الفلاتة والهوسا....وجدل الهويّة [الأرشيف]

الرشيد اسماعيل محمود

05-03-2010, 02:38 PM

جدل كثيف ولغط يدور عن قبيلة الفلاتة لدرجة انه كثير من الناس يخلط دون قصد بين الفلاتة والهوسا علي الرغم من انه توجد فروقات شاسعة مابين القبيلتين، حيث ان الفلاتة هم في الاصل بقارة حرفتهم الاساس الماشية يرتحلون بها شمالا في الصيف وجنوبا في الشتاء، ولهم ثروة حيوانية ضخمة اضافة الي الاختلاف البيّن في السحنات والملامح. حيث نجد أن الفلاتة يميلون الي اللون الفاتح او الأسمر مع انف دقيق مستقيم وقامة مائلة للطول علي الأرجح، حتي أصبح المثل السائر في دارفور التي عشتُ انا بها معظم حياتي (ناس تلس سمحين وملس) كناية عن الجمال والنضار.
أمّا الهوسا، فسحناتهم افريقية صرفة، حيث اللون الافريقي الداكن نوعا ما، والأنف المفلطح والجسم الممتليء القوي. وحرفتهم الزراعة والتجارة ولا علاقة لهم بتربية الماشية علي الأرجح.
الفلاتة في السودان لهم عاصمة رئيسية وهي مدينة تلس في جنوب دارفور
ولهم فيها نظارة بقيادة الناظر الحالي أحمد السّماني البشر وهي قبيلة كبيرة جدا ومتفرعة وتحتوي العديد من البطون.
الإيكا والإيبا :
هناك مقولة شفاهية رواها لي أحد كبار الفلاتة في نيالا، حيث ذكر لي أنّ جدّهم الكبير أنجب توأمين، أحدهم رضع فسّمي( إيكا) واصبح بعدها معرّب بلسان عربيٍّ مبين.
أمّا الآخر الذي لم يرضع لبن أمه فسُمي (إبا )، وأصبح رطّاني، بلسانٍ غير عربيٍّ مبين. وعليه أصبح للفلاتة قسمين:
• إيكا:
يتحدثون العربيّة فقط وتضم:
-أم عثمانة (وتنطق عندهم أُم عتمانة)..
-أولاد يحي.
-أولاد الشيخ.
-حجّاج.
-نقرة.
- كيسو
-أولاد عيش
• إيبا :
لايتحدثون العربية وتضم:
-أبائن.
-كانمو.
-لوي.
-واررة
-فولبة هيلليجة
-أسوجي
إختلف المؤرخون كثيراً في نسب الفلاتة، حيث ينسبهم البعض إلي فلات ابن عقبة بن نافع، في حين أنّ بعض المصادر تنسبهم الي قبائل ألمي يورو التي هاجرت من بلاد العرب قديما.
هنالك نوع ثالث للفلاتة أثروا حياة المدن ولم يهتموا بلغتهم وهم اليوربا ، أو كما هو مشهور فى السودان عيال عيش، وهؤلاء من مناطق تلس وبرام وقريضة .
واليوربا مثال لهم المذيع إسلام صالح بيلو والمرحوم دكتور انس صالح بيلو، وهم فلاتة يوروبا كما ذكر لي والدي حيث كان والدهم معلما في مدرسة زالنجي الوسطي
تتلمذ علي يديه الوالد.
والطريف في الأمر أن أحدهم حينما ذكرتُ له هذه المعلومة قال لي مندهشاً (ياخي بتبالغ لكن).
كلّ هذا بسبب الخلط الغير متعمد -كما ذكرت سابقا- بين الهوسا والفلاتة، ودونكم النكات التي تتحدث عن الفلاتة وتُروي بلهجة الهوسا، مما أدّي لتعزيز فرضية اندغام قبيلة
الفلاتة وتماهيها مع الهوسا وهذا لعمري خطأ مبين.

في نيالا هنالك حيٌّ عريق يسمي حي الجبل، يقع شرق المدينة، وهو منطقة مقفولة للفلاتة، غالبهم فلاتة أبائن جدهم ( إبا)، ولسانهم غير عربي يعني(رطّانة)، مهنتهم الأساسية الرعي، حيث كل اهتماماتهم الماشية، يعيشون عليها وعلي منتجاتها من لحوم وألبان.
يجاورهم وفي بقعة مقدّرة من الحي الهوسا، الذين يعتمدون في معيشتهم علي التجارة والمهن الأخري المختلفة ولكن ليس الرعي، واكثر مايتميز به نساء وبنات الهوسا، تجارة الاشياء البسيطة وهم ماهرون ومشهورون جدا بصناعة الاقاشي والقدوقدو والمرارو( الفول المدمس) والتسالي وكل منتجات الدّرت مثل الفول ذوالفلقة الواحدة ويطلق عليه الفول أبوالقوي وعيش الرِّيف والهالوك..
وهذه حرفة برع فيها الهوسا تحديداً. أمّا حي زنقو الشهير في نيالا، فهو منطقة مغلقة تماما للهوسا، وهو حي مشهور بالأقاشيه.

أبوبكر عباس

05-03-2010, 04:57 PM

بابكر مخير

05-03-2010, 05:06 PM

مبروك البوست الأول
أيوي يوي يوي...

يا الرشيد كنت طرحت علي سارا فرضية إنو الفلاتة يكونوا من البربر..

يبدو انو رجوعم لفلات بن عقبة بن نافع صلبطة ساكت زي بتاعة رجوع الجعليين للعباس..

البوست كمان شايف فيهو اندغام كبير

ياهو جنس طبيزك دآ البتسبب في قفيل البوستات;)

الرشيد يابا حلو كلامك، لكن المطرطش دآ:rolleyes:
بيجيب ليك الهوآ:eek:

الرشيد اسماعيل محمود

05-03-2010, 05:27 PM

المشاركة الأصلية كتبت بواسطة بابكر عباس http://sudanyat.org/vb/images/buttons/viewpost.gif (http://sudanyat.org/vb/showthread.php?p=204634#post204634)
مبروك البوست الأول
أيوي يوي يوي...

يا الرشيد كنت طرحت علي سارا فرضية إنو الفلاتة يكونوا من البربر..

يبدو انو رجوعم لفلات بن عقبة بن نافع صلبطة ساكت زي بتاعة رجوع الجعليين للعباس..

