المساعد الشخصي الرقمي

مشاهدة النسخة كاملة : ضيف على مائدة سودانيات ...! - 13 - أبو أماني (جزء ثاني)


أبو أماني
27-07-2009, 06:38 PM
gooodأحبائي الأعزاء ..
أحباء سودانيات .. لكم صادق الود والتحايا القلبية .. حقا قد سرني وأثلج صدري عمق صداقتي بكم ذهاء ما يقارب السنة أو يزيد .. قضيتها بينكم في سعادة وحبور .. وأحسست وأنا بينكم وبكم بدفء الأسرة وأحلى وشائج الإخاء والمحبة .. حيث صرتم بالنسبة لي كأفراد أسرتي رحما بل أكثر من ذلك..بحيث أقضي الساعات الطوال في رحابكم المرحة العامرة قبل وأكثر مما أقضيه مع أسرتي .. فلكم الشكر على ما وهبتموني من حب صادق إمتزج في شراييني وصار يغزو القلب ويعمر غرفه الأربع ويهرب ليعود ثانية ليمدني بالحياة .

فكرت مليئا في شكل مستقبل علاقة كل سوداني في سودانيات بالآخر! وهالني أن تكون علاقة صادقة حميمة كهذه عرضة للعيش والعمران طويلا عبر الفضاء الإسفيري والعالم الأثيري ..! وتصورت حياة شخوصها في اللاشئ وفنائهم في اللاشئ ..تماما كما يحدث يوميا بالنسبة لممثلين وممثلات نشاهدهم عبر الشاشات البيضاء والبلورية .. نعايشهم ونعاصرهم ثم يتلاشوا في اللاشئ حقيقي حزت في نفسي هذه الخاطرة .. وفكرت ثانية !..

أضع بين أياديكم عتبة أولي لتجسيد علاقة كل منا بالآخر .. وهو بوستر تتم استضافة عضو فيه ليكون مصدر حوار تعارفي يحكي لنا ما عن له أن يرويه عن نفسه فنزداد قربا منه أكثر وأكثر ومعرفة به وثيقة أكثر .. نعرف موقعه الحالي .. رقم موبايله .. عدد أفراد أسرته .. طموحاته الآنية والمستقبلية .. بعض مشاكله الخاصة التي يمكن الخوض فيها .. والمشاركة في علاجها بعض الجوانب المضيئة من حياته الماضية والتي يحلو له الخوض فيها مع الأحباء .. الخ ..

إن راقت لكم فكرتي هذه فأقترح أن يقوم كل ضيف حل بالبوستر في نهاية حلقته بترشيح من يحل بعده ضيفا على مننتسبي سودانيات .. وهكذا دواليك .. تبقى المعضلة في إختيار عضو الشرف الأول .. وأقترح أيضا أن يقوم صاحب البوستر بإختياره .. درج كبارنا على إختيار كبير القوم ليتولى ضربة البداية في كل مشروع أو عمل .. وحيث أن مجتمع سودانيات يحفل بالكبار شكلا وموضوعا وليس من بينهم من يتفضل على الآخر .. فأسمحوا لي أن أختار أكبر الأعضاء (سنا) .. فليكن ضيف الحلقة الأولى العميد الأستاذ :-

:Dخـــالـــد الحــــاج:confused:
مساهمتي الأولي معه المطالبة بنبذة صغيرة عن عميدنا والبطاقة الشخصية وتعريف مختصر ولكم جميعا خالص حبي وإعتزازي وإحترامي ...

زول الله
07-09-2010, 10:16 PM
الحمد لله حمداً كثيراً طيباً مبارك فيه
والشكر كل الشكر للاخوة الاعزاء فيصل سعد وابواماني على هذه السانحة
ثم الشكر لكل الذين شاركوا في هذه الزرزرة :D
الضيف القادم وبما انو الدنيا قبايل عيد وكدا فـ عايزين العيد يكون عيدين
واحد حق الفطر والتاني عيد رجعتو لقواعده سالماً
تلبية لمطلب الجماهير استاذنا ابو أماني فالتتفضل مرحباً بك

اولاً عايزين سيرة ذاتية - مفصلة في الترزي عديل كدا - عن أبو أماني:D

...........












اقول قولي هذا واستغفر الله لي ....................

عبدالعزيز عبدالله
08-09-2010, 07:25 AM
الحمد لله حمداً كثيراً طيباً مبارك فيه
والشكر كل الشكر للاخوة الاعزاء فيصل سعد وابواماني على هذه السانحة
ثم الشكر لكل الذين شاركوا في هذه الزرزرة :D
الضيف القادم وبما انو الدنيا قبايل عيد وكدا فـ عايزين العيد يكون عيدين
واحد حق الفطر والتاني عيد رجعتو لقواعده سالماً
تلبية لمطلب الجماهير استاذنا ابو أماني فالتتفضل مرحباً بك

اولاً عايزين سيرة ذاتية - مفصلة في الترزي عديل كدا - عن أبو أماني:D

...........












اقول قولي هذا واستغفر الله لي ....................






تسلم يا ود الشخ ...


والله الزول دا كان مفروض يجيبوهو من زماااااااااااااااااااااااااااان ...علينا جاي
وتعرف اهم حاجة انو الدنيا قبايل عيد وحتكون عندنا اجازة العيد 10 ايام كما اعلنتها الحكومة .. يعني حأكون محكر ليك لي ابو اماني ... كان ما جا انقذو ليك سفاري ... اقصد فيصل سعد :D... زي ما أنقذك من قبل انت وقبلك جانيت ...


التحايا النواضر بي سيد المائدة زااااااااااااااااااااااااااطو

اها الناس الليلة عازمنك فطور في بيتك ... وجهزنا ليك ما لذ وطاب من الملاحات البلدية والمأكولات الافرنجية .... وجميع انواع الشراب الحلال وشامبيون كمان...
اها يا زول الله الآذان اذن ولا لسة؟؟؟

طيب علي بال ما يأذن ... النغتنم المفرصة دي ... ونسعلك سوعالين مرفقين لي اسعلة زول الله....


بالاضافة للسيرة الذاتية ...
عايزين نشوف الولد الشفت ابو اماني ... أين التقي الفتاة الرائعة ام اماني...
وكيف كانت جقلبة ابو اماني ... ومقامرات ابو اماني في إيصال الايميلات وال (sms) الي ام اماني :)...
وكيف كانت تراجيديا الزواج في ذلك الوقت ... هل هي كما الآن تحمل كل التفاصيل البايخة ؟؟؟؟؟

أبو أماني
08-09-2010, 11:00 PM
الحمد لله حمداً كثيراً طيباً مبارك فيه
والشكر كل الشكر للاخوة الاعزاء فيصل سعد وابواماني على هذه السانحة
ثم الشكر لكل الذين شاركوا في هذه الزرزرة :D
الضيف القادم وبما انو الدنيا قبايل عيد وكدا فـ عايزين العيد يكون عيدين
واحد حق الفطر والتاني عيد رجعتو لقواعده سالماً
تلبية لمطلب الجماهير استاذنا ابو أماني فالتتفضل مرحباً بك

اولاً عايزين سيرة ذاتية - مفصلة في الترزي عديل كدا - عن أبو أماني:D

...........












اقول قولي هذا واستغفر الله لي ....................




أولا كل عام وأنتم جميعا بخير وسعادة وعافية ..وما يكون فيكم زول حرد العشاء ولا نقنق مع مرتو ولا سمع ليو منها كلمتين في العضل عشان رسلتو لحاجة ماجابه ليها! ومافي زول طالبكم شئ.. ثانيا أجزل الشكر لإبن العم العزيز الغالي المحسى الحر فيصل سعد الذي بأريحيته النادرة أحيأ هذا البوستر بعد موات.. ثالثا الشكر لكل الزملاء الأعزاء المتداخلين لإثرائهم هذا البوستر وبث الروح فيه خلال غيبتي .. والتي كادت أن تكون نهائية لولاء بعض من أعزهم وعلى رأسهم الإبنة الحبيبة للقلب نبراس تعقبها سمراء وسارة وكل باقي العقد النضيد ..

أخيرا .. أقول للشاب الظريف حد الثمالة زول الله .. والإبنة الرائعة البتخلي الزول يندم على كل سنين عمره الجات من بدري ! goood الحبيبة دكتورة جاااانيط .. (عليك الله يا عبدالعزيز ما أخير من "علوية"؟) ولكم جميعا .. اقول .. غالييين ..والطلب رخيص .. خلوني الليلة آخذ إذن من أم أماني.. أصلها محرّجة على ما أقول سيرتنا الزوجية على الملاء .. بث بقنعها إنكم مش ملاء زي ما هي بتفتكر.. وإنكم سنترلوك قلبي دييييش حبكم ظااااطو يا حبة وحا أجي أجاوب على الوليدات المطرطشين ديل .. عبدالعزيز .. إنت ويييين فردتك (حبة) ..؟؟ مالو يا أخوي .. يكونش حظروه الجماعة إياهم من غير ما نعرف؟؟؟ أبقوا معناgoood

أبو أماني
14-09-2010, 08:22 PM
الحمد لله حمداً كثيراً طيباً مبارك فيه
والشكر كل الشكر للاخوة الاعزاء فيصل سعد وابواماني على هذه السانحة
ثم الشكر لكل الذين شاركوا في هذه الزرزرة :D
الضيف القادم وبما انو الدنيا قبايل عيد وكدا فـ عايزين العيد يكون عيدين
واحد حق الفطر والتاني عيد رجعتو لقواعده سالماً
تلبية لمطلب الجماهير استاذنا ابو أماني فالتتفضل مرحباً بك

اولاً عايزين سيرة ذاتية - مفصلة في الترزي عديل كدا - عن أبو أماني:D

...........












اقول قولي هذا واستغفر الله لي ....................




إنه أمر دبر بليل بين فيصل سعد وزول الله !!..

حقيقي يا زول الله طلعت لا زول الله لاحاجة .. يا أخي إنت زول الله بالله ؟؟؟ إنت يا يابا .. بلوى مسيحة .. داهية تمشي على قدمين كارثة أحاقت بالأمة السودانية جمعاء تقول لي شنو تقول لي منو؟ وكمان الجنا ود عمي داك خلو سااااكت .. تلقاهو فتلها معاك في الخاس وقال ليك ندودر أبو أماني ونجيب رجله في الخية .. عمركم شفتو ليكم سيد بيت يعزموه في بيتو؟ إنها واللآت والعزي ..بدعة .. وكل بدعة .... وكل .... للنار .. ولكن أنا لها يا إبن الدرداء .. هاتو ماعندكم يا بني سويدة .. ولتروا كيف ينافح أبا أماني بسيف بنت عدنان الذي دانت له رقاب الحروف والتعابير والكلمات .. وهو كسيف العبسي عنتر بن شداد وشداد هذا كان رئيس إتحاد كرة القدم العام في العصر الجاهلي على ما أظن .. وقد قال فيما قال عنتر متباهيا بسيفه في معلقته الشهيرة ..
وسيفي كان في الهيجاء طبيبا يداوي رأس من يشكو الصداعا ..

