المساعد الشخصي الرقمي

مشاهدة النسخة كاملة : ضيف على مائدة سودانيات ...! - 5 - مجدي مسعد حنفي


أبو أماني
27-07-2009, 06:38 PM
gooodأحبائي الأعزاء ..
أحباء سودانيات .. لكم صادق الود والتحايا القلبية .. حقا قد سرني وأثلج صدري عمق صداقتي بكم ذهاء ما يقارب السنة أو يزيد .. قضيتها بينكم في سعادة وحبور .. وأحسست وأنا بينكم وبكم بدفء الأسرة وأحلى وشائج الإخاء والمحبة .. حيث صرتم بالنسبة لي كأفراد أسرتي رحما بل أكثر من ذلك..بحيث أقضي الساعات الطوال في رحابكم المرحة العامرة قبل وأكثر مما أقضيه مع أسرتي .. فلكم الشكر على ما وهبتموني من حب صادق إمتزج في شراييني وصار يغزو القلب ويعمر غرفه الأربع ويهرب ليعود ثانية ليمدني بالحياة .

فكرت مليئا في شكل مستقبل علاقة كل سوداني في سودانيات بالآخر! وهالني أن تكون علاقة صادقة حميمة كهذه عرضة للعيش والعمران طويلا عبر الفضاء الإسفيري والعالم الأثيري ..! وتصورت حياة شخوصها في اللاشئ وفنائهم في اللاشئ ..تماما كما يحدث يوميا بالنسبة لممثلين وممثلات نشاهدهم عبر الشاشات البيضاء والبلورية .. نعايشهم ونعاصرهم ثم يتلاشوا في اللاشئ حقيقي حزت في نفسي هذه الخاطرة .. وفكرت ثانية !..

أضع بين أياديكم عتبة أولي لتجسيد علاقة كل منا بالآخر .. وهو بوستر تتم استضافة عضو فيه ليكون مصدر حوار تعارفي يحكي لنا ما عن له أن يرويه عن نفسه فنزداد قربا منه أكثر وأكثر ومعرفة به وثيقة أكثر .. نعرف موقعه الحالي .. رقم موبايله .. عدد أفراد أسرته .. طموحاته الآنية والمستقبلية .. بعض مشاكله الخاصة التي يمكن الخوض فيها .. والمشاركة في علاجها بعض الجوانب المضيئة من حياته الماضية والتي يحلو له الخوض فيها مع الأحباء .. الخ ..

إن راقت لكم فكرتي هذه فأقترح أن يقوم كل ضيف حل بالبوستر في نهاية حلقته بترشيح من يحل بعده ضيفا على مننتسبي سودانيات .. وهكذا دواليك .. تبقى المعضلة في إختيار عضو الشرف الأول .. وأقترح أيضا أن يقوم صاحب البوستر بإختياره .. درج كبارنا على إختيار كبير القوم ليتولى ضربة البداية في كل مشروع أو عمل .. وحيث أن مجتمع سودانيات يحفل بالكبار شكلا وموضوعا وليس من بينهم من يتفضل على الآخر .. فأسمحوا لي أن أختار أكبر الأعضاء (سنا) .. فليكن ضيف الحلقة الأولى العميد الأستاذ :-

:Dخـــالـــد الحــــاج:confused:
مساهمتي الأولي معه المطالبة بنبذة صغيرة عن عميدنا والبطاقة الشخصية وتعريف مختصر ولكم جميعا خالص حبي وإعتزازي وإحترامي ...

أبو أماني
20-11-2009, 03:38 PM
أحبائي .. الأعزاء ..
لنتجاهل واقعة الضيف رقم (6) ونحاول معا معالجة التوتر الذي أحدثه موقفه المبهم الغير مبرر .. ولنستقبل الضيف القادم بالرقم (7) .. كان الإختيار صعبا بكل المقاييس في هذه المرحلة بالذات .. وكنت ناوي أقدم تفاحة هذا المنتدى ونسمته العبقة التي تنفث في حب ومرح نفحاتها بين فينة وفينة .. قصدي صديقي الحبوب الودود .. المشاكس فتحي مسعد .. ولكن قررت بعد إذنكم أن أترككم دون أن تغسلوا أيديكم في إنتظار (الحلو).. فترة من الزمن وأعدكم بأن يكون (حلو) جد جد وبالكريم كراميل كمان!

المفاجاءة سادتي .. إن كان الحبوب أبو آلاء فرح ومرح وسرور وعسل ينقط عديل كدي .. تفتكروا أخوه شقيقه .. الأزغر منو يكون كيييف؟ .. مجدي مسعد .. يكتب بطريقة السهل الممتنع وتستشف الشفافية والإلفة والموده المرحة المنسابة بين سطوره وتعرف من الوهلة الأولى أنه أديب لايشق له غبار .. ولكنك رغم كل ذلك لا تعرف عنه سوى أنه شقيق (الكارثة) توحة وتقول في سرك ربما .. لو فتحي بالظرف ده يا ربي يكون مجدي الأزغر منو كيف؟! إجابة على هذا السؤال .. أدعوا بإسمكم جميعا الحبيب العزيز الغالي تمر السوق ..
goood مجدي مسعد حنفي goood
حبيبنا تشرف والله وأكون أول مستقبليك بسؤال بسيط .. حدثنا عن أشياء عامة يجب أن نعرفها عنك وبعدها ينطلق السجال .. لك خالص مودتي .. وشكرا لإستجابتك الفورية الغير مشروطة لدعوتي بكل أريحية مسحت كل آثار الجروح التي خلفها .. الله يسامحه!!.. تشاااااووووو إلى حين ! goood

أبو أماني
22-11-2009, 05:37 PM
المشاركة الأصلية كتبت بواسطة مجدي مسعد حنفي [/color]


الاخوه والاخوات
الاخوات والاخوه
عشان مافي زول يزعل
طبعاً انا يشرفني ان اكون ضيف على مائدة سودانيات العامره واتمنى اني اكون ضيف
خفيف واحب في البدايه اني اشكر الاخ العزيز ابو اماني على الدعوه الكريمه وان شاءالله
اكون عند حسن ظنو..
الحقيقه انا بفضل انكم تبدوا الدردشه يعني لو في اي زول عايز يعرف اي حاجه عنّي
يتفضل ويسأل وانا ماحاقصر وحارد بكل امانه وصدق بس انتو دردقوا الكوره وانا علي
اشوت وان شاءالله مااطلع اشتر
* * * *

[color=#8B0000]شكرن آلللحبيب على تشريفنا وصدقني طلتك على هذا البوست المتواضع جعلت منو منتدي كامل بل موقع عديييل كده .. ويقيني أن بينك وبين (الشتارة) فراسخا وأميالا .. أحم .. أحم اولن في التبادي سوعال بسييييط .. انا يا أخوي بريدك بلحيل بس لو سألوني عنك أي سوعال بقول ليهم إسمك وأقيف .. دحين أقيف إنت المرة دي وكلمني بكل تجرد واريحية معهودة فيك عن ماتحب أن نعرفه عنك .. نطلب العام .. من نشاءة وطباع ووضع إجتماعي سياسي أدبي وخلافه .. ما تحب وما تكره .. حتي في الأكل والشراب والصداقات .. أفتح لنا صدرك الرحب ودعنا نسرح ونمرح داخل الحبيب مجدي على بساط طاهر هو لسانه أو يراعه .. لك حبي.goood

مجدي مسعد حنفي
22-11-2009, 06:50 PM
اها نبتدي من وين الحكايه
اقول ليكم خلينا نبدا من الاول
انا من مواليد 18\8\1955 م بمدينة الخرطوم بحري وبالتحديد
حلة حمد .. فترة الطفوله كانت عاديه ولو انها بتختلف شويه لاني مادخلت
الخلوه زي باقي ولاد الزمن داك لكن بديت علاقتي مع الدراسه من الحضانه
وبعد داك من سنه اولى ابتدائي في مدرسة اقباط بحري وطبعا الدراسه كانت
لغاية سنه تانيه مختلطه وانا لغاية حسه مازلت متذكر الجو بتاعي الوقت داك
وطبعاً عايزيني احكي ليكم عنها لكن دا بعدكم دي اسرار حربيه
يعني ممكن المره تهف ليها مرّه تفتح البوست تقوم تقرا الكلام نخش في مشاكل لا
ينفع فيها ابو اماني لا الامم المتحده..
اها من سنه تالته فصلونا وبقيت اجي من بدري استنى الجو عشان اصبح عليهو
( لعب شفع:)) لكن للاسف البت اهلها رجعوا مصر وكسروا لي قلبي:mad:
ومرت السنين وكملت الابتدائي وكمان الاعدادي في نفس المدرسه وطبعاً
الواحد الفتره ديك عمل جو جديد بس المرّه دي من الحله .
فترة الاعدادي فتره جميله جدا ويمكن انا مازلت لغاية حسه عندي اصدقاء في السودان
من الفتره ديك يمكن اكتر واحد متواصل معاهو صديقي العزيز سيداحمد ابراهيم وهو
من اولاد الحله وبالمناسبه هو من المسئولين الكبار في الاذاعه وحالياً هو متولّي متابعة
مجموعه من قصايدي مع الملحن حمدان ازرق وعرفت منو اخيراً
في اربعه اغاني اتلحنت لي مجذوب اونسه وسيف الجامعه وعصام محمد نور والرابعه
مامتذكر مشت لمنو .
اها ناخد بريك اقصد راحه ونواصل بعد الفاصل

مجدي مسعد حنفي
22-11-2009, 08:01 PM
الله يقطع شيطانك يابو اماني
تعرف وانا بقرا في مداخلتك الاخيره في البوست التاني
ضحكت لامن الاولاد اتخلعوا وجوني يشوفوا الحاصل شنو
ياخي انا زول بعرف الاتيكيت تفتكر لامن البنات الحلوات ديل ناس
منال وساره يكتبوا لي هناك اقوم انا ارد عليهم هنا
اها انا حسه نزلت اعلان هناك واخليت مسئوليتي

أبو أماني
23-11-2009, 10:32 AM
الله يقطع شيطانك يابو اماني
تعرف وانا بقرا في مداخلتك الاخيره في البوست التاني
ضحكت لامن الاولاد اتخلعوا وجوني يشوفوا الحاصل شنو
ياخي انا زول بعرف الاتيكيت تفتكر لامن البنات الحلوات ديل ناس
منال وساره يكتبوا لي هناك اقوم انا ارد عليهم هنا
اها انا حسه نزلت اعلان هناك واخليت مسئوليتي

عارفك يا ذوق .. كلك ذوق وملك الإتيكيت ..( بس بتلكك)! .. الله مش أخويا الصوغيير .. ؟ نهنا بك ومعك في لقاء السحاب يلا قدم اليمين .. وأبداء الإستجابة من أول مداخلة وأنا بساعدك بي درديق الكور .. وخلي أخوك فتحي يبقى زي الرشيد بدوي عبيد ويصرخ قوووووووووووونننن! goood

أبو أماني
23-11-2009, 10:44 AM
اها نبتدي من وين الحكايه
اقول ليكم خلينا نبدا من الاول
انا من مواليد 18\8\1955 م بمدينة الخرطوم بحري وبالتحديد
حلة حمد .. فترة الطفوله كانت عاديه ولو انها بتختلف شويه لاني مادخلت
الخلوه زي باقي ولاد الزمن داك لكن بديت علاقتي مع الدراسه من الحضانه
وبعد داك من سنه اولى ابتدائي في مدرسة اقباط بحري وطبعا الدراسه كانت
لغاية سنه تانيه مختلطه وانا لغاية حسه مازلت متذكر الجو بتاعي الوقت داك
وطبعاً عايزيني احكي ليكم عنها لكن دا بعدكم دي اسرار حربيه
يعني ممكن المره تهف ليها مرّه تفتح البوست تقوم تقرا الكلام نخش في مشاكل لا
ينفع فيها ابو اماني لا الامم المتحده..
اها من سنه تالته فصلونا وبقيت اجي من بدري استنى الجو عشان اصبح عليهو
( لعب شفع:)) لكن للاسف البت اهلها رجعوا مصر وكسروا لي قلبي:mad:
ومرت السنين وكملت الابتدائي وكمان الاعدادي في نفس المدرسه وطبعاً
الواحد الفتره ديك عمل جو جديد بس المرّه دي من الحله .
فترة الاعدادي فتره جميله جدا ويمكن انا مازلت لغاية حسه عندي اصدقاء في السودان
من الفتره ديك يمكن اكتر واحد متواصل معاهو صديقي العزيز سيداحمد ابراهيم وهو
من اولاد الحله وبالمناسبه هو من المسئولين الكبار في الاذاعه وحالياً هو متولّي متابعة
مجموعه من قصايدي مع الملحن حمدان ازرق وعرفت منو اخيراً
في اربعه اغاني اتلحنت لي مجذوب اونسه وسيف الجامعه وعصام محمد نور والرابعه
مامتذكر مشت لمنو .
اها ناخد بريك اقصد راحه ونواصل بعد الفاصل

مجدي كت عارفك شخصية مثيرة للدجل .. أوب سوري قصدي (الجدل) وهو جدل ائجابي وحاة خووتك .. وعارفك ظريف بس ما تصورت تكون أظرف من أخوك أطال الله عمرو توحـه يا أخي والله أولاد مسعد ديل سكر عديييييل كدي ...
بس يا مجدي عليك امان الله والرسول تحكي عن الحنان الكان زمان بتفاصيل أوفى بأسلوبك الرائع داااك .. وكان لآم العيال حفظها الله .. بديك ليها وصفة كااااربة .. لا ما تخاف سارة ماليها علاقة بالوصفة دي .. (تلقاها أسع دي دكتورة أمينة طييرت عيونها.. بيزنيس وكده!) بعدين ما تنكر يا فردة أنو كل واحد فينا من ناس (أولاد آدم) ديل لما يصل السن دي بيتجدع ويعمل فيها لأولاده .. ومرتو كان مقطع السمكة وديلها .. وهو زي أبو أماني كده يكون بيقطع السمكة بس لما تكون محمرة ولا مشوية .. goood

بدور التركي
23-11-2009, 11:01 AM
ما عندي اسئلة في الوقت الصعب دا:p
بس دا ما يمنع نجي نسلم ونقول ازيكو يا كل الناس ما زيكو:p

منال
23-11-2009, 11:43 AM
اووووووووو استاذنا مجدى

ترحيب حار

بعيد عن الكورة و السياسة

سؤال مباشر

بتغنى و اكيد ايوه
اها اكتر اغنيه بدندن بيها كتييير جدن

و زمان (ما بعيد ) غنى الحمام مع الشاور (كان شنو ).