البوست كمان شايف فيهو اندغام كبير

عباس الله يبارك فيك
انت فرحان عشان البوست الأوّل، ولاعشان قاصِّي لي وراجيني بالدو الديناري ..؟
انت عارف ياعباس انا بتفق معاك تماما في فكرة السلبطة .
وده إحساس الوعي بالهامش المتأصِّل في كلِّ القبائل السودانية، اللي دايما بتحاول تثبت عروبتها عن طريق إدعاءات تخلو من السند التاريخي الرّامز.
فقط هي اقوال شفاهية لاتقدِّم أو تؤخر.
في الدول العربية مابتلقي ليك زول بقول ليك انا جدي العباس ولاحمزة، لأنو حيكون لازم فايدة ولا يختلف اثنان في عروبية آخر..
بس عندنا هنا أيِّ واحد بحاول يثبت عروبيته ويستعلي علي آخرين لم يفعلوا مثله.

الرشيد اسماعيل محمود

05-03-2010, 05:39 PM

المشاركة الأصلية كتبت بواسطة بابكر مخير http://sudanyat.org/vb/images/buttons/viewpost.gif (http://sudanyat.org/vb/showthread.php?p=204637#post204637)
ياهو جنس طبيزك دآ البتسبب في قفيل البوستات;)

الرشيد يابا حلو كلامك، لكن المطرطش دآ:rolleyes:
بيجيب ليك الهوآ:eek:

والله حلو كلامك انت يا دكتور..
طبّيز بابكر أنا خابرو..
فــ ما تشيل هم.

أبوبكر عباس

05-03-2010, 05:39 PM

عباس الله يبارك فيك
انت فرحان عشان البوست الاول
ولا عشان قاصي لي وراجيني بالدو الديناري :D:D
:confused:
أول شئ في المشاركة دي حابي أقول انو انا لي يوميين إكتشفت لي إكتشاف عظيم:
إكتشفت انو دكتور بابكر مخير دا من النوابغ السودانية القليلة و الرجل أسهم مساهمة فعالة في بناء دولة الأمارات الحاضرة... كدي الموضوع نخليهو لانو حا نفتح ليهو بوست بحالو و هسع بلم في الداتا..... المشكلة إنو الرجل بقى بالنسبة لي محترم اكتر من (كيشو زاتو) و ما عارف تاني نقص ليهو كيف!!

نرجع للرشيد:
دو الديناري محتفظ بيهو، لكن الموضوع بتاعك جيد و دايرك تواصل فيهو..

في كلام لكاتب سوداني بقول فيها انو حفيد العباس او ولدو البرجعوا ليهو الجعليين، هو الوحيد الكان ما عندو أولاد!!

أميرى

05-03-2010, 05:41 PM

الرشيد يا صاحبى
انا سكنت لغاية ما بلغت العشرين من عمرى فى الديوم الشرقية
وعشش فلاتة فى النصف تماما بين الامتداد والديم ...
المدرسة الابتدائية كنا حوالى 40 فى الصف بين طالب وطالبة
الفلاتة كانوا بكونوا تلت الفصل...جاورناهم وصادقناهم وزرنا بيوتهم
وزاروا بيوتنا..............ما كلنا سودانيين ولا شنو؟

بس سؤالى بعد ما انت جيت بينتا هنا انو فى اختلاف وفرق بين الفلاتة والهوسا
الناس الحاليا موجودة فى الانقاذ ومايو ....فلاتة ولا هوسا؟
وهل الفلاتة مثلا اعلى مقام من الهوسا او العكس؟
يعنى هل الفلاتى بيزعل لو انا قلت ليهو انت هوساوى؟ وحيفتكرنى زى القللت من شأنه؟
بالمناسبة لى يوم الليلة مابعرف افرق بين الشايقى والرباطابى....

وعلى فكرة...
مبروك البوست الأول
أيوي يوي يوي...

:D

الرشيد اسماعيل محمود

05-03-2010, 05:55 PM

المشاركة الأصلية كتبت بواسطة بابكر عباس http://sudanyat.org/vb/images/buttons/viewpost.gif (http://sudanyat.org/vb/showthread.php?p=204645#post204645)
أول شئ في المشاركة دي حابي أقول انو انا لي يوميين إكتشفت لي إكتشاف عظيم:
إكتشفت انو دكتور بابكر مخير دا من النوابغ السودانية القليلة و الرجل أسهم مساهمة فعالة في بناء دولة الأمارات الحاضرة... كدي الموضوع نخليهو لانو حا نفتح ليهو بوست بحالو و هسع بلم في الداتا..... المشكلة إنو الرجل بقى بالنسبة لي محترم اكتر من (كيشو زاتو) و ما عارف تاني نقص ليهو كيف!!

نرجع للرشيد:
دو الديناري محتفظ بيهو، لكن الموضوع بتاعك جيد و دايرك تواصل فيهو..

في كلام لكاتب سوداني بقول فيها انو حفيد العباس او ولدو البرجعوا ليهو الجعليين، هو الوحيد الكان ما عندو أولاد!!

كلامك الأخير عن العباس اذا صح بيعزز فرضية احساس الدونية المعشعش في وعي الشخصية السودانية منذ ازمان.
والغريبة مالقينا لينا واحد قال انا جدي بلال بن رباح.
بجيك يابابكر بالراحة بعدين، عشان الموضوع لسع محتاج تفكيك واضافات.

الرشيد اسماعيل محمود

05-03-2010, 09:02 PM

المشاركة الأصلية كتبت بواسطة أميرى http://sudanyat.org/vb/images/buttons/viewpost.gif (http://sudanyat.org/vb/showthread.php?p=204646#post204646)

بس سؤالى بعد ما انت جيت بينتا هنا انو فى اختلاف وفرق بين الفلاتة والهوسا
الناس الحاليا موجودة فى الانقاذ ومايو ....فلاتة ولا هوسا؟
وهل الفلاتة مثلا اعلى مقام من الهوسا او العكس؟
يعنى هل الفلاتى بيزعل لو انا قلت ليهو انت هوساوى؟ وحيفتكرنى زى القللت من شأنه؟
بالمناسبة لى يوم الليلة مابعرف افرق بين الشايقى والرباطابى....

