القطار فى خارطة الغناء السودانى

[imported_Garcia]

http://sudaniyat.net/vb/images/uploads/210_3024844bcad34581a3.jpg

كلمات كثيرة وجدت حيز كبير من جانب شعراء الاغنية السودانية , مثل : العيون والشعر و ... الخ
لاحظت ايضا ان القطار ايضا له وجود فى كثير, من الاغانى وغالبا ما يكون الاشارة للسفر والحنين ..
للقرية او الشوق للاهل وللمحبوب او المحبوبة ..
نحاول فى هذه العجالة القاء الضؤ على اهم تلك القصائد و الاغنيات :

* يا قطار الشوق متين ترحل تودينا
نزور بلدا حنان اهلا ترسي هناك ترسينا

*القطار المر
فيه مر حبيبي
بالعلى ما مر
يا الشلت مريودي
وفى مقطع آخر قال الشاعر :
القطار يتهادى
حل في وادينا
يلا نجري نشوفه
المن زمان ناسينا
وختمها بلعنة غضب للقطار لانه اخذ مريوده :
يا القطار تدشدش
يا الشلت مريودي


ونواصل

[imported_عطر]

http://www.indymedia.no/usermedia/video/5/55.wmv

[imported_Garcia]

العزيزة عطر
الله عليك وعلى ذوقك الراقى والرفيع جدا ,
وبينى وبينك الشوق طال والغربة حجرت قلوبنا ..
وصدق من قال : الغربة ان شاء الله تعقرى المال الفقرى ...

[imported_wadosman]

الاخ جااارسيا....

دايما متفرد فى مواضيعك و بوستاتك...
الغناء السوداانى تطرق للكثير من الموااضيع
الحياتية و التى ترتبط بحياة النااس و حركتهم و ترحاالهم
القطاار اخذ قسطا كبيرا فى الاغنياات السودانية و ذلك
لارتباطه الوثيق و قتها بالسفر و الودااع و الفراااق
و هذه كلها ارض خصبة لميلاد قصيدة تترجم بعدها
الى اغنية بعد اضاافة اللحن و الموسيقى.....
كل محااور الاغاانى التى قيلت فى القطاار كانت تدور
حول سفر المحبوب و فراقه...كما كانت ايضا تتحدث عن
لحظاات الوداع عند السفر....
انا ياا القطاار دمعى ساال
يوم حبيبى ودعنى

كدا خلينا نشوف دفاترنا القديمة و نجيك رااجعين تاانى...

تحيااات.....

سندة:
القطار المر
فيه مر حبيبي
بالعلى ما مر
يا الشلت مريودي

في الرصيف مستني
وللثواني احاسب
امتى يظهر نورو
الليه ديمة اراقب
القى فيه هناى
يلقى فيني هناهو
ننسجم لريدنا
الكان يا مريودي

الاشرجي تراه
للاشارة اداهو
فتحوا السنفور
لمروره براهو
قلبي زاد خفقانه
و زاد كمان في ولاه
للحبيب الماري
الليهو زاد شوقي

القطار يتهادى
حل في وادينا
يلا نجري نشوفه
المن زمان ناسينا
في السلامة سلامة
اه انا الجنيتها
في المحطة بكيتها
يا القطار تدشدش
يا الشلت مريودي

[imported_Garcia]

كل محااور الاغاانى التى قيلت فى القطاار كانت تدور
حول سفر المحبوب و فراقه...كما كانت ايضا تتحدث عن
لحظاات الوداع عند السفر....
انا ياا القطاار دمعى ساال
يوم حبيبى ودعنى

كدا خلينا نشوف دفاترنا القديمة و نجيك رااجعين تاانى...


الصديق ودعثمان
تسلم لمرورك الانيق دوما واضافتك المميزة لهذا البوست ,
واصل معى فى النبش واعلم ان جرابك مليان ..
وتشكر لوضع نص اغنية القطار المر كاملة ..
وفى انتظارك حتى تعود ...

[imported_Garcia]

* اغنية فلق الصباح/ لخليل فرح
حين صدح بها الكاشف

عزه قومي كفاك نومك
ما كفاك دلال يومك
إنت يا الكبرتوك
البنات فاتوك
في القطار الطار
فلق الصباح
آهو نورك لاح قول لي
يا خفيف الروح خِلي
هو هذا نداك
أم ندي الأزهار

[Ismat]

الاديب ...الاريب.العزيز جارسيا...


السفر فى وجدان وخيال السودانيين ارتحال يستدعى نزف الحزن..ويستجدى الدمع.ويهتك ستار رهافةالحنين والحنان..له طقوسه المصاحبه...بداية بقفة الزاد... ولقد تغنى به الشعراء شعرا وصدح به الفنانون..ووسيلةالسفر التى فى خيال الرؤيا الاكثر اثاره وجدل هو القطار.لم يغنوا للمراكب وهى تعبر النيل الا فى الاسكله.وحلا...ولم يغنوا للسفن وهى تقطع البحار...غنوا للقطار والتجمع فى تلك المحطات للوداع تلك الطقوس التى هى جزء من وجع السفر.ولان القطار يطوى المسافات وينهب بصرير عجلاته الارض وهو على تلك القضبان..يقف فى المحطه ليفرق شحنه ويتلقى اخرى فى تجاذب حالات الفراق المر والاستقبال الفرح..والايادى تلوح والعيون تزرف والمسافات تتباعد..وللقادمين العيون تفرح والاحضان تلتحم والفرح يطفو .وتهدا سكينة الاشجان

ودعونا ننبش فى خواطر الذكرى عن القطارات المشهوره التى حملت حزن السنين وفرقت بين الاحباب..

سفرى السبب لى ازاى.....للشاعر حسن عوض ابو العلا.. حس الرحله الى مصر بالقطار حتى حلفا ثم العبور الى اسوان ثم قطار للقاهره.. الاغنيه فيها حنين الفراق واذى التوقع..!!
وهناك قطار ود القرشى الشهير .وهو يدشدش وهو يحول بين المحبوب..وقطار الشوق الى عطبره.ذلك العشق اللهفه والاحتراق..وانا يا القطار انا دمعى سال يوم حبيبى ودعته..للفنان صالح
ولعل السفرفى قطار خواطر الاحساس وزمن الفراق يفصل بين الاحبه ويشرد الاحساس بمعنى وجع الفراق يعطى احساس ايلام السفر..

جارسيا..
وكما قال الفنان ود عثمان وهو خبير بالاغانى وايقاع التطريب والدوزنه وهو دائما من اعظم قيادات القوات محموله فنا وطربا..طلب المهله كى يبحث عن دفاتره القديمه...وسكك ريد عشقه ومحطات سفره القديمه.انا متاكد انه يضم ورش تفوق ورش عطبره فى زمنها الذهبى...ان لم يفق بريتش ريل بقوة طغيانها...

وننتظره وهو يقلب الدفاتر ويثير غبار اتربة السفر...الاشتياق واللهفه والريد والعذاب
له الحب ..ذلك الرائع...
ولك جارسيا وانت تسجل كل يوم سبقا وتفتح نافذه جديده ..وتسبح بنا فى زمانك التنوع الجمال..
كل الحب

[imported_wadosman]

قيادات القوات محموله فنا وطربا..طلب المهله كى يبحث عن دفاتره القديمه...وسكك ريد عشقه ومحطات سفره القديمه.انا متاكد انه يضم ورش تفوق ورش عطبره فى زمنها الذهبى...ان لم يفق بريتش ريل بقوة طغيانها...

