قصة طريفة .. للناس الحلوين ..!! [الأرشيف]

أبو أماني

11-07-2009, 07:22 PM

//

//

//

//

//
زمان إنتشرت وظيفة مرموقة في الوسط الوظيفي تكسّب ذهب .. إسمها العرضحالجي .. وهو كاتب يجلس في مكتب صغير محمول في ساحات المحاكم ليكتب للأميين عرضحال يحوي تفاصيل شكواهم ليدخلوا به على قاضي المحكمة للبت في قضيتهم .. كلمة عرضحال كلمة مذدوجة من شقين تم دمجها بالعامية وهي أصلا .. عرض .. حال .. قصتنا عن جد لنا كان يشغل هذه الوظيفة المرموقة آنذاك .. وكان شغوفا بالعلم والمعرفة .. وكان يجالس علية المثقفين في الأمسيات وذات مساء سمع أحدهم يزج أثناء حديثه بكلمة ولا سيما .. فسأل عن المعنى وعرفه تماما .. ولفرط إعجابه بالكلمة الجديدة أصر أن يستخدمها في عمله .. ويزج بها ليستعرض مهاراته اللغوية ولما جاءت أول زبونة كتب لها العرضحال وتحايل حتى زج بالكلمة فيه وكانت المفرده عاجباهو شدييييد .. إذ ختم مقاله بقوله .. أعشم في عدالة محكمتكم حيث إنني إمرأة مسكينة ووحيدة .. لاسيما وزوجي متوفي من سنين .. وعندما سلمها العرضحال طالبها بملغ (25 قرش) أي طرادة في ذاك الزمن وكان قيمة العرضحال عشرة قروش فقط فصاحت المرأة محتجة ليه خمسة وعشرين قرش يا ود أمي أصلك كتبت لي شنو؟ فأشار لكلمة لاسيما في فخر وزهو وتباهي.. الكلمة دي (لاسيما) دي براها بخمسطاشر قرش.. فقالت المرأة مذهولة وشن طعمها الكلمة الغالية دي ؟؟ فقال لها وهو يمسح شاربه في خيلاء .. على اليمين القاضي يقرأ لاسيما دي عيلا يحكم ليك مغمض .. أصلو ما يتلفت جاي ولا جاي ..
فذهبت للقاضي مسرورة وضامنة الحكم لصالحها بفضل (لاسيما) .. وفعلا جاء الحكم في مصلحتها حيث طلع القاضي ما ناقش معنى كلمة لاسيما .. وأنا أقرأ عمود أخطاء كل يوم .. لاحظت تلاشي الأخطاء وظهور مفردات فصحي على شاكلة لاسيما .. والنطاس كبديل للطبيب .. وتذكرت واقعة لا سيما .. لماذا؟؟ بربي لست أدري .. ولكم .. خالص تحياتي .. goood goood goood

تحفة حوا

11-07-2009, 07:55 PM

هههههههههه

والله يا أبو أماني امبارح دي زوجي جاب سيرة العارضحالجي بي قصة كدا
وشرح لي معنى الوظيفة دي شنو :D
شفت تخاطر التوارد دا لاسيما وانت زول ظريف كدا ترسم على وجوهنا البسمة :D

المليجي

11-07-2009, 10:35 PM

يا صديقي
لاسيما وانت تكتب هذا البوست كنت متخيل نفسك عرضحالجي ومبسوط بالمفردات الجميله دي والله يا ابواماني من قريت اسم الوظيفه دي اتكيفت كدا لما عدلة جلستي وختيت الطاقيه بين حواجبي من الكييف ياخ العرضحالجيه ديل اكتر ناس فاهمه ومتفلسفه في السودان وونستم حلوة احلى حاجه تجي تقول مشكلتك وتسيبو هو بجيه ليك الخطاب براهو من غير تتفلسف ليهو قبال كدا جيت محكمة امدرمان القدام حوش الخليفه كنت موكل اني اطلق زوجة واحد من اقربائي (في داعي اسي للفضايح دي) :D
واطلع وثيقة الطلاق من المحكمه
شفت التوكيل دا كيف ;)
المهم قريبي دا كان مغترب وانا كنت يادوب في الجامعه وجيت المحكمه قالو لي اكتب طلبك وتعال مشيت للعرضحالجي وقال لي طلبك شنو قلت ليهو داير اطلق عاين فيني كدا قال لي متين كدا عرست وعايز تطلق قلت ليهو القسمه يا حاج قال لي احسن قول العرس غلبني :D:D
قلت ليهو انا زول موكل ساي يا حاج جاي انجز مهمه بس ماعندي شغله بيهم يطلقو يعرسو ماشغلتي
يا ابو اماني راجينك تاني تنكت لينا المهن المغبورة دي
كن كما اتمنى لك دوما بخير وراحة بال
مودتي..

الجيلى أحمد

12-07-2009, 12:47 AM

...

أبو أماني

12-07-2009, 10:03 AM

هههههههههه

والله يا أبو أماني امبارح دي زوجي جاب سيرة العارضحالجي بي قصة كدا
وشرح لي معنى الوظيفة دي شنو :D
شفت تخاطر التوارد دا لاسيما وانت زول ظريف كدا ترسم على وجوهنا البسمة :D

طبعا أجبرتيني أعترف أني مارستها وأنا في المرحلة الثانوية في إجازة المدرسة وصدقيني يا تحفة كانت قمة المتعة .. وتحس أنك المثقف الوحيد وسط الجماعة ديل .. لكين مادام أب عاج بتاعكم قال بيعرفها .. وأكيد بيكون من أبناء جيلنا .. لابد يكون عنده خبره عملية في المجال كدي أنتي أزنقيه .. شوفي كان ما إعترف ليك .. لاســــيما .. ونحن شباب الزمن داك كنا طموحين وما بنحب الإجازات وقعدت البيت .. لكي خالص تقديري وإعزازي
goood goood goood

سارة

12-07-2009, 10:06 AM

ابو أمانى لا سيما وانت المهم والناس كتير ما تهمنى

حيث أن كذلك أيضاgooodgoood

ضحكت وكم انا فى حوجة الى البكاء لاسيما والجو حار وحار جدا

أبو أماني

12-07-2009, 10:09 AM

أبو أماني

12-07-2009, 10:15 AM

...

عفوا سؤال .. هل كبرت خطوات يراعك على المقال .. إستاذي العزيز .. وعذرا إن لم أفهم المغزي .. عموما شكرا على المرور .. :confused:

أبو أماني

12-07-2009, 10:18 AM

سكون المقال القادم عن وظيفة .. كاتب السيرك .. وهو ليس سيركا للأكروبات .. هو دفتر كبير تدون فيه وقائع العمل اليومي.. أكرر أبقوا معنا ...
goood goood goood

عادل عسوم

12-07-2009, 10:48 AM

:D:D
حبيبنا
ذكرتني ايام الثانوي...
الجماعة يجيبوا لي الجوابات وعاوزين الردود!
-بالله ياعادل زولتي دي كتّابة وأنا مابقدر علي رد كلاما الكبار كبار دة :confused: بالله ظبط لي رد مدنكل كدة عشان أوديهو ليها
وأمسك ليك الجواب وأقراهو...
وطبعا هناك كم سؤال لازم أسألوا لي كل واحد:
1-أنتا زولتك دي بيضا والاّ خدرا؟
2-سمينة والاّ دار تموت بالضعفة؟
3-أهلا مروقين والاّ كُحّيتي؟
وطبعا السؤال الأخير دة بتترتب عليهو الكثير من الألفاظ والمعاني:p
وبعد كدة أقعد وما أخلي ليك جناس ولا طباق ولا محسنات بديعية ولامعاني قريبة وبعيدة ولا كلمات على شاكلة المزازيني بيها أبو ريم ديك وكدة :D
أها...مرة واحد صاحبي شبك مع واحدة كتّابة كتابة جد (ودي بالجد كانت أكتر واحدة ردودا بتتور نفسي) :confused:
المهم بعد فترة كدة صاحبي دا يوم جاني ليك وشو ينعل قفاهو :mad:
-يازول مالك من الصباح؟!
-ياخي أسكت بس:mad:
-شنو يا(...) ياخي ورينا الحاصل شنو؟!
-ياخي ماكللللو منك أنتا دا ...تقعد تجيب لينا كلماتك العجيبة دي لامن ودرتنا زاتو :mad:
-كدي قول بسم الله ووريني الحاصل؟!
-أمبارح زولتي بعد ما أتونسنا مسافة كدة قامت فجأة قبقبتني ليك وقالت لي أنا متأكدة مليون في المية أنك ماقاعد تكتب الردود البتصلني دي!:confused:
فقعدتا أتحلّف ليها واتمحرق ...قامت سألتني ليك وقالت:
-تقدر توريني معنى كلمة (اندياح) يعني شنو؟
-أها قلت ليها شنو؟
-أنا عارف؟:mad: المهم طربقت ليها كدة وفي النهاية وريتا انك القاعد تكتب الردود...
قامت راسا وألف سيف الاّ أعرّفا بيك
:p
:D:D

شبارقة

12-07-2009, 11:19 AM

...
قامت راسا وألف سيف الاّ أعرّفا بيك
:p
:D:D

دَلْ :D

شبارقة

12-07-2009, 11:32 AM

شفت تخاطر التوارد ا :D

تخاطر التوارد !!! :D

المصحح يقول : توارد الخواطر

عندنا واحد صاحبنا زمااان بيعكس أي جملة مكونة من كلمتين (طبعا ً من غير ما يقصد ومن غير ما ينتبه كمان :))... مثلا ً الصحة النفسية يقول ليك : النفس الصحية .... الغرفة التجارية يقول ليك التجارة الغرفية :D و توارد خواطر يقول ليك : تخاطر توارد :)

شبارقة

12-07-2009, 11:56 AM

.. لاســــيما .. ونحن شباب الزمن داك كنا طموحين وما بنحب الإجازات وقعدت البيت .. goood goood goood

... أنا غايتو كنت بشتغل مراسلة في الدوائر الحكومية (جيب شاي - جيب مويه - شيل الملف ده وجيب الملف داك) في إجازات المرحلة الإبتدائية والثانوي العام (ولنا مواقف مضحكة وأخرى محرجة مع مع تلك المهنة )... ولما دخلنا الثانوي إترقينا شوية (وترفعنا عن تلك الوظيفة :)) وبقينا نشتغل كتبة (نكتب الخطابات والمراسلات والتقارير...إلخ ..) .... وتلك الوظائف التي كنا نقوم بها ونحن طلبة أكسبتنا الكثير من المزايا منها الإعتماد على النفس والشجاعة الأدبية وحسن الأدب في التعامل مع الصغير والكبير ومع المدير والغفير ومع الموظفين والموظفات ... وآآآآآخ أنا من الموظفات وكيدهن :D

ملحوظة : هسه أولادنا هنا في الغربة (في إجازاتهم المدرسية) ما قاعدين يعملوا أي حاجة ولا عارفين أي حاجة :( (طلعوا كييت :mad:)

عادل عسوم

12-07-2009, 02:09 PM

دَلْ :D
غايتو يوم بتلدغ :mad:
:D

مرافي

12-07-2009, 05:42 PM

تحفة حوا

13-07-2009, 08:32 AM

مرافي يا غالية
والله انتي مرحب بيك في كل مكان وانا سبق ورحبتا بيك في القهوة
أبو أماني اعذريهو الكهربا قاعدا تقطع عندهم كتير ، كان الله في عونهم

شبارقة تخاطر توارد للهظار مش غلط املائي يعني والله مقصودة
انت بس خليك ورا الرسايلحالجي عادل عسوم :D
سؤال برئ يا شبارقة انت عرفت انو كلام عادل دل كيفن ؟ :D

قمر دورين

13-07-2009, 09:35 AM

أبو أماني أُسعدت صباحاً ومساءاً
شكراً جميلاً لك على نثر البسمة والفرح....:)

أبو أماني

13-07-2009, 10:37 AM

الاخ ابواماني

تحيات نضرات كنضارة مواضيعك الجميلة

والله عاااد انا زعلانة منك جنس زعل...ياكافي البلا جيتكم القهوة قلت سلااام زول عبرني مافي

ماقدر مقام القهوة ولا شنو ؟؟ولا القهوة بي (الابونيه) مأظن واحد (حينقش) الكلمة دي الا

المعتقين زازيت ليك بي عند القهوة ما عبرتني فاتح لي فتح ...طارق بن زياد ما فتحو!!!!!

