المساعد الشخصي الرقمي

مشاهدة النسخة كاملة : ضيف على مائدة سودانيات ...! - 7 - عكــود


أبو أماني
27-07-2009, 06:38 PM
gooodأحبائي الأعزاء ..
أحباء سودانيات .. لكم صادق الود والتحايا القلبية .. حقا قد سرني وأثلج صدري عمق صداقتي بكم ذهاء ما يقارب السنة أو يزيد .. قضيتها بينكم في سعادة وحبور .. وأحسست وأنا بينكم وبكم بدفء الأسرة وأحلى وشائج الإخاء والمحبة .. حيث صرتم بالنسبة لي كأفراد أسرتي رحما بل أكثر من ذلك..بحيث أقضي الساعات الطوال في رحابكم المرحة العامرة قبل وأكثر مما أقضيه مع أسرتي .. فلكم الشكر على ما وهبتموني من حب صادق إمتزج في شراييني وصار يغزو القلب ويعمر غرفه الأربع ويهرب ليعود ثانية ليمدني بالحياة .

فكرت مليئا في شكل مستقبل علاقة كل سوداني في سودانيات بالآخر! وهالني أن تكون علاقة صادقة حميمة كهذه عرضة للعيش والعمران طويلا عبر الفضاء الإسفيري والعالم الأثيري ..! وتصورت حياة شخوصها في اللاشئ وفنائهم في اللاشئ ..تماما كما يحدث يوميا بالنسبة لممثلين وممثلات نشاهدهم عبر الشاشات البيضاء والبلورية .. نعايشهم ونعاصرهم ثم يتلاشوا في اللاشئ حقيقي حزت في نفسي هذه الخاطرة .. وفكرت ثانية !..

أضع بين أياديكم عتبة أولي لتجسيد علاقة كل منا بالآخر .. وهو بوستر تتم استضافة عضو فيه ليكون مصدر حوار تعارفي يحكي لنا ما عن له أن يرويه عن نفسه فنزداد قربا منه أكثر وأكثر ومعرفة به وثيقة أكثر .. نعرف موقعه الحالي .. رقم موبايله .. عدد أفراد أسرته .. طموحاته الآنية والمستقبلية .. بعض مشاكله الخاصة التي يمكن الخوض فيها .. والمشاركة في علاجها بعض الجوانب المضيئة من حياته الماضية والتي يحلو له الخوض فيها مع الأحباء .. الخ ..

إن راقت لكم فكرتي هذه فأقترح أن يقوم كل ضيف حل بالبوستر في نهاية حلقته بترشيح من يحل بعده ضيفا على مننتسبي سودانيات .. وهكذا دواليك .. تبقى المعضلة في إختيار عضو الشرف الأول .. وأقترح أيضا أن يقوم صاحب البوستر بإختياره .. درج كبارنا على إختيار كبير القوم ليتولى ضربة البداية في كل مشروع أو عمل .. وحيث أن مجتمع سودانيات يحفل بالكبار شكلا وموضوعا وليس من بينهم من يتفضل على الآخر .. فأسمحوا لي أن أختار أكبر الأعضاء (سنا) .. فليكن ضيف الحلقة الأولى العميد الأستاذ :-

:Dخـــالـــد الحــــاج:confused:
مساهمتي الأولي معه المطالبة بنبذة صغيرة عن عميدنا والبطاقة الشخصية وتعريف مختصر ولكم جميعا خالص حبي وإعتزازي وإحترامي ...

أبو أماني
21-01-2010, 05:50 PM
بدون مجاملة مني والله أعلم .. فإن إستضافة عكود في هذا البوستر المتواضع سوف تشكل بعدا متفردا .. فهو شخصية تنقلت في المنتدى في عدة مواقع منها العضووية ومنها القيادية..وأخاله بعد أن نحى المسئولية عن كاهله .. يشعر بالغبطة أولا وخفة الحركة بما فيها اليد واللسان .. وممكن نتجول معه في مساحات شاسعة داخل (عالمه الخاص) بلا حرج أو بما يسمح لنا به!.. وهو أيضا كفراشة نشطة تحط رحالها في أكمام وشغاف كل القلوب وأولها قلبي .. أحسبه سيكون سهلا لكل من لم تسنح له فرصة كهذه للغوص في أعماق هذا المحيط الذاخر بالروائع يلا يا شباب .. عليكم بالضيف الظريف :-
* * * عــــكــــود * * *

أبو أماني
23-01-2010, 04:29 PM
كتبت بوستر جانبي أعلن فيه عن إستضافة العزيز عكود حتى ينشط الجميع .. وجاءت المداخلة التالية من العزيز (مواطن ) أنقلها هنا وليعلم الحبيب عكود .. إننا ما فايتين منو شبر .. معقول بس ألقي سانحة زي دي مع زول لذيذ زي ده وأفوتها ؟..ولا كيفن يا ابو الفياصل ؟؟_
منقول من هناك .. قال عكود أنه مر ببوست مشابه لهذا مع العزيز فيصل سعد وأقول له هنالك إختلاف واضح .. داك (كرسي ساخن) وده مقعد وثير وعاوزين من خلاله نعرف ما خفى من عالم جميل بداخل الزول الجميل عكود أها هاشم منتظر ... يلا قول بسم الله ...
-----------------------------------------------------------------الحبـيب عكـود
تسـلم يا غالي ..
سأنتـظـر معـك ..
__________________

(تبارك الذي بيـده البـؤس وبعـض ومضات المنـى
ويمـشي بيـنـنا)
مواطن
---------------------------------------------------------------
22-01-2010, 07:00 PM
مي هاشم
Member
-----------------------------------------------------------------
اقتباس:
المشاركة الأصلية كتبت بواسطة مواطن
أولاً : ما هو تقيــيمـك للخط العام لسودانيات ؟
ثانيا : وهل يغلب لون سياسي ما مثلاً فيه ؟
ثالثاً : ما هـو رأيك فيمن يقعـد عن التصارح ويعـمد إلى الترميـز والإشارة في مداخلاته/ها ؟ وماهي تداعيات هـذا المسلك على الصفاء العام ؟
----------------------------------------------------------------
العزيز مواطن
تحية طيبة
السؤالين ديل نفسي الناس تناقشهم عديل بالذات السؤال الثاني..
ارجو منك فتح بوست وليدلي الجميع بدلوه..
خالص الود
________________
(1) أرجو من الزميلة العزيزة .. أن يستمر الأمر هنا فهذا البوستر شامل ويمكن أن يحتوى الموضوع
(2) وللعزيز عكود بقول :-
كدي يا الحبيب روق لي صاحبي ده .. وجاوب على أسيئلتو ..وأنا جايييك ... تشاوووو gooodgoood

عكــود
23-01-2010, 04:46 PM
أبو أماني الزين،

يسعد مساك ياخي.

إن كان ولا بد، أرجوك أنقل أسئلة المواطن الصالح -القال عنّها خفيفة:rolleyes:- هنا، عشان الرد يكون برضو هنا.

تسمح لي أجيك باكر؟

أبو أماني
23-01-2010, 05:02 PM
أبو أماني الزين،

يسعد مساك ياخي.

إن كان ولا بد، أرجوك أنقل أسئلة المواطن الصالح القال عنّها -خفيفة:rolleyes:- هنا، عشان الرد يكون برضو هنا.

تسمح لي أجيك باكر؟

شوف توارد الخواطر ده كيف يا الحبيب .. لحظة بتكتب في المداخلة الفوق دي أنا كنت (أوول ريدي) نقلت المداخلة هولت هاشم .. بي جاي حسب رغبتك .. ومعاك لحدي بكرة .. أنا غير راحتك شن بدور يا .. أبو النسب .. يعني ما سعلت عن أحوال المدام .. الحالة بت عمك .. سمح أصبر لمن تجي بكلمها .. شيل شيلتك يابا ..طبعا عارف طقش الشايقيات وضايقو في لحم جلدك .. وعليك الله يا صديقي تجاوب لي على سوعالي ده .. المفراكة ..كييييييف ؟؟؟؟! goood gooodgoood gooodgoood

أبو أماني
26-01-2010, 10:04 PM
أبو أماني الزين،

يسعد مساك ياخي.

إن كان ولا بد، أرجوك أنقل أسئلة المواطن الصالح -القال عنّها خفيفة:rolleyes:- هنا، عشان الرد يكون برضو هنا.

تسمح لي أجيك باكر؟
بالله يا عكود يا أخوي .. ما تشحتف روحنا أكتر من كده .. أهو دا طلبك مجاب ونقلنا ليك كلام مواطن ..
اقتباس:
المشاركة الأصلية كتبت بواسطة مواطن
أولاً : ما هو تقيــيمـك للخط العام لسودانيات ؟
ثانيا : وهل يغلب لون سياسي ما مثلاً فيه ؟
ثالثاً : ما هـو رأيك فيمن يقعـد عن التصارح ويعـمد إلى الترميـز والإشارة في مداخلاته/ها ؟ وماهي تداعيات هـذا المسلك على الصفاء العام ؟
- - - - :confused:
وده كلامي أنا ..
عاوزين يا الحبيب .. تحكي لينا نبذة (مسهبة) عن حياة ومسيرة حياة الرائع عكود منذ نعومة الأظافر وحتي اللحظة .. ولا أسئلة ولا يحزنون عاوزين نتعرف عليك أكتر وعن قرب .. ما تخاف دي مجرد تسخينة والباقي في السكة .. لسع الخواجة وأبو ريم وأبو مازن وناس كتيره عندها كلام من النوع البقولوا عليو (ذو شجون) لك الود خالصا ... goood goood goood

فتحي مسعد حنفي
27-01-2010, 01:19 AM
بالله يا عكود يا أخوي .. ما تشحتف روحنا أكتر من كده .. أهو دا طلبك مجاب ونقلنا ليك كلام مواطن ..
اقتباس:
المشاركة الأصلية كتبت بواسطة مواطن
أولاً : ما هو تقيــيمـك للخط العام لسودانيات ؟
ثانيا : وهل يغلب لون سياسي ما مثلاً فيه ؟
ثالثاً : ما هـو رأيك فيمن يقعـد عن التصارح ويعـمد إلى الترميـز والإشارة في مداخلاته/ها ؟ وماهي تداعيات هـذا المسلك على الصفاء العام ؟
- - - - :confused:
وده كلامي أنا ..
عاوزين يا الحبيب .. تحكي لينا نبذة (مسهبة) عن حياة ومسيرة حياة الرائع عكود منذ نعومة الأظافر وحتي اللحظة .. ولا أسئلة ولا يحزنون عاوزين نتعرف عليك أكتر وعن قرب .. ما تخاف دي مجرد تسخينة والباقي في السكة .. لسع الخواجة وأبو ريم وأبو مازن وناس كتيره عندها كلام من النوع البقولوا عليو (ذو شجون) لك الود خالصا ... goood goood goood

