نادية .. شيطان بعيون ملائكية ..للكاتب / خالد الحاج

[imported_فيصل سعد]

اعضاء و زوار سودانيات الاعزاء
بعد السلام و التحايا للجميع.
يسعدني و يسرني القيام بنقل هذة
الرواية من المنبر القديم للفائدة العامة
و لانها تأخرت في الوصول للمنبر الجديد
و لانها تستحق مزيدا من النشر و الانتشار
و كل ذلك بعد اذن و موافقة الكاتب و نحن
في انتظار موافقتة لنبدأ نشرها في حلقات.

و لكم الشكر و التقدير.

نادية ...شيطان بعيون ملائكية
(هذه القصة محض خيال ولا علاقة لها بالواقع)
للكاتب / خالد الحاج

[imported_خالد الحاج]

المسافة
الله يديك العافية يا زول خد راحتك ماك محتاج إذن
بس راجع الأخطاء الإملائية :) إنت عارف الظروف الإكتبت فيها والإستعجال.
وأرجو أن تكون القصة بتستحق الإهتمام ده يا إبن عمي.

[imported_فيصل سعد]

نادية ... شيطان بعيون ملائكية
(هذه القصة محض خيال ولا علاقة لها بالواقع)

(1)

مطار الخرطوم العام 1984 أحمل متاعي البسيط وأقف في صف مراجعة الجوازات ،ألمس جيبي مرة وأخري للتأكد أن "القريشات" حسب تعبير الوالدة موجودة ، أتهيأ لعام دراسي ثالث من سنوات دراستي الجامعية ... أسمع صوت إمرأة تنادي :
يا أولادي مافي زول ماشي الإسكندرية ؟؟ نظرت نحوها امرأة في الخمسينات من عمرها عاملتها السنوات بحنو بهية الطلعة ، أرد : أيوه يا والدة أنا ماشي إسكندرية في حاجة ممكن أخدمك فيها ؟ تتقدم نحوي مبتسمة ابتسامة تظهر جمال عينيها وتلتفت للخلف منادية بصوت فيه بحة تحمل كل حنين السواقي : يا نادية ......
ويظهر القمر!! يا إلهي كم هي جميلة عينان لا تملك إلا أن تبحلق فيهما يحملان كل شرور العالم وخيره الوجه هدندوي الملامح ميال للصفرة تمشي هوينا فتسمع في وقع خطواتها ألحان الأمهرة والتجراي مكتنزة الساقين كأرجل تربيزة البليارد ، الوسط صغير بصورة ملفتة ويكفي وحده ليشفع لها يوم القيامة تأخذني قدماي غصبا عني خارج صف الجوازات !! أبادر بمد يدي بالسلام : السلام عليكم يا والدة
ترد : أهلا يا ولدي وتواصل الحكى : بتي دى طالبة جديدة أول سنة ليها ممكن يا ولدي توصلها معاك وتخلي بالك منها؟ أرد : جدآ يا والدة مافى عوجة يحصل خير إن شاء الله .
تسلم هي هذه المرة اليدان لا تحملان آثار شقاء تعمدت أن أمسك بيدها مدة أطول تسحب يدها في لطف اسمي نادية !! صوت يحمل بصمات مختلفة لا أجد له تشبيه سوي أنه "شرير" يخاطب فيك كل حواسك الخمس دفعة واحدة !! أردد مأخوذ اسمي جمال.
يتعالي النداء من المايكرفون الداخلي في صالة المطار : المسافرين علي الخطوط المصرية التوجه لصالة المغادرة ...... وداع حار بين نادية وأمها وأحضان ... تتوجه نحوي : يا ولدي بتي في ذمتك !!!!
مافي عوجة يا والدة يحصل خير اطمئني عليها.

داخل الطائرة جلست إلي جوارها لم أنتبه لرقم المقعد المخصص لي ، صوت جهوري : يا ابني المقعد ده بتاعي ؟ يخاطبني وينظر إليها !! يعتمر عمة "خوجلية " الملامح "ترباسية" الطول !! طلبت منه أن نبدل المقاعد ونظرت إليها .. نحنا مع بعض ؟ قبل علي مضض ولا يزال ينظر إليها تلك النظرة العجيبة تذكرني بنظرة تاجر المواشي لخرافه .
بقية الرحلة لم أضايقها سوي بنظراتي واحترمت إحساسها بحزن الفراق وبقية دموع تملأ عينيها الجميلتين .
نواصل

[imported_فيصل سعد]

108 شارع طيبة

ليس بعيدا عن البحر ولا عن خط الترام تقبع الشقة رقم 108 شارع طيبة في محطة الإبراهيمية شقة برحة بها أربعة غرف وصالة يشاركني فيها ثلاثة من الزملاء من نفس الكلية..
محمد يحي :
جعلي من المحمية ، ود بلد غير مبالي عبقري في مستواه الأكاديمي حمقي الطباع كريم النفس.

عبد الوهاب :
محسى ، يحب الرطانة وأغاني وردي في لسانه لكنة محببة متلاف حبوب شهم له صوت جميل يغني أحيانا ويرفض إن طلبت منه الترنم بأغنية ما.


أسامة :
شايقي ، "لايوق" فضولي .. ساخر صريع غواني وأخو أخوان..

نقتسم كل شيء التحويلات النقدية لفافات التبغ الكتب وبائعات الهوى. نحرص أن لا تزورنا زميلة سودانية في الشقة فحالها لا يسر، عادة ما تتواجد "رشا" أو أحدي رفيقاتها من بائعات الهوى. نكتفي بلقاء الزميلات في الكلية
أو في دار الإتحاد .

رشا مصرية ذات لسان زفر كانت مدخل بعضنا إلي عالم الرجولة سريعة النكتة يستدين منها بعض الزملاء ولا ترفض وتحفظ حسابها بالكتابة علي الحائط ، تشم رائحة التحويله النقدية ..

جال كل ذلك بخاطري وأنا أجلس وبجواري نادية في القطار الذي يقلنا من محطة مصر (رمسيس) إلي إسكندرية .. كيف سأدخل عليهم ونادية برفقتي ؟؟ هل سيكونون بمفردهم أم أجدهم متأبطين شرا؟؟
كسرت نادية حبل خواطري بسؤال أنت من وين؟؟ أنا من الصحافة الخرطوم !! كان علي أن أسأل من أين هي فرغم ساعتي السفر إلا أني كتمت فضولي وقد أخذ ذلك مني جهد ليس باليسير!! من كسلا !!
يا ربي.. إذن هذا هو السبب أجزم أن جدتها لأمها أو أبيها كانت أحدي من تغني لهن توفيق صالح جبريل
كسلا... هي بالحق جنة الإشراق.. كيف لا وتنجب مثل هاتين العينين.. كدت أقول لها ذلك ولكني خفت سوء الفهم فلزمت الصمت.. حدثتها عن بعض الزميلات في الكلية وعن إمكانية أن تسكن معهن فلم تمانع..وأفهمتها أن عليها أن تنزل يوم أو يومان معنا في الشقة حتى ندبر الأمر فما رأت في ذلك بأس.

نواصل

[imported_فيصل سعد]

(3)

إسكندرية :

توقف القطار في محطة الإسكندرية . تفاجأنى رائحة البحر ورطوبة الجو ، يا له من إحساس إنها تلك المدينة الفريدة لا يملك من زارها مرة إلا عشقا لها فكيف بمن خبر خباياها وحفظته محطات ترامها وحواريها ..يمر الترام بوسط المدينة ، البحر بشكله المهيب ومن علي البعد تظهر قلعة فايتيباي بعبقها التأريخى تصارع الموج والزمن مراكب الصيادين انحناءة شاطئ البحر..تستطيع أن تري إسكندرية من آخرها إلي آخرها وأنت تسير علي شاطئ البحر المتوسط..مأخوذ أنا بجمال كل شيئ وللرحلة مذاق المستحيل... كيف لا وأحمل إحساس بالرضي وكل الجمال الذي في الكون ..بحر، سماء صافية، مدينة تحتضنك بقدر عشقك لها!!! وفوق كل ذلك نادية !! أنظر إليها وينظر إلينا المارة وصدقوني بعض النظرات لا تخلو من حسد أما أنا فأحسني كموسي النبي أرميهم بنظرات الرضي فتتحول إلي ثعبان يبتلع حيّاتهم وينتصر الرضي علي سحر العيون والحسد..

يمر الترام بمحطات ألفتها وألفتني الأزريطة ، جامعة الإسكندرية ، المعسكر ومن ثم الأبراهيمية هنا خاتمة لمشوار وبداية لآخر.. أترك لها متاعي الخفيف وأحمل عنها شنطة ضخمة وأحمل مع الشنطة هم أثقل هل تنتظرني مفاجأة غير سارة في الشقة؟؟؟ أري من علي البعد محمد يحي يحمل (كيس) دون شك به" أم علي" و"أرز باللبن" فمحمد يحي يقضي من الوقت في كنتين اللبان بالأبراهيمية أكثر من قاعات الدرس في الكلية!! كم أنت رحيم يا إلهي !!! تبتسم الدنيا لي !! أشير إليه فيأتي مسرعا يسلم بفرح ثم يسلم عليها وأستمتع أنا بنظرة الدهشة في عينيه..ينظر إلي مرة ثم ينظر إليها..أبادر أنا بتعريفهم علي بعض نادية / محمد يحي ...نسير ثلاثتنا أسأله هامسا الدار أمان ؟ يهز رأسه علامة الإيجاب... الحمد لله...
نقف أمام سلم العمارة يضغط محمد علي الجرس لتنبيه "الشلة" ثم نصد السلم نسمع صوت عبد الوهاب يترنم (يا رشا يا كحيل غثنى هواك سباني) أضحك وينظر محمد يحي إلي ...هذه قصة أخري... سيأتي أوانها...
ندخل الشقة وسلام حار ونظرات عبد الوهاب تتفحص نادية وتنظر هي إليهم بحياء جميل!! يندفع أسامة من المطبخ لسماع صوتي صارخا جمال في البلد؟ هذا ما أخشاه هذا الشايقى ولسانه اللاذع الفالت ، بقدر اندفاعه كان وقوفه كالتمثال لرؤيته نادية.. لو مرت هذه اللحظة بأمان فلا خوف بعدها !! كيفك يا أسامة شوق والله.. يتقدم أسامة نحو وسط الصالة وعيناه تدوران في محجريهما كالملدوغ حمدا لله علي السلامة يخرج صوته مشروخ وكأنه يحمل الكلمات علي كتفيه!!! يمد يده بالسلام أحتضنه أنا وأهمس في أذنه "سيب البوامة وسلم" ينظر إلي وأشفق أنا عليه يكاد يبكي من الحيرة يسلم عليها حمدا لله علي السلامة ألحقه أنا بالاسم نادية فيهز رأسه
بصورة تدعو للضحك ..أهلا بك أنا أسامة..

نواصل
...