وغنيت لجمهور منذ المدارس و الجامعة و الان

وبجيك فى حتة غنا الحقيبه

يا مجدى قالو نجيب الاسئله هنا
وردك هناك بعرف الفنانين من بين السطور ومافى زول بصصنى - تكتب شعرى و تغنى

لكن ما رديت انك كنت بتغنى اى غنا
ا بوامانى شنو التنقلات دى

مجدي مسعد حنفي
23-11-2009, 12:07 PM
تعرف يابو اماني
ياخي حكاية الحب الاول دي مااظنها اشاعه لانو ليهو زغزغه غريبه في القلب
تخللي الواحد منعنش وهو ماعارف الحاصل ليهو دا شنو غايتو ايام سمحه ومابتتنسى
بس ياخي مرات تقعد تتذكر وتقول حسه انا كان كنت عرست فلانه ديك كان بقيت ارمل
الله يرحمها وكان عرست التانيه الله واعلم كان حصل لي شنو يمكن اكون بطقع زي
اطفال الحجاره ولا فوتّ طارة كلتش زي اخوي ناجي القدسي عشان كدا يازول
مافي احسن من الحب البجي مع العشره ودا الحاصل معاي والمثل بيقول تعددت الاسباب والموت واحدgoood وانا خلّيت حكاياتي كلها ومشيت عرست بت عمي من مصر
ودا كان البيقولوا عليهو حب من اول نظره وبيقولوا عليهو كمان رب صدفه خير من الف ميعاد
لاني مشيت مصر اشوف امي الجات للعلاج قام حصل المحظور:D

مجدي مسعد حنفي
23-11-2009, 01:03 PM
منال
انا رديت عليكي في الحوش الواسع قام ابواماني حساده كدا قال لا لازم تمشوا
الحوش الزحمه عشان الزحمه فيها رحمه
اها زي ماقلت ليك انا كنت فنان القعدات والزمن داك كان زمن ناس زيدان وحمد الريح
والطيب عبدالله واكيد ايوب فارس واسلوبو المميز في الاداء
تعرفي من خلال صداقتي مع عمر الشاعر وناجي القدسي مرات كنت بغني اغاني في القعدات
الناس لسه ماسمعوها
ومن الاغنيات الكنت بحبها لزيدان ومافي زول سمعا الوقت داك اغنية رفقاً ياحبيبي يعني انا
حفظتها وغنيتا في القعدات قبل مالناس تسمعا من زيدان بسنين طويله..
اما حبيبنا حمدالريح فدا الواحد كان حافظ اغانيهو كلها ومن الذكريات الظريفه يوم كنت راقد
في الاوضه بالليل وابوي مشغل الراديو في الحوش على اغنية لا سلام منك ومامنك تحيه
وكانت اول مرًه تتذاع بدون مبالغه انا كنت حفظت الاغنيه كلمه كلمه مع اللحن مع قفلة
حمدالريح وتاني يوم غنيتا للشباب في القعده الجماعه اتخلعوا لانهم عارفين اني الصباح قمت
مشيت المدرسه ( تقولي لي طلبة الزمن دا :D )يعني حفظتها متين
وبالمناسبه ياجماعه ودا بعد اذنك يامنال من الحاجات الغريبه فيني اني الزمن داك كنت عكس
الشباب تماماً يعني موضوع القعدات كان بالنسبه لي هو الغنا مش الحاجات التانيه ديك:)
وكنت لامن نكون ماشين عرس ماكنت بحب امشي وانا موزون عشان اكون مركز
في الجمال والجميلات الحلوات واكون ظابط الفوكس بتاع عيوني كويس
كمان من الحاجات الغريبه فيني اني كنت مصاحب مجموعه بدون مبالغه مافيهم واحد
بالغلط مابتسطل وانا الوحيد فيهم الواعي عشان كدا كنت بكون مستمتع جدا بي ونستم وتصرفاتم
العفويه ..
ومن الذكريات اللطيفه كان من ضمن الشله دي واحد من اعز اصدقائي اسمو محمد عوض
(العميد) من اولاد المزاد مرّه مشيت في بداية معرفتي بيهو مع اعز اصدقائي على الاطلاق
صديق الشيخ الملقب ب (اب تكه ) من اولاد حلة حمد ومن المريوماب بالتحديد مشينا نزور العميد يوم الوقفه ياخوانا اول مادخلنا الحي بتاعم حسينا في حاجه غريبه حاصله وفي كمية
شرطه ماطبيعيه طبعاً احنا ما جا في بالنا حاجه بطاله لا سمح الله المهم وصلنا البيت لقينا
كمان عساكر هناك استلمونا وعملوا معانا تحقيق لما عرفوا اننا اصحابو جايين من وين
وآخر مرّه شفتوهو متين وعلاقتكم بيهو شنو غايتو مافكانا منهم إلاّ اننا اصحابو لكن ماعارفين
هو وين والدليل اننا جايين ليهو زياره
طبعا انحنا عرفنا بعد داك الحبيب البوليس قبضو متلبس بي سجاره خدره قدام البحر وموزون
تمام قاموا شالوهو ودوهو مركز البوليس ودخلهو المكتب عشان ياخدوا اقوالو ويعملوا ليهو
محضر الجماعه انشغلوا عنو دقايق صاحبنا اتلفت شمال يمين مالقى زول شغال بيهو قام براحه
مشى على الباب عديل وطلع ومافي زول سالو ماشي وين ولامن انتبهو كان فص ملح وداب
على قولة المصريين المهم انا واب تكه رجعنا قلنا نمشي نادي البحريه نلعب كتشينه ونضرب صحن فول مدنكل لكن المفاجأه كانت هناك لقينا العميد بي لحمو ودمو واقف قدام النادي وكأنو
ماعمل حاجه ووحياتكم تاني يوم مشى سلم نفسو وطلع منها ومن التهمه الاصليه زي الشعره
من العجين ( طبعاً عارفين كيف;))
حسه انا كان نصيح زول زي دا تاني امشي معاهو ولا اعرفو مش كمان يبقى من اعز اصدقائي
ماياها دي محن السودانيين.

مجدي مسعد حنفي
25-11-2009, 04:30 PM
[size=6][font=Arial Black][color=#FF0000]ياأهل البيت هووووووي
حسه انا قاعد اتلفت شمال ويمين
عشان القى لي زول اتكلم معاهو بس الظاهر
الناس قاموا مشوا وحتّى سيد البيت زاتو مشى goood
اها قلت استنى شويه يمكن زول منهم يجي وكان اتاخروا انا
زاتي اقوم امشي بيتنا اتعشى مع مرتي ووليداتي :D

أبو أماني
26-11-2009, 04:51 PM
[size=6][font=Arial Black][color=#FF0000]ياأهل البيت هووووووي
حسه انا قاعد اتلفت شمال ويمين
عشان القى لي زول اتكلم معاهو بس الظاهر
الناس قاموا مشوا وحتّى سيد البيت زاتو مشى goood
اها قلت استنى شويه يمكن زول منهم يجي وكان اتاخروا انا
زاتي اقوم امشي بيتنا اتعشى مع مرتي ووليداتي :D

القصة صادفت العيد الكبير وطبعا عارف الخرفان بقى سعرها متزامن مع مؤشرات داوو جونز يعني عربي الجزيرة أو الإم بي سي يقول ليك على خروف نيعافة عضامو بررررره بي 400 بس!!.. وتقول كاني ماني يقول ليك ها زول ها .. إت ما عارف الدولار بقى بكم ؟؟ .

القصة يا الحبيب ماشة مشرورة شررة عجيبة خلاااااس ربك يجيب العواقب سليمة سااااي .. المهم خلال وبعد العيد الكوع بيسخن وأرجى الراجيك .. الناس بتجيك بتخمة لحم العيد وفي الليلة ديك .. شيل شيلتك براكك .. تحياتي وتبركات العيد لك ولك من حولك ولنا لقاء .. عفوا للجميع بسودانيات خالص الحب وعيدكم مبارك (عساكم من عواده ) ...goood

فتحي مسعد حنفي
28-11-2009, 03:42 AM
القصة صادفت العيد الكبير وطبعا عارف الخرفان بقى سعرها متزامن مع مؤشرات داوو جونز يعني عربي الجزيرة أو الإم بي سي يقول ليك على خروف نيعافة عضامو بررررره بي 400 بس!!.. وتقول كاني ماني يقول ليك ها زول ها .. إت ما عارف الدولار بقى بكم ؟؟ .

القصة يا الحبيب ماشة مشرورة شررة عجيبة خلاااااس ربك يجيب العواقب سليمة سااااي .. المهم خلال وبعد العيد الكوع بيسخن وأرجى الراجيك .. الناس بتجيك بتخمة لحم العيد وفي الليلة ديك .. شيل شيلتك براكك .. تحياتي وتبركات العيد لك ولك من حولك ولنا لقاء .. عفوا للجميع بسودانيات خالص الحب وعيدكم مبارك (عساكم من عواده ) ...goood


أعزائي كل سنة وانتو طيبين وأهي فرصة راحة أقدر أقول فيها نبذة عن الأخ الشقيق مجدي الانسان النادر في كل صفاته وصدقوني هذا الانسان شخص نادر بكل معني الكلمة ولا أقولها لأنه شقيقي ولكن لمعرفتي به منذ طفولته رغم ابتعادي عنه في فترة نضوجه وأنا سائح في بلاد الله.. فقد تركته وهو في سن العاشرة ورجعت وهو في الواحدة وعشرين من العمر..
رأيت أن أحكي لكم ما فعله هذا المجدي والتضحية التي قدمها بكل تجرد حتي تستمر عجلة الحياة في أسرتنا..
عندما غادرت أرض الوطن بعد ثورة أكتوبر كانت أسرتنا مستورة الحال تساندني ماديا في غربتي وأنا لا أكلف نفسي حتي التفكير عن مصدر المال الذي كانو يرسلونه لي وكانت علاقتي بأهلي محصورة في التحويلات التي كانوا يرسلونها كل أول شهر حتي طلبت منهم أن يوقفوها بعد أن أحسست بأني قادر علي العيش معتمدا علي نفسي..وكانت السكينة تسرقني فلا أفكر في أحوالهم وكيف يعيشون ولم يخطر ببالي ان الزمن ليس دائما مبتسما لنا ثم جاءت لحظة موت العواطف التي يمر بها كل من انقطع عن وطنه لفترة طويلة وزاد الطين بللة عدم رجوعي الي السودان لمدة سبعة سنوات متواصة لدواعي أمنية.. كبدت أهلي الكثير من المشاكل حتي أصبحو لا يدرون بأي بقعة من بقاع الأرض أعيش وحتي باتوا يتلقون أخباري من بعض الاخوة العائدين الي السودان وبالطبع كانت أخبار مختلفة منها ما هو حقيقة ومنها ما هو من نسج الخيال..فمنهم من أخبرهم بأني أحارب في فيتنام ومنهم من قال لهم اني أشتغل في التهريب بين دول الغرب والشرق الشيوعي حتي أصبحوا لا يعلمون ان كنت حيا أو ميتا..
عفوا علي الاطالة ولكن هذه معلومات هامة تكشف لكم كم كنت مستهترا بكل ما هو مفروض علي تجاه من تكبدوا الكثير حتي في أبسط الواجبات وهي أخباري التي انقطعت دون سبب الا ميتة القلب وانعدام الاحساس..
عموما سبعة سنوات قضيتها متنقلا بين دول أوروبا شرقها وغربها أكتسب كل يوم خبرات جديدة وأخسر كل يوم نفسي وانتمائي..حتي شاءت الأقدار أن أعود بعدها الي الوطن بصورة لا أستطيع وصفها بغير انها تدخل مباشر من رب العالمين اكراما لدعوات الأم ولدموعها التي لم تتوقف طوال فترة انقطاع أخباري..واكراما لهذا الرجل الذي كان يقتطع من مصاريف البيت كي لا أحتاج لأحد في غربتي حتي جاء وقت الانقطاع الاجباري عن العمل ببلوغه سن المعاش ولم يستسلم بل هاجر وهو شيخ الي دبي حتي تستمر الحياة كما كانت بعد أن جهز وزوج ستة بنات وصرف علي الابن الكبير الضائع في مجاهل أوروبا وتبقي له ولدين وبنت كانت علي مشارف الزواج..
عدت الي السودان في نوفمبر 1978 ووصلت الي منزلنا في بحري فرأيت من تركتهم أطفالا قد أصبحوا في عنفوان شبابهم ولاحظت عدم وجود مجدي بينهم..
سألت أين مجدي فكانت الاجابة غير متوقعة:مجدي يعمل في دبي منذ ثلاث سنوات..تعجبت فقد كنت أتوقع أن يكون في سنته الأخيرة في الجامعة..
علمت فيما بعد انه وبعد امتحان الشهادة ونجاحه فيها بمجموع عالي يؤهله لدراسة الكلية التي يختارها قرر أن لا يواصل الدراسة حتي يساعد الأهل في حياتهم ولا يزيد عليهم مشاق الحياة باضافة تكاليف دراسته علي الوالد الذي أصبح دخله يادوب يكفي مصروف البيت والعيش في سترة..وغياب الابن الأكبر الذي هو أنا والذي كان من الواجب أن يتولي أمر الأسرة بعد عودته.
بكل تجرد قرر مجدي أن يضحي بمستقبله حفاظا علي الأسرة فترك الدراسة وذهب وراء لقمة العيش وبالفعل كان هو رب العائلة من ناحية توفير المادة لهم.. وحتي عندما لحقت به في دبي كان هو الذي يصرف علي وكنت أستعمل سيارته بل حتي كنت أسوق برخصة سواقته للشبه الشديد بيننا رغم سمار بشرته ...وحتي بعد حضوري الي القاهرة بعد أن تركت الخليج كان يرسل لي كل ما أحتاجه من مال أو ملابس لي ولأسرتي وكأنه بابا نويل عند حضوره لمصر في الاجازات.. أنا أدين لهذا الرجل بكل ما لي في حياتي وأدعو الله صادقا أن يمكنني من رد بعض من جمائله علي وهي لا تحصي ولا تعد..
ألا توافقوني بأنه شخص نادر الوجود..لك حبي وامتناني يا من أنت أكثر من شقيق:):)

مجدي مسعد حنفي
28-11-2009, 09:14 AM
يافتحي يااخوي
كل سنه وانت والاخوه اعضاء المنتدى وكل من يقرأ مانكتبه في
هذا البوست بالف خير وعافيه وسعاده,
طبعاً انا بشكرك على كلامك عني وبالمناسبه وانا بقرا في الكلام حسيت بدمعه حاره
غافلتني ونزلت من عيني ويمكن في حاجه انت مابتعرفها وطبعا مؤكد مافي
زول كمان بيعرفها وهي اني وبدون تجميل او مبالغه وطول عمري جوّاي احساس
صادق ومافيهو اي رياء اني بحبك اكتر من نفسي ويمكن حسه الكلام دا بعض الناس تفتكروا
مجرد كلام للرد على كلامك لكن بشهد الله وتشهد الدمعه اللسه مازالت نازله وانا بكتب
على صدقي .
وانا عارف اني يوم احتاجك حالقاك جمبي واقف لي سند وعون وهو دا الطبيعي بين
الاخوان بغض النظر عن العلاقه البتربطنا ببعض وربنا يديم علينا نعمة الاخوه والمحبه .

