ده كان زمن الزمن زين والشعر مغطي الاضنين !!.. [الأرشيف]

مشاهدة النسخة كاملة : ده كان زمن الزمن زين والشعر مغطي الاضنين !!..

ودالزرق

18-12-2009, 09:51 PM

وحاتك لسه ما بتقدر تقاسم قلبي دقاتو
اقابلك وكلى حنية واخاف من نظرتك ليا
واخاف شوق العمر كلو يفاجأك يوم في عينيا ..
وراء البسمات كتمت دموع وبكيت من غير تحس بيا..

الرائع دوما وابدا اسحق الحلنقي في رائعته بتتعلم من الايام التي تغني بها الاستاذ الفنان محمد الامين .. قامتان من الابداع الشفيف عطرت سماوات النغم السوداني بعميق المفردة واللحن الشجي .. اتذكر في هذه اللحظة في الحوار الذي اجراه استاذنا حسين خوجلي مع الشاعر اسحق الحلنقي في برنامجه الموؤد ( ايام لها ايقاع) .. سال حسين خوجلى اسحق الحلنقي .. يا استاذ : بتتعلم من الايام دي حقتك؟
اجاب الحلنقي: نعم .!!
حسين : بس لانو ما بتشبه قصايدك التانية ..
الحلنقي : انت عارف يا حسين .. بتتعلم من الايام دي لو ما كتبتها انا مافي زول تاني بيكتبها !! - انتهى - .

كنت وقتها في الجامعة .. وصديقي العزيز (مكي حسن مكي) من ابناء سنار كنا عندما نلتقي في النادي الأهلي سنار مساءاً ، وطوال فترة جلوسه معنا في حوار مستمر .. انت يا (ودالزرق) عليك الله الأغنية الفلانية ديك شاعرها منو ؟؟ وهو طبعا كان يتوسم فيا المعرفة بالغناء السوداني شعرا .. وده كان زمن الزمن زين والشعر مغطي الاضنين !!.. وما تشطحوا بخيالكم بعيد انا عمري لازال في الخمسينات !! وكنا عندما نختلف في شاعر اغنية يأخد هاتفه الجوال ويتصل بالفنان صاحب الأغنية !!! الم اقل لكم من قبل يا جماعة سنار دي معقل الثقافة والأدب والفن والشعر ..
وكان دائما يترنم بـ:
بنحبك نحنا وما قادرين ابداً عن حبك نتخلا ..
نتخلا عن الوجه البشبه ضي القمرا الناعس طلا ..
الله يخليك يحرسك من عين الناس الله
لو نحنا بكينا علي الصورة .. سامح دمعتنا المعذورة
ولو نحنا مقامك ماقدرو غلطاتك عندنا مغفورة ..

قبل عده ايام كنت اتحدث مع احد أعضاء منتدانا .. وقلت له : والله تعرف يا فلان : انا ما في شئ اتاسفت عليهو في الغربة دي غير حاجة واحدة بس .. قال لي شنو الحاجة دي ؟ قلت ليهو : كنت زمان بنكتب .. ولدينا القدرة على الكتابة اليومية .. الان اصبحنا لا نستطيع ان نصيغ جملة مفيدة .. !! ملعون ابو دي غربة ياخ الخلتنا ننسى تراثنا وحكاوينا وقصصنا اليومية المستنبطة من واقعنا المعاش .
ونلتقي ..

عادل عسوم

18-12-2009, 09:57 PM

ود اللزرق ياجميل
ما أجمل بداياتك...
هذه أترجّة جميلة اللون والطعم والرائحة...
أما سنار...
فقد درست بها جانبا من الثانوي (العالي)
كان السكن بيتا يواجه نادي السكة الحديد
وكانت سنار كما هي دوما جميلة
بذاتها وناسها
مرحبا بك مثريا لسوح وفضاءات الابداع هنا
في سودانيات المحبة والخير
والتحية لسنار التي أحب
مودتي

ودالزرق

18-12-2009, 10:05 PM

ود اللزرق ياجميل
ما أجمل بداياتك...
هذه أترجّة جميلة اللون والطعم والرائحة...