يابو أمانتي الزول دا أنا لابد ليهو في اللفة الأخيرة ومستنيكم تخلصو وبعدين أنا بجيهو بي التقيلة من تايلاند ولي فوقgoood:Dgoood..بس الزول دا عمرو ما كان عندو نعومة أظفار ولا سمع بيها..دا من طلوع النخل كان عندو مخالب:D

أبو أماني
27-01-2010, 05:24 PM
يابو أمانتي الزول دا أنا لابد ليهو في اللفة الأخيرة ومستنيكم تخلصو وبعدين أنا بجيهو بي التقيلة من تايلاند ولي فوقgoood:Dgoood..بس الزول دا عمرو ما كان عندو نعومة أظفار ولا سمع بيها..دا من طلوع النخل كان عندو مخالب:D

يا خواجة عليك الله ما تخوف لينا الشايقي ده .. طبعا إنت عارف نسابتي ديل هراشين ساكت لكين القلب كبير .. ما تحمر لي يا عكود قصدي حبوبين وقلبهم يسع ما يحتويه مليون ميل مربع يلا يا أب شنبا روب .. سكت لي الجماعة ديل وأولهم أنا .. الخواجات ديل قزقز بيهم تشاوووgoood

عكــود
27-01-2010, 05:52 PM
الأحباب،

ابو أماني
مواطن
فتحي

أولاً آسف لعدم إستطاعتي الإيفاء بوعد قطعته في مداخلتي السابقة.
ثانياً شكراً لإستنطاقي واعتقادكم أن بإمكاني أن أفيد في سياق البوست.

أعذروني لظروف عملي الضاغطة هذه الأيّام، فقد رجعت قبل قليل من سفرة داخليّة وسأسافر بعد ظهر باكر لمدّة أربعة أيّام، لذا سيكون تداخلي منتظماً بعد الأثنين القادم إن شاء الله.
لكن لأبدأ . .

مواطن سأل:
أولاً : ما هو تقيــيمـك للخط العام لسودانيات ؟ سأبني إجابتي على الشعار المرفوع (سودانيات عالم من التواصل والمحبّة).
أعتقد أنّنا في هذا المجال قد قطعنا شوطاً كبيراً نباهي به باقي المنتديات، فسودانيات أشبه ما تكون منتدىً لـ قرية صغيرة يتعارف الجميع فيها ويحب الجميع بعضهم البعض. كم هائل من العلاقات نشأ وتنامى على الواقع، وكم كبير من الزيارات واللقاءات تمّ تبادلها، كل هذا الكم تمّ في جوّ تغلّفه المودّة والإحترام. هنا نشأت صلات يعتد بها ويمكن بكل بساطة وبدون حساسيّة، أن تتّصل بأحد أصدقاء سودانيات لتكلّفه بأداء مهمّة تخصّك، كما يمكن أن تتصّل لتقول (اليوم الفلاني أنا طابّي عندك!).
وقد علّق أحد متابعي سودانيات بالقول (عيبكم يا ناس سودانيات إنّكم أصحاب أكتر من اللازم).

أمّا، عن (نعم ننافس . . فنحن نخدم أمّة)، أعتقد بأنّنا في سودانيات قد قمنا بجهد في هذا المجال ولا يزال ينقصنا الكثير هنا، وفي رأيي أنّ المجلس الحالي يجب أن يبذل مجهوداً أكبر في هذا المجال، و ما أظنّه إلاّ فاعل.


سآتي لباقي أسئلة مواطن إن شاء الله ما تيسّر لي الوقت.

فتّكم بالعافية.

بدور التركي
27-01-2010, 06:36 PM
منتظرين.......

أبو أماني
31-01-2010, 03:52 PM
منتظرين.......

لكي خالص التحية ولاسرتك الكريمة .. وين الغيبة يا بت ملوك النيل؟ نواصل الإنتظار معك أن يطل علينا صاحب الطلعة البهية عكود ندرك مشغولياتو والضغط الذي يعانيه ولكن نعلم أننا في الخاطر والحنايا .. وعلى الحساب يا عكود ...

(1) لكل منا مجالا يبدع أو على الأقل يعتقد أنه يبدع فيه..وسؤالي لك هنا..ما هو المجال الذي تشعر إنك تبدع فيه .. مع ذكر جانب من تلكم الإبداعات؟!
(2) لن أثقل عليك يا boss (سابقاًُ) وفي نظري شخصيا (حاليا) وعليه أرجو الرد على كل ماسبق مني أو من الغير وكما قالت (ال) بدور .. منتظرين ........ تشاووو مؤقتا،،، goood

أبو أماني
01-02-2010, 06:08 PM
عليكم الرسول يا أخواني عكود ده ما سواها ظااااهرة ؟.. يعني فوق كم التقل الشدييييد ده يا السنجك؟! الأكل برد ومرتين رجعناو يسخنوه وإت لي هسع ما جيت المائدة .. شنو يا ملك يا ود الملوك القصة شن نفرها؟! سارة .. سرييييع رسل لينا المعلوم .. بس يبلعوه ليو كيفن؟! عموما ما زلنا ننتظر .. أنا خليني طائر في السماء اللحمر داك .. ست البنات المنتظره معاي دي تقول لها شنو؟؟!! كمان عاااان ده..! الفرحان لها شني؟ goood

عكــود
02-02-2010, 06:31 AM
سلام يا أبا أماني،
ليك وللعزيزة بدور.

أعتذر للمرّة الثانية فقد كنت خارج مدينتي الخمسة أيّام السابقة.

و إلى السؤال الثاني للعزيز مواطن:ثانيا : وهل يغلب لون سياسي ما مثلاً فيه ؟سودانيات قوس قزح، يحوي جميع الألوان المفر حة، الكل يأتي بحصاد ما يعتقد حسب قناعاته، سياسيّة كانت أم غير ذلك، تكون الغلبة للون السياسي على حسب نشاط منتسبي الإتّجاه المعني. ويبدو للمتصفّح العادي الغير متابع، أن هناك لون سياسي مثلاً يغلب عليها، فقط لأنّه تصفّح المنتدى في وقت نشاط ذلك التوجّه في طرح والدفاع عن توجّهه.
خلاصة القول، أنّ بسودانيات جميع ألوان التوجّهات السياسية، فهي تعكس مرآة الواقع السوداني، ولكني لا أعتقد أنّ هناك لون سياسي ممكن أن تُصبغ به سودانيات. غير أنّها يغلب عليها الإنحياز لقضايا السواني العادي الّذي اكتوى بلهيب ما يحدث في بلده، ولذا يتّفق الأغلبية في التصدّي لحكم الإنقاذ.

عكــود
02-02-2010, 06:45 AM
سأل مواطن:
ثالثاً : ما هـو رأيك فيمن يقعـد عن التصارح ويعـمد إلى الترميـز والإشارة في مداخلاته/ها ؟ وماهي تداعيات هـذا المسلك على الصفاء العام ؟الترميز والإشارة أسلوب جيّد في السياق الأدبي، وكثيراً ما يستخدمه من آتاه الله البلاغة وحُسن التعبير، ونجده كثيراً في مخاطبات أهلنا ممّن آتاهم الله موهبة الحكي والرواية.
لكنّي لا أقرّه أبداً -بل وأمقته- عندما يأتي بأسلوب (المُطاعنة) ويخلق ذلك بيني وبين من يستخدمه حاجزاً سالباً ينعكس على قراءاتي لما يأتي به.
بالتأكيد، الوضوح التام بأسلوب خالٍ من التجريح والتلميحات الغير حميدة، يفرض إحترامه على المُخاطَب والمتابِع.
تداعيات ذلك على الصفاء العام في سودانيات مدمّرة وفي كثير من الأحيان تنعكس حتى على العلاقات الشخصيّة، وهو ما يميّزنا.
قل لي بالله، ما الّذي يضّطرني أن أعمد إلى هذا الأسلوب في الوقت الذي يمكنني أن أوصل فكرتي بطريقة واضحة فيها إحترام لنفسي أوّلاً وللآخرين ثانياً؟

عكــود
02-02-2010, 07:05 AM
تسخينة أبو أماني:
وده كلامي أنا ..
عاوزين يا الحبيب .. تحكي لينا نبذة (مسهبة) عن حياة ومسيرة حياة الرائع عكود منذ نعومة الأظافر وحتي اللحظة .. ولا أسئلة ولا يحزنون عاوزين نتعرف عليك أكتر وعن قرب .. ما تخاف دي مجرد تسخينة والباقي في السكة .. طيّب يا الزين،
أبوذر الكامل محمد أحمد، ترعرت في القرير بين الجناين والتمُر، صِباي كان نصف مزارع ونصف تلميذ. قرأت الأوّليّة / الإبتدائية والثانوية العامة بالقرير والعليا بمروي، وبعدها الجامعة برومانيا - مدينة تمشوارا. فترة صِباي الأولى لها الفضل الكبير في تشكيل شخصيّتي بعد ذلك. ما زلت أعشق الخُضرة، النيل، ريحة البلد، حديث البلد، شعر البلد وأغانيه، دون تقوقع وانكفاء، وما زالت باللسان لهجة شايقيّة لا تُخطئها الأذن.
بعد التخرّج رجعت السودان ولم أبقى طويلاً نسبة لعدم وجود وظيفة تستر الحال، فيمّمت وجهي شطر الخليج، هرباً من سؤال الناس وسؤال الناس!
أعمل بالإمارات بشركة بتروكيماويّات كرئيس مجموعة موارد بشريّة. متزّوج ولي ولد (محمد 16 سنة) و رُبى (12 سنة) والحمد لله. أعشق أسرتي حد الجنون و أعشق أصدقائي وأواصلهم ما استطعت سبيلاً.
أهوى السفر والترحال ومخالطة الناس والتفاعل معهم، و ما زلت أذكر ما كتبه لي أبي -رحمه الله- في أوّل خطاب وصلني بعد وصولي رومانيا:
(خالط الناس يا إبني ولا تقوقع، فليس كل ما عندك جميل، وليس كل ما عندهم قبيح.)
يشدّني الحنين كل عام، لدعوات الوالدة -أطال الله عمرها و رزقني برّها- فاسافر السودان ولا أصبر عن القرير حيث أقضي معظم إجازتي هناك، بالعرّاقي والسروال الطويل (الجلاّبية يوم السوق وصلاة الجمعة فقط). هناك أقضي إجازتي الحقيقيّة، بين الأهل والأقارب، ولذا كثيراً ما إتلوّم مع أحبابي من بورداب الداخل متّكل على سماحهم البيدفوبو الزول قبُل يبرُد.

