المساعد الشخصي الرقمي

مشاهدة النسخة كاملة : ضيف على مائدة سودانيات ...! - 3 - فيصل سعد


أبو أماني
27-07-2009, 06:38 PM
gooodأحبائي الأعزاء ..
أحباء سودانيات .. لكم صادق الود والتحايا القلبية .. حقا قد سرني وأثلج صدري عمق صداقتي بكم ذهاء ما يقارب السنة أو يزيد .. قضيتها بينكم في سعادة وحبور .. وأحسست وأنا بينكم وبكم بدفء الأسرة وأحلى وشائج الإخاء والمحبة .. حيث صرتم بالنسبة لي كأفراد أسرتي رحما بل أكثر من ذلك..بحيث أقضي الساعات الطوال في رحابكم المرحة العامرة قبل وأكثر مما أقضيه مع أسرتي .. فلكم الشكر على ما وهبتموني من حب صادق إمتزج في شراييني وصار يغزو القلب ويعمر غرفه الأربع ويهرب ليعود ثانية ليمدني بالحياة .

فكرت مليئا في شكل مستقبل علاقة كل سوداني في سودانيات بالآخر! وهالني أن تكون علاقة صادقة حميمة كهذه عرضة للعيش والعمران طويلا عبر الفضاء الإسفيري والعالم الأثيري ..! وتصورت حياة شخوصها في اللاشئ وفنائهم في اللاشئ ..تماما كما يحدث يوميا بالنسبة لممثلين وممثلات نشاهدهم عبر الشاشات البيضاء والبلورية .. نعايشهم ونعاصرهم ثم يتلاشوا في اللاشئ حقيقي حزت في نفسي هذه الخاطرة .. وفكرت ثانية !..

أضع بين أياديكم عتبة أولي لتجسيد علاقة كل منا بالآخر .. وهو بوستر تتم استضافة عضو فيه ليكون مصدر حوار تعارفي يحكي لنا ما عن له أن يرويه عن نفسه فنزداد قربا منه أكثر وأكثر ومعرفة به وثيقة أكثر .. نعرف موقعه الحالي .. رقم موبايله .. عدد أفراد أسرته .. طموحاته الآنية والمستقبلية .. بعض مشاكله الخاصة التي يمكن الخوض فيها .. والمشاركة في علاجها بعض الجوانب المضيئة من حياته الماضية والتي يحلو له الخوض فيها مع الأحباء .. الخ ..

إن راقت لكم فكرتي هذه فأقترح أن يقوم كل ضيف حل بالبوستر في نهاية حلقته بترشيح من يحل بعده ضيفا على مننتسبي سودانيات .. وهكذا دواليك .. تبقى المعضلة في إختيار عضو الشرف الأول .. وأقترح أيضا أن يقوم صاحب البوستر بإختياره .. درج كبارنا على إختيار كبير القوم ليتولى ضربة البداية في كل مشروع أو عمل .. وحيث أن مجتمع سودانيات يحفل بالكبار شكلا وموضوعا وليس من بينهم من يتفضل على الآخر .. فأسمحوا لي أن أختار أكبر الأعضاء (سنا) .. فليكن ضيف الحلقة الأولى العميد الأستاذ :-

:Dخـــالـــد الحــــاج:confused:
مساهمتي الأولي معه المطالبة بنبذة صغيرة عن عميدنا والبطاقة الشخصية وتعريف مختصر ولكم جميعا خالص حبي وإعتزازي وإحترامي ...

فيصل سعد
07-09-2009, 04:54 AM
بسم الله، و الحمد لله،
و الصلاة و السلام على رسول الله ..

شكرا عزيزنا النور يوسف على الاضاءات و حروفك المنثورة في هذا البوست التعريفي، الرجاء المواصلة و عدم الانقطاع عن "سودانيات" عالم التواصل و المودة. التحية و التقدير لصاحب هذا البوست النفاج الذي يطل فيه الزملاء و الزميلات تعريفا و تواصلا و نتمنى ان يحقق البوست اهدافه المنشودة ..

فيصل سعد احمد الشيخ ادريس، من مواليد بري المحس في 14 يناير 1964، والدي الراحل الاستاذ / سعد احمد الشيخ من الرعيل الاول من شباب جيل الاستقلال الذين رفعوا العلم مرفرفا خفاقا مع الزعيم الازهري و رفاقه الميامين الابرار، من الجيل الاول من الصحفيين السودانيين صاحب و مؤسس وكالة اخبار الخرطوم، أول وكالة انباء سودانية، المؤممة 1970 بقانون التأميمات و المصادرات الظالمة و الجائرة في العهد المايوي البغيض المندحر، و رئيس تحرير "سودان استاندرد" اول صحيفة سودانية صدرت باللغة الانجليزية، مراسل وكالة رويتر بالخرطوم، مدير التحرير بوكالة الانباء الكويتية منذ العام 1980 و مدير مكتبها بالخرطوم حتى وفاته في 1988. عمي الراحل مصطفى الشيخ من مؤسسي اتحاد الشباب السوداني و من طلائع القوى الاشتراكية في السودان، خبرته معتقلات و سجون البلاد مناضلا و منافحا صلدا و مقاوما للقهر و البطش و جبروت الحكام ، جدي احمد الشيخ ادريس من اوائل موظفي القضاء و المحاكم قبل و بعد السودنة، و جدي المشرف الشيخ ادريس شيخ الخضرجية بسوق 4 ببري المحس، جدي عبد الرحمن حاج احمد "شيخ الحلة" ببري المحس او شيخ البركس كما تحلو تسميته و رئيس مجلس بلدي البراري، جدي ابراهيم علي ابراهيم من اوائل خريجي كلية غردون التذكارية، معلما طاف البلاد طولا و عرضا و تبوأ مدير كسلا الثانوية و وادي سيدنا و مدير كلية التربية كسلا، و مدير مكتب تعليم الخرطوم و مسجل الجامعة الاسلامية و مدير مكتبة امدرمان المركزية، و جدي عثمان علي ابراهيم معلما بارزا و من اوائل الرأسمالية السودانية الغير مرتبطة بالاستعمار، لهم الرحمة و المغفرة و الاجر و الثواب عند رب كريم مقتدر.

الوالدة سميرة ابراهيم علي، من امدرمان بيت المال، و جذور عائلة الوالدة و الوالد نابعة من جزيرة توتي على ضفاف نيلنا الخالد العظيم، و اهلنا موجودين و مترامي الاطراف في توتي و الخرطوم 1 ، 2، 3 ، السجانة، الديم، الامتداد، الصحافة، سوبا، جبرة، الجريف، امدرمان ، شمبات ، حلة حمد و خوجلي ، الحلفايا، المزاد، الاملاك، الحاج يوسف، الجيلي، الدروشاب، الفتيحاب ،الشجرة ، اللاماب ، البشاقرة ، التكلة ، التكينة و على ضفاف نيلينا الابيض و الازرق و ما بينهما.

بحكم ظروف عمل الوالد و تنقله سكنا بري المحس و الدرايسة "كوريا"، العمارات، الخرطوم 2 و بيت المال، درست الابتدائي بالديم شرق الابتدائية "أ" و عبد المنعم الابتدائية، الثانوي العام بالخرطوم الاهلية و بري الاميرية ، و الثانوي العالي بالخرطوم القديمة و المؤتمر الثانوية، تخرجت بدلوم NSCE برمجة و تشغيل كمبيوتر من معهد الشرق الاوسط لدراسات الحاسب الآلي (ICL) بقاهرة المعز في العام 1986 ، و منذ ذلك الحين "انجبتني مريم اخرى قطارا و حقيبة"

و نواصل ..

فيصل سعد
07-09-2009, 07:11 AM
http://sudaniyat.net/up/uploading/fai.jpg

شبارقة
07-09-2009, 09:40 AM
شكرا ً لجنابو الأستاذ / النور يوسف ومرحبا ً بحبيبنا فيصل سعد ويسعدني أن أكون أول المتداخلين ;)

أها يا فيصل ... حصل خضتا فى وحل المطر والطين ؟
ومن الترعة سويت شراب الهين ؟
وحصل قيلتا فى ضل دومة بى فرعين ؟
وحصل شاققتا عرق النيل مع الوزين ؟
وحصل مشي الأسفلت جربتو بالكرعين ؟
وركوب اللورى فى شمسا ً تصر العين ؟
وحصل عانيت وقوف الصف وراء التموين؟
:D:D

إذا كانت نـُص إجاباتك بـلا ... نديك قرشك طوالي وتنزل في المحطة الجاية :D

فيصل سعد
07-09-2009, 09:45 AM
شكرا ً لجنابو الأستاذ / النور يوسف ومرحبا ً بحبيبنا فيصل سعد

أها يا فيصل ... حصل خضتا فى وحل المطر والطين ؟
ومن الترعة سويت شراب الهين ؟
وحصل قيلتا فى ضل دومة بى فرعين ؟
وحصل شاققتا عرق النيل مع الوزين ؟
وحصل مشي الأسفلت جربتو بالكرعين ؟
وركوب اللورى فى شمسا ً تصر العين ؟
وحصل عانيت وقوف الصف وراء التموين؟
:D:D

إذا كانت نـُص إجاباتك بـلا ... نديك قرشك طوالي وتنزل في المحطة الجاية :D

سلام يا رجل و يسعدنا مرورك الجميل،
بس ما تعصر علينا شديد و نص الاجابات
نعم هي نص الاجابات لا و يا معلم، نحن
كان ما متنا شقينا المقابر :D:D

فيصل سعد
07-09-2009, 10:10 AM
"و اذكروني كل ما حلق طائر في الجو ،
و كلما داعبت اوراق الاشجار نسمة رقيقة،
فذكراكم هي ملء حياتي"



- القاهرة 1984 ، و نحن برالمة لنج اشقياء و شقيانين نتلمس بواكير خطاوي الغربة و الترحال ، تحركنا و المساء مبكرا انا و صديقي و ابن عمي احمد مصطفي الشيخ و الصديق عصام حسن و ثلاثتنا من بري، و الاصدقاء زملاء السكن الاخ طارق عبد المنعم قدم الخير ابن الركابية ام درمان و اخونا محمد احمد مختار العمدة (الاطرش) من ابناء دوكة بالقضارف و سنايرنا على الامين على (جكسا) و على احمد حسن (جنابو) من ابناء الخرطوم تلاتة و عمدتنا و مطربنا و فاكهة مجالسنا عوض قريد "ترباس" من ابناء الحلة الجديدة، و جارنا محمد النصيح من ابناء سنار ، و بعض الاصدقاء ضيوفنا من الاسكندرية الاخ ناجي التجاني السوري من امدرمان و الاخوين كمال و شعيب من ابناء بحري ، تحركنا من شقتنا بالمهندسين متوجهين الي حضور حفل اتحاد الطلبة السنوي الذي يحييه الموسيقار محمد وردي بدار الاتحاد بالجيزة.. في طريقنا مررنا على سكن اخونا السنير و العضو القيادي بالاتحاد و رئيس رابطة امدرمان عبادي محجوب "المخرج التلفزيوني حاليا" في ضاحية الهرم ، وجدنا معه الشاعر عبد القادر الكتيابي، و الفنان يوسف الموصلي، و بعض الاخوة العازفين ، و مجموعة من زملائهم بمعهد الموسيقى، و بعض من المعارف و الحسان الغيد ايقونات ذلك الزمن الجميل من ارض الكنانة الشقيقة و بعض زميلات الدراسة العزيزات ، في جلسة اختلط فيها الادب و الثقافة و الغناء العذب و الفن و الابداع سجلنا حضورنا و حجزنا مقاعدنا للسهرة الصباحية بعد الحفل، و توجه الجميع الي حفل الاتحاد ... اخذت ورقة من عبادي مكتوب فيها كلام تذكرت منه فقط عنوان هذه المداخلة .