حسع وحيث انه وبما انه.ايضاً كذلك...بل ولا سيما وحقيقة....

(وحقيقة دي بتاعتا لكيزان) البوست للحلوين فنحن مع الحلويييين ....ولا هنا برضو في

عزيييل؟؟؟؟

جميل المنى لك وسيير سييير يا.....

هووووووي النقوم جارية الكلام دخل الحوووووش

وتشااااااااااو

حاشا وكلا .. أبدا ما تعمدت اتجاهل طلة أجمل وردة من السور .. صدقيني يا مرافي ما علقت على مداخلتك بالقهوة لأي سبب من الأسباب وما مقصودة .. وأتمني إطلالتك البهية عبر المقهي اليومين ديل بنات جنسكم عاملات إنقلاب عديييييل .. ومحتكرين القهوة وناس شليل وأبو منو ومنو ديل معاهم ناس معتصم وبوكو وقيقا وشليل .. يزازو بي بره وكل واحد يدفر أخوه يقوم التاني يتعتع .. ويرجع لوراء .. ويصرخ بتدفر مالك ياخ .. وحقيقي لما اتاوق القي ليك في حوش القهوة قاعدات ناس شنكبة عنكبة .. شئ مجروس شئ بلدوزر .. شي راجمة صواريخ أبلع ريقي بصعوبة وأقول في سري .. والله أم أماني بحجم (هالك هوغان) حقها ده .. رحمة
أسكتي يا مرافي يابت أمي.. أرق واحدة فيهن .. سرورة .. لكن كان جيتي للقوه .. وحاة نظري أم شبتو عديل .. تلمها فوق الفريسة كان ما حمار الوادي (هنق) ما تفكو تقولي لي شنو تقولي لي منو؟ أسع دي أنا والله خائف على صاحبي عدولة شايفو هارش منها كان قالت بغم ساكت عدولة يقول ليها .. نعم !!.

بخصوص زعلك .. ما عاش اللي يزعلك يا ست الذوق والشعور .. وهاتي رأسك أبوسها مع مع تمنياتي بعدم إزعاج (ساكنيه)!!!. ما تحمري لي والله ما قاصد اللي فهمتيه أتي..
gooodgoood وتشاو gooodgoood

طارق صديق كانديك

13-07-2009, 10:41 AM

أبو أماني

13-07-2009, 10:46 AM

أبو أماني أُسعدت صباحاً ومساءاً
شكراً جميلاً لك على نثر البسمة والفرح....:)

والله يا قمر دورين .. بقيتي بجد زي قمر أربعطاشر .. ما تظهري إلا كل إسبوعين.. الحكاية شن نفرها يا بت القبائل .. يعني قائلة روحك ما بتفرقي علينا ولاشنو ؟ والله فارقه علينا فرقة شديدة بلحيل خصوصا في قهوة النشاط .. عليك الله تبطلي بخل .. وما تحرمينا من مداخلاتك الظريفة .. لكي كل التقدير والإعزاز .. gooodتشاووووووgoood

عادل عسوم

13-07-2009, 10:58 AM

همس الشوق

13-07-2009, 12:41 PM

لا سيما وانت العرضحالكي
وانا من الحلوين :D

جيئتك اعرض حالي اليك

علني وعسى ..........

وإنفجرت شهرزاد بالصياح المباااااااااااح

أبو أماني ياخ مشتاقين عديييييييييل كدا goood

أبو أماني

13-07-2009, 03:45 PM

لا سيما وأننا من بين الذين نحبك سااااي كده .. في الله .... !!

تقدمت بطلب شطب بلاغ جنائي في محكمة الأبيض الثانية وذكرت فيما ذكرت ... أنه (( ولما كانت قضية الإتهام بنيت على سيقانٍ من الكتان لا تقوى على حمل صحيفة الإتهام في مواجهة موكلي .. )) .. !!

رمقني مولانا بنظرة مبتسمة وهو يتلو الحكم بقبول الطلب وشطب الإتهام ... قائلا .. (( بيني وبينك سيقان من الكتان دي حلوة يا استاذ )) فضحكنا وضحك الحضور .. !!

شكرا يا جميل

تحياتي

بيني وبينك تخنتها شوية على مولانا .. يعني هو حمل كلمات كبيرة قدر ده؟.. أثق في وجود طرائف كتييييره في مهنة المحاماة .. أرجو أن تساعدني بما لديك لأني مفكر أدوور البوستر ده ويكون في مجال طرف مهنية ونمر على معظم المهن .. إيدك معانا يا أب شنبا روووب .. على فركة .. قصدي فكرة .. بالمناسبة دي أخبار روب..س شنو؟ مالها غاتسة ؟؟

نسيت أعذرني .. فما أسعدني بطلتك البتشرح الروح .. كيفك وكيف عيالك والأسرة الكريمة إنشاء الله بخير تحيات بن أختك الرائع الفاروق .. يا أخي والله ليك وحشة برغم أني ما لاقيتك لحدي اسع .. امنيتي لقائك وكل فرد من سودانيات .. اليوم داك بضبح ليكم عديل كده .. هيييع أنا أبوك .. يا أماني .. تشاووووووو goood

مرافي

13-07-2009, 06:10 PM

[QUOTE=تحفة حوا;154140]مرافي يا غالية
والله انتي مرحب بيك في كل مكان وانا سبق ورحبتا بيك في القهوة
أبو أماني اعذريهو الكهربا قاعدا تقطع عندهم كتير ، كان الله في عونهم

[size=5][color=#FF1493]الغالية ست الذوق تحفة حوا

كتر خيرك كتير ياظريفة فعلاً والله ما قصرتي معاي في القهوة..لكن ونسة مسيخة سااااي

دخلت القهوة لكن عاد بري ما ضقتها ....

لكي جميل الحب.......

مرافي

13-07-2009, 06:30 PM

حاشا وكلا .. أبدا ما تعمدت اتجاهل طلة أجمل وردة من السور .. صدقيني يا مرافي ما علقت على مداخلتك بالقهوة لأي سبب من الأسباب وما مقصودة .. وأتمني إطلالتك البهية عبر المقهي اليومين ديل بنات جنسكم عاملات إنقلاب عديييييل .. ومحتكرين القهوة وناس شليل وأبو منو ومنو ديل معاهم ناس معتصم وبوكو وقيقا وشليل .. يزازو بي بره وكل واحد يدفر أخوه يقوم التاني يتعتع .. ويرجع لوراء .. ويصرخ بتدفر مالك ياخ .. وحقيقي لما اتاوق القي ليك في حوش القهوة قاعدات ناس شنكبة عنكبة .. شئ مجروس شئ بلدوزر .. شي راجمة صواريخ أبلع ريقي بصعوبة وأقول في سري .. والله أم أماني بحجم (هالك هوغان) حقها ده .. رحمة
أسكتي يا مرافي يابت أمي.. أرق واحدة فيهن .. سرورة .. لكن كان جيتي للقوه .. وحاة نظري أم شبتو عديل .. تلمها فوق الفريسة كان ما حمار الوادي (هنق) ما تفكو تقولي لي شنو تقولي لي منو؟ أسع دي أنا والله خائف على صاحبي عدولة شايفو هارش منها كان قالت بغم ساكت عدولة يقول ليها .. نعم !!.

بخصوص زعلك .. ما عاش اللي يزعلك يا ست الذوق والشعور .. وهاتي رأسك أبوسها مع مع تمنياتي بعدم إزعاج (ساكنيه)!!!. ما تحمري لي والله ما قاصد اللي فهمتيه أتي..
gooodgoood وتشاو gooodgoood

الغالي ابو اماني
إحم ...إحم يادوب كده الواحد يتمغا ويستعدل...
بناتنا صلاة النبي عليهن عاجباتني في هرشن ليكم ...ده الشغل...وعدولة ده ماتخاف عليهو ده من الرعايا بتاعني عندو حصانة...مافي واحد بيقرب عليهو...
والله انا من المنادين بالريق الحلو يعني ح نستعمل معاكم الكلام البيكسر دااااك ..
صواريخ ارض جو لكن بإبتسامة حلوة كده.... هرشة قوية متبوعة بنظرة حانية....
هوووي سجمي كشفت الخطة!!!!!!
معليش يارفيقات ما مشكلة...نغير الاستراتيجية
ونتلاقى بعد الرجال ينومو اتفقنا....
آآخر كلام
مالك ومال الساكنين في راسي نايمين نوم العافية اهو نحل ليهم أزمة السكن ونديهم سكن مجاني: مش في كل كبد رطبة أجر....:D:D:D

ليك احلي واغلى الاماني يا ابواماني

أبو أماني

13-07-2009, 07:01 PM

لا سيما وانت العرضحالكي
وانا من الحلوين :D

جيئتك اعرض حالي اليك

علني وعسى ..........

وإنفجرت شهرزاد بالصياح المباااااااااااح

أبو أماني ياخ مشتاقين عديييييييييل كدا goood

الحقيني يا همس والله وقعت لي في جنس ورطة .. يحلني منها الحل بلا.. إتي بلا ..ده الحلاو منو؟ .. تصوري مرافي دخلت على بصورة ودودة ناعمة .. وأنا سلمت ليها .. قايلها بتجي تكون معانا .. أنقـري بعد كسرت لي قريناتي .. ما ورتني المكشن بلا بصل؟! خوفتني بكلامها المعصول ده وسنة ناعمة وريق حلو لمن تلحقنا أمات طه .. على اليمين الكلام الفوق ده خلاني شعرة جلدي قامت .. وقلت يا أخواني تراهو صاحبي عدولة ده متحمل نصائب .. والله ياعدولة مرافي دي تعادل ستة أمال و12 سارة .. غايتو أنا بكسح .. إت يابا أرجى الراجيك .. كان همس ما اتدخلت أنا بجيك في (الآي سي يو) همس عليك الله خلى بالك من الجنا ده .. في رقبتك .. أنا ماشي لناس سارة أجيب لي حبات بع .. بع.. ر .. باقي اليومين ديل أم أماني مركبة لي وش ككو .. شوقنا لطلتك أضعاف .. الرسول ما تقطعي.. gooodوتشااااوووووو goood

الزوول

13-07-2009, 07:48 PM

السلام عليكم
...
أبو أماني كيفك
طبعاً العرضحالجي كان في وقتها بمثابة السكرتير الآن
وكان يجب بالأضافة لتمكنه من معرفة خبايا القضايا والمداخل لمخاطبة القاضي
فإيضاً كان لا بد له أن يتميز بالإسلوب المنمق والبلاغة اللغوية.
ومما يحكي عن بلاغتهم وحسن تعبيرهم القصة المعروفة المشهورة التي تحكي عن الزول المشى للعرضحالجي يكتب ليهو تظلم عشان أخوانو أكلوه في الميراث
لما العرضحالجي انتهى من صياغة العريضة
قالو اقراها
فلما قراها ..الزول انفقع بالبكاء
يا زول مالك
قال ليهو : والله ما كنت قايل نفسي مظلوم قدر ده

....
تحياتي

أبو أماني

14-07-2009, 06:29 PM

gooodكاتب السرك ..!!goood

الشكر موصول لكل المشاركين أعلاه بدون فرز .. وتقديرا لتقديركم لنا نواصل المشوار ونحكي ليكم طرفة في وظيفة قديمة وجديدة بصورة مختلفه .. إسمها :-
* * * * * * *
كــاتـب الســـــرك !!
* * * * * * *
كان جدو محمود رحمه الله .. شابا في ذاك الوقت وحكمت عليه الأقدار أن يصير جدنا بحكم كونه خال الوالدة رحمها الله رغم أن يصغرها بعدة سنوات .. كان محبوبا لدينا جدن نحن معشر أطفال ذاك الزمن الجميل .. فهو يلاعبنا يلاطفنا في كل وقت ويحضر لنا دوما كيسا يذخر بكل ما يشتيه طفل ذلك الزمن .. كالدوم والقونقوليز والنبق واللالوب والفول والتسالي وكانت أجمل لحظات تمر بعمرنا عندما يكون جدو محمود موجود ونسمع ذاك الصوت العذب المنطلق من بوق صاحب عربة الدندرمة.. (طوووووووط طوط طوطوطوطوووووط) كان جدو يخسر في ذلك اليوم ما يقارب الريال (أب عشرة) لذا كان الشخص الوحيد الذي كنا نعرف طرقه على باب الحوش .. فنهرع جميعا ونتسابق لنفتح له الباب ونتعلق في رقبته وكتفه وظهره .. وكان يتحامل على نفسه ويحملنا جميعا ويتمايل ماشيا بصعوبة نحو المجلس حيث تقف الوالدة ويزجرها بلطف عندما تنهرنا بشدة .. ويقول لها .. خليهم .. ديل ما دفعتي يا فاطنة يا أختي!.