عكــود
02-02-2010, 07:31 AM
تابع أبو أماني:
(1) لكل منا مجالا يبدع أو على الأقل يعتقد أنه يبدع فيه..وسؤالي لك هنا..ما هو المجال الذي تشعر إنك تبدع فيه .. مع ذكر جانب من تلكم الإبداعات؟!
شخصي الضعيف بعيد كل البعد عن أن يكون مبدع، ولكنّي أتذوّق إبداع الآخرين في الشعر، الأدب و الغناء، ويكمنني القول أنّي ذوّاقة و تأسرني الكلمة كما ويطربني اللحن. بعض من أعرفهم من شعراء، يعرضون علي إنتاجهم لسماع رأيي كذوّاقة فقط وليس كناقد.
بعض الأحيان، عندما يستفزّني منظر أو موقف، أعبّر عنه بالكتابة والوصف. بعضهم يقولون أنّي أجيد الوصف، ولكنّي لا أسمّي ذلك إبداعاً، فكل ما يحدث ترجمة لما أحس وأرى. وقد كتبت في سودانيات قليل من ذلك. لكنّي أعتقد أنّ الإبداع الحقيقي في قدرتي على التواصل مع الآخرين، ولسماحة فيهم وكرم، أجد عندهم القبول و التفاعل، إذن هم المبدعون ولست أنا.

فيصل سعد
02-02-2010, 10:57 AM
التحية للعزيز ابو اماني،
و للاخ الاكرم عكود :

و اسمحوا لنا ان نسأل :

لماذا يحد و يقيد و يعسم المنصب الرسمي في سودانيات،
شاغله من التواصل و النشاط في منتدى الحوار ؟؟

ماهو رأئيك و تقيمك لكل من :

عدم التفاعل مع قضايا الساعة في سودانيات، بمعنى ان الاحداث الهامة في مختلف المجالات لا تجد الحوار الكافي في المنبر؟ و لا تسليط الضؤ، و ربما التجاهل الكامل ؟؟

الاعضاء الذين لا ينشئوا و يكتبوا بوستات، و فقط يكتفوا بالتداخل ؟؟

العضوية الخاملة في سودانيات ؟؟

الاعضاء الذين خرجوا و ابتعدوا و غابوا لاسباب مختلفة؟؟
ما هي المناهج و الخطط لاستعادة نشاطهم ؟؟

ضعف المشاركة و التفاعل في مشاريع و لوائح و اعمال المنبر و ضعف التصويت
من قبل العضوية في القرارات و الانتخابات؟؟ الاسباب ، و مشاريع الحلول ؟؟

هل توجد شللية في سودانيات، السلبيات و الايجابيات ؟؟


يرى البعض في سودانيات، بان الميثاق و اللوائح، لم تكن منصفة لمالك المنتدى و اخذت كثير
من حقوقه الادارية و التنظيمية، و حدت من سلطاته التنفيذية و تركت له الحق الادبي و المعنوي،
ما رأئيك في هذا الموضوع ؟؟

و لك وافر الاحترام و التقدير،
و الشكر مقدما لسعة صدرك ..

فتحي مسعد حنفي
02-02-2010, 01:36 PM
التحية للعزيز ابو اماني،
و للاخ الاكرم عكود :

و اسمحوا لنا ان نسأل :

لماذا يحد و يقيد و يعسم المنصب الرسمي في سودانيات،
شاغله من التواصل و النشاط في منتدى الحوار ؟؟

ماهو رأئيك و تقيمك لكل من :

عدم التفاعل مع قضايا الساعة في سودانيات، بمعنى ان الاحداث الهامة في مختلف المجالات لا تجد الحوار الكافي في المنبر؟ و لا تسليط الضؤ، و ربما التجاهل الكامل ؟؟

الاعضاء الذين لا ينشئوا و يكتبوا بوستات، و فقط يكتفوا بالتداخل ؟؟

العضوية الخاملة في سودانيات ؟؟

الاعضاء الذين خرجوا و ابتعدوا و غابوا لاسباب مختلفة؟؟
ما هي المناهج و الخطط لاستعادة نشاطهم ؟؟

ضعف المشاركة و التفاعل في مشاريع و لوائح و اعمال المنبر و ضعف التصويت
من قبل العضوية في القرارات و الانتخابات؟؟ الاسباب ، و مشاريع الحلول ؟؟

هل توجد شللية في سودانيات، السلبيات و الايجابيات ؟؟


يرى البعض في سودانيات، بان الميثاق و اللوائح، لم تكن منصفة لمالك المنتدى و اخذت كثير
من حقوقه الادارية و التنظيمية، و حدت من سلطاته التنفيذية و تركت له الحق الادبي و المعنوي،
ما رأئيك في هذا الموضوع ؟؟

و لك وافر الاحترام و التقدير،
و الشكر مقدما لسعة صدرك ..

هوووووي يافيصل انت مالك عملت زي الساعاتي الكتب نعي وفي الآخر كتب وبصلح كمان ساعات..
انت قايل دا اجتماع مجلس ادارة ولا هو الحكاية استغلال فرص..
الأسئلة دي تمشي تناقشا في حتة تانية..احنا هنا بنسأل عن الحياة الخاصة وكريستينا والجكس.:D;)goood

الجيلى أحمد
02-02-2010, 03:29 PM
ينصر دينك ياابومانى يااخى

جيبتا لى زولى :D:D

النديها جكة بتاعت تسخينة ونجيهو..

هلا هلا:D

أبو أماني
02-02-2010, 04:38 PM
ينصر دينك ياابومانى يااخى

جيبتا لى زولى :D:D

النديها جكة بتاعت تسخينة ونجيهو..

هلا هلا:D

* الجيلي أحمد :
وينصر دينك ودين أهلك إتا كمان يا زول يا رائع .. عليك الله يا الجيلي يا أخوي أراك بتعرف منافذ الدخول لأغوار شخصية العزيز عكود وهو شخصية تستحق أن نقف أمامها كلنا طويلا وبكل إعزاز وإجلال وكتر الله من أمثالك أنت وفيصل لتعصروا لي السنجك عصر نضيف..
* عكــود :
يا أخي والله العظيم وبدون مجاملة متابعة ما تكتبه أشبه بمتابعة رائعة من روائع الأدب العالمي الزول كان مزنوق ما يقدر يمشي الحمام .. واصل يا مايسترو عزفك الرائع .. على أوتار سودانيات ونحن كلنا آذان صاغية .. (ممكن تصلحوني لو غلطت أصلي ما متأكد على الألف مده ولا همزة ؟ بس عارف واحده جمع أذن والتانية مفرد نداء الصلاة) ..
* الخواحة :
يا توحة يا أخي مالك ؟ وما تخلي القعدة تحلووو ! الزول مالك شابي ليو في زمارة رقبتوا نحن عاوزينك تدخل علينا بمداخلاتك الرشيقة ديك.. بطل مكاجرة والحاصل ليك في البيت نحن والله مالينا ذنب فيو .. يعني لو أم آلاء هرشتك على خفيف ما تعمل منها موضوع كلنا (ماعدى بابكر مخير) قاعدين ننهرش عاااااادي ! .. مالك باقي لي زي المدير حقنا ؟!.
عكود .. هوي آ .. عكود .. خللللك منو .. الخواجة باقي وكت ما يلقي الهنايا ديك بسحلب..! أنا والله عندي حاجات كتيييرة .. بس عاوز الزملاء يدخلوا ويحمسوا الطار .. وعلى خفيف كده بقول ليك لو تكرمت تحدثنا عن .. عن .. عن .. يا ربي شنو ؟ أييييييوه ... عن .. ال...
الحب والحنان .. هسع وأيام زمان .. يلا يا مبدع ... تشششاااوووgoood

رأفت ميلاد
02-02-2010, 05:10 PM
يا عكود أقلع الكرفتة خلاص ياخ .. والمصيبة وملصتها فى جنابو :D:D

وبطل التواضع ما مبدع كيف ؟؟ .. والله وصاف والواحد بنطط فوق حروفك لامن تدخله خلعة .. ويعيش جوه الحاصل زى الحاضره هسى ..

أجيب ليك من الورا .. زمن الخلوة والفتة والمريسى :D:D:D

يا عمدة أطربنا .. ويا قول فتحى دى عضة نوالنا ليها أبو أمانى فيا فيصل سيبك من السياسة الإنتخابات إنتهت ..:D:D

أحكى لينا يا أبا ربى .. سيبك من محمد .. مافى أحن من البنيات ..

دايرك تحكى لينا بصفاء كدة عن شعورك أول أسبوعين فى رومانيا وأنت جاى من القرير ترانزيت الخرتوم .. شايقى طازة .. وكل شايقى (رقيق وشفيف) كان طلعنا ود الحاج :D:D

وعشان ما تملحنا عارفين الرومانية أحلى بنات أوربا وأقربم للشرقية .. يلا ألبس العراقى وإنداح

عكــود
02-02-2010, 05:42 PM
سلام يا فيصل وليك القومة.

وحبابك يا الجيلي، و إن كان ولا بد فجهّز مِدرتَك القصيْري، أنا باقي بحري رَحْراح و ماهو غريق شي.

و يا أبا أماني، إنت زول تعرف تصنع الفرح وتدخله في النفوس غصباً عنها. هسّع عليك الله حِدَيْثَك ده، أنا قدرو؟
الله يجبر بي خاطرك وخاطر قريبتنا طرفك.

عكــود
02-02-2010, 05:47 PM
الخواجة رأفت،
سلام وليك محبّة غرسها الله في قلوب البيعرفوك، وأنا أدّعي معيّتهم.

أصبر علي شوية وبجيك باللي يحبّو قلبك (بس مش سمسميّة :D).

