مشاهدة النسخة كاملة : رسائل إلى امي أرجو أن لا تقراها(ماقصيدة)
حجة امنة
21-06-2012, 12:35 PM
الرسالة الاولى : يما انا جيت الحداشر
العنوان : بيتكم الكاين في الخرتوم
التاريخ : حسع دي
بعد السلام عليكم , بلاهي كيف حالكم في المدة التي لم تروني فيها ؟!
مبروك عرس ولدكم الدكتور علي حسين على الحسناء سلمى
معليش جات متاخره لكن كالعادة انا جيت الحداشر
مع إنك يا حاجة قوية الذاكرة لكن إحتمال ما تتذكري الحادث دا ,
كعادتك في نسيان كل غلطاتي و هفواتي الكتيرة gap
المهم
لمن كنت في الثانوي في مدرسة الراهبات في مرة جيت تالتة الطيش ,
الحقيقة إنو تانية الطيش كانت من غير الناطقين بها
و الطيش كانت عيانة
مديرة المدرسة في الوكت داك كانت سامية صبحي إسكندر ,
تشبه لي حد بعيد مديرات المدارس في الافلام الامريكية
استاذة سامية مسحت بي الارض ,
ليه يا آمنة كدا , إنتي بت شاطرة و ذكية و ....
قمت إنفعلت و في النتيجة التانية طلعت الحداشر
لمن رجعت البيت كنت فرحااااااانة و قلت ليك : يما انا جيت الحداشر
قلتي لي : سجمي نقلوك فصل الإنجليزي !!!!
وكان فصل الانجليزي في المدرسة بيقبل 10 طلاب بس في الفصل
اسفة إني جيت الحداشر في عرس علي ولدك ,
علي ولدك دا طلع أخوي شديد والله
في الختام السلام عليكم
يتبع
نهلة محكر
21-06-2012, 01:03 PM
أها وقال ثم ماذا ..
بالمناسبة أنا هناك
وسوسن سنادة عاملة فيها مهمة
وأما بعد
مشتاقون ومنتظراك
اها وفي عرس اختك ح تجي الكم؟
بس قطع شك في عرس بت جيرانكم ح تجي الاولى
اهلنا الصينيين عندهم مثل حكيم بقول (لو فاتك عرس اخوك وعرس اختك ما يفوتك عرس صاحبك)
وانا صاحبك واولى بي انك تحضريهو
من باب صاحب عواليق ولا اخو شديد gap
ابوبكر حسن
21-06-2012, 02:38 PM
الرسالة الاولى : يما انا جيت الحداشر
العنوان : بيتكم الكاين في الخرتوم
التاريخ : حسع دي
بعد السلام عليكم , بلاهي كيف حالكم في المدة التي لم تروني فيها ؟!
مبروك عرس ولدكم الدكتور علي حسين على الحسناء سلمى
معليش جات متاخره لكن كالعادة انا جيت الحداشر
مع إنك يا حاجة قوية الذاكرة لكن إحتمال ما تتذكري الحادث دا ,
كعادتك في نسيان كل غلطاتي و هفواتي الكتيرة gap
المهم
لمن كنت في الثانوي في مدرسة الراهبات في مرة جيت تالتة الطيش ,
الحقيقة إنو تانية الطيش كانت من غير الناطقين بها
و الطيش كانت عيانة
مديرة المدرسة في الوكت داك كانت سامية صبحي إسكندر ,
تشبه لي حد بعيد مديرات المدارس في الافلام الامريكية
استاذة سامية مسحت بي الارض ,
ليه يا آمنة كدا , إنتي بت شاطرة و ذكية و ....
قمت إنفعلت و في النتيجة التانية طلعت الحداشر
لمن رجعت البيت كنت فرحااااااانة و قلت ليك : يما انا جيت الحداشر
قلتي لي : سجمي نقلوك فصل الإنجليزي !!!!
وكان فصل الانجليزي في المدرسة بيقبل 10 طلاب بس في الفصل
اسفة إني جيت الحداشر في عرس علي ولدك ,
علي ولدك دا طلع أخوي شديد والله
في الختام السلام عليكم
يتبع
ياخ انتى الاولى والله
الجية دى ما إلا بى الكرعين ياحجة امنة
تحياتى
مها عبدالمنعم
21-06-2012, 03:17 PM
سلامات يازوله كتابه
والله فرحت ليك كيف لمن شفتك قااااااااااعده
حجة امنة
21-06-2012, 03:45 PM
الرسالة التانية : ما تعامليني كمعجبة
العنوان : عيادة الانيميا المنجلية بمستشفى جعفر بن عوف
التاريخ : حسع دي بتوقيت قوقل (Google)
بعد السلام عليكم , بلاهي كيف حالكم في المدة التي لم تروني فيها ؟!
يا حاجة ياخي انا شكلي ما كنت بعرفك كويس
ف شنو , قمت قوقلتك
دي النتيجة الوحيدة الجاتني بالسوداني
دكتورة بخيته ومستشفى جعفر والانيميا المنجلية وابو الظربان واشياء اخرى
بسم الله الرحمن الرحيم
اعتبر نفسي مباركا طيلة الاربع سنوات الماضية كوني اعمل متطوعا مع الدكتورة بخيتة عطا الله استشارية طب الاطفال واختصاصية الانيميا المنجلية في عيادة الانيميا المنجلية المحولة بمستشفى جعفر بن عوف التخصصي سابقا فاستاذة الاجيال هذة فضلا عن كونها استاذة بالجامعات السودانية فهي المتخصصة الوحيدة في مرض الانيميا المنجلية وصاحبة اول عيادة تخصصية في السودان وهذا ليس غريبا على اطباء السودان الرواد بل الغريب كونها تعمل متطوعة طيلة الخمس عشرة سنة الماضية في العيادة المحولة دون راتب او حافز اواي مقابل مادي او معنوي محتسبة الاجر في مساعدة هؤلاء المرضى من اصحاب الدخل المهدود والجيوب الفارغة والمستشفى يقع في شارع الحوادث حيث المستوصفات والعيادات التي تتمنى تخصص نادر مثل الذي عند الدكتورة بل ان دكتورة بخيته تزور هؤلاء المرضى الذين يربو عددهم عن الخمس مئات حال مرضهم في اماكنهم ولا تبخل على زوارها بحق الفطور والمواصلات واللبن والفحص عندما يزورونها دكتورة بخيته تملك القدرة على تمليك طلابها معلومات اساسية وحتمية وخطيرة باسلوب بسيط وسلس خالي من التعقيدات الاكاديمية التي يختفي خافها اصحاب المعلومات المنقوصة هذة الاستاذة تعامانا كاولادها ولا تناديك او تخاطبك الا بيا ولدي ويا بنتي اليوم اتخذت إدارة المستشفى قرار معيب شكلا وموضوعا بايقاف العيادة وحرمان مئات المرضى من مكان يتلقون فية العلاج والتعليم الطبي والصحي والحب ولاحترام من دكتورة بخيته اليك دكتورة بخيته نحن ملتزمون بالعمل معك في اي زمان ومكان يمكنك من مواصلة هذة العيادة الخيرية التطوعية وننادي بالاتي :تكريم دكتورة بخيته على كافة المستويات ايجاد مركز طبي تعليمي بحثي لمرض الانيميا المنجلية هذا المرض الفتاك القاتل المهمل يتبع لاي من الجامعات او باشراف الوزارة ندين سلوك مستشفى جعفر بن عوف ونطالب باعتذارها لهذة القامة التي لم تفقد شيئا ماديا بل فقدت منبرها في تقديم الخير
دكتور زهير حسن
ف شنو , رجاءً ما تعامليني كمعجبة
وفرصة سعيدة والله
في الختام السلام عليكم
يتبع
حجة امنة
21-06-2012, 03:57 PM
أها وقال ثم ماذا ..
بالمناسبة أنا هناك
وسوسن سنادة عاملة فيها مهمة
وأما بعد
مشتاقون ومنتظراك
يا زولة انعل ابو الما مشتاقون و منتظراك زاتو gap
اها لسع ما مطرت ؟
حجة امنة
21-06-2012, 05:31 PM
اها وفي عرس اختك ح تجي الكم؟
بس قطع شك في عرس بت جيرانكم ح تجي الاولى
اهلنا الصينيين عندهم مثل حكيم بقول (لو فاتك عرس اخوك وعرس اختك ما يفوتك عرس صاحبك)
وانا صاحبك واولى بي انك تحضريهو
من باب صاحب عواليق ولا اخو شديد gap
يا وجدي ياخ في الليلة ديك انا هان علي أرضى و أسامح غربتي
إنفعلت ليك و قررت تاني ما يهمني البعرس يعرس و البطلق يطلق
قام ترااااااخ إتذكرت ليك إنو الشعارات البراقة و الهتافات دي طواااالي
قاعدة تدخلني في مضافريني gap
ف شنو و للضمان كدا ربنا يفرحنا بيك قريب gap
حجة امنة
21-06-2012, 05:34 PM
ياخ انتى الاولى والله
الجية دى ما إلا بى الكرعين ياحجة امنة
تحياتى
نوع الجية بي الكرعين دي بيكون معاها
عصرة قروش قريب لي خشم الباب gap
تحياتي انا زاتي
حجة امنة
21-06-2012, 05:38 PM
سلامات يازوله كتابه
والله فرحت ليك كيف لمن شفتك قااااااااااعده
يابت إتي بجي من بتين ؟
ياخ انا بقيت أجي تووووش داخلة و ما بفتش الجا منو و المشى منو
بس ألقى لي فرقه و أنقشط ورقة gap
يااخي دا مكسب طن
و كتابه إتي دي :D
حسين عبدالجليل
22-06-2012, 04:54 PM
اقتباس:
دكتورة بخيته ومستشفى جعفر والانيميا المنجلية وابو الظربان واشياء اخرى
بسم الله الرحمن الرحيم
اعتبر نفسي مباركا طيلة الاربع سنوات الماضية كوني اعمل متطوعا مع الدكتورة بخيتة عطا الله استشارية طب الاطفال واختصاصية الانيميا المنجلية في عيادة الانيميا المنجلية المحولة بمستشفى جعفر بن عوف التخصصي سابقا فاستاذة الاجيال هذة فضلا عن كونها استاذة بالجامعات السودانية فهي المتخصصة الوحيدة في مرض الانيميا المنجلية وصاحبة اول عيادة تخصصية في السودان وهذا ليس غريبا على اطباء السودان الرواد بل الغريب كونها تعمل متطوعة طيلة الخمس عشرة سنة الماضية في العيادة المحولة دون راتب او حافز اواي مقابل مادي او معنوي محتسبة الاجر في مساعدة هؤلاء المرضى من اصحاب الدخل المهدود والجيوب الفارغة والمستشفى يقع في شارع الحوادث حيث المستوصفات والعيادات التي تتمنى تخصص نادر مثل الذي عند الدكتورة بل ان دكتورة بخيته تزور هؤلاء المرضى الذين يربو عددهم عن الخمس مئات حال مرضهم في اماكنهم ولا تبخل على زوارها بحق الفطور والمواصلات واللبن والفحص عندما يزورونها دكتورة بخيته تملك القدرة على تمليك طلابها معلومات اساسية وحتمية وخطيرة باسلوب بسيط وسلس خالي من التعقيدات الاكاديمية التي يختفي خافها اصحاب المعلومات المنقوصة هذة الاستاذة تعامانا كاولادها ولا تناديك او تخاطبك الا بيا ولدي ويا بنتي اليوم اتخذت إدارة المستشفى قرار معيب شكلا وموضوعا بايقاف العيادة وحرمان مئات المرضى من مكان يتلقون فية العلاج والتعليم الطبي والصحي والحب ولاحترام من دكتورة بخيته اليك دكتورة بخيته نحن ملتزمون بالعمل معك في اي زمان ومكان يمكنك من مواصلة هذة العيادة الخيرية التطوعية وننادي بالاتي :تكريم دكتورة بخيته على كافة المستويات ايجاد مركز طبي تعليمي بحثي لمرض الانيميا المنجلية هذا المرض الفتاك القاتل المهمل يتبع لاي من الجامعات او باشراف الوزارة ندين سلوك مستشفى جعفر بن عوف ونطالب باعتذارها لهذة القامة التي لم تفقد شيئا ماديا بل فقدت منبرها في تقديم الخير
دكتور زهير حسن
سلام ياحاجة آمنة :
بلغي تحياتي و إحترمي وتقديري للدكتورة بخيتة عطا الله , فبمثلها تبني الاوطان .
ابن جيراننا - في ضواحي واشنطون- و عمره حوالي الاثني عشر عاما مصاب بمرض الانيميا المنجلية , نراه يلعب و يمرح كبقية الاطفال أحيانا , ثم يمرض ويلزم سرير المستشفي لعدة أيام , و تستمر الدورة بين المرض و الشفاء.
مؤخرا تحسنت حالته كثيرا وبسؤال و الدته علمت بأنه يتناول دواء تجريبي جديد, حبوب chemotherapy مثل التي تعطي لمرضي السرطان .
هذه هي الروابط لأنواع المعالجات الجديدة/التجريبية بامريكا لهذا المرض الذي معظم مرضاه من أصول أفريقية .
http://www.ncbi.nlm.nih.gov/pubmed/17724701
http://www.nih.gov/news/radio/jan2010/20100115niddksickle.htm
إن أمكن اعطاء الروابط أعلاه لدكتور بخيتة عطا الله , فربما تراها مفيدة .
ولك ولوالدتك الفاضلة التحية - يآمنة .
حجة امنة
22-06-2012, 08:52 PM
الرسالة التالتة : الحلبية بياعة القضية
العنوان : شارع الجامعة
التاريخ : شهر 8 سنة 1998
بعد السلام عليكم ، بلاهي كيف أنتم في المدة التي لم تروني فيها ؟!
يا حاجة يااخي انا شكلي ما كنت بعرفني كويس
ما أظن إنك عارفة الحادث دا لكن أهو الحصل حصل
في اليوم دا كان لي يادوب إسبوعين في الجامعة ، و كان اليوم المشئوم
يوم ناس الامن كتلو الطالب محمد عبدالسلام ، اليوم داك الطلبة إعتصمو
انا ما فهمت إعتصام يعني شنو ؟ لمن سمعت الكلمة دي إتخيلت إنها زي حركة
الناس لمن يقعدو في محل و يبطلو الاكل، شلت هم طبعا ،
إنتي عارفة همي في بطني
المهم
اليوم داك لي شقاوتي إعتصمت مع كم نفر من دفعتنا ، إعتصمو لانهم من مدني
و بعرفو الولد ، الايام ديك كان شريط محمد الامين
(ود مدني) طالع جديد
و الباص السياحي ، ركبت البص و سمعتو لي اول مرة ،
وهاك يا بكاء و هبالة في الشارع ،
الايام ديك كانت ونسة السناير كلها عن المظاهرات
و كيف إنهم بيتلقفو البنبان
ويرجعو لناس البوليس تاني ، وحكاوي و حكاوي
في اليوم داك كنت جاية في الطريق للجامعة ، أبوي عاين لي شدييييد و قال لي :
قالو في أحداث في الجامعة ، ما أشوفك تطلعي في مظاهرة يا آمنة
منو دي ؟ انا ، أبدا ، ما حيحصل
مع اني مشيت لابسة كدارة و إسكيرتي كلوش
لمن المظاهرة جات مارة بي باب كليتنا سالت نفس الناس الكانو بيحكو الحكاوي ، اهاااا
حنطلع متين ، تطلعي وين يا برلومة ، يلا أجري أركبي العربية ديك
حتخارجكم للسوق العربي ، إرتبكت لكن لمن شفت عدد إتنين شيوعي و تلاتة شيوعيات و وإتنين إتحادي و أنصار سنة
طلعو مع الناس ، للتاريخ ديل كانو كل الطلاب المنظمين في كليتنا بالاضافة لي كم كوز و كوزتين
طلعت
بقينا مااااشين في شارع الجامعة ، مقتل طالب مقتل أمة ، مقتل طالب مقتتتتتتتل أمة
و الشباب بحمسو في بعض ، زاد حماسم لمن
شافو طالبة من إقتصاد إسمها عبير كرار ، و نادوها بي بت الشهيد
انا طبعا كنت تور الله في برسيمو ، ما فاهمة حاجة
لمن شافو ناس فض الشغب و البوليس بقو يقولو ما تتفرقوووووو
ما تتفرقووووووووووو ، طبعا انا خفت لكن عملت فيها شجاعة و قعدت اكورك
ما تتفرقوووووووووو
قام واحد من العساكر ضرب رصاص في الهوا قام صادف عمود الكهرباء
عمل شطططططططط
قلتا ليهم : إتو أولاد حرام ولا شنو بلا ما تتفرقو بلا .... معاكم ، أساسا
إحنا ملمومين في كتل زول و دحين بلحقونا ليو ، أجرو يا بنات
مع أجرو يا بنات دي أنا تاني ما شافوني إلا في السوق العربي
اليوم التاني جيت لقيتم مسمييني الحلبية بياعة القضية
ف شنو شكلي برضو حا أنضم لي جبهة الجهاد الإلكتروني
فرصة سعيدة يا آمنة
في الختام السلام عليكم
يتبع
حجة امنة
22-06-2012, 09:02 PM
سلام ياحاجة آمنة :
بلغي تحياتي و إحترمي وتقديري للدكتورة بخيتة عطا الله , فبمثلها تبني الاوطان .
ابن جيراننا - في ضواحي واشنطون- و عمره حوالي الاثني عشر عاما مصاب بمرض الانيميا المنجلية , نراه يلعب و يمرح كبقية الاطفال أحيانا , ثم يمرض ويلزم سرير المستشفي لعدة أيام , و تستمر الدورة بين المرض و الشفاء.
مؤخرا تحسنت حالته كثيرا وبسؤال و الدته علمت بأنه يتناول دواء تجريبي جديد, حبوب chemotherapy مثل التي تعطي لمرضي السرطان .
هذه هي الروابط لأنواع المعالجات الجديدة/التجريبية بامريكا لهذا المرض الذي معظم مرضاه من أصول أفريقية .
http://www.ncbi.nlm.nih.gov/pubmed/17724701
http://www.nih.gov/news/radio/jan2010/20100115niddksickle.htm
إن أمكن اعطاء الروابط أعلاه لدكتور بخيتة عطا الله , فربما تراها مفيدة .
ولك ولوالدتك الفاضلة التحية - يآمنة .
الأنيميا المنجلية مرض مؤلم بمعنى الكلمة يا حسين ، المريض بيفضل
يتالم طول حياتو ، اذا الجو كان بارد بيزيد الالم إذا رطب او حار نفس الشي
الطفل ما بيقدر يمارس حياتو بشكل طبيعي لانو المجهود الزايد بزيد نوبات الالم
للاسف التوعية عن المرض ضعيفة جدا في السودان مع انو نسبة المرضى ما ساهلة ، و للاسف برضو عيادة دكتورة بخيتة هي الوحيدة المتخصصة في السودان ، و عيادة طوعية
شكرا على المعلومة و إن شاء الله حا ارسل ليها الرابط ، أخر مرة إتكلمت معاها
بخصوص الانيميا المنجلية عرفت إنهم بجربو في دواء جديد برضو ، أعتقد إنو ال اوميقا 3 ، الابحاث بتقول إنو بخفف من أعراض المرض و بيخفف نوبات الالم
لانو حسب الفهمتو المرض دا مزمن ولسع ما لقو ليو علاج جزري ، تحياتي لولد جيرانكم و والدته و ربنا يشفيه و يخفف عنه
نهلة محكر
23-06-2012, 02:08 PM
قررررررررررربت looool
اقتباس:
المشاركة الأصلية كتبت بواسطة حجة امنة http://sudanyat.org/vb/images/buttons/viewpost.gif (http://sudanyat.org/vb/showthread.php?p=466706#post466706)
اها لسع ما مطرت ؟
mamkouna
23-06-2012, 05:28 PM
لمن كنت في الثانوي في مدرسة الراهبات في مرة جيت تالتة الطيش ,
الحقيقة إنو تانية الطيش كانت من غير الناطقين بها
و الطيش كانت عيانة
.....................
ضحكتَ من جووووه قلبي يا حجة آمنة..
يضحك نهارك و كل حياتك
التحية ليك و للدكتورة بخيتة
حجة امنة
25-06-2012, 11:04 AM
لمن كنت في الثانوي في مدرسة الراهبات في مرة جيت تالتة الطيش ,
الحقيقة إنو تانية الطيش كانت من غير الناطقين بها
و الطيش كانت عيانة
.....................
ضحكتَ من جووووه قلبي يا حجة آمنة..
يضحك نهارك و كل حياتك
التحية ليك و للدكتورة بخيتة
و انا فرحت من جوووووووه جوات قلبي لمن
قريتك هنا
يضحك نهاراتك و كل حياتك يا ممكونة يا أختي
حجة امنة
27-06-2012, 12:52 PM
الرسالة الرابعة : مذكرات مجنده
العنوان : معسكر الخدمة الإلزامية ب ام دوم
التاريخ : شهر 12 سنة 2004
بعد السلام عليكم ، بلاهي كيف أنتم في المدة التي لم تروني فيها ؟!
يما إتي شكلك ما عرفتي تربيني كويس , ف شنو , الحيكومة ما قصرت معاي
أتذكر يوم بديت إجراءت التسجيل للخدمة الوطنية , أولاً الكشف الطبي
بنات دفعتنا أغلبم إتصنفو (ج) يعني غير لئقات صحياً و نصهم إتصنفو بي
نضارة وااااااحدة , دي تخش للجنة الطبية تمرق تديها لي أختا
أبيت أطرح فكرة تكتبو لي ورقة تطلعني (ج) , الصراحة خفتكم
تدوني درس في الأخلاق و تملوني فقر , وانا ما ناقصة بلاوي
ف شنو , إتوكلت و دخلت اللجنة , ياخ المره الدكتورة شمتني
من أول نظرة , و قبل ما أتم ليها كضبتي طلعتني (أ)
إن شاء الله تكون شحمت و أدوها شريط بعد داك
بعد إتصنفت طوالي دخلت المعسكر ,
معسكر ام دوم دفعة نسيبة و لا خولة الكم كدا ما عارفة
إتخيل لي كانت نسيبة ال الحداشر و الله ما قادره أتذكر
اغلب المجندات كانو كوادر الطبية و تخصصات نادرة
زي التربية و الرياضيات , لقيت من دفعتي إتنين
رشا و إكرام , لقيتم إتقدموني بي كم يوم
دخلت المعسكر بعد ما(الاب) وصلني
إتذكرت اول يوم لي في المدرسة
طلبت من (الاب) يخليني أدخل براي
رفض , ف شرحت ليو إني أساساً جاية متاخرة
ولو شافهو معاي حيعذبوني زيادة
رفض يمشي إلا بعد يتاكد إنهم قبلوني
المهم
دخلت , اول مشكلة واجهتها كانت مع إسمي
التعلمجية بتول : إسمك منو يا مجندة ؟!!!
إسمي : آمنة زوزانا حسين محمد حسن محمد ع......
بتول : هييي , شنو روزانا دي كمان
زوزانا زوزانا يا استاذة دا إسم بولندي معناو ....
بتول : هيييي انا ما استاذة
قامت تفتش في شنطتي : كيس صابون بدرة , علبة شمع بالكركار
صابونة فنيك , مشط , مكحلة , كم غيار , كم كتاب
و كنت داسه موبايلي في جيب داخلي
أدتني العهدة : ( الميري ) و هو فستان و بنطلون و خمار من الدمورية
جزمة باتا لونا بيجي , مصحف , كباية بلاستيك
مشيت أشرت لي ابوي من بعيد إنو خلاص قبلوني
دخلت المعسكر , و كان عبارة عن مدرسة فيها فصول
و حوشيين , الفصول كلها كانو مستخدمنها كعنابر عشان النوم
وكان فيها عدد من الحمامات و الأدب خانات
في طريقي للعنبر صادفت عدد من البنات
بينططو و هم شايلين شنطم فوق راسم و بيقولو :
انا الطيرة الجيت الليلة , انا الطيرة الجيت الليلة
قمت بقيت ماشة سريع عشان أغير هدومي عشان
ما ينقشوني جيت الليلة زي الطيرات ديل !!
وواحدات تانيات كانو قاعدين في فترة الراحة
سمعتهم بي أضاني دي :
الاولة : مبااااالغة لكين , نضيفة نضافة
التانية : أأي مستحمية ياااااخ
موضوع عدم الحمام و القمل حا أجيك ليو في رسالة قادمة
عشان يا حاجة ما أطول عليك القصة بي إختصار كدا
انا في المعسكر دا إتعلمت الكذب و الصلاة بدون وضوء
و السرقة
اي السرقة
يتبع جداً
قيس شحاتة
27-06-2012, 05:54 PM
الرسالة الرابعة : مذكرات مجنده
العنوان : معسكر الخدمة الإلزامية ب ام دوم
التاريخ : شهر 12 سنة 2004
بعد السلام عليكم ، بلاهي كيف أنتم في المدة التي لم تروني فيها ؟!
يما إتي شكلك ما عرفتي تربيني كويس , ف شنو , الحيكومة ما قصرت معاي
أتذكر يوم بديت إجراءت التسجيل للخدمة الوطنية , أولاً الكشف الطبي
بنات دفعتنا أغلبم إتصنفو (ج) يعني غير لئقات صحياً و نصهم إتصنفو بي
نضارة وااااااحدة , دي تخش للجنة الطبية تمرق تديها لي أختا
أبيت أطرح فكرة تكتبو لي ورقة تطلعني (ج) , الصراحة خفتكم
تدوني درس في الأخلاق و تملوني فقر , وانا ما ناقصة بلاوي
ف شنو , إتوكلت و دخلت اللجنة , ياخ المرة الدكتورة شمتني
من أول نظرة , و قبل ما أتم ليها كضبتي طلعتني (أ)
إن شاء الله تكون شحمت و أدوها شريط بعد داك
بعد إتصنفت طوالي دخلت المعسكر ,
معسكر ام دوم دفعة نسيبة و لا خولة الكم كدا ما عارفة
إتخيل لي كانت نسيبة ال الحداشر و الله ما قادره أتذكر
اغلب المجندات كانو كوادر الطبية و تخصصات نادرة
زي التربية و الرياضيات , لقيت من دفعتي إتنين
رشا و إكرام , لقيتم إتقدموني بي كم يوم
دخلت المعسكر بعد ما(الاب) وصلني
إتذكرت اول يوم لي في المدرسة
طلبت من (الاب) يخليني أدخل براي
رفض , ف شرحت ليو إني أساساً جاية متاخرة
ولو شافهو معاي حيعذبوني زيادة
رفض يمشي إلا بعد يتاكد إنهم قبلوني
المهم
دخلت , اول مشكلة واجهتها كانت مع إسمي
التعلمجية بتول : إسمك منو يا مجندة ؟!!!
إسمي : آمنة زوزانا حسين محمد حسن محمد ع......
بتول : هييي , شنو روزانا دي كمان
زوزانا زوزانا يا استاذة دا إسم بولندي معناو ....
بتول : هيييي انا ما استاذة
قامت تفتش في شنطتي : كيس صابون بدرة , علبة شمع بالكركار
صابونة فنيك , مشط , مكحلة , كم غيار , كم كتاب
و كنت داسه موبايلي في جيب داخلي
أدتني العهدة : ( الميري ) و هو فستان و بنطلون و خمار من الدمورية
جزمة باتا لونا بيجي , مصحف , كباية بلاستيك
مشيت أشرت لي ابوي من بعيد إنو خلاص قبلوني
دخلت المعسكر , و كان عبارة عن مدرسة فيها فصول
و حوشيين , الفصول كلها كانو مستخدمنها كعنابر عشان النوم
وكان فيها عدد من الحمامات و الأدب خانات
في طريقي للعنبر صادفت عدد من البنات
بينططو و هم شايلين شنطم فوق راسم و بيقولو :
انا الطيرة الجيت الليلة , انا الطيرة الجيت الليلة (1)
قمت بقيت ماشة سريع عشان أغير هدومي عشان
ما ينقشوني جيت الليلة زي الطيرات ديل(2) !!
وواحدات تانيات كانو قاعدين في فترة الراحة
سمعتهم بي أضاني دي :
الاولة : مبااااالغة لكين , نضيفة نضافة
التانية : أأي مستحمية ياااااخ
موضوع عدم الحمام و القمل حا أجيك ليو في رسالة قادمة
عشان يا حاجة ما أطول عليك القصة بي إختصار كدا
انا في المعسكر دا إتعلمت الكذب و الصلاة بدون وضوء
و السرقة
اي السرقة
يتبع جداً
(1) :D:D
(2) gapgap
حجّة آمنة.. الله يدّيك العافية. قولي آمين
ناصر يوسف
27-06-2012, 06:25 PM
وواحدات تانيات كانو قاعدين في فترة الراحة
سمعتهم بي أضاني دي :
الاولة : مبااااالغة لكين , نضيفة نضافة
التانية : أأي مستحمية ياااااخ
موضوع عدم الحمام و القمل حا أجيك ليو في رسالة قادمة
عشان يا حاجة ما أطول عليك القصة بي إختصار كدا
انا في المعسكر دا إتعلمت الكذب و الصلاة بدون وضوء
و السرقة
اي السرقة
يتبع جداً
حاجه آمنه كيفنك بت عمي
إنتي عارفه إنو كتابتك دي حاااااااااااااااارقة جداً ؟؟؟
قيقي كتابة مُؤلمة وبقينا بنفتش ليها في شان نفش غبينتنا ياخ ;) ;)
فشنوووووووووو ،،، تقعدي تكتبي لينا وبس ،،،
أكتبي يا زولة علييييييييييييييييكي الله أكتبي رسائلك دي ياخ
حجة امنة
27-06-2012, 06:50 PM
الرسالة الخامسة : العسكرية تصرف
العنوان : معسكر الخدمة الإلزامية ب ام دوم
التاريخ : شهر 12 سنة 2004
بعد السلام عليكم ، بلاهي كيف أنتم في المدة التي لم تروني فيها ؟!!
نرجع ليك لي موضوع السرقة
كانت معانا في المعسكر بت من جامعة السودان سمممممممينة و هبلة
جات تشتكي من إنو بنطلونا سرقو ولا إتشرط ما متذكره
للمعلومة ، المجندة بيكون عندها ميري وااااحد بس ، كنا بعد تمام الساعة 9 بنقعد نغسل
و للمعلومة برضو التمام هو : جمع كل الموجودين في المعسكر و عدهم
عادة بيكون في تلاته تمام في اليوم ، الصباح الساعة 7 قبل التدريب ، الساعة 5
و الساعة 9 ، تمام الساعة 9 دا كان الغرض منو الإستنزاف الجسدي و النفسي
عشان المجندات يمشو ينومو بدون تفكير في الوضع المهبب الكانو فيو ،
التعلمجيات كانو بيتفننو في الإساءة و الإستهزاء بالمجندات ،
الصراحة مرات الحاجات البيقولوها بتكون مضحكة
و للتاريخ انا ما حصل ضحكت في كلامم إلا لمن واحدة من البنات
مرة هشت ليها ضبانة من وشها أثناء وضع الإنتباه
وضع الإنتباه دا المفروض المجند ما يتحرك فيو تحت أي ظرف
قامت واحدة من التعلمجيات إسمها وداد قالت ليها : هييييي يا مجندة بتهشي في
الضبان ليه ؟ ضبانتنا دي جاتك ولا جيتيها ؟ ضبانتنا قاعده هنا مكرمه معززة ما انتو لو كنتو نضيفات ما كان جاتكم
يا مقملات !! gap
يااخي انا ضحكت ضحك لمن وقعت في الواطة ، معليش موضوع القمل دا حا اجيك ليو لاحقا
المهم كنا بنغسل الميري بعد الساعة 11 ، يا حاجة إتي عارفاني ما بعرف أغسل الهدوم gap
ف شنو صحباتي في العنبر حنو علي لانو الميري بتاعي كان أتفه ميري في المعسكر ،
بقو يغسلو لي ، بقيت انا أنقل ليهم الموية من هناااااااك و هم يغسلو
اها صحبتي السمينة شرطت بنطلونا وجات تتونس معانا ،
قلتا ليها انا زااااتي بنطلوني إتشرط ، ورح نسال واحدة من التعلمجيات ، مشينا
التعلمجية سامية : دايرين شنو ؟! ها ها ها ، إتصرفو يا مجندات
إتو ما عارفين العسكرية تصرف ؟!
