حكاوي ود جبريل !!

[أمين محمد سليمان]

هنا نستجمع أعمال طارق جبريل ...هذا الأصلع الباذخ !!

[طارق جبريل]

هنا نستجمع أعمال طارق جبريل ...هذا الأصلع الباذخ !!

غايتو يا بروف تحت مسؤوليتك كل ما سيكتب هنا:biggrin::biggrin::biggrin:

[طارق جبريل]

يا شباب حا احاول انزل اي حاجة تجي في راسي
في شي كنت بديته في الفيسبوك وحاجات مخزنة في قاع الصلعة:biggrin::biggrin:

[طارق جبريل]

حسن المثقفاتي وعبده الميكانيكي..
اصحاب فِرَد للطيش..
لكن ما بيتلاقوا الا يوم الخميس بالليل..
حسن موظف في وزارة الثقافة وعضو في حزب يساري..
يوميا بيرجع الحلة معاهو كمية جرايد وكتب..
بيقعد قدام البيت يقرأ أو يمشي للمنتديات والايام الثقافية..
عبده حياته كلها في المنطقة الصناعية.. حتى مفرداته ذاتها من نفس البيئة
حتى لو شاف ليه بت سمحة وشغالة «شل، أجيب، موبيل، توتال» بيقول ليها:
أحي أنا يا الرفارف..
أها يوم الخميس قريب المغربية عبدة بيجي لي حسن ويناديه:
يا مثقفاتي ارحكا ياخ.. «سليلة» الليلة بتقفل بدري وما بنلقى لينا «موية مقطرة»
وكدة «كربريترنا» بينفس يا ابو الثقافة وبيكون خميسنا «مبوش» ياخ..
عبدة بيرد عليه: ياخي انت جاهل ومحاولة انه الزول يرفع من قيمة الانسان جواك كلها فشلت
- يا مثقفاتي خلينا من الحنك العاضي دة ياخ «السِنَة» دي زي الاسبير الاصلي
بيلفحوها سريع سريع بعدين «حفصة» الليلة حا تكتل فراملنا ياخ..
- أرحكا ياخ.. انت ميؤس منك على مستوى رفع الوعي
- يا مثقفاتي أن عايز ارفع موية دماغي المقطرة ياخ عشان اعيش الجو
أول ما يصلوا عند «سليلة» في العشش عندهم ركن كدة براهم
و«سليلة» بتكون فارزة ليهم عيشتهم براهم و«أم فتفت مع الشطوط والأقاشي»
مسمياهم: بتاع الحيكومة وبتاع «أبيض ضميرك» وبتخلي حفصة تكون معاهم
وهي مقابلة باقي الزباين في الاوضة والراكوبة التانية..
أها أول ما «يتصلحوا» عبدة الميكانيكي بيقعد يديها بكية كدة:
حفصها يا حناني ياخ و«يغمزها» في نصها ويقول ليها: أحي أنا من دينمو النيسان دة..
- يا مغفل ياخي اتعامل مع حفصة دي ككيان.. كبني آدم.. أرقى بي مستواك شوية
- يا مثقفاتي بتذكرني بي حنان حبي الابدي زي مكنة البوكسي 78 ياخ
جاء ختفها مني واحد مثقف زيك ووداها السعودية... احييييي انا يا قلبي
ويقعد يبكي ويحضن حفصة.. بعد يتم جوعيرتو..
ولمن يسمع أحمد احساس بيغني في الراكوبة: على النجيلة جلسنا بيقول لي حسن:
كنت بوديها حديقة القرشي..
هههههههههههه
- انت يا عبده ما حصلت اطلعت علي كتب وقراية يعني..
- مطالعة قصدك
- ايوة
- يعني المطالعة دي بتخلي الزول مثقف
- ايوة بتوسع مداركك
- طيب انت قايم بينا ومثقفاتي واسبير ياباني اصلي اتاريني انا زيك واحد
- كيف
- ياخي انا قاري خمسة كتب «مُطالعة» في الابتدائي.. بالله هو ناس: طه القرشي
ديلاك ياهم الثقافة يا فَردة..
في صحتك يا زميل الثقافة..
ههههههههههههههههههههههههههههههههههههههههه

[أمين محمد سليمان]

غايتو يا بروف تحت مسؤوليتك كل ما سيكتب هنا:biggrin::biggrin::biggrin:
أنا مسؤل من كلامي يا طارق :biggrin::biggrin::biggrin: ...
مسؤل من انك أصلع ...و مسؤل من انك باذخ ...و مسؤل من إنو مافي زول حاليا بكتب حكاوي يومية بلغة عالية زي لغلتك !!
اكتب ياخي ... ربما يرفع بك الله قليلا من قبحنا المنثور في هذا المكان !!

[طارق جبريل]

الاندومي..

حمودي: بابا انا جعان
- والله يا ولدي انا ذاتي مهوي كدي ارحكا نكابس التُكل
- المطبخ.. المطبخ يا بابا «الكوزينة»
- كمان جابت ليها مغربي.. امشي قدامي
- التلاجة فيها ويكاب يا ولدي ودمعة جداد تقول يا ليل.. عشرة دقايق واظبط ليك القراريص
ناس امك ديل ما اظن يجوا هسي
- يا بابا انا ما عايز قراصة
- يا ولدي القراريص دي بترقدنا كاويق ونمشي نديها تكية جنب التلفزيون
- لا ما عايص قراريص
- طيب عايز شنو يا فقُر انت
- اندومي
- شنوووووووو
- اندومي يا بابا
- دي موش الشعيرية البي شوربة ديك
- شوربة شنو يا بابا اندومي
- طيب ما نسوي لينا شعيرية بي لبن بتكون سنينة
- يا بابا انا عايز اندومي
- اها واندومي دي انا اجيبها ليك من وين
- الرف الفوق داك يا بابا امي قاعدة تختها هناك
- طيب النشوف.. دي
- ايوة يا بابا دي
- اها ودي بيسوووها كيف
- ماما قاعدة تخت في الحلة الصغيرة ام غتاية قزاز شوية موية وتختها في البوتجاز
- سمح.... اندومي يا محمد والدمعة ام اوراك الجداد قاعدة؟؟
سويناها وختيناها في الصحن وقعدنا في الطربيزة
- بابا موش قلت جعان
- جعااااان
- اكل لذيذة يا بابا
- أنا آكل البتاعة دي الممصرنة دي المتل الدودة الشريطية دي
انا ود جبرين ود نفيسي بت البغاديد آكل اندومي يا ولدي
جملة الايمان نفيسي كان عايشي وشافتني باكل في ديدانك دي يا ولدي
جملة الايمان كانت حلفت علي طلاق تاني ما اخش شبا..
اندومي يا حمودي
اندومي..
دي ولادة شنو دي..

[طارق جبريل]

لباس الدمورية...

تتذكروا لباس الدمورية داك..
البيعملوهوا من باقي الدمورية حقت المرتبة
ويقولوا ليك امشي جيب لستك بي شلن
اللستك داك البيكون ملفوف في ورقة بيضاء فيها كتابة بالازرق
وبيكون في نفس الرف مع السفنجات الصينية..
الحاجة تكون قاعدة في بنبر بتنجد في المرتبة
وتناديك وتمشي جنبها في نص الحوش تمرق ليك اللباس القديم
وتخليك ميطي وتقيس ليك اللباس الجديدابو استك
يا سلام ياخ لمن تلبسوا وتمشي تلعب بلي ولا كمبلت
ولمن تجي ترتاح تحت النيمة من اللعب تقعد تحكحك في الحتة
بتاعة اللستك ديك وتدي اللستك جرة كدة لي قدام
تلقى مكان اللستك كراضم كراضم كدة والحاجة خنقتو ليك
ولمن تتني وتنيش بي الجلة اللين وتديها مطة
ويقول كدي اللباس يقول كرررررررررررررررر والهوا يدقشك
وترجع تاني للحاجة وانت لابسه يخيطوهو ليك والابرة تديك طعنة
وانت تقعد تقول آي آي وتنقنق..
ياخي الفقر دة مرات فيه حاجات سمحة يعلم الله
هههههههههههههههههههه

[طارق جبريل]

علاء
رواية نادي السيارات للأسواني..


الأسواني في الرواية دي بيسوقك سوق..
كلما تقرأ فصل تشتاق تمشي للفصل التاني بي شوق كبير..
رغم انه مرات بتحس انه الفصل رواية في حد ذاتها..
لكن اثناء القراية بيخليك بالخيال تمشي للفصول التانية وتربطهم..
بيخليك تدخل في الشخصية كأنما تحكي عن نفسك وعن محيطك..
يمكن بحكم الدراسة في مصر في حاجات كتيرة كان ساهل علي اتخيلها
لكن رغم ذلك القوة السردية لدى الاسواني بتخليك سابح في حيز الرواية
وتجبرك لغته المحكية على المتابعة بذهن متقد ومتحفز..
المجتمعات المخملية تجد في الجنس متعة وخروج عن المألوف..
المجتمعات البسيطة تجد في التعاضد والتلاحم والمساعدة متعة فوق التصور..
رواية ممتعة حد التخمة..
ــــــــــــــــــــ
ملاحظة عابرة:
«المثلي» الموجود في رواية «عمارة يعقوبيان» كان سبب مثليته
خادم اسود كان يفرغ مكبوته ذاك في طفولته..
«المثلي حميد» الموجود في رواية «نادي السيارات»
هو اسود أيضا ونتاج لعلاقة محرمة..

لا تعليق

[طارق جبريل]

أنا مسؤل من كلامي يا طارق :biggrin::biggrin::biggrin: ...
مسؤل من انك أصلع ...و مسؤل من انك باذخ ...و مسؤل من إنو مافي زول حاليا بكتب حكاوي يومية بلغة عالية زي لغلتك !!
اكتب ياخي ... ربما يرفع بك الله قليلا من قبحنا المنثور في هذا المكان !!
يا أمين
أيضا سأكتب وفاء لخالد
الرجل دة يحتل في دواخلي كما هائلا من المشاعر..
رحمه الله..

ووفاء لعكود لعهد قديم بيني وبينه

ووفاء ليك انت ونبراس وسارة (ستنور) وكل الجميلين هنا

[طارق جبريل]

حنين..


ريحة لِبيني مقننة في مُغربيي..
صوت حملان ترضع في أماتها..
حَرِف أليل طبطاب في «دُوكي» من نار الجريد..
صوت نعجة تلحس في جناها بعد مخاض..
ريحة «لِبِى»..
«روبا» بي فطير في قدحا من الدبكر..
قرقوشا سمح و«طَبِق» كبابي الشاي..
قمرة من تالا «السقوف»..
نِغيمي ألت طمبور من لااااااااااافوووووق..
رمال وصُحبة ووَنَس..
ضو فانوس من تالا التُكل..
خُصل أسود من سواد الكون..
خِصر يتمايل متل «العرجون»..
عيون متل القمرة في سماها..
حكاوي حبوبة..
فاطنة السمح.. و«مرة الأمير»..
وشمطت قمطت..
دغشا بدري..
صلاة الصبح.. وليك يا الله الحمد..
«الكرجة» في «طاقة» التُكل..
«طير الجنة» في «كفاي الجداد»..
صوت قمريتين فوق «كروقتين»..
«طوريي» و«أربل» و«لبقة برسيم»..
«الجدول الفوووق»..
«الجدول التححححت»..
حوض الملوخية..
قصيبة «تَقنَت»..
عرقا يَخُر..
«فكة» ريق..
«قِفيز تَمُر»..
«دِفيقات» «خودور»..
«أم راس»..
«بركاوي» و«قنديلا» و«كُلوم» و«رَشا» و«تَمُود»..
رصيص «هديمات»..
قطر كريمة «اللحد» و«اللربع»..
لواري «قَبَلو»..
وشوق شديد ومحنة حدها السماء..
حبوبة «نفيسي»..
عمي «الطيب ونورة»..
«السواعير» و«البغاديد» و«القرونة» و«الكنيشاب» و«الكرسناب»..
«حبوبتي الفردوس بت الريح»..
«بت الجدي» و«خدوم» و«حواء بت الخضر ود كنيش»..
«سعاد بت الجدل».. «زينب بت ابو دية»..
برج ود درقي..

إنا لله ياخ

[أمين محمد سليمان]

يا أمين
أيضا سأكتب وفاء لخالد
الرجل دة يحتل في دواخلي كما هائلا من المشاعر..
رحمه الله..

ووفاء لعكود لعهد قديم بيني وبينه

ووفاء ليك انت ونبراس وسارة (ستنور) وكل الجميلين هنا و ده بالظبط العشم يا طارق !!

[طارق جبريل]

«شات» نفيسي وبت بلولة...


-نفيسي: ياولدي اقطعولي خلوني اللمشي البلد
- إنت ضايقي كدي فوق شنو
- يا حبيب قساي هناك حباني وصحباتي وبلدي وهني شيتكم كله كُتور
- نان نحن مانا حبانك.. بعدين مو ياها بت بلولة دي بنخليكي تنضمي معاها
- إنت باقيلي جنيت.. انضم معاها كيفن وانا هني وهي في البلود بهنوك
- أصبريلي دقايق انا بخليكي تنضمي معاها
- أنا ما قلتلك شيتكم كله ماهو ياهو..
(ضرب تليفون لي ود العم وقاله أدخل في الاسكايب وشغله وادي حبوبتك بلولة خلها التنضم معانا)
- أها جيبي إضنيك النخليكي تنضمي مع بت بلولة..
- ودة أكنو شنو الخرابات ديل العلي الدفيق اليابس في راس الشوكة ألت الكروق (سماعات اللاب توب)
- إنت بس غزيهن في اضنينك واتكلمي مع بت بلولة..
- ودي مني دي المتقولعي كدي وخراباتها في لاااابرة في الطلزيون دي (شاشة الاسكايب)
- دي بت بلولة انت بس انضمي معاها قوليلا ألو..
- نان الشي مالو مو متل تاالفون دكان ود تميم
- أماني ما حجتك كتيري إنت بس قولي ألو
- هلوووووووووووو
- أييي... نفيسي
- هي وووووووووووووووووووب علي إنت يا بلولة جيتي من وين الشي دة لا يبقى كافته جن
- شن عرفني آآآنفيسي تراهم البطان ديل قالولي أنضمي مع بت بغداد وغزولي خرابات سوود كدي
في اضنيني علي حصاية التمُر وختولم طلطزيون في عِبي وقالولي انضمي
- وحات نضري الشي لا يبقى جن.. كيفن اشوفك وانت في شبا
- آآآآبعرفه آآآنفيسي اصلو قلبي دة بقى يسوي في الررررب ررررب رررررب
- نان آآآبلولة مالك متقولعي كدي و«شــ.....» يتلولحن علي المشلعيب كدي.. جنيتي
- نان يا بت بغداد جانا جنس سموم من ولدوني ما شوفتة زيه.. دحين فطرتو شي
- أييي.. جابولم قراصة وشيتا كدي يقولوا السُجك هش ورُخوص متل البُطان
الملَقِنَهم للطهار..
- ههههههههههه هيي سوووووود علي ودة أكنو شنو
- آآآبعرفه تراني مسكتو لوغدتو أماني ماهو طاعم.. خليت «الحَرِف» ضومة ضومة وقَبَل عليهو ههههه
- إنت عاد آآآآبتتقدري باقيلي فسحوكي وشبعتي في الحوامة
- أسكتي يا بلولة.. نحن مو ميتين بهنوك ضومة ضومة
- كيفن
- من دخل هني دخلوني في أويضة فيها طلزيون وفيها شيتا كدي علي راس الكُنوش
قالوا كدي هبشوهوا إن كان كدي يجيني الهواااا بااااااااارد متل اللكني قاعدي في قيفة بحر الساموري
وقلت كدي اتشنقلت علي قفاي وقلعت توبي ورفع رجليني والمحفضة مدلدلة من نصي كدي
والهوااا دة ضربني في «جـ.....» لااااامن بقيت ارجف وقلتلم الشي أغمتو.. أنا ضومة بِرِد هههههه
- ههههههههه بت «الغلــ......»... ههههههههه (النسوان الكانن قعدات جنبها ختن الطرح في وشوشن
ميتات من الضحاك والبنات قامن جاريات كلو كلو)..
- هههههه نحن مانا عايشين يا بلولة ضومة ضومة موسى غمتني في بيتو في شبا وود عمو غمتك
بهنوك وبقينا نرمي في البُطان لانا فارزين شي لانا عارفين اليخربنا..
- ايييي يوما اسود عرسولنا القرونة ديل هههههههههههههه
- دحين قاعدي تشوفي الطيب ولدي..
- أيي شوفته امبارح مندلي علي تمركم
- لا يبقى الراجل «اللـــ...» ود «اللـ.....» حماهو يسقي برسيمو تاني وضبلن عليه
- بري آآآبعرفه لكن فتح ولدي جاء طالع قالي سقينا البرسيم.. إنت البرسيم اليغمتك
قاعدي في الطراوة البرسيم وين تطيري..
- اسكتي يا بلولة... جابولي «حُقة» جديييييييد وليها غتاية صفرا (علبة بندول فوار)
وأصلو عندهم صعوط هني يكهرب يخليكي راقدي علي الدِلِق ضومة ضومة
- لا يبقى أليل نصارى يا خرابة هههههههههه
- آآآبعرفه... وحاتك من أختلي سفة أموع علي كعك العيد ههههههههههههههههه
- الرسول آآآنفيسي جيبيلي منو
- إييي شيتا كتير يدوني ليه وأغمتو فشان أجيبو ليكي معاي.. وعندهم جيران كدي سمحين خلاص
جابولي تياب وملايات... أماني ماهن عندهم نسوان سمحات
- كيفن
- وحاتك يا بلولة المرة من شدة ماها سمحي أقرب أقرصها في «صُـ.....» واليدين متمرات وفيهن حِني
ماها متل ألتنا علي «نوريق» العيش.. ملولوة كدي في الاصابعين علي بيت الزنانين...
- صلاتي علي محمد
- أييي وقالولي حتى البكيات هني عندهم حني في قعر الرجلين
- هي سووووووووود علي
- نان إنت قايلاهن متل رجلينك المشققات علي قَعَر «القِحِف»
- ههههههه الله لا كسبك
- وحاتك يا بلولة الكرعين من تحت مللللللللللللللللللللللللس لا تعرفن كرعين لا تعرفن «ضراع» ههه
- وووااااااكغستنا نحن الرجلينا لدغن بالعقارب
- إييي العقارب اليلحقنك أبوي
- ههههههههههههههههههههههههه
- وأصلو بلولة ما شوفتلي واحدي ساولا مشاط.. وكتين التياب ديل يقعن من روسيهن
تلقاهن مدردمات شعرن علي درادم «البقنيي» ههههههههههههه

تيت تيت تيت تيت النيت قطع
هههههههههههههههههههههههههههههههههه

[طارق جبريل]

لِعِب لِعِب....


أربعة علب لبن وسكين قديمة.. وسفنجتين قدام..
شوية جمُر.. علبة صلصة.. شوية سلوك..
سلك طويل للدريكسون.. ضُل نيمة..
تفتح العلب الأربعة.. اتنين ترسم فيهم جنب اللوري..
وبي نص علبة الصلصة تعمل نص دائرة قدام وواحدة ورة للعجلات..
تمسك علبة تعمل فيها تنيتين قدام واتنين وراء للعجلات.. شاسي وكدة..
بي مسمار تبدأ تعمل فتحات في جنبات اللوري والشاسي..
تبدأ تتني العلبة الاخيرة من مقدمة اللوري وانت طالع،،
بالسلوك تربط الاجناب في الاول.. وبعداك تربط التصادم..
بعد تنتهي تمشي تخت علبة الصلصة جنب حلة الملاح بالجنبة كدة..
لحدي ما تسخن تمسكها تقد بيها السفنجات القديمة عشان تعمل اللساتك..
تسخن السيخة وتعمل ليك خُرم في اللساتك..
تركب لستكين قدام بي سلك في التنية القدامية من الشاسي وتضغطهم
بي قطعة من سير السفنجة في الجنبتين..
تركب اربعة لساتك في الجنبات الخلفية وبرضو تضغطهم بي قطعة من سير السفنجة في الجنبتين..
تدخل الدركسون في سلك اللستكين القداميات..
والجزء الفوق تعمل فيهو دائرة.. وتربطه بي سلوك ملونة كدة كنوع من الكشب..
تقوم تديهو لزة عشان تشوف حركة اللساتك ما تكون مضغوطة..
تملأ ضهرية اللوري «فِريد».. والشحنة كدة تكون ظبطت..
وتديها اتنين تلاتة عننننننن. عننننننننننننن..
وتبدأ تخيت شوارع الحلة بي لوريك دة..

كنا بنلعب ياخ..
بنلعب جد جد ياخ..

[طارق جبريل]

نوستالجيا...

ما أحلى تلك المساءات... برنامج (لقطات) وفريد عبد الوهاب... ABBA وThe Eagle.. صوت ديمس روسيس العذب.. وboney M.. وزمهرير رأس السنة.. ثلاثة عناقريب... تلفزيون في طربيزة.. جلسرين في الشباك وبرطمان كركار.. علبة فيكس.. شقوق في الرجلين والوش.. (يا ود اتمسح بالجلسرين).. (يمة البرد ياخي)... (اصبروا مديدة الحلبة قربت تنجض).. كانون وفتحة بالجنبة وشوية رماد وفحم يطقطق تحت (حلة مكرتبي) فيها مفراكة بالجنبة... وشوش تحت البطاطين شايلة (كورية رمضان كريم الصغووويري) بتتفرج في الساحر وهو يحول الاوراق إلى حمامة.. اندهاشات على المحيا.. تمتمات زولة حنينة:(الله يغتي عليكم ويطرح البركة فيكم)..(قوموا صلولكم ركعتين في السنة الجديدي دي فشان الله يفتحها عليكم).. فرقة جاز وابتسامة فريد.. سنة جديدة وإمنيات حد السماء.. فيلم (western) او اعادة لحلقة من (the little house).. صوت الريح في شباك الخشب.. صوت الطشت جنب الماسورة بعد أن عبثت به الريح... ثبات ونوم عميق.. ريحة (لبيني مقننة) في دغشا بدري.. بستلة فيها لقيمات.. صوف البطانية احمر احمر في الراس.. فرشة اسنان جنب الماسورة.. كباية (شوب).. خشم منفوخ من لقيمات مغتسة في الشاي..كورة شراب و(ضقِل) و(حجلة).. و(حلة سخينة) وصاج وحطب و(طبطاب) وونسة فوق الحيط على ضهر البنابر.. ومحبة لله وشوق للبلد..

إنا لله ياخ

[طارق جبريل]

شووووووق..