سؤالك في غاية الموضوعية يا أميري..
انت عارف، العلاقة مابين الفلاتة والهوسا علاقة نشأت مابين أصحاب ارض (مستقرين) وهم الهوسا، وقبائل رعوية متجولة (الفلاتة ) الذين عملوا علي نشر الدين الإسلامي. ونسبة لما تميّزوا به من معرفة بأمور الدين والفقه، اضافة إلي شجاعتهم وإقدامهم، فقد امتلكوا زمام القيادة في كل الأراضي التي نزلوا بها.
أمّا:

وهل الفلاتة مثلا اعلى مقام من الهوسا او العكس؟
يعنى هل الفلاتى بيزعل لو انا قلت ليهو انت هوساوى؟ وحيفتكرنى زى القللت من شأنه؟

يقول جعفر ضحية:
ظل الفلاتة ينعمون بمقام خاص لدى الهوسا. فأينما وجد الفلاتة توافدت إليهم مجموعات الهوسا و رأسوهم طواعية على أمرهم و قدموهم على أنفسهم إكراما لقدرهم الجليل فى نشر الدين و المعرفة و حسن الخلق و الرياسة و الشجاعة و الإقدام. و ما يلاحظ من إدعاء النسب إلى الفلاتة، فيتم ذلك لعظمة دورهم و علو شأوهم بمنطقة غرب أفريقيا و هى ربما شبيهه بنفس الميل الملاحظ للإنتماء إلى المجموعات العربية بالسودان تأكيدا لحبهم للإسلام و المسلمين. هذا بجانب أن الإنتماء للفلاتة يساعد الهوسا فى الحصول على الأوراق الثبوتية بالسودان إستفادة من حقيقة أن الفلاتة لهم وجود قديم بالسودان يفوق حتى كثير من المجموعات التى تدعى أنها العرقيات الأصلية صاحبة الأرض بالسودان
الفلاتي يا أميري بزعل جدّاً اذا قلت ليهو انت هوساوي..
لأنو في فهمو إنو الهوساوي أقلّ منه منزلة وشأناً.

الرشيد اسماعيل محمود

05-03-2010, 10:20 PM

المفارقة انو الفلاتي في الفهم الشائع هو كل من هاجر من افريقيا (تحديدا من غرب افريقيا الي السودان) لذلك كلمة فلاتي تطلق عليهم دون تمييز.
لذلك فإنّ مفردة فلاتي تصبح كأنها وصمة أو نبذ، لأن ذلك يعني انتفاء العنصر العربي (المتهافت عليه) من قبل القبائل السودانية كأن غير العرب ليسوا ببشر (إن اكرمكم عند الله اتقاكم..الآية).
يقول شوقي بدري:

أنا لا أعفي نفسي من الغباء والعنصرية والشوفونية وكما ذكرت في مكتبة شوقي بدري في سودانيزاوولاين إنني عندما في الثانية عشر شاهدت فتاة صغيرة تقوم بضرب شقيقي بابكر ، وهي تقف أمام بوابة بنك الصمغ في السردارية أم درمان . والفتاة في السابعة أو الثامنة من عمرها . فقلت لها يا فلاتية ، وكأنني أحسب أن الكلمة إساءة بليغة ، فقالت لي : الفليتة ووجع ألقـ ... ‘‘ .
فأحسست بالخجل ولمت نفسي ، ولا أزال إلي اليوم ألوم نفسي ، وكنت أتذكر حاجة حوة التي كانت تأتي كثيراً إلي منزلنا ، وكانت والدتي تهب لمقابلتها بالترحيب ، وعندما تكون أمام صينية الغداء أو الفطور تعزم عليها

لذلك نجد الفلاتي يحاول اثبات عروبته من خلال نفي انتماء الهوسا إليه.
وتلك إحدي علامات العنصرية التي سببها عدم الإلمام الكافي للخط الفاصل بين الهوسا والفلاتة، حيث تختلف القبيلتان اختلافا كاملا بدءا من اللغة حتي العادات والتقاليد .
اثناء مروري علي إحدي المدوّنات الإسفيريّة، عثرتُ علي حديث شاب فلاتي عاتب علي موضوع النكات التي تقال عن الهوسا وتُروي علي أساس أنها عن الفلاتة..
يقول:
الناس البقولو عنهم النكات ديل ما فلاتة وانما اسمهم الهوسا لكن في السودان هم المعروفون بالفلاتة عشان كدة نحن كفلاتة زعلانين شديد علي الحكاية دي لانو في فرق بين الواحد يقول ليك نكتة عن الدناقلة او الشوايقة وهو يقصدهم فعلاً وبين يقول نكتة عن الفلاتة وهو قاصد الهوسا من هنا ياتي الفرق وانا بشوف الكلام بهذه الطريقة مثله ومثل توجيه اتهام لشخص بريئ
لكن هل هذا يعني -إن جاز لنا الاستشهاد بحديثه- هل يعني أنّ كل مطلب الفلاتة فقط التمييز بينهم والهوسا علي أساس الفروقات المذكورة أعلاه؟؟
وهل انتفاء انتماء الهوسا إلي الفلاتة يثبت عروبة الاخيرة؟؟

سارة

05-03-2010, 11:07 PM

من حق اى فلاتى يعتز ويفخر بقبيلته

وليه تقولوا لينا هوسا ؟؟؟؟؟؟؟؟؟؟ الفلاتة مالهم وكلمة فلاتة عيبها شنو؟؟؟loooollooool

جاية تعبانة الاسبوع دا كلو ورديات زى الطين:mad:

بس افضى واجيكم للكوماجgooodgooodgooodgoood

فتحي مسعد حنفي

05-03-2010, 11:18 PM

أنا ما عارف الغلاط في شنو:confused:
الحاجة المعروفة انو قبيلة الفولاني هي أكبر القبائل الأفريقية بلا منازع وتمتد في كل بقاع أفريقيا وخاصة غرب أفريقيا وتصل حتي السودان ..

الرشيد اسماعيل محمود

05-03-2010, 11:21 PM

سارة

05-03-2010, 11:27 PM

اماااااك
الفلاتية جات للكوماج
ده حالتو المناظر بس
الفيلم يبقي كيف:D;)
سارة
راجينك بس تعالي

تجيك ام كلعلعgooodgoood

انا هسى نعسانة

بجيك الصبح كان صبحنا حييين

وانت وبابكر ما ترجونى فى البوست دا

الرشيد اسماعيل محمود

05-03-2010, 11:47 PM

المشاركة الأصلية كتبت بواسطة فتحي مسعد حنفي http://sudanyat.org/vb/images/buttons/viewpost.gif (http://sudanyat.org/vb/showthread.php?p=204689#post204689)
أنا ما عارف الغلاط في شنو:confused:
الحاجة المعروفة انو قبيلة الفولاني هي أكبر القبائل الأفريقية بلا منازع وتمتد في كل بقاع أفريقيا وخاصة غرب أفريقيا وتصل حتي السودان ..

يا عم فتحي..
انت قلت الحاجة المعروفة..
طيّب اذا كانت المعروفة دي مجرّد روايات فيها الكتير من الغموض والتعميم..؟
يبقي من واجبنا إننا نحاول إزالة اللبس عن الغموض ده..
وأهو بنحاول.

الرشيد اسماعيل محمود

05-03-2010, 11:55 PM

المشاركة الأصلية كتبت بواسطة سارة http://sudanyat.org/vb/images/buttons/viewpost.gif (http://sudanyat.org/vb/showthread.php?p=204694#post204694)
تجيك ام كلعلعgooodgoood

انا هسى نعسانة

بجيك الصبح كان صبحنا حييين

في انتظارك سارة.
في انتظارك.