عادل عسوم

كيف حالك يا رائع ..

انت عارف انا قلت المنتدى ده منتدى غير عادي ما بتنفع معاهو البدايات التقليدية المعروفة ..( رحبوا بي يا جماعة .. والف مرحب بيك نورت المنتدى !!)

انا سعيد بانك اول زول يكون معاي ..

وتحية للمشرف العام لقبول عضويتي .

وابشروا .. علي الطلاق الا تابونا انتو بس !!

فتحي مسعد حنفي

18-12-2009, 10:13 PM

ود الزرق حبابك رغم اني حلبي;)مرحب بيك واحنا كل من تعدي الخمسين تبعنا ومننا..
أهلا بيك وبي بدايتك الدسمة ومقعدة:)

منال

18-12-2009, 10:14 PM

وابشروا .. علي الطلاق الا تابونا انتو بس !!

شوفتو كمان جاااى بطلاقو و بشيرو gooodgooodgoood

زرقان
ازيرق

اقغد سااااى

الاتنين ما بتلموا

نبشر ليك ونديك الشبال

علا الطلاق ده شخيت واقيف بعيد

تشيلك عافيتك

النور يوسف محمد

18-12-2009, 10:17 PM

بسم الله الرحمن الرحيم
ود الزرق
أيها الراقى الأنيق
لك من الود ما تشتهى الأنفس ... وتألفه الخواطر
مرحب بيك فى هذا البيت الدافئ
تتقدمك هذه اللوحة البهية
..
...
شوق العمر ...

ودالزرق

18-12-2009, 10:20 PM

ود الزرق حبابك رغم اني حلبي;)مرحب بيك واحنا كل من تعدي الخمسين تبعنا ومننا..
أهلا بيك وبي بدايتك الدسمة ومقعدة:)

الخمسينات دي عملتها ليك مخصوص لانك بتحب ناس الزمن داك ..goood

الف شكر ومرحبا..

خلونا نجبد نفسنا شوية ياجماعة ..:)

سارة

18-12-2009, 10:21 PM

هيييييييييييع ازرق

لكيكا

مرتو ما بطلكها

ونسيبتو ما بفاركا

وتيرو مو ساركا

ازرق كحل الشيخات

حرّم حبابك والشاى عليناgooodgoood

ودالزرق

18-12-2009, 10:27 PM

منال

سارة

النور

والله ياجماعة انا ما مصدق انو الناس دي بترحب بالناس بالطريقة دي ..
وبالطريقة دي بتساهروا بينا .. على قرار (ساهرتو بييييينا )..goood

والمره لقيناها بالساهل عشان نطلقها؟
واحد قالوا ليهو الجماعة انت وزارة الداخلية بتاعتك مخوفاك ..
قال ليهم والله ياجماعة .. وانتو ما رايدني حليفة ..
لمن تضرب لي تلفون .. اقرص فرملة واجنب بره الشارع .. حتى افتح التلفون .goood

رأفت ميلاد

18-12-2009, 10:44 PM

يا ود الزرق أنا لاقيتك فى الأسافير دى ..كان ماتشابه أسماء .. بس أنا كنت بإسم حركى (نسيته) وكان أول وآخر مرة أعملا ..

هسة بقدم ليك أوراق إعتمادى عديل ..

وكل سنة وأنت طيب

فتحي مسعد حنفي

18-12-2009, 10:48 PM

ودالزرق

19-12-2009, 02:39 AM

يا ود الزرق أنا لاقيتك فى الأسافير دى ..كان ماتشابه أسماء .. بس أنا كنت بإسم حركى (نسيته) وكان أول وآخر مرة أعملا ..

هسة بقدم ليك أوراق إعتمادى عديل ..

وكل سنة وأنت طيب

رافت ميلاد ..
بالتاكيد .. اتلاقينا عدة مرات .. سودانيز اورغ ..ودوت كوم . النيلين ..

اشكرك

ودالزرق

19-12-2009, 04:35 AM

لو وشوش صوت الريح في الباب
يسبقنا الشوق قبل العينين ..

