جنس حالة

[محمد علي عثمان]

ياخالق اللجوء وين نمشي
طالبين الهدوء وين نمشي
يارب العباد وين نمشي
في هذي البلاد وين نمشي
ربينا الجداد اتوفي
لامونا العباد
بارينا البنوك قبضونا ... لي حين السداد
كملنا القعاد في الضللة
وخمينا الرماد
في حفله هجيج مع حوته
او عقد الجلاد وين نمشي
شقينا الدروب وفترنا
في بلد الحروب
انفصل الجنوب واتوسد
الفجر الكذوب وين نمشي
قاعدين في الهبوب يالله
وفاضيات الجيوب
اشتهت القلوب الشردة
وادمنا الهروب
ويت نمشي
الصبر العنيد والهمة
والحر الشديد
لاشفنا البلاد وعمارا
في الفجر الجديد
لا الساسة الكتار سوولنا
مستقبل سعيد
وين نمشي
سودانا القديم ياحليلو
والغنا والنشيد
لاشفنا القديم قدامنا
لا طلنا الجديد
وين نمشي
شدينا الرحال وين نمشي
لي بلد الريال
خريجين رعاة للماشية
تدبير وانتحال
شان نلقي الاهل بالسترة
والرزق الحلال
في زمن الريال يالله
اصبح كالمحال
وبين امشي وتعال ياربي
اعيانا النضال
كشتنا المدينة الفاضلة
وزلونا الرجال
شدينا الرحال وين نمشي
لي خلف البحار
دولار للعمار يالله
دولار للايجار
دولار للرغيف ينجينا
من موية الخريف
في سفن الهلاك
والموعد هناك
شن بحصل اخوي
نعوم متل القعوي
شان امي وابوي
شان اختي واخوي
كندا واستراليا
بنما واندونيسيا
مافرقت كتير
يلاك ياحبيب
نقول للدنيا خير
نغرق او نموت
او يضربنا بوت
نقفل باب عمرنا
وتنفتح البيوت
نسير والدنيا سايرة
شان امونه دايرة
وحاجه سكينه دايرة
وخالتو مدينة دايرة
وحاجه النعمة حايرة
نعبر ياصديق
نفرج كل ضيق
نطفطف للحريق
ونمشي علي الغريق
نحول للحبايب
والاهل القرايب
دولارات معزة
تعين وكت المصايب
نفتح باب املنا
نقش دمعة اهلنا
هروب في اي قارب
هروب بعد المغارب
كندا استراليا
بنما اندونيسيا
مافرقت معانا
نلتمس المودة
والرحمة وحنانا
يلاك ياصديقي
للزمن الحقيقي
غرقانين جوانا
والنار في حشانا
يلاك وابقي صابر
نتحدي المعابر
لي تلك المنابر
او قل للمقابر
مافرقت معانا


طارق الأمين فى قصيدة عن غرق 14 سوداني في الطريق لأستراليا
30 أغسطس 2013م

[الرشيد اسماعيل محمود]

سلام يا محمد علي..
والله أنا بقرا في النص، كنت داير أكتب ليك إنو فيهو ملامح طارق الامين ونانسي عجاج!!!

نص ملحّن جاهز، وبشبه نانسي عجاج

[محمد علي عثمان]

سلام يا محمد علي..
والله أنا بقرا في النص، كنت داير أكتب ليك إنو فيهو ملامح طارق الامين ونانسي عجاج!!!

نص ملحّن جاهز، وبشبه نانسي عجاج

بالضبط كدة يالرشيد ياخوي نص ملحن وعايز فنان من نوعية نانسي عجاج او سيف الجامعة

[سر الختم إبراهيم نقد]

الأخ محمد علي
قصيدة محزنة تعبر عن إحباط الشباب السوداني وضيق السبل أمامه.
ما عارفين من نلوم على هذه الحالة؟؟
محزن أن تصدر الدول البضائع ونصدر نحن العقول والسواعد.
الله في.
شكراً.

[رأفت ميلاد]

مناحة محزنة تحكى حالنا وقد أصبحنا غجر الأرض

سلامات يا محمد على ومرحب بيك