نكوص زاريا بتي .. وحوستي

[imported_bayan]

أعترف انني ام شديدة الخوف على اطفالي
وبسبب هذا الخوف بناتي لا يعرفن السباحة
لانه طوالي بذكر الناس الغرقو في الحوض
بعداك ما حصل خليتهم يركبو القطر الطاير داك
في مدينة الملاهي.. لانه بذكر الناس الحصل ليهم حادث
واهم حاجة ما حصل سقتهم في عربيتي لانه بخاف يحصل حادث
وانا اعيش وهن يموتن..
المهم اسع زاريا اليوم عيد ميلادها ال 18
وليها اسبوع قالت عايزة الجزمة ام عجلات..
وقالت ما بتعفى عننا ولا تتقبل اي تهاني بدون نجيب ليها جزمة الجن دي
الجزمة كانت من الممنوعات زمان لانه في واحد وقع وكسر رقبتو
وانا شوفتو في المستشفى...
امبارح جات كبت حنك تقيل هنا.. وقالت انه ما فضل الا
اعمل صندوق حفظ في البنك واختهم فيه..
وانه هم عمرهم كلو ما بعملو اي حاجة مثيرة.
حتى لما اتعلمو العجلة انا كنت بمسك العجلة وهم سايقنها..
المهم طلعت القديم والفات والمات.
وقالت سيريسلي يا ماما لازم تشوفي ليك طريقة..
المهم الجزمة دي ما تجي هي حتكون زعلانة
وحتحاربني للابد...
وانا خايفة تقع تتكسر..
اها اسوي شنو؟

[imported_bayan]

اها البت بدأت تعمل لوبي
اسع وانا بكتب وصلتني رسالة
من اختها الاكبر منها
فحواها انه فقط لا مناص من الجزمة ام عجلات..
لاحظو زاريا عمرها بقى 18 سنة
ياهو دا النكوص حق ناس علم النفس؟

[imported_omrashid]

,والله يا بيان انا كنت قايله نفسي براي البخاف -- --تصوري اول مرة لمن راشد كان عمرة 3 سنوات اصر يمشي الملاهي ويركب القطار وكنت خايفه جدا وقررت اركب معاه القطر واول مادور قطر الرماد دا بصراحه خفت وقعدت اكورك ولكن لمن التفت الي ولدي لقيتو يضحك فيني وكان هو اخر انبساط --

اما الجزمه ام عجلات كانت السبب في ارتفاع ضغط الدم عندي لمن اصر علي اقتناءها

اما حكاية النكوص دي ماوراده ياستي اشاهد هنا اكبر من ال 18 ويلبسونها بس انحنا بنتعامل مع اولادنا بمفاهيمنا وليس بطريقتهم في الحياة --يختي خليهم يبتهجوا

ولك حبي وعقبال 100شمعه للاموره

[imported_بركات الشريف]

لكم التحية يا سيداتي
اكيد سمعتم بنكتة (ادروب) المعروفة، تقول النكتة ان ادروب سمع بموت واحد من الناس فسأل
- الراجل دا مات كيف
- ضربته كهرباء
وكان تعليق ادروب (الخلاهو يمشى للكهرباء شنو؟؟)
وسمع باخر صدمه قطار، فكان ادروب يصرح بنفس التصريح (الخلاهو يمشى للقطر شنو؟؟) واخيرا سمع بواحد لم تصعقه كهرباء ولم يصدمه قطار وانما مات في فراشه، فكان ان قال (دا ذاتو الخايفين منو)
كتب الله السلامة لكم ولابنائكم وابنائنا، لكن يا دكتورة نجاة شغلكم دا نحن بنسميهو (تربية نسوان):D ويبدو لي ان المشكلة عندكم وليس عند الجيل الجديد..يعنى لازم تسألي نفسك عن سر هذا الخوف الشديد، علما وحسب ما قرأته في مشاركاتك العديدة أنك كنت (عفريتة) جدا في طفولتك، ويعزز اعتقادي هذا قول ام راشد (وواول مادور قطر الرماد دا بصراحه خفت وقعدت اكورك ولكن لمن التفت الي ولدي لقيتو يضحك فيني وكان هو اخر انبساط --)
اذن واضح جدا ان المشكلة في الامهات وليس الابناء
بعدين يا دكتورة مع احترامي الكامل لك، والرجاء قبول اعتذاري مقدما لكن الموضوع موضوع عام ويستحق المناقشة..... البت عمرها 18 سنة وعائزة الجزمة ام عجلات؟؟؟؟؟؟؟؟؟
الحل انو الحكومة تعيد فتح معسكرات الدفاع الشعبي وتعمل معسكرات خاصة لابناء المغتربين ومعسكر خاص جدا لبنات المغتربين وانا متأكد انو زاريا حترجع ليك (راجل)