وننتظره وهو يقلب الدفاتر ويثير غبار اتربة السفر...الاشتياق واللهفه والريد والعذاب
له الحب ..ذلك الرائع...
ولك جارسيا وانت تسجل كل يوم سبقا وتفتح نافذه جديده ..وتسبح بنا فى زمانك التنوع الجمال..
كل الحب

القوااات المحمولة جاااهزة...و فى انتظاار التعليماات
التحية لك الاخ عصمت..و بكم و بالجميع هناااا
ينتعش هذا البوست الرااائع...لتكتمل السياااحة
بالقطااار فى وااحة الاغنياات السوداانية......

كل مودتى و تقديرى....


الفارقت ما لقيتا
الليلة وين ياروحي
الفارقت سيد روحا
شوفي كيفن رايق
يفتخر بي تيهو
صوريلو عيوني الباكية من عينيهو
أعرضيلو قليبي المخلص الحابيهو
لا تهابو جمالو والدلال البيهو
قولي ليهو سميرك أمسك المجنون
الليلة وين يا روحي
كم جلست معاهو واحتميت بي نورو
كم قسمت معاهو الحب وذقت سرور
كم تعبت معاهو يوم حرقني نفورو
هو الحبيب الحازم والوديع في خدورو
بلغيهوا سلامي الحاجبو يحكي النون
الليلة وين يا روحي
القطار فرقنا
ليه القطار فرقنا
أه حزنا ملكنا
بي انتصار روحنا
برانا نحنا برعنا
في الرمال الباسمة
تحت الرياض مجلسنا
فيها هل هلالو
بين ربوعا نشأنا
الوداع يا حبيبي
ربي لينا يصون
الليلة وين يا روحي
الفارقت سيد ريدا
ياروحي

[imported_Garcia]

العزيز / عصمت العالم
لك كل التحية والتقدير وانت تسكب هذا البوست من معينك الخصب والاصيل ,
تعرف الذى اورد لى فكرة هذا الموضوع منظر ذلك القطار وهو يشق احدى المحطات ..
واعجبتنى ملاحظتك الدقيقة عن كثرة كتابة الشعر حول القطار , وقلة من كتبوا حول
السفر بالمراكب وهى نقطة جديرة بالوقوف عندها ..
واحدى الاغنيات جاء فيها :
انا ما داير السفر لكن بس حكم القدر
وينو الحبيب انت شلتو جيبو يا القطار

ومؤكد ودعثمان له صولات وجولات فى هذا البوست , وهو له متابعة عميقة لعالم
الاغنية والشعر السودانى , ونعطيه مهلة للتنقيب والغوص فى هذا المجال الرحب ..
ومؤكد تحضرنا اغنية :
انا يا البلال وين قالوا لى سافر
يا السفروك وبالقطار ودوك
ولك عميق التقدير والود لاضافتك المميزة جدا , مع خالص المودة والاعزاز

[imported_Garcia]

القوااات المحمولة جاااهزة...و فى انتظاار التعليماات
التحية لك الاخ عصمت..و بكم و بالجميع هناااا
ينتعش هذا البوست الرااائع...لتكتمل السياااحة
بالقطااار فى وااحة الاغنياات السوداانية......

الله عليك ياودعثمان , وما اجملها من بداية مدهشة ورائعة
وما اروع السياحة معك بدرر ود القرشى ..

[imported_wadosman]

..وانا يا القطار انا دمعى سال يوم حبيبى ودعته..للفنان صالح



الرجاء ايقااف الاغنية فى اول البوست للاستماع لهذه الاغنية

http://andorra.indymedia.org/uploads/2006/07/gittar.wma
لينك الحفظ (http://andorra.indymedia.org/uploads/2006/07/gittar.wma)

[imported_نزار حسن علي]

http://sudaniyat.net/vb/images/uploads/210_3024844bcad34581a3.jpg

كلمات كثيرة وجدت حيز كبير من جانب شعراء الاغنية السودانية , مثل : العيون والشعر و ... الخ
لاحظت ايضا ان القطار ايضا له وجود فى كثير, من الاغانى وغالبا ما يكون الاشارة للسفر والحنين ..
للقرية او الشوق للاهل وللمحبوب او المحبوبة ..
نحاول فى هذه العجالة القاء الضؤ على اهم تلك القصائد و الاغنيات :

* يا قطار الشوق متين ترحل تودينا
نزور بلدا حنان اهلا ترسي هناك ترسينا

*القطار المر
فيه مر حبيبي
بالعلى ما مر
يا الشلت مريودي
وفى مقطع آخر قال الشاعر :
القطار يتهادى
حل في وادينا
يلا نجري نشوفه
المن زمان ناسينا
وختمها بلعنة غضب للقطار لانه اخذ مريوده :
يا القطار تدشدش
يا الشلت مريودي


ونواصل


الأخ/ غارسيا
لك الود والحب ايها الرائع بمعني الكلمة ونحنا هنا قاعدين عيل الهبشة ونتمني من الله يحفظك يا رائع واتمني مزيدا من المختارات حتي نتنفس هواء صادق بدلا من الهواء المخلوط بكل شئ ودام الحب بيننا
اخوك
نزار حسن علي
دوحة الجميع
دولة قطر

[imported_عبد الوهاب هنداوى]

قارسيا لك الود ايها المبدع
القطار لقد بقى فى حد الذكريات
والقطار قد مره منذ زمن من خاطرة الوطن بس
الجميل بان الافزاز من شعراءنا الغنائيين وشعراء
المديح قد ارخوا للقطرات وحملوها كثير من اللوم
وكثير من الاشواق والخطابات وها انت تثير فينا الذكريات
التى نقلتنى الى ايام الحجاج ووداعهم بالزغاريد والمديح
ولك الود ......................هنداوى

[imported_Garcia]

الاخ نزار حسن علي
اشكر مرورك الانيق من هنا , وكلماتك الطيبة حول البوست ..
واعتقد ان منظر القطار وحده يكفى لاثارة الذكريات بحلوها ومرها ..
ولك كل الود والتقدير ...

[imported_Garcia]

الاخ الجميل / عبد الوهاب هنداوى
ذكريات السفر بالقطار لها متعة خاصة وفريدة ,
وتظل الرحلة عالقة بالذهن رغم طول الطريق
والتعب , اذكر مرة كنا فى رحلة لبورتسودان
وحدث عطل فى القطار وتحديدا فى منطقة
دورديب , ولحسن الحظ كنا مجموعة كبيرة
قضينا يومين لا توصف حتى تم اصلاح العطل ..
رقم سهولة السفر الان بالطائرة الا انها لا تحرك
المشاعر لكتابة خاطرة او قصيدة مثلا ..

[Ismat]

العزيز جارسيا..


ولعل ود عثمان الفنان..غرق فى وحيح نحيبه.وهو يسترجع صوت زنقارالمغرد....والاحتراق الوية من نيران لهيب جهنم..

من بف نفسك يا القطار.
ولهيب نارك.
قلبى طار..
وين الحبيب.
انت شلتو..
جيبه..يا القطار..

احتراق وذلك القطار الذى يسيربوقود دفع الوقود الاحتراق وهو يبخ انفاسه ذلك الدخان المسترسل الذى يضفى على اجواء السفر كل غلالة الغموض ويرسم ملامح المجهول ويشكل رهبة ووجع وحريق للفراق..
وانا ما داير السفر.
لكن حكم القدر...