هاتوا ما عندكم من سؤال يا أحفاد (بلال) .. وسترون ماذا سيكون رد حفيد أبا جعفر المنصور و.. و... أأأأأأأ دي قعدة .. goood

سمراء
14-09-2010, 08:37 PM
اوووووووووووه ماى قود !
ماى ديب فريزر ..اقصد ديب فريند انا ماى ديب ماى هارت والفشافيش ابو امانى
ها اوريو انت ياخ ؟
وكل عام وانت حبيب وجميل والعاقبة عندكم فى المزرات :D
والله الليله فار ووقع فى زير ....استحمل ساى بس ياسنترلوق

سارة
14-09-2010, 09:18 PM
اووووووووووووه ابو امانى حتة واحدة يا دا الهنا

كل سنة وانت وامانى امها واخيانها بالف الف خير يارب

ابو امانى ازرق لكيلكا مرتو ما بطلكا ونسيبتو ما بفاركا وتيرو مو ساركا

دى والله لا تجيب اب جقادو حتى تعرفها

اها نا امشى ازبطلى كبيبية شاى واجيك صادة تجيك ام كلعلع

أبو أماني
14-09-2010, 09:26 PM
اووووووووووووه ابو امانى حتة واحدة يا دا الهنا

كل سنة وانت وامانى امها واخيانها بالف الف خير يارب

ابو امانى ازرق لكيلكا مرتو ما بطلكا ونسيبتو ما بفاركا وتيرو مو ساركا

دى والله لا تجيب اب جقادو حتى تعرفها

اها نا امشى ازبطلى كبيبية شاى واجيك صادة تجيك ام كلعلع[/color][color=#8B0000]]

وين يا نور العين .. والله مشتاقين وكل عام وإنتي وأهلك كلهم بخير وعافية .. ودييييش أبو الهوب ظااااطو ... بالله ما تغيبي علينا .. ولو إنك جوه عينينا .. أما أم كلعلع فأنا والله مستنيها بكل الشوق قالت بتجي هسع .. ماشة تزبطليها كبيبية شاي وصادة .. عليك الله يا طانط .. أم كلعلغ دي شنو ؟؟ صدقيني بسمع بيها لاكين ماعارفها .. ما تقولي لي أسعل فتحي مسعد .. الراجل ده سيرتو ساااكت بقت بتجيب لي الحستكوزة في الحمبلاظة .. أأأي والله .. يلا .. تشششااااووووو gooodgooodgoood[/B]

أبو أماني
14-09-2010, 09:30 PM
اوووووووووووه ماى قود !
ماى ديب فريزر ..اقصد ديب فريند انا ماى ديب ماى هارت والفشافيش ابو امانى
ها اوريو انت ياخ ؟
وكل عام وانت حبيب وجميل والعاقبة عندكم فى المزرات :D
والله الليله فار ووقع فى زير ....استحمل ساى بس ياسنترلوق

gooodسمورة .. يا عثل كل سنة وإنتي بالف خير وعافيه وكل أهلك كمان .. عيد سعيد أعاده الله علي الجميع بالخير واليمن والبركات .. والله مشتاقين .. وكان للتحمل والله عشان خاتر عيونك نتحمل وحتى الجحيم إن درتي بنخوضه عشان نجيك .. إتي يا يمة هينة ولا مكطوعة لينة .. هييييييع .. أنا أخوك .. أ.. سمراء goood

أبو أماني
14-09-2010, 10:04 PM
السيرة الذاتية لأبي أماني

الإسم : زين العابدين محجوب بابكر السيد وفي شهادة ميلاد أخرى (مأمون) الأول إسم الوالد والثاني إسم أطلقه على (بسمايتو) جدي لأمي رحمه الله .. ثم توالت الأسماء والألقاب فصرت عابدين / الزين / اللزرق / اللزيريق / وكان يحلو لوالدي رحمه الله أن يناديني بكلمة العب .. أما الإسم الذي يحلو لصديقي الحبيب هاشم طه أن يناديني به فهو (شريف) ولو إنني ما زلت أجهل كنه العلاقة بين الإسم والمسمى به !goood..

العمر : لن أشفي غليلكم وبخاصة (فتحي مسعد) وأجيب على طريقة حبوبتنا بت قضيم رحمها الله .. والله عمري .. ما متذكرو كيويس .. غايتو أكان 45 أكان 64 ما بخبرو!

الحالة الإجتماعية: متزوج (إمرأة) وأقول إمرأة تحديدا للدقة فجميلة أختي متزوجة (رجل) تصوروا !!!:D وحباني الله طوال مسيرة حياتي بخمسة أبناء تسلسلهم كالتالي :-

رامي البكر رحمه الله توفى وعمره 25 سنة عقب تخرجه من الجامعة ..
فادي .. يعمل حاليا ببنك فيصل الإسلامي .. وهو الآن في بلاد الضباب للتحضير للماجستير أدعوا لهم بربكم بالتوفيق والسداد ..
أماني : فنانة تشكيلية إفتتحت مرسم (وقالاري) بقلب الخرطوم وتتعامل مع بعض الصحف والتليفيزيون وبعض المؤسسات الفنية كمركز راشد دياب وطارق الأمين .. بيت الفنون ببحري وبعض المراكز الثقافية والمنتديات والمنسقيات وغيره قدمت لها بعض العروض لزيارة أربعة دول منهم دولتين عربيات وأخري ومازال الموضوع قيد البحث .. وأهو بتداقش ..
فاطمة : وهي لعظمة مكانتها عندي تحمل إسم والدتي رحمها الله وجاءت بعد رحيلها بفترة تعمل في مؤسسة إستشارات قانونية رغم إن تخصصها الأكاديمي .. بنوك ومصارف ..
آخر العنقود .. ناجي .. 16 سنة .. نال لقب .. My perminant headache بكل جدارة وإستحقاق .. لآنه يعيد سيناريو طفولتي النزقة بكل تفاصيلها بل بصورة أوسع .. أأأخ من ناجي هذا فقد قام بسداد الديون والفواتير المتأخرة التي أدين بها لأهلي أيام طفولتي وكان السداد من مواجهتي بنفس المعاناة التي عاناها أهلي زمان ..:D

الزوجة : السيدة شادية أحمد محمد عثمان .. لا أقول عنها سوى رغبتي المستحيلة في أن أشيد لها مجسما من الذهب الخالص كزوجة مثالية وذلك حسب رؤيتي الشخصية! ويكفي إنها كانت بفضل الله معيني في الحصول على فلذات رائعون كهؤلاء .. والأهم إنها صبرت على رجل مثلي دون أن تكل أو تمل أو تتذمر .. فمعظم إن لم نقل كل الرجال أنانيون في حبهم والذي لا يخلو من حب التملك .. ما تعملوا فيها ما ناقشين .. معظم الرجال يبيحون لآنفسهم ممارسات خطاء يحرمونها على زوجاتهم (إفتكر كده فهمتوا قصدي)! أووووووووف منكم يا أخ!..:D

العمل : أعمل مديرا إداريا لشركة جلفار .. الخليج للصناعات الدوائية بالإمارات - رأس الخيمة .. ووكيلنا الله .. ثم .. كمبال ..

Others
أحب .. الفن من حيث هو .. حتى الموقف الذي أعاني منه الأمرين لو تم تدبيره بصورة فنانة ومهنية وإحترافية أحنى هامتى إعجابا وتقديرا له .. رغم غضبتي التي تتلاشى حينها ولهذا السبب فقط !! أحب أن أري الناس مبسوطين متفاهمين متحابين .. أحب الجوء المرح وإزداد سوادا وتكشيرا وإحباطا لو شهدت شخصين مختلفين أو متخاصمين .. مهما كان السبب ..

أمنيتي الخالدة : أن يقال عني عقب مغادرتي هذه الفانية كلما جاءت سيرتي .. الله يرحمه
أها تاني عندكم شنو ؟؟؟ goood

معتصم الطاهر
14-09-2010, 10:31 PM
لماذا لم تعد تكتب فى غبر هذا البوست ..؟




زول زعلان

جيجي
15-09-2010, 09:28 AM
نواصل ......
3/ الغناء لم يتدهور في السودان بل تدهورت الاخلاقيات وتدنت القيم وضاعت المُثُل وضاع معها جيل كامل اصبح همه ان .. يطبِق حاجتو .. وينتبذ بها ركناً قصياً:D
وهذا التدهور لم ياتي من حكومة ولا دخل له بالسياسة إذا كنا واقعيين ونظرنا للأمر من زاوية محايدة
لأننا قاسينا اكثر في انظمة سابقة ولم نصل لهذه النتيجة في يوم من الايام.
الحاصل بالضبط هو اننا نحاول التطاول و مد كرعيننا اطول من لحافنا ومجاراة العالم الخارجي في ثقافاته وهذه نتيجة طبيعية لما يحدث وطبيعي اكثر ان ينعكس هذا الواقع على الغناء وتمتليء مفرداته به .

4/ ختان البنات العادة المتأصلة فينا زي حبوباتنا وحكاويهن من الصعب التخلص منها بأخوي واخوك في السودان لكن الوعي بأضرارها وحسنات تركها أراهـ بدأ يقف على أرجله بين الشابات خصوصاً وعقبال امهاتهن ومادام انهن - الشابات ديل - حيكونن امهات فأنا متفائل بإندثار هذه العادة في المستقبل القريب ان شاءالله وتنتهي هذه المزبحة المامنها فايدة.

5/ الرياضة ياسيدي عندنا بقت مستقبل .. يعني اللاعب بيعني عند اهله كوم كبير بتاع قروش زي المغترب في العقود الماضية. وهذه النظرة المادية اثرت وسوف تؤثر على مسيرتنا الكروية الى ماشاءالله بالذات عندما يكون طموح اللاعب الوصول الى احد الفرق الكبير هلال أو مريخ ولما يوصل ويستلم ينوم نومة اهل الكهف.
وايضاً عندما تختلط السياسة بالرياضة يضيع التنافس الحر وتختفي الروح الرياضية فنحن ياصاحبي شعب كان رياضياً لايشق له غبار في هذه القارة وصار الآن يتغنى بأمجاد الكباتن السابقين الذين مات بعضهم وهم مديونين لأصحاب البيوت الساكنينها بالايجار وبرضو يظل الهلال ساطعاً ومنيراً رغم انف الوصيفاب ومن لف لفهم gooodgoood

6/ عالم النت لهو وتسلية لمن أراده كذلك وعلم ومعرفة وعلاقات انسانية سامية لمن أراده كذلك

7/ ...
رأفت ميلاد .. ملك الجالدين والمناطق المجاورة:D
خالد الحاج .. الكبير كبير ياودالحاج وانت كذلك
سارة ..... يانادرة في زمناً كعب ياواقفة ضد المستحيل
النور يوسف .. لله عباداً اختصهم بقضاء حوائج الناس .. وانت منهم
نبراس .... حاحيت عليك غيماتي ماصبن حداك ؟؟؟
جيجي .... يابت يافوق منتظرة شنو ؟ امطري كلماتك وبِلي الشوق
ود عثمان .... في ناس تحسهم قبل تشوفهم وانت منهم يازول يانيل
عكود ....... صورتك الخايف عليها :D الفطور عندكم لكن
فتحي مسعد .... أول مرة الاقي حلبي بأخلاق الانبياء .. لك الاحترام
ام التيمان .... تخشك وتمرقك عااادي .. المشكلة مابتقفل الباب بي وراها
شبارقة ... وضاح المحيا سمحاً إذا التقاك وسمحاً اذا فارق
حسن فرح ...... ركازة وسند .. ماتطول الغيبة ياخال
شوقي بدري ..... شوقي بدري و كفى
بابكر مخير ...... أوتعلمون ان هذا الهرم القامة .. قريبي ؟؟ بس كيف ماعارف والله :D
جانيت ..... زولة من طينة ملايكة وراضعة من ثدي البتول .. زي بسمة في ثغر الرسول

اححححح ياخ قطعت نفسنا زاتو:o
عميلنا العزيز فيصل .. خلاص لقد استنفذت الكوتة حقتك من الاسئلة
عليك بمراجعة المستودع :D:D












اقول قولي هذا واستغفر الله لي .................

