المساعد الشخصي الرقمي

مشاهدة النسخة كاملة : ضيف على مائدة سودانيات ...! - 6 - أبو أماني


أبو أماني
27-07-2009, 06:38 PM
gooodأحبائي الأعزاء ..
أحباء سودانيات .. لكم صادق الود والتحايا القلبية .. حقا قد سرني وأثلج صدري عمق صداقتي بكم ذهاء ما يقارب السنة أو يزيد .. قضيتها بينكم في سعادة وحبور .. وأحسست وأنا بينكم وبكم بدفء الأسرة وأحلى وشائج الإخاء والمحبة .. حيث صرتم بالنسبة لي كأفراد أسرتي رحما بل أكثر من ذلك..بحيث أقضي الساعات الطوال في رحابكم المرحة العامرة قبل وأكثر مما أقضيه مع أسرتي .. فلكم الشكر على ما وهبتموني من حب صادق إمتزج في شراييني وصار يغزو القلب ويعمر غرفه الأربع ويهرب ليعود ثانية ليمدني بالحياة .

فكرت مليئا في شكل مستقبل علاقة كل سوداني في سودانيات بالآخر! وهالني أن تكون علاقة صادقة حميمة كهذه عرضة للعيش والعمران طويلا عبر الفضاء الإسفيري والعالم الأثيري ..! وتصورت حياة شخوصها في اللاشئ وفنائهم في اللاشئ ..تماما كما يحدث يوميا بالنسبة لممثلين وممثلات نشاهدهم عبر الشاشات البيضاء والبلورية .. نعايشهم ونعاصرهم ثم يتلاشوا في اللاشئ حقيقي حزت في نفسي هذه الخاطرة .. وفكرت ثانية !..

أضع بين أياديكم عتبة أولي لتجسيد علاقة كل منا بالآخر .. وهو بوستر تتم استضافة عضو فيه ليكون مصدر حوار تعارفي يحكي لنا ما عن له أن يرويه عن نفسه فنزداد قربا منه أكثر وأكثر ومعرفة به وثيقة أكثر .. نعرف موقعه الحالي .. رقم موبايله .. عدد أفراد أسرته .. طموحاته الآنية والمستقبلية .. بعض مشاكله الخاصة التي يمكن الخوض فيها .. والمشاركة في علاجها بعض الجوانب المضيئة من حياته الماضية والتي يحلو له الخوض فيها مع الأحباء .. الخ ..

إن راقت لكم فكرتي هذه فأقترح أن يقوم كل ضيف حل بالبوستر في نهاية حلقته بترشيح من يحل بعده ضيفا على مننتسبي سودانيات .. وهكذا دواليك .. تبقى المعضلة في إختيار عضو الشرف الأول .. وأقترح أيضا أن يقوم صاحب البوستر بإختياره .. درج كبارنا على إختيار كبير القوم ليتولى ضربة البداية في كل مشروع أو عمل .. وحيث أن مجتمع سودانيات يحفل بالكبار شكلا وموضوعا وليس من بينهم من يتفضل على الآخر .. فأسمحوا لي أن أختار أكبر الأعضاء (سنا) .. فليكن ضيف الحلقة الأولى العميد الأستاذ :-

:Dخـــالـــد الحــــاج:confused:
مساهمتي الأولي معه المطالبة بنبذة صغيرة عن عميدنا والبطاقة الشخصية وتعريف مختصر ولكم جميعا خالص حبي وإعتزازي وإحترامي ...

فيصل سعد
24-12-2009, 02:08 AM
سلام يا ابو اماني يا حبوب، و مرحبا بك ضيفا عزيزا
في بيتك العامر، حيث تنتظرك جموع مؤلفة في الداخل
و الخارج، و تتابع عبر اسلاك النت و الشاشات البلورية،
ال سي دي و فلات اسكرين بكافة احجامها، و اشواق المعجبين و
المعجبات تتابعك من كمبيوتراتهم و لابتوباتهم و هواتف الجيل
الثالث.

فهيا بنا ندلف الى الحوار الاخير في هذا العام، حوار
المتعة و الاثارة، و الريادة و الاصالة،
و ذكريات و محطات الزمنالجميل، و الدعوة مفتوحة
لجميع الاحباب هنا للمشاركة بجميع
انواع الاسئلة و الاستفسارات لضيفنا العزيز ..

و السؤال الاول تقليدي، و كما هو متعارف عليه، فلتحدثنا
قليلا عن المولد و النشأة و الدراسة و الحالة الاجتماعة و
المهنة و العمل و الهوايات و كل ما تريد ان تحدثنا به
في هذا السؤال الاول، المكرفون و الكيبورد والماوس
كلهم امامك و تحت امرك و رهن اشارتك، فدحين يا ود
عمنا، بسمل و اتوكل و حرك و دوس ..

السؤال الثاني، انت بتعرف اخونا "فيصل سعد" مشرف المنتدى دا
من وين و علاقتك بيو شنو ؟، و ايضا اخونا "هاشم طه" نائب الامين
العام لسودانيات بتعرفو من وين و علاقتك بيو شنو ؟ و كيف انضممت
لهذا المنبر و متى و لماذا ؟ و كيف وجدته ؟ و ما هي سلبياته و
ايجابياته حسب وجهة نظرك و حسب فترة وجودك هنا ..


و نواصل ..

فتحي مسعد حنفي
24-12-2009, 08:00 AM
جيدا جيت بي كرعيك يابو أماني وهم سؤالين فقط حاليا والتقيل في الجراب:
أوصف لنا احساسك في أول يوم ليك في كمبوني مع أولاد الخواجات.
أشرح لنا متي وكيف تغلبت علي مشكلة التأتأة في الكلام وهل كانت تسبب لك حرج في المدرسة؟
أخلص من ديل واستعد للما بتقدر عليهوgoood:Dgoood

أبو أماني
24-12-2009, 04:21 PM
سلام يا ابو اماني يا حبوب، و مرحبا بك ضيفا عزيزا
في بيتك العامر، حيث تنتظرك جموع مؤلفة في الداخل
و الخارج، و تتابع عبر اسلاك النت و الشاشات البلورية،
ال سي دي و فلات اسكرين بكافة احجامها، و اشواق المعجبين و
المعجبات تتابعك من كمبيوتراتهم و لابتوباتهم و هواتف الجيل
الثالث.

فهيا بنا ندلف الى الحوار الاخير في هذا العام، حوار
المتعة و الاثارة، و الريادة و الاصالة،
و ذكريات و محطات الزمنالجميل، و الدعوة مفتوحة
لجميع الاحباب هنا للمشاركة بجميع
انواع الاسئلة و الاستفسارات لضيفنا العزيز ..

و السؤال الاول تقليدي، و كما هو متعارف عليه، فلتحدثنا
قليلا عن المولد و النشأة و الدراسة و الحالة الاجتماعة و
المهنة و العمل و الهوايات و كل ما تريد ان تحدثنا به
في هذا السؤال الاول، المكرفون و الكيبورد والماوس
كلهم امامك و تحت امرك و رهن اشارتك، فدحين يا ود
عمنا، بسمل و اتوكل و حرك و دوس ..

السؤال الثاني، انت بتعرف اخونا "فيصل سعد" مشرف المنتدى دا
من وين و علاقتك بيو شنو ؟، و ايضا اخونا "هاشم طه" نائب الامين
العام لسودانيات بتعرفو من وين و علاقتك بيو شنو؟ و كيف انضممت
لهذا المنبر و متى و لماذا؟ و كيف وجدته؟ و ما هي سلبياته و
ايجابياته حسب وجهة نظرك و حسب فترة وجودك هنا ..
و نواصل ..


غايتو يا ود بري وتوتي .. سويتها وخالت .. وأنا عارف القدر على فطاحلة سودانيات ما بقدر عليو عيلا السم القدر غداوو .. ود بري المشرم المقرم الشماشي بدرجة بروف .. وكمان طافش لي بي براري كندا .. مخييييير الله عليك .. يا ود أمي من براري الدرائسة لبراري كندا ليك حق ما عب .. براوي .. ومن ما تبيت .. تفلق وتداوي .. اسع في ظمتك الفلقة دي لزومها شنو؟ عارفك خاتيني فوق دقنوسك الملآن ده .. قصدي من جووه .. ما تتعقد!! ..

