المساعد الشخصي الرقمي

مشاهدة النسخة كاملة : ضيف على مائدة سودانيات ...! - 8 - نادر السماني وحرمه سلمى يس


أبو أماني
27-07-2009, 06:38 PM
gooodأحبائي الأعزاء ..
أحباء سودانيات .. لكم صادق الود والتحايا القلبية .. حقا قد سرني وأثلج صدري عمق صداقتي بكم ذهاء ما يقارب السنة أو يزيد .. قضيتها بينكم في سعادة وحبور .. وأحسست وأنا بينكم وبكم بدفء الأسرة وأحلى وشائج الإخاء والمحبة .. حيث صرتم بالنسبة لي كأفراد أسرتي رحما بل أكثر من ذلك..بحيث أقضي الساعات الطوال في رحابكم المرحة العامرة قبل وأكثر مما أقضيه مع أسرتي .. فلكم الشكر على ما وهبتموني من حب صادق إمتزج في شراييني وصار يغزو القلب ويعمر غرفه الأربع ويهرب ليعود ثانية ليمدني بالحياة .

فكرت مليئا في شكل مستقبل علاقة كل سوداني في سودانيات بالآخر! وهالني أن تكون علاقة صادقة حميمة كهذه عرضة للعيش والعمران طويلا عبر الفضاء الإسفيري والعالم الأثيري ..! وتصورت حياة شخوصها في اللاشئ وفنائهم في اللاشئ ..تماما كما يحدث يوميا بالنسبة لممثلين وممثلات نشاهدهم عبر الشاشات البيضاء والبلورية .. نعايشهم ونعاصرهم ثم يتلاشوا في اللاشئ حقيقي حزت في نفسي هذه الخاطرة .. وفكرت ثانية !..

أضع بين أياديكم عتبة أولي لتجسيد علاقة كل منا بالآخر .. وهو بوستر تتم استضافة عضو فيه ليكون مصدر حوار تعارفي يحكي لنا ما عن له أن يرويه عن نفسه فنزداد قربا منه أكثر وأكثر ومعرفة به وثيقة أكثر .. نعرف موقعه الحالي .. رقم موبايله .. عدد أفراد أسرته .. طموحاته الآنية والمستقبلية .. بعض مشاكله الخاصة التي يمكن الخوض فيها .. والمشاركة في علاجها بعض الجوانب المضيئة من حياته الماضية والتي يحلو له الخوض فيها مع الأحباء .. الخ ..

إن راقت لكم فكرتي هذه فأقترح أن يقوم كل ضيف حل بالبوستر في نهاية حلقته بترشيح من يحل بعده ضيفا على مننتسبي سودانيات .. وهكذا دواليك .. تبقى المعضلة في إختيار عضو الشرف الأول .. وأقترح أيضا أن يقوم صاحب البوستر بإختياره .. درج كبارنا على إختيار كبير القوم ليتولى ضربة البداية في كل مشروع أو عمل .. وحيث أن مجتمع سودانيات يحفل بالكبار شكلا وموضوعا وليس من بينهم من يتفضل على الآخر .. فأسمحوا لي أن أختار أكبر الأعضاء (سنا) .. فليكن ضيف الحلقة الأولى العميد الأستاذ :-

:Dخـــالـــد الحــــاج:confused:
مساهمتي الأولي معه المطالبة بنبذة صغيرة عن عميدنا والبطاقة الشخصية وتعريف مختصر ولكم جميعا خالص حبي وإعتزازي وإحترامي ...

أبو أماني
28-02-2010, 05:03 PM
الحبيب فيصل سعد .. زعلان مني وحاولت بشتى الوسائل ترضيته في جنحة صدرت مني بحقه دون قصد وهو يعلم ذلك يقينا .. حاولت إستمالته في عدة مواقع وأعلاه طلبت منه تحديد من يخلف العزيز عكود حسب ذوقه .. ولكن طنش .. أذكره هنا .. كل إبن آدم خطأً .. الخ .. وإن كان الرب يغفر فما بال العبد يفجر..؟ وبأن زعلته على العين والرأس .. (بس ما قدر ده؟) مع أني سنا في مقام أخيه الأكبر ودما في مقام عمه..أعلم نقاء سريرته وأتمنى أن لا أكون إستنزفت كل مساحات التسامح الشاسعة لديه.. وهذا قولي!.

أختار لكم ضيف المرة القادمة وأستاذن في كون الجلوس على المائدة هذه المرة لشخصين هما بمثابة شخص واحد .. أي (زوجين) .. غدا تدركون من هو الضيف الظريف القادم ومن هي زوجته .. أمسكوا الخشب .. goood

فتحي مسعد حنفي
28-02-2010, 06:06 PM
الحبيب فيصل سعد .. زعلان مني وحاولت بشتى الوسائل ترضيته في جنحة صدرت مني بحقه دون قصد وهو يعلم ذلك يقينا .. حاولت إستمالته في عدة مواقع وأعلاه طلبت منه تحديد من يخلف العزيز عكود حسب ذوقه .. ولكن طنش .. أذكره هنا .. كل إبن آدم خطأً .. الخ .. وإن كان الرب يغفر فما بال العبد يفجر..؟ وبأن زعلته على العين والرأس .. (بس ما قدر ده؟) مع أني سنا في مقام أخيه الأكبر ودما في مقام عمه..أعلم نقاء سريرته وأتمنى أن لا أكون إستنزفت كل مساحات التسامح الشاسعة لديه.. وهذا قولي!.

أختار لكم ضيف المرة القادمة وأستاذن في كون الجلوس على المائدة هذه المرة لشخصين هما بمثابة شخص واحد .. أي (زوجين) .. غدا تدركون من هو الضيف الظريف القادم ومن هي زوجته .. أمسكوا الخشب .. goood

انت يازول عوير ولا ما بتعرف فيصل سعد:confused:فيصل سعد لو كان زعلان منك ما كان أصلا ناقش الموضوع معاك..كان قفل منك بي طبلة سبعة تكات..
فيصل دا يابو أماني يملك قلب من البلاتين أبيض عشان صفار الدهب لا يليق بقلب فيصل..
علي مسئوليتي أنا فيصل ما برضي انك تكون خايف من زعلو:o:)

فيصل سعد
01-03-2010, 07:01 AM
علي مسئوليتي أنا فيصل ما برضي
انك تكون خايف من زعلو:o:)


كلام سليم و مظبوط و منطقي و حقيقي، و ماك داير شكر يا ابو آلاء،
و يا ابو اماني ارمي قدام، و مرات بكون الزعل واجب
و ضرورة و مفروض عليك و لا فرار و هروب منه،
حصل خير يا ابن عمي، و ما يغشاك شر ..

أبو أماني
02-03-2010, 04:24 PM
كلام سليم و مظبوط و منطقي و حقيقي، و ماك داير شكر يا ابو آلاء،
و يا ابو اماني ارمي قدام، و مرات بكون الزعل واجب
و ضرورة و مفروض عليك و لا فرار و هروب منه،
حصل خير يا ابن عمي، و ما يغشاك شر ..
وعلى شرف العزيز فتحي مسعد والشقيق فيصل سعد أهديكم أحلى ضيفين في هذه الحلقة .. حضروا شعوركم وأرجوني دقائق ..goood

أبو أماني
02-03-2010, 05:58 PM
* * * * * * *
goood ضيفين على المائدة رقم (9)..! goood

الأستاذ نادر السماني والسيدة عقيلته (سلمى)..!!
في هذه المرة تستضيف مائدة سودانيات العامرة بالحب والأخاء والتواصل الأستاذ الرائع نادر السماني والذي فاق حدود الروعة أميالا وزوجه المصون الزميلة (سلمى) التي فاقت زوجها في هذا المضمار بضع أميال أخرى، مسيرة الحبيب نادر العملية أثرت بصورة بائنة في كل مناحي حياته اليومية فهو أستاذ في المدرسة وفي البيت وفي الشارع ( وفي المسرح!).. وفي كل مقام يوضع فيه.. بسمته الرائعة الشهيرة والتي تلازم شفتيه في كل الأحيان .. صارت سمة ملازمة له هذا بجانب روحه المرحة الوثابة لكل ما هو جميل ومفرح ومدعاة للضحك والإبتسام.. نادر يأخذ كل الأمور ببساطة متناهية وحتى المأساة ينظر إليها بنظرة تبعد عن التراجيدية والتأزم!.. فعندما سألته عن مقر عمله الذي أعرفه .. بدل يقول لي إستقلت ولا خليت الشغل معاهم كعادة كل من يترك عملاً ما!.. قال لي ضاحكا كمن يزف لي خبر ترقيته هي يا أبو أماني إنت وين ؟.. ديك ما رفدوني زماااان!..وأغرقنا في الضحك وكدت أقول له على طريقة عادل إمام (يعني فرحان أوي يا أخويا؟).. من يقابله يخشى شئ واحد فقط .. وهو أن تحين ساعة فراقه .. أما أم عياله أو هيز (إسوييت هارت) كما يطلق عليها أهل الحداثة.. فهي نسخة من زوجها بصورة (محسّنة) !! من حيث الذوق والظرف والرقة والكياسة والأدب الجم والثراء العلمي الفاحش.. وحيث إن صديقي وحبيبي نادر قصدي (شنُ) قد وافق (طبقة)! فإنصهرا في شخص واحد فقد نشأت فكرة إستضافتهما سويا !.. ليشعلا وهج هذا البوست على نطاق الجنسين من الزملاء ولتكن أول بادرة .. علها تثمر لنا.. رطبا جنيا.. فهلموا يا صحاب لسويعات من البهجة والإندهاش والإنبهار ..نبحر فيها في حضرة الضيفين الكريمين .. وأرجو إكرام مثواهما .. بل أقولها بكل صراحة ووضوح وعامية بحتة.. ( أشووهم لي على نار هادئة ونجضوهم لي تمام) !.