على جنب:
الحكاية كانت خلوة و فتّة و واحد ثائر وصفه خالد الحاج بالـ بُطيني.
المريسة دي جبتها من وين؟

عكــود
02-02-2010, 05:58 PM
سؤال فيصل سعد:

لماذا يحد و يقيد و يعسم المنصب الرسمي في سودانيات،
شاغله من التواصل و النشاط في منتدى الحوار ؟؟دي حقيقة يا فيصل. وإن كان -نظريّاً- الكيمان مفروض تكون مفروزة بين العضو وشاغل المنصب.
السبب، يبدو لي، أنّ الشخص إن أراد أن يكون فاعلاً كشاغل منصب، يتطلّب ذلك (لبس الكرفتة كما قال رأفت) بعض الأحيان، والكرفتة في مجتمع لابس (كاشوال) بتكون ملفتة للأنظار، وقد تُنمَّط الشخصيّة على أساسها. كما ولا ينسى الشخص المعني أثر الكرفتة على رقبتو حتّى وإن لبس (كاشوال). عشان كده بيعمل حسابو وما بيشوت المداخلة/الموضوع دون مراجعتو، وهنا بتجي (التعسيمة).
الفرز صعب يا فيصل ياخوي . .
صعب جدّاً، وقد قالها رأفت -محقّاً- أكثر من مرّة.
أتمنى -وأنت في منصبك الجديد- أن توجد معادلة تحفظ ذلك التوازن.
تعرف، كثير من الأحيان تكون في البال مداخلة (ماها ياها)، أشوتها في الخاص للأخوان، لأنّك لو حاولت تذوّقها، بتفقد كتير من طعمها و (شطّتها).

عكــود
02-02-2010, 06:11 PM
ماهو رأئيك و تقيمك لكل من :

عدم التفاعل مع قضايا الساعة في سودانيات، بمعنى ان الاحداث الهامة في مختلف المجالات لا تجد الحوار الكافي في المنبر؟ و لا تسليط الضؤ، و ربما التجاهل الكامل ؟؟

الاعضاء الذين لا ينشئوا و يكتبوا بوستات، و فقط يكتفوا بالتداخل ؟؟

العضوية الخاملة في سودانيات ؟؟

الاعضاء الذين خرجوا و ابتعدوا و غابوا لاسباب مختلفة؟؟
ما هي المناهج و الخطط لاستعادة نشاطهم ؟؟

ضعف المشاركة و التفاعل في مشاريع و لوائح و اعمال المنبر و ضعف التصويت
من قبل العضوية في القرارات و الانتخابات؟؟ الاسباب ، و مشاريع الحلول ؟؟

هل توجد شللية في سودانيات، السلبيات و الايجابيات ؟؟

سلام تاني يا فيصل،
أسئلتك دي تسمح لي أجلّيها هنا و نناقشها في الإدارة؟
يرى البعض في سودانيات، بان الميثاق و اللوائح، لم تكن منصفة لمالك المنتدى و اخذت كثير
من حقوقه الادارية و التنظيمية، و حدت من سلطاته التنفيذية و تركت له الحق الادبي و المعنوي،
ما رأئيك في هذا الموضوع ؟؟ ده كلام صاح، وبالضبط ده البتنادي بيهو الديمقراطيّة ومبدأ المشاركة و ده البينادي بيهو خالد الحاج.
خالد، قدر يطبّق فعليّاً ما ينادي به نظريّاً وهو رجل متصالح مع نفسو، وأنا سعيد جدّاً بذلك وليت ذلك يُطبّق في كل المنتديات السودانيّة تدريباً للممارسة الديمقراطيّة الإتحرمت منها أجيال وراء أجيال.
ولا أذيع سرّاً ان قلت، أنّ أوّل من عصرت عليه ومارست فيه صلاحيات الأمين العام، كان خالد الحاج وتقبّل ذلك بتفهّم رغم رأيه فيما طبّق عليه. كان ذلك أوّل تسلّمي لمهامي (دورة 2008) ولم أكن قد إستلمت باسويرد الأمين العام، طلبته منه وأرسله فوراً وهو يعلم الغرض من طلبه.
عايز تعرف التاني منو؟ :D

التحيّة، الإعجاب والقومة ليك يا خالد.

فيصل سعد
03-02-2010, 01:10 AM
شكرا يا عمدة، مع تقديرنا لرأئيك
مناقشة بعض الاسئلة في المجلس،
لا زلنا نتمنى و نرجو ان تدينا
و تتفضل علينا ببقية الاجابات هنا،
لتعم الفائدة، و لان منبر الادارة
لا يشاهده الاعضاء ..

و لك الاحترام و التقدير ..

رأفت ميلاد
03-02-2010, 03:44 AM
الخواجة على جنب:
الحكاية كانت خلوة و فتّة و واحد ثائر وصفه خالد الحاج بالـ بُطيني.
المريسة دي جبتها من وين؟



قصة المريسة ردفتها ليك بمزاج .. حقيقة حكاها لى عكود التانى فى الحلة التانية .. قالوا الأولاد البجو الخلوة ما يشربوا مريسة .. أم واحد فيهم قالت (نان يطلعوا بدون فطور) :D:D

هو الزول ده وينو ؟


الطلب لسة قائم ما تاهينى ;)

بابكر مخير
03-02-2010, 07:27 AM
الخواجة رأفت،
سلام وليك محبّة غرسها الله في قلوب البيعرفوك، وأنا أدّعي معيّتهم.

أصبر علي شوية وبجيك باللي يحبّو قلبك (بس مش سمسميّة :D).




هآ أمولانا السنجك،،
إتا ما عارف البحبو قلبهو، دم المسيح.. الأحمر القاني وفرنسي معتق..
ودآ، ما الياهو...
حاملهو وشايلهو وحتى جليسهو حرآم..
يابا..
الزول دآ بتوهك:mad:

عكــود
03-02-2010, 11:06 AM
سلام يا فيصل،
بجيك لإبداء الرأي على أسئلتك في النهاية إن شاء الله.

رأفت محبوب الجماهير،
عكود التاني زول موسوعة تراث و عِلِم وأخلاق فاضلة، وفعلاً ليهو زمن ما طلاّنا هنا.
ليك وليهو التحيّة، وماني مطنّش طلبك بس مزانق في الوقت.

ود مخيّر قنبلة الوُد الحايمة،
ياخوي رأفت زولي وبعرف البيحبو قلبو،
فما تخاف علي أخوك

معتصم الطاهر
03-02-2010, 03:50 PM
سلام يا عمدة

قعدتك هنا بتاور علينا كتير


أولا :-

و رغم أنف رأيك فى أنك فقط ذواقة ..
بعض كتاباتك تدل على غير ذلك ..

لماذا تبخل على نفسك و علينا بالكتابات الأدبية
نصوص شعر
و نصوص وصف ..

هل هو خوف الالتزام بالأدب ..كقضية وهَم ..
أم هو تواضع لدرجة التقاعس و التقاعد ..

الجيلى أحمد
03-02-2010, 03:59 PM
ياعكود

أحكى لينا عن عكود زمااان

منذ ولادته وحتى بلوغه العشرين
عن الطفولة والنشأة..

ماهى الأشياء التى أثرت مجرى حياتك?
ومن هم الذين تركوا بصمتهم فى حياتك
وانت فى مقتبل العمر?

ماذا كنت تود أن تكون ولم تكنه?

أحكى لنا عن العكوداب
وفنهم وشعرهم,
وأشدد على سؤال معتصم ..

وبجيك راجع للغريق

عشان ماتقول ردمتونى
:D:D

عكــود
03-02-2010, 04:35 PM
يا مريود شويّة شويّة
نار الشوق كتيرة عليَّ

الحكي الظاهر حيحلوْ، الناس يا حلاتا . . جات بي عِمَما وشالاتا.
شايف في أسئلة في الصميم وكيّفتني أنا ذاتي، بس دايرالا فاقة وراقة وأنا حأغيب يومين من باكر ضهر.
حأجاوب بالتناوب:
أبو أماني، رأفت، الباش، الجيلي، فيصل. فما تردموني لغاية ما أخلّص كما ولا تستعجلوا،
هو إنتو وراكو حاقة :D.

ليكم التقدير والمودّة.

عكــود
03-02-2010, 05:07 PM
أبو أماني نَشَد:
وعلى خفيف كده بقول ليك لو تكرمت تحدثنا عن .. عن .. عن .. يا ربي شنو ؟ أييييييوه ... عن .. ال...
الحب والحنان .. هسع وأيام زمان . تعرف يا الزين، أيّام كنّا نسكن في داخليات مدرسة مروي العليا، كان الطلوع للبيت كل أسبوعين (المسافة 27 كلم!)، كان الجميع ينتظر يوم خميسو بفارق الصبر مشارفةً للبلد والأهم للـ (مُسمّى مجازاً) باص الرحلة مروي - القرير. كان باص (جاهوري) يمر بداخلية مروي العليا بنات أوّلاً وبعدها يمر على مدرسة الأولاد. أغلب ركّاب الباص الأفاضل/الفاضلات كانوا يتأنّقون بما تيسّر (مسوح وقشرة للبنات، وتسريح و قشرة برضو للأولاد). الرحلة كانت تستغرق بين ساعة إلى ساعة ونصف (في غشوات وتنزيل ركّاب في الطريق). كنّا نتلصّص ونسترق النظر ونتبادل الإبتسامات الخفيفة مع البنات وآآآآحر خِفّة ورشاقة. كثيرون كانوا يخطّطون لمشروع علاقة، أو تجكيس، البعض كان يخفي الخطابات الـ تِعبوا فيها أثناء حصّة مذاكرة الأربعاء، ويتحيّن الفرصة المناسبة للـ (ديليفري). بعضها وصل بالسلامة وتمّ إستلام عِلم الوصول بخطاب معطّر مماثل، أمّا البعض الآخر (الخطابات) فقد ضلّ طريقه ولم يُعرف مصيره حتّى الآن.
كنت أنا بين هذا الفصيل وذاك، و لم تثمر محاولاتي كثيراً، كما ولم تفشل كل الفشل.
أمّا بعد ذلك، فقد حصل الوِلِف والتآلف وتترجم إلى مودة ورحمة و سَكَن والحمد لله، وكان ذلك بعد رجوعي من الدراسة.
وبين الداخلية ورجوعي من الدراسة، حصلت كثير من البلقعة الما فاتت محلّها.