معليش يا ابو اماني
بث والله اناكنت مافي وعندي سؤال لابد منه لزول الله
زول الله وذاك التناقض
ود الشيوخ....الغناي
الرقيق البناغي مشاعر البنيات وبعرض وسطهم:D....وهو شايل سكينه
البيعقل رجله ويمدها حسب الظروف
البيحمل لزميلاته الهدايا ويبكيهن
البيغني في رمضان ويحجر على الناس حق القراية:D

بابكر مخير
15-09-2010, 09:54 AM
ما حاتداخل حسي
بستنآ لمن الشربوت يتخمر وأقدمه في كونوش أو كباية كريستال غاليييييييية
لي أبو أماني وهو يتسبك في نار هاااااااادية.....
والحبيب يكون طشم وإنطبخ..
بجي عشان أمد يد العون لي حبيب
أنتشله من لهيب الاسئلة
الي دوحة العطف والمحبة..
الزول دآ يا زول الله
SO SOFT
بشيشكم عليهو...
هش بنكسر "عود العشر"
ناشف بنهرس "فتريتآ"
رجاااااااااااااافة "قصبآ"
أبعدوا منهو البيلي، ما هو ضراب كورية..
بفرطق،
الحاجات الحلوة...
بيمطق ..
النواعم، ما عندو معاها مشكلة..
لأنه!!
ما بهبش.
خلوهو براهو!؟
ما هو؟؟؟
لا بهش، لا بنش

حبيييييييييبييييييييي يا أبو اماني..
شيل شيلتك يا بتاع المقالب..
مقلبوك؟؟؟؟؟؟؟؟؟؟؟؟

مرافي
15-09-2010, 10:34 AM
السيرة الذاتية لأبي أماني

من مواجهتي بنفس المعاناة التي عاناها أهلي زمان ..:D

الزوجة : السيدة شادية أحمد محمد عثمان .. لا أقول عنها سوى رغبتي المستحيلة في أن أشيد لها مجسما من الذهب الخالص كزوجة مثالية وذلك حسب رؤيتي الشخصية! ويكفي إنها كانت بفضل الله معيني في الحصول على فلذات رائعون كهؤلاء .. والأهم إنها صبرت على رجل مثلي دون أن تكل أو تمل أو تتذمر .. فمعظم إن لم نقل كل الرجال أنانيون في حبهم والذي لا يخلو من حب التملك .. ما تعملوا فيها ما ناقشين .. معظم الرجال يبيحون لآنفسهم ممارسات خطاء يحرمونها على زوجاتهم (إفتكر كده فهمتوا قصدي)! أووووووووف منكم يا أخ!..:D



أمنيتي الخالدة : أن يقال عني عقب مغادرتي هذه الفانية كلما جاءت سيرتي .. الله يرحمه
أها تاني عندكم شنو ؟؟؟ goood


العزيز ابواماني

تحية معتقة

الكلام عن زوجتك عجبني شديد وقبل كل شيء مرحباً بالعودة

وان شاء الله طويل عمر يابا

ايه الاشراق دا كلو نورت المنتدى...

سؤالي..؟؟؟

تتمتع بمهارة عالية في الكتابة كنت احسب انك صحفي وليس اداري...

فهل مارست الصحافة وطرقت هذا الدرب يوماً ولوبالمراسلة.ففيك كل ميزات الصحفي؟؟؟

تحياتي للاسرة وكل عام وانت بالف خير..

زول الله
15-09-2010, 11:01 AM
معليش يا ابو اماني
بث والله اناكنت مافي وعندي سؤال لابد منه لزول الله
زول الله وذاك التناقض
ود الشيوخ....الغناي
الرقيق البناغي مشاعر البنيات وبعرض وسطهم:D....وهو شايل سكينه
البيعقل رجله ويمدها حسب الظروف
البيحمل لزميلاته الهدايا ويبكيهن
البيغني في رمضان ويحجر على الناس حق القراية:D
ابوأماني لايغرنك انتصارك على الكيبورد والحروف العربية
ولايغرنك استمالتك لحرائر البورد بكلماتك المغتغتة كالشعارات الانتخابية
فنحن في انتظارك بما لاقبل لك به فأنتظرنا ياهذا ثكلتك بنات جيرانكم:D


وقت مستقطع:
جيجي نحن بشر نحب ونكرهـ نغني ونبكي نفرح ونحزن
يأسرنا الحزن ويجهجه الحب باكاتنا ويسقينا الغد حلو الأمل
في لحظات الحب ننسى الكراهية وعند الفرح ننسى الحزن وبالأمل نتحدى حواجز اليأس
نقرب اعدائنا وكأنهم احبابنا ونبعد احبابنا عنا وكانهم اعدائنا
رصاص طائش ينطلق من هنا وزهور تناثر من هناك
وتبقى الحقيقة الناصعة اننا بشر وخيرنا هم التوابون

تخريمة:
تاني تجي بدري












اقول قولي هذا واستغفر الله لي .................

زول الله
15-09-2010, 03:52 PM
ابواماني كيفنك وعساك فاين وان شاءالله من العايدين الفائزين ياخ

* من عادات الاعتقال ان يراجع الفرد احواله السابقة واحوال من هم حوله ويستخلص النتائج
ابواماني كان معتقلاً بواسطة إدارة المنتدى الى ان فك الله أسره قبل العيد
في ياتو حتة حسيت انك كنت خطأ ووين كنت صاح ورأيك في قرار ايقافك؟؟

* كيف كان ابواماني يمرر رأيه الى سودانيات وبأي وسيلة ؟؟

* متى يحس ابواماني بالوحدة وماعلاجها عنده؟

* خطأ فادح ارتكبته ولم تتراجع عنه وتحملت النتائج ؟

* لديك اسلوب قصصي وحس صحافي مشوق وملفت , هل فكرت في دخول مجال الصحافة ؟



سخن بي ديل لحدما اجيك صادي












اقول قولي هذا واستغفر الله لي ....................

أبو أماني
15-09-2010, 04:37 PM
لماذا لم تعد تكتب فى غبر هذا البوست ..؟




زول زعلان

ماتزعل من حبيبك يا زول..وزعلك ما بنطقيه يا الساكن بعيد .. يحرق في قلوبنا ونيرانه بتزيد دايرنك حدانا يوم داك يبقى عيد .. هان عليك فراقنا .. ونحن ليك بنريد .. تحياتي لك ولأسرتك الرائعة حد الدهشة .. وكيف بنتنا الأستاذة إنشاء الله تمام التمام وكذلك قوت القلوب وقول ليها يا قوت القلوب ما أسباب الفجوة الغذائية هذه الأيام !!

أراك قريتني كتاب مفتوح وحسيت بوجعتي وسؤالك يشى بذلك .. حقيقي لسع ما قدرت أواكب زي زمان ..وشعرة جلدي ما إنطلقت .. ما عارف ليه .. والله يا المعتصم الموضوع ده داخل على دخلة شديدة بلحيل , وبحاول إجتثاث هذا الشعور .. يعني في النهاية خاطركم عندى كان أهم من كل مواقفى .. وآي ثينك إت إز أ ماتر أوف تايم .. قول يا لطيف .. يلا تشششاااووو

أبو أماني
15-09-2010, 04:44 PM
معليش يا ابو اماني
بث والله اناكنت مافي وعندي سؤال لابد منه لزول الله
زول الله وذاك التناقض
ود الشيوخ....الغناي
الرقيق البناغي مشاعر البنيات وبعرض وسطهم:D....وهو شايل سكينه
البيعقل رجله ويمدها حسب الظروف
البيحمل لزميلاته الهدايا ويبكيهن
البيغني في رمضان ويحجر على الناس حق القراية:D

يا أخي إنتي تدخلي أي مكان وفي أي وكت .. وكان ما عارفة إنك داخلة قلوبنا وساكنه فيها كمان يبقى لازم تعرفي..! بعدين دخلتك عسل سااااكت .. يا أخي أنا والله أي زرزرة لزول الله ده بتكيفني .. ومداخلتك جات في التنك .. خصوصا بعد قريت رده ليكgoood الكب فيو الزوغة بكل ديبلوماسية .. يطول عمرك يمه .. يلا تشششااااوووو

أبو أماني
15-09-2010, 04:54 PM
ما حاتداخل حسي
بستنآ لمن الشربوت يتخمر وأقدمه في كونوش أو كباية كريستال غاليييييييية
لي أبو أماني وهو يتسبك في نار هاااااااادية.....
والحبيب يكون طشم وإنطبخ..
بجي عشان أمد يد العون لي حبيب
أنتشله من لهيب الاسئلة
الي دوحة العطف والمحبة..
الزول دآ يا زول الله
SO SOFT
بشيشكم عليهو...
هش بنكسر "عود العشر"
ناشف بنهرس "فتريتآ"
رجاااااااااااااافة "قصبآ"
أبعدوا منهو البيلي، ما هو ضراب كورية..
بفرطق،
الحاجات الحلوة...
بيمطق ..
النواعم، ما عندو معاها مشكلة..
لأنه!!
ما بهبش.
خلوهو براهو!؟
ما هو؟؟؟
لا بهش، لا بنش

حبيييييييييبييييييييي يا أبو اماني..
شيل شيلتك يا بتاع المقالب..
مقلبوك؟؟؟؟؟؟؟؟؟؟؟؟

هم أصلا تلاتة أنفار .. البعمل ليهم ألف حساب .. أولهم إنت ..والخواجة الليمبي وناجي ولدي آخر العنقود .. يا أخي والله العظيم لما تتكلم عني بحس إني أنا بقرأ كلام بتاعي أنا عن نفسي علما بأننا لم نسعد باللقاء الحي حتى الآن .. وأخد بال حضرتك يا بيه ؟؟؟
أجمل حاجة عجبتني بلحيل قولة خلوهو براهو .. ما هو .. لا بيهش لا بينش.. دي غايتو تكون عملت ليها دفرة من فتحي مسعد سمسمية من نوع أبو كديس ..أما تحذيرك الأخير فقد جاء يشبه الشماتة يا مفتري .. جاي تقول لي مقلبوك بعد الفأس ما وقع فوق الرأس .. غايتو خووتكم يا أحفاد بابكر بدري ..أخير منها خوة الليمبي ... goood

أبو أماني
15-09-2010, 05:14 PM
العزيز ابواماني

تحية معتقة

الكلام عن زوجتك عجبني شديد وقبل كل شيء مرحباً بالعودة

وان شاء الله طويل عمر يابا

ايه الاشراق دا كلو نورت المنتدى...

سؤالي..؟؟؟

تتمتع بمهارة عالية في الكتابة كنت احسب انك صحفي وليس اداري...

فهل مارست الصحافة وطرقت هذا الدرب يوماً ولوبالمراسلة.ففيك كل ميزات الصحفي؟؟؟

تحياتي للاسرة وكل عام وانت بالف خير..

أقسم بالله العظيم إنتي يا مرافي من بين الناس العشان خاطرهم أنا أسقطت موقف مبدئي لآول مرة في حياتي .. يا بت إتي وين؟ والله شوقنا ليك بحر .. بحر شنو قولي (أوشن) عدييييل كدي تحياتي الحارة لك ولأسرتك الكريمة ..حفظهم الله وعيد مبارك بس ما يكونش شقيق حسني مبارك والسنة دي تحققي كل أمنياتك بما فيها زواجى الميمون من ست العفاف والصون شقيقتكم الأمورة همس الشوق .. وعلى فكرة أنا خلاص باقي لي شوية تشطيبات في الفيلا وسفرة صغنونة المانيا أعمل فيها شوية ديكورات لمحتويات الفم والكضوم وتزريع حاجات كده والموضوع يتم بإذن الله بس عليك الله ما تقولي الخبر ده .. عشان ما تعمل في روحها حاجة .. يا حبة عيني .. وعلى قول سمراء يطراها الله بالخير .. خير شنو؟ بالعريس إنشاء الله .. الللللللول ..goood

أما موضوع الكتابة .. فعمك خريج كلية الآداب .. تخصص أدب إنجليزي .. رغم إنو المظر طنق في غضب الله .. غايتو بحب الكتابة والقرأة من الإبتدائي وليوم الليلة وأظن ده السبب .. فيما ذهبتي إليه .. أما الصحافة والإعلام فهما عشقي الأزلي وبكتب في الصحف في مختلف المواضيع من سنة ستين .. بديتها بمقال كتبته عن صديق عزيز على إسمه إبن عنقر حفظه الله تسبب في حبسي 24 ساعة (ولأول مرة وآخر مرة في حياتي) المشكلة إنني بكتب كهاو أو متعاون .. مواضيع متناثرة ومتواترة .. ولا أستطيع كتابة عمود صحافي أو إمتهان الحرفة لعدم حصولي أو محاولة حصولي على قيد صحافي .. يعني مجرد كسل .. شفت العمر إتقدم وقلت إت إز توووو ليييييت ..