ودالزرق

20-12-2009, 05:11 PM

(الموج) شخصية سودانية مليئة بالطرفة والمواقف السودانية الأصيلة التي قل أن تجد لها مثيلا في حاضرنا الراهن .. رحمة الله عليه .. من أبناء قرية الزرق .. وفي بدايات مراحل تكوين القرى .. أو بمعنى دقيق مع بداية تلمس التنمية والسعي نحو جلب خدمات للقرى بالمنطقة .. اجتمع أهل القرية بعد إحدى الصلوات التي اعتادوا أن يناقشوا بعدها قضايا القرية.. وقرروا أن يكون للقرية صهريجاً للمياه، لان معاناة الأهل ازدادت خاصة وان الفتيان والفتيان منذ الصباح الباكر يضعون سروجهم المصنوعة من شجر (السلم) والقديد من جلود الأبقار .. وهمهم الوحيد أن يجلبوا أربع جركانات من المياه من النهر والذي يطلق عليه عادة (البحر) !!
اجتمع عدد من أهل القرية الذين لا تسقط لهم كلمة عند البقية ، وفرضوا على الجميع مبلغ معين من المال بالتساوي حتى يكون (مسيرا) للشخص الذي سوف يذهب للمحافظة أو رئاسة الإقليم في ذلك الوقت .. وتوافق الجميع على المبلغ وأصبح الناس تريد ترشيح شخص لديع القدرة على مخاطبة (الحاكم) ولان التعليم وقتها لا يتوافر بالقدر الكافي او غير موجود ، لذلك كان الناس عندما يريدون شخص يمثلهم خارج القرية يرشحون من عركته الحياة ولديه القدرة على الإفصاح .. وان يكون مظهره مهيب بعض الشئ .. وعادة هذه المواصفات تتوافر في شيخ القرية او زعيم القبيلة أو أو...الخ .
و(الموج) لأنه كان يمتلك المال لدربته على التجارة ومعرفته بأسرارها جمع قدر غير قليل من المال وكان لديه (كنتين) دكان في القرية يفتح على الشارع (درب العربات) والعربات حينها كانت قليلة ، الا (كومرالحيكومة) .. وعندما يمر الكومر بالقرية رائحة البنزين الغريبة على اهالي القرية تظل عالقة بالجو لساعات !!
وقع الاختيار على عمنا علي عبد الرحيم (الموج) وهو شخص مهيب .. وقيافة .. وكليم بمعنى انه يعرف ان يجود الحديث !! أعطوه المبلغ الذي جمع من اهالي القرية وودعوه لياتى إليهم بالصهريج .. وكأن الصهريج موجود.. فقط يريد (الموج) ان يأتي ليأخذه !! من كثرة الانتظار الذي عاشه اهالى القرية في عودة الموج ومعه الجرارات تحمل الحديد ..
وبعض الناس لا يتخيلون ( أيه معنى صهريج) !! وماهية الفائدة التي سيعود بها لأهالي المنطقة !! فقط فرضت عليهم مبالغ ودفعوها لان لا احد يجروء على أن يخالف الجماعة.. ويقال ان في إحدى القرى عندما وضعوا لها صهريجا وشبكة مياه للمنازل .. ان إحدى النساء صاحت بأعلى صوتها : (أتاريها الموية جنبنا في الحيطة ونحن ما عارفنها) !! و ( الزمن ده جت نرد من البحر فوق روسينا؟).
مر يوم يومين ثلاثة والناس في انتظار بص شندي ابورجيلة هو البص الوحيد الذي ياتي من المسيكتاب جنوب (الساعة 1 ص) يمر بالقري حتى يصل الى شندي الصباح . والأطفال أيضا ينتظرون الموج ليأتي إليهم بما سمعوه من آبائهم وأمهاتهم .. والموج لم ياتي بعد !!