فاتحة الشهية للمائدة :-
السؤال التقليدي (للكوبل) نبذه مختصرة للتعريف كل على حده..سامع يا نادر ما تمشي تعمل فيها أبو عرام وتلز الحاجة بكوعك وتقول ليها .. كدي زحي كــدي! عاوزين رد يكون (شامل النشاءة والتكوين والحياة العامة والأسرية) منكما الجوز.. بعد ده بإرتياح أقول ليكم يلا .. تشااااوووو إلى حين!.goood

نادر السماني
04-03-2010, 05:43 PM
يا أبا أماني، والحضور، لكم من التحية أرقها ، ومن الود أخلصه ، ومن الاعتذار أجزله ؛ فقد كان للفلس حضوره ، الذي لم تستطع شركة كنار احتماله ؛ فقطعت عني الخدمة ، وتركت لي العدة ؛ لذا لزم التوضيح . وسأعود مساء إن شاء الكريم .

فتحي مسعد حنفي
04-03-2010, 05:51 PM
يا أبا أماني، والحضور، لكم من التحية أرقها ، ومن الود أخلصه ، ومن الاعتذار أجزله ؛ فقد كان للفلس حضوره ، الذي لم تستطع شركة كنار احتماله ؛ فقطعت عني الخدمة ، وتركت لي العدة ؛ لذا لزم التوضيح . وسأعود مساء إن شاء الكريم .




المهم تخلي بالك من العدة خصوصا وانت بتدخلنا في تجربة جديدة مقيدة لحرياتنا في الكلام..لأول مرة ضيف يجي بي جماعتو وأنا بعتبر دا من باب المؤامرة منك بالشراكة مع أبو أماني حفاظا علي ماء الوجه الحليق مؤخرا والمسود مقدما:Dgoood

نادر السماني
04-03-2010, 10:34 PM
في القرن الثامن عشر نبغ في نواحي النيل الأبيض من قبيلة الجموعية التي تتحرك في تلك الأرجاء شاب أظهر أدبا جما وتلقى علما كافيا من شيوخه في ذلك العصر فكان أن قرر الهجرة إلى الحج وهناك التقى عبد الكريم السمان فأخذ عليه الطريق وعاد إلى دياره نائبا عن شيخه ومبشرا بطريقته وناشرا لها وهو ما عرف في التاريخ باسم (راجل أم مرحي ) وهو جبل انتبذ إليه الرجل متعبدا .
ومن ضمن زيجاته كانت له زوجة على الضفة الشرقية من النهر (البحر ) تنتمي إلى قبيلة الجميعاب فأنجبت له ابنا عرف باسم (عبد الرحمن )وسار على نهج والده ومن قبائل الرباطاب كانت واحدة من زوجاته ناحية جزيرة مقرات أنجبت له ابنا سماه (السماني ) تيمنا بشيخ والده . وعاد الابن إلى نواحي الجيلي وتزوج منها فأنجبت له ولدا أسماه (أحمد البدوي ) على نهج آبائه سائر ولكتب الطريقة ناشر وان أن تزوج من قرية بالقرب من الجيلي تسمى (الدوم ) صفية بت الخضر فأنجبت له ( السماني ) الذي نشأ بالجيلي غير ملتزم الطريق ممتهنا الخياطة النسائية مبرزا روحا فنانة راغبة في معرفة العالم بشكل جديد فكانت رحلته في منتصف خمسينات القرن الماضي إلى الخرطوم باحثا عن عالم جديد .
وفي أيام تسبق التركية بقليل (أو ربما بعدها بقليل ) جاء مهاجرا من صعيد مصر من مجموعة ترجع جذورها إلى مراكش ( بغرض التجارة أو هروبا من ثأر)إبراهيم الذي استقر بفاشر أبو زكريا وأنجب ابنا عرف باسم توفيق هاجر طلبا للرزق إلى أدرمان وهناك التقى خاله القادم مع الجيش المصري فتزوج ابته فأنجب منها (جلال)الذي تزوج من امرأة من أم درمان ترجع جذورها إلى أمبابة فأنجبا (آمال ) .
لسبب ما كان أن تزوج (السماني ) (آمال ) في نهاية خمسينات القرن الماضي وفي مارس من عام 1961م وفي الثاني والعشرين منه في أول يوم من برج الحمل جاء إلى الوجود من يكتب الآن فاختلفوا في تسميته فمنهم من قال (محمدا) ولأنه صاحب القلم فكتبها على الورق وكان رأيها الذي لم تستطع كتابته على الورق ولكنها فرضته في الواقع أن أسمته (نادرا )

نادر السماني
04-03-2010, 10:47 PM
goood

نادر السماني
04-03-2010, 10:56 PM
أهااااااااااااااااااااااااااااااااااااااا
كدة أنا وقعت بين مطرقة نادر السماني وسندان اللغة العربية والتاريخ ، عشان كدة أنا حأبدا ليكم من الآخر وأنسف اللغة العربية والتاريخ وأخلي نادر المعاه ولدت يسن وقبلو أسامة وقبلو أحمد وطبعا قبل ده اتزوجنا وأصلا اتلاقينا في الفرع ، أنا كنت بقرا قانون وهو كان بقرا فلسفة.
وأنا جيت الفرع من مدرسة السيد علي بالأبيض وأهلي من ركابية بارا. وخلاص كفاية كدا . وانا في انتظاركم .
سلمى يسن

نادر السماني
05-03-2010, 10:24 AM
الاسم الكامل : محمد السماني أحمد البدوي
الميلاد : 22/3/1961م
مكان الميلاد : أم درمان الثورة
الطفولة : مقسمة بين حي ودنوباوي حتى 1974م والثورة الرابعة
المراحل الدراسية : ودنوباوي (أ ) 1968م (آخر سنة للبس الجلابية ) 1974م
الأهلية المتوسطة أم درمان 74- 77
الأهلية الثانوية 77-80
الجيلي الثانوية 80 -81
معهد تجاري المنصورة 61- 83
جامعة القاهرة فرع الخرطوم 81-86
دبلوم علوم سياسية أم درمان الإسلامية 86 لم أجلس للامتحان لعدم الرسوم .
دبلوم التربية 88 أم درمان الإسلامية .
89 دبلو الإحصاء 89 جامعة القاهرة الفرع لم أكمل لظروف اقتصادية .
العمل :
80 -81 وزارة الشؤون الدينية والأوقاف.
بعد العودة من مصر :معلم مدرسة كرري التجارية (معلم مواد تجارية ورياضيات)84 لم أكمل العام الدراسي .
85-86 تلفزيون جمهورية السودان قسم البرامج التعليمية ، فصلت للغياب نتيجةالإنشغال بالملة الانتخابية .
87 -90مدرسة تلودي الثانوية معلمل للتاريخ حينا والرياضيات أخرى ثم وكيلا للمدرسة .
90-91 سنجا في مهن مختلفة كاشير في كافتيريا تاجر أثاثات تاجر فول وعيش وخضار
وأصل إن شاء الله

رأفت ميلاد
05-03-2010, 10:42 AM
متابعين روعة الشهد .. مرحب بيكم كتير

نستنى قبال نبدأ فى الإسقصاء والتدقيق والبحيت .. وطلعتوا فراعة .. نشوف باقى الحكايا ..
بس نقطة نظام يا سلمى .. الراجل ده فى جيناته الأولى فى مقدمة الدراويش ديل من جبل لى جبل وردت قصة (إحدى زوجاته) عدة مرات .. القصة ما عملت ليك شوية قلق كدة looool

بعدين نخش فى الغريق





إذيك يا (أبو) أمانى .. كيتاً فى نادر الهرانا لغة

نادر السماني
05-03-2010, 10:51 AM
إزيك يا رأفت ...... المشكلة في موضوع الزوجات ، إنو كل واحد إقول ليك ما عارف جاني وحي ولا شنو كدا ماعارف أو رأيت لي رؤية ، أها دي يعملو فيها شنو؟ إتخيل لي إنو كل واحدة كانت تبلع ريقها بلعة شديدة قدام الوحي ولا الرؤيا دي ، ودا إرهاب عديل كدا ولا مش كدا؟.
سلمى

نادر السماني
05-03-2010, 11:02 AM
يا فتحي كيف حالك (طبعا بعد الأرقام السابقة دي ما بقدر أقول ياعم فتحي ولاما كدة )
المهم تخلي بالك من العدة خصوصا وانت بتدخلنا في تجربة جديدة مقيدة لحرياتنا في الكلام..
يا زول أخد راحتك خالص وأصلو ما في كبت للحريات .

نادر السماني
05-03-2010, 11:11 AM
أواصل العمل
91 عامل في مصنع عطور بالمنطقة الصناعية بحري (شغلانة كدة في النص بين أصحاب المصنع والعمال ما عندها اسم )
92-95 عملت لي مصنع عشوائي لعمل الكريمات وتعبئة الروائح وزيوت الشعر وشوية تجارة مخستكة انتهت بي إلى السجن في شيكات طائرة بعت الوراي والقدامي وفكيت الدرب ورجعت مدرس المرة دي فجأة وبدون مقدما أصبحت مدرسا للغة العربية
المدارس التي عملت بها
وادي سيدنا الحكومية أم درمان
بشير محمد سعيد النموذجية
مدارس صلاح أمبدة وبحري وأم درمان
مدارس النيل الخرطوم (معهد صلاح )
مدارس كثيرة بأمبدة والكلاكلة وبحر ي . وإلى الآن في هذه الدوامة وغير معروف ما الذي يحدث غدا .

