المساعد الشخصي الرقمي

مشاهدة النسخة كاملة : البريد ابو...انا قاعد بريدو

آن
21-04-2011, 10:48 AM
"البريد ابو..انا قاعد بريدو"... صوت عمي الحلو جايي من بره وهو بنادي علي ولدو...اول فرحتو ووحيدو....نجوي....تجري علي المرايا تصلح شعرها الطويل و تكحل عيونها الساحرات علشان تكون احلي شي يشوفو لمن يدخل عليها.....قصه حب من الابتدائي....والفاتح بقول لي نجوي....انتي عروسي.....اتربو في حله وحده....وجرو في حوش واحد...وشربو من نفس البير...

يوم العرس كان اجمل يوم..الكل فرح والكل زغرد...والكل طبعا اتعشي ورقص...كانو احلي عروسين..نجوي جميله جمال ..زي مابقولو تعاين ليها ماتشبع...وسمارها الخمري بسطل اجعص جعيص....عمي مابحتاج اوصفو لانو.....عمي....:)
آن
21-04-2011, 10:54 AM
ماتضحكو في كتابتي ياشباب..انا في البدايه يا داب

:)
آن
21-04-2011, 11:08 AM
تشوفهم مع بعض..بدون ماتشعر تبتسم وتفرح..ريده كده ظاهره في عيونهم وكل واحد فيهم روحو مافيهو......روحو في التاني...

في اوضه كانت جنتها....عاشت نجوي مع الفاتح في بيت النسابه....مابتشعر بي ضيق المكان ...وده من طريقتها في تنظيمها وتهذيبها....احب اللحظات عندي كان لمن تناديني .."تعالي يا نونه سرحي لي شعري"..وجري شديد...اشيل المشط....وبي يد مفروره..اسرح شعرها ...واتمناهو شعري....

عمي دايما مسافر..وزي باقي البيت..بنترقب رجوعو بي فارغ الصبر...كنا بنتسابق علشان نترسل ليهو...جيبو مويه..وين الجريده...بس حب كده..يمكن كنا حاسين انو حياتو معانا حاتكون قصيره....
آن
21-04-2011, 11:21 AM
الزين ..عايش زي الملك..براهو ماعندو ند...نجوي شايله كرشها..تقيله زي ما بوصفو الشهر الاخير من الحمل..بس خفيفه هي كانت...الفاتح جايي بكره وكالعاده شغاله تجهيز وترتيب..ترك من مكان للتاني زي الفراشه ....الحامل....:)

طبعا كوني طفله شوباره..لازم ادخل في برنامج التجهيز ده...ارفع الستاره...امسح الطربيزه..حتي كبابي الفضيه مارحمتها...عادتني نجوي بي فرحتها...

من جهتي ..اضفت لي الموضوع مجلات ميكي...حنست ليهم اميره صحبتي لان عمي بحب يقراهم...يعني ممكن تقول كنت طمعانه زياده علي ابتسامتو...بي الطراده العودني عليها....

راجعه من المدرسه..كدر..من ضول لي ضل...وفوق كل حفره نطه..وفوق كده ماشه بي حماس..ومجلات ميكي في يدي....من بعيد اشوف لي صيوان...وبي فرحه قلبي رفرف...يا سلام عاملين لي عمي الفاتح حفله..جب.. جب...يمكن لي صغر سني....او يمكن لي عدم خبرتي..ماعرفت افرق بين صيوان العرس..من صيوان البكا.......
آن
21-04-2011, 11:34 AM
لحظات..كانت بس زي يوم القيامه لي في اليوم داك....سكلي..صراخ...وبرضو اصوات رايحه......نسوان واقفات ....ونسوان قاعدات.....ونسوان بتتدردق في التراب......ودموووووووووووووووووووع.....سنين مرت..مابتكلم عن سنه ولا اتنين..بتكلم عن...25 سنه..ولسه صوت عمتي في اضاني وهي بتقول..الفاتح مات يا نونه..عمك حبيبك مات....

يمكن غلاوه عمي عندي..ويمكن صدمه موتو برضو..لاكن لغايه اليوم..بتوقع انو يرجع...؟؟؟....وصوره تانيه مابتفارقني.... عويل نجوي وهي بالتوب الابيض...قاعده بي بطنها الورمانه في الارض......بدون دمووع...وبدوون كحل......
آن
21-04-2011, 12:04 PM
داك كان يوم البكا الاول....اليوم التاني كان يوم ولاده عزه...قطعه من امها..الاختلاف انها ماشافت ابدا وش ابوها.....الحزن الشفتو في وش الزين....ماقابلني ابدا في طفل ..حزييين حزن السنين..مع انو قطع منها بس تلاته...اختارت نجوي انها تعيش في الاوضه الكانت يوم جنتها....بس بدون.....روحها.....

كبرت عزه ..وكبر الزين...بدل الاب كان عندهم اتنين...عاوزين يعوضوهم عن المابتعوض....يتم.. بضم التاء ....بس يمكن احسن من يتم.......

بدون مقدمات...نجوي مسافره للعلاج...يعني مالا هسع..كويسه وحلوه زي زمان واكتر....عزه كانت في عمر الزين لمن ابوهم مات...ومافارقه معاهم سفر امهم....لان البيت كلو كان ام......ورجعت نجوي...واتذكر لغايه هسع الفستان الجابتو لي هديه..لبستو لي عرس سعاد...ودردقت بينا الدنيا...
آن
21-04-2011, 12:15 PM
يتبع................
tariqosman
21-04-2011, 02:02 PM
يتبع................