فتحي مسعد حنفي

06-03-2010, 12:14 AM

عليك نور ياعمنا
انت قلت الحاجة المعروفة
طيب اذا كانت المعروفة دي مجرد روايات
فيها الكتير من الغموض والتعميم
يبقي من واجبنا انو نزيل اللبس عن الغموض ده
خليك معانا قريب

تعرف يالرشيد قبل حوالي 5-6 سنين كنت في زيارة لي داكار في السنغال وكنت نازل مع صديق سنغالي كان مرشح لرئاسة السنغال واسمو ابراهيم سيسي أو فامو والتي تعني في لغتهم الخليل..مشيت معاهو وزرت أحد زملاء الدراسة في جامبيا التي تقع وسط السنغال زي البريمي في العين..في الرحلة دي عرفت من ابراهيم مضيفي معلومات كتيرة عن الفولاني واكتشفت انهم شايفين نفسهم القبيلة الأولي في أفريقيا بسبب انتشارهم في معظم دول أفريقيا.ومنهم المتعلمين والدكانرة وحتي في السودان تلقي مثلا عائلة جلالين الفي الأبيض معظم أبناءها متعلمين زي الدكتور آدم جلالين والدكتور المرحوم يوسف جلالين وغيرهم كتير.. والفلاتة اذا افتخرو بنفسهم وأصلهم فهم معاهم حق...

الرشيد اسماعيل محمود

06-03-2010, 12:48 PM

سارة:
البوست الرفعتيهو بيتكلم عن الفلاتة كقبيلة؛ تاريخ؛ عادات وتقاليد..
والبوست بتاعي ده موضوعو غير خالص والعنوان واضح.
انا بتكلم عن الخلط والإلتباس بين قبيلتين هم الفلاتة والهوسا في جدلية مستمرة منذ ازمان.
انا عشت وسط الاتنين وزاملت فلاتة وهوسا وجاورتهم لسنين..
عشان كده بس عايز أوضح وأساعد في إزالة لبس حاصل في التمييز بين القبيلتين دون اعلاء شأن قبيلة علي الأخري.

المشاركة الأصلية كتبت بواسطة مي هاشم http://sudanyat.org/vb/images/buttons/viewpost.gif (http://sudanyat.org/vb/showthread.php?p=171699#post171699)
مساكم الله بالخير والسعاده..

قفت لي هسي اكتب عن سارة..من قبييييييييل في بالي..
مودتي ليها
في اول لقاء كنا في العربية مع اختنا(مجدلية) ربنا يطراها بالخير كانت بتتكلم بلغة ما فهمناها انا ومجدلية، (ولأني شمشارة ودايرة اعرف اي شي)سألتها دي اي لغة؟؟قالت لي رطانة فلاتة، واندهشت وقلت ليها وانت عرفتيها كيف؟؟فقالت لي ان فيها جزء فلاتي!!أحببت منها ذلك..
مودتي

قولي واحد يا سارة..
اكيد مي هاشم مستغربة ومندهشة لأنو المعلومات الكانت واصلاها ماكافية عشان تحجب
اوتكبح جماح دهشة عفوية صادقة.

الرشيد اسماعيل محمود

06-03-2010, 12:57 PM

المشاركة الأصلية كتبت بواسطة سارة http://sudanyat.org/vb/images/buttons/viewpost.gif (http://sudanyat.org/vb/showthread.php?p=204686#post204686)
من حق اى فلاتى يعتز ويفخر بقبيلته

وليه تقولوا لينا هوسا ؟؟؟؟؟؟؟؟؟؟ الفلاتة مالهم وكلمة فلاتة عيبها شنو؟؟؟loooollooool

بس افضى واجيكم للكوماجgooodgooodgooodgoood

بل ومن حق أيّ شخص أن يفتخر بإنتمائه القبلي، لأنّ القبيلة ياسارة بمفهومها الإسلامي تقوِّي الوحدة بين الشعوب.
ولكن بمفهومها الجاهلي تعمل علي التفريق والإستعلاء..فالأولي أساسها(إن اكرمكم عند الله اتقاكم)، والتانية أساسها فلان وعلان ولون وعرق وأصل وفصل.
وليه تقولوا لينا هوسا ؟؟؟؟؟؟؟؟؟؟ الفلاتة مالهم وكلمة فلاتة عيبها شنو؟؟؟loooollooool
ده الأنا عاوز أوصِّلو
إنو الفلاتة والهوسا قبيلتين في كامل التمايز والإختلاف، لكل قبيلة عاداتها وتقاليدها الخاصّة..لغتها الخاصة وأصل مختلف عن الأخري من غير تعنصر واستعلاء
ملحوظة:
علامات الاستفهام الكتييييرة الانتي خاتاها فوق دي بتفيد الاستنكار اكتر من كونها استفهام.

الرشيد اسماعيل محمود

06-03-2010, 01:07 PM

سارة ..
بخصوص السلبطة الإتكلمنا عنها انا وبابكر عباس..
كانت مجرّد إسقاط في عموم السِّياق، وليس بالضرورة -ولايجب- أن تكون قبيلة الفلاتة هي المعنية بها.
شوفي الخال الشايقي قال شنو:

المشاركة الأصلية كتبت بواسطة خالد الحاج;
وهنالك مؤرخون غيره أورد الدكتور أبوسبيب فرضياتهم التي تدعم أن أصل القبائل المستعربة إنما هي أصول نوبية والحديث هنا يطول.
وأنا شخصيا أستخلص من كل ذلك أن أصل القبائل "العربية" في السودان ما هو إلا "هجين" . وهذا يرجعنا إلي موضوعنا أننا أفارقة أكثر مما يظن البعض.
وأنا بالجد في هذا الخصوص متصالح "جدا" مع نفسي وأعتبر نفسي سوداني ولا أعتبر "هجين" سبة علي الإطلاق وهي خيرا علي كل حال من الإقتتال حول أمر لا يودي ولا يجيب.وكما ذكرت من قبل وجودي في الغرب الأوروبي جعلني أستوعب تماما معني أن تكون غريب في مجتمع وأن يمارس عليك التمييز فقط للون سحنتك .
...