والناس يذهبون الى احدي القري التي تربطهم بها علاقات اجتماعية ويشاركونهم السراء والضراء .. لوفاة امرأة .. واللوري الوحيد الموجود في القرية يقلهم إلي حيث مكان العزاء .. صيوانات .. عمم بيضاء .. وجماعات ووحدانا في طريقه الى بيت العزاء .. توقف اللوري ونزل من اهالي القرية وفي طريقهم الى الصيوان .. قابلوهم أهل العزاء واقين في صفوف متراصة .. وعندما تبقت مسافة أمتار من الصيوان .. تسمع للعصى صوتا في الارض ..( رت .. رت .. رت) .. الفاتحة ااااجماعة .. الفاتحة الفاتحة) .. فإذا بهم يرون (الموج) ضمن اهالي العزاء رافعا يديه الى السماء بالفاتحة!! البعض لم يقرا الفاتحة من شدة التفكير في سبب مجئ الموج الى هنا !! غريبة الراجل ده جاء من وين ؟ و(الصهريج عمل فيهو شنو؟) .. اعتملت في ازهان الناس اسئلة حيرى .. لكن المكان ليس مكان اسئلة .. والمصاب جلل ..
اهل القرية نهضوا بعد اداء الواجب وتوجهوا الى اللوري .. و(الموج) ظل في مكانه .. ولم تنقطع سيرته طوال مسيرة اللوري الى القرية .. (يا خي ما قالنا أي شي !!) .. (انت يا فلان ما سألتوا ؟) .. ( ياخي اسألوا بي وين لفلان داك ياخي اداني معاهو كلمة!! ) .. يومين والموج جاء الى القرية .. لا صهريج .. ولا ....... !! . بعد الصلاة أيضا لم يقوم بتنوير أهالي القرية عن موضوع الصهريج .. واحد من الجماعة: اها عملت شنو حمد لله على السلامة .. اجاب بسرعة : والله مشيييت شندي – وهو مع ابداعه في الافهام – كان كلامه ياتي واحدا تلو الاخر !! وهذا الضرب من الحديث يسمى في عرف اهل المنطقة (قعيد حديث ).. مشيييت شندي وانا في السوق جاء واحد يسأل من فلان .. وقلت ليهو خير انشاء الله .. قال لي : في امراة في المستشفي اتوفت .. ومعاها مرافق .. بس فتشنا ليهو ما وجدناهو .. ومشيييييت مع الراجل ولقيتها دي فلانة بت فلان .. وفتشت لي اخوها مالقيتو .. بعديييين .. عارضه احد اهالي القرية لم يحتمل تطويل الحديث .. ( ياخى ادينا كلمة وغطايتها!!) .. الموج : (ياجماعة ما تخلوني اتم ليكم كلامي.. الله!! ) .. اها قول .. احكي !! بعديييين مشيت لقيتها اتوفت .. جريت السوق وحضرت الكفن .. واتفقت مع بتاع (بوكسي) .. ورفعت الجنازة وجيت .. ولمن دفناها .. و .. قاطعه اخر (ياخي .. نحن مالنا ومال فلانة ياخي .. صهريجنا عملت لينا فيهو شنو؟) .. والموج غضب .. وتململ في قعدته .. يا جماااعة .. يا جماااعة .. انتو لو ما رسلتوني فلانة دي بلاقيها وين انا؟؟!!
بعدها لم يتكلم احد عن الصهريج .. وعرفوا ان القروش ذهبت في واجب .. ولو سالوهو عن الموضوع اكتر كان عمل معاهم مشكلة .. انتو الواجب ما بتعرفوهو ؟؟ اللهم ارحم عمنا على عبد الرحيم ( الموج ) واسكنه فسيح جناتك .

فتحي مسعد حنفي

20-12-2009, 05:14 PM

اوعي دا يكون أبو صديق الموج صاحبي...أتاريهو كا ما أسألو عن أبوهو ما يجاوبني;):D

ودالزرق

20-12-2009, 06:10 PM

اوعي دا يكون أبو صديق الموج صاحبي...أتاريهو كا ما أسألو عن أبوهو ما يجاوبني;):D

لا لا اسم على مسمى .. صديق الموج دايما بذكرني بالموج الحقيقي ..

واحتمال ابوهو برضو اكان بحر بشيل العوام .!!