رسالة من دكتور قنات...العاصمة(عواصف..ظلام...غرق...و أشياء أخرى)

[haneena]

رسالة تليفونية من دكتور قنات
قامت عاصفة ترابية اليوم بالعاصمة تبعتها أمطار غزيرة أدت إلي قطع الكهرباء من كل العاصمة و غرقت العاصمة في شبر موية منذ صلاة المغرب مساء اليوم.
كما أن هناك الكثير من الأحياء مقطوع عنها المياه نهائيآ و تعاني العطش و الشوارع مليئة بمياه الأمطار.
لماذا تغرق العاصمة في شبر ماء و الخريف لم يطرق أبوابنا بعد؟

كنت( دكتور قنات) في مشوار من كبري المنشية الجديد مرورآ ببري و كوبر و بحري و بيت المال حتى الثورة ثم أم درمان إلى مدينة المهندسين.. كلها تعيش ظلامآ دامسآ ما عدا مطار الخرطوم و من يملك مولدآ كهربائيآ
بما في ذلك الإدارة المركزية للكهرباء بأم درمان!!!!

إلى متى يستمر مسلسل القطع هذا لمجرد هبوب رياح أو زخات مطرٍ و العالم من حولنا لا يعاني من قطع الكهرباء؟

أمس قام السيد مشرف محلية أم درمان بإقامة حفل تكريم للطلاب النوابغ إشتمل على ما لذ وطاب من المأكولات بما فيها الدجاج( إنفلونزا الطيور؟؟)
نعم يحتاج الطلاب النوابغ للتكريم و لكن..
هل بيئة و مناخ التعليم في يومنا هذا مثالية للتحصيل؟
أما كان الأجدى أن تصرف تلك الملايين على توفير الكتب المدرسية و إجلاس الطلاب و توفير وجبة لهم لمن لا يملك قوت يومه؟ و هم كثر
أم هذه الوليمة بفراخها هي لمساندة تجار الطيور؟

نواصل..إن رجعت الكهرباء

[معاوية عزالدين أبراهيم]

أمس قام السيد مشرف محلية أم درمان بإقامة حفل تكريم للطلاب النوابغ إشتمل على ما لذ وطاب من المأكولات بما فيها الدجاج( إنفلونزا الطيور؟؟)
نعم يحتاج الطلاب النوابغ للتكريم و لكن..
هل بيئة و مناخ التعليم في يومنا هذا مثالية للتحصيل؟
أما كان الأجدى أن تصرف تلك الملايين على توفير الكتب المدرسية و إجلاس الطلاب و توفير وجبة لهم لمن لا يملك قوت يومه؟ و هم كثر
أم هذه الوليمة بفراخها هي لمساندة تجار الطيور؟
الاخت العزيزة / حنينة
ايضا وصلتنى رسائل تفيد ذلك
اضافة الى سوء شبكات الاتصال
الله يكون فى عون الغلابة الذين يسكنون بيوت الجالوص
والكرتون والشوالات وهم بالطبع الاغلبية
اما بخصوص التعليم والنابغين وما ادراكما
علمت ان نسبةالنجاح فى المدارس الحكومية
دون ال 65% بينما وصلت ال 90% فى المدارس الخاصة
انها لكارثة حقيقية ولها مدلولات تستحق الوقوف
الى اين سياخذنا هولاء والى متى ؟
الله يكون فى عون الغلابة اين ما كانوا
لك كل الود والاحترام

[haneena]

عذرآ للتأخير
رسالة من دكتور قنات
إن العطل مرده محطة الروصيرص و هي تغذي أماكن كثيرة غير العاصمة
اما محطة بحري و قرِّي ما زالت تعمل

[د.سيد عبدالقادر قنات]

سلام الكهربة رجعت

واللمبات ولعت تش ( جمرة خبيييييييييييثة )

والماسورة بت نقط ( وغدا عداد جمرة خبيثة )

ليه الكهربا احسن من الموية

ولكن رب العزة قال في محكم تنزيله

( ما معناهو أن الموية هي مصدر الحياة )


ونحن جنبنا الابيض والازرق والنيل العظيم


ولكن موية معدووووووووووووووووووووومة


بس ورونا دا شنو ؟؟

العيب في مننو ؟؟

النيل ؟؟ ولا المسعول ؟؟

بعدين المبدعين ديل يكرموهم انفلونزا وسحاوي

وسوء تغذية

ولا نوفر الأجلاس والكتاب والترحيل والمعلم نريحو بالكامل

وين مجانية التعليم ؟؟؟

هل تذكرون الشهيد الطالب

موسي
أنتحر في الدويم ؟؟؟

لعجز أسرته عن دفع 500 جنيه فقط للمدرسة ؟؟؟

هل تصدقون هذا ؟؟؟

لم يقدم مشرف أو معتمد أو وزير أستقالته !!!!