كانت قعدة آخر الليل صباحية حافلة و محفلة بكل موارد البهجة و المرح، و ذات جو دافئ و حنين عامرا بالالفة و المودة و النقاء و الروح و الجمال و السحر الحلال. قضينا ليلة ساهرة مع الموسيقى و الطرب و دوزنة روائع الموصلي "يا ذاتي من عبر القرون جيتك انا شايل معاي شوق السنين مسدار غناء" و "مهما فيك طولت صابر يا سنين عمري الشقية ... و مهما طال فيك حظي عاثر و ذوبت روحي الاسية .. ما بقول انا راح اواني عارفه ببسم لي زماني .. و سعدي برجع لي تاني بالاماني السندسية " و تخللت القعدة اجواء القفشات و الفرح و الفكاهة و اجواء المطبخ و الحلل المدورة في نيران البوتجاز و شواء كوانين البلكونة و ضجة الصحاب في تجهيز المزز السريعة و ملحقاتها من كبد و شطوط و سلطات و رصرصة و توضيب الطلبات الجاهزة من فلافل القاهرة و فطائرها و كشريها الطاعم .. و اختتم عبادي تلك الاجواء الحميمة بدرر الحقيبة و "افكاري حيارى ضاعت باختيارها حبيبي آه و قلبي تاه في يوم الزيارة " و كانت افكار و فاتن يرددوا و يردد الجميع معهم في تلك الوصلة الغنائية الرائعة تطريبا و تغريدا من المبدع الباسم الفنان عبادي و هو يترنم " و هو حسنه صار فوق الجميع" و حقيقة كانت قعدة و جلسة الفة و مودة و شجن و محبة و محنة و طرب فوق الجميع ..

التحية لتلك الرفقة الحنينة و الحميمة من اصدقاء ذلك الزمن الجميل، و عذرا لمن سقط اسمه سهوا ،، و اقول لهم ذكراكم على الدوام هي ملء الحياة و دفئها ،، و الذكرى ناقوس يدق في عالم النسيان،، و اكيد اكيد حنتقابل ،، مع عميق الود و كثيف الشوق و عارم المحبة..




WIDTH=400 HEIGHT=350

تحفة حوا
07-09-2009, 11:15 AM
فيصل سعد واخيرا
goood
شنو البديت لينا بالكلام الكبار دا
كدي استنا النسألك بالاول

أول شي سيرة عطرة والله واستمتعنا بالقراءة جد
تانيا : الناحية العاطفية الهارب منها دي
تتكلم براك ولا نسألك :D
تالتا : بجيك راجعة

فيصل سعد
07-09-2009, 11:20 AM
سلام يا ست الكل،
سيرة البحر دي نخليها للنهاية،
عشان يكون ختامه مسك و كدا،،
شكرا للمرور ، و راجينك قدام ..

فيصل سعد
07-09-2009, 11:39 AM
لمسة وفاء و تقدير و شوق و سلام لاصدقاء طفولة و زملاء دراسة و اصدقاء عمل و غربة و اهل اصحاب و دفعة و جيران اعزاء، فرقت الغربة و الترحال و المنافي و ظروف الحياة ما بيننا و بينهم و انقطع التواصل ، التحية لهم اين ما كانوا و الحب و المودة لهم في كل ظروفهم مقرونة باطيب التمنيات و احلى الامنيات :

زملاء دراسة في الذاكرة :

سيف اليزل خليفة بابكر ، الديم شرق الابتدائية
احمد عبد القادر ، الديم شرق الابتدائية
فيصل عباس فضل ، الديم شرق الابتدائية
سليمان عبد الباقي محمد ، الديم شرق الابتدائية
نادر محجوب بابكر السيد ، بري الاميرية
الحاج عبد الله فرج الله ، بري الاميرية
عصام عمر قسومة ، بري الاميرية
امير حسن البداني ، بري الاميرية
السني ابو العزائم عباس ، بري الاميرية
خالد عمر محمد الامين ، بري الاميرية
صلاح هاشم سوار الدهب ، بري الاميرية
احمد صديق عبد اللطيف ، بري الاميرية
امير الفاتح حمودي ، بري الاميرية
عبد العزيز الريح قسومة ، بري الاميرية
محمد ادريس كنة ، الخرطوم القديمة
عبد الماجد عمر محمد الطيب ،الخرطوم القديمة
قيسوني اسماعيل ،الخرطوم القديمة
السني محمد ابراهيم ،الخرطوم القديمة
سامي على ،الخرطوم القديمة
شمس الدين ابو قرون ،الخرطوم القديمة
احمد المامون الامين، المؤتمر الثانوية

اصدقاء و اصحاب و جيران في الذاكرة :
"بيت المال"

امير جلال الغول ، دارصليح عبد الرازق ، سعد خليل سعد ، سالة عبد الله ، خالد حسين الغول ، جعفر حامد الشلالي ، صلاح عبد الرازق ، جمال فضل الله "فريني" ، اسامة فضل طه "حريقة" ، خالد عبد الرحمن ابراهيم "النالة" ، خالد عثمان سالم "كديس" ، عماد فضل الله "ماردونا" ، عماد كردش ، ياسر محجوب ، اسامة احمد عبدة "إندرة"، عصام سيد احمد "الجقر" ، عبد القوي دراج، ابراهيم عثمان "كلملم" ، حسين موسى "جربوكس" ، كامل محمد فضل السيد ، فرزدق برعي ، الفاتح السراج ، فيصل علي ابراهيم ، حسن يوسف الغول ، عمر مصطفى سلمان ، محمد خليل سعد ، ياسر محمد عثمان ، عصام حسن، طارق ميرغني ،، محمد ساتي ،يوسف عماد الدين خاطر، الرحمة و المغفرة للاعزاء المرحوم صديق توسكا ، المرحوم علاء الدين النوش و المرحوم جمال سالة..

اصدقاء و اصحاب و جيران في الذاكرة :
"بري"

مامون الريح ، محجوب عبد الله ، خليل الريح ، هشام عمر قسومة ، الاشقاء عابدين، ناجي ، نادر، مرتضى، معاوية و عبد القادر محجوب بابكر السيد ، طارق و مكي و خالد جميل صالح عكاشة، عادل علي ،عبد العظيم الريح ، محمد احمد خير السيد "شوولي" ، اسامة الزين آدم ، وليد السيد ، الفاتح ربيع ، عبد الحليم التكينة ، يسن بانقا ، عبد الرحمن حريز ، محمد عبد الباقي "التقر" ، الفنان احمد الطيب ، عارف قسومة ، مجاهد عوض ، يسن خالد ، معاذ يسن ، عبد الحميد الريح ، صلاح الدقنا ، علي عبد الباقي ، امير عوض ، احمد علي ،هشام جلال، نادر حسن ، مجدي منصور، زاهر شمام، بشير لولية ، مجدي منصور ، طارق محمود ، عبد المنعم الريح، محمد صديق عبد اللطيف ، عماد الحاج المشرف ، عباس عبد الله ، حسبو تاج الدين ، حسن حتيكابي ، صالح محجوب ، ايمن عبد الرزاق، ياسر حسن علي، مكي جميل ، صلاح جحا، جمال بابكر ، اسامة الفاتح ، محمد عمر اسحاق، و الكابتن نصر الدين حبيب له الرحمة و المغفرة،

عمات و خالات في الذاكرة:

آمال ابراهيم علي ، صفية المشرف ،كوثر بابكر احمد ، سعاد حمد، اقبال ابراهيم علي ، الهام بابكر ، سوسن ابراهيم علي ، دعاء عثمان علي ،بثينة ادهم ، عفاف بابكر احمد، وفاء عثمان على ،خالدة الريح ،اكرام ادهم ، رابحة الطاهر ، سونا مبارك ، عزة حسن احمد عبد القادر، كوكب الطاهر ، احسان مامون ، اسماء محمد احمد، سليمى جبارة ، وصال عثمان علي ، انصاف خلف الله، انشراح محمد حسن ، وداد بابكر خليل ، وداد خضر احمد ، سعاد عبد الله ، رقية بابكر ، سميرة بابكر ، بت وهب عبد الله ، رقية ابراهيم عبد الكريم، عفاف بابكر علي عمر ، علوية السيد مضوي ، سلوى عباس ، علوية النور

اعمام و خيلان في الذاكرة:

محمد الحسن ابراهيم علي ، ابراهيم الطاهر احمد ،مجدي محسي ، عزالدين علي المحسي ،الحاج المشرف ،علي عثمان علي، عادل الطاهر احمد ،محجوب عبد الله ، حسن كمير، محمد ادهم ، عاصم ابراهيم علي ، مصطفى مبارك "ابجيبين" ، احمد الطاهر ، عماد الطاهر ،علي ادهم ، مجتبي محسي ، وليد عثمان علي ، حسين بابكر، هاشم ابراهيم علي ،علي المشرف ، احمد الطيب السني ، زكي بابكر احمد ،عثمان محجوب زكي، عبد الغني غندور ، بشير طه صالح ، مروان حامد الرشيد ، محمود قسم السيد ،صلاح ساتي احمد ، عبد السلام عكاشة و كمال بابكر علي عمر.

اصدقاء غربة (مصر ، الامارات ، كندا)

عادل محمد ابراهيم "مدني" ، امير يونس "مدني" ، وليد/حسان/اباذر/معتز/موفق/ابو عبيدة محمد عبد الله "القضارف" ، صابر ابوبكر سعيد "كرمة البلد" ، سيد خلف الله "امدرمان" ، طارق قدم الخير"امدرمان" ، نصر الدين نوري "امدرمان" ، ضياء الدين حسن ادريس "المسلمية" ، فيصل حمد "القضارف" ، امير مساعد "سنجة" ، عبد الجليل حسين "الصحافة" ، عبد الاله زمراوي "كرمة البلد" ، ، عز الدين عبيد الله "كسلا" ، يوسف امين "الخرطوم 2" ، صبري محمد حسن "مدني" ، عبد المجيد عوض ساتي "بحري"، هشام المجمر "بحري" ، محمد دهيس "سنار" ، طارق نمر "كسلا" ، بشير اسماعيل "الابيض" ، كمال الشيخ "المسلمية" ، الفاتح يسن "صواردة" ، يحي فضل الله "كادقلي" ، مصطفي مدثر "امدرمان" ، فقيري حمد "بورتسودان"

اساتذة و معلمين في الذاكرة :

محمد احمد عبد القادر ، عبد الرحيم الشيخ ، حسين الغول ، عبد القادر كرف ، ابراهيم علي ، حسن عبيد ، عثمان علي ، عمر قسومة ، علي السيد ، مصطفي بوستك ، علي التلب ، قرنفلي ، سناري ، سيد احمد نقد الله ، حسن عبد الحليم ، ابراهيم الطاهر ،عوض يسن ، محمد حمزة ،النوراني الحاج الفاضلابي ، بشير الريح قسومة ، احمد جمال ، محمد الطيب ، شمس الدين الغول، صديق عبد اللطيف ، عمر ارباب.

و التحايا و التقدير كذلك مقرونة باسمى آيات الاحترام و المحبة، لكافة الزميلات و الزملاء و الاهل و المعارف و الصحاب بهذا المنبر العظيم الوطن "سودانيات" عالم التواصل و المحبة ..

sudaniyat.net/up/uploading/alteer_almohagir.wma

.... نواصل ....

فيصل سعد
08-09-2009, 06:24 AM
مشاوير و سنوات و حكاوي الصبا ، او ،
في ذكري المدرسة الابتدائية .. " الديم شرق الابتدائية بنين - الختمية أ "


- يوليو 1970 توجهت صباحا و في يوم غريب لا يشبه سابق ايام طفولتي و جهالتي ، الى المدرسة الابتدائية و انا ابن السادسة، مرتديا الرداء الكحلي و القميص اللبني، منتعلا شبط باتا الاسود، و حاملا شنطة مدرسية صغيرة و زمزمية ماء و سندوتش صنعته امي على غير العادة، و التي اقنعتني منذ مدة و اكدت لي في المساء السابق بانني ذاهب الى مدرسة جديدة ليس بها فطور و حلوى، و ان اخواني الصغار سيذهبون الى روضتنا القديمة لصغر سنهم مع والدهم "رحمه الله رحمة واسعة"، اما انا فساذهب بمفردى للمدرسة الجديدة و التي لا تبعد كثيرا عن البيت..