عموما مقبولة منك يا ولد العم وأنا أبوك يا فادي .. سارد عليك وعلى فرقع لوز التحت لكلامك ده وسوف أسردب لكل حملات التفتيش النازي في دفاتر محطم قلوب العذارى وسالب عقول السكارى .. موجه سلاح الإشارة و ناسف المريسة والعكارة البيختم قعدته بي سجارة .. هيييع أنا ود بري .. انا البشوفني كلو يقوم يجري ( من الخلقة)!! اها يا عشاي أصبر لي شوية ماشي وجاي .. لا لا .. إستنى إتا .. مشوار قرييييب وجاي راجع أرد عليكم كلكم .. أنا كمان قايلني أشتر ولا كتاحة .. أنا اب شنب .. أنا البنسف الحلة بملاحها .. وحرم ما بقول داير ملاحة ..
فاصل ونواصل .. goood goood goood

أبو أماني
24-12-2009, 07:36 PM
سلام يا ابو اماني يا حبوب، و مرحبا بك ضيفا عزيزا
في بيتك العامر، حيث تنتظرك جموع مؤلفة في الداخل
و الخارج، و تتابع عبر اسلاك النت و الشاشات البلورية،
ال سي دي و فلات اسكرين بكافة احجامها، و اشواق المعجبين و
المعجبات تتابعك من كمبيوتراتهم و لابتوباتهم و هواتف الجيل
الثالث.

فهيا بنا ندلف الى الحوار الاخير في هذا العام، حوار
المتعة و الاثارة، و الريادة و الاصالة،
و ذكريات و محطات الزمنالجميل، و الدعوة مفتوحة
لجميع الاحباب هنا للمشاركة بجميع
انواع الاسئلة و الاستفسارات لضيفنا العزيز ..

و السؤال الاول تقليدي، و كما هو متعارف عليه، فلتحدثنا
قليلا عن المولد و النشأة و الدراسة و الحالة الاجتماعة و
المهنة و العمل و الهوايات و كل ما تريد ان تحدثنا به
في هذا السؤال الاول، المكرفون و الكيبورد والماوس
كلهم امامك و تحت امرك و رهن اشارتك، فدحين يا ود
عمنا، بسمل و اتوكل و حرك و دوس ..

السؤال الثاني، انت بتعرف اخونا "فيصل سعد" مشرف المنتدى دا
من وين و علاقتك بيو شنو ؟، و ايضا اخونا "هاشم طه" نائب الامين
العام لسودانيات بتعرفو من وين و علاقتك بيو شنو ؟ و كيف انضممت
لهذا المنبر و متى و لماذا ؟ و كيف وجدته ؟ و ما هي سلبياته و
ايجابياته حسب وجهة نظرك و حسب فترة وجودك هنا ..


و نواصل ..


السؤال الأول :-
و السؤال الاول تقليدي، و كما هو متعارف عليه، فلتحدثنا
قليلا عن المولد و النشأة و الدراسة و الحالة الاجتماعة و
المهنة و العمل و الهوايات و كل ما تريد ان تحدثنا به
في هذا السؤال الاول، المكرفون و الكيبورد والماوس
كلهم امامك و تحت امرك و رهن اشارتك، فدحين يا ود
عمنا، بسمل و اتوكل و حرك و دوس ..
* * *
(1) المولد: مدينة بري الباسلة .. وعلى وجه التحديد ولدت بالدرائيسة وتربيت في المحس وترعرعت في منزل الوالد رحمه الله بحي كوريا .. والخبيث فيصل طبعا جاري وراء العمر الحقيقي وأقول ليو غيرك كان أشطر .. فقد إختلف العلماء في تحديد حقيقة تاريخ مولدي!.. شهادة الميلاد الأصلية بتقول كلام .. ما شغال بيو .. أما شهادة التسنين فاستخرجتها ثلاثة مرات .. الأولي (زادوني ناس القومسيون سنتين!!) وقدروا لي سنة 1955 .. هاشم طه .. أطلع منها .. فتحي مسعد .. أها قعدت تتململ؟؟ طيب والله ما أكمل ليكم خليكم على 54 سنة والماعاجبو يناقش المستشار القانوني حقي الدكتور بابكر مخير .. يلا اللي بعدو ..
(2) النشاءة بحي البراري بمشتقاته جميعا بما فيها إمتداد ناصر وما عدى (أبو حشيش)!
الدراسة : كمبوني .. كان مفروض أقرأ الأميرية الخرتوم بس الوالد رحمه الله .. جاء من السعودية في إجازة وحول أوراقي لكمبوني الخرطوم بحري إبتدائي ثم الخرطوم ثانوي عال .. ثم الجامعة الشعبية (آنذاك) لم أعمر فيها كثيرا فإنقطعت للعمل ثم واصلت بمعهد الدراسات المصرفية بالكويت ثم بجامعة الكويت (نظام التعليم المستمر للناضجين) إدارة أعنمال .. وأدب إنجليزي .. الحالة الإجتماعية .. صعبة جدن .. رزقت بخمسة عيال 3 اولاد وبتين والبكر رامي رحمه الله مات شهيد النيل .. في عام 2000 له الرحمة والمغفرة والجنان .
العمل : عملت في طليعة حياتي موظفا بالإدارة المركزية الخرتوم .. هاجرت بعدها للسعودية قضيت بالإدارة حوالي تسع سنوات .. و4 شهور بالسعودية .. سافرت عقبها للكويت حيث عاصرت نضال والد وأسرة صديقي ةأخي الأصغر فيصل سعد .. (أخ لو سننحت فرصة أفتك) للجماعة ديل .. ظللت بالكويت قرابة ال 14 سنة قضي عليها البدوي العربي العراقي المأفون صدام حسين سامحه الله .. فهو لم يسمع الكلام ويستخدم النابالم ..
العمل : أنحصر في مجال الإدارة والبيزنيس أدمين ... والترجمة على طريقة الكلاكلا أي .. إنجليزي عربي وبالعكس .. كنت ذات يوم أتقن اللغة الروسية .. وسعيت جاهدا لتعلم الفرنسية ولكني بعيد عن آذان السامعين .. كبوت وتزوجت ومن دي وعييييييييك ...
أخيرا الهوايات .. أهوي الحسان أينما كانوا وبأي شكل كانن .. وأهوى كل مايثير في النفس سرورا أو بهجة أو مرح .. أحب الملوخية بالرز .. والسمك .. خاصة الربيان .. والجمبري والفسيخ .. مؤمن أعشق الحلويات .. وأهلي معظمهم عنندهم سكري وأنا أحمد الله .. أحب السفر والبحر .. والإجتماعيات بكافة ضروبها .. وكل المسالك ودروبها خاصة تلك التي تؤدي إلي جلسة أنس .. ولمة أحباب .. أحب اللحظات لنفسي لحظة إستقبال الشمس ولحظة غروبها أعشق السهر .. وأتمني لحبي للسهر لو خلقت دجاجة .. الشق اللخير من السوعال .. وكل ما أريد ان احدثكم عنه .. حقيقي أريد أن أحدثكم عن تلكم المرأة النخلة .. أم أماني وفادي .. ورامي سابقا .. هذه المرأة بحق وحقيقي لو كنت نزار لصغت لها قصيدة أروع ألف مرة من قصيدة بلقيس .. الله يشفيها ويرجعها بالسلامة .. فقد وحشتني بسمتها الساحرة تلك .. ومفراكتها الحنينة بطعم الذبيب..أحمد زين أديني منديلك..أهئئئئئ أهئ أهي.. وشحتفة..وفييييييييط ..
يلا يا الحبيب .. سي يو ... تشششششااااوووووgooodgoood

أبو أماني
24-12-2009, 08:04 PM
جيدا جيت بي كرعيك يابو أماني وهم سؤالين فقط حاليا والتقيل في الجراب:
أوصف لنا احساسك في أول يوم ليك في كمبوني مع أولاد الخواجات.
أشرح لنا متي وكيف تغلبت علي مشكلة التأتأة في الكلام وهل كانت تسبب لك حرج في المدرسة؟
أخلص من ديل واستعد للما بتقدر عليهوgoood:Dgoood