أبو أماني
28-11-2009, 05:59 PM
يافتحي يااخوي
كل سنه وانت والاخوه اعضاء المنتدى وكل من يقرأ مانكتبه في
هذا البوست بالف خير وعافيه وسعاده,
طبعاً انا بشكرك على كلامك عني وبالمناسبه وانا بقرا في الكلام حسيت بدمعه حاره
غافلتني ونزلت من عيني ويمكن في حاجه انت مابتعرفها وطبعا مؤكد مافي
زول كمان بيعرفها وهي اني وبدون تجميل او مبالغه وطول عمري جوّاي احساس
صادق ومافيهو اي رياء اني بحبك اكتر من نفسي ويمكن حسه الكلام دا بعض الناس تفتكروا
مجرد كلام للرد على كلامك لكن بشهد الله وتشهد الدمعه اللسه مازالت نازله وانا بكتب
على صدقي .
وانا عارف اني يوم احتاجك حالقاك جمبي واقف لي سند وعون وهو دا الطبيعي بين
الاخوان بغض النظر عن العلاقه البتربطنا ببعض وربنا يديم علينا نعمة الاخوه والمحبه .
* * *
اللهم أدم المحبة بيننا .. دمعتك خلها .. على الطلاق دمعات نزلت من عيني وأنا أقرأ كلام الشقيقين .. يا أخي ربنا يحفظكم من العين (والغين) وكل الحروف الأبجدية .. وطبعا فتحي يكون ممتن لي جدن لانو زمنو ده كلو منتظر سانحة زي دي عشان يقدر يوفي شقيقه حقه ولم يجد .. أما بالنسبة لمجدي .. فهل هناك ما يقال عنه عقب ما قاله الحبيب توحة ..

مش أنا براي .. صدقوني كتير غيري يكونوا (بغروا) من خوتكم الفريدة دي .. ربنا يحفظكم ويديمكم لبععض ولكل أحبابكم بسودانيات يأ اولاد مسعد الرجل الذي ظل خالدا بكما .. نسأل الله له ولكل فقدائنا ببركة هذا العيد السعيد الجنة وحسن الختام مع الصديقين وحسن أؤلئك رفيقا آميييين ..

ملحووووزة goood:-

ألم أقل لكم أن الهدف من هذا البوست .. توثيق الصلاة والمعرفية ببعضنا ..أهو عن طريقه إكتشفتم وجود ملاك في ثياب البشر يدعى مجدي مسعد حنفي .. له كل الحب ولنا سجالات قادمه معه أبقوا معنا وكل عام وجميعكم بخير والف عافية ..

مجدي مسعد حنفي
28-11-2009, 06:15 PM
ابو اماني العزيز
كل سنه وانت طيب وبخير وعافيه
ياخي والله كلامك كلام اخوان بالحيل وربنا ياخي يديم
بيناتنا المحبه والاخوه وانا والله من جواي بتمني كل زول عندو اخو
يشيلو جوه عيونو عشان الخوه حاجه كبيره مفروض كل الناس تعرف
معناها وتفهو صح عشان الواحد مايجي عليهو يوم ويندم في وقت مايفيد
فيهو الندم .

أبو أماني
28-11-2009, 06:34 PM
ابو اماني العزيز
كل سنه وانت طيب وبخير وعافيه
ياخي والله كلامك كلام اخوان بالحيل وربنا ياخي يديم
بيناتنا المحبه والاخوه وانا والله من جواي بتمني كل زول عندو اخو
يشيلو جوه عيونو عشان الخوه حاجه كبيره مفروض كل الناس تعرف
معناها وتفهو صح عشان الواحد مايجي عليهو يوم ويندم في وقت مايفيد
فيهو الندم .

الحبيب مجدي .. عيدك سعيد ومبارك .. ودامت افراحنا .. كلامك بلسم يشفي جروح الروح ويرد الروح .. ويخلى وراه دمعا بالحب فوق الخدود .. مسفوح, وطالما سعادتك على الهواء ناووو .. أنتهز الفرصة وأدخل معاك في طلب بسييييييط ..!!

حدثنا يا أستاذي عن :-
- أحب موقف في حياتك شعرت فيه بالسعادة .. أروي لنا تفصيلا ...
- عرفنا بأفراد أسرتك الصغيرة .. إسما وتعليقا ..
- لا أكثر عليك .. لنا عودة ثانية .. ولك خالص حبي .. تشاوووووو goood

مجدي مسعد حنفي
28-11-2009, 08:03 PM
تعرف ياابو اماني المواقف السعيده في حياة الواحد الحمدلله كتيره
لكن بجد من اهم المواقف السعيده في حياتي اللحظه الجات الممرضه طالعه
من اوضة العمليات شايله في ايدينا محمد وهو لسه مولود والغريبه محمد دا لما اتولد
كان حكايه شينه خلاس يعني كان عباره عن عضام مغطيه بجلد لانو كان ضعيف
جداً وطالع مفتح عيونو كبار ويعاين للناس كانو شايفم مع انو بيقولو الطفل الوقت داك
مابيكون عندو تركيز ولا فهم للصوره وطبعاً مصدر السعاده كان في الاحساس لاول
مره بالابوه وان الكائن الصغير القدامك دا حته منك
سبحان الله محمد لما اتولد كنا مسمينو إي تي طبعاً عارفو الكائن الفضائي الشين داك لكن
بعد تلاته شهور محمد دا كان زول تاني شكلاً وموضوعاً ولو شفت صورو في مهرجان
الخليج السينمائي الاخير حتعرف انا قاصد شنو بالتغيير لانو لما كبر بقى شاب وسيم ومشروع
نجم سينمائي .
اما الاسره فطبعا على راسا ام محمد وهي بت عمي من اسكندريه زي ماحكيت في بدايه
البوست اني مشيت اسكندريه عشان اقابل الوالد والوالده الله يرحمم قام النصيب شنكلني
ورجعني دبي وانا لابس الدبله بس بيني وبينك انا اتشنكلت من اول نظره وطول الوقت كنت
عامل فيها تقيل بس في اللآخر دقيت الدلجه وسلمت الرايه وبالمناسبه من الحاجات الظريفه
بعد مالمره جات دبي وبدينا ناخد على بعض صارحتني انها لما وافقت على موضوع الارتباط
ماكان السبب الرئيسي الحب والهيام لكن عشان اخواتا التلاته كانوا عايشين هنا في دبي
وهي كانت امها لسه متوفيه من مدّه قريبه وابوها من قبلها يعني ماكانت مرتاحه مع اخوانا الاولاد وعشان كدا قلت ليك قبيل الحب البيجي بعد العشره هو الابقى .
اما الفرد التاني فهو مهند ودا بيدرس في كلية الهندسه قسم التصميم الداخلي وتقريبا قدامو
سنه ونص على التخرج وهو شاب مهذب جداً وماخد من طباعي الهدوء وعدم التدخين
الارتباط بالبيت اغلب الاوقات وبالمناسبه محمد ومهند الاتنين عندهم ميول فنيه من ناحية
كتابة الشعر بس محمد ماخد الحكايه جد اكتر من مهند بالاضافه لان محمد ملحن وكل
اغانيه من تاليفو والحانو يعني بيالف الكلام ملحن طوالي بس المشكله حظو زيي يعني
لسه مستني باب الحظ يفتح قدامو .
اما الفرد الاخير في الاسره فهي منى ودي آخر العنقود وهي في الصف الاول الثانوي يعني
شويه وندخل في الاستعداد واستقبال العرسان وغايتو ربنا يرزقا بي عريس يكون ابن حلال
يسترا ويضلل عليها وماعايزين منو اكتر من كدا

احمد زين
28-11-2009, 08:28 PM
الحبيب مجدي
خليني ارجع بيك لوراء شوية
واسألك السؤال الما قدرت اسألو لصاحبي فتحي لانك انت كنت قريب من الوالد اكتر بحكم انك كنت موجود في البيت في الوقت الكان فيهو صاحبنا بين دول اوروبا يعرس ويطلق:D:D
سؤالي ان تحدثنا عن الوالد له الرحمه كأحد اعمدة شعراء الحقيبة المعروفين نشاته والمراحل التي مرّ بها كشاعر
وكيف كان يكتب قصائده؟
هل يكتب في كل الاوقات ام في المناسبات فقط ؟
هل استطعت ان تجمع كل اشعاره وحفظها؟
ولي عودة

أبو أماني
28-11-2009, 09:23 PM
تعرف ياابو اماني المواقف السعيده في حياة الواحد الحمدلله كتيره
لكن بجد من اهم المواقف السعيده في حياتي اللحظه الجات الممرضه طالعه
من اوضة العمليات شايله في ايدينا محمد وهو لسه مولود والغريبه محمد دا لما اتولد
كان حكايه شينه خلاس يعني كان عباره عن عضام مغطيه بجلد لانو كان ضعيف
جداً وطالع مفتح عيونو كبار ويعاين للناس كانو شايفم مع انو بيقولو الطفل الوقت داك
مابيكون عندو تركيز ولا فهم للصوره وطبعاً مصدر السعاده كان في الاحساس لاول
مره بالابوه وان الكائن الصغير القدامك دا حته منك
سبحان الله محمد لما اتولد كنا مسمينو إي تي طبعاً عارفو الكائن الفضائي الشين داك لكن
بعد تلاته شهور محمد دا كان زول تاني شكلاً وموضوعاً ولو شفت صورو في مهرجان
الخليج السينمائي الاخير حتعرف انا قاصد شنو بالتغيير لانو لما كبر بقى شاب وسيم ومشروع
نجم سينمائي .
اما الاسره فطبعا على راسا ام محمد وهي بت عمي من اسكندريه زي ماحكيت في بدايه
البوست اني مشيت اسكندريه عشان اقابل الوالد والوالده الله يرحمم قام النصيب شنكلني
ورجعني دبي وانا لابس الدبله بس بيني وبينك انا اتشنكلت من اول نظره وطول الوقت كنت
عامل فيها تقيل بس في اللآخر دقيت الدلجه وسلمت الرايه وبالمناسبه من الحاجات الظريفه
بعد مالمره جات دبي وبدينا ناخد على بعض صارحتني انها لما وافقت على موضوع الارتباط
ماكان السبب الرئيسي الحب والهيام لكن عشان اخواتا التلاته كانوا عايشين هنا في دبي
وهي كانت امها لسه متوفيه من مدّه قريبه وابوها من قبلها يعني ماكانت مرتاحه مع اخوانا الاولاد وعشان كدا قلت ليك قبيل الحب البيجي بعد العشره هو الابقى .
اما الفرد التاني فهو مهند ودا بيدرس في كلية الهندسه قسم التصميم الداخلي وتقريبا قدامو
سنه ونص على التخرج وهو شاب مهذب جداً وماخد من طباعي الهدوء وعدم التدخين
الارتباط بالبيت اغلب الاوقات وبالمناسبه محمد ومهند الاتنين عندهم ميول فنيه من ناحية
كتابة الشعر بس محمد ماخد الحكايه جد اكتر من مهند بالاضافه لان محمد ملحن وكل
اغانيه من تاليفو والحانو يعني بيالف الكلام ملحن طوالي بس المشكله حظو زيي يعني
لسه مستني باب الحظ يفتح قدامو .
اما الفرد الاخير في الاسره فهي منى ودي آخر العنقود وهي في الصف الاول الثانوي يعني
شويه وندخل في الاستعداد واستقبال العرسان وغايتو ربنا يرزقا بي عريس يكون ابن حلال
يسترا ويضلل عليها وماعايزين منو اكتر من كدا

والله يا أبو محمد أنا سعيد جدن بمعرفتك عن كثب .. وصدقني عيدي يادوووب ضقت طعمه ربنا يخليك ويخلي ليك محمد ومهند ومنى وأمهم .. ويحفظهم ليك من كل شر وتبقى بيهم قبيلة قول :(أمة كاملة) أمين .. طبعا لن أذيع سرا لو قلت أنو الآنسة منى كأنثى ثانية بالعائلة الصغرى والأولي بالنسبة لك وآخر العنقود كمان!.. لا شك أنها ست الكل وصاحبة الكلمة الراجحة في البيت والتي لا يرد لها طلب أيا كان .. وكان كلامي ما صاح .. كضبني .. قال لك أسعل مجرب .. اولادك طبعا العامل الوراثي جعل منهم فنانين حسب الجينات .. اتمنى ليهم النجاح .. أما منى فأتنبأ لها بمستقبل مشرق وشهرة تجوب الآفاق .. وبكرة تقول صديقي أبو أماني قال .. نعيش ونشوف أتركك مع العزيز (كلبظة) ومطباته الكارثية .. أعمل حسابك منوو الزول عيكليتة بلحيل .. الشوايقة طرطشوه متل أخوك كدي .. تشاووووووgoood goood goood

مجدي مسعد حنفي
29-11-2009, 12:53 PM
الحبيب ابو أماني
الله يخليك ويخلّي ليك الاسره الكريمه والحمدلله انك حسيت بي طعم العيد مازينا
هنا عيد مسيخ ماليهو اي طعم ويمكن الحسنه الوحيده اجازة العيد عشان بتجمعنا
سوا .
اما آخر العنقود منى فيازول انحنا ماعندنا بنات يدلعوا علينا وطلباتا اوامر في حدود
المعقول والحمدلله ربنا رزقني بي ذريه صالحه عارفين وفاهمين ظروفي الصعبه
ودايماً طلباتم في حدود المعقول المقدور عليهو وانا مافي حاجه مأزماني غير محمد
لانو هو الشايل المسؤليه فوق راسو يعني شايل هم نفسو وهم اخوانو وان شاءالله ربنا
يسهل لمهند ويتخرج ويشتغل ويشيل مع اخوهو القفه من اضانا التانيه .

