خالد الحاج جاب لينا دارفوري عسكري حزب أمة بتاع مخدرات

[imported_شوقي بدري]

زي ما لاحظتوا مداخلات بابكر مخير واجد من واجبي أن اعرف بابكر لمن لا يعرفه .
الأخ بابكر حفيد الأمير مخير المعروف بأمير البادية وهم زيادية من دارفور وجده كذلك تعايشي وهو يعقوب جراب الرأي أخو الخليفة عبد الله التعايشي من ناحية أم والده ولقد شاهدته يرتدي الكاكي أيام نميري كرجل شرطة كما كان مسئولا عن شباب حزب الأمة وبتاع مخدرات دي ممكن أثبتها ليكم لان له منظمة في لندن اسمها إنسان أسسها ويديرها متخصصة في المخدرات وتنوير الناس بمضارها وهذا النشاط بدأه عندما كان يعمل في المختبر الجنائي في الأمارات لانه صيدلي كما عمل في الشرطة في السودان لم يكن يقبض إلا علي البكتيريا في المعمل وكان صديقا وثيقا بالرجل العظيم رحمة الله عليه إبراهيم احمد عبد الكريم . وكونه حزب أمة سيعطي طعما مختلفا للبورد وهو رجل متمكن من الكتابة فلنرحب به ونتمني له حظا سعيدا لأن إبنته ستتزوج غدا.
في مصيبة أخري نسيت أن أقولها لكم الرجل إبن عمتي وبابكر طبعا علي بابكر بدري وبالله يا جماعة استعدوا للنقاش يا خليناه خلي حزب الأمة يا بقينا حزب أمه مثله

شوقي

[imported_رأفت ميلاد]

خالد الحاج جاب لينا دارفوري عسكري حزب أمة بتاع مخدرات

الأسـتاذ المحترم شوقى بدري

كل التحايا

العنوان خطير يعمل لخبطة فى المخ ويزغلل العيون :D

ألف مرحب بالأخ بابكر مخير

وكل سـنة وأنتو طيبين

[imported_الجيلى أحمد]

وبالله يا جماعة استعدوا للنقاش يا خليناه خلي حزب الأمة يا بقينا حزب أمه مثله

:D

شكرآ على إبتسامة المساء

والله ياعم شوقى دا شكلو زول مكرب ونجيض,
مرحبآ ب بيننا ,
ومبروك لإبنته الزواج,

وعيد سعيد ياعم شوقى ,أعاده الله
عليك بالسعادة والهناء

[imported_omrashid]

جيت جاريه جري اشوف شمار ود مخير يطلع فشنك يا شوقي
لك الود ومرحبا به ليثري المنبر

[imported_د.سيد عبدالقادر قنات]

أهلا وسهلا بالحبيب مخير

وألف مبروك لزواج أبنته

وبيت مال وعيال


وكل عام وأنتم بخير

وعيد سعيد وعمر مديد

بس نشوف السودان وحدة وسلام ومحبة وتوادد وتراحم


يديكم العافية

[imported_Abu Marwan]

Dear uncle Shawgi

Eid Mubark

Welcome to Babikr, and hope to see Korea, and Ali

Regards to your family

[Ismat]

العزيز شوقى بدرى

كل سنه وانت طيب وبخير .وتمام التمام...ولك الامنيات البيض

والترحيب الحار بالاخ العزيز دكتور بابكر مخير..وبابكر له صولات وجولات وافكار واراء وهو من ربوع العباسيه ذلك الحى الشموخ والفن والرياضه والسياسه والعلوم.والاجتماعيات والتواصل.والناس بدفقهم وحبهم..ولقد قدمه الصديق شوقى بدرى بديباجة فيها اثارة العنوان المثير الجاذب...وقدمه بطريقته السهل الممتنع فى تبلوهات رائعه وتمريرات عرضيه ذكرتنا ايام الامير صديق منزول وهو يوزع كراته بتلك الحرفه وذلك الاتقان الفنان..
متعه ..وفن..
وهذا هو اسلوب شوقى بدرى الجميل...السهل الممتنع
تتقاطر المواكب لترحيب بالعزيز بابكر مخير...فى هذه الساحه النزال..للفن والافكار والسياسه والجمال وكل الاحداث..
مرحبا بك بابكر فى ديار سودانيات العامره.
كل الاعزاز