يعني أولادي معاك بي هناك وإت ما شخال بيهم الشخلة ..!! بالله دي صحوبية شنو دي يا أخواني .. إكراما لخاتر آلاء برد عليك ..
السوعال اللولاني : إحساسي كان عااادي في بحري الإبتدائي .. معظم الطلبة كانوا أولاد جنوب وقلة من أبناء الشمال والجاليات الأجنبية .. لاكين قصدك يا عنصري لما دخلت الثانوي العالي وجابوني الخرتوم .. عييييك يا توحة عينتك دي على قفا من يشيل .. وأنا وبعض الزرق كنا زي الضبانة في كورة الحليب بس كنا متميزين برضك .. وبنات اليونيتي كانن محمبكاتننا على وزن مجكساتننا .. والله يا توحة وماليك على حلفان كان في بت في اليونيتي إسمها إحلام يا أخي دي كانت مكسره فوقي ضلع وترقوة ومخروقة كمان ... أسكت يا فتحي شادية ما تسمعنا وكان ما مصدق اقول ليك البحر قريب أمشي أخد ليك جغمة وتعال .. لاني بقول ليك مع سبق الإصرار والترصد .. إنها برضها كانت مكسرة فوقي .. أأأي فوقي .. بالله شوفوا الخواجة ده عروقه اتشحطن وعيونو حمرن ووشو بقى زي الفشفاش كيف ؟؟ الله يستر على من الهجمة المرتدة .. سارة أنا وقعت في حواك ...

السوعال التاني : التأتاة .. او كما يقولون التمتمة .. فتحي تعال هيني إت قاعد يمليك صاحبك الحلبي داك بتاع السعودية في الخاس ولا شنو؟ المعلومات دي جبتها من وين؟.. عموما ممكن انكر واعرك إيدي في الحصى .. واقول كت زي البلبل .. لاكين الكضب حرام .. أأأي كت بتمتم تمتمة أنا ظااااطي بتسل روحي وتطير عروقي .. مرة جاءنا في كمبوني أستاذ تمتام مش خالس بس مرات بيربط ..ولما سمع تمتمتي قايلني بسخر منو وبحاكيه أداني ليك يا فتحي مسعد عشرة جلدات .. الدق كان بواسطة الخفير حق المدرسة .. عم جابر رحمه الله فارش ليو شوال خيش وخاتي فوقه العصي والسيطان ونحن حريفين كنا بنلبس تحت المنطلون أو الشورط .. مرات أكان مخدات أكان بامبرز .. والأخير ده كنا بنستخدمه لاغراض سلمية وكده ..!!

تغلبت على التمتمة وعلى وجه التحديد تماما في السنة الثانية ثانوي والفضل لله ومن ثم لأستاذ سوداني من أصل حبشي إسمو أستاذ محجوب كان بيتعمد يوقفني ساعات في القراءة بصوت عال وكان صبور وكان بيعمل لي معالجة نفسية عند كل فسحة .. ويرشدني ويزرع فيني الثقة في النفس وأهم حاجة علمني ليها أن لا أهتم لضحكات وتعليقات الناس الحولي وكانت البداية وكذلك نهاية التمتمة في حياتي بحيث في سنة ثالثة كنت .. مدير اللجنة الثقافية بالمدرسة ومن ديك ويا ربا تسكت أبو أماني .. جنس ورجقة .. فتحي مسعد يقصر ... يلا يا توحة سعدت بالحديث مع شخص أسطوري مثلك .. لكم جميعا حبي ما عدى الشماشي بتاع البراري ده .. تششششاااوووgoood

فيصل سعد
25-12-2009, 07:29 AM
استاذنا العزيز شكرا للاريحية، و الحضور الباهي المتألق،
و في خضم استرسالك الانيق، و حديثك المنمق، زي سهيت،
و جل من لا يسهى ، و لم تجاوب و تنورنا عن سؤال
معرفتك بالاخ هاشم طه، و لم تجاوب عن سؤالنا لك عن
"سودانيات" و نتمنى ان تراجع و تتفضل بالاجابة ..

و بعد ذلك تحدثنا قليلا عن :

ابو اماني و اصدقاء في الذاكرة ..

ابو اماني و الرياضة و المريخ ..

ابو اماني و السياسة و العمل العام ..

ابو اماني و الادب و الفكر و الثقافة و الفنون ..
و الفنان المفضل، موسيقيا و مسرحيا و سينمائيا ..

ابو اماني و عتبات و بدايات الحب و الغرام الاولى، و ان
كانت هنالك شواكيش هايدرولكية او ارض جو فسردها اختياري؟؟

و نواصل ..

أبو أماني
26-12-2009, 05:36 PM
استاذنا العزيز شكرا للاريحية، و الحضور الباهي المتألق،
و في خضم استرسالك الانيق، و حديثك المنمق، زي سهيت،
و جل من لا يسهى ، و لم تجاوب و تنورنا عن سؤال
معرفتك بالاخ هاشم طه، و لم تجاوب عن سؤالنا لك عن
"سودانيات" و نتمنى ان تراجع و تتفضل بالاجابة ..

و بعد ذلك تحدثنا قليلا عن :

ابو اماني و اصدقاء في الذاكرة ..

ابو اماني و الرياضة و المريخ ..

ابو اماني و السياسة و العمل العام ..

ابو اماني و الادب و الفكر و الثقافة و الفنون ..
و الفنان المفضل، موسيقيا و مسرحيا و سينمائيا ..

ابو اماني و عتبات و بدايات الحب و الغرام الاولى، و ان
كانت هنالك شواكيش هايدرولكية او ارض جو فسردها اختياري؟؟

و نواصل ..

يا أخواني عليكم الله سمعتوا بشبكة الطرش ؟؟ غايتو كوني طلعت ود عم الجنا .. يا أني الوقعت وماسميت .. أصبر يا خوي .. حبة حبة .. يا .. (ملواني).. أعمر الطاسة وأجي اجاوب على مجلس التحقيق ده برواقة .. حووووولا .. ياود إت في زول مسلطك على .. ولا شغال في السي آي .. أيه ؟! بالله الجنا لما ها ليك فوقي .. أدودودودودوت .. في دقيقة مفعول سمسمية فتحي مسعد الرسلها لي راح شمار في مرقة .. فيصل .. روق المنقة والله ارجع ليك .. تشاو

مجدي مسعد حنفي
27-12-2009, 06:26 AM
الحبيب ابو اماني
مرحب بي طلتك العزيزه
ياخي فيصل وفتحي ماشاءالله عليهم ماخلوا شارده ولا وارده ماسالوك
عنها يعني ماسكين ليفه وصابونه ونازلين غسيل فيكgoood
بس ياخي انا داير اسألك عن فتحي الزول دا مالو معاك مايشوف
اسمك إلاّ تلقاهو جاك ناطي بي عكازو :mad:

أبو أماني
27-12-2009, 05:16 PM
الحبيب ابو اماني
مرحب بي طلتك العزيزه
ياخي فيصل وفتحي ماشاءالله عليهم ماخلوا شارده ولا وارده ماسالوك
عنها يعني ماسكين ليفه وصابونه ونازلين غسيل فيكgoood
بس ياخي انا داير اسألك عن فتحي الزول دا مالو معاك مايشوف
اسمك إلاّ تلقاهو جاك ناطي بي عكازو :mad:

ما نحن التلاتة بربطة المعلم كده .. مارقين من كوشة واحده .. أنا وتوحة وهشومة .. الله يطراه بالخير .. تصور يا مجودي .. مررررة مرررة كدي بتخيل لي أخوك فتحي أنا مديو علقة كاربة أيام النزق بتاع الشباب والفتونة أصلو اولاد بري يعني أنا وفيصل سعد مرصعين اولاد جيلنا جد حتى بالأمارة صداقة هاشم بي تمت بعد شكلة كاااااربة في البي إن .. سينماء الجامعة زماااان لكين حقيقي السنين تراكمت فما متذكر ياتو الدق التاني!.. وكان ما بخاف الكضب أقول ليك زولي فك البيرق قبال اديو علقة!! لاكي حقيقي بخاف الكضب .. إستغفر الله .. فتحي حبيبي يا مجدي وهو مهما ورطني في مواقف لا أحسد عليها برضي ما بحمل فيو الهبشة .. ما قلت ليك من الحب ما (سطل) .. هي قصدي ما كتل ؟!goood مقصوووووده goood

أبو أماني
28-12-2009, 06:26 PM
استاذنا العزيز شكرا للاريحية، و الحضور الباهي المتألق،
و في خضم استرسالك الانيق، و حديثك المنمق، زي سهيت،
و جل من لا يسهى ، و لم تجاوب و تنورنا عن سؤال
معرفتك بالاخ هاشم طه، و لم تجاوب عن سؤالنا لك عن
"سودانيات" و نتمنى ان تراجع و تتفضل بالاجابة ..