مجدي مسعد حنفي
29-11-2009, 01:55 PM
الاخ العزيزأحمد محمد زين حسين ( عشلن ماتقول وين باقي اسمي:D )
في الاول خلينا نشوف موضوع الوالد احد اعمدة شعراء الحقيبه المعروفين لان الكلام بيزعل بعض الناس المازالوا مقتنعين بان ابوصلاح هو شاعر وجه القمر سافر والناعسات عيونن مش مسعد حنفي وكتير من الناس اتفنن في تاليف القصص لاثبات ذلك مع انو ابو صلاح ذات نفسو ماقال في يوم من الايام لغاية مامات انو الاغاني بتاعتو حتّى بعد مااتسجلوا في الاذاعه باسم الوالد الله يرحمو وطبعا مافي مجال نرجع نحكي الحكايه دي تاني من الاول لاني سبق ونشرت مذكرات الوالد في عدّة منتديات والمذكرات فيها بالتفصيل سبب اللبس البيقع فيهو الناس لكن الغريب ياخي الناس القرت المذكرات وبرضو مصرّه تقول الاغاني لابوصلاح والله حاجه تحيّر وانا كتبت ليك الكلام دا لاني لو مشيت مع الجماعه احباب ابو صلاح اكون اكدت انو مسعد حنفي ماشاعر حقيبه ولا حاجه عشان اصلا هو ماليهو غير الاغنيتين دل اغاني حقيبه اتغنّوا بصرف النظر عن قسيم الريد لي جود بالطيف لان الناس بتعتبرا مااغنية حقيبه لانها من الحان خضر بشير وهو مامن مغنين الحقيبه وانا اصلا مافاهم غنا الحقيبه هو لحن ولا كلام يعني الوالد نشر في كتاب امير الاغاني السودانيه ايام المشكله مع ابوصلاح مجموعة قصايد ماممكن نسميها غير قصايد حقيبه وطبعا للاسف الوالد قطع اي علاقه بالوسط الفني وقتها بعد المشكله ودا السبب الرئيسي لعدم ظهور تلك الاعمال للوجود والوحيد خضر بشير هو الاخد نص قسيم الريد من الكتاب ولحنو ومشى سمعو للوالد في البيت وطلب الاذن منو شخصياً وبالمناسبه دي سمعت من الوالد انوخضر بشير الوقت داك ماكان بيعمل الحركات بتاعتو الاتعودنا عليها منو وكان زول عادي جدا وكان ملحن تلاته اغاني للوالد اتنسوا مع مرور الوقت من ذاكرة خضر بشير ومن ذاكرة الوالد والوحيده السمعت مطلعا من الوالد كان بيقول حبك ياعازه علمني السهر ..
اما موضوع الطقوس المرتبطه بالكتابه فانا لما وعيت وكبرت شويه كان الوالد رجع تاني قطع علاقته بالوسط الفني بعد مناجاة ويومين ياناس لصلاح مصطفى والصباح للعاقب محمد حسن وبالتالي قل انتاجو بس الانا متاكد منو انو ماكان بيكتب في البيت واكيد معظم اعمالو في وقت فراغو في مكتبو في المخازن والمهمات او في سينما حلفايه ودا من خلال تجربتي انا شخصياً يعني انا ايام الدراسه كنت بكتب في البيت في الصالون لكن لما جيت دبي واشتغلت مااظن اني كتبت اي حاجه من اعمالي في البيت لا قبل العرس ولا بعدو ..
وبالنسبه لاعمالو فللاسف الوالد كان منظم جدا وعندو فايلات ودفاتر فيها معظم اعمالو من قصايد ومساجلات كرويه وقصص وروايات كلها اختفت من البيت بعد وفاتو ويمكن عدم وجودي في السودان وقت الوفاة ساهم في ضياع الارث العظيم دا وربنا يسامح الاستولا عليو لانو اكيد ماعارف قيمة الكنز العندو دا لو ماكان اتخلص اصلا منو بالحرق او التقطيع وحتى انا اتسرق مني هنا في الامارات نسخة كتاب امير الاغاني السودانيه واهمية النسخه ان فيها مجموعة قصايد لشاعر اسمو اب قور واب قور دا هو ذاتو مسعد حنفي ودا لقب اطلق عليهو خلال عملو في جبال النوبه في بداية حياتو والموضوع دا مافي زول بيعرفو إلاّ الناس الكانوا قراب جداً من الوالد ايام صدور الكتاب زي ابوصلاح وابناء ابو الريش اصحاب المطبعه واصحاب فكرة جمع واصدار الكتاب واللع اعلم صاحبنا الشال الكتاب من البيت عمل بيهو شنو ..
من الاعمال الكان مفروض ترى النور ملحمه غنائيه كامله بتحكي عن واحد مشى بيت عرس وهناك شاف واحده شنكلتو من اول نظره والنص بيحكي كل الاحداث بصوره رايعه لغاة مابيختم الوالد الملحمه بقولو ...
ومابين يوم وليله ..... عازه صارت لي حليله
الملحمه اعجب بيها ناجي القدسي جداً وبدا فعلا التلحين وكان كل فتره يمر على البيت ويسمع الوالد تطورات اللحن وناجي الوقت داك كان ساكن في حلة حمد قريب مننا وطبعا وفاة الوالد وهجرة ناجي لليمن والظروف الصعبه البيمر بيها قتلت العمل واتنسى وسقط من ذاكرة التاريخ.
ان شاءالله اكون وفقت في الرد على استفساراتك بصوره كافيه .

مجدي مسعد حنفي
30-11-2009, 05:13 PM
زمان كنت اسمع بي شيطان الشعر بكسر الشين وماكنت فاهم الحكايه او بمعني تاني
ماكنت مصدق لكن بيني وبينكم انا حصل معاي حاجه خلتني اصدق الكلام دا والموضوع
بختصار حصل معاي هنا في الامارات وهو اني بعد وصولي كنت مازلت مواصل رحلتي
مع كتابة الاغاني لكن فجأه وبدون مقدمات لقيت نفسي ابعد مااكون عن كتابة الشعر لدرجه
اني كنت اقعد وامسك القلم وقدامي الدفتر واحاول افتش على اي فكره تنفع تكون مطلع
لاغنيه القى راسي من جوّه ابيض مافيهو اي كلام لدرجة اني كنت اطلع الحاجات القديمه
واقراها واسأل نفسي معقول انا الكتبت الكلام دا وكيف وبدون مبالغه كنت احياناً بصل لدرجه عاليه من التوتر والانفعال النفسي ودا كلو بدون فايده وفي الاخر سلمت الرايه واقنعت نفسي
اني لا شاعر ولا يحزنون :mad:ونسيت الموضوع ومرت حوالي عشره سنين تصورو
مش حاجه عجيبه !!!!!!
وفجأه وانا في اجازه في مصر مع الاولاد في وقت كان لسه طالع فيها حميد الشاعري
ومصطفى قمر وهشام عباس وغيرهم لقيت نفسي منسجم مع الالحان لكن مامتكيّف من الكلمات
والحكايه دي استفزتني جداً وفجأه لقيت نفسي بحاول اكتب اغاني تاني بس الغريب في
الموضوع الشيطان المره دي كان مصري :D مع اني عمري ماكتبت اغاني باللهجه المصريه
وطبعا برضو البدايات ماكانت بالمستوى البرضي طموحي بس مع مرور الوقت اتحسنت
الامور وكتبت مجموعه كبيره من الاغاني المصريه بس اخوكم عندو مشكله مابيعرف يسك
الملحنين والفنانين عشان كدا ماعندي حاجه ظهرت إلاّ اغنيه واحده لمطربه مغربيه اسمها
سوسن قمر والالحان لأحمد بكر شقبق الملحن المعروف حلمي بكر وبعد كدا لحن لي صديق
اسمو ابراهيم خميس اغنيه رايعه كان مفروض تغنيها مصريه اسمها رانيا شعبان وكان من
المفروض تشارك بيها في مهرجان الاغنيه في القاهره لكن للأسف الجماعه اختلفوا في
القروش وضاعت الفرصه المهم بعد فتره الظاهر في شيطان خليجي ماعجبو يسيب الساحه
للشيطان المصري قام دخل في الموضوع بس الحمدلله اتفقوا مع بعض يعني وزعوا الاشغال
عليهمgoood وبقت الحكايه ماشيه شويه كدا وشويه كدا واتذكر مره كانوا قاعدين مع بعض
قعدة انس وروقان ليقت نفسي وانا في المكتب بكتب في نفس الوقت في اغنيتين واحده مصريه
وواحده خليجيه مع العلم الدوام بيبدا 7 صباحاً ويخلص 1 الضهر مش حاجه غريبه!!!!
الظاهر شيطاني السوداني لمن شاف الحكايه كدا والجماعه ديل احتلوا مكانو قام هو زاتو
عمل معاهم حلف بس تعرفوا هو طلع اقوى منهم واشطن لانو شويه شويه بدا يشتغل ليهم
في الازرق :D لغاية ماطفشم واستولى على الطاسه كلها ..
المهم مايرجع تاني بعد ماخلا ليهو الجو يطفشgoood

أبو أماني
30-11-2009, 08:54 PM
زمان كنت اسمع بي شيطان الشعر بكسر الشين وماكنت فاهم الحكايه او بمعني تاني
ماكنت مصدق لكن بيني وبينكم انا حصل معاي حاجه خلتني اصدق الكلام دا والموضوع
بختصار حصل معاي هنا في الامارات وهو اني بعد وصولي كنت مازلت مواصل رحلتي
مع كتابة الاغاني لكن فجأه وبدون مقدمات لقيت نفسي ابعد مااكون عن كتابة الشعر لدرجه
اني كنت اقعد وامسك القلم وقدامي الدفتر واحاول افتش على اي فكره تنفع تكون مطلع
لاغنيه القى راسي من جوّه ابيض مافيهو اي كلام لدرجة اني كنت اطلع الحاجات القديمه
واقراها واسأل نفسي معقول انا الكتبت الكلام دا وكيف وبدون مبالغه كنت احياناً بصل لدرجه عاليه من التوتر والانفعال النفسي ودا كلو بدون فايده وفي الاخر سلمت الرايه واقنعت نفسي
اني لا شاعر ولا يحزنون :mad:ونسيت الموضوع ومرت حوالي عشره سنين تصورو
مش حاجه عجيبه !!!!!!
وفجأه وانا في اجازه في مصر مع الاولاد في وقت كان لسه طالع فيها حميد الشاعري
ومصطفى قمر وهشام عباس وغيرهم لقيت نفسي منسجم مع الالحان لكن مامتكيّف من الكلمات
والحكايه دي استفزتني جداً وفجأه لقيت نفسي بحاول اكتب اغاني تاني بس الغريب في
الموضوع الشيطان المره دي كان مصري :D مع اني عمري ماكتبت اغاني باللهجه المصريه
وطبعا برضو البدايات ماكانت بالمستوى البرضي طموحي بس مع مرور الوقت اتحسنت
الامور وكتبت مجموعه كبيره من الاغاني المصريه بس اخوكم عندو مشكله مابيعرف يسك
الملحنين والفنانين عشان كدا ماعندي حاجه ظهرت إلاّ اغنيه واحده لمطربه مغربيه اسمها
سوسن قمر والالحان لأحمد بكر شقبق الملحن المعروف حلمي بكر وبعد كدا لحن لي صديق
اسمو ابراهيم خميس اغنيه رايعه كان مفروض تغنيها مصريه اسمها رانيا شعبان وكان من
المفروض تشارك بيها في مهرجان الاغنيه في القاهره لكن للأسف الجماعه اختلفوا في
القروش وضاعت الفرصه المهم بعد فتره الظاهر في شيطان خليجي ماعجبو يسيب الساحه
للشيطان المصري قام دخل في الموضوع بس الحمدلله اتفقوا مع بعض يعني وزعوا الاشغال
عليهمgoood وبقت الحكايه ماشيه شويه كدا وشويه كدا واتذكر مره كانوا قاعدين مع بعض
قعدة انس وروقان ليقت نفسي وانا في المكتب بكتب في نفس الوقت في اغنيتين واحده مصريه
وواحده خليجيه مع العلم الدوام بيبدا 7 صباحاً ويخلص 1 الضهر مش حاجه غريبه!!!!
الظاهر شيطاني السوداني لمن شاف الحكايه كدا والجماعه ديل احتلوا مكانو قام هو زاتو
عمل معاهم حلف بس تعرفوا هو طلع اقوى منهم واشطن لانو شويه شويه بدا يشتغل ليهم
في الازرق :D لغاية ماطفشم واستولى على الطاسه كلها ..
المهم مايرجع تاني بعد ماخلا ليهو الجو يطفشgoood

ألم أقل لكم ؟؟ بالله كم منا كان يجهل كل هذه الحقائق عن شخص نكن له حبا لا يضاهى ونجهل عنه الكثير!! .. ولن يزعل مني العزيز مجدي أو شقيقه الأكبر لو قلت بكل صراحة كنت كسائر بني جنسي من ذوي البشرة الداكنة السمراء ننظر لكل من هو سوداني أذنه صفراء أو حمراء أو بيضاء.. نظرة تبطن قناعة باطنه بانه سوداني نص كم!.. لا تؤاخذوني في صراحة مجردة صارخة كهذي .. فقربي من الشقيقين وحبي لهما جعلاني أبوح بما يحجم عن ذكره الآخرين ويقيني أنهما أحسا به من بعض الأخوة الإنطباعيين..نعم والله صدق كبارنا حين قالوا .. اللي ما يعرفك يجهلك .. أو إن لم تعاشر فلانا فأنت لا تعرفه .. عشرتي مع الأخوة من بني جنسي مع إختلاف البشرة ولونها وأنسابها..ومعرفتي الوثيقة لهما من خلال هذا البوست ومداولات أخرى جعلتني أوقن يقينا قاطعا .. بأنني على حق عند إعتزازي بكوني سوداني .. وتصوروا كيف يكون الحال لو ما جيتا من ناس ديل وناس الحارة ما .. أهلي؟ أكان .. وأ.. مآساتي وأ .. ذلي ..ودمتم بخير يا رائع يا فنان .. يا ربيب الروعة والفن ودام لك الدهر صافيا زاهرا .. وأمتعنا بما تكنزه من درر .. لك معزتي الخالصة.