لتعود حوجة الحنين تسد الحلوق وغصة الاسى تتمدد وهى تزرف كل حزن الدموع.
مااقسى الفراق..
ونتذكر الاغنيه الشهيره حين هاجر ابن من ديار الشايقيه الى العاصمه.وهو يسال امه..
يمه ارسلى عفوك..

وكانت زمنها الخرطوم مفازه وبعبع ارتحال يبتلع كل قادم .والقادمون يقدمون رجلا وياخرون الاخرى..ولعلنا نذكر كل تلك الانديه ابناء القرير.وابنا الكسمبر واولاد الزومه.وكثير.فى تلك الانديه يريدون ان يعيشوا ارتباط الالتاصق بمن قدموا من مناطقهم..واتوا للعاصمه..
ذلك الزمن كانت تلك المشاهد فزع ارتحال.وكيف الان اغلب اهل البلاد تفرقوا على ارض الله الواسعه..واصبحوا مهجرين وابناءيولدون فى الغربه..ويكبرون ويصبحون مواطنين للدول التى ولدوا فيها..
ولا يزال الحنين يردد..
وين الحبيب انت شلتو.
جيبه يا القطار..


الاحباب..
لعلها رحلة الشجون.ونحن نمتطى قطار الحياه منذ الطفوله الى الكهوله ومررنا على محطات كثيره نتظر ان نترجل عند محطتنا الاخيره حيث النهايه.نراجع فى صور الذكريات المحطات ورفقة السفر والاحباب والاصدقاء والزماله والايام الحلوه والمره ويشدنا الحنين الجارف..

ونواصل البحث عن القطار ومحطاته فى الغناء السودانى...
عميق الحب

[imported_منعم ابراهيم]

ياحليلا ...بلا عدل
قالو شالا
قطار الاحد..


السفر بالقطار ممتع ..رغم مابه من رهق ...لكن ..بيني وبينكم...قلنا نشاركم
الوردية :D :D

مرة اتقلبت بينا عربية قطر
في غرب السودان

بين الفولة وبابنوسة

قريب من محطة "بوطا"

لحدي هسسه ..الخوفة الدخلت فيني مامرقت.. :confused: :confused:

الا قطاراتكم دي مزازيكا ألف
لكم التحية

[imported_Garcia]

من بف نفسك يا القطار.
ولهيب نارك.
قلبى طار..
وين الحبيب.
انت شلتو..
جيبه..يا القطار..

الله عليك يا عصت بفتش ليها لى زمن وراح لى مقطعها الاول ,
وما اروع تتبعك لهذه الاغانى بوصفك وتحليلك الجميل ..
واصل فى هذا الابداع والروعة ..

[imported_Garcia]

مرة اتقلبت بينا عربية قطر
في غرب السودان

بين الفولة وبابنوسة

قريب من محطة "بوطا"

لحدي هسسه ..الخوفة الدخلت فيني مامرقت..

اتكتب ليكم عمر جديد يامنعم , واكيد دى ما ممكن تتنسى بسهولة ...


الا قطاراتكم دي مزازيكا ألف

يازول كيف دة كلامك , اسى مفكرين نعمل تذاكر للبوست دة :D :D
ودرجة اولى وثانية , بس سطيح ما معانا :rolleyes:

مع اطيب تحياتى ..

[Ismat]

جارسيا ...الاديب


وجداننا تتشكل وترتبط وتختلط بالحنين الدافق,,تكسرنا اشارات التعاطف وتاسرنا ملامح الرقه..ولذا تضمن الغناء عندنا كما هائلا من هذا الزخم.ومن شجون اللحظه..
ويرتد صوت فاطمه الحاج.. وهو يوح بفجعة الفراق..
يا مسافر فراقك لى صعيب.
من بعدك حياتى.كيف تطيب...


لينتقل المشهد لشاعر تقلد القلم ولبس الزى العسكرى..واستنطق حرقة الحنين واعتصر حس الفراق...الشاعر عبد المنعم عبد الحى..
قالوا ليه القطر تقدم..
كفره نيرانه ذى جهنم...

وقوات الحلفاء تواجه قوات الدوتشى فى صراع البقاء...

دائما يختلط حس الاسى وحزن الشجون ودمع الفراق.ليويلد ذلك الاعتصار المريع..
وخلايا خبايا الحس يهتكها كل ذلك الاجتياح...
ونواصل الرحله والقطار يحملنا فى زمانه الرحيل الفراق...

كل الحب

[imported_wadosman]

العزيز جارسيا..


ولعل ود عثمان الفنان..غرق فى وحيح نحيبه.وهو يسترجع صوت زنقارالمغرد....والاحتراق الوية من نيران لهيب جهنم..

من بف نفسك يا القطار.
ولهيب نارك.
قلبى طار..
وين الحبيب.
انت شلتو..
جيبه..يا القطار..

احتراق وذلك القطار الذى يسيربوقود دفع الوقود الاحتراق وهو يبخ انفاسه ذلك الدخان المسترسل الذى يضفى على اجواء السفر كل غلالة الغموض ويرسم ملامح المجهول ويشكل رهبة ووجع وحريق للفراق..
وانا ما داير السفر.
لكن حكم القدر...




http://andorra.indymedia.org/uploads/2006/07/algitar_zingar.mp3

لينك الحفظ (http://andorra.indymedia.org/uploads/2006/07/algitar_zingar.mp3)

[imported_حجة امنة]

ازيك ... يا جارسيا

اسمع القطار المر ...

بى حس محمود عبد العزيز ...


http://www.elhoot.net/Music/Elgtaar.wma

[imported_حجة امنة]

وبى حس عثمان الشفيع

http://www.alsudanonline.com/SudanMusic/alshfee/algitar.wma

[imported_Garcia]

العزيزة حجة امنة
مرحب بطلتك الجميلة من هنا , ونرحب بك فى قطار الذكريات
وما اجمل واروع هديتك لينا , اداء محمود لهذه الاغنية يفوق
الوصف وتصدقى لدى هذا التسجيل منذ مدة طويلة واسمعه
كل ما اجد فرصة , واسى شجعتينى انبش الشنطة من جديد :D
اضافة لاداءه اغنية ( ليل الشجن ) بنفس تلك الروعة ..

الاغنية بصوت الشفيع ما شغالة ما عارف ليه ؟؟؟
لك كل الود والتقدير , والى المحطة القادمة

[imported_حمدي اب جقادو]

قروووس ياصديقي الجميل

رايك شنو انزل ليك اغنية
القطر الشال حمدتو يتكسر بي جماعتو
القطر الشال معاويه يتفرتق زاويه زاويه
وين ياحبيبي ليه جورك انت علي :D

والله انا جادي ودي بالفعل استشاره باعتبارك صاحب البوست :D

الاغنيه دي انا محتفظ بيها من ايام السعوديه في ايميلي :D

ابقي زي ماانت كده قمر وشمس
وكل الحاجات التانيه ديك :D

جقجق

[imported_Garcia]

رايك شنو انزل ليك اغنية
القطر الشال حمدتو يتكسر بي جماعتو
القطر الشال معاويه يتفرتق زاويه زاويه
وين ياحبيبي ليه جورك انت علي

اوه جقجق يا جميل, شكلك داير تفرتق لى البوست دة ولاشنو :D
يازول نزل القطر قطرك وكان ما كفاك ليك قمرة كاملة ;)
وكتر لينا من الحاجات الثانية حاميانى فى الخاص :p
وفى انتظار حمدتو ومعاوية .

