المساعد الشخصي الرقمي

مشاهدة النسخة كاملة : ضيف على مائدة سودانيات ...! - 1 - خالد الحاج الحسن


أبو أماني
27-07-2009, 06:38 PM
gooodأحبائي الأعزاء ..
أحباء سودانيات .. لكم صادق الود والتحايا القلبية .. حقا قد سرني وأثلج صدري عمق صداقتي بكم ذهاء ما يقارب السنة أو يزيد .. قضيتها بينكم في سعادة وحبور .. وأحسست وأنا بينكم وبكم بدفء الأسرة وأحلى وشائج الإخاء والمحبة .. حيث صرتم بالنسبة لي كأفراد أسرتي رحما بل أكثر من ذلك..بحيث أقضي الساعات الطوال في رحابكم المرحة العامرة قبل وأكثر مما أقضيه مع أسرتي .. فلكم الشكر على ما وهبتموني من حب صادق إمتزج في شراييني وصار يغزو القلب ويعمر غرفه الأربع ويهرب ليعود ثانية ليمدني بالحياة .

فكرت مليئا في شكل مستقبل علاقة كل سوداني في سودانيات بالآخر! وهالني أن تكون علاقة صادقة حميمة كهذه عرضة للعيش والعمران طويلا عبر الفضاء الإسفيري والعالم الأثيري ..! وتصورت حياة شخوصها في اللاشئ وفنائهم في اللاشئ ..تماما كما يحدث يوميا بالنسبة لممثلين وممثلات نشاهدهم عبر الشاشات البيضاء والبلورية .. نعايشهم ونعاصرهم ثم يتلاشوا في اللاشئ حقيقي حزت في نفسي هذه الخاطرة .. وفكرت ثانية !..

أضع بين أياديكم عتبة أولي لتجسيد علاقة كل منا بالآخر .. وهو بوستر تتم استضافة عضو فيه ليكون مصدر حوار تعارفي يحكي لنا ما عن له أن يرويه عن نفسه فنزداد قربا منه أكثر وأكثر ومعرفة به وثيقة أكثر .. نعرف موقعه الحالي .. رقم موبايله .. عدد أفراد أسرته .. طموحاته الآنية والمستقبلية .. بعض مشاكله الخاصة التي يمكن الخوض فيها .. والمشاركة في علاجها بعض الجوانب المضيئة من حياته الماضية والتي يحلو له الخوض فيها مع الأحباء .. الخ ..

إن راقت لكم فكرتي هذه فأقترح أن يقوم كل ضيف حل بالبوستر في نهاية حلقته بترشيح من يحل بعده ضيفا على مننتسبي سودانيات .. وهكذا دواليك .. تبقى المعضلة في إختيار عضو الشرف الأول .. وأقترح أيضا أن يقوم صاحب البوستر بإختياره .. درج كبارنا على إختيار كبير القوم ليتولى ضربة البداية في كل مشروع أو عمل .. وحيث أن مجتمع سودانيات يحفل بالكبار شكلا وموضوعا وليس من بينهم من يتفضل على الآخر .. فأسمحوا لي أن أختار أكبر الأعضاء (سنا) .. فليكن ضيف الحلقة الأولى العميد الأستاذ :-

:Dخـــالـــد الحــــاج:confused:
مساهمتي الأولي معه المطالبة بنبذة صغيرة عن عميدنا والبطاقة الشخصية وتعريف مختصر ولكم جميعا خالص حبي وإعتزازي وإحترامي ...

سارة
27-07-2009, 07:14 PM
امانة ما وقع راجل

انا من دربى دا بمشى اعدل دماغى واجيب سعوالاتى واجيكم واسئلتى يا خال كلها اجبارى


ابو امانى والله بس المرة دى ( عفيت منك )gooodgooodgoood

المليجي
27-07-2009, 07:51 PM
ابو اماني الراجل الهمام
دائما سباق للخيرات
والمرة دي عملتها مائدة عدييييل كدا
انا من اسي حربط لي حجر في بطني
وحستنى زول يدردق لي الدور
واجيكم خاشي بنفس مفتوحه
تحياتي يا وهاج
على قولتك (اتشاااااااوات)gooodgoood

بابكر مخير
27-07-2009, 10:29 PM
أبو أماني
سلام
يابا ظنيتو الشافك فتحتا ليك مطعم عدييييييييييل ما كضب،،
إبتديتا بي قهوة نشاط وحسي مائدة سودانيات،، غايتو حيكومتك ظنيتك شاغلها مطبخ full-time...
أنا ما بستغرب يوم تفتح لينا بوست بي إسم أسماء في صينية كنافة (يا عمر الجوزلي وأسماء في صحن فولنا):D:D

تعرف فيصل سعد كان فتح ليهو بوست وظنيتو سماهو الكرسي الساخن،،
لكنه دقس شوية،،


أكان بكبر العمر، كان تكون الأول،،
خلودي ولدهو لساتو إعداد وين لي ناس وليداتهم وكلاء وزارات معاش:p

ربنا يحفظكم ليهم ولينا ويحفظهم ليكم ولينا

تحفة حوا
28-07-2009, 07:16 AM
أبو أماني يا أظرف زول
افكار حلوة زي دي ما بتجي من زول ساهل
لكن بوستيك دا زي الشامبو
2*1
هنا يجي الضيف ويجلس على مائدة سودانيات ونحنا نسألوا
وهو يمتنع عن الاجابة متى أراد (كرسي بارد وحنين )

وحقو تفتح بوست تاني للمشاكل عشان صاحب المشكلة يرسلا ليك في الخاص وانت تعرضا في العام بدون ذكر اسم صاحب المشكلة
والكل يحاول يساعد بي رايو (مشكلتك لها حل )

أبو أماني
28-07-2009, 02:34 PM
أبو أماني
سلام
يابا ظنيتو الشافك فتحتا ليك مطعم عدييييييييييل ما كضب،،
إبتديتا بي قهوة نشاط وحسي مائدة سودانيات،، غايتو حيكومتك ظنيتك شاغلها مطبخ full-time...
أنا ما بستغرب يوم تفتح لينا بوست بي إسم أسماء في صينية كنافة (يا عمر الجوزلي وأسماء في صحن فولنا):D:D

تعرف فيصل سعد كان فتح ليهو بوست وظنيتو سماهو الكرسي الساخن،،
لكنه دقس شوية،،


أكان بكبر العمر، كان تكون الأول،،
خلودي ولدهو لساتو إعداد وين لي ناس وليداتهم وكلاء وزارات معاش:p

ربنا يحفظكم ليهم ولينا ويحفظهم ليكم ولينا



ده قولك يا الحبيب تكعيب :-
يابا ظنيتو الشافك فتحتا ليك مطعم عدييييييييييل ما كضب،،
إبتديتا بي قهوة نشاط وحسي مائدة سودانيات،، غايتو حيكومتك ظنيتك شاغلها مطبخ full-time...
وماعندي عليو تعقيب ماك عارف البئر وغطاءها .. أها تاني شنو كمان؟ خلى الطابق مستور..

وتاني قلت :-تعرف فيصل سعد كان فتح ليهو بوست وظنيتو سماهو الكرسي الساخن،،
لكنه دقس شوية،،
بس ده عندي عليو تعقيب .. الحقيقة فكرة الكرسي الساخن قديمة وتعم معظم المنتديات .. وهذا قريب الشبه بس بيختلف في المحتوى والمضمون .. فالقصد من الأول مناكفات بريئة ومساجلات بين الزملاء .. بينما الهدف الأساسي من هذا البوستر .. هو تعميق الصلات وتوثيق المعرفة كل بالآخر..نريد التقارب..ومعرفة أبسط الحقائق عن أحب الناس..فهلا تكرمت أستاذي (الخال) البلال البسر البال .. وادلوت بدلوك ؟؟.. goood

أبو أماني
28-07-2009, 02:38 PM
أبو أماني يا أظرف زول
افكار حلوة زي دي ما بتجي من زول ساهل
لكن بوستيك دا زي الشامبو
2*1
هنا يجي الضيف ويجلس على مائدة سودانيات ونحنا نسألوا
وهو يمتنع عن الاجابة متى أراد (كرسي بارد وحنين )

وحقو تفتح بوست تاني للمشاكل عشان صاحب المشكلة يرسلا ليك في الخاص وانت تعرضا في العام بدون ذكر اسم صاحب المشكلة
والكل يحاول يساعد بي رايو (مشكلتك لها حل )

كلامك غاية الروعة وعين الإعتبار .. بس أديها صنة لو .. لم يستجيب العميد أو كانت الوتيرة سالبه سوف نعيد النظر سويا في إقتراحك الرائع .. وحقوق الطبع محفوظة .. تسلمي يا تحفة:confused:

مرافي
28-07-2009, 10:36 PM
العزيز ابواماني .
والله سبقتني في الفكرة..امكن مانفس الفكرة...لكن بيني وبين نفسي كنت بفكر..انو المنتدى
بقى للانسان زي بيتو وناس المنتدى زي اهلو لكن ..للاسف علاقة عبر الاثير.. والكيبود.!!نعرف بعضنا (نناكف) بعضنا ،لكن للاسف واحد شاف التاني مافي!!!!وكنت اسائل نفسي..كيف بنتلاقى..وكيف الامكانية للشيء ده..كل انسان يضع للاخر صورة من نسج الخيال ..وهم يعني
يعني.الواحد لو لقى التاني في الشارع ما يعرفو للاسف...واقول كيف اللقاء واللمه .زي المحال كده..منتشرين في كل القارات وكلنا تجمعنا سودانيات عبر الكلمات وكل واحد هويتو كلماتو وردودو.وكتير مننا اسماءهم وهمية ...ورغم تواصلنا كل يوم...ورغم الحب الذي يجمعنا لكننا بعيدين مكاناً..فكيف اللمة وكيف التلاقي..ياناس سودانيات...والله الواحد نفسو يقابل كل اعضاء سودانيات وجهاً لوجه...مني نتمناه ..وياربي الشوفة متيييين لناس سودانيات...