المصدر:
http://sudanyat.org/vb/showthread.php?t=10805&page=4

سارة

06-03-2010, 01:17 PM

اها انا جيتك

gooodgooodgoood

سارة

06-03-2010, 01:21 PM

الرشيد يا جميل

الموضوع ليس موضوع سلبطة ولكن الموضوع اكبر من كدا بكتيير اذا صدقت الرواية

التى تقول كلنا هجين او كلنا اصولنا غير معروفة اقصد بكلنا كسودانيين فمن حقنا ان

نعرف الى اى جهة ننتمى

سؤال جادى جدا جدا هل عرب يعنى لون فاتح وشعر ناعم؟

وماهى اوصاف العروبة او ماهى مواصفات العربى؟

عملنا استفهام واحدة عشان ما يحصل ليك more confused

أبوبكر عباس

06-03-2010, 01:55 PM

...
بخصوص السلبطة الاتكلمنا عنها انا و الكاشف بابكر عباس;)
...:D:Dالكاشف أخوك لا ينكر عروبة القبائل الجعلية في السودان، لكن شاكي في نسبم للعباس...
بالنسبة للفلاتة أنا شاكي في نسبم العربي يعني الصلبطة بتاعتم صلبطة عروبة و صلبطة الرجوع لفلات بن عقبة بن نافع (شوفهم إختاروا أكبر واحد وصل لتخوم المنطقة ديك)؟!.
الفلاتة في إفريقية أقدم من عقبة بن نافع....
تزين رجال الامبرورو (من الفلاتة) بشبه الزينة بتاعة الرجال عند بعض قبائل البربر في الشمال الغربي لافريقية..

الرشيد اسماعيل محمود

06-03-2010, 02:12 PM

تعرف يالرشيد قبل حوالي 5-6 سنين كنت في زيارة لي داكار في السنغال وكنت نازل مع صديق سنغالي كان مرشح لرئاسة السنغال واسمو ابراهيم سيسي أو فامو والتي تعني في لغتهم الخليل..مشيت معاهو وزرت أحد زملاء الدراسة في جامبيا التي تقع وسط السنغال زي البريمي في العين..في الرحلة دي عرفت من ابراهيم مضيفي معلومات كتيرة عن الفولاني واكتشفت انهم شايفين نفسهم القبيلة الأولي في أفريقيا بسبب انتشارهم في معظم دول أفريقيا.ومنهم المتعلمين والدكانرة وحتي في السودان تلقي مثلا عائلة جلالين الفي الأبيض معظم أبناءها متعلمين زي الدكتور آدم جلالين والدكتور المرحوم يوسف جلالين وغيرهم كتير.. والفلاتة اذا افتخرو بنفسهم وأصلهم فهم معاهم حق...
عم فتحي مشكور علي الاضافات التي حتما تضيف وتثري
حديثك ده برجعنا للتصنيف والتعريف ومافي مشكلة
انا اضيف لكلامك ده انو
الفولاني دي قبيلة كبيرة جدا جدا لدرجة انو بسموها الشعب العظيم
انا بس حابي اركز في فلاتة السودان ديل وصلو البلد دي متين وكيف
اقرا معاي..
في كتاب (الفلاتة في افريقيا ومساهماتهم) يقول الطيب عبدالرحيم محمد الفلاتي:
برجع اصل الفلاتة الي قبائل جهينة وتميم اللذين هاجروا من الجزيرة العربية الي افريقيا لقلة المراعي هناك.
فسلكت تميم طريق الشام الي سيناء بينما جهينة واصلت الي الي منطقة ليبيا الحالية ثم انتشرت جنوبا حتي غانا الحالية.
عادت بعض الاسر من تميم الي الجزيرة العربية الي ان ظهر الاسلام..بعدها قاد احفاد هؤلاء العائدين حملة فتح غرب افريقيا بقيادة عقبة بن نافع فأسلم ملك الروم وهو ملك غانا وتزوج عقبة من ابنة الملك وتدعي بج منقو وانجبت له خمسة اولاد وبنتا واحدة وهم:
• عثمان تورو
• محمد فلان
• ابوبكر فلات
• عمر دردرو
• علي قردو
• وفاطمة شلفو
انتشر الاحفاد في كل افريقيا من البحر الاحمر وحتي فوتا تورو
الي ان يصل الكاتب:وسكن احفاد فاطمة شفو الذين هم من اب رومي ارض السودان وذلك حول مناطق الكبابيش وارض الشايقية وتشاد واريتيريا
وتزوج المجاهدون الذين رافقوا عقبة بن نافع الروميات والقبائل الاخري وانصهرواا معهم وزاوجوهم
ثم استشهد عقبة وكثير من المجاهدين وتوفيت زوجته منقو(مريم) مخلفين ورائهم ذرية انقسمت الي:
الفلاتة الاصليون وهم ابناء عقبة من ام رومية (منقو) ابنة ملك غانا.
الفلاتة بنو الروم الذين صاروا فلاتيين بسبب التزاوج والمصاهرة.
الفلاتة بنو العرب وهم ابناء المجاهدين الذين رافقوا عقبة بن نافع.
الفلاتة الجعفريون كما يسميهم محمد بيلو في كتابه (انفاق الميسور في تاريخ بلاد التكرور)
ومحمد سمبو الكلوي في كتابه( كنز الاولاد في تاريخ الذراري والاجداد) بأنهم من الفلاتة( توردبي)
انتسابا لجدتهم صفية بنت جعفر بن ابي طالب

حاشية:
الاقتباس منقول بتصرف لا يخل بالمعني
يتواصل

فتحي مسعد حنفي

06-03-2010, 02:15 PM

الكاشف أخوك لا ينكر عروبة القبائل الجعلية في السودان، لكن شاكي في نسبم للعباس...
بالنسبة للفلاتة أنا شاكي في نسبم العربي يعني الصلبطة بتاعتم صلبطة عروبة و صلبطة الرجوع لفلات بن عقبة بن نافع (شوفهم إختاروا أكبر واحد وصل لتخوم المنطقة ديك)؟!.
الفلاتة في إفريقية أقدم من عقبة بن نافع....
تزين رجال الامبرورو (من الفلاتة) بشبه الزينة بتاعة الرجال عند بعض قبائل البربر في الشمال الغربي لافريقية..

هو يابابكر عقبة بن نافع دا كان نافع ولا ما نافع أصلو فوتو كوبيير..علي اليمين الفلاتة ديل دايرين تلاتة زي جدنا نوح عشان يتنسبو ليهم..
حكاية الاختلاط ممكن تأثر بصورة آخرها انها تعمل قبيلة زي حكاية عروبة الجعليين لكن ما ممكن شعب يرجع لي شخص والا كان الاسبان أصلهم جاي من طارق بن زياد البربري والفلسطينيين لي صلاح الدين الأيوبي الكردي الشركسي..
تعرف سبب اللخبطة دي كلها انو الفلاتة في الشكل العام ما ممكن نقول عليهم ملامحم زنجية عشان فعلا بتحس انهم منحدرين من ريس مختلف غير باقي الأفارقة وفيهم ناس لعلمك لونهم أصفر وعيونم خضر البنسميهم عيون كديس وديل أكيد حسب النظرية بكونو من أصلاب الفايكنج الاسكندنافيين..جننتونا ياخ الفلاتي فلاتي والعربي عربي والخواجة خواجة وأنا وانت ورقصني ياجدع ودقي يامزيكة وأحرقي بعرك ياسارة والحاج دقو ما تفكو:Dgoood:Dgoood