قلتا ليهن خير ، الميري الجديد كتيييير قاعد في كنتينر في نص الحوش و بابو فاتح يلاكم نجازف منو .
فتحو لي خشمم و صحبتي السمينة الهبلة أبت تجي معاي ، إتخيل لي رشا دفعتي مشت معاي
جازفنا الميري و طلعنا .
بعد كم يوم صحبتي السمينة الهبلة جات قالت لي : يا ابو الزوز يااخي دايراك تجازفي لي حاجة .
اها خير ؟
جازفي لي مصحف لانو مصحفي سرقو .
شنوووووو ، مصحف ؟! يا بت إتي هبلة ؟ انا بت ناس و ناس محترمين
دايراني اسرق ليك مصحف ؟!!!! ;)
بعد داك بي كم يوم كنا في فترة الراحة ، دي الفترة البعد صلاة الضهر ،
اليوم داك قالو مافي تدريب لانو المعسكر فيو تصليحات في الحمامات
المعسكر إتملا رجال ، إحتفينا بي جيتم دي زي الحاجة السمحة :D
لانو المعسكر كان فيو نسوان بس ، الحرس الرجال بيكونو قاعدين بي السلاح
برا المعسكر ، مرات مرات بيخش واحد إسمو معاز على ما أتذكر بيخش يمرق السلاح
للتدريبات كان صغيروني و وجيه ، بيقومن البنات لمن يجي
بيغنن : معاز شايل السلاح تاح تاح ترااااح gap
اها فجاءة كدا قامو ضربو صفارة الجمع ، قمنا نتجارى عشان نلبس الميري للجمع ،
قامو قالو أجمع و بي هدومكم دي ، يا ساتر يارب
قمنا جمعنا في الحوش الأمامي ، المعسكر فيو تقريبا 600 مجندة مقسمين لي 6
سرايا ، لمن نجمع بنكون في شكل مستطيل و التعلمجيات بيقيفن في نص المستطيل .
اليوم داك كل التعلمجيات كانن جوة المستطيل و جنبهم كرتونة صغيرة .
بدو ينبزو فينا نبز زايد من العادة : إنتو جيتو من وين ؟ إنتو جيتو من الخلا ؟
جامعات شنو دي الإتخرجتو منها ؟ يا معفنات يا ....
تعلمجية سامية إتفضلت و وضحت لينا إنو ناس التصليح لقو المجاري مقفولة
لانو البنات رمو في الحمامات حاجات قفلتا ، قامو مرقو الحاجات و ختوها في الكرتونة دي !!
تعلمجية وداد : انا إسمي وداد جرجرة ، لو دايرين تتجرجرو معاي بتجرجر معاكم للصباح
تعلمجية بتول : لو دايرين جرجرة وداد قاعدة للتخريج ،
لكين الليلة مافي إنصراف إل الكرتونة دي تنصرف !
و مافي زول يشيل الكرتونة !!!
اليوم داك كانت شمش الله أرجل ما يكون ،
و بس قعدت قصاد مخي لمن ساح و كرهت ام حلة السودان !!
بعد نص ساعة قمت إتلفت للجماعة الوراي
بي صوت خشن إكتسبتو في المعسكر: شباب قالو مافي زول يشيل الكرتونة
واحدين من ورا قعدو يتنطنو : اسكتي يا زوزانا ما ناقصنك
يا شبااااااب ، واحدة فيكم تختبر ،
تختبر بي لغة الجيش يعني تطلع من الطابور ،
قامت واحدة إسمها زيتونة من جامعة السودان تربية رياضيات ، إختبرت معاي
وجرررري شلنا الكرتونة و طوالي لبرميل الوساااخه كان ورا السرية حقتنا
في الوكت داك التعلمجيات كانو مشغولين بالونسة ، يلا مع رجعتنا للطابور
بتول شافتنا ، قعدت تكورك : شفتك شفتك يا مجندة ، ابقي شجاعة و امرقي !!
لمن لقت الكرتونة مافي زادت في الكواريك
قامت زيتونة مرقت و مرقت وراها :D
بتول : دا شنو دا ، عملتو شنو
قلت ليها : جنابك قلتي مافي زول يشيل الكرتونة ، لكين ممكن زولين يشيلو الكرتونة .
عاينت لي بي إعجاب لي حسع محيرني !
بتول : مبروووووووك العسكرية تصرف يا مجندات ،
السرية الرابعة يا (جن جويد ) إنصراااااااااف !!
دي كانت سريتنا ، صرفو سريتنا و خلو الباقيين و خلونا انا و زيتونة معاهم
بعد نص ساعة صرفو الباقين ، بعد ربع ساعة صرفونا انا و زيتونة .
القرف حيتواصل لحد ما نصل لي قصة القمل
يتبع للأسف >>>
ZEIN ABDALLA
27-06-2012, 08:00 PM
الرسالة الرابعة : مذكرات مجنده
العنوان : معسكر الخدمة الإلزامية ب ام دوم
التاريخ : شهر 12 سنة 2004
معسكر ام دوم دفعة نسيبة و لا خولة الكم كدا ما عارفة
إتخيل لي كانت نسيبة ال الحداشر و الله ما قادره أتذكر
دخلت , اول مشكلة واجهتها كانت مع إسمي
التعلمجية بتول : إسمك منو يا مجندة ؟!!!
إسمي : آمنة زوزانا حسين محمد حسن محمد ع......
بتول : هييي , شنو روزانا دي كمان
زوزانا زوزانا يا استاذة دا إسم بولندي معناو ....
بتول : هيييي انا ما استاذة
قامت تفتش في شنطتي : كيس صابون بدرة , علبة شمع بالكركار
صابونة فنيك , مشط , مكحلة , كم غيار , كم كتاب
و كنت داسه موبايلي في جيب داخلي
أدتني العهدة : ( الميري ) و هو فستان و بنطلون و خمار من الدمورية
جزمة باتا لونا بيجي , مصحف , كباية بلاستيك
مشيت أشرت لي ابوي من بعيد إنو خلاص قبلوني
دخلت المعسكر , و كان عبارة عن مدرسة فيها فصول
و حوشيين , الفصول كلها كانو مستخدمنها كعنابر عشان النوم
وكان فيها عدد من الحمامات و الأدب خانات
في طريقي للعنبر صادفت عدد من البنات
بينططو و هم شايلين شنطم فوق راسم و بيقولو :
انا الطيرة الجيت الليلة , انا الطيرة الجيت الليلة
قمت بقيت ماشة سريع عشان أغير هدومي عشان
ما ينقشوني جيت الليلة زي الطيرات ديل !!
وواحدات تانيات كانو قاعدين في فترة الراحة
سمعتهم بي أضاني دي :
الاولة : مبااااالغة لكين , نضيفة نضافة
التانية : أأي مستحمية ياااااخ
موضوع عدم الحمام و القمل حا أجيك ليو في رسالة قادمة
يتبع جداً
والله يا حجة آمنة بعد قريت مداخلتك الفوق دى اصبت بشعور غريب
هو خليط من الدهشة والحزن والاحباط وكثير من الغضب ....
عند زياراتى السودان استغرب فى تفكير الكثير من جيل الانقاذ ولا
اعرف السبب...وقد يكون من الاسباب هو ادخالهم السجن واذلالهم
فى ما يسمى معسكر الخدمة الالزامية وتمت برمجة عقولهم وصاروا
زي الروبوت.
نخليك تواصلى فقد يكون القادم أحلى
.
حجة امنة
28-06-2012, 02:44 PM
(1) :D:D
(2) gapgap
حجّة آمنة.. الله يدّيك العافية. قولي آمين
آميييييين gap
عاين
الوشوش ديل دسهن لانو حنحتاج ليهن لي قدام
القادم أعفن يا قيس يا أخي ، القادم أعفن :D
حجة امنة
28-06-2012, 02:58 PM
حاجه آمنه كيفنك بت عمي
إنتي عارفه إنو كتابتك دي حاااااااااااااااارقة جداً ؟؟؟
قيقي كتابة مُؤلمة وبقينا بنفتش ليها في شان نفش غبينتنا ياخ ;) ;)
فشنوووووووووو ،،، تقعدي تكتبي لينا وبس ،،،
أكتبي يا زولة علييييييييييييييييكي الله أكتبي رسائلك دي ياخ
إتا قايل شنو
انا ولا على كيفي حا أكتب
إتعصرت عصرة عدوك يا ناصر يا أخوي
و حاسه بي إحساس تافه جدا
بقيت زي ال ( بيشارك في القنيص بالدقه )
الزول بيكون (هييوين) و (هيليفيت )
الجماعة يكونو مارقين للصيد متجهزين
المارق بي حصان و الشايل سلاح
دا بمرقو مع الناس ملووووص ، أباطاتو و النجم
أها بعد الناس يتمو الصيد و يبقو على الاكل
زولك يمرق الشطة و الدقة :o
طارق صديق كانديك
28-06-2012, 03:14 PM
ياحجة آمنة الواحد يقرأ ويتبسم لطريقتك المتميزة في السرد ثم يلفه الأسى من كل مكان حين يتأمل ما فعله هؤلاء بالناس في بلدي .. !
ليس حباً في النقد أو التوجيه ولكن بالفعل أجد العنوان لا يعبّر عن محتوى الرسائل هذا المحتوى الذي يملأ الخاطر ألم حتى لا يكاد يسيغه، ثم تنهمر غمامات الطرفة المليحة بردا وسلاما على القارئين.
متابعة باهتمام لحدي ما نشوف قصة ( القمل ) العذبتينا بيها دي :)
ليك احترامي
أمير الأمين
28-06-2012, 03:47 PM
آميييييين gap
القادم أعفن يا قيس يا أخي ، القادم أعفن :D
أغرب بشارة ...!!:D:D
حجة امنة أزيكِ
يا حجة آآمنة
اولا بجد بضم صوتى للاخ طارق لفت انتباهى للموضوع صديق
بقرا مسافة طويلة فى موضوع بسودانيات واحنا فى انتظاره وكان السؤال
بتقرا شنو ............ موضوع حجة آآمنة وبراى كدا حيرنى الزمن الاخدو
والعنوان استغربت ....... فاظهرى هذه الكوميدياء السوداء
اضحكتنى ، فكان الوجع اشد ...
على جنب كده : قلتى طلعنا دفعة ناس رشا ديل دايما ناس مجازفات looool
واسعدنى قلمك الذى انطق صمت الممكونة مودتى لكما
سلمتم
واحة
حجة امنة
28-06-2012, 08:07 PM
والله يا حجة آمنة بعد قريت مداخلتك الفوق دى اصبت بشعور غريب
هو خليط من الدهشة والحزن والاحباط وكثير من الغضب ....
عند زياراتى السودان استغرب فى تفكير الكثير من جيل الانقاذ ولا
اعرف السبب...وقد يكون من الاسباب هو ادخالهم السجن واذلالهم
فى ما يسمى معسكر الخدمة الالزامية وتمت برمجة عقولهم وصاروا
زي الروبوت.
نخليك تواصلى فقد يكون القادم أحلى
.
عارف ، انا قاعده كل السنوات الفاتت بحاول أحلل في القصة دي ،
المرارة الحسيت بيها بسبب المعسكر ما دايره تفارق حلقي ،
غايتو قبل فترة وصلت للإستنتاج حقك دا ، الكان مزعلني الضغط البيمارسو عليك عشان تصبر على المعسكر ، لو ما تميت المعسكر ما بتقدر تستخرج شهادتك ، و لو عملت اي حركة كدا ولا كدا ممكن عادي يعملو ليك ( كما كت ) للمعسكر ، يعني أعد بي لغة الجيش gap
معليش حا اجيب ليك مداخلة لي من منتدى تاني عشان اوضح ليك كمية الضغوط ، و اسفة لانو المداخلة حتكون طويلة شوية :)
:
والله انا ال كم و اربعين يوم دي
كانت أكعب أيام متتالية مرت علي بدون مبالغة
المشكلة ما كانت الاكل الكعب ولا البرد حق شهر 1
ولا البعد من البيت
للمعلومة انا دي كانت اول مرة ابيت بره بيتنا ،
يعني ما حصل قعدت في داخلية ،
بعدين في حاجة خطيرة جدا إكتشفتها في المعسكر ،
البنات ، البنات ديل ياخ مخلوقات كريهة جدا
لمن عددم يفوت ال 10 انفار في مكان واحد
فيهم الهبلة و الحرامية و الكضابة
و العندها نفسيات و العاملة فيها السيدة عائشة
و الظريفة و الحربية و ال بي دستة رجال
لمن تلقاك الكوته دي كلهاااا مع بعض
بتكون صعبة
يلا الحرب كانت حرب نفسية اكتر منها جسدية
والله انا كنت متخيلة انو الحكاية حتكون الضعيف يقع و
السمين بيقيف
بتذكر في الحته دي شخصيتين
الاولى : امل بت عطبرة ، إتخرجت من طب الزعيم الازهري أفتكر ،
امل دي أضعف بت لاقتني في المعسكر ، شعرها طوووووووويل
وكانت مضفراهو من اول يوم لحد التخريج ،
كنت مسمياها ( امل ام قمل) :D
البت دي من اجمل و اقوى الشخصيات القابلتني
بتذكر إنها مع ضعف جسمها كانت حاضرة العزيمة مرات أثناء التدريب
البنات بيدوخو من التعب او من ضربة شمس الشتاء
تلقاها طواااالي طلعت من الطابور عشان ترفع الوقع
ف كتير انا كنت بطلع معاها عشان نرفع (الخساير)
للمعلومة الخساير كان الاسم البيطلقو على المجندات البيكونو عيانات
يا زول انا كنت بطلع عشان في المسافة البنرفع فيها الخساير و نوديهم
لطبيبة المعسكر اكون شلت نفسي و ارتاح شوية
اها كنا بنشيل الوقعت و نمشي للعيادة ، الدكتورة كانت بتعمل هي زاااتا في الخدمة
كنا بنجيها في الاول بالشباك و نغني ليها : تنقذني الطبيبة ، و تنقذني الطبيبة
الشخصية التانية كانت (فاطنة برونكو) إتخيل لي قرت تمريض
البت دي برضو عندها شخصية عجيبة ، مرحة بصورة غريبة لكن لمن تقفل بتقفل
لمن نفسياتا تقوم عليها بتقوم من الصباح بتلبس بنطلون جنز مشرشر من الركب
و قميص كاروهات بالاحمر و تجي تفتش علي في عنبرنا
بقوم انا بلاوز منها و بزوغ ، بترفض تخش العنبر و لو ما لقتني بتقعد في الحر
بيقومو البنات بيحنو عليها و بيفتشوني ، بتقوم تقول لي دايراك في موضوع
بنقوم نتمشى في المعسكر ، تقوم تقول لي بي لهجة الشوايقة : آمنة موشتهي بوي
بوي دي يعني أبوي
بقوم أقول ليها يا برونكو ياخ يعني انا مشتهيه راجل الجيران ؟ ما كلنا مشتهين أبواتنا
تقوم تبتسم و تقول : آمنة مشتهيي لي كسرة بالموية ، أقوم أقول ليها : هييي قبل شوية
عسناها و اكلناها بي ويكة ، يا بت إتي بتتوحمي ، فكينا يااااخ
تقوم تضحك و ترجع نفس ذات البت المرحة الجميلة .
النهاية gap
للمداخلة دي
حجة امنة
28-06-2012, 10:33 PM
الرسالة السادسة : قايد كتيبة الكافرون
العنوان : معسكر الخدمة الإلزامية ب ام دوم
التاريخ : شهر 12 سنة 2004
بعد السلام عليكم ، بلاهي كيف أنتم في المدة التي لم تروني فيها ؟!!
عاااارفاك القصة دي عارفاها :D
تتذكري لمن كنت بعمل ليكم زحمة في الحمام مع أذان المغرب
وتقولي لي : يا بت إنسلي لينا ، دي مواعيد صلاة المسلمين
نظام نخيس عشان انا الله يغفر لي كنت بتاخر و بفطفط في الصلاة
اها يا زولة الفشلتي فيو مدة ال 18 سنة :D القعدتها معاكم قبل المعسكر
نجحو فيو ناس الحيكومة
يا حاجة أنا بقيت صلاية جنس صلاة، لمن بلا وضوء!
أتذكر من اول يوم دخلت المعسكر، صادف صلاة الضهر،
بعد مشيت لبست الميري، جيت لقيت لي عريشة كدا زي الراكوبة،
لقيت البنات الكانن بيقطعن فيني قمت كا نوع من الرشاقة
جيت سلمت عليهم، اها في نص مطايبتي ليهن ضربو الصفارة
و الناس دي قامت جارية، بسم اللهي في شنو؟! أجري أجري يا مستجده
سجمنا، أجري وين؟! ورح العريشة، جريت معاها لحد ما دخلنا العريشة
بعد ما إستغفرن و شلنا نفسنا وروني إنو لمن صفارة الصلاة تضرب لازم
أي زول يدخل العريشة بغض النظر عن إنو بيصلي ولا كتابي ولا ماعندو دين
ولا معزور! يلا لو ما دخلت عريشة ابو سفيان دي طوالي بعاقبوك في تمام 9
اها بعد صلاة الضهر كان عندهم التلاوة، بيقرو ما تيسر من القران بي قيادة
تعلمجية بنقول ليها الشيخة، كانت بتنطق اسمي بي لهجة الشوايقة بتقول لي : زوزاني :D
اها انا كنت جاية من إجازة طويلة و الفترة بعد صلاة الضهر دي كانت بالنسبة لي فترة القيلولة، يعني كان جا منو داك في بيتنا ما بمرق ليو gap
في المعسكر بالجد كنت بعاني من إني كنت بدقس في نص التلاوة لدرجة تانيب الضمير، لمن الشيخة لقتني مرات بدقس قامت عملتني (أمير تلاوة) يعني الزول البيكون مسئول من مجموعة التلاوة، بقوم بدقس برضو، دا كلو هين
المصيبة كانت في صلاة الفجر؛ الأذان بيكون الساعة 5 و نص ولا 6 بيقومو يضربو الصفارة الساعة 4، الناس كلها تصحى عشان تنضف المعسكر
البنات بيقومن يقشن المعسكر كلو و واحدات بيمشن يجيبن الشاي من الخالات الطباخات في المطبخ، في جرادل حديد، نفس الجرادل المستخدمه في غسل الميري! قامن بنات منظمات ومرتبات من عنبرنا مسكن جردلين و علموهن عشان تاني نجيب فيهن الشاي بس، مع إنو انا شخصيا ما فارق معاي gap
بعد النضافة و شراب الشاي البنات بيلبسن الميري و بنمشي الصلاة وبعد داك بنجمع للتمام الساعة 7 و بعدها بنمرق ميدان (ام دوم) للتدريب
اها انا اول 10 أيام إنعصرت مع الجماعة و بقيت أقوم أقش الحوش و أواصل البرنامج معاهم، بعد داك بنيت لي قاعدة شعبية في السرية بتاعتنا :D
قمت أقنعتهم إنو ما من مصلحة السرية إني أشارك في قش الحوش؛ لاني مابعرف أقش، لاكين كمان انا منو يعني ولا إتخرجت من أكسفورد؟!!
ف شنو قمت إتفقت معاهم إني أكون مسئولة من نضافة الحمامات في الفترة النهارية، وافقو ، مع العلم إنو الفترة دي هي فترة الراحة و أحيانا البنات بيغسلو فيها و بيكبو موية الصابون في الحمامات، و عشان ضميري ما ياكلني قمت كم مرة نضفت الحمامات جد جد، موية صابون بدرة في الجردل و هووووب شوووووو و إنتهى البيان gap
اها بقيت بنوووووم زي الترتيب و مافي زول بيسالني، بصحى مع شراب الشاهي و مرات بمشي معاهم صلاة الفجر و مرات لحد ما أقوم بي راحتي الساعة 6 و نص بقوم أصلي الصبح.
يوم كنت نااااايمة، جات واحدة من سريتنا من جامعة السودان ما دايرة أقول إسمها، أدوها رتبة (حيكمدار) الحيكمدار كانت عندها مهام تنظيمية في السرية ؛ بتكون مسئولة عن السرية قدام (الحيكمدار العام) بتكون مجندة برضو.
المهم، جات حضرة الحيكمدار لقتني أحمد سيدي ناااااااايمة و الجماعة شغالين قش تقيل، سالت البنات النايمة دي منو؟! قالو ليها دي ابو الزوز، مالا عيانة ؟!
لا ما عيانة و شرحو ليها الإتفاق، انا عملت ميته و ابيت اقوم عليها :D
قامت تنكش تنكش جات رفعت الغطا من وشي،
جناب الحيكمدار عريف أركان حرب : قومي يا زوزانا للنضافة.
شخصي السمين :D : قالو ليك انا بنضف الحمامات الحماااااامات.
جناب الحيكمدار عريف أركان حرب : قومي يا مجندة ، دي تعليمات
شخصي السمين : يا بت تعليمات شنو إتي صدقتي ؟!! إن شاءالله يوم تخريج السجم دا يدوك رتبة gap
ورجعت إدمدمت بالغطا
جناب الحيكمدار عريف أركان حرب: قومي يا زوزانا و بطلي قلة أدب و سفاهة !!
أمك :eek:، معليش يا حاجة قصدي خوووووود :D
قمت طواااالي رفعت الغطا و وقفت ليها فوق السرير
انا الصراحة كلمة قلة أدب ما حرقتني لكين حرقتني حكاية السفاهة دي!!
والله أتذكر لحد حسع كنت لابسه جلابيتي الخدرا ام شرطه بي الجنبه لزوم التهوية و كدا،
و شعري منكوش النكشة حقة الصباح ديك gap
اها قمت وقفت ليها فوق السرير و انا فاغرة الفاه gap
شنو شنو شنو سفاااااااهة!!!
يلا مع شنو شنو دي باقي البنات الفي العنبر إتلفتو
لالالا يا ابو الزوز ما بيشبهك الكلام دا صلي على النبي
الصراحة انا الكسر عيني إنو بنات طب الزعيم الأزهري طالبات الحاجة كانن حاضرات و للاسف عارفني بتها ;)
ودا سبب أساسي من الاسباب الخلتني أمتنع عن الألفاظ القبيحة بعد المعسكر :D
المهم
قلت ليهم: صلو على الحبيب إتو ديل ، انا بس دايرة أشرح للاستاذة دي معنى كلمة سفاهة
و قبلت عليها : يا جنابك (الجن الل***) في سري طبعا لانو الكريهات بنات الطب كانو متابعين :D
: يا جنابك السفيه هو من يصرف ماله في أوجه الحرام مثل الخمر و النساء و انا الليلة بوريك سفاهتي!!
المهم قامو الاجاويد إتدخلو و انا قصرت الشر،
قلت ليهم خلاس بقوم أنضف الحمامات،
البت بعد فترة كدا جات إعتذرت لي و إتعافينا.
اها نرجع ليك لي تلاوة الضهر، مره كدا قمت أثناء التلاوة نمت لمن شخرت
و لكزوني، قمت زعلت زعل شديد خلاص، قمت فتتتت وقفت على حيلي،
الجماعة دا شنو ماشة وين يا أبو الزوز؟!!
هيييي، من أراد منك أن تثكله أمه و يعمل للمعسكر دا ( كما كت )
فليتبعني خلف هذه التعريشة و إلى عنبرنا، انا ماشة انوم .
الجماعة قامو إتجهجهو، بقو يتمتمو، والله يااخي إحنا زاتنا نعسانين لكين ...
هييييي بي طريقتكم، إتو ناس كبار و خريجين ولا جيتو هنا بي شهادة إكمال إبتدائي؟
ف شنو ، مشيت العنبر، في كم واحدة عاملات فيها شجاعات و واحدات عاملات الطيرة المبارية السيرة ،
نمنا جنس نوم، هي بتكون زي ربع ساعة كدا لكين كانت حلوة ، في الربع ساعة دي الخبر كان وصل ، يؤسفني أقول إنو بينا كان في جواسيس للتعلمجيات و الإداريات حااجيك ليهم تاني في قصة القمل
اها شويتين كدا و نسمع ليك كرووووو باب العنبر فتح ، و صوت جووووطة ، انا حسب نومتي بقى لي رهاب رهاب ، كان القى ليك سميرة الإدارية فوق راسي !!
سميرة : دي منو النايمة دي ، قوووومي يا مجندة ، نايمين في وكت التلااااااااوة ، ما بتخجلو !!
رفعت ليها راسي من تحت الغطا نااايمة ولمن مريله: أأأ ، منو ، سميرة ، في شنو ؟
سميرة : في شنووووو ؟!!! انا جيتك في حوش بيتكم ، بلا في شنو معاك ، يلااااااا كلكم قدامي على الميدان الأمامي
قمت أتمتم : دقيقة نلبس الميري
سميرة : لاااااا بي خلقكم دي ، مااااابتخجلو ، تنومو في وكت التلاااااااوة !!
قمت بي نفس جلابيتي الخدرا المشروطة بالجنبه ، كجنتها و سبرتها gap
قمنا كشلو كشلو مشينا الميدان الأمامي ، طوالي إستلمتنا وداد جرجرة ، أول حاجة قالت لينا
أقعدو على ركبكم و وشكم للشمش و إيدينكم لي فوووووق .
انا مع إيدينكم فوق دي صرخت ليك من جووووة قلبي : أحدا" أحد ، أحدا" أحد ، أأأحدا" أحد .
وداد جرجرة : إتي ، أحي انا منك إتي يا قايد كتيبة الكافرون ، إنصراااااف
وقعدت تضحك !!!!!
القرف حيتواصل لحد ما نصل لي قصة القمل
يتبع للأسف >>>
حجة امنة
28-06-2012, 10:46 PM
ياحجة آمنة الواحد يقرأ ويتبسم لطريقتك المتميزة في السرد ثم يلفه الأسى من كل مكان حين يتأمل ما فعله هؤلاء بالناس في بلدي .. !
ليس حباً في النقد أو التوجيه ولكن بالفعل أجد العنوان لا يعبّر عن محتوى الرسائل هذا المحتوى الذي يملأ الخاطر ألم حتى لا يكاد يسيغه، ثم تنهمر غمامات الطرفة المليحة بردا وسلاما على القارئين.
متابعة باهتمام لحدي ما نشوف قصة ( القمل ) العذبتينا بيها دي :)
ليك احترامي
يا طارق إحتمال دي طريقة للهرب من الحزن بالسخرية من النفس في الاول
قبل الواقع :o
هييي لكين قصة القمل دي زبدة القصة كلها ،
دايرني أحرقا ليك طوالي كدا ، حلاة لق لق :D
قصص معسكرات الخدمة الإلزامية كتيرة جدا ، و أكترها ما بيسر
عارف ، معسكرات الخدمة سنويا بيموتو فيها شباب بسبب ضربات الشمس
و بسبب الأزمة و الناس بتسكت ، في المعسكر ال انا كنت فيو في كم بت كانو مريضات بالازمة و لسبب ما ماإتصنفو ( ج ) إتصنفو ( ب ) ، ناس (ب) ديل كمان اخير منهم ناس ( أ ) بيسموهم الخساير ، بيقعدو في المعسكر ينضفو و يملو الأزيار ، و أحيانا بيخشو في الطابور للتدريب ، لكن مسموح ليهم يطلعو من الطابور لو تعبو ، ديل كانو مبوظين أعصابنا ، أثناء التدريب رببببب الواحدة تجي واقعة او تصرخ لانها ماقادره تتنفس ، لحسن الحظ مافي زول مات في معسكرنا ، لو لا قدر الله كان حصل موت ، كان تلقاني لي حسع حارقه لستكي في ( ام دوم ) gap
اشرف السر
28-06-2012, 11:07 PM
استمتعت كثيرا بحكيك الطاعم يا "ابو الزوز"
رغم الكوميديا السوداء في حياة المعسكرات..
وهادي "استراحة" هنا في بوستك دا...
القمل القمل.. مستني القمل:D
حجة امنة
29-06-2012, 10:51 AM
أغرب بشارة ...!!:D:D
حجة امنة أزيكِ
بلاوي بلاوي يا أمير ياأخي gap
دي الحالة رسايل للأم :o
حجة امنة
29-06-2012, 11:17 AM
يا حجة آآمنة
اولا بجد بضم صوتى للاخ طارق لفت انتباهى للموضوع صديق
بقرا مسافة طويلة فى موضوع بسودانيات واحنا فى انتظاره وكان السؤال
بتقرا شنو ............ موضوع حجة آآمنة وبراى كدا حيرنى الزمن الاخدو
والعنوان استغربت ....... فاظهرى هذه الكوميدياء السوداء
اضحكتنى ، فكان الوجع اشد ...
على جنب كده : قلتى طلعنا دفعة ناس رشا ديل دايما ناس مجازفات looool
واسعدنى قلمك الذى انطق صمت الممكونة مودتى لكما
سلمتم
واحة
تحياتي لي الصديق اللفتك للموضوع gap
كدي تعالي لي بالجنبه قلتي لي طلعتي دفعة رشا ؟!!
دافعتيها وين ؟ gap
والله يا واحة غايتو لو دي رشا دفعتي ، تكون مبالغة
رشا دي زولة جميلة
عايني
ما جميلة و رايعة حقة النت ديك
لا ، إنسانة جد جد ، هي و مخلوقة تانية إسمها إلاء هاشم
قبل المعسكر سافرنا ضمن مجموعة من الجامعة لي رحلة علمية
للاردن لجامعة الزرقاء ، دي كانت اول مرة أعرفا بالجد
البتين ديل يا قول (صديق الموج ) زي الكسرة بالموية
لا بيغلطن عليك لا بيوسخن إيديك .
عليك الله تحياتي للصديق اللفتك للموضوع ، قولي ليو
قبل ما نصل لي قصة القمل ، لو ما فاطر ماااااتخاطر gap
حجة امنة
02-07-2012, 06:48 PM
الرسالة السابعة :الليلة المزاج عاااالي يا أمي
العنوان : معسكر الخدمة الإلزامية ب ام دوم .
التاريخ : بين الليلة وبين يوم باكر
بعد السلام عليكم ، بلاهي كيف أنتم في المدة التي لم تروني فيها ؟!!
كيفك بلاهي ياامي ، انا اليوم أصبحت جميلة أحمد سيدي و بمزاج عاااالي .