كان متواضعا في كل شئ .. حتى وظيفته التي يشغلها فقد كان يعمل تربالا في ساقية أبيه الذي هو جدنا الأكبر .. والتي كانت تقبع في أحضان شاطي النيل ببري الشريف .. قيد بضعة أمتار من منازلنا .. غير أنه كان يمتاز بميله للعلم والتعلم .. يريد أن يعرف كل شئ يمر به وكان كثير السؤال ولا يتحرج من إظهار جهله .. وذلك برغم (أميته) التي كانت سابقا تعادل 60 فولت سعى لتخفيضها لست سبع فولتات .. عقب التحاقه بفصول (نحو!! الأمية) كما كانت تقول جدتي رحمها الله والتي كانت آنذاك فايناليست بالفصل الرابع بمحو الأمية .. تخرجت بمرتبة الشرف من الدرجة الأولي.. كذلك كان يحمل ذهنا متوقدا وذاكرة فوتغرافيه وكان يعشق اللغة الإنجليزية .. ما يسمع كلمة بالإنجليزي إلا ويطارد من قالها بالحاح حتى يحفظها ويعرف معناها وكان جدو محمود يتكلم باللغة الإنجليزية فيشبعها نكالا ومرمطة كان بيعمل فيها العجب على طريقة ال spare parts English أي على شاكلة الترابلة الذين يقفون في الأسواق يسخرّون حميرهم ودوابهم لنقل الخواجات ويخاطبون الخواجة بقولهم .. ( هي .. خواجه دونكي مي .. رايد يو .. خرتوم بالاس بياستر توو؟؟) أو هيي خواجة (ميي ماي دونكي رايد يو .. تو ذا نييير إستيشن؟).

كان مدير الثكنات حيث المخازن والمهمات العسكرية معجبا بشخصيته جدا فأرسل في أثره .. وذهب جدو محمود وهو يحوقل ويتبسمل ويطنطن تحت تحت .. يا ربي النصيبة ده بدور مني شنو؟ ذهب إليه ممتطيا حماره الديلوكس لابسا السروال ابو تكة الطويل والعراقي .. وقضى ذهاء اليوم لديهم ولم يعود إلينا إلا عقب آذان المغرب راكبا حماره ولكننا تعرفنا عليه بصعوبة بالغة حيث خلع السروال والعراقي هناك ولبس الميري .. رداء شورط وقميص أفرنجي وبوت جلد قدر الهجمة .. ويحمل شنطة جلدية بها باقي الغيارات والمهام .. وأهم ملحقاته كان كيس تعودنا على رؤيته عند عودة جدو محمود .. زغردت الوالدة وإتلم الجيران عندما زف إلينا خبر الحكيمدار العين جدو محمود (كاتب سرك) وتشاغلنا نحن بالتنازع على محتويات الكيس حقنا والتي كانت تدير رؤوسنا آنذاك .. وكان يحوي .. كمية من الدوم كبديل شرعي للتفاح.. والنبق كبديل للعنب .. واللالوب الذي لم أجد له بديلا حتى يومنا هذا ..وفرح الجميع ليلتها وأذكر أني نمت تلكم الليلة مبتسما حتى الصباح .. وتحت مسقط رأسي (مخدتي) بقية مقتنياتي من الثورة المذكورة آنفا.

كانت الوظيفة أشبه بليلة القدر بالنسبة لجدو محمود حيث قلبت حياته رأسا على عقب للأحسن طبعا .. فقد تحول فجاءة من السروال والعراقي الطويل .. والجلوس في ضل الحيط والشدر وجمب الدكان إلى الملابس الإفرنجية والإشتراك في نادي بري الثقافي مع كبار الموظفين وأختفى الحمار من حياة جدو لتحل محله عجلة رالي أبو لستك (دبل جنت) وكان لها جرسا لايشبه جرس المدرسة فقد كان صوته حنينا وشجيا لا مهابا كذاك.. وحتى حقة التمباك الكريهة ديك إختفت ليحل محلها صندوق سجائر أبو نخلة إنعكست النعمة على جدو وحتي كيسنا تحول من اللغاويس أعلاه ..إلي بسكويت وحلاوة..طيحينية وشعر البنات وتمتعنا ردحا من الزمن بالشعور باننا من أولاد الخرتوم إتنين!

كان الروتين العملي لجدو محمود بالثكنات ككاتب سرك .. أن يجلس في مكتب صغير أمام الباب الرئيسي يسجل كل شاردة وواردة .. وبجانبه دفتر الحضور يوقع أمامه كل العاملين .. وكانت المفردات الإنجليزية المستخدمة دوما لا تتجاوز في عددها الخمسة أو الست حفظها جدو عن ظهر قلب .. منها .. آبسنت .. سيك ريبورت .. لييت .. ولييف .. وسارت الحياة مع جدو ورئيسه الخواجة مسرى السكين في الذبدة .. إلي أن حل ذاك اليوم وحضر كل العاملين ووقعوا ودخلوا لعملهم .. عدى العامل تية كوكو الذي عقب دخوله وتوقيعه .. لدغته عقرب داخل المخزن وحملوه إلي (الإسبتالية - بعربية الخواجة التاني) وأسقط في يد جدو محمود .. ماذا يقول للخواجة عندما يروي له هذه الحادثة بحذافيرها؟! وقد إنصبت مشكلة جدو في كلمة عقرب بالإنجليزي .. المسكين حام البركس على رجل كلب .. يا أخوانا عقرب بالإنجليزي شنو؟ دون جدوي وعندما أزف وقت حضور الخواجة لمراجعة الكشف كان جدو قد حفظ السنياريو الذي أعده ولم يبقى ليه سوي كلمة عقرب .. فتوكل على الحي الدايم وطلب من رمضان الفراش كباية شاي .. وشهر قلمه بعد أن مرره على لسانه ..ورسم ليكم عقرب (تشهيك في قرصتها)! وكان الضنب حقها شاهقا يشق عنان السماء .. التقول إيريال عربية!.. وطبق الورقة بعناية وحرص كمن يخاف من لسعتها .. ولما جاء الخواجة فتح ليو الدفتر .. ومرر بالقلم على كل الأسماء .. ووقف عند تيه كوكو وعندها قال للخواجة بإنجليزية سليمة! شوف يا خواجة .. توداي تية كم.. ساين .. أند قو تو ويرك .. (بعدين ياخواجة)! وعبث بيده داخل الجيب بسرعة وأخرج الورقة وفردها أمام الخواجة قائلا يو سي زيس ؟؟ نظر وتراجع الخواجة خطوة للوراء وإنفنس للوراء قليلا وهو يأخذ رشفة من غليونه مسرورا ومنشرحا عندما شاهد روعة الرسم وصاح مبتسما وهو يقول يا ..يا .. يس إسكوربيون! وجدو محمود ما صدق أنه الخواجة فهم وكان لازم يتم باقي الشرح (بانتومايم) فشهر قلم الرصاص المسنون ودبز ليكم الخواجة في إيده بلا شفقة .. وأردف قائلا بس لايك زيس طق إن هيز فينقر!.. لم يشعر الخواجة بألم الوخزة وهو يقهقه ضاحكا ناثرا دخان الغليون الكثيف مقحقحا بوقاحة بدو الخواجات .. مربتا بيده على كتف جدو في سرور .. ومن طرأئف الأمور أن ينال جدو على ذلك الموقف علاوة في الراتب ..
شكرا لكم فقد أنعشتم ذاكرتي بلحظات جميلة لا تنسى عشتها يوما .. أواه لو تعود يا الحبيب!

أبو أماني

15-07-2009, 06:24 PM

وهي وظيفة إندثرت ولن تخطر على بال واحد فيكم .. وهي وظيفة ال .. ال.. ال.. هيا حتيقي ما تقلقوش .. ال .. ال.. ((تموه خيال)) .. عذرا حتى نلتقي قريبا ولكم حب بالدفار ... goood

همس الشوق

16-07-2009, 07:52 AM

الحقيني يا همس والله وقعت لي في جنس ورطة .. يحلني منها الحل بلا.. إتي بلا ..ده الحلاو منو؟ .. تصوري مرافي دخلت على بصورة ودودة ناعمة .. وأنا سلمت ليها .. قايلها بتجي تكون معانا .. أنقـري بعد كسرت لي قريناتي .. ما ورتني المكشن بلا بصل؟! خوفتني بكلامها المعصول ده وسنة ناعمة وريق حلو لمن تلحقنا أمات طه .. على اليمين الكلام الفوق ده خلاني شعرة جلدي قامت .. وقلت يا أخواني تراهو صاحبي عدولة ده متحمل نصائب .. والله ياعدولة مرافي دي تعادل ستة أمال و12 سارة .. غايتو أنا بكسح .. إت يابا أرجى الراجيك .. كان همس ما اتدخلت أنا بجيك في (الآي سي يو) همس عليك الله خلى بالك من الجنا ده .. في رقبتك .. أنا ماشي لناس سارة أجيب لي حبات بع .. بع.. ر .. باقي اليومين ديل أم أماني مركبة لي وش ككو .. شوقنا لطلتك أضعاف .. الرسول ما تقطعي.. gooodوتشااااوووووو goood

هههههههههههههههههه
إنت ما عارف أن كيدهن عظيم ولا شنو ... والله مرافئ دي رئيسة عصابة عديييييل أعملوا حسابكم يا ناس .... إنت قايلني انا جبتها هنا لي شنو... بشتنه ورقاد واطه ... ولسه يا ما في الجراب يا حاوي ... بس انت يا أبو اماني في الأمن ما عندك مشكلة بدخل ليك واسطة .. وعادل دا عرف الموضوع من اولو وهدا اللعب معاها وهم هسه سمن على عسل .. الدور والباقي على الباشمهندس الطردو من القهوة وجابو ليهو بعاتيه قال شنو ... محاسبة جديده والله انا خفته عديل ومرقته من القهوة جري زي الساكيني بوليس النظام العام في المظاهرات .... goood .. غايتو انا قلته ليها ياخ حرام عليك عمو معتصم دا زول عيان وكدا وجائ القهوة يفرق شوية .. بالله العظيم حدرت لي جنس حدره اخير منها ( أم كف )

طارق صديق كانديك

16-07-2009, 09:56 AM

كثيرة هي المواقف الطريفة في أروقة المحاكم رغماً عما تحتويه من فجيعة لبعض أطراف الدعاوى المختلفة لكنها لا تخلو من طرفة رغم ذاك ... ( نفك عن روحنا شوية ) !!

***

أنا (...........) قاضي المحكمة العامة (.......) حكمت عليك يا (فلان الفلاني ) بالإعدام شنقاً حتى الموت!!(

المتهم متشاغلاً وكأن الأمر لا يعنيه !! في الوقت الذي توقع منه القاضي أن تبدو عليه بعض مشاعر رد الفعل على الحكم .. !
القاض مكرراً أنا (...........) قاضي المحكمة العامة (.......) حكمت عليك يا (فلان الفلاني ) بالإعدام شنقاً حتى الموت!!
مازال المتهم دون رد فعل وكأن الأمر لا يعينيه!!!

للمرة الثالثة ينطق القاض بالحكم أنا (...........) قاضي المحكمة العامة (.......) حكمت عليك يا (فلان الفلاني ) بالإعدام شنقاً حتى الموت!!

المتهم : ما خلاص سمعنا آآب راساً ماكن عندك حاجة تانية ؟؟؟؟؟؟

طارق صديق كانديك

16-07-2009, 09:58 AM

أستاذنا الفاضل ( .....) أطال الله عمره كان قد عمل قاضياً في بداية حياته المهنية ثم بعد سنين عدداً ترك القضائية وتوجه تلقاء مدين ... !!