[imported_haneena]

مرحبآ بالأستاذ بابكر مخير في سودانيات
عندما قرأت الإسم في مراسلاته للعضوية معي حدثت نفسي...هذا الإسم مر على قبلآ و لا أذكر أين
هو إبن لندن إذن...
نحتاج لكل أقلام الأحزاب (السنينة) و ننتظر أن نراه مقاتلآ بالكلمة و بالحجة و المنطق
فهذه مرحلة في تاريخ بلادنا تحتاج من هم كذلك

ألف مرحب مرة أخرى بالأستاذ بابكر في بيته
ربنا يتم على خير و ألف مبروك لإينتكم

عم شوقي ما قصرت في التعريف و التقديم

[بابكر مخير]

الأحباء أهل المنبر في السودان (الجد) سودانيات
كنت مشغول الأيام الفايته وأفتكر الكلمة الصاح (مهموم) لعرس البنية، والحمد لله ربنا أداها عريسً يمون شاكلتو عريس بنيت كل حبيب..
في العرس كلمني عصمت العالم: يازول والله شوقي بدري كشف كل أوراقك في سودانا "سودانيات"، بالمناسبة عصمت عندو حكاية الإثارة في تصوير الأشياء، مما زاد همي...
اليوم وبعد أن غادرتنا مدينة لشهر العسل، " مسمينها على حبوبتها وحبوبتي (غلوته يعني)" فتحت النت وجري على السودانيات،،، لقيت الحكاية ما خطيرة. شكراً لشوقي على الترحيب ولعصمت! على توصيل "الشمار" ولخالد والدكتور وإبرتو السنينة وللأستاذة الحنينة وللذين رحبو بي والذين بعد أن أنتظم سأرحب بهم
بمناسبة زواج مدينة ويحلو لي أن أُسميها مدون؛ تشبها بالذي كان العميد يوسف بدري ينادي به أخته، مدينة أمي، كتي ليا أو في الحقيقة ليها، صديقنا الفنان عاصم البنا الأتي:

مداين الفرح بيك نورت يامدينه
واتبهرجت ليالى الدنيا عندك ابهجينا
علمى الناس الجمال واصول الزينه
وغنى بالفرح الشديد افرحى وانعشينا
......
مبروك عليك بيتك يالحنينه
تملاهو السعاده الإلفة وسكينة
تعمر بيكى كل اركانو يالامينة
وعقبال عند زنوبة ومحمد ود حسيبة السيدة الرزينة

.......
زينتى وفي زفافك ضويتى لينا الدنيا
يافرح الاماسى ومعانى الجمال المنيا
ياروعة ياغالية بت الغالى ما كونيا
مبروك مبروك ... مبروك يا احلى غنية
تعمر بيكى كل اركانو يالطبعك امينة
يالهاديه يالواعية في رقة الوزينة
.....
ما بنحمل فراقك لكينو العبد مخلوق مسير
المن دونك الكل مصيرو إتحير
ويا اب امنه انشاء الله فرحك يدوم ماتغير
تبراك الساعده والعافية وانت مخير



عاصم البنا
أمدرمان
28/10/2006

[imported_أبو العز الجنوبي]

العزيز الوالد شوقي بدري
كل سنة وانت طيب،،،،
العنوان عمل لي لخطبة اكتر من بتاعة رأفت ميلاد، قمت شمرت عن ساعد الشكل والعضلات، قلت الليلة يا انا يأ انت في البوست ده تقوم بكل رواقة واريحية تعريني قدام نفسي كده؟؟؟
لكن السؤال المهم: منو البصدق انك ما حزب أمة؟؟؟؟؟
انا ما قلت انصاري...
مرحب بالدكتور بابكر مخير...
ومن منا لا يعرفه؟؟؟
اضافة حقيقية .. ويا ناس سودانيات ابشروا وابشرن.....