المُغربية ياخ.. المغربية ديك.. وتباشير الخريف هابة كدة..
مساءات الخرطوم كانت عجيبة ياخ..
وتسمع صوت الملاية وهي بتهب في العنقريب..
ويجيك صوت عمنا محمد صالح ينادي للمغرب.. صوت رخيم وجميل..
رجال الحي وهم بي عراريقهم وسراويلهم يضحكون وهم ماشين الصلاة..
ريحة الشاي المقنن والفانوس في طربيزة المكوة..
ظلال امك هي داخلة وهي طالعة من التكل..
ريحة اللقيمات.. كباية الشُب.. بنبر الحبال وبنبر البلاستيك..
الماشة يحركوا بيها الجمُر عشان براد الشاي..
صوت غنم خالتنا أم النصر وهي بترضع في العتتان..
الهبابة معلقة في مسمار قدام باب التُكُل..
علبة «الختة» في عنقريب صغير جنب التكل وفيها قلم كوبيا واسامي ناس الختة..
صوت حمامة انزلقت من راس الصفيحة المعلقة في بورج الحمام..
«هنا أم درمان».. الرادي معلق من جلدة كدة في مسمار كبير في شِعبَة الراكوبة..
نشرة تمانية.. اخبار الموت في ارجاء هذا المليون ميل وأماكن الدفن..
خلف الله حمد:
أنــا فــي الـتـمني ديـمـه هـديلي سـاجع
مـا لـقيت لـي مـغيث ولا لـقيت لـي مـراجع

الله الله ياخ..

داير أشوف حبيبي اليوم داك شفته رايق ودمعه ناقع
أســود شـعـره حـالـك أمـا صـفاره فـاقع
تـتـلاصف خــدوده لا حـجـاب ولا بـراقـع
أشـوف لـعسو ونـواعسو جـل الـباري صانع
أشـوف فـي خـده شخصي وفي صدري المضارع

صوت الريق والشيالين.. طرب من جوة ياخ... من جوة شديد

يـفـر خـيت بـسـمه يشبه بـرقـاً لـيـله هـاجـع
يـرفـع لــي رشـاشـه يـسبل نـظره واقـع
دايــر أشـوفو غـافل ودايـر أشـوفو جـاذع
محنن دون قنله وحدو وتوبو واقع
يـتـغطى بــي سـواعده ويحنو كـانه واجـع
ويلتجى بى مرافقه واطراف المضاجع
وتتلب فوق شفاهه لؤلؤة المدامع
يــردد لــي نـغـيماً تـشتاق لـي الـمسامع

عجيب يا ود الرضي انت ياخ كلامك بيدخل توووووووووش للوجدان

أعـاين فـيه وأضـحك وأجـري وأجـيه راجـع
مـتـلاعب لـيـس إلا مــا مـوضوع مـطامع
أقـيـس بـالليل بشـعره ألـقى الـفرق شـاسع
اقيس الفم بودعه القى الودع واسع
دي مــا بـيـلقاها زول زي صـيـده نـاجـع

وصف مبالغة ياخ.. حُب... حُب شديد..

صوت وهمهمة غناء وصوت صحون بتتغسل..
بختها العِدة بيك.. سعيدة في عضمها دة.. سعيدة ياخ..
سعيدة ليفة العدة في أناملك..
سعيد الجردل الشاف عيونك ومويته الوسخانة راقت..
سعيدة السوستة وعرق الرقبة نازل فيها..
سعيدة الريح البتمايل ضفايرك ياخ..

قمرة في نص السماء.. رفعة رجل حد الركبة..
حِلِم بعيد.. جميل ممتع.. أماني حدها السماء..
ضمة إيد.. همسة ريد.. بسمة ثقر..

«هنا لندن».. صوت «المدفعجي» تجوب أركان الكون..
«صوت العرب».. الأبنودي يقرأ «يا عبد الرحمن»

ثم..
صوت مسجل ما بابه مكسور..

أي قليل يا طيف أقيف وأرجاني
وين فايتني عابر
وأنا شن حارس وراك أنا تاني
ياني معاك مسافر
وين حتى الطيف رحل خلاني
ما طيّب لي خاطر

الله عليك يا محمد كرم الله ياخ..
رنة طمبور تدخل الوجدان من غير استئذان..
ومحمد سعيد دفع الله يجعل الحروف تتموسق..

رنة طمبور تاني:
حبي فارق تاني ما ظنيتو يرجع..
آه يا خلايا لي قلبي الموجع..

إنا لله ياخ..

[طارق جبريل]

أبو كباس..

يا الحبيبين امبارح ماني قربت اموت..
الشي بالليل مسكني ليكم ابو كباس
انا عارفها الفاصوليا دي بتسويها فيني.. لقيتها بايتي في التلاجة يا حلات الدنيي عليها
سخنتها وقعدت ألوغد فيها لامن ادشيت وبطني دي اتمبلت علي زير السبيل..
قلت كدي اترحمنت ومشًيت علي السرير ونومت..
ان كان يجيني ليكم ابو كباس... وتظهري لي شويفعي كل ما تقرب مني
الشعر دة يقيف علي اللاشميق ويطول والوش يتفلطح علي قراصة الطيانة..
ومتل محمد ولدي ماسك في سروالي وخايف ويشيل ينصل فيه وانا ارفع
وافتشلي في عصايي ولا نصيبي فشان اضربها الخرابة دي
وهي تمشي علينا واليدين قلبن ضلافين ضومة ضومة..
ومحمد ولدي اصلو من الخوف اتشعلق في السروال لامن قطع التكة..
واتاريني انا نايم بقيت افتفت واناتق.. وشويتين جابتلها كواريك ضومة ضومة
ووووووووووووو هيييييييك ووووووووووووك
لامن كواريكي كترن ادوني لكزة
وكتين صحيت بي شوووي مديت يدي لااااااتحت قلت تبقى
فاصولية الجن دي مرقت واللحاف باظ وريحتو بقت صِنِني
ربكم رب الخير ما لقيتلي شي
الله يقلع الفاصوليا تاني آآبتدخل بيتي

[طارق جبريل]

الله يا الخرطوم ياخ..
العشش.. عم آدم بتاع التموت تخلي.. قراصة النبق... القنقليز في الطشاتة.. عم هارون
بتاع الشُرُكٓة..الاقاشي.. التبش بالشطة.. المسكيت المكوم في شوال كل كوم بي قرش
بص الهنقاري والكومساري بيكورك: الغالي الغالي.. بص البعيو وسواقه اسحق جربكس
استوديو سمعة الذي لا نزوره الا ونحن مقبلون على احد امتحانات الشهادة مع (تفة)
لا تخطئها الكاميرا... حين تحتار في احد اسئلة الامتحان لا تجد غير النظر في
هذه (التفة) في بطاقة رقم الجلوس علها تسعفك بالاجابة الصحيحة...
عم موسى بتاع البرسيم وامامه رُبط القش مكومة وهو يمضغ شيئا اصفر اللون
مدرسة فاطمة عبد الرحيم و(البرتق) طالع و(حلات الدنيا) عليه.. استاذ بشير
وصوت العنج وحاجة النعمة بتاعة الفطور ومدرسة بشير... حاجة حفصة بتاعة التسالي
عثمان ضيق وعلووب والبهجة التي لا تنتهي... السوق الشعبي.. اكشاك العصير
وريحة الجوافة وصوت الخلاطة ودق المصفا في جك الخلاطة (كككككككككك)
وصوت محمد الامين: ما هو باين باين في العيون... اكشاك الجرائد ومجلة (الصقر)
وصورة رومنيغة في الغلاف.. طبلية السفنجات الصينية... بتاع العراريق والسراويل
محل الصندل والمحلبية والسرتية.. محلات ود الكشامر... تياب العيلفون...
البصات السفرية... حصاحيصا حصاحيصا حصاحيصا.. كوستي كوستي كوستي
سنار سنار سنار... مناقل مناقل مناقل.. ربك ربك ربك..
تسخين السواق للمكنة عععععععن ععععععععععن عععععععععععععن...
صوت كمساري وسط ضجيج المدن هذا: الللللليييييييل نحن ولا بلد نقعد نقوم علي كيفنا..
صوت شافع مباري شبابيك البصات: لبان ماكسي... مرايات مرايات...
الكلية المهنية وصوت الغفير يطرد في اولاد الامتداد جايين يلعبوا كورة في الميدان..
ميدان الربيع... محمد كجاجة جاري بالكورة في الجناح الايمن... طرمبة حجازي..
الديم.... الديم... الديم وصوت بوب مارلي: نو ومان نووو كراي.. الراستات...
ديم القنا... العمارات... اسكريم واحد واربعين(اخخخخخخ انا)... (شدر) التمرهندي
اولاد المصارين البيض... مقابر فاروق... محطة الغالي... الخرطوم الجديدة..
الناظر عبد الحميد مدني.. استاذ قناوي بتاع الرياضيات.. استاذ سيف بتاع الاحياء
جامع شروني... السكة حديد.. (صعلوق المحطة).. قطر كريمة... كلية الطب..
المستشفى الجنوبي... شارع الاسبتالية... المعرض التشكيلي في (المريديان)...
استوديو فلاش.. كماسرة الحافلات: شرق شرق شرق... ظلط ظلط ظلط..
الجامع الكبير... مكتبة الجامع الكبير... الممتاز في الرياضيات.. مذكرات
عبد الرحيم عمسيب للكيمياء.... بتاعين السبح والمساويك.. بتاعين الكتب القديمة..
شحادين الجامع الكبير: كريمو ربنا كريمو... كريمو ربنا كريمو...
شارع الجمهورية... اتني.. محلات المسرة... محلات باتا..

انا لله يا الخرطوم ياخ

[نبراس السيد الدمرداش]

غايتو بس الطلقوها وبالا في الرجوع
طيب تعال الصباح
طوالي لملمت حاجاتك وجيت جاري
انا لو طردوني عقاب الليل دا حتكون انت السبب

ياخي تنعدل عليك يا رب

[مرافي]

الله يا الخرطوم ياخ..
العشش.. عم آدم بتاع التموت تخلي.. قراصة النبق... القنقليز في الطشاتة.. عم هارون
بتاع الشُرُكٓة..الاقاشي.. التبش بالشطة.. المسكيت المكوم في شوال كل كوم بي قرش
بص الهنقاري والكومساري بيكورك: الغالي الغالي.. بص البعيو وسواقه اسحق جربكس
استوديو سمعة الذي لا نزوره الا ونحن مقبلون على احد امتحانات الشهادة مع (تفة)
لا تخطئها الكاميرا... حين تحتار في احد اسئلة الامتحان لا تجد غير النظر في
هذه (التفة) في بطاقة رقم الجلوس علها تسعفك بالاجابة الصحيحة...
عم موسى بتاع البرسيم وامامه رُبط القش مكومة وهو يمضغ شيئا اصفر اللون
مدرسة فاطمة عبد الرحيم و(البرتق) طالع و(حلات الدنيا) عليه.. استاذ بشير
وصوت العنج وحاجة النعمة بتاعة الفطور ومدرسة بشير... حاجة حفصة بتاعة التسالي
عثمان ضيق وعلووب والبهجة التي لا تنتهي... السوق الشعبي.. اكشاك العصير
وريحة الجوافة وصوت الخلاطة ودق المصفا في جك الخلاطة (كككككككككك)
وصوت محمد الامين: ما هو باين باين في العيون... اكشاك الجرائد ومجلة (الصقر)
وصورة رومنيغة في الغلاف.. طبلية السفنجات الصينية... بتاع العراريق والسراويل
محل الصندل والمحلبية والسرتية.. محلات ود الكشامر... تياب العيلفون...
البصات السفرية... حصاحيصا حصاحيصا حصاحيصا.. كوستي كوستي كوستي
سنار سنار سنار... مناقل مناقل مناقل.. ربك ربك ربك..
تسخين السواق للمكنة عععععععن ععععععععععن عععععععععععععن...
صوت كمساري وسط ضجيج المدن هذا: الللللليييييييل نحن ولا بلد نقعد نقوم علي كيفنا..
صوت شافع مباري شبابيك البصات: لبان ماكسي... مرايات مرايات...
الكلية المهنية وصوت الغفير يطرد في اولاد الامتداد جايين يلعبوا كورة في الميدان..
ميدان الربيع... محمد كجاجة جاري بالكورة في الجناح الايمن... طرمبة حجازي..
الديم.... الديم... الديم وصوت بوب مارلي: نو ومان نووو كراي.. الراستات...
ديم القنا... العمارات... اسكريم واحد واربعين(اخخخخخخ انا)... (شدر) التمرهندي
اولاد المصارين البيض... مقابر فاروق... محطة الغالي... الخرطوم الجديدة..
الناظر عبد الحميد مدني.. استاذ قناوي بتاع الرياضيات.. استاذ سيف بتاع الاحياء
جامع شروني... السكة حديد.. (صعلوق المحطة).. قطر كريمة... كلية الطب..
المستشفى الجنوبي... شارع الاسبتالية... المعرض التشكيلي في (المريديان)...
استوديو فلاش.. كماسرة الحافلات: شرق شرق شرق... ظلط ظلط ظلط..
الجامع الكبير... مكتبة الجامع الكبير... الممتاز في الرياضيات.. مذكرات
عبد الرحيم عمسيب للكيمياء.... بتاعين السبح والمساويك.. بتاعين الكتب القديمة..
شحادين الجامع الكبير: كريمو ربنا كريمو... كريمو ربنا كريمو...
شارع الجمهورية... اتني.. محلات المسرة... محلات باتا..

انا لله يا الخرطوم ياخ


قت لي ياود جبريل كان غلبتك الاجابة بتعاين في التفه امكن تفتح مخك :biggrin:
احلى من كدا ما قريت رغم انها سرد لواقع واماكن واسماء
لكنها اطعم من كتير من قصص قريتا
ياخ اغلط وعاين في التفة وبعدين ادينا الحكي الطاعم دا
يخدر قلمك ويديك العافية
انا لله يا ود جبريل ياخ ..
بس لكن لقيتك قديم خلاص...:biggrin:

[عكــود]

اكتب ياخي ... ربما يرفع بك الله قليلا من قبحنا المنثور في هذا المكان !!

يا أمين
أيضا سأكتب وفاء لخالد
الرجل دة يحتل في دواخلي كما هائلا من المشاعر..
رحمه الله..

ووفاء لعكود لعهد قديم بيني وبينه

ووفاء ليك انت ونبراس وسارة (ستنور) وكل الجميلين هنا

و ده بالظبط العشم يا طارق !!شكراً أمين ...
شكراً طارق ...
شكراً لكل من رابض/ت ولم يبرح/تبرح مكانه/ها هنا.
شكراً على الدرس.

ليت قومي يعلمون!

ولا أبرئ نفسي.

[آبري]

وهادي قعده ....
عليم الله الشي اكنها قدامي .... وصف حد الوصف ....


كسره
وا شريري يا يمه .... محروم

[طارق جبريل]

غايتو بس الطلقوها وبالا في الرجوع
طيب تعال الصباح
طوالي لملمت حاجاتك وجيت جاري
انا لو طردوني عقاب الليل دا حتكون انت السبب

ياخي تنعدل عليك يا رب


:biggrin::biggrin::biggrin::biggrin:
نبروسة يا ستهم
حا اهريكم هري غايتو هنا هههه

[طارق جبريل]

قت لي ياود جبريل كان غلبتك الاجابة بتعاين في التفه امكن تفتح مخك :biggrin:
احلى من كدا ما قريت رغم انها سرد لواقع واماكن واسماء
لكنها اطعم من كتير من قصص قريتا
ياخ اغلط وعاين في التفة وبعدين ادينا الحكي الطاعم دا
يخدر قلمك ويديك العافية
انا لله يا ود جبريل ياخ ..
بس لكن لقيتك قديم خلاص...:biggrin:

ياخي انا ما اقدم من امين محمد سليمان دة
:biggrin::biggrin::biggrin::biggrin::biggrin:

[طارق جبريل]

شكراً أمين ...
شكراً طارق ...
شكراً لكل من رابض/ت ولم يبرح/تبرح مكانه/ها هنا.
شكراً على الدرس.

ليت قومي يعلمون!

ولا أبرئ نفسي.

حبيبنا الذي هناك
ازيك ياخ

[طارق جبريل]

وهادي قعده ....
عليم الله الشي اكنها قدامي .... وصف حد الوصف ....


كسره
وا شريري يا يمه .... محروم

هيا خرابة انت حي :biggrin::biggrin:
قالولي شايل حالي في قعدات ناس البركل :biggrin::biggrin::biggrin:

[أحمد طه]

حنين..

«سعاد بت الجدل».. «زينب بت ابو دية»..
برج ود درقي..

إنا لله ياخ


طارق سلامات واريتك انت طيب ،
في الباقيلي إنت قاصد سعاد بت الجُضُل ، و قمت لقيت (الجضل) دا يسبب لك الحرج مع ناس الجزيرة وكدة:biggrin::gap::biggrin:

بالمناسبة : الجضل عند الشايقية هو (الجذل) وهو الجِذْل: أَصل الشيء الباقي من شجرة وغيرها بعد ذهاب الفرع، والجمع أَجذال وجِذال وجُذُول وجُذُولة.
والجِذْل ما عَظُم من أُصول الشجر المُقَطَّع،
(لسان العرب)

و مالك ما طريت وداحمد ود نصر
البقية الباقية من الجيل الذهبي

التحايا للبروف الجميل

[أمين محمد سليمان]

يا اخوانا شوفو لينا سكة إنتساب للشايقية !! :cool:

الحاجة المحيراني ... الطريقة البكتب بيها طارق المحادثات بين شخوص روياتو و جرهم للكلام ده ما سمعت بيه أصلا ... ما عارف هل طارق متبلي على الناس دي ... ولا اصحابي الشوايقة حناكيش !! :biggrin:

[أمين محمد سليمان]

غايتو بس الطلقوها وبالا في الرجوع
طيب تعال الصباح
طوالي لملمت حاجاتك وجيت جاري
انا لو طردوني عقاب الليل دا حتكون انت السبب

ياخي تنعدل عليك يا رب


يا نبرا ... طارق زي الكان مزنوق بالكتابات دي و جاء فكاها هنا !! :biggrin:

ياخي ده جمال ما بعدو جمال !!

[أمين محمد سليمان]

انا لله يا ود جبريل ياخ ..
بس لكن لقيتك قديم خلاص...:biggrin: طارق صلعتو ساي أقدم مننا !! :biggrin::biggrin:

[AMAL]

الاندومي..

حمودي: بابا انا جعان
- والله يا ولدي انا ذاتي مهوي كدي ارحكا نكابس التُكل
- المطبخ.. المطبخ يا بابا «الكوزينة»
- كمان جابت ليها مغربي.. امشي قدامي
- التلاجة فيها ويكاب يا ولدي ودمعة جداد تقول يا ليل.. عشرة دقايق واظبط ليك القراريص
ناس امك ديل ما اظن يجوا هسي
- يا بابا انا ما عايز قراصة
- يا ولدي القراريص دي بترقدنا كاويق ونمشي نديها تكية جنب التلفزيون
- لا ما عايص قراريص
- طيب عايز شنو يا فقُر انت
- اندومي
- شنوووووووو
- اندومي يا بابا
- دي موش الشعيرية البي شوربة ديك
- شوربة شنو يا بابا اندومي
- طيب ما نسوي لينا شعيرية بي لبن بتكون سنينة
- يا بابا انا عايز اندومي
- اها واندومي دي انا اجيبها ليك من وين
- الرف الفوق داك يا بابا امي قاعدة تختها هناك
- طيب النشوف.. دي
- ايوة يا بابا دي
- اها ودي بيسوووها كيف
- ماما قاعدة تخت في الحلة الصغيرة ام غتاية قزاز شوية موية وتختها في البوتجاز
- سمح.... اندومي يا محمد والدمعة ام اوراك الجداد قاعدة؟؟
سويناها وختيناها في الصحن وقعدنا في الطربيزة
- بابا موش قلت جعان
- جعااااان
- اكل لذيذة يا بابا
- أنا آكل البتاعة دي الممصرنة دي المتل الدودة الشريطية دي
انا ود جبرين ود نفيسي بت البغاديد آكل اندومي يا ولدي
جملة الايمان نفيسي كان عايشي وشافتني باكل في ديدانك دي يا ولدي
جملة الايمان كانت حلفت علي طلاق تاني ما اخش شبا..
اندومي يا حمودي
اندومي..
دي ولادة شنو دي..


:biggrin:

الزوج
- طبختيلنا ايه النهار دا?
الزوجة
- اندومي ياحبيبي
الزوج
- لمي اندومك وروحي بيت ابوك

هههه


شكرا ود جبريل متعة والله

[AMAL]

شكراً أمين ...
شكراً طارق ...
شكراً لكل من رابض/ت ولم يبرح/تبرح مكانه/ها هنا.
شكراً على الدرس.

ليت قومي يعلمون!

ولا أبرئ نفسي.


وكل من شاكل وتشاكل
ومن التزم بالحياد الما ايجابي :tongue:

مداخلة في شكل مطاعنة :wink:

[اشرف السر]

:gap::gap:

كلام زي الاندومي يا طارق


بس جيت عشان اقرا كلامك بتاع امس تاني...
الجماعة بعد ما اشتروا الحاجات من سيد الخدار وبتاع اللحمة

وينو:wink::wink:

[طارق جبريل]

طارق سلامات واريتك انت طيب ،
في الباقيلي إنت قاصد سعاد بت الجُضُل ، و قمت لقيت (الجضل) دا يسبب لك الحرج مع ناس الجزيرة وكدة:biggrin::gap::biggrin:

بالمناسبة : الجضل عند الشايقية هو (الجذل) وهو
(لسان العرب)

و مالك ما طريت وداحمد ود نصر
البقية الباقية من الجيل الذهبي

التحايا للبروف الجميل
ياها ذااااتها يا ود طه وحات نضري :biggrin::biggrin::biggrin::biggrin:

[طارق جبريل]

يا اخوانا شوفو لينا سكة إنتساب للشايقية !! :cool:

الحاجة المحيراني ... الطريقة البكتب بيها طارق المحادثات بين شخوص روياتو و جرهم للكلام ده ما سمعت بيه أصلا ... ما عارف هل طارق متبلي على الناس دي ... ولا اصحابي الشوايقة حناكيش !! :biggrin:

يا اخوي انت مصاحب شوايقة حناكيش عشان يقولوا عليك صغنبوتي:biggrin::biggrin:

[طارق جبريل]

يا نبرا ... طارق زي الكان مزنوق بالكتابات دي و جاء فكاها هنا !! :biggrin:

ياخي ده جمال ما بعدو جمال !!