ولسؤ حظه أول قضية جنائية يترافع فيها كانت قضية حشيش ! وحينما اكتملت هئية المحكمة في إحدى الجلسات ، جاء المتهم والشهود والحضور والمحامون ووضعت المعروضات أمام قفص المتهمين(عبارة عن عدد إثنين جوال حشيش ) وحينما كان استاذنا يتحدث ويتحرك بالقرب من المعروضات تصادف أن وكز الحشيش بيده دون قصد فوقع ( قندول قندولين كدا من الجوال ) بين يدي المتهم !!! فجفل المتهم وابتعد عن الحشيش بشكل لا إرادي !!! وهنا بادره محاميه بقوله : ـ

( أرفعوا مالوا جديد عليك ) فضجت المحكمة ضحكاً!!!

المليجي

16-07-2009, 10:17 AM

للمرة الثالثة ينطق القاض بالحكم أنا (...........) قاضي المحكمة العامة (.......) حكمت عليك يا (فلان الفلاني ) بالإعدام شنقاً حتى الموت!!

المتهم : ما خلاص سمعنا آآب راساً ماكن عندك حاجة تانية ؟؟؟؟؟؟
:D:D:D
عندو شنو عشان يشيل همو والله ليهو حق يتجاهل
لاكين عاوزك تعرف حاجه يا طارق
اني قاعد اضحك واتخجا من الضحك في الكلمه دي بس :D:D

المليجي

16-07-2009, 10:21 AM

المتهم : ما خلاص سمعنا آآب راساً ماكن عندك حاجة تانية ؟؟؟؟؟؟

هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه

أبو أماني

23-07-2009, 03:30 PM

من المهن التي إندثرت أيضا وظيفة مفتش التذاكر بالباص أو الترماج أو القطر .. وكان الكمساري يقوم بجولته العادية في كل رحلة لجمع الفلوس من الركاب وكان يلبس بذة رسمية ويحمل على كتفه شنطة لحفظ التذاكر والنقود فيها .. وبعد تكملة جولته بحوالى عشرة دقائق يأتي المفتش لمراجعة التذاكر .. كان الكمساري رشيق المظهر ومهندم ويبتسم في وجه الراكب في أدب جم .. مش زي الكماسرة اليومين ديل يطيروا رحمن القلب بمنظرهم المزري المشلهت وأسلوبهم الجاف .. حتى في الموقف .. ينادي على الركاب بسبهللية وإسفاف .. شيريق شيريق شيريق .. وهذه الكلمة الغريبة معناها .. الصحافة شرق .. أو اللفة .. اللفة .. علينا جاي .. وكاني به فارش طماطم .. ومع كل لفة تطلع من فمه (أو ما يفترض فيه أن يكون فما) يأتيك رزاز معطون بعطر التمباك ولا كان شال منك الفلوس وصهين من الباقي وتقعد تشحد فيو يرجع باقيك .. وهو يطنطن .. ماعندي فكة يا حاج .. وإنت في سرك .. تحج في جمل اعور وكتين ماعندك فكة جاي تسوي شنو؟ ولكنك لا تجرؤ على قولها لاسباب تانية حامياك!!!

كانت الحقبة في منتصف الستينات أحبائي (ضنيتو ناس بوكو وود الطاهر الزمن داك يكونوا من فطاحلة المثقفين والأفندية الذين يشار إليهم بالبنان) .. كانت الوزارة تضطلع بأعبائها تماما نحو المواطن وتوفر له المواصلات لشتى بقاع المليون ميل مربع (آنذاك!).. وكانت ترصد أسطولا مهولا من المركبات العامة .. والقطارات وحتى الترام ..او الترماج كما صار عندنا مع وجود ورش حكومية رسمية لصيانة ومعالجة أعطالها .. وكان المفتش والكمساري موظفا حكومة عدييييل كده .. يتقاضون رواتب محترمة بمفهوم ذاك العصر وعندما يستلم الكمساري الفلوس يسلمك تذكرة معتمدة من الوزارة ولو ما عنده فكه يكتب لك الباقي على ظهرها .. فتستلمه في أي وقت وفي أي محطة .. يأتي بعده المفتش ليراجع عمل الكمساري فيقص التذاكر بطريقة يعرف منها إن الرقابة لصيقة لمقدرات هذا الوطن والمواطن.

توجد طرائف كثيرة مرتبطة بهذه المهنة أذكر منها بعض ما أستحضره .. وعلى الزملاء الأعزاء المساهمة بما لديهم لو تيسر ..

* كان مفتش القطار يمارس جولته العادية متفقدا الكبائن والدرجات ويراجع التذاكر وكان يصاحب جولته هذه عادة شرطي بالزي الرسمي يحمل بندقية وباقي مستلزماته كشرطي تحسبا لأي طارئ .. وفي إجدي الدرجات توقف عند حاجة رباطابية لم تقص التذكرة .. فطالبها بثمنها وكان الثمن 35 قرش ..فأعطته جنيه (أخدر!) ولما لم يكن لديه فكة كتب لها على ظهر التذكرة باقيها ووقع .. وهم بالرحيل .. فصاحت فيه الحاجة بجزع .. أقيف آ أعشاي ماشي بالباقي الليلي وين ؟ فقال لها باسما بمشي وأجيك يا حاجة كتبت ليك الباقي في التذكرة بجي أسع .. فما تمالكت الحاجة أعصابها .. وقمزت على المفتش وطبقتو من زمارة رقبتو وقالت ليو متيمنة ما بتمرق من هني لو ما سلمتني طرف الباقي حقي .. فضحك العسكري وبعده المفتش وقال لها برقة شنو يا حاجة ما بتثقي فوقي ؟؟ فصاحت فيه .. أثق فيك إت والحكومة المشغلاك ما واثقة فيك؟ فأستغرب وقال ليها كيفن يا حاجة ما واثقة فيني ؟ فقالت له بكل قناعة دحين يا العوقة .. كان واثقين فوقك كان تبعوك العسكري ده؟ فضحك المفتش من أعماقه ورهن العسكري شخصيا لديها إلى أن رجع لها بالباقي .. 65 قرش صاغ ..

كنت أود الإسترسال ولكن جاءني إستدعاء عاجل من القيادة العامة أو الحيكومة الصغرى كما يحلو للحبيب بوكو أن يسميها .. قزقزوا بي دي ولنا عودة في ذات الموضوع .. تشـاوووو gooodgooodgoood

أبو أماني

27-07-2009, 04:01 PM

مما سبق : -
كنت أود الإسترسال ولكن جاءني إستدعاء عاجل من القيادة العامة أو الحيكومة الصغرى كما يحلو للحبيب بوكو أن يسميها .. قزقزوا بي دي ولنا عودة في ذات الموضوع .. تشـاوووو
* * *
المفارقة الثانية :-
كان والدي وعمي رحمهما الله يعملان بالسعودية .. وكانا في إجازة سنوية .. وكان لازم يعملوا برأة ذمة ضريبية .. وذهبا معا لمصلحة ضرائب (المغتربين) الوالد موظف قد الدنيا يعمل في شركة (أرامكو) وهو خريج كلية غردون التذكارية القديمة .. والعم يعمل سائقا .. فهو على قدر حاله خريج .. خلوة ود أم بلي .. ببري الدرائسة .. وفي المساء إجتمعا بمنزلنا .. وكان الوالد محبط ومغيوظ وحانق على الحكومة .. وصاري وشو صرة أب خمسة في طرف توب حبوبة .. أما العم فجاء متهلل الأسارير .. ودار النقاش التالي ..
العم : أها يا محجوب يا أخوي .. عملت شنو؟ مع جماعتك ديل ؟ ودفعوك كم؟ ..
الوالد: أدفع شنو يدفعهم الخراب اللي يخمهم .. البت المفعوصة دي بتاعة الجمارك تقول لي عاوزين منك 4000 دولار ؟ لــــيه ؟؟ هي قايلاني أنا شغال ولي عهد هناك؟
يضحك عمي رحمه الله في شبه شماتة .. هي لاكين يا محجوب يا أخوي إت ما بتستاهل كان مشيت ليها بالبدلة الكاملة والكدوس والنظارات البيرسول .. يعني عاوزها تقول ليك شنو؟
تنبه الوالد لكلام شقيقه الأصغر ولفرط إهتمامه قام من رقدته .. وجلس وهو يسأل شقيقه بإهتمام الوالد: عليك الله يا عثمان دفعوك كم؟ فقال له عثمان : والله أربعة سنة دفعوني 200 دولار بس .. فحدح الوالد العم بنظرة فاحصة تململ لها عمي وهو يبادله النظرات بتوجس .. محجوب مالك بتعاين لي كدي في شنو؟ ,, إختمرت الفكرة في رأس الوالد وهو يطيل النظر لأخيه الذي كان ينتعل شبط أكل عليه الدهر ولم يشرب .. وجلابية .. صفراء اللون كانت بيضاء ذات يوم وعمة بدون طاقية يلفها عمي ببراعة شخص مصاب بحجر في نافوخه .. ومتأبطا مظروفا فيه البظابورطي .. وأوراق الحمي الصفراء وبعض الإيصالات .. تهللت أسارير والدي عندما تذكر أن الوظيفة بجواز السفر كانت (مفتش) فقد كان قبل سفره للسعودية يعمل مفتشا بلجنة جرد ومراجعة مخازن الدولة .. وأختمرت الفكرة في راس الوالد تماما فهب من جلسته وأوقف أخيه وقبله واحتضنه وقدم له مبلغ خمسون جنيها وقال ليو .. بكرة الصباح عاوزك تقلع هدومك دي كلها (عدى الداخلية طبعا) الجلابية والشال والعمة والشبشب وأهم شئ المظروف حقك المهترئ ده تجيبهم لي صرة في خيط .. فكان لوقع الخمسين فعل السحر في عمي الي قال له أغسلهم وأجيبهم ليك؟ فصرخ الوالد تغسلهم شنو يا بني آدم جيبهم بوسخهم ده .. ما عليك .. وفي اليوم التالي إكتملت فصول المؤامرة عندما جاء الوالد بزي شقيقه وغير مشيته الواثقة تلك .. وطلب مني أن أقود سيارته وأوقفها بعيدا من مرمى الضرائب .. وأنتظر بها .. خرج الوالد من السيارة .. ودخل ردهات مكتب ضرائب المغتربين وقابلته بالكوليدور ضابطة ضرائب مغتربين فقال لها وهو متأبطا الظرف كمن يكتنز ثروة يخشى عليها من الضياع .. يا بتي عليك الله مكتب مدير الجمارك بي وين؟ فنظرت إليه بعطف وقالت .. قصدك الضرائب؟ فقال ليها أي .. مو كلو واحد؟ فقالت له أااي ياعمي وصلت .. وأخذته لمكتبها وأجلسته على المقعد وتناولت المظروف وبعد مراجعته سألته بجدية .. إت يا عمي الحاج في السعودية شغال شنو بالظبط ؟ فرد عليها بقوله شغال لي في مخزن الليل إسبيرات .. يقولوا لي جيب ده وودي ده .. وبنضف الإسبيرات وارصها في الرفوف .. فنظرت في الجواز وقالت ليو .. لكين ياعمي في جواز السفر مكتوب الوظيفة .. مفتش .. ! فضحك مليئا وقال ليها آآي يا بتي .. إتي ما عارفة الحقيقة زماااان قبل يلدوك كان في حاجة بقولوا ليها الترماج وعمك كان شغال كمساري .. تبع وزارة المواصلات ولما رقوني من كمساري عملوني مفتش تذاكر .. أها وكتين الوليدات طلعوا لي البظابورطي كتبوا مفتش .. ومن ديك وعيييك ليوم الليلة .. فقالت ليو بس الناس ديل خاصمين منك الضريبة الفاتت على أساس إنك موظف .. فقال لها بخبث .. عاد يا بتي الحيكومة كان قالت شئ في زول بيقدر يناضمها ؟؟ فضحكت وقالت ليو .. ولا يهمك يا ابوي .. أنا بطلع ليك حقك من الحكومة وعملت تضريباتها يجي نص ساعة .. خلالها لهط الوالد رحمه الله كباية الليمون الجابتها ليو الضابطة .. وطلع طالب الحكومة ضرائب السنة الجاية كمان .. وحصل على إبراء ذمة حتى شهر ديسمبر من العام التالي .. وجاني راجع بنشاط شاب في العقد الثاني من العمر وهو يدندن قبل ركوب السيارة وكانت الإغنية التي يترنم بها ...
البعده .. بيجنن
القربه .. بيحنن
الهيين وليين ..
وديع وحنيين
شغل بالي ..
وكانت مسرحيته تلك .. هي سهرة أسرية ضاحكة بعد وجبة سمك وقمبرى كاااااربة تستاهل .. قداديمكم الشينات ديل ... ولنا لقاء آخر مع وظيفة آخرى .. ومواقف أطرف ...تشاووو