مجدي مسعد حنفي
01-12-2009, 04:28 PM
تعرف يا ابواماني يااخوي كلامك دا صح ميه في الميه بس في حاجه مهمه جدا في شخصيتي واعتقد في شخصية فتحي كمان وهي اني ابدا ماحصل في يوم من الايام فكرت في الكلام دا لاني فعلا من يوم ماتولدت ماحسيت في يوم من الايام اني ماسوداني وان ابوي اصلو مصري ووووووووو حاجات كتيره تعرف ليه؟ عشان ياهو هو السودان يعني حتى لما زول يقول ليك ياحلبي كانت بتتقال بي هزار وضحك ماشتيمه والغريبه ياخي انا درست الثانوي في مدارس البعثه التعليمه المصريه يعني درسوني مدرسين مصريين ومعاي في سنوات الدراسه مجموعه من الطلبه المصريين لكن والله العظيم انا ماحصل في يوم من الايام حسيت اني بنتمي للناس ديل حتى اصحابي في المدرسه كانوا سودانيين واصحابي هنا بقصد بيها المقربين وحتى لما عرست بت عمي الاسكندرانيه برضو دا ماغيّر من طبعي حاجه مع اني بحب اسكندريه جدا لكن رغم السنين دي كلها ماقادر احب طباع المصريين واتاقلم معاها لما امشي في الاجازات يعني لو علي اقضي الاجازه قاعد في البيت اتقرج على التلفزيون عشان ماانزل الشارع واحتك بالناس وبالذات سواقين التاكسي عشان المصريين كوم وديل كوم براهو وانا زول عصبي يعني لازم كل طلعه اعمل لي مشكله مع سواق التاكسي غايتو الله يخلي السودان ويحفظو من كل شر
قول آمين.

فيصل سعد
02-12-2009, 12:02 AM
سلامات حبيبنا و عزيزنا مجدي
و كل عام و انتم بخير، و نسعد بوجودك في هذا البوست
و التحية لصاحبه،، و نرجو ان تحدثنا قليلا
عن بحري و زمنكم فيها كفر و وتر ، خصوصا
و اخوك الخواجة فتحي كان حارس مرمى "استاك" و كدا ..
و سؤالنا الثاني محطة استقرارك بعد دبي
ستكون مصر ام السودان و لماذا ؟
مع اطيب التحايا و وافر الود
و الاحترام العميق ..

فتحي مسعد حنفي
02-12-2009, 08:58 AM
سلامات حبيبنا و عزيزنا مجدي
و كل عام و انتم بخير، و نسعد بوجودك في هذا البوست
و التحية لصاحبه،، و نرجو ان تحدثنا قليلا
عن بحري و زمنكم فيها كفر و وتر ، خصوصا
و اخوك الخواجة فتحي كان حارس مرمى "استاك" و كدا ..
و سؤالنا الثاني محطة استقرارك بعد دبي
ستكون مصر ام السودان و لماذا ؟
مع اطيب التحايا و وافر الود
و الاحترام العميق ..



يامجدي كدي قبال ما ترد علي الزول دا خليني أوريك هو منو..وبعدين خلي ردودك حسب المطلوب..
فيصل سعد دا يامجدي من أولاد مدينة العين سابقا وصاحب محمد مرغني ود السرف ألله يرحمها يعني داخل مذاكر وبيسأل بي خباثة..يعني قال ليك كان بيلعب في استاك..يعني أنا عمري 100 سنة وكنت بلعب مع عثمان الحاج ودولي وبدوي وعمر الحلبي خال محمد مرغني وأخو صديق الكلس..حكاية ماشي وين بعد دبي قول ليهو ماشي نيجيريا وأوعي توريهو ماشي وينgoood
وهو ذاتو لو سألتو حيمشي وين تلقاهو ما عارف عشان انتمائه تاه ما بين كندا وبيت المال وتوتي وبري وما خفي أعطم:p أبقي بي عافية وأنا حأجيك تاني للرد علي أبو أماني بس ما هسة:)

فيصل سعد
02-12-2009, 09:09 AM
يامجدي كدي قبال ما ترد علي الزول دا خليني أوريك هو منو..وبعدين خلي ردودك حسب المطلوب..
فيصل سعد دا يامجدي من أولاد مدينة العين سابقا وصاحب محمد مرغني ود السرف ألله يرحمها يعني داخل مذاكر وبيسأل بي خباثة..يعني قال ليك كان بيلعب في استاك..يعني أنا عمري 100 سنة وكنت بلعب مع عثمان الحاج ودولي وبدوي وعمر الحلبي خال محمد مرغني وأخو صديق الكلس..حكاية ماشي وين بعد دبي قول ليهو ماشي نيجيريا وأوعي توريهو ماشي وينgoood
وهو ذاتو لو سألتو حيمشي وين تلقاهو ما عارف عشان انتمائه تاه ما بين كندا وبيت المال وتوتي وبري وما خفي أعطم:p أبقي بي عافية وأنا حأجيك تاني للرد علي أبو أماني بس ما هسة:)

انت يا كافي البلاء فقدت حسن الظن تب :D:D
خباثة شنو يا ابو آلاء الداير تبهتنا بيها و نحن خاتنك
في اعز مكانة ، تعرف يا معلم انت من ما تابعت ناس
ابو اماني و شلة سوق الناقة حالك اصبح لا يسر بتاتا :D:D
بعدين ما تشكك مجدي فينا لانه عارفنا و عارفنوا و صاحبنا
و مصاحبنوا ، فامشي شوف ليك سمسمية قرقشها و اتخارج
و بطل لخبتة و امشي شاكل ود ابو عاقلة و كيشو
اللابتين ليك في الزقاق :D:D

مجدي مسعد حنفي
02-12-2009, 10:33 AM
الاخ العزيز فيصل سعد
تحياتي ياحبيب وكل سنه وانت طيب
تعرف انا زول مابعرف الخباثه ولا اللف والدوران يعني مع التحذير بتاع فتحي برضو ماحاكون متحفظ في ردي عليك وحاجاوبك على اسألتك بكل وضوح مع استعمال بعض الخباثه اذا لزم الامرgoood .
بحري وماادراك مابحري بلد جميله ولذيذه وطبيعي يازول المكان الاتولدت فيهو وعشت طفولتك وشبابك في حواريهو وشوارعو ( اوعى تفتكرني من اولاد الشوارع :D )تكون شايف انو احلى مكان وزي مابيقولوا المكان حلو بي ناسو وطبعا الواحد كان بمشي امدرمان وبمشي الخرطوم لكن كانت في الغالب زيارات تقضية مصالح وواجبات وزيارات رسميه يعني امدرمان لي فيها بيت خالتي هنديه الله يرحما وفيها اهلي المطبعجيه في بيت المال وبيت عمتي في الثوره لكن كنت بمشي كتير في الفتره الاخيره قبل هجرتي لدبي لعمر الشاعر في العباسيه ام الخرطوم فكان فيها بيوت اخواتي وبيت عمي حمدي الله يرحمو وبعض القرايب في بري وامتداد ناصر
لكن بحري حاجه تانيه بالنسبه لي لاني عشت بين ناسا احلى سنين عمري وتقريبا كان لي في كل حي فيها اهل واصدقاء وطبعا الكلام دا على بحري القديمه مش الحاليه لاني حوالي 27 سنه منقطع عن السودان يعني في احياء كتيره طلعت والقديمه زاتا اتغيّرت عشان كدا الذكريات مرتبطه ببحري شارع بيتنا او شارع جنينة البلديه ودار الرياضه بحري حلة حمد والبابورات ونادي البحريه وميدان البابورات الطلع منو قرن شطه وقرن شطه للمابعرف من اولاد حلة حمد وياما لعب معانا كوره وياما امتعنا بعزفو على ألة الهارمونيكا ومعلومه كمان عن قرن شطه انو اول مابدا الناس تعرفو عرفوهو في دوري الدرجه الرابعه او التالته مع فريق الثريا
ومن الذكريات الجميله اني وانا في المرحله الاعداديه كنت ايام اجازة المدرسه بصحى كل يوم بدري امشي المحطه الوسطى بحري اتشتري الجرايد وبعض المجلات يعني عامل فيها مثقف:D
يعني المشوار دا ماحاجه ساهله يعني بتاع كم كيلو كدا لكن كنت بستمتع بيهو جداً
دا كان مشوار الصباح اما مشوار المسا فكان بيصل لغاية البوسطه في الغالب مابكون براي عشان كنت بخاف امشي بالليل برايgoood يعني كنا بنتجمع ونمشي نتعشا في كيسو او عمر الخيام لمن نكون عايزين نكسر الفول بالكبده وطبعا بعد العشا لازم كباية الليمون او الشعير من حسن نضيف حبيب الكل :cool: والواحد برضو مابنسى لمن جيبو يكون مليان شويه كان بيخللي العشا من سبأ او الاندلس بس ياخي سبأ دا كان بيعمل سندوتش زغني انا كنت بعشقو فعلا وعشان تكتمل الصوره لازم قطعة البسبوسه بعد العشا طبعا الطقوس دا كتير ماكانت بتم بعد السينما في الغالب سينما حلفايا عشان الوالد كان مدير السينما يعني الدخول ميته وطبعا المشاوير دا كلها كانت بالرجلين يعني تخيل من قدام البيت للسينما مشوار قدر شنو ومرات كمان كنت بمشي لابعد من كدا ازور اختي ابعد من السينما يعني الواحد قصة تكس وباص دي ماكان بيفكر فيها إلاّ لما يكون ماشي الخرطوم او امدرمان وعلى طاري الباصات مرّه كنت في بيت عمر الشاعر طلعت ركبت بكاسي عشان امشي المحطه الوسطى امدرمان والحمدلله وصلت وركبت بص المواصلات لبحري الكمساري كان في اول الباص وانا قاعد في الآخر قات اجهز القروش والزمن داك اظن الاجره كانت قرشين :confused:المهم دخلت ايدي في جيب البنطلون الصغير مالقيت في قروش وانا متأكد اني عامل حسابي وعندي قروش بالزياده يازول شمال يمبن جيب القميص جيوب البطلون مافي فايده اها هنا بديت اتوتر يعني حسه اقول للكمساري شنو وانا زول لابس قيافه وود ناس معقوله اقوليهو ماعندي قروش وزي ماقلت ليك في الاول انا مابعرف اللف والدوران وحسه الزول دا حيصدقني لو قلت ليهو الحقيقه ياخي سبحان الله وانا في خضم توتري لقيت الكمساري لمن قرب مني بيشاور لي بي ايدو اني اطنش وما امد ليهو القروش في الاول انا استغربت وبقيت مامصدق الحاصل لكن لمن قرب شديد مني ودققت فيهو اكتشفت انو من اولاد الحله (حلة حمد)goood وانا ماكان لي معرفه بيهو غير السلام في الشارع ... لكن الاغرب من كدا اني لما وصلت البيت وقلعت البنطلون اكتشفت ان القروش كانت في الجيب الصغير في مكان صعب صوابعي تصل ليهو بسهوله :mad:
من الذكريات اللطيفه ايام الثانوي اني كنت بمشي كل يوم المحطه الوسطي الخرطوم بالطراحه بس كنت بعمل حسابي اطلع من البيت بدري عشان امشي اقيف في المحطه الوسطى بحري واصبح عيوني بي جمال بنات المدارس صاحبات الحسن والدلال والابتسامات من تحت لي تحت والنظرات الوديعه ;) يعني لازم آخد جرعة الحنان من بحري وانا كمان اكمل الجرعه قدام جمال عبدالناصر من بنات الكليه القبطيه ياخي حاجات محفوره في الذاكره مابتتمحي ابداً .
اما يالحبيب موضوع امشي وين فدا ماقاعد افكر فيهو لاني ماناوي امشي من هنا إلاّ بي ابعاد يعني يركبوني الطياره بالغصب :D بس بيني وبينك المنطق بيقول اني لو سبت الامارات طبيعي امشي اسكندريه لاني هناك عندي شقتي حدادي مدادي يعني حاعيش في ملكي لكن في السودان انا ماعندي ملك بعد مابعت نصيبي في بيت حلة حمد لاختي عشان اقدر اكمل هنا ومع ان بيوت اخواتي مفتوحه لي ولي اولادي بس برضو بيتك اكرم ليك ولا شنو رايك .

فتحي مسعد حنفي
02-12-2009, 11:10 AM
يامجدي انت الظاهر عليك طول المدة البعدت فيها من السودان لخبطت موازين المسافات عندك..
كم كبلو شنو المن البيت للمحطة الوسطي:D ياخ الكيلو دا 4 لفات ميدان الكورة يعني لو فرتقت ميدان كورة ورصيتو طوليا ورا بعضو أخر متر منو بكون جوة كشك الجرايد..دا لو ما وصل المغالق البعد الجامع:D
يا فيصل ويا أبو أماني مجدي راجل سوداني بمعني الكلمة ..تصوروا انو لا يمكن يتكلم مصري علي الرغم من انو عايش في الامارات كمصري..وزوجتو مصرية وأولادو بيتكلمو مصري.الا انو مع مرتو وأولادو بيتكلم سوداني صرف ودا سبب مشاكلو مع بتاعين التكس في مصر عشان لما يكلمهم بي لهجتو السودانية بيتعاملو معاهو كأجنبي صيدة وطبعا ما حيوري جواز سفرو المصري عشان يفهمم انو زيو زيهم..يعني أنا أذكر انو كان مقدم لي تلفون لشقة الاسكندرية وكان كل ما يمشي يراجع يقولو ليهو بكرة لغاية ما أنا مشيت معاهو ودخاخيني طالعة وطلعنا للمدير في السنترال وهناك أخوكم رمي ليهو الكارنيه الصحفي قدامو وهم طبعا بيخافو من الصحافة خوف شديد..الراجل طوالي قام يعتذر والحكاية بقت فيها يابيه ما تزعلش نفسك أنا حأشوف الموضوع دا بنفسي وفعلا يمكن في نفس اليوم التلفون اشتغل..
دا كلو عشان ما بيتكلم معاهم بالمصري..
أنا مثلا في بيتنا مافي كلام مصري الا مع المصريين ورأفت ميلاد لما كان معاي هنا قال مستغرب بناتي ديل كيف بيعملو سويتش ويقلبو من لغة للتانية بدون ما يتلخبطو..أما أنا فلغاية اليوم عندي لكنة سودانية واضحة ولما خفت بقو يفتكروني من أسوان لقرب اللهجة الأسوانية من السودانية..أما أولاد مجدي فكلامهم مصري صرف عشان طبعا العيال بيتكلمو بي لغة الأم عشان كدا الخواجات بيسمو لغة الانسان الأصلية: mother tongue أفتكر كدا وضحت بعض النقاط الخافية..