أخيرا تحياتي بالمقابل لأسرتك ..ودمتي بخير يا أعز الناس .. بس ما تنقطعي .. تلقيني دايمن بي جاي .. يلا تشششااااووووgoood

أبو أماني
15-09-2010, 05:48 PM
ابواماني كيفنك وعساك فاين وان شاءالله من العايدين الفائزين ياخ

* من عادات الاعتقال ان يراجع الفرد احواله السابقة واحوال من هم حوله ويستخلص النتائج
ابواماني كان معتقلاً بواسطة إدارة المنتدى الى ان فك الله أسره قبل العيد
في ياتو حتة حسيت انك كنت خطأ ووين كنت صاح ورأيك في قرار ايقافك؟؟

* كيف كان ابواماني يمرر رأيه الى سودانيات وبأي وسيلة ؟؟

* متى يحس ابواماني بالوحدة وماعلاجها عنده؟

* خطأ فادح ارتكبته ولم تتراجع عنه وتحملت النتائج ؟

* لديك اسلوب قصصي وحس صحافي مشوق وملفت , هل فكرت في دخول مجال الصحافة ؟

سخن بي ديل لحدما اجيك صادي


اقول قولي هذا واستغفر الله لي ....................




ابواماني كان معتقلاً بواسطة إدارة المنتدى الى ان فك الله أسره قبل العيد
في ياتو حتة حسيت انك كنت خطأ ووين كنت صاح ورأيك في قرار ايقافك؟؟

* أولا أنا لا أسميه إعتقالا بل هو إمتهان لحرية عضو بالمنتدي بدون وجه حق .. وهذا ما أثار الدماء بالعروق .. خاصة وقد كنت أتوقع أن أسمع كلمة شكر وتقدير .. المؤسف بحثت بشده عن وجود أقل خطأ استحق عليه ما حدث فلم أجد بكل أسف سوي .. إنضوائي تحت لواء إدارة تحكم بهذه الشاكلة .. زول الله سكر على الموضوع ده الله يخليك .. نشوف السوعال التاني.

* كنت (بل لازلت) أمرر رائي عبر سودانيات (بكل عفوية وبلا تخطيط مسبق )!.

* أحس بالوحدة القاتلة تخنقني عندما أكون بين أناس لايحسنون الحوار ..أو النقاش .. وفي كثير من الأوقات أهرب من وحدتي هذه علنا عندما يكون الطرف الآخر من النوع التجم .. يعني النوع داك اللو ما بادرت إنت بالكلام .. كان قعدت معاو يومين ما يفتح خشمو.. يا أخي ده بيعمل لي قرحة عديييل كدي ...

* الخطأ الفادح الذي إرتكبته ولم أتراجع عنه وتحملت كل نتائجه .. كنت في السادسة عشر من العمر وكنت مغرم بقيادة السيارات (تعلمجي) وقد حذرني الوالد رحمه الله تحذيرا شديد اللهجة من محاولة قيادة سيارته بدون علمه أو وجوده ( الراجل الله يرحمه كان مبرمج تعليمي القيادة بصورة مهنية وعدة مرات قام بتمريني) بس اليوم داك منظر الوالد نائم نوما عميقا والمفتاح في الطاولة .. والسيارة تغمز لي بفانوسها الشمال .. ما قدرت أقاوم وقلت أسوقها وتوقد نار تصبح رماد وخلى الوالد يعمل العاوزو ..وبالفعل..كان عندي جكسوية قريبتنا كت مكسر ..هي قصدي كانت مكسرة فوقي .. سقت السيارة ورحت أخدتها من جمب مدرستهم ومعاها ثلاثة صاحباتها ..وعملت جنتلمان إشتريت ليهم آيس كريم .. ولما رجعت السيارة كان الوالد مازال نائما .. بس السيارة الحق لله كانت دخاخينها تقول يا غربتي .. وإتضح لاحقا إنها سيحت سبيكة .. أخذت علقة .. وأخذ والدي رحمه الله علقة أخري حيث باع السيارة برماد القروش .. المصيبة يا زول .. عملت عملتي دي بإصرار وبعد دراسة كل العواقب والإحتمالات عليك الرسول ما فعلن الجهل نصيبة ؟؟!

* نعم دخلت مجال الصحافة والميديا المقرؤة .. بس ما بصورة رسمية (متعاون) لعدم حصولي على القيد الصحافي أو محاولة الحصول عليه... شكرا على التقريظ ..

* سخن بي ديل لحدما اجيك صادي
يسخن شحمك ولحمك يا يابا ... يلاتشششااااووووgoood

زول الله
15-09-2010, 09:26 PM
اعصابك ياخ ..خليك ريلاكس عشان نقدر نشوت ليك حاجة حاجتين تاني وكدا

طبعاً بعد إهداء السطور الأولى من إجابتك لإدارة المنتدى ومن لف لفهم نخش في الموضوع:

* بعد الانفصال -إذا حدث- نظرة أغلب الشماليين هي أن الجنوبيين غير مؤهلين لقيادة دولة ..رأيك؟

* قبل الزواج يردم الواحد خطيبته بكل انواع الدفاع عن حقوق المرأة والمساواة وما إلى ذلك
ثم بعد الزواج يرى أن أصلح مكان لها هو البيت ... لماذا وما رأيك ؟؟

* يقولون ان الغربة ضياع إجتماعي وفقدان هوية .. رأيك؟؟


ديل للتسلية كدا باقي الليل دا وبجيك تاني











اقول قولي هذا واستغفر الله لي ................

جانيت
16-09-2010, 08:22 AM
ابوي انا وابو اماني كل سنة وانت بالف خير

ياخ والله لخمني من البوست ده الشديد القوي غلبة العيد

وبعد العيد استشهدنا في سبيل المرض


يلا حاجيك بي رواقة وعندي ليك سوعااااااااااااال واحد بث
خليني النجمعو كويث عشان تجاوبني كويث

رأفت ميلاد
16-09-2010, 08:49 AM
سلامات يا أبو أمانى

كل سنة وأنت طيب والأولاد وأمهم بخير

هو سؤال واحد مافى غيره .. مشتاقين ياخ

جانيت
16-09-2010, 10:09 AM
سلامات يا أبو أمانى

كل سنة وأنت طيب والأولاد وأمهم بخير

هو سؤال واحد مافى غيره .. مشتاقين ياخ

السؤال ماعندك يا عباس:D:D

أبو أماني
16-09-2010, 05:23 PM
اعصابك ياخ ..خليك ريلاكس عشان نقدر نشوت ليك حاجة حاجتين تاني وكدا
طبعاً بعد إهداء السطور الأولى من إجابتك لإدارة المنتدى ومن لف لفهم نخش في الموضوع:
* بعد الانفصال -إذا حدث- نظرة أغلب الشماليين هي أن الجنوبيين غير مؤهلين لقيادة دولة ..رأيك؟
* قبل الزواج يردم الواحد خطيبته بكل انواع الدفاع عن حقوق المرأة والمساواة وما إلى ذلك
ثم بعد الزواج يرى أن أصلح مكان لها هو البيت ... لماذا وما رأيك ؟؟
* يقولون ان الغربة ضياع إجتماعي وفقدان هوية .. رأيك؟؟
ديل للتسلية كدا باقي الليل دا وبجيك تاني

اقول قولي هذا واستغفر الله لي ................


]* اعصابك ياخ ..خليك ريلاكس عشان نقدر نشوت ليك حاجة حاجتين تاني وكدا
طبعاً بعد إهداء السطور الأولى من إجابتك لإدارة المنتدى ومن لف لفهم!![/U]
- هو إنت خليت فيها أعصاب يا زول الله يا أخوي .. غايتو النمشى وراك نشوف آخرتها زماااان حبوبتي رحمها الله قالت لي قولة بس ما تزعل منها .. قالت لي يا عابدين ياولدي البباري الجداد بوديهو الكوشة .. (قلت ليك ما تزعل من كلمتي دي لأني لقيتها مدردقة وفي التمانيات على طول .. زي ما دردقتني قبال كده وحولتني من مضيف لضيف).. ودردقتني تاني مرة وإنت عارف محل وجعى وين ودودرتني .. وحولت ال case بتاعي لمجلس الإدارة وهم الشكية لي الله .. على الهبشة .. ما صدقوا خبر تاني يوم طوووالي شاتو ليك فرمان قدر الليلة وباكر .. ما قالوا أبو أماني مباشرة كده ولا فلان ولا علان لاكين (إن دايركت كدي) .. اللبيب بالإشارة يفهم .. وأنا أطال الله عمرك نكاية في البشرية جمعأ .. بعتقد إني لبيب .. يلا.. يا زول خلينا نشوف أخرتها وحررررم ما بتردد في أي سوعال تسعلني ليو وبقول الفي قلبي طووووالي وزي ماقالت حبوبتي سالفة الذكر .. محل رهيفة ينــقد!..إنقليزي ده يا مرسي؟!.
- - -
* بعد الانفصال -إذا حدث- نظرة أغلب الشماليين هي أن الجنوبيين غير مؤهلين لقيادة دولة ..رأيك؟
- نظرة خاطيئة مية المية .. فمن الجنوبيين شباب مؤهلين ومثقفين أكثر من أتخن شمالي أما الإنفصال في حد ذاته فهو مرفوض من كل الوان الطيف السوداني شمالا وجنوبا ما عدى القلة وبعض قوى الظلام العالمي الجديد .. من ينتهجوا منذ عهد الإستعمار سياسة فرق تسد ..وهذا هو السيناريو البنتاغوني .. والكينيستي المعد للسودان حتى ينالوا مرماهم .. رأي إن الإنفصال الله لا قدر له أن يحدث .. لو حدث سيكون .. كارثة حقيقية ألمت بنا كسودانيين .. اللهم نسألك اللطف..
- - -
* قبل الزواج يردم الواحد خطيبته بكل انواع الدفاع عن حقوق المرأة والمساواة وما إلى ذلك ثم بعد الزواج يرى أن أصلح مكان لها هو البيت ... لماذا وما رأيك ؟؟
- بإختصار شديد يحدث هذا الأمر مع أغلب الرجال (السودانيين) ومهما بلغوا باعا من الإستنارة والتعليم .. لسبب بسييييط جدن .. وهو إننا في الأصل سودانيين حتى النخاع الشوكي ومتلفحين بتوب معار من الحضارة والرقى والتشبه بالحضارات المكتسبة .. أيام الخطوبة تكون على قناعة تامة بأنك ماعندك مانع من عمل الزوجة وده حق طبيعى وبعد الزوج تستقيظ شخصية هارون الرشيد .. وتنشط عقلية البلاط فيتمرد (سي سيد) على فلسفة مستر حضارة.. ألم تلاحظ يا زول الله إنك معظم الوقت تتصرف بكل دماثة ولياقة ورقة وظرف مع كل وكافة بنات حواء ما عدى زوجتك ؟؟.. ما تكضب سااااكت .. والله في الهينة والقاسية تديها في (التنك) على طول لكين لو واحدة تانية .. تقعد تتسحسح .. وهئ هئ هئ .. ومعليش .. وبيحصل .. وتخلق لها كل الأعذار المنطقية وال..لامنطقية!..هوووي يا نسوان والله ولا تحريش ولا حاجة.. دي حقيقة!goood
- - -
* يقولون ان الغربة ضياع إجتماعي وفقدان هوية .. رأيك؟؟
- كلام مغلوط مية المية .. الغربة صقل للشخصية وإكتساب خبرات .. وإحتكاك بحضارات أخري .. الغربة جامعة غير رسمية تعقد سيمستراتها في الشارع العام والمكتب والبيت خارج نطاق المليون ميل مربع .. والمثل بيقول أسأل مجرب .. صدقني يا زول الله الشخص الماثل أمامك حاليا .. هذا المأفون أبو أماني .. كان قبل مرحلة الإغتراب .. شخصية عادية خالص يعني مجرد شخص والسلام .. لم أكن مؤثرا بحضوري في المجتمعات والمحافل أو ملفت للنظر وشعرت بتغيير كامل شامل طرأ على شخصيتي بعد سنين الإغتراب ..
- - -
* ديل للتسلية كدا باقي الليل دا وبجيك تاني
- إنشاء الله تجيك (الكشة) بكسر الكاف .. ولا أسأل عن معناها .. يلا تشششاااووووgoood