ما عندي مشكلة غير إنو قدمي مبققه من مشيت أمس حقة المظاهرة ، أه بالمناسبة انا مرقت في مظاهرة لندن عشان ما تقولي ما كلمتك ، اليوم داك أبيت أظهر في التلفزيون لمن شفت الكميرات إدسيت مع إني بحب الظهور زي ما إتي
عارفة لكن خفتك تشوفيني قلت أحسن تسمعيها مني ، حسع دا ما موضوعنا ، الليلة قمت بدري مارست مهامي اليومية كربة منزل و مشيت الدكان ( الاسم سالم والله عالم)
مشيت أجيب لي ( صلج ) يعني بالسوداني ( سبانخ ) ، دخلت ليك طوااالي على
الخضار نظام البت عارفة دايرة شنو ، كان القى ليك
( بيبي إسبنش ) ، ( إسبنش فور ساندوتش) ، ( إسبنش بالطوه ) زهجت زهج ،
إتذكرت نكتة العربي المابعرف إنقليزي و جا مع أبوه للعلاج في لندن ،
قام مشى ( إجور رود ) شارع في لندن مشهور بالمحلات العربية و العرب و السودانيين ،
لقى ليو سوداني ، قال ليو : يا ود العم ألحقني بي إسم حاجة أكلا ، قام حفظو إسم السمك ، مشى للمطعم قال للجرسون : ها جنى ها أدنا ( فيش ) ، الجرسون باصرا وفهمو اها قعد ياكل في الفيش إسبوعين لمن قرب يفقد الذاكرة ، قام رجع للسوداني ، حفظو اللبن ، مشى المطعم قال للجرسون : قايلني داير أقوللك فيش أأأ ؟ أمش جيب لي ( ميلك ) الجرسون حكمة الله فهمو لكن سالو بالانقليزي : هوت اور كولد ، يعني بارد ولا حار ،
قال ليو : أاأ ؟ مالك داير تهتهتا و تكلكلا لي ، خلاس أمش جيب لي ال( فيش) الله يفشفش مصرانك دا !!
اها دحين يا حاجة لفحت اول ( إسبينش ) في وشي و مرقت .
من ما طلعت من البيت كنت بسمع في غنية لمحتك بي صوت واحد غنااااي
إسمو ( أبو بكر سيد أحمد ) يا يما طلع الغنى ما سمح في خشم سيدو ولا حاجة !
و كنت لابسه توبي البيشبه حق الصوماليات ، الليلة أي صومالية ماشة في الشارع تتكشب معاي و واحدة فيهن جات جاااارية و ترطن بي لغتم ، لمن إعتذرت ليها و عرفت إني سودانية
قربت تتف في وشي !! و ما هماني
ضحكت في وشها و مشيت وانا بسمع في أبو بكر و مشيت كاني أرقص يا أم .
حسيت إنو مزاجي عالي بشكل مخيف .
إتذكرت واحد من أيام المعسكر ، اليوم داك جمعونا لتمام الساعة 9 بعد صلاة العشا طوالي على غير العادة ، و طوالي بدينا النبز ، يا كذابيين يا حراميات ، دي جامعات شنو دي الطلعتو منها دي ، و هاكذا ، بعد ساعة من الموال دا فهمنا إنهم عرفو من الجواسيس إنو في بت عندها موبايل ، و كانو مانعين الموبايل لكن بسمحو لينا نتكلم مع اهلنا في الحالات الطارئة و عشان نكلمم بي مواعيد الزيارات ، اليوم داك المعسكر إتكركب كركبة عجيبة و حصلت ربكة و الوقفه طالت ، لانهم قالو هم عارفين البت لكن دايرنها تكون شجاعة و تسلم الموبايل ، و مافي زول داير يعترف ، لمن الساعة بقت 11 قالو لينا ( إسترح ) و خلونا جبنا البروش من العريشة و قعدنا في الواطة ، للمعلومة المعسكر ما فيو كراسي للمجندات ، لو قعدت بتقعد في واطات الله دي ، و قعدنا ، يا أمي ما بكضب عليك ، خفت خفت شديد ، لانهم لو إكتشفو إني غانجة بي تلفوني و لمن التعلمجية اول يوم فتشتني ما كلمتها بيو ممكن يعملو لي ( كما كت ) للمعسكر و يعودوني ليو ، يا حاجة غانجة يعني لابده و عاملة غمرانة ، قمت براااحة زحفت لحد ما دخلت في سرية ناس إكرام و رشا دفعتي .
قلتا ليهن : ألحقوني ، خلاس نقشوني !!
رشا : لالالالا يا بت هم قاصدين بت في سريتنا ، إتشاكلت ليها مع واحدة من جواسيسم و ديك مشت بلغت !!
لا ياخ ، تااافهة لكين ، طيب حقو انا أمشي أعترف .
رشا و أكرام إتفقن إنو مافي داعي للمجازفة .
بعد ساعة لمن البت أبت تعترف قررو يفتشو المعسكر كلو !!
يلا و الناس دي قامت تتجارى ، المضحك و مبكي إنهم في رحلة البحث عن الموبايل لقو كمية من الممنوعات ، زي الكريمات و المرايات ، تاني يوم من الحادث جمعونا لي تمام الصباح و جابو المعروضات التي تم ضبطها و تحريزها بالليل و ختوها في طشط كبير و جات ( الحيكمدار العام) و نايبتها شايلين الطشط ، قامت تعلمجية بتول قالت ليها جيبي طوبة ، جابت الطوبة و نزلت في الكريمات و المرايات ، كروررررو ، كششششش ، كروو .
و البنات ديل يبكوووووووو ، و انا أضححححححك !!
المهم ، لمن بدو يفتشو في المعسكر و الشنط انا قررت أسلم نفسي ، في طريقي لخيمة الإداريات لاقتني رشا جاااارية و منططه عيونا ، يا آمنة ألحقيني ، مالك يا بت عندك كريمات ؟ يا آمنة يأخ إتي بتعرفيني كمان انا شكلي دا شكل زول بيستعمل كريمات ؟!! كريمات شنو يأخ انا عندي عيشتين من الغدا ما أكلتهم ( بيكون عندك كوته معينة من العيش لازم تاكلا كلها ) و عندي ليمون ، الليمون كان ممنوع في المعسكر !!!
مشيت سلمت نفسي و كذبت و قلت ليهم انا ما كنت عارفه إنو التلفون ممنوع و أساسا كان موجود في شنطتي لمن فتشوني و كنت قافلاه طول الفترة الفاتة . كنت بكذب عليها و عيني في عينا دون أن يرجف لي جفن يا أمي !
ف شنو ، صدقوني ، و قالت لي أرجعي الحوش مع الباقيين ، خلونا قاعدين لحد الساعة 1 صباحا ، و كانت الدنيا شتاء ، لمن رجعت و بقينا نتونس ، رشا قالت ليهم : بالمناسبة أبو الزوز دي صوتا سمح ، كانت بتغني في كورال الكلية ، قلتا ليهم أيي كنت بغني في الكورال لكن مرات بيقفلو مكرفوني و بكون تاماها شجاعة أدبية ساااهي ، و ضحكن ، و ضحكت معاهن ، و غنينا ، كل أغاني حنان النيل ، ( يا رزينة وصي عييننييك الحنينة ، ترسم الفرحة المهاجر في عيون كل المدينة ) و ( بين الليلة و بين يوم بااااااكر ،شتلة إلفه و ومضت خااااطر ) غنينا و ما همانا البرد ، بعد ساعة من الغنى المتواصل هم فترو و سكتو و انا صوتي بح و أبيت أسكت بس بقيت مدنقره و بغني ، قالن لي يا أبو الزوز كفاك ، قمت رفعت راسي و عيوني مرقرقات و قلت ليهن : معليش انا واصلت لاني إتذكرت قعدتي في حوش بيتنا مع أخواني و غنانا هناك في ليالي الصيف ، و حسيت بي الدفو الكنت بحسو حينها ، قامن قعدن يبكن ، كلهن ، يااااخوانا دي مصيبة شنو دي ، يعني الواحد لو حازقاهو بكية تطيروها ليو بي اللفحي حقكن دا ، و ضحكن و العيون نديانة .
قبيل بعد رجعت البيت حسيت إني دايرة أضحك و أبكي ، ضربت لي وفاء قاسم لانها الوحيدة البتعرف تعمل معاي الحركة الهبلة دي ، لقيتا بتبكي ، بتبكي عمر عبدوني ، أخونا الما ولدتيه يا يما ، تمتمت ليها بكلمات انا زاتي ما فهمتها و قفلت على كدا .
من حينها و انا بسمع في نفس الغنية !!
الحزن حيتواصل لحد ما نصل لي قصة القمل .
يتبع للأسف >>>
سماح محمد
02-07-2012, 07:18 PM
حجة آمنــة
ياخ كتابتك دي سمحة شديييييييييد
ومؤثرة
حاجة كدة عفوية وصادقة..
إكتشفت البوست دة متأخر
واستمتعت بقصص المعسكر .. واتذكرت زيارتي لإحدى صديقاتي في معسكر أم دوم (نحنا كنا نسيبة 11 :D )، واختك إستهبلت لمان طلعت (ج) :p..غايتو كان الله مدَّ في أنفاسنا وأيامنا بنجي نحكي..
التحية ليك ولبورداب UK
والرحمة للاخ عمر عبدوني.ربنا يرحمه ويصبر أهله وأصدقائه
واصلي ياأمونة..دي كتابة بتحرك فينا مليون حاجة وحاجة
شكراً ياجميــــلة
حجة امنة
03-07-2012, 02:43 PM
الرسالة التامنة : تمام الشيطان
العنوان : معسكر الخدمة الإلزامية ب ام دوم
التاريخ : شهر 12 سنة 2004
بعد السلام عليكم ، بلاهي كيف أنتم في المدة التي لم تروني فيها ؟!!
يا حاجة ياأخي انا الله أعلم أرجع أم بنين تاني !!
اليوم داك الشمش صدقت و بطلت كضب و طلعت جدجد لي أول مرة من ما جيت
قمت إتحنفشت ليك و طلعت في طريقي لي بيت سارة فضل ، البت دي ما دايرة
تفك ضفيرتي ، هناااك بيتم بعد شارعين ، و هنا بيتا نفس الشي ، لو ما البت الهبلة
ام ضحكة نضيفة دي ما أظن كنت أقدر على برد البلد دي
اها قمت قطعت ليك نصي بي بنطلون و لبست لي نضارة شمس مع إنو الساعة كانت 6
يما في هذه البلد المغرب بيأذن الساعة 9 و نيف ،
لابسه النضارة و ماشايفه قدامي و المشكلة زي ما عارفة عندي الحول الداخلي ، و مرات لمن
أزعل بيبقى خارجي زاتو ، ف شنو ، لمن البس نضاره بكون شايفة إتنين إتنين
قلتا لي روحي والله يا آمنة ناقصك بس العجلة ام مسجل و وردة جنب الدركسون حقة
أولاد البقاره ديك ، طواااالي إتذكرت رحلتي لي أهلك في سنجة ، سنة 97 لمن كنت منتظره
الجامعة تفتح و معاي كل البنات من دفعتي ، لانو الحكومة قررت تفتح المعسكرات للاولاد
بي دفعة عزة السودان الاولى ، و كان الظلم في إنها إتحسبت للاولاد خدمة وطنية
و إحنا ضاعت علينا سنة في البيت و في النهاية جينا عملنا الخدمة لمدة سنة .
في الفترة ديك مشيت زيارة لي سنجة بلدك و مسقط راسي ، من ضمن الرحلة
مشيت حلتكم ال لي جووه ( أم بنين ) ، ( أم أجمل بنين و بنات في النيل الازرق )
قضيت فيها 3 يوم بس ، من أجمل الايام في الرحلة ، الحفاوة و الكرم و كمية الخرفان
النطيتم في بلدك يا حاجة ممكن تحل مشكلة مصر في اللحوم ، و الشاي بي لبن
الغنم المقنن لي حسع طعمو ممسخ علي كيف الشاهي ، البرنامج كان كالاتي
البنات بيصحن قريب للساعة 9 بيكونن الامهات إتولن أمر شاهي الصباح
نشرب الشاهي باللبن المقنن في الراكوبة ، بعد داك البنات بيقشن الحيشان
، أساسا بيت الاسرة الواحدة بيكون عبارة عن حوش وااااحد و مقسم كل أسرة
عندها قطية و راكوبة و ( الأدب خانة ) عادة بتكون مشتركة ، وفي محل
بعييييد عن القطاطي ، في منطقة مرتفعة و بتكون عبارة عن حفرة محاوطة
بي حيطة من ثلاثة اركان و الركن الرابع بيكون الباب ، بيكون مغطى بي
قطعة من الخيش ، الحيط بتكون قصيرة ، يعني لو إنت واقف بتكون مكشوف من راسك
لحد أكتافك ، و لمن تكون ماشي (الادب خانة) بتشيل معاك الإبريق عشان باقي الناس
يعرفو إنها محجوزة ، كنت بكون شايله الإبريق و قاطعه الحوش ، أي زول بيشوفني
بيناديني : بت بخيته ، ها بت ها ، كيف أصبحت أ الدكتورة ؟ ماشه المستراح ؟
بت بخيته إنعلك طيبة أأالدكتورة ، مارقه علي (بيت الادب) ؟
غايتو حكاية الطب البيورثو دا ماشفتو إلا عند أهلك ديل !!
بت بخيته ،طّلق تجي تفطري معانا ، اها ماشه على ال.....
، يعني لحد ما تصل تكون طارة ليك في راسك !
بعد القش بيفطرن و كانن كتر خيرن بيدخلن لي الموية جووووة القطية للحمام بالطشط
و الكوز ، الجردل ، بعد داك بيستعملن زيت الكركار للشعر و الجسم بعد إستعمال الدلكة ،
بعد الفطور بيقعدن يتونس و يشربن الشاهي الاحمر و الجبنه ، بعد صلاة الضهر
بينومن ، في الوكت داك الامهات بيجهزن الغدا ، بعدها بيتغدن و العصر الاولاد بيجو
قاطعين نصهم و لابسين (نظارات ) الشمس و بيمرقو كلهم إلى الجروف ودا على شرف
زيارتي ليهم ، يعني ما برنامج يومي ، رجعنا المغرب من الجروف لنجد شاهي المغرب
المقنن جاهز ، و تتواصل الونسة و السمر إلى منتصف الليل برعاية الإمهات و باقي أصحاب البيت .
اها يا حاجة انا خلاص قررت تاني أتكلم بالجيم المعطشه ام تلاته نقط (چ)
مع قراري دا إتذكرت ليك چنابو رحاب قائد المعسكر ، حضرة جنابا جات المعسكر
بعد بدايتو بي كم يوم ، الايام ديك كنا بنسمع عنها سمع ، انا اول يوم شفتها
كانو محرسني الماسورة الامامية و وداد جرجرة قالت لي ماااافي زول يشيل موية من هنا
تعليمات يا مجندة ، لانو كانت في مشكلة في الموية في المعسكر ، الخيارات كانت بين
إنك تستحم او تغسل هدومك ، تتوضى او تشرب و هاكذا
ف شنو ، بقيت واقفه جنب الماسورة قامت جات دايرة تفتح الماسورة ، انا عرفتها من الوصف
لانهم قالو جات بالليل ، قلتا ليها : لو سمحتي ممنوع ، عاينت لي شديييييد وما إتكلمت
قامت جات واحدة من الجاسوسات طايرة : زوزانا بطلي هزار دي جنابو رحاب قائد المعسكر .
عاينت ليها جوووة عينا : معليش جنابك ما عرفتك لكن دي تعليمات و لو جا عمر البشير ما كان بخليو .
إبتسمت لي إبتسامة حامضة كدا ، و فتحت الماسورة .
بعد داك مرقنا للتدريب في ميدان ام دوم ، اليوم داك كانت حر الشتاء شديدة ، و كان أول يوم
نطلع نتدرب بي سلاح ، الحمدلله سريتنا ما كنا شايلين سلاح ، لانو بدو التسليح من السرية
الاولى لحد الرابعة السلاح قصر ، بعد تمينا جري التعلمجية وقفتنا إنتباه ، جاتنا جنابو رحاب
جابو ليها كرسي و قعدت تفررررج فينا ، بعد شوية واحدة من البنات راسا لف و تااااااخ وقعت
بالسلاح في الواطة ، قامت جنابو رحاب تكورك : دا شنووووو يا مچنده ، ترمي السلاح
في الارض ، إتو ما عارفين دي چريمة بيعاقب عليها القانون ؟!! يلا كلكم أرفعو السلاح
فووووووق ، قامو السرايا المسلحين رفعو السلاح فوووووق ، قلتا لي بنات سريتنا سرررريع
أرفعو السلاح فوووق ، قعدو يتنطنو إتي يا زوزانا مجنونة ؟ سلاح شنو ؟
لكين موقف الكرتونة أداهم ثقة بليدة كدا في تصرفاتي ، قامو رفعو السلاح الخيالي فوووووق
قامت جنابو رحاب قعدت تعاين لينا بي إستغراب ، قامت تعلمجية وداد قالت ليها ديل
ديل : ( الجن جويد ) ، قامت إبتسمت نفس الإبتسامة الحامضة ، بعد شوية واحدة خسييسة
من الجاسوسات رفعت السلاح بي يد واحدة و كوركت : اااالله أأأكبر
للمعلومة ، كانو في المعسكر بيعلمونا نهتف هتافات معينة بي دلالات مختلفة ،
مثلاًً لمن يقولو ليك مبرررروك معناو إتا عملت شي كويس ، يعني للفت
النظر ممكن تستخدم ( الله أكبر ) قامت لمن البت هتفت ، جنابو رحاب : مبررررروك يا
مچندة ، إنصرااااااف ، قمت قلت لي جماعتي سررررريع أرفعو السلاح بي يد واحدة
قامو الدور دا بدون مناقشة كلهم رفعو السلاح الوهمي بي يد واحدة و بي حس وااااحد
الله أأأكبرررررررررررررر
طوالي چنابو رحاب صرفتنا : چن چويد إنصرررررررررراف !!
بعد داك بي كم يوم البنات بقو يقولو إنو المعسكر مسكون ،المعسكر بالليل بكون فعلاً مخيف
يأخي يوم واحدة معانا في العنبر التعلمجيات كانو مسمينها عمود الكهرباء لانها طويييييلة
و سمينة ، كانت بتنوم في السرير الفوقي مباشرة ، البت دي نننننص الليل جات طايرة من فوق
ونطت في رقبتي ، آمنة آمنة والله شفت لي حاجة زي الراجل جات داخلة ، قلتا ليها : عليك
الله بي تفتك المنكوشة دي حتى كان جا شوشو شخصياً حيخاف منك !! يا بت نومي ، أبت
ترجع سريرا و فضلت خانقاني للصباح .
يلا الكلام وصل لحضرة چناب رحاب
قامت في تمام الساعة 9 سالتنا : قلتو في چن في المعسكر يا مچندات ؟
كلنا بي حس واحد : أأأأي جنابك
چنابو رحاب : خلاص تاني عندكم تمام الساعة 2 صباحاًً إسمو تمام الشيطان و الچن !!!
و بقينا نصحى الساعة 2 صباحاً عشان تمام الشيطان ، عارفاني يما انا بحب النوم
ولو قطعت نومتي بصحى بي صداع
و كان جيتي إتي شخصياً تصحيني كنتي بتسمعي فارغ .
بنقوم نصحى و الدنيا برد ، انا كنت بس بسكت ساااااكت و بربط بطانتي فوق راسي
زي المره الراجلا ميت جديد و كشلو كشلو للميدان ،
بقيف و عيوني مقفولة تقريباً ، يقولو صفا بعمل إنتباه ، يقولو
الله أكبر أقول ليهم الله يحرقكم بالجاز و هاكذا ، لمن لقيت إني حا أجيب الهوا لجماعتي
بقيت بس بسكت ، الحاجة الكانت بتغيظني إنو البنات بكونو نعسانات لمن بيغلطو في الحساب
تسمع : واحد ، إتنين لحد 67 ، فجاءة تسمع واحدة بتقول 54 !!
يقومو يبدو العد من جديد ، إستمرينا كم يوم بالحال دا لحد ما عدد كبير من البنات مرضو
من السهر و البرد ، قامت چنابو رحاب يوم في تمام 9 سالتنا تاني
و هي مبتسم نفس ذات الإبتسامة الحامضة : أأأها أخبار الچن شنو ؟!
قلتا في سري :الچن ؟! (چنابة الحبشية الماتغسلا موية النيل ).
كلنا و بلسان وااااحد : إنصرف جنابك ، الجن إنصرف !!!
لكن ربنا دا ما عادل ، بعدها بي كم يوم قامت هي زاااااتا شافت ليها حاجة و قامت تكورك
و التعلمجيات جو جاريين ليها ، و بقو لافين في المعسكر كلو ، بلاهي المرة دي ترجف كلها و
عرقااااانة لمن الجيم العطشانة حقتا ديك إتبلت !!
اللهم شماته
حتتواصل لحد ما نصل لي قصة القمل
يتبع للأسف >>>
عادل البراري
03-07-2012, 05:00 PM
سلام يا افندوم التحية ليك امشي للقدام
حجة امنه اتصبري:D
http://www.youtube.com/watch?v=jNYq57Uiq-E
حجة امنة
09-07-2012, 10:59 PM
حجة امنه اتصبري:D
http://www.youtube.com/watch?v=jNYq57Uiq-E
طبعاً في هذه اللحظة التاريخية انا بحاول ارفع بيك البوست و اجرب إذا كان المداخلات الطارت مع تحديث المنتدى حتترفع اوتومتك ولا لا gap
ومن هذا المنطلق بحزر كل المتداخلين المداخلاتم إتجازفت إني بديهم
مهلة لحد ما الله يسهل و ينقلو كلامم صرة في خيت من المنتدى في الرابط ادناه
و شكرن شعبي
http://sudanyat.org/vbold/
حجة امنة
09-07-2012, 11:05 PM
استمتعت كثيرا بحكيك الطاعم يا "ابو الزوز"
رغم الكوميديا السوداء في حياة المعسكرات..
وهادي "استراحة" هنا في بوستك دا...
القمل القمل.. مستني القمل:D
القمل القمل ... مستني القمل
أأ ؟
نس تحب حرق اللساتك زي عيونا :D
تعال نضحكك
في مظاهرت لندن واحد من الشباب الكبار النوع البكون حاضر من إنقلاب نميري gap ظريف كدا
مسك المكرفون قال : يا البشير عليك الله خلي العفانة و طير !!
اها ممكن عادي نعمل لينا هتاف بالمعنى دا لكن بدل القمل يكون القراد
أرفع غضبك يا كريم يا رب
حجة امنة
09-07-2012, 11:09 PM
حجة آمنــة
ياخ كتابتك دي سمحة شديييييييييد
ومؤثرة
حاجة كدة عفوية وصادقة..
إكتشفت البوست دة متأخر
واستمتعت بقصص المعسكر .. واتذكرت زيارتي لإحدى صديقاتي في معسكر أم دوم (نحنا كنا نسيبة 11 :D )، واختك إستهبلت لمان طلعت (ج) :p..غايتو كان الله مدَّ في أنفاسنا وأيامنا بنجي نحكي..
التحية ليك ولبورداب UK
والرحمة للاخ عمر عبدوني.ربنا يرحمه ويصبر أهله وأصدقائه
واصلي ياأمونة..دي كتابة بتحرك فينا مليون حاجة وحاجة
شكراً ياجميــــلة
جميلة إتي دي gap
أديك سر ؟ الرسايل دي قصتا غريبة
دي اول مرة أكتب على الهوا مباشرتن كدا gap
عادة بكتب الحاجة و بقعد أقراها كوووووويس و أقراها لي أخرين
و برنامج ، لكن دي بكتبا و بضغط إرسال طوالي ، مرات برجع انا زاااتي أقراها تصدقي ؟!
حاأنتظر قصصك عن الخدمة الإلزامية
وشهادتك دي شرف للبوست دا يا سماح ، ف شنو ، شكراً ياخ
حجة امنة
09-07-2012, 11:11 PM
سلام يا افندوم التحية ليك امشي للقدام
سلااااااام سلاح سعادتك gap
إنتظروني ياخ و ماتجرو كدا
بله محمد الفاضل
10-07-2012, 09:51 AM
غايتو
جيبان ما جيبان
ما بجيب شي
إن جبتي القمل
بس معاك
ومستمتع جد
إن خلولنا فيها متعة
مقطوعين الطاري الراكبين فوق ضهورنا ديل
...........
تماضر حمزة
10-07-2012, 07:37 PM
يابت اجمعي سريع الناس دي كلها راجية القمل
انا جايبة معاي جاز للضمان كدا:D
في البوست دا اكتشفت انو نحنا فينا شبه كبير في طريقة الكتابة جاني احساس انك سارقة بوستيني لكن اتذكرت اني ماكملت جامعتي في السودان:D
"ف شنو" شكرا للمادحين وكدا:p:p
مجنونة ياامونة!
يا خوفي حجة امنة تصدق انها كاتبة
وتقوم تملانا فقر علي فقر دا
------
طمطم عندي احساس انو البنسوي فيهو دا محض مكابرة gap
وهاد ابراهيم محمد
10-07-2012, 08:23 PM
المشاركة الأصلية كتبت بواسطة حجة امنة http://sudanyat.org/vb/images/buttons/viewpost.gif (http://sudanyat.org/vb/showthread.php?p=468538#post468538)
أديك سر ؟ الرسايل دي قصتا غريبة
دي اول مرة أكتب على الهوا مباشرتن كدا http://sudanyat.org/vbold/images/smilies/gap.gif
عادة بكتب الحاجة و بقعد أقراها كوووووويس و أقراها لي أخرين
و برنامج
وانتي حتئوليلي http://sudanyat.org/vbold/images/smilies/biggrin.gifhttp://sudanyat.org/vbold/images/smilies/biggrin.gif
أمونة ياخ والله ما قادرة أقرا بمزاج ينفصل عني هذه الأيام..
لكن بقرا عشان أتمسح في ريحتك يا مطرة..
ومن نص النَص بتطلع لي ريحتك وضحكتك الما موزونة ديك الممكن في نصها تكون أقرب للصرخة وتقومي تضاريها بإبتسامة خجلانة كده مع انو الخجل عندك
يصمد لثواني بس... أجمل الثواني يا جميلة.
وبتطلع لي كل أحوالك التي أعهد والتي لا يعرفون http://sudanyat.org/vbold/images/smilies/tongue.gif
بتمسح فيك ومشتاقة ليك يا بت.
أكتبي..
أكتبي كل الكتابة المابية لي وحردانة..
أكتبي وإتفشي, أخير من مقالدة الحيطان ومناضمة مقاعد الشارع..
أكتبي وأكشفي ميلان حالنا ومغايسنا الحايمين بيها لا محنة لا ريدة
والبلد الإتغسلت من ملامحها,, ورجعت تفتش ليها حتى في مجاري التصاريف الما بتتصرّف.
أكتبي.. وبس.
___________
اها.... يضوي ليك ان شاءالله :p
وهاد ابراهيم محمد
10-07-2012, 08:27 PM
المشاركة الأصلية كتبت بواسطة عكود http://sudanyat.org/vb/images/buttons/viewpost.gif (http://sudanyat.org/vb/showthread.php?p=468538#post468538)
كتابة زي طلّيع السريحة من الضُفُر؛
ليها قردنة.
تعليق الكاس:)
_____
:D
حجة امنة
10-07-2012, 10:36 PM
الرسالة التاسعة : حمادة قد السلك ( قصة القمل )
العنوان : معسكر الخدمة الإلزامية ب ام دوم
التاريخ : شهر 12 سنة 2004
بعد السلام عليكم ، بلاهي كيف أنتم في المدة التي لم تروني فيها ؟!!
يا حاجة (بخ بخ) انا بقيت عندي مفتاح بيت !!
ما قادره أستوعب الحكاية دي و مرات كتيرة بمرق و بخلي باب البيت فاتح زي ما كنت بعمل
في بيتكم ، بيتكم أبو باب فاتح سااااااهي ،
أتذكر أخر أيام في المعسكر كانت صعبة جداً لاننا بقينا ما عارفين التخريج حيكون متين و التعلمجيات
و چنابو رحاب ما دايرين يقولو لينا الحقيقة و بيماطلو فينا و كل يوم بيطلعو بي حِجة جديدة ،
في الاول قالو السبب المعطل التخريج إنو السلاح ناقص و لازم يتم عشان نمشي لضرب النار
في منطقة (السليت) و الخطوة دي أخر خطوة في المعسكر بعدها التخريج مباشرة ، قامو تمو السلاح
و ما ودونا نضرب النار !! بعد فترة عرفنا إنهم حيخلونا ننتظر معسكر تاني بدا بعدنا بي 20
يوم عشان نتخرج مع بعض ، و بسبب الحكاية دي نحن قعدنا في المعسكر 45 يوم بدل شهر !!
الحاجة الزادت الطين بله إنو حصلت مشكلة في الموية في المعسكر و الخيارات بقت يا تستحم
يا تغسل الميري ، يا تشرب يا تتوضى و هاكذا ، انا اول 10 أيام كنت متغمصه شخصية
بت نضيفة و كنت بستحم الصباح قبل الطابور و بالليل قبل ما أنوم ما دايرة أقول ليك زي
ما بعمل في البيت عشان ما تفضحيني ، المهم ، بعد داك بقت الحركة دي صعبة لانو الدنيا
شتاء و المعسكر مخيف بعد تمام 9 دا غير مشكلة الموية ، بقيت بستحم مرة واحدة في اليوم
شوية شوية بقت يوم أي و يوم بعمل رايحة و هاكذا ، حالتي النفسية كانت مابطالة عشان
الكضب حرام عدم الحمام ما أثر شديد لكن حركة الكضب بتاعم و الغش هو الزهجني
الكويس إنهم كانو ضاغطننا بي التدريب و الوقفه بتاعة التمام ف شنو كنا بنووووم بدون
تفكير ، بقيت بلقى حاجة أفرغ فيها طاقتي و غضبي ، الجلالات : وهي أغاني و أناشيد بتلازم التدريب و الجكه ، قامن التعلمجيات إكتشفن موهبتي و عملوني قايد سرية ،
بكون ماشيه في بداية الطابور او في نهايتو ، السرية بيكون عندها قايدين واحد أمامي و واحد خلفي ، القايد بيدي تعليمات : لليميييييييين در ، لليساااااار در ، صوتي كان عالي و راااااجل كدا
أتذكر من الجلالات : ليلى جري التوب ، ليلى ، التوب جميل اللون ، ليلى ، التوب جميل اللون ليلى دا الحماني النوم ، ليلى .
حمادة قد السلك بلغ الملكية ، يقدو بالمسمار إن شاء الله بالزردية ، تماااااام تمام يا تعلمجية .
بيتخللها تكبير و تهليل للحماس و كدا .