[imported_omrashid]

ويا بركات يا خوي ادروب دا انتايه ولا شنو :D:D

اما الباقي خليتو لي بيان عشان ترد عليك

[imported_bayan]

اما الجزمه ام عجلات كانت السبب في ارتفاع ضغط الدم عندي لمن اصر علي اقتناءها
سلام يا ام راشد مشتاقين

ما دي ذاتها القدة الخايفين منها..ارتفاع ضغط الدم والازمة
في حالة حدوث حادث...
قدر ما حكيت ليها عن الحوادث قالت عايزة نسبة مئوية
عن عدد الحوادث..(حنك عاضي شديد)
المهم لسع مصرة يا الجزمة يا حرب
وهي بنيتي الصغيرة الشرطا حأموت في بيتها
قلت ليها الزول لما يبقى عمرو 18 سنة
بيكون اعقل وافهم..
برضو ما جاب تمنو...
نشوف بكرة
يا ربي احاربها قبل تحاربني؟؟؟؟
الهجوم خير وسيلة للدفاع ولا كيف..

[imported_bayan]

كتب الله السلامة لكم ولابنائكم وابنائنا، لكن يا دكتورة نجاة شغلكم دا نحن بنسميهو (تربية نسوان):D ويبدو لي ان المشكلة عندكم وليس عند الجيل الجديد..
ازيك با بركات
اها النقوليك انه الشعب السوداني دا كلو تربية نسوان لانه الابناء هم ابناء الامهات
يجارن وراكم من بحر ليميدان كورة ولو طلعت ليكم بقيتو سياسين يجن يوم الزيارة
يفتشوكم لو قبضوكم وين ابو غير يجبو القروش بعملو حاجة
لو ما الامهات كان غرقتو ولحقتو امات طه.. قال تربية نسوان...(وش زعلان شديد)


يعنى لازم تسألي نفسك عن سر هذا الخوف الشديد، علما وحسب ما قرأته في مشاركاتك العديدة أنك كنت (عفريتة) جدا في طفولتك،
والله انا ذاتي متحيرة من الخوف دا جا من وين مع انه امي كانت مقتنعة عمرها كلو
انها حتمسك اولادي عشان انا ما ممكن امسكهم كويس..وهي بتفتكر ممكن انساهم في مكان
ولا اضيعهم مني في بكان.. جات آمنت انه انا ام كويسة ولا بت من بناتي حصل ليها اي
حادث بسبب المراقبة المجهرية من حضرتنا.والعقل الذى اتي متاخرا..
بعدين شيطنة الصغرة ديك كلها اثبات ذات جندري كان.. عشان الاكبر واصغر مني اولاد




اذن واضح جدا ان المشكلة في الامهات وليس الابناء
ايوة مشكلة امهات عايزين يحمو اولادهن من الحاجات الخترية
لكن ام راشد جازفتي انا القطر دا بجنبو ما بجي..شوفتا التضحية دي كيف يا بركات؟

بعدين يا دكتورة مع احترامي الكامل لك، والرجاء قبول اعتذاري مقدما لكن الموضوع موضوع عام ويستحق المناقشة..... البت عمرها 18 سنة وعائزة الجزمة ام عجلات؟؟؟؟؟؟؟؟؟
هاهاهاههاها شوفتا دا ياهو المدهشني مسألة النكوص دي
ام راشد قالت عادي لانه هنا الناس الكبار برضو بيلبسوها
لكن انا ذاتي معاك في دي

الحل انو الحكومة تعيد فتح معسكرات الدفاع الشعبي وتعمل معسكرات خاصة لابناء المغتربين ومعسكر خاص جدا لبنات المغتربين وانا متأكد انو زاريا حترجع ليك (راجل
بالله هي الحكومة قفلتهم وانا قافلة عليهم في اكمال تربية البنات؟؟؟!!
ما بشرتني...
بعدين الرجال بخافو من الموت والمرض بدرجة خرافية وجرس
الواحد تجيه نزلة يوقف البيت على فد رجل..
دا رجوعا لادروب النموذج وكلام ام راشد عن ما هو نوع ادروب؟:D:D:D:D

[imported_الجيلى أحمد]

عليك الله يابيان
خلى الشباب ديل يعملوا حاجاتهم..

[imported_mamkouna]

http://cctvimedia.clearchannel.com/tennis%20shoe%20roller%20skates2.jpg
http://www.sevenbellsrollerrink.com/images/template/3column/large/3col_lg_closeup_white_roller_skates_w_pink_laces.j pg
http://shoes.lovetoknow.com/images/Shoes/d/d1/Skateboard.jpg
http://img.tradekey.com/images/uploadedimages/products/4/5/A357734-20070207005345.jpg



غايتو مافي زول في الدنيا دي قِدِر عليكِ يا بيان زي زرزورة دي.
عفيت منها!