[imported_فيصل سعد]

الاعزاء جارسيا و الجميع هنا :
سلام و تحايا و نشارك معكم هذا البوست الشحمان.

من فتيح للخور للمغالق
من علايل ابروف للمزالق
قدله يا مولاي حافي حالق
بالطريق الشاقي الترام

[imported_Garcia]

كنا فرشنا السكة ورود لوكلمتنا كان بالجية
http://sudaniyat.net/vb/images/uploads/210_1411344bff426b306e.jpg

الاخ العزيز المسافة
وينك يا زول يا جميل الغيبة دى كدة ,
سعيدين بطلتك الجميلة وعساك طيب ,
ولو كنت اعلم انه البوست دة بجيبك كان ,
جبت ليك كل قطارات السكة حديد هنا :D

وهاك دى صورة من الزمن الجميل :

http://sudaniyat.net/vb/images/uploads/210_1442344bff53a885b8.jpg

[imported_wadosman]

اسالوه
اسالوه قايل الناس نسوه....
يوم سافر قطاري ....
يوم لهلبت ناري ....
يوم ودعت حبي ...
يا ناس انا دمعي جاري....
كيف قاعد مطمن ...
سحر الريم يجنن .....
ومن تاثير عيونك ....
لحياتي مامن ......
يا السمرة الحبيبة ...
يا النادية الرطيبة ....
ادوب في القصر العيني .....
وتنغزني الطبيبة .....

مهلا لا تغيري ....
انا اتقرر مصيري ......
سجنك لي يا ساحرة ....
اه لو ضاقو غيري ......
يا مسافر براك .....
كيف تنسى هواك .....
انا قلبي حباك .....
وبسافر معاك ........

[imported_Garcia]

يوم سافر قطاري ....
يوم لهلبت ناري ....

ودعثمان يارائع
ما اجمل نبشك وغوصك البديع , فى عالم الاغنيات
التى تناولت القطار ومعه لهيب الشوق من مرارة
الفراق والوداع ...
ويبدو ان القطار موجود فى عدد كبير من الاغنيات
التى قد لا ننتبه لها فى الغالب ...
اغنية من بف نفسك يا القطار ,لم اتمكن من سماعها
لا ادرى لماذا ؟؟

[imported_علي حاج علي]

العزيز قارسيا ... لك الود والتقدير
القطار ذلك الحياة الذي يسير على الارض ويحمل معه الاشواق والافراح والاحزان ... وله مكانة كبيرة عند كل من تنقلوا به او سمعوا عنه ولم يتمتعوا بتجربة الامتاع بالسفر عبره وانين العجلات ونغمة الصفارة للقاطرة واناقة الكمساري والبعض لا يتحمل الفراق للقطار ويقوم بكتابة تذكار من فلان الفلاني من ابناء منطقة كدا بعد ان يكون كتب ليهو بيتين شعر وكده ... انتقلت هذه الالفة للشعراء والفنانين ليسطروا اروع الاغنيات حول فكرة القطار ... اعجبتني ابيات ود القرشي
الاشرجي تراه
للاشارة اداهو
نزلوا الصنفور
لي مرورو براهو
في هذه الابيات نشر لنا الشاعر ثقافة السكة الحديد وتناول وظيفة الاشرجي ( قسم الاشارة ) والاشرجي هو من يحدد للقطار المرور ويعطيه الضوء ... الصنفور ( ممكن واحد يقول ليك واقف ذي الصنفور ) وبالمناسبة لو قال ليك كده انا اعتبرها حاجة كويسة ... الصنفور هو عمود من الحديد في اعلاه قائم يشكل مع العمود في الاعلي زاوية قائمة وفي هذه الحالة يكون الصنفور مقفول عندما يكون في شكل زاوية قائمة بحيث يظهر الضوء الاحمر علامة الخطر ... ولمن يقول ليك نزلوا الصنفور ياخذ في الاعلي شكل زاوية حادة بعد ان ينزل القائم الى الاسفل ومع نزول القائم ناحية الاسفل يظهر الضوء الاخضر علامة المرور شفته كيف العملية جميلة ... اتخيل نفسك واقف في المحطة ومنتظر ينزلوا الصنفور للقطار وكل مرة تتاوق بي راسك وتقول الصنفور لسه ما نزلوهوا ... بعد عملية انزال الصنفور يقوم ناظر المحطة بدق الجرس للركاب حتى يصعدوا القطار ... بعدين في حاجة تانية اسمها ( التابلت ) وهي تكون في المحطات الرئيسية وهي عبارة عن سلكة او حديدة دائرية يقوم ناظر المحطة عند مرور القطار بمحطته برميها للسواق في عملية هندسية فنية رائعة ويا ريت القطار يرجع تاني علشان نستمتع بها ... المهم هذا التابلت هو ضمان المرور للقطار بان لا يوجد قطار مقابل له على الخط ... وثقافة السكة الحديد يطول الكلام حولها وحول عمالها المثقفين الذين نتمنى ان يعودوا ليحركوا السكة الحديد الى عهدها الاول .
ولك كل الود

[imported_Garcia]

العزيز / جيفارا
احيى مرورك الرائع من هنا واضافتك القيمة والمميزة للبوست ,
والتى اضافت الكثير وخاصة استشهادك بابيات ودالقرشى البديعة ,
وشرحك للابيات وتفكيكها بهذه الصورة الجميلة ..
نحيى معك من هنا عمال نقابة السكة حديد الاشاوس ..
ولدى احساس انك عطبراوى على السكين يا جيفارا ..
مع خالص الود والتقدير ..

[imported_wadosman]

الاخ جااارسيا...

شوية مشغوليااات.....

القطر فى الغناء الشااايقى له صولاااات و جولااات..و كما
هو معروف قطر كريمة كانت له شهرة واسعة بين اهاالى المديرية
الشماالية...و كان معروفا بقطر الاحد ولقد جاءت قصائد و اغنيات
كثيرة عن قطر الاحد...و من اكثر الشعراء الذين ضمنوا قطر الاحد فى
قصايدهم الشااعر السر عثماان الطيب وكمثاال قصيدته المشهور بت البلد
التى تغنى بها الفناان محمد كرم الله...بلا خبر قالو العريس قام بالاحد...
سوف نتعرض لهذه الاغنية لاحقا....

القصيدة التالية و التى يتغنى بها الفنان ود اليمنى و التى لا اعرف شااعرها
هذه القصيدة او الاغنية سلكت منحنى يختلف عن بااقى الاغنيااات فهى تتحدث
عن رحلة المحبوبة من كريمة حتى الخرطوم..فهى تحكى عن متاابعة الشااعر لسفر
محبوبته من ساعة قيامها و حتى وصولها الى محطة الخرطوم....
ذكر الشااعر اغلب اسااامى المحطااات التى يمر بها القطاار فى رحلته من كريمة
حتى الخرطوم...و كل هذه المحطااات معروفة تماما لسكااان المديرية الشماالية من رواد
القطاار فى ذلك الوقت...
الاغنية ملئية بالاحاااسيس و الشوق و الحنين لملاقاة المحبوبة و ذلك عكس اغلب الاغنيااات
الاخرى التى تحدثت عن القطااار من منحنى الفراااق و الوداااع....