نادر السماني
05-03-2010, 11:14 AM
متابعين روعة الشهد .. مرحب بيكم كتير
ومرحب بيك كتير يا رأفت يا حبوب يا من تدخل الروح دون إذن وتقيم هناك أنت وآخرين وأخريات هنا كثر .

فتحي مسعد حنفي
05-03-2010, 11:32 AM
يا فتحي كيف حالك (طبعا بعد الأرقام السابقة دي ما بقدر أقول ياعم فتحي ولاما كدة )

يا زول أخد راحتك خالص وأصلو ما في كبت للحريات .



شوف يانادر أنا كنت في السنة النهائية في الثانوي العالي لما حضرتك اتولدت..يعني ما فارقة معاي تقول عمو ولا عمتو ذاتو.ودا ما محتاج لي أرقام سابقة وأسرار لاحقة;)
بعدين مافي كبت للحريات وآخد راحتي ما بتجي ولا كيف ياسلمي:confused:اذا الله قال بوضوح انكم ناقصات عقل ودين ولا دا الرسول القال كدا:confused:المهم أنا ما عندي في الموضوع دا كلام والبتقال بي هزار بتقلب جد والكمبيوتر بسجل والحسابة بتحسب وآخرتا المستندات بتتختا فوق الطربيزة وأنا ما محتاج لي زول يجي يقول ألله لا يكسبك يافتحي انت السبب مع اني بريئ والسبب الحقيقي بكون وراهو مهند الرباطابيgoood..
أنا شخصيت الأسئلة العندي حأخليها في الآخر لما تمرقو العندكم وأجي أنا أديكم القاضية:p:o

النور يوسف محمد
05-03-2010, 12:16 PM
بسم الله الرحمن الرحيم

الأخ نادر , الأخت سلمى
اسعد الله أوقاتكما بكل خير ..
بداية الشكر وأنتما تشرفان هذه النافذة ..
من الطبيعى أن الإنسان يبحث عن قواسم قبل أن يسأل ..
مدرسة الجيلى الثانوية كانت أيضاَ من محطات حياتى .. والركابية هى قبيلة
أستاذنا وقائدنا الطيب عبد الرحمن مختار قبل أن تنتقل أسرتهم الى نيالا ..
سؤالى ..
يا سيد نادر هل لدراستك الفلسفة أثر فى مسيرة حياتك الملفته نوعاً ما ؟؟
و بصفة عامة هل دراسة الفلسفة تؤثر فى تكوين الرؤى والأفكار للفرد ؟؟
خلافاً لكل الدراسات التى تصبح فى ذات يوم ( أكل عيش ) لا أكثر ..
( بالمناسبة المدام درست فلسفة بذات الجامعة ) ..
والمعلومة ليست لها علاقة باسئلتى أعلاه :D:D ..
بالنسبة لى أحب اللغة العربية وأحب التأمل فى جمال مدلولاتها البلاغية

نتابع يا الحبيب ...
معليش (ياء النداء ) دى داخلة غلط وكده :D:D

فتحي مسعد حنفي
05-03-2010, 12:32 PM
أعمل حسابك يانادر سؤال جنابو دا في منتهي الخطورة..عشان كدا ما تحاول تتفلسف ونجي نطلعك كيت ساكت وجاوب بالتي هي أحسن...

أبو أماني
05-03-2010, 06:24 PM
ومرحب بيك كتير يا رأفت يا حبوب يا من تدخل الروح دون إذن وتقيم هناك أنت وآخرين وأخريات هنا كثر .

على فكرة يا نادر .. رأفت ميلاد وفتحي مسعد ديل في سودانيات زي الملاحة في السفرة ..
قبل أنسي وبمناسبة طلة الحبيب النور له التحية والتجلة .. نرجو تسهيل عملية تنشيط مشاركة السيدة سلمي مدام الأستاذ نادر بسودانيات .. فقد علمت إن عضويتها لم يتم تفعيلها .. الأخوة المشرفين .. منال .. فيصل سعد وكل الشباب .. (ده كلام يا جماعة؟؟؟).. بالله فعلوها ليها فورم ..! وأعملوا ليها باص ويرد مؤقت .. الله يهداكم يا أخ ...

العزيز نادر شكرا على السرد الشيّق الممتع وصدقنا مواصلين ومتابعين ويكفي إنك من قولة تيت كبيت موية السكر للحمام الزاجل الإسمو (النور) ده .. يا أخي والله طلت النور دي بشوفها زي ليلة القدر كدي .. وعقبال للفي بالي وهم كثر .. بس العزيز جمال محمد إبراهيم على قمتهم .. واصل يا رائع .. ودع الهانم تغرد معاك ... يلا تشاوووووgoood

رأفت ميلاد
05-03-2010, 07:50 PM
إزيك يا رأفت ...... المشكلة في موضوع الزوجات ، إنو كل واحد إقول ليك ما عارف جاني وحي ولا شنو كدا ماعارف أو رأيت لي رؤية ، أها دي يعملو فيها شنو؟ إتخيل لي إنو كل واحدة كانت تبلع ريقها بلعة شديدة قدام الوحي ولا الرؤيا دي ، ودا إرهاب عديل كدا ولا مش كدا؟.
سلمى

غايتوا أعملى حسابك أنتى ذاتك وما تقولى الراجل كبر .. أولاد فلسفة ديل دكتور صمويل كان مقطعم النفس الوداهو يتحاوم من فلسفة فوق لمدرجات القانون تحت شنو :D:D:D

ويا نادر أعمل بنصيحة فتحى .. جنابو ده بخت البسملة محاية يلغيك بيها قبال الهوك .. دقق قبال تتفلسف عليه :D:D

yassir musa
05-03-2010, 08:15 PM
شكرا ابو أماني استضافة نادر وسلمى هي استضافة تاريخ مشترك لعدد من الأصدقاء الجيدين النادرين تحياتي لكل المرحبين رأفت وفتحي وجميع ضيوفك ..بالمناسبة الفكرة جميلة ومفيدة اسمح لي أن اسجل اعجابي بها

فتحي مسعد حنفي
05-03-2010, 08:31 PM
شكرا ابو أماني استضافة نادر وسلمى هي استضافة تاريخ مشترك لعدد من الأصدقاء الجيدين النادرين تحياتي لكل المرحبين رأفت وفتحي وجميع ضيوفك ..بالمناسبة الفكرة جميلة ومفيدة اسمح لي أن اسجل اعجابي بها


أهو كدا انت ياياسر ضمنت ما أختك في سرج واحد مع مهند لكن جمال همد خاتيهو خاتيهو وحأحذر سلمي من الاتنين ديل وانت ذاتك حقو تشوف ليك طريقة تتخارج منهمgoood:D

أبو أماني
05-03-2010, 08:32 PM
شكرا ابو أماني استضافة نادر وسلمى هي استضافة تاريخ مشترك لعدد من الأصدقاء الجيدين النادرين تحياتي لكل المرحبين رأفت وفتحي وجميع ضيوفك ..بالمناسبة الفكرة جميلة ومفيدة اسمح لي أن اسجل اعجابي بها

أهلا بك يا الحبيب .. سعدت بمداخلتك الراقية ومجاملتك الرقيقة التي تثلج الصدور .. حقيقي ملآتني غرورا .. بس يظل عتابي لك قائما بكل الود .. معقول نكون على قيد خطوات من بعضنا ولم نلتقي حتى الآن !!.. كذلك استغرب غياب درة مثلك عن كل لقاء سابق لنا بإسم سودانيات .. قسما لن أخلى سبيلك قبل أن أزودك بمفاتيح الوصل .. خذ وليعذرني العزيز نادر على تطفيش بنات أفكاره ..
نادر السماني هاتف رقم : 0912810182
د. أحمد محمد زين (شلولخ) 0916541440
الآنسة منال كوكو : 0121004768
أبو أماني بس ذنبك على جمبك 0918107448
سودانيات عالم من المحبة والتواصل .. لك تقديري .. ولنادر أكرر إعتذاري ..يلا واصل!goood

yassir musa
05-03-2010, 09:19 PM
العزيزين جدا نادر وسلمى حبي واحترامي وشوقي الذي ما زادته السنين إلا كما ونوعا القا وفخرا لستم جزء من رحلة وسيرة بل معان ظلت دوما مرجعا لحلاوة الانتماء ومتعة الكفاح تعلمنا منكم كيف نحب ونعشق دون ضوضاء وكيف أن الحب هو من نوع الانتماء الانتماء للجمال والأرض والانسان وكيف أن الحب هو من الايمان تتغير كل الأشياء إلاه يظل طودا شامخا يمنح القوة والكرامة والوضوح الشفاف ..فليحفظكم الله لأسرتكم الصغيرة ولنا نحن ولهذا الوطن الذي ما زادته المحن إلا جمالا وبهاء ..انت كما انت صديقي الشامخ النادر نادر كوب من اللبن الأبيض لا تتلون ولا تفقد طعمك ..باسم ..بسيط ..باسط شيخ بطريقتك اسمح لي ان اعلن على هذه المائدة أني أحبك أحبك ..اكتب عنك ولا تبخل فاليوم عرفت أنك ماهر كاتب هلم

نبراس السيد الدمرداش
05-03-2010, 11:20 PM
من اجمل الشخصيات المرت بحياتي
نادر السماني ,, اتقابلنا 3 مرات فقط ,, بس شخصيه تعرف كيف تنفذ لدواخلك
ربنا يحفظكم انت و اسرتك و يخليهم ليك و على راسهم ست روحك سلمى و يديم عليكم المحبه

ما عندي اسئله لانو كمية الشفافيه البتحكو بيها ما محتاجه لاسئله

نادر السماني
06-03-2010, 08:25 AM
الأحباب
رأفت
فتحي
النور
ياسر
سيد البيت
نبراس
لكم ولك الود وسأعود بعد الحصة .