أبو أماني
03-02-2010, 05:11 PM
يا مريود شويّة شويّة
نار الشوق كتيرة عليَّ

الحكي الظاهر حيحلوْ، الناس يا حلاتا . . جات بي عِمَما وشالاتا.
شايف في أسئلة في الصميم وكيّفتني أنا ذاتي، بس دايرالا فاقة وراقة وأنا حأغيب يومين من باكر ضهر.
حأجاوب بالتناوب:
أبو أماني، رأفت، الباش، الجيلي، فيصل. فما تردموني لغاية ما أخلّص كما ولا تستعجلوا،
هو إنتو وراكو حاقة :D.

ليكم التقدير والمودّة.



والله العظيم الراقل ده عسل .. ينأأأأط ... ونحن منتظرين ...!! وآآآدي أعدة!!!

عكــود
03-02-2010, 06:06 PM
طلب رأفت:
دايرك تحكى لينا بصفاء كدة عن شعورك أول أسبوعين فى رومانيا وأنت جاى من القرير ترانزيت الخرتوم .. شايقى طازة .. وكل شايقى (رقيق وشفيف) كان طلعنا ود الحاج أثناء فترة الدراسة بالقرير، ولحُسن الحظ، كنت بزور الخرطوم في بعض الإجازات وبنزل عند عمّنا في الخرطوم تلاتة غرب حديقة القرشي. أها دي النفعتني، أي نعم ما أزالت غبشة القرية 100% لكن ممكن تقول هذّبت بعض العادات القرويّة الراسخة.
أوّل يوم سافرنا فيهو كنّا إتنين، الصديق عصام فرح (دكتور باطنية الآن) وأنا. وصلنا بوخارست في إحدى أمسيات نوفمبر الباردة جدّاً، ولم يقابلنا أحد في المطار، بعد جُهد شديد وكثير من التفاصيل (تحتاج بوست بحاله) قدرنا نلِم في بعض السودانيين هناك، وما قصّروا.
همّنا الأكبر كان التأقلم مع الدنيا الجديدة، تعلّم اللغة الرومانيّة ومقاومة الحنين الجارف للبلد.
كانت أوّل شهور صعبة جدّاً، فقد تكالبت علينا منغصّات كثيرة، ليس أهونها الفلس.
ليالينا كانت تضج بالغناء السوداني، شريط وراء شريط، وكان سيّد الأشرطة لود جبارة وسيّدة الأغاني فيه:
شوفي الزمن يا يمّة ساقني بعيد خلاس
جرّعني كاس
إتدردرت وإتبهدلت وريني الخلاس
كثيرون إعترفوا، فيما بعد، أن دموعهم كانت تُخالط مخاخيتهم (عفواً) بعد طفي الأنوار والإنجباد تحت البطاطين، والبعض كان (حين يصاحب السماع تناول بعض ما يُبلْ به الأضرس في ليالي الشتاء) يفكّها بكية عند سماع الأغنية المؤذية.
كُنت أنا على الحافّة والهبشة، ولكنّها عدّت بسلام.

وتسلم يا رأفت على المجاملة.

فيصل سعد
06-02-2010, 02:51 AM
متابعين ..

أبو أماني
06-02-2010, 04:37 PM
متابعين ..

ونحن كلنا متابعين مع فيصولة .. بس عليك الله يا عكود يا أخوي الناس شايلين حال نسابتي الشوايقة وبقولوا عليهم (بخيلين) والكلام ده قــــــع .. يحرق روحي بلحيل !دحين شغل نقطة نقطة ده خلو .. وأفتح الماسورة للآخر عشان نرتوي فد مرة ..

بعدين زي ما قال العزيزين الجيلي ورأفت كلمة إبداعات ما عندك دي ما خاشة رأسنا لأننا برضو عندنا نظر .. أظهر وبان عليك الآمان وبطل تواضع .. التواضع الكتييير ده ما لحق السودانيين أمات طه .. يلا يا ذوق .. هاك القيثار .. هي قصدي اليراع .. هي قصدي الكي بورد .. وورينا الروائع .. ما يطول إنتظارنا عليك الله .. جيب من الدواخل في لحظة صفاء وتشششاوووو:o

عكــود
07-02-2010, 08:50 AM
و رغم أنف رأيك فى أنك فقط ذواقة ..
بعض كتاباتك تدل على غير ذلك ..

لماذا تبخل على نفسك و علينا بالكتابات الأدبية
نصوص شعر
و نصوص وصف ..

هل هو خوف الالتزام بالأدب ..كقضية وهَم ..
أم هو تواضع لدرجة التقاعس و التقاعد ..رجعنالك يا الزين.

سلام يا باش،
وياخي تشكر على حُسن ظنّك فيما أكتب وعشمك فيماهو أكثر من ذلك (بالطريقة دي بصدّق وده ما كويّس علشانكم :)).

نصوص الشعر ما عندي ليها أدوات قدر أدواتكم، أوّل كلام ممكن تقول منظوم، شاركت بيهو (قطِع أخدر) في بوست المجادعات (عبدالله الشقليني، أبو الحُسين وآخرين/ات) ولم يتعدّى ذلك محاولة في نظم المربّعات، وبصراحة لم تعجبني بضاعتي، فلم أحاول بعدها إعادة المحاولة غير شذرات هنا وهناك، أذكر أن بعضها كان في تهنئة شليل بميلاد إبنه سعيد.
أكتب من فترة لأخرى عن الأماكن العزيزة على القلب و ما تخزّنه الذاكرة من تجارب و مواقف مرتبطة بتلك الأمكنة، و أكون في حالة إنبساط شديد، فقط لأنّي أحب تلك الأماكن، أو بالأحرى أحب ما قضيته هناك من زمن، وكتابتي عنها أعتبره بمثابة رد للجميل. يكون وصفي لكل ذلك من القلب وكأنّي أسترجع ذلك الزمن ولذا يقول بعض الأصدقاء إنّي زول وصّاف. لكنّي أيضاً زول نفسو قصيّر، لا صبر ولا مخزون كافٍ أملكهما لأقدّم ما يُمكن أن يندرج تحت المنتوج الأدبي.
يعني يا باش، الحكاية ماها بُخُل . .
ولاها تواضع وخوف من الإلتزام،
كل الحكاية و ما فيها "رحم الله إمرء عرف قدر نفسه".

طارق صديق كانديك
07-02-2010, 09:52 AM
ياعكود

أحكى لينا عن عكود زمااان

منذ ولادته وحتى بلوغه العشرين
عن الطفولة والنشأة..

ماهى الأشياء التى أثرت مجرى حياتك?
ومن هم الذين تركوا بصمتهم فى حياتك
وانت فى مقتبل العمر?

ماذا كنت تود أن تكون ولم تكنه?

أحكى لنا عن العكوداب
وفنهم وشعرهم,
وأشدد على سؤال معتصم ..

وبجيك راجع للغريق

عشان ماتقول ردمتونى
:D:D

العزيز عكود ..

السلام عليكم ورحمة والله

ظللت متلمساً حرفك هنا مستظلاً به .. فلو كنت سائلاً لك ومحرضاً لقلمك لما سألت غير ما تفضل به الأخ الجيلي .. فشكرا له اذ جاء بما يدور في ذهني .. !!

ننتظر أن نقرأ لك كثيراً ..

تحياتي

عكــود
07-02-2010, 10:32 AM
سلام يا جيلي،


أسئلتك كبيرة وتحتاج لبراح في الوقت والباندويدث!

أهديك بعض الصور التّي تشكّل جزء مهم من أعماقي ودواخلي:

http://sudaniyat.net/up/uploading/1222.jpg
حوش وسيع، باب كبير، نخلتين وميضنة.
الصورة مأخوذة من الدانقة (البرندة) الكبيرة.

http://sudaniyat.net/up/uploading/130.jpg

الأرض والمياه، الأشعار والنغم الحنين كانوا محور إهتماماتنا و ما زالوا.
جاييك للباقي!

عكــود
07-02-2010, 10:56 AM
العزيز فيصل،

شكراً للإهتمام والمتابعة، و أسئلتك ديك ما ناسيها، بس هسّع خلّيني "إنداح و إتجدّع" شويّة مع الجماعة الطيبين ديل.

تسلم يا ملك.

عكــود
07-02-2010, 11:02 AM
العزيز . . القريبة كتاباته من القلب،
طارق . .

ياخي تُشكر أن وجدت في "راكوبة خريف" حرفي ما يُستظَل به، وأن رأيت في يباس قلمي ما يستحق عناءكم بالتحريض.
ولو أنّي كنت أعلم . .
لكنت، منذ زمن، قد حبّرت الصفحات تحبيرا.

مرورك كالنسمة الغاشية.

عكــود
07-02-2010, 11:08 AM
بس عليك الله يا عكود يا أخوي الناس شايلين حال نسابتي الشوايقة وبقولوا عليهم (بخيلين) والكلام ده قــــــع .. يحرق روحي بلحيل !دحين شغل نقطة نقطة ده خلو .. وأفتح الماسورة للآخر عشان نرتوي فد مرة .. أهلنا وحاااااة الله ماهُن بخلاء . .
والماسورة بفتحها للآخر . . إن شاء الله تلقوا فيها الروَيَان.

على جنب:
ما تحته خط من تعبير . . عجبني بالحيل!

عكــود
07-02-2010, 07:20 PM
الأخ العزيز أبو أماني،
والأخوة/ات المتابعين/ات،

عذراً . .

أتوقّف مؤقّتاً عن الإسترسال فمزاج المنتدى العام، وبكل أسف، لا يسمح.

أتمنّى أن يهدأ الحال و تصفو النفوس ويعود الصفاء والوئام . .
ويعود الجيلي للإستماع إلى التعليق على أسئلته / طلباته.

إلى حين عودة للمواصلة، أترككم في رعاية الله.

فتحي مسعد حنفي
07-02-2010, 07:58 PM
الأخ العزيز أبو أماني،
والأخوة/ات المتابعين/ات،

عذراً . .

أتوقّف مؤقّتاً عن الإسترسال فمزاج المنتدى العام، وبكل أسف، لا يسمح.

أتمنّى أن يهدأ الحال و تصفو النفوس ويعود الصفاء والوئام . .
ويعود الجيلي للإستماع إلى التعليق على أسئلته / طلباته.