بابكر مخير
29-07-2009, 09:23 AM
ده قولك يا الحبيب تكعيب :-
يابا ظنيتو الشافك فتحتا ليك مطعم عدييييييييييل ما كضب،،
إبتديتا بي قهوة نشاط وحسي مائدة سودانيات،، غايتو حيكومتك ظنيتك شاغلها مطبخ full-time...
وماعندي عليو تعقيب ماك عارف البئر وغطاءها .. أها تاني شنو كمان؟ خلى الطابق مستور..

وتاني قلت :-تعرف فيصل سعد كان فتح ليهو بوست وظنيتو سماهو الكرسي الساخن،،
لكنه دقس شوية،،
بس ده عندي عليو تعقيب .. الحقيقة فكرة الكرسي الساخن قديمة وتعم معظم المنتديات .. وهذا قريب الشبه بس بيختلف في المحتوى والمضمون .. فالقصد من الأول مناكفات بريئة ومساجلات بين الزملاء .. بينما الهدف الأساسي من هذا البوستر .. هو تعميق الصلات وتوثيق المعرفة كل بالآخر..نريد التقارب..ومعرفة أبسط الحقائق عن أحب الناس..فهلا تكرمت أستاذي (الخال) البلال البسر البال .. وادلوت بدلوك ؟؟.. goood

إتا وصلك الشمار،،
لكن المطعم كان حق أخويا،،
أريتو كان حقي;) كان عوازيم طواااااااااااااالي لمن أفلس...
بعدين شوقي بدري ما قالها قبال كدي "بابكر، كلامك ما بتفهم" وأنا يابا قصدي من دي كانت التورية، أنو أوري الناس كرمك والملان قدحك، لي درجة أنو السيدة الفضلى، ما بتمرق من المطبخ،، الحبيب وقع ليييييييييييييك "طاخ ودقا الدلجة؟؟"...
بعدين ياهو فكرتك صايبة، (قوووووووووووون تكون سجلتو براك في ود الهادي يعني آلشآ على قول المصاروآ) وما في سبب أنه ما تكتر البوستات البتوثق الخوة والصداقة بين الأعضاء وربنا يديمها محبة...
وما شايف وما شفتا ولا قصدتا أنه ما يكون في تاني وتالت، لكن بس لزوم التحشري وبقت عليا، جيت أظارف، ظبزتها وأنا ما عارف...
بس ما قلتا ليا حكاية الكُوبر ما إتعرضتا ليها ليييييييييييه؟؟
ولا حرقووووووووووووو

سلام يابا

بدور التركي
29-07-2009, 09:49 AM
فكرت مليئا في شكل مستقبل علاقة كل سوداني في سودانيات بالآخر! وهالني أن تكون علاقة صادقة حميمة كهذه عرضة للعيش والعمران طويلا عبر الفضاء الإسفيري والعالم الأثيري ..!

انا كدا مستقبلي ضاع وسطكم
يعني حسى لو كنت سودانية واحمل الجواز السوداني
ما كنتوا عاملتوني بالقسوة دي:confused:
طيب اعتبروني اخت سودانية ولو بالكضب:p

خالد الحاج
29-07-2009, 10:21 AM
إزيك يا أبا أماني
إنت يا أخي الحكايا لو بالكبر ناس عمك بابكر مخير وشوقي بدري ورأفت ميلاد وحتى جيل ناس معتصم الطاهر والعمدة عكود ..مالك ديل هارب منهم ؟
ما قالوا ليك الخال من الجيل الوسيط :D
علي العموم مرحب بأي أسئلة و "تحقيقات" :(
حبابكم عشرة ...

بدور التركي
29-07-2009, 10:35 AM
اهلا وسهلا بالضيف الجميل

ستعود للتحقيقات...

همس الشوق
29-07-2009, 10:41 AM
أبو أماني ياخ فكرة عظيمة كما عهدناك


بس



لو



بديت لينا بالناس السينغل goood

شبارقة
29-07-2009, 11:05 AM
مرحب بأي أسئلة و "تحقيقات" :(
حبابكم عشرة ...

شكراً يا أبو أماني وشكرا ً للضيف الأول في هذا اللقاء الخال / خالد

وأسمحوا لي بأن أرمي أول حجر في البحيرات الساكنة في الدواخل ....

أها يا خال ممكن في البداية كده تدينا سيرة ذاتية مختصرة ... وشكرا ً

أبو أماني
29-07-2009, 02:39 PM
أبو أماني ياخ فكرة عظيمة كما عهدناك


بس



لو



بديت لينا بالناس السينغل goood

السينغل من الجنسين .. مخلينهم في اللآخر .. راجيين الحلو .. من الجنسين .. أسع خلينا نشطب على البضاعة الديو تو إكسبايري .. يعني ممكن أخوك يترشح التاني ..ما تفهمونا بقى بعدين إتي يا بت أمي مالك شغالة بالسينغل .. ما عينك مليااااانة تحمدي سيدك .. ولا بتفكري في ... أيوااااا فهمت !!!! goood دقي يا مزيكة goood

أبو أماني
29-07-2009, 02:43 PM
انا كدا مستقبلي ضاع وسطكم
يعني حسى لو كنت سودانية واحمل الجواز السوداني
ما كنتوا عاملتوني بالقسوة دي:confused:
طيب اعتبروني اخت سودانية ولو بالكضب:p

هي يا الما .. ناقشة شئ .. على الليمان إتي بي جواز بجنسية بدونهم .. سودانية مية المية في عين اليرضى واليابا .. وكان للجنسية كفاية الدموع السائلة ليل ونهار في توقيعك دي .. خوفي يا ياسمين تطلعي بعد خلودي .. مباشرة .. شيلي شيلتك يمة .. تشاووووو goood

أبو أماني
29-07-2009, 02:45 PM
امانة ما وقع راجل

انا من دربى دا بمشى اعدل دماغى واجيب سعوالاتى واجيكم واسئلتى يا خال كلها اجبارى


ابو امانى والله بس المرة دى ( عفيت منك )gooodgooodgoood

أدخلي على الخال .. تووووووووش .. وبالحتة الفيها .. الحزام كمان .. يلا وأنا وراك .. goood

أبو أماني
29-07-2009, 02:49 PM
ابو اماني الراجل الهمام
دائما سباق للخيرات
والمرة دي عملتها مائدة عدييييل كدا
انا من اسي حربط لي حجر في بطني
وحستنى زول يدردق لي الدور
واجيكم خاشي بنفس مفتوحه
تحياتي يا وهاج
على قولتك (اتشاااااااوات)gooodgoood

الدور جايييك جايييك .. بس هسع دي .. عاوزنك تجيه لنا الخال الحبوب ده بسوعالين تلاتة فروم ذا هاوس أو ذا كلاوي .. وعليك الله ما ترحموا خسوسا لو عرفتو إنه هلالابي .. يلا يا مليجي .. عاوزك تكون (مليجي) بالجد .. لك مودتي goood

أبو أماني
29-07-2009, 02:59 PM
إتا وصلك الشمار،،
لكن المطعم كان حق أخويا،،
أريتو كان حقي;) كان عوازيم طواااااااااااااالي لمن أفلس...
بعدين شوقي بدري ما قالها قبال كدي "بابكر، كلامك ما بتفهم" وأنا يابا قصدي من دي كانت التورية، أنو أوري الناس كرمك والملان قدحك، لي درجة أنو السيدة الفضلى، ما بتمرق من المطبخ،، الحبيب وقع ليييييييييييييك "طاخ ودقا الدلجة؟؟"...
بعدين ياهو فكرتك صايبة، (قوووووووووووون تكون سجلتو براك في ود الهادي يعني آلشآ على قول المصاروآ) وما في سبب أنه ما تكتر البوستات البتوثق الخوة والصداقة بين الأعضاء وربنا يديمها محبة...
وما شايف وما شفتا ولا قصدتا أنه ما يكون في تاني وتالت، لكن بس لزوم التحشري وبقت عليا، جيت أظارف، ظبزتها وأنا ما عارف...
بس ما قلتا ليا حكاية الكُوبر ما إتعرضتا ليها ليييييييييييه؟؟
ولا حرقووووووووووووو

سلام يابا

فاهمك يا أخوي وخابزك وعاجنك وكان حدرت لي وإت ساكت بعرفك بدور بخلدك شنو .. وماني بعتب عليك تب .. ما العتب مرفوع بين الحبائب .. بياخذوه ناس الحيكومة بس .. الله لاجاب طاريها يا حبيب قساي وشريك همي وبلاي .. ومتل ماني فاهمك لقيتك خابزني وعاجني برضو .. ووحات خووتك المقامها عقب الشهادة .. كلامك في المتبخ ما وقع واطا ..وأحمد الله بيت أخوك ما بيقل عن بيتك.. بيت ضيفان وحبان وحبائب رحمن والمرآة مكتبها أياهو المتبخ.. وحاشاك أبو سيدة النساء (زنوبة) من التحشر والكلام الشين .. يا الكلك زين .. ياعجب العين وفي حكاية الكبر .. كضبا كاضب .. وكيف يكبر من يحمل قلب طفل رضيع .. تسلم يا الحبيب تكعيب ويسلموا بيك كل الحداك .. لك حبي .. عليك الله .. مارس معزتك عند الخال وخلو يبل راسو ..ويجينا بي جاي .. الجري ده ما حقنا .. تشاوووووgoood

أبو أماني
29-07-2009, 03:05 PM
إزيك يا أبا أماني
إنت يا أخي الحكايا لو بالكبر ناس عمك بابكر مخير وشوقي بدري ورأفت ميلاد وحتى جيل ناس معتصم الطاهر والعمدة عكود ..مالك ديل هارب منهم ؟
ما قالوا ليك الخال من الجيل الوسيط :D
علي العموم مرحب بأي أسئلة و "تحقيقات" :(
حبابكم عشرة ...