تحفة حوا

30-07-2009, 07:52 PM

شواكيش حسب التخصصات الجامعية :

كلية طب الاسنان :
لمن يحصل تسوس بالشكل ده في حياتنا لازم نقلع اسباب التسوس من جذوره .
التخدير الموضعي لالامنا مابحل المشكلة ومحاولة التقويم فشلت معاكي للاسف ودايما بتركبي لي ضرس ما ضرسك عشان كده الجسر امتد وزاد بيناتنا وقدر ما حركت فكي معاكي برضو مصرة تجيبي لي التهاب في اللثة انتي بقيتي حشوة مؤقتة لقلبي وأنا محتاج حشوة داااااااايمة

كلية علوم التغذية :
بتول انتي سببتي لي تسمم في حياتي وعلاقتنا دي تاقصة فايتمين ولازم تنتهي لانو الاستمرار فيها غير صحي على الاطلاق وبعدين انا زهجت من المحولات الفاشلة لتعقيم علاقتنا وزهجت من تطهيرك لي جروحي القديمة وبقى عندي عسر في هضم شخصيتك حتى شهيتي للونسة مع البنات اتسدت كفانا مواد حافظة

كلية هندسة الجينات :
بتول انتي عارفة انو جيناتك هي السبب ضعف المناعة العاطفي موروث في عيلتك انا اسف بس احماضنا النووية ما بتتفق ولازم تتحلل وكل كروموسوماية تمشي جهة وكلو نواة تطلع خليتا

كلية علوم الطيران :
بتول يؤسفني أقول ليكي اني دقيت ليكي خروج نهائي في حياتي اعمل شنو ياخي انتي عارفة انو مكنة الحب بتخرب عاجلا ام اجلا وبعدين انا زول درجة اولى وانتي يا دوب درجة الافق انا وانتي طيارتنا ورررررر اقلعت ما تخلينا نهبط هبوط اضطراري برة مدرجات الحياة

كلية الموسيقى والمسرح :
اسمعيني يا بتول انا بحبك مووووت وبتمنى اعرسك اليوم قبل بكرة أها نمشي نشتري الشبكة متين ؟ رايك شنو في الدور دا ؟ ما انفع ممثل يا بتول ؟ اسمعيني يا بتول بصراحة السيناريو بتاع حبنا دا فيهو خروج عن النص حياتنا بقت نشاز وانا بفتكر اننا لازم نفكر في الحوارات البتدور بيناتنا على مسرح الواقع ولازم نعزف عزف انفرادي كل واحد براااااهو فهمتيني مش ؟ هاااااا ؟ لا انا المرة دي جاااادي تمثيل شنو يادي ما تفهمي يااااااخ الا الحن ليك كلامي دا ؟

كلية هندسة الاتصالات :
بصراحة يا بتول انا كنتا قايلك في السلك لكن طلعتي موبايل بلا بطارية انا وانتي لازم نقطع اتصالاتنا بي بعض انتي مرات مشغولة ودايما مقطوعة المسافة بيناتنا زادت ومشاعرنا بقت مشوشة لانو عواطفنا للاسف بقت لاسلكية ياخي باختصار حبنا طلع برة الشبكة

كلية الهندسة الزراعية :
عارفة يا بتول الحب بذرة دايرة ليها تربة ممتازة وموية نضيفة واضاءة كافية شان تنمو وانتي للاسف تربتك مالحة تب ومويتك ارتوازية وكان لازم نحصد الفشل في علاقتنا دي خلينا من التفرع في المواضيع الغير مورقة علاقتنا اصيبت باليرقات وانتي للاسف استخدمتي المبيدات العاطفية من غير ما تكلميني بعدين بصراحة انا خايف انو براعمنا في المستقبل يطلعوا زيك كدا

كلية علوم البصريات :
بتول انتي عارفة اني زول عندو بعد نظر وشايف اننا ما بننفع لي بعض اقول ليك اني ما قادر اكمل ح اكتب كلامي دا في ورقة ركزي معاي وحاولي تقري الحروف دي

i

h
a
t
e

u
اها غمضي العين الشمال وافتحي اليمين قريتيها .........كلك نظر يا بتول

كلية علم الكيمياء :
شوفي يا بتول لمن تحصل اكسدة بيناتنا دا معناتو اني قلوي وانتي حاااامضة انتي زمان كنتي فلذة كبدي لكن انا بطلت اطلع مع اشباه الفلذات وبعدين القال تتفاعلي كدا منو انتي ما عارفة التفاعلات العاطفية بتحول محلول المشاعر الى محلول لا لون له ولا رائحة الحكاية دي فجرت معمل حبنا للاسف وبعدين انا اكتشفت لي عنصر مشع وما مستعد اخليها عشان عنصر خامل زيك انتي

كلية علم الاقتصاد
عارفة يا بتول المشكلة وما فيها انو حصل ركود لي مشاعرنا والاسعار العاطفية انخفضت حتى اسهم القلب بقت بي معدل سهم واحد لكل 100 نبضة وبعدين البضاعة العاطفية ما لعبة ياخ انتي مش عارفة انك حسب قانون العرض والطلب لمن تزيدي في كمية الحنان ممكن يحصل نقصان في سعر العاطفة

كلية الاداب قسم علم الاثار :
بتول اسمحي لي انك تحفة مزيفة الجكس كلهم تحف عتيقة ونادرة الا انتي ما عندك غير فك الرموز بالطريقة اللي تعجبك تنقبي عن المشاكل تنقيب وبعدين انا وانتي اساسا حضارتنا مختلفة من البداية وافتكر انو حقو ندفن البناتنا بعدا هوووووي مالك بتعايني لي كدا ؟ ما فهمتي ليه انا بتكلم لغة مسمارية ولا شنو ؟ شنو لغة الفراعنة الانا اتبليت بيها دي ؟

كلية الفيزياء قسم العلوم الفلكية :
اسمعي يا بتول انتي ما لاحظتي انو سنتنا الضوئية مرت بي سرعة يا بت الحلال الشمس والقمر ما بتلاقو في سما واحدة يعني باختصار نجم حبنا افل وبعدين انا كنت قابلك مجرة تختلف عن باقي المجرات كنت قايل ما ليكي زي في الكون طلعتي ثقب اسود في حياتي وانا بالشكل دا ح الف معاك مدارات الحياة من غير اي هدف افتكر كلامي واضح وضوح كوكب الزهرة الساعة 4 فجر

كلية علوم البحار :
اسمعي هنا دا مركب فيهو قبطانين بغرق عديل كدة وبعدين انتي ما ملاحظة اننا دايما ماشين عكس التيار وانو امواج الحياة بترزع في مركبنا دا يمين وشمال من غير اي سبب انتي ليه مصرة تغرقيني معاك يا بتول ياخي انا زهجت من المد والجزر الحاصل لي بي سببك يلا بعد دا نزلي شراعك من حياتي واقطعي خطافك عني البحر مليان اسماك

:D :D :D

أبو أماني

30-07-2009, 08:07 PM

أشهد الله

أنك أروع تحفة قابلتها في حياتي .. تسلمي يا ست الذوق

gooodgooodgoood

أبو أماني

03-08-2009, 04:42 PM

تحفة بالرائعة القدمتها فوق دي .. أوحت لي أجاريها مرتجلا ( الرجالة تطير يابت أمي)!!.. بس في وسط .. شعبي عادي وأنماط عشوائية :-
** ** **
تربال :
أولا للحناكيش تربال تعني .. زول (أمي) وأبوي وكل العائلة .. جائز يكون دخل خلوة بيشتغل غالبا في المزارع والحقول ..
جاي داخل الحلة .. راكب حمارتو .. لاقتو بتول شايله ليها موية من البئر أو الحفير .. وتتقصع زولك تلب من ضهر الحمارة .. بكل مهارة لايعوزها (باراشوت)! وحفيان برجل واحده النعال الشمال فلت من الكراع وما هماه .. وصلها يناهد .. هي يا بتول .. كيفن أصبحتي الليلة؟ .. والله حد ماكت قاعد في (النبرو) كت بفكر فوقك ..وللحناكيش .. النبرو هو نكاية للساقية .. البجرها التور .. والله حد ما بحبك آآآ بتول .. ويدنقر يجر كراع السروال الشمال بإيدو اليمين ويقعد يكرش بضفوره .. الليلة التور كل ما يا خد لو لفة .. أقول يا ربي أشوف بتول ماشة على بهنوووك .. شايلة فكة الريق .. والحناكيش كان ماتوا ما بوريهم فكة الريق دي شنو.. يا بتاعين الكونينينتال .. والمورنينغ قلاسيه .. أشوف فيكم يوم .. الدعوة من التربال وليس مني..!.

حفار الأبيار :-
محامود .. حفار أبيار لابس السروال الطويل والعراقي القرب يبقى جلابية أنصار سنة وشايل مخلاية .. كمان يجي حنكوش يقول مخلاية يعني إيه يا أونكل .. وفيها عدة الشغل .. يعني حتكون لاب توب .. ويو إس بي ؟؟ ما كوريك وطورية وأزمة زي الحصلت في فنزويلا قبل عدة شهور ديك !! .. وهو مارق من البيت الصبح .. شاف ليك بتول جارتهم الخاتي عينو عليها مارقة شايلة (بستلة) تجيب فوقها اللبن .. وبتكوس لسيد الحمار .. وزولك فتح جري عليها .. هي يا بتول .. بتول .. أقيفي النكلمك .. وقفت بخفر وحياء وهي تسحب طرف التوب لتغطي به ثغرها الفتان .. وإبتسامة جميلة تخلى نانسي عجرم تحرد الغناء .. وهي تقول ليو بصوت يقطر أنوثة .. بتكورك لي .. يا محامود؟ أخونا سمع الصوت كرعية إتضاربن التقول بيناتن تركة .. وقال ليها بأخر نفس مشحتف من الجرية .. عليك النبي أقيفي أنا لي يومين ما شفتك .. بتيين يا بتول .. الله يتوب على من حفر الأبيار .. وأبيع الحمار .. وأقطع في الحلة دابر الشمار .. الم لي حبة قريشات .. وأجي أعرسك .. آآآآ بتول .. أأأأ ست البنات ؟؟ وتضحك ضحكة تضج رقة وعذوبة كتلك التي ترسلها (هيفاء) قصدي هيوفة لعريسها عدولة عقب سماع نكتة من نزار .. ولما يسمع محامود الضحكة يذوب عشقا وولها في تولة .. ويطير لفوق زي زول الصقرية ولما يعمل لاندينغ تتغز فيو في كراعه .. شوكة قدر ده ..!!! ويسكت .. بينما تصرخ هي ووووب على سجمي يا محامود .. يقلع الشوكة بكل شجاعة كما ينزع الحنكوش السكين من قالب زبدة ويقول لها .. تبري من السجم يا بتول .. هي شني .. ماشوكة كتر .. وكان حنكوش قال لي شوكة كتر يعني شنو .. ما برد عليو لاني أصلا ما عارفها .. لنا عودة .. ونتوقع مساهمات الزملاء .. ولتحفة حواء وتفاحة آدم كل الود .. تشاووووو gooodgooodgoood

تحفة حوا

03-08-2009, 05:31 PM

طيب ما الفرق بين التربال والمتيربي :D
اتخيل لي واحد بيحفر بالسلوكة (التربال )والتاني يبذر البذور (المتيربي )
ما بقول ليكم عرفتا من وين goood
يارب يطلع صاح
وعذرا لو كلامي غلط

أبو أماني

04-08-2009, 04:27 PM

طيب ما الفرق بين التربال والمتيربي :D
اتخيل لي واحد بيحفر بالسلوكة (التربال )والتاني يبذر البذور (المتيربي )
ما بقول ليكم عرفتا من وين goood
يارب يطلع صاح
وعذرا لو كلامي غلط

