عشوشه ..أجمل نساء الطير

[أيمن مضوي]

مدخل ..
( أهداء لعشوشه أجمل نساء الطير )
ــــــــــــــــــــــــ
لحظه لقيتك يا هواى ..
غلبنى اسوق خطواتى قدام ..
اساسق فى دريبات العشم
شان ألقالك طريق ..
شان أروى رويحتى ونفيستى
المشحتفه فيك .
شالونى ختونى محموم حى
دوداب الصى . شاوينى من شوقك شيى .
ركزت وحلفت شأن أختانى
وما ظنيتك اختاك
قليبى ظنيتو هواك ..
يا المهيوبه كتالك
ويا المعيوشه شيالك
يا نى فى دريبات الرحيل بلقاك .

نص
_______
جيانى شايله فرح ميعادك خطوة للمنفى
تساسق غناوى الطل وتشب صقريه
ويا القمرة هووى يالقمرة
دقى المحلب تدفق حيضان السنسن
واربط قبليك حريرة فى جريده المطر
وأشيل شبالك فرح غناى
وتانى حلفتك يا القمرة
كان تهبشن البريدن هنااااااا
وأتاوقن نجيمات الصباح من هنااااااااا
شان سموك بسيمات
فرح زغروده الحله الهناك
مكروفه من عشق المطامير
مخلوقه من طين ترايه عرق الجبين
تجابد فينا عسكر تحلف تمسك
شهقه مريودك ضحى
وعيال الحله يوم داك ضحى ..
كجو الشراك للطير ..

( حلاب قلاب .. تحلق تقلب .. تجى مشقلب )

حلبولك ضوء القمرة
جابولك قليبى غباشه ريد
معطونه فى فرح الجهال
مقبوضه فى شرك هواى

يا سحابات القبلى شايل ضهريه
ضليله ضليله ..
أدفق على حوش عشم هواى (جبه ..وطرفه )
وأنتر خريفك دابى العسكر
وتتقسم فينا فرح غناك
عوئ وسماك
_____________________________
6/8/2013 أيمن عثمان