عارفك من الجيل الوسيط ومن دورنا كده .. لكين يا الحبيب لقيت كل الكبار القلتهم خاتنك في الرأس عمة وشال يتباهوا بيك .. قلت يا أخوانا .. الحكاية تراها ما بالسن والعمر .. حاجة كدي من الله فوق .. أركز آل .. حبيب .. وجاوب على كل المداخلات البتخصك فوق بداية بأول البوستر .. وثق .. ستجدنا في داخلك حيث قال المرحوم إسماعين حسن ..
جوووه الجوووة .. زغرد فوقها صوت الناي ... وكان يرمز للسويداء حيث تقيم يا فخيم .. :(

بابكر مخير
29-07-2009, 05:48 PM
إزيك يا أبا أماني
إنت يا أخي الحكايا لو بالكبر ناس عمك بابكر مخير وشوقي بدري ورأفت ميلاد وحتى جيل ناس معتصم الطاهر والعمدة عكود ..مالك ديل هارب منهم ؟
ما قالوا ليك الخال من الجيل الوسيط :D
علي العموم مرحب بأي أسئلة و "تحقيقات" :(
حبابكم عشرة ...

خلودي،
تعرف يابا وأبو أماني،
عندي أخويا علي (ما عارف ليه ما بحب ذكر الآلقاب، بفتكر مناداة الزول بإسمهو بتغني، خاصة لمن يكون قدر الإسم ويشرفه).. المهم كان وهم أطفال مع عزوز ويوسف وشلة من أطفال الأسرة عندهم لعبة،، السؤال عن حاجات عملها الواحد ولمن ما يجاوب صاح،، طبعن في واحد أو أكتر يكون عارف القصة ومعاصر الحث، يطوع/وا ويقول غلط وينكشف أنه الواحد/ة خبآ الحقيقة، بيقوم أبو علوة بيديهو صقعة بالمسطرة في ضهر اليد...
دحن نخلي بالنا والإجابة تكون بصدق وإلااااااااااااااااااااااا،،
علي أخويا موجوووووود والمساطر ما أكترها:D




آها خلودي
برآآآآآآآآآآآآآآآآآآآآك درتها وهاك أنا بفرع ليك الأسعلة....

* بتتباهى بالإنتماء القبلي..
* إختيارك اللون السياسي في كبر ولا أيام المراهقة...
* تفتكر السودان ولا هولندا مستقبل وليداتك...


بداية جافة،
صعبة وسخيفة، لكنها بتهون كل قاسي جآي...
سلام ومحبة

خالد الحاج
29-07-2009, 11:10 PM
سلامات يا شباب
نبدأ بأسئلة أبو أماني وشبارقة...

الاسم : خالد الحاج الحسن الحسين صالح ....
من مواليد البركل بالمديرية الشمالية عام 1961 شهر فبراير يوم 28 ...
يعني عمري 48 سنة
أو
2625 أسبوع
أو
17683 يوم
أو
424392 ساعة
أو
25463532 دقيقة

أما الثواني فخليناها للانتظار... "مليت ثواني الانتظار" أو كما قال خليل اسماعيل..:(

التعليم ..
الابتدائية : السجانة
المتوسطة : الخرطوم جنوب
الثانوية : الخرطوم بحري
الجامعي : الاسكندرية + الأفرويشن جامعة الخرطوم.

متزوج ...

أربعة أطفال ...
حباب
جعفر
سارة
نهلة

أعمل في مؤسسة (Rock Wool) في مدينة رورموند حيث أقيم حاليا في الجنوب الهولندي.

خالد الحاج
29-07-2009, 11:25 PM
آها خلودي
برآآآآآآآآآآآآآآآآآآآآك درتها وهاك أنا بفرع ليك الأسعلة....

* بتتباهى بالإنتماء القبلي..
* إختيارك اللون السياسي في كبر ولا أيام المراهقة...
* تفتكر السودان ولا هولندا مستقبل وليداتك...


بداية جافة،
صعبة وسخيفة، لكنها بتهون كل قاسي جآي...
سلام ومحبة

سلامات يا بابو..
لا أتباهي بانتمائي القبلي بتلك الصورة السلبية التي تثير النعرات فكلنا لآدم وآدم من تراب.. لكني أفخر بانتمائي لقبيلة لها تأريخ متجزر وأصول راسخة وصفت بالحنية وتشايلوا كتف الغنا الميَل فكان منهم
اسماعيل حسن
حمد سعيد دفع الله
محمد الحسن سالم حميد
السر عثمان الطيب
خالد الباشا

......
وكان منهم النعام آدم
ومنهم
محمد كرم الله
محمد النصري
....
...............

سؤالك الثاني:
كان والدي شيوعيا وهو من خريجي مدرسة عطبرة الصناعية وهذه مدينة الحديد والنار وصانعة الثورات حينها...
صار الوالد في أواخر أيامه صوفي وتبع الشيخ عبد الله البدري بمدينة بربر وصار من حيرانه...
كانت النشأة في منزل اعتاد رؤية البوليس (لم يكن حينها يوجد أمن) .. والمنشورات ورائحة مكنات الرونيو..
أما الانتماء فهو من صغر لكن الانتماء الفعلي للحزب الشيوعي فقد جاء متأخرا جدا.

أما سؤالك الأخير يا بابو فهو سؤال المليون والله ...

هولندا لا تحمل لي ولأبنائي إلا الشقاء .. أي والله ...
صدقني يا ابن عمي لو وجدت وظيفة في السودان تكفيني شر السؤال ما انتظرت يوما واحدا في هولندا والله علي ما أقول شهيد ..
يا بابكر يا أخوي نحن هنا شتلات استوائية مزروعة في مناخ قطبي :(

رد الله غربتنا جميعا ...

بابكر مخير
30-07-2009, 01:54 AM
سلامات يا بابو..
لا أتباهي بانتمائي القبلي بتلك الصورة السلبية التي تثير النعرات فكلنا لآدم وآدم من تراب.. لكني أفخر بانتمائي لقبيلة لها تأريخ متجزر وأصول راسخة وصفت بالحنية وتشايلوا كتف الغنا الميَل فكان منهم
اسماعيل حسن
حمد سعيد دفع الله
محمد الحسن سالم حميد
السر عثمان الطيب
خالد الباشا

......
وكان منهم النعام آدم
ومنهم
محمد كرم الله
محمد النصري
....
...............

سؤالك الثاني:
كان والدي شيوعيا وهو من خريجي مدرسة عطبرة الصناعية وهذه مدينة الحديد والنار وصانعة الثورات حينها...
صار الوالد في أواخر أيامه صوفي وتبع الشيخ عبد الله البدري بمدينة بربر وصار من حيرانه...
كانت النشأة في منزل اعتاد رؤية البوليس (لم يكن حينها يوجد أمن) .. والمنشورات ورائحة مكنات الرونيو..
أما الانتماء فهو من صغر لكن الانتماء الفعلي للحزب الشيوعي فقد جاء متأخرا جدا.

أما سؤالك الأخير يا بابو فهو سؤال المليون والله ...

هولندا لا تحمل لي ولأبنائي إلا الشقاء .. أي والله ...
صدقني يا ابن عمي لو وجدت وظيفة في السودان تكفيني شر السؤال ما انتظرت يوما واحدا في هولندا والله علي ما أقول شهيد ..
يا بابكر يا أخوي نحن هنا شتلات استوائية مزروعة في مناخ قطبي :(

رد الله غربتنا جميعا ...

الحبيب الغالي
شكرن ودآ الكنتا متوقعه!
أن يكون الصدق هو خالص إجابتك...

أعجبني يا الحبيب

يا بابكر يا أخوي نحن هنا شتلات استوائية مزروعة في مناخ قطبي :(

تشبيه نادر أن يجي من مهندز;)
وأعجبني اللون اللبني (شفتا يا أبو أماني "حفر إيدك وغرق ليك":D:D)

قمر دورين
30-07-2009, 07:56 AM
أبو أماني
لك تحيّة محمّلة برحيق زهر نديّ في موسم الربيع....

فكرة البوست جميلة جداً....
وعبارة (ضيف على المائدة ) تختزن الحنين والكرم والأصالة بين جنبيها.....
نتابع....:)

مرافي
30-07-2009, 02:58 PM
العزيز خالد..عرفنا الجانب الاجتماعي الاسرة ..ربنا يحفظهم ..والانتماء
السؤال..فكرة المنتدى كيف بدأت ومتى؟؟؟وبكم عضو بدأ؟؟
وسر التسمية..سودانيات..التاء للتانيث ولا دلالة للسودان يعني اشياء سودانية؟؟؟
خاصة وانتو الشوايقة حنيينين لكل رمز للأم..:D
المهجر مابه وماعليه يعني نصيحة لكل واحد شادي الرحال لارض المهجريمني النفس بتحقيق
المنى واولهم نفسي!!
افتكر كفاك وشكراً..لييك

خالد الحاج
31-07-2009, 11:36 AM
العزيز خالد..عرفنا الجانب الاجتماعي الاسرة ..ربنا يحفظهم ..والانتماء
السؤال..فكرة المنتدى كيف بدأت ومتى؟؟؟وبكم عضو بدأ؟؟
وسر التسمية..سودانيات..التاء للتانيث ولا دلالة للسودان يعني اشياء سودانية؟؟؟
خاصة وانتو الشوايقة حنيينين لكل رمز للأم..:D
المهجر مابه وماعليه يعني نصيحة لكل واحد شادي الرحال لارض المهجريمني النفس بتحقيق
المنى واولهم نفسي!!
افتكر كفاك وشكراً..لييك

حبابك مرافي..