الله يسترنا من الزنقة عاد:biggrin::biggrin::biggrin:

[طارق جبريل]

طارق صلعتو ساي أقدم مننا !! :biggrin::biggrin:

اها يا الخنفس:biggrin::biggrin::biggrin:

[طارق جبريل]

:biggrin:

الزوج
- طبختيلنا ايه النهار دا?
الزوجة
- اندومي ياحبيبي
الزوج
- لمي اندومك وروحي بيت ابوك

هههه


شكرا ود جبريل متعة والله
:biggrin::biggrin::biggrin:
حباب امال والاندومي :tongue:

[طارق جبريل]

:gap::gap:

كلام زي الاندومي يا طارق


بس جيت عشان اقرا كلامك بتاع امس تاني...
الجماعة بعد ما اشتروا الحاجات من سيد الخدار وبتاع اللحمة

وينو:wink::wink:
حايم بي هنا يا حبيب فتش علي البوست قديم:
حفرة دخان سكينة بت ود جيب الله

[طارق جبريل]

الخرطوم..


العشش.. عم آدم بتاع التموت تخلي.. قراصة النبق... القنقليز في الطشاتة.. عم هارون
بتاع الشُرُكٓة..الاقاشي.. التبش بالشطة.. المسكيت المكوم في شوال كل كوم بي قرش
بص الهنقاري والكومساري بيكورك: الغالي الغالي.. بص البعيو وسواقه اسحق جربكس
استوديو سمعة الذي لا نزوره الا ونحن مقبلون على احد امتحانات الشهادة مع (تفة)
لا تخطئها الكاميرا... حين تحتار في احد اسئلة الامتحان لا تجد غير النظر في
هذه (التفة) في بطاقة رقم الجلوس علها تسعفك بالاجابة الصحيحة...
عم موسى بتاع البرسيم وامامه رُبط القش مكومة وهو يمضغ شيئا اصفر اللون
مدرسة فاطمة عبد الرحيم و(البرتق) طالع و(حلات الدنيا) عليه.. استاذ بشير
وصوت العنج وحاجة النعمة بتاعة الفطور ومدرسة بشير... حاجة حفصة بتاعة التسالي
عثمان ضيق وعلووب والبهجة التي لا تنتهي... السوق الشعبي.. اكشاك العصير
وريحة الجوافة وصوت الخلاطة ودق المصفا في جك الخلاطة (كككككككككك)
وصوت محمد الامين: ما هو باين باين في العيون... اكشاك الجرائد ومجلة (الصقر)
وصورة رومنيغة في الغلاف.. طبلية السفنجات الصينية... بتاع العراريق والسراويل
محل الصندل والمحلبية والسرتية.. محلات ود الكشامر... تياب العيلفون...
البصات السفرية... حصاحيصا حصاحيصا حصاحيصا.. كوستي كوستي كوستي
سنار سنار سنار... مناقل مناقل مناقل.. ربك ربك ربك..
تسخين السواق للمكنة عععععععن ععععععععععن عععععععععععععن...
صوت كمساري وسط ضجيج المدن هذا: الللللليييييييل نحن ولا بلد نقعد نقوم علي كيفنا..
صوت شافع مباري شبابيك البصات: لبان ماكسي... مرايات مرايات...
الكلية المهنية وصوت الغفير يطرد في اولاد الامتداد جايين يلعبوا كورة في الميدان..
ميدان الربيع... محمد كجاجة جاري بالكورة في الجناح الايمن... طرمبة حجازي..
الديم.... الديم... الديم وصوت بوب مارلي: نو ومان نووو كراي.. الراستات...
ديم القنا... العمارات... اسكريم واحد واربعين(اخخخخخخ انا)... (شدر) التمرهندي
اولاد المصارين البيض... مقابر فاروق... محطة الغالي... الخرطوم الجديدة..
الناظر عبد الحميد مدني.. استاذ قناوي بتاع الرياضيات.. استاذ سيف بتاع الاحياء
جامع شروني... السكة حديد.. (صعلوق المحطة).. قطر كريمة... كلية الطب..
المستشفى الجنوبي... شارع الاسبتالية... المعرض التشكيلي في (المريديان)...
استوديو فلاش.. كماسرة الحافلات: شرق شرق شرق... ظلط ظلط ظلط..
الجامع الكبير... مكتبة الجامع الكبير... الممتاز في الرياضيات.. مذكرات
عبد الرحيم عمسيب للكيمياء.... بتاعين السبح والمساويك.. بتاعين الكتب القديمة..
شحادين الجامع الكبير: كريمو ربنا كريمو... كريمو ربنا كريمو...
شارع الجمهورية... اتني.. محلات المسرة... محلات باتا..

انا لله يا الخرطوم ياخ

[طارق جبريل]

بعد تكتل الحفلة الفي المربع القدااااام داك تجي داخل البيت مهوي شديد...
تكابس بي جاي بي جاي تلقى القصة ناشفة معدمة كتاح النار...
ترفع الطبق تلقى ليك باقي كسرة .. تختها في صحن الطلس
وتقطع فوقها بصلة وطماطماية وتديها شوية ملح وشمار وزيت سمسم
وتعفصها وتعجنها مع بعد كدة وتفعد تلوغد وانت قاعد في بنبر جنب التكل..
تقش الصحن وتقعد تمصمص في اصابعينك وتقوم تغسل ايدك
وتغشي الزير تكتح ليك كباية موية... وتمشي علي العنقريب
تلقى الملاية بتهبهب والقمر دة خانس ولابد ليك..
ترٓجٍع شريط الحفلة الكتلتها وتسرح في دنياك...
يا ربي شافتني لمن اشرت ليها...
ديني انا ياخ لمن الخصلة تنزل في وشها وهي بترقص..

ليالي الخرطوم... انا لله ياخ

[أمين محمد سليمان]

يرفع لمزيد من القراءة!

[أمين محمد سليمان]

إنذار أول لطارق !!

[طارق جبريل]

إنذار أول لطارق !!

:biggrin::biggrin::biggrin::biggrin:

[طارق جبريل]

مرة قمت من النوم مهجوم عشان امشي المدرسة
يا دوب اتسوكت بي المعجون ابو صفقات داك ويحرقك في لهاتك داك..
والجو كان برد ناشف.. وعيوني بي قضاهن..
شلت كراس العربي والحساب من شباك الاوضة اللاااجوة
وجيت لقيتلي خرتايتين في شناط العنقريب لفحتلي واحدي فيهن
ودخلت فيها الكراريس ومعاهن اللقيمات..
بعد الطابور دخلت الفصل والشبابيك مقفلات وكلنا مكنكشين من البرد..
بالله طلعت كراس الحساب لقيتو مبرقع بي زيت اللقيمات
إن كان أشملكم ريحة صُنان الغنم في الكراس..
رفعت الخرتاية شميتها لقيتها خرتاية العتوت..
اتاريها امي رحمها الله طلقت العتوت بعد حلبت اللبيني وختت الخرتايي جنب ألتي..
هسي يقولولك تخريج أواب من الروضة..
هاكم التراب دي في خشمكم..

[مهند الخطيب]

مرة قمت من النوم مهجوم عشان امشي المدرسة
يا دوب اتسوكت بي المعجون ابو صفقات داك ويحرقك في لهاتك داك..
والجو كان برد ناشف.. وعيوني بي قضاهن..
شلت كراس العربي والحساب من شباك الاوضة اللاااجوة
وجيت لقيتلي خرتايتين في شناط العنقريب لفحتلي واحدي فيهن
ودخلت فيها الكراريس ومعاهن اللقيمات..
بعد الطابور دخلت الفصل والشبابيك مقفلات وكلنا مكنكشين من البرد..
بالله طلعت كراس الحساب لقيتو مبرقع بي زيت اللقيمات
إن كان أشملكم ريحة صُنان الغنم في الكراس..
رفعت الخرتاية شميتها لقيتها خرتاية العتوت..
اتاريها امي رحمها الله طلقت العتوت بعد حلبت اللبيني وختت الخرتايي جنب ألتي..
هسي يقولولك تخريج أواب من الروضة..
هاكم التراب دي في خشمكم..


دي ياها زاتا (سوتيان) الغنماية والله ...:biggrin:

عاين ياطارق وللا اسمك منو انت ، انا ح استغل البوست بتاعك ده عشان أنزل فيهو حكايات الامامة بت المقدم عليها الرحمة ، مابتحمل مسئولية بوست باسمي تكون فيهو الحكايات دي وانت أساسا مارق للربا والتلاف ، فما تعمل لي فيها البوست حقك واسمه حكاوي طارق جبريل وللا فاتحو ليك البروف ..

[أمين محمد سليمان]

عاين ياطارق وللا اسمك منو انت ، انا ح استغل البوست بتاعك ده عشان أنزل فيهو حكايات الامامة بت المقدم عليها الرحمة ، مابتحمل مسئولية بوست باسمي تكون فيهو الحكايات دي وانت أساسا مارق للربا والتلاف ، فما تعمل لي فيها البوست حقك واسمه حكاوي طارق جبريل وللا فاتحو ليك البروف .. يا زول مرحب بيك و مرحب بالامامة بت المقدم عليها الرحمة ... لكني غير مسؤل عن أي كتابة تكتبها بالذات بعد ما شفت صورك و إنت منفعل ! :biggrin::biggrin:

[طارق جبريل]

دي ياها زاتا (سوتيان) الغنماية والله ...:biggrin:

عاين ياطارق وللا اسمك منو انت ، انا ح استغل البوست بتاعك ده عشان أنزل فيهو حكايات الامامة بت المقدم عليها الرحمة ، مابتحمل مسئولية بوست باسمي تكون فيهو الحكايات دي وانت أساسا مارق للربا والتلاف ، فما تعمل لي فيها البوست حقك واسمه حكاوي طارق جبريل وللا فاتحو ليك البروف ..

:biggrin::biggrin:
شوت سااااااي يا الحبيب

[طارق جبريل]

الليلي قلت كدي دخلت السوبر ماركت اشتريتلي صابونة ألت (دوڤ)..
أكنها انجلينا جولي دي احسن مني في شنو...
يعني فشان قاعدي تعضي شلوفتها التحت بقت تستحمى بالدوڤ..
انا ذاتي قاعد اعضي في صباعي...
وكمان يا الحبيبين اشتريتلي ليفي الزي حلاوة لكوم ديك..
لا تعرف تتمشكبها لا تعرف تتصور جنبها..
وقلت كدي فتحت الدوش ابو راسا ابيض داك العلي كعك العيد المضرضرنلو السكر..
ماهو متل أليلنا الزمان داك العلي طارة الكلتش والمويي تجي نازلي منه دراشة دراشة
زي القاعد تغربلك في تراب لي (ملطم) البياض أليل الأوّٓض..
اها المويي هني تجي نازلي حنيني كدي ولزيزوني متل التكنك نازل فوقك بسكويت
العيد من المفرمة... شيتا كدي التقول في زول قاعد يٓقٓردِن في ضهرك ويجكن فيهو..
وقلت كدي اديت الـ(دوڤ) مشكة في الليفي السمحي دي..
والريحي الحٍلوي جات طاقشاني في نخرتي.. والخرابة التقول فيها كريم أليل يدين
أليل البنات داك اليقولوا (أتريكس)... ناااااااعمي ويدينك يبقن ملللللللللس
وحات نضري بس ناقصات (القٍميع)...
وقلت كدي اخدتلي مشكة والرغوة دي نزلت فوقي.. اصلي اتخيلت نفسي
الممثلين البيجيبوهم في الأفلام غاتسين في الصابون ومارقين كرعيهم في البانيو
لكن لقيت الكرعين مكلوجات...
نان انا بعد انتهيت من المشكي ما حسيتلكم اني بقيت من عٌلي القوم..
حليل زمن الصابونة (البيوضي) بتاع غسيل العدة داك
وكتين تكون داير تستحمى وتلقى اختك دايري تغسل العِدي وتقوم كدي
تجيب السكين وتٓقلِم الصابونة نصين فشان انت تمشي علي حمامك
واختك تغسل عدتها في الطشت الجنب الماسورة...
وحليل الليفي ام بذر ديك وكتين تتمشكبها وتجي طالع
البذر ينزرلقلك من تحت العراقي والسروال...
هههههههههههههه

[الجيلى أحمد]

ماهو متل أليلنا الزمان داك العلي طارة الكلتش والمويي تجي نازلي منه دراشة دراشة
زي القاعد تغربلك في تراب لي (ملطم) البياض أليل الأوّٓض..


حليل زمن الصابونة (البيوضي) بتاع غسيل العدة داك
الله لا كسبك
انت من الزمن داك حى؟

________
أشيل وأفتش لى فى صابونة فنيك.
فنيك الله ورسوله,
السودان عدمان حتة فنيك

[طارق جبريل]

الله لا كسبك
انت من الزمن داك حى؟

________
أشيل وأفتش لى فى صابونة فنيك.
فنيك الله ورسوله,
السودان عدمان حتة فنيك

اييي يا الحبيب
معتت علي كعك العيد الداسنو
:biggrin::biggrin::biggrin:

[مهند الخطيب]

يا زول مرحب بيك و مرحب بالامامة بت المقدم عليها الرحمة ... لكني غير مسؤل عن أي كتابة تكتبها بالذات بعد ما شفت صورك و إنت منفعل ! :biggrin::biggrin:


ان شاء الله كده مبسوط يامعتصم الطاهر !!!؟

[مهند الخطيب]

:biggrin::biggrin:
شوت سااااااي يا الحبيب


:biggrin:

جداً ....

سأقوم بتغيير الأسماء لأسباب تأمينية :wink:

[مهند الخطيب]

حكايات الامامة بت المقدم (1)

اعتاد أهالي فريقنا على التجمع تحت شجرة العرديب المتوهطة نص بيوتنا في البلد ، يتبادلوا المعلومات عن أسعار المحاصيل ، ويمارسوا فعل النميمة على ناس الفُرقان التانية ، و يحيو طقوس القهوة الالهية اللي ماف قهوة بتشبها ...
وفي يوم الجمعة داك اجتمع تحت ظل العرديبة خلوق كثيرة ، توسطتهم الحاجة الامامة بت المقدم وهي بتلقي بتوجيهاتها لبت أخوها زينة بت حسب الرسول فيما يخص قلي البن ...
- ما تحرقي يا المطرطشة ، يحرقك يوم تلاقي ...!
نتضاير كلنا كالعادة ، وتقبل الامانة بت المقدم علي سبحتا!
اليوم داك جات نعمات بت المقدم علي العرديبة جارّة توبا وواضح انها شايلا ليها خبر مابنسكت عليهو ...الشي ده وضح من انها لا شربت موية من الزير المحروق الخاتينو أهل الفريق تحت الشدرة ، لا سلمت على الناس!

- يا الامامة.... عباس ود العبادية قالو خطب!!!!
وعباس المذكور هو زوج علوية بت المحينة ، بت خالة الامامة بت المقدم وصديقتها الأثيرة...

- خطب؟؟! خطب منو العايب الشايب أبو التلاتة فتوات؟؟؟ هو الشهر الجاي عقد اشراقة بتو علي بت عبد الجليل الحافظابي؟!!!

- خطب زكية أخت منصور ده...

اتضاير منصور في قعدتو ، وقد كانت أخته زكية مشهورة انها صاحبة الصدر الأكبر في البلد ، صدر مهول كم قرضته جلسات الغيبة والنميمة....

استعدلت بت المقدم في قعدتا ، وأحكمت ربط غطاء الرأس وقالت بملامح وشها الباردة :

- والله كويس عباس ود العبادية يشبع لبن !!!!!!!!!

ولمن شافت مضايرتنا ومضايرة منصور شقيق زكية القاعد قصادا أردفت :

- ما كمان جدها القابل عنده البهايم لا تنحد ولا تنعد .........

[اشرف السر]

أكنها انجلينا جولي دي احسن مني في شنو...
يعني فشان قاعدي تعضي شلوفتها التحت بقت تستحمى بالدوڤ..
انا ذاتي قاعد اعضي في صباعي...



إني لأراك في ضلالك القديم يا ود جبرين...

كلمتااااااااااااااااااك.. الزولة دي و بت لوبيز خط احمر
اشخت شخيت واقيف بعيد
قبال ما يظهر حافظ حسين هنا...

[اشرف السر]

حكايات الامامة بت المقدم (1)

- ما تحرقي يا المطرطشة ، يحرقك يوم تلاقي ...!


استعدلت بت المقدم في قعدتا ، وأحكمت ربط غطاء الرأس وقالت بملامح وشها الباردة :

- والله كويس عباس ود العبادية يشبع لبن !!!!!!!!!

ولمن شافت مضايرتنا ومضايرة منصور شقيق زكية القاعد قصادا أردفت :

- ما كمان جدها القابل عنده البهايم لا تنحد ولا تنعد .........

مهند
هوووووووي

مالو الكلام دا باقي لي مسنسر سنسره شديدة خلاس
ما بشبه الإمامة بت المقدم...

غرِّق... غرِّق يا الحِبيِّب

[أمين محمد سليمان]

ان شاء الله كده مبسوط يامعتصم الطاهر !!!؟ معتصم عمل شنو غير ما وثق لشلالات الانفعالات المتدفقة من أعالي احاسيسكم المرهفة ؟!! :cool:

[مهند الخطيب]

مهند
هوووووووي

مالو الكلام دا باقي لي مسنسر سنسره شديدة خلاس
ما بشبه الإمامة بت المقدم...

غرِّق... غرِّق يا الحِبيِّب

بتضمن لي الأمين العام؟؟:biggrin:

ياخ كان ماسنسرناها المضايرة بتحصل ده غير اني امرؤ به حياء ...

[مهند الخطيب]

معتصم عمل شنو غير ما وثق لشلالات الانفعالات المتدفقة من أعالي احاسيسكم المرهفة ؟!! :cool:


والله يا بروف الزول ده حيرنا ....

بقى الواحد في غنا الحمام يتلفّت خوف الفلاش .....

[مهند الخطيب]

لكني غير مسؤل عن أي كتابة تكتبها بالذات بعد ما شفت صورك و إنت منفعل ! :biggrin::biggrin:


يابروف ... حافظ حسين شاف جزء من حكايات الامامة بت المقدم دي ، وقال انها كتابات فاضحة!!! ومادام حافظ قال فاضحة معناتا هي منتهية شديد:biggrin: ... وبحسب الراوي والكاتب أشرف السر قال السنسرة ماحبابا ... هسي الراي شنو؟؟؟ نواصل وللا كيف؟ :wink::biggrin:

[زول الله]

؟؟:biggrin:

ياخ كان ماسنسرناها المضايرة بتحصل ده غير اني امرؤ به حياء ...

امرؤ به شنو؟؟؟؟:tongue::tongue:
طيب حياك الله ياخ:biggrin:

اسمع
مادام حافظ قال كدا يبقى شوووت يارجل وكلنا لها

مش في استثناءات ؟؟
وتيب







اقول قولي هذا واستغفرالله لي.................

[أمين محمد سليمان]

يابروف ... حافظ حسين شاف جزء من حكايات الامامة بت المقدم دي ، وقال انها كتابات فاضحة!!! ومادام حافظ قال فاضحة معناتا هي منتهية شديد:biggrin: ... وبحسب الراوي والكاتب أشرف السر قال السنسرة ماحبابا ... هسي الراي شنو؟؟؟ نواصل وللا كيف؟ :wink::biggrin:
غايتو كان حافظ قال فاضحة معناتها قرايتها لا تجوز :rolleyes:
لكني مثل أشعب ...لا أحكم على غايب ... رسلها لي في ايميل و بديك النجيضة إن شاء الله .

[طارق جبريل]

مخيلة الخندريس..

رواية ممتعة جدا جدا..
فيها الشئ الكثير من «قاع المدينة»..
تفاصيل «الحياة المنسية» لمدينة تعج بالمتناقضات كالخرطوم..
روعة السرد تجبرك على متابعة الحكي بنفس واحد..
تجعلك ترى الشخوص تتماهى أمامك كأنما هي شريط سينمائي
في سينما النيل الأزرق..
رغم الاحساس «الكاذب» لأول وهلة من أن الفصول في الراوية تتباعد شيئا ما..
لكن حين تترك للشخصية الرئيسية تقودك في «دهاليز السرد» تجد نفسك
بشكل لا إرادي وسط حكاوي كانت تمر أمام ناظريك دون أن تعيرها إهتماما..
تمنيت أن تتعمق الرواية في علاقتها بـ«بُقا» وطريقة تفكيره..
تمنيت أن تقودنا إلى القناعة التي جعلته على يقين من أن
مؤسسة الزواج «هي مقبرة الحب» ونهاية توهجه..
تمنيت أن تتمعمق في هذه الشخصية التي لها مقدرة على الحب
في اتجاهين متناقضين تماما من وجهة نظر خاصة جدا..
حب للإنجاب وحفظ السلالة وحب لمتعة الروح والجسد..
عالمين يجمع بينهم «بُقا» بكيفية غريبة ومحيرة..
كما كنت أمني النفس أن تكون شخصية «الفكي» «الشماشي»
ذات دور كبير في الرواية.. فقط لفهم ما يحدث في «عالم المجاري»
تحت المدينة.. حيث تدب حياة أخرى لا نعرف طقوسها وقوانينها..
حياة كاملة «تحت أرجلنا» نجهل عنها الكثير.. في الزمان الغابر كانت هذه
الحياة مرئية أمامنا «قرب سينما كلوزيوم والجامع الكبير» وقاع المدينة..
اليوم هذه الحياة «غاصت» في أعماق المجاري بعيدا أن حراك المجتمع «الفوقي»
الفصل قبل الأخير حسيت أنه أُقحم إقحاما في الرواية..
كأنما جعلنا نحن المتلقين نشاهد فيلما معادا..
لا أحبذ أن يكشف الكاتب عن شخوصه الحقيقية..
اعتقد جاذما أن القارئ والمتلقي يسقط بعض شخوصه في محيطه
على الرواية وبذلك يضاعف من متعته هو كمتلقي للسرد بأن يجعل
حوارا خاصا بينه وبين شخوص الراوية في محيطه الخاص وبالتالي
تنشأ حميمية من نوع آخر مع شخوص الرواية..
قناعتي الدائمة أن شخوص أي رواية هي عالم موجود في حياة الكاتب
ومحيطه الضيق المرئي منه والمُتلَلقى عن طريق حكاوي الآخرين..
أذكر جيدا أن شيخ الطيب صالح رحمه الله قد كشف لي بعضا من شخوصه
في الحياة الخاصة وخصوصا «بت مجذوب» وأحسست أنه فعل ذلك
لأنه وحسب زعمه «الكتابة لديه استنفذت أغراضها في مد الجسور
مع عالمه والحنين الذي انتابه حين ترك هذا العالم»..