أتذكر من المجندات واحدة من بنات الزعيم الازهري خريجة معامل إسمها عوضية دوكة ، كنا بنقول ليها عوض لانها كانت طوييييييلة و ضعيفة و صوتا قوي زي الاولاد ، كانت في السرية
السادسة ، كنت لمن أتعب من الجري في ميدان (ام دوم) و عينها تجي في عيني بقوم أغمز ليها
بتقوم تطلع من الطابور و تجري بالطرف و تبدا الجلالات ، بقوم انا زاااتي أطلع نظام منافسة
و نقعد نكبر و نهلل و نوحد الجلالات في السريتين ، بيقومن التعلمجيات بيتكيفن و تاني ما بيركزو مع سريتنا ، بقوم انا بقعد أغنننننني لحد ما أطلع كلو كلو من الطابور و ززززووووت
أنقشط في طابور الخساير ، الخساير بيكونو واقفين ساكت ما بيجرو ، بيقومو يدسوني في نص الطابور لحد ما أرتاح و سريتي تلف لفة لفتين و تاني أرجع برااااحة ألقى لي فرقة و أنقشط ورقة ، حكاية إنهم عملوني قايد كتيبة دي كانت جايبه لي الهواء لانو القايد بكون في وش المدفع
في مرة قررت إني أستحم و ما أغسل الميري قامت تعلمجية سامية قالت لي بلهجة الجنوب : هيييييي يا هيكيمدار يا وزغاااااان بكرة لو جيت وزغان كدا انا بخلي مجندات دا يرموك في الوزاغة !!
اليوم داك انا كنت وصلت الحد و قررت أقد سلك ، يعني أهرب من المعسكر يا حاجة .
قمت قعدت مع نفسي عشان أدرس الحكاية ، قعدتي دي أخدت نص ساعة بس و بعدها
مشيت لي إكرام و رشا كلمتهم إني ماشه بيتنا أستحم و جايه ، قعدو يرجفو ، و يكترو في الأسئلة ، قلت ليهم : لمصلحتكم خلوني أحكي ليكم بعد أجي !!
أساسا انا كنت عملت دراسة جدوى قبل كم يوم ، المعسكر كان عبارة عن مدرسة فاضية
لصقها مدرسة تانية فيها طالبات و داخلية أستاذات و بينهم باب بيكون مفتوح لحد المغرب
مرة انا و رشا مرينا من الباب و مشينا شربنا من الازيار حقة المدرسة مافي زول سالنا ، لكن لمن دخلنا لجوووه و التعلمجية لمحتنا كوركت فينا و رجعتنا ، باب المعسكر محروس بي حرس بي سلاح ، باب المدرسة عندو حارس عجوووووز بيكون نايم طول اليوم جوة المدرسة و الباب فيو ترباس ممكن يتفتح من برا لانو قديم ، المعسكر عندو باب تالت من جهة المطبخ و مافيو حرس
لكن خفت أعمل مشكلة للخالات الطبخات ف طلعتو من حساباتي ، اليوم داك طلعت التدريب عادي و لمن رجعنا للفطور و الراحة ، فترة الراحة كانت من الساعة 10 و نص بيكون الفطور و عندهم برنامج (سخافي) بيعملو في العريشة و بعد داك صلاة الضهر و بعدها التلاوة و راحة لحد تمام
الساعة 5 ، قمت بعد الفطور لبست الميري الوسخان و فوقو عباية شديتا من إكرام ، لبست جزمة عادية عشان ماالفت الإنتباه ، رشا كانت مراقبه لي الطريق ، الجبانة كانت ماشه معاي لكن غيرت رايها ، قمت طلعت من عنبرنا و لحسن الحظ كان قريب من الباب الفاصل المدرستين ، توووووف
إنقشطت في المدرسة و جيت شاقه الطالبات ، قامو إتعرفو علي : هيييي موش دي مجنده في المعسكر ؟! لالالالا أسكتي أسكتي خليها !!
فتحت الباب الخارجي و طلعت على الشارع بدون ما أتلفت على حرس التامين جنب باب المعسكر و مشيت عاااادي كاني أستاذة في المدرسة ، مشيت في الاتجاه العكسي للعساكر ، لمن لقيت لفة في الشارع دخلت جوة الحلة و بقيت أجررررري و أجررررررري ، لمن إطمنت إنو مافي زول لحقني طلعت الشارع الرئيسي تاني و طوالي لقيت حافلة في وشي إنقشطت فيها ، إنا لله
قعدت أعين للناس بي غباء كدا ، هييي راجل ، هييي مرة جد جد ، هييي شفع !!!
عيني وقعت في الراجل القاعد جنبي ، قام بدون مقدمات بقى يحكي لي إنو كان شغال في السعودية و طلع لي ورق كدا !! قلت ليو بالمناسبة انا هاربة من معسكر الخدمة و لي شهر ماشفت أهلي ولا شفت ناس ، دا كلو عشان يسكت يخليني أقدر أفكر و أتحكم في ضربات قلبي ، قام قعد يكورك و يسب في الحكومة : بلاهي دي بلد دي ، لييييييييه يدخلو البنات معسكر دا كلاااام فاضيييييييييي !! و ملا لي وشي تفاف و زهجني زيادة .
المشكلة إني ما كنت فاهمة حاانزل وين لكن لمن الحافلة نزلت من الكبري ، الشارع وقع لي ، نزلت من الحافلة و ركبت رقشة و طواااالي البيت ، لمن وصلت الباب الفاتح سااااااهي بقيت
أكبر و أهلل من جوووووة قلبي ، لحد ما أخواني جو جارين من جوة البيت ، و قعدو يحضنو فيني ، سبحان الله كنت مشتاقة للحضن دا لكني رفضتو ، قلت ليهم خلوني أستحم و أجيكم !!
دخلت الحمام و بكيت بكيت بكيت ، كل المرارة و الإحباط و الذل و الغضب ، و غسلت شعري
و إغتسلت غسل الدخول للإسلام .
جيت لقيتم جهزو لي الاكل و ضربو لي أبوي ، أديتم الميري الوسخان ، رفضت أكل و طلبت شاي
ما قدرت أقعد في كرسي و قعدت في الواطه ، أخواتي و بنات عمتي قعدو يبكو على منظري
لانو وزني نزل بصورة ملحوظة و وشي و لوني إتغيرو ، قلت ليهم : هييي انا مافاضية ليكم حسع ، يلا سريع مشطو لي شعري ، في الوكت داك أبوي جا جاري قبل مواعيد شغلو ، مخلوع ، لانو أخواني المشو المعسكر ما قدو سلك لكن جابوهم عيانين ، علي العريس مثلاً ، جابوهو بي حمة لانو السلاح عوقو في رجلو !!
شرحت ليو إني جيت و راجعة طوالي ، قمت لبست الميري المغسول و مكوي و ودعتهم و طلعت معاو ، طوال السكة يسال فيني من حكاية قدة السلك دي ، أهاااا و صحباتك القدت معاك منو ؟ أهااااا نشيل لي صحباتك شنو ؟ كيك ؟
كيك ؟!!!! كيك يا حاج ؟ إتا قايلني ماشه رحلة ولا عيد ميلاد ؟
دا في سري طبعاً ، في الاول قررت أشيل ليمون ، لكن قلت لاااا بجيب لينا هوا ساي
قلت ليو مافي داعي و شلت زيادة قروش و خلاص ، قال لي : أهااا أرجعك بالبوابة الرئيسية ؟!
و كان جادي !!
لا يا أبوي ما حينفع لانو لو إكتشفوني حيعملو لي للمعسكر ( كما كت ) ، بس فجة أقول ليك نزلني ، نزلني .
قام نزلني في نفس الحته الطلعت منها للحافلة و رجعت بي نفس الدرب ، و لحد ما دخلت المدرسة ، لقيت الباب بين المدرستين مقفول !!
لكن لانو ربنا كريم لقيت شباك عنبرنا البيفتح في المدرسة فاتح ، قمت طفرت بيو ، يا حاجة طفرت يعني تلبت ، و لحسن الحظ البنات كانو لسع في الحوش و العنبر فاضي ، قلعت العباية و لبست
الجزمة الباته ، و جيت قادله في نص المعسكر بلا طرحة و المشاط يقول يا غربتي و الميري نضييييييف و مكوي ، صحباتي جو طايررررين من هناك و شبو في رقبتي ، آممممممنة حمدلله على سلامتك ، و رشا الهبلة تشيل و تحضن فيني ، قلت ليهم خلااااس ما قبضوني قاده حيقبضوني بي هبالتكن دي ، في تمام 5 تعلمجية سامية تشيل و تعاين لي ، و ما قادره تفهم :D
بعد داك الجاسوسات وصلو المعلومة للتعلمجيات و كلنا لاحظنا إنهم عينو بنات يباروني في المعسكر ، مسكينات بيكونن تعبن جنس تعب من اللف .gap
واحدة من البنات إسمها توسل خريجة علوم الخرطوم بعرفا قبل المعسكر لانها دفعة بت عمتي
بقت صحبتي في المعسكر عدلت الجلالة حقة حمادة قد السلك لي :
زوزانا قدت سلك بلغت الملكية
تقدو بالشباك إن شاءالله بالزنكية
زوزانا دقست سميرة و التعلمجية
تماااام تمام يا شماشية :D
ذكرى الصديقات حتتواصل لحد ما نصل لقوس قزح الجميلات
يتبع فربما القادم أجمل >>>
حجة امنة
10-07-2012, 11:20 PM
غايتو
جيبان ما جيبان
ما بجيب شي
إن جبتي القمل
بس معاك
ومستمتع جد
إن خلولنا فيها متعة
مقطوعين الطاري الراكبين فوق ضهورنا ديل
...........
حقي بجيبو براااااي
ما سمعت المثل البيقول :
ما ( حق ) جلدك مثل التسوي كريت في القرض ؟ gap
حجة امنة
10-07-2012, 11:27 PM
يابت اجمعي سريع الناس دي كلها راجية القمل
انا جايبة معاي جاز للضمان كدا:D
في البوست دا اكتشفت انو نحنا فينا شبه كبير في طريقة الكتابة جاني احساس انك سارقة بوستيني لكن اتذكرت اني ماكملت جامعتي في السودان:D
"ف شنو" شكرا للمادحين وكدا:p:p
مجنونة ياامونة!
عشان الكضب حرام و البياكل حق الناس الله بيطلع زيتو بعدين
انا (ف شنو ) دي بكون شفتها عندك و عجبتني ،
لكن إتخيل لي إني أساسا بستخدما في كلامي ولاني في الرسايل
اللعينة دي بكتب بي كلامي زاااتو ، أديك سر ؟!
الناس البيعرفوني بيكونو ممعوطين من الرسايل دي لانهم بكونو
سمعو القصص دي بي نفس التفاصيل المعاطة دي gap
ال نضحكك قبل كم يوم شفتك كاتباها في فجة ، قمت قلتا لي روحي
شوووووفي تماضر المعفنة بقت تستخدم أدواتي و ما بتشير لي !!!
حسع انا فرقي من ناس الإنقاذ شنو ؟! :D
حجة امنة
10-07-2012, 11:30 PM
يا خوفي حجة امنة تصدق انها كاتبة
وتقوم تملانا فقر علي فقر دا
------
طمطم عندي احساس انو البنسوي فيهو دا محض مكابرة gap
طبعاً طمطم بتكون مخلوعة من مداخلتك دي
لانو و لأول مرة ما حنقول ليك إذهب إلى الخلا يا وجدي :D
حجة امنة
10-07-2012, 11:38 PM
___________
اها.... يضوي ليك ان شاءالله :p
انا برااااي بعرفو كان بيضوي لي ولا لا
عارفه يا وهاد
قدر ما أقعد مع نفسي و أسلخني بسبب إني كدا
كدا دي بتكوني عرفتيها gap
يعني العشوائية و السبهللية
و أتفكر في حكمة ربنا
إني أكون مابشبه الناس ديل
الناس ديل تشمل ناس البيت و الحاجة بالتحديد
و إنتو ، صديقاتي
يعني سبحان الله
بتجيني أفكار كتيرة ما بطلع منها بي أي حاجة
وبرجع لنقطة البداية
مواهب عبد العزيز نقد الله
10-07-2012, 11:54 PM
حجوج ... بالقسم المغلظ والله لاول مرة اشعر انه يمكن للمتعة والألم ان يكونا رفيقين ويشكلا التوئمة التى كنا نخالها عصية من غير نشاز ... سردك مؤثر , صادق , مضحك ذبّاح من الوريد الى الوريد ...
دمتى كما انت بنكهة حجة امنة المتفردة ..
ومتابعة حد التخمة ..
طارق صديق كانديك
11-07-2012, 08:30 AM
------
طمطم عندي احساس انو البنسوي فيهو دا محض مكابرة gap
ود يا ثقة :p
الرسالة التاسعة : حمادة قد السلك ( قصة القمل )
غايتو يا حجة آمنة زي مابقول تاج السر الملك ( دغمستي الشغلانية دغمسة شديدة) ولمن انتهت قصتا ما لقيناها :)
عشان كده أحسن نركز على قوس قزح بإطمئنان :D
تماضر حمزة
11-07-2012, 08:45 AM
مجنونة فعلا
وجريئة بشكل انا غايتو جبااااااااااانة عمايلك دي مابعملا وكنت حاكون في الخساير حدت التخريج:D
مستمتعة بالبوست دا لدرجة ماتتخيليها وشايفاك زوغتي من القمل
اعترفي،اعترفي مابنمسكا ليك:p:p
سماح محمد
11-07-2012, 11:49 AM
طارق وطمطم لقيتكم زرزارين :p
يعني أمونة دي إلا تقول فلّوني عدييييل كدة :D
والله يا زوزانا لحقتي نفسك
أعد قراءة النص مع بعض التدقيق:
أكبر و أهلل من جوووووة قلبي ، لحد ما أخواني جو جارين من جوة البيت ، و قعدو يحضنو فيني ، سبحان الله كنت مشتاقة للحضن دا لكني رفضتو ، قلت ليهم خلوني أستحم و أجيكم !!دخلت الحمام و بكيت بكيت بكيت ، كل المرارة و الإحباط و الذل و الغضب ، و غسلت شعري و إغتسلت غسل الدخول للإسلام .
جيت لقيتم جهزو لي الاكل و ضربو لي أبوي ، أديتم الميري الوسخان ، رفضت أكل و طلبت شاي
ما قدرت أقعد في كرسي و قعدت في الواطه ، أخواتي و بنات عمتي قعدو يبكو على منظري
لانو وزني نزل بصورة ملحوظة و وشي و لوني إتغيرو ، قلت ليهم : هييي انا مافاضية ليكم حسع ، يلا سريع مشطو لي شعري ، >>>
:D:p
_______________
أمونة ياحبيبة
إنتي زولة متصالحة مع نفسك واحساسك بالحاجات مدهش
مدهش عديل كدة
عليك الله ما تقيفي كلو كلو
وذاتو مافي وصف يتقال بعد وصف عكود لكتابتك
نسكت نقرأ ونستمتع
شكرا ليك
حجة امنة
17-07-2012, 10:14 AM
يعني القمل دا إلا يصقعو عليك طق طرق طق ؟!
عالم تحب ال ( أرف ) زي عيونا gap
ابوبكر حسن
17-07-2012, 10:26 AM
يعني القمل دا إلا يصقعو عليك طق طرق طق ؟!
عالم تحب ال ( أرف ) زي عيونا gap
يعنى ياحجة امنة طلعتى من المعسكر والمعمعة بلا قملة:D:D:D
حجة امنة
21-07-2012, 01:05 AM
الرسالة العاشرة : مناسبة الكصيدة
العنوان : في الإبريق
التاريخ : أجلاً غير مُسمى
بعد السلام عليكم ، بلاهي كيف أنتم في المدة التي لم تروني فيها ؟!!
زي ما قلت ليك ، اليوما داك مرقت في مظاهرة (لحس الكوع ) في لندن ، ماشه كدا قامت
جات بت ماشه جنبي و إتخيل لي إنها بتتكلم معاي ، لمن قلتا ليها أأأ ؟ قالت لي : لالالالا أنا أسفة !!!
قلت ليها : أسفة انا دي لاني إتحشرت بينك و بين نفسك ، و عاااادي ، انا زاتي بعمل الحركة دي .
طوااالي عرفتها زولتي .
عرفتني بي إسمها : نسرين ، بت تخش القلب توووش ، اليوم داك صرفت معاها عربي كدا لمن فترت ، البت رغم صغر سنها موسوعة يا أمي ، ما شاء الله
شكيت ليها من إني قاعده عاطلة و زهجت خلاص ، و حكاية تقوم من الصباح يغمتو ليك قروش دي مكجناها من زمن كنت في بيتكم ، أتذكر أيام الجامعة كنت بقنص لل( الاب ) عشان أشيل منو المصروف ، بقوم مرات بصحى بعد ما يمرق للشغل ، بقوم بجازف قروش سيد اللبن ، مرة كنت نايمة في الحوش و اليوم داك بالليل عرق العرب غلب ، قمت جبجبت ليك شعري بالكركار و إتكحلت و نمت ، بالليل جات كتاحة كااااااربه، لمن صحيت الصباح لقيت وشي خرايط خرايط جزو بني و جزو أسود من الكحل السايل و حاجات تانية حامياني ، اها قبل ما أغسل وشي ، سمعت الاب بيدور في العربية ، قمت جااااارية عشان أحصلو وفي سري أنقنق ، و زعلت من حركتو دي ، قمت مشيت لصقت وشي في الشباك و هو مدنقر و قلقان العربية تقوم تعطلو ، قام رفع راسو شاف خلقتي ، مسكين إتخلع لمن انا خفت تجيو ذبحة ، صرخ ليو صرخة خوف كدا ، قام إتحرج و جاط فيني : مااااالك دايرة شنووووو ؟!! قمت أبيت أرد و بس مديت ليو يدي ، قام طلع القروش و يطنطن ، في الوكت داك إنتي جيتي ركبتي ، و انا ماشه سمعتو بيقول ليك : بتك دي قبيحة جداً على فكرة .
المهم
قامت نسرين بعد كم يوم ضربت لي عشان أشتغل بدلها في سوق (شبر بوش) ، لانها مسافرة لمدة إسبوع إجازة ، سوق شعبي في لندن قطعة من سوق (سعد قشرة) في بحري ، أغلبو هنود و سودانيين و صومال ، إشتغلت في دكان تياب سودانية و دروع صومالية ، سيد المحل هندي ، تاجر ماهر ، متدين ، دا حسب دينو ، عندو رب بيصلي ليو يومياً الساعة عشرة ، التعامل معاو مريح إلى حداً ما ، اليوما داك بيتونس معاي قام قال لي : أعتقد أنك لم تكوني تحلمين بالمجي إلى لندن !!
معليش يا حاجة ، حا أكتب الترجمة طوالي .
قال لي : أعتقد أنك لم تكوني تحلمين بالمجي إلى لندن !!
قلت ليو : شنو شنو شنو ، لندن شنو كمان ؟!!!
لمن إنتبهت رجعت للإنجليزي : ماذا تقصد ؟!
لمن شافني نطتت ليو عيوني : لالا أنا لا أقصد شي ، أنا نفسي لم أكن أحلم بالعيش هنا .
قمت رفعت راسي : لا يا سيدي ، لا عليك ، انا نفسي لم أكن أحلم بالعيش هنا ولا في أسوء أحلامي ، انا في بلدي كنت أعمل أستاذة في أعرق جامعة بالسودان ، هذا أولاً
قام قاطعني : هل تفتقدين أهلك و الناس في بلدك ؟!
إفتعلت لي إبتسامة : نعم ، فالناس في بلدي يصنعون الحب ، كلامهم انغام ولونهم بسام وحين يتقابلون ينطقون بالسلام ، عليكم السلام .. عليكم السلام .. عليكم السلام .
او كلام بالمعنى دا
إبتسم و سكت و لسان حاله يهتف : وكت دا كلو حاصل في بلدك الجابك شنو تنشحطي في دكاني دا ؟!!
بعد كم يوم من شغلي معاو جاب ليو توب جديد ، وطلب مني أسميو ليو ، قمت سميتو ( دقة نافع ) ، سالني من المعنى قمت شرحت ليو إنو الراجل دا في حكومة السودان و جا لندن وفي مؤتمر صحفي و طول لسانو كالعادة قام واحد من الحاضرين ضربو بالكرسي ، و كنت أمينة معاو في إنو إحتمال جزو من الزباين ما يحبو الاسم ، قام قال لي كدي جربي ، ياأخي طلعت دقة نافع دي عاجبه كترة ناس ، في نفس اليوم جو جماعة كدا ، مره ظرييييفة و راجلا و واحد تاني ، راجلا طوووويل و عريض و النوع البيحب يحشر الكلمات الإنجليزي في الكلام و هي بتقول ليو يا دكتور ، بعد ما إشترو التوب قلت ليها بالمناسبة التوب دا إسمو ( دقة نافع ) قالت لي : سجممممممك ديل لو سمعوك ما بيشترو !!!
في سري : عنهم ما إشترو ، عويرة دي ، انا ماااالي !!!!
جهراً : لاااااا ياخ ، كيزان و كدا ، أأأ ؟!! ههههههههههه
الراجل رد لي بي صوت جهور كدا : أأيي كيزان و جعليين .
قلت ليو : شششششغل !!! دا الكلام .. ظاهر والله ، ههههههههه
في سري : من كرشك الكبيرة دي و صوتك الشبعان دا ..
و مرة واحدة تانية قالت لي : سجمك لمن يجو يعتقلوك !!!
قلت ليها يعتقلو منو ؟!! لييييه ياااااخ إحنا في أم بدة ؟!!!
الهندي لمن حس إنو إحتمال الإسم يأثر في تجارتو قرر يغيرو ،
في اللقطة دي إتذكرت أيام كنت شغالة في البلد ، طبعاً انا قشرت في الهندي ساكت و شغلي في جامعة الخرطوم كان ضربة حظ ، لاني إتخرجت بي ( درجة الشرف التانية ) و الجامعة ما بتشغل غير ناس الدرجة الاولى ، لكن حظي كان كويس و أخر أيام في سنه خامسه حضرت دورة تدريبية في الجامعة عن ( التعليم الإلكتروني ) و إختاروني تبع فريق مركز الحاسوب في الجامعة و بعد إتخرجت عملت معاهم الخدمة الإلزامية ، و لاني أخدت شهادة ال ( icdl ) من كلية ( كمبيوتر مان ) شغلوني أستاذة في مركز ال ( icdl ) في جامعة الخرطوم ، إشتغلت معاهم كم شهر و قروشم ما نفعت معاي و قلت ليهم فرصة سعيدة ، بعد داك رنا صحبتي إتوسطت لي عشان أشتغل في كلية ( أبتيك ) و إشتغلت ، و بعدها إتوسطت لي عشان أشتغل في ( المركز السوداني الألماني لتاكيد الجودة ) و إشتغلت .
و انا براجع في الكلام دا إتنبهت إنو أي شغل إشتغلتو كان بي واسطة هذه ال رنا
او ( بنو ) كما يحلو لها أن تنادي نفسها ( بنو .. ناس هندسة جنو )
هذه ال رنا ، من الحاجات المخلياني متاكده إنو ربنا بيحبني و إنك بتدعي لي يما .
أتذكر أول يوم لاقيتا ، كان مع بداية السنة الدراسية الاولى ، جاتني بدون مناسبة و عرفتني بي إسمها ، انا رنا مصطفى ، رنا بت فاطنة دقنة !!!
في سري : الليلة يوم القيامة ولا شنو ، الهبلة دي جاية تعرف بي إسم امها ؟!!
قمت ركبت ليها وش الغباء ، و حكمة الله وش الغباء دا بيكون و انا بفكر
رنا لمن لقتني ما عرفتها : موش إنتي آمنة بت خالتي بخيته ، و عمتك مدينة ؟!
في سري : لا حولا ولا قوة ، دي بتعرف الاسرة كلها ؟! يا ربي لا تصيبنا لا تطلع صليبنا .
رنا و شكلها إتحرجت : ماما قالت لي إنك معانا و لازم أتعرف عليك .
الوكت دا كلو انا بعاين ليها و ما بتكلم ، العين البتكون نص مفتوحة و الحاجب اليمين مرفوع و الشلوفة مايلة للجانب الأيسر .
أخيراً رديت ليها : خير .. خير .
في سري : دي النوع البيقول ماما ، و شكلها النوع المصاحب أمو و بجري يحكي ليها ، مااااشفتي يا ماما هيثم قال لي شنو ، مااااشفتي يا ماما آمنة بت خالتي بخيته عملت شنو !! يااااي
و تقوم أمها تشيل الكلام صرة في خيت تجيبو ليكم ، يا ربي لا تبلينا لا تطلع بلاوينا .
لمن وصلت للنقطة دي من التفكير ، وش الغباء راح و بقت صرة وش : خير .. خير يا ستي و فرصة سعيدة .
طبعاً هي لي حسع كل ما نتذكر الكلام دا بتكون مستغربة في خير خير دي .
بعد كم يوم من حركتي الحامضة دي كنا قاعدين مجموعة من البرالمة تحت شجرة اللبخة الوحيدة في حوش كليتنا ، قامت رنا جات ، انا عملت رايحة و قبلت منها ، قامت جات تسال من دفتر المحاضرات حقها ، نوع الدفاتر الكبيييييرة البيكون عندها سلك بالطرف قلت كمان الهبلة طلعت بتاعة دفاتر كبيرة و قراية ، الحمدلله إختصرتها و ما أديتا فرصة تصاحبني، طلعت واحدة من البنات حنكوشة كدا شالتو ختتو في المصطبه و قعدت فيو عشان ماتوّسِخ إسكيرتيها ، قامت فجخت السلك حق الدفتر ، قامت رنا قالت ليها : هييي لكين ما طلعتي دينو ؟!!
طوالي قمت مسكتها من كتفها : قلتي لي خالتي فاطنة دقنة كيف ؟!!
وفي سري : دي زولتي تتتتب .
ال رنا دي جميلة شكلاً و مضموناً ، نشات في بيت علم و دين ، والدها متدين بإعتدال ، و متصوف ، مهندس ، عسكري أحيل للصالح العام مع بداية " الإنقاذ "، أستاذ بجامعة الخرطوم ، كنا بنشاغلها : إتي أبوكي دا عامل فيها لبان سحري ؟!! ( نوع من اللبان للاطفال ، يتغير لونه إلى عدد من الالوان مع المضغ )
عم مصطفى كان ليو دور كبير في تربيتنا كلنا في الشلة من خلال رنا ، الرجل عصامي و واضح بشكل مثير للإعجاب !!
من القصص التي يرددها طلابه بكلية الهندسة : في مرة تم إستدعاءه و تبليغه إنو أحد الطلاب إستشهد ، قال ليهم : انا المطلوب مني شنو غير إني أسجلو غياب ؟!!
رنا سمراء و لها شعر طويل بشكل يدعو للحسد ، أخذت لونها و حس الفكاهة و السخرية من والدها ، كانت أحياناً بتحوم مع بنات خالا ، بقوم أقول ليها : ديل منو ؟! بتعرفني دايرة أتعَافّن عليها : ديل بنااااات خاااالي يا آمنة .
يا زوووولة قولي كلام غير دا ، ديل بنات عرب يااااخي .
و كانت من ضمن الشلة منال ، بت أمدرمان ، كانت بسخريتها و التلميحات العنصرية الطريفة
بتشارك معاي في الحوار دا ، في مره شِلتنا كلهن سقطن في واحد من إمتحانات (نصف السنة ) نجحنا انا و رنا بس ، انا الحظ برضو خدمني لانو أول ما دخلنا الإمتحان لقيت روحي عارفة تعريف رياضي بس قمت كتبتو ، قامت واحدة من بنات الدفعة الورانا و دمجوهم معانا نادتني : زوزانا زوزانا ، حليتي المسالة التانية ؟! قلت البرلومة دي وهم ولا شنو ؟ قلت ليها لاااا بي قطامة كدا ، قالت لي خلاس : أكتبي : أفرض ان : x = 3+y ، و شففتني باقي المسالة ، قمت نجحت ، و حكمة الله هي قدت ، شكلها كانت مقرضة على المسالة دي بس و انا فتها بالتعريف ، اها كلهم إتقبلو الحكاية دي بروح رياضية لانو أغلب الدفعة قدو ، إلا منال زعلت زعل شديد ، و أكتر حاجة غاظتا إنو انا و رنا نجحنا ، قمنا عشان نغيظا زيادة لمن مرقنا للفطور بقينا انا و رنا ماشين قداااام ، نظام ناجحين و مافاضين ليهم ، قامت قالت : أصلها الدنيا كدا ما بتدي حريف ، تدي العبيد ، و أشارت لي رنا ، و ود العرب البليد و أشارت لي ، و ضحكنا
لمن رنا كلمتني عن الشغل في ( المركز السوداني الالماني لتاكيد الجودة ) و عن مديرة المركز الدكتورة منال أبو بكر وافقت بدون تفكير ، دكتورة منال من الناس المتميزين في مجال ضبط الجودة في السودان و مركزها بيتعامل مع عدد كبير من المصالح الحكومية ، مسكت ليها مجموعة طلاب من موظفي وزارة ( التخطيط العمراني ) ، المهم ، كنت طالباهم قروش ، ما كتيرة ، لكن أنا الايام ديك كنت مفلسة شديد ، قامو ضربو لي عشان أمشي أشيل قروشي ، بعد مشيت المديرة المالية أبت تقابلني لانو طلع القروش لسع ما جاتم من ناس الوزارة و رسلت لي موظف صغيروني كدا ، قعد يتعذر لي و عرقاااان ، قمت قلت ليو يااااخي مافي مشكلة ، لمن قروشكم تطلع أضربو لي ، لمن جيت ماره بي مكتب المديرة المالية عينا وقعت في عيني ، سلمت عليها و انا مبتسمة قامت فتحت خشمها و ما ردت لي ، ضحكت و مشيت خليتا ، لاقتني دكتورة منال ، لمن عرفت الحصل قعدت تتعذر لي بي شدة لمن أنا زاتي إتحسست ، و طلعت دايرة أتشق من الزعل
، يااخي المرة دي انا بحترما شديد ليه تتختا في موقف بايخ زي دا ، إتخطيت الزعلة سريع و بقيت في مصيبة إني ما شايلة غير 1 جنيه سوداني و ما أظن يوصلني البيت !!
قمت بقيت مااااشه و زعلانة من الدنيا دي ، و أفكر ، لحد ما وصلت مبنى الحملة الإنتخابية لي دكتور كامل إدريس ، قلت هيييي بلاهي هو مترشح ؟!!! و بقيت واقفه برا المبنى أتفررررج في الملصقات حقة الحملة ، جوو مارين فيني بت و راجل ، قالو لي إتفضلي ، قلت يلاااا ال نتفضل انا وراي شنو الجراحة ولا المجلس الوطني ، دخلت و بقينا نتناقش ، البت إسمها فاطنة من بنات الغرب و ساكنة في أم درمان و الراجل إسمو ( سيف الدولة ) المشرف على الحملة من أولاد سنار ، من شباب الحركة الاسلامية الجد جد ، سالوني إنتي حترشحي منو ؟! قلت ليهم : انا أساسا ما عندي علاقة بالسياسة و ما متسجلة ، لكن لو كنت عارفة إنو دكتور كامل مترشح كان سجلت ، تعبنا من الأحزاب و العسكرية و الجهوية ، دايرين ناس فاهمين و ناس علم .
اليوم داك حسيت إني فعلاً جاهلة و سلبية لاني ما إتسجلت للإنتخابات .
في نص الكلام عرفت إنهم الإتنين مزارعين و بيزرعو عدد من المحاصيل ، قام سيف الدولة قال : انا مزاااااارع و بتدين علي المطرة !! زي حال كل أهل بلدي ، انا زول بسيط زي حال أهلي المزارعين ديل و بخاف هذه المدينة تفسد فطرتي لكين منو البقدر يقول : البغلة في الإبريق ؟!!
رجعت البيت بي رجليني و انا بفكر فيهم و كتبت نص ( البغلة في الإبريق ) .