كنا جميعا أعضاء في الشقيقة س.اون لاين .. بل كنت أحد إدارييها وتركت بصمات واضحة فيها مثل الأقسام (بوستات مميزة) و (قضايا التعذيب) ..هما من أفكاري وتنفيذي.
اختلفت مع الأخ بكري أبوبكر في كيفية إدارة المنتدي إذ أن الأخ بكري كان يري أن المشاكل والتجاوزات التي تصل حد الشتائم تجلب القراء..
من ناحيتي كنت أري أن لا بد من وجود قوانين تحفظ للكل حقه .. عضو وقارئي وإدارة.
من هنا جاءتني الفكرة في انشاء سودانيات والاسم يعني (أشياء سودانية) ...
طرحت الفكرة علي مجموعة من الأصدقاء لأن فكرة أن يكون صاحب القرار فرد لم تكن تروقني فأردته عمل جماعي..
كان هؤلاء الأصدقاء هم :
الطيب بشير
حنينة
رجاء العباسي
راوية العباسي
علاء تمبس
فتحي البحيري

وعند التنفيذ لم يبق منهم إلا حنينة التي اقتنعت بالفكرة..
وتكونت سودانيات في بداية سنة 2004

عانت سودانيات في مسيرها من الكثير من المشاكل.. تعلبنا عليها ولا نزال هنا كما ترين ...


بخصوص سؤالك عن الغربة ...
لا أدري ماذا أقول .. أذكر هنا مقولة الطيب صالح علي لسان مصطفي سعيد في روايته الخالدة موسم الهجرة إلي الشمال حين قال للراوي في وصيته حول أبناءه :
(جنبهم مشقة السفر ) ...
صدق طيبنا الصالح والرجل ينطق عن تجربة غربة طويلة ...
هي قطعة من نار لا يقدر عليها إلا مجبورا كقول أهلنا في غرب السودان (المجبور بملح بالعسل) ...
نصيحتي لك ... (تجنبي مشقة السفر )
وتذكري قول درويش :
القمح مـرٌّ في حقول الآخرين

والماء مالح ، والغيــم فولاذ ٌ

وهذا النجم جارح

وعليك أن تحيــــا وأن تحيــــــا

وأن تعطي مقابل حبـّة الزيتون جلدك

رأفت ميلاد
31-07-2009, 12:22 PM
إزيك يا أبا أماني
إنت يا أخي الحكايا لو بالكبر ناس عمك بابكر مخير وشوقي بدري ورأفت ميلاد وحتى جيل ناس معتصم الطاهر والعمدة عكود ..مالك ديل هارب منهم ؟

ياخوى أنا حاشرنى هنا مالك .. أنا دى ما شلتى .. نحن مع الأيقونات وعضوية شلة البحر ناس كانديك وأبو ريم وعادل عسول :D وناس عثمان الطيب والشباب البفرح ده .. ناس شليل وشبارقة وفيصل سعد ما سائلين فيهم .. ود عثمان داك زول بتلصق ساكت .. ياهو دفعة ناس ود الطاهر ..

سؤالى الأول : الصلعة دى تساقط شعر ولا طاقية إخفاء ؟ :mad:

خالد الحاج
31-07-2009, 12:50 PM
ياخوى أنا حاشرنى هنا مالك .. أنا دى ما شلتى .. نحن مع الأيقونات وعضوية شلة البحر ناس كانديك وأبو ريم وعادل عسول :D وناس عثمان الطيب والشباب البفرح ده .. ناس شليل وشبارقة وفيصل سعد ما سائلين فيهم .. ود عثمان داك زول بتلصق ساكت .. ياهو دفعة ناس ود الطاهر ..

سؤالى الأول : الصلعة دى تساقط شعر ولا طاقية إخفاء ؟ :mad:

سلامات يا دفعة :D
تبرا إنت من الكبر ...
الصورة بتاعة البروفايل دي آخر صورة أخدتها يا رأفت .. بالعربي كده ما عندي صلعة لكن شعري صار أبيض كلبن كاني :D
حكاية الصلعة كالآتي :
جاء شوقي لزيارتي ومعه محجوب شريف ومجدي الجزولي وحسن الجزولي..
في الصباح قام مجدي الجزولي داير يعمل لي قطعية بقت زي "كارل لويس" أو "ال ... جنَ" :D
وكعلاج قمنا جزيناه صلعة ...
المهم يا زول الحكاية من ديك بقت عادية كل مدة أحلق صلعة تيمنا بشوقي بدري "يلحقنا وينجدنا" ;)

همس الشوق
31-07-2009, 02:33 PM
الخال

سعيده بصفحي لكتاب يحمل بين جوانحه كل الشفافية والصدق والإعتزاز بالنفس والوطن والإنتماء

ولكن !!!!!!

سؤال يطرح نفسه كثيرا في بلاد المهجر حيث الإنتماء الطوعي والتجنس

اولا
هل تحمل الجواز الهولندي ؟
وهل ترى ان تحقيق الإنتماء لتلك البلدان يكفل لك ولأسرتك العيش بسلام فيها وخارجها ؟


ثانيا
الغربة لها وجهنا
مشرق
وعابس

كلنا تكبدنا مشاق تلكما الوجهان

فماذا اضافت لك هولندا؟
وماذا اخذت منك ؟

بجيك راجعة

تحفة حوا
31-07-2009, 09:32 PM
ود الحاج ازيك
شنو أخبار حباب ؟
من هو فنانك المفضل ؟
وماهي أجمل أغنية عندك ؟
وماهي حكمتك التي تتبعها ؟

خالد الحاج
01-08-2009, 10:05 AM
الخال

سعيده بصفحي لكتاب يحمل بين جوانحه كل الشفافية والصدق والإعتزاز بالنفس والوطن والإنتماء

ولكن !!!!!!

سؤال يطرح نفسه كثيرا في بلاد المهجر حيث الإنتماء الطوعي والتجنس

اولا
هل تحمل الجواز الهولندي ؟
وهل ترى ان تحقيق الإنتماء لتلك البلدان يكفل لك ولأسرتك العيش بسلام فيها وخارجها ؟


ثانيا
الغربة لها وجهنا
مشرق
وعابس

كلنا تكبدنا مشاق تلكما الوجهان

فماذا اضافت لك هولندا؟
وماذا اخذت منك ؟

بجيك راجعة

حباب همس الشوق

اولا
هل تحمل الجواز الهولندي ؟
وهل ترى ان تحقيق الإنتماء لتلك البلدان يكفل لك ولأسرتك العيش بسلام فيها وخارجها ؟

نعم أحمل الجنسية الهولندية مع احتفاظي بجنسيتى السودانية.
مسألة العيش بسلام حمالة أوجه يا بت أختي..
إن كنت تعنين العيش من حيث الأكل والشراب والتعليم والصحة فالإجابة نعم.
لكن السلام يا بت الأخت ماهو أكل وشراب.. "ليس بالخبز وحده يحي الإنسان"
الغربة تسرق منك أجمل ما فيك "الانتماء" ..
تخيلي أنك تعيشين في قرية أقاصي الجنوب الهولندي.. لا أهل ولا أصدقاء ولا أسرة تزورك
ينحصر نشاطك بين العمل والمنزل .. وكل اصدقاءك ومؤنسي وحشتك هم جهاز كمبيوتر يمدك ككيس جلكوز بمعني أن تشعر بانسانيتك .. محزن مش كده ؟

الأبناء من ناحية أخري هم مصيبتنا الكبري..
سارة ابنتي عمرها 12 سنة .. طلبت أن تقص شعرها وهو طويل نوعا وجميل.. رفضت أنا
وردت سارة علي بلغة غير جميلة رديت عليها برفع صوتي ورميتها بمجلة كانت في يدي فأسرعت جارية ناحية الشارع ولم تعد إلا بعد أن أحضرها البوليس بعد منتصف الليل :(
لم أقسو في حياتي علي ابنائي وأعاملهم برفق ...
http://www.albrkal.com/upload/uploads/sarah122.jpg

طبعا هذا لم يقنع البوليس فاتصلوا بمنظمة تسمي (كندر بشخيرمنج) حماية الطفل..
هؤلاء اعتبروها قضيتهم وهاك يا تحقيق وأمش وتعال...
نبشوا حتى سجلي الطبي وسجلي العدلي...
أسوق هذه القصة فقط كي أشرح ما نعاني أحيانا من غربة الجسد والروح..
لا تزال التحقيقات جارية وهي مآساة تأخذ من روحي وجسدي ولا أقول إلا الشكية لله :(
هولندا أخذت عمري وسلامي النفسي يا ابنة الأخت.

يديك العافية.

عادل عسوم
01-08-2009, 10:36 AM
ياخوى أنا حاشرنى هنا مالك .. أنا دى ما شلتى .. نحن مع الأيقونات وعضوية شلة البحر ناس كانديك وأبو ريم وعادل عسول :D وناس عثمان الطيب والشباب البفرح ده .. ناس شليل وشبارقة وفيصل سعد ما سائلين فيهم .. ود عثمان داك زول بتلصق ساكت .. ياهو دفعة ناس ود الطاهر ..
:mad:
شكلك يارأفت (الخبر والدمام) ديل عندك فيهن (في القلوب منازل) looool...
والقصة ماااااااأظنها (تِلصّق) في ناس كانديك وابوريم و(عادل عسول) :D
أما ودعثمان الظاهر عليك ماشفتو بالجينز والتي شيرت (المارون كلر)...صدقني ماهو سائل في ناس عثمان الطيب زاتن :confused:
تسلم ياحبيب
...
..
.
سؤال للأخ خالد:
ماهي الأسس التي تبني عليها صداقاتك؟
مودتي

خالد الحاج
01-08-2009, 10:39 AM
ود الحاج ازيك
شنو أخبار حباب ؟
من هو فنانك المفضل ؟
وماهي أجمل أغنية عندك ؟
وماهي حكمتك التي تتبعها ؟

إزيك يا تحفة حوا
عساك بخير

حباب بخير وقد صارت إمرأة شابة :
http://www.albrkal.com/upload/uploads/hubab.jpg

أستمع للعديد من الفنانيين وليس هنالك فنان محدد..
أجمل أغنية (سوقني معاك يا حمام) للفنان محمد النصري فهي أنشودة في شكل ملحمة وطنية وعاطفية ..
أهديك أياها :

((سوقني معاك يا حمام ..