مجدي مسعد حنفي
02-12-2009, 04:53 PM
يافتحي ياخوي
انت كنت بتدرس اعلام ولا مساحه:D

فتحي مسعد حنفي
02-12-2009, 08:38 PM
يافتحي ياخوي
انت كنت بتدرس اعلام ولا مساحه:D




زمان يامجدي وأنا طالب في كلية الصحافة في براغ عميد الكلية زارنا في المدرج عشان يدينا نصائح مفيدة في المهنة وركز في الأول علي : هل تملك أهم مؤهل لتكون صحفيا..وورانا سر النجاح في الآتي: عشان تكون صحفي ناجح لازم تكون انسان بلا مبدأ وبلا ضمير تجيد الكذب واللعب علي جميع الحبال ومن لا يملك هذه المؤهلات عليه أن يبحث عن كلية تانية..تصور الكلام دا حصل بالضبط زي ما حكيتو ليك وطبعا احنا أخدنا الموضوع كنوع من الدعابة ولكن بمرور الزمن اكتشفت ان هناك جانب كبير من الحقيقة في كلامو وانو ما كان بيهزر فمعظم الصحافيين الكبار من المشاهير يتمتعون بهذه الصفات..
الحاجة التانية قال لينا عشان تبني حيطة لازم تشوف طوبة كويسة تبدا بها البنا وانت يالحبيب الكيلومترات بتاعتك دي كانت الطوبة الفتحت بيها الكلام عشان أجيب الكلام البعد داك عنك..
فهمت:Dيعني الموضوع لا مساحة ولا حاجة وكان مجرد خيط يوصلني لبكرة الخيط العايزا..كلام خارم بارم مش كدا:Dgoood

أبو أماني
03-12-2009, 06:09 PM
الله يطرح فيكم البركة يا أولاد مسعد وياود سعد..شوف الهناء والسعادة دي بالله!حتى أسماءكم توحي بالسعادة وأنا والله أسعد الناس بيكم.. على الليمان بقرأ في البوست ده ومداخلاتكم الرائعة دي طوووالي الذاكرة رجعت بي كمين سنة كده لوراء وتخيلت روحي في سينما الحلفايا أو الوطنية بحري بشاهد لي في فيلم من أفلام الزمن داك وقاعد بكل مشاعري مع الشاشة .. قول فيلم الأرض للمرحوم المليجي وعزت العلايلي أو نهر الحب لطيبة الذكر فاتن حمامة وبعلها عمرالشريف .. أو فتوات الحسينية لفريد شوقي على ما أظن .. يا أخي والله إنتو عالم من الروعة .. الله يخليكم لبعض ويخليكم لينا ويسلم ود سعد اللي بيعرف يحرك المياه فوق البرك الراكدة .. دمتم أحبائي ومازلنا معكم في إنتظار الكثير المثير الخطر ..

الحبيب مجدي .. لآنك ما زول لف ودوران زي أخوك ده بسعلك سؤال وأنا واثق إنك حتقول الحقيقة خاصة لو أم محمد ما قاعدة تخش المنتدى ..

كل واحد فينا وخاصة فتحي مسعد يحمل بين جوانحه سرا عاطفيا حميما لا يبوح به .. ولكن وبما إننا بلغنا من الكبر عتيا .. وبقت ما فارقة معانا عاوزك يا مجدي تقول لي بكل صراحة وتصف لي الإنسانة التي تملك هذا السر والتي لم تقبل القسمة بأن تكون من نصيبك ..! هيييييع أمانا ما وقع راجل .. قالوا الصقر كان وقع كترة البتابت عيب .. ورينا شغلك يا أبو محمد .. تشاووووgoood

فيصل سعد
03-12-2009, 07:03 PM
انت يا ود حاجة فاطنة
ما كنت ماشي كويس، مالك بديت تطبز :D:D
و تنكش في الشواكيش الهايدرولكية :D:D
بعدين انت بتقعد في الكرسي دا بتين، لانه الناس
سانة السكاكين و راجياك، و اي زول لخبت معاو
مديني توكيل لنبشك، و الجنس اللطيف موكل ايمولا
فدحين خلص مع مجدي دا و بل راسك ساي :D:D
لانوا جميع ملفاتك بحوزتنا ابتداء بابحشيش جنوب نادي
بري القديم مرورا بكترينا، ديم سلك، بابا كوستا
و قهوة الزيبق الى الفروانية و السالمية و حولي، و هاشم
طه وعدنا بارسال شذرات من المثير الخطر :D:D

و تبكي بس ..

مجدي مسعد حنفي
03-12-2009, 08:25 PM
الحبيب الغالي ابو اماني
يازول انت مالك تلف وترجع تاني للموضوع زاتو
انت العربيه الراكبا دي الدركسون بتاعا بلف جهه واحده :D
غايتو اوعدك كان مرّه الظروف جمعتنا سوا في اي مكان من الكوره
الارضيه وياريت طبعاً يكون في السودان اوعدك الوقت داك اكشف ليك
السر الخطير بتفاصيلو:p:p:D

أبو أماني
04-12-2009, 09:15 AM
انت يا ود حاجة فاطنة
ما كنت ماشي كويس، مالك بديت تطبز :D:D
و تنكش في الشواكيش الهايدرولكية :D:D
بعدين انت بتقعد في الكرسي دا بتين، لانه الناس
سانة السكاكين و راجياك، و اي زول لخبت معاو
مديني توكيل لنبشك، و الجنس اللطيف موكل ايمولا
فدحين خلص مع مجدي دا و بل راسك ساي :D:D
لانوا جميع ملفاتك بحوزتنا ابتداء بابحشيش جنوب نادي
بري القديم مرورا بكترينا، ديم سلك، بابا كوستا
و قهوة الزيبق الى الفروانية و السالمية و حولي، و هاشم
طه وعدنا بارسال شذرات من المثير الخطر :D:D

و تبكي بس ..

ها .. إتا قايلني داقس ليك ؟.. على اليمين أنا أحرف من اشتر في الزوغان .. حلاة ليق .. ليق .. قايلني بقعد ليك .. عشان إنت والخواجة بتاعك ده تشرحوني .. تلقوها عند القافل .. بجوكرين مخاواه .. ورموا ليو الدوو .. يلا تشاووو كدي سوي فلاحتك مع مجدي باقي لي قادر عليك تب .. وفصاحتك كلها طلعت شمار في مرقة .. goood goood goood

بابكر مخير
04-12-2009, 09:25 AM
مجود
مرحب بيك يابا
ويا أبو أماني، إختيار موفق في الإستضافة

مجدي مسعد حنفي
04-12-2009, 10:14 AM
الحبيب بابكر
كل سنه وانت طيب
ياخي شغلتنا عليك تلفنت ليك في العيد لكن مارديت
وخلليتني اغني العيد الجاب الناس لينا ماجابك :( والله ليك
وحشه وان شاءالله تكون امورك واهلك تمام التمام

أبو أماني
05-12-2009, 05:07 PM
الحبيب بابكر
كل سنه وانت طيب
ياخي شغلتنا عليك تلفنت ليك في العيد لكن مارديت
وخلليتني اغني العيد الجاب الناس لينا ماجابك :( والله ليك
وحشه وان شاءالله تكون امورك واهلك تمام التمام

يا أخوي كتر الف خيرك البقيت سبب للعزيز بوكو يوسخ نعالوا ويجي علينا بي جاي .. وهات رأسك أبوسها .. وبالله ما تقطع يا ود مخير ليك وحشة والله ..بعدين تعال هيي يا فالح دار تعمل لي حركات أخوك الأوانطجي فتحي سمسمية دي؟؟ صدقني بوكو ظاااطو مستني بشوق جوابك على سوعالي الأخير داك ..أأأأأي حق الجيكس .. الحبوكانا الزمان والقسمة قالت لا .. يلا عليك الأمان وما تخاف مافي زول بيصل المدام ولا إت من جماعتنا ناس .. Who؟ لك الحب كله ولبوكو أضعاف ..goood

فيصل سعد
12-12-2009, 04:35 PM
الحبيب ابو اماني:
لكم التحايا الباذخة،

بالله عليك، ادينا اشارة عندما
تكمل مع الحبيب مجدي، لانه
عندنا ليك زبون/ة من العيار التقيل ..

أبو أماني
12-12-2009, 05:41 PM
الحبيب ابو اماني:
لكم التحايا الباذخة،

بالله عليك، ادينا اشارة عندما
تكمل مع الحبيب مجدي، لانه
عندنا ليك زبون/ة من العيار التقيل ..

تستأذن مييين يا أبو سعد؟ ده أنت صاحب الدار ونحن في ضيافتك وطبعا عارفك ذوقك رفيع حتكون شخصية آخر اللآطة .. بس خلينا نملص أخونا مجدي ده وعليك الله ساعدني يافردة .. ده جرابو مليان ملي تمام محل تهبشو تلقاه جاهز موية ونور .. ماشاء الله عليو .. تحياتي لاسرتك الكريمة .. وقول لبت قسومة .. عابدين بتتذكريو ولا كندا لفت ليك راسك .. وقول ليها الست بتسلم عليك .. والله إتذكرت الست عمتك كانت شرقانة بمرتك دي شرقة .. تشيل وتختب فيها لي أولاد أهلها لكين ربنا مرقها من ضل السيف .. وقعت ليها في راجل هدي ورضي .. ولا بينهرش ولا حاجة .. بس بيغسل العدة بمزاجه براهو .. مش كده يا بوكو ؟!! gooodتشاوووو

فيصل سعد
12-12-2009, 05:55 PM
تستأذن مييين يا أبو سعد؟ ده أنت صاحب الدار ونحن في ضيافتك وطبعا عارفك ذوقك رفيع حتكون شخصية آخر اللآطة .. بس خلينا نملص أخونا مجدي ده وعليك الله ساعدني يافردة .. ده جرابو مليان ملي تمام محل تهبشو تلقاه جاهز موية ونور .. ماشاء الله عليو .. تحياتي لاسرتك الكريمة .. وقول لبت قسومة .. عابدين بتتذكريو ولا كندا لفت ليك راسك .. وقول ليها الست بتسلم عليك .. والله إتذكرت الست عمتك كانت شرقانة بمرتك دي شرقة .. تشيل وتختب فيها لي أولاد أهلها لكين ربنا مرقها من ضل السيف .. وقعت ليها في راجل هدي ورضي .. ولا بينهرش ولا حاجة .. بس بيغسل العدة بمزاجه براهو .. مش كده يا بوكو ؟!! gooodتشاوووو

يمين ما خاتية ام اماني عليك،
كان جرتك من اضانك و
ردمتك شارع 53
منزل رقم 12، يا المطموس :D:D
و مفراكاتها اتمحقت بسببك يا اكسلانس ..
بعدين نحن راجين طلتك في البوست
المثبت في راس البيت هناك، مالك عامل
رايح و كدا ..

يديك العافية ..

فتحي مسعد حنفي
12-12-2009, 06:10 PM
يمين ما خاتية ام اماني عليك،
كان جرتك من اضانك و
ردمتك شارع 53
منزل رقم 12، يا المطموس :D:D
و مفراكاتها اتمحقت بسببك يا اكسلانس ..
بعدين نحن راجين طلتك في البوست
المثبت في راس البيت هناك، مالك عامل
رايح و كدا ..

يديك العافية ..

ما تخاف يافيصل الراجل جاي جاي لكن أظنو مستني ود الزين يجيب ليهو السلم عشان يطلع بيهو فوق..الكلام دا علي ضمانتي عشان الرشحو زول عزيز عليهو;):D

أبو أماني
13-12-2009, 06:04 PM
مجود
مرحب بيك يابا
ويا أبو أماني، إختيار موفق في الإستضافة

وينك يا ملك ؟.. بوكو الختييير شوقنا ليك محمل بالبوابير .. الحكاية شنو يابا .. خلااااس إتعزز الليمون عشان بالغنا في ريدو؟ .. المائدة ما غشيتها والقهوة خليتها .. الهوم ويرك كتر اليومين ديل ولا شنو يابا ..؟ قالوا أسعل مجررررب .. شايف ودسعد وود مسعد طرطشوا لي البوست الليلي وخلو مجودي يعاين ليهم ساااااكت .. عليك الله يا بابكر أدي مجدى ده دفرة بسوعال كارب خلى المواضيع تسلك .. وتسلم يا ملك ..gooodتشاووووgooodgoood

بابكر مخير
14-12-2009, 05:57 AM
وينك يا ملك ؟.. بوكو الختييير شوقنا ليك محمل بالبوابير .. الحكاية شنو يابا .. خلااااس إتعزز الليمون عشان بالغنا في ريدو؟ .. المائدة ما غشيتها والقهوة خليتها .. الهوم ويرك كتر اليومين ديل ولا شنو يابا ..؟ قالوا أسعل مجررررب .. شايف ودسعد وود مسعد طرطشوا لي البوست الليلي وخلو مجودي يعاين ليهم ساااااكت .. عليك الله يا بابكر أدي مجدى ده دفرة بسوعال كارب خلى المواضيع تسلك .. وتسلم يا ملك ..gooodتشاووووgooodgoood

أمسك!! قول يابا..
حكاية البوابير دي مستوحآ من "الجو" ولا جات كدآ برآآآآآآآآآآآآآآآآآآآآآآآآهاlooool
بعدين شايفك بديتا لينا بالقلابآ:(
الشين بعدين السين..
كدي شوف النضارة تكون ملبوسة بالقلابآ...