كنت متابعة مع رنا أخبار د. منال ، لحد ما الحكومة فجاءة طلعت قرار بي قفل المركز و بدون أسباب واضحة إلى أجلاً غير مسمى ، عشان نسمع تحت تحت إنو ولد ( نافع علي نافع ) عندو مركز منافس و داير يكوش على المجموعات بتاعة المصالح الحكومية !!! د. منال حاولت بي كل السبل تجد إجابة و تبرير للحصل لكن بدون فايدة ، و بعدها عرفت إنها رمت طوبة القصة و قررت تخلي البلد إلى أجلاً غير مسمى .
ومين يا حاجة البيقدر يقول البغلة في الإبريق
ذكرى الصديقات ، قوس قزح الجميلات ال إتقاسمن معاي قلم الدلال و الفرحة حتتواصل
إلى أجلاً غير مسمى
يتبع فربما القادم أجمل >>>
مرفق إلى عنايتكم نص قصيدة ( البغلة في الإبريق )
فـي كل عام تـزرع بـتـديـن عـلى المـطـرة
وبـتـتـوكـل تـعـيـش مـالا المعايـش شـدهـتـك ؟!؟
يا .. يــــــا الف يـخـس علـى المـديـنـة
الـدايـره تـنـزع فـطـرتـك
في كل يوم مــِتـلـك بيطلع من جدايل الشــــمس نور
يـمـسـح جـبـيـن الارض يـهـمـس لـيـها
يــــــا موعـودة تحـمـلي بالصـبر
تـــلـدي الصـبر
ما يـاهـا زاااااتـا الولـدتـك
يــــــا الف يخس على المدينة
الـدايـره تـفسـد فـطـرتـك
فـي كل حين يـدعوها داعي : يا مـختـارة
هـل قـد مَــسَّــك الضُّرُّ؟!؟
فـتـدعـو لـلـمـزيـد...
يا ربـي زد..يا ربـي زد
وبـي جـاهـا تــُـقـبـل دعـوتـك
ومع المـطـر تـلـقـاهـا سـرعـة إتـبـرجـت
مـن السـمـاء تِـتـلقـى كـل الـبـِـلزمـا
ما هـُـنــدي في كـل أزمـه هي الإتـلـقـتـك
والله يخس علــــــــــ......الدايــــــره
الله على جـيـت المـطـر
وضـمة الأرض المـطر
زي فيـض عِـنـاق العـاشـقـين
طعم البكاء لما يصبـح زي قدر
او فـرض عـيـن
في زمـتك ما الـف يخس على المدينة
الدايره تـمسح فطرتك؟!؟
يا الله لي شوق المطـر
وكـت السـنابـل لــّبـنـن
خوف الحبيبات ضفرنو جريد نخل
وإتوسدن قلبك
كما الـتعــويـذة لي حين جـيـتـك
تاالله الف ..والف الف
يخس على المدينة الدايره تنزع فطرتك
تاالله الف ..والف الف
يخس على المدينة الدايره تنزع فطرتك
عايني
في رمضان دا دايما في عدم موضوعية زيو وزي باقي الشهور
عليه نرجو الاخذ بالاعتبار في عدم موضوعية الناس
عشان تقومي تملي لينا عدم موضوعيتنا بعدم موضوعك دا
ومن كان له عدم موضوع فليجد به لمن لا عدم موضوع عنده
غايتو احيانا كتاااااااابة
حجة امنة
25-07-2012, 01:10 PM
حجوج ... بالقسم المغلظ والله لاول مرة اشعر انه يمكن للمتعة والألم ان يكونا رفيقين ويشكلا التوئمة التى كنا نخالها عصية من غير نشاز ... سردك مؤثر , صادق , مضحك ذبّاح من الوريد الى الوريد ...
دمتى كما انت بنكهة حجة امنة المتفردة ..
ومتابعة حد التخمة ..
زي ما قلت ليك يا مواهب في مداخلتي الإتجازفت في تحديث المنتدى لمن لقيتك رديتي على الرسائل ، رجعت قريتا تااااني ، و ماليني إحساس إنتظار النتيجة في المدرسة ، حكاية متابعتك دي مخيفة بقدر ما هي مفرحة . gap
حجة امنة
25-07-2012, 01:12 PM
يعنى ياحجة امنة طلعتى من المعسكر والمعمعة بلا قملة:D:D:D
الصراحة في كم قملاية كدا ، لكين بيرستيجي يأخ gap
حجة امنة
25-07-2012, 01:20 PM
عايني
في رمضان دا دايما في عدم موضوعية زيو وزي باقي الشهور
عليه نرجو الاخذ بالاعتبار في عدم موضوعية الناس
عشان تقومي تملي لينا عدم موضوعيتنا بعدم موضوعك دا
ومن كان له عدم موضوع فليجد به لمن لا عدم موضوع عنده
غايتو احيانا كتاااااااابة
سأكتفي ب إقتباس هذه المداخلة
و ذلك للزمن و التاريخ gapgapgap
ياخ خليك موضوعية شوية في عدم موضوعويتك دي
وتعالي كبي لينا باقي عدم الموضوع دا
فاننا نموت لا موضوعيا
حجة امنة
01-08-2012, 02:11 AM
الرسالة الحيداشر : اللحظة التي أفلس فيها الشيطان
العنوان : بين شارع ( المين رود ) بالخرتوم و ( إجور رود ) ب لندن
التاريخ : من شهر 8 سنة 1998 و لحد حسع
بعد السلام عليكم ، بلاهي كيف أنتم في المدة التي لم تروني فيها ؟!!
يا حاجة رمضان طويل
بسم اللهي قصدي رمضان كريم يا حاجة
الأولمبيات 2012 _ لندن بدت و انا لي شقاوتي اليوم داك مرقت ، يوم الإفتتاح
انا يطرشني و يعمي جيراني ما كنت عارفة ، و سبحان الله من الصباح قمت و حاسة
إني ما دايرة أمرق ، لكني إتطريت لانو كان اليوم الأخير من كورس لغة الإشارة الإنجليزية
للصم في ال ( كوو_ليييج ) زي ما بيقولن النسوان هنا ، أول أيام جيت ، كل ما أتعرف لي على واحدة و تكون دايره تقشر فيني بتقوم تقول لي : أأهااااا ما بديتي ليك قراية ؟!! لانو لو دخلتي في موضوع الاولاد تاني بتبقى ليك صعبة .
بقوم كنوع من إدارة الحوار بسال : أهااا إنتي بتقري ؟!
تقوم تقشر فيني : أأأييي بمشي ال ( كوو_ليييج ) ، قصدها ال (college) !!!!
بكون في اللحظة ديك دايرة أطرش من الضحك : أهااااا بتقري شنو في ال ( كووو_ليييج) ؟!
تقوم تستغرب و ترفع لي حاجبها : هيييي ما ال ( لأن_قِيويج ) !!!!! قصدها ال (language)
في اللقطة دي ما بقدر أكتم الضحكة ، يما مشتهيه يوم واحدة من البوباريات ديل تقول لي قاعده تقرا تمريض ولا علم الفلك ، بلاهي الواحدة تتشدق ليك بي ال ( كووو_ليييييج ) لمن تتخيل إنها بتعمل في الدكتوراه !!
الحكاية دي حرقتني و قمت إتحنفشت و سجلت لكورس لغة الإشارة الإنجليزية ، أول يوم مشيت كنت خااااايفة و في جواي حاسه إنها خطوة بليدة ، حسع كان مشيت قريت ال (لأن_قِيويج )
زي باقي النسوان ما كان أحسن لي ؟!! جات الأستاذة داخلة ، كان ألقاها ليك هي زااااتا في روحا صماء !!!! قربت أقوم أطلع ، بقيت المحاضرة كلها قاعده على عصباتي ، بعد شويتين قالت لينا أخدو راحة نص ساعة ، قامت البت الجنبي سالتني سؤال ، نططت ليها عيوني لاني ما فهمتها ، قامت قعدت تضحك !! عرقت جنس عرق ، قامت قالت لي : أنا أسفة يا عزيزتي لقد تحدثت معك بلغتي الام البرتغالية ، انا دائما أكرر هذه الحركة الغَبِية!!!
لاحولااااا ، يا حاجة بالجد تنفست الصعداء ، الهبلة طلعت من البرازيل !!
قمت إفتعلت لي إبتسامة شِفته كدا : لا عليك عزيزتي ، انا أيضاً أفعلها أحيانا ، و لكن بالعربية ، ها ها ها .
قامت دايرة تقشر فيني : هل تعلمين أنا خائفة من أن أصاب بالتشويش لاني درست لغة الإشارة البرتغالية ، و عندما تذكر الأستاذة الكلمة أكون قد فكرت في الإشارة بلغتي أولاً .
قمت طوااالي قشرت ليها : أوووو هذه نفس مشكلتي ، لاني درست لغة الإشارة العربية الموحدة ببلدي !!!
بعد كم محاضرة الاستاذة قعدتنا في مجموعات ، قامت واحدة من الطالبات إنجليزية سمينة كدا و مبتسمة الوكت كلو ، سالتني : عندما تُأشرين الكلمات هل تترجمينها إلى لُغتكِ أولاً ؟!
وااااي انا من لُغتكِ ، الناس ديل ما شافو ليهم أفارقه غيري ؟!!
أها كانو بيتعاملو معاي بي حساسية كدا يعني لمن تجي إشارات زي خمر ، نَبيِذ ، كنيسة ، كانو بيتحسسو ، وانا بحاول أكون عادية و لسوء حظي لمن يجي دوري في الإشارة ما بتجيني إلا الإشارات المُحرجة دي !! مرة في دوري كان السؤال ، أين تذهب للصلاة ، والمفروض أنا أأشر الإجابة القدامي في الشاشة و هي الكنيسة ، قمت طوااالي أشرتها ، الأستاذة قربت تنطق من الحرجة و قامت طوالي كتبت في السبورة مسجد و ورتنا إشارة كلمة مسجد ، و مرة تانية جاتني إشارة خمر ، أشرتها و معاها حركة طَشمه كدا ، قامو ضحكو وتحس بيهم برضو ملاوزين .
أها أخر يوم كنت صايمة و مَدروخة زي التقول عاضاني جدادة ، اليوم داك يا قول العربي أريتو التمساح كان طقاني وكسر رقبتي ، اليوم كلو يسالو فيني ، كل ما يجو ماشين فسحة الشاي ولا الفطور ، مااالك يا آمنة إنعلك طيبة ؟! لالا يا شباب بس انا صايمة ، أوووو سوري آمنة !!!
أها ما مسموح ليكم تشربو شاي ؟! لالا ولأأأ شي ، و يقعدو يندهش فيني !!
في النهاية قمت مشيت معاهم الكافتيريا عشان ما يتحسسو ، ريحة القهوة عملت لي نفسيات ، قامت واحدة فيهن إنجليزية بيضاء شغالة مدربة شخصية في صالة رياضية سالتني : عفواً يا آمنة ، انا أريد أن أسالك عدة أسئلة عن معنى الصيام و لماذا يصوم المسلمين .
قمت نططت ليها عيوني بي تحفز كدا ، حركات غير الناطقين بها
مع نطيطة العيون : أ أ أ ، أنا لا أدري كيف أوصف لك معنى الصيام الفعلي لنا كمسلمين .
قامت إتحسست : أنا أسفة و لم أقصد أن أحشر أنفي ، لكن لدي زبونة مسلمة و أريد أن أفهم ما تمر به لكي أكون أكثر تعاطفاً و تقديراً لشعورها !!
الدور دا إنحرجت انا : الحقيقة انا هي التي أسفة يا سيدتي ، لان حاجز اللغة سيجعلني عاجزة عن توضيح و شرح الامر ، انا جداً أسفة !!!
في اللقطة دي قامت البرازيلية إتدخلت ، كانت بتسمع في كلامنا و بتفتش في النت ، قامت فتحت ليها صفحة فيها تعريف للصيام ، قمت إتذكرت إنها لمن عرفتني صايمة قالت إنها قبل كم سنة صامت لانها كانت متزوجة مسلم و كان بيعرف فيها بالدين ، قامت صامت شهر كامل و نقصت 15 كيلو من وزنها !!
قعدت أتمتم : إنها تستطيع أن تخبرك فقد صامت من قبل !!
البرازيلية : إن للصيام عِدة جوانب نفسية و أخلاقية منها أن الصائم يجب أن لا يعامل الأخرين بصورة سيئة
هنا انا شبيت ليها في حلقها : نعم نعم ، و الصيام لا يعني التوقف فقط عن الاكل و الشرب ، إنه يعني التوقف عن الكذب و السرقة و كل ما يغضب الله !!!
قمت حسيت بي تَفاهة مداخلتي و دنقرت و صريت وشي ، قامت الخواجية إتحسست تاني و إعتذرت لي تاني ، قمت أنا زاتي إعتذرت تاني و في نفسي عرفت إني زعلانة من نفسي في الاول ، لاني متاكده إنو المشكلة ما حاجز اللغة بس العَجّزني ، الجهل برضو ، و الخوف من المسئولية قدام ربنا .
في نهاية اليوم طلعت بعد ما الاستاذة وزعت لينا الشهادات و إتوادعنا ، مرقت و مشيت محطة البص و بقيت واقفه مع الناس ، والشمش واقفه معانا ، فوق راسي مباشرةً ، نص ساعة ، البص ماجا ، ساعة ، ما جا !!! بعد شوية واحد قال لينا : هوووي يا طير البص دا قاعد ينبرم بي هنااااك لانو الليلة الإفتتاح و السواقيين بقو بيخرمو بي جوة يا وهم .
قامو الناس بقو ماشين لي قدام و انا كالعادة ، الطيرة المبارية السيرة ، نمشي و نفتر ، نمشي و نفتر ، لحد ما وصلنا المحطة البيخرمو منها السواقيين ، أها واقفين كدا ، كان عيني للباصات بتخرم قدام شووووية من المحطة !! جنبي واحد إنجليزي قام سب ، كان القى ليك روحي بسب بالإنجليزي !!! شُششُششُغل المافي شنو ؟!
وقام جرى بالحته البيخرم بيها البص ، انا قعدت أفكر ، قلت هووووي جِنّاً تعرفو أخيّر لي أباري المحطات لحد ما ربنا يسهل ، بقيت مااااشة و بص واحد داير يجي مافي ، شقيت شارع ( أوكسفورد رود ) كلوووو ، و الناس دي مبسووووطة و فرحانيين بالشمش و ماشيين عريانين و يتصورو ، و انا خلاس أخلاقي وصلت تحت الصفر ، أشوف ليك قدامي شباب كدا ، شكلهم سُياح ماشيين و ياكلو في الإسكريم و شغالين ليك : أأي لااااف يو ، نووو أأي لاااف يوووو !!!
بعد شويتين أشوف ليك واحدة إنجليزية بيضاء مصنقعه ليها بي قزازة موية بااااردة ، القزازة البتكون حجم عائلي ديك !!!
طواااالي عرفت روحي دخلت مرحلة الهلوسة ، خواجية و تصنقع و تَبّوز بالقزازة كدا ؟! لالا ما ممكن .
واصلت في حكاية الهلوسة و الزحف دي لمدة 3 ساعات ، لحد ما وصلت ( إجور رود ) ، ماشه كدا لاقتني واحدة خواجية ما بيضاء شديد ، عملت لي في وشي كدا و قالت : أأوذ بالله من الشيتان الرجيم !!
قمت إتخطيتا و لمن جمعت رجعت ليها ، إتكلمت معاها بالعربي : قلتي شنو ؟!
الخواجية : كولت ليك أأوذ بالله من الشيتان الرجيم ، مووش إنتو في سودان لمن تشوف شيتان بتكول أأوذ بالله من ...
قاطعتها بي إبتسامه هبلة كدا : يا زولة الله يسامحك !!
و مشيت خطوتين ، وقفت
قام الشيتان يا قول الخواجية قال لي : آمنة إنتي بقيتي هبلة ولا شنو ؟! شنو الله يسامحك دي ؟!
دي خياسة جديدة ولا شنو ؟!
رديت : لاحولاااا ، شوشو شخصياً ، إتو موش ربطوكم ؟! ثم إنو لغتك في الحوار بقت تعبانة كدا ليه ؟!
شوشو : أرجعي حدديها مع الخواجية بت الهكس باشا دي .
قمت رجعت الخطوتين و سالتها : إنتي ليه قلتي لي كدا ؟!
قامت كررت نفس الكلام الاول : كولت ليك أأوذ بالله من الشيتان الرجيم ، مووش إنتو في سودان لمن تشوف شيتان بتكول أأوذ بالله من ...
قاطعتها : يا زولة الله يسامحك
الخواجية : الله يسامهك إتي دي ، أويره دي !!
يما الخواجية قالت لي أويره دي !! انا إنتهيت عالمياً يما
طوالي شوشو لقى فرقة و إنقشط كما الورقة : أويره دي ؟! دا كلام شنو يا آمنة ؟
معقولة البيحصل دا ؟ حسع دا لو كان حصل في أبو جنزير كان بيحصل شنو ؟!
رديت : منو دي ، يمين بالله دا لو حصل في أبو جنزير كان الكلام الفارغ يكون مدور حتى لحظة كتابة هذه السطور !!
شوشو : أيووووة دا الكلااام ، يلا زي البت الفالحة أرجعي خطوتين لي ورا .
رديت : الله ينعلك يا الشيطان أساساً دا المرجعنا لي ورا ، والله ما أرجع ولا خطوة .
و واصلت طريقي و في إبتسامتي و فوق راسي قوس قزح الجميلات المذكور سابقاً
بالتحديد الاء هاشم ، الإنسانة دي أكاد أجذِم إنها حتدخل الجنة بي حديث :
((تبسمك في وجه اخيك صدقة))
أول مرة شفتها كنت قاعده في شارع ( المين رود ) جات ماشه و مبتسمة ، الصراحة إبتسامتها ما كانت أول شي لفتني ، طرحتها ، طرحتها راقية رقي عجيب و متناسقة مع باقي اللبسه ، أتذكر كانت طرحة مشجرة و أرضيتها لونها زي الشاي باللبن و فيها وردة باللون البصلي و شايله دفاتر كبيرة كدا ، بعدها بي كم يوم شفتها ماشيه في المظاهرة الطلعت عشان مقتل ( محمد عبدالسلام ) اليوم القبل اليوم الطلعت فيو انا و جريت لمن الجماعة فكو الرصاص ، المظاهرة جات ماشه في شارع الجامعة و الاء كانت في المقدمة ، ماشه و تهتف : مقتل طالب مقتل أمة ، مقتتتتل طالب مقتتتتل أمة ، و لابسة نفس ذات الطرحة الراقية ، في اللحظة دي انا شفتها طويلة القامة ، عريضة المنكبين ، شلولخة عديييل كدا ، و قررت أصاحبا .
بعد كم يوم شفتها قاعده تحت شجرة اللبخة الوحيدة في كليتنا ، قمت قعدت أتحكحك لحد ما وصلت قريب منها ، قمت جبنت أتكلم معاها ، شويتين كدا قامت عينا وقعت في عيني ، و إبتسمت ، و طوااالي جات سلمت علي ، قالت لي : إنتي زوزانا ، صاااح ؟!
الشهرة متاعب يما
قمت ما إتعافّنت عليها زي ما عملت مع رنا : أيي زوزانا لكين ما أظن قابلتك قبل كدا ، و طرحتك سمممممحة ياخ ، ما طرحة مُظاهرات .
قعدت تضحك : انا شفتك لمن جيتي مدرسة (فاطمة عبد الرحيم) عشان تزوري صحباتك بتاعين ( سيستر إسكول ) و قعدو يكركو ليك أبو الزووووز و كنتي لابسة فستانك القصير و عامله ضنبين حصان و قعدتي تقولي ليهم شكرن شكرن يا معجبيين صور ما معانا !!! بالجد كلنا إتكيفنا منك ؟!
قام شوشو إنقشط : عامليها كمعجبة يا عويرة .
رديت : هيييي البت دي طرحتا سمحة ، دا اولاً و عيونا عسليات يا عوير إتا دا ، قد
من اليوم داك و لحد الأن ، كل ما تحضر الاء يتضائل الشيطان داخلي
الاء ما بتعرف تعامل أي مخلوق كعب ، ما بتعرف تقطع في الناس و بعد دا ونااااسة !!
الاء ما بتعرف تحرج أي مخلوق ، أيام الإمتحانات بنات الشلة كانو معينني حارس شخصي لي سيادة ال الاء ، لانها ممكن تكون في الطريق للسنتر عشان تقابل الباقيين عشان نراجع ، يقوم يلاقيها 100 زول يسلم عليها وماتعرف تستائذن منهم !! بقوم انا أحرجا ليك بي إني بستأذن و بمسكا من يدها و كرررررر لحد محل المراجعة .
الاء كانت أكثرنا فهم لمواد الرياضيات البحته و أكثرنا قدرة على شرحها ، ممكن تتطوع تشرح للدفعة كلها مواد البحته و تجيب أكبر درجة و تقد باقي المواد !!!
الاء جميلة جوة و برا ، من بيت علم و دين برضو ، شديدة الإعجاب بوالدها و كنا نشاركها في هذا الإعجاب سراً ، تجينا من الصباح : ماشفتو أبو الهاء الليلة عمل شنو !! لالا ياااخ بالغ لكين ، حركاتو الحامضة دي ما بيخليها ؟!
الاء كانت شديدة الإنتباه للتفاصيل في أي عمل تقوم به؛ عشان كدا تلقاها متورطه في الأشغال المعاطة و بايخة في الأسابيع الثقافية و تخريج الكلية ، يمسكوها ليك زينة معرض الرياضيات البحته !!!!! ، الإشراف على مشاريع التخرج في معرض الإحصاء !!!!!!
أيام الأسابيع الثقافية تقعد تشرف و تنسق و تزين لحد الساعة 8 ، تصل بيتم الساعة 9 ونص !!
أبو الهاء يهرشا ليك ، تقوم تقول ليو بكرة بدررررري انا معاك ، بكرة تجيو ليك كوووووشك كوووشك جاره باقي البوسترات و أقلام التلوين الساعة 10 !!!
الاء محبوبة الجماهير من العميد لحد عم جون حارس الكلية ،
الاء ورثت عن والدتها عينيها العسليتان و وجهها الباسم الطيب ، ومن والدها ذكائه و كرم
عرب الجزيرة و عادات حيشان قريتهم ( السوريبة ) ، ألاء كريمة بصورة مُزعجة ، في واحد من أيام الأسابيع الثقافية جونا كمية من الضيوف ، قمنا لمينا قروشنا كلها و عزمناهم كلهم ، وكل واحد مننا خلى قروش للمواصلات ، نهاية اليوم تجيني الاء تتقاصر و تتطاول ، و مبتسمة ، آمنة بالمناسبة انا ما عندي قروش مواصلات !!!! قلتا ليها ما تخافي بدفع ليك من هنا و لحد السوق العربي ، و بديك لي مواصلاتكم ، إتلبدنا لحد ما إنقشطنا لينا في حافلة مافيها زول من كليتنا ، وصلتها مواصلاتم و أديتا القروش : شاحده الله يا الاء تركبي كدا و تدفعي ، تتلفتي تلقي الحافلة كلها ناس حلتكم ، و الله إلا تطلعي سلسلك تديو للكمساري : الشباب ديل معاي يا معلم !!!
و كانت بتريحني في حاجتين ، لمن نكون ماشين جوة الجامعة و نجي ماريين بي الجماعة الحِبِبين البيكون مُتلصقين و قاعدين في الأرشات و شغاليين : أأي لاف يو ، نوووو أأي لاف يوووو
بتكون الاء ماشه قدامنا و كوووشك كوووووشك مُنضفه الأرض بي إسكيرتيها تقوم تحوص ليهم عيونا و تقول ليهم : المحل دا بيشيل نفر وااااااحد !!!!
تاااااخ و تمشي و نتحرج نحنا
الحاجة التانية ، الاء صوتا جميل ، كنا بنشكل ثنائي رهيب ، لمن كنت أزهج من المراجعة كنت بغمز ليها : يا أخوانا بقترح إنو الاء تغني لينا غنية غنيتين .
بيقومو يكوركو : لاااااا ما دااااايرييييين ، قديتونا بي فرمالاتكم دي ، ما د ا ي ر ي ن
الاء : يلا يا ابو الزوز لو سمحتي خشي لينا بي رمية ( من معزتك إتي لي )
لالا يا الاء ياخ خوشي إتي
ونقوم نغني من معزتك إتي لي ، لحد (و قولتي لي معااااك سلااااااامة) ، تن ، (ضحكك شررررررح قلب السمااااء ) !!!
رنا : ياااااخوانا ، القلب الشريط منو ؟!
بعدين كنا لو بنغني و جا زول سلم ، مثلا : نوووور بيييتنا ، تري لم شاااارع بيتنا تري لم ، أهلاااا عبير كيفك ، أقعدي أقعدي ، يووووم جييييتنا ، يا الهليت فرحت قلوبنا !!!
و هاكذا ، و لو ما تمينا الغنية بيجينا صداع ، و ما بنختار غير الأغاني البتجيب سرطان في الحنجرة ، ناس ( وصتني وصيتا ) ( يا رزينة ) ( يا بلاد النور )
مرة الواطة حاااارة و الإمتحانات مسخنة ، قعدنا ندندن
الاء : خساااارة يا قلبي الحنيييين
إنقشطت ليك بي فرحة : هجرونا أحبااااب السنين
الاء : من غير سبب
إنقشطت بي رشاقة : أي والله من غير سبب
الاء : ظلمو الغراااام ، الكان حلو و الكان أمين
و إتمطيت بي راحة : يقولو عننا ظاااالمين يا حليلنا
الاء : و الله يا حلييييلنا ، حليلنا نحن المخلصين ... إيييييييه
منال : إييييييه ؟!! دا شنو دا دكان ود البصير دا ، و الله (حنان النيل ) تسمعكن إلا ترفع فيكن قضية !!
دايرة أختصر ما قادره يا أم ، بي إختصار كدا انا أكاد أجذّم أني قد أخذت نصف ديني من هذه الاء .
يتبع فربما القادم أجمل >>>
مواهب عبد العزيز نقد الله
01-08-2012, 03:46 AM
القادم أجمل ولا شك ما دمتى فيه ...
وكل يرى الناس بعين طبعه وما ترينه فى من حولك من صفات ملائكية انما هى منك ومن نبل روحك ودماثة خلقك ...
معنى ان يكون الانسان كتاب مفتوح من غير تلوين او تدليس كنت اعتقد انه من المعانى المجازية التى لا يمكن ان تتأتى لبشر ولكنك احققتيها ..
لله درك أيتها الآمنة ..
دمتى بجمالك النضاح
ابوبكر حسن
02-08-2012, 11:43 AM
الزوله الكتّابة حجة امنة
رمضانك يتبارك
و
كل سنه وانتى طيبة
القادم اكيد اجمل واخدر ضواى كمان
واصلى فى جوابات الحاجه
الله يديك ويديها العافية
حجة امنة
12-08-2012, 11:28 PM
القادم أجمل ولا شك ما دمتى فيه ...
وكل يرى الناس بعين طبعه وما ترينه فى من حولك من صفات ملائكية انما هى منك ومن نبل روحك ودماثة خلقك ...
معنى ان يكون الانسان كتاب مفتوح من غير تلوين او تدليس كنت اعتقد انه من المعانى المجازية التى لا يمكن ان تتأتى لبشر ولكنك احققتيها ..
لله درك أيتها الآمنة ..
دمتى بجمالك النضاح
ليه يا مواهب ياخ
يشهد الله من يوم شفت ردك دا ، أمشي و أجيه راجعة
و الله ما فتح علي بي رد مناسب او بالعدم مهذب gap
انا ما عارفة لي متين أشيل و دللللل أرمي في دورابي دا
ف شنو
خليتك لي الله يا مواهب gap
حافظ حسين
13-08-2012, 12:01 AM
جبناء و جبانات ما عندكم خوة
تلقوا ليكم حاجة سمحة تنوموا بيها
و علي قول رأفت ميلاد (رسالة داخلية بتكلفكم شنو؟)
و الله البوست الجميل دا يعمي اهلي و يطرش جيرانا كان شفته
يا سلام عليك يا أمنة
حجة امنة
24-08-2012, 05:37 PM
الزوله الكتّابة حجة امنة
رمضانك يتبارك
و
كل سنه وانتى طيبة
القادم اكيد اجمل واخدر ضواى كمان
واصلى فى جوابات الحاجه
الله يديك ويديها العافية
كل سنة و إتا طيب يا بكري يأخي
انا من هذا المنبر أحب أوضح حاجة مهمة شديد
انا ما كتابة ولا حاجة و الرسايل دي جات كدا توفيق من رب العالمين
و علاقتي بي والدتي كانت زي الزفت ،
كنت قايلاها زي الزفت لكين
ظهرت لي مستجدات ، ربما أتطرق لها في القريب العاجل gap
غايتو يا بكري يأخي ربنا يجبر بي خاطركم بحق جاه الحبيب المصطفى و بركة هذا العيد .
حجة امنة
01-09-2012, 10:39 PM
جبناء و جبانات ما عندكم خوة
تلقوا ليكم حاجة سمحة تنوموا بيها
و علي قول رأفت ميلاد (رسالة داخلية بتكلفكم شنو؟)
و الله البوست الجميل دا يعمي اهلي و يطرش جيرانا كان شفته
يا سلام عليك يا أمنة
تبرا يااخ
لكين يا حافظ حسين شكيتك شكيتاً لا تتعطل لا تتبطل
كان مسّخت لي هذا البوستي الذي ما زال طفلاً يحبو
بي بوستيك حق الدفاع الشعبي gap
لكن شنو
الله في
وانا نويت أشيل هذه التجربة الغنية صُرة في خيت إلى بوستكم العامر
و لسع بي جاي يتبع >>> gap
حجة امنة
19-09-2012, 12:54 PM
الرسالة الإتناشر : عندما تجعل من نفسك أضحوكة.. أمام نفسك(البول تحت الحيط).
العنوان : بين بيتنا العامر و الخلا
التاريخ : أمس القريبة دي
بعد السلام عليكم ، بلاهي كيف أنتم في المدة التي لم تروني فيها ؟!!
إذا دار مِحور سؤالكم عني، ف أنا أحْمِد سيدي و ما زلتُ في هذه البلدُ الباردِ أهلها.
يما انا جادة، ما تقري الرسالة دي بالذات، لو سمحتي.
أمس إتذكرت عبارة (الأب) الشهيرة : إنتو ما تستااااااهلو، المفروض تعيشو في الخلا!!!
وضحكات أخواني الشريرة و غضبات أبي على أثر عملاتنا الشريرة ، التي عادة ما تنتهي بعبارته أعلاه.
أمس حسيت بي إمتنان عظيم لهذا الخلا، و تقدير للتجارب المريت بيها في الريف.
من صباح الرحمن جوني ناس التصليحات، بعد ما خلفو مواعيدم لمدة إسبوع، يما الخواجات ديل طلعو ما عندهم مواعيد برضو، سااااي شايلين حس السودانيين .