احمد الله الخاااطر انجبر
جانى زولا شااايل الخبر
و قال لى محبوبتك فى القطر
احمد الله الخاااطر انجبر
فاااقد الجنحين يطير فر
فيهو ستى السمحة ام جهل
يا الضريحا فوق البحر
و القطر هون لو اليصل
فى طريقو لا يحصل خطر
لا دعاااش لا هواء لا مطر
الليل ام رهو ادوها الخبر
بافرح داير تصل القمر
الله فوق محمودة الخصل
القمرة فوق قمرة من القطر
طبا فى الكاااب شايل الشباب
يا الوديحية اهل الكتااااب

http://andorra.indymedia.org/uploads/2006/07/fi_algatar.wma

[imported_Garcia]

العزيز ودعثمان
لك كل الود والتحية , وعذرا للانقطاع لبعض المشاغل ,
اتابع بكل نهم غوصك الجميل دوما الذى يضئ هذا البوست ,
وهذه المرة القطار فى الشعر والغناء الشايقى الملئ بالحنين ,
والشوق الدفاق والوصف الصادق والمعبر وبساطة المفردات ..
تخريمة : قطعت بالامس رحلة بالقطار داخل الاراضى المنخفضة ,
تذكرت هذا البوست وقارنت بقطاراتنا وسرعتها البطيئة والتى كنا ,
فى السابق ننزل ونقضى بعض الاغراض ونعود ونلحق به مرة اخرى ,,
ولك كل السلام , ولى عودة

[Ismat]

العزيز الاديب جارسيا


لعل قطار سيد خليفه فيه ذ لك الوجع..
القطر....القطر..
نويت...السفر..
حبيبى.حبيبى..

ونرحل الى الكاشف وهو يتسال..
الحبيب ...وين.قالوا لى...سافر...
ثم بكاء الحلنقى .ووحيح على ابراهيم...فى كسلا الوريفه..
وحتى السواقى..بكت معايا..
وشاركت فى وداع قطاره...

ولعلنا نعود القهقرى..
طار قلبى ...منى.
اذا الوداع يا قلبى وحبيبى...
واهلا اذايا الحير..طبيبى..
فارقنى...حبى..
اتاح يا رقيبى..
يا نجوم....سعودى..
اتلاشى...غيبى


ونحن نقف على سكون اللحظه.....وصفير القطار يرحل بنا فى سفر الذكريات...وياله من سفر الشجون الاحتراق...نعيد الماضى من اول من اول الخطى اليانعه..ونحس بفداحة الخسران والضياع...
يا لحزن الجراح النزيف...والمحطات تتباعد والقطار يطوى المسافات وكل ينزل فى محطة رحيله لا تاخير ولا وقوف...ولا تعطيل ..ولا مجامله..

ونقول الوداع..
انها ذلك اللهيب الاحتراق..
يا ازمنة الضجيج...
يا سواحل الفراق....

الاديب جارسيا..
انت اعلم برعش همس حسى حين نطرق تلك الازمنه...ونحن نستعد للرحيل..ولا ندرى توقيت صفارة القطار..انها فى غيب العدم

كل الود

[imported_فيصل سعد]

والبال إشتعَل
السكة الحديد .. يا عمو القَطَر
يا عبدالرحيم قِدّامك قطر
وسال الدم .. مطر
وطارت دمعتين وإنشايح وتر
يا طاحن الخبر
ما بين القضا ومَرْحاكة القدر
الشِّهدوا الدموم والدمع الهَدَر
إيدُمْ فى التُراب والعين فى القطر
عارفين الحصل
عارفين فى حذر
الخبر اليقين بوّخ وإنتشر
أطفال القرى وعمال الحضَر
أدوهو الطيور ودنّوا البحر
إنصاعت سحاب
وإنْدافَقْ مطر
عم عبد الرحيم فى الشارع عَصر
لى تالا اليسار
متفادى الكَجر دورية الكجر
جفّلت الحُمار وطلوَح زى حجر
وعم عبد الرحيم إتلافا القطر

[imported_wadosman]

الشاغل الافكار
محمد عوض الكريم القرشي

الشاغل الافكار
سلمتو قلبي وسار
هل من عوده لي
قابلتو دون ستار
سعدت بيه مرار
اخلص لي والاخلاص
يا ربي دومو
ولمست فيه شعور لغيري ما معروف
وتراني ليل ونهار انا اشكي وابكي
الحبيب الشالو القطار
يلاك نزور الديار الفيها قطف الثمار
ريدنا النبيل يا حليلو
يا حليلو ليلنا الطويل
انا كم رشفت رضاك
من فاهو كالسلسبيل
تشهد نجوم الليل تشهد زهور الخميل
وفيما يجدي الملام او يسمر السمار
هل نلمح ظبي الديار
صدفه الحبيب اختار
قربي وهوائي شعار
عرفتو اني محب انظم هوائي اشعار
عرفني انو دان لقلبي دون إشعار
فتعال يا أسفار
يا الشاغل الافكار
نمرح مع الاطيار
والحب يصفو لي ..

[imported_محمد يحيى]

العزيز جارسيا
لك التحايا عبر هذا البوست الرائع واقدم قصيده للشاعر عباس عبد الملك واسمها ترام ابو روف واول مره اعرف ابو روف كان فيها ترام (قطر) مع خالص ودي .

ترام ابروف امس شال السمح معروف
سبقني
قام بيها الترام مخطوف وخلتني التقول مكتوف
آذتني
واصل حبي مامنتوف رويحتي تسوي في التفتوف
احزنتني
يالحارق الحشا والجوف ويانور البصر والشوف
سبيتني
جوه الهجعه طيفها يطوف جزم رشماتها تامن الخوف
جفتني
اخوك يالخايلة صار مأسوف طريتا ودمعي كب نسوف
هلكني
هي حاكمة الدنيا للمسكوف قليب عاشقك عليك معكوف
عازلي دعني
هي ملكه ولابسه الملكوف مناي من ايدها عشرة كفوف
التذيدني
حباب يوم زعلتو المعروف غضب قال لي هاك مصروف
كفتني
ضحك وانحظ ذوق وظروف قلبنا لاشكلة بالمعروف
بسطني
جسيمك ناعماً كالغوف كخز او نرجساً ملفوف
يريعني
بريد شخصك جلوس ووقوف اكون بي عفوكم محفوف
يسعني

[imported_Garcia]

الاعزاء عصمت / المسافة / ودعثمان / محمد يحيى
لكم عاطر الود والتحية , وعذرا للانقطاع لظروف سفر لالمانيا ,
وسأعود لكم قريبا .....

[imported_Garcia]

ونحن نقف على سكون اللحظه.....وصفير القطار يرحل بنا فى سفر الذكريات...وياله من سفر الشجون الاحتراق...نعيد الماضى من اول من اول الخطى اليانعه..ونحس بفداحة الخسران والضياع

العزيز/ عصمت
ما اروعه من سفر مذهل وملهم فى رحاب غوصك الجميل ,
وانت تنبش لنا الماضى بذكرياته العطرة والمشرقة ...
وامدك المولى بوافر الصحة والعافية ..

