ما هو عارف - رائعة الشاعر / خليل فرح

[imported_Garcia]

ما هو عارف
خليل فرح

ماهو عارف قدمـه المفـارق
يـا محـط آمالـي الـسـلام
في سموم الصيف لاح له بارق
لـم يـزل يرتـاد المشـارق
كان مع الأحباب نجمه شـارق
ماله والأفـلاك فـي الظـلام
يـا دهـر أهوالـك تسـارق
منها كم كـم شابـت مفـارق
ما علينا الفـات كلـه فـارق
رقنـا ولـه نعـيـد الـمـلام
من حطامك أنا غصنـي وارق
فـي شـن أبقيـت للطـوارق
غير قليبا في همومـه غـارق
ولسـانـا بــرده الـكـلام
ويح قلبي المـا انفـك خافـق
فارق ام درمان باكـي شافـق
يا أم قبايل مـا فيـك منافـق
سقي أرضك صـوب الغمـام
يا بـلادي كـم فيـك حـاذق
غيـر الهـك مــا أم رازق
من شعـاره دخـول المـأزق
يتفـانـي وشـرفـك تـمـام
مسرح الغزلان فـي الحدايـق
والشوارع الغـر والمضايـق
قول لي كيف أمسيت دمت رايق
دام بهـاك مشمـول بالنظـان
مجلس اللـذات فـي النمـارق
والترف لا زال وصفه خـارق
ضاري حسك فاح جانا مـارق
وله قاطعو الريح مـا هـو لام
في يمين النيـل حيـث سابـق
كنا فـوق أعـراف السوابـق
الضريح الفـاح طيبـه عابـق
السـلام يـا المهـدي الامـام
أيـن منـي الودعتـه شاهـق
باكـي ناهـد لسـه مراهـق
عيني ما بتشـوف الا شاهـق
أيـن وجـه البـدر التـمـام
أين مني الفـي زهـوه باسـق
في شبابه نقـي مـن مفاسـق
بين ثيابـه البيـض المناسـق
حولـك اشبـه رتـل الحمـام
يا بريد الجـو فوقـي حالـق
ميل علي الروح ليهـا خالـق
عدت سالم قول وأنـت عالـق
مقـرن النيليـن كيلـو كــام
الحبايـب لفـتـوا الخـلايـق
بيني وبينهم قطعـوا العلايـق
ان دلال ان تيـه كلـه لا يـق
نحـن مـا مجينـا الخصـام
يا جميـل يـا نـور الشقايـق
أملأ كأسـك واصبـر دقايـق
مجلسك مفهـوم شوفـه رايـق
عقـده ناقـص زول ولا تـام
مـن فتيـح للخـور للمغالـق
من علايل ابـروف للمزالـق
قدله يا مـولاي خافـي حالـق
بالطريـق الشـاقـه الـتـرام
ما يئسنا الخير عـوده سايـق
الحي يعود ان أتي دونه عايـق
الي يـوم اللقـا وانـت رايـق
السـلام يـا وطنـي السـلام

* إهداء لعشاق الطرب الاصيل الأغنية بصوت الفنانة الجميلة / حنان ابراهيم
http://www.youtube.com/watch?v=bvZ6HDA6xtE

[imported_wadosman]

شكرا جاارسيا للعمل الجميل
و فعلا صوت بنكهة الخميس...

مودتى...

[imported_بسمله]

يا سلا م ليك و عليك و منك يا جارسيا انا يا سلام يا سلام و العيون فيها كلام
ياخى مبالغه شديد اصلو اجمل من كدا مافى
تسلم يا فنان

[imported_Garcia]

شكرا جاارسيا للعمل الجميل
و فعلا صوت بنكهة الخميس...

مودتى...