سوقني معاك يالحمام
... ...
محمد الحسن سالم حميد
......

سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منام
... ...
سوقني محل ما المحنة
أيادي تقطر سلام
سماحة الحياة فوق أهلنا
وبلادي تقرقر وئام
... ...
غلابه وأمان مو الطيابة
ضكارى بصارى وكرام
حبابه الحبان في بابه
وتدخلوا عليّ الحرام

فقارى ولكن غنايا
غنايا بهذا الغمام
بهذا النيل كم تغايا
وتيرابا النرميهو قام
... ...
إرادة القمره البتقدر
براها تضوي الضلام
شعاع شمشاً ياما خدّر
وإذا يبَّس لا يُلام
... ...
فيابا خرابا الحرابة
وخرابة فكر سوسي سام
خرابة الكل نفسو تأبى
عقابه .. تلِم عم سام
... ...
ولِيد مخلوق للقرايي
خزين مدخور للجِسام
تتمر نيتو التخايي
إلاما مذهلل إلام

درب من دم ماب يودي
حرِب سُبّه .. حرب حرام
تشيل وتشيل مابِ تدِّي
عُقب آخرتا إنهزام
... ...
بطانة الشيطان قديمِة
وبعد دا منو العرشو دام

إذا الإنسان ما لو قيمِة
علي إيش خلَّفُو سام وحام
... ...
تعالوا الدم ما هو مويةِ
ولا ها ترايي المسام
أخويا وطراوة الخوة إبتسام
... ...
تعالوا نحانن بعضنا
تعالوا نحانن بعضنا
نخل قلبو على التُمام
نبضنا يشهل أرضنا
وأرضنا تجِم العضام
... ...
تعالوا بدل نبني ساتر
نخيب ظن الصدام
نطَّيب للعازه خاطر
نقوم لأطفاله سام
... ...
أخير كرّاكةً بتفتح
حفير وتراقد الركام
أم الدبابة البتكشح
شخير الموت الزؤام
... ...
تعال لي غابتك يا خيرا
تعال لها يا أسده الهمام
بدل دوشكة يغني طيره
محل قنبلة عش نعام
... ...
بلد صمَّي وشعب واحد
عصية على الإنقسام
أبيه وبكراها واعد
صبية ومشهاده تام
... ...
بساطه أحمدي كم يشيلنا
وتشهِّلنا على الدوام
نَقِل ليلنا تقوِّي حيلنا
ودليلنا تمام التمام
... ...
نلقّم سقف المتاهة
نجم هدّاي في الضلام
ونطعِّم حرف النزاهة
لإيئلافك يا حمام

ديموقراطية وأمان
سوا .. سوا عالين مقام
مواريثنا المن زمان
محصَّنة في أروع نظام
... ...
بريدك يا زول بريدك
بعشقك حتّى الهيام
أريحيتك عد تزيدك
مهابة وليك القيام
... ...
عهدي معاك يا حمام
حبِيْب الرُسل الكرام
رسول الأمراء العظام
عصامي على ما يرام
... ...
ماب تهدِل في خنادق
ولا ب تقدِل فوق حطام
ولا ب تنزل في فنادق
وسطنا مراعيك قُدام
... ...
فيا ملدوغ من أديس
معوَّق في كوكدام
تعال عمِّر فينا ميس
كفانا طشيش الكلام
جناحيك جنوب شمال
وأمش طوِّف يا حمام
محِل غصن العزّة مال
عليك وعليهُو السلام

حكيم الطير يا مهبِّر
شُراكة القَتَلة اللئام
متين بإسم الحق تكبِّر
وبالرحمة تصلِّي إمام
... ...
فلاحة العالم تعمر
محبّة مودة ووئام
يقص الايد التدمر
تشمِّر ساعد السلام
... ...
سوقني زمن كُلُّو عافي
نتاجو عِلم خيرو عام
بري آيمة من المنافي
وطن وافي على الدوام
قِبلة غناي))

http://www.albrkal.com/upload/uploads/sognymaaak.wma

بالله تمعني في الكلمات وماذا تقول ..:(

سارة
01-08-2009, 10:45 AM
اولا بالتبادى نسلم

وبعدين نجيب السوعالات؟؟؟؟

اول شاكوش اخته فى حياتك؟؟؟؟؟

دا فكة ريق وبس

خالد الحاج
01-08-2009, 10:50 AM
شكلك يارأفت (الخبر والدمام) ديل عندك فيهن (في القلوب منازل) looool...
والقصة ماااااااأظنها (تِلصّق) في ناس كانديك وابوريم و(عادل عسول) :D
أما ودعثمان الظاهر عليك ماشفتو بالجينز والتي شيرت (المارون كلر)...صدقني ماهو سائل في ناس عثمان الطيب زاتن :confused:
تسلم ياحبيب
...
..
.
سؤال للأخ خالد:
ماهي الأسس التي تبني عليها صداقاتك؟
مودتي

إزيك يا عادل وعساك بخير يا باش والأسرة الحبيبة..
الأصدقاء...
هم الثروة الحقيقة يا عادل .. أي والله..
لي أصدقاء بعدد حبات الرمل.. ولا أسس لدي يا عادل في اختيار الأصدقاء..
كل انسان عالم بذاته.. وعليك أن تقبل الآخرين علي أساس أن الكمال لله وحده وأن فيك من النواقص ما يشفع لللآخرين إن انشغلت بها ..
ما يحزنني يا عادل أنني خسرت بعض الأصدقاء وهم عندي أحب إليَ من نفسي والله..
السبب عيب فيني .. أتخيل دوما أن أصدقائي يتفهمون نواياي ويفهمون ما أقصد...
أرمي الكلام أحيانا وأنا أعتمد علي "احساسي الضخم بهم جواي" وبثقة تصل لمرحلة الغفلة فإذا بي أغضبهم مني...
هل تعلمت من التجارب..؟؟ أبدا والله فقد تكرر الأمر..
العيب في أخوك يا عادل قطع شك فحكمة أهلنا تقول "كان اتنين قالوا ليك راسك مافي أهبشو" ..
أسأل الله حسن الظن ومحبة الناس فهي ما نخرج به من هذه البسيطة و "الكفن مالوش جيوب" أو كما قال أولاد بمبا ..
يديك العافية يا زول يا حبيب..

أبو أماني
01-08-2009, 01:23 PM
الشكر لكل الزملاء والأصدقاء الذين أثروا الحوار بأسلوب راق ينم عن المصدر .. وحقيقي يا خلودي ..سعدت بمتابعة المشاركات والمساهمات وأستفدت كثيرا بمعلومات ومعي آخرين لم نكن ندريها .. وياما في الجراب يا حاوي ..(جصط ريلاكس ..فييل هووم أند تيك يور تايم ويز أص ) صدقني يا الحبيب من فرط إنسجامي لم أجرو على المداخلة الآن على الأقل .. نتابع وأرجو أن يأتي ردك على الجميع .. حسب ما أتصور.. وأن تكون المداخلات حسب ما تتمنى و.. آآآآدي تكية ..! :)

خالد الحاج
01-08-2009, 02:03 PM
اولا بالتبادى نسلم

وبعدين نجيب السوعالات؟؟؟؟

اول شاكوش اخته فى حياتك؟؟؟؟؟

دا فكة ريق وبس
إزيك يا سرور
إنت ما بتخلي البحيت ؟ غايتو يوم بتتلدغي looool

أول شاكوش كان بعد التخرج من الجامعة وفي لجنة الاختيار للخدمة العامة في الخرطوم..
خاتي سفتي وواقف قدام البورد أقرا في نتائج المعاينات ومنتظر "البلومة"
جاتني تحمل في يدها مجموعة كروت لدعوة زواجها .. أي والله ..:(
قالت لي : أنتظرك لي متين أنا في زول جاهز اتقدم لي ...
كنت حينها لا يزال والدي يدفع لي حق المواصلات والتمباك :(
غايتو يا سارة الله يجازيك ..

سارة
02-08-2009, 07:00 AM
ناسف للبحيت ولكن لابد من ما ليس منه بد

بس عليا الليمان دى بلومة غبيانة ومطرطشةgooodgoood

ما علينانجى للسوعالات:

1- لو رجع الزمن بك عشرون سنة للوراء ماهو الشى الذى كنت تتمكنى اعادة النظر فيه

وما هو القرار الذى تنميت انك اتخذته؟؟؟

2- لو اعطيت اليك ثلاث وردات لمن تهديها ؟؟؟؟؟

3- تشرفت يوما بزايارتكم وسعدت بوجودى فى دارك العامرة رغم قصر المدة لاحظت انك

انسان بسيط جدا وطيب واكتر شىء لفت نظرى انك ما النوع النقناق فى قصة الاكل ولا دا وينو

ولا دا ما سمح( هل دى طبيعتك ولا كانت كشكرة )gooodgoood


اجيك تانى ولا كفاية





عليك دينك تسلم على الحكومة وافراد الطاقم الحلوين

أبو أماني
04-08-2009, 09:47 AM
ناسف للبحيت ولكن لابد من ما ليس منه بد

بس عليا الليمان دى بلومة غبيانة ومطرطشةgooodgoood

ما علينانجى للسوعالات:

1- لو رجع الزمن بك عشرون سنة للوراء ماهو الشى الذى كنت تتمكنى اعادة النظر فيه

وما هو القرار الذى تنميت انك اتخذته؟؟؟

2- لو اعطيت اليك ثلاث وردات لمن تهديها ؟؟؟؟؟

3- تشرفت يوما بزايارتكم وسعدت بوجودى فى دارك العامرة رغم قصر المدة لاحظت انك

انسان بسيط جدا وطيب واكتر شىء لفت نظرى انك ما النوع النقناق فى قصة الاكل ولا دا وينو