جيجي
16-09-2010, 06:32 PM
يا أخي إنتي تدخلي أي مكان وفي أي وكت .. وكان ما عارفة إنك داخلة قلوبنا وساكنه فيها كمان يبقى لازم تعرفي..! بعدين دخلتك عسل سااااكت .. يا أخي أنا والله أي زرزرة لزول الله ده بتكيفني .. ومداخلتك جات في التنك .. خصوصا بعد قريت رده ليكgoood الكب فيو الزوغة بكل ديبلوماسية .. يطول عمرك يمه .. يلا تشششااااوووو
شكرا لكلماتك الجميلات والمحبة موصولة لك
واما زول الله يكفي انه فهم الرسالة

ابو اماني
ماهو السؤال الذي تمنيت يطرح عليك ولميحدث؟

أبو أماني
16-09-2010, 06:38 PM
ابوي انا وابو اماني كل سنة وانت بالف خير

ياخ والله لخمني من البوست ده الشديد القوي غلبة العيد

وبعد العيد استشهدنا في سبيل المرض


يلا حاجيك بي رواقة وعندي ليك سوعااااااااااااال واحد بث
خليني النجمعو كويث عشان تجاوبني كويث

ألف مليون مليار سلامتك يا ست الحسن والجمال والظرف والكياسة والأدب .. وين يا ستهن وما تسأليني هن ياتون؟؟ عليك الله ما تحرمينا من طلاتك الرائعة ديك ومهابشاتك الظريفة ديك وخلي البوست يلعلط كدي .. وجيبي لي ضرتك الشهيرة .. عبعزيز .. ومن لف لفه ممن يتطاولون ويتشابون لهامات الكواكب والنجوم السوامق زي ناس جانيت.. وطالما عادوا ينتعلون خفي حنين ويرددون وراء فنان السودان الأول وردي .. و.. و.. وقبضت الريييييييييييح ..goood جانيت كلمتك في البداية وموضعك شقيقة لأماني .. قلادة في صدري .. لكي كل الحب والتقدير .. وعظيم الأمنيات الأبوية بأن يسعدك ويوفقك ويحقق ليك كل أمنياتك .. يلا .. تشششاااووووgoood

أبو أماني
16-09-2010, 06:45 PM
سلامات يا أبو أمانى

كل سنة وأنت طيب والأولاد وأمهم بخير

هو سؤال واحد مافى غيره .. مشتاقين ياخ

والله يا روفي وقسما بالمسيح ومحمد .. أحبك بكل صدق ومن كل قلبي وبدون أدني سبب ظاهر يعني كان جينا لخلقتك ما فيها حوافز غير البسمة الرائعة الجانبية دي .. وكان جينا للون البشرة أهو شووووية كدي وتبقى أبو أماني .. وأنا ظاااطي مستغرب كيف اولاد المصارين البييض يطلعوا زرق زي ناس (قريعتي راحت ديل) .. أحمد زين ما تحمر لي .. ماقاصدك والله .. عموما يا روفي يا الحبيب طلتك .. طلة وردة من السور ونغمة تناغي من طمبور .. وجمال الفال وراحة البال وهجعة زول بعد ترحال .. عليك الله بطل تقل وغياب بدون أسباب .. ونحن ديمة في رجاك يا الخزين .. عيد سعيد ومبارك وتحياتي لأسرتك الكريمة فرضا فرضا .. يلا تشششاااووووgoood

أبو أماني
16-09-2010, 06:48 PM
السؤال ماعندك يا عباس:D:D

عباس ده خليو يا جانيت .. ده (سييم) بيناتنا .. وأهو حنجاوب عليه .. والله مهما بلغ شوقك ما بيحصل واحد على ألف من شوقي ليك .. ياود إت عامل لي عمل ولا شنو ؟؟؟ goood

طارق صديق كانديك
16-09-2010, 06:51 PM
الزول الجميل .. !!

أبو أماني .. كيف حالك .. وكل عام وأنت ومن حولك في حلل النعيم .. !!

فقط للتحية والتقدير ..

عوداً أحمد .. !!

مودتي

أبو أماني
20-09-2010, 05:34 PM
الزول الجميل .. !!

أبو أماني .. كيف حالك .. وكل عام وأنت ومن حولك في حلل النعيم .. !!

فقط للتحية والتقدير ..

عوداً أحمد .. !!

مودتي

ود كانديك .. كيف حالك وأسرتك الرائعة لكم خالص تحياتي وصادق معزتي .. وربنا يرد غربتكم سالمين وغانمين .. شوقي ليك شديد بلحيل يهد الحيل .. خيالكم باقي جوووانا ومعاكم كم نساهر الليل .. تشكر على مداخلتك الرائعة ودم بعافية وخير وهناء .. يلا تشششااااووو .

ملحووووزة ود مخير :-
إبن أختك فاروق (حارق تش) زي ما بيقولوا وبقى معلم أد الدنيا ومحله قريب من سكننا بجبرة..والزبائن على قفاء من يشيل أمسك الخشب ولو رشاشة أمسك العجب .. goood

زول الله
20-09-2010, 06:28 PM
ابو اماني نطلع شوية من الجو بتاع المعتقلات دا :D:D

* لمن تقرا من الشعراء
* اجمل بيت شعر كتبته ذات يوم لمدامكم المصون ايام الجكس والبكا
* أغاني الساحة الآن راجل المرا وانت نازل مقارنة مع الزمن السمح رأيك الاسباب والحل؟؟
* السودان سلة غذاء العالم شعار قديم .. هل بالإمكان تفعيله ؟؟؟
* احزابنا ورموزها الذابلة..مفهوم الديمقراطية وأمكانية تطبيقها عندنا .. العراقيل والحلول ؟؟؟؟

بجيك تاني كان الله مد في العمر












اقول قولي هذا واستغفر الله لي ...............

معتصم الطاهر
20-09-2010, 09:58 PM
لماذا لا تنشر كتاباتك الادبية ( اقصد الشعر) .. ولماذا لا تأخذ الشعر كقضية ؟

جانيت
21-09-2010, 08:04 AM
ابو اماني يا سيد الناس

سودانيات ليس كما سبق على حد قول الكثيرين هنا منهم من يرى انها في تقدم ومنهم من يرى انها فقدت رونقها للهزل وعدم الجدية

اتينا سودانيات مجموعه من الشباب او ال 3Gكما يطلقها علينا الامين العام

ما هو برأيك في تلك المجموعه هل لها التاثير في التقدم ام فقدان الرونق


خالص حبي وتقديري

طارق الحسن محمد
21-09-2010, 01:09 PM
ابو امانى الجميل
سعال واحد بس
ياخى انت بتميل لبعض العبارات
المصرية فى كتابتك
هل برضو فى كلامك موجودة
والتاثير دا جائى من وين
تشاااااااااااااااااااااو :D :D

أبو أماني
21-09-2010, 05:42 PM
ابوي انا وابو اماني كل سنة وانت بالف خير

ياخ والله لخمني من البوست ده الشديد القوي غلبة العيد

وبعد العيد استشهدنا في سبيل المرض


يلا حاجيك بي رواقة وعندي ليك سوعااااااااااااال واحد بث
خليني النجمعو كويث عشان تجاوبني كويث

أرقى وأحلى وأظرف دكتورة في السودان وعموم إفريقيا .. ماي إسويت هارت ولا ديناري ماعارف !! جانيت كيفنك .. شنو ليك إسبوع بتجمعى في السوعال هو ده سوعال جد جد ولا سوعال ديكي ؟؟ أنا منتظر وبذاكر غيابيا .. يلا تشششااااووووgoood

أبو أماني
21-09-2010, 06:21 PM
ابو اماني نطلع شوية من الجو بتاع المعتقلات دا :D:D

* لمن تقرا من الشعراء
* اجمل بيت شعر كتبته ذات يوم لمدامكم المصون ايام الجكس والبكا
* أغاني الساحة الآن راجل المرا وانت نازل مقارنة مع الزمن السمح رأيك الاسباب والحل؟؟
* السودان سلة غذاء العالم شعار قديم .. هل بالإمكان تفعيله ؟؟؟
* احزابنا ورموزها الذابلة..مفهوم الديمقراطية وأمكانية تطبيقها عندنا .. العراقيل والحلول ؟؟؟؟

بجيك تاني كان الله مد في العمر


اقول قولي هذا واستغفر الله لي ...............




لمن أقرأ :
حقيقي يازول الله يا أخوي أهوى الشعر بصورة ما طبيعية .. وبقرأ لكل مبدع .. وبشبه كل شاعر أيا كان ببستان وريف مخضر .. يانع الزهور .. ومن كل بستان بطلع لي بوردة وردتين بس حقيقي .. يستغرقني نزار كلما التقيه .. ويمد لي ولكل المجتمع لسانه ساخرا الشاعر العراقي الفذ مظفر النواب .. ويسلب كل شعوري ويشعرني بالدهشة والتواضع أمام ملكاته أحمد مطر .. أستعذب وأعشق شعر بدر شاكر السياب والبياتي .. وأعتز حتى النخاع الشوكي بكل ما صاغه الشعراء سودانيون بدون فرز خاصة .. المرحوم إسماعيل حسن .. التجاني يوسف بشير الهادي آدم .. وإدريس جماع .. وهلمجرا ...

أجمل بيت شعر لزوجتي :-
هو الحقيقة ما بيت .. ده حلة صغنونة كده لانو البيت براهو ما بيوصل المعلومة .. بقول فيه:-

ما مشتهيك ..
مستني فوق حر الجمر ..
لحظة حنان تجمعني بيك ..
متمنى أول حد حناني ..
كان أقدر أنصف حبي ليك
أو أقدر أوصل حد جمالك
وألقى كلمة حب إليك ..
ما ده الحنان ..
سائل بيكتب من زمان ..
أجمل قصيدة حب إليك ..
**
و ... رب رب رب .. لحدي ما وصلت الختام ..

بالله يا أجمل حبيب ..
ما تنسى زول راهب لديك ..
بالله كفكف ليو دموعه ..
خليهو ينسى الدنيا بيك ..
خليه يشعر بوجوده ..
بحنانه وحبه ليك ..
ما تحاول تغيب ..
من عينه يوم .. يمكن ..
يموت من شوقه ليك * * * غايتو لقيتك يا زول الله .. ريحتك طاقة عدييييل كدي!:D.. الله يسامحك!goood

الأغاني الهابطة: -
زول الله .. المعادلة الأزلية ما تنساها .. السمح والقبيح .. المؤدب والصعلوك .. رجل الدين والسكرجي .. نحن لسنا ضد الأغاني الهابطة بصورة متشددة .. بل نستهجنها ونتجاهلها علنا وربما من يدري ندندن بها ليلا وسرا بكل سرور .. في لحظات (تانية حامياني)!goood
تعرف يازول الله .. جلست مع جهابذة الفن السوداني في السبعينات جلسات حميمة .. وتصدق كل واحد فيهم عنده أغنيات رائعة اللحن والأداء هابطة المعاني .. يعني راجل المرأة تكون مهذبة خاااالس .. خليك من ده .. الشاعر البقول أنا وأنا .. عنده أرشيف خاص بيو من أشعار لا يستطيع عرضها على الملا .. خلي ناس حواء المجروس وبلو بلو .. ونجاة غرزة .. وغيرهم من المناضلات في بلاط السوقية ياكلوا عيشهم ..