شكرا بركة ساكن
وقراءة ممتعة للجميع

[طارق جبريل]

مصطفى حسن نصر ود عمتي
جاهو صحبه عايز يستشيره في موضوع عرس..
- قلتلي شنو يا ود التوم
- يا مصطفى رايدلي ويحيدي وكاتلي قلبي
- وحلالي... ولميت فيها وين يا خرابة
- مشيت أشتريلي كهرباء للبيت ولقيتها ماسكي الوردييي
- باقيلي من يومك داك وأنت كهربتك راقدي خل
- أيي وحاتك دخلت قلبي وبقيت أهضربها ضومة ضومة
- نان إنت أصلك ردتها في فِرِد يوم
- يا الحبيب ما من يومي الاتكهربت داك بقيت من عندها آآآبفوت
- أي سووووووووود علي.. نان بقيت تشتري في الكهرباء للحلي كلها
- كل ما أجي غاشيها أشيلي كهرباء بـ10 تالاف
- ههههههه باقيلي كملت قريشاتك كلهن في كهربة الجن دي
- واجعي قلبي يا مصطفى.. ووكتين تضحكلي أصلي أطولي شبرين لاااافوق
- واااحلالي... ومن وين هي
- من أم علقة
- وأم علقة دي أكنها وين
- أهل العوض
- سجمك وسجمك حبوبتك وخالتك بت ود الكاتب
- الفي شنو
- يمين تعرسها وعمها تجيهو قرحة ويودوهوا الأردن علي تشوفلك بلد
- كيفن
- يمين يكبسوك في البيت وعمها يبقى طيب ويقعدوا لامن بت خالتها الدافقت
تنجمى وتاني ينتظروا لامن جدها الناسور يبرالو.. وعمتها الوقعت كسرت حوضها
وبقت تبلبل هدومها بالبول يجيبوها عندك والبيت يتملي «صِنِني» والعفنة تكتلك
وإن بقى أبو أمها الكسر مخروقتو مات في الخرطوم ياكا الشايل البكا لامن تبول في لباسك
وأصلو ناس قُرحة ومرارة ديل آآآآبيقيفوا ضومة ضومة علي جنزير العجلة يلف ويجيك راجع..
والعجب وكتين يجوا بي لواريهم شايلنهم ويحيدي جاها وجع الولادي..
أصلو السمايي دي ياها المحمداك في بطُن بيتك..
ود التوم أقولك شي..
- أها
- لامن تعرس ما تعزمني

[طارق جبريل]

قريبتي عندها بت واحدة وخمسة اولاد..
عرست للبت وفرحانة فرح السنين..
اها يا البت قومي جاها وجع الولادة..
يا الله لي ..... وووووب علي يومة..
كواريك من امها..
قاموا الدكاترة قالوا ليها قيصري وضع الجنين صعب..
اها قاعدة برة وجنبها العريس..
تشيل وتسبح: الله يحلك يا بتي..
وتشيل تحَمِر للعريس..
قومي يا البت ادخلي في غيبوبة بعد الولادة..
المرة جقلبت جقليب السنين..
ربكم رب الخير البت طلعت من العناية..
قامت الام قبلت علي العريس وصارة وشها:
شوف يا (....) ولادة تاني مافي سامعني ولا لا.. بوس بس يا ولدي
ههههههههههههههههههههههههههههههه

[طارق جبريل]

اصلو الليلي اليوم بايظ ضومة ضومة...

واحدا هيلنا بووووم راقد كاويق... محل ما غتسوهوا ما نفع..
قاموا ودوهوا بورسودان كاسولوا شغلة مع واحدا تكاسي لامن اتعلم...
اها قالوا كدي اشترولوا تاكسي وبقى يشتغل...
الخرابة القروش دي ماهن فارزن لكن باقي اهلو طزيانين...
المهم شالوا عليهو الصبر لامو بقى نجيض في شغل التاكسي...
اها الخرابين قالوا النصيبي دة آآبتعدلو علي مرة تجيهو ترقدو كداد..
حق الله بق الله ساقوهوا نزلوبوا البلد...
الشي ماهو بوم قدر ما عافروا ما لقولم عروس..
خالته واحدي نييجضي مشت شافتلها يتيمي من تالاهم...
وكلمت اهلها والزغاريد دي انفجرت في البلد..
ما خلولم فنان أليل طنبور ما جابوا..
والخرابة ينقز ومرات مخاخيتو تتسايل وامو صاقعالو:
بالمنديل يا القنديل...
باقي غمتتلو منديلا ليهو ورد في جيبو..
اها من هني لا هني ساقوهم ودوهم بورسودان تاني..
اجرولم بيت وسمح سكنوا فيهو..
اها قومي يا العروس اتوحمي...
وبقت توعوع فوقو.. بس مع دخلتو تسوي في الععوووووووووووع...
الخرابة قام كاتلها وهاج فوقها...
جوا خيلانو وقرايب البت فشان يصالحوهم..
شيل دق شيل دق قالولوا خلها التمشي البلد لامن يفوتها الوحم..
اها زولكم ماهو كاتلاهو البوامة... اصلو اطرق ضومة ضومة..
اها كلهم واقفين فشان تركب البص تمشي علي البلد..
اها زولكم وقف قدامها وهي مارقي رويسها من شباك البص
وقالها وسط الخلوق وبي صوتا محروق في حشاهو
وسوا الحركة البي يد مغموتة وويحيداتا فاضي ديك:
أها البلد بتمشيها وترجعي لكن الفي بطنك دة شوفيلك زولا يتمو ليكي
هههههههههههههههههههههههههههههههههههههههههههههههههه ههههههههه

[طارق جبريل]

- ياخي قلقت عليك وجيت اشوفك... من امبارح انت مختفي...
قالتها بدلال وغنج كبيرين... شفتاها لعساوان تنضحان بالغواية وفي عينيها شئ من بريق
الضعف والقوة معا... يا ألطاف الله.. كم يأسرني تمايل ديسها على جيدها كنخلات
قريتنا وهي تتمايل وتوشوش للنيل بالمحبة تارة وبالعذوبة تارة اخرى ولا تجد مياهه من
شئ تفعله في لحظات النشوة تلك سوى لطمات على الضفة عٓلّٓ رزاز مياهه يصل
الى جريدها ويقبل خضرته... ما الذي رمى بهذه (الأنثى) في طريقي.. أمثالي لا
يصلحون للعشق والهيام... ثمة أفواه تنتظر.. ثمة فقرُ يرابط أمام مدشرنا ويريدني
مقاتلا دون صُلجان.... ثمة أم تأتيني همهمات دعواتها عند بزوغ الفجر وهي
على (تبروقتها) تنانجي الإله كي انجو من براثن (الحاجة والعوذ)..
يا سيدتي أنا لا اقوى على (سمار) خديك... ستخور قواي أمام كفلك اللدن..
ترهقني نعومة كفيك و(أنثاك) الطاغية.. دعيني وانجو بنفسك من طوفان حكاياتي...
بالله عليك دعيني وأمضي..
---------------------
شخبتة على ورقة لاحمد من ايام الدراسة

[أمير الأمين]

قريبتي عندها بت واحدة وخمسة اولاد..
عرست للبت وفرحانة فرح السنين..
اها يا البت قومي جاها وجع الولادة..
يا الله لي ..... وووووب علي يومة..
كواريك من امها..
قاموا الدكاترة قالوا ليها قيصري وضع الجنين صعب..
اها قاعدة برة وجنبها العريس..
تشيل وتسبح: الله يحلك يا بتي..
وتشيل تحَمِر للعريس..
قومي يا البت ادخلي في غيبوبة بعد الولادة..
المرة جقلبت جقليب السنين..
ربكم رب الخير البت طلعت من العناية..
قامت الام قبلت علي العريس وصارة وشها:
شوف يا (....) ولادة تاني مافي سامعني ولا لا.. بوس بس يا ولدي
ههههههههههههههههههههههههههههههه

عندنا حاجة كبيرة قبل لحظات من ولادة بتها بى بكرها الاول
قالت "الله يستر عليها من فاخورة آل فلان"....:biggrin:

[طارق جبريل]

عندنا حاجة كبيرة قبل لحظات من ولادة بتها بى بكرها الاول
قالت "الله يستر عليها من فاخورة آل فلان"....:biggrin:

:biggrin::biggrin::biggrin::biggrin::biggrin:
امير ازيك ياخ

[أمين محمد سليمان]

تمام يا طارق والله ...عقبل ما نمسك المكتب الاعلامي للأمير !!
---------
يا مهند ما رسلت لي البتاعة !!

[طارق جبريل]

تمام يا طارق والله ...عقبل ما نمسك المكتب الاعلامي للأمير !!
---------
يا مهند ما رسلت لي البتاعة !!
:biggrin::biggrin::biggrin::biggrin::biggrin::bigg rin::biggrin::biggrin::biggrin::biggrin:

[طارق جبريل]

قدارف قدارف قدارف قدارف... الله آآرف.. ارح ارح
ربك ربك ربك ربك ربك.....
دويم دويم دويم دويم حصل صفايح الجبنا ياااااا....
شافع مكندك ويدينو سايل فيهن العرق وشعره زي بوخ السليقة
مباري شبابيك البصات:
لبان ماكسي...لبان ماكسي...لبان ماكسي...
هساهيسا...هساهيسا...هساهيسا... احضر المسلسل مع الحبايب ياااا
واحد لابس ليه سروال وعراقي اغبااااااااااش:
ارح يااااا مجلة الصقر... ارح يااااا روز اليوسف... ارح يااااصباح الخير
سنار سنار سنار سنار... كراسي النص يااااا طالعين خلاص يااااا
شافع لابس عراقي وصديري وسفنجة مقطوعة رابطها بي دبارة:
المرايات المريات... الكُحُل..الكُحُل... الضفارات علينا جاااااي
مدني مدني مدني مدني.... مدني الجمال وانا مالي يااااااا
كمساري مشعلق في باب البص وغازي ليه خلال حديد ابو يد داك في شعره:
اللييييييييل نحن ولااااااااد بلد نقعد نقوم علي كيييييييفنا....
الكاملين... الكاملين....الكاملين ارح يااااا
كمساري شغال يرتب في الشنط فوق البص شاف ليه واحدة عجبته:
السمن السايح وما لاقي الصفايح.... احي انا.. اموت ركن يا قلبي ياخ
كوستي كوستي كوستي كوستي....
مرة كبيرة تسال في كمساري: يا ولدي بصات المناقل وين؟
ام علقة ام علقة ام علقة جزيرة جزيرة جزيرة يااااا
تلاتة كماسرة بيتونسوا في الواطة:
الليلة شغل بابو (مافي شغل).. كلوزيوم ياااخ
فيهو شنو كلوزيوم دة
فيهو فيلم بتاع لقو سنين يااخ اني شوفتي مرتين الله واحد
شاشي كابور ياخ..
مناقل مناقل مناقل مناقل مناقل.....
سواق خاتي رجلو في طابلون البص وبيديها بوري تيييييييييت تتتيييييت:
دركسونك قايم علي بولاد لي ست الجمال الليلة مافي قعااااد
كشك بتاع عصير طالقين فيه بخور وواحد بيصفي في عصير الجوافة
بدق المصفا في جك الخلاط: ككك ككككك كككككككك
ومشغل ابو اللمين: اقوليها عويناتك
واحد غازي كوعو في نصه ورافع رجله:
السرتية المحلبية... حنة التاج الاصلية... صندلية الهند ياااااااا
صوت من محل شرايط: الكتداكة سيدي سيدي الاراكا
واحد خاتي ليه برش وفارش فيه مساويك:
اللراك اللراك اللراك ياااا علينا جاي
بتين ماشات:
بالله شوفي العربي المقطع دة
مالو
غمز لي بي عينو وقال لي احي انا
عينو بي التتقدة يا ربي
واحد مالي الدكان ربع براميل فول وشطة وبلح وشمار:
يا ولد امشي جيبلنا فول مظبوط
صوت ابو اللمين: نعيش برانا .. نعيش في جنة
السوق الشعبي الخرطوم يوما ما
انا لله ياخ

[طارق جبريل]

- إنت آآآمحومد مالك من قبيل ماسكاك القلاية
- الشي كتبتلا جواب ماني عارف أديها ياهو كيفن
- نان أصلك من اللول ردتها كيفن وشوفتها كيفن
- الخرابة جات تنشل من البير وبقيت احاحيلا في نشل المويي
- نان ما تنتطرا في بير الجن دي
- ايي نان ماها براها الشي معاها تلاتي والبير في نص الدرب
- نان داير تسوي شنو
- ما عندي حل غير النعاج ألاتُن
- ايييي سووووووووووود علي نان داير تقول الكلام للنعجي وهي تقولو ليها
- هههههههه ان كانت بتنضُم يمين كان وصيتها
- ههههههههه نان اصلك داير تسوي شنو يا مقطوع الطاري
- اشيل الجواب اغتسو في خرتاية النعجي الكبيري باقي قاعدي تبدابا الحَلِب
- ههههههههه وحات نضري ماك نصيح شي.. نان ان بقت نعجة الجن دي اكلت الجواب
- بقوم علي الفجر يكونن النعاج راقدات واخته ليها واقعد احاحي لامن تحلبن وتقراهو
بالله دي ترباية دي ههههههههه

[طارق جبريل]

الهزيع الأخير من الليل في «شبا»..
الله أكبر الله أكبر..
«النباه» الأول..
صدى الآذان يتخلل جريد النخل ويلتقي سطح النيل و«يقطع» للضفة الأخرى..
- اصبحنا واصبحنا لي الله.. صوت «الفردوس» حبوبتي وهي تتوضأ على «تبروقتها»..
- «الفردوس» شوفيلي «اللبريق».. يأتي صوت جدي الضرير يوسف ود أبو دية في غرفته في آخر «حوش»
ود أبو دية من جهة «مراح النعاج» و«حوش ود تميم»..
الخامسة والنصف صباحا..
بدأ الظلام ينزلق عن كتف «شبا» متقهقرا أمام خيوط الصباح..
القرية كعادتها في هذا الوقت يلفها هدوء عميق..
لا شئ في الأفق سوى منظر «التمر» يرتمي في أحضان النيل... ذلك الأزرق اللامنتهي..
الأزقة مقفرة و«ناعسة» تتهيأ لحركة الدواب والناس..
بعض ذكور اليمام بدأت ترسل نغمات هديلها علها تفوز بأنثى لتنجب لها صغارا تكون امتدادا لوجودها..
إنه موسم الزرع والضرع والتزاوج إذن..
نفحات من نسيم بارد يهب على بيوت الطين تلك..
رائحة الأرض تحيلك على القرى والمداشر المنتشرة على ضفاف هذا «الإله الأفعى»..
لا بد أن المزارعون الآن مبتهجون..
لقد جادت السماء في الحبشة وآن لرحم الأرض أن يتهيأ.. وآن للمعاول اللاعقة الصدأ أن تعمل..
إنها «الحياة» هنا.. وبين هؤلاء «الطيبون»..
«كورية ألموني».. «حَلب» النعاج..
ريحة «لبيني مقننة».. و«فطير» في «الدونكة» وبقايا «قنقروشة»..
و«إندلاكا لاااااااااااتحت»..
«راس طورية» و«لربل» و«كون شِبر».. و«لبقة» وخرير مياه و«قراعي»..
و«صباحات الله بي خيرها يا المبروك»..
«قفيز تمُر»..
«دفيق» و«أم راس» و«مشرق»..
«قوقاي» قمري.. وصوت «كرجة» و«طير الجنة»..
إنه «الغنى» في حقيقته وبساطته معا..
إنها «طاقة» المحبة التي تزين هذه البقاع التي تنتشر على الضفاف هنا..
يسرفون في «المحبة» لأن خلف تلال الصحراء التي تحيط بهم لا يوجد غير «وهم» الحضارة ذاك..
للعناق هنا طعم ورائحة تنفذ إليك بكل الحنين الذي تحتويه الأرض..
حتى النظرة لها نصيب من «صوت الفرح»..
ما أجمل «شبا» وما أجمل ناسها..

إنا لله ياخ

[طارق جبريل]

ناس سكينة يسوّين في الدلكي..

-سكينة: الرسول آآلسُرة بعدين فسراع حصليني... باقي انجارطتة والبت دي عرسها ضومة ضومة حكت في الركاب..
-السرة: وحاتك يا حبيبة قساي بس اللفطر وليداتي واغشى العريبي املأ حُقتي صعوط واجي عليكي
-خادم الله (خدوم): دحين يا سكيني قُداحتك ماهلات شي.. فشان ما نكتر الحجي والشدّدان في القلايا دي
سكينة: خمسة قُداحة كبااار كفايي وحات نضري ماني زايداهن
-حُسنة: هههههههه عاد دايري تضيعي زينب بتك.. ان بقت الدلكي كملت عليها وما تقلت شي هههههه
خدوم: هي سووووود علي نان الدلكي وٓحدها البتخليها تتقل... اي الواطة في خشم حنان بتك ان بقت دايري تعرس وسويتيلا الدلكي بس...
حسنة: نان مو ياها الدلكي وشوية ريحي ههههههههههههه
خدوم: سوووووود علي اريتك ام التاباني البنات
سكينة: اها يا السرة نجهزلك شنو
السرة: اعجنن العجين وسون لي كل قدح تلاتة لدايات وولعن الطلح لامن دخاخينو يتلاون ان بكون جيت
مشن علي بيت سكينة وقلعت تيابن ألات الجارات وسون اللدايات للقداحي وجابن العجين لتخنو في القداحة وجابلهن كوريي فشان يبلن فيها يدينن وكتين يقلبن عجين الدلكي في القداحة وشوية ريحي.. وضوفر ينقرفن ويفسخن فيهو في صينية ألموني وشي محلب وشي شاف تكسر فيهو خدوم صغار صغار وكانون وعلبة لبن وطوة وكماشة يهبن بيها الفحم الفي الكانون وهبابة ودلاقين لي كفي القداحة في الطلح وختن بنابرن وسون قهوتن ينتظرن في السرة...
حسنة لكزت سكينة وهي تموت من الضحك وتعاين في خدوم وقامت سكينة عاينت لي خدوم وانفقعت ضحك
- خدوم: مالكن يا بنات الهرمة تضاحكن... وفقعتها ضحكة هههههههههههههه اييي عارفاها الجلابييي من ورا راقدة هرود... باقيلي الخيمة ألتي قاعدي في السهلة ههههههههههههه
حسنة: هههههههههههههههههه اي جلابية شنو وحات نضري الخيمي ألتك ذاتها راقدي خل ونصايبك في السهلة الله لا كسبك هههههههههههههههه
- سكينة ههههههههههههههههههه: الرسول أآخدوم انت محمد عبد الكريم دة العاجبه فيكي شنو مسوي رجلينك المكلوجات ديل علي مفرمة الخدرة ههههههههههههههه
- خدوم: نان هن كانن مكلوجات وحات نضري علي (البوص) كلوجن هو وسجمن ومدن هههههههههههههه
- حسنة: ووووووووووووب علينا حاج عبد الله لا يسمعك خاتي كرسيهو عند الباب الله لا تاجرك
دخلت السرة وضحكت معاهن وكفت القداحة في اللدايات ومسكت طرف التوب مسحت وشها وطلعت حُقتها الصغيري من المحفضة وادتها دقة ورمتلها سفة تحت لسانها: انتن تبارن خدوم.... امبارح وكتين ولعت الطلح لي زينب بتك جات علي ولادها وانا وحومد عثمان نسمع فيها وقالتلهن العروس دي كفيناها تحت الشملي مافي واحدا فيكم يجي يتحاوم بهنوك باقي عارفاكم يا ولاد خدوم عينكم زايغي ههههههههههههه
حسنة: ووووووووووووووووب علي وووووب علي من الطروقييي
- السرة: حومد عثمان قالي خاتي ود حضري البيخلي بتو يقفلوها ويدخنوها في بيت خدوم شالت حالها قربت تقولهم دايرين نشيلها اوراكها هههههههههههههههههه
- سكينة: هههههههههههههههههههههه الرسول فيكن لا تكاتلوها زينب قالتلي آآبتدخن إلا عند خدوم باقي قاعدي تريدها من قلبها... تطلع في البنبر وتنط عندها في نص الحوش ههههههههه
- السرة: ههههههههههههههههه يمين خالتها خدوم لي الشايفاهو دة علي توصلها اللكوندة ألت العسل وتقول لللراجل تعال اللوصيك ههههههههههههههههههههههههههه سكينة اديني كوز الموية الجنبك دة الطلح دة بقة بيحرقلنا العجين دة ههههههه
خدوم شالت القدح من فوق الطلح وغتست يدها في كورية الموية وبقت تقلب في الدلكي وتساويها مع طرف القدح وضحكت: ههههههههههههههههههههههههههههه نان هو راجل الجن دة ادخنها ليهو وكمان امعطها واسويلها الدلكي واديها خومرتها وكمان اوصي ههههههههه هو راجل دة ولا دِلِق ههههههههههه
سكينة تفسخ في الضوفر وخاتة الصينيي في اوراكها: ههههههههههههههههه غايتو آآبسألك آآخدوم انت باقيلي وكتين عرسوكي الدهسيري كلها تضاحك علي سواتك ههههههههههههههههههه
خدوم: ههههههههههههههههههه كنت جاهلي ي سكيني امي قالتلي بعد تاخدي كبتك صحيني وولعي الفانونس فشان اشيلك الحلاوة.... وانا خايفي من المعيط قمت شلتلي جريدي من الكرقي وقلت اولعها واتشتش الصوفايات من لااااافوق فشان ما يوجعني ان كان اتشلكم وركي وقمت من تحت الشملي واسكلب في الحوش وامي رحمها قامت مهجومي وتسوي في بسمممممممم الله بسمممممم الله يا ود الكرسني تحصلني بتي اتمست يا لطيف الطف وانا صاقعالا يمة شويت وركي ود الكرسني طاير هههههههههههههههههه
- السرة: هههههههههههههههههههههههههههه سكينة ناوليني الريحي اللخفج الدلكي دي ان بارينا قشور دي يومنا بيضيع باقي دي مرتا قاهري هههههههههههههههه

---------------------------
اتا كان باريت خدوم دي الفيسبوك دة بيمشي الخور
هههههههههههههههههههههه

[طارق جبريل]

امبارح جاتني جوعة انا قاعد جنب التلفزيون قمت اديتها كوريكة:
هوووووي اقدحولنا جنى جداد انا سايف ضومة ضومة
ريم بتي:oh mon dieu qu'est-ce que vous avez dit papa
ما فهمت التكتح لكن خمنت انها قالت: سجمي يا بابا انت عيان
حمرت ليها، كمان اخوها اداها طنطينة بالفرنسي وهو بيضحك
كنت عايز افنو بالسفنجة لكن خوفتة مع الجوعة دي اقوم اتمغى اكتر من اللزوم يجيني فتاق
بالله دي ترباية دي
ديل هسي لو قلت ليهم انا كنت بعوم في موية المطر وبعمل دايفينق في الخور الجنبنا المليان قعونجات
ولمن الفريق يتملي جراد بقبض عشرة جرادات قبل الفطور ما يطلع اقطع روسينن وامسكن
اشويهن في الكانون تحت ملاح الشبت واقرقشن...
ان بقيت قلتلم النصايب دي باقيلي يمشوا في شهادة الميلاد محل الابو يكتبوا: لا يوجد
انا الجابني هنا ذاتو شنو... هسي موش كان اكون مدلدل رجليني في البحر في شبا آكلي في دفيق
شاحد ربي دة اي زول جاب الانقاذ دي تقوم ليه كوكة في اي حتة مقلوظة في جسمه
ويجيهو اشكدي تحت وركينو يحميهو العرس والولادة.... قادر يا كريم