و بعد ذلك تحدثنا قليلا عن :

ابو اماني و اصدقاء في الذاكرة ..

ابو اماني و الرياضة و المريخ ..

ابو اماني و السياسة و العمل العام ..

ابو اماني و الادب و الفكر و الثقافة و الفنون ..
و الفنان المفضل، موسيقيا و مسرحيا و سينمائيا ..

ابو اماني و عتبات و بدايات الحب و الغرام الاولى، و ان
كانت هنالك شواكيش هايدرولكية او ارض جو فسردها اختياري؟؟

و نواصل ..

ما تشفق ..جايييك بالتقيل

بابكر مخير
29-12-2009, 07:46 AM
ما نحن التلاتة بربطة المعلم كده .. مارقين من كوشة واحده .. أنا وتوحة وهشومة goood مقصوووووده goood

ديمة مغشوش في روحي، أني؟؟
جميل، طيب، لطيف ومحبوب..
بس حسي وأنا خارج مجموعة التلاتة، وضحت ليا أنو؟!
تب أو طب ولا أقول؛ بتن كّئ ماني لا دآ ولا ديك ولا دولة... "دولآ"
يابا!!
أريتها كوشة الهنا والسرور، اللامة الجواهر ولامة البلاك & هوايت
حركة ووقفة وعدم مرور
لامة الشّْعر الحريري والمنفوش والمافيش والتحت الباروكة مستور..
لامة الأدب وقولة الشِعر وللألي الأدب
لامة الأخو والأبو والجد ورجاحة الرآي وود حبوبة
كوشة مزيننها تلات فرسان، حبان، أخوان ما كيزان..
كوشة الزين الحنفية الهاشمية، حجة، وكعبة سمحآ وما كعبة..
آحيييييييييييييييييييييا من كوش جنس ديل،
أريتنا فيها أكياس بلاستيك مرمية ولا حتى عقاب طبخة مع الجوع الفي البلد، خيال ووهمية...


تقول ليا كوشة
وأنا نان أبقى شنو ولا منو
"على وزن تقولي شنو":(

أبو أماني
29-12-2009, 10:02 AM
ديمة مغشوش في روحي، أني؟؟
جميل، طيب، لطيف ومحبوب..
بس حسي وأنا خارج مجموعة التلاتة، وضحت ليا أنو؟!
تب أو طب ولا أقول؛ بتن كّئ ماني لا دآ ولا ديك ولا دولة... "دولآ"
يابا!!
أريتها كوشة الهنا والسرور، اللامة الجواهر ولامة البلاك & هوايت
حركة ووقفة وعدم مرور
لامة الشّْعر الحريري والمنفوش والمافيش والتحت الباروكة مستور..
لامة الأدب وقولة الشِعر وللألي الأدب
لامة الأخو والأبو والجد ورجاحة الرآي وود حبوبة
كوشة مزيننها تلات فرسان، حبان، أخوان ما كيزان..
كوشة الزين الحنفية الهاشمية، حجة، وكعبة سمحآ وما كعبة..
آحيييييييييييييييييييييا من كوش جنس ديل،
أريتنا فيها أكياس بلاستيك مرمية ولا حتى عقاب طبخة مع الجوع الفي البلد، خيال ووهمية...


تقول ليا كوشة
وأنا نان أبقى شنو ولا منو
"على وزن تقولي شنو":(


هي يا با إت منو القدرك .. يا الما ناقش ولا عارف حقيقية قدرك .. إنت شن جابك للكوش يابا أومال الحدائق الغناء والجمال الطبيعي يعيش فوقو منو غيرك يابا .. وإنت مكانك جووووه ال.. جوووووه .. تتسرب لمسارب الروح .. والله مشتاق أشوفك يا بوكو واقلدك قلدة كااااربة لمن ضلعك يطقطقن .. وزنوبة بتك تشفق عليك من العصرة وتصرخ .. عمو أبو أماني حرام عليك أبوي ده قدرك ولا لحم سدرك .. بتين الجيية يا با .. تحياتي القلبية لجميع أهلك ... تشاوووووgoood

فيصل سعد
30-12-2009, 06:38 AM
يا ابو الوجاهة انت اقعد اعملها
لي سلام و ونسة و مقالدة و اتزاوغ
كدا :D:D و ناس نانا وصلوا القلابات،
خش لينا في سؤالنا عن ابو مهيد و مقالبك
ليو و سؤالنا عن منبر سودانيات و اسئلة
المداخلة رقم 360 و الكع و بطل حركات
الجعافرة دي، خلينا نخش على فرنسا و المولد
و السواسيو و كلوزيم و اتني و قهوة الزيبق
و سوق اربعة، و ناس سلطة و لوفت و الجنيد،
و تحياتنا الباذخة يا سنير سنايرنا :D:D

فيصل سعد
01-01-2010, 10:57 AM
http://sudaniyat.net/up/uploading/AED1.jpg

مواطن
01-01-2010, 11:37 PM
يا
خش لينا في سؤالنا عن ابو مهيد و مقالبك
ليو و سؤالنا عن منبر سودانيات و اسئلة
المداخلة رقم 360 و الكع و بطل حركات
الجعافرة دي، خلينا نخش على فرنسا و المولد
و السواسيو و كلوزيم و اتني و قهوة الزيبق
و سوق اربعة، و ناس سلطة و لوفت و الجنيد،
و تحياتنا الباذخة يا سنير سنايرنا :D:D

فـوفـو المجيّـه
عاوز المفيـد ؟؟ .. هاك ..
يُسأل المرء يوم القيامة عن ثلاثٍ :
خـير وفيـر
وفـراش وثـير
وعـمـر البشـير :confused:
....
دحين إبن آوى ده أسألو عن ثلاث :
حـسن زنقـو
وود نيكـولا
وزيـيـرا

وماتركز على ناس هاشم طه وهاشم خوجلي وعوض جولط .. بعدين هاشم طه ده منو ؟؟ :eek:
أما أول شاكوش فكان من زييـرا {أشطب على السؤال}
أقعد بالعافية

رأفت ميلاد
02-01-2010, 01:30 AM
(1) المولد: مدينة بري الباسلة .. وعلى وجه التحديد ولدت بالدرائيسة وتربيت في المحس وترعرعت في منزل الوالد رحمه الله بحي كوريا .. goood
كل سنة وأنت طيب يا أبو أمانى
جعلها ليك سنة عامرة وتديك الفى مرادك .. وتسلم لأمانى وأم أمانى.

غايتو من شفت كوريا دى طريت الشكل لامن جبت سيرته براك .. الدقيته فى السينما أكون أنا ما فتحى .. بس يكون تشابه عليك الحلب :D:D
كوريا بعرفا خرم حرم وأهلى فيها عمك يوسف عبد الملك رحمه الله أولاده يسرى ونبيل يوسف الكارثة ..

سؤالى ليه أولاد برى الدرايسة رايقين وأولاد اللاماب فناين وأولا كوريا فى النص شرامة .. رغم كلهم أهل :D:D

أبو أماني
02-01-2010, 05:23 PM
كل سنة وأنت طيب يا أبو أمانى
جعلها ليك سنة عامرة وتديك الفى مرادك .. وتسلم لأمانى وأم أمانى.

غايتو من شفت كوريا دى طريت الشكل لامن جبت سيرته براك .. الدقيته فى السينما أكون أنا ما فتحى .. بس يكون تشابه عليك الحلب :D:D
كوريا بعرفا خرم حرم وأهلى فيها عمك يوسف عبد الملك رحمه الله أولاده يسرى ونبيل يوسف الكارثة ..