أبو أماني
06-03-2010, 04:43 PM
الأحباب
رأفت
فتحي
النور
ياسر
سيد البيت
نبراس
لكم ولك الود وسأعود بعد الحصة .

والله مره مررره .. كدي بقول صاحبي فتحي مسعد ما خاتي عليك لما لماها فيك حلق ليك دقنك يا أخي ما معقول دي حصة شنو دي أصلها؟؟ تصور يا رأفت واقف جمب باب المدرسة الحصة الأولي إنتهت والتانية والتالتة والفسحة ورجعوا العيال تاني الفصل واللخيرة ظاااطها جات والتلاميذ جو تارسين باب الحوش حق المدرسة فرحانين طائرين السماء الحصت نادر السماني إنتهت وسمعت ولد بيقول لزميله .. يا أخي ده براي جنس بري؟ أنا ماعارف مرتو متحملاو كيف (سلمى السؤال محول ليك)!.. وده كلو كوم يا روفي والكوم الكبير الحقيقة الوصلت ليها عن طريق الصدفة .. تصور أسباب الغياب إنو اليو إس بي حق (كنار) في البيت وعشان يوفي بوعده لازم يرجع البيت وسمعت تحت تحت كدي أنو صاحبي كابي الزوغة .. لانو اليوم عليو! تبيخ شنو؟ تبيخ بس؟؟ .. كلو مما جميعو .. قال حصة قال .. نادر ..نادر .. هاك الحصة دي ولا أقول ليك .. هاك تلاااااتة حصص .. goood goood goood

نادر السماني
06-03-2010, 08:52 PM
مساء الخير على الجميع
وأبدا بسؤال الأستاذ النور
يا سيد نادر هل لدراستك الفلسفة أثر فى مسيرة حياتك الملفته نوعاً ما ؟؟
و بصفة عامة هل دراسة الفلسفة تؤثر فى تكوين الرؤى والأفكار للفرد ؟؟
خلافاً لكل الدراسات التى تصبح فى ذات يوم ( أكل عيش ) لا أكثر ..
هذا النوع من الأسئلة صعبة الإجابة عليه بشكل دقيق ولكن هي محاولة
في الأصل كنت أتمنى دراسة علم النفس وكانت هذه الرغبة متمكنة جدا من نفسي وما زالت وبما إن الجامعة (الفرع ) لم يكن بها هذا التخصص فلجأت إلى الفلسفة باعتبارها أم العلوم وكانت لي اهتمامات بها من خلال تعرفي في المرحلة الثانوية على ما عاتقدت حينها أنه الفلسفة الماركسية واحتكاكي الكبير بالجمهوريين والفكر الجمهوري (بسبب ذلك جلدت في الصف الأول الثانوي من أستاذ التاريخ الذي أصبح لاحقا صديق وزميل إذ زعمت أن الأستاذ محمود محمد طه يماثل مارتن لوثر في الإسلام فهو مصلح إسلامي فاعتبر أستاذ التاريخ هذا الكلام نوعا من قلة الأدب ليس إلا !!) والغريب كان قد وقعفي يدي كتاب الغزالي الذي كفر فيه الفلاسفة في عشرين مسألة وبدلا من كره الفلسفة واعتبارهم كفارا حدث العكس تماما فأغرمت بابن سينا ومن بعده ابن رشد بعد أن قرأت له تهافت التهافت . ومن جانب لإخر فإن دراسة الفلسفة قد جعلتني -في ظني - أبحث في جوهر الأشياء ولا أبالي كثيرا بمظاهرها الزائفة ولذلك كانت حياتي في مجملها بسيطة جدا ولاتميل للتعقيد ز ولذا بشكل عام أرى لحياتي أثر في دراسة الفلسفة ولدراسة الفلسفة أثر في حياتي فالعلاقة كما يقول أهل الفلسفة علاقة جدلية .
وبصفة عامة الآطلاع الفلسفي يساعد على تكوين الرؤى العامة للفرد أما دراسة الفلسفة كما كانت تدرس في الفرع فهي دراسة فقيرة وغير مؤثرة على معظم طلابها خصوصا ابتداء من أيامنا .
بالتأكيد لا يمكن لي الزعم بأن ما ذكرته سابقا يعتبر إجابة كاملة عن السؤال لكنها محاولة في إطار الممكن وفق المنبر.
( بالمناسبة المدام درست فلسفة بذات الجامعة ) ..لو تعاصرنا لتعارفنا على الأرجح بلغها التحايا في كل الأحوال .

نادر السماني
06-03-2010, 09:01 PM
اسمح لي ان اعلن على هذه المائدة أني أحبك أحبك
أنا أعلنت رائي مرارا وتكرار في قوانين سبتمبر 83
بمثل تلك القوة التي أعلن بها الأستاذ الشهيد الذي اغتالته قوى الغدر والهوس الديني- نحن أيضا نحبك يا ياسر وهل نستطيع غير ذلك بعد هذا العمر ؟
بهذه المناسبة ما تنزل لينا تسجيل بصوت على الزين لهذا المقطع

نادر السماني
07-03-2010, 12:17 AM
من اجمل الشخصيات المرت بحياتي
نادر السماني ,, اتقابلنا 3 مرات فقط ,, بس شخصيه تعرف كيف تنفذ لدواخلك
ربنا يحفظكم انت و اسرتك و يخليهم ليك و على راسهم ست روحك سلمى و يديم عليكم المحبه

الأرواح جنود مجندة ما تآلف منها ائتلف ربنا يسعدك في أيامك .

بابكر مخير
07-03-2010, 07:47 AM
الحبيب نادر
تعرف الموية، لا رائحة لها ولا طعم
وإتا ياكا ظاتها
تسلك في آي حتآ وتماشي آي ذوق
العندهو حساسيآ من العطور، يشمك ويملآ أنفاسهو بيك دون خوف والبيحب الريحآ يلقها فيكآ بتفوح
وذي الموية،،
البيدور طعم السكر فيك بيلقاهو، بس يتمناهو
والعامل رجيم منك يكتر وما يتلافاهو..
لا بتسمن ولا بتضر وكترتك مهمة..

إتا يابا
شكل زولن يختهو في الجرح يبريهو
والذيك عنصر فريد وفي وجوده مثالي، بمعنى؟؟
ما مفروض تكون ولا شيوعي ولا جمهوري، لا أمة ولا إتحادي..
زول كدآ بس للناس..

عجبتني يابا صراحتك المتناهية ودي ندر بتلقاها..
درس من مدرس
وليك شكر

يابا الحبيب
كلامي يمكن يكون وممكن ما يتفهم
لكني بيهو قاصد أنك مهم
مهم ذي الموية
للزرع
وللضرع
وللإنسان
وليك يابا سلام

نادر السماني
07-03-2010, 03:04 PM
الحبيب (أعنيها بعيدا عن الأطر السياسية ) بابكر

تعرف الموية، لا رائحة لها ولا طعم
وإتا ياكا ظاتها
أعجبني تأكيد المدح بما يشبه الذم هذا وأطربني وأطمح لبلوغ ذلك المقام وشاكر لك حسن الظن هذا مع الود المقيم .عجبتني يابا صراحتك المتناهية ودي ندر بتلقاها..[/quote]
دائما أطمح ما استطعت إلى ذلك سبيلا إلى الصراحة -رغم إزعاجها أحيانا - إلا أنها مريحة في كثير من الأحيان .

[quote]والذيك عنصر فريد وفي وجوده مثالي، بمعنى؟؟
ما مفروض تكون ولا شيوعي ولا جمهوري، لا أمة ولا إتحادي..
زول كدآ بس للناس..
من ذكرتهم أعلاه ألتقي معهم حينا وابتعد آخر لكني ما انتظمت في سلكهم الحزبي ، ولكني أحترمهم جميعا ، وربما فصلت في هذا الأمر لاحقا إن كانت له أهمية .