[imported_فيصل سعد]

(4)

في بيتنا امرأة


لو لا الملامة لحلفت صادق أني في مكان آخر غير الشقة التي قضيت فيها عامين من عمري..إنها اللمسة الأنثوية...هن رحمة لنا..صدق القائل!!
لم تفعل أكثر من الجلوس في غرفتي وحيدة لفترة ساعات ثم خرجت تلطفت مع الكل وكانت تخصني بنظرات خاصة أحسها تدخل إليّ عنوة تهزني بعنف !! مالي أنا وهذا؟؟ تلك العيون يا إلهي هن سلاح للإبادة الشاملة !! تعرف هي سطوتهم وتسبلهم بدراية أنثوية لا تخلو من مكر!! تلبس جلباب طويل وتغطي رأسها باشارب جعل جزء من شعرها يظهر لأول مرة طويل.... طول ليلنا!! والصدر ؟؟ يا ربي... هو كقول الشاعر لا زيادة ولا نقصان (كل شئ موقع فيك حتى لفتة الجيد واهتزاز النهود) مالي أنا وهذا؟؟
تجلس علي طرف الكنبة !! تخرج الكلمات من أسامة بعد صمت خلته دهرا" فالصمت في حرم الجمال جمال"
يا زوله اتصلحى أقعدي سمح خدي راحتك... ترد عليه مرتاحة أنا يا جماعة ما أخرب عليكم طريقة حياتكم خليكم عاديين!!
تنهض فجأة وتدخل المطبخ تتبعها ثمانية أعيون كظلها.. يا جماعة أنا والله جعانة عندكم حاجة تتاكل ولا نفسكم في طبخة أعملها ليكم.. يا إلهي في وجودها الفذ لم ينتبه أحد لطعام ويقولون أن أقرب الطرق لقلب الرجل معدته؟؟ يا لهم من أغبياء!!
ينهض عبد الوهاب ويدخل المطبخ يعدون وجبة ...أسمعه يدندن .. نجحت إذن في إذابة الجليد... يخرجون وألمح لأول مرة ابتسامتها ..."مافي أجمل من كده"...تسري عدوة الابتسامة في الكل.. كل ما فيها يخالف الواقع يبتسم الناس فتصغر عيونهم العينان عندها تحتلان الوجه كله وهي تبتسم
الكل صار أجمل في وجودها الجميل... نخرج جميعنا بمبادرة من محمد يحي مشوار إلي الشاطئ يحاول الجعلي أن يكسر الحذر في التعامل وما مثل البحر من أنيس...
شاطئي الإبراهيمية بائعو التين الشوكى وأم الخلول (*) وعقود الياسمين ينتشرون علي الشاطئ الجميل .. هواء منعش ورزاز متطاير من الأمواج وهي تحتضن الشاطئ...وهناك في الأفق يلتقي البحر بالسماء فتتحد الزرقة في لقاء لا فكاك فيه يأسر الناظر...
أسامة يهمس يا جمال ... التفت إليه ينظر ليتأكد أنها لا تنتبه لما يقول !! مأخوذة هي بالبحر ها هو الأبيض الساحر يحظي بضحية جديدة...وهي أجمل دون شك من كل عرائسه وكل ما حكته الأساطير من عهد فرعون مرورا بالرومان وحتى عهد الاسكندر الأكبر.. أخال وتيرة أمواجه تشتد أسمع أنينه فكلنا في الهم شرق
أردد في سري لست وحدك يا بحر لست وحدك..... مالي أنا وهذا؟؟؟
يقول أسامة : أسمع اها أبقي نجيض لا تفرط الزولة يعلم الله مكسرة فيك !! ابتسم لقوله ها الشايقي الغبيان هو أنا عرفتها متين ؟ يبدو عليه الغضب يرد بجدية : ياها دي بوامتك والله انت ما تستاهل إلا جنس ناس رشا.. بدت لي المقارنة مؤلمة !!! لم أجد ما أقوله تتباطأ خطوات البقية فنلحق بهم يتقدم نحوي صبي يحمل عقود من الياسمين : خد يا بيه اشتري للعروسة الحلوة عقد ياسمين ؟؟ لما واجهني أنا دون غيري؟؟؟
نفحته بعض المال وأخذت العقد مددته إليها أخذته بابتسامة قرّبته من أنفها الجميل لتشمه بعمق وأتابع أنا حركات العيون ...يا إلهي مالي أنا وهذا ...

(*) أم الخلول – قواقع بحرية تأكل نية
يسميها أهلنا في بورتسودان (الذرمباق) .

نواصل

[imported_ندي عبدالمنعم]

نادية ...شيطان بعيون ملائكية
(هذه القصة محض خيال ولا علاقة لها بالواقع)
للكاتب / خالد الحاج

Ya .. right !!!! ;)

[imported_بنت النيل]

المسافة

تسلم يارائع على إعادة هذا الإبداع مرة أخرى
ناشدنا الريس كثيراً كى لايحرمنا من إبداعه

لكن يبدو أن قرووووووووووووضى خوفو عديل كدا ......
وحسع ما صدقنا إنو رجع يكتب كتابات حلوة مرة ثانية وقلنا الخمسة أمتار بتاعة نهول الحلوة حا تجر وراها كمية من الخطوات الإبداعية
بس ربنا يستر من أقلام النقاد
وما تتفتح عليهو النار مرة تانية



مشاكسة

شوفت الأحمر دا كيف :p



لكم الود
بنت النيل

[imported_فيصل سعد]

(5)

الرحول :


ثلاثة أيام مرت منذ وصولنا وصارت نادية جزء من الشلة نخرج سويا...
جولات تعرفيه...وسط البلد، المسرح، السينما ، المتاحف،جامعة إسكندرية وحتى سوق زنقة الستات
نسير علي الشاطئ بالساعات من القلعة وحتى المنتزه ..كانت تعامل كل منا وكأنه محور الكون
الكل تعلق بها بصورة أو باخري فعلنا كل شئ إلا أهم شئ وهو تسكينها مع بعض الزميلات
استمرأنا وجودها بيننا واستعذبنا ذلك..كنت أجدني مع مرور الساعات أكثر قربا منها وكانت لا تزال
تخصني ببعض ما يميزني عن الآخرين وكان ذلك كافيا لي يرضيني بصورة ما فهي في النهاية
(الأمانة) التي أحملها علي أكتافي وبالنسبة للشلة هي ذاك الحلم الجميل المستحيل الذي أشركتهم
فيه وتقبلوه بابتهاج لم يحاولوا إخفاءه...كان لا بد من حدوث تغيير ثوري في أسلوب حياتنا
البوهيمى حتى يستوعب الواقع الجديد ، الواقع الجميل وقد كان...
انقطعت زيارات رشا وصويحباتها أو قطعت بمبادرة صامتة من عبد الوهاب وكانت إشارة منه
جميلة وتضحية غالية كنت أعلم شخصيا مقدارها!!!
صار التعامل عادي نوعا تعرفت نادية سريعا علي ميولنا ، لم تكن مباشرة في تعاملها مع الجميع
تجد دوما مداخل لطيفة مع الكل واكتشفت جمال صوت عبد الوهاب واكتشفنا رقة وعذوبة صوتها
كانت تدندن أحيانا فيحمل عنها عبد الوهاب كتف الغناء فنسمع شدوا ولا الأحلام..
مرت الساعات كالثواني وكان لا بد مما ليس منه بد ...الرحول... دبرنا لها سكن مع بعض الزميلات
دون مشقة فهي تملك مفاتيح الدخول إلي القلوب وكانت الصديقات حفيات بها..
لم تنقطع زياراتها لنا تعلمت الوست والهارت والكنكان..وكانت هناك بعض الإشارات التي تدفعني
إلي مرحلة لا فكاك قابلتها أنا بحذر علي الرغم من "نقة" أسامة التي لا تتوقف..
تدخل غرفتي دون الآخرين وفي غيابي تنام فيها بعض من نهار..تنظم حاجياتي وتنظف غرفتي
تقف خلفي أحيانا ونحن نلعب الكنكان وتضع يدها بلطف علي كتفي أو تحرك شعري بأصابعها!!
صار كل ذلك عاديا وكان الكل راضي بهذه القسمة..
بدأ العام الدراسي وانشغلنا جميعا بالجدول اليومي للمحاضرات ..بدأت زياراتها تقل نوعا وكان ذلك
طبيعي ومفهوم..تأتي أحيانا إن استشكل عليها أمر ما ..والكل يساعد..يشرح محمد يحي بعض الدروس
مشاوير رسمية يبادر أسامة أو عبد الوهاب بالمساعدة فيها..كانت حصتي بعض المهام ذات الطابع الخاص
مشاوير التسوق وزيارات تعريفية لعالم الطلاب.دار الاتحاد الطلابي...السينما أحيانا
حدود معلومة وواضحة لم يحاول أحدنا عبورها...هي بحيائها ونوع من الكبرياء ...أنا بترددي الغير مفهوم للكل..وحيرتي..وذاك الإحساس الغبي بأنها (بتي أمانة في ذمتك يا ولدي) !!!!!!!!


نواصل
....

[imported_عمر صديق]

عزيزى المسافة
لم كل هذا التاخير
فانا فى تلهف لاكمال بقية الرواية
ولك شكرى وتقديرى

[imported_عمر صديق]

عزيزى المسافة
لم كل هذا التاخير
فانا فى تلهف لاكمال بقية الرواية
ولك شكرى وتقديرى

[imported_فيصل سعد]

عزيزى المسافة
لم كل هذا التاخير
فانا فى تلهف لاكمال بقية الرواية
ولك شكرى وتقديرى

مرحب يا عمر ... شيل الصبر شوية,,,


(6)

البحث عن إجابات

تمر الأيام وتيرة تعلو وتهبط والشوق القديم هو هو...الحيرة هي هي.. صار منظرنا مألوف
اعتدت وجودها جزء أساسي من حياتي..ألفت عطرها الذي ترتديه..عيناها اللتين صارتا
لي سجن ومعبد!! تغيب فترة فيختل نظام الكون...أجدني ألهث للاطمئنان علي أحوالها..
ولست وحدي الشلة نفسها يختل مزاجها بغياب نادية...صارت مشاوير محمد يحي للبان أكثر
من قبل وعرف عبد الوهاب طريق البحر وقلت دندنته بالغناء...أسامة كان أنيسي ومستودع أحزاني
لا أحتاج أن أحكي يكفي ما تجود به عيناي...طال الغياب فترة طويلة هذه المرة التقيها أحيانا في مباني
الكلية أعزمها علي مشروب "إسبرايت" تسلم وتحكي قليلا....وتهرب من النظر في عيوني...
أسامة يحاول أحيانا أن ينفس غضبه فيرمي اللائمة علي..:
شغلك ني.. تترتر .. تترتر والترتير ما بينفع
الزولة بتحبك لكن إنت ماك نصيح....
ألزم الصمت..ليس هناك ما يقال ولن يسمعني هو...وكنت بيني ونفسي
أبحث عن إجابات فكيف لي بإقناع الآخرين...
جاء عبد الوهاب مرة وهو مهموم فارقته الابتسامة المعهودة رأيته يتحاشاني...ثم وسوسة مع محمد يحي
ينضم لهم أسامة.. هناك أمر ما يدور؟؟؟ يقتلني الفضول...
في شنو يا جماعة؟
عبد الوهاب يرمي حمله كله مرة واحدة وبصورة غاضبة :
بتعرف طارق؟
طارق منو؟
الود الحنكوش داك بتاع صيدلة!!
أي بعرفو مالو؟
شايفو ملصق في نادية محل ما أمش ألقاهم سوا وعرفت تحت تحت انو الجماعة ديل زي البيحبو بعض كده!!!
أتركهم بلا رد وأتجه نحو غرفتي أقفل الباب خلفي وأتكئ علي سريري..مازال عطرها هنا ..جلباب للنوم..وفرشة لتسريح الشعر...لا مهرب...