[imported_Garcia]

الاعزاء / المسافة - ودعثمان
كل التحية والشكر للاضافة المميزة من روائع درر الغناء السودانى ...
الاخ / محمد يحيى
مرحب بطلتك هنا واحيى مرورك الرائع من هنا واضافتك القيمة والمميزة للبوست ..
ولكم عاطر الود والتحايا

[imported_فيصل سعد]

قطار الشوق متين ترحل
ترحل تودينا
نشوف بلدا حنان اهلا
ترسى هناك ترسينا


نسائم عطبرة الحلوة
تهدينا و ترسينا
نقابل فيها ناس طيبين
فراقم كان مبكينا
يا قطار الشوق متين توصل
هناك حبيبنا راجينا
متين نحضن عويناتو
متين يسرع يحيينا


يا قطار الشوق
دا ليل الغربة فيهو ودار
متين تسرع متين
بتكمل المشوار
عشان ما نلقى سيد الناس
و نطفى البينا من النار
نشوفو عيونو نعسانة
و لونو الزاهى كلو نضار


يا قطار الشوق حبيبنا هناك
يحسب فى مسافاتك
و لو تعرف غلاوة الريد
كنت نسيت محطاتك
وكان بدرت فى الميعاد
و كان قللت ساعاتك
و كان حنيت على مرة
و كان حركت عجلاتك

[imported_عمر مجذوب خطيب]

الاحباب الكرام اسمحوا لي بان تكون اولى مساهماتي في هذا الموقع عبر السفر والرحيل ، فالذاكرة السودانية احتفت اكثر من غيرها بوسائل النقل والمواصلات منذ الجمل والقوافل ، احتفاء صيغ شعرا وادبا متفردا، وقد غنى الشايقية للقطار كثيرا كما ادخله الرباطاب في روزنامة سحرهم وسرعة بديهتهم المعهودة.

يا حليلا بلا عدد قالوا شالا قطار الاحد

وخبر العريس الجاييي بي قطر الاحد

والغريبة ان شعراء الشايقية لم يغنوا لقطار الاربعاء والجمعة فهل هذا لدواعي القافية والوزن الشعري ام لكون الاحد في بدايات الاسبوع ربما هذا وربما ذاك وربما شيتا كتر

واغرب من ذلك ان الشعراء يدعون على القطار لانه اخذ المحبوب بعيدا عن حبيبه - ثنائية الرحيل والمكوث وما يتوسط الاثنين من فقد واشتياق - فكم من قطار (رقده الشعراء خردا) قبل ان يعيدوا تجميعه لتسفير احباء اخرين وهكذا دواليك.
مودتي

[imported_فيصل سعد]

مرحب يا عمر و خليك قريب.

من بف نفسك يا القطار
و رزيم صدرك قلبي طار
وين يا الحبيب
انت شلتوا جيبوا
يا القطار

و نادوا لي البريدوا
زي عيني,,,,,,,

[imported_عبد العظيم الطاهر]

الحبيب قارسيا .... كيفنك يا أصيل

بوست .. شحمااان فعلاً زي ما قال اخونا المسافة ... طلع ربيت كتيييير :D

أهل عطبرة .. أيضا هم أكثر احتفاءا بالقطار .. وعطبرة عاصمة الحديد والنار .. ومعظم قاطنيها يعملون في ورش السكة الحديد .. ورشة صيانة العربات ... ورشة القيزنجية .. العطشقية الخ .. وكان لابد من أن يتغنى عملاق عطبرة والسودان وملك الاناشيد الوطنية حسن خليفة العطبراوي للقطار أيضاًالليل وين حن علي يا السافر نساني


قطارو حلا يا ناس قطارو حلا=
الزول مسافرأنا ودعتو الله=
ترك لعمري الآلام والمذله=
*************=
حبينا سافر يا ناس متين رجوعو=
نورو يضوي في ربوعنا وربوعو=
حليل دموعي الكابات فوق دموعو=
**************=
ويصب العطبراوي كل الصبابة والجوى في اغنيته الشهيرة ايضا :-


نسانا حبيبنا ما منظور ينسانا
مالو سافر ودع ما غشانا
حليل الخوة ما قدر عشانا
همسة ...
عصمت العالم ....... وود عثمان .. ما أروعكما

[imported_فيصل سعد]

سلامات عبد العظيم الطاهر و تشكر للمداخلة الانيقة.
يا جماعة انا ماسك (مستلم) البوست لحين عوده صاحبه و بعدين بنتحاسب؟
يعني البوست اصبح في حوزتنا او في الحيز حتى اشعار آخر.
ما تحرمونا من الطلات و الغشوات جميعها!!!

حدادا عندي يوم سافرت
فية بكيت و ما استغفرت
بكل المغاني كفرت
و صفر قطرك انا انتحرت
:o:rolleyes::rolleyes::o

[imported_فيصل سعد]

عزه قومي
كفاك نومك
ما كفاك
دلال يومك
إنت يا
الكبرتوك
البنات فاتوك
في القطار الطار

[imported_فيصل سعد]

قطر الثلاثاء و لا عدم
يا ناس القوز علينا ظلم

[imported_عبد الغني كرم الله]

.......

عزيزي، , وأخي جارثيا، لم تثير الشجن..

القطار.. القطار!!...

كنت طفل، حين تحسست جوارح بلدي به، أنا الطفل الصغير، الفقير، اليتيم، بل حديث اليتم، توفى ابي في نهاية السنة الدراسية، وارسلت لي أختي الكبرى (علوية)، كي اقضي الاجازة الصيفية معهم في بورسودان، ذهبت بشنطة ساذجة، مليئة بالالغاز وتختخ، والصبيان والتسالي، وويكة ارسلتها امي، وبخور التيمان، وجوابات من بنات خالي، لبنات علوية، امي تبكي في المحطة، وانا احدق في مخلوق ليس له نهاية، كحلمي، أنه قرية راحلة، وجوه وسحنات، كنت انظر لمحطة الخرطوم، تخيلت الخرطوم كلها راحلة، بشر بشر بشر، تجار ومرضى وطلاب، خيالي غض، لا يبتعد عن الحدث، يغرق فيه، يسوح فيه، المواسير الكبيرة، حممت رأسي، التصق العرق بالعنق، والشعر، والقيمص، اخفيت على أمي زرارة انقطعت...

