انا لا وارغو لا افياني...قصيدة جديدة لهاشم صديق [الأرشيف]

مشاهدة النسخة كاملة : انا لا وارغو لا افياني...قصيدة جديدة لهاشم صديق

imported_ابوريم

14-06-2009, 09:59 AM

(1)
التكوين
إسمي خميس ود كوة العاتي
كان عجلاتي
وأمي مهيرة وأبوها بشارة
كان ساعاتي
أبوي من بارا
وأمي إتولدت في حلة غميسة
ما بتنشاف في أي خريطة
بأي طريقة بأي شطارة
كان بي عين أو نضارة
أمي وأبوي صدفة اتلاقو
في الدنيا الشاسعة والرحمة الواسعة
في قطر الهم الدرجة الرابعة
كانو عوايل في السفر الصدفة
ملح وملاح ونسة وعرفة
تسالي وترمس وقهوة بقرفة
وفي الونسة السمحة في قطر الزحمة
قلب الوالد حن ورف
وقلب الوالدة اتخج وخف
بعد شهرين صبحو اتنين
زوجين طيبين اتلمو في اسرة
في بيت (البقعة) وسط ( العرضة)

أبوي فقران لكن بدبارة
مهر الوالدة كان سحارة
تلاتة جنيه.. سعفة ووردة
وفركة وفردة
تبروقة ومصحف .. وبمبر ومبخر
تربيزة يتيمة .. نص دسته كبابي
كفتيرة قديمة .. وكم هبابي
جابونا تلاتة.. بتين ووليد
ربونا بكسرة.. كسونا السترة
شربنا اللبن الصافي الاصلي
ما اتمطقنا اللبن البدرة
شبينا كبرنا.. فهمنا نطقنا
وكسبنا القدرة
وأنا كنت مقرم .. وود تفتيحة
والدنيا دي كانت طيبة فسيحة
سينما (برمبل).. باسطة (بيَن)
الترماج
حبوبة عجوبة
والنفاج
قصبة سكر وعنكوليب
نبلة قوية وقلوبية.. شرك الطير
رحلة عيد لجزيرة توتي .. أو الباقير
شدر كافوري سواقي الحاج
جنينة النزهة..
زنكي اللحمة ..السوق الزحمة
وقهوة نوري
والدافوري قيامة عجاج

أنا كنت حريف والكورة شراب
أحاور نملة في جحر الضب
وأبهدل أجندل أشطر باك
أو هباك
أفرشو رررب
روضت الكورة
بدل مأسورها بقت مأسورتي
المجنونة بت الكلب
وأترقيت للتيم الاول
وكبرت بقيت مفتل شاب
اتنورت عن الأوطان
وإتفتحت علي الاحزاب
العرضة جنوب .. العرضة شمال
خور ابو عنجة .. بيت المال
شارع الطابية.. تيم الطاغية
كار المافيا .. جنينة سيدي
سور القبة ..ضرايح بحري
شرايف بري
رافع الراية
تيم القعدة والانداية
ناس شاشاما.. نادي شليل
الحولية .. دق النوبة
في حمد النيل
الشامراب .. نادي الكاب
……. والخ .. والخ
بخا بخ في العجن اللخ

ولأني حريف وود لعاب
سكنتني عيون من باب لي باب
إتسجلت في تيم مغمور
مرقت سريع لي تيم مشهور
والبلد أتيام والناس أقسام
شارع خاص .. شارع عام
أتيام فارعين .. أتيام أقزام
أحزاب فارغين .. أحزاب أعلام
دروب وحروب .. صدام وكلام
وأنا كنت خميس ود كوة العاتي
بقيت موضوع تصفيق وشيوع
مرات محبوب أحس بسلام
ومرات أتخاف .. تقول بعاتي
مرات إخلاص لشعار التيم
مرات معدود في الحال متواطي

(2)
الوعي

من تيم الشوف الضيق ضقت
إتأملت الحال المايل
وشفت الناس في خصام وقبايل
فكيت تسجيلي بايدي وعقلي
وأتسجلت في تيم الشعب الثوري الغالي
وأنا أصلي مصحصح وود تفتيحة
ولاعب فقري
مرقت سريع من ضيق الحارة
للميدان الواسع دوغري
أنا لا وارغو ولا إفياني
لا ود طمبل لا مساوي
إتسجلت بحق طعمية
شراب مقدود ..وكدارة هدية .. وكيس تمباك
وإتفننت أكون رأس حربة
وإتجننت عديل في المحور
وإتقطعت أكون مساك
إتراقبت كتير بالصف
وإتكعبلت كتير من خلف
ولأني خميس ود كوة العاتي
أقع وأقوم كمكان سداري
تقول عجلاتي

وقعت كتير لكني وقفت
حاورت دفرت بعزم الشعب
وصلت المرمي
كم سددت ..كم سجلت.. كم دافعت
كم مررت .. كم قومت نفس عراضة
مع اني مراقب ديمة بلاعب
لاصق فيني كأنو قرادة
ومرات ممسوك بي زول عتالي
جابوهو عشاني خصوص من مالي
شعارو الغالي لا باص لا بصة
يتابع يراقب تقول مرسال من جهة مختصة
لكني طرحتو .. جمعتو .. قسمتو
جدعتو بعيد في برة الخط
إتمدد يقنت زي ضكر البط