أبو أماني
08-03-2010, 08:20 PM
الحبيب أستاذ نادر ..
مازال الليل طفلا يحبو .. حدثناعن أيام الشباب والصبا والنزق .. حدثنا عن مرحلة الثانوي والجامعة قبيل دخولك القفص الذهبي .. وماتنسي أهم موضوع بلسانك الحلو ده .. قصة لقاءك إنت والحكومة بالتفصيل الغير ممل ... يلا تشاووو

العزيزة سلمي ..
نوهت لموضوع تنشيط إشتراكك لعل الإدارة تعيرنا إهتماما .. بس عشان ماتبقوا زي حبوباتنا زمان .. لما يجوا يقوموا الحج بيطلعوا جواز سفر واااااحد والمراة صحبة راكب في الجواز .. إتي وراجلك بتحبوا الضحك عشان كدي أضحككم بقصة حبوبتي الله يرحمها سفروها الحج بالطائرة بعد خراج روح أقنعوها تركب الطيارة .. وركبت وهي خائفة تترقط .. لما المضيفة عاوزة تجمع أوراق شهادة الحمى الصفراء وقفت قريب من حبوبتي وقالت بصوت يا جماعة عاوزين الشهادة .. فرفعت حبوبتي أصبع السبابة اليمين عاليا وقالت بصوتها المكسر داك .. أشهدو أن لا إله إلا الله .. وإن محمدا رسول الله والموت حق والحياة باطلة .. وكانت الرقبة تميل شمال ويمين زي مروحة الطربيزة أو أغنية ترباس ديك ...
سؤالي لك : لم تحدثيني عن نفسك كما فعل العزيز نادر .. ننتظر ... goood

أبو أماني
09-03-2010, 04:53 PM
الحكاية شنو يا حبان .. إيه قصة الطناش الشديد دي يا جماعة .. صرف النظر عن المساكين رحمة .. نادر السماني .. نظام تقل ولا شنو يعني ..؟؟ goood

نادر السماني
10-03-2010, 05:30 PM
لأول مرة أكون خارج السودان كان الشوق إلى الأهل والأصدقاء كبيرا بلا شك واكتساب صداقات جديدة كان مفرحا جدا وكانت امتحانات الفرع قد أجلت إلى أغسطس - بسبب انتفاضة يناير 82 المجيدة التي هزت النظام المايوي هزة واستنهضت الحركة الجماهيرية -
وعاد الفتى الحالم بعد أن فشل في تغيير اتجاه بعثة مصر إلى قراءة علم النفس وانغرس في الحياة الطلابية (لا أرتاح إلى كلمة الحركة الطالبية لذا ألح على استعمال الخطأ الشائع )بمدينة المنصورة وأصبح مهموما بتفاصيل ذلك المجتمع ومنحازا في الليل الأخير إلى الكتاب . وبعد أن فشل أيضا في مشروع التشرد في أوربا بسبب تلك الامتحانات!!!!
عاد ذلك الفتى ليفاجأ بأنه لا يملك مقرر الجامعة ولا يعرف ما هي المواد (إذ كان قد فارق الجامعة مع بداية العام الدراسي ولم يتعرف على زملائه وزميلاته )فلجأ إلى صديق من أصدقاء الحي والمرحلة الثانوية يدرس لغة عربية لعله يرشده إلى بعض دارسي الفلسفة في الجامعة ، فقاده إلى مجموعة تذاكر بصورة جماعية في ما يسمى حينها بالكازينو (ولا علاقة له بأدنى كازينو فهو ساحة خلفية في الجامعة بها مقاعد معظمها يحتاج إلى صيانة ) وكانت المجموعة لحظة حضورنا على وشك التوقف لاستراحة (بريييييييييك -كما تنطقها آمال حياها الله أينما ما وجدت )وقد بدأ عليهم وعليهن استغراب يصل حد الإنكار لهذا الولد (حينها )المنتعل (سفنجة ) ويضع طاقية صيادين على رأسه وعليه لحية مشعثة وبنطال جنز متسخ إلى حد ما وتي شرت بأكمام قصيرة ودون ياقة ويبتسم دون مبررويحاول بكل بساطة السؤال عن المقرر والكتب والامتحانات يوم السبت ونحن في منتصف نهار الأربعاء فبدا الأمر كوميديا ولكن كان لي رأي مختلف وهو ما هو أول امتحان فكان الجواب فلسفة يونانية فقلت وأين الكتاب فأعطتني إحداهن كتابا لأميرة حلمي مطر عن الفلسفة اليونانية على ألا أغادر الكازينو به فوافقت سعيدا وتركوني وذهبوا إلى استراحتهم وهم يتضاحكون ويتضاحكن فضحك قلبي لهذا الفرح -وهو في الحقيقة استهزاء بي وبحالي - وانكببت على أميرة لا ألوي على شيئ - واتضح لي لاحقا أنني كنت مضحكة شلة حقوقييين وحقوقية كانوا بقربي

أبو أماني
10-03-2010, 05:39 PM
مواصلين بكل حواسنا .. وكأني أستمع لصوت بلبل يغرد على فنن في حديقة غنأ .. واصل يا الحبيب .. وأأأأدي بركة ...goood

نادر السماني
10-03-2010, 06:32 PM
الموضوع دا شهر 8سنة 82 وكان يوم ماطر يعني شكشاكة وأذكر بعدها ذهبنا إلى معرض كتاب في نادي ناصر (حينما كان ثقافيا )وذهب معنا هذا الشاب ( مالي قلبت عربي ) وده زاد استغرابنا، هو إنت وكت ما قاري لزوم المعارض ليك شنو ؟؟!!!!!!!!!!!!!!!!!! .
اليوم التاني أفاجا بأنو شلة فلسفة بقى عندها أشتاذ شرِّيح وكان أبو سفنجة الذي فرض ذاته على الجامعة والشلة وفلسفة ومن ديك وعيييييييييييييييييييييييييييييييييييييييييييييييي يييييييييييييييييييييييييييك . سلمى

فتحي مسعد حنفي
10-03-2010, 07:41 PM
الموضوع دا شهر 8سنة 82 وكان يوم ماطر يعني شكشاكة وأذكر بعدها ذهبنا إلى معرض كتاب في نادي ناصر (حينما كان ثقافيا )وذهب معنا هذا الشاب ( مالي قلبت عربي ) وده زاد استغرابنا، هو إنت وكت ما قاري لزوم المعارض ليك شنو ؟؟!!!!!!!!!!!!!!!!!! .
اليوم التاني أفاجا بأنو شلة فلسفة بقى عندها أشتاذ شرِّيح وكان أبو سفنجة الذي فرض ذاته على الجامعة والشلة وفلسفة ومن ديك وعيييييييييييييييييييييييييييييييييييييييييييييييي يييييييييييييييييييييييييييك . سلمى

هو يعني دايرين تقولو انو السفنجات كانت حاجة غريبة في كلية الفلسفة:confused:
تكون غريبة كيف وكمال شداد المحاضر كان بيجي الجامعة ويخش يحاضر لابس سفنجة ولامن كان عايز يحترم نقسو كان بيلبس شقيانة..

أبو أماني
13-03-2010, 05:48 PM
هو يعني دايرين تقولو انو السفنجات كانت حاجة غريبة في كلية الفلسفة:confused:
تكون غريبة كيف وكمال شداد المحاضر كان بيجي الجامعة ويخش يحاضر لابس سفنجة ولامن كان عايز يحترم نقسو كان بيلبس شقيانة..

أمممممممك !!! أها صاحبي طلع دفعة كمال شداد .. وأنا في مجال الصحافة الرياضية بعرف أنو شداد دخل في العام 88 من عمره قبل شهرين تلاتة .. سجل يا نادر .. وواصل ..!! goood goood goood goood goood

أبو أماني
14-03-2010, 03:59 PM
أدرك كل الظروف المحيطة .. وأقدرها حق قدرها .. وأعلم إن إتصالات كنار .. قد أوصلت روح صديقي نادر الحلقوم .. غير أن العزاء كل العزاء في شفافيتكم المفرطة .. فهلا تكرمتما علينا بطلة حلوة (ثنائية) من طلاتكما البهية؟! .. إليكم عوامل مساعدة ..
- لكل زوجين سعيدين مثلكما .. قصة تلاقي ومجاهدة في سبيل الوصول للمراد وصرتما بحمد اللله الآن أسرة سعيدة يشار إليها بالبنان وتعتبر أنموذج للزيجات التي يخشى عليها من العين.. فهلا تكرمتما بتسليط بعض الضوء على هذا النموذج ؟.
- نادر .. تمر بكل إنسان لحظات حميمة وسعيدة كلما طافت بذاكرته .. تومض بسمة على الشفاه من عالم اللاشعور .. فهل تدعونا لنعيش معك ذكرى مثل هذه اللحظات ؟..
- السؤال الأخير (إجباري) وخاص بالمدام .. أستاذة سلمى لو أجبروك للذهاب للقمر والعيش باقي عمرك هناك .. وأجبروك على إختيار شخص واحد فقط .. فمن تختارين؟goood

نادر السماني
14-03-2010, 08:07 PM
مرحبتين حبيبنا فتحي ، وعذرا على التأخير

هو يعني دايرين تقولو انو السفنجات كانت حاجة غريبة في كلية الفلسفة
أبدا ما دايرين نقول بس هو ده الحصل ليس إلا ،
تكون غريبة كيف وكمال شداد المحاضر كان بيجي الجامعة ويخش يحاضر لابس سفنجة ولامن كان عايز يحترم نقسو كان بيلبس شقيانة..
ياخ كمال شداد دا كان في الخرطوم وأنحنا بنتكلم عن الفرع ( أقول نكتة 46 ولا عارفه ولا تكون انت المألفه )

نادر السماني
14-03-2010, 08:27 PM
يا أبا أماني لك التحيات تترى ( وقيل تترتر يمكنك الاستعانة بهيفاء )
لقد حاولت أن أرد عليك بما عنَّ لي وبعد مجهود جبار في معافرة الكي بورد وأنا لست من معافريه طقشت شيئا لا أدري ما هو فضيع عليَّ ما كتبت وليس بمقدوري اليوم المعافر فاسمح عليك سلام الله يا زين .

أبو أماني
16-03-2010, 06:01 PM
يا أبا أماني لك التحيات تترى ( وقيل تترتر يمكنك الاستعانة بهيفاء )
لقد حاولت أن أرد عليك بما عنَّ لي وبعد مجهود جبار في معافرة الكي بورد وأنا لست من معافريه طقشت شيئا لا أدري ما هو فضيع عليَّ ما كتبت وليس بمقدوري اليوم المعافر فاسمح عليك سلام الله يا زين .