إلى حين عودة للمواصلة، أترككم في رعاية الله.



يازول الجيلي دا وصل مرحلة الا تودوهو لي شيخ المكاشفي ولا تودوهو لي شيخ الأمين يشربو من المحاية البيبسي:D:p

عكــود
08-02-2010, 07:24 PM
العزيز فتحي،

أنا لا ألوم الجيلي، ولكنّي ألوم حظّي أن أتت إستضافتي في مثل هذه الأجواء التّي بالتأكيد تترك أثرها على باقي بوستات التواصل والمحبّة، ومنها هذا البوست الجميل لصاحبه الجميل جدّاً (أبو أماني).

لك المودّة.

فتحي مسعد حنفي
08-02-2010, 07:41 PM
العزيز فتحي،

أنا لا ألوم الجيلي، ولكنّي ألوم حظّي أن أتت إستضافتي في مثل هذه الأجواء التّي بالتأكيد تترك أثرها على باقي بوستات التواصل والمحبّة، ومنها هذا البوست الجميل لصاحبه الجميل جدّاً (أبو أماني).

لك المودّة.



والله ياعكود المشكلة أنا حاسي بالجوا الجيلي وما قادر أقول ليهو حاجة والبوست داك أنا حلفت لي بابكر ما أخشو تاني وقلت لي عادل الجيلي دا زي الحنفية الجلدتا مقطوعة وبتنقط وطلبت منو يبعد عن ابيوست زيي عشان باقي الجلدة ما يتقطع والحنفية تاني ما تقيف وأهي اتقطعت كان في طريقة تركبو ليها جلدة جديدة أنا ايدي معاكم بعمل فيها بايب فيتر:Dgoood:D

أبو أماني
10-02-2010, 04:58 PM
العزيز فتحي،

أنا لا ألوم الجيلي، ولكنّي ألوم حظّي أن أتت إستضافتي في مثل هذه الأجواء التّي بالتأكيد تترك أثرها على باقي بوستات التواصل والمحبّة، ومنها هذا البوست الجميل لصاحبه الجميل جدّاً (أبو أماني).

لك المودّة.



حقيقي يا جماعة لا نملك حق لوم أي طرف من الأطراف المتحاورة في ذاك البوستر وأشيد بالزعامة في هذا المنتدى وموقفها الرائع من كل الأمور .. فصاحب الإمتياز أبان وأوضح .. والأمين العام كان حصيفا وربانا ماهرا .. يعرف متي يتدخل وكيف؟؟ فلنترك الجيلي وأبومحمد وكل من إتفق أو إختلف معهما .. ولا ضير ما دامت النفوس من الداخل نظيفة .. عكود ..كفاية زوغان .. ما قت لك الزول بتاع الزوغان .. أصصوو ما قـــــــــــــــــع أدورو ؟؟ هيا ..!goood goood goood

أبو أماني
16-02-2010, 04:40 PM
العزيز عكود .. لا يمارس علينا الدلال كما يعتقد البعض .. فهو رجل مشغول حتى النخاع الشوكي حسب علمي ورغما .. يستقطع ما تيسر من وقت لأسرة سودانيات ولو على حساب أسرته أحيانا كثيرة وهذا حسب ظني! وقد تكون حقيقة لا يذكرها !.

نقدر له كل ذلك ولكن رجاء أن يستقطع لنا ولو النذر اليسير من وقته الثمين .. ليختتم لنا رحلتنا المثيرة الممتعة معه عبر نفسه .. (ولا بأس أن شاء تحديد من يصطفيه ليخلفه على المائدة) .. بس يا السنجك عليك الله ما تكمل الهبٌر والضلع والحاجات التانية خلي شويه للقادم بعدك!.. عموما بجانب ما لم ترد عليه أعلاه (إن وجد) .. نقدم التحلية مسكا وختام..
• ذكرت لنا في معرض مداخلاتك قصة أول هجرة لك خارج البلاد .. ولم تذكر لنا بعض ملامح أول عودة لك للسودان بعد أول إغتراب ..
• خلال سياحتك في بلاد الله طوال عمرك الطويل بإذن الله .. أذكر لنا أسماء ثلاث دول حبيبة لنفسك .. وثلاث مدن خارج السودان وثلاثة داخله مع نبذه قصيرة عن كل واحدة على حدة!.
• كل شاب في مطلع حياته يتطلع لطموحات مستقبلية .. وعند التطبيق تختل النظرية فما هو موقف عكود من ذلك (الآن! فيقيني أنه ما زال شابا)؟
• شئ توقعت سؤالك عنه ولم أفعل ! مع الإجابة عليه فضلا..
• أخيرا .. أقول ليك وبكل حب صادق كفيت ووفيت وحاشاك ما قصرت .. تشاااووو
* * * * * * * * *goood

أبو أماني
20-02-2010, 08:34 AM
حقيقي مهما كانت مشغولياتك فهي لن تمنعك من الوصل وتجبرك على تجاهلنا .. لو دعى الحال يمكنك أن تكتب مداخلة من كلمتين فقط ولا نطمع في أكثر منهما .. فقط لكي يستمر الوضع على ماكان عليه لا أكثر .. لك مودتي .. وهذا مجرد عتاب لا أكثر ..!! تشاوووو goood

أبو أماني
20-02-2010, 05:09 PM
مضت دستة من الأيام مذ آخر مداخلة (جانبية لك) أعقبتها عدة مناشدات بالتواصل .. على المانع خير ولا نملك سوى ..
؟ ؟ ؟ ؟ ؟

عكــود
20-02-2010, 06:12 PM
العزيز أبو أماني،
عساك طيّب يا زول يا سمح . .

يحق لك العتاب ويلزمني الإعتذار عن التأخير والإستجابة لمناشدتك.
عندما أعتذر، لا أحب الدخول في تفاصيل إيراد الأسباب والمبرّرات، بل أعشم في فضل السماح.

أوعدك يا حبيب أن اتواجد هنا وبكثرة، من صباح الغد إن شاء الله.

لك المودّة الصادقة.

أبو أماني
20-02-2010, 06:17 PM
العزيز أبو أماني،
عساك طيّب يا زول يا سمح . .

يحق لك العتاب ويلزمني الإعتذار عن التأخير والإستجابة لمناشدتك.
عندما أعتذر، لا أحب الدخول في تفاصيل إيراد الأسباب والمبرّرات، بل أعشم في فضل السماح.

أوعدك يا حبيب أن اتواجد هنا وبكثرة، من صباح الغد إن شاء الله.

لك المودّة الصادقة.




روح يا شيخ .. الله ينور دربك دنيا وآخرة ويرحم والديك ..

عكــود
21-02-2010, 05:18 PM
أسئلة الجيلي:
أحكى لينا عن عكود زمااان
منذ ولادته وحتى بلوغه العشرين
عن الطفولة والنشأة..
وُلدت في الخرطوم حيث كان يعمل الوالد عليه الرحمة، وتفتّحت مداركي في القرير بعد أن إستقرّ الوالد هناك.
كان الوالد يعمل في البوستة والتلغراف، بعد أن عمل مترجماً بعد تخرجّه في كليّة غردون. عند إستقراره في القرير، نذر نفسه لتعليم الناس (رجال ونساء) أمور دينهم، فقد كان متفقّهاً في الدين، علاوة على الإشراف على فلاحة أرضه. كان يعقد حلقات تعليمية يوميّة (يومان للنساء وخمسة للرجال) وكان إمام المسجد، ولكنه كان مرِناً سمحاً متسامحاً كما لم يكُن متزمّتاً.
يبدو أنّه كان يتقفّى أثر أبيه، فقد كان جدّي رائد التعليم في المنطقة، وكان زميلاً للشيخ بابكر بدري وصديقاً له، بعد تقاعده إفتتح أوّل مدرسة في المنطقة. أقول هذا لأعطيك نبذة عن البيئة التّي نشأت فيها.
مراحلي التعليميّة كانت في القرير ومروي الثانويّة العليا.
إهتماماتي في الصبا الباكر كانت تتنوّع بين شغف قراءة الأدب، حفظ الأشعار، خاصّة لشعراء المنطقة، وترديد الأغاني، يجب التنويه هنا، أنّه لا تخلو أسرة في القرير من شاعر أو شاعرة، لكني فشلت في تعليم العزف على الطنبور.

وأواصل . .

عكــود
22-02-2010, 05:34 AM
تابع الجيلي:

ماهى الأشياء التى أثرت مجرى حياتك?
ومن هم الذين تركوا بصمتهم فى حياتك
وانت فى مقتبل العمر?
لا شك أن الإنسان إبن بيئته، منها تتشكّل معظم ملامح شخصيّته حتّى وإن لم تظهر على السطح. يقول النفسانيّون، أنّ أنسب مكان يقضي فيه الإنسان شيخوخته بعد التاقاعد، هو مكان نشأته الأولى. لهذا، فقد أثرت القرير حياتي كثيراً، وقدر بعض الفضائل العندي غرستها نشأتي الأولى و أهلي هناك، نخيلهم، نيلهم، أشعارهم، أذكارهم، بليلتهم، حنّيتهم، كلامهم، حُسن تعاملهم مع الآخر، ديبلوماسيّتهم وكثير من الجوانب المهمّة.
كثيرون هم من تركوا بصماتهم في حياتي يا الجيلي، ويعتمد على المجال. في المجال الإنساني وهو الأهم، قطع شك هي الوالدة (أطال الله عمرها)، كريمة كالريح المرسلة، حنينة كالنسمة، حليمة، سمحة ومتسامحة. بيتها محط رحال الجميع، بابها يُفتح بعد صلاة الفجر ولا يُغلق إلاّ بعد أن يعم السكون. تُحسن معاملة الجميع حتّى من يخاصمونها، وتصلهم بالمودّة والرحمة، لا تحتمل رؤية خلاف بين شخصين. أمّا أحبابها من الأعراب الرُحّل وعابري السبيل، فلا تغفل عنهم ولا يغيبون عنها، يحبّونها كما يحبّوا أمّهاتهم، وتحبّهم كأبنائها، وعند سفرها للخرطوم، وعادة تكون لفترات قصيرة، يتجمّعون عندها وعند الوداع يبكون بحرقة وتبكي بحرقة أكثر و (لااااا تطوّلي علينا يا أمّي آمنِي). لم أسمعها في حياتي قط تذكر غائباً/ة إلاّ بالخير والدعوات. وأحسب أنّها مُستجابة الدعوة، أقول ذلك عن تجارب عدّة، أعرفها ويعرفها المقرّبون.