محمد يحي يدخل الغرفة وهو يقدم رجل ويؤخر الأخري..وأخيرا يبادر بالحديث :

أنت يا زول قصتك شنو؟
يا محمد يا أخي مافي قصة يعني دايرني أعمل شنو؟
لكن يا جمال إنت بتحبها .
..................................................
.................................................. .............
.................................................. ...........................................
أيوه يا محمد بحبها "خرجت مني بصعوبة كالسريحة من ظفر القدم" لكن عندي شنو أقدمو ليها
أنا لسه طالب يا أخي لسة أبوي بيصرف علي..
يا أخي في زول قال ليك اتزوجها؟؟؟ بس كلمها عن إحساسك.....
.................................................. .........
.................................................. .................
.................................................. ............................
لا إجابة مرضية له يخرج من الغرفة ويجر الباب خلفه ... ثم يخرجون جميعا...
صمت في الشقة يكاد يفتلني...أسرع بالخروج تقودني قدماي إلي البحر...الشمس إلي مغيب
وشفق أحمر يغطي الأفق...أسير بلا هدي علي طول الشاطئ..بعض المارة يمسكون أيادي بعض
وبعضهم يجلسون علي حائط "البلاج" يهمسون بكلمات الحب.. شارع خالد بن الوليد...ميامى...
طارق؟؟؟
هذا الفتي المدلل من أسرة ثرية الوحيد الذي يقطن شقة وحده..سعر قميصه يكفي لإطعامنا شهرا بحاله؟؟؟
طارق؟؟؟
لما لم أري ذلك قادما ؟؟؟ هل أنا ساذج لهذه الدرجة؟؟ "بوم" علي حسب تعبير أسامة؟؟؟؟

نواصل....

[imported_Garcia]

المسافة تحية عطرة ولك جزيل الشكر لنقل القصة هنا .. ولم اتمكن من
قرأتها فى المنتدى القديم ... والله ياخال شكلنا حانديك اجازة لمدة شهر
حتى تتفرغ لكتابة قصص اخرى بروعة هذا العمل الرصين ...
القصة وان كانت من محض الخيال الا انها لمست الكثيرين ورجعتهم ايام
الدراسة ... وان اختلفت المسميات هنا وهناك ...
لاتنقطع عن الكتابة واكيد ياما فى الجراب يا حاوى :D
ومتابع باقى السرد المشوق ... وشحتفتا روحنا يا مسافة :)

كل المنى

[imported_فيصل سعد]

مرحبا Garcia
و خليك متابع.......

(7)

والقمرا في ليل الغريب :

كنا جميعا نحبها بصورة أو بأخري..نفتقد طلتها.. ولم نعتاد علي غيابها المفاجئ كان فوق
توقعاتنا وأكبر من احتمالنا..ورغم الألم الكامن فينا ليل نهار بدأت حياتنا ترجع لي وتيرتها
السابقة بصورة (طويل الجرح يغري بالتناسي) ...كانوا يتعمدون عدم ذكر اسمها ويتحاشون
فتح الموضوع معي..صرت من ناحية أخري مدمن جولات الشاطئ وأكثر عزلة..ما بين الكلية
وغرفتي والبحر..اكتشفت أن لليل رهافته ومذاقه الخاص..وللحزن طعمه المرير..وللقلب نزفه
وجرحه الغائر...الأيام...الأيام وحدها الطبيب المداوي...
صرت التقيهم أحيانا..كانت تتحاشى النظر إلي رغم تأكدي التام من رؤيتها لي ولم أبادر
من ناحيتي بكسر الطوق الذي اختارت هي بكامل إرادتها أن تجعله سياج بيني وبينها..

شهر ثم آخر....لا جديد.... حتى اللقاءات التي كانت تتم مصادفة صارت نادرة الحدوث
وفي يوم ألتقي صباح...زميلتها في السكن ومعرفة قديمة لي بحكم الزمالة..
: سلام جمال
سلام صباح أحوالك
: الحمد لله كويسين ، لكن بتكم حالتها ما كويسة..
بتنا ؟ كنت أعرف إنها تقصد نادية !! ولكن جعلني القلق أردد الكلمة كمن لم يستوعب!!
: نادية !!
مالها الحاصل عليها شنو؟؟
: حقيقي ما عارفاها مالها لكن بتقضي وكت طويل في غرفتها وبتبكي ورافضة تتكلم..
ممكن تبلغيها سلامي يا صباح وقولي ليها جمال بيسأل عن أحوالك..
: جدآ يا جمال لكن مش أحسن كان تمش إنت تشوف الحاصل عليها شنو؟
لا يا صباح أنا ما داير أفرض نفسي عليها بس وريها أني قلقان عليها.
: طيب!!
شكرآ صباح سلام...

عدت للمنزل وما كنت أحتاج أن أحكي كل المجموعة لاحظت امتقاع سحنتي وعبوس وجهي
وكأنهم كورس للمديح الحاصل شنو؟؟؟
ما عرف والله يا جماعة .. وحكيت لقائي مع صباح...أسامة يصر علي الذهاب إليها مرددا :
البت أمانة في رقبتك يا زول أمش شوف الحاصل عليها شنو!!
محمد يحي يوافقني علي رأي ويفضل عدم الذهاب إليها ..
عبد الوهاب يهز رأسه ..هي عارفه بتلقانا وين لو احتاجت لينا...
صار الأمر هم وحيرة جماعية..

يمر يومان...يومان طويلان بلياليهم...ولا جديد يكاد نبضي يتوقف...يا إلهي لطفك..
وفجأة يدق جرس الباب...لم نكن نتوقع أن يكون الطارق نادية فهي تملك مفتاح للشقة
يفتح أسامة الباب تدخل نادية.....
يا ربي؟؟؟؟ العينان؟؟؟ الوجه؟؟؟ كل شيء..زهرة ذابلة ... يندفع الكل نحوها
مالك نادية أنت بخير... لا رد... ولكن العيون تمتلئي بدموع تكاد تسيل علي خديها
وتغالبهم....

نواصل.....
..

[imported_mohamed hemaid]

العزيز المسافة
تشكر علي نقل رائعة ود الحاج التي لا علاقة لها بالواقع
استمتع بقراءتها مرات ومرات فلا تقلل الجرعات منها

عرجة..
شفقتنا اكتر من خالد الحاج عندما انزلها :D
وفي انتظار التواصل..

حميد..

[imported_Aboremaz]

اقتباس من محمد حميد
العزيز المسافة
تشكر علي نقل رائعة ود الحاج التي لا علاقة لها بالواقع
استمتع بقراءتها مرات ومرات فلا تقلل الجرعات منهاوالله زي ما قال قارسيا بترجع الواحد لايام الدراسة. واصل .

[imported_فيصل سعد]

الاعزاء Aboremaz و mohamed hemaid
شكرا للمرور و التعليق و طولوا نفسكم شوية.

(8)

الحلم والغضب :

تراجعنا جميعا حين رأينا الدموع..أسرعت هي نحو غرفتي لتغلق الباب خلفها...
نظرة من محمد يحي لكل من أسامة وعبد الوهاب أراهم يتسللون للخارج تاركين
مساحة لي للتصرف وليتهم ما فعلوا فقد كنت في حيرة من أمري قلبي يحدثني أن الأمر
فوق طاقة احتمالي....
تركتها ساعة زمن ظللت خلالها أقطع الصالة جيئة وذهاب...ثم فاض الأمر بي
ذهبت وطرقت برفق علي الباب.. سمعت بعد مده كلمة اتفضل...
دخلت الغرفة تتكئ هي نصف اتكاءه علي السرير.. أحست بخروج الشباب..
تقتلني الحيرة..لو تعلم فقط أنها لو سألت حياتي ما تأخرت...
جلست بجوارها في صمت..بدأ صوتها في النشيج..يعلو بصورة كانت تمزق قلبي
ثم فجأة تعلقت بعنقي وبكت بحرقة...اكتفيت بالصمت ليس هذا وقت الحديث..
تركتها حتى انتهت نوبة البكاء وطلبت منها أن تغسل وجهها بماء بارد ..ثم خرجنا
أخذتها إلي الشاطئ..سرنا لفترة طويلة...لم أبادر بالسؤال عما يحدث ..تركت الأمر لها..
بدأ الجو يميل للبرود..خلعت الجاكت ووضعته عليها..نظرة عرفان وللحظة عاد ذاك البريق
الساحر للعينين الجميلتين الذابلتين....عدنا بعدها للشقة..تدخل الغرفة مباشرة وتغلق الباب مرة أخري
تركتني وحيدا في الصالة وحالي يدعو للرثاء....
صوت الجرس...أفتح الباب ...الشباب يعودون من الخارج تخبرهم نظراتي أن لا جديد...
كانت ليلة طويلة مملة كنت أتقلب وأحس أسامة بجانبي يعاني الأرق هو الآخر...
لم تخرج من الغرفة حتى صباح اليوم التالي...
ذهب الشباب إلي كلياتهم..تركوني لحيرتي وكنت واثق أنهم سيكونون موجودون بأجسادهم فقط
هذا لو ذهبوا للكلية أصلا

خرجت من الغرفة ثم الحمام...جلست في الكرسي المقابل..
صباح الخير
: صياح الخير يا نادية كيف أصبحت؟
تهز رأسها بصورة لا تعطي أي انطباع مفهوم...
: مالك يا نادية أحكي لي هل حدث مكروه لأهلك؟
لا...
صمت آخر لمدة .........
: نادية؟
تلتفت نحوي...أكاد يغمي علي من الألم......أخيرا نطقت...:
أنا حاصلة لي مشكلة كبيرة وما عارفة أعمل شنو....
: خير يا نادية عارفه إنك ممكن تعتمدي علي مش كده؟
أيوة عارفة بس ما عارفها أقول شنو
: أحكي وما تحاولي تتخيري الكلمات قولي بس الحاصل شنو...
أنت عارف طارق؟ قصدي عارف علاقتي بطارق؟
: أيوة يا نادية عارف خير الحصل شنو...
تجري دموعها دفعة واحدة...أجدني أتحرك وأجلس بجوارها أمسك بيدها
تواصل الحديث يا جمال أنا حامل؟؟؟؟؟؟؟
صمت يحمل ضجيج الكون كله في دواخله وإحساس بالموات يسري ليعم كل جسدي
يا إلهي...............
.................................................. ....
.................................................. ................

وجدتني أحضنها برفق....بدون حكي وواصلت هي في نحيب مؤلم.......
ثم اندفعت لتدخل الغرفة مرة أخري....جلست وإحساس يتملكني بالهروب...
تحركت نحو الغرفة ناديت هامسا : نادية لا تخرجي سأعود ويحصل خير إن شاء الله...
خرجت...تقودني قدماي نحو الشاطئ....حين وصلت وجدتني أجري...جريت مسافة
حتي خلت أنفاسي ستنقطع...لم أنتبه إلي أني أرتدي "سفنجة" إلا حين انقطعت لأصير
بفردة واحدة...ما زلت أجري.....منظري يلفت المارة....لا يكفي هذا...أقف أمام حائط
البلاج أصرخ بأعلى صوتي...أأأأأأأأأأه......ثم أجلس لأبكي أنا هذه المرة كما لم أبكي من قبل....