هااازول ولا يهمك .. حرم راجينك ولو لي الحول .. بس ما تعوق علينا .. والمدام كمان goood

أبو أماني
18-03-2010, 10:36 AM
بدأ هذا البوست نشطا ومتحركا بصورة ملفتة .. ولكن في الآونة الأخيرة صاروا يطنشونه فيا يكون بقى دقة قديمة .. يا العيب فيني أنا .. وحاشا ان يكون الحق على الضيوف .. توقعت أن يشعلل نادر هذا البوست نارا .. بدخلاته التي تثير حراكا في أعتى البرك .. ولكن ؟؟ قالوا الغائب عذره معاه .. وأنا معاي الله .. نادر حبيبي لو كابي الزوغة على الأقل رشح لي الضيف القادم .. وعاذرك يا حبيبي مهما قسيت على ...goood

أبو أماني
18-03-2010, 03:36 PM
؟ ؟ ؟ ؟ ؟ ؟
goood goood goood

نادر السماني
18-03-2010, 03:52 PM
ااستاذ (ابو اماني)........
سلامي لك والجميع

تسلم يا اخوي انت والبوست والضيوف .....

ككم فوق رؤوسنا

من ناحيتي انا مقصرة مقصرة وده كلو لاني شغالة بي نص مكنة والصداع النصفي

يمنعني التركيز على الفكرة والكتابة وكان نادر السماني بيغطي لي لانو كانن بيكتب و الايام

دي مشغول شوية لانها الدنيا اخر سنة دراسية .

لك ا لعتبى حتى ترضى.
وبعدين ياخي شنو حكاية التهديد دي قبلها ما( اتجعلنت ) وقلت بترجانا للحول ؟


طول بالك لانو نحن ما بنكب الزوغة ولو فرض وكبيناها بنرشحك انت الضيف القادم

( خلي عامل لينا سيد البيت ) . وطباخ السم بيضوقة .

سلمى

أبو أماني
18-03-2010, 04:30 PM
ااستاذ (ابو اماني)........
سلامي لك والجميع

تسلم يا اخوي انت والبوست والضيوف .....

ككم فوق رؤوسنا

من ناحيتي انا مقصرة مقصرة وده كلو لاني شغالة بي نص مكنة والصداع النصفي

يمنعني التركيز على الفكرة والكتابة وكان نادر السماني بيغطي لي لانو كانن بيكتب و الايام

دي مشغول شوية لانها الدنيا اخر سنة دراسية .

لك ا لعتبى حتى ترضى.
وبعدين ياخي شنو حكاية التهديد دي قبلها ما( اتجعلنت ) وقلت بترجانا للحول ؟


طول بالك لانو نحن ما بنكب الزوغة ولو فرض وكبيناها بنرشحك انت الضيف القادم

( خلي عامل لينا سيد البيت ) . وطباخ السم بيضوقة .

سلمى

مبسوط أنا لاني مشيت مخططي وعارف خاطري عندكم غالي فقمت عملت فيها زعلان .. والحمد لي ما خذلتوني .. كده عرفت سبب التأخير وصافية لبن يا (ملكة الخلية) .. عليك الله صاحبي ده لما أشبهو هو وأسرته بالعسل ما بكون قصرت في حقكم ؟.. عموما آدي الله وآدي حكمتو .. ننتظر على أحر من الجمر .. طلتكم البهية .. بس ما تطول وبطلي حركات الشوايقة دي !! يعني كشكرت ليكم وقلت برجاكم للحول تمسكوا فوقها طب !.. الواحد ما يكشكر تاني ولا شنو؟؟ الله يعينك ويعين صديقي الأثير ندورة (أب راسا متل الكورة) يلا تشششااااوووgoood

نادر السماني
18-03-2010, 04:41 PM
تحيات للك

ابتداءا بالاستاذ فتحي المتحفظ ا حيانا من الوقوع في شر البلية من الطربقةوالفهم الذي قد يكون مغلوطا من ناحيتي..(في الحقيقة هي مش قد ) لانو يبدو لي انه متأكد من احساسو وشكلو كدة انو رافع شعار (العترة بتصلح المشية)..والمشية دي ما دايرين نعرفا بس لازم نعرف العترة . .سلامي لالاء .
[color=#808080]الاستاذ رأفت ميلاد شكرا لك على النصائح الغالية .
استاذنا النور شكرا للمشاركة والطيب عبد الرحمن مختار رقم نعتز به ..فنعم من عرفت . شكرا لك .
العزيزة نبراس شكرا لدعواتك الجميلة ...تحياتي لك

وللوالد فردتك .

العزيز ياسر موسى دايما ضاحك ومحب للاخرين .تحياتي لك .
ياسر موسى بتخيلك دايما ضاحك سلامي لناس البيت .
شكرا .

الاستاذ ابو اماني لك الاماني الحلوة ...سلامي لأماني وام اماني واخوان اماني.

سمعتك بتقول في سرك (ناس ما بتمشي الا بالضرب والتهديد).
سلمى

جانيت
18-03-2010, 07:25 PM
الجميل نادر اعفوا لي







الوسيم الشكس بتاعي ابو اماني


جيتي البوست ده جات متاخرة عمى مني ما اكتر

جاااااااااااااياكم الصباح بمزاج افلفله ليكم حته حته


ويا نادر استحمل اسالتي


بتجي براها كده من غي فرامل


هسي ما عندي مزاج او بالاصح اتعكرررررررررررررر

نادر السماني
20-03-2010, 10:06 PM
أهلين جانيت
ويا نادر استحمل اسالتي


بتجي براها كده من غي فرامل


هسي ما عندي مزاج او بالاصح اتعكرررررررررررررر

على الرأس أنت وأسئلتك متى ما تأتِ وكيفما تكن

نادر السماني
20-03-2010, 10:20 PM
يا أبا أماني لك من الود أجزله ولضيوفك
لكل زوجين سعيدين مثلكما .. قصة تلاقي ومجاهدة في سبيل الوصول للمراد وصرتما بحمد اللله الآن أسرة سعيدة يشار إليها بالبنان وتعتبر أنموذج للزيجات التي يخشى عليها من العين.. فهلا تكرمتما بتسليط بعض الضوء على هذا النموذج ؟.
الأمر في اعتقادي بسيط جدا إذ إني أحببت سلمى ويبدو أنها فعلت بهدوء شديد فقد التقينا في أغسطس 82 في حوارات عن الأدب واستمرت هذه العلاقة في شكلها هذا تتعمق بشكل تدريجي آخذة من حياة الفراعة بساطتها ونبلها في جو عام حميم وإنساني وبدأت تأخذ ملامحها في 84 وفي مثل هذا الشهر في حديقة الحيوانات التي كانت مكان فراعي للمذاكرة حدث البوح ومن لحظتها والقلب يزداد ارتباطا بهذه الروح اللطيفة التي سكنتني وانغمست فيها وما استطعت ولا استطاعت النوم ونحن على خصام ، لاندعي اتفاقا كاملا فهذا ليس من طبيعة البشر لكنا نحافظ على الدوام على احترام كبير منه نستمد القدرة على احتمال الاختلاف ، ولربما لرومانسية المراهقة المستمرة استطعنا التماسك في ظل هذه الظروف .

نادر السماني
21-03-2010, 08:45 AM
يحب الاجواء النقية وغير المتوترة .

يبحث دائما عن الجوهر في تعامله مع الانسان .

لا يكذب ابدا مهما كان الداعي .

كلمة ( لو سمحت ) تسبق اي طلب من اي شخص حنى اولاده وانا .

لا يبادر بالكلام الجارح .

يضع مائة عذر للذي اخطأ في حقه .

دائما يستهويه الجديد والمتطور .

يمدح ما يراه لذيذ ا من الطعام ولا يعيب ما يراه عكس ذلك .

يكره الادوية وبالذات الحقن .

كريم لدرجة (حاتم) .

يحب عمله .(بشراهة).

منضبط تماما في مواعيده . عفوا لركاكة اللغة .


سلمى

عادل عسوم
21-03-2010, 09:45 AM
يحب الاجواء النقية وغير المتوترة .

يبحث دائما عن الجوهر في تعامله مع الانسان .

لا يكذب ابدا مهما كان الداعي .

كلمة ( لو سمحت ) تسبق اي طلب من اي شخص حنى اولاده وانا .

لا يبادر بالكلام الجارح .

يضع مائة عذر للذي اخطأ في حقه .

دائما يستهويه الجديد والمتطور .

يمدح ما يراه لذيذ ا من الطعام ولا يعيب ما يراه عكس ذلك .

يكره الادوية وبالذات الحقن .

كريم لدرجة (حاتم) .

يحب عمله .(بشراهة).

منضبط تماما في مواعيده . عفوا لركاكة اللغة .


سلمى
الفُضلى سلمى
لأن وافقت سلمى (تلك) زهيرا (ذاك)...
فقد وافقت (تماما) نادرنا ;)
لقد تلمسنا الكثير من توصيفك فيه حقا...
التحية له من جميل
ولك من نصيفة و...أميرة
...
نادر...
أين تجد نفسك:
في سوح النثر أم في فضاءات الشِعر؟
مودتي لكما

فتحي مسعد حنفي
21-03-2010, 09:48 AM
يا أبا أماني لك من الود أجزله ولضيوفك

الأمر في اعتقادي بسيط جدا إذ إني أحببت سلمى ويبدو أنها فعلت بهدوء شديد فقد التقينا في أغسطس 82 في حوارات عن الأدب واستمرت هذه العلاقة في شكلها هذا تتعمق بشكل تدريجي آخذة من حياة الفراعة بساطتها ونبلها في جو عام حميم وإنساني وبدأت تأخذ ملامحها في 84 وفي مثل هذا الشهر في حديقة الحيوانات التي كانت مكان فراعي للمذاكرة حدث البوح ومن لحظتها والقلب يزداد ارتباطا بهذه الروح اللطيفة التي سكنتني وانغمست فيها وما استطعت ولا استطاعت النوم ونحن على خصام ، لاندعي اتفاقا كاملا فهذا ليس من طبيعة البشر لكنا نحافظ على الدوام على احترام كبير منه نستمد القدرة على احتمال الاختلاف ، ولربما لرومانسية المراهقة المستمرة استطعنا التماسك في ظل هذه الظروف .