ودعثمان يا جميل
تسلم لحضورك الرائع دوما بحضرة الشاعر الكبير الراحل والمقيم ,
دوما فى الوجدان / خليل فرح , شاعر عزة , وفى الضواحى و
وما خطاه بأنامله من أجمل اغنيات العشق والوطنية فصيحها
وعاميها من درر الغناء السودانى :
زاهى فرعك نما وسمـا
تشبهى الضو فى السمـا
الخدود نارها مضرمـة
فى حشاى واضعة مفرمة
بي هلاكنا أنت مغرمـة
طرفك الساهى كم رمـى
سمحة قامتك على التمـا
فاهـك البسمـة خاتمـا

رحمه الله بقدر ما قدم لنا من إبداع وروعة ليس لهما نظير ...

اما الفنانة المعتزلة حنان ابراهيم فلها صوت جميل واداء رائع ,
وحضور مدهش لكن للاسف إعتزلت الغناء مبكرا ...
ولك خالص الود والتقدير ....

[imported_Garcia]

يا سلا م ليك و عليك و منك يا جارسيا انا يا سلام يا سلام و العيون فيها كلام
ياخى مبالغه شديد اصلو اجمل من كدا مافى
تسلم يا فنان

الغالية بسملة
لك عاطر التحايا والاشواق ...
ومن غيرك يعرف قيمة ذلك الطرب الاصيل ,
والمفردات العذبة التى تدخل القلب دون إستئذان ....
اهديك إحدى روائعه وهى قصيدة ( ودمدنى )
التى كتبها فى مدينتك الجميلة , و تغنى بها
الموسيقار الكبير محمد الامين وابدع فى تلحينها
وتوزيعها وأداءها :

ما له اعيـاه النضـال بدنـي
روحي ليه مشتهيه ود مدنـي
ليت حظـي سمـح واسعدنـي
طوفه فد يوم بي ربوع مدنـي
كنت أزوره ابويـا ود مدنـي
واشكي ليه الحضري والمدني
آه علـي حشاشتـي ودجنـي
وحنينـي ولوعتـي وشجنـى
دار ابويا ومتعتـي وعجنـي
يا سعادتي وثروتـي ومجنـي
حين سألنا حـاوي الوصـب
من خمايـل قريـة القصـب
قالوا جات سيرتك علي النصب
ونحن بين الروضة والقصـب
صنفه بعرها قالن إن تصـب
تربط الأحلام مـع الخصـب
كان حبيبنا وحاشا ما نصبـي
ومن زمان فارقنا وهو صبـي
تاني ما سمعنا انقطـع خبـره
يا حليلم طشوا مـا اتخبـروا
واحدة فيهن قالـت انجبـروا
فــقـــر ابـــونـــا
وخــدمــة الـنـبــرو
الكنانـة أكـرمـت نـزلـي
واغدقت من خيره كـل زلـي
إن حييت أو مـت فـي الازل
ده مقـدر طبعـه فـي الازل
غايته بختم نفثتـي الخطـرت
بي تحية من حشاي شطـرت
للتدور والطايره والما طـارت
وسلاما ما الغصون خطـرت

[imported_بسمله]

جارسياااااااااااااااااااااااااا
يا خى انت رهيب فظيع مبالغه
ما بتتوصف
ياخى ما ممكن و الله لا ما قادره اصدق انو اخيرا فى زول فى االمنتدى دا هدى لى لول

شكرا جزيلا و القصيده دى من اقرب القصائد لى قلبى وود الامين دا انا بحبو جدا و اداها فعلا بطريقه روعه
تسلم يا عظيم

[imported_Garcia]

بسمله
تسلمى يازولة يا جميلة , وانتى إنسانة شفيفة تستاهلى كل خير ..
سلام عبرك لمدينتك الجميلة منبع الجمال والإبداع ويكفيها انها قدمت ,
قامات فنية عظيمة مثل : إبراهيم الكاشف , محمد الأمين , ابوعركى البخيت
عبدالعزيز المبارك .... الخ والقائمة تطول ..