نواصل

[imported_فيصل سعد]

(9)


لقاء عاصف :


رجعت إلي الشقة باب الغرفة مغلق لا يزال ..جلست علي الكنبة ورأسي يكاد ينفجر
من الأسئلة ولا إجابات..هل أخبر الشلة؟؟؟ فإن لم أخبرهم هل أستطيع وحدي معالجة
الأمر؟؟أبن أتجه ولمن ألجأ؟؟؟
بدأت الشلة في العودة أسامة عبد الوهاب فمحمد لم يكملوا يومهم الدراسي لم يكذبني
حدسي ولم يخيبوا ظني فيهم....
أخذتهم وخرجنا...إلي البحر مرة أخري...جلسنا علي حائط البلاج وأخبرتهم بالأمر
كانت ردود أفعالهم متنوعة وسريالية المنظر.. محمد يحي هذا الجعلى الصامد تجري
دموعه بلا توقف..عبد الوهاب بدأ فجأة يتحدث إلينا برطانة المحس كلام غاضب ظننته يشتم
ولم أقاطعه...أسامة يذكر الاسم طارق بحرقة ويتحدث عن قتله ...
كنت أمتاز عنهم بصفاء الذهن "نوعا" فقد أخذت حصتي من الجنون ....فحاولت أن أسير بالأمر
نحو باب الحلول....
: يا جماعة خلونا نفكر في الورطة دي بعقلانية نعمل شنو؟
أسامة : ده كلو منك لو سمعت كلامي من الأول ما كان ده حصل !!
: ده ما وكت اللوم يا أسامة أرد أنا بألم ظاهر...
محمد يحي : المسألة دي دايرة معرفة يا جماعة ما ساكت كده...
عبد الوهاب لا يزال يرطن ولكن من ضمن حديثه ورد الاسم رشا ؟؟

نلتفت إليه جميعا ويبادر محمد يحي : يا عبد الواهب يا أخي روّق شويه واتكلم عربي
ورينا رأيك...
عبد الوهاب : يعود نوعا إلي وعيه ....الحل عند رشا...خلو الموضوع علي لكن المسألة دايرة
قروش....
أسامة : القروش ما مشكلة أدوني ساعة وأنا أجيبها ليكم من طارق!!!

أنظر أنا إلي محمد يحي ..يفهمني مباشرة... ويتوجه بالحديث إلي أسامة : موضوع طارق ده نمش
ليهو الإتنين يا أسامة الحكاية دايرة تعقل والمسألة ما بتقبل شيل الحس...

عرف كل منا دوره...وكان علي أن أهتم بنادية وأن أحرص علي أن لا يحدث لها مكروه
..............
..............................
............................................

أعود للشقة والحال هناك كما هو...قمت بعمل شاي وطرقت غلي باب الغرفة...لم أسمع رد
فتحت الباب ونظرت بحذر...نادية في وسط السرير مغطاة تماما ب"بطانية"...
جلست إلي جوارها...نادية؟ ترفع الغطاء عن وجهها العيون الجميلة صارت حمراء من البكاء
وغاطسة في محجرها.. أربت عليها وأدعوها إلي شراب الشاي...يا نادية ما تشيلي هم
المسألة دي بتتعالج إن شاء الله...أشربي الشاي ده وخلي الموضوع علي الله وعلي...
وتجري الدموع....سيل لا نهاية له...أخرج أنا...إلي الصالة...

كان أول العائدين عبد الوهاب....
جذبني من يدي ودخلنا إلي غرفته... بادر : لقيتها ...كنت عارف إنها بتقعد عند ناس
سيف...
أها خير الحصل شنو؟
: أسمع قالت في دكتور في الجيزة اسمه عدلي في ميدان الجيزة عمارة رقم (00) وبيعمل
الحكاية دي بي 150 جنيه...وما بيسأل أي أسئلة....
يا عبد الوهاب الزولة دي مضمونة يمكن تورطنا في مشكلة يا أخي؟؟
يرد بغضب جعلني أحس بالضآلة..
: شنو يعني ورطة أكتر من النحنا فيها دي يحصل اليحصل يا أخي...
خير يا عبد الوهاب معاك حق والله.
يدخل كل من أسامة ومحمد يحي ... محمد يحي يسأل
: أها يا عبده خير؟
عبد الوهاب يشرح مرة أخري ... ثم يحكي محمد ما حدث مع طارق...
: الكلب قعد يبكي ذي البنات الصغار..لو ما مسكت أسامة كان كتلو وبعد ده لحقو بي كفين
وأنا قلت ليهو لو لقيناه حايم في كلية الآداب ساكت بنكتلوا .. الله أعلم تاني يقرب ليها..
وشلنا منو كل القروش العندو 95 جنيه...
خلاص يا جماعة نكمل الباقي نحنا وفي الوكت الحالي ما تدوا نادية إحساس بأنكم عارفين
الحاصل نهائي يكفي العليها..

[imported_فيصل سعد]

(10)

قاهرة المعز :


ميدان رمسيس بإحساس مختلف هذه المرة...ازدحام السابلة.. الهواء مشبع بثاني أكسيد الكربون
ألفاظ بذيئة في كل ناحية.. الخطي مسرعة الكل يجري... أصوات المنادين تختلط ببعضها..
أصحاب التاكسي والحافلات ، بائعو الفواكه والصحف اليومية، الكل ينادي ولا مستمع...
...القاهرة... كم أكره هذه المدينة ...يمر الأتوبيس المزدحم ببعض المعالم المعروفة لدي
ولكن بلا مذاق هذه المرة.. القللي، الفجالة، معهد الموسيقي العربية، دار القضاء العالي
كبري ستة أكتوبر، وأخيرا العجوزة ، مطعم فلفلة ، المستشفي العسكري، شارع شاهين
الشقة رقم ستة عشر...نطرق الباب..يفتح بشري سلام ....سلام... ونظرات إعجاب لرؤية
نادية لم يستطع إخفاءها...ليتك رأيتها بشري وهي مزدهرة بعد ... ليتك رأيتها!!!!
ترحيب مضياف بلا فضول هو بعض أهلي....
راحة من المشوار ووجبة فول من فلفلة... ثم الخروج إلي ميدان الجيزة..عبورا بميدان الدقي
تمثال نهضة مصر الجميل، مباني جامعة القاهرة....ميدان الجيزة آثار كبري جديد في وسط الميدان...
العمارة الضخمة ولافتة في مدخل المبني د.عدلي *** أخصائي التوليد جامعة القاهرة ومستشفي
القصر العيني...
الأسانسير القديم يصدر أنات تحدث عن طول الدهر وشكوى من كبر... تكاد أرجلي تخذلني
وأتماسك فأنا هنا الفارس المنقذ وعلي الثبات!!!!!
صالة فيها ممرضة تجلس خلف تربيزة مليئة بملفات المرضي وكروت جديدة.. بعض السيدات الحمل
يجلسن في لا مبالاة ..نظرة الفضول المصرية المعتادة...أجلستها علي الكرسي وتوجهت نحو الممرضة ..
: السلام عليكم
أهلا يا بيه عندكو مواعيد ؟
: جينا من غير ميعاد ... هل الموضوع بيحتاج لميعاد مسبق؟
أيوة يا بيه بس ممكن تتقضل تجلس لو في فرصة حا أدخلكم عالدكتور
كان هذا يعني أن أنفحها ببعض المال فغمزت لها بعيني ..لغة مصرية لا تختص بالطرشان
وحدهم...
طالت الجلسة ساعة وزيادة تململت أنا...أتوجه بنظراتي نحو الممرضة وأغمز مرة أخري
تدخل غرفة الطبيب ثم تعود تنادي علي الاسم مدام جميلة ..أقف أنا هذا هو الإسم الذي
خطر ببالي وسجلت به.. دفعت "الفيزتة" وجنيه فوقها أخذته الممرضة بفرحة طفولية...
الدكتور عدلي أصلع فوق الأربعين بقليل كبير الكرش حاد النظرات...
: هلا بابن النيل ...
** لعنة الله عليّ وعليك.....
أهلآ يا دكتور
: اتفضلوا
** نجلس وننظر لبعضنا نادية الدكتور وأنا
: أهلا في أيه إن شاء الله
والله يا دكتور أنا طالب دراسات عليا هنا وزوجتي أيضا طالبة وحدث حمل بس الوقت غير
مناسب لطفل ونريد إنزاله..
** ينظر إلي نظرة عرفت منها أنه لا يصدق روايتي وكأنه يقول – العب غيرها علي هامان
يا فرعون – وقد تماسكت حتى لا تخذلني نظراتي....
: طب والعروسة رأيها أيه ؟
** تبكي هي دموع تندفع فجأة وأمد يدي أنا للإمساك بيدها "هذا ليس وقت البكاء"
هي موافقة يا دكتور
: صحيح يا عروسة عايزة تنزليه؟
** تهز رأسها إيجابا ويكتفي هو بهذه الهزة كرأي ويدعوها للدخول لصالة الكشف
ويناديني لأدخل معه..أتمانع أنا ويصر هو ولا أستطيع الرفض فأنا هنا زوجها وعلي
مشاهدة ومعرفة ما يحدث أدخل علي مضض أقف في ناحية رأسها وأنظر في عينيها
كانت العينان تحملان لون الموت ...أمسك بيدها وأواصل النظر في وجهها...
ينتهي الدكتور من الكشف ويخرج.. أتبعه أنا...ثم نادية بعد قليل...
: ده لسه شهرين وشويه يعني لسه.. ودي عملية بسيطة
اتفضلوا في الصالة بره أنا عندي لسه مريضتين وبعديها نشوف
ويمد يده علي التلفون ليتصل برقم .. يملأ الخوف نفسي..لعله يتصل بالبوليس
نخرج للصالة وننتظر...ساعة أخري من الزمن يدخل شخص آخر بكرش ضخمة
يسلم علي الممرضة ويدخل دون استأذن لغرفة الطبيب...
تدخل الممرضة خلفه .. دقائق أخري ثم تعود .. تشير إلي أذهب إليها تطلب مني مائة جنيه
رسوم عملية... أدفع المبلغ وأعود لأجلس جوار نادية .. تمسك هي بيدي...
تدخل الممرضة وتخرج أكثر من مرة وفي النهاية تشير إلينا بالدخول..
غرفة أخري.. ندخل صالة كبيرة مجهزة لعملية...يخاطبني الطبيب اتفضل أنت انتظر برة
وبعد العملية حا نندهلك.. تمسك هي بيدي.. أجذبها منها تأبي فكاكا.. أهمس لها شدي حيلك
شويه.. أخرج إلي الصالة... كانت أطول ساعة مرت علي حياتي البائسة....
تخرج الممرضة ثم يتبعها الرجل ذو الكرش ثم الطبيب.. يتجه نحوي..
: روح اشتري ليها عصير فواكه بس يكون فرش...
أخرج أنا ليس بعيد محل لبيع العصير .. وأعود مسرعا.. تشير إلي الممرضة بالدخول إليها
أدخل.. ما زالت تحت البنج وتنادي في هذيان باسمي...أمسك يدها وأجلس بجوارها..
تدخل الممرضة وتخرج وفي كل مرة تردد حمدا لله علي السلامة يا بيه..
بدأت نادية تفيق من البنج..أشربتها عصير الفواكه.. وخرجنا ممسكا بها ونصيحة من الدكتور
أن ترتاح نادية بعض الوقت..
: حمدا لله علي السلامة يا ابن النيل...
لعنة الله عليك وعليّ....
نأخذ تكسي وعودة للشقة بالعجوزة....