خلي زول تاني يجي يقول فتحي عجوز وجدو وكلام فارغ كتير ما داير..يللا بلا عترة بلا وقعة..ناس بجكسو من قبل 28 سنة وأكيد كان عمرم فوق العشرين...يللا أحسبوها براكم وأتاريهم شغالين زوغان من الأسئلة ..مرة كمبيوتر بايظ ومرة امتحانات شغالة وما عارف تاني شنو..أمال أبو أماني الما عندو كمبيوتر يسوي شنو خصوصا بعد ما أم أماني نقصت المصروف البتديهو ليهو وبقي الألف بتاعة ساعة النت كافيه في مشكلة.دا غير المشاكل التانية الما حتتحل الا أجيكم عديل بالدرب..شوايقة يارسول اللهgooodgoood

نادر السماني
21-03-2010, 12:15 PM
عادل يا لطيف لك التقدير والاحترام ومن قبل ذلك المودة والسلام :
نادر...
أين تجد نفسك:
في سوح النثر أم في فضاءات الشِعر؟
في الطفولة الباكرة وجدت نفسي مشغولا بالكتاب ربما لعدم القدرة على مجاراة الأولاد في لعب الكرة وألعاب العنف عموما ولميل طبيعي للسلم (لا يخلو من جبن ) كان انشغالي بالكتاب لهذا لا أفرق بين النثر والشعر في القراءة ولكن قد أفرق في زمان القراءة ففي أيام اكون مشغولا بالشعر وربما شاعر معين أو نوع من الشعر وفي أخرى الرواية أو القصة القصيرة وتشدني جدا القراءة في النقد الأدبي أو الفكري أو الديني وعموما ما يميز قراءتي هو عدم الانضباط فما يقع في يدي غالبا ما أقرأه وهو بدوره يقودني إلى تجاه جديد ربما ومع الأسف الشديد هذه الهواية بدأت في التناقص بمتتاليه هندسية لضعف النظر ليلا أصبح الكتاب الورقي يتراجع إلى درجة العدم في السنة الأخيرة إلا نهارا وقد فاجأني النهار بقصره .

نادر السماني
21-03-2010, 12:30 PM
عزيزنا فتحي لك التجلة والاحترام وكن قبل ذلك السلام :
خلي زول تاني يجي يقول فتحي عجوز وجدو وكلام فارغ كتير
الزول منو ؟؟؟؟!!!! حدد أبن أفصح يا زين الشباب كيتا على الشمات وهم كثر .
(عجوز ) في القرآن وردت وصفا لامرأة إبراهيم الخليل تخاطب الملكين اللذين حملا لها ولزوجها البشرى بالإنجاب (عجوز عقيم ) وعندما وصفت زوجها (بعلي شيخ )وبهذا خرجت من وصف عجوز وعن الشياخة فهي مرتبة عند الخليجييين وأنت أدرى .
أمال أبو أماني الما عندو كمبيوتر يسوي شنو خصوصا بعد ما أم أماني نقصت المصروف البتديهو ليهو وبقي الألف بتاعة ساعة النت كافيه في مشكلة.
يعمل نا ئم كما هو الآن !!!

معتصم الطاهر
21-03-2010, 01:43 PM
طلب صغير لو أمكن ..

ممكن السيرة الذاتية الأدبية ..

نادر السماني
21-03-2010, 03:11 PM
اهلا بك استاذ عسوم .حبابك عشرة .

شكرا لرؤيتك الجميلة ...

.اعرفك قبل هذا المنتدى في منتدى التوثيق .[/color][/size]

نادر السماني
22-03-2010, 12:46 AM
اهلا بك استاذ عسوم .حبابك عشرة .

شكرا لرؤيتك الجميلة ...

.اعرفك قبل هذا المنتدى في منتدى التوثيق
سلمى

نادر السماني
22-03-2010, 01:24 AM
حبابك معتصم
طلب صغير لو أمكن ..

ممكن السيرة الذاتية الأدبية ..
طلباتك أوامر يا ملك .
بداية أنا (والعياذ بالله ) متحفظ على مسألة السيرة الأدبية هذه، ولا أصنف نفسي أديبا ،لكني على الدوام مهتم بالأدب ، عاشق لأجناسه المختلفة . وكثيرا ما أبدي رأيا أو ملاحظة أو إعجابا بنص أدبي ولحسن ظن بعض الناس فيَّ يظنون ذلك نقدا . ويندر أن أكتب ما أقول .ولكن
في المرحلة الابتدائية وربما لعدم إجادتي ألعاب أندادي فلا أجد إلا أن أحدثهم عمَّا أقرأ في الغالب القصص أقوم بحكايتها لهم فأصبح ذلك مطلوبا إلى حد ما . مما حدا بي في المرحلة المتوسطة أن أساهم في تأسيس جمعية الموسيقى والمسرح في الثورة الحارة الرابعة ( رحلت إليها 74م ) وكنا نصدر جريدة نضعها في الميدان ولكن ذلك قوبل باستهجان من البعض المتفذ في الحي . والغريب أن حوربنا من بعض( الإخوان المسلمين ) واتهمنا بالشيوعية وكانت فرصة لي التعرف على الشيوعيين وقراءة شيئا من كتبهم وأدبهم فجعلني ذلك اهتم بالقراءة وأخجل مما كنت أكتب .
وهنا أذكر بالخير صبري والطاهر وعبد الرحمن نجدي والمنصوري وبدر الدين عجاج فقد ساعدونا في مشروعنا ذاك ، ولكن البعد الأدبي والفني خفت لدرجة العدم فانشغلت بالحوار ، بل قل الصراع مع متهمينا وبما إني كنت ضعيفا في أي صراع جسدي؛ فقد اهتممت بقراءة ما استطعت الحصول عليه من كتب الشيوعية والأخوان المسلمين والجمهوريين وقد بدا في أول 77م ظهور الأخوان في العمل وسط جيلنا ، فكنت لهم خصما حتى أن أميرهم في الحارة زعم أن من سلَّم عليَّ بطل وضؤوه ولست بعابئ ، ولكني منحاز لفكرة الاشتراكية ومنحاز لرؤية محمود في قضايا المرأة ومساواتها بالرجل وبساطة الحياة الاجتماعية للجمهوريين والجمهوريات وقد كانوا كثر في ثورتنا ، ولتقيت في تلك الأيام محمودا فأسرني ببساطته ولطف حديثه وكنت مع صديق لي اسمه ياسر ( أسرته جمهورية كلها ) كثيري التردد على بيت محمود في الأولى، ولم يقف أمامي في تلك الأيام والانخراط معهم إلا مسألة الصلاة . ومن جانب آخر يشدني نيكتين الذي لم أفهمه جيدا في أسس الآقتصاد السياسي ويبهرني ماو في زحف الثورة من الريف إلى المدينة ولين بياو ( يبدو أني صادقت الصينين والسوفيت من شيوعيي الثورة في ذلك الوقت ) وقرأت وصايا البنا ولم أحبها وملخص لجاهلية القرن العشرين وكرهت تزمته ،كذلك كانت النماذج البشرية من الإخوان ليست من النوع المحبوب عندي بعكس الجمهوريين والشيوعيين فكنت أجد متعة في مصادقتهم .
معتصم أنا في غاية الأسف فكما ترى فإني سرحت وليست هذه بسيرة أدبية ولا يحزنون . وصعُب عليَّ مسحها والعودة إلى ما تطلبه إن وجد فاصفح بعين الرضا واسمح بالعودة غدا إن مُدَّ لي في الأيام .