و كان قبل ذلك قد حدث بعض التلكك والمماطلة و الممانعة مني في شأن ذلك التغيير و تلك المدرسة الجديدة و فراق اخوتي، و ربما جاهرت بالمعارضة و عدم الرضا و اعلنت عدم الذهاب ، و لكن كل ارهاصات ذلك الحردان و نشاف الراس المبكر، قد حسمها جدي الاستاذ الناظر ابراهيم علي"رحمه الله رحمة واسعة" في ذلك الصباح الغريب بعد ان "جراني من اضاني" بكل حسم و مودة و حنين، و دلف بي الى داخل المدرسة..

بعد دردشة صباحية مع بعض زملائه الاساتذة، تركني بالمدرسة و اعطاني شلنا او ريالا لا اذكر بالتحديد، و ربما قال لهم "ليكم اللحم و لينا العضم".. و امرني بان احضر هنا صباح كل يوم للعلم و الدراسة و التحصيل و انا لا اعلم و لا افهم شيئا عن تلك المعاني في ذلك الوقت..

و لا افهم ايضا سوى انني فارقت روضة اخوتي و اصحابي الى غير رجعة، و انه وجب علي الحضور يوميا لهذا المكان الجديد، الذي اخذني احد المعلمين الى الفصل قائلا لمعلم آخر "دا حفيد مفتش التعليم اهتم بيه مع اخوانه ديل"..

كذلك وجب احترام و تنفيذ رغبة و اوامر ذلك الوالد الحنون، الذي اتى بي لهذا المكان و انصرف في سبيله، تاركا في جيبي شلنا او ريالا، و غارسا في دواخلي اطمئنان و تحفيزا و رغبة في العلم و المعرفة لا تقدر بثمن، ربما لم افهمها في ذلك الوقت المبكر، و لكنها نمت و ترعرعت في مسيرة الايام، و كانت الدافع الرئيسي في مواصلة كل المشاوير و الخطاوي فيما بعد ..

كان اليوم الاول طويلا و مليئا بالارتباك و الغموض، و غريبا برؤية وجوه جديدة و اختلاف عوامل الزمان و المكان و تغير السائد و المعتاد ،، و لكنه لا يخلو من فرحة و دهشة، و تباين مشاعر مختلفة من غبطة و سرور و خوف و رهبة و قلق.. و في طابور صباح اليوم الاول هذا، بدأت الامور تتسهل و بدأ القلق في الزوال، برؤية بعض ابناء الحي، و بعض أصدقاء الروضة، و بعض الاهل و الاقارب و المعارف، و صادفنا و زاملنا بعضهم في نفس الفصل ..

و هكذا بدأت و تشكلت النواة الاولى في مسيرة العلم و التحصيل، و تنمية و صقل القدرات و الهوايات، و بدايات تشكيل الشخصية و انطلاق مسيرة الفهم و التعامل مع الحياة، و بداية معرفة و تكوين و انشاء الاصدقاء و الصحاب الجدد ..

و من الاشياء التى لا تنسى في ذلك اليوم ، السبورة و الطباشير و المساحة ، حاجات الفول و التسالي، و القونقوليز و قراصة النبق و حلاوة شعيرية، و حلاوة عكاز، و اكياس الداندرمة، و العرديب ،و جرس المدرسة، و علم السودان و نشيده، و صوت العصافير تغرد في الاشجار، و الف باء تاء ثاء .. و بعض زملاء الصف الاول سيف اليزل خليفة بابكر ، فيصل عباس فضل ، نادر عبد الحفيظ، سليمان عبد الباقي محمد ، عماد عبد الحميد، نادر عبد العزيز ،اسماعيل عبد الحي ، عثمان علي البصير، الهادي قنجاري ، عمر عبد العزيز حسن، بطرس لبيب يوحنا، المرحوم سعد محي الدين ، و المرحوم ياسر نصر الحاج علي طيب الله ثراهم ..

فيصل سعد
08-09-2009, 06:26 AM
مشاعر

صادق هواي في ريدك
حائر فؤادي و شاكي
هائم في بحر امواجك
ما لاقي الا جفاك
ياهو السفر خلانا
سارحين دوام في تباكي

راجين الامل يطرانا
رغم الظروف القاسية
و تتحملي و تتناسي
كل لحظات جافية
الفرحة تغمر قلبك
طيبة و مشاعر صافية
و كل لحظة ندية
تغشاك بهجة و عافية
تضحك معاك الدنيا
و تبقى زيك وافية

فيصل سعد
القاهرة 1984


حسرة

المسافة البينا طالت
و زادت الاشواق في بعدك
و الليالي الفينا سادله
صحت الآهات زمن

نحنا شلناك و رحلنا
و كم تعبنا كتير بسهدك
الا ذكراك و عهودك
صبرونا سنين شجن

ليه تجافي و تقسي انت
تهجرينا تقلي ودك
و نبقى في حسرة ضياع
رماد حريق يزداد محن

تهنا في الدنيا و عذابها
سألنا بس ما لقينا ردك
حتى احلامنا الزمان
ضاعوا من الجور سهن

فيصل سعد
ابوظبي 1988


فجر الحنان

عيونك لما ترحل بي
تسوقني تمشي بعيد
بسافر ليها بالآهات
حاضن هواي و سعيد
يا فجر الحنان غيرك
ما اظني تاني بريد

انا من زمن ولهان
و بخيالي سرحت
راجيك يوم ما تطل
و انا ياما اتحملت
شوفتك زوال آلامي
و بالبهجة اتوسدت

يا روح الامل جاوب
اشفي كل جراح
سيب الدلال و تعال
خلي الهموم تنزاح
و بحبنا نغرد
كالبلبل الصداح

فيصل سعد
العين 1997


مودة

بدلي الاشواق في ريدنا
بحنان رقة مشاعر
صحي ناعسات امنياتنا
في لهفة الطول مساهر
لمي احزان السنين
عطريها شذى الازاهر
يا مودة في ريدنا سامية
ماضي مستقبل و حاضر

قلبي تتشتت هواجسه
و يرجع احساسك يكون
بالاماني و بالتهاني
ضجة في صمت السكون
تملأ دنياي ابتسامتك
تبقى زاهية بكل لون
و انت تغمري قلبي فرحة
و تسعدي الروح و العيون

فيصل سعد
لوس انجلوس ، 1990

فيصل سعد
08-09-2009, 06:58 AM
ذكريات في سيرة الغربة و الترحال
خططناها سنة سنتين ، الآن دقت فوق العشرين،
و اصبحت هجرة، و ربما "ون وي ترافيك" و الشكية لله

والدنا الراحل كان يعمل بالكويت 1980 - 1986 هاجر و الاسرة ما عدا اخوكم، الطالب المجتهد في ذلك الوقت، و كنت ساكن مع جدي و حبوبتي في بيت المال، و بزور الاهل و بزوروني في الاجازات، حسب التساهيل،، المهم تخرجت 1983 من الخرطوم القديمة و كسحت الكويت، و قلت للوالد انا القراية دا حدي معاها هنا، و ساعدنا بوظيفة و كدا، قال نجوم السماء قراب، المهم بعد نقة، رجعت امدرمان، و من هناك جدي كسح بي القاهرة، و شربكني في معهد كومبيوتر سنين و معتمد و بروفشنال، تابع لاكبر هاردوير مانوفاكشرور في ذلك الوقت (IBM) و ربما حتى الآن في هذا القلوباليزم،،

قضيت سنتين تلاتة زي السم في قاهرة المعز، خلصت و ظرفت شهاداتي بعد الاعتمادات و التوثيقات، و يا الكويت جاك بلاء، فتحنا الموضوع تاني مع الجلك، و العزيز الراحل لاوز بالدبلوما و قال ما كفاية، "اللهم طولك يا روح" ، و استرسل و اشار انه مافي خبرة عملية و السودان اولى بالجهد و العطاء، و البلد و ناس البلد، و طين البلد و تمر البلد، و طير البلد و كل ما في البلد بيحتاجوا علمكم و شبابكم، و يجب ان تناضلوا القهر و البطش المايوي، و تساهموا في الحرية و انارة دروب العتمة و التيه والضلال، و ما في سبب لاغتراب و هجرة الشباب، و خش لينا في مليون تفصيلة و سالفة، شيئ واقع لينا و مفهوم و مستدرك، و اشياء كثيرة فوتناها بالصمت و التبلم و هزة الراس و الموافقة بالايجاب.. قضيت ايام اجازتي معاو و مع امي و اخواني ، و رجعت امدرمان خشمي ملح ملح، و فاقد تركيز و توازن و ملخوم و حالتي تحنن الطير..

بواسطة عم عزيز و غالي ، تم قبولي و تعينت بارت تايم و متدربا بكمبيوتر الهيئة القوميةالكهرباء و المياه بماهية 280 جنيه في الشهر، متكيف و مبسوط و متجدع و متشرشح بمزاج، كورة و سينما و مسرح و قاعة صداقة و جرين فيلدج و معارض و رحلات و بحر و صيد سمك و قعدات للطيش :D:D و ما خلينا لا حنة لا صبحية لا قيدومة ما كتلناها، كذلك دخلنا اتحاد الشباب و ساهمنا في طباعة و توزيع بيانات و منشورات المعارضة الجادة و الرصينة الله يطراها بالخير، و تلمسنا دروب و مسالك المعارضة الوطنية السرية الجادة و المنظبطة و العميقة.. رغم كل ذلك الزخم ظل هاجس الاغتراب و الدولار ابصلعة باقيا في الضلوع و الراس، و مأجلا مؤقتا الى حين..

جدي الله يرحمه برضوا، كنت مريحوا تمام الراحة، مراسيل و صفوف بنزين، و صفوف عيش، و جير و بوهية، و سوق خضار و متكيف مني شديد، و عارفني داير افرتق من البلد و واقف معاي داعما و مساندا للطيش، كلم ولده الكبير (خالي) في امارة ابوظبي و قال ليو ود اختك دا شوف ليو طريقة سوقوا معاك يكون نفسة، و رسل ليو زيارة و تذكرة في اقرب فرصة، و الخال وعد خيرا، و نفذ وعده فيما بعد تماما و زيادة ، قلت لجدي الوالد حيرفض الاغتراب و انت عارفو، قال لي ما تقلق و ابوك انا بقنعه ليك تماما، و قدامك بالتلفون دا حتسمع باضانك دي و بديك موافقة فورية،، المهم في مساء صافي و بعد جو مغيم و ممطر اتصلنا انا و جدي بالوالد في الكويت و بعد السلام و التحايا دار شيئ كهذا الحديث بين والدي و جدي :

- الصحة و الاحوال و كيفكم كلكم.
- بخير و في امان الله كيف انت و العقاب.

- الحمد لله مافي عوجة تب بس الرطوبة شديدة الايام دي.

- ان شاء الله المصاريف بتصلكم في انتظام و مكفية و مغطية معاكم.

- لا تمام جزاكم الله خيرا، و نحمد فضله و نشكرة، مانا محتاجين حاجة تب، و ما تتعبوا و ترهقوا نفسكم و ما تنشغلوا بينا كتير.

- مافي تعب و لا حاجة و دا اقل من الواجب يا حاج.

- كيف الاولاد و امهم و مدارسهم و باقي الاهل المعاكم.

- لا تمام كلهم بخير، ابن الكلب داك ان شاء الله كويس و ما مغلبكم و كدا ؟


- لا كويس ، لكن من ناحية مغلبنا مغلبنا و انا ضارب ليك بسببو

- استر يا رب،، مالو المرة دي ان شاء الله خير.

- الايام دي قاعد مباري اهلنا السدنة ديك، و طالع و نازل معاهم، و انا لاقيت ود خالي الوزير و ود عمك الوزير التاني داك في اكتر من مناسبة، و لمحوا لي انه عندهم تعينات و ترشيحات جديدة في مناصب في الخارجية و الجهاز و الاتحاد الاشتراكي و ولدنا دا مختوت في راس القائمة و اسمه في اول الكشف و الريس صدق عليه، و المسألة مسألة وكت .

- النظام في آخر ايامه و بقى يتخبط و كمان داير يورط الشباب ديل، و دي مسرحية و محاولة تجميل صورتهم القبيحة و قذارتهم و وحشيتهم و فسادهم، ما كفاية طفشونا نحن، كمان دايرين يضايقونا في اولادنا، اها و هو رايو شنو ؟؟

- يظهر و الله اعلم هو ما عنده علم بالموضوع دا، لكن الناس ديل انت عارف مغرياتهم خطيرة، قروش و عربات، بذخ و صرف مفتوح، رشاوي و بلاوي زرقاء، و قمة الفساد و الرشوة، و المقاومة صعبة لشباب في سنهم .