[طارق جبريل]

الكتابة ترياق للاحساس البشري عموما (الحنين والألم والحب والشوق والحزن ...الخ)..
الطيب صالح قال هو كتب بدافع الحنين لي بيئة جميلة هو بحبها واحس انه تنكر لها أو هجرها دون سبب واضح، يعني ألم الحنين هو الدفعه للكتابة ودة كان في شكل مناجاة لتلك القرى «عند منحنى النيل» حتى شخوصه كانت من نفس البيئة التي غادرها «إلى الشمال» دون سبب حقيقي للهجرة.. كانت الكتابة لديه نوعا من التقريع لفراقه لتلك العوالم التي أحبها ونقل «حكاويها» إلى العالم أجمع.. نقل لهم «سرده» ذاك وهو غير مهتم بما اسبقه عليه من شهرة بقدر اهتمامه بجسر تواصل مع تلك البيئة.. ألم البعد كان حافزا قويا له في الكتابة..
محمد شكري أيضا كتب بعد أن ناء صدره بالطفولة البئيسة التي عاشها... «يا طارق انا تعبت أن أحمل كل هذا الأنين بداخلي.. تعبت تعبا مريرا في ذللك.. لذا فكرت أن أكتب ربما تحمل عني البشرية جمعاء ما عشته من طفولة (فُعِل بي وفَعلتُ في آخرين) ربما أُعري هذه البشرية وأضعها أمام مرآة لترى القبح الذي تعيشه رغم «الزواق» الذي يغطي تجاعيدها هنا وهناك.. وكان أن كتبت بصدق كبير مع نفسي رغم ما جره علي هذا الصدق من متاعب كبيرة في بداياتي.. لكنني ارتحت بعد أن شاركني الآلاف تلك الآلام ورغك ذلك لم استطع العيش بشكل سوي وانغمست في في حياة الازقة الخلفية تلك.. لكنني إن لم أكتب ربما سعيت بشكل حسيس إلى الانتحار.. فالكتابة أجلت هذا الانتحار أو لنقل خففت من وطأة التفكير فيه بشكل كبير».. تلك كانت تجربة شكري مع الكتابة..
صلاح جاهين هو بدوره كتب وكتب وكتب ورغم ذلك في ايامه الاخيرة في لندن، وحسب ما استقيته من الطيب صالح شخصيا، كان سفرته تلك اشبه بالانتحار كان لا مبال بالحياة ككل.. وربما تبقت في دواخله أشياء لم يستطع ترجمتها إلى كتابات تزيح عنه كاهل الإحساس الذي يعتريه مع «تعب» الموهبة..
أنا متابع كم زول في الفيسبوك دة بيكتب بي نفس النفس ونفس الإحساس بتاع محاولة نزع شئ من الحمل الذي يسكن في الدواخل لتستمر الحياة..
تابعوا عماد عبد الله كمثال واضح لهذا النوع من الكتابة.. عماد بسهولة كبيرة ممكن تقرأ نفسياته من خلال كتاباته.. لمن يكون في اريحية معتادة بتلقاهو بيهظر هنا ويهابش هناك.. أول ما «يهبشه» الحنين شوفوا نوع الكتابة بتكون اختلفت 360 درجة.. بتلقى الكتابة دي في شكل حنين للديم تحديدا وعوالم الديم وحاجات الديم كحي كان عنده صيت وتفرد جعل من المكان «حلة بريستو» لتفاعلات مختلة لي ناس أتوا من أمكنة مختلفة في السودان انصهروا مع بعض وكونوا ما عرف لاحقا بـ«الديامة حطب القيامة».. اقروا عماد كويس ياخ بتلقوا الحنين دة في شكل رسائل لي اصحابه وندمائه من الديم ولي حكاوي بين الازقة وليالي الشغب اللا محدود مطلقا... كل حدث يسمعه أو يشوفه بيحيله مباشرة لتلك الأزمنة وذلك المكان الذي يراه هو فردوسا.. لو سمع بي خريف ساي ممكن يكتب ليك عن باعوضة الديم وقعونجات الديم وكدايس الديم بشكل من الكتابة البتكون منجذب لكل سطر يليه وبمتعة كبيرة جدا لأنه عماد بيكون لا شعوريا بيفرغ في شحنات كبيرة من الحنين للاشياء التي احبها هناك.. جواهو رافض الغربة تماما لكن بيقاوم ألمها بالكتابة.. في كم نموذج كدة هنا في بالي برجع اكتب عنهم... اقروا عماد عبد الله كويس..
الكلامة دة للناس العندهم عماد عبد الله من الاصدقاء في الفيسبوك..

[طارق جبريل]

http://www.youtube.com/watch?v=c2qCjsCnW2U

أعيش في ظلمة وإنت صباحي
إنت طبيبي أمــوت بجـراحي
بشعري رفعتك أسمى مكانه
يا الجازيتني بكســـر جناحي
عرفت الحب وفاء وإخلاص
حنـــان ووداد ورود وسـلام
عشت معاك ليالي جميــــلة
ليــــالي حنيـــنة كالأنســــام
وإنت كنت معايا ولسه معايا
في أحـــلامي وفي الأوهـــام
وتخاصمني عشان بس كلمة
يـامــا نظمـــت فيــــك كـــلام

وتخاصمني عشان بس كلمـة
وأحلـي قصائدي نظمتهـا فيـك
نظمـت في لونـك أجمـل أغانـي
نظمـت في شعـرك في عينيـك
وفي بسماتــك وفي نظـراتـــك
وفي انفاســـك وفي خــديــــك
كلـو نسيتــوا وما نسيـت كلمـة
في لحظـة يـأس أنا قلتها ليـك

لو في الكلمـــــة أنا غلطـــان
يامـا إنــت قسيــت وغلطـــت
ويـامـا قلــت كــلام جـرحنـي
يامــا قـلــــت ويامـا قلـــــت
وكم أدميـــت بكلمــة فـؤادى
علشـان خـاطـرك إستحملـت
عشان بهـواك بشـوفـا رقيقة
كلمات جارحـة بيــها نطقـــت

كلمتـي المسـت غــــرورك
وفــرقتنــــا يـا حبيـبـي
مش خـلاص كفـرت عنــها
بتسهـــــدي وبنحيـبــي
دي الليـالي المــره عشتـها
وحـدي في نــاري ولهيـبــي
وبرضـو مارضيــان تسامح
يــا صبــاحى ويا طبيبــي



محمد يوسف في الاغنية سكب كل الاحاسيس الجواهو... عبر عن الألم بجمالية قمم الاحزان، الشاعر لمن يديك الاحساس انه الحاجة دي حقتك انت برضو ويوصل ليك احساسه بتكون متعة التلقي حد السحاب، المتعة موش في الحب في عضمه في الاحساس الجميل البيخلفه الحب في سرحانك لمن تكون براك، احساس الشاعرة وتعبيره القوي يخليك كانه القصة دي حقتك عديل كدة...

إنا لله ياخ
دة ما جمكسين لامن طلع الزيت ياخ

حا يكون بسب دين للكلمة دي لي هسي محمد يوسف دة ههههههههههههههههههههههههههههههه

[طارق جبريل]

غايته البوست دة حا اصنقر فيه براااااااااي كدة
:biggrin::biggrin::biggrin::biggrin::biggrin:

[اشرف السر]

ما براك يا المبروك:gap:
(نظام ايس بريكر وكدا)...

قاعدين على طول هنا ومتابعين في كل الأمكنة...

[عكــود]

الكتابة ترياق للاحساس البشري عموما (الحنين والألم والحب والشوق والحزن ...الخ)..
الطيب صالح قال هو كتب بدافع الحنين لي بيئة جميلة هو بحبها واحس انه تنكر لها أو هجرها دون سبب واضح، يعني ألم الحنين هو الدفعه للكتابة ودة كان في شكل مناجاة لتلك القرى «عند منحنى النيل» حتى شخوصه كانت من نفس البيئة التي غادرها «إلى الشمال» دون سبب حقيقي للهجرة.. كانت الكتابة لديه نوعا من التقريع لفراقه لتلك العوالم التي أحبها ونقل «حكاويها» إلى العالم أجمع.. نقل لهم «سرده» ذاك وهو غير مهتم بما اسبقه عليه من شهرة بقدر اهتمامه بجسر تواصل مع تلك البيئة.. ألم البعد كان حافزا قويا له في الكتابة..
محمد شكري أيضا كتب بعد أن ناء صدره بالطفولة البئيسة التي عاشها... «يا طارق انا تعبت أن أحمل كل هذا الأنين بداخلي.. تعبت تعبا مريرا في ذللك.. لذا فكرت أن أكتب ربما تحمل عني البشرية جمعاء ما عشته من طفولة (فُعِل بي وفَعلتُ في آخرين) ربما أُعري هذه البشرية وأضعها أمام مرآة لترى القبح الذي تعيشه رغم «الزواق» الذي يغطي تجاعيدها هنا وهناك.. وكان أن كتبت بصدق كبير مع نفسي رغم ما جره علي هذا الصدق من متاعب كبيرة في بداياتي.. لكنني ارتحت بعد أن شاركني الآلاف تلك الآلام ورغك ذلك لم استطع العيش بشكل سوي وانغمست في في حياة الازقة الخلفية تلك.. لكنني إن لم أكتب ربما سعيت بشكل حسيس إلى الانتحار.. فالكتابة أجلت هذا الانتحار أو لنقل خففت من وطأة التفكير فيه بشكل كبير».. تلك كانت تجربة شكري مع الكتابة..
صلاح جاهين هو بدوره كتب وكتب وكتب ورغم ذلك في ايامه الاخيرة في لندن، وحسب ما استقيته من الطيب صالح شخصيا، كان سفرته تلك اشبه بالانتحار كان لا مبال بالحياة ككل.. وربما تبقت في دواخله أشياء لم يستطع ترجمتها إلى كتابات تزيح عنه كاهل الإحساس الذي يعتريه مع «تعب» الموهبة..
أنا متابع كم زول في الفيسبوك دة بيكتب بي نفس النفس ونفس الإحساس بتاع محاولة نزع شئ من الحمل الذي يسكن في الدواخل لتستمر الحياة..
تابعوا عماد عبد الله كمثال واضح لهذا النوع من الكتابة.. عماد بسهولة كبيرة ممكن تقرأ نفسياته من خلال كتاباته.. لمن يكون في اريحية معتادة بتلقاهو بيهظر هنا ويهابش هناك.. أول ما «يهبشه» الحنين شوفوا نوع الكتابة بتكون اختلفت 360 درجة.. بتلقى الكتابة دي في شكل حنين للديم تحديدا وعوالم الديم وحاجات الديم كحي كان عنده صيت وتفرد جعل من المكان «حلة بريستو» لتفاعلات مختلة لي ناس أتوا من أمكنة مختلفة في السودان انصهروا مع بعض وكونوا ما عرف لاحقا بـ«الديامة حطب القيامة».. اقروا عماد كويس ياخ بتلقوا الحنين دة في شكل رسائل لي اصحابه وندمائه من الديم ولي حكاوي بين الازقة وليالي الشغب اللا محدود مطلقا... كل حدث يسمعه أو يشوفه بيحيله مباشرة لتلك الأزمنة وذلك المكان الذي يراه هو فردوسا.. لو سمع بي خريف ساي ممكن يكتب ليك عن باعوضة الديم وقعونجات الديم وكدايس الديم بشكل من الكتابة البتكون منجذب لكل سطر يليه وبمتعة كبيرة جدا لأنه عماد بيكون لا شعوريا بيفرغ في شحنات كبيرة من الحنين للاشياء التي احبها هناك.. جواهو رافض الغربة تماما لكن بيقاوم ألمها بالكتابة.. في كم نموذج كدة هنا في بالي برجع اكتب عنهم... اقروا عماد عبد الله كويس..
الكلامة دة للناس العندهم عماد عبد الله من الاصدقاء في الفيسبوك..

سلام يا طارق،

أعجبني ما أوردته هنا عن تأثير الحنين إلى الماضي في كتابات المبدعين، وكتابات من ذكرتهم خير دليل.
كتابات عماد عن الديم تأتي صادقة جداً وتقودك فعلاً لتعيش في عالم الديم بكل صدق لما يمور فيه من تفاعلات مكان وزمان وإنسان، حتى للذين لم يعرفوا عن الديم شيئاً؛ فهو يملك مقدرة فذة في تصوير الأشياء وإنفعالات الإنسان وتفاعلاته. يعكس كل ذلك بقلم رشيق وروح عاشقة.

شكراً ياخي، وماك براك ..
متابعين لكل حرف تكتبه هنا، ف

واصل الله يرضى عليك.

[طارق جبريل]

ما براك يا المبروك:gap:
(نظام ايس بريكر وكدا)...

قاعدين على طول هنا ومتابعين في كل الأمكنة...

لا عدمناك يا حبيب

[طارق جبريل]

سلام يا طارق،

أعجبني ما أوردته هنا عن تأثير الحنين إلى الماضي في كتابات المبدعين، وكتابات من ذكرتهم خير دليل.
كتابات عماد عن الديم تأتي صادقة جداً وتقودك فعلاً لتعيش في عالم الديم بكل صدق لما يمور فيه من تفاعلات مكان وزمان وإنسان، حتى للذين لم يعرفوا عن الديم شيئاً؛ فهو يملك مقدرة فذة في تصوير الأشياء وإنفعالات الإنسان وتفاعلاته. يعكس كل ذلك بقلم رشيق وروح عاشقة.

شكراً ياخي، وماك براك ..
متابعين لكل حرف تكتبه هنا، ف

واصل الله يرضى عليك.


اوووووووه الزعيم
ياخي ازيك وكيفنك ونعلك طيب في عضامك ديل

[طارق جبريل]

زمان ونحن طُلب انا والرفيق عوض الله يطراهو بالخير...
اول شغل لينا في العمارات كان منهولات وصب تنك للسايفون
المعلم ومعاهو سلفاتوري وباولو كانوا شغالين في المنهولات
وانا وعوض وشول كنا بنحفر في الصب تنك...
اها الدنيا حر وسموم وشهر مايو الزي باب الفرن داك..
اها كلما نحفر يجينا المعلم يقول غرقوا شوية...
انا وعوض كل واحد مدي ضهره للتاني وبالقدوم شغالين حفر
وشول كان عليه يطلع التراب بالكريق...
اها لمن جات الساعة واحدة الحفرة دي بقت قلاية بس
عوض قلب القدوم علي الحفرة واتكل على الخشبة وقال للمعلم:
ياخي كفاهم الناس ديل انت قايلهم زينا ديل بياكلو بسكويت ولغاويس الامساك عندهم زي الاسهال عندنا
نحن لامن يكون عندك امساك ياخي تكتم نفسك وعيونك تبقى في نص راسك وركبيك يرجفن
وتمسك في حيطة الادبخانك وبعد دة يا دوب يتقلم من نصه وتسمع صوته قال جلوغ والباقي
لسة جواك زي راس العفريتة لمن تبدا ترفع اللستك... كفاية حفر ياخ ميتينا طلع
هههههههههههههههههههههههههههههه

[طارق جبريل]

مرة كان عندنا حصة انجليزي (نايل كورس).. استاذ عنده نضارات كدة والله نسيت اسمه... الموضوع كان الـ«Co education».. أها قام زي فتح لينا مجال النقاش كدة اها انا طوالي رفعت يدي وقلت ليه قبل اي حاجة المواضيع الزي دي بتخلي الزول يطلع من دوامة فول عمنا عبد الوهاب ويصحصح شوية... ههههههههه..
شوف يا عمك الـ«Co education» دة مهم لحفظ التوازن النفسي ياخ.. بيخيلك كدة ضارب نار طوالي.. هههههههههه... اها قلت اضرب ليه مثل ابن لبون كدة اخليه ليك يآمن بالنظرية «الجبرينية» حقتي.. قلت ليه هسي زي ملتقى حديقة القرشي والـ«Co education» الحاصل فيهو بيخليك حتى لو ما لقيت مواصلات تمشي كداري وانت معنوياتك ضاربة هبابة ياخ (an example algorashy garden tarnsport station is areal example for the day mode so without ((chiks)) you feel lonely and your day will be ((mokhastik)) but if you see them even if you went home ((kadary)) you will feel perfect) يمين خليت ليكم الفصل دة يزح بالواطة والاستاذ ذاته من الضحك لمن قلع نضارته...
هههههههههههههههههههههههههههههههههههههههه

[طارق جبريل]

الكون عالم محاط بالجنون ياخ..
«ياخي خليتني أحب الفقر وعوالمه المجنونة»..
البعض يعتقد أن في الفقر سحرا وجاذبية لمجرد أنه يفرض عليك «اللالوب» بدل «الآيسكريم»
وأن لـ«اللالوب» عوالم مفرحة وفيها بهجة عالم «سوق الشمس»..
والبعض الآخر يعتقد في نفس الفقر جحيم وضنك وممانعة للجمال..
سحائب من الافكار الجنونية عند خاصرة النيل في سماء تنفث الصهد والمحبة معا
وانت عليك ان تختار معركتك دون ان يكون لديك سلاح..

[طارق جبريل]

ريحة دعاش..
نفحات مطر..
شفق مغيب..
ريحة «لِبيني مقننة» في كانون في يده ماشة في نص الحوش..
امي لابسة طرحة وشايلة هبباتها تهب في جمر تحت الحلة المكرتبي..
قعاد بنابر قدام الراكوبة..
«رمي» لقيمات في الصاج.. وصحن مليان زلابية مضرضر فيها سكر..
كباية شُب اغتس فيها اللقيمات واملابا خشمي..
صوت العتتان ترضع في اماتها..
لباس من باقي الدمورية حقت المرتبة.. فنيلة حمالات... خُلال خشب وتِفة..
سفنجة نخرتها مقطوعة ومربوطة لستك كراسي ومسمار..
رادي معلق في مسمار في «الشِعبي»..
صوت العطبراوي عذبا طروبا يملأ أرجاء الكون:
نسانا حبيبنا الما منظور ينسانا
مالو سافر روح ما غشانا
حليل الخوه الما قدَّر عشانا
نسانا حبيبنا وعارف ريدنا هولو
عشانو بتمشى قلوبنا مع رحيلو
تسافر بينا لي دارو ومقيلو
نقول فارقنا سافر ياحليلو
صوت خالتي ام النصر بي راس الحيطة: يا عشة عليك الله لو زيركم بارد املي لي الكورية
برق ورعد وشخشة في صوت الرادي..
صوت عم محمد صالح: الله أكبر الله أكبر
نشرة تمانية وأخبار الموت..
صوت من بعيد: وووووووب علي يا محمد ود عمي وووووووب علي
كراس حساب وجدول ضرب و7X8=56
علبة هندسة..
قميص لبني وردا كحلي..
كتاب محفوظات:
هُنَا صَوْتٌ يُنَادِينِي نَعَمْ لَبَّيْكِ أَوْطَانِي
دَمِي عَزْمِي وَصَدْرِي كُلُّهُ أَضْوَاءُ إِيْمَانِي
سَأَرْفَعُ رَايَةَ المَجْدِ وَأَبْنِي خَيْرَ بُنْيَانِ
هُنَا صَوْتٌ يُنَادِينِي تَقَدَّمْ أَنْتَ سُودَانِي
سَأَمْشِي رَافِعَاً رَأْسِي بِأَرْضِ النُّبْلِ وَالطُّهْرِ
وَمِنْ تَقْدِيسِ أَوْطَانِي وَحُبٍّ فِي دَمِي يَجْرِي
وَمِنْ ذِكْرَى كِفَاحِ الأَمْــــــسِ مِنْ أَيَّامِهِ الغُرِّ
سأجعل للعلا زادي وأقضي رحلة العمر
هنا صوت يناديني تقدم أنت سوداني
وطابور الصباح:
علمي أنت رجائي أنت عنوانُ الولاء
أنت رمزٌ للفداء أنت رمزٌ للإباء
لونك الأحمرُ فيضٌ من دماء الشهداء
لونك الأبيضُ رمزٌ لسلامٍ ووفاءِ
لونك الأخضرُ زرعٌ وإخضرارٍ ونماء
لونك الأسود وجهُ السابقين الأقوياء
فلتدم أنت لنا وليدم منك الوفاء
الشاعر كذا ولد في كذا وله ديوان شعر كذا..

إنا لله ياخ

[طارق جبريل]

امبارح حلمتلي حلم متل التكني جابوني انا وهيفاء وهبي في لجنة ألت مسابقات في الـ(MBC)..
اها كل ما متسابق ينتهي تشيل تعاينلي وتقلب في عويناتها وتقوللي:
شووو طرووووووووووق حلو يا اسمر مو هيك..
وتشيل وتعضعض في حلاوة لكوم ألتها الملياني أحمر شلاليف ديك..
وأنا مقهي زي الماكلي أمانة ألت زول وصاقعلها: أييي ياهو كدي
وهي تديني دقشة بي كتفها: لك تؤبر عيني يا سمارة
وأنا اشيل وانكرش في الكرسي أليلي.. وصوف راسي دة يقيف متل المغنطيس الكابسو الحديد
وأصلي مغبي ماني عارف المسابقة في عضمها ألت شنو.. شعر ولا غناء ولا مواهب رقيص
وحتى مقدم البرنامج وكتين يبدابي في التعليق أقوله: كدي خلها التقول أنا زيها
وباقيلي «الياء» ألت الشوايقة ألتنا شلناها من شدرة «الأرز»..
والساعة التقولي: عن جد يا طروووووووووق
أصلي أرقد كاويق ضومة ضومة
وفي سري أسوي: وينك يا نفيسي بت البغاديد تشوفي ولدك أماني ماهو طامس في «المطوطي»
قربت اقول صدق وعده هههههههههههههههههههه
ربكم رب الخير العصاير الشربتهن بالليل نزلن في الحالب ولكزني هههههههههههههههههههههههه

[طارق جبريل]

بت بغداد: انت دحين يا طارق ولدي ناس ود عمر ديل ماهن عازمنكم للفطور
- ايي يا حبوبتي
- خلاص قوماكم.. وينن اخواتك وامك
- في الكرقة المن تالا التكل
- ادني عكازي وقوماك علي ناس ود عمر ديل عندهم حداري اماني ماها كعبي
- سمح
اها دخلنا يا الحبيبين وسالمنا الناس ومرة ود محجوب غتست في التكل ساعة وما مرقت
- بت بغداد لكزتني بالعكاز وملت عليها:
الخرابي دي لا يبقى ماتت في التكل ولا كمان حٓتـلٓت اللحم السم سمح كله
امشي قولها جيبي فطورك دة .... ان بقى كمان قاطع اللهجي النطلع لي اهلنا نشوفلنا تُرمي
هههههههههههههههههههههههههههههههههههههههههههههههههه هههههههههههههههه
الله يرحمك يا بت البغاديد ياخ

[طارق جبريل]

«يا ود جبرين.. ياخي القرمبوز والبرتق السمح ورايق دة مريح ياخ.. ياخي المرة السمحة دي من قميعة أصابعينها بتفرزها»
من أقوال عوض «كريمة»
هههههههههههههههههههههههههههههههههههه

[طارق جبريل]

بت ابو دية ولعت اللمبة ام ضنيب وشايلة كورية الحلو مر تصحي فينا:
طارق ابوي... قوم يا حبيب قساي... النباه اللول قرب... قوم ابوي اشربلك حلو مر واكلك حاجة
قوم ابوي الله يرضى عليك...
ختت تقروقتها في نص الحوش وصلتلها ركعتين وتنده علي سابل الستر:
يا ابراهيم يا ود حشاي الله يملاك في العافي التخصك في المصارين ويديك قدر الجبال وقدر السحاب ما شال.. يا طلحة يا ود رضاي الله يجيبك لي اشوفك ويغتي عليك بي جناح جبرين.. يا اعتماد الله يطرح البركة في ولادك ويديك قدر سبيب راسك.. يا عفاف الله يعدلك طريقك ويحفظك لي بنياتك.. يا لطفي وادعاك اللا يسهى لا ينوم يغتيك ويعليك ويديك في بلاد النبي لامن يغنيك.. يا سهير الله يسهلك امتحاناتك وينجحك ويديك الفي مرادك قادر يا كريم.. يا طارق ابوي وحبيب قساي يعليك ويغتي عليك واشوفك ناجح ودايما في صفحتي من عيني ما تغيب... يا ربي تسترنا وتزيد اللجر يا ربي تزيد اللجر..