سلة غذاء : نعم يمكن تفعيله وتحقيقه ..ولكن ليس في هذا العهد .. العيب فينا يا الحبيب ما في سوداننا الحبيب ..

أحزابنا :-
أحزابنا أطال الله عمرك وعمرها وتجاوز الإنقاذ .. ما بطالة وليس ما يعيبها سوى عدم المؤسسية والعمل في المواسم .. يعني في حكم عسكري يطبق على أنفاس الشعب السوداني كم وعشرين سنة .. تكون احزابنا في حالة بيات شتوي أو قسري لا فرق .. علما بأن المرحوم طيب الذكر محمد أحمد المحجوب رحمه الله قال : إن الديموقراطية لا تأتي إلا بمزيد من الديموقراطية .. وشوف براك وين توفر لها المزيد .. سنحت فرصة وحيدة توسمنا فيها الخير عندما مسك الحكم ود سيدي المهدي المثقف المتعلم القاري في بريطانيا .. قام سواها لينا كله سينديكالية وراديكالية وينبغي وهلمجرا لمن لحقنا أمات طه وعشم العسكر فينا .. زول الله إت قصتك معاي شنو؟ إنا شاعر كدي حا أطلع من المائدة دي بقرحة ولا مصران .. كمان قال لي بجيك تاني .. عملت لي وجع وش يا أخي .. عزوز إت وينك يا أخي ما تحلني من (شبكة الطروش دي) ... يلا تشششااااووووgoood

فتحي مسعد حنفي
21-09-2010, 08:25 PM
تعرف يابو أماني أنا لما كنت قاعد في بيتكم عاينت ليك ولي أم أماني وقلت في سري قادر ألله اللم الشامي علي المغربي لكن الحاجات دايما بتكون سالب وموجب..صورة وعفريتة...جبنة وزيتون حتي الخواجات عملو ويسكي..black&white يعني انت ما فلتة زمان بل مثال لما يجود به الزمان علي المانات الزيك..
عشان كدا يالحبيب أشعارك في توأم روحك حالة طبيعية مادام الالهام جاييك من الطرف الآخر يعني أم أماني هي الكتبت الكلام الجميل دا بي وحيها..
خودا حافظ يارفيق:D;)goood

طارق الحسن محمد
21-09-2010, 08:32 PM
تعرف يابو أماني أنا لما كنت قاعد في بيتكم عاينت ليك ولي أم أماني وقلت في سري قادر ألله اللم الشامي علي المغربي لكن الحاجات دايما بتكون سالب وموجب..صورة وعفريتة...جبنة وزيتون حتي الخواجات عملو ويسكي..black&white يعني انت ما فلتة زمان بل مثال لما يجود به الزمان علي المانات الزيك..
عشان كدا يالحبيب أشعارك في توأم روحك حالة طبيعية مادام الالهام جاييك من الطرف الآخر يعني أم أماني هي الكتبت الكلام الجميل دا بي وحيها..
خودا حافظ يارفيق:D;)goood

شغل الف والله


نسفت ابو امانى من جذوره


حلبى

لئيم

وبس
بتشحدها

؟ ؟


! ! !


من اصلك




ههههههههههههههههههههههه

فتحي مسعد حنفي
21-09-2010, 08:38 PM
شغل الف والله


نسفت ابو امانى من جذوره


حلبى

لئيم

وبس
بتشحدها

؟ ؟


! ! !


من اصلك




ههههههههههههههههههههههه


المشكلة ياطارق انت فهمتني وأخونا دا الا تسلفو فهامتك عشان يفهم كلامي..لكن والحق يقال أبو أماني دا شاعر كويس وعندو أشعار رائعة بس جبان عشان أشعارو كلها كلماتا بتدور في محيط بيتو وعائلتو عشان ما يخش في مشاكل..بس ممكن يكون كاتب برة حيطان البيت وداسي الكتبو..

طارق الحسن محمد
21-09-2010, 09:09 PM
المشكلة ياطارق انت فهمتني وأخونا دا الا تسلفو فهامتك عشان يفهم كلامي..لكن والحق يقال أبو أماني دا شاعر كويس وعندو أشعار رائعة بس جبان عشان أشعارو كلها كلماتا بتدور في محيط بيتو وعائلتو عشان ما يخش في مشاكل..بس ممكن يكون كاتب برة حيطان البيت وداسي الكتبو..

دى
مشكلة



وكبيرة



شكرا
فتحى

للتوضيح



المهم



:D

أبو أماني
22-09-2010, 05:59 PM
المشكلة ياطارق انت فهمتني وأخونا دا الا تسلفو فهامتك عشان يفهم كلامي..لكن والحق يقال أبو أماني دا شاعر كويس وعندو أشعار رائعة بس جبان عشان أشعارو كلها كلماتا بتدور في محيط بيتو وعائلتو عشان ما يخش في مشاكل..بس ممكن يكون كاتب برة حيطان البيت وداسي الكتبو..

العزيز طارق الحسن .. سلامات يا راجل وعيد سعيد .. شكرا على المداخلة الظريفة ولو إنها أخذت طابع (البحث عن شمار .. أو سمسمية )!:D طبعا إنت عارف إنو أنا وفتحي مسعد ده أصحاب ( ودي ذاتها فاكيها فيني) وأنا مشيتها ليو بمزاجي قلت حرام بستفة في كل حتة يمشي ليها ما يجوز يعني !!:D ورغم كدي تلقانا الشحمة والنار .. أنا النار .. goood المسكين أنا مقدر الظروف النفسية الماري بيها خسوسا لمن يحاول يقارن بيني وبينو .. ويلقى الفرق شاسع والله يا طروقة .. حماري غلب معاو .. قدر ما كلمتو وقلت ليو ما تعاين فوق وماتقارن بينك وبين الناس .. بس هو دماغو ناشف .. غايتو أمري لله أتحمل .. أصلي رغم كل شئ بريدو ريده شديدة رغم (رزالتو دي) goood كبارنا قالوا .. الحب أعمى .. ومن الحب ما قتل .. وده ما قتلني.. ده طلع ....! عديل كدي .. أسع دي ما رديت على مداخلتو الرمدانة دي .. تلقاهو قاعد يحمر لي من بعيد .. والوش محمر التقول فشفاش .. يلا تشششاااووو

أبو أماني
22-09-2010, 06:12 PM
شغل الف والله


(1) نسفت ابو امانى من جذوره


(2) حلبى

لئيم

وبس
(3) بتشحدها

؟ ؟


! ! !


(4) من اصلك




ههههههههههههههههههههههه

(1) ينسف مين يا عم .. خليو ينسف السفة الفي خشمو دي بالأول .. ده مياس ..!goood

(2) هذه حقيقة لا يتناطح عليها عنزان .. تسلم !!

(3) معليش في دي مخي تخين! أرجو التوضيح .. حقيقي ما فهمتها وحسن النية متوفر!!

(4) بخصوص الأصل ده .. أنا بتفرج بس يبدو إنك تعرف فتحي أكثر ..!! goood

في كل الأحوال لك خالص معزتي .. يلا تشششاااوووgoood

زول الله
22-09-2010, 06:19 PM
ابوأماني مساك الله بالخير والنور

* اسمع انت جيت البيت دا كيف ومين الهداك ليهو وهل لديك عضوية في بيوت اخرى؟؟
- اغلب الناس بتاخد انطباعا عن الآخرين من النظرة الأولى أو اللقاء الأول ..
*السؤال: انطباعك عن ناس سودانيات قبل تشوفهم وبعد داك ؟

* رأيك في جملتين ..
1/ خالد الحاج
2/ طارق الحسن
3/ فتحي مسعد حنفي
4/ سمراء
5/ سارة
6/ جانيت
7/ فيصل سعد
8/ عكود
9/ الأمين العام النور
10/ معتصم الطاهر
11/ بابكر مخير
12/ عبدالعزيز عبدالله
13/ رأفت ميلاد
14/ نبراس الدمرداش
15/ بدرالدين اسحق


اجيك تاني ؟؟؟؟

سمح












اقول قولي هذا واستغفر الله لي ..................

فتحي مسعد حنفي
22-09-2010, 06:32 PM
ابوأماني مساك الله بالخير والنور

* اسمع انت جيت البيت دا كيف ومين الهداك ليهو وهل لديك عضوية في بيوت اخرى؟؟
- اغلب الناس بتاخد انطباعا عن الآخرين من النظرة الأولى أو اللقاء الأول ..
*السؤال: انطباعك عن ناس سودانيات قبل تشوفهم وبعد داك ؟

* رأيك في جملتين ..
1/ خالد الحاج
2/ طارق الحسن
3/ فتحي مسعد حنفي
4/ سمراء
5/ سارة
6/ جانيت
7/ فيصل سعد
8/ عكود
9/ الأمين العام النور
10/ معتصم الطاهر
11/ بابكر مخير
12/ عبدالعزيز عبدالله
13/ رأفت ميلاد
14/ نبراس الدمرداش
15/ بدرالدين اسحق


اجيك تاني ؟؟؟؟

سم

اقول قولي هذا واستغفر الله لي ..................





يازول الله شيل مديدتك دي واتخارج أحسن ليك..

أبو أماني
25-09-2010, 12:26 AM
لماذا لا تنشر كتاباتك الادبية ( اقصد الشعر) .. ولماذا لا تأخذ الشعر كقضية ؟

أشعر بالفخر وأنا أتلقى هذا التقريظ الغير مباشر من رجل بقامتك يا المعتصم ولكن حقيقي الأمل موجود والعين بصيرة واليد قصيرة ..غير إن الفكرة موجودة .. أما الشق الثاني من السؤال فالشعر بالنسبة لي ليست مجرد قضية فهو حياة وهاجس ووسيلة لنبش القضايا .. ولك عظيم مودتي...

أبو أماني
25-09-2010, 12:38 AM
ابو اماني يا سيد الناس

(1) سودانيات ليس كما سبق على حد قول الكثيرين هنا منهم من يرى انها في تقدم ومنهم من يرى انها فقدت رونقها للهزل وعدم الجدية

(2) اتينا سودانيات مجموعه من الشباب او ال 3Gكما يطلقها علينا الامين العام

ما هو برأيك في تلك المجموعه هل لها التاثير في التقدم ام فقدان الرونق


خالص حبي وتقديري

(1) سودانيات ليست كما سبق وهذه حقيقة ودوام الحال من المحال ولكنها تسير بخطى حثيثة نحو الأفضل بلا شك .. وقليل من الهزل وعدم الجدية (أحيانا) هو بعض من رونقها حسب إعتقادي .. فلتطيبي نفسا سودانيات بخير ..