- الغريبة انا عمه بديني عنه معلومات ممتازه في شغله، و نشاطوا و انه زول مسؤول و منظبط و محترم و قلبو حار و زول خير.

- عمه ما قال ليك الا الحقيقة ، و هو كذلك، لكن انا ضارب ليك اشاورك في المعلومات السمعتها من ناسنا ديك و نتشاور .

- و الله دي عوجة لو حصلت، انت رأيك شنو ؟

- و الله انا عملت احتياطات قبل ما اضرب ليك، و كلمت خالو في ابوظبي و رسلت ليه شهاداته و اوراقه و جوازه، و شرحت ليو بدون اي تفاصيل، يساعد الزول دا باي طريقة، و وعد خير ..

- احسن حاجة عملتها يا حاج، لكن انا بفتكر نطفشوا من البلد دي و انا بجيبه يقعد معاي هنا مؤقتا ، بدل ما يتورط مع الناس ديل و ما يقدر يتخارج .. كدي لو هو موجود اديني اكلمه ..

- جدا ، دقيقة واحدة ، و ما تشيل هم ربك بسهلها و بعين، و ناس مايو الرمم ديل ولدنا دا يشمو قدحة ..

- السلام عليكم يا بوي كيفكم ان شاء الله طيبين .

- اهلا و سهلا كيفك و كيف احوالك، و احوال اهلك و كيف شغلك.

-كلهم بخير و يسلموا عليكم، كيف امي و اخواني

- تمام، منتظرينك تجيهم زيارة، انا حأرسل ليك التذكرة و التأشيرة على الخطوط الكويتية
بعد بكرة، استلمهم و احجز و اركب تعال الاسبوع الجاي اخد ليك شهر شهرين معانا .

-جدا مافي عوجة، بمشي ليهم بعد باكر، و بحجز بعد اسبوعين و بجيكم ان شاء الله

- اسبوعين لشنو، ما تجي الاسبوع الجاي .

- بس داير احضر جواب اجازة و كمان احضر هلال مريخ على كاس الدوري الممتاز و ارتب اموري و بسافر بعد اسبوعين ان شاء الله.

-و هو كذلك، سلم على جدك و حبوبتك و خيلانك و خالاتك و اعمامك و عماتك، سلام

- و عليكم السلام، في امان الله ..

شكرت جدي لدعمه و عونه و حكمته، وغادرت انا للكويت، ثم الى ابوظبي بعد وفاة الوالد موظفا محترما بمزاج :D:D،، بعد زوال النظام المايوي، جلسنا انا و ابي و جدي و تطرقنا لهذا الموضوع كذكريات و ونسة عابرة، و تفاجئت انا بان الموضوع لم يكن دعما و مزحا او كذبة بيضاء من جدي العزيز، بل كان حقيقة و واقع معاش في تلك الفترة، مما زاد احترامي و عرفاني و وفائي و اكباري لهذين الرجلين العظيمين رحمهما الله و احسن اليهما ..

منال
08-09-2009, 07:58 AM
ود سعد مرحبتين

البدايه فى الديم شرق ... فكيت الخط فى الديم

ديامى

سيرة مليانه حكى وذكريات


عاين يا فيصل بطلب منك حكى عن الغنا السمح ... ولمن تجيب الاغنيه اربطها لينا مع ذكريات و حكينا ياسلام يا فيصل ... سمعتم الفن فى زمن الجمال و النغم والشعر .

بعدين ما تدس خربشة حروفك المترعه دى نزلها هنا


تخريمه
ما بقطع الخيط المنضوم ... لكن بجيك اخستقك بث :D:D

مودتى

فيصل سعد
08-09-2009, 08:05 AM
ود سعد مرحبتين

البدايه فى الديم شرق ... فكيت الخط فى الديم
ديامى
سيرة مليانه حكى وذكريات
بعدين ما تدس خربشة حروفك المترعه دى نزلها هنا
تخريمه
ما بقطع الخيط المنضوم ... لكن بجيك اخستقك بث :D:D
مودتى

وين لقيتك لامن اباك،
خستقي يا بت قشة ما تعتر ليك،
قلتي لي المنقة كيف،
احب العصير زاتو :D:D

بعدين يا منو لون زينب
البتكتبي بيو دا، عامل لي طشاش
و مجهجهني في رمضان وكدا،
لون شديد و انت ذاتك شديدة :D:D

عكــود
08-09-2009, 08:22 AM
التحيّة للحبّوب أبي أماني.
إستمتعت فعلاً بالبوست الرويان . .
بحروف خالد . .
رشاقة يراع النور وغزير تجاربه . .
مداخلات الأعضاء . .
وقيادة أبو أماني السلسة للبوست.

والآن . .
مع حبيب الجماهير سعدنا الفيصل،
أترك نفسي يا فيصل مع إنسياب وتداعي ذكرياتك والخواطر . .
فأنت رجلٌ وفيّ، مُرهف وصادق.

بس جاييك بالأسئلة لي قدّام،
هسّع أُخد راحتك يا حبيب.

تسلم ويدوم صفاك.

ألف باقة حب لأبي أماني.

فيصل سعد
08-09-2009, 08:36 AM
مرحب بعمدة الديار
و حارسها الامين،،
مرورك و طلتك تفرح،
و تسعد، و قطع شك تبهج ..

في انتظارك و انتظار اسئلتك
و التداعيات و الخواطر كملت تب ..
ايها الاخ العزيز الاكرم ..

ودي و اعزازي ..

خالد الحاج
08-09-2009, 10:15 AM
دي رحلة عمر والله يا فيصل..
ممتع الحكي عندك ..
بجيك بي مهلة ..

فيصل سعد
08-09-2009, 10:32 AM
ماك محتاج
شكر يا خال،
لكن طلتك
تكيف 24 قيراط،
و تفك خرمة سنين،،
و في رجاك ..

عكــود
08-09-2009, 11:08 AM
جيتك تاني يا فيصل ما دام أدّيتني الضوء الأخضر.

تجربتك مع مؤسّسية سودانيات،
ما لها وما عليها؟
ما هي الأشياء التي يجب:
1/- تركها؟
2/- البدء بالعمل بها؟
3/- المحافظة عليها؟

أسألك هذه الأسئلة وأنت قد عاصرت دورتين مشاركاً فعّالاً في منظومة الإدارة كمشرف على منتدى الحوار.

رغم جدّية العمل في الإشراف والصبغة الرسميّة له، لكن لا يخلو الأمر من المواقف الطريفة، هل قابلتك؟

مع تحيّاتي.

معتصم الطاهر
08-09-2009, 12:13 PM
بصراحة
وانت مشرف من هم الذين تقرأ لهم و فى بالك ( استيكة) ...


ثانيا
ومهم جدا

الشواكيش .. من الخرطوم القديمة حتى القاهرة ..

فيصل سعد
08-09-2009, 12:22 PM
جيتك تاني يا فيصل ما دام أدّيتني الضوء الأخضر.

تجربتك مع مؤسّسية سودانيات،
ما لها وما عليها؟
ما هي الأشياء التي يجب:
1/- تركها؟
2/- البدء بالعمل بها؟
3/- المحافظة عليها؟

أسألك هذه الأسئلة وأنت قد عاصرت دورتين مشاركاً فعّالاً في منظومة الإدارة كمشرف على منتدى الحوار.

رغم جدّية العمل في الإشراف والصبغة الرسميّة له، لكن لا يخلو الأمر من المواقف الطريفة، هل قابلتك؟

مع تحيّاتي.


مرحب بيك سعادة الامين العام، و شكرا لعودتك و يدك ملانة تب
و بخصوص هذه الاسئلة، اجيبك بكل شفافية و وضوح كما يلي:

طبعا انا لا يمكنني التقييم منفردا، و لكن اديك رأي و وجهة نظري الخاصة،
تتحمل الخطأ و الصواب، و لكن قطع شك لا تأتي من فراغ و عبث :

تجربتي مع مؤسسية سودانيات، انها بدأت بمبادرة كريمة من مالك المنبر، بعد ان تفاقمت خلافات كثيرة و متعددة موضوعية و غير موضوعية في كل المستويات (ملاك، امانة عامة، و عضوية) و حدثت هرجلة و شد و جذب و صراعات تشابكت في تلك المستويات، و حدث ما حدث من دمار، ضرب العصب الحي في اوتار هذا المنبر و اصاب دعائم بنيته التحتية.

بذل جهد خارق و عمل جماعي منظم، باض و افرخ و خرج علينا بمشاريع مواثيق و لوائح و قوانين، خضعت لنقاشات مستفيضة و تم تمحيصها و غربلتها في جو ديمقراطي، و بني عليها الميثاق الحالي و متفرعاته من نظم و لوائح .

تبعها ديمقراطية انتخاب مجلس الادارة و الامانة العامة، رغم حداثة التجربة و ضعف العدد الانتخابي (عدد المصوتين) من مجموع العضوية، الا ان المؤسسية ولدت متينة و راسخة و مرنة للتطوير و التحديث.

اقول لك و بالصوت العالي، ان المشاكل و العقبات الادارية في هذا المنبر، ليست في المواثيق و اللوائح و القوانيين و الانتخاب و التصويت، بل في عدم التنسيق الجيد و الاتصال بين مستويات الادارة و الاعضاء و عدم وضوح الرؤية الكافية في الصلاحيات و التضارب في العمل التشريعي و الاستشاري و التنفيذي.

و ايضا هنالك عدم صبر، و تقاعس و ركلسة، و قبول الرأي الآخر ضعيفا، و هناك عدم التزام، و قصر نظر، و ضيق نفس لدى بعض الاداريين الذين تعاقبوا في هذا العمل. هذه هي المعضلات التي تواجه العمل الاداري هنا، و تحتاج وقفة و مراجعة مع النفس، و قطع شك حلولها ليست مستعصية، و لكن يجب توفر ارادة حقيقية و رغبة ذاتية لمواجهتها و تجنبها و تجاوز اخطارها، و المنهج الصحيح يقود للحل الصحيح.

هذه الاخفاقات الادارية، تضعف و تربك دفة العمل، و نضطر مجبرين في احيان كثيرة، بان نتجاوز صلاحياتنا و نقرر و ننفذ خارج مهامنا لاستمرار و تسيير العمل في هذا المنبر، و هذا النهج رغم خطله الواضح وضوح الشمس و البائن للعيان مفروض علينا و غير مفضل و غير مستطاب من جانبنا كمشرفين .

اقول لك هذا الرأي و انا اقدر و احترم صادقا كل الزملاء و الزميلات الذين عملوا و يعملون معنا في هذا المنبر، و اثمن عاليا جهودهم المقدرة و ما بذلوا من وقت و سكبوا من عرق في دفع عجلة هذا المنبر، و انا احرص من اي شخص آخر هنا على ان يكون النجاح حليفهم و التوفيق و السداد نتيجة ما يبذلون من جهود مقدرة و معترف بها و مشهودة.

يجب علينا جميعا اعضاء و ادارة ان نترك الركلسة و غض الطرف و اللامبالاه، و ان نظل اخوة و اخوات و زملاء بحسن نية، و حسن ظن، و قلوب صافية، نتحاور و نختلف بتقدير و مودة، و يجب ان نبدأ بزيادة جرعات المشاركة و الحوار و التواصل، و الله الموفق ..

الجدية في العمل واجبة و ضرورة، و الطرائف كثيرة و متعددة و لكن اكثرها كانت مع ابو اليشا الله يديو العافية و يطراو بالخير و احسن تخليو يحكيها ليك بنفسه ان لم تكن موثقة في البوستات الاولى في منتدى الادارة و نحن برالمة في ذاك الزمان :D:D:D

فيصل سعد
08-09-2009, 12:37 PM
بصراحة
وانت مشرف من هم الذين تقرأ لهم و فى بالك ( استيكة) ...
ثانيا
ومهم جدا
الشواكيش .. من الخرطوم القديمة حتى القاهرة ..