المهم
الجماعة جو يشتغلو في الحمام وانا حارساهم، واحد إنجليزي ابيض والتاني بولندي ، واحد فيهم بيقلع المقعد بتاع الحمام و التاني بيصلح الارضية الخشب، اول حاجة زهجتني ، الراجل بتاع الأرضية بيتكلم معاي بالانجليزي و بالاشارة كاني ما حافهمو !!! دا كلو عشان ما عاملتو ك سيد اللبن و جا لقاني لااااابسة توبي، بعد شرح لي الحاصل مشيت قعدت في التلفزيون، سمعتو بعد شوية ضرب الجرس لي ماكس جارنا الفوقنا ، ماكس إنجليزي أبيض و عايشة معاو جكستو ، ماكس متعود ينوم النهار كلووو و يقوم يسكر بالليل و يغني في الجيتار!!!
الجماعة ضربو ليو الباب و شرحو ليو المشكلة و إنهم حيقطعو الموية من المبنى، انا بقيت قاعده قدام التلفزيون لمن نعست و نمت، بعد شوية صحيت بي إحساس ما مفهوم ، بعد صحصحت إكتشفت إني محتاجة أستعمل الحمام!!!!
عصرت علي روحي كدااااا، ما نفع ، قلت أعمل شنوووو ، أمشي لي جارتي السودانية؟! ما حينفع لانو بيتا داير دقيقة مشي و سلم طويل، قمت إتوكلت و شلت لي موية في كباية من براد الشاي لانو الموية قطعوها!!! و شلت معاي مناديل، ربك رب الخير؛ بيتنا أرضي و عندو حديقة عندها باب داخلي و واحد فاتح في الشارع، فتحت الباب الداخلي، البولندي قعد يعاين لي، قمت نططت ليو عيوني و ترااااخ قفلت الباب بي وراي، حاولت أقفل الباب من برا بالمفتاح للضمان عشان لو الشمار كتلو و قرر يباريني، من شدة الزنقه ما قفلتو ، بقيت واقفه و أعاين للحديقة، أمشي وين أمشي وين، لحسن الحظ الشجر قااااايم و ما هذبناو لينا فترة طويلة، لكن لو قعدت بين الشجر ماكس و بتو ممكن يشوفوني من شباك مطبخم ، و جيرانا الباكستان حديقتم كاشفه حديقتنا!!!
واقفه و أتلولو كدا، إتلفت لقيت الزقاق البيمرق للشارع و تحت شباك الحمام، بس طواااالي مشيت تحت الشباك و .... ، الحمدلله الذي عافانا.
بعد جيت داخله بالباب ، الإنجليزي سالني: هل أنتي بخير ؟!
إتخيل لي شررررررر دي بتكون طقشت أضانو.
رديت ليو : أححح يسسس!!!
أنا إتِدردرتّ يما.
حسع لو كنت في البلد كان مشيت أقرب باب، دقيتو
تتذكري لمن كنا راجعين من سنجة بالبص السياحي؟! وانا كنت مزنوقه نفس الزنقه السودا دي ، ربك رب الخير .النار ولعت في البص و قالو الناس تنزل منو، يما إنتي لفحتي نضارتك و جريدتك و جريتي!!! انا قعدت لي زي نص دقيقة على أمل تنقذني الطبيبة و كدا، ولاااا هببتي لي، يما جريتي خليتني، والله صحي الروح دي حلوتن!!
إتخطيت صدمتي في حكاية التضحية و فلم ( من أجل أبنائي) و الوهمات ديك سريع لانو الزنقة كانت شديدة، لمن نزلت و شفتيني إتهجمتي و قربتي تشرقي، لمن سالتك ليه ما جريتيني ، و أنقذتي جريدتك؟!
قلتي لي : يا آمنة يا بتي، إنتي عندك رجليني، لكين جريدتي ما عندها!!!
المهم في هذه القصة إنو لمن الباص وقف و بقو يحاولو يصلحو انا مشيت مساااافة بعيد من الانظار و إتدسيت بي ورا الشجر و....
و الحمدلله الذي عافانا.
يعني متعوده دايماً علي الخلا دا.
إتخيل لي إتدربت برضو في الدويم، في بيت عمتي لمن كنا صغار انا و بنات عمتي، كان عندنا زقاق إسمو زقاق البول، الحمدلله بنات عمتي ما بيقرو النت .
المهم
الزقاق دا ضييييق و فيو حيطة مشتركة مع جيرانا، بنربط في الزقاق دا خروف العيد، يعني ممكن تلقى فيو كل أنواع المخلفات البشرية و الحيوانية، كنا بنعمل فيو مسابقة أطول بولة، مرة عملنا مسابقة ، انا عملت فيها حنكوشة و أصريت أبول في حته ما فيها بول ، المحل الوحيد الكان جديد ، تحت الشباك حق أوضة البنات ، بعدها إتشاكلنا في النتيجة، مشينا الحوش و الشكلة كبرت:
انا بولتي أطووووول ، لاااااا انا بولتي قطعت مسافة أكبررررر!!!
عمي قاعد في الشارع مع الرجال قام سمع الشكلة، جانا طاير بالعكاز، انا دي طبقت سفنجتي تحت إباطي و إسكيرتي في خشمي و جرررري علي أوضة البنات و تلبت بالشباك، مباشرة لي البول، وفهمت متاخر ليه ما كانو بيبولو في الفجة ديك.
يما الحمدلله البقيت بت الريف و ما ولدتوني في بحري ولا أزقة أم درمان العريقة.
عموماً البول في الخلا و تحت الحيط دا كان الله قاسمو ليك ، كان في أوروبا بيبقى عليك !!!
يتبع >>>>
ماريل
19-09-2012, 01:19 PM
الرسالة الإتناشر : عندما تجعل من نفسك أضحوكة.. أمام نفسك(البول تحت الحيط).
العنوان : بين بيتنا العامر و الخلا
التاريخ : أمس القريبة دي
بعد السلام عليكم ، بلاهي كيف أنتم في المدة التي لم تروني فيها ؟!!
إذا دار مِحور سؤالكم عني، ف أنا أحْمِد سيدي و ما زلتُ في هذه البلدُ الباردِ أهلها.
يما انا جادة، ما تقري الرسالة دي بالذات، لو سمحتي.
أمس إتذكرت عبارة (الأب) الشهيرة : إنتو ما تستااااااهلو، المفروض تعيشو في الخلا!!!
وضحكات أخواني الشريرة و غضبات أبي على أثر عملاتنا الشريرة ، التي عادة ما تنتهي بعبارته أعلاه.
أمس حسيت بي إمتنان عظيم لهذا الخلا، و تقدير للتجارب المريت بيها في الريف.
من صباح الرحمن جوني ناس التصليحات، بعد ما خلفو مواعيدم لمدة إسبوع، يما الخواجات ديل طلعو ما عندهم مواعيد برضو، سااااي شايلين حس السودانيين .
المهم
الجماعة جو يشتغلو في الحمام وانا حارساهم، واحد إنجليزي ابيض والتاني بولندي ، واحد فيهم بيقلع المقعد بتاع الحمام و التاني بيصلح الارضية الخشب، اول حاجة زهجتني ، الراجل بتاع الأرضية بيتكلم معاي بالانجليزي و بالاشارة كاني ما حافهمو !!! دا كلو عشان ما عاملتو ك سيد اللبن و جا لقاني لااااابسة توبي، بعد شرح لي الحاصل مشيت قعدت في التلفزيون، سمعتو بعد شوية ضرب الجرس لي ماكس جارنا الفوقنا ، ماكس إنجليزي أبيض و عايشة معاو جكستو ، ماكس متعود ينوم النهار كلووو و يقوم يسكر بالليل و يغني في الجيتار!!!
الجماعة ضربو ليو الباب و شرحو ليو المشكلة و إنهم حيقطعو الموية من المبنى، انا بقيت قاعده قدام التلفزيون لمن نعست و نمت، بعد شوية صحيت بي إحساس ما مفهوم ، بعد صحصحت إكتشفت إني محتاجة أستعمل الحمام!!!!
عصرت علي روحي كدااااا، ما نفع ، قلت أعمل شنوووو ، أمشي لي جارتي السودانية؟! ما حينفع لانو بيتا داير دقيقة مشي و سلم طويل، قمت إتوكلت و شلت لي موية في كباية من براد الشاي لانو الموية قطعوها!!! و شلت معاي مناديل، ربك رب الخير؛ بيتنا أرضي و عندو حديقة عندها باب داخلي و واحد فاتح في الشارع، فتحت الباب الداخلي، البولندي قعد يعاين لي، قمت نططت ليو عيوني و ترااااخ قفلت الباب بي وراي، حاولت أقفل الباب من برا بالمفتاح للضمان عشان لو الشمار كتلو و قرر يباريني، من شدة الزنقه ما قفلتو ، بقيت واقفه و أعاين للحديقة، أمشي وين أمشي وين، لحسن الحظ الشجر قااااايم و ما هذبناو لينا فترة طويلة، لكن لو قعدت بين الشجر ماكس و بتو ممكن يشوفوني من شباك مطبخم ، و جيرانا الباكستان حديقتم كاشفه حديقتنا!!!
واقفه و أتلولو كدا، إتلفت لقيت الزقاق البيمرق للشارع و تحت شباك الحمام، بس طواااالي مشيت تحت الشباك و .... ، الحمدلله الذي عافانا.
بعد جيت داخله بالباب ، الإنجليزي سالني: هل أنتي بخير ؟!
إتخيل لي شررررررر دي بتكون طقشت أضانو.
رديت ليو : أححح يسسس!!!
أنا إتِدردرتّ يما.
حسع لو كنت في البلد كان مشيت أقرب باب، دقيتو
تتذكري لمن كنا راجعين من سنجة بالبص السياحي؟! وانا كنت مزنوقه نفس الزنقه السودا دي ، ربك رب الخير .النار ولعت في البص و قالو الناس تنزل منو، يما إنتي لفحتي نضارتك و جريدتك و جريتي!!! انا قعدت لي زي نص دقيقة على أمل تنقذني الطبيبة و كدا، ولاااا هببتي لي، يما جريتي خليتني، والله صحي الروح دي حلوتن!!
إتخطيت صدمتي في حكاية التضحية و فلم ( من أجل أبنائي) و الوهمات ديك سريع لانو الزنقة كانت شديدة، لمن نزلت و شفتيني إتهجمتي و قربتي تشرقي، لمن سالتك ليه ما جريتيني ، و أنقذتي جريدتك؟!
قلتي لي : يا آمنة يا بتي، إنتي عندك رجليني، لكين جريدتي ما عندها!!!
المهم في هذه القصة إنو لمن الباص وقف و بقو يحاولو يصلحو انا مشيت مساااافة بعيد من الانظار و إتدسيت بي ورا الشجر و....
و الحمدلله الذي عافانا.
يعني متعوده دايماً علي الخلا دا.
إتخيل لي إتدربت برضو في الدويم، في بيت عمتي لمن كنا صغار انا و بنات عمتي، كان عندنا زقاق إسمو زقاق البول، الحمدلله بنات عمتي ما بيقرو النت .
المهم
الزقاق دا ضييييق و فيو حيطة مشتركة مع جيرانا، بنربط في الزقاق دا خروف العيد، يعني ممكن تلقى فيو كل أنواع المخلفات البشرية و الحيوانية، كنا بنعمل فيو مسابقة أطول بولة، مرة عملنا مسابقة ، انا عملت فيها حنكوشة و أصريت أبول في حته ما فيها بول ، المحل الوحيد الكان جديد ، تحت الشباك حق أوضة البنات ، بعدها إتشاكلنا في النتيجة، مشينا الحوش و الشكلة كبرت:
انا بولتي أطووووول ، لاااااا انا بولتي قطعت مسافة أكبررررر!!!
عمي قاعد في الشارع مع الرجال قام سمع الشكلة، جانا طاير بالعكاز، انا دي طبقت سفنجتي تحت إباطي و إسكيرتي في خشمي و جرررري علي أوضة البنات و تلبت بالشباك، مباشرة لي البول، وفهمت متاخر ليه ما كانو بيبولو في الفجة ديك.
يما الحمدلله البقيت بت الريف و ما ولدتوني في بحري ولا أزقة أم درمان العريقة.
عموماً البول في الخلا و تحت الحيط دا كان الله قاسمو ليك ، كان في أوروبا بيبقى عليك !!!
يتبع >>>>
انتى صديقة ما واضحة كلو كلو ياخى
امس انا نهارى كلو معاكى فى التلفون
وكع كع بتاعت صيانة الحمام دى كلها
فوق صنقورى ده من جووووووووووووووووووه
حكيتى لى كلام كتير لكن نهائيا ما جبتى لى
سيرة العملا المهببة العملتيها دى:D:D:D
غايتو يا آمنة انا لو صاحبتك مية سنة ما بكتب زى
كلامك (المعفن ده)يخس عليكى:D:D:D
بله محمد الفاضل
19-09-2012, 01:30 PM
نسعل الله السلامة
يا اخي ينعل شياطينك واحد واحد
يا بت
دا شنو دا
غايتو جنك كلكي
الحمد لله الذي عافانا
ههههههههههههههههههههههههههههههههههه
يا بت انتي مبالغه في الكتابه
واظن وبعض الطن اثم
الكتابة بالدارجي تحتاج لموهبة كبيرة
وانتي كذلك
حجة امنة
19-09-2012, 02:16 PM
يخسي عليكم
يعني تاني الواحد كان زنقتو قصة عن هموم الغربة وبلد المهجر
يكطعا في حنانو gap
معليييش
الله في
يخسي عليكم
يعني تاني الواحد كان زنقتو قصة عن هموم الغربة وبلد المهجر
يكطعا في حنانو gap
معليييش
الله في
عفنه عدييييييل كدا:D
البديري
19-09-2012, 02:28 PM
والله ياحجة آمنة ..نزعتى ضحكة مُش بسمة من وسط ملل وتكشير العمل!
الله يفرحك ويبسطك دائما يارب ...
وزى ماقال الحبيب زول خرافى الكتابة بالدارجى تحتاج لموهبة ..
الكتابة بالدارجى تمنع الملل والروتين الادبى فى سرد القصص، ودا البميزك ، سبحان الله كتبتى سطور كتيرة جدا ولكن يسهل قرأتها فى اقل من ٣ تلاتة دقائق ... غايتو ياحجة آمنة:D:D خليتينى زى الحمار فى وادى مليان بالاعشاب! ..لا الحمار بشبع! ولا الاعشاب بتكمل!
وانا كذالك عندما اتوسط احرفك ...تسلمى كتير وماتهملى موهبتك،لانك مُتميزة وهذا يكفى.
غايتو مبدائياً كدة انتى كاتبتى المفضلة حتى 2013 !looool
مع اجمل المُنى:)
حجوجتنا السمحة
سلام عليك وعلي دفئك
وانتي الاولي في الحميمية والتلقائية
واي حاجة سمحة
معليش انا جيت هنا الطيش
العند حجوج اكيد بعيش:cool:
النور يوسف محمد
19-09-2012, 02:40 PM
بسم الله الرحمن الرحيم
كتابة تطول العمر ..
وتعلمك ..
كيف تكون سهلاً تحت كل سماء ..
يا سلام عليك ..............يا سلام
بدر الطائف
19-09-2012, 02:41 PM
الرسالة الإتناشر : عندما تجعل من نفسك أضحوكة.. أمام نفسك(البول تحت الحيط).
_________________________________
كفايه يا ناس الإنقاذ تبولو فوق رأسنا دا و تقولو دي المطرة ، كفايه
تحس بانه فى تناسق واتساق مابين الرساله والتوقيع.
نصيحتى للحاجه ام حجه الرساله دى جليها:D.
ناصر يوسف
19-09-2012, 03:02 PM
يا حجه آمنه ،،،
ياخ أقول ليك شنو بس ؟؟
تاني كمان أقوم أشكرك ؟؟
ياخ أكتبي وبـــــــــس والله يلعني إن ما بقراك في كل يوم
أقول ليك حاجه ومن وراء ضهرك كمان ومن غير أي إذن ولا يحزنون
كل حروفك الهنا دي أنا فاتح لي ملف في الويرد ،،، ( Copy & pest) وأجي بالليل أقرأ علي كيف كيف حناني ذاتو ياخ
مش علي كيفي
وتيييييييب ما تجي وتكبي ياخ الله ؟؟ !!! ;) ;) ;)
وينك يا بدر الدين
عشان تجي تشوف البوست الصنانة دا
مهتدى حامد محمد قسم السيد
19-09-2012, 06:15 PM
لمن كنت في الثانوي في مدرسة الراهبات في مرة جيت تالتة الطيش ,
الحقيقة إنو تانية الطيش كانت من غير الناطقين بها
و الطيش كانت عيانة
.....................
ضحكتَ من جووووه قلبي يا حجة آمنة..
يضحك نهارك و كل حياتك
التحية ليك و للدكتورة بخيتة
والله شى عجيب
لايك
طارق صديق كانديك
19-09-2012, 06:18 PM
يا سلام عليك يا حجة آمنة
ليس هناك تصالح مع النفس أفضل مما قراته هنا.
أنا بحييك والله.
----
قلت لي تلبتي من الشباك على شر أعمالك مباشرة:)
قيس شحاتة
19-09-2012, 06:44 PM
وينك يا بدر الدين
عشان تجي تشوف البوست الصنانة دا
بدر الدين بتاع فنيلتك؟
المشكلة التي حكت عنها اللخت، تعتبر إحدى أخطر المشكلات التي تواجه السودانيين في بلاد المهجر:D
حاول أقلب الصفحة واقرا ما يستفاد من الدرس يا ابو الوجود يا ود الحنودgap
طيبان
19-09-2012, 06:47 PM
معجب جدا بالطريقة المميّزة في الحكي وبالروح الحرّة والتفاصيل المدهشة في هذا البوست والأهم القفز فوق توقعات القارئ بألف فرسخ ،
يا حاجة آمنة ياخي انت البرنجي والله ، الله يبهجك كما أبهجتينا ، تحياتي لك وللوالدة التي أرجو أن تجد بخير في هذه المدّة التي لم تراك فيها .
__
دا شنو البوست السمح شديد دا . :)
شكرا ياحجة امنة بوستك مبالغة انت بتخلي الذول منتعش وبقيت اتذكر ايام الدراسة :) وكلامك ذي طريقة كلام امي الله يرحمها ربنا يخليك:cool:
ناصر يوسف
20-09-2012, 09:42 AM
يا بت ،،، ;) ;) إنتي لسه ما دايرة تجي ؟؟
تجي ولا نجي ولا نشرب برنجي ( البرنجي دي ختفتها من طيبان )
حجه آمنه عليكي الله تجي ياخ
سمِح ؟؟
عكــود
20-09-2012, 12:00 PM
سلام يا حجة آمنة،
متعة قراءة رسائلك إلى أمّك، ستّفت مواعين الإنبساط عندي لامِن دفّقت.
كتبت قبل كده تعليق عليها:
كتابة متل طلّيع السريحة من الضفر . .
ليها قردنة.
ولكنه ضاع عند نقل المنتدى؛
الله يستر هسّع.
ليك السلام والتحية وللوالدة.
حجة امنة
20-09-2012, 06:17 PM
انتى صديقة ما واضحة كلو كلو ياخى
امس انا نهارى كلو معاكى فى التلفون
وكع كع بتاعت صيانة الحمام دى كلها
فوق صنقورى ده من جووووووووووووووووووه
حكيتى لى كلام كتير لكن نهائيا ما جبتى لى
سيرة العملا المهببة العملتيها دى:D:D:D
غايتو يا آمنة انا لو صاحبتك مية سنة ما بكتب زى
كلامك (المعفن ده)يخس عليكى:D:D:D
واللهي صحي يخسي علي :D
انا ماعارفة لو ما كانت رسايل للام كان حصل شنو gap
بالمناسبة إنتي ال صحبوميتر بتاعك ما شغال
ياأخي انا أتململ أتململ و إنتي ولاااا
ياأخي قربت أمسك المكرفون أقول ليك
زي العروس الفي النكته القديمة ديك:
(عن إذنكم يا الجمهور بندور نبول)
حجة امنة
20-09-2012, 06:20 PM
نسعل الله السلامة
يا اخي ينعل شياطينك واحد واحد
يا بت
دا شنو دا
غايتو جنك كلكي
الحمد لله الذي عافانا
ههههههههههههههههههههههههههههههههههه
يا بله أنا إنتهيت إسفيرياً كسيدة مجتمع راقية
انا إنتهيت يا أخوانا gap
الحمدولله ما كنت طارحة نفسي كاكاتبة و شاعرة ختيرة gap
الحمدولله الذي عافانا
حجة امنة
20-09-2012, 06:23 PM
يا بت انتي مبالغه في الكتابه
واظن وبعض الطن اثم
الكتابة بالدارجي تحتاج لموهبة كبيرة
وانتي كذلك
ضربة حظ يا إبرا
غايتو الرسايل ديل الله يدينا خيرهن gap
ربنا يجبر خاطرك بحق جاه النبي.
حجة امنة
20-09-2012, 06:33 PM
والله ياحجة آمنة ..نزعتى ضحكة مُش بسمة من وسط ملل وتكشير العمل!
الله يفرحك ويبسطك دائما يارب ...
وزى ماقال الحبيب زول خرافى الكتابة بالدارجى تحتاج لموهبة ..
الكتابة بالدارجى تمنع الملل والروتين الادبى فى سرد القصص، ودا البميزك ، سبحان الله كتبتى سطور كتيرة جدا ولكن يسهل قرأتها فى اقل من 3 تلاتة دقائق ... غايتو ياحجة آمنة:D:D خليتينى زى الحمار فى وادى مليان بالاعشاب! ..لا الحمار بشبع! ولا الاعشاب بتكمل!
وانا كذالك عندما اتوسط احرفك ...تسلمى كتير وماتهملى موهبتك،لانك مُتميزة وهذا يكفى.
غايتو مبدائياً كدة انتى كاتبتى المفضلة حتى 2013 !looool
مع اجمل المُنى:)
والله دا شرف لي
انا من أمس أزازي بي جاي و ما عارفة أرد أقول شنو :)
مفكره جااااده أربط كفاحي مع البنات المهذبات الردادات (من رد)
و عنهن سماح gap
حجة امنة
20-09-2012, 06:38 PM
حجوجتنا السمحة
سلام عليك وعلي دفئك
وانتي الاولي في الحميمية والتلقائية
واي حاجة سمحة
معليش انا جيت هنا الطيش
العند حجوج اكيد بعيش:cool:
مرات الطيش بيكون الاول gap
يا ستي إنتي علي قول أستاذ أزهري محمد علي :
كيفك تفوت علي كيفك تعال
http://www.youtube.com/watch?v=l8k8fqjBd_o&feature=youtube_gdata_player
حجة امنة
20-09-2012, 06:50 PM
بسم الله الرحمن الرحيم
كتابة تطول العمر ..
وتعلمك ..
كيف تكون سهلاً تحت كل سماء ..
يا سلام عليك ..............يا سلام
يا أستاذ النور
ما تتخيل انا متهيبه الرد عليك كيف :)
أخاف ما أقدر أعبر عن فرحتي بي دف تشجيعكم لي
بعد إذنك حا أتنازل عن توقيعي لانك بديت رسالتك بي إسم الله
كالعادة :o
حجة امنة
20-09-2012, 06:55 PM
تحس بانه فى تناسق واتساق مابين الرساله والتوقيع.
نصيحتى للحاجه ام حجه الرساله دى جليها:D.
التوقيع دا غير البلاوي ما جاب لي شي gap
يااخوي الحجة ما حتشوف الرسايل دي
أختك مفتحة
أمي بتقرا الراكوبة و سودانيز اون لاين بسسسس gap
مرات قلبي يقول لي أنزلهن في أون لاين؛ لانو الحكومة حاظراهو في السودان.
تاني أقول بررري كان فكو أسوي شنو؟!:rolleyes:
"الإنقاذ" دي مااااامضمونة gap
حجة امنة
20-09-2012, 07:00 PM
يا حجه آمنه ،،،
ياخ أقول ليك شنو بس ؟؟
تاني كمان أقوم أشكرك ؟؟
ياخ أكتبي وبـــــــــس والله يلعني إن ما بقراك في كل يوم
أقول ليك حاجه ومن وراء ضهرك كمان ومن غير أي إذن ولا يحزنون
كل حروفك الهنا دي أنا فاتح لي ملف في الويرد ،،، ( Copy & pest) وأجي بالليل أقرأ علي كيف كيف حناني ذاتو ياخ
مش علي كيفي
وتيييييييب ما تجي وتكبي ياخ الله ؟؟ !!! ;) ;) ;)
ناصر ما تكورك ياخ gap
فلاحتك فيني، حي انا؟!
كلمتك مليون مرة يا ناصر
انا طالما بعيده من بلدي و أهلي، بكتب الرسايل ديل:o
إلا أموت
و يا قول حماضة(زوجي) :
إنتي يا آمنة مااااابتموتي حسع؛ الله دايرك حيةgap
حجة امنة
20-09-2012, 07:03 PM
وينك يا بدر الدين
عشان تجي تشوف البوست الصنانة دا
بدر الدين منو؟!
يا زول علي العموم و للضمان، كان جا مرحب بيو و كمان كان قنص لي في فجة تانية يكون أحسن و أبرك :)
همس الشوق
20-09-2012, 07:19 PM
الرسالة الإتناشر : عندما تجعل من نفسك أضحوكة.. أمام نفسك(البول تحت الحيط).
العنوان : بين بيتنا العامر و الخلا
التاريخ : أمس القريبة دي
بعد السلام عليكم ، بلاهي كيف أنتم في المدة التي لم تروني فيها ؟!!
إذا دار مِحور سؤالكم عني، ف أنا أحْمِد سيدي و ما زلتُ في هذه البلدُ الباردِ أهلها.
يما انا جادة، ما تقري الرسالة دي بالذات، لو سمحتي.
أمس إتذكرت عبارة (الأب) الشهيرة : إنتو ما تستااااااهلو، المفروض تعيشو في الخلا!!!
وضحكات أخواني الشريرة و غضبات أبي على أثر عملاتنا الشريرة ، التي عادة ما تنتهي بعبارته أعلاه.
أمس حسيت بي إمتنان عظيم لهذا الخلا، و تقدير للتجارب المريت بيها في الريف.
من صباح الرحمن جوني ناس التصليحات، بعد ما خلفو مواعيدم لمدة إسبوع، يما الخواجات ديل طلعو ما عندهم مواعيد برضو، سااااي شايلين حس السودانيين .
المهم
الجماعة جو يشتغلو في الحمام وانا حارساهم، واحد إنجليزي ابيض والتاني بولندي ، واحد فيهم بيقلع المقعد بتاع الحمام و التاني بيصلح الارضية الخشب، اول حاجة زهجتني ، الراجل بتاع الأرضية بيتكلم معاي بالانجليزي و بالاشارة كاني ما حافهمو !!! دا كلو عشان ما عاملتو ك سيد اللبن و جا لقاني لااااابسة توبي، بعد شرح لي الحاصل مشيت قعدت في التلفزيون، سمعتو بعد شوية ضرب الجرس لي ماكس جارنا الفوقنا ، ماكس إنجليزي أبيض و عايشة معاو جكستو ، ماكس متعود ينوم النهار كلووو و يقوم يسكر بالليل و يغني في الجيتار!!!
الجماعة ضربو ليو الباب و شرحو ليو المشكلة و إنهم حيقطعو الموية من المبنى، انا بقيت قاعده قدام التلفزيون لمن نعست و نمت، بعد شوية صحيت بي إحساس ما مفهوم ، بعد صحصحت إكتشفت إني محتاجة أستعمل الحمام!!!!
عصرت علي روحي كدااااا، ما نفع ، قلت أعمل شنوووو ، أمشي لي جارتي السودانية؟! ما حينفع لانو بيتا داير دقيقة مشي و سلم طويل، قمت إتوكلت و شلت لي موية في كباية من براد الشاي لانو الموية قطعوها!!! و شلت معاي مناديل، ربك رب الخير؛ بيتنا أرضي و عندو حديقة عندها باب داخلي و واحد فاتح في الشارع، فتحت الباب الداخلي، البولندي قعد يعاين لي، قمت نططت ليو عيوني و ترااااخ قفلت الباب بي وراي، حاولت أقفل الباب من برا بالمفتاح للضمان عشان لو الشمار كتلو و قرر يباريني، من شدة الزنقه ما قفلتو ، بقيت واقفه و أعاين للحديقة، أمشي وين أمشي وين، لحسن الحظ الشجر قااااايم و ما هذبناو لينا فترة طويلة، لكن لو قعدت بين الشجر ماكس و بتو ممكن يشوفوني من شباك مطبخم ، و جيرانا الباكستان حديقتم كاشفه حديقتنا!!!
واقفه و أتلولو كدا، إتلفت لقيت الزقاق البيمرق للشارع و تحت شباك الحمام، بس طواااالي مشيت تحت الشباك و .... ، الحمدلله الذي عافانا.
بعد جيت داخله بالباب ، الإنجليزي سالني: هل أنتي بخير ؟!
إتخيل لي شررررررر دي بتكون طقشت أضانو.
رديت ليو : أححح يسسس!!!
أنا إتِدردرتّ يما.
حسع لو كنت في البلد كان مشيت أقرب باب، دقيتو
تتذكري لمن كنا راجعين من سنجة بالبص السياحي؟! وانا كنت مزنوقه نفس الزنقه السودا دي ، ربك رب الخير .النار ولعت في البص و قالو الناس تنزل منو، يما إنتي لفحتي نضارتك و جريدتك و جريتي!!! انا قعدت لي زي نص دقيقة على أمل تنقذني الطبيبة و كدا، ولاااا هببتي لي، يما جريتي خليتني، والله صحي الروح دي حلوتن!!
إتخطيت صدمتي في حكاية التضحية و فلم ( من أجل أبنائي) و الوهمات ديك سريع لانو الزنقة كانت شديدة، لمن نزلت و شفتيني إتهجمتي و قربتي تشرقي، لمن سالتك ليه ما جريتيني ، و أنقذتي جريدتك؟!
قلتي لي : يا آمنة يا بتي، إنتي عندك رجليني، لكين جريدتي ما عندها!!!
المهم في هذه القصة إنو لمن الباص وقف و بقو يحاولو يصلحو انا مشيت مساااافة بعيد من الانظار و إتدسيت بي ورا الشجر و....
و الحمدلله الذي عافانا.
يعني متعوده دايماً علي الخلا دا.
إتخيل لي إتدربت برضو في الدويم، في بيت عمتي لمن كنا صغار انا و بنات عمتي، كان عندنا زقاق إسمو زقاق البول، الحمدلله بنات عمتي ما بيقرو النت .
المهم
الزقاق دا ضييييق و فيو حيطة مشتركة مع جيرانا، بنربط في الزقاق دا خروف العيد، يعني ممكن تلقى فيو كل أنواع المخلفات البشرية و الحيوانية، كنا بنعمل فيو مسابقة أطول بولة، مرة عملنا مسابقة ، انا عملت فيها حنكوشة و أصريت أبول في حته ما فيها بول ، المحل الوحيد الكان جديد ، تحت الشباك حق أوضة البنات ، بعدها إتشاكلنا في النتيجة، مشينا الحوش و الشكلة كبرت:
انا بولتي أطووووول ، لاااااا انا بولتي قطعت مسافة أكبررررر!!!
عمي قاعد في الشارع مع الرجال قام سمع الشكلة، جانا طاير بالعكاز، انا دي طبقت سفنجتي تحت إباطي و إسكيرتي في خشمي و جرررري علي أوضة البنات و تلبت بالشباك، مباشرة لي البول، وفهمت متاخر ليه ما كانو بيبولو في الفجة ديك.