(2) ليس الشباب وحدهم بل تمازج الحوار بين عدة أجيال في عفوية زاد الموقع رونقا وبهاء فمن بربك يتصور ممازحة ظريفة بين شابة أمورة مثلك وعجوز مكعكع متصابي زي الفي بالي؟ أسع في زول جاب سيرة فتحي مسعد ..؟ goood

لكي خالص حبي وتقديري .. يلا تشششاااوووو:D

أبو أماني
25-09-2010, 12:48 AM
ابو امانى الجميل
سعال واحد بس
ياخى انت بتميل لبعض العبارات
المصرية فى كتابتك
هل برضو فى كلامك موجودة
والتاثير دا جائى من وين
تشاااااااااااااااااااااو :D :D

لا تختلف معي كثيرا في إن المصريون أشقائنا أخف مننا دما وأظرف كمان .. كما أن لهجتهم محببة ومفهومة وشائعة أكثر من لهجتنا العامية أضف لذلك إن معظم علاقات النسب والمصاهرة تسود بين القطرين بصورة ملحوظة .. يعني عدد لا يستهان به من السودانيين جذورهم مصرية وأنا من هؤلاء .. عموما هذا لايمنع إنني في الواقع مكجنهم .. لعدة سلبيات في الكاريزما المصرية أز أ هول .. وبصراحة مرات بنكجنهم لتفوقهم علينا في بعض المجالات goood يلا تشششااااوووو gooodgoood

أبو أماني
25-09-2010, 01:08 AM
تعرف يابو أماني أنا لما كنت قاعد في بيتكم عاينت ليك ولي أم أماني وقلت في سري قادر ألله اللم الشامي علي المغربي لكن الحاجات دايما بتكون سالب وموجب..صورة وعفريتة...جبنة وزيتون حتي الخواجات عملو ويسكي..black&white يعني انت ما فلتة زمان بل مثال لما يجود به الزمان علي المانات الزيك..
عشان كدا يالحبيب أشعارك في توأم روحك حالة طبيعية مادام الالهام جاييك من الطرف الآخر يعني أم أماني هي الكتبت الكلام الجميل دا بي وحيها..
خودا حافظ يارفيق:D;)goood

فتحي مسعد (أعصابك) حاول تخفي غيرتك شوية ..وبطل تجديف .. يا أخي بدل تقعد تهاجم فيني عمال على بطال ..ما تحذو حذوي وتقلدني .. أسع دي مثلا أنا الفقير لله تعالى ده كتبت في زوجتي يجي تلطاشر قصيدة..منها الولعت فيك نار دي .. كدي يا سليل الشعراء الأماجد ويابن الشاعر الفذ العم مسعد رحمه الله وريني قلت شنو في أم أحمد وألآء والتي هي بلا شك أحق من أم أماني بالمدح .. لصبرها طول هذه السنين على ( بلوى مسيحة ) زييك ؟؟؟ يلا تشاووو

ملحووووزة ود مخير :-

فتحي ما تنسى قبال تشرع في الرد على..بلع حبوب الدغت وبالمرة قيس السكري ..goood

أبو أماني
25-09-2010, 02:52 AM
ابوأماني مساك الله بالخير والنور

* اسمع انت جيت البيت دا كيف ومين الهداك ليهو وهل لديك عضوية في بيوت اخرى؟؟
- اغلب الناس بتاخد انطباعا عن الآخرين من النظرة الأولى أو اللقاء الأول ..
*السؤال: انطباعك عن ناس سودانيات قبل تشوفهم وبعد داك ؟

* رأيك في جملتين ..
1/ خالد الحاج
2/ طارق الحسن
3/ فتحي مسعد حنفي
4/ سمراء
5/ سارة
6/ جانيت
7/ فيصل سعد
8/ عكود
9/ الأمين العام النور
10/ معتصم الطاهر
11/ بابكر مخير
12/ عبدالعزيز عبدالله
13/ رأفت ميلاد
14/ نبراس الدمرداش
15/ بدرالدين اسحق


اجيك تاني ؟؟؟؟

سمح












اقول قولي هذا واستغفر الله لي ..................





* اسمع انت جيت البيت دا كيف ومين الهداك ليهو وهل لديك عضوية في بيوت اخرى؟؟
جيت تينقيش تينقيش بكرعي .. وهداني ليهو الحبيب الغالي هاشم قبل حوالي سنة من إلتحاقي و نعم لدي عضوية عديدة في بيوت عدة ..
- اغلب الناس بتاخد انطباعا عن الآخرين من النظرة الأولى أو اللقاء الأول ..
*السؤال: انطباعك عن ناس سودانيات قبل تشوفهم وبعد داك ؟
* رأيك في جملتين ..[/0color]
[color=#8B0000]1/ خالد الحاج : لم نلتقي وإنطباعي عنه إنه رجل ودود يسعى جاهدا لعمل موازنة عادلة بين كونه مالكا للموقع .. وعضووا فيه .. له التحية والتقدير ..
2/ طارق الحسن : لم نلتقي بعد ولكني أحسبه رجل ظريف تتمنى معرفته لا يخلو من جمجرة !
3/ فتحي مسعد حنفي : إلتقيته (بكل أسف)!:D أو بالأحرى لسؤ حظه .. الخصه لك في كلمتين ( شماسي أورستوقراطي) goood
4/ سمراء البنت الحديقة فهي تحمل من كل حديقة زهرة .. حفظها الله
5/ سارة: بنت وأخت وأم وحبيبة وزوجة تتمناها.. وفي أحيان كثيرة..أخ ملء السمع والبصر
6/ جانيت : مزبج من الأصل والأدب والعلم وخفة الدم والروح وال (ثماحة) السؤال المحير الرجال.. وين؟؟ ما تقولوا لي مشوا كندا..goood
7/ فيصل سعد: ود العم البزيل الغم .. إنشاء الله من الغربة يا ود أمي تنجم .. قول آمين
8/ عكود ؛ نموذج رائع متكامل للسوداني ود البلد الأصيل .. ولو عمل باروكة فتحي مسعد تعب والجيكس كلو حيفتح ليو ويحول لعكود .. كدي جرب الباروكة يا عكود !:D
9/ الأمين العام النور: إلتقينا بالسودان زيارته الأخيرة .. وهو رجل حبوب صافي النية والسريرة .. لاحظت عليه لحظات شرود وسرحان .. من آثار (شاكوش قديم) على ما أظن.
10/ معتصم الطاهر: شخصية لاتمل الجلوس معها والحديث إليها .. ظريف وبشوش ..
11/ بابكر مخير : يكفي إن كل بنية بتقول ليو يا أبوي ..وكل زول بيقول ليو يا الحبيب أها تاني في شنو كمان فضل ؟؟
12/ عبدالعزيز عبدالله : بشوف في عزوز شبابي والغريبة يا زول الله كل ما أشوف عبعزيز بتذكر المرحوم إبني البكر رامي رحمه الله .. تسلم يا أبو عبد الله
13/ رأفت ميلاد : أول من رحب بي في سودانيات .. يحمل قلب وليد وعقل شيخ وقور .. وفتوة فارس وجاذبية تؤثر فعاليتها في الجنسين !!!goood
14/ نبراس الدمرداش: شبه البنيات و (عزة)السودان وعمة زي تيجان فوق رؤوس الأخوان .. وبنتي التي لم أنجبها ..!
15/ بدرالدين اسحق : لم نلتقي .. ولكني أحسبه (كوز) يحاول جاهدا للتخلص من الأذن الوحيدة الموجوده به .. له خالص المعزة والتقدير ..

اجيك تاني ؟؟؟؟ جاي تعمل شنو؟ عليك الله خليني ..خلاس طلعة روحي.. يلا تشششاااوووgoood

أبو أماني
26-09-2010, 11:43 PM
اقتباس:
المشاركة الأصلية كتبت بواسطة أبو أماني http://sudanyat.org/vb/images/styles/smartblue/buttons/viewpost.gif (http://sudanyat.org/vb/showthread.php?p=280196#post280196)
(1) ينسف مين يا عم .. خليو ينسف السفة الفي خشمو دي بالأول .. ده مياس ..!goood

(2) هذه حقيقة لا يتناطح عليها عنزان .. تسلم !!

(3) معليش في دي مخي تخين! أرجو التوضيح .. حقيقي ما فهمتها وحسن النية متوفر!!

(4) بخصوص الأصل ده .. أنا بتفرج بس يبدو إنك تعرف فتحي أكثر ..!! goood

في كل الأحوال لك خالص معزتي .. يلا تشششاااوووgoood



(أنتم هؤلاء) أعلاه مقصود بها هنا الزميل طارق محمد الحسن تحديدا ! وهو في المداخلة التي رد فيها على الأخ فتحي مسعد أورد ضمنها كلمة (بتشحدها) ثم أعقبها بثلاث علامات إستفهام؟ ثم ال .. ههههههههه..!!!

حيث إن الطرف النسائي الوحيد في المداخلة هو زوجتي المصون حفظها الله من كل سؤ فمن حق كل من يقرأ تلميح طارق هذا أن ينسب الفعل لها .. وعندما خدشت الكلمة الغريبة الغير مبررة أذني ثم كرامتي!!.. لم أشاء أن أتهمه أو أجرمه وعملت بحسن النية ومنحت طارق فرصة للتفسير والدفاع عن مقصده إن كان شريفا .. ولكن خذلني بتجاهله التام لما ألمحت إليه وهو يملك فرصة الإدعاء أو الجزم بأنه (لم يرى أو يشاهد ماكتبته)! وهو أمر مردود عليه إن حدث فهذا هو اليوم الثالث .. وأجزم أنا غيبا وعن يقين بأنه شاهدها وطنش ربما عامدا .. الله أعلم .. عموما هذه فرصة أخيره له لتبرير أو إثبات التهمة التي أوجهها إليه علنا وهي التهكم واللغو في عرض وشرف زوجة من يفترض فيه أن يكون أخا أو زميلا .. وإن واصل التطنيش .. فلكل مقام مقال .. أقول قولي هذا وأستغفر الله لي (وله) ولكم .. وإن لم تعودوا عدنا يا .. طارق ..!!!

فتحي مسعد حنفي
27-09-2010, 12:16 AM
اقتباس:
المشاركة الأصلية كتبت بواسطة أبو أماني [

(أنتم هؤلاء) أعلاه مقصود بها هنا الزميل طارق محمد الحسن تحديدا ! وهو في المداخلة التي رد فيها على الأخ فتحي مسعد أورد ضمنها كلمة (بتشحدها) ثم أعقبها بثلاث علامات إستفهام؟ ثم ال .. ههههههههه..!!!

حيث إن الطرف النسائي الوحيد في المداخلة هو زوجتي المصون حفظها الله من كل سؤ فمن حق كل من يقرأ تلميح طارق هذا أن ينسب الفعل لها .. وعندما خدشت الكلمة الغريبة الغير مبررة أذني ثم كرامتي!!.. لم أشاء أن أتهمه أو أجرمه وعملت بحسن النية ومنحت طارق فرصة للتفسير والدفاع عن مقصده إن كان شريفا .. ولكن خذلني بتجاهله التام لما ألمحت إليه وهو يملك فرصة الإدعاء أو الجزم بأنه (لم يرى أو يشاهد ماكتبته)! وهو أمر مردود عليه إن حدث فهذا هو اليوم الثالث .. وأجزم أنا غيبا وعن يقين بأنه شاهدها وطنش ربما عامدا .. الله أعلم .. عموما هذه فرصة أخيره له لتبرير أو إثبات التهمة التي أوجهها إليه علنا وهي التهكم واللغو في عرض وشرف زوجة من يفترض فيه أن يكون أخا أو زميلا .. وإن واصل التطنيش .. فلكل مقام مقال .. أقول قولي هذا وأستغفر الله لي (وله) ولكم .. وإن لم تعودوا عدنا يا .. طارق ..!!!