نواصل

[imported_فيصل سعد]

(11)

خاتمة :
شيطانة بعيون ملائكية.


يوم مضي جالس أنا بجوار السرير ونادية تعاني من الحمى..مكمدات باردة ..هذيان..واسمي يتردد
في صورة متقطعة...تعود إليها الحياة بالتدرج.. بعض البريق للعينين..تورد الخدود...
أخذتها في الصباح بعد أن استردت عافيتها في جولة حول معالم القاهرة.. الأهرام...برج القاهرة..
المتحف المصري..كنت أتحدث وهي تهز رأسها مستمعة وحين يتطلب الأمر ردا كانت ترد ببخل
يوم كان ضروريا حسب اعتقادي حينها...وكان مشوار العودة...حدثتها أن تترك الأمر خلفها وأن تعتبرها
تجربة قاسية مرت بها عليها أن تستفيد منها...كلام..كلام...كلام. لم يكن مقنع حتى لي أنا الناصح
وكنت أحسها أحيانا غيرة منصتة....
إسكندرية ...إحساس بالراحة ...سألتها إن كانت تود أن تذهب معنا إلي الإبراهيمية أم إلي شقتها
فاختارت شقتها...أوصلتها.. وذهبت في حالي...
كانت في انتظاري عيون قلقة...طمأنت الكل بدون تفاصيل..الحمد لله..الحمد لله...الحمد لله
كانت ردودهم..
غابت نادية وتفهمنا ذلك...كنت التقيها فتسلم علي وتسألني عن حالي وتذهب في حالها...
صارت تتجنبني والشلة...ولم نحاول أن نؤثر علي خياراتها...علي الرغم من تواجدنا في مدينة
واحدة وتجمعنا مباني نفس الكلية...غابت نادية عن حياتنا.....

كان جرحي أكبر من قدرة الزمن علي محو أثاره...جرح ترك ظلاله الكئيبة علي تفاصيل حياتي..
صرت بوهيمى الطباع ساخر الكلمة..صرت أغني مع عبد الوهاب (يا رشا يا كحيل غثني هواك
سباني) عادت رشا وصويحباتها إلي الشقة من جديد وصار لي حسابي عبارة عن أربعة "شختات"
علي حائط غرفة نومي..وضاع إلي الأبد ذاك العطر الذي كان يسكن أنفي ويدغدغ حواسي..
وبعض أسئلة ظلت دون إجابات..هل هي ملاك؟؟؟أم شيطان بعيون ملائكية.
....

[imported_عجب الفيا]

لا ادري هل انتهت القصة ام لا تزال فيها بقية
علي اية حال هذه كتابة انسان محترف وموهوب وليس مجرد انسان هاوي
سرد سلس ، حبك محكم ، تصوير دقيق ولغة انسيابية بلا تقعر او تكلف
فقط هنالك بعض الاخطاء الطباعية
لم تعجبني كلمة " الحكي " الشامية التي تكررت اكثر من مرة !

[imported_فيصل سعد]

العزيز / عجب الفيا
مرحبا بك و بمشاركتك.

عذرا فظروف عجلة و سرعة الطباعة اتت بكثير من الاخطاء.
ان اشرت لاخطاء طباعية يمكن تصحيها.
و بقية الاسئلة محولة للكاتب للرد عليها.

الود و التقدير.

[imported_خالد الحاج]

الأحباب

ندي عبد المنعم
بنت النيل
عمر صديق
جارسيا
حميد
أبورماز

شكرآ لوجودكم المبهج هنا وصدقوني كان الموضوع تجربة وما كنت أظنها ستجد أي نوع من الإهتمام
ولكن لطف منكم أنكم بتشجعوا العبد لله وشيلوا شيلتكم :D


العزيز منعم

لمداخلتك طعم خاص ووجودك هنا أسعدني بحق ليتك ما بخلت فأنا أحتاج لنصحك
أما كلمة حكي فهي من ضمن لساني إن صح التعبير وأقولها كما تقول مثلآ
أحكي لنا طرفة، أو حكاية الرتينة بت سالم في حنة علي الشاشوق أو مثل الحكايا الشعبية
أما الأخطاء الإملائية (الطباعية تلطفآ منك :) ) فسأعمل علي تداركها إن شاء الله
معزتي لك


المسافة ..... يديك العافية يا زول يا زين

[imported_فيصل سعد]

المسافة ..... يديك العافية يا زول يا زين

الله يعافيك عزيزي خالد الحاج
كل عام و انتم بخير
و نحن في انتظار عمل جديد!!

[imported_د.سيد عبدالقادر قنات]

هل هي ملاك؟ أم شيطان بعيون ملائكية ؟؟؟..
أستاذ خالد الليل هود ولكن االقصة تجبرك علي المتابعة
ولكن هي أنثي
لماذا لم يقم بالوصية بالكامل ؟؟؟ الوصية في الضمة.
ولكن لو لم يكن هنالك ذئاب بشرية
لكانت النهاية غير تلك
الذئاب البشرية هي الآفة
الشيطان هو الرجل بعيون ملائكة
وهي تتحمل جزء من المسئولية
والمجتمع هو المسئول الأكبر[QUOTE]..... ]والمجتمع هو المسئول الأكبر]والمجتمع هو المسئول الأكبر

[imported_ندي عبدالمنعم]

العزيز خالد ..

قصة جميلة و معبرة ,, تعاطفت مع نادية كثيرا ,, وكذلك مع بطل الرواية ,, حقيقة هى ليست بشيطانة ,, ولكن المرأة الجميلة فى مجتمعاتنا دائما ما تتعرض لمطبات و ملا حقات تعرقل مسارها و تضعها امام مواقف فى غاية الصعوبة ,, هى أمرأة صادقة ,, ولكنها أخطأت الاختيار ,, ربما لضعف تجربتها و اندفاع عواطفها. ربما تكون نادية ملاكا اوقعه سوء حظه بحبائل شيطان جبان.


لك التحية على هذه الرواية الجميلة ...

و للمسافة الشكر لمناولته لنا هذه القطعة .. فقد فاتتنى فى البورد القديم.

[imported_فيصل سعد]

لك التحية اختنا ندي عبدالمنعم
و الشكر و التقدير.

[imported_فيصل سعد]

و التحايا تصل الاخ د.سيد عبدالقادر قنات.

[imported_فتحي مسعد حنفي]

شكرا يافيصل لنقلك هذه الدرة الجميلة وواصل لكن في كلمتين عايز اقولهم لخالد0
يا خالد انت في زول قال ليك احنا هنود خيال شنو وليست من الواقع بتاع شنو0
عموما الطلعت بيهو أنا انو نادية هي الملاك وانت شيطان في ثياب حمل وديع0ياراجل أنا مستعد أحلف بكل انواع الحلايف البعرفها انو الحكاية دي حقيقية وحصلت ليك انت شخصيا ونحتت جواك أخاديد وأنهار حتفضل جواك الي الأبد0
أنا من بكرة شادي الرحال الي الاسكندرية وحأفللي الابراهيمية شارع شارع أسأل عجايزها كلهم عن الشباب السودانيين الكانوا ساكنين هناك وكانت معاهم في فترة بت سودانية ومن حظك أنا أساسا من الابراهيمية من شارع ادفو الرابط بين شارع اللاجيتي الواصل لغاية صابر بتاع الرز باللبن وبين شارع سوق شديا ولو دعا الحال أوصل لغاية كامب شيزار0
ما علينا حكايتك حقيقة ولا خيال القصة مكتوبة بحرفية وأسلوب مشوق لا ينطبق علي هاوي وحقو تواصل كتابة انشالله تكتب عن معايشاتك في هولندا المهم تستمر في الكتابة0
لك كل الود والاعجاب

[imported_فيصل سعد]

[color=#2E8B57]
شكرا يافيصل لنقلك هذه الدرة الجميلة.


[size=5]عفوا يا خواجة اصالة عن شخصي الضعيف و نيابة عن الخال القوي :D:D

[imported_خالد الحاج]

شكرا يافيصل لنقلك هذه الدرة الجميلة وواصل لكن في كلمتين عايز اقولهم لخالد0
يا خالد انت في زول قال ليك احنا هنود خيال شنو وليست من الواقع بتاع شنو0
عموما الطلعت بيهو أنا انو نادية هي الملاك وانت شيطان في ثياب حمل وديع0ياراجل أنا مستعد أحلف بكل انواع الحلايف البعرفها انو الحكاية دي حقيقية وحصلت ليك انت شخصيا ونحتت جواك أخاديد وأنهار حتفضل جواك الي الأبد0
أنا من بكرة شادي الرحال الي الاسكندرية وحأفللي الابراهيمية شارع شارع أسأل عجايزها كلهم عن الشباب السودانيين الكانوا ساكنين هناك وكانت معاهم في فترة بت سودانية ومن حظك أنا أساسا من الابراهيمية من شارع ادفو الرابط بين شارع اللاجيتي الواصل لغاية صابر بتاع الرز باللبن وبين شارع سوق شديا ولو دعا الحال أوصل لغاية كامب شيزار0
ما علينا حكايتك حقيقة ولا خيال القصة مكتوبة بحرفية وأسلوب مشوق لا ينطبق علي هاوي وحقو تواصل كتابة انشالله تكتب عن معايشاتك في هولندا المهم تستمر في الكتابة0
لك كل الود والاعجاب

تعرف يا فتحي الله أعلم تلقي ليك باقي شمار الحكايا ليها أعوام يا أخي
طبعا ما أعوام كتار زي قصتكم يا أخي شوقي فكاكم إنت وبابكر
سنة 1968 كنتوا طلاب جامعيين في تشكسلوفاكيا ؟ والبيرة بي قرش ومليمتين :D
الشكية لله
سنة 1968 كان عمري ستة سنوات .. يعني يا دوب دخلت المدرسة :eek:

سكنا فترة يا فتحي في سوق شيديا
صحيت الساعة أربعة صباحا علي صوت صريخ عالي :
(يا أوطة يا مجنونة
بلاش الزحمة دي يا عالم
حا تشتروا كلكو
أوقفو صف
بلاش الزحمة يا عالم
يا أوطة يا مجنونة يا بت المجنونة )
صدقني الزول براه قدام تربيزة الطماطم ولا معاه ولا مشتري واحد.
ديل أولاد بمبة يا فتحي.