ام التيمان

06-03-2010, 02:24 PM

سلام عليك يا الرشيد
اكتر شعب قى الدنيا معقد من اصلو السودانيين .
نحن افارقة ذو البشرة الفاتحة اللون زى الاحباش و التشاديين و الصوماليين و السنغال و مالى و مورتانيا و جميع الدول التى تقع فى جنوب الصحراء
وحتى الفلاتى لايرضى ان يقول انا فلاتى و خاصة اذا كان لونة فاتح و ايضآ اخوانا فى دارفور و الشرق ينكرون قبائلهم احساسهم بالدونية و خاصة اذا كان متعلم و له ثروة و نفوذ
الذين يفصحون عن قبائلهم اهل الجزيرة و الشمالية اعتقاد منهم انهم ينتمون للاصول العربية مع انو اهل الشمال نوبة ( رطانة) و اهل الجنوب لا ينكرون انتمائهم الافريقى
و انا بسأل اذا كان سكان شمال افريقيا عرب دخلوا مع الاسلام اين ذهبوا سكان افريقيا الاصليين
و كم نسبة العرب الذين دخلوا افريقيا .!!!؟؟.

الرشيد اسماعيل محمود

06-03-2010, 03:17 PM

المشاركة الأصلية كتبت بواسطة سارة http://sudanyat.org/vb/images/buttons/viewpost.gif (http://sudanyat.org/vb/showthread.php?p=204867#post204867)
الرشيد يا جميل

الموضوع ليس موضوع سلبطة ولكن الموضوع اكبر من كدا بكتيير اذا صدقت الرواية

التى تقول كلنا هجين او كلنا اصولنا غير معروفة اقصد بكلنا كسودانيين فمن حقنا ان

نعرف الى اى جهة ننتمى

سؤال جادى جدا جدا هل عرب يعنى لون فاتح وشعر ناعم؟

وماهى اوصاف العروبة او ماهى مواصفات العربى؟

الثابت ياسارة انو الخصائص المعيارية في الثقافة العربية للعربي، بتعتمد أوّل ماتعتمد علي اللون والشعر وشكل الأنف الدقيق الي آخر الحكاية.
يعني فكرة اللغة المشتركة دي خلينا منها وإلا لكان السودانيين الفي بريطانيا ديل خواجات للطيش.
المشكلة ياسارة إن المعايير دي كوّناها نحن برانا وبدينا نقيسها علي نفسنا نحن السودانيين.
أقري معاي مقتطف من أزمة الهوية في شمال السودان ..بقلم د.الباقر العفيف وترجمة الخاتم عدلان:

فعندما افاق هذا الفرد علي ان الخصائص امعيارية المثالية للهوية العربية
هي البشرة البيضاء والشعر الناعم المرسل والانف المستقيم وجد انه يفتقر الي بعض هذه الخصائص والصفات واستشعر الحاجة للحصول عليها فصار مفهوما ان اللون كلما مال الي البياض كلما صار الشخص اقرب الي المركز
وكلما صار ادعاؤه الانتماء العربي اكثر مشروعية وعندما تتعثر الاجابة لشرط اللون يحاول الفرد ان يجد اجابة ومخرجا في الشعر للبرهان علي اصله العربي فكلما كان الشعر ناعما كلما كان الشخص اقرب الي المركز
وعندما يفشل في امتحان الشعر هو الاخر يحاول ان يجد له مخرجا في شكل الانف وكلما كانت قريبة من المعايير العربية للانف كلما كان ذلك افضل علي الاقل ستكون شاهدا علي اصل غير زنجي .

ياسارة للأسف المعايير دي وضعناها واتبذرت في العقل الجمعي وأصبحت هي المعايير
المثالية..يعني لمّا يقول ليك عربي إطلاقا ماممكن خيالك يخت صورة شخص داكن اللون ذا انف مفلطح و شعر قرقد.
لكن السؤال الموضوعي المفروض يكون حاضر إنو ليه نحن بنتهافت لنيل صفة العروبة أو بالاحري الإنتماء العروبي.
دي تخريمة ولسّع جاي ليك في موضوع الهوسا من هم ومن أين أتوا.
يتبع..

الرشيد اسماعيل محمود

06-03-2010, 03:31 PM

المشاركة الأصلية كتبت بواسطة بابكر عباس http://sudanyat.org/vb/images/buttons/viewpost.gif (http://sudanyat.org/vb/showthread.php?p=204875#post204875)
الكاشف أخوك لا ينكر عروبة القبائل الجعلية في السودان، لكن شاكي في نسبم للعباس...
بالنسبة للفلاتة أنا شاكي في نسبم العربي يعني الصلبطة بتاعتم صلبطة عروبة و صلبطة الرجوع لفلات بن عقبة بن نافع (شوفهم إختاروا أكبر واحد وصل لتخوم المنطقة ديك)؟!.
الفلاتة في إفريقية أقدم من عقبة بن نافع....
تزين رجال الامبرورو (من الفلاتة) بشبه الزينة بتاعة الرجال عند بعض قبائل البربر في الشمال الغربي لافريقية..

عباس سلامات..
في الإقتباس الفوق انا ذكرت انو جزء من المجاهدين في جيش عقبة بن نافع اتزوجوا روميات وبرابرة واحفادهم تزاوجوا معهم وصاهروهم مكوِّنين فلاتة من اصل غيرعربي، وده علي حسب الروايات التاريخية، بس جزء منهم وليس الكل.
أمّا:
تزين رجال الامبرورو (من الفلاتة) بشبه الزينة بتاعة الرجال عند بعض قبائل البربر في الشمال الغربي لافريقية
ممكن تكون مقاربة في غاية الموضوعية.

الرشيد اسماعيل محمود

06-03-2010, 03:54 PM

المشاركة الأصلية كتبت بواسطة ام التيمان http://sudanyat.org/vb/images/buttons/viewpost.gif (http://sudanyat.org/vb/showthread.php?p=204883#post204883)
سلام عليك يا الرشيد
اكتر شعب قى الدنيا معقد من اصلو السودانيين .
نحن افارقة ذو البشرة الفاتحة اللون زى الاحباش و التشاديين و الصوماليين و السنغال و مالى و مورتانيا و جميع الدول التى تقع فى جنوب الصحراء
وحتى الفلاتى لايرضى ان يقول انا فلاتى و خاصة اذا كان لونة فاتح و ايضآ اخوانا فى دارفور و الشرق ينكرون قبائلهم احساسهم بالدونية و خاصة اذا كان متعلم و له ثروة و نفوذ
الذين يفصحون عن قبائلهم اهل الجزيرة و الشمالية اعتقاد منهم انهم ينتمون للاصول العربية مع انو اهل الشمال نوبة ( رطانة) و اهل الجنوب لا ينكرون انتمائهم الافريقى
و انا بسأل اذا كان سكان شمال افريقيا عرب دخلوا مع الاسلام اين ذهبوا سكان افريقيا الاصليين
و كم نسبة العرب الذين دخلوا افريقيا .!!!؟؟.