سؤالى ليه أولاد برى الدرايسة رايقين وأولاد اللاماب فناين وأولا كوريا فى النص شرامة .. رغم كلهم أهل :D:D


أين أنت يا عرابي العزيز .. والله ليك وحشة .. وبعدين مالك مقاطع بوساتي؟.. معذرة التاء بعد السين سقطت سهوا .. ف.. دونط وووري!.. طبعا جبرت بخاتري لما قلت الزول الدقوه في البي إن كان إنت وما فتحي مسعد .. وحقيقة السنين كتيرة المررت ..ونسيت الواقعة والشخص لكين المتأكد منو إنو الزول الأكل العلقة كان (أنا) ولا فخر!!.. والدقاني حلبي زييكم كدي بس عليو مقانص عبيد الديم الله لا ضوقكم لي بونيتهم ..
الفرق بين شباب المحس والدرائسة واللاماب وكوريا .. بسييط أكيد إت عارفه بس بتدردق فيني عشان توسعة المعرفة .. أولاد المحس كانو اولاد أفندية .. وموظفين .. وأولاد كوريا كانوا أولاد ناس تغيانين وأبواتهم عندهم تشديرة كااااربة الزمن داك تصل الألف ونص الألف جنيه .. أما أولاد الدرائسة كانوا حسب معايير الزمن داك عنقالة سااااكت (وأنا من اللتنين محس ودرائسه) أما ناس اللاماب يكفيك أننا زمان كنا بنقول عليهم (عرب اللاماب) وكلمة عرب كانت وربما مازالت في مفهومنا العامي (نبذه) تخلي الواحد يطلع من طوره .. وديل برضو أهلنا دم ولحم يا رأفت .. شفت الشبكة الوقعتني فوقها يا .. روفي؟؟

المهم أولا وأخيرا .. إن كل هذه الفواصل الوهمية .. كانت تتلاشى زي فقاع الصابون عند أول محك وكان آل بري الكرام .. يهبون ساعة الحارة .. ويقفون وقفة رجل واحد .. لذا كانت وظلت وستظل المدينة النموذجية التي تحمل ملامح القرية والريف والحضر .. أما أهلك الذكرتهم فرحم الله المرحوم بإذنه يوسف عبد الملك .. وأولاده قد أذكر منهم نبيل لانو كارثة كما قلت وكنت لا أقل عنه .. (كارثية) بل أفوقه .. لك خالص حبي .. عشمي أن تنورني بما آل إليه حال أبناء المرحوم يوسف عبد الملك .. يسري ونبيل .. أخالني بخرت ذكرى يسري .. أنعش الذاكرة يا سيفن آب سودانيات .. ولك خالص محبتي .. تشاووووgoood

أبو أماني
02-01-2010, 05:36 PM
فـوفـو المجيّـه
عاوز المفيـد ؟؟ .. هاك ..
يُسأل المرء يوم القيامة عن ثلاثٍ :
خـير وفيـر
وفـراش وثـير
وعـمـر البشـير :confused:
....
دحين إبن آوى ده أسألو عن ثلاث :
حـسن زنقـو
وود نيكـولا
وزيـيـرا

وماتركز على ناس هاشم طه وهاشم خوجلي وعوض جولط .. بعدين هاشم طه ده منو ؟؟ :eek:
أما أول شاكوش فكان من زييـرا {أشطب على السؤال}
أقعد بالعافية

معقولة يا هشومة الجنا المطوفش ده يدردقك ويخليك تفك أخر صاحبك وفردتك..؟؟ ما عارف فيصل سعد ده عميل مخابراتي .. وطابور خامس ؟! ما لاحظت من ما فتح البوست ده وهو يتحرش بي وعاوز يقعدني في الكرسي النجضتو فيو قبل ده؟!الراجل لوبي ختيييير جدن لو أعرف الجيهة المحركاو! .. أأأأخ .. أكيد دولة أجنبية .. goood

عموما أنا ببرد ليو بطنو .. أصلو ما بيهون على ..
وسوف أجاوب على كل أسئلته وحقتك كمان المقترحة .. بكل شفافية وتجرد .. بس أتو اللتنين .. أرجو نورا .. يلا تشاوووووو.. حسن منو ياهاشم .. وكمان زيئرا ..؟؟ يجازي محنك يا مضروب goood

رأفت ميلاد
02-01-2010, 06:01 PM
أين أنت يا عرابي العزيز .. والله ليك وحشة .. وبعدين مالك مقاطع بوساتي؟.. معذرة التاء بعد السين سقطت سهوا .. ف.. دونط وووري!.. طبعا جبرت بخاتري لما قلت الزول الدقوه في البي إن كان إنت وما فتحي مسعد .. وحقيقة السنين كتيرة المررت ..ونسيت الواقعة والشخص لكين المتأكد منو إنو الزول الأكل العلقة كان (أنا) ولا فخر!!.. والدقاني حلبي زييكم كدي بس عليو مقانص عبيد الديم الله لا ضوقكم لي بونيتهم ..
الفرق بين شباب المحس والدرائسة واللاماب وكوريا .. بسييط أكيد إت عارفه بس بتدردق فيني عشان توسعة المعرفة .. أولاد المحس كانو اولاد أفندية .. وموظفين .. وأولاد كوريا كانوا أولاد ناس تغيانين وأبواتهم عندهم تشديرة كااااربة الزمن داك تصل الألف ونص الألف جنيه .. أما أولاد الدرائسة كانوا حسب معايير الزمن داك عنقالة سااااكت (وأنا من اللتنين محس ودرائسه) أما ناس اللاماب يكفيك أننا زمان كنا بنقول عليهم (عرب اللاماب) وكلمة عرب كانت وربما مازالت في مفهومنا العامي (نبذه) تخلي الواحد يطلع من طوره .. وديل برضو أهلنا دم ولحم يا رأفت .. شفت الشبكة الوقعتني فوقها يا .. روفي؟؟

المهم أولا وأخيرا .. إن كل هذه الفواصل الوهمية .. كانت تتلاشى زي فقاع الصابون عند أول محك وكان آل بري الكرام .. يهبون ساعة الحارة .. ويقفون وقفة رجل واحد .. لذا كانت وظلت وستظل المدينة النموذجية التي تحمل ملامح القرية والريف والحضر .. أما أهلك الذكرتهم فرحم الله المرحوم بإذنه يوسف عبد الملك .. وأولاده قد أذكر منهم نبيل لانو كارثة كما قلت وكنت لا أقل عنه .. (كارثية) بل أفوقه .. لك خالص حبي .. عشمي أن تنورني بما آل إليه حال أبناء المرحوم يوسف عبد الملك .. يسري ونبيل .. أخالني بخرت ذكرى يسري .. أنعش الذاكرة يا سيفن آب سودانيات .. ولك خالص محبتي .. تشاووووgoood
سلام يا أبو أمانى
الله ما جاب قطيعة ياخ .. أنت الأخدت ليك خفسة .. وبصراحة أنا لما بلقى بوستات دشمان بنغرز فيها ما بطلع ..
نبيل الكارثة معانا هنا .. ويسرى (بتاع البنك) لسة فى برى فى بيتم زاتو .. وأخوهم طبيب إستقر فى اليونان ..

بمناسبة عرب وعنصرية ناس برى .. لما سكنا إمتداد ناصر قسما لينا نميرى .. ناس برى زعلو لأنها عمل ليهم الشريف (إمتداد البرارى) .. كانو بسمونا لحم الراس :D:D

أحكى لينا عن مواصلات برى إمتداد ناصر :D:D

فيصل سعد
04-01-2010, 09:26 AM
يا ابن العم العزيز ، نحن في
انتظارك، و في زولة عزيزة
دايرة تحاورك، فبطل زغبرة،
و قرب تعال ما تبتعد !!!