ماذا كنت تود أن تكون ولم تكنه?
هناك رغبة دفينة داخلي لم أعمل لتحقيقها ولكنّها ما زالت تراودني، وددت كثيراً أن أكون معلّمّاً. لأني أعتقد أنّي أعرف كيف أوصّل المعلومة للمتلقّي بطريقة لا بأس بها، كما يمكنني التعامل مع شتّى الأنماط البشريّة.

أحكى لنا عن العكوداب
وفنهم وشعرهم,
العكوداب يا الجيلي فرع كبير، يتوزّعون في ثلاث مناطق في السودان، الأصل في القرير ومنّهم نحن، الجزء الثاني في سَلَوة و ودبانقا قُرب شندي، ومنهم زميلنا كمال عكود والشاعر ودبادي، أمّا الجزء الثالث، فاستقرّوا في الجزيرة وبالتحديد ود سلفاب (ود سلفاب سيد الإسم هو شقيق جدّنا عكود سلفاب)، ومنهم الفنّان مصطفى سيدأحمد (عليه الرحمة). كما أسلفت سابقاً، يندلر أن تجد أسرة في القرير ليس بها شاعراً أو شاعرة، والعكوداب ليسوا إستثناء، بل برعوا في ذلك منذ الأجداد والحبّوبات وليتني كنت أحفظ شيئاً من شعر حبّوبتنا بت دُرُو أو عاشة بت عِتمان، أو جدّي جقلاب. إشتهر منهم كشاعر، الأخ ود بادي وليس أشعرهم، وكفنّان، مصطفى سيدأحمد.

تسلم يا الجيلي، على توّيرة النَفَس!

أبو أماني
22-02-2010, 09:20 AM
ليس لأنني مفترع هذا البوستر .. وليس لأنني أحبك يا رجل لوجهه تعالى وأستلطف حديثك .. وليس مجاملة أو نفاق .. الله وحده أعلم كم أتابع ما يخطه يراعك ردا على (المعجبين!) بكل شغف وإستمتاع ..متعك الله بالصحة والعافية .. وأأأأأأدي تكية في إنتظار هطول المزن من ديمة حبلى بالنفائس .. لك حبي .. وخد بس مش ليك .. للعزيز فتحي مسعد :-
goood goood goood goood goood

عكــود
22-02-2010, 09:51 AM
تسلم يا أبا أماني على الكلمة الحلوة والتشجيع،
وأنت العزيز.

أسئلة أبو أماني:
• كل شاب في مطلع حياته يتطلع لطموحات مستقبلية .. وعند التطبيق تختل النظرية فما هو موقف عكود من ذلك (الآن! فيقيني أنه ما زال شابا)؟

هذا بالضبط ما حدث في حالتي، وده سؤال المليون يا الزين.
كانت طموحاتي المستقبليّة أن أقرأ كلّية الهندسة ، وقد فعلت. لكن عند بداية حياتي العمليّة، هنا في الخليج، شاءت الأقدار أن أبدأ العمل في مجال الموارد البشريّة، لحين توفّر الوظيفة المناسبة التّي تتوافق مع مؤهّلي الأكاديمي. إستمرّ الحال وأحببت المجال الجديد وتعمّقت فيه بالدراسة، المثابرة والدورات التدريبيّة، فوجدت نفسي أكثر في مجال الموارد البشريّة وآثرته أكثر. الحمد لله الآن أنا راضٍ كل الرضا عن ما حقّقته في المجال العملي، ولو عاد بي الزمن مرّة أخرى، لاخترت دراسة الموارد البشريّة منذ البداية.

• شئ توقعت سؤالك عنه ولم أفعل ! مع الإجابة عليه فضلا.
لم تتركوا شيئاً يا حبيب،
لم تتركوا شيئاً أبداً، فقد عرفتم، بحرفنة شديدة، كيف تلعبون باصات الأسئلة.

لك المودّة وللمتداخلين.

عكــود
22-02-2010, 09:55 AM
حسب الوعد، أعود لأسئلة العزيز فيصل سعد وأسأله، إن كان ما يزال يرغب في سماع إجابتي هنا؟
أسأل لأن هناك عدّة بوستات تناقش نفس الموضوع تقريباً.

في إنتظارك يا كوتش.

تشاااااااو:D

معتصم الطاهر
22-02-2010, 09:58 AM
سؤال

لا تحلو سيرة أبى ذر .. دون سيرة الكامل الكبير .. الشاعر و الأخ
حدثنا عنه .. كأخ أكبر

و كأديب ..

فيصل سعد
22-02-2010, 09:59 AM
حسب الوعد، أعود لأسئلة العزيز فيصل سعد وأسأله، إن كان ما يزال يرغب في سماع إجابتي هنا؟
أسأل لأن هناك عدّة بوستات تناقش نفس الموضوع تقريباً.

في إنتظارك يا كوتش.

تشاااااااو:D

نسمع بالحيل يا ابن العم،
و راجينك تب ..

بدور التركي
22-02-2010, 10:01 AM
متابعين ومستمتعين:)

ناصر يوسف
22-02-2010, 10:03 AM
عكود يا الحبيب

مُمكن تفتح خزائن الذكريات وتحدثنا عن هذه الصورة وعن هذه الضحكة المارقة من جوف شغاف القلب من جُووووووووَه وبي مَحبّة ؟؟

كانت متين ووين وسبب الضحكة البتسُر القلب دي ؟؟؟
http://up.sudanradio.info/upradio/upload//12954-1-415673926.JPG (http://up.sudanradio.info/)

عكــود
22-02-2010, 11:40 AM
سؤال

لا تحلو سيرة أبى ذر .. دون سيرة الكامل الكبير .. الشاعر و الأخ
حدثنا عنه .. كأخ أكبر

و كأديب ..سلام يا باش،
أبراهيم ما هو أخي الأكبر وبس، أبراهيم كان قدوتي في كثير من ضروب تعاملي مع الحياة وكيفيّة تعاطيها. يمكنني القول بأنه كان وما زال ثائراً على البالي من المألوف، إعتنى بي منذ الصِغر وكان يعاملني، دون إخوتي، كصديق مقرّب رغم فارق السن، يشاورني في تفاصيل كثيرة ويبدو أنّه أحسّ منّي إهتماماً بما يكتب، فقد كان يعرض علي منتوجه. لم أكن أجامله إن لم تعجبني إحدى نصوصه، ولم أكن دائماً محقّاً، لكنه كان يناقشني في مرئيّاتي ويأخذ ما يقتنع به. بطبيعته، رجل صَلِد ويتمترس بقوّة وراء ما يراه صحيحاً، إلاّ فيما يخص كتاباته، فهو مرِن للغاية، واسع الأفق ولمّاح جدّاً، لا أبذل كثير عناء لأوصل له فكرتي.
كأديب، أعتقد أنّك وخالد يمكنكما أن تكتبا عنه أفضل ممّا قد أفعل، فقد قابلتما الرجل، جلستما معه و احتفظتما ببعض كتاباته علاوة على كتابه في الترجمة الشعريّة "المدارات والمعابر"، وبالمناسبة، هذا الكتاب أُعتمد ضمن مقرّر الدراسات العليا في الترجمة، في كليّة الآداب بجامعة الخرطوم.
محمّد سعيد دفع الله شاعر الغناء الشايقي المعروف (الطيف ، الزول الوسيم، أريتك تبقى طيّب إنت وغيرها) وصف إبراهيم بأنّه أفضل شاعر من منطقة الشايقيّة في الوقت الحالي.

عكــود
22-02-2010, 12:13 PM
التحية للعزيز ابو اماني،
و للاخ الاكرم عكود :

و اسمحوا لنا ان نسأل :


ماهو رأئيك و تقيمك لكل من :
عدم التفاعل مع قضايا الساعة في سودانيات، بمعنى ان الاحداث الهامة في مختلف المجالات لا تجد الحوار الكافي في المنبر؟ و لا تسليط الضؤ، و ربما التجاهل الكامل ؟؟

أعتقد يا فيصل، أنّك مُحق هنا. ذلك أعزيه لطبيعة العضويّة في سودانيات واهتماماتهم، وربّما وصمهم لسودانيات بوعاء معيّن، لا يفضّلون تعاطي مثل تلك الأحداث، التّي تتحدث عنها، من خلاله. بدليل أن البعض تجده نشط في منتديات أخرى يتناول من خلالها بعض الأحداث، وفي سودانيات لا يفعل.
لا أعتقد أنّ ذلك يُعد منقصة في المنتدى، لكنّي أرى أن ينشط ذوي الإهتمام، وهم موجودون/ات في ذلك الجانب.

الاعضاء الذين لا ينشئوا و يكتبوا بوستات، و فقط يكتفوا بالتداخل ؟؟

هناك بعض الأمثلة لذلك، وبعضهم مجيدون جدّاً في ضروب الكتابة المُختلفة. فتح البوست، أي بوست، مسؤوليّة بحيث يجب متابعة البوست الذّي تفتح، تدير المداخلات فيه وتوجّهه الوُجهة المقصودة وذلك قد لا يتأتّى لمن لا يجدون الوقت الكافي للدخول في سودانيات، قد يكون بسبب المشغوليّة، عدم إنتظام النت عندهم أو لأيّ إلتزامات أخرى، لذلك فهم يفضّلون الطلّة، حسب ما يتوفّر عندهم/ن من وقت للتداخل.
العضوية الخاملة في سودانيات ؟؟
هنا تكمن مشكلة تؤثّر على مناشط مختلفة في المنتدى، ودونك عمليّة التصويت إذا تمّ ربطها بنسبة ما، وجب وضع حل لذلك. ما هو الحل أو كيف يتم؟ لا أدري في الوقت الحالي، وأعتقد أنّ ذلك هو دور الإدارة.
الاعضاء الذين خرجوا و ابتعدوا و غابوا لاسباب مختلفة؟؟
ما هي المناهج و الخطط لاستعادة نشاطهم ؟؟ يجب وضع وسائل لإستعادة نشاطهم/ن، وأعتقد أن المجلس السابق قد قام ببعض الجُهد في هذا السبيل، لكنّه لم يكن كافٍ. هنا أعتقد أن ذلك مهمّة الجميع، إدارة وعضويّة، فهناك أعضاء أعزّاء إبتعدوا لأسباب مُختلفة، ولا أظن أنّها كلها مقنعة.
يجب بذل جهد أكبر هنا يا فيصل.
ضعف المشاركة و التفاعل في مشاريع و لوائح و اعمال المنبر و ضعف التصويت
من قبل العضوية في القرارات و الانتخابات؟؟ الاسباب ، و مشاريع الحلول ؟؟
نعم، هناك ضعف بائن، ويكفي أنّ تعديل اللائحة قد أُجيز بتصويت 22 عضو فقط! والآن يدور نقاش حول ذات اللائحة و عيوبها. قليلون فقط أبدوا تعليقاتهم، عند طرحها للنقاش، أذكر منهم، أسامة الكاشف، نبراس وشليل، رغم تثبيت البوست لفترة طويلة.
هي الطبيعة البشريّة، لا نحب قراءة اللوائح والإرشادات.
هل توجد شللية في سودانيات، السلبيات و الايجابيات ؟؟ نعم توجد، وليس في ذلك عيب بل أراه شئ طبيعي، سودانيات مثلها مثل أي مجتمع، تنشأ صداقات بين الأفراد وتتطوّر ومن الطبيعي أن توجد شلليات بين الأفراد. لكنّي لا أرى تقوقعاً وانكفاءً، بل أرى تفاعلاً يسير بصورة جيّدة بين كل "شلّة" وأخرى.