باعة هنا ، وهناك، رجل عجوز يشتري جريدة، فتاة تغتني مجلة، وطحنية، ماهذا، لم اتعود على سفر طويل، كل رحلاتي لا تتجاوز 30 كيلو، أربعين كيلو، اكثر قليلا، أو أقل، ماهذا السفر الذي يحتاج لعطام، ومفارش، ومجلات، وبكاء، الجميع يبكي (هل كلهم ايتام مثلي)، لست أدري، قد يكون يتم (احمد شوقي)، ان اليتيم هو الذي تلقى له، (أما تخلت، او أب مشغولا)، كم كنت مذهولا بسعة المحطة، قطارات كتيرة، نحو نيالا، نحو حلفا، نحو بورسودان، وداع واستقبال، نساء تجلس على الصفائح والكنب بانتظار قيام القطار، سيقوم القطار الرابعة عصرا، ونحن منذ الفجر، لم يأتي قطارنا، السكة التي سيقف عليها تمتد خالية، هناك قطارات لمدن أخرى، بنات جميلات، ورجل سمين يقف لوحده، لا أحد معه، أحسست بحنو نحوه، عروس وأهلها، كيف يسع القطار هؤلاء، هناك مسجون، مكلبش ومعه جنود يحروسه، (هل القطار سجن)، هناك طلاب وطالبات، وفد (لزيارة مدينة عروسة الساحلية، السياحية)، شعورهم طويلة، والبنات الوان متوهجه (هم من معهد الفنون الجميلة)، أكثر شاعرا، وروح، وتقبل، اصوات بوري القطار، هنا، هناك، كبري السجانة، تمر فوقه السيارات، وتحته القطارات، كأفعى (حديدية، كما يقول نغوغو واثنفو)، في تويجات الدم أو حبة قمح لا أدري، كنت ألبس رداء، وقميص، جلست امي على سور مبني على شجرة جميز كبيرة، وحولها اسر واسر واسر، انشغلت بفضولي، جريت لآخر المحطة، كي أرى القطار، تسلقت عربة فارغة، يااااااااااه، كراسي وكراسي، ممرات، حمامات، غرف نوم، مطبخ، واستراحة، ومقابض، وروائح، وكراسي خشبية، وأخرى ناعمة، وغرف نوم وسراير مزدوجة، كيف يتحرك هذا المخلوق، انه قرية كاملة متحركة، قرية تجري، لم اجد مئذنة، أو حقل، لأقسمت بأنها قرية، تجري.. بل هناك سيارات كاملة فوقه، وشاحنات، لم ارى في حياتي سيارة تحمل سيارة من قبل، وعجلات (من حديد)، وليس لستك، وتجري في شارع من خطين بس، وليس شارع ترابي،...

ظهر اخي عبدالعزيز، طالب في الثانوي (مدرسة الخرطوم القديمة)، جاء لوداع اخيه الصغير، كل الاخوان يحبون اخوانهم، ولكن هو أكثر وانضر، واجمل (جلب لي معه طحنية، وإلغاز)، ألم أقل أنه أجمل، واعمق (أنه يعرف رغباتي، كما لو أنه كاهن، أو ولي)، ومن قال غير ذلك، كان يبكي مثل أمي (من يتسلق ظهره، ويرهقه بالاسئلة عن الله، وأين يسكن، ولونه، وهو عاري أم لابس) من بعدي، أختي محاسن هادئة، رغم أنها طفلة، لا أدري لم؟ يقول جدي فرويد، نحن نولد (عجزة)، أي (نرث عقل لا واعي جمعي)، يحوي تجارب لا تحصر، أصدقه، لأن (محاسن هادئة، جدا)، ولا تسأل (عن زوجه الله، وأولاده)، ....

عمال السكة يغيرون اتجاه العربات، القاطرات، أجلستني امي مع اسرة من (جبيت، لا ازال اذكر اسمهم، سلمى نور الدين كرم الله)، لا ازال، كحلوى في الفم، (لا اكذب عليكم، استغليت فكرة انني حديث اليتم مع هذه العائلة بصورة مبالغة، بحيث ان الكوته من الحلوى كانت تضاعف لي، أكثر من بناتها، وأولادها)، وكنت أنام معها في الكنبة، وينحشر بقية الخلق تحتها، على أرضية القمرة الخشبية،، وكنت احتل النافذة بقية الرحلة، كي أرى اشياء عالية، كنهود النساء، يقال لها الجبال (كأنها ترضع السحب، تلك الرقة)، وكي أرى شندي، وعطبرة، وأرى المسافات تلد المسافات، وأرى عالم كامل يجري، وينحني، ويصعد، ويهبط، لأيام، وليس ساعات، ينام الناس فيه، ويصحو، ويتقوضوا، ويمارسوا (العشق، والجنس في غرف النوم الفارهة)، وهي تسعى بهم، من وادي لآخر، ومن جبل لآخر، .. وتحت ايقاع واحد، صوت العجلات وهي تحتك بقضيب السكة حديد، بل يظل (رنين العجلات معك لأيام وأيام)، كعادة الذاكرة في حفظ الاشياء ، حتى الطعم تحفظه الذاكرة، فهل ننسى طعم الموز، أو الصعود، أو الطمي..

يتبع...

عزيزي جارثيا، والله هذا النص كتب للتو، صباح اليوم، الاثنين، بدون مراجعة، ولكن تدفقت للذاكرة احداث وروائح وعوالم، والله اعمق المحبة ليك، ولسه الذكرى لتحرك القطار، والمرور على بحر، والسقاي، والجيلي، وبانقا، وشندي، والدامر، وعطبره، وهيا، وجبيت وسكنات

[Ismat]

الاحباب المتداخلين...

القطار ذلك الارتحال الوسيله الزمنيه والوقتيه بكل مشائل شجنه وشجونه...انه مثل مسار الحياه حين ينتهى بها المطاف فى محطتها النهائيه..التى تكون اخر المطاف...والقطار وةسيلة نقل وانتقال فى مراوحته وعبوره..واحساس الرحيل فيه وبه قد الهم الشعراء فواتح استنباط....اربكت دواخل خلاجاتهم فتغنوا بوحيح وجع الرحيل ومعاناة البعاد..والقطار يحمل فى جوفه همسات الربيع وصفاء الاحجبه...

ولعل للشاعر الفنان المحفل محمد عض الكريم القرشى ذلك القدر المعلأ وهو يوصف جور وتعدى واستباحة القطار ..لكل دفق المشاعر وهو يحمل بعيدا ذلك الحبيب..والاشرجى..والصنافور..وحتى الدعوه والمطالبه بدشدشة القطار الذى نقل ذلك المحبوب..وحالة الجن التى اعترت كل الاحاسيس..وتلك الدموع تتقطر فى المحطه...

وياتينا زنقار .بى من بف نفسك يا القطار..ذلك اللهيب الاحتراق المرسل لظى يبثه القطارمن احشاء جوفه وهو ينطلق..وهو يحمل الحبيب...ولعل كره السفر ياتى مطابقا لحالة نزع الفراق...!!

وناتى الى حتى السواقى بكت معاه ..وشاركت فى وداع قطاره...!! تسال ارتباك حالات العشق والقطار يبعثرها بانفاس احتراقه...وهو يطوى المسافات المتسعه...!!! والشوق يتناثر على اعتاب الهجر الوداع...
وانا يا القطار انا قلبى طار..يوم حبيبى ودعته...ل!!ولعله صراخ اشتياق محموم..وتردد إ‘ستغاثه ملهوف وعاجز...

لتبقى صور القطار فى كل ممراحلها هى اشارات الفراق...وللقطار القارى فى اوربا الذىيخترق حشا القاره الاورييه حتى لواء اسكندورنا..عابرا عدة دول...مخلفا وراء انفاسه مشاوير الذكريات...

والسفر عموما ..ارتحال فراق.. قد لا يكون لقاء بعده..وقد يكون...!!

وللقطار واسفاره ..جملة من صور وذكريات...
وانه الحنين الخفى.لفراق .ورحيل... وربما لقاء..عاصف..!!
كل الحب








...

[imported_فيصل سعد]

ما زمان انا وانت لفينا الموانيء
بالقطارات والمطارات والسفن

[Ismat]

الصديق البديع فيصل سعد...