ولا دا ما سمح( هل دى طبيعتك ولا كانت كشكرة )gooodgoood


اجيك تانى ولا كفاية





عليك دينك تسلم على الحكومة وافراد الطاقم الحلوين

الخال البلال البيسر البال .. مالو طنننش ؟؟ البنية السكرية اللهيجا عسل ما سعلتك سوعال مالك يا ود أمي طنشت وعملت رايح .. ما هي براها كلنا مستنين بلهفة مريخاب في المطار مستنين يشوفوا كأس خارجي من شرفة المطار .. يلا يا الحبيب .. ما تعووق علينا .. وتغيب .. نحن في الإنتظار ... goood goood goood

بدور التركي
04-08-2009, 10:22 AM
متابعين الحوار الجميل

مرافي
04-08-2009, 01:42 PM
3- تشرفت يوما بزايارتكم وسعدت بوجودى فى دارك العامرة رغم قصر المدة لاحظت انك

انسان بسيط جدا وطيب واكتر شىء لفت نظرى انك ما النوع النقناق فى قصة الاكل ولا دا وينو

ولا دا ما سمح( هل دى طبيعتك ولا كانت كشكرة )gooodgoood


اجيك تانى ولا كفاية



عليك دينك تسلم على الحكومة وافراد الطاقم الحلوين



سلااام للكل
نان ياناصحة..دي ما كشكرة سااااكت
في راجل مانقناق في الاكل يختي...!!!!!
مستحــــــــــــــــــــــــــــيل
يكون ايام زيارتك ..كان مقطعو في حشاو..لزوم الضيافة:D
ولا شنو..قولك ياخالد ...
دام الجميع بالعافية وعدم النقة.looool:Dgoood

قوت القلوب
04-08-2009, 09:34 PM
ولِيد مخلوق للقرايي
خزين مدخور للجِسام
تتمر نيتو التخايي
إلاما مذهلل إلام


دي ظابطة معاك

كلاماتو حنينة
وبتحكي حال البلد

بس طول بالك يااخوي
ولمم اطرافك وروح على البلد
بدل تلقى البيت فضى عليك


وبعدين دي ماجكسوية
بس لكن دي كانت بتتونس
ساكت بتقضي وكتgoood
اقول ليك خسرانة هي والله
ولا شاكوش على راسهاهي وقع

اها انا هنا للمساندة
من عصير ومناديل وكده
لانو اماني مافي
ومحاحاة ناس الزرزرة

خالد الحاج
04-08-2009, 09:49 PM
ناسف للبحيت ولكن لابد من ما ليس منه بد

بس عليا الليمان دى بلومة غبيانة ومطرطشةgooodgoood

ما علينانجى للسوعالات:

1- لو رجع الزمن بك عشرون سنة للوراء ماهو الشى الذى كنت تتمكنى اعادة النظر فيه

وما هو القرار الذى تنميت انك اتخذته؟؟؟

2- لو اعطيت اليك ثلاث وردات لمن تهديها ؟؟؟؟؟

3- تشرفت يوما بزايارتكم وسعدت بوجودى فى دارك العامرة رغم قصر المدة لاحظت انك

انسان بسيط جدا وطيب واكتر شىء لفت نظرى انك ما النوع النقناق فى قصة الاكل ولا دا وينو

ولا دا ما سمح( هل دى طبيعتك ولا كانت كشكرة )gooodgoood


اجيك تانى ولا كفاية





عليك دينك تسلم على الحكومة وافراد الطاقم الحلوين

البلومة يا سرور عاقلة وحسبتها كويس... وأنا الله مرقني :D
لو رجعت عشرين سنة ما أفتكر أغير حاجة والله ...

وردة علي قبر أمي وأخري علي قبر والدي والأخيرة لحباب خالد الحاج ..

الأكل مشكلة يا سرور فأنا أسلوب أكلي مختلف تماما من أبنائي فهم لا يحبون "الطبائخ والمسبكات" ويفضلون "الجنك فود" ...
أجد نفسي أطبخ أحيانا غير هذا آكل الموجدود وإن لم يرضيني واضعا أمامي الحكمة (ليس بالخبز وحده يحي الانسان) .

تعالي يا سرور وكت ما تريدي يشيلك الراس يا ابنة العم .

خالد الحاج
04-08-2009, 09:51 PM
سلااام للكل
نان ياناصحة..دي ما كشكرة سااااكت
في راجل مانقناق في الاكل يختي...!!!!!
مستحــــــــــــــــــــــــــــيل
يكون ايام زيارتك ..كان مقطعو في حشاو..لزوم الضيافة:D
ولا شنو..قولك ياخالد ...
دام الجميع بالعافية وعدم النقة.looool:Dgoood

النصيحة لله يا مرافي ما قاعد أنقنق بالعكس لما أزعل "بكضم" أي والله
شفتي زول ما يتكلم 15 يوم ؟ ...

خالد الحاج
04-08-2009, 09:53 PM
دي ظابطة معاك

كلاماتو حنينة
وبتحكي حال البلد

بس طول بالك يااخوي
ولمم اطرافك وروح على البلد
بدل تلقى البيت فضى عليك


وبعدين دي ماجكسوية
بس لكن دي كانت بتتونس
ساكت بتقضي وكتgoood
اقول ليك خسرانة هي والله
ولا شاكوش على راسهاهي وقع

اها انا هنا للمساندة
من عصير ومناديل وكده
لانو اماني مافي
ومحاحاة ناس الزرزرة
إزيك يا هويدا
عساك بخير يا ابنة العم..
خلي الطاجن مغطي..:(
الشكية لله ......

بسمله
04-08-2009, 09:55 PM
خالد الحاج

رجل بعمق بلادنا و طيبه اهلنا شخصيه لا يمكن تجاوزها بسهوله ..
و لانى فى سودانيات منذ ان بدأت فشهادتى فيه مجروحه
سعدت كثيرا بلقائه الثر ..
و سعدت اكثر بهذا البوست و الذى اتاح لى فرصه النظر اليه عن قرب

شكرا لك يا ابا امانى

و شكرا كثيرا لخالد ..
:)

عبدالعزيز خطاب
04-08-2009, 11:03 PM
ياخال

سلام شوق

أسئلتي:-

1- هل قناعاتك مازالت راسخة بإنتماءك للحزب الشيوعي؟؟

2- هل الثوابت في الفكر السياسي تشيخ بفعل السنين؟؟ لا أقصد سنين عمرك (الندية) وإنما تداول الأيام والمتغيرات ودورة الشخوص في سلالم الهيكل الحزبي!!

3- ماهي رؤيتك المستقبلية في مساهمتك للمراحل الآنية لسودان ما قبل وبعد الأنتخابات وإستفتاء تقرير المصير؟؟ والقدر الذي ستسهم به سودانيات؟؟؟؟

4- هل مازلت متشبس بكل القناعات التي حملتها من مشاركتك بمؤتمر الإعلاميين ؟؟

5-أولاد أختك كم؟؟؟؟؟؟؟؟؟؟؟؟goood

محبتي التي تعرفها
الميت

خالد الحاج
05-08-2009, 07:53 AM
خالد الحاج

رجل بعمق بلادنا و طيبه اهلنا شخصيه لا يمكن تجاوزها بسهوله ..
و لانى فى سودانيات منذ ان بدأت فشهادتى فيه مجروحه
سعدت كثيرا بلقائه الثر ..
و سعدت اكثر بهذا البوست و الذى اتاح لى فرصه النظر اليه عن قرب

شكرا لك يا ابا امانى

و شكرا كثيرا لخالد ..
:)
ألف شكر عزيزتي بسملة لحسن ظنك في خالك..

خالد الحاج
05-08-2009, 08:10 AM
ياخال

سلام شوق

أسئلتي:-

1- هل قناعاتك مازالت راسخة بإنتماءك للحزب الشيوعي؟؟

2- هل الثوابت في الفكر السياسي تشيخ بفعل السنين؟؟ لا أقصد سنين عمرك (الندية) وإنما تداول الأيام والمتغيرات ودورة الشخوص في سلالم الهيكل الحزبي!!

3- ماهي رؤيتك المستقبلية في مساهمتك للمراحل الآنية لسودان ما قبل وبعد الأنتخابات وإستفتاء تقرير المصير؟؟ والقدر الذي ستسهم به سودانيات؟؟؟؟

4- هل مازلت متشبس بكل القناعات التي حملتها من مشاركتك بمؤتمر الإعلاميين ؟؟

5-أولاد أختك كم؟؟؟؟؟؟؟؟؟؟؟؟goood

محبتي التي تعرفها
الميت

إزيك يا عزيز اللذيذ..
1- هل قناعاتك مازالت راسخة بإنتماءك للحزب الشيوعي؟؟

بالنسبة لسؤالك الأول يا عزيز ما أستطيع قوله لك الآن هو الآتي :

* نعم لا أزال عضوا في الحزب الشيوعي.
* عضويتي في الحزب مجمدة بطلب مني إلي أن أتلقي ردا في شكوي مرفوعة من قبلي لقيادة الحزب وامتد انتظاري منذ شهر فبراير ولا جديد .
أما عن القناعات فصبرا... انتظرني شهرا وستقرأ رأي ...

2- هل الثوابت في الفكر السياسي تشيخ بفعل السنين؟؟ لا أقصد سنين عمرك (الندية) وإنما تداول الأيام والمتغيرات ودورة الشخوص في سلالم الهيكل الحزبي!!

هذا سؤال كبير يا عزيز والإجابة عليه باختصار قد تسرق المعاني وتؤدي للتجريم..
علي كل حال هل يكفيك القول أن خيبة أمل كبيرة تتملكني بعيد المؤتمر الخامس للحزب وأن التغيرات التي حدثت لا تتوازي والمرجو .. اللهم إلا أن كان قيام المؤتمر نفسه يعتبر انجازا استثنائيا نكتفي بإعلان فرحتنا به .!!