سلام عليك ام التيمان..
كلامك موضوعي للحد البعيد وده الحاصل..
يعني الموضوع ما مقتصر علي قبيلة واحدة ولكن الخاشين الميس كتار..
وبعدين احساس الدونية ده حالة عامة في صورة قزحية..
يعني ممكن يكون الزول في حتة مستعْلي وفي حتة تانية بيكون مستعلي عليه.
شكراً علي الإضافة.

الرشيد اسماعيل محمود

06-03-2010, 03:59 PM

المشاركة الأصلية كتبت بواسطة فتحي مسعد حنفي http://sudanyat.org/vb/images/buttons/viewpost.gif (http://sudanyat.org/vb/showthread.php?p=204880#post204880)
تعرف سبب اللخبطة دي كلها انو الفلاتة في الشكل العام ما ممكن نقول عليهم ملامحم زنجية عشان فعلا بتحس انهم منحدرين من ريس مختلف غير باقي الأفارقة وفيهم ناس لعلمك لونهم أصفر وعيونم خضر البنسميهم عيون كديس وديل أكيد حسب النظرية بكونو من أصلاب الفايكنج الاسكندنافيين:Dgoood:Dgoood

عم فتحي..
اها سارة دي ياربي من ديل..؟؟ :)

أبوبكر عباس

06-03-2010, 05:21 PM

الرشيد عليك الله تعفى ليّ...
أنا كنت شاكي إنك إنت و أميري شخصية واحدة!
لحدي ما لقيتك كتبت:
إندغام.... إنبذرت..... صورة قزحية..... نوع الكلام دا أنا ما بعرفو خلي أميري!
عشان كدا خسمتك بالرسول (موش السودانيون عامة *بحبوا المدينة اكتر من مكة و الفلاتة و الهوسا بحبوا مكة اكتر) تعفي لي....

* انت من السودانيين العامة

فتحي مسعد حنفي

06-03-2010, 05:31 PM

الرشيد عليك الله تعفى ليّ...
أنا كنت شاكي إنك إنت و أميري شخصية واحدة!
لحدي ما لقيتك كتبت:
نوع الكلام دا أنا ما بعرفو خلي أميري!
عشان كدا خسمتك بالرسول (موش السودانيون عامة *بحبوا المدينة اكتر من مكة و الفلاتة و الهوسا بحبوا مكة اكتر) تعفي لي....
* انت من السودانيين العامة

أها وانت من أندينا:confused::confused:قصدي الخاصة ولاد المصارين البيض ;):p

أبوبكر عباس

06-03-2010, 05:39 PM

أها وانت من أندينا:confused::confused:قصدي الخاصة ولاد المصارين البيض ;):p
انا تبع الرشيد...
انتو الحلبة ديل فتحي و نبيل و رأفت بتحبوا من مصر و لي فوق

أبرى و استبرى منكم!

أميرى

06-03-2010, 05:40 PM

الرشيد عليك الله تعفى ليّ...
أنا كنت شاكي إنك إنت و أميري شخصية واحدة!
لحدي ما لقيتك كتبت:
نوع الكلام دا أنا ما بعرفو خلي أميري!
عشان كدا خسمتك بالرسول (موش السودانيون عامة *بحبوا المدينة اكتر من مكة و الفلاتة و الهوسا بحبوا مكة اكتر) تعفي لي....

* انت من السودانيين العامة

انا ما عافى ليك غايتو :D

فتحي مسعد حنفي

06-03-2010, 05:44 PM

انا تبع الرشيد...
انتو الحلبة ديل فتحي و نبيل و رأفت بتحبوا من مصر و لي فوق

أبرى و استبرى منكم!

يازول نبيل دا خاتي معانا مالك:confused:الزول دا انت جنبو خواجة وهو علاقتو مع المصريين زي علاقة المماليك بي مصر..دا سوداني حلفاوي قح اتولد واتربي في مصر زي ما أنا حلبي قح اتولدت واتربيت في السودان وبقت أخلاقي زي أخلاق أولاد كورتو بما فيهم الفلاتة وباقي الخلطات الأفريقيةgoood:D

أبوبكر عباس

06-03-2010, 05:52 PM

يازول نبيل دا خاتي معانا مالك::D
و الله يا فتحي الزول دا أول ما جيت المنتدى دا هرشني.... أها أنا قاصي ليهو بدو الديناري بتاع الرشيد دا، لكن وحاتك ما لقيت لي فيهو فرصة.... كلما يفتح ليهو بوست أفتحو ألقى ليك مانشستر سيتي.. شيلسي... الشئ الوحيد العرفتو نيوكاسل لانو دا إسم مرض بصيب الدواجن....

معليش يا الرشيد ممكن نرجع لموضوع البوست ودي فرصة نعرف منك الحرفا ياتم في الكورة الفلاتة؟ أم الهوسا؟

الرشيد اسماعيل محمود

06-03-2010, 08:59 PM

المشاركة الأصلية كتبت بواسطة فتحي مسعد حنفي http://sudanyat.org/vb/images/buttons/viewpost.gif (http://sudanyat.org/vb/showthread.php?p=204938#post204938)
يازول نبيل دا خاتي معانا مالك:confused:الزول دا انت جنبو خواجة وهو علاقتو مع المصريين زي علاقة المماليك بي مصر..دا سوداني حلفاوي قح اتولد واتربي في مصر زي ما أنا حلبي قح اتولدت واتربيت في السودان وبقت أخلاقي زي أخلاق أولاد كورتو بما فيهم الفلاتة وباقي الخلطات الأفريقيةgoood:D

أنا هسّع قلت حاجة؟؟؟
أميري..
رحم الله امريء خرج لشنو؟؟؟:D

أميرى

06-03-2010, 09:02 PM

انا هسع قلت حاجة؟؟؟:D:D:D
و
اميري
رحم الله امريء خرج لشنو؟؟؟:D;)

للربا والتلاف :p

فتحي مسعد حنفي

06-03-2010, 09:03 PM

انا هسع قلت حاجة؟؟؟:D:D:D
و
اميري
رحم الله امريء خرج لشنو؟؟؟:D;)

ونسي يربط كرفتتوgooodgoood

الرشيد اسماعيل محمود

06-03-2010, 10:38 PM

قبيلة الهوسا :
قسم علماء اللغات اسم هوسا الي:
هو...بمعني اركب
سا...بمعني الثور
وفي المجمل معناها أركب الثور أو راكب الثور.
أنا لا أميل إلي هذا التفسير، لأن التسميات غالباً ماتحمل إشارات أو دلالات ذات صلة؛ وبما أنّ الهوسا لاعلاقة لهم بالماشية والرّعي فبالضرورة ألا يمثل الثور أيِّ قيمة أو دلالة معرفية بالنسبة لهم.

