قاموس المفردات العامية فى اشعار حميد

[imported_نغم]

جيت فوق راى

لانو الاقلام النادت بفتح بوست اخر
ما ورتنا المغزى شنو و ما اقنعتنى غايتو
و ما بطالبم بى التوضيح
لكن الى صاحبت البوست سلام

الغرض من البوست واضح
مفردة حميدنا فى كل قصائده
ا
الجمع فى بوست واحد يتداخل فيه الكل
بتسهل مهمة
- المتابعة الجيدة
- الاستفادة من مجمل المفردات و التفنيد
- يسهل الرجوع الى معنى المفردة فى احدى القصائد و تبيان اختلاف معنى اخر
وهذا بالحق هو ما نرمى اليه من كشف العبقريه اللتو
- التركيز فى بوست واحد حافظا على هذا الجهد الحالد


فى بالى كمان تعليلاتى البحتفظ بيها الى ان يستبين الامر

ماريل
ابقى على عضم البوست الموحد لدل تشتيت الجهود

ولك التحيات

[آيات مبارك]

العزيزة ماريل

بوست أكثر من جميل
وكل ماقرأته أتذكر المرحوم خالد الحاج .. ليته كان حاضراً ورآه

[imported_ماريل]

جيت فوق راى

لانو الاقلام النادت بفتح بوست اخر
ما ورتنا المغزى شنو و ما اقنعتنى غايتو
و ما بطالبم بى التوضيح
لكن الى صاحبت البوست سلام

الغرض من البوست واضح
مفردة حميدنا فى كل قصائده
ا
الجمع فى بوست واحد يتداخل فيه الكل
بتسهل مهمة
- المتابعة الجيدة
- الاستفادة من مجمل المفردات و التفنيد
- يسهل الرجوع الى معنى المفردة فى احدى القصائد و تبيان اختلاف معنى اخر
وهذا بالحق هو ما نرمى اليه من كشف العبقريه اللتو
- التركيز فى بوست واحد حافظا على هذا الجهد الحالد


فى بالى كمان تعليلاتى البحتفظ بيها الى ان يستبين الامر

ماريل
ابقى على عضم البوست الموحد لدل تشتيت الجهود

ولك التحيات

ازيك يا نغم
عكود فكرتوا كالاتى:
نفتح بوست منفصل لكل قصيدة
بعد يكمل فيها النقاش يتم دمجها
فى البوست ده...
ارجوا تكون وضحت ليك الفكرة
كونى بخير
يا ستى
شاكرة انا لاهتمامك
وابدأ رائيك

[imported_ماريل]

العزيزة ماريل

بوست أكثر من جميل
وكل ماقرأته أتذكر المرحوم خالد الحاج .. ليته كان حاضراً ورآه

شكرا يا آيات
اكيد بسعد بى
مرورك واستمتاعك بالقراية هنا
تسلمى يا ستى
(ربنا يرحم خالد الحاج)

[imported_ماريل]

بوست توثيقي جميل يستحق المتابعه
شكرا ماريل لهذا الجمال

وانا اسعد جدا ان تلمسوا الجمال فى دوحة (حميد)
وان تستمتعوا به......

[imported_نغم]

ازيك يا نغم
عكود فكرتوا كالاتى:
نفتح بوست منفصل لكل قصيدة
بعد يكمل فيها النقاش يتم دمجها
فى البوست ده...
ارجوا تكون وضحت ليك الفكرة
كونى بخير
يا ستى
شاكرة انا لاهتمامك
وابدأ رائيك

فكرة عكود واصحى
وما علينا بالدمح (التقنى)

وما وقعت لى الفكرة دى
با بنيه
االبوست ده مسئوليه كبيرة
فكرتك ليهو شنو؟
و عشان النقاش
وهو النقاش بكمل النبى فوقو ههههههههههههه

قت تشتيت جهود
ده القصدتو
البوست ماشى وين و كيف
ونجى تانى نرقع او نتلقو




مانى معاها ضمة الله
:D:D:mad::D:D

[imported_نغم]