3- ماهي رؤيتك المستقبلية في مساهمتك للمراحل الآنية لسودان ما قبل وبعد الأنتخابات وإستفتاء تقرير المصير؟؟ والقدر الذي ستسهم به سودانيات؟؟؟؟

قناعتي الشخصية هي العمل ولآخر نفس لتكريث روح وحدوية وترسيخ السلام.. وقد كان هذا هو ديدن سودانيات الراسخ الذي لم يتغير...
نعم الوضع السياسي الراهن لا يبشر بمستقبل مطمئن خاصة فيما يتعلق بتقرير المصير لكن الدول لا تقاس بحجمها يا عزيز انما بمدي تماسكها وما تقدمه من رفاهية وسلام وأمن لمواطنيها ... فإن كان لا بد من انفصال فاليتم ذلك في صورة حضارية وبسلام .



4- هل مازلت متشبس بكل القناعات التي حملتها من مشاركتك بمؤتمر الإعلاميين ؟؟

وهل هنالك تغييرا تراه يحتم علي تغيير قناعاتي ؟
كان مؤتمر الإعلاميين فرصة لي للمشاهدة عن قرب والحكم (فرست هاند) علي أوضاع الوطن بعد أن ظللت أكتب منذ 1995 من علي البعد معتمدا علي ما تجود به وسائل الإعلام ..

5-أولاد أختك كم؟؟؟؟؟؟؟؟؟؟؟؟goood

أولاد أختي اتنين يا عزيز واحد مات رحمة الله عليه والتاني عاااااااايش

بابكر مخير
05-08-2009, 08:25 AM
أولاد أختي اتنين يا عزيز واحد مات رحمة الله عليه والتاني عاااااااايش

ما سؤال، لكن تعليق أو نقول ملاحظة..
فيكا يا خلودي بشوف الزول الديمة مشغول،
حياتك يغلب عليها طابع الجدية،،
ممكن أقول في بعض الأحيان أنك مهمووووووووووووووم (في شني يابا الدنيا حلوة وخلي بالك قصيرة)
لكن بالرد دآ،،
بقت نظرياتي مشقلبة،،
حلوة ذي حلاوة الزول الرديت عليهو،،
غايتو ظنيتك من نسيم هولندا الداشر قنب (كنابيس) بقيت رويان....gooodgoood
وخلى مقياسي إنقلب..:D:D
سلامي للمحظوظين بيك، صباح ونهار ومساء،،،

أبو أماني
05-08-2009, 04:43 PM
الخال.. د.. لك الصادق من القلب .. متابعين وسعداء بكل ما يدور منك ومن المتداخلين إجاباتك .. أدب رفيع ونظم بديع .. بس العزيز عبد العزيز بن الخطاب لم توفي سؤاله حقه كما أظن .. فهو قال .. وأنت قلت ..
اقتباس:
5-أولاد أختك كم؟؟؟؟؟؟؟؟؟؟؟؟

أولاد أختي اتنين يا عزيز واحد مات رحمة الله عليه والتاني عاااااااايش
__________________

ضنيته .. قاصد شيتن كتر .. وعلامات الإستفهام الكتيييرة دي تشير .. وضنيتك قصدت الزوغة فأولاد أختك يا (خال) لا حصر لهم..عجبا.. ينقص الدال من إسمك ويظل الإسم كامل المعني والمضمون ..

لا تستبق الأحداث فهناك في جعبتنا..الكثير المثير الخطر.. وحاليا الله يعينك يافردة على القدامك ديل شايف الحبيب تكعيب بوكو .. بيسخن على الخط .. في أمان الله .. ووداعته .. تشاو

بابكر مخير
06-08-2009, 07:28 AM
الخال.. د.. لك الصادق من القلب .. متابعين وسعداء بكل ما يدور منك ومن المتداخلين إجاباتك .. أدب رفيع ونظم بديع .. بس العزيز عبد العزيز بن الخطاب لم توفي سؤاله حقه كما أظن .. فهو قال .. وأنت قلت ..
اقتباس:
5-أولاد أختك كم؟؟؟؟؟؟؟؟؟؟؟؟
أولاد أختي اتنين يا عزيز واحد مات رحمة الله عليه والتاني عاااااااايش
__________________
ضنيته .. قاصد شيتن كتر ..
وعلامات الإستفهام الكتيييرة دي تشير .. وضنيتك قصدت الزوغة فأولاد أختك يا (خال) لا حصر لهم..عجبا.. ينقص الدال من إسمك ويظل الإسم كامل المعني والمضمون ..
لا تستبق الأحداث فهناك في جعبتنا..الكثير المثير الخطر.. وحاليا الله يعينك يافردة على القدامك ديل شايف الحبيب تكعيب بوكو .. بيسخن على الخط .. في أمان الله .. ووداعته .. تشاو

أبو أماني،
ست الأماني الحلوة وجميلة..
أنا أولاد أختو بعرفهم كلهم،،
ما هم إخياني، سودانيات وسودان بالذات وكل سوداني بالجنسية وال(ميلاد) "أهو إسم واحد فلت منهم";)..
لكن يابا لو شفتا أولاد خالتو هو،،،
أبتديهم من زملآ المهنا ناس كمال "الكبير وكبير" وأمر علي البندر الهو في الأصل منبع الدر وأصل بيكا لي رب البهجة والجمال، مفرح القلب ومسعد الخلق "أسعد البرير"...
غايتو هو يفرح وإتا تفرح والشئ البيفرح برضو وبزيد الفرحة؟؟؟؟






















































اللون الهلالابي،
الله يسرك يابا في ما يغرك....

"بمناسبة هلالابي؛ المرة الوحيدة القعدتا فييها لمدة ساعات في إجزخانة خاصة،، جاءت وحدة وطلبت حبوب الهلالابي،،،،، ما عرفتا المقصود!!! أخوك زول حكومة بث دواء دون أسماء تجارية،،، قام لحقني المساعد في الإجزخانة وجاب صندوق لونو لبني لحبوب منع الحمل،، وعليه رسمة قمر كامل وهلال،،،"

طارق صديق كانديك
06-08-2009, 08:02 AM
شكراً كثيراً أبو أماني .. !!

الجميل خالد الحاج

متعك الله بالصحة والعافية أنت وعصافيرك الندية أينما حللتم .. !!

أشهد أني قرأتك بجوانحي فوجدتك تحمل الوداد كله .. !!

فقط لك تحية مستحقة .. !!

مع تقديري

طارق صديق كانديك
06-08-2009, 08:08 AM
ياخوى أنا حاشرنى هنا مالك .. أنا دى ما شلتى .. نحن مع الأيقونات وعضوية شلة البحر ناس كانديك وأبو ريم وعادل عسول :D وناس عثمان الطيب والشباب البفرح ده .. ناس شليل وشبارقة وفيصل سعد ما سائلين فيهم .. ود عثمان داك زول بتلصق ساكت .. ياهو دفعة ناس ود الطاهر ..

:mad:

(( النديد)) :D رأفت ميلاد

صباح الأيقونات على البحر كن أم على مفترق الشوق


أما والبحر أمامنا وفي معيتنا الجمال ... لن نستثني منه شيئاً .. !!

سعيدين بأن نكون في خاطرك يا جميل ... !!

عاطر مودتي

أبو أماني
07-08-2009, 06:53 PM
شكراً كثيراً أبو أماني .. !!

الجميل خالد الحاج

متعك الله بالصحة والعافية أنت وعصافيرك الندية أينما حللتم .. !!

أشهد أني قرأتك بجوانحي فوجدتك تحمل الوداد كله .. !!

فقط لك تحية مستحقة .. !!

مع تقديري

وكما قرأتني قرأتك يا صديقي العزيز .. شكرا على الكلام الحلو الجميل ولا عجب فطيب المصدر يفوح أريجه يعبق الأرجاء .. يهمني في المقام الأول والأخير .. أن نساهم جميعا في إعتصار ما نود معرفته من ضيف مائدتنا الدسمة .. وحررررم مافي زول يقوم منها .. أرجو الحلو ... تحياتي يا عسل .. لك ولجميع المشاركين أعلاه وعلى القائمة الحبيب تكعيب بوكو goood

أبو أماني
07-08-2009, 06:59 PM
أبو أماني،
ست الأماني الحلوة وجميلة..
أنا أولاد أختو بعرفهم كلهم،،
ما هم إخياني، سودانيات وسودان بالذات وكل سوداني بالجنسية وال(ميلاد) "أهو إسم واحد فلت منهم";)..
لكن يابا لو شفتا أولاد خالتو هو،،،
أبتديهم من زملآ المهنا ناس كمال "الكبير وكبير" وأمر علي البندر الهو في الأصل منبع الدر وأصل بيكا لي رب البهجة والجمال، مفرح القلب ومسعد الخلق "أسعد البرير"...
غايتو هو يفرح وإتا تفرح والشئ البيفرح برضو وبزيد الفرحة؟؟؟؟






















































اللون الهلالابي،
الله يسرك يابا في ما يغرك....

"بمناسبة هلالابي؛ المرة الوحيدة القعدتا فييها لمدة ساعات في إجزخانة خاصة،، جاءت وحدة وطلبت حبوب الهلالابي،،،،، ما عرفتا المقصود!!! أخوك زول حكومة بث دواء دون أسماء تجارية،،، قام لحقني المساعد في الإجزخانة وجاب صندوق لونو لبني لحبوب منع الحمل،، وعليه رسمة قمر كامل وهلال،،،"

حقيقي يا دوك .. مداخلاتك ومساهماتك الدسمة الموجزة التي تذكرني بلسعات محمد على كلاي تذكرني أيضا بالإمتحانات في مرحلة الثانوي العالي .. يا أخي والله وووالله إت ما في منك إتنين في البلد دي .. تصدق يا مؤمن؟ محاورتك للخال العزيز خالد وإثارة كوامن الذكريات بأصدقاء الصبينة والشباب .. محاورة ذكية بلا شك تستفز مشاعر ضيفنا الكريم وتجعله يسهب دونما يقصد وهذا غاية ما نصبو إليه دمت لينا .. نبراسا مضيئا .. وفكرا راجحا وحاديا للدرب أبا جعفر المنصور .. ولأبي جعفر الآخر (خالد) كل الود .. وننتظر ردوده على المشاركين بفارغ الصبر ..أرقدوا عافية goood..

