إلى صديقتي.. حبيبتي.. زوجتي نانا وهي ترتدي عامها الثلاثين

[شليل]

في يوم من الأيام
والواطه نديانه
إخضر رحم الليل
نورتي يا نانا
ولدوكي من غيمة
من نجمة نعسانه
متكيه فوق النيل
والقيفه خجلانه
ضحك السقد بغته
وأعلن موات الليل
صفق الضلام حت
وإتحك ضهر السيل
وإندلى من حته
آسراني فيك بالحيل
مال النخل حت
كل السبيط آمن
شبال وصقريه
حتى البحر خت
الحنه وإطامن
حاضنلو قمريه
بتقوقي من قمت
شافع صغير ساكن
في بالي غنيه
غنية للورده
غنيه غنية
مشرع طشاش عدى
وأشواقي ليك الزاد
مليون سلام في الخد
مليون سلام بالجد
لي لحظة الميلاد

[imported_omrashid]

والله انت رائع يا شليل

ربنا يخليكم لبعض

[imported_mamkouna]

ولدوكي من غيمة
من نجمة نعسانه
متكيه فوق النيل
والقيفه خجلانه


ربنا يخليها ليكَ يا شليل..
و يخليكَ ليها..
إن شالله مرت خَرَفَك...الما تنحل من طَرَفَك...
و..
إن شاء الله إنتَ..
راجل خَرَفَا...الما تنحل من طَرَفَا.

[imported_عمر مجذوب خطيب]

شليل ما اصدقها من قصيدة وما ارشق مفرداتها - تبغر عديل كدا

[imported_فيصل سعد]

هنيئا لكما.:):)

[شليل]

التحية لحضوركم الأنيق

[imported_mohmmed aldareer]

الاخ شليل

بالجد اديت للمنتدى رونق خاص

كل عام واحلامكم بتتحقق بدهشة هي!!!

[شليل]

أخجلتو تواضعي والله.. شكراً أخي محمد

[عكــود]

وأشواقي ليك الزاد
مليون سلام في الخد
مليون سلام بالجد
لي لحظة الميلاد و. .
مليون باقة ورد لها ولك . .
يا شليل.

[معتصم الطاهر]

مال النخل حت
كل السبيط آمن
شبال وصقريه
حتى البحر خت
الحنه وإطامن
حاضنلو قمريه
بتقوقي من قمت


أنت تستاهلا

وهى بالجد تستحق ..

فهذا حب ناعم و جميل وولوف ..

دام الحب ..

[imported_mohamed hemaid]

مال النخل حت
كل السبيط آمن
آمنا بهذا الحب..
دعواتنا بسعادة دائمة ...

[imported_bayan]

ولها العمر المديد الذي تقضيه معك في سعادة ومحبة

قوليها تكسر ركبة في العمر الاجمل دا...

ولكما كل المنى

[شليل]

شكراً على حضوركم اللطيف حميد- الراجل الكتاب- والأخت بيان

[ناصر يوسف]

شليل ما راح
شليل ساكن بين شواطيها
بغني للبت ويقوقي يقوقي يقوقي زي قمريه
واليوم أكان عصريه
تحت ضُل التبلديه بهاتي عليها
وهي تقول

وااااااااااااا شليلي الراح من دماي زمان
وكتين موعد الميلاد هو كان رايح
لكنه في
ساكن في شراييني غُنا

و




أحب الحُب زاتو ياخي

شليل ... ده شنو ده ؟؟؟ داير تجننا كمان ؟؟؟

لها ولك مني جزيل حُبٍ وأمنياتٌ عطرات مضمخات بالندي وأريج الورد الزهر الــ الفرح

تخريمه سغنتوووووووووته:

قلت لي وهي (إلى صديقتي.. حبيبتي.. زوجتي نانا وهي ترتدي عامها الثلاثين

إنت شفت شهادة ميلادها جدجد كدي .. ههههههههه :p:p:p

هو ربيع العمر يا شليل الثلاثين من العمر ما أبهاه من عمر

وأمنياتي لك ولها بعمر مديد وسعادة لا تُحد

[شليل]

ناصر.. والله ما عارف أقول ليك شنو.. ياخ إنت أثنيت علي بشكل ما متوقع.. أنا كل العملتو إني إتنفست حبيبتي وبس
لكن بتفق معاك في : أحب الحب زاتو.. لأنو هو الوحيد البيجدد فينا الحياه.
تخريمه صغيرونه:
آخر كلام!!! واحد وتلاتين.. ما تقول لي فيك الخير.
ملحوظة جديرة بالملاحظة:
شيل لي عدد واحد بوسه من الأموره الفي الصورة دي.. ربنا يخليها ليك

[imported_عزة كمال]

في بلدنا الجافي ذو الطبيعه الصخريه يعتبر البوح بالمشاعر الجميلة ضعفا و هذه اقسى انواع الماسي ,,,
يكبر الطفل في بيت قاحل يحتاج الى اذن لتضمه امه الى صدرها ناهيك عن الاب فهو بالنسبة اليه (الراجل البجيب لينا القروش و المرة مرة بقريني ) .... لا يجد اي علامات مشاعر جميلة بين امه و ابيه ........... فماذا نتوقع ان تكون طبيعته ؟؟ ومن هنا نشا الاتهام الجائر انو السودانين جافين و دمهم حامي ,,,,,,,,,,
و الباب مفتوح للنقاش ..........
و هنيئا لك فرحتك الجميلة يا اخ شليل
_________

[شليل]

وللبخوض صفاك عزه نحن النبال..
شكراً على شعورك اللطيف..

[ناصر يوسف]

ناصر.. والله ما عارف أقول ليك شنو.. ياخ إنت أثنيت علي بشكل ما متوقع.. أنا كل العملتو إني إتنفست حبيبتي وبس
لكن بتفق معاك في : أحب الحب زاتو.. لأنو هو الوحيد البيجدد فينا الحياه.
تخريمه صغيرونه:
آخر كلام!!! واحد وتلاتين.. ما تقول لي فيك الخير.
ملحوظة جديرة بالملاحظة:
شيل لي عدد واحد بوسه من الأموره الفي الصورة دي.. ربنا يخليها ليك

أخي الحبيب

شليل الماااااااا راح

هذا لعمري تعبير رقيق دقيق وفيه من تفاصيل الإنصهار الكثير الكثير

وعلي قول أخوي عبد العظيم أحمد الطيب

ده كلام كبييييييير جداً

تسلم وتسلم ليك حبيبتك ذات الــ (31) :p:p:p

ولك من الأموره رحيق شكرٌ علي البوسه

[شليل]

تسلم ياناصر..
وعقبال تتنفس رحيق في ال 31