يما الحمدلله البقيت بت الريف و ما ولدتوني في بحري ولا أزقة أم درمان العريقة.
عموماً البول في الخلا و تحت الحيط دا كان الله قاسمو ليك ، كان في أوروبا بيبقى عليك !!!
يتبع >>>>
يخسسسسسسسسسسي عليكم ياخ
بوست تحفه زي دا وانا ما جايبة خبر
لكن يا صاحبتي ضربتي بريستجي خالص
دا شنو دا ياخ
حكيك طاااااعم وحلو والله
لكن امكن لو قرت الرسالة دي
اللييييييييييييله gap
حجة امنة
20-09-2012, 07:25 PM
والله شى عجيب
لايك
مهتدى حامد محمد قسم السيد
عضـــو
تاريخ التسجيل: Sep 2012
الدولة: السودان - أم درمان
المشاركات: 3
ياأخي لايك انا دي gap
شكراً يا مهتدي علي تشريفي بي دخولك بوستي الفقير إلى رحمة الله داgap
حجة امنة
20-09-2012, 07:29 PM
يا سلام عليك يا حجة آمنة
ليس هناك تصالح مع النفس أفضل مما قراته هنا.
أنا بحييك والله.
----
قلت لي تلبتي من الشباك على شر أعمالك مباشرة:)
وين يا طارق؛ انا شر أعمالي دا خلي ساي gap
القادم أشرر، إن الله مد في عمري
يا طارق يا أخي انا خلاص بقيت واقفه في فجة هناااااك، بعد شكراً المسيخة دي بي سنوات ضوئية عديل :)
حجة امنة
20-09-2012, 07:38 PM
بدر الدين بتاع فنيلتك؟
المشكلة التي حكت عنها اللخت، تعتبر إحدى أخطر المشكلات التي تواجه السودانيين في بلاد المهجر:D
حاول أقلب الصفحة واقرا ما يستفاد من الدرس يا ابو الوجود يا ود الحنودgap
اللخت دي ذكرتني قصة (الضب اللاصق في الحَله) القلتها ليكgap
حجة امنة
20-09-2012, 07:45 PM
معجب جدا بالطريقة المميّزة في الحكي وبالروح الحرّة والتفاصيل المدهشة في هذا البوست والأهم القفز فوق توقعات القارئ بألف فرسخ ،
يا حاجة آمنة ياخي انت البرنجي والله ، الله يبهجك كما أبهجتينا ، تحياتي لك وللوالدة التي أرجو أن تجد بخير في هذه المدّة التي لم تراك فيها .
__
دا شنو البوست السمح شديد دا . :)
أخجلتم تواضعنا(النون البالي بالك)gap
عارف يا طيبان
انا بعد دا ممكن أموت عااااديgap
النصيحة الإحساس دا جاني تلاته مرات
_ أول يوم إتكلمت مع عم محجوب شريف.
_يوم قعدت في منصة واحدة و قريت مع أ.أزهري محمد علي، حميد رحمة الله عليه، أ. عبدالقادر الكتيابي، منصة واااااااحدة ياخ
_ يوم عقدي، و أخواني شالوني بالكرسي gap
الترتيب للأحداث أعلاه غير زي دلالة:D
حجة امنة
20-09-2012, 07:49 PM
شكرا ياحجة امنة بوستك مبالغة انت بتخلي الذول منتعش وبقيت اتذكر ايام الدراسة :) وكلامك ذي طريقة كلام امي الله يرحمها ربنا يخليك:cool:
تسلمي يا ست البنات :)
شايفاك عملتي غمرانة و أبيتي توريني إسمك معناو شنوgap
لكين بلبد ليك في زقاق، حسع دا ما وكتو :D
ربنا يرحم والدتك و يخليك يا جميلة .
حجة امنة
20-09-2012, 07:54 PM
يا بت ،،، ;) ;) إنتي لسه ما دايرة تجي ؟؟
تجي ولا نجي ولا نشرب برنجي ( البرنجي دي ختفتها من طيبان )
حجه آمنه عليكي الله تجي ياخ
سمِح ؟؟
هييي
البرنجي ضار بالصحة
واخده بالك يا حجة ؟! gap
ناصر ياخ أمش سجر بعيد ما دايرين هوا:D
ذكرني أحكي ليك قصة كيس الصاعوط ال لقتو الحجة تحت المرتبةgap
الصاعوط إلى الهاوية؟!gap
مي هاشم
20-09-2012, 07:54 PM
:L
عشان ما (أتخلف) من المشاركة في البوست gap
تعلمين يا زوزانا كم أحب رسائلك..وليت لي مثلها..
حجة امنة
20-09-2012, 07:58 PM
سلام يا حجة آمنة،
متعة قراءة رسائلك إلى أمّك، ستّفت مواعين الإنبساط عندي لامِن دفّقت.
كتبت قبل كده تعليق عليها:
ولكنه ضاع عند نقل المنتدى؛
الله يستر هسّع.
ليك السلام والتحية وللوالدة.
لمن شفتك رديت لفحت لي سفنجة و توب صلاة gap
عشان أحصل، قبال ما أخوانا في الإشراف الفني يقررو يحدثو المنتدى gap
يا ريس أديك سر؟!
والله أكاد أجذم إني سأهزم الشتاء هذا العام :)
حجة امنة
20-09-2012, 08:15 PM
يخسسسسسسسسسسي عليكم ياخ
بوست تحفه زي دا وانا ما جايبة خبر
لكن يا صاحبتي ضربتي بريستجي خالص
دا شنو دا ياخ
حكيك طاااااعم وحلو والله
لكن امكن لو قرت الرسالة دي
اللييييييييييييله gap
لا النصيحة إتعافنو عليك gap
يا درفة قتا ليك الحجة حدها الراكوبة و س. اون لاااااينgap
ما قاعده تتضهب بي جاي
ما شايفاني ماخده راحتي كيف :D
عكــود
20-09-2012, 08:16 PM
والله أكاد أجذم إني سأهزم الشتاء هذا العام :)
أها، تعبير زي ده يختّو وين هسع؟
مع مواعين الإنبساط المستفة لامن مدفقة دي!
يا سلام ..
وتاني يا سلام.
ناصر يوسف
21-09-2012, 11:35 AM
ناصر ما تكورك ياخ gap
فلاحتك فيني، حي انا؟!
كلمتك مليون مرة يا ناصر
انا طالما بعيده من بلدي و أهلي، بكتب الرسايل ديل:o
إلا أموت
و يا قول حماضة(زوجي) :
إنتي يا آمنة مااااابتموتي حسع؛ الله دايرك حيةgap
ونحن برضو دايرنك حية ،،،
تسلمي يا بت العم ويسلم قلمك ياخ
عادل البراري
31-10-2012, 10:39 AM
يا حاجه
كيف حالك في هذه المدة
التي لم نراكم فيها
يبدو الصقيع قاسي وعنيد
حجة امنة
08-11-2012, 10:07 AM
:L
عشان ما (أتخلف) من المشاركة في البوست gap
تعلمين يا زوزانا كم أحب رسائلك..وليت لي مثلها..
أعلم و الله أعلمgap
تعلمين كم أتوق لرسائلك :)
يا سلااااااااااااااااااااااام اسلوبك رائع وبيشد الواحد وبيخليك غصباً عنك تضحك :D:D:D
يسعد ايامك زي ما اسعدتيني الليلة .. وفي انتظار حكاية كيس الصاعوووووووووط looool ..
لــك ودي :cool:
ناصر يوسف
26-11-2012, 10:31 AM
رسالتي لحجة آمنة
يا زولة كدي دفي الجو ياخ من صقيع البرديبة الجاتنا هني دي ياخ
والنعمنو كدي صقيع بلدنا ولا جليد لندن ظاتو ياخ
الشئ شنو ،، بياتك الشتوي ده دحين ما كفاكي منو يا بت العم ؟؟
أمرقي وأطلعي تعالي لا عند هني ده ياخ
في شان نتراوح ما بين الراح ونرتاح
تعالي يا بت العم أكتبي وبس
شفتي كيف لما نكورك ليكم وما تجونا ياخ
آآآآآآآآآخ :rolleyes:
حجة امنة
11-12-2012, 11:27 PM
خاص و حصري للأخ ناصر يوسف
(العنصرية بفهم)
حجة امنة
11-12-2012, 11:28 PM
الرسالة التلتاشر: اللحظة التي أفلس فيها الاب (العنصرية بي فهم).
العنوان : هنا و هناك
التاريخ : زمن ماشي و زمن جايي و زمن لسع
بعد السلام عليكم ، بلاهي كيف أنتم في المدة التي لم تروني فيها ؟!!
إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها.
يا الحاجة الكلمك عن الرسايل دي، ماعافية ليو دنيا لا أخره حتى لو كان عمو قوقل رضي الله عنه زي ما إدعيتي في أخر مرة إتكلمنا: كنت بفتش في بحوث الأنيميا المنجلية في قوقل قام جاني رابط الموضوع ضمن النتايج!!
لا خلاس، صدقتك
كالعادة مارستي هوايتك في الإستجواب و الإستدراج و انا الهبلة خليتك تستعبطيني و بعد تميتي كلامك طلبتي ما أجيب سيرتك في قصصي المهببة دي، إتفاجئت بيك تقولي: هيييي انا لا أمك ولا بعرفك!!
نكرتيني يا حاجة؟! بعد العمر دا، للاسف فات الأوان، غايتو للضمان كدا تاني ما بجيب سيرتك لكن حاأحول الرسايل ل (رسائل إلى أبي أرجو أن لا تقراها أمي)
المهم
اليوما داك إتذكرت لم تدور نقاشات بخصوص نسب جدودنا للرسول صلى الله عليه وسلم!!
و إصرار كل واحد فيكم على إنو الأقرب نسباً للرسول، كعادة قبايل كتير في السودان، وحكمة الله بتلقى أسر كتيره عندهم ورقة تشبه ورق البردي فيها شجرة العائلة و النسب بي قدرة قادر بيصل للرسول! حسب إدعائك نسبكم بيصل للعباس رضي الله عنه، الاب بيدعي إنو نسبو بيصل لسيدنا علي إبن أبي طالب شخصياً!
في مرة إحتدم النقاش إلى أن أفلس الاب و وصل الحد: ياخ إحنا جدنا أبو لهب زاتو، عجبكم عجبكم ما عجبكم .....
مرة في زواج واحد من أولاد عمنا و الناس مشو يتقدمو، إتقدم زوج عمتي الكبيرة و كبير الأسرة في الوكت داك، جدي خوجلي رحمة الله عليه بدا كلامو بي الفرمالة بتاعة كل مرة: نحن أشراف و جدنا النبي!!
قام واحد من أولاد عمنا الشباب إتشالق: يا جدي الأفضل نتفاخر بالعمل الطيب ما النسب.
جدي خوجلي: هيييي يا ولد نحنا بي عملنا واصلين و بي نسبنا واصلين!!
أنا غايتو رايي كان واضح في المسالة دي، ربنا سبحانه و تعالى كان عندو حكمة في موت أبناء الرسول الذكور و أحفادو، عشان جنس الحكحكة حقة السودانيين دي!!
أتذكر لمن كنت ممتحنة الثانوي كان عندي صحبتي في درس العصر، البت دي سبحان الخالق المعبود؛ طووويلة و لونا (شي كولا تي) و عيونا كبيرررررة لونا عسلي حنين كدا وتفاصيل مافي داعي ليها؛ بس الحاجة البتحير في ملامح البت دي إنو ملامحا النوع خاتف لونين؛ يعني مابتقدر تحدد إنها عربية ولا أفريقية؛ أيووا إتذكرت حاجة؛ كانت أنيقة بشكل عجيب؛ عندها لبسه كدا قماشا خيش عجيبة، وكان خطها جميل؛ بتكتب الكلمات مايله في السطر، المهم؛ يوم كدا في أثناء ونسة سالتها سؤال ندمانة عليو لي حسع؛ قلت ليها: إتي يا سلمى قبيلتكم شنو ؟
مع إني الزمن داك مابفرز ليك كلام قبلية و عنصرية و الكلام دا، قالت إنو أمها جعلية و أبوها من بلد في شرق أفريقيا، قمت أنا بي غباء كدا قلت ليها: ياخي معناتو أبوك دا زول كويس خلاس!! لانو السودانين مابيدو بناتم بالساهل !!
لاحولاأاا ماتتخيلو إحراجي بعد داك؛ و التعبني زياده إنها ردت علي بي إبتسامة وسيمة و قالت لي : أيوه أيوة أبوي كان كويس.
من اليوما داك كجنت سؤال قبيلتك شنو دا، لمن كنت شغاله في المركز السوداني الألماني لتاكيد الجودة كان معانا في نفس المبني شركة صاحبها أخو مديرتي، كنت بنزل أستخدم مكنة التصوير بلقى الموظفين شغالين ليك: انا جعلي و انت شايقي و دناقلة دناقلة يا رسول الله!!
وكلهههههم بيقولو جدهم النبي، مرة نزلت أصور ورق و كنت مستعجله و زهجانة، لقيتم كالعادة شغالين في قصة القبايل دي ويضححححكو و صف مكنة التصوير قطر بس، واحد فيهم إسمو إبراهيم سالني: إتي يا أستاذة آمنة قبيلتك شنو؟!
رديت ليو و وشي جاااادي: لا إحنا حلبة ساي ومركبين مكنة أشراف، ما تركزو معاي شديد.
إبراهيم دا من اللطف الناس المرو علي في الشغل، متصوف تبع الطريقة البرهانية، محب للشعر و الغناء، لمن أكون طالعة من محاضرة بنزل من المركز بلقى مكتبهم طوال بابو فاتح و صوت الشعر او الغنى شغال، بقوم أقيف بدون ما أسلم و أسمع و طوالي أقول ليهم إسم الشاعر أو الفنان و أسم القصيدة و الملحن و غنوها متين!! مرة جيت لقيتو مشغل مديح وقفت كدا و ركزت شديد،
قال لي: هاااا كان نططتي ما حتعرفي.
قلت ليو: (السر عوض) البرهاني، ساكن فرنسا، حسع نازل إجازة في بيتنا.
نطط عيونو و قرب يدي اللاب توب شلوت: يا آمنة كرهتينا الغنى و المديح زاتو!!!
انا كانت ضربة حظ لانو (السر عوض) متزوج (التاية) بت خالتي ربنا يطراهم كلهم بالخير.
هنا في بلد (الكباب )حلال دي، لاقيت صنوف من أنواع العنصرية، للاسف إكتشفت إني انا زااااتي عندي العنصرية اللاإرادية تجاه الأخرين، أولاً النظره الفوقية للحبش إنهم نص نسوانهم ما كويسات و عادي عندهم التهتك و الإنحلال، بعد جيت هنا حتى عرفت إنو في أثيوبيين و إرتريين، و هم عموماً ناس لطيفين و خدومين و في حالهم بس ظروف بلدهم و الحروب هي الجبرتهم يطلعو و يلجئو للسودان و باقي الدول و يشتغلو في البيوت مع إنو الشغل ماعيب، طبعاً حكاية إنو الشغل ما عيب دي جاياكم ليها.
تانياً الصومالين، يلا ديل ما كان عندي عنهم فكرة غير إنهم جيعانين و الحرب طلعت زيتم، عندنا صديقة هنا من ناس كردفان لذيذة خلاص مرة النسوان بيحكن عن معاناتم مع البلد و اللغة في اول أيام ليهم قالت اول شهر ليها لمن جات بيرطانيا كانت ما بتعرف ولا كلمة بالإنجليزي و بردانة و خايفة قامت مرة إتشجعت و طلعت الشارع براها و كانت لابسه عباية زي حقة الصوماليات قامت قاطعه الشارع كدا طقشت ليها واحد أسود بيكون جمايكي قام قال ليها : تباً لك* .إيتها الصومالية اللعينة!!
* تباً لك و اللعينة دي زي ترجمة تلفزيون السودان للكلمات الماياها..
قالت ليو : تصم العقرب في فرق جع***!! **
و عملت ليو بي يدها كدا(جمعت كل الأصابع في قبضة و لوحت بها)
هي ما حرقا إنو قال ليها أيتها اللعينة لكن حرقا إنو شبها بي الصوماليات!!.
** جع*** كلمة عادية في نظري لانها جزء أساسي من جسم البني أدم لكن للضمان أحسن أكتبها كدا عشان معانا عوايل في الرسايل دي.
أها حسب ملاحظتي في الفترة الفاتت دي إنو العنصرية هنا بتجيك من الأجناس التانية ما من البريطانيين زاتم!! يعني البريطانيين البيض نادر ما يتعاملو مع الزول بي عنصرية، ما عشان هم ما عنصريين لكن لانو فهمم للعنصرية أبعد من لوني و لونك وشعري سبيبي و أصفر و شعرك قرقدي؛ العنصرية حقتم على السلوك البيمارسو المجموعات، يعني ضد إرهاب المسلمين و ميل السود للعنف و الخ...
غايتو و الخ... دي سمحة خلاس لمن الزول ما يلقى كلام يتم بيو جملة.
مرة كنت زهجااااانة قاعده في البيت قبل ما أشتغل في محل التياب بتاع الهندي، و الشغل ما عيب، نضفت البيت و طلعت الشارع أكب الزبالة في برميل الوسخ، كنت لابسه جلابية بيت و مالابسه طرحة، جات ماشه جنب سور البيت صومالية طوالي بادرت بالسلام: سلامو عليكم سيستر، رديت عليها باأحسن منها، شويتين كدا جات واحدة إنجليزية سوداء ماشه سرررريع و جارا ولدها من يدو و بتتكلم في الموبايل بي صوت عاااالي و بتنبز نبز عفن من النوع بتاع تباً لك أيها اللعين إبن اللعينة!!
قمت انا بعد إتاكدت إنها ما شايفاني قعدت أهز في راسي و إبتسمت إبتسامة حامضة كدا، في اللقطة دي جات إنجليزية بيضاء عجوز كدا، قامت نهرتني: ما تضحكي، شوفيها بتتكلم بي صوت عالي كيف؟!!
تاني إبتسمت و هزيت راسي: لالا بالغت و الله و الألفاظ العجيبة دي قدام طفلها!!!
إبتسمت: لو شفتي عندي جارتي سو..
كانت دايرة تقول سوداء و لمن كشفت لي لقتني أقرب للسواد
قلت ليها: قولي سوداء ما مشكلة و قعدت أضحك
أخدت نفس و دورت قطيعة: كان شفتي جارتي السوداء برضو حركاتا كدا لمن تقوم للمشاكل مع حبيبها إلا يفرتقوهم بالبوليس!!!
طبعاً الإنجليز البيض و بالذات الكبار في السن .القابلوني هنا ديل جنهم ونسة و قطيعة!!!
الحاجة العرفتها.في بريطانيا دي لو الواحدة سمراء او يبدو عليها إنو شعرها مجعد او خشن و قامت مشت صالون سيدات خاص بالبيض، طواااالي بيختوها ليها، بيكلموها بالواضح إنو دااااااك صالون الزنوج ، أمشي ليو ، يلا البيسمع الكلام دا بيتخيل إنها عنصرية، لكين لا ، الحقيقة إنو صالون البيض بيكون مجهز للتعامل مع الشعر الناعم فقط، من حيث أدوات و كريمات ، و كذلك صالون السود او الزنوج بيكون مابيستقبل أنواع الشعر البتميل للنعومة الشديدة.
انا من أول أيام سمعت كم قصة عن واحدات مشن صالون بيض او هنود و أحرجوهن، بعد جيت بي شهر لقيت جنبي صالون مكتوب فيو للمحجبات و السيدات فقط، هنا لو مشيت صالون زنوج ممكن الصالون يكون مشترك ، قمت دخلت و انا خايفة يحرجوني، لقيت الصالون بتاع عراقية و شغالة معاها أفقانستانية، الحمدلله عملو لي شعري ، مع إنها تعبت لانو شعري كتير و خشن، لكن ما إتساخفت علي، بعد كم يوم رجعت لقيت واحدة تانية بيضة لكين ما إنجليزية إشتغلت بدل الأفقانية، إتخيل لي عربية لانو إنجليزيها ركيك جداً، سالتهم عن علاج للشعر إسمو (الكيراتين) لمن سالتها كنت لابسه الحجاب، قامت ست المحل العراقية قالت لي أكشفي شعرك عشان توريك لو بينفع معاك، قبل ما اكشف شعري قالت لي ، نحن ما بنعمل للشعر الخشن!!!! قلت ليها دقيقة اوريك شعري، قالت لي : لاااا أستطيع أن أجذم أن شعرك مجعد!!!
انا برااااحة ضبيت ضنبي و مرقت.
لمن حكيت لي صحباتي إستغربو لاني عادة ما بسكت على الحاجات دي.
بعد كممممم شهر رجعت ليهم و انا قانصة ليها
قمت تاااااني سالتهم، و من ما قالت لي خشن و ما خشن،
قلت ليها و نفسي قااااايم: بالمناسبة
في بلدي السودان ممكن تلقي ناس أسود أسود أسود مني و شعرم زي الحرير
و ممكن تلقي ناس أبيض منك و شعرم زي السلك .
قعدت تعاين لي و فاتحه خشمها، انا طوالي رفعت راسي و طلعت
وبعد دا ما إتفشيت
يتبع إلى أن أحكي لك يا أبي حكاية إنو الشغل ما عيب.
يتبع>>>>
طارق صديق كانديك
12-12-2012, 07:28 AM
الحاجة العرفتها.في بريطانيا دي لو الواحدة سمراء او يبدو عليها إنو شعرها مجعد او خشن و قامت مشت صالون سيدات خاص بالبيض، طواااالي بيختوها ليها، بيكلموها بالواضح إنو دااااااك صالون الزنوج ، أمشي ليو ، يلا البيسمع الكلام دا بيتخيل إنها عنصرية، لكين لا ، الحقيقة إنو صالون البيض بيكون مجهز للتعامل مع الشعر الناعم فقط، من حيث أدوات و كريمات ، و كذلك صالون السود او الزنوج بيكون مابيستقبل أنواع الشعر البتميل للنعومة الشديدة.
يعني دي فرمالة تقنع ليها زول:)
تجهيز الصالون بما يخدم كل الشعر اللافي في الحلة بتاعتم دي صعب يعني.؟
دي عنصرية برضو وبدون فهم كمان
سعيد باستئنافك للرسائل.
حجة امنة
12-12-2012, 09:58 AM
يعني دي فرمالة تقنع ليها زول:)
تجهيز الصالون بما يخدم كل الشعر اللافي في الحلة بتاعتم دي صعب يعني.؟
دي عنصرية برضو وبدون فهم كمان
سعيد باستئنافك للرسائل.
طارق ختاها لي ياجدعااااانgap
تصدق كلامك صاح!!
محاولة تبرير أي سلوك بيصنف البني أدم حسب سحنتو دا زاتو عنصرية بغيضة
والله غايتو انا دي لسع دايره لي شغل كتير في مخي دا:)
البركة في الأجيال القادمةgap
العنصرية بي فهم دي قصدت بيها الإنجليز ال أمهم بتعم أبوهمgap
الواحد فيهم بيكون عندو فيك ميت راي لكن بيكتفي بي الإبتسامة الباردة البيمطو فيها شلاليفم ديك، الايام الفاتت دي الإنجليز بيلبسو وردة حمراء تخليداً لذكرى جدودهم الماتو في الحرب العالمية،محمد زوجي حكى لي إنو مرات بيقوم يلبس الوردة معاهم، زملائو في الشغل بيسالو: إنت جدودك يا محمد ماتو هنا في الحرب العالمية؟؟!؟! بيقول ليهم: أيييي و الكان بنو ليكم الأندر قراوند ديل جدود منو؟ موش جدودي الجبتوهم من أفريقيا؟!gap
مافي واحد فيهم بيقدر يضحك في كلامو دا كدا عدييييل قدامو
يلا تعال شوف، عندي صحبتي عايشه في الصين قالت هناك عندهم إعتقاد إنو الأفارقه ديل ناس وسخانين و ريحتم كعبة، لمن يركبو معاهم في الأسانسير بيقفلو نخرينم لمن زول أسود يركب!!!! أها هي كل يوم بتتاخر من الشغل لانها بتكون دورت شكلة في الأسانسيرgap
تورتا نفسي يا طارق أفندي، لو سمحتا تاني بي منطقك المنطقي دا ما تجيني تتقاطع بي جاي، عامل نضاراتك ديل، بِسgap
حجة امنة
12-12-2012, 10:03 AM
يا سلااااااااااااااااااااااام اسلوبك رائع وبيشد الواحد وبيخليك غصباً عنك تضحك :D:D:D
يسعد ايامك زي ما اسعدتيني الليلة .. وفي انتظار حكاية كيس الصاعوووووووووط looool ..
لــك ودي :cool:
تسلمي يا ست البنات
لكين قصة الصاعووووط دي إتجهجهت؛ الحاجة نقشت موضوع الرسايل يا بت أمي، عاد تاني قصص كتيرة بقطعا في حنانيgap
ماريل
12-12-2012, 10:05 AM
حجة أمنة ازيك
مرات بتحكى حكى جميل ومرات بتخيل لى لسانك زى المخشب كده(يكون السبب الجليد)
المهم عنصريتك البى فهم دى نوع الحكى البتحكيهو ولسانك مخشب:):)
حجة ما تفارقى الدفاية نوهائيا تانى لانك بتطلعى برة النص......
هذا مع شكرى:D
همس الشوق
12-12-2012, 10:46 AM
:Dالناس في شنو الحسانية ترسل في الرسايل
حجة امنة
12-12-2012, 10:52 AM
حجة أمنة ازيك
مرات بتحكى حكى جميل ومرات بتخيل لى لسانك زى المخشب كده(يكون السبب الجليد)
المهم عنصريتك البى فهم دى نوع الحكى البتحكيهو ولسانك مخشب:):)
حجة ما تفارقى الدفاية نوهائيا تانى لانك بتطلعى برة النص......
هذا مع شكرى:D
ماريلوف ياخgap
أالغالية البرد جانا بي عياااالو يا ماريل:)
ماشاءالله عينك نجيضة، فعلاً الرسالة دي طلعت معسمه عسيم السواد
لاني كتبتها بي مزاج متجمد زي ما قلتي:o
سعيدة بي شوفتك يا جميلة.
حجة امنة
16-12-2012, 12:48 PM
:Dالناس في شنو الحسانية ترسل في الرسايل
صدقتي و الله gap
حجة امنة
21-03-2013, 01:20 PM
http://www.youtube.com/watch?v=i4h0dkg8Ztc&feature=youtube_gdata_player
مرافي
21-03-2013, 01:48 PM
البركة بالشوفة والله ليك وحشة:cool:
وينك يا حاجة شوق الشوق...
طلتك بالدنيا...
حجة امنة
07-05-2013, 12:50 AM
الرسالة الأربعتاشر: خشمي بقى ما خفيف.
العنوان :
التاريخ : عيد اللم الموافق 21 شهر 3
بعد السلام عليكم ، بلاهي كيف أنتم في المدة التي لم تروني فيها ؟!!
إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها.
سبحان الله!!
خشمي بقى ما خفيف لمن انا زاتي مستغربه فيني
اليوما داك إتذكرت عائشة صحبتي في الجامعة و لحد اليوم مع إني مقصره في تواصل معاها، عشة ، أتذكر اول يوم إتلاقينا في الجامعة، تحت اللبخة، كانت قاعده في واحده من الكنبات و جنبها بت من دفعتنا شهادة عربية إسمها سلمى، كانو بيتكلمو قبل ما أجي أقعد قصادهم، قامت عشة قعدت تعاين لي شدييييد و بدون مقدمات سالتني: انا شفتك قبل كدا.
قلت ليها إنتي قريتي وين لانو انا لفيت معاهد الخرطوم دي نصها حتان جبت لي مجموع دخلني هنا.
قالت لي: إنتي موش كنتي بتجي معهد صلاح؟! و صحبتك هبة هاشم؟!
وحاط الله الشهره متاعب يما
قلت ليها: أي أي شفتك في معهد صلاح.
وانا النصيحة لي الله الوكت داك لا إتذكرتها لا شفتها!!
عشة: كنا مسمينك الحبشية عشان كنتي بتلبسي فستان (سيسترإسكول) القصير و مرات ما بتلبسي طرحة!!
صريت وشي: شوفي بلاهي، و حسع أجي هنا عشان دي(قمت أشرت على المره القاعد مع حرس الجامعة في بوابة الكلية) تحميني أخش، قال شنو قال بلوزتي ضيقة!!
عشة: بلوزتك دي مالا حسع ؟!
في سري قلت البت دي بتفهم بي وين؟! أقول ليها حموني أخش تقول لي بلوزتك مالا؟!
رديت ليها: لالالا دي ما ياها الكنت لابساها قبيل، رجعت غيرت البلوزة و جيت.
ما برلومة ياأخوانا و فرحانة، مالي ما برجع البيت أغير و أجي!
الوكت داك كلو سلمي كانت ساكته و مدنقره وشها في الواطه و بتمسح العرق من وشها بشكل دوري كل دقيقتين، بعد مسااااافة رفعت راسها و قالت لينا بي صوت منخفض شديد: إنتو طلعتو بتعرفو بعض؟! خلاص تعالو نبقى أصحاب!!
والله صحي
تعالو نبقى أصحاب
و بقينا أصحاب
نجي من الصباح، تعريف الصباح: ما قبل الساعة عشرة، انا ولا فخر ما حصل دخلت محاضرة قبل الساعة عشرة إلا بعد سنة تالته لمن عِدتّ السنة، المهم، بنجي طوالي نخش محاضرة عشرة بعدها نمشي (بيزنز) كلية إدارة الاعمال عشان نفطر، لانو الوكت داك كليتنا ما كان فيها غير ليمون و فول، لكين ليمون بيزنز كان أظرف، نجي راجعين الكلية و بعد داك حسب المزاج الداير يخش المحاضرة بيخش و الداير يقعد يتضهب تحت اللبخة بيقعد، انا كنت من رواد الضهب الاساسيين، اها سلمى بقت لينا في العزيزة، آمنة نعمل شنو؟! نمشي نفطر يا سلمى، آمنة تاني نعمل شنو؟! أقطعي الشارع يا سلمى، أكلي يا سلمى أقطعي الشارع عشان نرجع الكلية و هاكذا، اليوما داك قلتا ليها يا سلمى لو دايره تعيدي السنة باريني، طوااااالي إنعدلت على محاضراتها و بقت تمشي معانا الفطور بس.
عشة كانت أنيقة و مهندمه بصوره مزعجة بالنسبة لينا نحنا الكاشين سااااهي ديل، كل ساعة بتمشي إستراحة البنات عشان ترتب نفسها،كنا لمن واحدة من البنات تمشي الإستراحة و نكون قاعدين في مجموعة و شباب الدفعة قاعدين بنقول مشت تصلي، أتذكر في مرة من ذات المرارات عشة مشت الإستراحة قام واحد من الشباب قال وين عشة، انا شبيت طوالي: مشت تصللللللي
قال لي: دي صلاة شنو دي الساعة حداشر يا آمنة؟!
مرة مشينا نصلي صحي صحي، كان الدنيا رمضان أتذكر، عشة بعد صلت طلعت الكحل ولا البدره ما أتذكر و كانت بتتكلم ليها مع بت لابسه ليها عباية، و كانت بتسال فيها و البت أم عباية بتفتي ليها: إنتي يا ستنا البدره في رمضان حلاااال؟!