يا أخواني والله العظيم تحفة دي حيرت الجن والجمبو .. يعني عندها ثقافة شمولية بدرجة وزير يا أخي ما معقول .. تكوني بتعرفي من القديم والحديث بالصورة دي .. حتى التربال والمتيربي بعدين لاحظت لكل مداخلاتها لقيتها ليكم فقرية جد جد أي موضوع تمسكو تجضمو جضيمة هيفاء لعادل عسوم لو شافتو بيعاين لواحدة!.. البنية اللهلوبة دي معطونة بموية عفاريت؟.. أقول ليك قولة .. الحاي الله .. والكاتل الله ..يعني الكوتش بتاعك.. لو يرقدني في مشرحة أو أحمد شرفي أنا بغمض عيوني وأتشهد في سري وأقولها ليك على الملاء..تحفة.. حواء.. تفاحة آدم أنا حقيقي معجب بيك جدن .. أكان للكوتشة اللتي .. علقة تفوت ولا حدي يموت .. تشاووو goood

تحفة حوا

04-08-2009, 05:21 PM

يا أخواني والله العظيم تحفة دي حيرت الجن والجمبو .. يعني عندها ثقافة شمولية بدرجة وزير يا أخي ما معقول .. تكوني بتعرفي من القديم والحديث بالصورة دي .. حتى التربال والمتيربي بعدين لاحظت لكل مداخلاتها لقيتها ليكم فقرية جد جد أي موضوع تمسكو تجضمو جضيمة هيفاء لعادل عسوم لو شافتو بيعاين لواحدة!.. البنية اللهلوبة دي معطونة بموية عفاريت؟.. أقول ليك قولة .. الحاي الله .. والكاتل الله ..يعني الكوتش بتاعك.. لو يرقدني في مشرحة أو أحمد شرفي أنا بغمض عيوني وأتشهد في سري وأقولها ليك على الملاء..تحفة.. حواء.. تفاحة آدم أنا حقيقي معجب بيك جدن .. أكان للكوتشة اللتي .. علقة تفوت ولا حدي يموت .. تشاووو goood

هههههههههههه
هووووي يا أبو أماني أخير ليك تخاف
زولي دا خطيييييييير
وأنا من حسي بديت الرجفي هو انا بعرفك اصلا
وانت ارجا الراجيك
علقة ام اماني دي انا مستعدة اخدا عنك
اها قصرتا معاك

وعنوانك دا غيرررروا :D

يا حليل ابو أماني كان راجل طيب
الا براهو قام يهابش :o

قوت القلوب

04-08-2009, 05:47 PM

أبو أماني

04-08-2009, 06:00 PM

هههههههههههه
هووووي يا أبو أماني أخير ليك تخاف
زولي دا خطيييييييير
وأنا من حسي بديت الرجفي هو انا بعرفك اصلا
وانت ارجا الراجيك
علقة ام اماني دي انا مستعدة اخدا عنك
اها قصرتا معاك

وعنوانك دا غيرررروا :D

يا حليل ابو أماني كان راجل طيب
الا براهو قام يهابش :o

إ إإإإ تـ .. تتتتـ تي من حسي بديتي .. ش ..ش.شن.شنوو؟؟ الرجفي؟؟ كر عليا يا يمة يعني أنا أسوي شنو؟ .. البس لي طرحة ولا كي.. كي.. كييييفن ؟؟ يا ولد فا.. فا.. فاددددي .. بسرعة جدد لي الجواز حقي ده .. تحـ حححححفة .. قوت ..قوتتتتتتتي لللللي .. جا.جاجايييين السودان بتين؟؟؟ شهر إطناشر ؟.. يعني باقي كدي كككككككم شهر أسسسسي .. أنا عارفو لساني ده يوم بيجيب خبري..قال بجيب خبري.. هو لسع ما جابو يعني ..؟؟؟ يا كوتش .. هوي يا كوتش .. عوووك .. كدي أسمعني .. قول خير .. والله ووووالله .. كلامي ده كلام إعجاب أخوي لله في الله سااااكت ! تصدقني تصدقني .. ما تصدقني يعني أسوي ليك شنو عشان اقنعك؟.. تعال سو الدايرو.. أريتني ما تنيت أصلو أنا مقتنع الناس الكويسين الزييي كده ما بيعيشوا كتير .. تحفة المرة دي بقولها ليك لآخر مرة .. تشاووووو نلتقي في (جنات الخلد) الود ضامن يعني!

أبو أماني

05-08-2009, 10:22 AM

ابو اماني

ياخ انت زول بتعرف تونس وحبوب ومواضيعك ماخده اوسكار المنتدى من غير منافس
وتحفة
لكن ماتحفة حواء عشان الهوا وكدا
جد الواحد بيقرأ وبيتسمتع كمان
وبتدي الحكوة بعد الحقيقة
ولاسيما روح الفن (دي بالانجليزي) عندك
gooodgoood

اهنيء ام اماني على هذي الروح المنتعشة والفرفشة ولاسيما وراء كل عظيم امرأة جميلة:p
جاياك جاياك يا ابوها جاية افتو هناك
مرفق ودنا وعينا الباردة

استاذتي العزيزة الأديبة الرائعة قوت .. لكي وأسرتك خالص ودي وعاطر تحياتي .. حقيقي كلماتك (الوضيئة) بعد إذن عادل عسوم طبعا!.. أصلي عدولة ده كان ما هبشتو ما برتاح .. كلماتك الرقيقة .. باقة زهور وأكليل فخار أضعه على صدري وأقول للغاشي والماشي شوف يا فردة .. قوت القلوب قالت عني شنو .. لكي خالص الشكر .. وجمعك لي مع تحفة حواء ككوبل أثلج صدري .. لكين بس .. يعني .. حكاية الكوتش الختري دي شووووية .. معكننة على .. ما تضحكي على .. والله وووالله .. أنا ما خائف ولا حاجة .. بس كمان يعني .. أصلي زول مسالم وما بحب المشاكل .. وكده ..
شكرا على مرورك الظريف الرشيق وأعدك أن أشكل مع تحفة ثنائي في مقبل المشاركات ولو إني لا أثق في بنات حواء .. بس تحفة حاجة تااااانية خااااالس .. والللليلا نسيت الكوتش !! تشااااوووو goood goood goood

همس الشوق

05-08-2009, 11:10 AM

عاين يا ابو اماني

بصراحة حاولته اني اكتب مشاركة هنا

لكن لقيت لغتكم صعبة ياخ

يا ريت تكتب لينا بالعربي العديييييييل دا

تحفة حوا

05-08-2009, 11:17 AM

أبو أماني

05-08-2009, 03:26 PM

عاين يا ابو اماني

بصراحة حاولته اني اكتب مشاركة هنا

لكن لقيت لغتكم صعبة ياخ

يا ريت تكتب لينا بالعربي العديييييييل دا

والله يا مستهبلة .. إتي لو بطلتي دلالك المصطنع ده علينا..تكتبي كلام..لاتشابه سحر كلماته إلا كلام الله في التوراة .. تقولي لي شنو؟ تقولي لي منو؟؟ .. أكتبي يا ست الروعات وبطلي دلال مع عظيم تقديرنا .. لتواضعك المثير .. الكشفوه منو يا ناس ؟؟ همس goood

أبو أماني

05-08-2009, 03:48 PM

في مهن نسائية كمان :
المشاطة :
ودي كانت بتجي وتسرح شعر النسوان وتجلب معاها أدوات خاصة بيها
والأهم الشمارات البتجيبها والناس بتضرب بيها المثل في الخبارات والشمارات

الدلالية :
ويمكن في بعضهن مازالن يدللن حتى اليوم ودي البتجيب حاجات من السوق وتحوم على الحريم في البيوت لتسويق بضاعتها والكل يعرفها
وبرضو لا تخلو من الشمارات

الله يجازيك بالخير يا تحفة.. كل مرة تفتحي ليك موضوع وتجرجريني معاك .. طبعا شدتني فكرة الوظائف العند الحريم (الخاصة بيهن) ونبدأ بالنموذجين الفوق ديل ..
المشاطة : بتذكر لما كت صغييير (9/12 سنة كده) تضحكوا شنو؟ يعني ما مصدقين والله كت صغيير في يوم من الأيام وكت بجي داخل من المدرسة بلقى الوالدة أو العمة أو الحبوبة ذاتها قاعدة في البرندة في نص العنقريب .. وبوراها على ظهر العنقريب المشاطة .. خاتة ليها بمبر بي ضهرها وخاتين فوقه مخدة رهيفة .. وماده كرعيها بالجمبين حوالين أمي .. وتشيل وتجرجر في الشعيرات وماسكة ليها (إشفة) زي المسلة حقت المراتب .. وتشيل وتغرزها في كوم الشعر تعمل ليها شق وسط الشعر وتقول كدي تجر ليك الخصلة وتلمها فيها برم .. من الصنقور فوق لحدي أخر الخصلة .. وأمي الله يرحمها كانت تميل براسها مع الجرة وتغمض عين وتفتح التانية ومرة مرة أسمعها تقول بهمس حي حي حي .. وأثنا ذلك تكون علبة السجائر البحاري أو البرنجي في الطربيزة .. غير عدة القهوة والشاي وباقي الفطور .. والمشاطة يا تحفة يا أختي حكمة الله بتشرب السيجارة بطريقة خاصة بيها .. تلقيها ماسكاها بطرف أصابعيها زي الطبيب والمبضع .. وبين كل بخة وبخة .. تبرى ليك الوالدة .. وما شفتي يا فاطنة يا اختي بخيتة جارتكم البي غادي .. يا بت أمي قالوا أول اللبارح راجلها جاء سكران دقاها ليك دق القطن..وناس كتيرة بت ام الحسن..العريس جاب ليهم الشيلة ناقصة رجعوها ليهم ببوكسيها وكمان الغريبة المشاطة بتكون ملتي تالنتس.. يعني عدة مواهب..فهي حنانة وبتسوي الدلكة وحاجات تانية حامياني! وواحدات بعد كل المواهب دي بختمنها بقهوة المغربية وقعدت الحوش تحت الشدرة .. العناقريب الهبابية ما تديك الدرب والجبنة مدورة .. تنكش في قفتها تطلع ليها صرة .. وتمرق الودع .. ومن ديك .. أسرار الرجال كلها تكون على الهواء مباشرة .. وتطلع من هناك .. ماليه قفتها بما لذ وطاب لناس بيتها خلاف القريشات اللقطتن من أماتنا المسكينات ناس قريعتي راحت ناس فارغات..كابدولو بلا قرعات..وقوام بلا..(تموه خيااال)!.
أما الدلالية ..فليها يوم تاني، فقط أبقوا معنا يا حلوين..خلوني النلحق باقي عدة المطبخ أغسلها قبال أم أماني ما تجي داخلة .. قالت مارقة عند الجيران وبتجي أسع دي.. دي مني القالت (هلشونا دي؟) .. صدقوني .. تواضع مني والله .. تشااااووووو
dgoood goood goood

همس الشوق

06-08-2009, 10:08 AM

والله يا مستهبلة .. إتي لو بطلتي دلالك المصطنع ده علينا..تكتبي كلام..لاتشابه سحر كلماته إلا كلام الله في التوراة .. تقولي لي شنو؟ تقولي لي منو؟؟ .. أكتبي يا ست الروعات وبطلي دلال مع عظيم تقديرنا .. لتواضعك المثير .. الكشفوه منو يا ناس ؟؟ همس goood

ياخ إنت ما عارفني جعلية وعمرابية كمان

والكلام دا بنفخني شديد

ويخلني أتجعلن واطلع كل الفي السحارة goood

مرافي

06-08-2009, 01:28 PM

يا أخواني والله العظيم تحفة دي حيرت الجن والجمبو .. يعني عندها ثقافة شمولية بدرجة وزير يا أخي ما معقول .. تكوني بتعرفي من القديم والحديث بالصورة دي .. حتى التربال والمتيربي بعدين لاحظت لكل مداخلاتها لقيتها ليكم فقرية جد جد أي موضوع تمسكو تجضمو جضيمة هيفاء لعادل عسوم لو شافتو بيعاين لواحدة!.. البنية اللهلوبة دي معطونة بموية عفاريت؟.. أقول ليك قولة .. الحاي الله .. والكاتل الله ..يعني الكوتش بتاعك.. لو يرقدني في مشرحة أو أحمد شرفي أنا بغمض عيوني وأتشهد في سري وأقولها ليك على الملاء..تحفة.. حواء.. تفاحة آدم أنا حقيقي معجب بيك جدن .. أكان للكوتشة اللتي .. علقة تفوت ولا حدي يموت .. تشاووو goood