ولكن بدلا عن ذلك

يعملو غدا بالجداد ويدفع والد موسي الفاتورة حتي بعد انتحار ابنه ؟؟

بعدين النجاح والتحصيل والتفوق

نرجو ان ترجعوا لتقرير محمد الشيخ مدني عندما كان

وقتها وزير التربية الولائي ،ن أنها فضيحة ومأساة

ومع ذلك يحق لنا ان نسال كم كلف حفل مشرف امدرمان ؟؟

وكم كلفت غدوة الوالي ؟؟؟

يا جماعة بس لي متين نحنا مضلمين مع كلو مطرة ؟

ولي متين عاصمة الدولة الحضارية

عاصمة الدولة الرسالية

عاصمة الثقافة العربية

عاصمة الموتمرات

تغرق في شبر موية ؟؟

غدا تشوفو التبريرات !!!!!

علي كل حال بعد المطرة

الجو بقي تمام لسكان الكرتون

والكرانك وابنيران وجبرونا

وكمان بقت عندهم موية من ربنا اللطيف

بس متين نحن نتعافي ؟؟؟

يديكم العافية

[أبومناهل]

يا أخوانا الضرب علي الميت حراااااااااااااام
إنت حارقين ورقكم في شنو ؟؟
هسه في زول في الدنيا دي كلها . .
عشمان في الناس ديل . . ديل ناس
مقطوع فيهم العشم من أول يوم . . . .
ديل كان برسلوا الناس للموت عشان يقللوا
عدد الشعب السوداني . . ولما الموت يجي للناس
في محلهم يقوموا يتحركوا عشان يحمو الناس من الموت
إنتو بتحلموا . .
أنا شخصياً قررت أن لا أذكر أي عيب من عيوب الإنقاذ
لا سابقاً ولا مستقبلاً . . . خلاص ( قنعت ) . .

[بنت النيل]

خرجت من منزلنا وأنا أرتدى إسكيرت لونه بيجى
إجتهدت فى مكوته بوضع المكواة فى البوتجاز وتسخينها .... لأن الكهرباء مقطوعة
كنت أجتهد ان لايرانى احد حتى لأعطى محاضرة بعنوان أزمة الغاز .
عندما وصلت لأقرب نفطة للمواصلات كان لون الإسكيرت إلى المنتصف قد تحول للمشجر ( بني بى بيجى )
فى مدخل شارع الدكاترة كانت هناك عربة يتيمة تحاول(شطف) الماء من منطقة الشهداء والذى تجمع بكميات أكبر كادت معها الركشات ان تغرق .
نزلت فى سوق أم درما ن عند الجامع العتيق ....فى لحظة .... تحولت جميعى إلى بنى بالبيجى بالأسود .... وألوان أخرى لأاعرفها ...
بعد جهد جهيد وبعد مرور أكثر من ثلث الساعةوصلت إلى المكان الذى أقصدة فى بداية شارع الموردة جهة البوسته ( ستكون الرياضة النسوية خاصة القفز فوق الحواجز والسباحة فى أولوية إهتمامتى فى الفترة القادمة )
كاد صديقى الذى كنت أقصده أن يموت ضحكاً حينما رأى منظرى ..... وببساطة قال لى فى حاجتين فى البلد دى بجو فجأه كل سنة
رمضان والخريف ....
نظرت إليه شذراً وسكت .......