نرجع
عشان حميدنا
وست الدار

مقطع اول

لفتك فجراً
يسطع .. يقطع ...رحطك
ست الدار سامعاني كويس ؟؟
مرتي و اخيتي وام الكل
أنا بندهلك من شارع الله ..
الفوقي هجير والتحتي بقل
سُبّي معايا الشردو راجلك ..
والحرمونا شوية الضل
سُبّي الحالة العالة علينا ..
حتى احكيلك بالتفصيل





بين الحين والاخر يقوم حميد باعادة كتابة بعد نصوصه وقد تمر بعد النصوص بعدة مراحل كما في ست الدار التي لاندري ماهو النص الكامل بتفاصيله الا انني اعتمد علي النص الذي تم تغييره مؤخرا ً .. وقد تكون هناك اختلافات كثيرة بين ما اوردته هنا ونص اخر لست الدار ..

.

مقطع تانى
حتى احكيلك بالتفصيل
حاصل الحاصل يا بت أحمد
جانا وفد في المصنع زاير ..
وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف المصنع فيهو خساير
وقالوا يخفضوا ميتين عامل
ميتين عامل في فد مرة
ميتين عامل .. ميتين عامل
يبقوا هوامل .. يبقوا ارامل
ما يهموش .. الهم المصنع
تفّ قرارو وفات في حالو
مسئولين ونقابيين .......
مافي العارض واللا اترجى
العمال من سمعوا احتجوا ...
متجاوزين العرف السايد
سيرو موكب صامد وصامت
إتضامنا معاهم سرنا ..
أب عرام دور عربيتو ..
العربية الامريكية....
زنقح خلا الموكب ثابت
احتجينا مع الإحتجو
إتكلمنا كلام موضوعي
قلنا المصنع حق الدولة ..
والعمال أصحاب الحق
هي البتقرر والتتولى
هي البتحدد سير المصنع
يد العامل هي العاد تنتج
مو المكنات الأمريكية
زيت العامل ياهو البطلع ..
مو المكنات الأمريكية
وسكن الأيدي العمالية
أنضف من لسنات الفجرة
ودين الدقن الشيطانية
ومن كرفتة البنك الدولي ..
وكل وجوه الراسمالية
وأشرف من ..............
داك الحين المصنع هاج
جات عربات اللات بوليس ..
فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتحريض والتخريب والشيوعية
البوليس صاقع شيوعية
وفاكر نفسو بنبذ فينا
آيا بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقم أو تحقيق الأمريكان



مقطع ثالث

سبوعين عشناهن جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالن شاهد
شوق وسلام الزين ود حامد
ست الدار الشوق الواحد
لي حلتنا وليكم ليكم
وللإشراق في عينيكم
وكل الناس الزولن صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
لمت ..لمت .. كان ما لمت
أنا جاييكم وما ندمان

.

(بعد الحاصل والإتحصل ست الدار بت أحمد تكتب) :

مقطع رابع

زيني الزين .. أب حالاً زين
جاني جوابك .. يا المبروك
وسابني أشوف الدنيا كويس
وأعرف غلط الصاح مظبوط
سابني أميّز .. وأقدر أفرّز .. أرجع أميّز
فرحانابك يا أحزان
فرح النار بي لوح الزان
ومبسوطابك يا المبسوط
ما هزّاني مصيرك
قدر ما هزوني الميتين عامل
ميتين عامل في فد مرة
ميتين اسرة تروّح وين
في الأيام النجسة المـُرّه
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عُمّال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تُعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بُنية
ينتج كيف؟ شغال بي فـُونيا؟
عامل ينتج عشرين حتة
تلحقو منها قيمة إتنين !!
ستة بغطوا المنصرفات ؟
سبعة.. تمانية .. تسعة بغطوا ؟
أدّها تسعة المنصرفات
كل الفايض ..بدخل وين؟
قولوا البفضل بمشي لي مين؟
وبرضو خساير؟
والله مهازل
يا مضغوط .. خفّض ميزك حبّة تين
تنك القعدة تلاتة خطوط
خفض مرتك توب مضغوط
من التمسحبو كبابي الصين
خفض عمرك يا ابن الفانية
وبي نظارتك واجه ثانية
ثانية عيون الشغالين
ثانية وبس
والله مهازل