[imported_طارق مصطفى]

Garcia
جميل ان يجد الانسان
الزهجان التعبان الحاكمينه كيزان
واحة ظليلة في هجير الظلم والقهر

شكراً على البوست الرائع.. يا رائع

[imported_طارق الحسن محمد]

يا جميل
جارسيا يا فردة
شكرا
شكرا
شكرا

[imported_Garcia]

الأخ / طارق مصطفى
مرحب بمرورك ومشاركتك لنا قليل من الطرب فى الزمن الصعب ,
والزهجة ما حا تتفك إلا نشوف البشير وعصابته خارج كراسى الحكم ..
ولك عميق الود و التقدير ....

[imported_Garcia]

عزة في حـذا الخرطـوم قبـال
وعزة من جنان شمبـات حبـال
وعزة لـي ربـوع ام در جبـال
وعزة في الفؤاد دوا يشفي الوبال

طارق الحسن
سلام يا صاحبى وعساك بكل الخير ,
تسلم لحضورك يازول يا جميل ..
مع خالص الود والتقدير ..

[imported_haneena]

سلامت يا قارسيا

صوت جميل
لكن يا قارسيا....
حنان إبراهيم دي مش حنان بلوبلو ذات نفسها؟؟!!
و لا بس نفس الملامح و الصوت؟

[imported_Garcia]

سلامات حنينة
كيف وعسى كل الامور على ما يرام ؟
وتسلمى لطلتك الجميلة هنا , وبالنسبة لسؤالك
ربما هناك بعض الشبه بينهما الصوت والشكل
وتسريحة الشعر كمان :D
وهما شخصتين مختلفتين , حنان ابراهيم إعتزلت
الغناء منذ مدة طويلة قبل ان تظهر حنان بلوبلوفى
الساحة الفنية , ولها اغانى اخرى عديدة مسجلة
فى الإذاعة والتلفزيون , علما بأنها كانت تسكن فى
ودنوباوي .... مع خالص ودى وتقديرى ..

[imported_بسمله]

يا جارسيا ..
تعرف انا ما بكذب لامن اقول ليك انو مافى مكان انا حسيت فيهو او بحس فيهو بالانتماء زى مدينه ودمدنى الجميله الى انا بشوفا اجمل مكان فى الدنيا يعنى
شكرا كتير ليك انت على روحك الظريفه

[imported_Garcia]

العزيز بسملة
طبعا مصدقك تماما لعشقك وحبك لمدينتك الجميلة ...
وهى تستحق كل ذلك الحب والعشق , الإنسان بطبعه ولوف
ويعشق المكان الذى نشاء وتربى فيه , ولارتباط المكان
دائما بذكريات طفولة ودراسة وأصدقاء و ...الخ ,
وتبقى للأمكنة سحرها ونكهتها الخاصة وجمالها و رائحة
الماضى وما يحمله من حنين وشوق لذكرى ايام خوالى ...

[imported_رأفت ميلاد]

http://www.sudaneseonline.com/video/maho3arfgadamoalmofareg.WMA
يا قارسيا
ده برضو ما الأصل ولكن جميل

تحياتى

على مسئولية أخونا عصام أحمد صوت إبراهيم خوجلى

أما الفاجأة التالية كما قال أخونا هشام القنبلة

ألحق وقفهم عشان تسمعهم كلعلى حدا

تحياتى
http://nilelove.org/upload/upload/wh_73468877.WMA

[imported_Garcia]

الجميل رأفت ميلاد
تسلم لطلتك الجميلة هنا ومعك كل تلك الدرر البديعة ..
اول ما دخلت البوست سمعت اللقاء والغناء فى وقت واحد .. :D :D
وحصلت وقفت واحد وشغلت التانى :p
تسلم شديد لهذه الإضافات الثرة والجميلة للبوست ..
وما اروع اغنية ( إنت بدر السماء فى صفاك ) رائعة الشاعر /
على المساح .... اطربتنا لحد الثمالة يا رأفت يا مدهش ..