بنت النيل

[أبو العز الجنوبي]

حنينة
الكهرباء قطعت من العصر يعني من الساعة اربعة...
بعد داك جات العواصف الترابية بعد الخامسة...
ثم المطرة....
الموية قاطعة... والكهرباء قاطعة.. .. الناس قاااااااااااااطعة
الكهرباء عرفناها...
الموية دي مالها؟؟؟
النيل جف؟؟
الابيض والأزرق؟؟
الآبار جفت؟؟
طيب إذا فرضنا ديل كلهم جفو... مياه الصرف الصحي جفت؟؟؟ ما قاعدين نشربها هسع من المواسير..

[بابكر مخير]

بيقولو "عيك" أو "إيك" وهي لإظهار التعج في قدم الأمر، يعني بالسوداني الفصيح لمن خبر يكون قديم او حدث يكون طول قولو ليك عيك أو إيك، وانا برد على قصة العجاجة والكتاحة دلوقت لسببين: الأول حكاية ياتو جا أول الجدادة ولا البيضة ودا !! المقصود بيهو المشاركة في الكتابة في سودانيات "عشان تقدر تفتح ليك موضوع في المنتدي لازم يكون عندك مشاركتين (هو أنا تقريبا ذي وقع ليا الكلام) يعني دلوقت بكون عندي مشاركة وأقوم أشوف ليا خبر معتت تاني أشارك فيهو ويكون إكتمل النصاب القانوني وأدخل دنيا المنتدى بأوسع أبوابه،،،، طيب دا نمرة وأحد...... والرد السريع في موضوع العجاجة والكتاحة!!! المعروفع في السودان لمن تجي الكتاحة تنعدم الرؤية في النهار ولمن تنقطع الكهرباء تنقطع الرؤية في المساء، تمام؟ طيب الحكومة قررت إدخال نظام الكميرات لمراقبة حركة السير، بتاع العربيات والتكاسي وكدا وبرضو مراقبة حركة الناس في أيام حظر التجول ومراقبة تحرك العساكرأيام الإنقلابات ، يا أخونا حكومة الهم دي أدوها راسها هي وينو السودان عشان تدخل فيهو تكنلوجيا ذي دي محتاجة لكهرباء وجو صافي .... طبعا دي فكرة وراها شركة من زبانية الحكم وعنده مشروع لإكتناز المزيد من المال وهوغالباً من أبناء عمومة المتعافي والله يعافي السودان منهم ومن عبد البلقي مصطفي الناطق بإسم الشرطة المكلولة

[د.سيد عبدالقادر قنات]

سلام بابكر وألف مرحب بيك

بس هو بقت علي الرادارات للمراقبة

ولا استيراد البصات



ولا بناية العمارات بالقش



ولا سفلته الشوارع بالزفت

ماهو كلو زفت في زفت

الفضل لينا شنو ؟؟؟

كرامتنا ؟؟؟؟؟؟

يديك العافية

[عصمت العالم]

العزيز دكتور بابكر مخير...

وانت اعلم بشعاب مكه. ودروبها..وحين اتى هؤلاء..بكم كل ذلك الوهم الحلم...كانت مبادرتهم القصاص والاقفاص ..والبطش..والتخويف...والرهق..لكل فرد ولكل حس ..وشعور..وانتماء...وسقطوا لانهم دعاة كذب ونفاق...وانت تراهم الان يقيمون على موقع عروش خاويه...وهم يضطربون ويكابرون..ويحنثون بكل قسم مقدس...

وسيظل الظلام قائم مقيم...وهم تاجروا فى جرنيتات التوليد وتاجروا فى سدود التوليد وتاجروا فى المبادىء..وتاجروا فى كل شىء..وافسدو وفرطوا بلا اهتمام ولا وعى..ولا حكمه....
ليعلم كل السودانيين ان الاتجار بقيم وبالمقدسات ليس هو الطريق الوصل للحريه والديمقراطيه وكريم العيش...

وحين انتمى وانحاز الانصار وقيادة حزب الامه..بقيادة السيد الامام الصادق المهدى. الى الجبهه الوطنيه والنضال الوطنى الملتزم لصالح الامه السودانيه..ولعل خطبة صلاة العيد هى ذلك الاعلان الذى لا يقبل الشك.. الى صالح الشعب والجماهير..بدات معالم الطريق الصحيح الذى يجب ان ينضم تحت لوائه كل وطنى مخلص .لحتمية الخلاص...

عميق الود..

واللعه اكبر ولله الحمد