سلامات يا هاش يا باش،،
تلاتة اربعة استيكات اتوماتيك
تنتصب صاحية على الدوام امام
كل من خالد الحاج، بابكر مخير
و محمد ابو عاقلة و الرابعة
خليها في سرك :D:D

بعدين يا فكهاني، انت لو
قاصد استيكة تانية، فاللهم اني صائم و كدا :D:D

اما الشواكيش فحتقضي باقي
يومك حساب و عدد، يا زول
فيهم واحد بسببه اعلنت الاضراب
عن الزواج، لدرجة الحاجة الله
يديها العافية، قالت لي امشي جيبها
ان شاء الله من اديس :D:D

ارقد عافية ..

الجيلى أحمد
08-09-2009, 05:09 PM
متابع وبس
(مؤقتآ) :D

جميل يافيصل

ابومشعل
08-09-2009, 11:00 PM
الاستاذ / فيصل سعد

صباحاتك كلها خير

قبل الولوج في نفق التساؤلات العميقه دعنا نبدأ بمحوري الخرطوم القديمه وابناء بري .
وسؤالنا الاول عن الانهر ابوبكر وعمر وخالد وعثمان ؟ في ايهما كانت سباحتكم ؟
وهل كان لكم علاقة - على اي مستوى كان - بابناء مايو فخر الدين وابن نفيسه محمد ابراهيم او دريج ابراهيم دريج ؟ وحسن عبد المنعم مدير بنك السودان ائنذاك ؟؟ .
ابناء بري عادل يوسف وعادل حسن وعبد السميع اللميع ؟
واستاذ الفاضلابي مدى قربكم منه وطريقته المتميزه ؟
استاذ فتح الرحمن سيداحمد ؟؟


تخريمة : وصلتنا رسالتكم وهى على العين والراس ، ونشكر لكم سعة صدركم وصبركم علينا حتى اوصلنا رسالتنا لهم وكانت النتيجه فتاكة وهي المبتغي والمراد بعد ان جعلناهم كالممسك بالاسد ان جاوره ( وب ) وان اطلقه ( وبين ) .

ولنا عودة .

معتصم الطاهر
09-09-2009, 12:07 AM
فيصل

سلامات

تداخلت المسائل ..عفوا


سؤال ..
هل للعاءلة تأثبر عليك فى مسألة التوجه السياسى ؟

رأيك فى الحزب الشيوعى حاليا

هل يحتاج السودان لحزب جديد بمفهوم وطنى جديد ؟

فيصل سعد
09-09-2009, 10:01 AM
متابع وبس
(مؤقتآ) :D

جميل يافيصل

مرحب يا زعيم
الالفة و المودة،
و بالحيل راجين طلتك
بعد فك المؤقت و المؤقتة و المؤقتات ..
يديك العافية ..

فيصل سعد
09-09-2009, 10:13 AM
الاستاذ / فيصل سعد

صباحاتك كلها خير

قبل الولوج في نفق التساؤلات العميقه دعنا نبدأ بمحوري الخرطوم القديمه وابناء بري .
وسؤالنا الاول عن الانهر ابوبكر وعمر وخالد وعثمان ؟ في ايهما كانت سباحتكم ؟
وهل كان لكم علاقة - على اي مستوى كان - بابناء مايو فخر الدين وابن نفيسه محمد ابراهيم او دريج ابراهيم دريج ؟ وحسن عبد المنعم مدير بنك السودان ائنذاك ؟؟ .
ابناء بري عادل يوسف وعادل حسن وعبد السميع اللميع ؟
واستاذ الفاضلابي مدى قربكم منه وطريقته المتميزه ؟
استاذ فتح الرحمن سيداحمد ؟؟


تخريمة : وصلتنا رسالتكم وهى على العين والراس ، ونشكر لكم سعة صدركم وصبركم علينا حتى اوصلنا رسالتنا لهم وكانت النتيجه فتاكة وهي المبتغي والمراد بعد ان جعلناهم كالممسك بالاسد ان جاوره ( وب ) وان اطلقه ( وبين ) .

ولنا عودة .

حبابك ابو مشعل، نهرنا عثمان
بالخرطوم القديمة 1980-1982
و مرشد الصف كان استاذ النوراني الحاج الفاضلابي
و ناظرنا حسن عبيد و وكيلنا مصطفى عابدين
لهم الرحمة و المغفرة، اما ابناء مايو المذكورين
لم نتعرف عليهم، و لكن جاورنا في الصف صديقنا
عبد الماجد عمر محمد الطيب و كان نعم الاخ و
نعم الصديق، و مدير بنك السودان الذي عرفناه
كان جدنا الاستاذ / محمد علي المحسي المراجع
القانوني و استاذ المحاسبة بكلية الاقتصاد بجامعة
الخرطوم، و في قيادات مايو كان جدودنا زين العابدين
محمد احمد عبد القادر و ابوالقاسم هاشم لهم الرحمة.
و شكرا لتفهمك الرسالة، و شكرا لوجودك هنا و
مشاركتك ..

خالد الحاج
09-09-2009, 10:33 AM
طبعا يا فيصل أنا أقدم رجل وأأخر التانية للتداخل هنا ..
ما عارف ليه لكن تحلو لي الشتارة لما الموضوع يتعلق بيك أو بعكود والباش :)
الديم شرق أتنين ؟
قريت فيها سنة في الابتدائية عندما سكنا الديم لمدة عام ...
وسؤالي ليك يا فيصل ...
بتعرف كشك "يس" بتاع الجرايد ؟
وبتعرف "يس" نفسه ؟:D
الزول ده عندو كشك جرايد تاني .. أي والله .. برضو جوار مدرسة..
في الركن الشمالي الشرقي من مدرسة الخرطوم جنوب 2 المتوسطة ...
ولصق الكبانية :D
بجيك راجع لو قلت لي تعال ..looool

فيصل سعد
09-09-2009, 11:24 AM
فيصل
سلامات
تداخلت المسائل ..عفوا
سؤال ..
هل للعاءلة تأثبر عليك فى مسألة التوجه السياسى ؟
رأيك فى الحزب الشيوعى حاليا
هل يحتاج السودان لحزب جديد بمفهوم وطنى جديد ؟


مرحبا بعودتك
مجددا يا باش:

نعم للعائلة تأثير كبير للتوجه السياسي، انا كثير من جدودي واعمامي و خيلاني وعماتي و خالاتي، اعضاء بارزين و ناشطين في الحزب الشيوعي السوداني، و انا منذ ان فتحت في الصبا الباكر، و في اعتاب سنين الدراسة الاولى، كنت زائرا و مترددا اسبوعيا و مرافقا لاهلنا الكبار رجالا و نساء، لسجن كوبر و عدد من معتقلات البلاد، حاملا الخبز و الشاي و القهوة و الاشواق و الجرائد و التحايا للمعتقلين من اهلنا و رفاقهم، و رضعت مبكرا غبن و كراهية القهر و البطش و جبروت الانظمة الدكتاتورية.

من ناحية اخرى تاريخيا، نحن من اسرة متعددة المشارب الروحية، و ان طغت الختمية عددا، و لكن جدتنا رابحة انصارية من الجزيرة ابا، و جدودنا آل العباس و آل طيب الاسماء انصار و موالين لحزب الامة، و جدودي ابراهيم و عتمان علي يقدرون و يجلون الشيخ محمد الحسن الادريسي، و والدي و اهله ملازمين الهندي و اصدقاء و اهل و رفاق للشريفين الحسين و زين العابدين، و كذلك تجمعنا صلة رحم متينة بشيخ علي عبد الرحمن الضرير، و شيخ ادريس ارباب العقائد جد جدودنا، و على ضؤ ما ذكرت توزع توجه العائلة السياسي بين الامة و الاتحادي و الشيوعي، و كثير من المستقلين، و انا بينهم، و لكن لم نفارق النضال الوطني و دروبه و ظللنا منافحين الظلم، و جاهرين بالحق، و صادحين بالعدل و المساواة، جميعنا حملنا هذا الوطن في حدقات العيون، و ذقنا في سبيل عزته و كرامته، التعسف و شظى العيش و التشتت في المنافي.

انا خرجت من السودان مظلوما و مغبونا، و تعرضنا لمصادرات تاريخية ظالمة و جائرة، و في فجر الديمقراطية طالبنا بحقوقنا، و لم نجد الانصاف، و رفعنا امرنا لرب العالمين موحدين و موقنين في رحمته و عدله و انصافه، و تركنا السياسة و فارقنا دروبها، لانها لم تجلب لنا سوى الهم و الغم، و سقط فيها رجال لنا، بشرف و عفة يد و لسان، ماتوا و رحلوا في صمت و الحسرة تملأ قلوبهم، و قلوبنا من بعدهم، و نسأل الله ان يشملهم بعطفه و احسانه، و ان يجزيهم عنا خير الجزاء، و ان يعوضهم بقدر ما قدموا و اخلصوا و تفانوا في خدمة بلادهم.

بخصوص الحزب الشيوعي حاليا، فهذا امر يهم و يخص اعضاءوه و منتسبيه، و لكن السياسة و كثير من مناحي امور بلادنا المتعددة، اقتصاديا و اجتماعيا و تنمويا، تحتاج الى ترميم و اعادة بناء و هيكلة جديدة، و هذا الدمار المبرمج الذي حدث في هذا العهد الغاشم، ولد مهاما جساما و تحديات كبيرة، تحتاج عزيمة و اجماع وطني، و صدق و اخلاص، و تحتاج همة و تجرد و نكران ذات و عمل دؤوب، من جميع الحادبين على المصلحة العامة للبلاد و اهلها، للخروج لبر الامان، و كيف السبيل؟ هذا هو السؤال الذي يجب ان يتم التفاكر فيه، و التجمع و الالتفاف حوله !!

اطيب التحايا ..

فيصل سعد
09-09-2009, 11:35 AM
طبعا يا فيصل أنا أقدم رجل وأأخر التانية للتداخل هنا ..
ما عارف ليه لكن تحلو لي الشتارة لما الموضوع يتعلق بيك أو بعكود والباش :)
الديم شرق أتنين ؟
قريت فيها سنة في الابتدائية عندما سكنا الديم لمدة عام ...
وسؤالي ليك يا فيصل ...
بتعرف كشك "يس" بتاع الجرايد ؟
وبتعرف "يس" نفسه ؟:D
الزول ده عندو كشك جرايد تاني .. أي والله .. برضو جوار مدرسة..
في الركن الشمالي الشرقي من مدرسة الخرطوم جنوب 2 المتوسطة ...
ولصق الكبانية :D
بجيك راجع لو قلت لي تعال ..looool

سلامات يا خال و حبابك الف،
انا ما بعرف لا ياسين و لا كشكه،
لكن على ما اذكر و نحن في تالتة
و رابعة بنفطر في دكان اللوز ،،
و كشك الجرايد البعرفه كان في السور
الجنوبي الغربي لنادي الاسرة "كشك توتو كورة"
و كان يملكه عمنا سعد احمد عيسي، او "سعد بلنجة"
كما تحلو تسميته، و انا كنت شغال في هذا الكشك
في الاجازة و كدا :D:D

يا زول اظهر و ما تنقطع، و لو ناوشت تاني، جيب
معاك قصة بتاع المواتر في سوق الموردة !!
ولا ادينا اضاءة في قعداتكم في الديم،
لما كانوا بغنوا ليك سخسيا و كدا :D:D

فيصل سعد
09-09-2009, 12:11 PM
عد فات زمن العيون
الالفة و الحضن الملاذ
و رهافة الحس البلون
ضحكة الناس العزاز

الراحل مصطفى سيد احمد،
و الشاعر المرهف صلاح حاج سعيد،،

اهداء للاحباب هنا،
و كل عام و سودانيات و انتم بخير..

http://sudaniyat.net/up/uploading/adda_faat.mp3

أبو أماني
09-09-2009, 03:19 PM
هيا يا الحبيب .. فوفو .. غرد .. وأفرد جناحيك فالفضاء والفناء كليهما ملكك الحر .. طوف عل بيت المشرف بكوريا ومنه خرم على أبي حشيش زمان .. قاطع أرجع على المحس .. قابل عبد الله موية .. والمرحوم عبد الله لوفت .. تعال راجع كوريا قابل أبناء عوض الجولط بقوا رجال ملئ البصر .. أدقش الدرائسة محل دكان الطيب الجعلي تلقي المرحوم شريف عنطوز يحمل صفيحة السحور وتحيط به سبعة ثمانية كلاب سيامية (الحكاية مش كدايس بس) واصل يا مبدع .. وشنف الآذان بما قال أهلك ناس زمان وأأأأدي .. على قولة العزيزة أمال .. (تكية)!
gooodgooodgoood

احمد زين
09-09-2009, 04:23 PM
أخي فيصل
الآن فقط عرفت انه لك الحق في ترشيح نفسك ضيفا على مائدة سودانيات
الحكي جميل وسلس ونتابعه باهتمام وما لفت انتباهي حكاية الغبينة المرقت بيها من البلد دي
وهناك سؤال مهم وهو
علاقة فيصل بالريف السوداني شنو ؟ لانو الملاحظ حتى الآن فيصل من بري الى قطر الى امدرمان والامارات وهكذا

فيصل سعد
09-09-2009, 04:47 PM
علاقة فيصل بالريف السوداني شنو ؟ لانو الملاحظ حتى الآن فيصل من بري الى قطر الى امدرمان والامارات وهكذا

حبابك يا ابو حميد
و نهارك فل،،

الريف السوداني مطبوع و متحكر في الضلوع،
كيف لا ؟ و نحن ترعرعنا مع اهل كرام، في
فيافي البشاقرة و العديد و التكلة و التكينة، و الجزيرة
و كسلا و القضارف ..

