بوست كدة و كدة...أو كما يجب

[أميرى]

محاولة لرفع الفتح و ضم الكسرة
أو فلنسترق الصمت

النادي الألماني في الخرطوم يحتاج لتأشيرة و ربطة عنق ولأنه لم يكن بحوزته غير قدميه بصق بحزر علي اللافته و مضي

شارع الستين طريق طويل بالقدر الكافي لحزم أفكارك كربطة جرجير ثم الإنتماء للحزب الشيوعي بشجاعة تحسد عليها

عوض أحمودي الفنان الضرير إعترضه رجل الهدف عند مدخل المستشفي الفخم فبادره أحمودي صائحا إتا لا بتشوف تلفزيون لا بتشوف رب؟
كنت حاضر لغضبته فضممت كاف و واو كفر و تركت وتر كما هي يعني تبقي عليو ميته و خراب ديار؟

بكرة لو ربنا حيانا بسوقكم الملاهي

[سارة]

وبكرة ليه يا صاحبى الذى يجافينى؟؟؟

المـــافى شنو؟؟؟

[أميرى]

خرج فلان إبن فلان من منزل زويه ولم يعد حتي الآن أوصافه كالآتي؛
متوسط الطول شعره سبيبي عيونه عسلية يرتدي تموت تخلي

قرأت الإعلان علي مهل و نظرت إلي نفسي جيدا ثم سلمت نفسي لأقرب مركز للشرطة
فما يدريني لعلني هو

شعب بتشابه شديد
وحات الله

ست الشاي السمحة في آخر محطة علي شمالك تجيد الحديث والإبتسام و ما تجيده حقا أنها تجبرك علي ملاحقة أنفاسك المتلاحقة
أو هذا ما أري

الإسكلتون ذي الطوابق الخمس يقف غير بعيد من راكوبة صغيرة بقش و طين و خيش و بعض المال الحلال

أها التزكرة بي كم؟

[أميرى]

طفلة و سنتين و ضفيرة تلعب بأمان أمام البيت و الشارع هادئ جدا في تلك اللحظة و لا أحد

كو كو كو كو تطرق الباب بعنف
تخرج إمرأة في تمام زينتها و ...تصرخ فيها بحزم يا مرة جادعة بتك ف الشارع و قاعدة تتكبرتي و بكرة ووب بتي إغتصبوها
تركتها هناك بدهشتها و مضيت

في نفس الأمسية كانت تحادث رفيقاتها عن فاعل الخير غريب الأطوار

[عبد العظيم الطاهر]

شديتني يا أميري ....

أنا هنا معاك ...........:L

[ام التيمان]

خرج فلان إبن فلان من منزل زويه ولم يعد حتي الآن أوصافه كالآتي؛
متوسط الطول شعره سبيبي عيونه عسلية يرتدي تموت تخلي

قرأت الإعلان علي مهل و نظرت إلي نفسي جيدا ثم سلمت نفسي لأقرب مركز للشرطة
فما يدريني لعلني هو



ارحتني من عناء البحث
شكرآ لك

[رشا]

قرأت الإعلان علي مهل و نظرت إلي نفسي جيدا ثم سلمت نفسي لأقرب مركز للشرطة
فما يدريني لعلني هو




بس مابعرف أعبر عن اعجابي بالحاجات كيف ,,,الكلام رائع وتم الباقي براك

لكن انت متأكد من وصفك لي ست الشاي ياأميري؟

[فيصل سعد]

بوست خفيف الدم و الروح يا زول .. رغم اننا
في انتظار الترلة كما تعلم ..

[أميرى]

وبكرة ليه يا صاحبى الذى يجافينى؟؟؟

المـــافى شنو؟؟؟

في فيلم أمريكي تمنت الفتاة أن تكون في مكانين في نفس الوقت فقادها حبيبها مغمضة العينين إلي خط أبيض علي الأسفلت يفصل بين ولايتين و أزاح عنها عصابة عينيها ...ضحكت الفتاة كثيرا حتي إهتزت أدمعي

أنتي ياسارة في النرويج و في القلب

فهلا أزحتي عصابة عينيك فالخط الأبيض تماما تحت قدميك

بالنسبة لبكرة أهو جا
شفتي كيف؟

[طارق صديق كانديك]

ما أجمل أن أطالع نظمك ياخي .. !!

فالفكرة الذكية فيه تقرع باب الروح: كو كو كو

المهم*

يامشيتو الملاهي من وراي ولا بكرة ماجات .. !!

* بحسب صديقنا الذي في الدمازين

[جيجي]

ارحتني من عناء البحث
شكرآ لكبختك والله
ام التيمان لمت قيك:p

[أميرى]

شديتني يا أميري ....