احم...احم الكلاااام دخل الحوش
والليلة يا ابو اماني البمرقك شنو من الحوش..؟؟؟
تحفة يابت امي ..راجلك جنسو شنو...؟؟؟؟؟
هي لكن بس علقة..في حاجات تاني خااايفة عليك منها
ياخوي صغير وجاهل يايمة.....loooollooool

أبو أماني

06-08-2009, 03:56 PM

احم...احم الكلاااام دخل الحوش
والليلة يا ابو اماني البمرقك شنو من الحوش..؟؟؟
تحفة يابت امي ..راجلك جنسو شنو...؟؟؟؟؟
هي لكن بس علقة..في حاجات تاني خااايفة عليك منها
ياخوي صغير وجاهل يايمة.....loooollooool

غايتو يا مرافي ما بسألك! يعني نظام وليع نيران عينك عينك .. أسع دي راجلها ده كان طلع جعلي حفيد المك لزم .. ولا حتى أكان مركب ليو مكنة جعلي سااااكت .. نان أم الحسين ما إتنفخت .. أروح في الكازوزة أنا؟؟ ولا أبقى زعيم أوانطة يعني .. وأروح في الرجلين؟؟.. goood goood goood

أبو أماني

10-08-2009, 03:48 PM

هههههههههههههههههه
إنت ما عارف أن كيدهن عظيم ولا شنو ... والله مرافئ دي رئيسة عصابة عديييييل أعملوا حسابكم يا ناس .... إنت قايلني انا جبتها هنا لي شنو... بشتنه ورقاد واطه ... ولسه يا ما في الجراب يا حاوي ... بس انت يا أبو اماني في الأمن ما عندك مشكلة بدخل ليك واسطة .. وعادل دا عرف الموضوع من اولو وهدا اللعب معاها وهم هسه سمن على عسل .. الدور والباقي على الباشمهندس الطردو من القهوة وجابو ليهو بعاتيه قال شنو ... محاسبة جديده والله انا خفته عديل ومرقته من القهوة جري زي الساكيني بوليس النظام العام في المظاهرات .... goood .. غايتو انا قلته ليها ياخ حرام عليك عمو معتصم دا زول عيان وكدا وجائ القهوة يفرق شوية .. بالله العظيم حدرت لي جنس حدره اخير منها ( أم كف )

والله هيفاء .. قصدي هيوفة دي كان ما جرت سنة ناعمة مع (عمو معتصم) أفتكر بتجيـهـو نفسيات ياحبة عيني الراجل مكسر فيها وهي ما جايبة ليو خبر .. سمعت تحت تحت كدي قالوا بقى يجي القهوة يوميا ممن جابتها مرافي .. المحيرني عليك الله يا همس العاجبها في عادل عسوم ده شنو عليك الرسول؟ .. أسع دي كان ما الحب أعمى وبيكابس كمان متل عمو معتصم (والله عمو دي عاجباني جنس عجب!) عمو ده مالو ؟ عيبيه لي كان تقدري .. يا يمة وجاهة وشباب وخفة دم .. ورقة وظرف .. وكان لل .. المهم الأخلاق طبعا .. ولا كيفن ياهمس؟ .. والللليلااااا باين على عكيت .. يلا نشتت قبال الوجيه ده يجي ناطي .. هو يخوف وجكسويتو تحمر لينا .. تشاوووووgoood goood goood

فتحي مسعد حنفي

10-08-2009, 05:59 PM

//
//
زمان إنتشرت وظيفة مرموقة في الوسط الوظيفي تكسّب ذهب .. إسمها العرضحالجي .. وهو كاتب يجلس في مكتب صغير محمول في ساحات المحاكم ليكتب للأميين عرضحال يحوي تفاصيل شكواهم ليدخلوا به على قاضي المحكمة للبت في قضيتهم .. كلمة عرضحال كلمة مذدوجة من شقين تم دمجها بالعامية وهي أصلا .. عرض .. حال .. قصتنا عن جد لنا كان يشغل هذه الوظيفة المرموقة آنذاك .. وكان شغوفا بالعلم والمعرفة .. وكان يجالس علية المثقفين في الأمسيات وذات مساء سمع أحدهم يزج أثناء حديثه بكلمة ولا سيما .. فسأل عن المعنى وعرفه تماما .. ولفرط إعجابه بالكلمة الجديدة أصر أن يستخدمها في عمله .. ويزج بها ليستعرض مهاراته اللغوية ولما جاءت أول زبونة كتب لها العرضحال وتحايل حتى زج بالكلمة فيه وكانت المفرده عاجباهو شدييييد .. إذ ختم مقاله بقوله .. أعشم في عدالة محكمتكم حيث إنني إمرأة مسكينة ووحيدة .. لاسيما وزوجي متوفي من سنين .. وعندما سلمها العرضحال طالبها بملغ (25 قرش) أي طرادة في ذاك الزمن وكان قيمة العرضحال عشرة قروش فقط فصاحت المرأة محتجة ليه خمسة وعشرين قرش يا ود أمي أصلك كتبت لي شنو؟ فأشار لكلمة لاسيما في فخر وزهو وتباهي.. الكلمة دي (لاسيما) دي براها بخمسطاشر قرش.. فقالت المرأة مذهولة وشن طعمها الكلمة الغالية دي ؟؟ فقال لها وهو يمسح شاربه في خيلاء .. على اليمين القاضي يقرأ لاسيما دي عيلا يحكم ليك مغمض .. أصلو ما يتلفت جاي ولا جاي ..
فذهبت للقاضي مسرورة وضامنة الحكم لصالحها بفضل (لاسيما) .. وفعلا جاء الحكم في مصلحتها حيث طلع القاضي ما ناقش معنى كلمة لاسيما .. وأنا أقرأ عمود أخطاء كل يوم .. لاحظت تلاشي الأخطاء وظهور مفردات فصحي على شاكلة لاسيما .. والنطاس كبديل للطبيب .. وتذكرت واقعة لا سيما .. لماذا؟؟ بربي لست أدري .. ولكم .. خالص تحياتي .. goood goood goood

تعرف يابو البنات الليلة انا لأول مرة قريت البوست دا ولاسيما اني عرفت ما خفي عنك..
اتذكرت حكاية الناس البيحبو استعمال الكلام الغلاد الما سمعو بيهو قبل كدا ودي فعلا كتيرة في السودان وأتذكر كان عندنا في الثانوي صول بتاع الكديت..راجل من اندكم شايقي بشبه كديس الكيتي كولا..كان دايما يهددنا ويقول : من الآن فصايص أنا ما حأرحمكم..
وزي قريبكم السمع كلمة وخاصة وداير يستعملها بأي طريقة وكان مسافر بالقطر وراكب درجة تالتة وواقف في الشباك جنبو واحد واقف يتفرج معاه..وفي حتة القطر بيلف فيها لامن عاينوا لي قدام شافوا راس القطر وهو لافي..أخونا اتلفت للجنبو وقال ليهو :تعرف القطر دا سريع خلاس التاني قال ليهو أي ولله .أخونا لحقو بي وخاسة درجة أولي..
أشهر من تجني علي الكلمات الكبيرة كان المرحوم حمودة(حلاق الجامعة)
مرة بعد حركة اليسار ايام النميري رسل تلغراف للنميري كتب فيهو: سيرو للأمام أنتم وأذنابكم البررة ونحن من وراءكم بالمرصاد(دي ما نكتة)
مرة كان بيحلق للنذير دفع الله وصاحبو بيستعجل فيهو عشان يحصلو الكورة.. حمودة قال ليهو ياخ بس دقايق خلليني انتهي من خالي الزهن دا...طبعا النذير راسو كلو صلعة..لما فتحو قسم الكمبيوتر في الجامعة حمودة عايز بأي طريقة بستعمل الكلمة وما لاقي طريقة..مرة واحد صاحبو قال ليهو ياحمودة انا عطشان داير اشرب..ما عندكم موية..حمودة أشر ليهو علي حنفية المبرد وقال ليهو : ياخ ما تشرب من الكمبيوتر دا..
الأمثلة كتيرة تملا كتب..

أبو أماني

11-08-2009, 10:22 AM

تعرف يابو البنات الليلة انا لأول مرة قريت البوست دا ولاسيما اني عرفت ما خفي عنك..
اتذكرت حكاية الناس البيحبو استعمال الكلام الغلاد الما سمعو بيهو قبل كدا ودي فعلا كتيرة في السودان وأتذكر كان عندنا في الثانوي صول بتاع الكديت..راجل من اندكم شايقي بشبه كديس الكيتي كولا..كان دايما يهددنا ويقول : من الآن فصايص أنا ما حأرحمكم..
وزي قريبكم السمع كلمة وخاصة وداير يستعملها بأي طريقة وكان مسافر بالقطر وراكب درجة تالتة وواقف في الشباك جنبو واحد واقف يتفرج معاه..وفي حتة القطر بيلف فيها لامن عاينوا لي قدام شافوا راس القطر وهو لافي..أخونا اتلفت للجنبو وقال ليهو :تعرف القطر دا سريع خلاس التاني قال ليهو أي ولله .أخونا لحقو بي وخاسة درجة أولي..
أشهر من تجني علي الكلمات الكبيرة كان المرحوم حمودة(حلاق الجامعة)
مرة بعد حركة اليسار ايام النميري رسل تلغراف للنميري كتب فيهو: سيرو للأمام أنتم وأذنابكم البررة ونحن من وراءكم بالمرصاد(دي ما نكتة)
مرة كان بيحلق للنذير دفع الله وصاحبو بيستعجل فيهو عشان يحصلو الكورة.. حمودة قال ليهو ياخ بس دقايق خلليني انتهي من خالي الزهن دا...طبعا النذير راسو كلو صلعة..لما فتحو قسم الكمبيوتر في الجامعة حمودة عايز بأي طريقة بستعمل الكلمة وما لاقي طريقة..مرة واحد صاحبو قال ليهو ياحمودة انا عطشان داير اشرب..ما عندكم موية..حمودة أشر ليهو علي حنفية المبرد وقال ليهو : ياخ ما تشرب من الكمبيوتر دا..
الأمثلة كتيرة تملا كتب..

مداخلتك الحلوة .. أنعشت ذاكرتي عن المرحوم : حموده حلاق الجامعة ::

* شاف باص مليان ركاب مشمعين وواحدين تشعلقين في الباب .. فقال الباص ده مليان شخصيات بارزة ...

* كان قاعد في صالونه مع إثنين من دكاترة الجامعة .. ناداه واحد .. قال ليو .. يا أخي خلي عندك ذوق ما تناديني لما تلقاني مع شخصيات متبرزة في المجتمع ..

* لقى جماعة في السوق متلمين حول بياع .. الفضول خلاه يفج الناس ويقول ليهم بكل وقار لو سمحتوا .. بالله .. أدونا معاكم وجهة نظر ..

* بيتكلموا الجماعة وحموده رامي أضانه وكان الكلام عن دكتور هو يعرفه .. ولما تطرق حديثهم عن أسلوب الدكتور الغائب بانه بيعاني من البيروقراطية .. تدخل حمودة .. الله يشفيو!