ستنا قامت إتشنجت ليك فيها: البدره أساساً في رمضان ولا ما رمضان حلااااال؟!
قلت ليها براحة كدا: دي منو يا عشة؟!
عشة: آجي ياآمنة دي ستنا!!!
بالجد كنت متفاجئه: ستنا أنصار السنة دفعتنا؟!!!!
الوكت داك كنا في سنة تانية و انا اول مرة أشوف وش ستنا!!
ستنا دي مره مشينا نشرب موية من (الكولر) يعني البراد بتاع الموية في مبنى الإداره لانو الوحيد الكان بيطلع موية باردة جد جد، أها لقينا الصف طوووووووويل، كنا انا و عشة و منال، لقينا قدامنا طوالي ستنا واقفه في الصف، بعد دورها جا مسكت الكباية و ررررررربببب قعدت في الواطه و بقت تقرا في دعاء كدا، قال شنو قال دعاء شرب الماء، لييييه ياخ، ما تقول بسم الله و خلاص، البت قاعده قريب للدقيقتين تدعي و ماسكه كوز الموية و نحنا الشمش طاقه في نوافيخنا و عطشانين و بعد داك لاحقين محاضرة، قامت منال صلحت نضارتها و قالت ليها: يا ستنا مع إحترامي ليك لكين لو كلو زول جا يشرب عمل عمايلك دي نحنا نجي من بيوتنا نقيف في الصف دا نشرب و نرجع بيوتنا لا نخش محاضرة ولا هم يحزنون!!!
المهم
(رنا) كانت كل يومين تلاته بتغشني تقول لي يلاكي أعزميني ليمون في (بيزنز) أقول ليها: مالي و مالك ما تعزميني إتي؟!!.
تقوم تدقسني: لالالالا عندي ليك كلام سر!
طوالي بقوم برخي: سر بخصوص منو؟! منى ولا عشة ولا ألاء
بتقوم بتعرف إنو الشرك قبض: لالالالالالا إلاء شنو، سر بيخصني انا دي
طوالي بنمشي بيزنز نشفط الليمون و نتونس، في الحلقة الأخيرة بيطلع لا في سر ولا شي!!
أها اليوما داك ماشين نقطع شارع الزلط، لقيت عشة قاعده في السور حق الكلية قامت سالتني: آممممنة ماشه وييييين؟!
قلت ليها بي صوت عالي: جايه جايه، بس ماشه مع رنا بيزنز عندها كلام سر حتقولو لي و أجي أقولو ليك صُره في خيت!!
المهم
انا كنت عيانة، عملت عملية حمل خارج الرحم.
لكين يا الساده القراء لقيتم أصعب مني؛ يعني تتخيلو أكلم الخالة الوالده هنا؟! أي انا تافه لكين ما للدرجة دي كمان، طبعاً هي عارفه الحصل، غايتو إتخيل لي انا بحاول أكلم نفسي و بتم روحي دي.
الحصل بي إختصار، تعبت و مشيت المستشفى و الدكاتره إكتشفو إنو الحمل خارج الرحم و قبضوني طوالي عشان يعملو عملية يستخرجو، الدكتوره بعد شرحت لينا الحاصل ختوني مع (حماضة) في غرفة لحد ما يجتمعو مع الجراح و يحددو العملية، كل ماشويتين تجي تمسح لي في كتفي و تقول لي: أوووووو يو أر لاكي!!!.
يعني انا محظوظه عشان جيت في مرحلة بدري قبل ما تحصل لي مضاعفات، قربت أقول ليها كان ما كنت لاكي كان حصل لي شنو؟! تاني نعلت الشيطان قلت انا مالي بقيت زي المصريين في المسلسلات، الواحد من ما تصيبو مصيبة طوالي يكشف ليك راسو و يطلع بالبلكونة يقابل السماء عدييييل: ليه ... ليييييه يا رب، انا عملت إيه يا رب؟!!!!
أها المره تمشي و تجي و تتونس معاي بعد شوية جابت ليها كم كتاب بتكلم عن الحمل الخارجي و جابت معاهم علبة مناديل ورق و ختتها لينا قدامنا، نظام نقرا و نبكي ولا شنو ما عارفة؟!!!
قلت لي حماضة المرة دي تاني كان جات تتقاطع بي جاي و اللهي بسمعا ليك فارغ لمن تتكيف
قال لي: آمنة عليك الله ما تفضحينا أبكي بكاك ساهي.
المهم
قررو العملية و بقو كل دقيقتين يرسلو زول شكلو براو يسالو فيني: بتشربي سجاير، لا ، بتسكري، لا، عملتي عملية قبل كدا ، لا
حيرت ليك الخواجات ديل في صناقيرم دي
قررو العملية تاني يوم الصباح بدري لانو قالو أحسن من يعملوها بالليل لانها عملية كبيره و بيحتاجو المستشفى يكون فيها عدد كفاية من المساعدين، الليل كلو ما قدرت أنوم؛ لانهم غزغزو لي مية حاجة في يديني وسحبو مني طن دم عشان يفحصو؛ أها بقيت مقنطره يدي فووووق الليل كلو؛ الجديد شديد ياأخواني، لمن صحيت الصباح كنت حاسه إني حالتي زي الزفت و وسخانة، جات الممرضة قالت لي أمشي إستحمي عشان العملية بعد شوية، دخلت الحمام و بقيت أستحما بي مزاااااج قربت أصفر، كان جاتني ليك نهرتني: هييييي الجماعة راجينك ياالاخت!!
فووووووو قشطوني ليك في السرير أبو عجلات و ترااااخ الأسانسير و توووووف الغرفة القبل العمليات محل التخدير، الوكت داك كلو انا حاسه كاني بحضر في مسلسل تركي، لقيت مجموعة من الشباب واقفين راجيني عشان التخدير، قعدو يتونسو معاي إنتي من السودان و ما أدراك ما السودان، قربت أقول ليهم عليكم الله خدرو تخديركم خلونا من الشغله الميته حقتكم دي!! قالو لي عدي من واحد لي عشرة بديت أعد: ون .. تو .. ثِري
قمت إتذكرت إنو الناس في بلدي يصنعون الحب و عااااادي بيموتو في التخدير، هيا يما هيييي الليلة كان متا في التخدير؟! قمت رفعت أصبعي بالشهادة: أشهدو أن لا........
و بقيت شاهد ما شفش حاقه
صحيت لقيت روحي في العنبر!! يا كافي البلا لا شفت الجراح لا شفت اللمبه المدوره البيختوها فوق راس العيان لا شفت مشرط لا شاشه!!
بس فتحت عيني لقيت قدامي واحد من جماعتي القبيل بتاعين التخدير، شبكتو ليك: وير إز ماي هزبند، أي ونط تو سي ماي هزبند!!!
يعني أين زوجي أريد أن أرى زوجي!!
عِلم يما؛ الهضربه زاتا بي الإنقليزي، انا الله أعلم أرجع أم بده تاني!!
يا أم ، أجمل ما في هذه الغربة لمن تلقى ناس ينقلو ليك تفاصيل البلد لحد باب بيتك.. طازجة
الشكر أجزله للأصدقاء و الاسرة بلندن و عنهم أسرة الاخ العزيز الخدر دالوم و زوجته الاخت العزيزة رقية و بناتهم الجميلات.
يتبع >>>
ولكن بدون وعود
* أرجو من الساده القراء مسامحتي لإقحامهم في هاكذا أمور خاصة، لكن أجدني بدون حيله أخرى غير الكتابه المُره هذه، انا جداً أسفة.
امونة يا ست الفريق
الف سلامة ياستي
معوض ان شاء الله في القريب العاجل
سماح محمد
07-05-2013, 07:49 AM
حمدلله على السلامة يا أمونة وما تشوفي شر إن شاء الله :cool:
قمت إتذكرت إنو الناس في بلدي يصنعون الحب و عااااادي بيموتو في التخدير، هيا يما هيييي الليلة كان متا في التخدير؟! قمت رفعت أصبعي بالشهادة: أشهدو أن لا........
ياخ الحقائق مرات مؤلمة خلاص!
وما أسهل الموت في هذا الوطن..!
أجر وعافية ياحبيبه
والله يعوضك
حجة امنة
07-05-2013, 11:42 AM
البركة بالشوفة والله ليك وحشة:cool:
وينك يا حاجة شوق الشوق...
طلتك بالدنيا...
الله يبارك فيك يا ست البنات :cool:
معليش إتاخرت لكن أهووو
نلف نلف نلف في الغربة دي لمن راسنا زاتو يلف gap
حجة امنة
07-05-2013, 11:43 AM
امونة يا ست الفريق
الف سلامة ياستي
معوض ان شاء الله في القريب العاجل
تسلمي يا جيجي يا الحبيبة :cool:
كلو بي وكتو
كلو بي وكتو :)
حجة امنة
07-05-2013, 11:48 AM
حمدلله على السلامة يا أمونة وما تشوفي شر إن شاء الله :cool:
ياخ الحقائق مرات مؤلمة خلاص!
وما أسهل الموت في هذا الوطن..!
أجر وعافية ياحبيبه
والله يعوضك
الله يجبر خاطرك بحق جاه النبي
تسلمي يا ست البنات :cool:
صحي و الله
(وما أسهل الموت في هذا الوطن..!)
كل ما أتكلم مع زول من البلد يقول لي الحمدلله إنك هناك، لو كنتي هنا كان متتي!!:(
إنا لله يا سماح .. إنا لله
ماريل
07-05-2013, 11:58 AM
العزيزة جدا الحاجة امنة
سلامات وربنا يعوضك ان شا الله
افتقدتك جدا وتمنيت ان يكون مانعك خير
يا ستى صحتك بالدنيا والباقى هين ....
حجة امنة
07-05-2013, 12:06 PM
العزيزة جدا الحاجة امنة
سلامات وربنا يعوضك ان شا الله
افتقدتك جدا وتمنيت ان يكون مانعك خير
يا ستى صحتك بالدنيا والباقى هين ....
تسلمي يا ماريل يا حبيبة :cool:
انا زاتي إفتقدتكم و الله
الف شكر يا ستي.
النور يوسف محمد
07-05-2013, 12:31 PM
بسم الله الرحمن الرحيم
حجة امنة ،، تحياتى
ما شاء الله ،،
سلالة فى السرد مش تنقل الواحد للمكان وبس ،،
الواحد ممكن بسهولة يعيش حتى أحاسيس الكاتب وينفعل معاها ،،
ثم سلامات وما تشوفى شر ،،
طارق صديق كانديك
07-05-2013, 01:21 PM
ياخ مفروض يتبع جداً وبوعود جازمة جدا مش بدون وعود.
مش قال ليك اسكتي وابكي بكاك ساهي؟ :Dتعالي ياخ وكملي الحكي.
حمدا لله على السلامة ياحجوج
مهند الخطيب
07-05-2013, 05:03 PM
الف لاباس ياحجوجوعلى قدر أهل اللماضة تأتي العمليات ..
ابقي على الوعود وأنسي يتبع ...
عليك الله حكو ليك هضربتك؟
مواهب عبد العزيز نقد الله
07-05-2013, 05:56 PM
الف سلامة حجوج , ومعوض ان شاء الله ..........
إفتقدنا طلتك الحلوة ..........................
كلماتك كتير بتكون مخدر للألم جوانّا, فما تغيبى تانى :)...........
عكــود
07-05-2013, 07:08 PM
ألف سلامة يا حجة آمنة،
ربّنا يعوّض بإذنه تعالى.
تعرفين كيف تجعلين من معاناتك مادة شيّقة.
خالد غالي
07-05-2013, 08:20 PM
الف حمد الله على السلامة يا حاجة آمنة
معوّض باذن الله
كتابة جميلة وطاعمة ياخي ...
اعجاب لحد التكسر عديل كده والله :D
We are so sory
we hope next time is in side the jack
مواساة بالتنغليزي على وزن وير ايز ماي هزبند ^_^
خال فاطنة
07-05-2013, 10:26 PM
هلا ب حجة آمنة....
دياب الشاهر
07-05-2013, 11:09 PM
حجة آمنة
تحية وود لك أعجبني العنوان فمررت فعرفت كيف تصدق الاحاسيس في بساطة كلمات
دمت
Sahar
08-05-2013, 01:38 PM
لديك يا جميلة مقدرة رائعة على تطويع الحروف وبعث الجمال فيها..
اظني نسيت اسلم عليك، وان شاء الله اجر وعافية يا حجة آمنة وسلامتك الف سلامة وتجيبي ان شاء الله الي ح يملوا ال inbox بتاعك بالرسائل..
حجة امنة
08-05-2013, 02:39 PM
بسم الله الرحمن الرحيم
حجة امنة ،، تحياتى
ما شاء الله ،،
سلالة فى السرد مش تنقل الواحد للمكان وبس ،،
الواحد ممكن بسهولة يعيش حتى أحاسيس الكاتب وينفعل معاها ،،
ثم سلامات وما تشوفى شر ،،
الله يسلمك يا أستاذ النور
انا حالتي قلت الدور دا من البنج كورتي فكتgap
بالجد جاني إحساس إنو الرسالة ما متماسكه و فيها تردد لاني ما كنت دايره أتكلم عن الحكاية دي عشان الناس ما تقلق، لكن كراهة مني ساكت كتبتهاgap
ربنا يجبر خاطرك بحق جاه النبي.
حجة امنة
08-05-2013, 02:41 PM
ياخ مفروض يتبع جداً وبوعود جازمة جدا مش بدون وعود.
مش قال ليك اسكتي وابكي بكاك ساهي؟ :Dتعالي ياخ وكملي الحكي.
حمدا لله على السلامة ياحجوج
الله يسلمك يا طارك ياخيgap
بحاول و الله
كان الله أراد بجي أحكي لمن أملاكم فقر زاتو gap
يعلم الله شي غير تشجيعكم دا مخفف علي مافي، الف شكر يااخوانا
الف شكر
حجة امنة
08-05-2013, 02:49 PM
الف لاباس ياحجوجوعلى قدر أهل اللماضة تأتي العمليات ..
ابقي على الوعود وأنسي يتبع ...
عليك الله حكو ليك هضربتك؟
والله يا مهند سينما بسgap
لكن الخواجات عندهم حركة سمحة شديد، لي نوعية الناس المكنتم خفيفة و خشمم زاتو خفيف الزيي ديل:rolleyes:
لمن يطلعو الواحد من العملية بيختو في حته إسمها ال (recovery room) لمن يفتح و يكمل هضربتو كلهااااا حتان يودوه العنبر، ربك رب الخير انا بعد مرقت لقيتم مانعين مني الزيارة حتى زوجي سمحو ليو بي 5 دقايق بس يشوفني و يطلع طوالي، لكين إتا قايل انا قصرت بالتلفون؟! أيو زول ضرب لي ونستو ليك، ونسسسسسسة عجيبة gap و بعد البنج فكا نسيت الكلام طبعاً
غايتو بس الحمد لله
اشرف السر
08-05-2013, 07:22 PM
ألف حمدله على سلامتك يا حجوج
وما تشوفي شر...
اللهم ختينا البنج وحركاته...
حجة امنة
09-05-2013, 01:40 PM
الف سلامة حجوج , ومعوض ان شاء الله ..........
إفتقدنا طلتك الحلوة ..........................
كلماتك كتير بتكون مخدر للألم جوانّا, فما تغيبى تانى :)...........
تسلمي يا أم شهد :cool:
و ما تفقدي غالي يا رب.
حجة امنة
09-05-2013, 01:42 PM
ألف سلامة يا حجة آمنة،
ربّنا يعوّض بإذنه تعالى.
تعرفين كيف تجعلين من معاناتك مادة شيّقة.
الله يسلمك يا عكود يا أخي
وكتر الف خيركم
شهادتك دي ما تتخيل شجعتني لي ياتو درجة؛ أمانة ما عندي كترة مواد شيقة شوك شديدgap
حجة امنة
09-05-2013, 01:52 PM
الف حمد الله على السلامة يا حاجة آمنة
معوّض باذن الله
كتابة جميلة وطاعمة ياخي ...
اعجاب لحد التكسر عديل كده والله :D
حسع انا أقوم أرمي روحي من البلكونة و لا شنو يااخواااااناgap
خالد غالي شمسياً؟!
الله يسلمك يااخي
We are so sory
we hope next time is in side the jack
مواساة بالتنغليزي على وزن وير ايز ماي هزبند ^_^
والله نحنا بي إنقليزينا العجيب دا خسارة في أم بده يا عملات حمورgap
قلتا لي إن سايد زا جك؟! وين دا من حمام الجك يلا يا منقة؟!gap
وجدي هييي حسع انا ما فايقه ليك:rolleyes:
إذهب إلى الخلا و تماضر بتوضبك، قال جك قالgap
هلا ب حجة آمنة....
هلا ب ك يا خال فاطنة يااخي
لكين حركة الإقتباسات المتعدده دي سمحة خلاس، شفيتا من تماضر و سماحgap
طبعاً دي الخطوة الاولى في سبيل إني أتعلم منهن الردود السمحة المحترمةgap
حجة امنة
10-05-2013, 12:25 PM
حجة آمنة
تحية وود لك أعجبني العنوان فمررت فعرفت كيف تصدق الاحاسيس في بساطة كلمات
دمت
الف شكر على المرور الجميل دا، دي شهادة أفخر بيها
خالص ودي و إمتناني يا دياب.
لديك يا جميلة مقدرة رائعة على تطويع الحروف وبعث الجمال فيها..
اظني نسيت اسلم عليك، وان شاء الله اجر وعافية يا حجة آمنة وسلامتك الف سلامة وتجيبي ان شاء الله الي ح يملوا ال inbox بتاعك بالرسائل..
تسلمي يا ست البنات
و سعيدة جداً بتشريفك الرسائل
موضوع ال inbox دا للزمن داك بيكون لقو ليو تكنلوجيا تانية gap
لكين للضمان بقول أميييين gap
حجة امنة
12-05-2013, 10:15 PM
ألف حمدله على سلامتك يا حجوج
وما تشوفي شر...
اللهم ختينا البنج وحركاته...
اللهم أميييييييين gap
الف شكر يا أشرف
حجة امنة
12-05-2013, 10:20 PM
بسم الله
البوست دا انا خليت فيو كم رد و حسع الواطه أصبحت نيييييييووووووت إتلحسنgap
تغريدة ياخ مالك ما رجيتيني لم أجي :)
تغريده
15-05-2013, 08:55 AM
بسم الله
البوست دا انا خليت فيو كم رد و حسع الواطه أصبحت نيييييييووووووت إتلحسنgap
تغريدة ياخ مالك ما رجيتيني لم أجي :)
واصلى يالحبيبة وراجينك بكل استمتاع وشوق
والكلام المالقيتيه الظروف بس حكمت :rolleyes::)
حجة امنة
17-05-2013, 12:31 PM
ما تشوفي شر يا حجوج
الله يسلمك يا إبرا ياخي
واصلى يالحبيبة وراجينك بكل استمتاع وشوق
والكلام المالقيتيه الظروف بس حكمت :rolleyes::)
الله كريم علينا يا تغريده :)
على العموم البوست بوستك، تمشي و تجي تلقينا نحنا يانا نحنا gap
حجة امنة
17-01-2014, 01:37 AM
الرسالة الخمستاشر: لو شفتي كيف بنزف نزيف الورد بالشوك إنطعن
(كلمات خطاب حسن أحمد غناء الهادي أدم(ود الجبل) )
العنوان : بيتنا الكاين هنا
التاريخ : الليلة إلا كم سنة
بعد السلام عليكم ، بلاهي كيف أنتم في المدة التي لم تروني فيها ؟!!
إذا دار مِحور سؤالكم عني، ف أنا أحمد الله سيدي و ما زلتُ في هذه البلدُ الباردِ أهلها.
يما انا بقيت من العيال السيس
الليلة قمت بنشاط أنضف البيت و أعمل بعض الاشغال الشاقة المؤبدة دي، و مبسوطة من روحي، قررت لمن (عطوة الخزين راجلي)* الشهير ب (حماضة) يرجع من الشغل أتقدم ليو بإعتزار رسمي و شعبي لانو البيت دا قدر ما حاولت ما قدرت اوصلو لدرجة النضافة البيتوقعها سيادته.
شغاله بي نشاط و بديت أغسل في الهدوم، لقيت فوق الغسالة قزاز و فريمات صور مكسره قمت أتذكرت انو الاستاذ حماضة كسر لي فريماتي لمن جا يعلقم، أتغظت تاني مع انو الحادث دا ليو شهور، قمت قررت أسحب الاعتزار، اها جيت أدخل الهدوم في الغسالة طرااااااخ طقتني ليك قزازة في جبهتي و الدم دا جا طاير بووووووووووف، بس طوالي قلت : (اللهم إني لا أسألك رد القضاء ولكن أسألك اللطف فيه)
جبت لي منديل ورق ضغطت بيو الجرح و جريت مراية الحمام، زحيت المنديل قلت هيييي الجرح صغيررر و بووووووف الدم جا طاير ملا الحوض، طوالي ضربت لناس الاسعاف،ردت علي مرة طبعاً كرهوني حياتي بالاسئلة أسمك ..عنونك ..تاريخ ميلادك.. الخ
أثناء ما بتكلم معاها برااااحة رفعت المنديل لقيت الدم وقف، قمت قلت ليها انا أسفة؛ الدم وقف، ما أظن أحتاج أسعاف، انا بس أتهجمت لانو الدم ملى المكان.
قالت لي مافي مشكلة هم على أي حال حيجوك و يقررو !!! و أدتني إرشادات من ضمنها إني أقعد حته واحده و ما أتحرك.
قلت الشبكني في الخواجات العبطه ديل شنو؟!!!
هم بيخافو أكون حاولت أنتحر او يكون زول ضربني و هاكذا قصص
المهم
أنتظرت 40 دقيقة حتان جو، أثناء ما منتظراهم ضربت لحماضة في الشغل شرحت ليو الحصل عشان لو مشيت المستشفى يعرفني، لمن ناس الإسعاف جوني لقوني خليت أي شي في محلو سالوني الحاصل شنو، سقتهم محل القزاز وريتم الحصل، واحد طلع يجيب حاجات من الاسعاف، زميلو التاني بقى يمسح في الدم من وشي و يفتش باللمبه في الجرحة، قام قال لي السلام عليكم انا جزائري، قلت ليو انا سودانية، قال لي ايوة عرفتك انا اصحابي كتار سودانيين، في الوكت داك زميلو الانجليزي جا قمنا رجعنا نتكلم بالانجليزي، بقو يسالو عن بياناتي و كشفو على الجرح لقو ما بيحتاج أمشي المستشفى، لصقو لي لصقة صغيرونه كدا و بقو مارقين، قمت قلت ليهم: أنا أسفة جداً لانو جبتكم و الموضوع ما بيستاهل و كان ممكن يكون في واحد محتاج ليكم أكتر مني.
الانجليزي قعد يضحك و قال لي ما تخافي نحنا كتاااار و لو في زول محتاج حيلقى زملائنا.
شكرتهم و طلعو.
قلت ياااااحليل زمن كنت في بلدي و بشرب موية النار و الحبة دي ما بتجيني!!!
أي يا السادة القراء موية النار الوااااحدة دي
أتذكر قبل كم سنة أيام كنت بدرس (لغة الإشارة العربية) كان عندي إمتحان و قمت ساهرت الليل كلو براجع، زي الساعة 10 قلت أخد راحة و أكل لي حاجة، قمت لقيت في الطربيزة قزازة بتاعة بلاستيك حقة بيبسي و شكلها فيها موية، كنت عطشااااانه قمت قلت الموية دي بايته برا بتكون دايرا زيادة من الماسورة ، قمت شلتها و دخلت الحمام و كبيت جزء كبير منها في الحوض و تميت الباقي موية، و طوالي بّقيت لي بقة كبيرة، طوااالي سنوني عملت كرررررررج
رفعت أصبعي و قلت : (اللهم إني لا أسألك رد القضاء ولكن أسألك اللطف فيه)
تاني قلت آمنة إنتي في الحمام و تقولي أيات، دي شنو السفالة دي
قمت طوالي طلعت و شايله القزازة لقيت ولدنا الشغال قال لي دا شنوووو ليه شلتي موية النار؟!!!
طوالي كوركت لي نزهة و لينا أخواتي جو جاريين و لمن كلمتهم قامو يجوطو، ضربو لي ابوي أدوني ليو قام جاط ليك فيني: موية النار أسااااساً الجابا البيت شنووووو؟!
قلت ليو: بينضفو بيها حيضان الحمام.
هاج ليك فيني زيادة: الحمامات عنها ما إتنضفت، دي حمامات شنو دي البينضفوها بي موية النار دي؟!
ملا لي سماعة التلفون رعاف و توفاف
قلت ليو بي قلبي يا حاج ركز لي مع الموضوع الأساسي حسع، قمت أتنبهت أني ماشربتها مركزة و إني خففتها، لا .. بالمنطق كدا لو كنت شربتها مركزة كان حسع بتفاصح جنس فصاحتي دي؟!
اها الاب جاط فيني و أداني إرشادات طبية و قفل الخط
قمت عااااادي إتنفضت و مشيت أمتحنت عاااااادي لا جابو لي إسعاف لا حركات العيال السيس الإتعلمتها في البلد دي!!
اها نهاية اليوم جيت و لحد الوكت داك أمي لا ضربت لي لا هببتو لي، جيت زعلانة واقفه قِربة لقيتا عااادي تقراء في الكمبيوتر، قلت ليها لييييه ما سالتي مني، قالت لي: لييييه في شنو كدي أحكي لي.
حكيت ليها القصة و تميت القصة كوز موية كالعادة.
قالت لي : ياااااااا الله شربتي موية النار ؟! لا حول ولا قوة إلا بالله
قلت ليها : أي و الله جوووووووت شفطها بس ربك رب الخير الهمني قبل ما أشربا زدتها مو...
قاطعتني: يا ااااا الله يعني الليلة ما نضفتو الحمامات؟!!!!!!!
يتبع >>>
ولكن بدون وعود
* (عطوة الخزين راجلي) مقتبسة من ام مدام فنجاط ، فنجاط شخصية الضفدع الكرتونية بمجلة صباح السودانية
هذه الرسالة إهداء للحبيبات بقروب الواتساب (إلى حمار الوحش .. قبلة)
سوسن سنادة.. منى عتباني.. لمياء صالح.. سماح المكي.. إيمان خليفة.. زهراء منصوري.. ريان أنس.. عزة جعفر بت سلمى
خالص حبي و وردتين
http://www.youtube.com/watch?v=tQ2dEril4Rk&feature=youtube_gdata_player
حجة امنة
17-01-2014, 01:49 AM
http://files.mothhelah.com/img/0Fm24569.jpg
http://files.mothhelah.com/img/XqJ23766.jpg
التحية للفنان إسماعيل حمودي.
الصورتين أعلاه من منتدى كورة سودانية
البديري
17-01-2014, 05:56 AM
سلامات حجة امنه،
تاني قلت آمنة إنتي في الحمام و تقولي أيات، دي شنو السفالة دي
:haha:
غايتو التاكلى والتشربى الينفعك(حتى لو ملخبط بموية النار)،وتسلم البطن الجابتك
خليتينى استقبل صباح الجمعة بابتسامة مع كباية القهوة، جمعتكم مباركة باذن الله.
على الهامش;
تسلمى كتير على تعديل التوقيع، وباذن الله ربنا بفرجة علينا من حيث لانعلم، ونعيش احرار بكرامتنا وعزنا.:victory:
عبدالله جمعة
17-01-2014, 08:03 AM
يا سلااااام يا حجوج
ما زال وعاء غربتك ينضح بالجمال وكأنك على ضفاف النيل تسقينا منه ونحن الغرباء عن الوطن
تحياتي من بورتسودان
عبد العظيم السعيد
17-01-2014, 10:35 AM
سلام حجة امنة ..
لست بقادر ان اعبر اكثر عنما قاله الاخوة هني ..
ولكني من صباحات الله بيض ..
كريت البوست كرة واحدي ..
فاصبح لجمعتي طعم ولون .. وضحك ..
متعك الله بالصحة .. كما امتعتينا ..
حجة امنة
17-01-2014, 07:18 PM
سلامات حجة امنه،
:haha:
غايتو التاكلى والتشربى الينفعك(حتى لو ملخبط بموية النار)،وتسلم البطن الجابتك
خليتينى استقبل صباح الجمعة بابتسامة مع كباية القهوة، جمعتكم مباركة باذن الله.
على الهامش;
تسلمى كتير على تعديل التوقيع، وباذن الله ربنا بفرجة علينا من حيث لانعلم، ونعيش احرار بكرامتنا وعزنا.:victory:
البديري يأخي أولاً الحمدلله شفناك طيب، او قريناك بخير :i-m_so_happy:
و أسال الله يجبر خاطرك بقدر ما طيبت خاطري بكلامك دا.
على هامش الهامش، توقيعي للاسف حاله بتاعة يأس من البني أدمين لكن و الحمدلله ثقتي في ربنا كبيره، كل يوم أسمع و أشوف حاجات بتعمق عندي الإحساسين ديل ، أكاد أجذم إني الخمسة شهور الفاتت كبرت تلاته سنين و يومين، أخاف أصل مرحلة ال لا دهشة، ربنا يكضب الشينة.
ياخ دا هامش ولا قطر :sarcastic_hand:
علاءالدين عبدالله الاحمر
18-01-2014, 02:10 PM
تحية لك في ذمن الاياب
حجة امنة
18-01-2014, 07:04 PM
يا سلااااام يا حجوج
ما زال وعاء غربتك ينضح بالجمال وكأنك على ضفاف النيل تسقينا منه ونحن الغرباء عن الوطن
تحياتي من بورتسودان
إتا قايل مشكلتك شنو غير الغربة
مشكلتك إنو كن جميلاً ترى الوجود جميلا
دي مشكلة تصدق؟!!
:grin::rofl:
البديري
21-01-2014, 07:48 PM
على هامش الهامش، توقيعي للاسف حاله بتاعة يأس من البني أدمين لكن و الحمدلله ثقتي في ربنا كبيره، كل يوم أسمع و أشوف حاجات بتعمق عندي الإحساسين ديل ، أكاد أجذم إني الخمسة شهور الفاتت كبرت تلاته سنين و يومين، أخاف أصل مرحلة ال لا دهشة، ربنا يكضب الشينة.
ياخ دا هامش ولا قطر :sarcastic_hand:
مسطول كل يوم يكتب في ورقه (ربي محتآج 50 ألف) و يكتب عنوآنه ويربطها بي بلونه ويطيرها,,,,,
وكل مره تقع فوق مركز الشرطه اللي جنبه.
العساكر اتعاطفوا معاه و قرروا يجمعوا له مبلغ ويساعدوه,,, فجمعوا (25 ألف)
و مشوا دقوا ليه الباب و لما طلع قالوا ليه: (تفضل دي 25 ألف جنيه ربك رسلها ليك) علشان ما يحرجوه يعني..
أخذها منهم ودخل البيت وقام كتب رساله ثانيه وربطها بي بلونة وطيرها، وطبعاً وقعت فوق مركز الشرطه،
فتحوها ولقوه كاتب: (ربي أشكرك على الهديه و بالمناسبة عساكر الكيزان ديل سرقو نصها)
ماعارف يا اختى حجة امنه
قريت النكتة دى فى منتدانا ''كووورة سودانية'' طوالى اتزكرتك! ههههه
:lol:
vBulletin® v3.8.8 Beta 2, Copyright ©2000-2024