انا لله يا عشة بت ابو دية ياخ
انا لله ياخ

[عكــود]

الله يرحم بت أب دية ويحسن إليها يا طارق.

كتابة صادقة وحنينة، تسل الدمع من العين.

[عكــود]

«يا ود جبرين.. ياخي القرمبوز والبرتق السمح ورايق دة مريح ياخ.. ياخي المرة السمحة دي من قميعة أصابعينها بتفرزها»
من أقوال عوض «كريمة»
هههههههههههههههههههههههههههههههههههه


"المره السمحة ماها دايرالا شوف، ليها زيفة تشمها من بعييييد، متل البرسيم المسقي!"
إجابة النعام آدم (رحمه الله) عن سؤال: كيف بتعرف المره السمحة، وإنت آ بتشوف؟

مع خالص التحيات لعوض كريمة.
:biggrin::biggrin:

[طارق جبريل]

الله يرحم بت أب دية ويحسن إليها يا طارق.

كتابة صادقة وحنينة، تسل الدمع من العين.

رحمن الله يا حبيب
اماني ما كانن حنينات ياخي

[طارق جبريل]

"المره السمحة ماها دايرالا شوف، ليها زيفة تشمها من بعييييد، متل البرسيم المسقي!"
إجابة النعام آدم (رحمه الله) عن سؤال: كيف بتعرف المره السمحة، وإنت آ بتشوف؟

مع خالص التحيات لعوض كريمة.
:biggrin::biggrin:

:biggrin::biggrin::biggrin::biggrin::biggrin::bigg rin::biggrin:
خبرة ياخ

[أمير الأمين]

:biggrin::biggrin::biggrin::biggrin::biggrin::bigg rin::biggrin:
خبرة ياخ
:like2::like2:

[طارق جبريل]

:like2::like2:

امير ازيك

[طارق جبريل]

- ابو عويض انت ناس (****) في مربع 12 ما بتعرفهم
- عوض كريمة: عندهم بنات سمحات
- ابو عويض انت الله ما ليك دة ود عم ابوي
- عوض كريمة: شوف يا فردة زول في الامتداد دة ما عنده بنات سمحات ما تسألني منه
- فقر اصلك من يومك
- عوض كريمة: يعني عايزني اعرف ناس «حنني» و«جمال جربوبة» و«معتز كرنديس»
قوم فكني ياخ..
هههههههههههههههههههههههههههههههههههههههههههههههههه هههههههه
عوض كريمة اكتر زول بيعرف يوصف بيوت الجكس السمح في الامتداد والصحافة
ههههههههههههههههههههههههههههههههههههه

[طارق جبريل]

- حسن ود الزهرة: الرسول آآطارق ما تندلاك معاي لي البلد
- هي نان انا دابي طلع منها،.. انت عندك فيها غرد ولا اشتهيتا
- ياخي ماشي اعزي واشيل الفاتحة في سكينة بت جيب الله
نان سكيني مو ماتت من حياة جدي الدود الاكلها في قبرها يكون بقى بترول
- ايي عارف ما قدرت امشلهم وماني داير اتلوم
- ود الزهرة انت باقيلي بقيت بوم.. نان تمشليهم بعد الزمن دة كله
- ايي ياخي بمشيلهم... كنت قاعد اريدها ياخي.... اماني ما كان عندها سماحة (ربيت)

ههههههههههههههههههههههههههههههههه
بالله دي ترباية دي

[طارق جبريل]

يا جماعة هسي الحاجات دي اندثرت:
الجرورة=الدين من بتاع الدكان
التلكي=الخشبة البكسروا فيها اللحم في العيد
الختة= الصندوق
النملية= تلاجة الفقراء
النطع= دة ما داير شرح هو والشملة (ههههههههههههه)
شناط العنقريب (الكراب)
الموص عشان العروس تسمن
المُلقاط
كورية الطلس وصحن الطلس
المقصوصة
حجر الحيمور البحكوا بيهو الكعب
كورة الشراب
القرقريبة
البستلة
الخُلال
الكُونوش
برميل المريق
عمود الأكل

[طارق جبريل]

أيام المنتديات والمنابر ظهرت وانتشرت في النيت ديك..
بقى اي زول من قرية نائية كدة ومكسر ليه في جكسوية في الحلة يعمل ليه منتدى
ويملاهو ليك قلوب وورود وصورة من جهة بيت الجكسوية للقرية ههههههههههههههه
والعجب في اسامي المنتديات: وردة أم علقة/ أقحوانة كاب الجداد/ عطر قَنَتي/ فُلة أم ضبيبينة
ويشيل يرسل للعضوية ويرسل لي ست الحسن..
وأول رسالة داخلية: ياخي بما انك عضو نشط عايزين نختك في الكرسي الساخن كويس..
وهي تكون مداخلة واحدة ما سوتها...
أها يقوم يرشها ليك ويثبت البوست ويرش ليك مقدمة طويلة كدة عنها وتلقاها عمرها 19 سنة
وهو يرش ليها تعريف فيه مداخلتين هههههههههههههه
وأول سؤال: كيف تنظرين إلى الحب
هههههههههههههههههههههههههههههههههههههههههههههه
وفي نفس الوقت يفتح ليه بوست: بريدك والريدة ظاهرة في عيني
هههههههههههههههههههههههههههههههههههههههههههههههههه هههههههههههههههههههه
ولاد أم زغدة تموتوا في الريدة الله يكتلكم ياخ

[طارق جبريل]

يوم مخستك ياخ..
لابس لي شورت وقاعد اعاين في الكورة وقدامي صحن كرز..
ود جبرين قاعد ياكل في كرز بالله دي حالة دي..
خلي بالكم انا بقيت مهيض ورهيف..
من الدوم وقراصة النبق للكرز وشورت كمان..
من قبيل قاعد اعاين للشورت الكحلي دة وفيهو زيق لبني
حليل ردا الابتدائي داك..
كلما تتمغى يعمل كرررررررررررررررر ينشرط وتضاير بي كراس الحساب لامن تصل البيت
وتشوف علبة الخيت والابرة وتقعد تخيت فيها دورانيات دورانيات كدة ويبقى زي الفيهو حبل في نصه كدة
مرة اتسهق شديد لمن ما لقيت لي حتة في القماش تمسك الإبرة والخيت
قمت جازفته ليك الكفة بالمقص نظام رقعة كدة.. وقعدت اجازف فيهو من هنا لي هنا..
لمن انتهيت قلت البسه اشوف المضوع وصل وين،،
وحاتكم لقيتو ليك مرفوع لي فوق زي خرتاية خدوم الماسكة بيها «شـ....ها»
والرقعة زي الركامة... آآآي الركامة ديك..
وهسي جابت ليها كرز..
عليم كريم غايتو ربنا دة

[طارق جبريل]

http://www6.0zz0.com/2014/06/21/21/281028419.jpeg (http://www.0zz0.com)

قاعدي في بنبرا قدام الراكوبة المن تالا التُكل وخاتالا طرحي في رويسها..
دوائر ألات بصلات غلاد في قعر حليلي مكرتبي «مكرود» قعيرا من كم تشُر..
كانون مليان هبوت..
جُلغي ألت زيت من جالون «زيت الفهد»،،
«مقصوصة» تمشي من هني لا هني في الحليلي..
هِوِين أليل «شرموط»..
شويي ألت ملح..
شمارا مضرضر..
كسبرة بي راس المقصوصة..
توم مدقوق في فندك النحاس..
البصلي ماتت والشرموط اتلايق في نصيص الحلي..
طماطم حمرا «لاقي» حاكنها في كوريي بي «حكاكة الطماطم» أم ايدا علي المنفلي..
مفراكة ألت جريد..
برطمان أليلي ويكي..
ربع أليل قمح مدقق عن حاج اللمين..
صاجا فوق لدايات وتحته عيدان ألات حطب وجنبه جدادي راكضي فوق 15 جنى جدادايي..
لهب العيدان سوالو دخاخين.. الجدادي تسوي في الـ«كض كض كض كض»..
«طبطاب» وفطير..
صحن أليل طلس فوقه وردات غُلاد..
تلاتة طبطابات في نص الصحن..
تتكي الحلة فيهو وتملحلنا الويكي..
بي اصبعها تمسح زيق الحلي وتلحس صباعها..
بصلات خُدور مفقوشات في صحن «ألموني» وفيهن موية ليمون وشطة..
«تُرمي» نمسربهاا الصبر..
كفتيري في باقي الهبوت زرقا والدخان طالع من نخرتها..
ونقعد «نطبق» في كبابي الشاي..
ويا ربي تزيد اللجر يا ربي تزيد اللجر.. زيد اللجر..

إنا لله ياخ..
إنا لله..

[طارق جبريل]

حسن ود كسبه زول حلو وليهو حكاوي لم يفارق شبا ولم يبارحها طيلة حياته ....قالو يوم رسلوه نورى عشان يجيب عجل من هناك .....مرق من الصباح رجع بالليل قالهم والله انا ماكنت قايل الدنيا دى وسيعى كدى هههههههههههههههههه

[أمير الأمين]

اذكر كم اجازة فى شوارع الامتداد مربع 7 تحديدا
كنا بننزل ضيوفا على ناس كرام جدا ..لمدة يوم يومين ايام
البلد بخيرها...والاهم العالق بالذاكرة تمارين الكرة فى ملعب
العشرة.. مع كتاحة الشتاء وغبشة البرد..اصدقاء الزمن داك
ولد لعاب جدا اسمه عصام ويكنى عصام جكسا وبرضو صلاح
الفحل...و اخرون...
يا اخى ايام ليها ايقاع:075:


ازيك يا طارق

[طارق جبريل]

اذكر كم اجازة فى شوارع الامتداد مربع 7 تحديدا
كنا بننزل ضيوفا على ناس كرام جدا ..لمدة يوم يومين ايام
البلد بخيرها...والاهم العالق بالذاكرة تمارين الكرة فى ملعب
العشرة.. مع كتاحة الشتاء وغبشة البرد..اصدقاء الزمن داك
ولد لعاب جدا اسمه عصام ويكنى عصام جكسا وبرضو صلاح
الفحل...و اخرون...
يا اخى ايام ليها ايقاع:075:


ازيك يا طارق

امير كيفنك ابوي
تصوم وتفطر علي خير ياخ

[طارق جبريل]

«والله السودان دة اتفه من كيس تمباك»
دة رد زول سألته عن البلد وعن اولاده ومصاريف المدارس
ههههههههههههههههههههههههههههههههههههههههههههههههه

[طارق جبريل]

شايلين صفايحنا كلللو كللللو كلللو.. يا صايم قوم اتسحر.. يا صايم قوم اتسحر..
ومحل يفتح باب يدونا نشربلنا عصير ولا حلو مر..
أها علي التعترنا دخلنا علي مربع اتنين وشارع كله حُفَر وكلاب..
أها يا نقعلنا في حفرة فيها موية بلاعة يا يقوم ساكينا كلب نقوم صوف بي صفايحنا..
لامن فترنا عوض كريمة قالي:
ود جبرين أمورقاكا من الحلي الفقُر دي
- ليه فيي شنو
- ياخي ديل التقول مخطط حتتهم دي فار كلها حفر وعلي العليهم ساعِلَهم كلاب متل الغنم
أمورقاكا من هني أن نفسي اتقطع وريحتي بقت بلاعات بلاعات..
ديل آآآبيكون فيهم واحدا صايم.. باقيلي شيطانهم ذاتو لليلي ما ربطو..
هههههههههههههههههههههههههههه

[طارق جبريل]

الود محمد شابكني ليك وديني البلاج وديني البلاج..
قلت ليه ارحكاكا ياخ ورمتني.. ومنها نخم الرماد..
شلت لي كيس فيه سندوتشات عشان انا بهوي سريع مع الموية دي
وشلت لي باغة موية وبسكويت..
ولبست لي شورت كحلي (والله شورت يا عماد عبد الله) وتي شيرت لبني ونزلت منتظر الود الفقر دة ينزل
جاء شايل ليهو شنيطة صغوووووويري وواحدة كبيرة شوية
قلت ليه دة شنو يا محمد.. قال لي: الصغيرة دي يا بابا فيها كريم ضد الشمس
وواحد ضد موية الملح و«بان دوش» (دة مافي زول يسألني منه لأنه لونه اصفر كدة أنا كنت قايله اسكريم)
ماما قالت لي اديها بابا... اجي
اها والكبيرة دي.. دي يا بابا فيها بشكيرين وبشكير كبير عشان نقعد فيهم وسفنجات بحر ومظلة..
ما لقيت لي طوبة افلقه بيها.. يا ود الكلب انا كنت بقع في النيل بي سروال بي تكة..
ولمن البحر يكون قايم وعكران بالصباح بلقى لي «كركجي»* واقع من اضاني وناشف..
ولمن اجي داخل البيت بكون اغباااااااااااااااااااش بمشي اشيل لي سكين وعلي علبة صابون العدة
وكررررررررررررررررررررج بقطع لي سِرحِي من الصابون واخت الصفيحة في البلاعة
وادخل اتمشك زيييييييين بالليفي أم بزر ديك وبجي مارق لوني بيكون كوبيا عديييييييييل..
ختينا مظلتنا وفرشنا البشكير الكبير ومحمد طلع حاجات البلاستيك البيلعبوا بيها في الرملة ديك
وعاملة زي قوالب كعك العيد ديك..
اها شلت الشنيطة الصغووويري ديك ختيتها تحت راسي وانبطحت وخلفت رجلي
اها قمت اديتها كشيفة علي اليمين لقيت لي رِجِل نااااااعمة وبيضااااااااااء ومدبلغة زي طفاية القاعة ديك
قمت عاينت لي رجلي لقيتها مكلوجة زي البسطونة لمن يتنيها استاذ الدين وهو زعلان لمن يلقى ليهو تلميذ ما حافظ
برااااحة شلت واحد من البشكيرين غتيت رجلي وبقت مرفوعة زي عود الطلح التحت الشملة وماهو موقدنو شي
اتقلبت علي جنبي الشمال إن كان عيني تقعلها في «فنانيس» بيييييييييُض علي اللُقمة البيسووها بالزبادي ديك
وفيها زيق من الملاح ماشي ملولو ملولو كدي في نصها...
هي سووووووووووووووووووووووود عليك يا ود جبيرين..
إنتو البشير لليلي حاكمنا...
الباقي ان حكيتو مفروض اطعم الصين
الله يكتلكم
هههههههههههههههه
ــــــــــــــــــــــــــــــــــــ
* كركجي لي ناس الشهادة العربية هو طين البحر البينشف داك ولمن تجي ماشي فيهو يعمل كوروم كوروم

[طارق جبريل]

يا جماعة الزولة البتحاور ود النصري دي لو زول ساكن جنبها يشيل ليه درابة ويديها في صنقورها..
او ممكن بعد الفطور يديها جضيمة من جضومها الزي لقيمات الخميرة الناعمة ديك...
ياخي حكاية تقعد تسأل زول زي التصري انه الاغنية دي لحنتها كيف ولا كانت البداية بي شنو
دي نوع الاسئلة البتفقع المرارة وحاجة تانية بتتقال بعد الفطور...
يعني كان سالته انت وبتلحن في الاغنية كنت قاعد في قيفة ولا مطمس رحليك في جدول
ولا مغتسن في حوض برسيم كان بتكون شوية مبلوعة... ياخي التقديم دة فن وزول زي النصري
دة وعنده معجبين كميات الناس عايزة تعرف حاجات من النوع الغميس داك حاجات في طقوسه
واختياراته للاغاني والمقدم مفروض يجتهد ويمشي لي اصحابه ويطلع منهم معلومات وحاجات طريفة
ومواقف في الكواليس وتجي تطعمها في نص الاسئلة.. يعني بدل تقول ليه لحنتها وين وكيف
تكون عندها معلومة مثلا انه اللحن دة قبليه كانت في حكاية (اكل ملاح لاريق مع خالد شقوري
مثلا)
وقام شال الطمبور وقعد يدندن وبعد يجاوبها تقوم تجيب خالد الباشا ضاحكا في تسجيل يروي
حكاية اللحن من جهة تانية... اغنية ام الحسن مثلا خالد شقوري كتبها جواب لي اسامة حمزة
لمى فيها ود النصري وجضمها جضيم عدوك اها في جزء من الاغنية دي ما اتغنى والجواب دة راها
لكن في زول انا عارفه حافظ باقي الاغنية كلها وعنده نسخة منها... اها اجتهاد المذيع واعداده لي
التفاصيل الصغيرة دي بيخلي الحلقات جاذبة وفيها متعة للمتلقي... يعجبني الطاهر التوم في انه
مجتهد جدا في جمع الداتا للزول العايز يحاوره... ورمتونا ياخ الله يورم كوكتكم...

اسامة حمزة ما تحمر لي
هههههههههههههههههههههههههههههههههه

[طارق جبريل]

يا جماعة التطريب العند النور الجيلاني صعب يتكرر..
الزول دة فيه حاجة من خضر بشير الاتنين ديل لمن يدخلوا جوة الطرب بيتحولوا لي حاجة مختلفة
كأنهم في حلقة مديح... بيتفاعلوا مع الاغنية بشكل غريب وبيوصلوها للمتلقي في قمة المتعة..
تمنيت انه السر قدور يتطرق لي اغنية «في عز الليل» للتجاني الحاج موسى
أنا عندي رأي ممكن يكون مشاتر أو بعيدا عن الاجماع
صراحة انا استمتعت جدا جدا بي لحن واداء وتطريب الاغنية عند النور الجيلاني اكتر من الكابلي
وحسب معلوماتي الاغنية اتلحنت في شمبات مع عازف المندلين المرافق للنور الجيلاني
واللحن طلع بعد صعوبة كبيرة.. وكنت قد سألت التجاني الحاج موسى أيهما أوصل كلماتك
والتجاني زاغ من الاجابة..
وتمنيت انه كتكريم ايضا للنور الجيلاني الفرقة الموسيقية دي فرصة لعازف المندلين المبدع
مجرد أمنيات..

[عكــود]

يا جماعة التطريب العند النور الجيلاني صعب يتكرر..
الزول دة فيه حاجة من خضر بشير الاتنين ديل لمن يدخلوا جوة الطرب بيتحولوا لي حاجة مختلفة
كأنهم في حلقة مديح... بيتفاعلوا مع الاغنية بشكل غريب وبيوصلوها للمتلقي في قمة المتعة..
تمنيت انه السر قدور يتطرق لي اغنية «في عز الليل» للتجاني الحاج موسى
أنا عندي رأي ممكن يكون مشاتر أو بعيدا عن الاجماع
صراحة انا استمتعت جدا جدا بي لحن واداء وتطريب الاغنية عند النور الجيلاني اكتر من الكابلي
وحسب معلوماتي الاغنية اتلحنت في شمبات مع عازف المندلين المرافق للنور الجيلاني
واللحن طلع بعد صعوبة كبيرة.. وكنت قد سألت التجاني الحاج موسى أيهما أوصل كلماتك
والتجاني زاغ من الاجابة..
وتمنيت انه كتكريم ايضا للنور الجيلاني الفرقة الموسيقية دي فرصة لعازف المندلين المبدع
مجرد أمنيات..

سلام يا طارق ورمضان كريم عليك ..

الله يديك العافية ياخي في قولك عن النور الجيلاني!

النور الجيلاني والجابري فنانين نساهم الإعلام ولم يكرمهم كما يستحقون، بينما أكرم وبالغ في الإكرام لمن هم أقل منهم قامة.

"في عز الليل" عند كابلي ما بقدر أسمعها كلها، بس عند النور بتخليك تطرب وتنطط كمان.

أغاني النور الجيلاني، من الصعب تقول واحدة تعجبك أقل من التانية، كل أغانيه تطرب وتجذب.

حأنقل مداخلتي دي بي إقتباسها لبوست أغاني وأغاني.