تعرف فتحي دآ من يوم عرفتهو؟؟؟؟
بحب يخلط تلقاهو يجيب ليك الأخضر الليموني يمزجهو الأحمر القاني ويطلع ليك حروف هرغلوفية لكن ود سعد تشم فيهو ريحة توتي وهناك طبعن الليمون بالهبل، بس من طريقتهو تقول ما بتاع عصاير ولا بيعرف يوزن الأخضر الليموني، لكنهو ذي ود خالي "شوقي" بيخالط...

دحن أعذرهم و"مجود" زول الله دآ!!
بيعرف يطلع ليهم حقهو بهداوة..
بالله شفتا ردوهو كيف تقيلة،،
بالله وزنة قدر العيار "ما تمشي تقراها عبار" تقع ولاها شوال أسمنت "دي لناس زمااااااان، عارفيييييييييييين الغرطسة وكيس الأسمنت"

يابا القهوة ماااااااااااااااااااااااااااااااااااااااا بتتخلى وحلاتها مع الشيشة، البكر يكبوهو ليك وإتا سرحان، التني تكون يادوبك شفتا القدامك والتالت بيكون البداية ولمن الجبنة تفضى وإتا في حلم..
الغريبة والمستغرب ليهو؟؟
ليه تعطمها غير شكل؟؟؟
وليدي عبد العزيز عبد الله يمتنع

مجدي مسعد حنفي
14-12-2009, 12:50 PM
تعرف يابابكر ياخوي كلامك عن فيصل سعد وتوتي والليمون دا ذكرني حاجه قديمه بالحيل وهي برضو عن الليمون
زمان وانا لسه في الثانوي حصلت ازمه في الليمون يعني السوق بقى مافيهو ولا ليمونه واحده وكان لقيت ليك ليمونه تلقاها بالشي الفلاني اها الوقت داك كان عندي صديقي اسمو محمد عوض والمشهور بالعميد بعد ماعرس قام سكن في توتي وتوتي دي انا عمري مالمست رملتا بي رجلي يعني علاقتي بيها من شاطي جنينة البلديه بالنظر من بعيد لبعيد ودا لسببين الاول اني مابعرف اعوم والتاني الكنت بسمعو عن البقطع لهناك ويقبضوا التواته متلبس بالتواجد الغير قانوني في المزارع يعني كان امك داعيه عليك تلقى نفسك في الموقف دا لانك باختصار كدا محتاج ينقلوك من توتي لمستشفى بحري قسم الحوادث عشان حتكون محتاج لعملية بواسير gooodlooool اها نرجع للموضوع اتفقت انا وصديقي اب تكّه او صديق الشيخ نمشي نزور العميد في توتي وبالفعل ركبنا البنطون من الخرطوم ووصلنا ودي كانت اول وآخر مرّه ازور فيها توتي المهم بعد الزياره والغدا العميد وواحد من اهلو قالوا يعملوا لينا جوله في الجزيره واخوك طبعا زي السياح مبهور بالمناظر وبي بالناس الطيبين لابعد درجه ممكن الواحد يتخيلا لكن ياخي الزعلني منهم كمية الليمون الشفتها في المزارع حاجه ماممكن زول يتخيلا بالمره يعني سوق بحري مافيهو ولا ليمونه وديل عندهم الليمون دا كلو مخللنو في الشجر قال ايه عشان الحكومه رخصت تمنو لا وايه يقولوا ليك شيل التقدر عليهو وانت ماشي شفت الكرم غايتو انا واخوي اب تكه شلنا القدرنا عليهو بس طبعا عملنا حسابنا عشان الناس لمن ننزل من البنطون مايهجموا علينا ولا عسكري يقبضنا بتهمة تهريب ممنوعات :Dgoood

بمناسبة الحديث عن توتي مره كنت بتكلم مع اخونا عوض بابكر معد ومقدم برنامج حقيبة الفن في التلفون حكى لي قصة اغنية مناجاة وقال لي ان الوالد الله يرحمو كان صديق لوالدو وكان بيمشي يزورو في توتي ودايما كانو بيقعدوا في الرمله المقابله للمقرن وهناك في المكان داك كتب الوالد اغنية مناجاة او هل تذكرين نزهتنا في المقرن سوا بس للاسف المعلومه دي عرفتها منو بعد وفاة والدي عليه رحمة الله لكن اعتقد ان الاخ عوض بابكر اهل للثقه واكيد المعلومه صحيحه .

مجدي مسعد حنفي
15-12-2009, 07:51 PM
[blur][size=5][color=#0000FF]كنت من فتره حكيت عن شياطين الشعر (( شياطين عشان انا كان عندي واحد سوداني وواحد خليجي وواحد مصري ) بس المره دي داير احكي عن التوفيق وعدم التوفيق وماداير اقول الحظ يعني في زول يصدق اني ماعندي في الاذاعه السودانيه غير غنّوه واحده يتيمه لحنا الراحل العزيز عبدالله ابراهيم اميقو عليه رحمة الله وغناها الامين عبد الغفار اسمها كتير مشتاق واعتقد انها موجوده في بوست شاعرات وشعراء المنتدى .
ماتفتكروا اني ماكان عندي حاجه تنفع تتغنا غيرا بالعكس كان عندي اكتر من نص مجاز من لجنة النصوص وملحنين كمان لكن هنا يجي التوفيق وعدم التوفيق فاول نص مجاز كان بعنوان حبيبه يابلدي كان مفروض يغنيهو الموصلي وبالمناسبه النص دا كان اول نص اتقدم بيهو للجنة النصوص وطبعاً ماتتخيلوا الفرحه الحسيت بيها وانا بستلم النص من عبدالوهاب حمد ارباب مقرر اللجنه في الزمن داك وعلى النص ختم اللجنه مجازه طبعاً كنت حاسي اني عايز اطير وامشي اوريهو للموصلي والزمن داك كنا بنتقابل في شعبة الفن والابداع ايام الاتحاد الاشتراكي والموصلي هو النصحني اودي النص لجنة النصوص بعد ماقراهو وكان مفروض بعد داك يلحنو عشان يتقدم مع مجموعة كورال الشعبه قام الله يسامحو فنان اسمو عمر كوستي شاف النص مع الموصلي يشبك فيهو وقال إلاّ يغنيهو الموصلي قال الراجل دا كويس قلنا مافي مشكله الكلام دا قبل مااسافر الامارات يعني اكتر من تلاتين سنه ولغاية حسه الاغنيه لسه معاهو والغريب والمضحك من كم شهر كدا جاني اتصال من صديق اسمو سيد احمد ابراهيم بيشتغل في الاذاعه قال ايه عمر كوستي بيفتش عليك عشان عايز يسجل الاغنيه وانا قلت استاذنك قبل مااديهو تلفونك قلت ليهو مافي مشكله انا اصلا كنت مفتكر الزول دا مات ولا اعتزل اها من المكالمه ديك وهذا العمر لا اتصل ولا عارف عنو اي حاجه يمكن المره دي يكون مات بالجد :confused: نجي بعد كدا لحكايتي مع فتحي المك وفتحي المك كان زميلي في الاعدادي في اقباط بحري بس ماكان لي علاقه بيهو وهو كان زول مابتاع قرايه والموسيقى كانت لاحسه مخو المهم هو ساب المدرسه وبعد كدا ظهر كعازف كمان وملحن ايام عبدو الصغير واغنية ياحبيبي طاب الهوى وما علينا بتاعت ام كلثوم وتشاء الصدف اقابل فتحي في رحله لمجوعة الشعبه في احدى المزارع وبعد تبادل الحديث وذكريات اقباط بحري اتفقنا على التعاون وفعلا اديتو بعد فتره نص اسمو معاكم انتو ياغاليين وهونص مجاز وفتحي ماقصر لحن النص وكان مشروع تخرجو من معهد الموسيقى والمسرح واشترك بيهو كمان في مهرجان الاغنيه الخامس بعديها طوالي اديتو نص تاني اسمو لما طليتي في ديارنا وبرضو مجاز وايام واتصل وقال اللحن جاهز وفعلا كان لحن جميل راقص وبعد كدا صرح في لقاءاتو بالتعاون الفني بيني وبينو وذكر الاغنيتين وسافرت انا الامارات على اساس انو حيسجل الاغاني في اقرب وقت ولكن مره اخرى عوارض فتحي اخوي تعترضنيgoood قال ايه فتحي المك قرر فجأه يعتزل الفن ويكسر العود طيب انا ذنبي شنو في الموضوع دا ماتعتزل ياخي بس سجل الاغاني في الاول :D الظاهر المشكله في اسم فتحي:confused::D
نجي بعد دا لاخونا مجذوب اونسه ودا هو زاتو حكايه تصوروا الزول دا قابلتو في اجازه في السودان في بيت عرس في حلة حمد واتعرفنا وقلت ليهو عندي نص عايز ابدا بيهو تعاون معاك الحبيب رحب واتفقنا نتقابل تاني يوم في دار اتحاد الفنانين في امدرمان وفعلا مشيت وقابلتووعرضت عليهو نص اسمو منّي انتي وكان لسه فرش طالع يادوب من اللجنه بي ختم الاجازه الراجل اعجب بالنص وطلب مهله كم يوم يعرضو على اخوهو الشاعر حسين عشان هو متعود على كدا قلت مافي مشكله ايه يعني هو انا يهمني (ثقه);)وبالفعل اتقابلنا في الميعاد المحدد وقال كلو تمام واديتو عنواني في دبي وتلفوني وكمان اديتو النص الاصلي الفيهو الختم وسافرت على اساس قريب حاسمع اخبار حلوه وان النحس خلاص حيتفك مااصلو المره دي غيرنا الاسم من فتحي لمجذوبgoood وسافرت ومرت ايام وشهور ومافي خبر بس فجأه عرفت انو هذا المجذوب وصل دبي وحيقيم حفله في النادي السوداني بدبي طوالي ماكضبت مشيت يوم الحفله ووقفت قدام بوابة النادي بعد ماعرفت انو لسه ماوصل وشويه وجا الحبيب مشيت عليهو وسلمت وقلت ليهو انا فلان الفلاني اتقابلنا في النادي في امدرمان واديتك اغنيه اسمها كدا عايز اعرف الحصل فيها شنو .. حسي ممكن ناس منكم حيفكروا انو رد علي انها لسه ماجهزت وياريت لو كان قال لي كدا المصيبه لقيتو اصلا ناسيني وناسي النص وماعارف عنو اي حاجه غايتو يمكن زول غيري كان اداهو بنيه يمكن تذكرو :D لكن وحاتكم لميت احراجي ومشيت البيت وانا عندي اكتئاب حاد في الموهبه الشعريه :mad:
كل الفات دا كوم وحكايتي مع الموصلي كوم الموصلي راجل بتربطني بيهو صداقه بدت مع شعبة الفن والابداع واستمرت خلال الفتره السبقت سفري لدبي ومازالت الصداقه دي مستمره لغاية اللحظه دي والموصلي من الشخصيات المحترمه جداً والمجامله جدا جدا هو والمرحوم اميقو وكفايه انهم اصروا يعملوا لي حفله لما مشيت السودان من الاسكندريه بعد العرس وفعلا كانت حفله في غاية الجمال والروعه نرجع لموضوعنا قبل مااسافر لدبي اول مره كنت كتبت نص اسمو زاد حياتي او ياحبيبي زي ماهو مسميهو والنص دا انا بعتبرو من اجمل ماكتبت يعني ووجه القمر سافر بتاعتي والحمدلله مافي زول مشاركني فيها:D عرضت النص على الموصلي فور اجازة اللجنه ليهو والحمدلله النص عجبو جداً وماكضب كلها كم يوم وكان شغال بحواسو كلها في اللحن واكتمل اللحن وسافرت انا لدبي وسافر هو وقتها كمان للقاهره لكن قبل سفرو قال ان الاغنيه حتغنيها واحده مطربه جديده اسمها سميه حسن قلت ليهو انت ادرى وانا ماعندي مشكله في اختيارك المهم العمل يرى النور عشان عشان اطلع من دايرة عدم التوفيق ومرت الايام والشهور ويمكن كمان كم من سنه ولقيتو كاتب لي الاغنيه شبك فيها واحد اسمو عادل الصديق عايش في السعوديه قلت في السعوديه في الصين المهم الاغنيه تنزل شويه والموصلي ساب مصر وسافر امريكا وانقطعت الاتصالات بينا سنين ونسيت انا موضوع الاغنيه ونسيت اصلا اني كنت في يوم من الايام شاعر يعني بكتب شعرgoood وفجأه جاني تلفون من قطر من واحد متزوج بت اختي اسمو محمد الاشرف قال ان الموصلي قالب علي الدنيا تحب اديهو تلفونك قلت ليهو طبعا انا زاتي كايس ليهو السنين دي كلها المهم اتصل الموصلي تاني يوم وقال الاغنيه عادل ماحيقدر يغنيها نسبه لظروف ابتعادو عن البلد وقرر يغنيها واحد اسمو عمر بانقا عايش في امريكا وكان زمان عضو في فرقة عقد الجلاد والمره دي الكلام نهائي وفعلا كلمني عمر وعرفت منو انهم شغالين في البروفات عليها وعلى باقي اغاني السي دي والراجل ماقصر حول لي من هناك القروش والكلام دا من تقريبا سنتين ونص على اساس يديني اسم الزول الحاعمل ليهو التنازل وصيغة التنازل كمان ومن الزمن داك مافي اخبار لغاية فتره قريبه عرفت من الموصلي ان الاغاني جاهزه ومفروض عمر يمشي السودان قريب عشان يطرح السي دي والشريط وان الاغنيه حسب كلام الموصلي والمختصين فنياً السمعوا العمل بتعتبر من اجمل مالحن الموصلي ومش كدا وبس بل حتكون بصمه فارقه في تاريخ الغناء السوداني :)
فياريت دعواتكم معاي عشان الحكايه ماتطلع فشنك المره دي كمان والحق اسمع اللحن قبل ماانقرض لاني لغاية حسه ماعارف اللحن كيف :(:confused::mad:
اها ايه رايكم دا بسمو شنو دا

فتحي مسعد حنفي
15-12-2009, 08:03 PM
يازول المرة دي انشاءالله موفق..وتعرف يامجدي انت فعلا شاعر كبير مش متسلبط في الشعر والحكاية زي ما قلت عدم توفيق وعوارض أخوك فتحي لكن صدقني انت راس مالك أغنية واحدة تنزل وتشتهر وبعد داك حتلقي الفنانين هم البيجرو عليك زي ما حصل مع الحلنقي..
قلوبنا معاك وبندعي ليك ليل ونهار بالتوفيق عشان ما فضل في العمر باقي..