مجدي مسعد حنفي
04-01-2010, 03:59 PM
يافيصل ياخوي
ابو اماني دا من يوم
ماسافرت المره وهو ماتمام
ومامعروف كل يوم بغتس وينgoood

فيصل سعد
05-01-2010, 10:22 AM
يافيصل ياخوي
ابو اماني دا من يوم
ماسافرت المره وهو ماتمام
ومامعروف كل يوم بغتس وينgoood

يا ابو المجد بكرة ان شاء الله
ام اماني تقوم بالسلامة،
و تشفى و تطيب .. و نشوف
اللخو دا حيتعلل بشنو تاني :D:D

أبو أماني
05-01-2010, 04:57 PM
يا ابو المجد بكرة ان شاء الله
ام اماني تقوم بالسلامة،
و تشفى و تطيب .. و نشوف
اللخو دا حيتعلل بشنو تاني :D:D

طبعا بعد الحاجة تجاوزت الخطوط الحرجة .. واعصابنا هداءت سوف أهريكم بس أدوني فرقة أرد الروح .. وأجيكم فريش .. فيصل والله أكيفك لمن تقول لي كفى .. أنا والبنات عملنا (قرعة) البيغسل عدة المطبخ منو .. ووقعت على أنا .. الغريبة يا جماعة اسبوع بحالو البنات ديل يكتبوا القرعة قدامي .. والعدة تقع على أنا .. يا أخي انا والله بقيت يجن نسوان داخلات .. بقيت بشيل هم عديييل كدي .. ماعندكم إقتراح غير القرعه دي ؟؟؟ يلا تشاوووو .. يا بت توتا صابون الغسيل وين ؟؟ goood goood goood

فتحي مسعد حنفي
05-01-2010, 08:58 PM
طبعا بعد الحاجة تجاوزت الخطوط الحرجة .. واعصابنا هداءت سوف أهريكم بس أدوني فرقة أرد الروح .. وأجيكم فريش .. فيصل والله أكيفك لمن تقول لي كفى .. أنا والبنات عملنا (قرعة) البيغسل عدة المطبخ منو .. ووقعت على أنا .. الغريبة يا جماعة اسبوع بحالو البنات ديل يكتبوا القرعة قدامي .. والعدة تقع على أنا .. يا أخي انا والله بقيت يجن نسوان داخلات .. بقيت بشيل هم عديييل كدي .. ماعندكم إقتراح غير القرعه دي ؟؟؟ يلا تشاوووو .. يا بت توتا صابون الغسيل وين ؟؟ goood goood goood


يافيصل أنا ما قلت لك الزول دا طرور وغبيان ساكت:confused::confused: لأ وكمان طلع عويرgoood العيال في البيت بيكتبو الأسامي في ورق وبيلخبتوهو وبعدين بيسحبو منو ورقة والورقة الفيها الاسم هو العليهو غسيل العدة..
اللذيذ في الموضوع العيال كاتبين اسم أبوهم في كل الورق وبخلوهو هو يسحب الورقة بي ايدو..وعمنا طبعا لو سحب لي شهر فبراير برضو حيطلع اسمو..
أها في عوارة أكتر من كدا:confused:
غايتو يامعلم أنا حقي أخدتو منو تالت ومتلت..ختيت ليك أم أماني وفادي ولدا وواحدة ضيفة من كوبر وكشفت ليك أوراق أبو أماني كلها ودخولو المنتدي بعد نص الليل..وكان هو صحي راجل خليهو يضرب تلفون لأم أماني عشان تكسر الموبايل وتغرمو تمنو:Dgoood:D

معتصم الطاهر
06-01-2010, 12:09 PM
ابو أمانى

تحية

كيف تحكم على أعضاء المنبر و أنت لم تللق أكثرهم

أبو أماني
06-01-2010, 09:31 PM
ابو أمانى

تحية

كيف تحكم على أعضاء المنبر و أنت لم تللق أكثرهم

أحكم عليهم بالحاسة السادسة ومن خلال المداخلات والمواضيع والأسلوب والردود .. لكين إنت بالذات وزي ما كلمتك ضللت البوصلة بتاعتي جد جد .. لاني شفت الصورة واياميها كنت في قمة الإدارة بسودانيات والمنصب كان جابرك تركب لينا (وش ككو) وكت وحاتك يا غالي بدخل على بوستاتك بكل أدب (مصطنع) زي الداخل بيت عمو في زيارة وبت عمو كاسرة فيو ضلعة ولما قابلتك في منتزه المسرح القومي على شرف دعوة الظريف الفنان الشامل ناصر .. لقيت شخصية تضج مرحا وحيوية وشباب وهالني منظر مؤشر بوصلتي وهو يدور حول الميناء عشرين مره عشان يستقر محل الشمال .. حيث ينبض القلب .. لك حبي الخالص .. والحمد لله الفكو منك اللجام!.. يلا .. فرحي خلق الله وإتني .. وإتني .. يا شبه القمرا .. (أكتبي) رشي عبيرك فينا .. كفاك ولا أديك ؟.. تشااااااوووووgoood

أبو أماني
06-01-2010, 09:54 PM
يافيصل أنا ما قلت لك الزول دا طرور وغبيان ساكت:confused::confused: لأ وكمان طلع عويرgoood العيال في البيت بيكتبو الأسامي في ورق وبيلخبتوهو وبعدين بيسحبو منو ورقة والورقة الفيها الاسم هو العليهو غسيل العدة..
اللذيذ في الموضوع العيال كاتبين اسم أبوهم في كل الورق وبخلوهو هو يسحب الورقة بي ايدو..وعمنا طبعا لو سحب لي شهر فبراير برضو حيطلع اسمو..
أها في عوارة أكتر من كدا:confused:
غايتو يامعلم أنا حقي أخدتو منو تالت ومتلت..ختيت ليك أم أماني وفادي ولدا وواحدة ضيفة من كوبر وكشفت ليك أوراق أبو أماني كلها ودخولو المنتدي بعد نص الليل..وكان هو صحي راجل خليهو يضرب تلفون لأم أماني عشان تكسر الموبايل وتغرمو تمنو:Dgoood:D

المرة دي بالثابتة يا توحة يا خببيبي ....(1) فتحي حبيبي قال :-
يافيصل أنا ما قلت لك الزول دا طرور وغبيان ساكت:confused::confused: لأ وكمان طلع عويرgoood العيال في البيت بيكتبو الأسامي في ورق وبيلخبتوهو وبعدين بيسحبو منو ورقة والورقة الفيها الاسم هو العليهو غسيل العدة..
اللذيذ في الموضوع العيال كاتبين اسم أبوهم في كل الورق وبخلوهو هو يسحب الورقة بي ايدو..وعمنا طبعا لو سحب لي شهر فبراير برضو حيطلع اسمو..
* * * الرد * * *
أنا وباقي (الربع) هنا مقتنعين وباصمين بالعشرة على صحة أقوالك أعلاه بس لو تكرمت تشرح لنا .. كيفية إكتسابك لهذه الخبرة (العملية) التي لا يشق لها غبار ؟؟؟.

(2) وكمان قال الحبيب لا فض فوه :-
غايتو يامعلم أنا حقي أخدتو منو تالت ومتلت..ختيت ليك أم أماني وفادي ولدا وواحدة ضيفة من كوبر وكشفت ليك أوراق أبو أماني كلها ودخولو المنتدي بعد نص الليل..وكان هو صحي راجل خليهو يضرب تلفون لأم أماني عشان تكسر الموبايل وتغرمو تمنو...
* * * الرد * * *
إذا كنت يا أحلى زول تتعاطى ال .. (سمسمية) بالدس طوال هذه السنين خوفا من مفراكة أوكنش أم ألآ أطال الله عمرها .. فاخوك بحمد الله ما عنده قشة مرة .. بدليل إنو فادي وأمو يعرفون كلمة السر لدخول كل مساحاتي السرية او الخاصة .. يعني طلع زي ما بقولوا أهلنا أولاد بمبة كشر .. طلع نأبك .. على شوونة.. قال أوراق قال .. أوراق شنو يا بتاع الويكاب .. قلت لي .. الويكاب عشان منو ال بيتوحم؟؟؟ ياربي يكون وحم .. (باك ديت) ولا شنو؟!..