أهو ..حاجة كده على الطائر إكراما لطلتك المشرفة البهية .. تحياتي ..goood goood goood

همس الشوق

11-08-2009, 12:09 PM

والله هيفاء .. قصدي هيوفة دي كان ما جرت سنة ناعمة مع (عمو معتصم) أفتكر بتجيـهـو نفسيات ياحبة عيني الراجل مكسر فيها وهي ما جايبة ليو خبر .. سمعت تحت تحت كدي قالوا بقى يجي القهوة يوميا ممن جابتها مرافي .. المحيرني عليك الله يا همس العاجبها في عادل عسوم ده شنو عليك الرسول؟ .. أسع دي كان ما الحب أعمى وبيكابس كمان متل عمو معتصم (والله عمو دي عاجباني جنس عجب!) عمو ده مالو ؟ عيبيه لي كان تقدري .. يا يمة وجاهة وشباب وخفة دم .. ورقة وظرف .. وكان لل .. المهم الأخلاق طبعا .. ولا كيفن ياهمس؟ .. والللليلااااا باين على عكيت .. يلا نشتت قبال الوجيه ده يجي ناطي .. هو يخوف وجكسويتو تحمر لينا .. تشاوووووgoood goood goood

ههههههه
تعرف يا مامون
النسوان ديل ما تشوفن كدا القلب رهيييييييييييف .. وصاحبك عدوله دا ناقش الموضوع ... وساني الحنك إبره بس .. عشان كدا .. تعرف الحنك السنين دا برقد ليك النسوان ديل سلطة .... وكلمة ما بقولنها ... دي اسرار المهنة ... طلعتها عشان خاطر الراجل المسكين دا جبناهو القهوة قلنا يغير شوية من ايام المرض ... بس بالله كلمو قول ليهو عليك بالحنك السنين والله هيفاء دي تتفن ليك في الواطة ..goood
تشااااااااااااوو

عادل عسوم

11-08-2009, 01:21 PM

ههههههه
تعرف يا مامون
النسوان ديل ما تشوفن كدا القلب رهيييييييييييف .. وصاحبك عدوله دا ناقش الموضوع ... وساني الحنك إبره بس .. عشان كدا .. تعرف الحنك السنين دا برقد ليك النسوان ديل سلطة .... وكلمة ما بقولنها ... دي اسرار المهنة ... طلعتها عشان خاطر الراجل المسكين دا جبناهو القهوة قلنا يغير شوية من ايام المرض ... بس بالله كلمو قول ليهو عليك بالحنك السنين والله هيفاء دي تتفن ليك في الواطة ..goood
تشااااااااااااوو
:mad::mad:
(مامون) أقصد أبوأماني دة تباريهو كدي الاّ يوديكي التوج :D:D
يعني بنيتي علي كلامو وخلاص بقيت أنا مقددا و(حنكي) سنين ياهمس الشوق؟:confused:
وبعدين القاليك انا صاحبو منو :mad:
:D:D

أبو أماني

11-08-2009, 03:28 PM

:mad::mad:
(مامون) أقصد أبوأماني دة تباريهو كدي الاّ يوديكي التوج :D:D
يعني بنيتي علي كلامو وخلاص بقيت أنا مقددا و(حنكي) سنين ياهمس الشوق؟:confused:
وبعدين القاليك انا صاحبو منو :mad:
:D:D

خلااااااس نكرته خووتي ليك وصحوبية سودانيات .. يا أخي حرام عليك أنا واثق أن علاقة كل زول في سودانيات بالتاني علاقة أشقاء .. الله؟ موش.. إتولدت علاقتنا مع بعض في رحم هذا المنتدى الراقي .. حرام عليك تبيعني عشان الشكلوتة حقتك دي .. حتى لو عاجباك وكانت مكسرة فيك برضو ما بعذرك .. وبقول .. شبهينا وإتلاقينا .. مبروك سعيد بسعيده .. أنا خليني مع البالونة المنفوخة الجابتها لي سرورة الشهر الفات .. تربتي ووصلتها .. إنشاء الله يا سرورة .. ربي يديك الفي مرادك .. أكان بريتيني براجمة الصواريخ دي.. بالمناسبة يا سرورة في مرادك شنو تاني غير شوفة أبو أماني؟؟ goood goood goood

أبو أماني

17-08-2009, 06:00 PM

]وظيفة اليوم : سيد اللبن

تنعمون هذه الأيام أعزائي بمعطيات الألفية الثالثة من أوجه حضارية ومتغييرات حياة يومية.. فصرتم تشربون شاي الصباح باللبن البودرة المبستر أو الحليب السائل من حليب المراعى والمزارع تأتيكم في عبوات من الورق المقوى أو البلاستيك .. ولكن يظل طعم اللبن الآن زي طعم الحياة في عهد ما أنزل الله به من سلطان !!.

أما لو سألتم عن طعم اللبن (بل ومعظم الأشياء) في عهد (أعمامي)! وأعمامكم ناس ود مسعد وود مخير .. وود الطاهر .. وربما .. (أقول ربما) .. ود الحاج .. فسيقولون لكم .. إن الذي بين يديكم الآن هذا ليست له علاقة بحليب أو لبن الأمس.. من حيث النكهة والطعم وغيره.. بل لا يمت لحليب الأمس بصلة !.

الزمان : أعود بكم للنصف الأول من ستينيات القرن المنصرم .. - المكان : مدينة البراري وعلى وجه الخصوص بري المحس .. وعلى وجه التحديد .. منزل جدي لأبي .. نصحو كل يوم في الصباح الباكر والذي يسميه جدي رحمه الله (الدغش) بضم الدال .. على صيحات ولكزس من عصاء الجد لنقوم نلحق صلاة الفجر .. نقوم بخفة ورشاقة ونغتسل ونتوضاء ونصل الفجر حاضرا .. لينصرف بعد الصلاة كل فرد لما يتوجب عليه عمله كل يوم .. فالوالد يقبع بمصلاته أو (التبروقة) يقراء ما تيسر من آي الذكر الحكيم ويعقبه بالتسبيح بحمد الله .. بينما تقوم الجدة بدخول المطبخ .. كنا بندلعو نسميه (التكل) بضم التاء والكاف وتسكين اللام .. لتجهز لنا شاي الصباح وتوابعه .. وتعد الفطور أو ال كونتي نين تال برضو كنا بندلعو زمااان نسميه .. فكة الريق .. وفي خلال ذاك الوقت نسمع عادة وفي توقيت شبه ثابت .. صوت طرق مألوف على الباب .. يعقبه صوت جدتي من المطبخ وهي تكورك لي قائلة .. يا ولد عابدين .. بسراعك ..الفح (البستلة) الحق سيد اللبن جيب منو رطلين .. كنت كلما لفحت البستلة وجريت على الباب لما أفتحه .. القى إن نو تايم .. الحمار بس واقف قدام الباب وسيد اللبن هنووووك قدام باب الجار التاني لينا بيصب لبتهم في اللبن من (التمنة الصغيرة المعلق فيها عبارين تلاتة واحد نص الرطل والرطل والرطلين) في ذلك الأثناء كنت أنتظر قدام الباب وأبحلق في الحمار الذي ينظر إلى بكل إستكانة ولا مبالاة .. ويحرك شفتيه الغلاظ بين كل لحظة وأخرى كما لو أنه يهم أن يزجي لي بسر يؤرق مضجعه .. بينما كنت أنا أنظر إليه ولذكائي الخارق أياميها كنت أبحلق فيه بحيرة بالغة ودهشة دفينة.. وتساؤل يدور بخلدي سنينا.. سيد اللبن هناك والحمار واقف قدام الباب يا ربي الدق الباب منو؟.. أيعقل أن يكون الحمار؟!.

رجاء لا تسيئوا الظن بالحمار يا حبائب .. فبحق المعبود لا غيره .. إن الحمار ممكن يعملها فهو أذكي حسب يقيني من كل الحكام (اللي عندنا)! .. وهو مشهود له بأنه يتعلم من التكرار بينما يتكرر بقاء الحكام بالكراسي سنينا عددا.. دون جدوى منهم أو رجاء فيهم !..

عذرا حبائبي لو أطلت .. ولكن كما تناولنا الأمر بسخرية ومرح .. لنتناوله بجدية تفيدنا :-
كان الرجل متدينا للحد الذي يقيم فيه حدود الله على نفسه وآل بيته .. وكان يتقي الله خير تقاته ويغض الطرف عن المحارم والحرمات .. ولكنه ذات يوم راوده الشيطان بمساعدة شيطانة من بني الإنس .. وكاد أن يرتكب الذنب لولا رحمة من الله وبضع إيمان من الرجل فتاب ورجع واستغفر .. وعندما تذكر حديث رسولنا الكريم (صلعم) الزاني يزنى به ولو في ضل بيته .. قرر أن يستوثق من الأمر وأن يحقق مع زوجته عند رجوعه .. وفعلا في المساء سأل زوجته واستحلفها بالله أن تحكي له أي واقعة أو حدث غير مألوف مر بها خلال اليوم منذ خروجه .. فكانت المرأة صادقة مع زوجها وقالت له الحقيقة الليلة في حاجة غريبة جدن حصلت معاي تصوور سيد اللبن سنين بيديني اللبن عمرو ما رفع عينو وملاءها فيني..الليلة كان بيعاين لي ببجاحة وكان شكلو ما طبيعي .. فندم الرجل ندما شديدا وإستغفر الله كثيرا وعيونه تفيض دمعا وقرر من يوميها أن لا يخوض في أعراض الآخرين .. حفظنا الله وإياكم وستر حرماتنا .. ولنا عودا قريب مع وظيفة أخرى .. تشاووووو
[/color] goood

أبو أماني

27-09-2009, 12:29 PM

وظيفة السمسار .. وظيفة مريحة جدن حيث لا تحتاج لرأسمال سوى اللسان الحلو وسرعة البديهة والمقدرة على الحجة والإقناع .. ومعرفة نقاط الضعف في شخصية الزبون أو بالآحرى الضحية ! .. والسمسار رغم جهله التام بعلم النفس إلا أنه يعتمد في عمله إعتمادا كليا على السايكولوجي مستقلا الفطرة أو الموهبة من عند الله سبحانه وتعالى .

غير أن وظيفة السمسار لا تلق ترحيبا عند الكثيرين .. وهي غير محبوبة .. والغريب في الأمر أن كلمة سمسار لها وقع كلمة .. الحرام .. أو القمار في أذان السامعين .. يشهد الله أنني أدعي الذكاء والألمعية ولم يشعرني بالغشامة والتلامة سوى سمسار أمي دودرتي وكوكرني وكاد أن يبيعني الترماج .. كان ذلك في أول الألفية الثالثة .. كنت عائدا من الجماهيرية ال .. ال .. ال خد نفس .. وحبيت أشتري لي حافلة .. وكت عامل فيها فيتيك .. ومفتح .. لماها ليكم سمسار قعدني جمب ست شاي .. قعدت تسقي فيني في نصائب .. شي جنزبيل .. شي .. نعناع .. شي شاي وقهوة وخلافه والبخور يقول يا غربتي .. كت في أول الجلسة .. مفنجل عيوني وواعي لكل شئ يدور حولي لاكين أخوكم بعد كتح الكباية الثالثة ولا الرابعة ما عارف بقيت بعيد عنكم زي الغنماية .. محل ما يودوني مسلوب الإرادة أمشي وراهم .. يا أخي بقيت لما أشوف السمسار جاي على العشة حقت ست الشاي كت بشوفه زي رسول العناية الإلهية الجاني عشان ينشلني من وهدة الضياع والحيرة ..ويركبني روزا كرت كرتونة أو كما درجوا أن يقولوا لي قدام أي حافلة اعاينها .. ما أطول عليكم .. دبسني ليكم لا سامحه الله في حافلة (كوستر فائف آر) موديل 80 يعني جارية في البلد دي 21 سنة تماما .. والحكمة عاملة زي اليونايتيد نيشن الدركسون حق مرسيدس .. والمكنة (جاز 31 ) واللساتك أوستن قصدي عجلات الحديد الجوه والديفرينش لاندي كروزر .. والغايظني مفتاح عجل مافي ولما جبته لقيت روحي محتاج لخمسة مفاتيح عجل لانو كل عجل فيو صامولة مختلفة من الثانية .. والسعر الحقيقي ليها ما يزيد عن 9 أو 10 مليون بسلام الرأس وشكر الشاري كمان، شيلني ليها إبن ال..إستغفر الله تصوروا بكم؟ 12 / 13 /16؟ يا أخي ده لسع بعيييد جدن .. على الليمان دفعت فيها 21 مليون المليون ينطح التاني .. والغريب في الموضوع كت بشوفها كانها جاية من الشركة اليابانية الأم هناك (كرت كرتونة) زي ما بقولوا أولاد ال.. لكين بعد جبتها البيت ووقفتها جمب الباب .. ودخلت غسلت الدرن الفوقي داك كان جوه كان بره .. واتوضيت وصليت المغرب .. مرقت أتغزل فيها .. وقعدت في الواطا من الإحباط وليوم الليلة مستغرب .. في النصيبة السقتني ليها المرأة الغرابية ست الشاي ديك .. الله لا كسبك يا مضروبة ..
نواصل في مرة قادمة .. سيرة الماتسماش .. السمسار .. أشوف فوقك يوم ياااااا رب ... و.. gooodتشاووووووgoood