كذلك امدرمان و بري و توتي لم تخلو من نزعات ريفية،
و رغم دخول المكننة و التكنلوجيا،
ظلت اخلاق و ثقافة و مشاعر اهلها تغوص
في بصمات و ملامح و عبق الريف و مشرئبة
من نفاحته جيلا بعد جيل .

يديك العافية..

فيصل سعد
09-09-2009, 04:53 PM
هيا يا الحبيب .. فوفو .. غرد .. وأفرد جناحيك فالفضاء والفناء كليهما ملكك الحر .. طوف عل بيت المشرف بكوريا ومنه خرم على أبي حشيش زمان .. قاطع أرجع على المحس .. قابل عبد الله موية .. والمرحوم عبد الله لوفت .. تعال راجع كوريا قابل أبناء عوض الجولط بقوا رجال ملئ البصر .. أدقش الدرائسة محل دكان الطيب الجعلي تلقي المرحوم شريف عنطوز يحمل صفيحة السحور وتحيط به سبعة ثمانية كلاب سيامية (الحكاية مش كدايس بس) واصل يا مبدع .. وشنف الآذان بما قال أهلك ناس زمان وأأأأدي .. على قولة العزيزة أمال .. (تكية)!
gooodgooodgoood

العزير ابو اماني، شكرك واجب
و مستحق، و جهدك مقدر في
اركان هذه الديار، لك و لاسرتك
اطيب التحايا، و عميق الوداد
و المحبة، و الحقنا بعد كدا
بالضيف الرابع، اذ وصلنا الى
المحطة الاخيرة في هذا المشوار
الحميم، مجدد الشكر و التقدير
لك و للجميع هنا، و كل عام و
انتم بخير،، و في امان الله ..

أبو أماني
10-09-2009, 02:54 PM
العزير ابو اماني، شكرك واجب
و مستحق، و جهدك مقدر في
اركان هذه الديار، لك و لاسرتك
اطيب التحايا، و عميق الوداد
و المحبة، و الحقنا بعد كدا
بالضيف الرابع، اذ وصلنا الى
المحطة الاخيرة في هذا المشوار
الحميم، مجدد الشكر و التقدير
لك و للجميع هنا، و كل عام و
انتم بخير،، و في امان الله ..



حليلك يابا .. هوا طلوع الحمام زي دخولو ؟؟ ده أحنا ماشفناش حاقة لسه ياراقل .. أمال فين الجيكس اللي كان عامل للحاقة سميرة ..مالنخوليا .. خالتي سميرة خالتي سميرة .. وين فيصل؟ .. أمي قالت لي أمشي لفيصل سعد يدرسك .. وأياميها كان أبو الفياصل مقدد ليو ماده كدي ومجضمها تمام .. التقول على رياضيات .. المهم باب الشارع ببري كوريا مابقيف من الخبت .. فيصل في .. والشاب كان لذيذوني ومسمسم .. أعمل حسابك كلمة مسمسم دي بتجيب ليك هواء مع عمك فتحي مسعد .. المهم يافردة ..ما تتذاكى على فطاحلة سودانيات .. الله يطول عمرك يا سارة والله عاجباني عجب .. أظهر وبان عليك الأمان وهات ما في الجراب يا حاوي .. قال يكب الزوغة قال .. إذا كان وقفنا ليك الغفير جمب الباب الشفيف (الرهيف) طارق الحسن .. شيل شيلتك ..تشاوووووgoood goood goood

فيصل سعد
10-09-2009, 08:11 PM
ابو اماني بطل تهويش، و ما تقعد تأدرس لينا
بقطعك الاخدر دا و قنابلك و داناتك المفبركة :D:D
الكع هات الضيف الرابع، و انا برشح ليك رأفت ميلاد،
مع انك ما تستاهل و كدا :D:D

تحياتي يا ملك ملوك عصر الجمال ..

منال
11-09-2009, 08:28 PM
فيصل ازيك

دقيقه ماشى وين لسه بدرى و الغنا وين ... سالنا وتانى نبدا نخستقك

ود سعد فى لغة تداول بين الشباب كدا منها عبارات بستخدموها لمن تكون .... :D;)
ماها راندوك

منها يقول ليك الزول ده عندو جرادة
شليل = عندو جرادة كبيرة (هو عارف)
ود سعد = جرادة متوسطة

وتانى بقولو ( ده زول عندو كاك كبير)
المطلوب ان تختار خمسه من ( منتدى سودانيات ) العندهم جرادة
و عشرة من العندهم كاك


وبمناسبة الغنا و لكن ما هزيت الجراب لسه
سميرة دنيا غنت
اغالب دمعى و اتصبر و اقول يا الله صبرنى على فراقك يا اغلى الناس

اغلى الناس و الفراق ( بالحياة يا ود سعد) كدى ورينا الفراق


فيصل ما تكب الزوغا انت ضيف اصبر شويه
مودتى

فيصل سعد
11-09-2009, 09:22 PM
المطلوب ان تختار خمسه من ( منتدى سودانيات ) العندهم جرادة
و عشرة من العندهم كاك

اغالب دمعى و اتصبر و اقول يا الله صبرنى على فراقك يا اغلى الناس
اغلى الناس و الفراق ( بالحياة يا ود سعد) كدى ورينا الفراق



سلامات يا منو ، و خلي بالك انت دايرا
تجيبي لينا مشاكل و تعملي لينا
حيصبيص :D:D و كدا ، و ناسك
ديل زمنا كنا بنقول "عندهم طيرة"
او سحلبة او مبادئ جنكرة
على خفيف شعرة و سبيبة كدا، و
المرحلة الثانية انك تفط سطر
او سطرين ثلاثة و كدا .. ادينا انت
خمسة من حبايبنا هنا و انا بكمل
ليك الخمسة الباقيين و انا و انت
و شليل برة الحساب و كدا :D:D

الغناء جاييك في الطريق، بالنسبة لاغالب دمعي و اتصبر
سميرة جضمتها تمام، و لعلمك الاغنية كتبها الراحل
عوض جبريل لكمال ترباس و مصنفة من اجمل اغنياته..

قلتي لي ضيف ؟؟
ضيف وين و المضيف
يفلق و يداوي، لكن انت و
هو تلقوها عند الغافل ..
و بالمناسبه هو ذاتو جرادو طن :D:D


كوني بخير ..

طارق الحسن محمد
11-09-2009, 09:54 PM
أبو أماني ياخ فكرة عظيمة كما عهدناك


بس



لو



بديت لينا بالناس السينغل goood
https://www.ruready.net/RUReady/images/misc/hand_point_up.jpg

طارق الحسن محمد
11-09-2009, 10:05 PM
طبعا يا فيصل أنا أقدم رجل وأأخر التانية للتداخل هنا ..
ما عارف ليه لكن تحلو لي الشتارة لما الموضوع يتعلق بيك أو بعكود والباش :)
الديم شرق أتنين ؟
قريت فيها سنة في الابتدائية عندما سكنا الديم لمدة عام ...
وسؤالي ليك يا فيصل ...
بتعرف كشك "يس" بتاع الجرايد ؟
وبتعرف "يس" نفسه ؟:D
الزول ده عندو كشك جرايد تاني .. أي والله .. برضو جوار مدرسة..
في الركن الشمالي الشرقي من مدرسة الخرطوم جنوب 2 المتوسطة ...
ولصق الكبانية :D
بجيك راجع لو قلت لي تعال ..looool

يس

الممرض ايضا

وردية ليل
فى مستشفى العيون

ووردية صباح

قى المكتبة

( راجل طيب والله )

:D :D :D

http://www.abunawaf.com/store5/jd5.jpg

معتصم الطاهر
11-09-2009, 10:16 PM
فيصل

" سودانيات " فقدت أقلاما مميزة .. وأصدقاء نعزهم و أحباب نريدهم

و أنت فى نهاية دورة .. ما دورك فى اعادة استكتابهم ..!!

طارق الحسن محمد
11-09-2009, 10:28 PM
سلامات يا خال و حبابك الف،
انا ما بعرف لا ياسين و لا كشكه،
لكن على ما اذكر و نحن في تالتة
و رابعة بنفطر في دكان اللوز ،،
و كشك الجرايد البعرفه كان في السور
الجنوبي الغربي لنادي الاسرة "كشك توتو كورة"
و كان يملكه عمنا سعد احمد عيسي، او "سعد بلنجة"
كما تحلو تسميته، و انا كنت شغال في هذا الكشك
في الاجازة و كدا :D:D

يا زول اظهر و ما تنقطع، و لو ناوشت تاني، جيب
معاك قصة بتاع المواتر في سوق الموردة !!
ولا ادينا اضاءة في قعداتكم في الديم،
لما كانوا بغنوا ليك سخسيا و كدا :D:D

نحن في تالتة
و رابعة بنفطر في دكان اللوز
دكان محمد اللوز ناصية ويفتح شرق وفى الزاوية الــ مقابلة له عكسيا
دكان عمك عبيد وفى نفس صف دكان عمك عبيد الطاحونة وهى البتفتح مباشرة فى باب مدرسة الديم شرق 4 الابتدائية للبنات

كشك يسن
ملاصق لسور مدرسة البنات الابتدائية من الناحية الغربية والاقرب لمدرسة الديم شرق 1 ( مدرسة الزبالة )

كشك يس
التانى فى الركن الشمالى الشرقى للمعهد المواصلات السلكية والاسلكية ومواجه لركن حديقة القرشى الجنوبى الغربى

شفت الجغرافيا هنا كيف يا فيصل
تخريمة :
فى حالة غياب يس عن المكتبة بتاع مدرسة الديم
يحل محله ( ويقوم بكل واجبته ) زول طويل ذو شنب كث اسمه سليمان
وبــــــــــــــــــــــــــــــــرضو عنـــــــــــــــــــــــده عجلة
تحياتى يا جميل

فيصل سعد
11-09-2009, 10:35 PM
ما شاء الله يا سنغل :D:D
و عيني باردة ..

سلام يا جميل ..

فيصل سعد
11-09-2009, 10:39 PM
فيصل
" سودانيات " فقدت أقلاما مميزة .. وأصدقاء نعزهم و أحباب نريدهم
و أنت فى نهاية دورة .. ما دورك فى اعادة استكتابهم ..!!

سلامات يا صديقي، و الله يدينا اجر المحاولة،
لكن الحرنة كانت تقيلة ، و رغم ذلك الناس
تحاول للم الشمل، و احترام من قرر الخروج
دون عودة .. و تبقى سودانيات منبرا حرا و عالم
من المودة و التواصل ..

تحياتي ..