عموما محاولتك لا بأس بها .. ولكنها طلعت زي قنبلة (أربابكم) المخزنها في شندي .. وفي كل الأحوال تظل أنت فتحي مسعد الشاب الحلو الحبوب الخلى ناس سودانيات يقولوا الروب .. تششااااو يا الحبيب ..وزيارة ..زيارتين لأولادي في دياركم ما كفاية .. وما مقنعة بالنسبة لي لأني عارفك .. إبن أصول .. ولسع البقول عليك حلبي حرم أقد ليو عينو .. وتاني تششششااااوووو goood

فيصل سعد
06-01-2010, 10:01 PM
يا ابو الوجاهة انت اقعد اعملها
لي سلام و ونسة و مقالدة و اتزاوغ
كدا :D:D و ناس نانا وصلوا القلابات،
خش لينا في سؤالنا عن ابو مهيد و مقالبك
ليو و سؤالنا عن منبر سودانيات و اسئلة
المداخلة رقم 360 و اسئلة المتداخلين،
الكع و بطل حركات الجعافرة دي،
خلينا نخش على فرنسا و المولد
و السواسيو و كلوزيم و اتني و قهوة الزيبق
و سوق اربعة، و ناس سلطة و لوفت و الجنيد،
و تحياتنا الباذخة يا سنير سنايرنا :D:D

فيصل سعد
06-01-2010, 10:05 PM
و ما تنسى ديل :



و بعد ذلك تحدثنا قليلا عن :

ابو اماني و اصدقاء في الذاكرة ..

ابو اماني و الرياضة و المريخ ..

ابو اماني و السياسة و العمل العام ..

ابو اماني و الادب و الفكر و الثقافة و الفنون ..
و الفنان المفضل، موسيقيا و مسرحيا و سينمائيا ..

ابو اماني و عتبات و بدايات الحب و الغرام الاولى، و ان
كانت هنالك شواكيش هايدرولكية او ارض جو فسردها اختياري؟؟

و نواصل ..

عبدالدين سلامه
07-01-2010, 10:32 AM
تحياتي وجاييك ... لسه واصل من السفر

أبو أماني
10-01-2010, 05:10 PM
يا ابو الوجاهة انت اقعد اعملها
لي سلام و ونسة و مقالدة و اتزاوغ
كدا :D:D و ناس نانا وصلوا القلابات،
خش لينا في سؤالنا عن ابو مهيد و مقالبك
ليو و سؤالنا عن منبر سودانيات و اسئلة
المداخلة رقم 360 و اسئلة المتداخلين،
الكع و بطل حركات الجعافرة دي،
خلينا نخش على فرنسا و المولد
و السواسيو و كلوزيم و اتني و قهوة الزيبق
و سوق اربعة، و ناس سلطة و لوفت و الجنيد،
و تحياتنا الباذخة يا سنير سنايرنا :D:D
* * *
أولن بالتبادي : الحبيب هاشم .. وهو صديق يملؤني الفخر أن أنسب إليه صديقا.. تعرفنا عن طريق الصدفة .. حيث التحقت للعمل بالإدارة المركزية للكهرباء والمياه آنذاك .. وحيث كانت متاخمة أو قل مقابلة لحديقة الحيوانات .. أو كما يحلو لحبوبتي بت أبو حسبو أن تسميها .. جنينة النزهة .. وكانت تذخر أقفاصها بأشكال تشبه لحد بعيد البعض ممن يمتلكون ناصية القرار هذه الأيام .. كنت أعمل موظفا بقسم شئون الموظفين وكان هاشم يعمل في قسم يبعد عنا قليلا في داخل المبنى .. وكان رئيسهم رحمه الله (مضييقها للطيش) وكان كل الإصطاف شاميو .. وهو من أولاد بري (المرحوم محمد عثمان التلب) رحمه الله .. وعلى التعتروا اليوم داك صادف جيت داخل مكتبهم .. ولقيت الباشكاتب بجلالة قدره مدخل مسطرة يحك بيها ظهره .. فلم أتواني من السخرية منه ..وقلت له جادا .. حاجه غريبة .. ما تستحمى يا أخي بلا ياخدك .. وضج الإصطاف المغبون بالضحك .. من ديك وهاشم استلطفني حتى صارت هذه الواقعة نواة صداقة حميمة ادخرها ليوم .. الله لا وراكم ليو .. قصدي يوم الكرسي الجمب باب الشارع الصباح الصباح .. !!!

سألت عن مقالبي لهاشم ولم تسأل عن مقالب هاشم لي .. والله يا فيصل كان يفصل ليك مقلب .. عابدين عوض الله يرحمو ما يفصلو .. لاحقا .. اذكر لكم بعض مقالب متداولة بين (الجبنة والزيتون) أو كما كان يطلق علينا المعج/بون/بات ..فيصل ما تهرش رأسك القصة ما محتاجة تفكير كتير .. وذكاء المعى .. طبعا الزيتون برمزوا بيها لهاشم يا عبقري!!.

أسئلتك كتتتتتيره .. لذلك سوف اديك الإجابات بالأقساط ... يلا تشاااااووووو goood goood goood

بابكر مخير
10-01-2010, 05:37 PM
يا ود نونو
يابا إحنا الصغااااااااااااااااااار ديل كنا عارفين أنو إسمها "جنينة النزهة"، لمن إتا:mad:
كدي بالله بالجد، قول لينا زمنك كان إسمها شنهو!!
حبوبتك ديك ظنيتها دفعتنا:D

(الجبنة والزيتون) أو كما كان يطلق علينا المعج/بون/بات ..فيصل ما تهرش رأسك القصة ما محتاجة تفكير كتير .. وذكاء المعى .. طبعا الزيتون برمزوا بيها لهاشم يا عبقري!!.

هنا ممكن أوفقك لأني هشومي الآنا شوفتهو دآك، كان بس الأبيض فيهو شعرهو وقميصهو اللابسهو.
سنة يا المعوض السنون بالأقلام:eek:

يلا تشاااااووووو[/B] goood goood goood

إتا فيك عرق من قوم جيلينا،
بالتشاااااووووو قادينا،
ورميي الدوراب قادينا
الجااااااااااااااااااااااك
"أمشي قول ليا جدك كان بستعمل الكلمة دي":D

بابكر مخير
10-01-2010, 05:41 PM
[color=#8B0000
وكان رئيسهم رحمه الله (مضييقها للطيش) وكان كل الإصطاف شاميو .. وهو من أولاد بري (المرحوم محمد عثمان التلب) رحمه الله .. [/color] goood goood goood

غايتهو فوفو من بري
شيل شيلتك لو بقا عليه رحمة الله من بري المحس
"المديدة حرقني"
تشاااااووووو

فيصل سعد
10-01-2010, 10:38 PM
غايتهو فوفو من بري
شيل شيلتك لو بقا عليه رحمة الله من بري المحس
"المديدة حرقني"
تشاااااووووو

يا الحبيب المشكلة العويصة :D:D
انه ابو اماني زاتو من بري المحس
و اتربى في حوش جده هناك ، و عمته
امي ست نور جارتنا هيتة بالهيتة :D:D
لكن اليوم كله مقيل في ابحشيش و
الدرايسة عشان كدا لونه طلع زيتوني
فاقع السواد و كدا :D:D

فيصل سعد
10-01-2010, 10:41 PM
إتا فيك عرق من قوم جيلينا،
بالتشاااااووووو قادينا،
ورميي الدوراب قادينا
الجااااااااااااااااااااااك
"أمشي قول ليا جدك كان بستعمل الكلمة دي":D

ابو اماني ملك الجاكات
و الادرسة :D:D
و عنده محن كدا بيعرفا
براو اسمها قنابل هايدروليكية :D:D
و مكنات اسفيرية..

فيصل سعد
10-01-2010, 10:43 PM
* * *


أسئلتك كتتتتتيره .. لذلك سوف اديك الإجابات بالأقساط ... يلا تشاااااووووو goood goood goood

يا حبوب حمد الله على سلامة
ام اولادك، مرحبا بعودتك و
ما تشوفوا شر ..