أبو أماني
22-03-2010, 06:00 PM
عزيزنا فتحي لك التجلة والاحترام وكن قبل ذلك السلام :
فتحي ده يا ندورة .. رمانة منتدانا .. وتفاحة آدم القرضها ولحقنا أمات طه .. نزلنا أسفل سافلين هسع لو أبونا آدم خلى الطفاسة حقتو دي ما كنا نبرطع في الجنة لي يوم الليلة .. عشان كده أي كلام يقولوا على العين والرأس ولو إنو السمسمية عاملة عمايلة معاه مخلاياهو شغال شليخ سااااااكت!..تصدق لي يوم الليلة (جواهر الأدب ماجابو لي) وأنا الأول مرة في حياتي أعرف حاجة إسمها (ويكاب) فتشت ليها سلقط ملقط ورسلت ليو قنطار بدل يشكرني قام قال لي دي ويكة سااااك .. وأنا وحاة خوتو الماببدلها بغرزة سمسمية التانية ظاااطها أول مرة أسمع بيهاgoood
الزول منو ؟؟؟؟!!!! حدد أبن أفصح يا زين الشباب كيتا على الشمات وهم كثر .
(عجوز ) في القرآن وردت وصفا لامرأة إبراهيم الخليل تخاطب الملكين اللذين حملا لها ولزوجها البشرى بالإنجاب (عجوز عقيم ) وعندما وصفت زوجها (بعلي شيخ )وبهذا خرجت من وصف عجوز وعن الشياخة فهي مرتبة عند الخليجييين وأنت أدرى .
غايتو كلمة (عجوز) كان بتزعلوا ولا تعمل ليو تضخم في الأبوريا أنا بقولها ليو يا أخي بعضمة لسانو قال شاف شداد في جامعة الخرتوم بالسفنجة .. يعني يكون سنة كم؟ وكان عمره كم؟ لا بلااااي هو قايلنا هنود زيييييو ؟؟؟goood
أمال أبو أماني الما عندو كمبيوتر يسوي شنو خصوصا بعد ما أم أماني نقصت المصروف البتديهو ليهو وبقي الألف بتاعة ساعة النت كافيه في مشكلة.
يعمل نا ئم كما هو الآن !!!
هوووي يانادر وحاة جلابيتي الماعندي غيرها وبعزها أكتر منو..فتحي كضااااب يسرق الضحى الأعلى ..الرجال البيشلو المصاريف من نسوانهم ويسلموهم الماهية على دائرة الملين معروف لونهم شنو؟.. وكان للكومبيوتر وحاتك ياغالي .. موجود في البيت ومعاه تلات لابتوبات .. بس شلولخ ما شافهم .. أصلو خائفين من العين !.. قال أم أماني بتديو المصاريف يعني بقت على قصة (رمتني بدائها وإنسلت) دي صحوبية شنو البتوور النفس دي) goood وكان لازم لمعزتي ليو أكملهم خمسة .. بس ماحقت مازيمبي .. gooodgoood يلا واصل يا أجمل غيثار شرف البوستر .. تشششااااووو

فتحي مسعد حنفي
22-03-2010, 06:31 PM
انت يابو أماني قايل الناس عورا ولا شنو..أول حاجة نادر وسلمي ديل أنا عرفتهم وقابلتهم قبل ما أشوف وشك الشين دا وبعدين انت ما قلت هاشم جاب ليك الكتاب تاني داير شنو..أوعي تكون بتاجر فيهم..أما اللاب توبات دي زوية رهيبة ..انت نسيت كلامك لامن ود الزين نسي لاب توبو عندكم انت ما قلت أماني افتكرتو قولة خير..عليك الله شوف ليك طريقة عالج الزهايمر دا عشان ما تصل مرحلة الما بيعرف يرجع بيتو وبعد داك الا يربطوهو في السرير...سوري العنقريب..gooodgoood:p

نادر السماني
23-03-2010, 01:19 PM
فتحي تحياتي
أبا أماني لو طلبت جواهر الأدب لسلفتك إليه حتى تشبع منه وما زال العرض قائما .

فتحي مسعد حنفي
23-03-2010, 02:09 PM
فتحي تحياتي
أبا أماني لو طلبت جواهر الأدب لسلفتك إليه حتى تشبع منه وما زال العرض قائما .


رجل والرجال قليل..ياخ ود الزين فهمني الفلم..الزول دا متفق مع مديرو في الشغل انو لو جاب ليهو الكتاب دا حيديهو علاوة.يعني لا قراية ولا يحزنون وهو لو داير يقرا الكتاب موجود في النت وبعدين الزول دا ولله قال هاشم جابو ليهو..أظنو متفق مع زول تاني غير المدير ..goood

أبو أماني
24-03-2010, 05:44 PM
رجل والرجال قليل..ياخ ود الزين فهمني الفلم..الزول دا متفق مع مديرو في الشغل انو لو جاب ليهو الكتاب دا حيديهو علاوة.يعني لا قراية ولا يحزنون وهو لو داير يقرا الكتاب موجود في النت وبعدين الزول دا ولله قال هاشم جابو ليهو..أظنو متفق مع زول تاني غير المدير ..goood

أولا هاشم طه طلع (كالعادة)أضكر منك .. صحيح دقيت سدرك وقلت ليو أنا برسلوا ليو ..لكين الراجل الله يطول عمره ماهان عليو يجيني ساي والكتاب لقاو .. رغم ظروفه الإنت أدرى بها مني آنذاك ووزنو الزائد .. بعدين قوقل وحاتك يا غالي عمري ما رجعت ليو عيلا في الشديد القوي (الله يطراك بالخير يا كانديك) وقرأة الكتاب صفحة صفحة متعة لا تعوض رغم كل التقنيات الحديثة .. ولا رائك شنو يا أبو العريييييف؟ أما نجرتك لقصة مديري والله ممكن تصدق لسبب بسييييط..إنو زميلي مصري..goood نادر يا أخ إنت ومرتك الضكرانة دي ماتلحقوني تحلوني من صاحبي ده .. بعدين ما تنسى القفلة وإختيار الضيف القادم حسب ذوقك الرفيع .. وصدقني لو مرتك حرشتك (عارفك بتسمع كلامها) تعلني أنا زي ما قالت قبل ده صدقني .. مابقبل .. أنا لسع عندي قبيلة كاملة عاوز أعزمها .. يلا ننتظر goood

نادر السماني
24-03-2010, 06:31 PM
مواصلة لسؤال معتصم حول السيرة الأدبية -إن وجدت -
في مرحلة الثانوي كنت واحدا من محرري جريدة الحارة وهي جريدة تكتب باليد على ورق الفلسكاب وتوزع في الحارة (11) وبقية الحارات الغربية من الثورات ومن المحررين أذكر عمر إدريس -أسامة عباس -عبد الوهاب ود شيخ الحارة -خالد -عماد وغيرهم وكنا نستغل منزل الشاعر الأنسان محجوب شريف الذي غالبا ما يكون معتقلا وتذهب زوجته إلى بيت أهلها فيخلو لنا المنزل وهو جزء من بيت عمر إدريس .
في الجامعة الفرع كنت وسلمى جزء من جمعية التراث والثقافة العربية وفيما أذكر قدمت عددا من الدراسات الأدبية حاليا غير موجودة عن الطيب صالح وآخر ما أذكره عنها حيازة محمد عبد الخالق لها ولا أذكر إعادتها إن أعادها كما قدمت حينها دراسة عن شعر محمد عبد القادر وهو أحد شعراء الجامعة المميزين حينها كما كنت مشاركا بالحضور والحوارات الأدبية في المنتدى الأدبي وسلمى للجامعة وهي فترة خصبة في حياتنا .
قاد ذلك الحراك الثقافي في منتصف الثمانينات إلى تكوين جمعية ثقافية من الجمعيات والكيانات الثقافية المختلفة عرفت باسم (تجاوز للثقافة والإبداع ) التي استمرت حتى الانتفاضة ثم منها كانت بدايات تكوين اتحاد الكتاب ولكني في تلك الفترة أخذتني السياسة بهما اليومي الثقيل ( والتافه ) بلغة صديقي حسين كمبيوتر .
في المنصورة كنت مهموما بالعمل السياسي في إطار الحركة الطلابية وعموما أنا كائن شفاهي جدا والكتابة ترهقني جدا .
بعد الانتفاضة أسسنا ندوة نهارية أسبوعية في دار المعلمين قدمت فيها فعاليات ثقافية متنوعة كنت مشاركا رئيسا في كثير منها -مشافهة في الغالب - وتندر الكتابة لكني أذكر كتبت دراسة عن الحكاية الشعبية لاقت قبولا كبيرا لكنها لم تنشر وضاعت كالعادة .
مؤخرا أصبحت مشاركا في الفعاليات الثقافية وفي الغالب تكون المشاركة غير مكتوبة أو كتبت في شكل نقاط أو تكتب ولم توثق كالعادة .
ذكرتني سلمى بعد زيارة درويش للسودان في 2006 م التقينا مجموعة من الأصدقاء وأعدنا فكرة منتدى يكون دوريا في بيت واح أو اثنين من الأصدقاء وتوقف ذلك من حوالي العام تقريبا .
نر جو ألا نكون قد أثقلنا عليكم وعليكن .
وأطلقوا سراحنا مشكورين ومقدرين

نادر السماني
24-03-2010, 06:42 PM
أها يا أبو أماني نقول ليك مع السلامة وفتناكم بي غافية وعامرين إن شاء الله . خلاص يا نادر رشح ليهو زول سلمى

شامة ميرغني عبد الكريم
24-03-2010, 06:55 PM
نادر السماني أيها الرائع
شدتني مساجلاتكم البديعة ورجعت لمنتدى السرد والنقد واستبد بي الشوق لزينب بليل والاخوات وكوكبة النقادالرائعين انها أيام اشم عطرها وأحس نداها الربيعي في جدب ايامنا في هذه الغربة .....قريبا باذن الله سأكون معكم في اجازة قصيرة ويا رب ألقاكم كلكم بخير ومنتدياتكم مدورة

نادر السماني
24-03-2010, 08:45 PM
أستاذة شامة بيننا يا بختنا لقد سعدت جدا بهذا الاكتشاف وأحب أن أشير إل أن شامة صاحبة الحائزة التقديرية لمسابقة الطيب صالح للرواية السودانية في نسختها الأخيرة وهي إضافة حقيقية للمنتدى وأتمنى أن أشاهد لها مشاركات في المنتدى .
بخصوص زينب بليل تلك المرأة النخلة في الخاطر الكتابة عنها قريبا إن شاء الله ويدك معي لعلنا ننجز ذلك .
تحياتي لأسرتك .

نادر السماني
24-03-2010, 08:49 PM
ويبدو أن قد وصلنا الختام فللجميع خالص التقدير والاحترام
أرشح المرأة الخيَّرة وصاحبة الصوت القوي والصريح والرأي السديد
سارة