مرة عملنا شكلة قفلنا فيها السوق ونحن أربعة أشخاص فقط
أي والله
أسامة دفع الله
محمد يحي
أبوبكر الوسيلة السماني
وشخصي الضعيف
ولم تنتهي الشكلة الدموية جدا إلا بحضور كبير الخضرجية في السوق ممسكا بأذن الشاب الذي تفوه بألفاظ نابية لأحد الزميلات السودانيات وأجبره علي الإعتذار لها ولنا ..
أيام :(

[imported_فتحي مسعد حنفي]

تعرف يا فتحي الله أعلم تلقي ليك باقي شمار الحكايا ليها أعوام يا أخي
طبعا ما أعوام كتار زي قصتكم يا أخي شوقي فكاكم إنت وبابكر
سنة 1968 كنتوا طلاب جامعيين في تشكسلوفاكيا ؟ والبيرة بي قرش ومليمتين
الشكية لله

أول حاجة كلامك دا فيهو اعتراف واضح لانك معتمد علي طول المدة في انعدام الشمارات وما أنكرت0
أما احنا ففي عام 68 كنا لينا تلاتة سنين في تشيكوسلوفاكيا وسنة 68 مربوطة في أذهانا لانها السنة الدخلت فيها جيوش حلف وارسو البلد واحتلتها ودي كانت أيام رهيبة فقدنا فيها صديق عزيز أفريقي اسمو جيشيكGeshek صديق حميم لشوقي بدري كان معانا في نفس الداخلية0فزاد فقدانه من صعوبة التجربة0ولك أن تتخيل انك تصحي الصباح تلقي كل شارع فيهو دبابة والرصاص بيطاير حواليك0ألله لا وراك0
عموما دا ما بيمنع انو سردك للواقعة الحقيقية التي عشتها أنت كان رائعا ومتفردا وما تخاف ولا تخجل أنا تجربتك دي مريت بيها 3 مرات وفي المرة الرابعة جبت واحد صاحبي يقول انو هو الوالد لأنو في لجنة لازم توافق علي الاجهاض وتحاول تقنعك بانو أحسن تحتفظوا بالجنين ولو انا شافوني رابع مرة كنت حأنطرد من البلد وأمشي اشوف لي حتة تانية

[imported_Fanar]

وصدقوني كان الموضوع تجربة وما كنت أظنها ستجد أي نوع من الإهتمام


تجربة بكل هذا الجمال في السرد والحبكة القصصة

ماذا عن نتاج ما بعد التجربة؟؟

اتحفنا الله يرضى عليك




مع شكري الجزيل لفيصل سعد

[imported_فيصل سعد]

مع شكري الجزيل لفيصل سعد

و انا اشكرك كثيرا عزيزتي فنار و احبك جدا جدا للطيش :):) بكل ما تحمل الكلمة من معاني سامية و سعيد بوجودك و تواصلك معنا ايما سعادة :D:D:D كوني بالف خير.

[شليل]

التحيه ليك يا فيصل .. حقيقه دي أجواء مشوقه وممتعه.. وزي ما قال أبو الفتوح الواحد مر بيها كتير..
فياريت نشحمن البوست ده وكل واحد يكتب إذا كان عندو تجربة مماثلة..



ـــــــــــــــــــــــــــ
همسة: يا خال إنت مالك غتيت كده.. كل الإمكانيات دي عندك ولابت!

[imported_فتحي مسعد حنفي]

التحيه ليك يا فيصل .. حقيقه دي أجواء مشوقه وممتعه.. وزي ما قال أبو الفتوح الواحد مر بيها كتير..
فياريت نشحمن البوست ده وكل واحد يكتب إذا كان عندو تجربة مماثلة..



ـــــــــــــــــــــــــــ
همسة: يا خال إنت مالك غتيت كده.. كل الإمكانيات دي عندك ولابت!

انت ياشليل كايس ليك جنازة تقعد تولول عليها ولا شنو:confused:ما تخلي الناس في حالها داير تفضح خلق الله مالك 0أنا زول بقيت عجوز وبقت ما فارقة معاي الناس تعرف العملتو في شبابي وكان أنا سكت ناس شوقي بدري ما بقصروا في الفضايح وبعدين أنا لما جيت اتزوج قعدت مع المدام وحكيت ليها كل حاجة عشان ما تجي في يوم تسمع ليها كلام وتعمل لي تحقيق0هل الباقيين بيقدروا يعملوا كدة:confused::D:D

[شليل]

انت ياشليل كايس ليك جنازة تقعد تولول عليها ولا شنوما تخلي الناس في حالها داير تفضح خلق الله مالك 0أنا زول بقيت عجوز وبقت ما فارقة معاي الناس تعرف العملتو في شبابي وكان أنا سكت ناس شوقي بدري ما بقصروا في الفضايح وبعدين أنا لما جيت اتزوج قعدت مع المدام وحكيت ليها كل حاجة عشان ما تجي في يوم تسمع ليها كلام وتعمل لي تحقيق0هل الباقيين بيقدروا يعملوا كدة
أفووو كيفن ما أحكي ليها دي حبيبتي وشريكة حياتي , لكن إنت بعضمة لسانك مش قلت:
وما تخاف ولا تخجل أنا تجربتك دي مريت بيها 3 مرات وفي المرة الرابعة جبت واحد صاحبي يقول انو هو الوالد لأنو في لجنة لازم توافق علي الاجهاض وتحاول تقنعك بانو أحسن تحتفظوا بالجنين ولو انا شافوني رابع مرة كنت حأنطرد من البلد وأمشي اشوف لي حتة تانية
مافي مشاكل ياعمك.. نحن ليه بنلاوز من الثالوث بتاع : الدين.. الجنس.. السياسة ؟.. أكتب ولو داير
تستعين بصديق مافي زول بيشيل حالك..غايتو فيصل سعد خليهو علي.. لكن ناس شوقي بدري إلا تسرق ال password بتاعم .. ولو داير تفرد صفحه جديده أنا بجازف معاك أها رايك شنو؟

[imported_فتحي مسعد حنفي]

مافي مشاكل ياعمك.. نحن ليه بنلاوز من الثالوث بتاع : الدين.. الجنس.. السياسة ؟.. أكتب ولو داير
تستعين بصديق مافي زول بيشيل حالك..غايتو فيصل سعد خليهو علي.. لكن ناس شوقي بدري إلا تسرق ال password بتاعم .. ولو داير تفرد صفحه جديده أنا بجازف معاك أها رايك شنو؟


لأ خلينا مستورين أحسن

[imported_خالد الحاج]

تجربة بكل هذا الجمال في السرد والحبكة القصصة

ماذا عن نتاج ما بعد التجربة؟؟

اتحفنا الله يرضى عليك




مع شكري الجزيل لفيصل سعد

العزيزة فنار
شكري الجزيل للإطراء
الموضوع قديم له أكثر من عامين ونزل أول مرة في المنتدي السابق الذي صار إرشيف الآن.
دار حوار حينها تجدينه في الإرشيف ربما أجاب علي بعض أسئلتك.
هنا بعض محاولاتي في القصة القصيرة



http://sudanyat.net/vb/showthread.php?t=1052
شخصيات من حلتنا(مجموعة قصص)

http://sudanyat.net/vb/showthread.php?t=1938

بكائيات ود الحاج

http://sudanyat.net/vb/showthread.php?t=5051
جو سوي أباس ... لعنة عباس تطاردني.

مودتي

[imported_خالد الحاج]

ـــــــــــــــــــــــــــ
همسة: يا خال إنت مالك غتيت كده.. كل الإمكانيات دي عندك ولابت!

أبدا والله يا شليل
أبحث بإسمي وستجد العديد من المحاولات في القصة القصيرة

http://sudanyat.net/vb/showthread.php?t=1052
شخصيات من حلتنا

http://sudanyat.net/vb/showthread.php?t=1938

بكائيات ود الحاج

http://sudanyat.net/vb/showthread.php?t=5051
جو سوي أباس ... لعنة عباس تطاردني...

[imported_Fanar]

و انا اشكرك كثيرا عزيزتي فنار و احبك جدا جدا للطيش :):) بكل ما تحمل الكلمة من معاني سامية و سعيد بوجودك و تواصلك معنا ايما سعادة :D:D:D كوني بالف خير.
دا فولت عالي شديييد على شخصي الضعيف يا فيصل
في زماننا هذا .. لسة في قلوب فاكرة المعاني السامية؟؟

انحناءة من هامتي لقلبك الماس

قالت انغام:
( صبح اللي يحب في ايامنا "طيب".. وكمان "على نياتو"
وإيه يعني يقولوا عليك طيب
خليك هنا من قلبي قريب
وكفاية تكون .. انسان في زمان
فيه طيبة القلب.. بتتعيب )


يااااا طيب
اهديك أنغام باندياح للطيش

والثقل .. ما معانا
http://www.geocities.com/honest3n3/angham_ya-6ayeb.rm

[imported_فيصل سعد]

فيصل سعد خليهو علي.. لكن ناس شوقي بدري إلا تسرق ال password بتاعم .. ولو داير تفرد صفحه جديده أنا بجازف معاك أها رايك شنو؟
لأ خلينا مستورين أحسن

و انا احتراما للخوة و العشرة و الزمالة، يمين ما اخذلكم :D عشان اريحكم من المساسقة و سك الجنائز و الولولة و كمان تقديرا لاتفاقكم الظاهر الباطن :) و زي ما قاليك الخواجة خلينا مستورين و كدا :D حارش ليكم شوية "بوح حميم" :D و كمان تحفيزا لكم بالمجازفة المشتركة :D اتفقنا؟ بس ما تطمعوا اكتر من كدا يا "فرد" :-

تقريبا في نفس فترة حدوث رواية الاسكندرية المشوقة، كنت طالبا في قاهرة المعز اسكن اطراف المهندسين ما بين الدقي و العجوزة امام نادي الصيد، و حيث اننا :D كنا برالمة، كنا بتاعين فواكة و عصير ساي :D و توارد خواطر باشمعتصمية :D مستلهمة "ان ادفانس" و كذلك سنايرنا دفعة الخال "ود الحاج" متسلطين حبتين و كاتمين نفسنا شوية :D و عندما تخرجوا و كسحوا، قضينا احلى ايامنا مع ناس "رشا يا كحيل" دون خربشات على الجدران كما كان يفعل الخال المسخوت بالابراهيمية الله يدينا خيرو :D . كانت علاقاتنا مع بنات وطننا في الغربة و حتي داخل الوطن و ما زالت مبنية على الاحترام و زيادة توقير و رهبة، المهم بعد التخرج و العودة و العمل بالسودان نشأت كثير من العلاقات حلوها و مرها و الشواكيش الحارقة و قليل من الشواكيش المضادة و بدأت بحب و مودة و انتهت باحسان و سلام و احترام اغلب الاحيان و لم تدخل في حتات غريقة كالتي حدثت ل "جمال" و "نادية" في رواية معلمنا الشقي :D .

بخصوص الزواج فيما بعد ، و كما ذكر الخواجة "سيد العارفين" الحبوب :D صاحب الخبرات الثرة في كل المجالات و صاحب التجارب المشابهة لتجربة الرواية، فانا 1995 في احدى اجازاتي بالخرطوم و كنت مغتربا بالامارات مشيت قابلت حكومتنا الموقرة حاليا :D قلت ليها يا "بت الناس" دي ماهية شهرين بتعمل عقد و خطوبة بسيطة و انا زول محمول و مسئول ممكن نعيش مستورين و نحقق قليل احلام :D قالت لي "أبشر" بنتمها كسرة بموية و ونسة و مودة، تزوجتها بعد عام و الآن اولادنا 12 سنة ، 9 سنين، و سنتين و داقشنا و اهو داقشين سواء في مسخرة هذه الحياة؟ و الله يسهل على الجميع.

تحيات زاكيات.

[imported_خالد الحاج]

والله يا فيصل تجربتك بريئة بصورة تدعو للرثاء :D
وأنا كنت قايل نفسي درويش

أضحكتني جعل الله أيامك كلها أفراح وأسعدك وحكومتك الموقرة .