همس الشوق
07-08-2009, 07:38 PM
حباب همس الشوق



نعم أحمل الجنسية الهولندية مع احتفاظي بجنسيتى السودانية.
مسألة العيش بسلام حمالة أوجه يا بت أختي..
إن كنت تعنين العيش من حيث الأكل والشراب والتعليم والصحة فالإجابة نعم.
لكن السلام يا بت الأخت ماهو أكل وشراب.. "ليس بالخبز وحده يحي الإنسان"
الغربة تسرق منك أجمل ما فيك "الانتماء" ..
تخيلي أنك تعيشين في قرية أقاصي الجنوب الهولندي.. لا أهل ولا أصدقاء ولا أسرة تزورك
ينحصر نشاطك بين العمل والمنزل .. وكل اصدقاءك ومؤنسي وحشتك هم جهاز كمبيوتر يمدك ككيس جلكوز بمعني أن تشعر بانسانيتك .. محزن مش كده ؟

الأبناء من ناحية أخري هم مصيبتنا الكبري..
سارة ابنتي عمرها 12 سنة .. طلبت أن تقص شعرها وهو طويل نوعا وجميل.. رفضت أنا
وردت سارة علي بلغة غير جميلة رديت عليها برفع صوتي ورميتها بمجلة كانت في يدي فأسرعت جارية ناحية الشارع ولم تعد إلا بعد أن أحضرها البوليس بعد منتصف الليل :(
لم أقسو في حياتي علي ابنائي وأعاملهم برفق ...
http://www.albrkal.com/upload/uploads/sarah122.jpg

طبعا هذا لم يقنع البوليس فاتصلوا بمنظمة تسمي (كندر بشخيرمنج) حماية الطفل..
هؤلاء اعتبروها قضيتهم وهاك يا تحقيق وأمش وتعال...
نبشوا حتى سجلي الطبي وسجلي العدلي...
أسوق هذه القصة فقط كي أشرح ما نعاني أحيانا من غربة الجسد والروح..
لا تزال التحقيقات جارية وهي مآساة تأخذ من روحي وجسدي ولا أقول إلا الشكية لله :(
هولندا أخذت عمري وسلامي النفسي يا ابنة الأخت.

يديك العافية.

يا ربيييييي
مبالغة
هي فاتورة التربية في بلاد العم سام

للأسف سمعت مواقف كتيره عن تمرد الأبناء هناك

ولكن ...

اذا إفترضنا نية الرجوع الى الوطن في يوما ما

كيف سيتكيف الأبناء على العيش في السودان ؟؟؟؟
وهل النية موجوده خصوصا بعد هذا الموقف المخيف....؟؟؟؟

أبو أماني
09-08-2009, 06:00 PM
يا ربيييييي
مبالغة
هي فاتورة التربية في بلاد العم سام

للأسف سمعت مواقف كتيره عن تمرد الأبناء هناك

ولكن ...

اذا إفترضنا نية الرجوع الى الوطن في يوما ما

كيف سيتكيف الأبناء على العيش في السودان ؟؟؟؟
وهل النية موجوده خصوصا بعد هذا الموقف المخيف....؟؟؟؟



أولا رد على البنية يا خال .. وثانيا هنالك عدة مداخلات أعلاه لم ترد عليها ثالثا وأخيرا هانت بعد ردودك على كافة ضيوفك .. ممكن في ختام طلتك البهية ترشح لينا على مزاجك الضيف رغم إثنين .. والذي تسبغ عليه شرف أن يأتي منك .. وبعدك .. لك خالص مودتي goood :D :D

خالد الحاج
09-08-2009, 06:14 PM
يا ربيييييي
مبالغة
هي فاتورة التربية في بلاد العم سام

للأسف سمعت مواقف كتيره عن تمرد الأبناء هناك

ولكن ...

اذا إفترضنا نية الرجوع الى الوطن في يوما ما

كيف سيتكيف الأبناء على العيش في السودان ؟؟؟؟
وهل النية موجوده خصوصا بعد هذا الموقف المخيف....؟؟؟؟




الأعزاء
بابكر مخير
طارق صديق
أبوأماني
المسألة ليست أكثر من "دبرسة" مقيمة أجاركم الله ...
غياب غير مقصود والله ...
محبة مقيمة يا بابكر وطارق تعلمانها ...


العزيزة همس الشوق..
سارة لا تزال طفلة وما حدث لم أوصله وصفا لمرحلة "التمرد" لكنها تجربة قاسية علي كل حال..
أما عن الرجوع للوطن فهي رغبة لازمتني لأعوام طوال -14 عام- هي مدة وجودي في هولندا..
المسألة لم تعد تتجسد في "شخصي" الضعيف انما في الأولاد.. وكل يوم يمر يصير القرار أصعب..
شخصيا لم تعد مسألة العيش في الغرب تشكل لدي ذاك البريق المرتبط ب "الشباب"...
شاهدت الغرب وسافرت لأكثر من عشرون دولة حول العالم ...
صدقيني ليس هنالك جديد يشاهد ..
قال عالم أنثربولجي : (كي تفهم نفسك جيدا عليك ب "أكسبلور" عوالم أخري )...
النتيجة أن الانسان اينما كان وكيفما كان شكله ولونه وذهنيته هو هو الانسان ...
النتيجة ..
أشتاق لحياة بسيطة .. سلام الجار وقولة اتفضل ..حرم تشرب شاي.. وكل سنة وانت طيب ، ويا آخي كفارة ...
و..... بس ...
حتى هذه أصبحت عزيزة المنال ...
الشكية لله .

خالد الحاج
09-08-2009, 06:17 PM
أخيرا عليك بأحد هؤلاء يا أبا أماني...
النور يوسف
رأفت ميلاد
لنا جعفر
هاشم طه
حسن فرح
بابكر مخير..

أبو أماني
09-08-2009, 06:49 PM
أخيرا عليك بأحد هؤلاء يا أبا أماني...
النور يوسف
رأفت ميلاد
لنا جعفر
هاشم طه
حسن فرح
بابكر مخير..

حقا ابهجتنا واسعدتنا بإستضافتك الرائعة المتميزة وخرجنا منك بحصيلة وافرة من أشياء حميمة كنت تكنزها لنفسك ومن تعزهم فاقنعك أبو أماني باننا منهم .. ترشيحك سيكون فهرست كما جاء من بنانك الرائع .. لك الود الصادق والحب الصاخب والشوق الدافق للقائك والأسرة الكريمة لهم تحياتي .. وليشمر لنا العزيز النور يوسف المرشح الأول عن ساعديه .. بدايتي مع ضيفي الجديد .. سؤال واحد تمهيدي : أود التعرف إليك أنا وباقي من لا يعرفونك يا نورنا الضاوي فهلا تكرمت ومديت رأسك جاي؟ .goood.goood.goood

somiaadam
09-08-2009, 08:56 PM
إزيك يا سرور
إنت ما بتخلي البحيت ؟ غايتو يوم بتتلدغي looool

أول شاكوش كان بعد التخرج من الجامعة وفي لجنة الاختيار للخدمة العامة في الخرطوم..
خاتي سفتي وواقف قدام البورد أقرا في نتائج المعاينات ومنتظر "البلومة"
جاتني تحمل في يدها مجموعة كروت لدعوة زواجها .. أي والله ..:(
قالت لي : أنتظرك لي متين أنا في زول جاهز اتقدم لي ...
كنت حينها لا يزال والدي يدفع لي حق المواصلات والتمباك :(
غايتو يا سارة الله يجازيك ..
اخونا خالد بالله عليك
ده محل الشواكيش طبعا لانو لجنه الاختيار دي اساسا كان حيدوك فيها شاكوش يعني
يبقوا اتنين الله يكون في عونك (الجنه)دي جايبين سيرتها مالكم مورما فشفاشنا :mad:

ياريت تحكي لينا ما أمكن من تجارب كانت لها أثر في تغيير مجري حياتك أذا حصلت
ولسه جاينك للباقي..بس شويه كده

somiaadam
09-08-2009, 08:59 PM
شكرا للرائع ابو اماني علي الافكار الرائعه
أعزرني كتبتها بعد المشاركه

أبو أماني
10-08-2009, 08:33 AM
اخونا خالد بالله عليك
ده محل الشواكيش طبعا لانو لجنه الاختيار دي اساسا كان حيدوك فيها شاكوش يعني
يبقوا اتنين الله يكون في عونك (الجنه)دي جايبين سيرتها مالكم مورما فشفاشنا :mad:

ياريت تحكي لينا ما أمكن من تجارب كانت لها أثر في تغيير مجري حياتك أذا حصلت
ولسه جاينك للباقي..بس شويه كده

طبعا بعد إعلان ختام زيارتك أعلاه وصلت المداخلة الرائعة الهامة من العزيزة أستاذه سمية آدم ولازم يأتي الرد منك شافيا ومسهبا لانه آخر رد بعد إنعتاقك .. لكما خالص الود

أبو أماني
12-08-2009, 10:32 AM
We are waiting... I hope not 4 long... chawoooo

خالد الحاج
12-08-2009, 05:58 PM
ياريت تحكي لينا ما أمكن من تجارب كانت لها أثر في تغيير مجري حياتك أذا حصلت
ولسه جاينك للباقي..بس شويه كده

سمية آدم ..
حبابك يا خية..
هناك محطات عديدة ... لكن المحطة التي أقف فيها "الآن" هي التي غيرت مجري حياتي..
باختصار وأرجو أن لا تقولي لي أشرح (اكتشفت بعد سنوات طوال أني لم أشتري الوهم فقط انما اسهمت في تسويقه) :(
أزيدك (هينين) علي قول أهلي الشايقية ... أني بعد هذه المحطة لا انتمي إلا للوطن .

ويا أبا أماني أنا ماني جاييك هنا تاني دحين أقبض في النور يوسف أو هاشم طه أو رأفت ميلاد.. أيا كان صيدك فأنت الكسبان ..
والسلالالالالام .