ولأنو الكورة والدنيا الصعبة
بحر ممدود لا حد لا شط
إتعذبت في درب الواقع
أكتر وأكتر
التحكيم الفاشل ياما
شهر في وشي الكرت الاصفر
ومرة الاحمر
وجرايد النقة كانت أخطر
ألف إشاعة وكم شماعة
سموم وحراب .. دمار وخراب
كم سووني بعت وخنت
أو ساومت وإتقاعست
بعت قضية قبضت رهاب
وإتهافت عديل لي والي
أو دقيت في السر لي باب
وإتوسلت عيون أرباب
مع إني خميس ود كوة العاتي
ود تفتيحة .. مصحصح وفقري
مرقت عديل من باب الحارة الضيق ضايق
للميدان الواسع دوغري
فكيت تسجيلي بإيدي وعقلي
وإتسجلت في تيم الشعب
الثوري الغالي

imported_على ماجداب

14-06-2009, 04:18 PM

الأخ ابو ريم
تحياتى وودى
آسف فانا من معجبى هذا الرجل زمان ..
لكم أحزن وأأسى لحال هذا الرجل الذى خرجت شاعريته فجأه ولم تعد حتى الآن وما أظنها ستعود ..اقرأ معى آخر قصيده لهاشم صديق ..وحاول تتذكر معى رائعته (نبته حبيبتى) اللى بيقول فيها :

لأنو الكلمه شرف الرب

وعز الرب

وتاج الرب

لو خانت قلوب الناس

محال الناس تحس تطرب

كأنو ياصديقى ما ياهو نفس الزول .. ماعارف الحاصل شنو ..وربما يرى غيرى غير ذلك
لك مودتى ..وله هاشم الصديق تحايا عطرات

imported_ابوريم

15-06-2009, 07:06 AM

imported_مرافي

17-06-2009, 12:12 AM

علي ماجداب
مودتي لك.
لا داعي للأسف.
الشاعر يعيش ويمشي بيننا خطاوي الحسرة ويمضغ معنا نفس المر وكتوي بذات النيران. هو ليس من كوكب آخر. فقد ولى زمان الشعراء الذين يهيمون في الصحاري عشان الحبيبة. عشان كدة بنظلم الشاعر اذا وضعناه في ثوب مرحلة - قصيدة - اسلوب - نمط - ما...هو كائن حر طليق...يكتب عن القرنتية وعن نبتة ويبدع في كلٍ.
اشكرك على مداخلتك.
تخريمة!
اعتبر نفسي محظوظا-اول مرة-لانك اديتني شرف مشاركتك التانية في المنتدي.

ابوريم سلاااام
حقيقة الإبداع في بلادي عظيم ولكن وللاسف :mad:المبدعين قد ولدوا من رحم بلد ،لايقدر الإبداع!!!!!!!
مبدعون كثر مثل هاشم صديق.... من يعرفهم من يعطيهم وضعمهم الذي يستحقونه!!
لدينا عظماء في جميع الفنون ولكن!!! مهمشون !! منتهى تكريمهم ليلة تإبين بعد موتهم!!!! ياللسخف!!!!
ومن يتغنون للحمير والبغال والحناطير!!! يملاون صفحات المجلات ويصدحون ملء القنوات
اليست مفارقات عجيبة
الاعلااااام اين ؟؟؟؟؟؟ثم اين؟؟؟؟؟؟
ثم اين؟؟؟؟؟؟؟؟؟؟؟؟؟؟؟؟؟؟؟

imported_كيشو

17-06-2009, 11:37 AM

العزيز أبو ريم
لم أقرأ القصيدة بعد ولكن دعني أقول إن هاشم صديق مبدع سوداني يحتاج إليه السودان- كبلد -في سيرته الذاتية

imported_على ماجداب

17-06-2009, 04:22 PM

علي ماجداب
مودتي لك.
لا داعي للأسف.
الشاعر يعيش ويمشي بيننا خطاوي الحسرة ويمضغ معنا نفس المر وكتوي بذات النيران. هو ليس من كوكب آخر. فقد ولى زمان الشعراء الذين يهيمون في الصحاري عشان الحبيبة. عشان كدة بنظلم الشاعر اذا وضعناه في ثوب مرحلة - قصيدة - اسلوب - نمط - ما...هو كائن حر طليق...يكتب عن القرنتية وعن نبتة ويبدع في كلٍ.
اشكرك على مداخلتك.
تخريمة!
اعتبر نفسي محظوظا-اول مرة-لانك اديتني شرف مشاركتك التانية في المنتدي.

الجميل أبو ريم
صديق هذا تربينا على كلمته وموسيقاه وجرسه وقوة تعبيره .. وهو الآن مختلف .. على أساس الشعر بكلياته .. وعندما يكون الأمر أمر شعر فقط قد لا يشفع لسيئ الشعر من قاله .. ومن عاش قوة النص عند صديق ..قوة تكفى لتقبع كلماته فى الذاكره حفظا وترديدا .. سيرى ان النص أضعف من ان يحتمل .. واضم ايضا نص القرنتيه الى هذا النص ..
لكم العتبى بإحتمالكم لرأيئ المغاير
معاك يبقى الزمن حاضر
ويجى العالم قريب منى
ويكون أجمل
هاشم صديق

imported_AMAL

17-06-2009, 04:55 PM

لكم أحزن وأأسى لحال هذا الرجل الذى خرجت شاعريته فجأه ولم تعد حتى الآن وما أظنها ستعود
هاشم صديق نفسه خرج ولم يعد من زمااااان

ابو ريم
وارغو وافياني ديل منو؟
الله كسبك يالفي بالي;) خربتو اي حاجة :D

تحية وترحيب اخ علي ماجداب