أبو أماني
17-01-2010, 12:49 PM
يا حبوب حمد الله على سلامة
ام اولادك، مرحبا بعودتك و
ما تشوفوا شر ..
القسط الأخير ..
و بعد ذلك تحدثنا قليلا عن :
ابو اماني و اصدقاء في الذاكرة ..أصدقاء بالهبل يا معلم .. منهم من بلغ شاوا بعيدا ومنهم من لم يبلغ ولا حتى حرف الشاء من شاو .. على قيد الحياة منهم .. الدكتور محمود ياسين من أولاد بورتسودان الآن بأمريكا وأسرته معكم بكندا .. وعبد الله المبشر .. أظنك تعرفه من بري المحس .. وسيف الدين خليفة الصادق من اللاماب .. ومن أصدقاء الدراسة .. عبد الحميد أحمد سليم ومحمد تكروني .. وعيييييك

ابو اماني و الرياضة و المريخ ..الرياضة والفنون أحبهما حتى الموت .. وأما المــــــريخ .. فهو عشقا تجذر في الضلوع والحنايا .. وكفي..!
ابو اماني و السياسة و العمل العام ..
السياسة هجرتها منذ أن ظهر في الكون .. (ناس كده!) طلقتها بالتلاتة .. أحمل بعض الحنين لحزبي الأصلي .. المحارب من كل الجهات .. أما الأسرة فكلها إتحادي ديموقراطي .. العمل العام .. أعمل مديرا إداريا لشركة دواء إماراتيه .. مقرها بالمنشية .. تدعى (جلفار) بجانب بعض الممارسات الصحافية (الإجتماعية والرياضية فقط) ...
ابو اماني و الادب و الفكر و الثقافة و الفنون .
أعشق الأدب ..(على قلته)! .. الفكر حائر حتى اللحظة فيما بين أيهما خلق أولا .. الدجاجة أم البيضة .. خاصة لو أقحمنا قوله تعالى جل وعلا .. (يخرج الحي من الميت والميت من الحي) صدق الله العظيم .. الثقافة أصل الحضارة وأم الأمم .. والفنون .. (أبوها)!! أعشق الفن باي شكل جاء.. حتى الغلاسة لو فيها وتضررت منها تعجبني يا فيصل ..

و الفنان المفضل، موسيقيا و مسرحيا و سينمائيا ..
أظلم الكثيرين لو إخترت فنانا ( مفضلا ) وأنا أسمع بشغف لكل مطربي بلادي خاصة تلك المقطوعات الغنائية التي بها لمسة إبداع .. أدبا شعرا لحنا وأداء .. التحية لقمم الغناء في بلادي أحياء وأموات ومن الأحياء أخص الهرم الفني .. وردي أبو اللمين والكابلي ..وجميع الأموات.
مسرحيا .. أحب المسرح درجة الجنون .. وصديق دائم للمسرح القومي وقاعة الصدافة .. وقصر الشباب والأطفال ومسرح البقعة .. وأحب تمثيل المرحوم الفاضل سعيد .. والجعفري .. وكذلك على مهدي ومكي سنادة وهاشم صديق والفادني وعادل إمام السوداني عميد فرقة الأصدقاء .. وحتى المتقاعد مع سبق الإصرار والترصد الرائع .. (ناصر يوسف) لع له التحية.
أما السينماء فحدث ولا حرج .. أحب السينماء لدرجة إدمان البعض للسمسمية .. فتحي مسعد باردون والله ما قاصدك .. وبصراحة ألسينما زمان .. أروع مليون مرة من المؤثرات الصوتية والخدع السينمائية دلوقت ..
ابو اماني و عتبات و بدايات الحب و الغرام الاولى:-
تهئ تهئ تهئ .. عليك الله ما تخجلني يا ..إتا .. !! الراس مدنقر والوجنتين محمرات والأصابع واقعين شكل مع بعض .. يعني .. كان في شوية حاجججججات كده .. بس على خفيف ..بعدها طوووالي بلعة ريق .. وقشة عرق .. والمروحة شغالة
و ان كانت هنالك شواكيش هايدرولكية او ارض جو فسردها اختياري؟؟
الحمد لله البقى إختياري .. هو شاكوش وااااحد ما في غيره .. جاء على دماغي زي القضاء المستعجل .. لما أم أماني الله يسامحها وافقت على خطوبتي ليها اليوم داك .. عليك الله كان ما قصر نظر حريم .. العاجبها في النصيبة الزرقاء دي شنو؟ غايتو نقول التجي من السماء تتلقاها الواطا .. أها قصرت معاك يابا .. يلا .. نفرتق بعد ده يا .. حبة ..شـــتتتتتتتتا ت ..! دي بدل تشاااااووو ..

أبو أماني
19-01-2010, 04:33 PM
goood شكرا الحبيب فيصل سعد goood
• أتمنى أن تكونوا قد وجدتم في ضيافتي بعض السرور وأن لا أكن الضيف الذي تنتظر بفارغ الصبر متى يضع يديه على ركبتيه عازما الرحيل فيقال له بنفاق بائن ما بدري! وأن لاتك كلمة (مع السلامة) الذ كلمة سمعها المضيف منذ حضوره!.
• ويسعدني أنني ومن خلال هذا البوست قد عرفت وعرف غيري الكثير عن أناس نكن لهم كل الود والحب الصادق النبيل .. فأنا شخصيا أحسست بأنني عرفت الكثير مما أجهل عن الحبيب ابو سارة والأديب الهرم الأستاذ النور يوسف والحبيب بكوري .. والفنان المخضرم مجدي مسعد وإبن بري الباذخ فيصل سعد .. والعزيزة آمال الشيخ رقم شحها الواضح عند إستضافتها!.. والصديق الحبيب تكعيب د. عادل عسوم .. وتوأمه القيثارة .. أبو مازن .. وسارة (الخرافية)!..وحتما لا أنسى صديقي الرائع حد الدهشة (أبومهييد)!.
• الشخصية القادمة بإذن الله شخصيه تحتل مساحات خصبة ومهولة في حنايا معظم إن لم نقل كل افراد سودانيات وثقتي لا تحد في أن ضيافتها ستشكل زخما مهولا من المداخلات الظريفة فهي شخصية لطيفة حلوة المعشر رشيقة الطلة وأهم من كل هذا غيابها الذي طول أخيرا عن عالم سودانيات أرجو أن يكون في هذا البوست بمثابة تحريض لها بالعوده ..
• طبعا نبراس.. وتحفة حواء وشليل وشبارقة وروبس وجانيت والعالم الجنها شمارات ديل .. يموتوا يعرفوا الشخصية دي منو؟ .. عموما موتوا بغيظكم ولو إلى حين .. حيث يعلن عنها لاحقا .. يلا تشاووو وأكرر شكري لإبن العم العزيز فيصل سعد ..

فتحي مسعد حنفي
19-01-2010, 06:01 PM
goood شكرا الحبيب فيصل سعد goood
• مجدي مسعد وإبن بري الباذخ فيصل سعد .. والعزيزة آمال الشيخ رقم شحها الواضح عند إستضافتها!.. والصديق الحبيب تكعيب د. عادل عسوم .. وتوأمه القيثارة .. أبو مازن .. وسارة (الخرافية)!..وحتما لا أنسى صديقي الرائع حد الدهشة (أبومهييد)!.

والعزيزة آمال الشيخ رقم شحها الواضح عند إستضافتها!..• طبعا نبراس.. وتحفة حواء وشليل وشبارقة وروبس وجانيت والعالم الجنها شمارات ديل .. يموتوا يعرفوا الشخصية دي منو؟ .. عموما موتوا بغيظكم ولو إلى حين .. حيث يعلن عنها لاحقا .. يلا تشاووو وأكرر شكري لإبن العم العزيز فيصل سعد ..

أها كدي ورينا أمال رقم شحها دا كم

أبو أماني
21-01-2010, 05:28 PM
أها كدي ورينا أمال رقم شحها دا كم
][®][^][®][طبعا يا معلم إيمولا هلالابية على السكين .. (على شنو؟ ما عارف!!) عشان كدي بيكون رقم شحها .. ((0)) يرمز للصفر الدولي الكبير الذي حصل عليه الخمساوي .. تهئئئئ هئ هئ! إت بس الله يخليك لجنس ده يعني لو بالسهو أو الغلط القاف جات بدل الغين تلقى المصحح اللغوي (الخواجة!!) واقف ليك بالمرصاد أها براك جبتو لي رقبتك الما ظاهرة دي .. جنس كلبظة ..!!! ][®][^][®][ goood goood goood goood goood