[imported_عالم عباس]

شيخنا وسيدنا بابكر مخير
(والله مخير في أحكامه)!
ديباجة شيخنا شوقي بدري التي زفك بها إلينا لا معقب لها، والحمد لله رب العالمين
فما أسعدنا بك هنا، وأنا بالذات!
ليس جهوياً فقط، ولا عرقياً، (فالزيادية أخوالي)، ولا حباً في ناس امدرمان، وبالذات العبايسة شرق، ولا لشهادة عمنا شوقي بدري، وبدرياته التي هي بدور ما فتئت تسطع في جمال الكتابة وسماواتها الوضيئة، بل وأكثر.

كما أسعدنا زفاف ابنتكم، أسعدها الله وبارك فيها ولها، ورزقهم الذرية الصالحة، وأمد الله في عمرك حتى(تلولي أحفادها، ويعبثوا بشيباتك النضيرة، وقتها)!
في انتظار أسطركم، على أن تعرج بنا من مرة لأخرى إلى (التويا)، ولعلك أن تغني مع أحبابك في "سودانيات":
(نحن الشطة الدنقابا
نكيل العين لا من تابا)

متعك الله بالصحة والعافية، والشكر لأستاذنا شوقي بدري، ونفحاته الراقية.، حين قادك إلى هذا المنهل العذب والمورد الرائق.

[بابكر مخير]

العزيزة أم راشد
السلام ؛ في مشاركتك
جيت جاريه جري اشوف شمار ود مخير يطلع فشنك يا شوقي
لك الود ومرحبا به ليثري المنبر
ما عرفتينا، الفشنك ياتو؟ الشمار ولا ود مخير،،، هو بيني بينك الإتنين فشنك، أكان الشمار نفد وأكان أنا في الغربة وهم السودان المابيخلص صقرنا.
إنشاء الله نشارك معاكم وكل العندنا بنديها وبالأخص مع العزيز دكتور سيد،
نتلاقى لي قدام

[بابكر مخير]

العزيز عالم
لك الحب والمودة
كلمات (قربت أقول طيبة بس إتذكرت أنها كلمة الجماعة) عليه أقول: مشكور عليها تكون حافز أنو الواحد يشارك بي همة

[بابكر مخير]

أبو العز الجنوبي
حرارتك دي والتنفيسة السريعة من شيم الأنصار، حاريين في رد الفعل ولكن لما تظهر ليهم الحقيقة بي نفس السرعة بيراجعوا نفسهم وبيعترفوا،، الحبيب أبو العز !!! منو مننا ما أنصاري، طبعنا السودانيين أننا من أنصار الحق، بننصر المحتاج، إحنا السودانيين أنصار ومنتصرين، يا أخي ربنا ينصرنا ونكون بيه منتصرين، يعني شوف أنصاري دي وصف لشنو وكم مرة نستعملها، لك السلام مجدد وللحبيب شوقي الشكر

[أبو الحسين]

الأسـتاذ المحترم شوقى بدري

كل التحايا

العنوان خطير يعمل لخبطة فى المخ ويزغلل العيون :D

ألف مرحب بالأخ بابكر مخير

وكل سـنة وأنتو طيبين

والله أنا ذاتي إتهجمت لكن نسوي شنو...

ندخل نبارك العيد ونقول كل سنة وانتو طيبين...

وربنا يحقق الأماني ويبلغ المقاصد ياااااااااارب ويحفظكم جميعاً...


مودتي قواسيب قواسيب...


أبو الحســـــــــــــين...

[imported_آمنة مختار]

الأستاذ شوقى بدرى
سعيدة ان يجمعنى بك مكان واحد.

مرحبا بالأستاذ بابكر مخير.

[imported_شوقي بدري]

شكرا للمتداخلين وآسف لعدم الرد ولكن بابكر تكفل بالرد عليكم.

الابنة الأخت آمنة مختار

لك التحية وشكرا علي الإشادة
اهو جنس الكلام ده يكبر رأس الواحد ويعمل مهم ويقوم يشطح
شوقي