تعرف يابو أماني الزول لامن الزول يكون شين زيك وكمان حالك السواد وفوق دا يكون مخرف دي بتكون عوجة كبيرة ما ليها علاج..
عليك الله دا كلام شنو الكاتبو فوق دا والقعدت تلاتة يوم تتحاوم عشان تلقي الشجاعة تقولو وتبين عقدتك الأصلية..طوالي فسرتها بي عقلك الزنخ وعملت لينا فيها مؤنث ومذكر وقمت فهمت كل شيئ غلط مع انو القاصدو طارق واضح ولو في زول مفروض يزعل بكون أنا ياذكي الحلة..
الراجل دا بخاطبني وقال علي حلبي لئيم وبس ثم أردفها بي كلمة وتساؤل بتشحدا؟؟؟ وهنا المقصود اللآمة يالحبيب الهي جزو مني ما محتاج أفتش ليها ولا أشحدا..فهمت يابو مخ زي وشك:confused::confused:هسة عليك الله تفتكر الدار في عقلك دا ممكن يخطر علي بال طارق ولا حتي يفكر فيهو..
أنا الأستغفر الله لك يامرتد:p

أبو أماني
27-09-2010, 01:52 AM
اقتباس:
المشاركة الأصلية كتبت بواسطة فتحي مسعد حنفي http://sudanyat.org/vb/images/styles/smartblue/buttons/viewpost.gif (http://sudanyat.org/vb/showthread.php?p=281978#post281978)
تعرف يابو أماني الزول لامن الزول يكون شين زيك وكمان حالك السواد وفوق دا يكون مخرف دي بتكون عوجة كبيرة ما ليها علاج..
عليك الله دا كلام شنو الكاتبو فوق دا والقعدت تلاتة يوم تتحاوم عشان تلقي الشجاعة تقولو وتبين عقدتك الأصلية..طوالي فسرتها بي عقلك الزنخ وعملت لينا فيها مؤنث ومذكر وقمت فهمت كل شيئ غلط مع انو القاصدو طارق واضح ولو في زول مفروض يزعل بكون أنا ياذكي الحلة..
الراجل دا بخاطبني وقال علي حلبي لئيم وبس ثم أردفها بي كلمة وتساؤل بتشحدا؟؟؟ وهنا المقصود اللآمة يالحبيب الهي جزو مني ما محتاج أفتش ليها ولا أشحدا..فهمت يابو مخ زي وشك:confused::confused:هسة عليك الله تفتكر الدار في عقلك دا ممكن يخطر علي بال طارق ولا حتي يفكر فيهو..
أنا الأستغفر الله لك يامرتد:p



اللهم اجعلنا من الذين يسمعون القول فيتبعون أحسنه .. ومن القول مايرد فيه ضمير الغائب المؤنث كما جاء سلفا في كلمة بتشحدها..قد يصوغها بهذه الكيفية وهو يقصد لآمتك المشهود بها على كل لسان وأنا أثق في طارق شخصيا حسب حسن ظني ولكن من بأنفسهم مرض ولايتبعون القول الكريم أعلاه قد بل حتما سينسبون وبكل خبث الضمير للمؤنث الآخر وما أثار حفيظتي وهاجسي هذا الإحتمال في تفسير كل إمرئ على حسب هواه فسارعت بطلب وضع النقاط فوق الحروف (وبدون إتهام) وطلبت من الأخ طارق التوضيح .. ولا أظن إن ما فعلت يستحق أن تتهم أخيك الأصغر بالخرف والمخ الزنخ .. فتحي .. طارق .. لا أظن أن فيكما من يتقبل بحقه أو حرمه قولا يحتمل التأويل..عموما من حق الأخ طارق أن يتجاهل الرد إن لم يلق بالا للأمر أو صاحبه .. وشكرا لفتحي مسعد على محاولة رأب الصدع أو إزالة سؤ التفاهم والتصدي بالرد إنابة عن طارق وهو موجود .. سلام ..

طارق الحسن محمد
28-09-2010, 01:27 PM
اقتباس:
المشاركة الأصلية كتبت بواسطة أبو أماني http://sudanyat.org/vb/images/styles/smartblue/buttons/viewpost.gif (http://sudanyat.org/vb/showthread.php?p=280196#post280196)
(1) ينسف مين يا عم .. خليو ينسف السفة الفي خشمو دي بالأول .. ده مياس ..!goood

(2) هذه حقيقة لا يتناطح عليها عنزان .. تسلم !!

(3) معليش في دي مخي تخين! أرجو التوضيح .. حقيقي ما فهمتها وحسن النية متوفر!!

(4) بخصوص الأصل ده .. أنا بتفرج بس يبدو إنك تعرف فتحي أكثر ..!! goood

في كل الأحوال لك خالص معزتي .. يلا تشششاااوووgoood





(3) بتشحدها

قصدت يا جميل انه لئيم جينينا
ومافى حوجة انه يشحد او يستلف اللؤم

:D :D

واخوك ما ( جمجار ) ياود بمبة

:D :D

طارق الحسن محمد
28-09-2010, 01:32 PM
يا حبيب
والله انا كل الكلام الفوق دا انا ما قريتو
ومرة فتحى لمح لى فى بوست
انه ارجع ارد هنا
ودى اول مرة ادخل البوست دا
من يوم ما سالتك
فانا اسف اذا فسرت كلامى بغير
معناه
والله لم اطنشك ولا استطيع
فانت اخ عزيز جدا
اكرر اعتذارى

طارق الحسن محمد
28-09-2010, 01:41 PM
شغل الف والله


نسفت ابو امانى من جذوره


حلبى

لئيم

وبس
بتشحدها

؟ ؟


! ! !


من اصلك




ههههههههههههههههههههه


واضح انه

المخاطب هنا فتحى

:confused:

أبو أماني
28-09-2010, 02:12 PM
اقتباس:
المشاركة الأصلية كتبت بواسطة طارق الحسن محمد http://sudanyat.org/vb/images/styles/smartblue/buttons/viewpost.gif (http://sudanyat.org/vb/showthread.php?p=282747#post282747)
يا حبيب
والله انا كل الكلام الفوق دا انا ما قريتو
ومرة فتحى لمح لى فى بوست
انه ارجع ارد هنا
ودى اول مرة ادخل البوست دا
من يوم ما سالتك
فانا اسف اذا فسرت كلامى بغير
معناه
والله لم اطنشك ولا استطيع
فانت اخ عزيز جدا
اكرر اعتذارى



الحبيب طارق أبو الحسن .. لك تحيتي وخالص إعتذاري على مابدر بتلك الشاكلة ولكن كان لزاما على (الإستقصاء والمراجعة) منعا للتأويل.. وكنت منتظر نفس ردك المهذب المتجاهل لكل تحاملي عليك والذي يفيض تهذيبا كمصدره.. طب نفسا يا عزيزي .. مثلما طبت أنا نفسا وحبور لرائع ردك .. تحياتي بث قبال أمشي .. زعلان لأني إكتشفت إنو الليمبي قصدي فتحي مسعد بحبك أكتر مني يـــلا.. تشششاااووو:D

طارق الحسن محمد
28-09-2010, 02:27 PM
والله كلكم اعزاء وكرام
طيبون و الكلام والحديث معكم
كم هو ممتع وجميل
كن طيبا دائما وبالف خير
وتحت تحت
بحبك اكتر من فتحى انا
اها شن قولك
:cool: :cool:
:D

فتحي مسعد حنفي
28-09-2010, 02:39 PM
والله كلكم اعزاء وكرام
طيبون و الكلام والحديث معكم
كم هو ممتع وجميل
كن طيبا دائما وبالف خير
وتحت تحت
بحبك اكتر من فتحى انا
اها شن قولك
:cool: :cool:
:D

واللاي ياطارق جاتني كلمة في طرف لساني كنت داير أفكها في الكي بورد لكن خفت اترفد بي سبب شرعي..لكن كدي فكر فيها وأصرفا لي روحك ولي أبو أماني:mad::mad::(

طارق الحسن محمد
28-09-2010, 02:52 PM
اقتباس:
المشاركة الأصلية كتبت بواسطة فتحي مسعد حنفي http://sudanyat.org/vb/images/styles/smartblue/buttons/viewpost.gif (http://sudanyat.org/vb/showthread.php?p=282776#post282776)

واللاي ياطارق جاتني كلمة في طرف لساني كنت داير أفكها في الكي بورد لكن خفت اترفد بي سبب شرعي..لكن كدي فكر فيها وأصرفا لي روحك ولي أبو أماني:mad::mad::(




وصلتنى
وصرفتها
لابو امانى

:D :D

أبو أماني
28-09-2010, 03:01 PM
اقتباس:
المشاركة الأصلية كتبت بواسطة طارق الحسن محمد http://sudanyat.org/vb/images/styles/smartblue/buttons/viewpost.gif (http://sudanyat.org/vb/showthread.php?p=282780#post282780)
اقتباس:
المشاركة الأصلية كتبت بواسطة فتحي مسعد حنفي http://sudanyat.org/vb/images/styles/smartblue/buttons/viewpost.gif (http://sudanyat.org/vb/showthread.php?p=282776#post282776)

واللاي ياطارق جاتني كلمة في طرف لساني كنت داير أفكها في الكي بورد لكن خفت اترفد بي سبب شرعي..لكن كدي فكر فيها وأصرفا لي روحك ولي أبو أماني:mad::mad::(




وصلتنى
وصرفتها
لابو امانى

:D :D



وصلت الكلمة وماها كلمة واحده .. كلمتين !.. بث في ظمتك بتقدر على الكلام معقول تقدر على اللتنين ؟؟؟ .. عامل فيها ذكي .. عليك الله يا طارق شوف مغسة الحلب دي .. البركة في بابكر مخير المنعني أسحب منو الجنسية .. الللللول ...:D looool ;)

زول الله
28-09-2010, 06:30 PM
اقتباس:
المشاركة الأصلية كتبت بواسطة فتحي مسعد حنفي http://sudanyat.org/vb/images/styles/smartblue/buttons/viewpost.gif (http://sudanyat.org/vb/showthread.php?p=282776#post282776)

واللاي ياطارق جاتني كلمة في طرف لساني كنت داير أفكها في الكي بورد لكن خفت اترفد بي سبب شرعي..لكن كدي فكر فيها وأصرفا لي روحك ولي أبو أماني:mad::mad::(



ابوالفتوح ياخ ماسمعت بالحلفاوي المشى الحج شايل معاو قُـفة مليانة ورق صُغار ومطبق ؟؟
ياها زاتا مش؟؟ :D:D











اقول قولي هذا واستغفر الله لي ...................

فتحي مسعد حنفي
28-09-2010, 07:13 PM
اقتباس:



ابوالفتوح ياخ ماسمعت بالحلفاوي المشى الحج شايل معاو قُـفة مليانة ورق صُغار ومطبق ؟؟
ياها زاتا مش؟؟ :D:D











اقول قولي هذا واستغفر الله لي ...................


أبدا يافنان ورق الحلفاويين كان بسيط جنب القاصدو أنا..ديلك ناس نص ديانة وأنا زول نص أدب..goood:D

طارق الحسن محمد
28-09-2010, 07:21 PM
نص شنو ياخى
مافى عديل

:D :D

أبو أماني
02-10-2010, 10:17 AM
اقتباس:
المشاركة الأصلية كتبت بواسطة طارق الحسن محمد http://sudanyat.org/vb/images/styles/smartblue/buttons/viewpost.gif (http://sudanyat.org/vb/showthread.php?p=282891#post282891)
نص شنو ياخى
مافى عديل

:D :D



العزيز أبو الحسن .. يا خي والله مشتاقين .. صاحبك الليمبي ده خليك منو .. نص شنو يا أخي .. ومافي شنو؟؟ والله لو حتى كأس على الطائر ما عنده .. عموما .. طالب منك أن تجهز نفسك وشعورك من الآن لآن تحل ضيفا عزيزا على المائدة .. وحضر الإجابات وكل الزوغات .. من هسع ..لاني خلال الفترة دي بكسر حاجز الذكور في ضيافة المائدة وعاوز أستضيف ليكم شخصية .. تنقط عسل .. رحبوا معي بالعزيزة :-

همس الشوق

الواحد يشيل نفسه ويتنفس البتاعة ديك البقولوا عليها .. أأي الصعداء بعد الله حلاني من زول الله .. وعصابته .. رحبوا يا شباب بخطيبة أبو أماني وعروس المستقبل .. أسع فتحي مسعد يقول لي .. هو فضل فيها مستقبل .. يلا تشششاااووو :D