حميدنا
تجلى فى وضع العلاقة بين الزين و ام راشد فى المقطع الاول

لفتك فجراً
يسطع .. يقطع ...رحطك
ست الدار سامعاني كويس ؟؟
مرتي و اخيتي وام الكل
أنا بندهلك من شارع الله ..
الفوقي هجير والتحتي بقل
سُبّي معايا الشردو راجلك ..
والحرمونا شوية الضل
سُبّي الحالة العالة علينا ..
حتى احكيلك بالتفصيل

و دى براها مفخرة لام راشد ورسائلهما المتبادله فى القصيدة

الحكى بالتفصيل فى بقية المقاطع
بوضح الحاله الاقتصاديه و السياسيه فى ذاك الزمان
وبالطبع مع التدهور المريع و اذ قارنا هذا اليوم
مع مشاهد تلك الحقبه نتوصل الى مآل اليه حالنا
..

[imported_اسامات]

اخر ما تبقي من جوابات ست الدار ..
بعدها تأتي التلغرافات ونرحل الي قصيدة اخري ..

ميتين عامل ؟
ميتين بيت ؟
ميتين اسرة بلا راس خيط؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليش يا الزين بتوصي عليا
ليش ... ليش ...ليش
بتوصي عليا
وانا بت احمد ست الدار
ام اولادك وهم صغار ..
ام اولادك وهم صغار
ثم ولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
وعارف ام راشد والتومات ..
مرتاً دغري وغلباوية
آه يا الزين .. لو كنت معاكم ..
كنت بقيت النوباوية
اسبوعين قضيتن جوه
يبقي غصب زادنك قوة
ما تهتم يا الزين بالحاصل
واصل سعيك .. واصل واصل
واصل سيرك ............
كان ما كنت الزين ود حامد
كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوّت شو ..
فرقو غيما الأمريكان
ياتو رصاص ما عقبو خلاص
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو راحوا الديش
غزّا بكانا اتنين رطانة
وصاقع كلو من اسماعين
هو الفسّل لهن الشغلانة
ويا اسماعيل ما كان الديش
شقّ مسيمعك بالجبخانة
لو المجلس قبل اوراقك ..
أو في الثانوي لقيت لك خانة
لكن قدرك يا إنسان ..
بلداً هاص هيصة جبّانة
وطالو الناس التريانين ..
ضلو الله الما ضلانا
أخّدو نوره، الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفا شكوهو وما لقو حق
المحجوب إتلقى اخبارك
وقال جاييك في أول بص
البرسيم طهرنا البارح
نعجة راشد صبحت والدي
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
وفي الأتراح .. الزين الزين
ما تشغل بالك
بس يا الزين كان درت مشورتي
اصلو كتالك ياهو كتالك
تجي مندلي
الواطة تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزالة السوق
مبعوتالك عشرة جنيه
والأشواق من هنا لا عندك
ست الدار أحمد جابر


.

[imported_ماريل]

(ملح المشاعر)
السلام ملح المشاعر
مافى حب الا انبدابو
بالعديلة الجانا ساير يا حباب الجاب عقابو
.......
همبريب السلم يقدل
والامان يربط سحابو
والديمقراطية تنزل
والوطن يخضر ترابو
...........
الفتح نيران فى اخيو
يمة اخير يفتح كتابو
المعارف تبقى ضيو
من بدل يدقس فى غابو
.........
كل طائر فر يرجع
للعشيش المرة سابو
اصلو مما ازهارو تفقع
الربيع يحلو دابو
............
البلاد فى صباها لسع
والوطن فى عز شبابو
دار يشوفنا
ودايرة تسمع حس انيسه الطال غيابو
.................
اسالو النيل شيمة شيمة
طول جريفاتو وضفافو
عن تواريخنا المقيمة
والعز الشوف عينو شافو
امة ما بتعرف هزيمة
لا انكسارات لا خلافو
اليهش طيرن فى نيمة
واحراق شدرو ونشافو
ده الوطن دفتر عزيمة
بس جلودنا سمر غلاف
فالعلينا قليبو ديمة
حقو فيهو الله نخافو
........................................
انبدابو:ابتدأ به
عقابو:البقية
همبريب:الجو الجميل المحمل بالدعاش
يربط سحابو:كناية عن كثافة السحب التى تنبئ بامطار غزيرة
يدقس:يذهب مستعجلا