لك مقدره جباره فى اختراق انسجة الوجدان..واخاديد الذاكره..وغلاف اغشية المخ..واربطة الفكره...
ورائحة السفر فى زمان صبا العمر وفورة الشباب..وتلك القدله.والاعتزاز والمقدره..والطموح..كانت لها رائحه خلابه وشهيه..ونحن كنا نخترق غلاف التجربه ..خاصة فى اوربا..وقتها كانت بكرا على الكثيرين..وفى حولرى واروقة وطرقات بيروت الفتيه..ومدارات كل ذلك الزمن الجى...وكنا بالواننا السمراء نشكل عقدا فريدا فى تلك السموات ..وينظرون الينا وكاننا قد قدمنا من عوالم اخرى.تاتى بالعجيب ..والعجاب...وكان انضباطما ومسلكنا وتصرفاتنا..من واقع تربيتنا اطار واقى وملفت فى التعامل .والسلوك والتهذيب...
وكل القطارات القاريه.والمحليه..وقطارات الانفاق..كلها تسافر عبر ايقاع فكر واحد.هو مبدا ...الرحيل.والانتقال..ويخرج الجميع كل لوجهته..فى ازدحام متعاظم..
العزيز فيصل..

وصفارات تلك البواخر .وهى تعلن .وتطلب الاذن بالرسو..على الرصيف..والجلبه..والتناغم المتداخل بين كل ذلك الربط..وزبد البحر.وهو يلفظ انفاسه عند المرسى..وتلك البواخر العملاقه..تحقق لك الرغبه فى التواصل .والرحيل...ونوارس البحر.وجنياته.وعرائس الحلم الندى..وذلك الطلسمان لذلك الغموض والهيبه.للبحر ولليل..
والليل .ستار.العاشقين...!!
لقد..كان طواف سفر مستغرق وفاره..بين القطارات..والبواخر...ومداخل المطارات..وياله من زمن..وايقاع..وذكرى..
العزيز فيصل..
افض .وافتح ملفات الذكريات..وادلق بعضا من تلك المشاهد الحنين...
هذا وعد..
كل الحب

[imported_wadosman]

و بجيكم صادى بقطر الثلاثاء

http://www.sudaneseonline.com/video/algitar.wma

[imported_فيصل سعد]

مرحبا بك حبيبنا ود عثمان رجل المهمات الفنية حادي الدرب و رفيق التآلف و خليك قريب دائما.

استاذنا الرائع "عصمت العالم" ابو وليد :

سنواصل يا صديق الترحال السايبيري هذة الاجترارات الحميمة و سنسبر اغوار كل ناصية نطوف بها او نصادفها و نردفها ما تحتاجه من ذكريات و اشجان و سنتحف الجميع هنا و نوفي اخونا الحبيب خالد الحاج و جميع الزملاء وعدنا الصادق ان ندفع معهم هذا المنبر الي الامام نحو الثريا ليلحق كل النجيمات البعيدة والبديعة و يحلق نجما منيرا في السماء. بكم و معكم احساس جميل بان السايبر و الدنيا لا زالت بخير.

على جنب :
*** جيراننا في بيت المال يحملون نفس اسم عائلتكم و اذكر منهم صديقنا صلاح العالم و اعتقد هم وكلاء ماكينات "سنجر" في سوق ام درمان فهل انتم اهل؟؟.و في احتمال يا عصمت نكون تصادفنا بدري شوية في "بدوك بيت المال" و رواده اعمامنا عبد الكريم احمد حميدة ،حسن سلمان، السفير الطيب و صلاح احمد حميدة ، عبد الكريم الكابلي ، السفير عصام حسن، عمنا ميرغني المحسي، رحم الله الاحياء منهم و الاموات،و هنا كنا صبية القوم ، نناول العشاء و نستمتع بكابلي خلف الجدار.
و الاحتمال الثاني نكون تصادفنا في منتدي خالي المرحوم عبد الهادي احمد الصديق دار صليح بالملازمين و رواده عز الدين الطيب ، عوض الله ، الجد ،عبد الحميد دراج ، صديق الطيب، مامون دارصليح، ابوعركي البخيت، و هنا كنا ننهل بدايات الثقافة و نستقصي اثر بعض الحروف و نشارك في شيل الغناء الخرافي . فخبرني يا عصمت في اي بدوك التقينا قبل عشرون عاما و اكثر؟؟

انجبتني مريم اخرى قطاراً وحقيبة
ارضعتني مريمُ الأخرى قوافي
ثم أهدتني المنافي
هكذا قد خبّروني
ثم قالوا لي ترجل

[Ismat]

البديع فيصل..سعد..

بالطبع سنظل تلك الاجنحه التى تحمل سودانيات الى سموات الكون الممتده..ونمنحها من دفق نبض كل زاد الوقود..فلنعمل سويا من اجل احياء الثافه والفنون..وقيم الجمال .وعمق الترابط وزمان الشعر..والجمال واطياف المنى .والامنيات...

وعلى جنب..العزيز فيصل..

.ان لم تخنى الاكره..وانا احاول الاستعاده برغم سنوات الغياب...
اول لقاء ضباب الرؤيا يتحلق..اعتقد مع وفاء بشير الشفيع...والدرديرى نقدزوتامون عبد العزيز نقد..فى بيت المال..ثم مجموعة من امسيات التلاقى..السفير صلاح احمد.والسفير عصام حسن..ومحمدصلاح الدين الكابلى..لكن والذى اذكره بقوه...اننا التقينا مع صلاح احمد ابراهيم.والهادى احمد ابراهيم.وطه احمد طه.( ويسترن تلغرام..بورتسودان) .والمرحوم سيف الدين حمد النيل....واعتقد صديقى وزميلى اسملاش بطرس...وادماث بيتو..وناس بيت المال..ال ابوعيسى..ومحمود الزعيم..وابراهيم قديس..
المهم ان بيننا عمق المعرفه..واكيد زاكيد..سنتقابل...!!
لدى اهل فى بيت المال..ال الازهرى..

صلاح العالم..اخ وصديق وحبيب...ورفيق..ونحن اشقاء الزماله والمعرفه والعشره والود التواصل..وهم اهلنا..وبيننا رحم التواصل العميق والدفيق..

العزيز فيصل...

دعنى استرجع بعض الصور..وساتيك بالتاكيد ...الاكيد
لان القلوب شواهد..وهنالك ربط من موده..ومحبه..وعمق..
ونتواصل ايها العزيز

[imported_فيصل سعد]

المهم ان بيننا عمق المعرفه..واكيد واكيد..سنتقابل...!!
لدى اهل فى بيت المال..ال الازهرى..

ونتواصل ايها العزيز

صلاح ازهري(شقيق الزعيم) و زوجته مكارم جيران اعزاء و اكثر من اهل و يسكن نفس شارعنا خلف طرمبة اجب، و اكيد اهلك الازاهر بالملازمين ابو السيد و ود الانور و فرغلي دفعتنا ،و يكون آل المفتي اهلك ايضا و هم جيران اعزاء كذلك. لك الود ...

و يوم سافر قطاري يوم لهلبت ناري
يوم ودعني حبي يا ناس انا دمعي جاري

[imported_فيصل سعد]

القطار يتهادى
حل في وادينا
يلا نجري نشوفه
المن زمان ناسينا

[imported_فيصل سعد]

القطار فرقنا
أه حزنا ملكنا
بي انتصار روحنا
برانا نحنا برعنا
في الرمال الباسمة
تحت الرياض مجلسنا

[imported_فيصل سعد]

بوست من الامس حنينا و دعاشا ..
و كانت لنا ايام ..

في الرصيف مستني
و للثواني احاسب

http://www.sudanorg.tk/upload/uploads/07Track7.wma

امتي يظهر نوره
الليهو ديمة اراقب