بالمناسبة هدية فنار شغالة والأغنية بالجد جميلة
http://www.geocities.com/honest3n3/angham_ya-6ayeb.rm

حاول تنزلها هي علي (ريل بلاير) لو ما عندك البرنامج نزلو وأسمع يا أخي .

[imported_Fanar]

فيصل ياخ لا تخليها تفوتك اغنية جميلة جدا

عملتها أنغام لأبوها- قبل ما يتخانقوا- وابوها هو اللي لحنها ليها وهو اللي بيغني معاها
غنتها في بداياتها الفنية .. قالت عايزة تعزز بيها مفاهيم اوسع و أشمل للحب من المفاهيم المعروضة في الساحة .. حب بمفهوم اسمى( حب الوالدين ، حب الأخوة ، حب الأصدقاء ..) عشان كدة قالت : "فسر للعالم معنى الحب"

لازم تسمعها لو تسرق ريل بلاير

[imported_فيصل سعد]

فيصل ياخ لا تخليها تفوتك اغنية جميلة جدا
لازم تسمعها لو تسرق ريل بلاير

تمت مباصرة ريل بلاير مضروب ( 90Days-Trial)
الغنية في السلك يا رفيقة المفاهيم الاوسع شمولا :D
كتر خيرك و زيدينا من زي دا :D انا و خالي الدراويش ديل :D وما تسمعي كلام الخواجة الحا (ق/س)د المنطط عيونوا داك.

[imported_فيصل سعد]

والله يا فيصل تجربتك بريئة بصورة تدعو للرثاء :D
وأنا كنت قايل نفسي درويش
أضحكتني جعل الله أيامك كلها أفراح وأسعدك وحكومتك الموقرة .
بالمناسبة هدية فنار شغالة والأغنية بالجد جميلة.

درويش شنوا يا خال نحنا جنبكم بياعين سبح ساي :D:D هدية فنار سمحة تب و شكرا للرابط و بعدين تاني انت و معلمك ما تلاوزوا و تفتروا علينا بالغناءالقطعوا فيكم :D:D، اهو نحن برضوا ناس حلوين اهدونا غناء هاي تك و كدا :D:D جودة و مضمون و قضوا يومكم احسبوا الفروقات و كدا :eek::eek::eek:

[imported_Fanar]

اهداء الى العزيزالطيب فيصل سعد والغالي الزبون فتحي مسعد ( ابهاتهم بيتشابهوا:eek:) بمناسبة
صدى الذكريات .. والحنين للذي فات
وياليت الهناي يعود يوما


http://www.l44l.com/up/uploads/119120b1b7.jpg (http://www.l44l.com/up)

http://www.l44l.com/up/uploads/fa9774e736.jpg (http://www.l44l.com/up)

[imported_نوفل عبد الرحيم]

يا ود الحاج ياخ فكنا من حكاية ( تجربه ) دي وأملا الصفحات كتابه
ياخ انا من اول حرف لحدي أخر حرف .. نفسي يقوم وينزل
غايه في الابداع والامتاع ..

شكرا جميلا اخي فيصل سعد ان ابحرت بنا في يم ود الحاج هذا
عظيم مودتي

[imported_فيصل سعد]

يا ود الحاج ياخ فكنا من حكاية ( تجربه ) دي وأملا الصفحات كتابه
ياخ انا من اول حرف لحدي أخر حرف .. نفسي يقوم وينزل
غايه في الابداع والامتاع ..

شكرا جميلا اخي فيصل سعد ان ابحرت بنا في يم ود الحاج هذا
عظيم مودتي

يا نوفل حبابك الف و مرحب بيك مليون . و الخال دا خلي علي تب :D:D انا بنكت ليك منه كل الابداع، و ما تسمع كلام تجربة و ما تجربة :D:D دي حالتها مناظر ساي و كتبها و نحن نصارع في هكر و المنبر كان بينهكر مرتين تلاتة في اليوم :D:D:D الله لا وراك زي ايامنا ديك يا صديقي.

[imported_فيصل سعد]

اخونا شليل 07 مساء الانوار :
البوست دا منتظر منك مجازفة وعدتنا بيها زمان.
نحن كنا مصهينين و مريحنك عشان الاعياد و خلصت.
فدحين يا معلم سن قلمك و تعال لينا بيجاي و اخونا الجيلي
الكلام القلناه دا ليك شرحو يعني برضو تعال ناطي ليك ببوح حميم و كدة :D:D:D

[شليل]

اخونا شليل 07 مساء الانوار :
البوست دا منتظر منك مجازفة وعدتنا بيها زمان.
نحن كنا مصهينين و مريحنك عشان الاعياد و خلصت.
فدحين يا معلم سن قلمك و تعال لينا بيجاي
ود عمك.. كل سنه وإنت طيب.
والله أنا كنت جادًي أجازف.. لكن إنتو مجازفاتكم طلعت ما جادًه زي ما قال الخال:D:D .. ف أنكت لينا واحده كاربه بنكت ليك إتنين.
لكن في الوكت الحالي أهديك تصبيرة:
" بنهديك المشاعر وتخون الأمانه"

[imported_فيصل سعد]

يرفع بطلب من اخت عزيزة لدينا
و لمزيدا من القراءة و الاطلاع..

[imported_فتحي مسعد حنفي]

يرفع بطلب من اخت عزيزة لدينا
و لمزيدا من القراءة و الاطلاع..

كدي في الأول طلع لينا الخال من الاكتئاب والبيات الربيعي اللابد فيهم اليومين ديل ...يطير بولا وتطير سنينو:mad::Dأهي دي بقت حالة الواحد اليومين ديل مرة أضحك ومرة أبكي ومرة أتحمل أسايا:Dوكل لحظة تمر عليا بتنقص الأيام شوية خاصة في السن دي:D

[imported_فيصل سعد]

كدي في الأول طلع لينا الخال من الاكتئاب والبيات الربيعي اللابد فيهم اليومين ديل ...يطير بولا وتطير سنينو:mad::Dأهي دي بقت حالة الواحد اليومين ديل مرة أضحك ومرة أبكي ومرة أتحمل أسايا:Dوكل لحظة تمر عليا بتنقص الأيام شوية خاصة في السن دي:D

كدي يا خواجة حاول معاو انت و ارمي ليو قولوبية خاصة :D:D ولا جر ليو سبحة :D:D خصوصا انت الايام دي متبرك بشيخ الامين و خاشي ليك فلم كدة ما اديتنا فيو نور و اضاءة كافية ، و مدد يا خواجة مدد ..

[imported_فتحي مسعد حنفي]

كدي يا خواجة حاول معاو انت و ارمي ليو قولوبية خاصة :D:D ولا جر ليو سبحة :D:D خصوصا انت الايام دي متبرك بشيخ الامين و خاشي ليك فلم كدة ما اديتنا فيو نور و اضاءة كافية ، و مدد يا خواجة مدد ..

أجي يافيصل جيتك يا عبد المعين تعين لقيتك انت ذاتك داير تتعان:Dوبعدين مدد شنو ومديدة شنو وفلم شنو الداير تدخلني ليهو واضاءتو ما كافية:confused:هو الزول الذيي ذنوبو تدخل قبيلة النار لامن يكوس طريقة يكفر عن ذنوبو يبقي لازم يكون في طريقو للتشيخ...الحكاية وما فيها أنا زول 50 سنة ما سجدت لله وعشان أعوض الفات يبقي لازم أكتر من النوافل وما زي ما انت فاكر اني ماسك لي طريقة وبالمناسبة انا ونستي مع شيخ الأمين كلها بزنس وما بنتكلم ولا في طرق صوفية ولا في الدين من أساسو وما اتكلمنا في الحاجات دي الا بعد ما ناس حاولو يوقعوا بيناتنا وقالوا ليهو فتحي كاتب انو نسيبو بيسوق أولادو ويلبسهم جلاليب خضرا مع انو راجل متعلم ولما مشيت السودان واتقابلنا لقيت الزول الوحيد الدافع عني كان شيخ الأمين ذاتو لأنو فهم أنا قاصد شنو بالضبط ودا يوريك مدي حكمة الزول دا الخلي ود مخير يغير 180 درجة..
أها بالمناسبة ما دام انت جبت سيرة شيخ الأمين خليني كمان أقول ليك انو أخونا أمير الشعراني لا قابل الشيخ ولا عمل معاهو لقاء والحوار أجراهو واحد اسمو أحمد يونس رئيس تحرير حكايات وأمير حاول ينسبو لنفسو ولما أنا كتبت ليهو اني حأراجع شيخ الأمين في الكلام دا ولدنا أمير لبد بعد ما حاول يتملص من مواصلة الموضوع وأنا كنت متوقع انو يحاول علي الأقل يعتذر بلطافة والناس ما كانوا حيدققوا معاهو في موضوع الفبركة ولو انت هسع ما جبت سيرتو أنا ذاتي ما كنت حأجيب سيرة الموضوع دا وحتي توضح الصورة تماما افتح بوست أمير وأقرا كل المداخلات وحتفهم الحصل:)

[imported_فيصل سعد]

اهو ود الشيخ جاء و مرق زولك و ريحك من مشاوير.. :D:D

[imported_فيصل سعد]

UP

[imported_فتحي مسعد حنفي]

UP

UP شنو يافيصل خالد خلاص رجع :confused:والبنية الفي بطنها كان قريب بكون هسع في الامام الشافعي(القرافة) واسكندرية رايح جاي:D:D:D وهولندا ما فيها زي دا وهو بقي حريف عامل الدرب ساساقا هولندا بلجيكا والعكس يعني غير معلوم المكان:confused::o

[imported_فيصل سعد]

اقتراح للاخ شليل بنقل هذة الرواية الى "نوافذ"

[imported_AMAL]

قمة المتعة وحرفية عالية جدا
ياخالد مشكلتك شنو مع البراءة
شكلك ذي الزول الماسك ليه قلم اسود وبشخبط في الحيط البيضا
تنسمت عبير الامكنة الخرطوم ٢ مابعيدة من٣ ونادي الاسرة كما حبينا فيهو شقيناهو
مرارات ناس الانقاذ وتعديهم علي الاماكن البتمثل اكترمن مساحات تستثمرها الذهنية الانقاذية <بيوت السكة حديد ونادي الاسرة >
فلفلة والفول الرهيب اسكندرية والبحر
وايام البعثات المصرية والقرو هناك اكتر من البقرو هسي في خلاوي الانقاذ
واكيد اجمل
عجبتني لازمة< وانا كان مالي>
هسي زولك الفي قصة نادية دا ما عارفين نحكم عليه بياتو معيار بي اخلاقنا السودانية ونقول ود السرور اخو البنات الركز وما قال انا مالي
ولا نحكم عليه بي معيار الدين ونقول ليه شيل شيلتك وارجي القيامة وياكاتل الروح وين تروح
والا بالقانون ونفتح لي كم مادة كدا من نوع الاجهاض الغير شرعي< في واحد شرعي بالمناسبة >
بالاضافة للتستر وحاجات تانية
غايتو حيرتنا وامتعتنا يديك الف عافية
انت وفيصل ناقل الكفر الذي ليس بكافر

[imported_فتحي مسعد حنفي]

قمة المتعة وحرفية عالية جدا
ياخالد مشكلتك شنو مع البراءة
شكلك ذي الزول الماسك ليه قلم اسود وبشخبط في الحيط البيضا
تنسمت عبير الامكنة الخرطوم ٢ مابعيدة من٣ ونادي الاسرة كما حبينا فيهو شقيناهو
مرارات ناس الانقاذ وتعديهم علي الاماكن البتمثل اكترمن مساحات تستثمرها الذهنية الانقاذية <بيوت السكة حديد ونادي الاسرة >
فلفلة والفول الرهيب اسكندرية والبحر
وايام البعثات المصرية والقرو هناك اكتر من البقرو هسي في خلاوي الانقاذ
واكيد اجمل
عجبتني لازمة< وانا كان مالي>
هسي زولك الفي قصة نادية دا ما عارفين نحكم عليه بياتو معيار بي اخلاقنا السودانية ونقول ود السرور اخو البنات الركز وما قال انا مالي
ولا نحكم عليه بي معيار الدين ونقول ليه شيل شيلتك وارجي القيامة وياكاتل الروح وين تروح
والا بالقانون ونفتح لي كم مادة كدا من نوع الاجهاض الغير شرعي< في واحد شرعي بالمناسبة >
بالاضافة للتستر وحاجات تانية
غايتو حيرتنا وامتعتنا يديك الف عافية
انت وفيصل ناقل الكفر الذي ليس بكافر






يابتي أنا اتوقعتك تسألي خالد ليه رواياتو كلها بتبدأ من الأرحام واحدة حامل والتانية برضو قايلنها حامل ودا كلام تحت تحت.بعدين ياريت تعرفي لينا الكفر عشان نشوف لو فيصل ليس بكافر:D

[imported_AMAL]

ودا كلام تحت تحت.