و لك وافر الاحترام و التقدير،
و الشكر مقدما لسعة صدرك ..

بعض الأسئلة قمت بالرد عليها سابقاً.

ليك المودّة يا حبيب.

عكــود
22-02-2010, 12:16 PM
متابعين ومستمتعين:)تسلمي يا بدور على الجرعات التشجيعيّة وأنا سعيد أن تجدي متعة في متابعة "الكرسي الساخن".

كل التقدير.

عكــود
22-02-2010, 12:34 PM
عكود يا الحبيب

مُمكن تفتح خزائن الذكريات وتحدثنا عن هذه الصورة وعن هذه الضحكة المارقة من جوف شغاف القلب من جُووووووووَه وبي مَحبّة ؟؟

كانت متين ووين وسبب الضحكة البتسُر القلب دي ؟؟؟ ناصر يا حبيب،

ياخي الصورة دي جبتها من وين؟
صراحة ما متذكّرها وما عندي منّها، لكن ما دام جبتها إنت أكيد بتكون في واحدة من لمّات سودانيات في الخرطوم.
وما دام الضحكة هانقدُر، أكيد كانت بوجودك و وجود أحباب يُمكن أن أحذرهم.

دحين يا خوي ما جاتك راحة، الصورة دي ورفيقاتها المعاها . .
سريييييع رسّلهم لي في:
aelkamil@hotmail.com

شفت الجاتك؟


سلام.

فيصل سعد
22-02-2010, 03:12 PM
http://up.sudanradio.info/upradio/upload//12954-1-415673926.JPG (http://up.sudanradio.info/)

اعتقد يا عمدة يا حبوب
الصورة عندها علاقة
بالاخ رئيس اتحاد المزارعين :D:D
و الحبيب جنابو الطيب بشير، كان ممكن
يدينا الاكيدة ..

ارقد عافية ..

عكــود
22-02-2010, 04:30 PM
اعتقد يا عمدة يا حبوب
الصورة عندها علاقة
بالاخ رئيس اتحاد المزارعين :D:D
و الحبيب جنابو الطيب بشير، كان ممكن
يدينا الاكيدة ..

ارقد عافية ..:D:D:D

الصورة أكيد ليها علاقة بذلك العسكري الغتيت الذي نحب. وأعتقد أنها في صيف 2007 وكان ما أخاف الكِضِب في كافتيريا قصر الرشيد، وكان الحضور جميل وكبير، أستطيع أن أعدّهم/ن (من ذاكرة القلب الرقدوا فيهو واتمدّدوا ما شاء لهم/ن) فرداً فردا.

وللاّ شنو يا ناصر؟

تسلم يا فيصل.

عكــود
24-02-2010, 05:27 AM
تابع أبو أماني:

• خلال سياحتك في بلاد الله طوال عمرك الطويل بإذن الله .. أذكر لنا أسماء ثلاث دول حبيبة لنفسك .. وثلاث مدن خارج السودان وثلاثة داخله مع نبذه قصيرة عن كل واحدة على حدة!.

إذا إستثنينا السودان، فأكثر الدول تركت بصمتها في ذاكرتي رومانيا، تركيا و هنغاريا، والمدن على التوالي:
تمشوارا: مدينة الزهور والحدائق والناس الودودين السمحين (درست فيها).
إسطنبول: العراقة والتاريخ وهي مدينة لا تُمل (زرتها كثيراً منذ أن كنت طالب وما زلت أتوق إليها).
بودابست: الطبيعة الخلاّبة، نهر الدانوب الذّي يقسمها إلى جبلٍ و وادٍ والشعب الحميم المهذّب الجميل.

داخل السودان يا الزين، وبكل أسف أقول، ما أتاح لي الزمن أن أتجوّل في كثير من مدننا الحبيبة، وذلك تقصير منّي مهما تعلّلت بعدم توفّر الوقت للقيام بذلك. لكن من المدن البتمنّى أزورها، كسلا، الأبيّض، جوبا وجبل مرّة.

شكراً يا أبا أماني على الإستضافة في مائدتك العامرة دائماً إن شاء الله، وأعتقد أن قد آن الأوان لترشيح الضيف القادم وأفضّل أن تقوم أنت بذلك.
الشكر برضو لكل المتداخلين والمتابعين وأتمنّى أن لا أكون قد خيّبت ظنّهم.

آسف جدّاً على التأخير في التداخل وأشكرك يا الزين على تحمّل ذلك.

فيصل سعد
25-02-2010, 05:06 AM
عزيزنا ابو ربى، قبل المغادرة، نعيد لك و نذكرك
بهذا السؤال الذي جاء في مقدمة اللقاء :

يرى البعض في سودانيات، و انا احدهم، بان الميثاق و اللوائح، لم تكن منصفة لمالك المنتدى و اخذت كثير من حقوقه الادارية و التنظيمية، و حدت من سلطاته التنفيذية، و تركت له الحق الادبي و المعنوي فقط، الامر الذي قلل من عطاؤه الاداري بصورة او باخرى ..

ما رأئيك في هذا الموضوع ؟؟

و لك وافر الاحترام و التقدير،
و لمضيفك الكريم، و المتابعين و القراء ..

عكــود
25-02-2010, 07:18 AM
سلام يا فيصل ولعلّك طيّب،

السؤال ما جلّيتو ياخوي إنت الجلّيت الرد :)، ردّيت عليه في المداخلة رقم 418 بالتالي:
يرى البعض في سودانيات، بان الميثاق و اللوائح، لم تكن منصفة لمالك المنتدى و اخذت كثير
من حقوقه الادارية و التنظيمية، و حدت من سلطاته التنفيذية و تركت له الحق الادبي و المعنوي،
ما رأئيك في هذا الموضوع ؟؟

ده كلام صاح، وبالضبط ده البتنادي بيهو الديمقراطيّة ومبدأ المشاركة و ده البينادي بيهو خالد الحاج.
خالد، قدر يطبّق فعليّاً ما ينادي به نظريّاً وهو رجل متصالح مع نفسو، وأنا سعيد جدّاً بذلك وليت ذلك يُطبّق في كل المنتديات السودانيّة تدريباً للممارسة الديمقراطيّة الإتحرمت منها أجيال وراء أجيال.
ولا أذيع سرّاً ان قلت، أنّ أوّل من عصرت عليه ومارست فيه صلاحيات الأمين العام، كان خالد الحاج وتقبّل ذلك بتفهّم رغم رأيه فيما طبّق عليه. كان ذلك أوّل تسلّمي لمهامي (دورة 2008) ولم أكن قد إستلمت باسويرد الأمين العام، طلبته منه وأرسله فوراً وهو يعلم الغرض من طلبه.
عايز تعرف التاني منو؟

التحيّة، الإعجاب والقومة ليك يا خالد.

فيصل سعد
25-02-2010, 08:32 AM
عذرا لعدم الرؤية،
و بشوف القلب ..
ولك الشكر و التقدير،
و في امان الله ..

أبو أماني
25-02-2010, 03:19 PM
عذرا لعدم الرؤية،
و بشوف القلب ..
ولك الشكر و التقدير،
و في امان الله ..
الحبائب الحلوين ..سلام من القلب..للوريد .. للشريان التاجي وبالعكس .. ممزوجا بهيموغلوبين حبي لكم .. حقيقي إبن العم كان متوهجا في إشعال أتون الحوار بمداخلاته الثرة .. شكرا فيصل ويا ها المحرية فيك يابن الأكارم .. تمم جميلك وإختار لي الضيف القادم .. وأعلن عنه ويا حبذا لو نوعت فقد كان الضيوف معظمهم رجالا .. لك خالص تقديري ..
الحبيب تكعيب عكود .. يا أخي إنت الزييك منو؟ والله شرفتني وزدتني طول وابهجتني أنا والمعاي بكلامك البيقطر شهد .. وأسلوبك البديع في الكتابة .. حفظك الله لأهلك ولنا ولسوداننا وسودانيات .. ودمت بخير يا أروع الأصدقاء ... فتحي .. أراه .. ناطرك يا زلمي ..!!!
وإكراما لميولك الهلالية نهديك:
مازيمبي! goood goood goood goood goood يلا تشاو

عكــود
25-02-2010, 05:05 PM
وإكراما لميولك الهلالية نهديك:
مازيمبي! goood goood goood goood goood يلا تشاو

أها ده بس إختلافي معاك يا الزين!:D

تحيّاتي ليك ولأختنا طرفكم والوليدات.

تشاااااااااااااااااااااااو :)

أبو أماني
26-02-2010, 02:06 PM
أها ده بس إختلافي معاك يا الزين!:D

تحيّاتي ليك ولأختنا طرفكم والوليدات.

تشاااااااااااااااااااااااو :)

شكرا الحبيب عكود .. دام الود والصفاء والتواصل .. وما زرناك في شينة يا با ..
الحبيب فيصل سعد .. أراه.. إحنيي ناطرينك يا زلمي!.. ما تعمل فيها رائح .. بترشح منو؟؟؟؟goood