أنا هنا معاك ...........:L

في حته كدة ما متزكرها هسا واحد كتب الدهشة هي أعظم نعم الرب
غايتو واحد فينا أصابتو الدهشة و رضا الرب
أنا و لا إنت يا ربي؟

عبد العظيم شكرا للطف النبيل يا طيب

[أميرى]

ارحتني من عناء البحث
شكرآ لك

أها لقيتو؟

[أميرى]

بس مابعرف أعبر عن اعجابي بالحاجات كيف ,,,الكلام رائع وتم الباقي براك

لكن انت متأكد من وصفك لي ست الشاي ياأميري؟

ستات الشاي مالهم؟
والله سمحات و ناعمات

تعرفي لست ممن يرفع الصوت عاليا بالهتاف الشهير
(المطحونات في الأرض اللاتي أذاقتهن الحروب الشنو و الشنو)

والله حنك منظمات المجتمع المدني ومناضلي ما وراء البحار دة ما بقسم معاي

بقسم معاك؟
بي جازك إذن

وشكرا و كدة

[أميرى]

بوست خفيف الدم و الروح يا زول .. رغم اننا
في انتظار الترلة كما تعلم ..

الترلة هينة الكلام في الراس

:D

[الرشيد اسماعيل محمود]

خرج فلان إبن فلان من منزل زويه ولم يعد حتي الآن أوصافه كالآتي؛
متوسط الطول شعره سبيبي عيونه عسلية يرتدي تموت تخلي

قرأت الإعلان علي مهل و نظرت إلي نفسي جيدا ثم سلمت نفسي لأقرب مركز للشرطة
فما يدريني لعلني هو

ولعلك هو..
ولعلك..
و..
التلميذ في المدرسة..
عاد التلاميذ للفصل بعد فسحة الفطور..
أستاذ الحساب ولج الفصل..
أثناء الحصّة وصل احد التلاميذ متأخراً (بالطبع)..
أهااا يا الفنجري، كنت وين..؟ بادره الاستاذ..
كنت في الفطور يا أستاذ.. أجاب التلميذ..
تعال، تعال يا الفنجري.. قالها الاستاذ وهو يمد أمامه الخرطوش الأسود..
مع أوّل سوط يحتمله ظهر التلميذ، إستفرغ ما بجوفه من أكل..
دة شنو..؟؟ هاج الاستاذ..
فبادره التلميذ بخوف كبير:
"والله يا استاذ، قدو قدو فجأتن قورو"*
وضحك كل التلاميذ، وكنت أنا من ضمنهم، في زمان غابر خلا أنه بكامل الصفاء وراحة البال..
أها:
بوست كدة و كدة...أو كما يجب
إعتبرني دخلت بإسكور كدة وكدة..
"كما يجب" ديك خليتها ليك..

*كلام خوف ساي، ما عندو أيِّ منطق. ولا رايك شنو..؟

[somiaadam]

اميري الامير سلااااااااام

**
سمعت زات مرة بروف عبدالله الطيب يحكي عن بواب المستشفي وقفوا وابي يدخلوا ..قام قال ليهو ماعرفتني قال ليهو لاااااا وكورك فيهو انو مايدخل
فقال بروف عبدالله الطيب هسي لوكنت فنان ولا لاعب كورة كان عرفتني
اهو هسي الفنان زاتو ماعرفو
بس ماتلومو البواب شايف شغلتو دي نمرة 1
ونمرة 2 ودا احتمال كبير ماعندو تلفزيون من اصلو في البيت عشان يشوف
احمودي ولا عبدالله الطيب :)
****
واحد عندو كارو كاتب فيهو بي وراء المدير العاام
*****
عليك الله مع ناس خرج ولم يعد فتشني معاك
دمت بخير

[حافظ حسين]

أميري عليك الله تعال واصل لينا يا خي....

أتاري يتبع دي فقرية كدا*




-----------------
** سي سي لبله الشاعر

[أميرى]

ما أجمل أن أطالع نظمك ياخي .. !!

فالفكرة الذكية فيه تقرع باب الروح: كو كو كو

المهم*

يامشيتو الملاهي من وراي ولا بكرة ماجات .. !!

* بحسب صديقنا الذي في الدمازين

تخيل لو أن رواية نزلت الأسواق وترك تخيل النهاية لمخيلة القراء وأفضل تتمه للقصة لصاحبها جائزة
ثم تخيل أن مسطولا إشترك في المسابقة و فاز هو بالجائزة
فهل بمقدورك تخيل ما كتب؟

أرفق ورقة إجابته خالية إلا من نقطة نقشها بحزر

فأجمل النهايات هي تلك التي تستدرجنا للإبتسام
مش بالله

ثم فجأتن بكرة جا والله

من الطارق؟

[أميرى]

بختك والله
ام التيمان لمت قيك:p

أيييوي أيييووي:D

[أميرى]