التحت تحت دا انا ما حضرتو يا مسعد لكن متاكدة انها كلها تحت

ياريت تعرفي لينا الكفر عشان نشوف لو فيصل ليس بكافر:D[/size][/color][/QUOTE]


انا سمسميتي رابطة قالو وقالو تحديدا اسال زول اسمو مسعد حنفي اها وكت الله لماني فيك فيدني افادك الله تعريف الكفر ديل الجماعة البخشو النار يوم القيامة عشان بعملوا حاجات ما كويسة ذي العملوها ناس القصة بتاعت خالد دي حاجات قلة الادب ذي ما بقولو الاولاد الصغار
اها عيب لي التعريف دا

[imported_فتحي مسعد حنفي]

التحت تحت دا انا ما حضرتو يا مسعد لكن متاكدة انها كلها تحت

D[/size][/color]


انا سمسميتي رابطة قالو وقالو تحديدا اسال زول اسمو مسعد حنفي اها وكت الله لماني فيك فيدني افادك الله تعريف الكفر ديل الجماعة البخشو النار يوم القيامة عشان بعملوا حاجات ما كويسة ذي العملوها ناس القصة بتاعت خالد دي حاجات قلة الادب ذي ما بقولو الاولاد الصغار
اها عيب لي التعريف دا[/QUOTE]





أهنيك علي شجاعتك في الرد ومبروك نجحتي في الامتحان;) ووقت سمسميتك رابطة يبقي ما محتاجة افادة ولو بالسمسمية برضو محتاجة افادة يبقي أحسن تخليها وتبعدي منها لأنها حتكون فشلت في أداء مهمتها

[imported_فتحي مسعد حنفي]

التحت تحت دا انا ما حضرتو يا مسعد لكن متاكدة انها كلها تحت

D[/size][/color]


انا سمسميتي رابطة قالو وقالو تحديدا اسال زول اسمو مسعد حنفي اها وكت الله لماني فيك فيدني افادك الله تعريف الكفر ديل الجماعة البخشو النار يوم القيامة عشان بعملوا حاجات ما كويسة ذي العملوها ناس القصة بتاعت خالد دي حاجات قلة الادب ذي ما بقولو الاولاد الصغار
اها عيب لي التعريف دا[/QUOTE]




عدنا...التحت تحت مقصود بيهو الكلام المتغطي ..عشان ما تظلميني:rolleyes: بعدين دا منو الأداك سر السمسمية..أخوك خالد راجل مؤدب وما بيعرف حاجات قلة أدب عشان المكان العايش فيهو هسح الحاجات دي عندهم منتهي الأدب..قلة الأدب دي عندنا هناااااااك..أما الكفر دا والله أعلم مقصود بيهو الكورة البلعبو بيها الناس الكبار وللا انتي شايفا شنو:confused:

[imported_AMAL]

عدنا...التحت تحت مقصود بيهو الكلام المتغطي ..عشان ما تظلميني

وانا تحت بقصد بيها دون المستوي ... عشان ما تظلمني::p
rolleyes:
بعدين دا منو الأداك سر السمسمية.

.بابكر مخير

أخوك خالد راجل مؤدب

انا بتكلم عن بطل القصة:confused:


قلة الأدب دي عندنا هناااااااك

قلة الما ادب
ادب القلة
ادب الما قلة
لخبطتني يازول

..أما الكفر دا والله أعلم مقصود بيهو الكورة البلعبو بيها الناس الكبار وللا انتي شايفا شنو:confused:[/quote]

اختلاف مناهج

[imported_فتحي مسعد حنفي]

وانا تحت بقصد بيها دون المستوي ... عشان ما تظلمني::p
rolleyes:
.بابكر مخير
انا بتكلم عن بطل القصة:confused:

قلة الما ادب
ادب القلة
ادب الما قلة
لخبطتني يازول

اختلاف مناهج[/QUOTE]






كدا أنا لازم أعمل حسابي شديد عشان انتي باين عليك زولة ما ساهلة تب وأحسن نعمل تحالف بدل ما نشمت الناس. عشان في ناس قاعدين زي الصقور دايرين يشوفوا القعدة دي حتنتهي علي شنو....أها رأيك شنو في الاقتراح دا وبابكر مخير راجل أثبت لي انو خوتو خوة....ألله يسامحو.هو ناسي انو بتي عضوة في المنتدي وبتوصل لي أمها كل حاجة:(

حاشية: بطل القصة ما هو خالد ذااااتو:D

[imported_AMAL]

يعيش التحالف يعيش

مفيش تعارف

يخلي التحالف يعيش

يعيش اهل بلدي






]

حاشية: بطل القصة ما هو خالد ذااااتو:D[/QUOTE]
عليك النبي
لكن ما فتيتو

[imported_فيصل سعد]

لعناية الاعضاء و الزوار و الجدد :D:D و بطلب بعض المحاربين القدامى،
و لتجديد دماء الرواية و القصة القصيرة و البوح الحميم بسودانيات ..
و كل عام و انتم بخير ..

[imported_نواريا]

شيء جميل انو انا كعضوة جديدة اني اشوف ابداعات سابقة ..

وبصراحة التسلسل ممتع والنهاية غير متوقعة وبعيدة عن الابتذال .. تهانينا يا عمو خالد على ابداعك .. البعيد عن كونه مجرد ضربة هاوي .. بل هو اكثر من ذلك بكثير :)

[imported_أسامة الكاشف]

شكرا يا ود سعد

يا خال
اللغة سلسلة
الأحداث مترابطة
حياة الطلبة خصوصا في المحروسة
عبرت عنها الرواية بصدق
ملاحظات عامة يا خال:

* بعض اللحظات كانت تحتاج تكثيف (لحظة الإعلان عن الحمل.. الإجهاض)
* الحياة اليومية العادية وتفاصيلها الممتعة كان من الممكن أن تكون أكثر ثراءاً وتصب في
مصلحة السرد.

في إنتظار الجديد وما تتأخر يا خال

[imported_فيصل سعد]

مرحب يا سمسم ..
و معك في انتظار الجديد ..
و برضو تقول لي انقلاب :D:D

[imported_فيصل سعد]

يرفع استجابة لطلبات
كثيرة و متعددة :D:D

[imported_فيصل سعد]

عودة الي الارشيف ما بطالة،
كسرا للروتين و الجمود، و مزيدا
من الاطلاع و تواصل اجيال البوستات
بسودانيات ..

ارقدوا عافية ..

[imported_فيصل سعد]

و عودة الى زمن جميل ..

[imported_خالد الحاج]

و عودة الى زمن جميل ..

و عودة الى زمن جميل ..

[imported_Amin Bushari]

الخال غايتو بعد بكاك في القصة دي
يا دوب اتــأكدته انك شايقي معتق وزول حنين :D
هي نان البكي تخلي لمنو يا خال looool
لوووووووووووووول
يا ســــلام ســـرد جميل ينساب سهولة وعذوبة كرقه مشاعرك
شكلها الغربة دي قست قلبك غايتو:mad:

تسلم يا فيصل لمنحنا فرصة قراءة بكا الخال :D

[imported_عثمان]

يااااه رواية رائعة حقيقة والله
بطعم ومذاق خالد الحاج بتشبه جمالك والله يا خالد
لكن يا خالد يعلم الله ويشهد حسيت إنو "جمال" ده
بيشبهك شديد والله لدرجة حسيت إنو ممكن "جمال" ده
يكون "خالد الحاج"

العزيز فيصل مشكور على الجهد المقدر يا سيد الناس

[imported_ميسون مطر]

أكتر مخلوق كسلان فيما يتعلق "بالقراية" هو شخسى الضعيف

ولكن...شدتنى عيون نادية ...فغصت فيها بما يكفى لتحويل مشروع "شوربة الدجاج" خاصتى ، الى دجاج مشوى كبريتى اللون ويحتاج الى قوة جذب وشد لاقناعه بأن الالتصاق بقاع "الحلة" ليس فكرة جيدة!

رواية يا خالى ...تراودنى عن "عزلتى" وتدعونى الى قراءتها أكثر من مرة ..فى سابقة لا تتكرر بسهولة...(حصلت لى مرة واحدة بس مع احداثيات الانسان لعزيزنا محسن خالد)


أشكرك بكل قوتى يا فيصل سعد ..لنفخ الروح فى صفحات الرواية ..ولا امتاعنا الممتن لك

[imported_قرقاش]

جميله ..جميله ..
لو لاحظتوا بجددوها كل سنه شهر 12...
فى القصهخ زعلنى طارق ..اريته طارق السواد والرماد دى عمليه يعملها فى ذمتكم ..؟

[imported_فيصل سعد]

امين - عثمان - ميسون -قرقاش
لكم التحايا و الود المقيم ..

و كونوا بخير ..

[imported_فتحي مسعد حنفي]

امين - عثمان - ميسون -قرقاش
لكم التحايا و الود المقيم ..

و كونوا بخير ..


تعرف يافيصل الموضوع دا من أجمل ما قرأت لخالد الحاج وقد سبق أن طلبت منو المواصلة في هذا الخط ولكنو نفض لي..

[imported_فيصل سعد]

تعرف يافيصل الموضوع دا من أجمل ما قرأت لخالد الحاج وقد سبق أن طلبت منو المواصلة في هذا الخط ولكنو نفض لي..

سلام يا لورد و ان شاء الله روقة
و مرحب بيك و بطلتك الوريفة loooollooool

[imported_فيصل سعد]

لو لاحظتوا بجددوها كل سنه شهر 12...



التحايا يا قرقاش .. و هذا العام نرفعها لمزيدا من القراءة و الاطلاع شهرين قبل ديسمبر.. و يمكن للامين العام او المشرف الفني بنقل هذا البوست العاطر الى منتدى الراحل المقيم له واسع الرحمة و المغفرة ..