فيصل سعد
12-09-2009, 06:17 AM
وبمناسبة الغناء و لكن ما هزيت الجراب لسه،
سميرة دنيا غنت :

اغالب دمعى و اتصبر
و اقول يا الله صبرنى
على فراقك يا اغلى الناس

اغلى الناس و الفراق ( بالحياة يا ود سعد) كدى ورينا الفراق



اهداء للعزيزة/ منال، و فعلا فراق الموت
بتلاك باليقين و الايمان صبرا و احتسابا، و
فراق الازمنة و الامكنة بتباصر بالامل شوقا
و حنينا و اتياع،" فراق الزين و نار البين
حموني النوم و انا مساهر" و لكن الكعب جد
فراق الزول و هو قاعد جنبك و الشكية لله..

http://sudaniyat.net/up/uploading/agalib.mp3

منال
12-09-2009, 08:23 AM
سلامات يا منو ، و خلي بالك انت دايرا
تجيبي لينا مشاكل و تعملي لينا
حيصبيص :D:D و كدا ، و ناسك
ديل زمنا كنا بنقول "عندهم طيرة"
او سحلبة او مبادئ جنكرة
على خفيف شعرة و سبيبة كدا، و
المرحلة الثانية انك تفط سطر
او سطرين ثلاثة و كدا .. ادينا انت
خمسة من حبايبنا هنا و انا بكمل
ليك الخمسة الباقيين و انا و انت
و شليل برة الحساب و كدا :D:D

كوني بخير ..

هههههههههههه
لقيتك زغبير لكن gooodgoood

و البركة الجات فينا ثلاثة الهلال امس دى (منو - التنقوش و فوفو) و ما بغير لون زينب للموج الكاسح و الرد كاسل نخلى لناسو و عااااااارفين الجرادة حااااااايمة و شليلنا لابد فى رمضان

و نعفيك ياخى ونحول السؤال لفتحى مسعد (ابو امانى خليك صاحى)

ادخل من خمسة فى عين العدو ولهم التحيات
ديل العندهم جرادة

الجيلى احمد - مرافئ- رشا حاتم - ابوى -عبدالجليل loooolloooollooool

ود الشيخ
وكت انبلبلتا اخير تعوم loooolloooollooool

وتقولو كلو

وبجى اطمجك بس

الغنا ... الغنا
ناس الربا ديل

http://sudaniyat.net/up/uploading/Sm3na_com_aziz_ghonay.rm

فيصل سعد
12-09-2009, 09:29 AM
ادخل من خمسة فى عين العدو ولهم التحيات ديل العندهم جرادة :
الجيلى احمد - مرافئ- رشا حاتم - ابوى -عبدالجليل loooolloooollooool

ود الشيخ
وكت انبلبلتا اخير تعوم loooolloooollooool
وتقولو كلو
وبجى اطمجك بس




و الخمسة الباقين من ناس الجرادة، هم كما هو معلوم مسبقا
"اوبفيوسلي " و كدا :D:D :

هاشم و عادل و طارق و فخري و ابو ريم ..

لهم عاطر التحايا
و كثيف الشوق
و عميق المودة ...

و السلام عليكم،
و العفو و العافية،
و في امان الله ..


http://sudaniyat.net/wadosman/uploading/tagog.wma



و نهديكم جميعا
لحن الختام
" تاجوج" كجراي/وردي ..

قليبي المنو اصلو شقاي ريدي
يزيد الهم علي يسفح وريدي
بيعشق بالألم نبرة قصيدي
دي تاجوج ما اتلقت يا خملة زيدي

تمر المحنة زي ضل السحابة
حروف اسمك نغم يسبي الغلابة
حروف اسمك بشارة خير حبابة
حروف اسمك حليفة و نار صبابة

مع الأيام يزيد حسنك نضارة
عشان عينيك تخضر الصحارى
بوصف ليكي ألحان العذارى
نعيش باقي العمر في الريد سكارى

نخوض بحر الهموم نبحر نعدي
نقابل بالثبات موج التحدي
سنين العمر تاخد وما بتدي
ودربك لشواطئ النور يودي

منال
12-09-2009, 10:14 AM
اليك و الكلام الجارى

لافوق ده

يا فيصل بحازول فى اغنية الشغالين فؤادى و سميرة دنيا
ما اترفعت
غايتو اقبلا العيديه ودى جغمسه

ÇáãáÝ ãæÌæÏ ãÓÈÞÇ

أبو أماني
15-09-2009, 09:37 AM
كلامك أوامر يا ملك .. بس على شرط تختار لينا واحد سينغل مدنكل كده ونحن معاك .. يلا يا الحبيب ود سعد قرررب يودع .. لك معزتي ...goood

فيصل سعد
15-09-2009, 10:14 AM
حبابك ابو اماني ، و اقبض قوي في رأفت ميلاد
اهو قاعد اونلاين ، و لك للجميع هنا وافر الشكر و
التقدير، و نرحب بالعزيز رأفت ميلاد ضيفا عزيزا على
هذه النافذة و نبدأ معك بنبذة عن السيرة الذاتية ، فاهلا و
مرحبا بك ضيفا عزيزا كريما و تفضل ...

طارق الحسن محمد
16-09-2009, 06:05 AM
يا زميل
( دى دبل كيك )
زايغوين
؟
لسه فى اسئلة معلقة فى مشلعيب
دائرها البيجاوبها
اولن بالتبادى
يس عرفتو ؟
;)
سيف اليزل خليفة دفعتك كيف
وهو دفعتى
انت درست فى الختمية ولا الديم شرق 2
؟ ؟
هل تتذكر هولا
استاذ عبد الرحيم , ومحمد الامين , واحمد السنوسنى , وتوفيق , وبول , احمد حسب الله واحمد البشير والناظر عبد الرحمن
والغفراء
عم هارون رحمة الله عليه
وعم
عبدالله

؟ ؟ ؟

فيصل سعد
16-09-2009, 06:27 AM
يا زميل
( دى دبل كيك )
زايغوين
؟
لسه فى اسئلة معلقة فى مشلعيب
دائرها البيجاوبها
اولن بالتبادى
يس عرفتو ؟
;)
سيف اليزل خليفة دفعتك كيف
وهو دفعتى
انت درست فى الختمية ولا الديم شرق 2
؟ ؟
هل تتذكر هولا
استاذ عبد الرحيم , ومحمد الامين , واحمد السنوسنى , وتوفيق , وبول , احمد حسب الله واحمد البشير والناظر عبد الرحمن
والغفراء
عم هارون رحمة الله عليه
وعم
عبدالله

؟ ؟ ؟

نعم درست في الختمية يا حبوب ، استاذ عبد الرحيم كان مرشد الصف في اولى و ثانية و ثالتة على ما اعتقد و كان ساكن جنوب المدرسة في نفس الشارع، و استاذ محمد الامين كان المرشد بعد ذلك، سيف اليزل دفعتي 6 سنين يا معلم و اسأله كيف جننا كاروهات زريبة الفحم بتاعه العم خليفة في مشاوير بين الديم و الامتداد و الصحافة الجديدة في ذلك الوقت، و دفعتنا برضو نادر عبد الحفيظ كان يسكن جنوب المقابر في شارع ميركاتو حاليا و اصبح نجما كرويا شهيرا حرمته اصابة حادث موتر من ان يتبوأ هداف السودان الاول، و لعبنا في الشبيبة في الرابطة بميدان الجيل و مدربنا "فيصل لاسكو" و زاملنا البعيو اخوان و المرحوم يوسف دحية و سعد محي الدين من اولاد الخرطوم 2 و سكنا بجوارهم في النجيلة الثالثة شرق السفارة الجزائرية و الشارع يتجه شرقا الى المدرسة التجارية و يصل الى شارع المطار، اما ناس ياسين و جماعتوا فديل تسأل منهم الخال سنير و خبير عجلات و مواتر و فيسبات و كدا :D:D يا ابو الطرق يا لذيذ :D:D

أبو أماني
16-09-2009, 02:44 PM
نعم درست في الختمية يا حبوب ، استاذ عبد الرحيم كان مرشد الصف في اولى و ثانية و ثالتة على ما اعتقد و كان ساكن جنوب المدرسة في نفس الشارع، و استاذ محمد الامين كان المرشد بعد ذلك، سيف اليزل دفعتي 6 سنين يا معلم و اسأله كيف جننا كاروهات زريبة الفحم بتاعه العم خليفة في مشاوير بين الديم و الامتداد و الصحافة الجديدة في ذلك الوقت، و دفعتنا برضو نادر عبد الحفيظ كان يسكن جنوب المقابر في شارع ميركاتو حاليا و اصبح نجما كرويا شهيرا حرمته اصابة حادث موتر من ان يتبوأ هداف السودان الاول، و لعبنا في الشبيبة في الرابطة بميدان الجيل و مدربنا "فيصل لاسكو" و زاملنا البعيو اخوان و المرحوم يوسف دحية و سعد محي الدين من اولاد الخرطوم 2 و سكنا بجوارهم في النجيلة الثالثة شرق السفارة الجزائرية و الشارع يتجه شرقا الى المدرسة التجارية و يصل الى شارع المطار، اما ناس ياسين و جماعتوا فديل تسأل منهم الخال سنير و خبير عجلات و مواتر و فيسبات و كدا :D:D يا ابو الطرق يا لذيذ :D:D

أيوا ..ما قلت ليك إنت أديب والجابك لي ذاته مأدب ؟؟ شوفتوه دردق الكورة لفيصل كييف .. ياأخي أنت رأس حربة خطير والله .. وشايف يا بن عمي فيصل .. شابكني أها ماشي ..أها أنا ماشي .. تمشي شنو اقول عليك يايابا .. أقعد .. ما تبقى نزق .. أسع دي ذكريات حلوة زي دي كان راحت علينا سااااكت.. فضفض يا عم ولاحدش حووش.. طروقة.. عليو.. ما تخليه الجنا عامل ليها .. ضبان ضكر .. وريو المستخبي .. وأنا ظااااطي لابت ليو .. تشاووووgoood goood goood

فيصل سعد
16-09-2009, 10:47 PM
سلامات ابو اماني،، و مالك داير تقلب
البوست فيش و تشبيه، و ما تقعد تباري
الشمارات و تألف و تنجر في ود اخوك،
رشحنا ليك رأفت ميلاد كضيف رابع، لبدت و
زغبرت و ما اديتنا خبر، الحاصل شنو؟؟

تخريمة: انت من تلاتة 11 سبتمبر احوالك لا تسر، هون عليك
يا رجل و الكورة غالب مغلوب، و الزعيم زعيم في كل الظروف ..

ارقد عافية ..