ولعلك هو..
ولعلك..
و..
التلميذ في المدرسة..
عاد التلاميذ للفصل بعد فسحة الفطور..
أستاذ الحساب ولج الفصل..
أثناء الحصّة وصل احد التلاميذ متأخراً (بالطبع)..
أهااا يا الفنجري، كنت وين..؟ بادره الاستاذ..
كنت في الفطور يا أستاذ.. أجاب التلميذ..
تعال، تعال يا الفنجري.. قالها الاستاذ وهو يمد أمامه الخرطوش الأسود..
مع أوّل سوط يحتمله ظهر التلميذ، إستفرغ ما بجوفه من أكل..
دة شنو..؟؟ هاج الاستاذ..
فبادره التلميذ بخوف كبير:
"والله يا استاذ، قدو قدو فجأتن قورو"*
وضحك كل التلاميذ، وكنت أنا من ضمنهم، في زمان غابر خلا أنه بكامل الصفاء وراحة البال..
أها:

إعتبرني دخلت بإسكور كدة وكدة..
"كما يجب" ديك خليتها ليك..

*كلام خوف ساي، ما عندو أيِّ منطق. ولا رايك شنو..؟

نشيل الكلام جملة ما قطاعي لأسباب تقنية والله

كلام الخوف الساي هو في تمام منطقه وحاتك بس إتا دور كميرتك تجاه تعابير السوط والوجه والظهر والتناغم بين التفاصيل بمنطقك بمنطقك
والمسطول قالوا له في زمان غير صفاء الزمان ذاك يا زول عادي تقدر تنتقد الحكومة بأمان
فطفق يصيح
وينو العدل
وينو الرخا
وينها المساواة
وينو الشغل


وين أنا؟
منو الطفا النور؟
وااااي:D

كدة و كدة تقربنا من النور
أما كما يجب فبتجيب الواااي

أها الطفا النور منو بالله؟

[أميرى]

اميري الامير سلااااااااام

**
سمعت زات مرة بروف عبدالله الطيب يحكي عن بواب المستشفي وقفوا وابي يدخلوا ..قام قال ليهو ماعرفتني قال ليهو لاااااا وكورك فيهو انو مايدخل
فقال بروف عبدالله الطيب هسي لوكنت فنان ولا لاعب كورة كان عرفتني
اهو هسي الفنان زاتو ماعرفو
بس ماتلومو البواب شايف شغلتو دي نمرة 1
ونمرة 2 ودا احتمال كبير ماعندو تلفزيون من اصلو في البيت عشان يشوف
احمودي ولا عبدالله الطيب :)
****
واحد عندو كارو كاتب فيهو بي وراء المدير العاام
*****
عليك الله مع ناس خرج ولم يعد فتشني معاك
دمت بخير

قبيل شفت بتاع كارو من(أولاد الحور) الناس البشرة جلدهم ضد الشمس ديك
أشفقت علي عينيه و جلده من الشمس والأسفلت و هذا الوطن الذي تمنع عليه برزق و ظل

قابل كل هذا بجلد وسابق السيارات علي طريق الأسفلت حتي ظننت أنه ..المدير العام

سمسم لقيتك غايتو
أها أدسك منك؟
ولا أديك ليك؟

[أميرى]

أميري عليك الله تعال واصل لينا يا خي....

أتاري يتبع دي فقرية كدا*




-----------------
** سي سي لبله الشاعر

بري أنا يتبع دي قلتها متين؟

هسا الواحد لو عرس و في ليلة الدخلة فجأتن كدة قال يتبع غدا:D:D
أها؟
وأنسحبت قوات العدو علي بعد رطل لبن من خط سته
وإليكم الأنباء بالتفصيل:D

[جيجي]

فقري والله:)

[أميرى]

تك تاك
تك تاك
بووووووم

كم تمنيت يا ياسر أن أسجد لله
لكن!!!
و بين عبراتها زحفت بصبر إلي قلبي...
وأكتفيت بدفع كرسيها المتحرك ...بين عيني

لا زلت من ساعتها يا صديقة
أمشي حزينا في الشوارع أركل الحصي و أحادث نفسي
كما و إسحق

اللهم أهدها قبلة و...سجدة

[مرافي]

تك تاك
تك تاك
بووووووم

كم تمنيت يا ياسر أن أسجد لله
لكن!!!
و بين عبراتها زحفت بصبر إلي قلبي...
وأكتفيت بدفع كرسيها المتحرك ...بين عيني

لا زلت من ساعتها يا صديقة
أمشي حزينا في الشوارع أركل الحصي و أحادث نفسي
كما و إسحق

اللهم أهدها قبلة و...سجدة

باين عليك مشيت كتير من شهر 12 لي شهر 3 :D :D

اميري سلاااام

[أميرى]

باين عليك مشيت كتير من شهر 12 لي شهر 3 :D :D

اميري سلاااام

من قبل ١٢ بكتير يا ستنا
و لسة

منورة لمن شمسنا غارت

إنعل أبو شوقي ليك ياخ