تمام ومتابعين

بس ما تطولوlooool
جيجي
21-04-2011, 08:19 PM
يالله
الغمتني الما
وانا اعيش حنين امي اذا بك تجرينني الى حنين اخر
والم اخر
يا له من ليل هذا الذي حاولت تغيير حنين الدمعات فيه الى حنين الكلمة وشجن اللحن
آن
25-04-2011, 05:11 AM
تمام ومتابعين

بس ما تطولوlooool

يالله
الغمتني الما
وانا اعيش حنين امي اذا بك تجرينني الى حنين اخر
والم اخر
يا له من ليل هذا الذي حاولت تغيير حنين الدمعات فيه الى حنين الكلمة وشجن اللحن

صباح الافراح والنور والسرور...شكرا علي المتابعه..وآسفه علي التاخير....وبسم الله نكمل........
آن
25-04-2011, 05:31 AM
الناس عايشه..عمه اتزوجت..وعمه ولدت...وده سافر..وده اتخرج..يعني الدنيا ماحاتقيف علي موت واحد..اتنين..ولا حتي العائله كلها......

انا ماعارفه دي طبعه في المره السودانيه..ولا الظروف بتخليها تعمل كده..غايتو كنت معجبه جدا بي نجوي....بعد موت الفاتح ماقعدت خالص..عندها طفلين تربيهم....اتعلمت السواقه..دخلت معهد سكرتاريه....واشتغلت....حياتها مع عيالها بدت تستقر..ونجوي...حلات الدنيا عليها......

الدنيا بدت تحلي.......اجازه صغيره مشتها نجوي وعيالها ...القاهره حلوه الايامات دي الجو..الاكل..والفسح وطبعا..التسوق... شهر مر واشتقنا ليهم ......ولا للهدايا يمكن؟....:)

بتذكر كلامي لغايه هسع مع ايمان بت اخت نجوي...وهي بتبكي وانا ....ملاااانه قلق...نجوي حاتموت يا نونه....نجوي حاتموت...وانا بعاين ليها كده..كاني شايفه اعبط واغبي انسان في العالم..شايفاها بس رياله سايله بتتكلم...قلت ليها يا بت انتي عويره؟..تموت كيف يعني؟..عمي الفاتح مات..ماممكن هي كمان تموت........

وزي ماقالت ايمان..كان........................................ ...

كنت مع نجوي في غرفتها..بتفرجني في الحاجات الاشترتها في الاجازه.....تياب وشباشب عاوزه اخيط دي كده..وعاوزه البس دي مع دي...تياب , شباشب, فساتين...وكل حاجه احلي من التانيه....بس حاجه وحده كانت شاحبه.....وش نجوي....
آن
25-04-2011, 05:50 AM
اظن اسبوعين بعد رجوعها من القاهره....وتلاته سنوات بعد موت الفاتح...لحقتو نجوي...بتذكرها راقده في السرير وفيها باقي روح...لونها اصفر زي الكركم...ومع ده..جميله زي ماعودتنا....تعالي يا نونه سرحي لي شعري............

علي حسب كلام الدكاتره..انو المرض الخبيث الجاها قبل سنين...انتشر لي الكبد...يعني بدون معجزه من رب العباد..خلاص....ادعو ليها.. وبس

الناس بتبكي كمان علي الزين سته.. .وعزه تلاته .....اهم اتنين في حيات الزول......فقدوهم ديل و في العمر ده....الحمد لله..

اتربو في بيت فيهو سته امهات..وابوين....كل واحد فيهم بحاول بي طريقتو يعوضهم فقدان اتنين وبس؟؟.....

الزين شاب..وسيم...علشان بشبه عمي طبعا..نظره وحده في وشو ما اتغيرت...نفس النظره الانطبعت بعد وفات ابوه....بفتش عن هويتو من سنين.....ولسه ..بفتش

عزه...زي ماكانو بقولو علي امها زمان..حلات الدنيا عليها.....وسبحان الخالق..بتشوف فيها نجوي...عكس اخوها....دايما مبتسمه وضاحكه...بتحب الدنيا ..وبتبحت بي يدينها ورجلينها وكل حواسها علشان تشبع منها...ولسه....ماشبعت....

قصه حقيقه......والم حقيقي.....


اللهم ارحمهم واحسن مثواهم....
فيصل سعد
27-09-2011, 06:58 AM
مرحبا بك و بجميل السرد ..
و كوني بالف خير..
أميرى
15-11-2011, 07:13 PM
سلمي علي الزين و عزه بالله عليك
و عودي بالله عليك
آن
22-11-2011, 11:46 PM
مرحبا بك و بجميل السرد ..
و كوني بالف خير..

ربنا يجبر بي خاطرك اخي فيصل.....اخجلتم تواضعنا....وانت بالف خير



جميل السرد منو يا عمك؟...:D
آن
22-11-2011, 11:52 PM
سلمي علي الزين و عزه بالله عليك
و عودي بالله عليك

اميري.....تسلم يا امير

عارف شي..لسه والله لايصين في لواصتهم...ربنا يهدي سرهم وينور طريقهم

عوووودنا....وربنا يكون في عونكم

:)