عليك النبي كان تكسري خاطرها...خليها تختار الدايراهو...دي فيها رياضة و حركة و حفظ نوازن و تحريك لكل عضلات الجسم..
و عشان ما تقوم عليك الأزمة....جيبي معاكِ الطقم بتاع الحماية..و هو مكوٌن من طاقية واقية...و واقيات للأيدي و الركب...وبالحالة العليكي دي ممكن تلبسيها دا...:D:p
http://www.gop-pride.com/imagesLg/Knight-in-Armor_02.jpg

[imported_abubakr sidahmed]

اذن واضح جدا ان المشكلة في الامهات وليس الابناء

وفي حالتي وانا الخمسيني تقولو شنو يا اهلنا ؟؟؟ اول مرة وبنتي الكبيرة عمرها يدوبك ستاشر وباختيارها التحقت في كلية خاصة بلاد تبعد عن دبي سبع ساعات طيران بس لم تكن سامية -زوجتي- مصدقة حتي اللحظة التي وصلنا الي باب الطائرة ونحن راجعون الي دبي -بعد ان تركت بنتي في شقة مستاجرة مع بنت اخري صديقتها الالمانية التي تعرفت عليها في صف البنك افتح حساب فصار الاب صديقي والبنت صديقة بنتي - بانني سوف لا اتراجع واخد بنتي معي وحتي بعد العودة ولحين ان عادت في اجازة بعد 4 اشهر ...؟؟ فانا قلق عليها وعلي الاخري واخاهم اكاد احسب خطواتهم ولكن للضرورة احكام ... لم يكن والدي رحمه الله هكذا ولكن والدتي اطال الله عمرها هي كذلك وانا الان اشفق عليها والحياة جعلتنا نحن ابناؤها وبناتها شتات في اركان الدنيا .... ربما اكون انا النوبي الاوحد لمن هم في عمري من لم يتعلم العوم في النيل ويتسلق نخلة .. فقبل التهجيير اصر والدي - رحمه الله- علي ان نعود الي البلد لنتعرف علي الاهل ونشوف البلد قبلما تغرق .. كان اخوي الاكبر مني في مدارس بعطبرة والخرطوم فكنت انا الولد الوحيد الذي تم تحويله من مدرسته في كوستي الي حلفا ..لكن كنت "عليلا" بالمفهوم البلدي فانا البس نظارة منذ ان كنت في الخامسة من عمري والنطارات كانت عند قريبنا المرحوم محمد علي عباس في الخرطوم (النطارات والساعات الاهلية بالقرب من محلات زكي "لا اعرف ان كانت هذه المحلات موجودة الان ام لا ") ولا توجد محلات للنظارات بين حلفا والخرطوم وعليه كان لابد الحفاظ علي نطارتي فبدونها لا مدرسة ولا يحزنون فلذا فرضت علي الوالدة عدم العوم حتي لا اخلع النطارة فتضييع اوتنكسر وكانت ترسم في ساقي علامات عند ذهابي مع اطفال القرية الي النهر لتتاكد من انني لم اعوم وسبب لي ذلك كثير من الاحراج زيادة علي احراج انني "ابونطارة " و"رتانق بنجمن " ( ما بيرطن في ذاك الزمن ) ولكن شجعني شيطانيين اصغر مني ( احدهما فيصل طه بن خالي الذي رحل عن الفانية قبل اربع اسابيع وبن جدي جعفر صالحيين عم الكاتب عثمان صالحيين ) بان احاول العوم وهما سيقومان باعادة الرسم علي الساق كما هو وفعلت ورسمو علي الساق نفس العلامة وعدت الي البيت ونلت علقة ما نلهاش حمار حردان عند اللفة فلقد فاتهم ان الساق لم تصر متربة بعد العوم ورجعت بساقيين نظيفيين ..!! ومنها حرمت !! ورغم ذلك كسرت النطارة مرة وسافرت من وادي حلفا الي محطة الخرطوم الي دكان قريبي ونطارة جديدة وعودة بعد كام يوم الي المدرسة الاميرية بوادي حلفا وعلقة بالا اكسر النطارة تاني ...
وبعدة كلو يانجاة تقوللي رو للر بلاديز و روللر اسكيتز .. خليها تلبسن عشان ما تطلع كيشة زي حال العبدلله ...
مودتي
ابوبكر

[imported_الجيلى أحمد]

يابيان
البت الكبيرة اليشيا صوفيا مغرمة بالحكاية دى وأم الفقرا (زيك كدا) كانت خايفة عليها خوف شديد, فكنت آخذها لتعليمها دون علم والدتها,
وكانت مفاجأة لها حين شاهدتها تتزحلق لأول مرة وبمهارة..