مجدي مسعد حنفي
16-12-2009, 12:26 PM
يافتحي الباقي من العمر دا في علم العليم
بس الواحد بيدعو ربنا كان لسه باقي عمر يكون عمر
فرح وراحه مايكون عمر شقى لكن برضو نقول الحمدلله
على كل المكتوب لينا .
سبحان الله امبارح واثناء مابكتب في في الموضوع اعلاه
جاتني مكالمه من سيداحمد ابراهيم ومعاهو الملحن حمدان ازرق
واتكلمت مع حمدان وطمني الامور ماشيه كويس وفي تلاته اغاني
اتلحنوا خلاص ومشوا لعصام محمد نور وسيف الجامعه ووليد الزاكي
وهو كان قاعد في نادي الفنانين عشان مستنيهم يجيبوا ليهو السي ديهات
الفيها الاغاني باصواتم عشان يوديها لشركة الانتاج ويتفق معاهم
فإن شاءالله خير مين عارف يمكن ربنا عايز يفتح لي طاقة نور بعد
مااتقفلت كل الطاقات وبرضو انا قاعد راجي الموصلي وعمر بانقا يمكن
برضو الفرج يجي عن طريقم دعواتك

فتحي مسعد حنفي
16-12-2009, 12:38 PM
مادام فيها ود النور أكيد حتتفتح طاقة نور:Dgoood:D

أبو أماني
17-12-2009, 04:26 PM
مادام فيها ود النور أكيد حتتفتح طاقة نور:Dgoood:D

فتحي يا أخي .. والله أخوك ده طرطشت ليو تفكيره .. كدي عليك الله روووق شوية وما تغير مسار البوست الراجل مطلوب منو اجابات وإنت تضرب السمسمية وتجي تجوطنا بي جاي .. مجدي .. خليك من فتحي ده وركز معاي شوية .. عملت لينا شنو .. في آخر أسئلة كدي ارجع برواقة .. ونحن منتظرين عشان نطلق سراحك .. كمان هاك إضافة :-
* * *
عاوزك ترسل لي في الخاص أكثر 3 قصائد تحبها وتعزها أكتر من التانيات ..
كمان عاوزك في العام .. شعورك .. اللحظات التالية :-
لحظة التخرج من الجامعة ..
لحظة إستلام أول وظيفة في حياتك
لحظة جلوسك على الكوشة .. (الكاف والواو بالفتحة ماتودونا في داهية)!.
أخيرا اللحظة التاريخية لما شلت أول مولود من صلبك ..
يلا يا بطل .. هانت .. الزمن نص ساعة فقط .. تشاوووووgoood

فتحي مسعد حنفي
17-12-2009, 04:41 PM
فتحي يا أخي .. والله أخوك ده طرطشت ليو تفكيره .. كدي عليك الله روووق شوية وما تغير مسار البوست الراجل مطلوب منو اجابات وإنت تضرب السمسمية وتجي تجوطنا بي جاي .. مجدي .. خليك من فتحي ده وركز معاي شوية .. عملت لينا شنو .. في آخر أسئلة كدي ارجع برواقة .. ونحن منتظرين عشان نطلق سراحك .. كمان هاك إضافة :-
* * *
عاوزك ترسل لي في الخاص أكثر 3 قصائد تحبها وتعزها أكتر من التانيات ..
كمان عاوزك في العام .. شعورك .. اللحظات التالية :-
لحظة التخرج من الجامعة ..
لحظة إستلام أول وظيفة في حياتك
لحظة جلوسك على الكوشة .. (الكاف والواو بالفتحة ماتودونا في داهية)!.
أخيرا اللحظة التاريخية لما شلت أول مولود من صلبك ..
يلا يا بطل .. هانت .. الزمن نص ساعة فقط .. تشاوووووgoood


أنا يامجدي ما قلت ليك أبو أماني دا زول فاكة منو وما بجمع..الزول دا كاتب ليك شعورك لحظة تخرجك من الجامعة مع انو أنا وضحت عظمتك لامن ضحيت بي مستقبلك ومشيت اشتغلت بي شهادة الثانوي عشان تقيف مع الوالد وتشيل معاهو مصاريف البيت وأنا حايم بتصعلك في أوروبا ما جايب خبر الناس السايبم في السودان..
يابو أماني أنا نصحتك وقلت ليك السمسمية دي ما بتقدر عليها وأحسن تبعد عنها عشان بتلحس الفاضل تحت صلعتك..
بعدين سيبك من ألقصايد البحبها وبعزها وأنا عشان عاجنك وخابزك وعارف انت ناوي تعمل شنو..أنا بصفتي ولي أمر مجدي بقول ليك اختار التلاتة البعجبوك واتصرف فيهم زي ما عايز بس اسأل مجدي في الأول عشان ممكن يكون مديهم لي زول يغنيهم..

مجدي مسعد حنفي
17-12-2009, 05:48 PM
فتحي يا أخي .. والله أخوك ده طرطشت ليو تفكيره .. كدي عليك الله روووق شوية وما تغير مسار البوست الراجل مطلوب منو اجابات وإنت تضرب السمسمية وتجي تجوطنا بي جاي .. مجدي .. خليك من فتحي ده وركز معاي شوية .. عملت لينا شنو .. في آخر أسئلة كدي ارجع برواقة .. ونحن منتظرين عشان نطلق سراحك .. كمان هاك إضافة :-
* * *
عاوزك ترسل لي في الخاص أكثر 3 قصائد تحبها وتعزها أكتر من التانيات ..
كمان عاوزك في العام .. شعورك .. اللحظات التالية :-
لحظة التخرج من الجامعة ..
لحظة إستلام أول وظيفة في حياتك
لحظة جلوسك على الكوشة .. (الكاف والواو بالفتحة ماتودونا في داهية)!.
أخيرا اللحظة التاريخية لما شلت أول مولود من صلبك ..
يلا يا بطل .. هانت .. الزمن نص ساعة فقط .. تشاوووووgoood

ابوأماني
ياخي وين انت وشنو الغيبه دي ياخي البوست من غيرك مسيخ وفتحي لو ماقايم بالواجب انا كنت من قبيل زغتا
بعدين ياخي انت ماكنت متابع البوست دا كويس ولا شنو حسي اسألتك الفوق دي انا قبل كدا جاوبت على واحد منها بتاع اول مولود وفتحي جاوب ليك على سؤال الجامعه ومافي مانع اجاوبك على الباقيين
بالنسبه لاول وظيفه هي ماكانت وظيفه رسميه يعني كانت قبل مااسافر لدبي يعني حاجه كدا نظام تسليه وتطليع مصاريف ودي كانت في محل ملابس جاهزه صاحبو راجل اختي حسن بكري والمحل كان في شارع الجمهوريه في عمارة او مركز صحارى وماقعدت فيهو كتير يعني كم شهر وطبعا الراتب كان رمزي ونصو ضايع مواصلات لان الشغل كان دوامين عشان كدا ماحسيت بي قيمة الراتب لكن طبعاً اول راتب اخدتو في الامارات كان ليهو طعم مختلف لانو كان راتب محترم الزمن داك فوق التلاته الاف درهم سنة 78 حاجه ماكنت احلم بيها خصوصا زي ماقال فتحي انا جاي بشهادة الثانوي وماعندي خبره لكن الحمدلله دعا الوالدين يعني تصور انا وصلت دبي يوم 2/10 ويوم 19/11 انا كنت مداوم في دفاع دبي وداقي اقامتي 5 سنين والحمدلله الشغل السريع والراتب الكويس اداني المجال اني احقق الغرض الجيت ليهو وسبحان الله فتحي زاتو ربنا هداهو والسنه الوراها طوالي رجع السودان نهائي ودا اداني الفرصه اقيف مع الوالد في عرس اختي وبنا البيت التاني وبعدين جا عرس بت خالي لانها كانت يتيمه متربيه معانا في البيت هي واخوانا الاولاد ودا كلها حاجات ماشكلت مشكله كبيره بسبب الراتب زي ماقلت ليك وعشان كدا بسرعه يعني مش بسرعه اوي:D بديت اوفر شوية قريشات لنفسي وقدرت بعد تلاته سنين اخطب والسنه الرابعه اعرس .. شفت الرجاله دي:D
اما يازول لحظة الجلوس في الكوشه فطبعا داك كان شعور صعب الوصف بالذات ان العرس كان في الاسكندريه وانت عارف افراح المصريين وبدون مبالغه انا عرسي كان عباره عن حفله من حفلات ليالي المدينه واكيد متذكرا يعني بدل الرقاصه تلاته ومطربين ومطربات بالهبل ومنولوجست يعني ماناقص إلاّ العاب بهلوانيه gooodgoood والذ حاجه كان في مطربه اسمها بدريه ومشهوره ببداره ودي الزمن داك كانت مطربة اسكندريه الاولى المره دي واقفه تغنّي ونص ضهرها عريان قال ايه لسه راجعه من الحج طبعاً في في الجو دا بقيت عامل زي الاطرش في الزفه يعني قاعد في الكوشه ومامستوعب ان دا عرسي انا لكن يازول الحاصل دا كلو ماكان بيسوى الحفله العملا لي الموصلي واميقو في البيت لما مشيت السودان من هناك حفله تخليك تحس فعلاً انك عريس خصوصاً لن امي اصرت تحنني :D

أبو أماني
19-12-2009, 04:41 PM
أنا يامجدي ما قلت ليك أبو أماني دا زول فاكة منو وما بجمع..الزول دا كاتب ليك شعورك لحظة تخرجك من الجامعة مع انو أنا وضحت عظمتك لامن ضحيت بي مستقبلك ومشيت اشتغلت بي شهادة الثانوي عشان تقيف مع الوالد وتشيل معاهو مصاريف البيت وأنا حايم بتصعلك في أوروبا ما جايب خبر الناس السايبم في السودان..
يابو أماني أنا نصحتك وقلت ليك السمسمية دي ما بتقدر عليها وأحسن تبعد عنها عشان بتلحس الفاضل تحت صلعتك..
بعدين سيبك من ألقصايد البحبها وبعزها وأنا عشان عاجنك وخابزك وعارف انت ناوي تعمل شنو..أنا بصفتي ولي أمر مجدي بقول ليك اختار التلاتة البعجبوك واتصرف فيهم زي ما عايز بس اسأل مجدي في الأول عشان ممكن يكون مديهم لي زول يغنيهم..

والله كلما اقرأ مساجلاتنا نحن التلاتة .. أتخيل (وأنا ما شارب ولا حاجة حتى الموية دي ما شربتها) تصور بتخيل منظرنا وأنا وسط الأخوة كارمازوف .. زي منظر طاولة فيها كباتين حليب وفي نصهم .. صحن زيتون .. هاشم طه عليك الله الحقني حلني .. ولا أأأأأه .. نسيت ما أنت قريب منهم .. تطلع طابور خامس كمان .. عموما مجدي دخول الجامعة ليس مقياسا للمستوى الفكري للفرد فكم من حملة للدكتوراه .. وهم يحملون داخل الجمجمة مخ البعير .. ولتكن الحياة هي الجامعة وكلنا خريجيها .. أعتبر إجاباتك كلها وردت وكفيت ووفيت يا أبا محمد حفظك الله في الدارين وأطال الله عمرك في الأولى ..

الأحباء متابعي هذا السرد الجميل لشخص يدخل القلب قبل أن تلامس يده يدك .. أشعر بأسي شديد وأنا أطلق سراح هذا البلبل الغريد .. وحقيقي الراجل ما قصر تب .. وتجاوب بكل شفافيه مع كل مناكفاتنا له .. ونهلنا من فيضه الكثير ورغم طمعنا الغريزي غير أني أخلى سبيله مكرها وفي القلب حسرة .. وعشمي أن لا ينقطع .. عن المساجلات مع ضيوف البوست ..

آنساتي سيداتي سادتي .. أترك المايكرفون لصديقي وزميلي الحبيب فيصل سعد حيث وعد في مداخلة سابقة بأن يكون الضيف القادم (مفاجاءة) ومن أختياره شخصيا .. يلا يا أبو السعود .. كلنا آذان صاغية .. وسلامي للجميع معطونا بحب أزلي .. gooodتششششااااوووووgoood

مجدي مسعد حنفي
19-12-2009, 06:22 PM
الحبيب ابوأماني
الف شكر على الاستضافه وان شاءالله دايماً
المائده عمرانه بضيوفك واتمنى اني اكون كنت ضيف
خفيف على كل من تابع ومن شارك معانا ..
وبالمناسبه دي اخصك واخص البوست اني في احتمال
كبير جداً اكون في الخرطوم في آخر شهر ياناير ودا تنبيه ليك
بعدم الزوغان من البلد لاني ماتنسى لي 15 سنه ماجيت وداير
زول يمسك ايدي ويقودني في الشوارع عشان مااتوه:Dgoood

أبو أماني
20-12-2009, 04:14 PM
الحبيب ابوأماني
الف شكر على الاستضافه وان شاءالله دايماً
المائده عمرانه بضيوفك واتمنى اني اكون كنت ضيف
خفيف على كل من تابع ومن شارك معانا ..
وبالمناسبه دي اخصك واخص البوست اني في احتمال
كبير جداً اكون في الخرطوم في آخر شهر ياناير ودا تنبيه ليك
بعدم الزوغان من البلد لاني ماتنسى لي 15 سنه ماجيت وداير
زول يمسك ايدي ويقودني في الشوارع عشان مااتوه:Dgoood

أشكرك شكرا جزيلا على طلتك البهية وإنعاشك لهذا البوست ردحا يسيرا من الزمن نثرت خلاله الغالي والنفيس من دررك .. وكم تمنيت أن تواصل أكثر فيقيني إن جراب الحاوي لا يخلو .. بل (بيت الضبع ما بيخلى من العظام) أرجو أن لا تقطع عنا حضورك الأثيري المبهج .. وحتى حضورك المادي في يناير القادم ننتظره بفارغ الصبر لك عظيم مودتي ..

يلا يا ود بري .. فيصل سعد .. هادا الميدان يا .. حميدان .. وتشاووووو