[طارق جبريل]

عكود يا حبيبنا ازيك ياخ

[طارق جبريل]

(غايتو الزولة الاخترعت الخُومرة والدلكة دي ما مفروض تتحاسب يوم القيامة تووووووووووش الجنة)
عوض كريمة بعد جاء من شهر العسل في التسعينيات

[طارق جبريل]

لطفي أخوي ومحمد كمبال قالوا دايرين يصلوا جماعة.. أها ماهن حافظينلهم شي من القرآن..
يخربهم ضومة ضومة معلمين الله من كتاب الله... يا دوب بي ألت الله الحمدو والكوثر..
أها معاهم واحد بنغالي محمد لكز لطفي قالو اقيم الصلاة وخلي البنغالي يصليبنا دايما شايفه شايله قرآن
أها أقاموا الصلاة والبنقالي كبر..
قرأ الفاتحة وبعديها قرأ « اللَّهُ نُورُ السَّمَاوَاتِ وَالْأَرْضِ ۚ مَثَلُ نُورِهِ كَمِشْكَاةٍ فِيهَا مِصْبَاحٌ ۖ الْمِصْبَاحُ فِي زُجَاجَةٍ ۖ الزُّجَاجَةُ كَأَنَّهَا كَوْكَبٌ دُرِّيٌّ يُوقَدُ مِن شَجَرَةٍ مُّبَارَكَةٍ زَيْتُونَةٍ لَّا شَرْقِيَّةٍ وَلَا غَرْبِيَّةٍ يَكَادُ زَيْتُهَا يُضِيءُ وَلَوْ لَمْ تَمْسَسْهُ نَارٌ ۚ نُّورٌ عَلَىٰ نُورٍ ۗ يَهْدِي اللَّهُ لِنُورِهِ مَن يَشَاءُ ۚ»..
لطفي لكز ود كمبال في نص الصلاة..
أها ود كمبال قالو: مالك الفي شنو خلنا النصلي..
- اييي تصلي شنو البنغالي ضيعلنا صلاتنا
- كيفن
- ايي الشي سواها لينا نور وفانوس أم الحسن بت الجدي
- اييييييييه
- الخرابة ضيعنا والله قرب يقول رتينة نادي شبا وفانوس فاطني بت الخِضِر
- اييييي ما معقول
- يا زول الشي يسوي في القزازة والزيت وحات نضري قرب يقولنا نفَوِط القزازي
- إييييي دة شنو دة
- الله لا كسبه يا زول دة ماهو قرآن شي حلات تقولي قراي
- ياخي لا يبقى تكون آية مانا فارزنها يا سجم انت
- اقولك شابكنا بَقَت وولعت ولا شرقية ولا غربية.. شرقية شنو وغربية شنو الشي إقامة اصلها
- والله انا شاكي انه تكون سورة يا لطفي وتبقى انت الضيعتنا
- اييي الشي أقولك يسوي زجاجة درية تضوي تقولي قرآن
- كدي النشوف المصف يييداك
اها البنغالي واصل صلاته وهم مشوا علي المصحف يفتشوا في السورة
وكتين لقوها ود كمبال قعد يداعي في لطفي:
الله لا كسبك انت شن عرفك بالقرآن ان كان الشي الحافظه كله «الهمزة اللمزة» و«الكوثر»
- اييي نان شن عرفني انا في حياتي ما سمعت سورة فيها فوانيس وزيت زيتون
- بي وين تسمعها انت بييي وييييييين... ليلك ونهارك تنقز مع محمد كرم الله من المطبخ للصالة

ههههههههههههههههههههههههههههه

[طارق جبريل]

نفسي اجيب الطربيزة الكبيرة واختها في نص البرندة وافرش فيها بطانية حمرا وملاية المكوة
واولع الفحم في المنقد واشيل الجمر بالماشة واملأ المكوة وارفعها اديها هزة وانفخها بالجنبات محل الفتحات
واختها في حافة الطربيزة في حيمورة المكوة واجيب المسجل ابو باب مافي داك والشريط بيطلع منه
زي تفة التمباك وادخل سلكين المسجل في الكبس المقلدم داك وسلكه جايي نازل من جحر من الاوضة
واشغل شريط ابراهيم عوض الفيهو اغنية من قساك واخت جنبه شريط وردي مرحبا يا شوق
ومحمد ميرغني ما بتفدر تتوب يا قلبي المودر وعثمان حسين ليه تقول ايامنا راحت وانتهينا
واردم الهدوم العايز اكويها في العنقريب الفي الزقاق وامي تجيب لي عراريق وجلاليب ابوي عشان
اكويهن معاي.. واشم ريحة السخينة حقت الفطور العاملاها لينا امي وهي بتعوس في الكسرة والفطير
واقعد ادندن مع المسجل واكوي ومرة اديها صفارة كدة مع مزيكة مرحبا يا شوق...
واقلب المسجل رادي وحقيبة الفن و(الجرحو نوسر بي ولع فيني جمرو الحي)
ميرغني المامون واحمد حسن جمعة.... وارجع اشغل المسجل تاني لمن اصل جلاليب ابوي
وعثمان حسين: ما بصدقكم... ويجي عوض كريمة ناطي من بيتهم بالحيطة الفي الزقاق
ولابس جلابيته المسهوكة ديك ويرقد جنب الهدوم المكويات ويرفع رجلينه المكلوجات في حيطة الزقاق
ماسك ليه مقص بيقص في بنطلون قديم عايز يعمله ردا للدافوزي... وامي تجيب لينا القنقروشة
في صينية الشاي وتختها في طرف العنقريب وعوض يشاغلها: احب فطيرك انا يا الشايقية..
انا لله ياخ

[طارق جبريل]

صحن طلس ابيض كبيييير مخروم في الجنبة وفيه خيت دبارة... خاتنه في بنبر.. جردلين طلس فيهم ورود بالجنبات مليانات دقيق فينو.. بستلة مليانة سمن ريحتها مالية التُكل... خميرة بيرة في علبة لبن... كانون فيهو حلة فيها موية بتغلي... كمون اسود.. نشادر في كيس.. فتايل صغيرة فيها منكهات وسوائل... جردل طلس صغير (مناصص) سكر مسحون... طربيزة خشب فيها مفرمة مركب فيها قُمع.... خمسة صواني نضيفات ممسوحات بي سمنة وفي طرفن مكتوب بي مسمار (بت ابو دية)... علبة حلاوة فيها مناقيش وكباية كبيرة وواحدة صغيرة زيقن ممسوح بي زيت... صاج جنب الراكوبة في كانون كبير تحته اعواد مكبوب فيهن جاز من البابور حق النحاس والنار تطقطق في الاعواد وجنب الصاج طشت غسيل... عشرة بنابر تحت الراكوبة ورادي معلق في الشِعبة (وكيف قيلتوا)... حُقة صعوط في الطريزة وكبابي شاي... دقيق في نص الصحن وفاجنو وكبوا فوقه السمن وشوية موية سخنة معاها (بسم الله يا رازق يا كريم)... عجينة في صينية فاردنها بي كباية.. قطيع العجينة بالكباية والقالب... صواني خاتنها في الاوراك وينقشن فيها... جدادة حايمة بي سواسيوها.. صينية فوق الصاج وكفوا فيها الطشت وختوا فيهو جمر من فوق...
سكر مسحون في حلة وجواهو خبيز يضرضروا فيهو... جرادل نضيفة ومنشفة من الموية وبي غتايات... الجردل وكتين يتملي يرفعوهوا في راس الفضية... مفرمة وبسكريت ورص في صينية... صوت ضكر حمام (غووووووغ غوووووغ)... شيالات كعك وحلاوة ريرة وبسكريت... وتعود الايام...
انا لله ياخ

[طارق جبريل]

شكله الراحد مصنقر براهو في البوست دة
:biggrin::biggrin::biggrin::biggrin:
البروف جاب رجلي
:biggrin::biggrin:

[احمد سيداحمد]

شكله الراحد مصنقر براهو في البوست دة
:biggrin::biggrin::biggrin::biggrin:
البروف جاب رجلي
:biggrin::biggrin:

ماك براك يا حبيب ، واصل ونحن متابعين كل ما تكتبه .

تحياتي

[عكــود]

سلام يا طارق وينعاد عليك والأسرة بكل خير.

زي ما قال ولدنا أسمر، والله ماك مصنقر براك،
والزيي وزي أسمر ماهُن شويي، كان أعضاء كان قراء،
والدليل عدد القراءات.

دحين ياخوي واصل وصفك و"طمستك".

[طارق جبريل]

لطفي جبريل.. زول نادر على طريقته..
ممكن تكون قافلة معاهو للميتين وتجيهو انت بارم وشك يخليك تضحك لامن تموت..
قبل كم سنة كدة رجع نهائي من السعودية.. وصادف رجعته دي انه انا مشيت اجازة..
اها كنا ما بنتفارق 25 يوم..
بالليل نخت السراير في الدرابزين ونطفي النور ونقعد نتونس ونقرقر..
يوم دفسناها بوش في دكان وليد وضربنا البارد في البنابر جنب القِدرة وجينا ماشين علي البيت
لقينا السراير دي تهبهب وبااااااااااردة.. جبنا صبارة الموية وختيناها بيناتنا..
- إنت يا طارق تتذكر أمال السمحة ديك في مربع (...)..
- أم عيون غُلاد ديك وبتمشي زي الدقيق الخميرته زايدي
- بس ياااها كتلتها
- ودي الذكرك ليها شنو
- أمبارح شوفتها ياخ راكبة حافلة وبقت مرة كبييييييييري متل الماكلالا أمانة.. مع انها كانت سمحي خلاص
- اهاا.. انت قبل دة موش كنت رايدها ايامك الفي اولى ثانوي
- اييي... يوم بعد درس العصر قابلتها علي الجامع.. وسلمت عليها وأديتها لبانة ماكسي..
- هههههههههه دي ياها ريدتك ليها
- لا ياخي قلتلا تقابلني بعد باكر محتاج اقولها شي ضروري
- اها
- جازفت لي طرادة من متوكل اخوي ويومين ما فطرت في المدرسة وتميت لي حق نص كيلو باسطة
- انت اصلك داير تدوعلا ولا تحبها
- لا ياخ الباسطة دي كانت في وكتها زي ريحة كريستيان ديور بتساعدك في الحنك وكدة وبتخلي الجكس يلين
- اصلو دي باسطة دي ولا شحم... اها
- مشيت لي محمد مكاوي اتسلفت منه الساعة
- كمان الساعة في شنو
- جنصصة ياخ
- اها
- لبست الدبابة حقت انور ود عمي وقشرت وانتظرتها في ركن «فاطنة عبد الرحيم»..
- أها جاتك
- جات معاها اشراقة ياخ وخايفة كدة
- يعني ما قدرت تفك آخرك
- فكيتو علي خفيف كدة واديتها الباسطة
- اها وشافت الساعة والجنصصة
- والله قدر ما كشكشتها ورفعت يدي لي فوق ما ركزت معاها.. كان مركزة في الدبابة والباسطة..
- ههههههههههههههههههههههههه.. اها
- اها شنو... لاااايوم اليلي تاني ما قابلتها.. أكلت الباسطة وخلتني مقهي..
دحين باقيلك دة بيكون شاكوش ولا شنو؟؟؟
هههههههههههههههههههههههههههههههههههههههههههههه
يخليك ويغتي عليك يا لطفي يا ابن أمي ياخ



http://www8.0zz0.com/2014/09/16/23/635121896.jpeg (http://www.0zz0.com)

[طارق جبريل]

يا جماعة الشباب القايمين الايام دي قولوا ليهم عليكم الله خلوا لينا غنانا حق زمان دة زي ما ياهو..
الواحد فيهم شايل ليه جيتار وشغال كللن كللللن
ويبحلق في عويناته للسماء متل ضكر الحمام الانتايته حاضني البيض وراكي فوق الصفيحي وفهمه كملان
ويبهدل في غناء الحقيبة بي طريقة «ممجوجة» ويقول ليك: عايز أوصل غنانا للعالمية
ياخي عليك الله خليه حقنا دة نحن ما عايزنه يصل العالمية..
سوي حقك ووصله لي شاكيرا وبيكيه ذاتم عديلة عليك
الغناء دة اتعمل بي احساسه وبي لحظته الهو فيها وبقى خالد عشان كمية
الاحساس الصادق فيه والالحان الخلقت منه اسطورة.. والعزف الكان الناس
بتدرب عليه شهور وشهور لحدي ما يصل للمستمع في صورته الخلته يدخل وجدان الناس..
ياخي نحن ما ضد جيلكم دة سووا العايزنه.. بس كمان خلوا لينا حاجات
ما تقعدوا ليكم في ضهور لساتك في ركن الحلة وكللللللللللللن كلللللن تبوظوا لينا حاجاتنا
اله يبوظ ختراتكم ياخ

[طارق جبريل]

(مُستراح) قصر الإمارات...
دُنية الله دي وكتين تعيش فيها كتير أماني ما تشوفلك جنس نصايب ومحن..
قوم يا ناصر ود اللمين سوقني ودني لي قصر اللمارات..
لقيتلكم النوافير دي تجَلجِغ قدام القصر وشوف عيني النور دة جوة ألمي (الموية)..
وشيتا أحمر وشيتا اصفر وشيتا بنوفسو (بنفسجي)..
وواحدين في البيبان (جمع باب) لابسلهم شيتا كدي مجرجر مع اللرض ويشيلوا يحنوا في رقابهم..
متل التكني رئيس ولا شيتا غلييييييد في البلد..
واصلو العربات دي من سماحتن وحات نضري تَمَلِح فيهن المولاح ضومة ضومة..
وأنا أشيل أنطط في عويناتي متل ضكر القعونج وكتين يكون يغوغي وكايسلو بُطان وغازي كرعينو في الطين وممرق رويسو حاريلو جكسوية قعونجية بت كلب كدة..
نان انا وكتين دخلت جوة القصر ما قربت أقول صدق وعده..
شي بنوت علي النجف سميحات ومتمرات وحات نضري إن كبوا فوقن العسل يندلق..
والواطة دي ملسااااااااااااااااااااااااااا وضومة ضومة تخليك علي البتتزحلق في الجليد..
والشمعدانات نورن باقي علي ضو القندران في خلا هيا وسنكات بالليل..
وناصر مسكين يشيل ويشرحلي... دة رخام آآبعرفه شنو..
ودة سجاد إيراني باليد.. ودي طفاية مذهبة..
قوم قربنا من مُستراحات الخرابة دة وناصر صاقعلي: ادخل شوف الجمال الهنا دة
وأنا صاقعلو: في المستراح كمان في جمال... علمه واسع يا الحبيب..
أها قمت كدي دخلت ولقيتلي فلبيني انحنى لامن قرب يقص رقبتو وشايلو بشاكير لا تعرفن حلاوة قطن
ولا تعرفن يتمسحوبن.. وحات نضري وكتين شميتن وحكيتن في وشي قايل نفسي يدلكوا فيني..
قمت كدي دخلت علي مستراح السرور دة..
وكتين فتحت الباب عيوني ديل نططتن تاني وشعر راسي وقف علي المغنطيس الكابسو الحديد..
قلت كدي قلعت شبشبي واديتها قدلة في الرخام الماهل وواسع داك..
وقلت كدي اتوهطت في مقعد السرور داك..
وحات ود الكرسني المقعد ماهل ونااااااااااااعم علي المرتبة المنجدنها جديدي..
وقلت كدي رفعت ركبي لااااافوق والخرابين ديلاك نزلت في أمان الله.. باقي كنت دافسها «مندي»..
وقلت كدي سرحت في مُستراح جبيرين الزمان داك..
وحات نضري نحن مانا كنا عايشين شي... مهمشين ضومة ضومة..
ياخي تقعد في مستراح الجن داك وانت بي سفنجتك ام نخرة مقطوعة ديك ورابطها بي سلك دبارة..
وتحقص ركبيك ووسطك يبقى مليان عراريق وسروال وتغمت التِكة بيناتن...
وتقعد تباصر في نصايب القراريص ديلاك واللُوبي عفن وتَقنت والعرق يُخر من تحت اضنيك..
ووكتين ينزل لببببببببببببببببب كدي وتسمع صوته تحت يبقالي لامن تقرب تزغرد..
والعجب وكتين يقولولك شوف المستراح دة ما يكون اتملا..
تشوفلك باقي جريدي وتولع فيها النار وترميها من جُحر المستراح وتتاوق..
وتلقى الاسمنت المسلح أليل القراريص والسخينة كابساتنه الصراصير ومع بقة النار كدي
يقومن ينجارن علي الركشات في شارع الستين..
أها يا الحبان الله سهلي وبقيت في الموية افتحها من وين..
أعاين في المواسير علي صُرة الشافع الما قطعوها كويس..
مبعجات في الحيط وماني عارف افتحها كيفن..
يا اخوانا دي وكرة شنو دي...
غمتها بي دي ما نفعها ضربتها بالبشكير ما نفع..
ربك ربك الخير يدي مشت تحتها إن كان شووووووووووو جات نازلي سوخنة وسمحي تشهيك الوضو..
قمت كدي مشيت يدي جنب الماسورة الصغيري الجنبها إن كان يطلعلي الصابون وينزل علي الاسكريم
صلاتي علي محمد... صابونا سمح كدي وليه ريحي سمحي قربت اشيلو اتريحبو خفت يقبضوني وانا مارق..
تاني مديت ايدي علي ماسورتا صغووويري كدي علي مصران الخروف وكتين راسو يكون قطعه الضباح قبل يجرجرو
إن كان تنزلي يا الحبان ريحي.. قالت كدي عطرت المستراح كله.. وقلت كدي اتريحت زيييييين ومليت خياشيمي..
وحات ربي دعيت لي الشيخ زايد في تربته...
الرسول ما تقولوا للبشير يسويلن مستراحات متل ديل ويتحلل وعافين منه لله والرسول..
هههههههههههههههههههههههههههههههههههههههه

[طارق جبريل]

http://www2.0zz0.com/2014/09/17/18/280604999.jpeg (http://www.0zz0.com)

عمتي حواء بت الخضر ود كنيش..

- دحين يا عمتي اتعافيتي مع عمي مكاوي
- أييي يا ولدي قبل تلاتة يوم من يموت دخلت عنده
- أها
- قلتلو الرسول آآآمكاوي تعفالي وأنا عافي منك لله والرسول
- هههههه باقي انت تكوني جننتيهو في راسه دة من عرسك... شي طشمي
وشي سف صعوط وشي شلويح... خابرك انا يا عمتي ماكي نصيحي شي
- هههههههههههههههه الله يغفرلنا يا ولدي
- أها وعفالك
- أييي وقالي الله يغفرلنا كلنا يا بت ود كنيش
- تراكي سمح راضيتيهو... دحين في الحج انت اسمك ما كان طلع شي
- أييي عمك مكاوي اسمه طلع وأنا قديت عربي
- ههههههههههههههههههههههههههههههههههههه طيب سمح الاتعافيتي معاهو
- لكن بعد مات نسيت أقولو شيتا حرق روحي
- أكنو شنو دة
- ياخي «الحِد» دة أماني مو صعب
- كيفن
- يا ولدي اتلولح في الهديمات البُيض ديل ثلاثة شهور ضيقن خلقتي
لا مشي جيران لا ونسي بي هني وبي هني... شيتا كدي قاطع اللهجي
- ههههههههههه
- نان أصلك كنتي دايري تسوي شنو
- أريتني يا ولدي وكتين دخلت اتعافى معاهو إن قلتلو يعفالي من «الحِد» دة
هههههههههههههههههههههههههههههههههههههههههه

[عكــود]

سلام طارق ولعلك بخير.

جيت اتحمدلك سلامة الرجوع من الإمارات.
:confused:

[طارق جبريل]

مشيت اجيب البت من المدرسة لقيت ليكم البنات كل واحدة شايلة اي فون وخاتة السماعات في اضنيها
ومنتظرة ابوها والضفور شي احمر وشي لبني وشي بنوفسو (بنفسجي) وشي مستردة والشعر ملولو زي المطلعنه من البُكل الزمان ديك والاولاد برضو مشعلقين السماعات ولابسين ليهم الكبك بتاع نايك الفيهو الوان بتعمل زغللة ديك وواحدين لابسين شرابات صغنبوتة كدة حدها عضم الشيطان
طوالي اتذكرت عوض كريمة لمن حكي لي عن طفولتهم والقراية... قال كان لابس
تموت تخلي الفردتين شمال واصبعه الكبير بيطلع برة اللساتك لامن عمل ليه حبن واتكردم زي آخر طعمية في الصاج لمن تتلبك مع اختها... والردا الكاكي من شدة ما انسهك رقع فيهو لبادة وخيطها بي خيت المراتب داك ولمن يكون ماشي مع العرجة بتاعة الحبن اللبادة بتطلع وتنزل زي كركاسة العجل وركبته فيها شعر واقف واقف كدة علي المغنطيس الكابسه الحديد وكان عنده شعر نخرين مارق لي برة زي المقشاشة الخاتنها في جردل... وصحبه كان اللباس دايما ناصل من الردا لحدي اضطر
يفك كفة الردا ولمن يتجنصص بيربي ضفر اصبعه الصغير وانا شاكي كان بحك بيهو القمل ومرة زراير القميص قطعن في شكلة ما لقى غير زراير الابرول لامن محل الزراير بقى زي الخُرج وكان بيتقل في الجلسرين في البرد والرجل بعد حصة الفطور بتبقى معججة ومكندكة زي ضهرية اللوري الكان شاحن تراب... ههههههههههههههههههههههههههه

[طارق جبريل]

وكتين مشينا ندرس الجامعة في مصر... اها بعد الانتفاضة الصادق المهدي كان مكاتل المصريين...
والخرابين ابو يقبلونا علي بعد حراق روح... مشينا العلاقات الثقافية وشلنا جوابات التحويل ديك..
اها امي رحمها الله قالتلي الصعيد دة يا ولدي قالوا بارد دحين نزلتك من الطيارة تشتريلك فنلة ألت برد
انا علي حس البرد دة شلت بطانيتي الحمرا ديك ووهطتها نص الشنطة..
واصلو ما عندي هدوما قدر ديل..
ولفيتلي فتيلين ألات جلسرين بي كيس وباقي دلقانة من التُكل وغتستهن في نص الشنطة...
وسويتلي فيكس في جيب الشنطة... وقدر ما حكيت راسي قلت اشيلي برطمان أليل كركار فشان كنت
بشوف أمي قبل تنوم في البرد البينوني في الشبابيك داك فوووووووووووو وو فوووووووووو اها تمسح
يدينها وكرعينا وتجر البطانية فوقها قبل تدعي: امسينا بي الله واتوكلنا علي الله يا ربي تزيد اللجور..
أها انا قايل كركار الجن دة يدفي الزول ويشيل القشروب أليل البرد داك اليحميك تضحك... وضحكتك
تبقى متل العتوت الرابطنلو الخشبايي ديك فشان ما يرضع أمه... عندي جزيمي علي الزول الصايده
البرونبوفي ليها حمبكات بالجنبات كدي.. طلعت علي النيمايي ألتنا انتظر (مكندشة ابو الرفارف) بتاع
الورونيش البيجي من العشش داك وليهو صندوق ساويلو فيهو فريد ويكشكش فيهو:
وررررررنش يا...وررررررررنش يا... ربكم رب الخير جاء واديتو الجزيمي وقلتلو يخيتها داير ما يدور
باقي ماني عارف بلد المصرييين دي كيفنها وهناك مافي عم اسحق يقطعلي تموت تخلي..
اتورنشت زي العجب وشلتها ختيتها في الشباب ضومة ضومة...
أها يوم السفر دة مسكت قريشاتي صريتن في اللباس واديتن تنيتين فشان ابوي رحمها الله قالي
المصريين عندهم نشالين يسرقوا الكحل من العين.. أها مع الحزام القروش سولهن كورضومة كدي
وبقت لازي قدامي متل الزول الما قطعولوا صورته كويس وقامت حمبكت لي قدام متل فنيسة الجدادي..
لقلت كدي ودعت أهلي ومشينا علي مطار الخرطوم لابي شنطتي ومرة مرة اهبش القروش الصاريهن
في اللباس... وزنا العفش انا ومحمد ود عمي وقعدنا ننتظر لامن ذاعوا الطيارة الماشة علي القاهرة
وطلعنا الطيارة وقالت كدي اتوهطت في نص المدرج علي سمكاية البلطي في نص الصاج..
ووكتين بقت تجري وتكورك انا اصلي كنكشت في الكرسي القدامي ومرة مرة اتبن قروشي في محسني
ووكتين قالت كدي صنقعت راسها بقيت اضغت في سنوني كررررررررر كررررررر واسوي في:
وووب علي يا بت ابو دية... القرايي العلي شنو مالي ان بقيت كملت الطُلبة لامن بقيت اسطى...
ربكم رب الخير اتعدلت وجات ويحيدي مطرطشة احمر شلاليف لازالا كارو قدامها فيهو اكل وشيتا
يشربو... ختتلنا انا ومحمد ود عمي اللكل وشيتا كدي ميه ميه كدي ولحمايي حايمي وسطه علي
دينمو العربيي.. لا بصلا اخدر الزول يقرشو لا فجل وكتين تاكله وبطنك تكوفر وتتنبل... أكلا قاطع
اللهجي وماهو مسبك في الحلة المكرتبي ألت بت ابو دية رحمها الله...
شويتين قالولنا اربطوا الحزام وصلنا مطار القاهرة... قالت كدي الطيارة تميل من هني لا هني متل
الحديي الدايري تختفلها سوسيوة... وقالت كدي نزلت رجلينها في الواطة واخدتلها جريا ووقفت..
اها فتحولنا الباب... طلعت رويسي كدي من الطيارة البرد ضربني ولقيت نفسي الدخان يطلع من
خشمي.. تاني قلت كدي شلت نفسي ونفخته والدخان دة جاء مارق وليهو لواية... قلت في نفسي
هيييييع يا ود جبرين بقيت زي الخواويج أليلين نشرة تسعة في التلفزيون.... أماني يا الجلسرين
ما جاك مسيح ههههههههههههههههههههههههههههههههههه..
وأصلي يوم عرفت العنب البناتي داك آآآبيتحكي ضومة ضومة
هههههههههههههههههههههههههههههههههههههههههههههه

[طارق جبريل]

عمتي حواء بت الخضر ود كنيش سوولا عملية موية في عينها..
أها سألتها عينك كيفنها:
يا ولدي الخرابة مديني قطرات قدر الفَني.. وحات نضري يسقنلهن عشرة حيضان ألات برسيم
هههههههههههههههههههههههههههههههههههههههههههههههههه ههههههههههههههههههههههههههههه

[طارق جبريل]

زمان لمن الحصة تكون فاضية وتطلع الاطلس وتشوف ليك مدينة غميسة كدة في جخانين آسيا ديك
وتقول لي أصحابك اعرفوها لي وين والناس كلها تقهي في الاطلس
الحركة كان لذيذة خلاص....