تعتبر لغة الهوسا الثالتة في افريقيا بعد العربية والسواحيلية من حيث الانتشار والاستخدام في كل افريقيا
وهي غنية بالمفردات العربية وهذا يرجع لهجرات جهينة وتميم الي افريقيا قبل الميلاد ومدي تأثر هذه القبيلة بتلك الهجرات
اوصاف الهوسا وطبائعهم:
تميل الوان الهوسا الاصليين الي السواد الناعم.
يعملون اصلا بالزراعة والصناعة الثقيلة والخفيفة والتجارة.
لهم عاطفة اسلامية قوية واهتمام بالغ بالقران وحفظه.
الالتزام بالعبادة الجماعية والتصوف وخصوصا التيجانية والقادرية.
هادئوا الطباع يميلون الي السلم ويصعب اثارة الهوسا الي مرحلة الغضب.
يميلون الي الثراء السريع.
كثيرا ما يلجأ فقراءهم الي الشحتة لغير ضرورة ملحة.
تخرج بنات الفقراء منهم للبيع والشراء الهامشي.
كرماء عند الضرورة.
لا ينصهرون مع غيرهم من القبائل الا ماندر.
يعتبر شرب الخمر عندهم عار اجتماعي.
ضعف استعداد التفاعل مع المؤثرات الحضارية عند كثير منهم وذلك لسببين:
الاول انهم يعيشون دائما في معسكرات اقتصادية منعزلة عن المجتمعات المتحضرة
ثانيا لمحافظتهم الدقيقة علي تقاليدهم ولغتهم وعدم
الاستعداد للفكاك منها حتي في اوروبا وامريكا .

في اعتقادي الخاص أنّ صعوبة إثارة الهوساوي إلي مرحلة الغضب، وحدها كافية للتمييز بين الفلاتة والهوسا، لأنّ الفلاتة عكسهم تماما، (قاعدين علي الهبشة-سارة نموذجا):D.
الفلاتة عكس الهوسا تماما يندمجوا مع أيِّ مجتمع ويحاولوا أن يؤثروا عليه لدرجة أنّ الفلاتي يجيك في محلك ويتسلط عليك ويصدِّر ليك إحساس إنو هو سيد المحل (عن تجارب واقعية).
مصدر الإقتباس:
الفلاتة في افريقيا ومساهماتهم..الطيب عبدالرحيم

سارة

06-03-2010, 10:56 PM

ماشى انت اكتب بس:mad::mad:

وانا باذن الله سوف اكون نموذجن حياgooodgoood

والرهيفة التنقدlooool

الرشيد اسماعيل محمود

07-03-2010, 05:25 PM

بقي ان نشير الي ان الهوسا دخلوا الي السودان عن طريق الهجرات الدينية في موسم الحج حيث السودان
كان هو الجسر الرابط بين افريقيا ومكة لذلك يتخلف بعض الحجاج في السودان بعد انقضاء موسم الحج.
فيستقرون ويعمروا الارض( لاحظ الوجود الكثيف للهوسا في شرق السودان كسلا\القضارف نموذجا).
او عن طريق الهجرات السياسية ودي اقل وضوحا من الاولي ابان فترة المهدية مناصرين للمهدي لكنها هجرات ضئيلة.
اضافة الي انهم قوم يؤمنون بالعمل ويبذلون فيه جهدا مبالغا ولأنهم ناس زراعة فقد استوطنوا الاماكن الزراعية وتحديد الشريط المحاذي للنيل الازرق حيث تشهد منطقة جنوب النيل الازرق تواجدا كثيفا لهم.
استشهاد:

عادل سلامات
عشقي للضفة الغربية للنيل الأزرق يمتد كاسراب السمبر من بتري للدمازين..
شوف يا عادل أهلنا الهوسا بالرغم من حداثة هجرتهم للسودان، إلا أنهم سكنوا أجمل و أغنى المناطق بالسودان، لانهم أهل عمل و زراعة..
عليك الله شوف جمال المنطقة دي من جنوب مدني لحدي الدمازين،
ما في أي شئ بخلي المنطقة دي ما تكون:
أجمل و أغنى منطقة في إفريقية
ثم..
بابكر ياجميل
أؤمّن على ذلك
ذات الهوسا سكنوا (غرب) القاش فاضحى له فوت على شرقه!
أما جمال السوح -التي تذكر-فحدث عنه ولاحرج
والحرج -دوما-يتغشانا من (تالا) المتواكلين والمتكاسلين منا ياحبيب
شكري لك جزيل على جميل الأضافة
مودة تترى

http://sudanyat.org/vb/showthread.php?t=13291

من عادة الهوسا انهم دائما ينشئون معسكرات اقتصادية خاصة بهم في اطراف المدن والعواصم ويطلقوا عليها
زنقو zango او العشش وهذه بسرعة تتحول لتجمع كبير يضم كل قبائل وسط وشرق افريقيا ممن ليس لهم صلة بالهوسا مثل قبائل البرنو والبرقو
وهذه المعسكرات الاقتصادية التي تشبه المناطق المغلقة مردها كما ذكرنا سابقا لعدم قابلية الهوسا للاندماج مع الاخرين وتحبيذهم (فرز عيشتهم)
وهذه من الاسباب التي ادت الي عدم تأثر لغتهم الخاصة واحتفاظها بخصوصية كبيرة.
اضافة الي ان تكوين هذه العشش يعتبر من الممارسات السلبية نسبة لاثارها الاجتماعية وامتلاءها بعادات وسلوكيات غير حميدة تتم فيها وهذه بالطبع لايتحمل وزرها الهوسا لانه كما ذكرنا سابقا بأن العشش او ال(زنقو) ليس تجمعا اقتصاديا مغلقا علي الهوسا فقط بل خليط من قبائل افريقية اخري تري فيه مكانا جيدا للسكن وممارسة الحياة بلاقيود اجتماعية او مدنية مقيدة في اغلب الاحوال.
الهوسا قبيلة قدمت الكثير في كل المجالات ويظهر اثرهم واضحا في الاعمال الشاقة جدا ذلك انهم ذوي تكوين جسماني قوي جدا(زادهم الله بسطة في الجسم) لذلك فان بعض الاعمال ربما لايقدر عليها غيرهم.
انتشروا في السودان في كل الجهات وعمروا الاماكن التي نزلوا بها واصبحوا بذلك سودانيين مثل كل القبائل الاخري لهم مثل ما للاخرين من حقوق وعليهم مثل ماعلي الاخرين من واجب.