فيصل سعد
17-09-2009, 07:38 AM
http://sudaniyat.net/up/uploading/AED1.jpg

طارق الحسن محمد
18-09-2009, 06:43 AM
نعم درست في الختمية يا حبوب ، استاذ عبد الرحيم كان مرشد الصف في اولى و ثانية و ثالتة على ما اعتقد و كان ساكن جنوب المدرسة في نفس الشارع، و استاذ محمد الامين كان المرشد بعد ذلك، سيف اليزل دفعتي 6 سنين يا معلم و اسأله كيف جننا كاروهات زريبة الفحم بتاعه العم خليفة في مشاوير بين الديم و الامتداد و الصحافة الجديدة في ذلك الوقت، و دفعتنا برضو نادر عبد الحفيظ كان يسكن جنوب المقابر في شارع ميركاتو حاليا و اصبح نجما كرويا شهيرا حرمته اصابة حادث موتر من ان يتبوأ هداف السودان الاول، و لعبنا في الشبيبة في الرابطة بميدان الجيل و مدربنا "فيصل لاسكو" و زاملنا البعيو اخوان و المرحوم يوسف دحية و سعد محي الدين من اولاد الخرطوم 2 و سكنا بجوارهم في النجيلة الثالثة شرق السفارة الجزائرية و الشارع يتجه شرقا الى المدرسة التجارية و يصل الى شارع المطار، اما ناس ياسين و جماعتوا فديل تسأل منهم الخال سنير و خبير عجلات و مواتر و فيسبات و كدا :D:D يا ابو الطرق يا لذيذ :D:D

يا حبيب والله ردك دا ريحنى شوية وشلعل ذكريات انا خائف البوست دا ما ينتهى ولا تنزل من الكرسى الجمر دا

نبدا بالختمية
الختمية ومدرسة الديم شرق 2 مدرستين جوه حوش واحد كل بيفصل بينهم سور من شجر التمر هندى قبل دمجهما وجعلها مدرسة ذات نهرين .. طابور الختمية كان بيكون فى الحوش الجنوبى للمدرسة من جهة بابها الرئسى البيفتح فى ميدان صغير فى شكل L ومعنى كدة برضو انه باب المدرسة بيفتح فى الجزء الشمالى لبيت استاذ غبد الرحيم وهو من اسرة التربيا التى تقيم فى هذا المنزل
وطابور الديم شرق كان بيكون فى الميدان الذى يتوسط المدرستين
استاذ محمد الامين درسنى رياضيات وكان ساكن الديم وانتقل للصحافة وعبارته الشهيرة ( امور اللف والدوران دى ما على ) لن انساها ابدأ
سيف البزل خليفة زاملته فى رابعة لانى كنت فايته بسنة دراسية واضطرت لاعادة السنة الرايعة بعد تعرضى لحادث لزمت فيه سرير المستشفى لثلاث اشهر تقريبأ وكان فى هذه الدفعة على ما اذكر مجدى خضر طه وسيد ابراهيم وسيد بتذكره لانه كان اول الفصل ومن العمارات ومجدى خضر طه لانه جارنا الهيتة بالهيتة
سيف اليزل كان ابوه عنده محل لبيع الحطب والفحم فى زريبة الديم وكذلك زميل اخر كان اسمه جلال
تانيا
نادرعبد الحفيط ود حلتى ويسكن بيوت الحجر شمال حى الزهور وجنوب مقابر فاروق وغرب بوستة العمارات خلف بقالة امل بستة بيوت بالعدد كان اول شى بيلعب فى فريق الحلة وهو الامل
تالتا
السفارة الجزائرية دى بعرف مكانها تماما وعندما غادرت مقرها الى مكان اخر تحول المبنى الى شركة خدمات امنية كانت توظف فقط الاخوة الجنوبيين
وذكرياتى مع السفارة الجزائرية كانت رحلات فى العطلة الصيفية كنا نتجمع اربع او خمسة اولاد من الحلة ونبدا رحلات تقافية حقيقية الى كل السفارات التى نعرفها فى حى العمارت بدأ بالسفارة السعودية . وكنا نظفر باعداد من الكتب الدينية ومجلة الفيصل وسفارة كوريا الدينقراطية وكنا نحمل بكم هائل من الكتب التى تمجد الرفيق والزعيم المحبوب كيم ايل سونغ وصوره والمشهد يتكرر ايضا فى السفارة الصينية ومجلتهم المشهورة الصين اليوم
وصور الزعيم الثورى ماو تسى تونغ والسفارة الكويتية والتى كانت تبرنا باعداد محترمة من مجلة العربى ومكتب منظمة التحرير الفلسطينية والذى كان يقع شمال مقابر فاروق ويفتح على صينيتكم ومجلتهم العاصفة

والسفارة الجزائرية كانت خاتمة رحلتنا وبعدها نعود الى ديارنا شاقين المقابر ( طبعا بالنهار ) بعد ان نكون قد شربنا من ازيار غفير الباب الشمالى واغتسلنا من حنفياتها
( مش سفاح صنعا الوقت داك كان شغال غفير الباب الشمالى ؟ ؟) عمومأ كانو هم مجموعة من ابنا الفور
دى واحدة من رحلاتنا الاساسية والمهمة الى العمارات ( ذات الطابع الثقافى:D )
اما النوع الاخر لرحلاتنا الى العمارات فكانت ذات ( طابع نفاياتى ونفعوى :D)
اقوليك كيف كانت كدة
كنا نخرج من بيوتنا مستهدفين شى واحد ومحدد جدا فى العمارات الا وهو
الكــــــــــــــــــــــوش
اى والله الكوش
نباريها كوشة كوشة لدرجة اننا كنا نسميها باسماء محددة للتفريق والتحديد
ولانه الدنيا كانت بخيرها الكوش دى كانت تحمل فى دواخلها ماهو بالنسبة لنا شى ثمين
اى والله
كنا نجد العاب وقد حدثت لها بعض التلفيات البسيطة يعنى من النوع الممكن تصلحوه انت ولا تديه لاخوك الكبير ولا زول شفت فى الحلة يرجعها لوضعها الطبيعى او تلف وكسر من النوع الذى لايوثر فى ادئها او شكلها كثيرأ او ممكن تطنشه لانه المسالة فى الاساس ملح ومن الكوشة
:D
تعرف ونحنا فى واحدة من رحلاتنا للكوش دى والله بتذكر فى كوشة على شارع مدنى مع شارع 17 او 15 او بينهم مش متاكد فى زول مننا اسمه مزمل مختار بقى يكوركك وهو يعلن ان لقى حمبوكة ( بلونة برندوق اليوم :D) وكانت هذه الحمبوكة ذات شكل ولون غريب جدأ ولم نرة مثله جميعأ من قبل . وبالنسية لنا كانت الحنابيك والصفافير والبلى من الالعاب التى ياستطاعتنا شراءوها والحصول عليها لذا نحن لدينا باع وخبرة فى كل انواع الحنابيك
عشان كدة كنا مستغربين لشكل هذه الحنبوكة
المهم انه صاحبنا مزمل طول الطريق والسكة فرحان بالحنبوكة لانه كانت هى فقط حصيلته من من رحلة ( التكويش ) ويشيل وينفخ فى الحمبوكة .. بشيل وينفخ .. يشيل وينــــــــــــفخ
حتى وصلنا الحلة .. قدام بيتهم لقينا اخوه الكبير وهو طبعا حريف كوش وحريف اى شى كونه زول كبير واول ما شاف اخوه فرحان وبيينفخ فى الحنبوكة
صرخ فيه باعلى صوت عنده
ارمى العفن الفى خشمك دا
اندهشنا وبهت مزمل بهتة عظيمة ورمى الحنبوكة وهو زعلان ومندهش من طلب اخوه برمى الحنبوكة
واخرج الحنبوكة من فمه ونظر ونظرنا معه با ستغراب شديد الى اخيه
وساله
ليه امرقها من خشمى
وبادره مرة اخرى
ارميها من ايدك يا معفن
رماها وزاد استغرابأ فزدنا دهشة معه
فيها شنو الحنبوكة دى .. سال مزمل اخوه مدثر
بعد ان رمى الحنبوكة فى الارض وكل واحد
فينا قفل على الحمبوكةتحسبأ ان كان الامر مقلب او مجرد
هرشة من مدثر لاخيه مزمل
ولكن كل خطط الاستيلاء على الحنبوكة نزعت من
روءسنا بعد ان القى مدثر قنبلته فى نفس و اذن مزمل
ونحن بعد ان قال :
انت عارف الوسخ الخاتيه فى خشمك دا شنو ؟
مزمل متشائلا : مش حنبوكة ؟
مدثر: حنبوكة فى عينك يا حمار
مدثر مردفأ :
دى ما حنبوكة دى ... دا ديوركس
مزمل: ديوركس يعنى شنو
مدثر : ديوركس بتاع الــــــــــــــ ....
مزمل : يدخل فى حالة من الغثيان وتويــــــــــــــع
ونحنا دخلنا فى حالة هستيرية من الضحك على مزمل
ونفخه لحمبوكته
( الكوندوم )

طارق الحسن محمد
18-09-2009, 10:25 PM
أيوا ..ما قلت ليك إنت أديب والجابك لي ذاته مأدب ؟؟ شوفتوه دردق الكورة لفيصل كييف .. ياأخي أنت رأس حربة خطير والله .. وشايف يا بن عمي فيصل .. شابكني أها ماشي ..أها أنا ماشي .. تمشي شنو اقول عليك يايابا .. أقعد .. ما تبقى نزق .. أسع دي ذكريات حلوة زي دي كان راحت علينا سااااكت.. فضفض يا عم ولاحدش حووش.. طروقة.. عليو.. ما تخليه الجنا عامل ليها .. ضبان ضكر .. وريو المستخبي .. وأنا ظااااطي لابت ليو .. تشاووووgoood goood goood

ابو امانى الجميل
الزول طلع ولد دفعة
دحين ما تفكو
لسع عنده كتير شكله
والغريبة
نكر ياسين
;)
دا بيتنسى ؟
لا والله وحاتك ما بيتنسى زولأ زى دا
بالله اساله قول ليهو
كنت بتشترى مجلة ميكى وسمير
والمغامرين الخمسة
والشياطين الثلاثة عشر من
ويـــــــــــــــن
؟ ؟ ؟ ؟
ولا كنت معديها
ركـــــــــــــــوب حمير
;)
؟ ؟ ؟
ولســــــــــــــــــــــــــــع
رافت قاعد هنا وما ماشى بعيد
وملحوق
ســــــــــــــــــــــــــمــــــــــــــــح

معتصم الطاهر
19-09-2009, 12:04 AM
فيصل سلامات


سؤال ..

من ترشح ( 4) ليمثلوا/يمثلن الادارة القادمة .. ( الادارة الحالية يمتنعون) ..
و لماذا ؟

فيصل سعد
19-09-2009, 01:25 AM
بالله اساله قول ليهو
كنت بتشترى مجلة ميكى وسمير
والمغامرين الخمسة
والشياطين الثلاثة عشر من
ويـــــــــــــــن
؟ ؟ ؟ ؟
ولا كنت معديها
ركـــــــــــــــوب حمير



يا ود عمك الزمن البحكي ليك عنه داك،
انا لا بعرف اقرأ لا اكتب، فما تسرح بغنم
ابليس اكتر من كدا يا كج، و ما تتشفتن علي
و بطل تهويش و تكويش يا ود يا مقرم و ما
تبيع الموية في حارة السقايين، و لك من
المودة احلاها و اعذبها بالصودا و التلج
كمان يا قروبير :D:D

فيصل سعد
19-09-2009, 02:04 AM
فيصل سلامات
سؤال ..
من ترشح ( 4) ليمثلوا/يمثلن الادارة القادمة .. ( الادارة الحالية يمتنعون) ..
و لماذا ؟

سؤال صعب شديد يا باش، الاجابة الحقيقية
عليه بتجيب زعل و لوم و ربما احقاد و
ضغائن ، ما سودانيين و العمل العام عندنا
رتيق و لتيق و معليش و باركوها و هلمجرا،،
لذلك بعد اذنك الكريم، ارجو ان تعفيني من هذا
السؤال بطيب و عفو خاطر يا اخي العزيز .

ولكن رغم ذلك، و رغما عن كل الظروف و الملابسات،
لابد من التأكيد بان مجلسكم الموقر الحالي (معتصم،لنا، آمال، و منال)
طيب اداء، و تعاون، و تخطيط، و علما و قدرات، وضعيف تنسيق و تواصل اداري
و قاعدي، و طولة بال و نفس، و هذه سنة الحياة فما تشيل هم، و التجربة و الاحتكاك
بيولدوا و بيصقلوا الخبرات بالتراكم، بالاضافة الي المجهودات السابقة المقدرة
للجيلي احمد منفردا، و منافحا لوضع الاساسات و السقالات و الدعائم،
و الاداء الطيب المجود للاخ مهند الرباطابي في الامانة العامة .. تحت رعاية
الاخ عكود الامين العام لسودانيات و دوره و جهده المقدر في التنسيق و لملمة
اطراف الخيوط و السير بهذا المنبر الى بر الامان ..

هذه حقائق يجب تدوينها لحفظ الحقوق، و للذكرى و التاريخ ..
و هذه هي المدرسة التي تعلمنا فيها العمل الاداري و الاشرافي
و سنوصلها لمن اراد من الاجيال القادمة ..

ان كانت هنالك مناشدة، فهي ان يبقى احد اعضاء
هذا المجلس و يترشح من جديد للفوز، و ليعمل في
مواصلة تنفيذ المتبقى من الخطط و الاعمال، و حتي لا يبدأ الناس من
اول جديد، و المناشدة الاخيرة لجميع الزملاء و الزميلات الكرام الافاضل
في هذا المنبر و لي و لك ايضا (( الما داير يشتغل و يتعب و يبذل
و يقدم لهذا الصرح، احسن انه ما يترشح))

و لك وافر الشكر و التقدير..