أقترح عليك يابيان إنتى ذاتك تمشى تتزحلقى معاها :D

[imported_خالد الحاج]

قبل 13 سنة يا دوك أول صباح لي في أمستردام وكنت نازل في فندق درجة تانية في أشهر ميدان أسمه
(دام أسكوير) وقفت في الشارع "أترقط" من البرد رغم أني لابس الهدوم الجبتها معاي كلها :D
وحيات خوتك أشوف ليك زول لابس (لباس بكيني) أي والله وشراب عليه لستك علي قول عادل إمام
ولابس جزمة فيها عجلات ومدردق في الشارع في أمانة الله.
طبعا ناديت أماني : يا حاجة تعالي شوفي المجنون ده. الزول يشهد الله بقي لي زي لوحة لي سلفاتور دالي الشكية لله وأنا أرجف من البرد..

بعد كده ساقوني السناير لي بحيرة متجمد ولبسوني جزمة بتاعة تزحلق (دي فيها حديدة بس ما فيها عجلات) ورغم أني كنت شايل معاي كرسي نظام أثبت نفسي لكن رفضت الطبيعة تخلع عني ذاك الشايقي المستشرق "ضمة ضمة" :D

أسه سارة وجعفر في أمانة الله يتزحلقوا بيها وكمان تشوفيهم بي جزم العجلات ما شاء الله حريفين

يا بيان يا أختي ده زمن مختلف.. ويشهد الله ذكرتيني المرحومة أمي ونحنا ماشين البلد قعدت قبليها بي شهر تحذر فيني : أوعاك من ركوب الحمير بتكسر يدك وهنا إلا يودوك للبصير، عاين لي صلاح ود عمك كيفن معوج لا تعرفو ماشي لا تعرفو جاي عليك :D .

إنت زمانك فات وغنايك مات متلي وجاي عشان كده خلي الجيل ده في حالو .

[عكــود]

تحياتي يا بيان،

تعرّضت لضغوط مشابهة
وانصعت بعد طنطنة ليست بالقليلة
وبعض محْرَكة
النتيجة كانت لا تتناسب وخوفنا
أقل بكتير يا دكتورة

أما أن زاريا بت الـ 18 قد نكصت
فوالله لا
ما فات فيها الفوات
دحين وافقي بدون كترة ملاواة
لأنّك في النهاية خسرانة خسرانة
أخير تثبّتي فضلك كأم متفّهمة لمتطلّبات الشباب
فيحسب لك

كل الود

[imported_بركات الشريف]

اقتباس من ام راشد: (ويا بركات يا خوي ادروب دا انتايه ولا شنو

اما الباقي خليتو لي بيان عشان ترد عليك )
واقتباس من بيان (دا رجوعا لادروب النموذج وكلام ام راشد عن ما هو نوع ادروب؟)
سيداتي العزيزات: أكيد ادروبنا المذكور اعلاه (تربية نسوان):D:D

على اى حال ان جينا للجد يا دكتورات فتربية النسوان ليست شرا كلها ولا تربية الرجال خيرا كلها، بل أن افضل تركيبة ممكنة هي الخلط بينهما، فعطف الام وشفقتها الدائمة التى لاحدود لها يجب ان يوازنها في المقابل (عين حمراء) ليس بالضرورة ان تكون (حمراء وشرارة) فقد انتهى عهد الخيل والليل والبيداء ولكن ولو حمرة على خفيف مثل (شفق المغيب) بلغة اهل الفن، لضبط الامور، و الطفل ان اعطيته شبرا طلب مترا، وان اعطيته مترا طلب كيلو مترا، فلا بد من وجود (فرامل) تستخدم من حين لآخر لتهدئة الاوضاع وتصحيح المسار، وعلينا ان نعترف ان الجيل الجديد لا يفكر كما نفكر ولا ينظر للحياة كما ننظر وهذا حقه، ولكن بما ان عملية تواصل الاجيال وانتقال الخبرات وانتقال الارث الثقافي من جيل الى جيل والذي بدونه تضيع الهوية أمر لازم، فقد يجد الجيل القديم نفسه مضطرا لممارسة بعض الضغوط على الجيل الجديد لتتم عملية النقلة الثقافية والتى تميز كل مجتمع عن الآخر، وهي ضغوط لا مفر منها، فترك كل شخص يتمرد كما شاء معناه غرق المركب.
واذا رجعنا لزاريا وجزمتها فلابد من ان نتذكر شاعرة قصيدة ( ود الملك عريس خيلا بجن عركوس)..جيل قديم جدا يتأسف على وفاة الرجل في فراشه وجيل حديث جدا تتمدد طفولته وويتسع مجالها ولابد من التوفيق بصورة أو اخرى بين الجيلين..فالماضي يجب الا يكون قيدا على المستقبل ولكن لابأس من ان يكون سياجا له.