[طارق جبريل]

فتحت الشنطة بتاعة الغداء بتاعة بتي وهي ماشة المدرسة لقيت لي سندوتش الفيهو الجبنة الصفراء ديك بتكون نازة كدة في البتاعة البتخلي الحاجات سخنة ديك وواحد دانيت واتنين بسكويت شكلاتة وتفاحة وعصير منقة... قفلت الشنطة لقيتها واقفة وراي وقالت لي:
انت يا بابا ماما عشة كانت بتسوي ليك الغداء كدة
لا انا كنت بتغدا في البيت لكن بفطر في المدرسة
بتفطر شنو يا بابا في المدرسة كورنفليكس ولا كرواسون
انا افطر كورنفليكس يا بتي انا ود جبرين افطر كرواسون
طيب تفطر شنو وماما عشة بتسوي ليك فطور شنو
كانت بتديني ريال ومعاهو طرادة يا بتي
وبتشتري شنو يا بابا وليه ريال وتاني طرادة وديل هم شنو
بالريال بنتشارك انا ومختار هارون ومحمد بلو واحمد دهب وابراهيم عبد القادر ونعمل بوش
آآآ دة الموية بتاعة (البينز) السويتوها في الحوش انت وعمو لطفي
ايوة
والطرادة يا بابا بتشتري بيها عصير وشكلاتة
عصير وشكلاتة... لا دي ما داخلة في الفطور دي بجيب بيها قٓش (برسيم) من عم موسى للغنم
Ohhhh my god dad برسيم from your school
بالله دي ترباية دي...
لو قلت ليها انا وعوض كريمة كنا بنقبض ود ابرق وننتف ريشه جمب العمود ونشويهو بي مصارينو
وكمان بنتقرع بعد الشية... كانت نكرتني حطب البت دي

[طارق جبريل]

الليلة قمت من الصباح وطيف اسماء اختي زاني لي في راسي الله يديها الصحة ويخليها لي اولادها واحفادها... اتذكرت حاجات كتيرة كدة مع بعض... حمام العصر داك لمن كان تدخلنا واحد واحد وتحمينا وتشيل الصفيحة من البلاعة وتكشحها في الشارع وتدينا هرشة: امشي اعملها لي ام الحفر وسكج بكج وتعال لي مكندك... كانت طيبانة ياخ رغم انها اختنا الكبيرة لكن ما كنا بنهرش منها لانه كانت جنها ضحك وقلبها ابيض كدة... ايام عرسها انا ما كنت فاهم الحاصل شنو.. ساقوها ودوها بيت الجيران وقفلوها هناك وانا كنت زعلان من الحتة دي عشان ما بلقاها تضحك معاي وتكلكلني قبل ما انوم بعد شاي المغربية ابو لبن مقنن داك ولقيمات.. مرات اخت تلاتة بنابر فوق بعض واطلع في حيطة الجيران المغربية وألاقيهم بعلموا فيها رقيص العروس... جات تعوم بصديرها دي الرايقة... دي الرايقة... العريس قمرة عليك الله فتحي وشوفي عليك الله... ما كان في غنايات وعلامات رقيص محترفات الشغلانية زي ناس قسمة... بنات الحلة والجارات ودلوكة وخلاص... البيوت كانت واحدة وممكن تدخل اي بيت تاكل وتشرب وتمرق ولو بتك عرسها قرب يجوا (يحبسوها) في بيت اي جار من الجيران وبتكون في امان... قبل العرس بي يومين دخلت عند الجيران نصت نهار بعد ما زهجت من لعبة كمبلت... مديت راسي في الاوضة الهي قاعدة فيها... لقيت معاها نص بنات الحلة... الناس كانت حلوة ياخ.. هي شافتني كنت عايز اقوم جاري الشارع نادتني قالت لي تعال خجلت ادخل واحدة من بنات الحلة شالتني وختتني في حجر اسماء اختي باستني وقتعدت ليها وهي زي الدمعة عايزة تنزل منها كدة والبنات شابكنها يا بت قولي بسم الله.. قمت انا قلت ليها انت ماشة وين... ليه بقيتي ما بتقعدي معانا في البيت... قامت ضمتني شديد كدة وزي الدمعت.. البنات هرشوها وانا نزلت منها وكنت عايز امشي وواحدة من البنات مسكتني جضمتني وقالت لي بكيت العروس ياخ وانا كنت بحاول اتملص منها وشابكها: ياخي فكيني ياخ... قمت جاري ومشيت بيتنا لقيت امي ماسكة ليها قدح دلكة وجمبها كورية فيها موية عكرانة كدة ولدايات فيهن طلح مولع فيهو قدح مكفي قمت قلت ليها: انتو ليه وديتوا اسماء عند ناس عم محمد صالح ليه بقت ما بتقعد معانا.. قالت لي اسماء خلاص حا يعرسوها وتمشي بيتها قلت ليها ليه تمشي ياخي انا ما عايزها تمشي.. مسكتني ضمتني كدة وعيونها رقرقن وقالت لي: بتمشي بيتها لكن بتسكن جبنا عشان كل يوم تمشي ليها.. يوم العرس الناس صلوا في بروش كتيرة كدة قدام الصيوان وبعداك قعدوا يسمعوا في الماذون بتكلم مع ابوي وابو العريس وشوية كدة: الف الف مبروك الف الف مبروك والنسوان قعدن يزغردن والصيوان دة هاج وماج كدة وفرقة البوليس بتاعين الموسيقى ديلاك قعدوا يعزفوا: الليلة وين لا وين يا عيني وعجبوني فالوا العين يا عيني انا.. والنسوان قامن يرقصن والهيصة قامت... شوية جات اسماء اختي لابسة زفاف كدة وقعدت اعاين ليها من بعيد وقعدوها في الكوشة والحفلة والغناء اشتغل شي طمبور وشي مزازيك انا مشيت قعدت في البروش حقت العقد نعساااان ازوزي.. الصباح لقيت نفسي نايم بي شبطي في عنقريب جمب التكل.. واسماء اختي مافيشة قالوا سافرت...
يعدلها عليك شقيش تقبلي يا اسماء اختي يا (حبوبة)...
انا لله ياخ

[طارق جبريل]

زمان والواحد شافع تكون قاشي في الدافوري دفير صاح..
اها تكحل الحاجة جاية من الخضار وعينك لي قعر العجورة مارق من القفة..
تجي طاير تقلم العجورة وتقرمش فيها وتمشي تواصل الدافوري..
هسي اظن ذاتو ما بقت في قفة.. والناس خلو العجور ههههههههههه

[طارق جبريل]

الفرقة الفلسطينية الشاركت في «عرب قوت تالنت» ما اعتقد إنها كانت محتاجة استدرار عطف اللجنة أو المشاهد بتيمة «فلسطين المحتلة وصعوبة المرور من المعابر» وإنه هذه لوحدها كرت أبيض لقلوب كل العرب والإنسانية في عمقها الحقيقي.. محاولة استخدام ما يحدث في فلسطين في برنامج مواهب ومحاولة تقديم فن مختلف «مثل فوز محمد عساف» في تقديري الخاص جدا يخصم من المتسابق.. لو اعتمد على موهبته فقط لكفاه الأمر.. بؤر الألم في العالم العربي الآن أصبحت من الكِبَر بحيث يصعب حتى حصرها وإن كان ألم فلسطين أعمق وأخذ زمنا أكثر.. أطفال دارفور وجبال النوبة يعيشون تحت القصف في الكهوف في حكم رئيس جاثم على صدورهم في ظل نظام حكم يقول إنه «رسالي» في السودان.. ومخيمات تندوف تعج بأطفال يحلمون بغد أفضل بعيدا عن مصالح جنرالات الجزائر.. وأطفال سوريا يموتون قصفا بين جنون «داعش» و(أنا) «الأسد».. وأطفال العراق يحترقون وتحتهم آبار بترول كانت ستغنيهم دهورا من الرفاهية بعيدا عن «رجم النساء» و«نكاح السبايا» و«فساد أصدقاء المالكي».. وأطفال ليبيا يدفعون ثمن «من أنتم العقيد» والذين أتوا من بعده... الموهبة وحدها قادرة على إيصال صوت المتسابق بعيدا عن قضايا الوطن.. من الخليج إلى المحيط الكل ينزف.. لكن رغم الكثير من الألم فرحم هذه الأرض قادر على ولادة مواهب عربية.. والفرقة الفلسطينية تستحق «البززززز الاصفر» دون أن تكشف عن هويتها الفلسطينية ولو كان عازف القانون وحده المشارك لكفاه الأمر...
من زاوية أخرى:
الجيل الثاني من المهاجرين المغاربة والجزائريين ليسوا كلهم «الإخوان كواشي».. هناك جيل مبدع جدا جدا أتى لـ«عرب قوت تالنت» ويستحقون المشاهدة والتنويه..

[طارق جبريل]

- عوض كريمة: انت يا عمك القيامة حا تقوم متين
- ليه يعني
- يعني ما عندك عنها اي معلومة
- والله علمها عند ربها.. لكن انت مالك يعني
- ياخي الواحد عايز يحدد موقفه من هسي
- حا تزيد في النوافل والصدقات ولا شنو يا ابو عويض
- ابدا بس عايز اجازف لي مكان
- اجي يا ود كريمة... مكان كيف يعني... ابو عويض انت فاطر شنو
- يا عمك لمن تحدد زمانها بتقدر تقنص ليك في مكان كويس ياخ
- اجي، مكان كيف يعني
- لو عرفت وكتها بسافر قبل اسبوع كدة اديس
- اديس؟؟ وليه اديس يعني
- يا عمك القيامة دي حا تقوم من هناك قطع شك
- وليه يعني تقوم من اديس دي
- يا عمك الحور العين ديل كلهن ياهن جكس اديس دة... انت قايل شنو... عشان كدة
لازم تجازف ليك مكان هناك عشان ما تتجهجه
- هههههههههههههههههههههههه ابو عويض انت نصيح
- يا عمك يمين بالله ما تلبد للحور العين الفي اديس ديل حا تدقس دقسة عدوك... ياخ يقوموا ناس
قتيبة ابن شنو وابا ذر شنو وابن ابي شنو ديلاك يقطعوا البحر دة ويلقطوا ليك الحور ديل من
شوارع اديس دي يا عمك يخلوا خشمنا ملح ملح.... اها بعداك الا نقع امبدة كرور....
هههههههههههههههههههههههههههههههههههههههههههههههههه ههههههههههههه

[طارق جبريل]

الايدز (AIDS) في المغرب بيسموهوا «سيدا» (SIDA)..
....................................
ناصر أخوي زول طيباااان كدة الجرادة تاكل عشاهو.. لكن شليق شلاقة ما عادية
شلاقة التمغس ديك لو حفرت ليك حفرة كبيت فيها موية نار يقول ليك: كدي خليني ادخل رجلي
فيها أشوفها بتحرق هههههههههههههههه..
اها كان في المغرب معاي شغال في امان الله جاتو زهجة كدة شاف ليه مخارجة للكويت
قدر ما حنستو ياخي الكوايتة ديل ولاد هرمة.. حرن كلو كلو قال الا يمشي قلت ليه عديلة
اها شال اولاده ومشى اتاريهو من ضروريات اخراج الاقامة لازم تعمل فحوصات روتينية على الصحة
ومن ضمنها الايدز... اها زولكم مشى المستشفى وعمل الفحوصات كلها وشالوا منه الدم لي فحص الايدز
وقالوا ليه ترجع بكرة عشان نديك النتيجة... اها باكر من صباحات الله طزززززززز علي المستشفى
مشى كشف كدة محل عمل الكشف عشان يشيل النتيجة قالوا ليه النتيجة بتلقاها في محل تاني..
ما لقى ليه زول يسأله من المكان دة... علي شلاقته لمى ليه في هندي المهم شوية انجليزي
علي شوية شايقي شرح للهندي هو عايز شنو.. اها الهندي قام قال ليه: إنت سيييدا
زولكم قلع عيونه وعرقه بقى يخر وقال للهندي: الله لا كسبك انت قاعد تقول في شنو..
الهندي تاني قال ليه: انت سيييييدا ...
ايييي الله لا كسبك السيدا التغمتك تلحقك الزينين... بقى يرجف ورجلينه اتكلوجن وحيله مات
ضومة ضومة وبقى يداعي في الهندي: يا ربي يلاقيك قندران يقشك انا ما هبشتلي مرة
تقولي سيييدا.. الشي دة تكونوا غلطانين الله يكتلكم.. أصله برك في واطة الله دي..
الهندي قلع عيونه ونزل عنده في الواطة وبقى تاني يقول ليه: مال سوداني إنت سييييدا..
ناصر رقد كاويق ضومة ضومة قام الهندي تكله لحدي محل النتيجة وناصر بقى يرجف علي
جلي السماية.. ادوهو الظرف حق النتيجة يفتح فيه وكله يرجف علي الموبايل وكتين يكون هزاز
وكتين شاف حتة الايدز (نيقاتيف) بس جري وراء الهندي وينبز فيه: يا ود الكلب يا غنماية
شاحد ربي دة يرحلوك من هني والطيارة التوديك تقع في البحر قال سييييدا قال.. يا ربي
سيدا التلحقك أمات طه ساوي دقنك كدي علي تيس أم النصر....
هههههههههههههههههههههههههههههههههههههههههههههههههه ه

[طارق جبريل]

عوض كريمة كان منتظرني جمب مظلة فاطمة عبد الرحيم في زلط الصحافة شرق...
عوض كريمة: يا عمك فاتتك جنس رُكبة... ياخي الركبة دي لمن تكون مليانة ومفرطة بالجنبات موت احمر
- ودي شوفتها وين دي يا شقي الحال
- بت الثانوي ديك ياخ الهواء شال الفستان هسي فوق الركبة
- ود هسي ياها مقاييسك للجمال يا ابو عويض
- يا ابو الطروق ياخ الرُكبة دي لمن تكون مدوعلة والطارة حقتها الفوق ديك العاملة زي طاقية اليهود ديك
لمن تكون غرقانة في الكمونية وما ظاهرة البت بتكون نجاض ياخ والله لو عوراء ولٓجنٓة وطيش الفصل بعرسها
- هي لكن انت مقاييسكك مالها بتاعة جزارين كدة
- ما الجزارين ديل هم ذاتهم الكاتلين الجدادة وخامين الكمونية ياخ اريتني هبوب انا ياخ
هههههههههههههههههههههههههههههههههههههههههههههه

[طارق جبريل]

كانت القرية كعادتها ذلك المساء يلفها هدوء عميق، بدأ الظلام يتسرب إلى كتف «شبا» قاهرا خيوط النهار، لا شئ في الأفق سوى منظر النخيل يرتمي في أحضان النيل، ذلك «الإله الأفعى»، الأزقة مقفرة.. بعض ذكور اليمام لا زالت ترسل نغمات هديلها علها تفوز بأنثى لتنجب لها صغارا تكون امتدادا لوجودها..
«سكن» القرويون إلى «بيوتهم» بعد عناء طويل بين المعاول والأرض في انتظار أن تحبل وتجود بثمرها عليهم... جيئ بـ«اللبن المقنن» برائحته المميزة الشهية تلك وكان «القرقوش» حاضرا.. وكانت «المحنة» وحكاوي «حبوبتي نفيسي بت البغاديد» هي مسرحنا في بيت جدي «ود القرونة» في إحدى تلال شبا..
انتصف القمر في كبد السماء محفزا للغواية، نسائم من عبق الأرض تملأ المكان، لـ«الرملة» هنا طعم آخر في ليالي الصيف تلك، اليوم كان خميسا.. تناهت إلى أسماعنا ورفقائي مزمل الرحيمة ومجدي فاروق ومامون مكاوي ومبروك الطيب ونحن نقتعد الرمال «أنين» طمبور من نواحي «القلعة» و«الدوداب»، كان الصوت عذبا مليئا بالدفء.. «مشاويرك عديلة»، يا إلاهي إنه «صديق أحمد» صاح مزمل طربا، أينما كان صديق أحمد كانت صورة «عبد الله محمد محمد خير» حاضرة.. فالرجلين مثلا ثنائيا غنائيا أغنى وجداننا بالكثير من الطرب..
«أها ماشين ولا أمشي براي» صاح مامون متسائلا، فهو يعشق صديق أحمد حد الجنون.. «كيفن مانا ماشين»، رددت عليها بابتسامة خبيثة.. وكان أن «سرجنا حميرنا» في سبيل صديق أحمد ونغمات طمبوره الجميل.. كان صوت الطمبور يأتي إلى ونحن على «حميرنا» ثم يعبر إلى الضفة الأخرى ويعود مرة أخرى كأنما يحفزنا لحث «حميرنا» على إسراع الخطى حتى لا «تفوتنا اللعبة»..
ما أنا وصلنا مكان «اللعبة» حتى جهرنا «نور الرتائن» المنصوبة أعلى «حوش» العرس، تركنا حميرنا لترتاح أسفل القرية عند النخيل وأسرعنا الخطى في طلب «النغم».. حين وصلنا كان «الدليب» يصدح حتى عنان السماء و«الصفاقون» يتبعون امرأة «تنقز» برشاقة كبيرة ويعطي «مُشاطها» «الشبال» يمنة ويسارا.. إنه فرح أحد أبنا القرية عاد من الاغتراب بعد خمس سنوات وجاء ليحتفي بالسعادة «عند منحنى النيل».. سرت فرحة المكان إلينا وأصابنا شئ من «النقزي» ونحن نقف خلف القوم... كان صديق أحمد مبدعا ونغمات طمبوره تأخذنا بعيدا إلى عوالم يصعب وصفها..
تغير إيقاع الطمبور إلى «الرتوتي» فدخل عبد الوهاب الحلبي وعلي عزاز «الدارة».. كانت مبارة في «النقزي» جائزتها «زغرودة» هنا و«أبشر» هناك... لم أر في حياتي شخصا يطوع عضلاته مع إيقاع الموسيقى كما فعل عبد الوهاب الحلبي.. تمايل الرجل هنا وهناك وملأ «الدارة» جيئا وذهابا وكان أصابع رجليه تنغرس في الرمل ثم تهلو من «نقرات الطمبور والرتوتي»... للفرح هنا طعم مختلف.. بساطة الناس ورحابة الأرض عند خاصرة النيل تصبغ الاحتفال هنا بنكهتها..
طربنا وتمايلنا مع القوم وأفق السماء يصفر ويزرق حتى بدأ الليل ينهزم مع تباشير الفجر وأذان «جامع شبا».. عدنا محملين بالفرح وشاكرين لصديق أحمد أفاعيل تطريبه...
إنا لله ياخ
عديلة عليك محل ماتمشي تمشي ياعديلة
ارضيلو زي الغيمة رشي مشاويرك عديله عديله عليك
عديله الكان قصيره الكان طويله عديله عليك
اما انا الهماني راحتك اول الشي
انت تامرني وعلي امرك بيمشي
بس عليك توعدني ماتطول بيك غيبة
وعد من انبل حبيب لي اجمل حبيبة
فيك عرفتة الدنيا قاصيها وقريبه
منك اتعلمت كيف اقدر اجيبا
لامتين يانومي في رؤياي تصدق
لامتين ياشوق مؤاني قليبي تحرق
تاني جود بي لقياي زمني المفرق
تاني يااجمل صباح في عمري اشرق
ياحلات العشرة وكتين تبقى صح صح
وياحلات الريدة وكتين تصفى تفرح
وياحلات ليلا معاك مادرنا يصبح
وياحلات صبحا تكون انت المصبح
في الربيع قالو الزهور تنضر تفتح
ياربيع في حضنو كم دفاني وارتح
يايباب بستاني من غيرك مكردح
والسموم في ام شير وغيرا ام شير تكتح
حبك الخلاني لي زول مابجافي
حبك العلمني انظم ليك قوافي
حبك اكبر مهر لي طهري وعفافي
اه بحبك دا اصلو حبك زيو مافي