[imported_ماريل]

(تعلُق..و..تعلق)


يتعلق قلبك بى زول
والزول عن حبك مشغول
تلتاع ولياليكا تطول
على قدر هواك ما يتمدد يتمدد جواكا عزول
.....
فوق سكتو حيلك ينهد
لا تقرب لا تلقى وصول
الدنيا قبالك تنسد
على بختك يا يظهر زول ينسيك مرارات الصد
فى الزمن الصبرى المكتول
يا سارتك من قيف المد تترايم جوه المجهول
لا شرطة لا سلطة ولا حد
عن قدرك غيرك مسئول
لكن يوم تصبح مشغول بى تربة اهاليك الجدبزى حبة درة فى قندول يتعلق قلبك بالشعب
فى زمن الجهجهة والصلب
لا ارتحت ولا ارتاح القلب
شقيش خطواتك ما تروح ينبح من خلفك كم كلب
السجن قصادك مفتوح
والمشنقة فى اقرب درب
لا حزن عليك ولا نوح لا اتحزم لى تارك حزب
فى كفك شايل للروح
والروح بلوح للشعب
والشعب مغمد مطروح بيسمع فى جداول الضرب
عصفورك فتفت مشبوح
يسأل فى الشرق من الغرب
هل يطلع باكر مشروح زى طلة بسمة من القلب
ام تبقى الزول المسنوحيتسوك باسلاك الذرب
دا لانك دغرى وبيفوح من بقك كرهك للحرب
....................
تلتاع:من اللوعة اى العذاب
قبالك:امامك
سارتك:الساره هى الهدام اى الجزء من الشاطئ المحازى تماما للنيل والذى يتهدم بفعل الموج
قيف:الشاطئ
يترايم:يتهدم ويسقط فى الماء
الجدب:الجاف الغير مزروع
شقيش:على اى شق او على اى اتجاه
تارك:التار هو تحديدا الثأر
مشبوح:الشبحه هى مد الرجل الى اقصى ما تستطيع
مسنوح:قبيح

[imported_وهاد ابراهيم محمد]

تحياتي ماريل وعساك بخير..
شكراً لأنك عاودتي الكتابة هنا..
_____
البوست رأيته في بداياته.. العنوان إذ يوحي بدسامة المادة, عمدت ألّا أتابعه تجزئةً
لأتمكن من مطالعةٍ ممتعة لعدة صفحات متتالياتٍ, وفعلت.
_____
المفردات العامية أجمل ما يحفظها لنا هي هذه القوالب الشعرية العصيّة على النسيان,
ويا لكثر ما تساقط من مفردات باتت نسياً منسياً, بعد الهجرات القسرية, والتحضُّر الإجباري والجاهِل..
هذا العمل يُثري قاموسي انا, أولاً
ثم يمنحني قراءة جديدة بالغة الإختلاف, لأعمال حميد.
فياله من عمل.
_____
شاكرة لكِ وللإخوة (المترجماتية) أجمعين.

[imported_ماريل]

تحياتي ماريل وعساك بخير.. شكراً لأنك عاودتي الكتابة هنا.. _____ البوست رأيته في بداياته.. العنوان إذ يوحي بدسامة المادة, عمدت ألّا أتابعه تجزئةً لأتمكن من مطالعةٍ ممتعة لعدة صفحات متتالياتٍ, وفعلت. _____ المفردات العامية أجمل ما يحفظها لنا هي هذه القوالب الشعرية العصيّة على النسيان, ويا لكثر ما تساقط من مفردات باتت نسياً منسياً, بعد الهجرات القسرية, والتحضُّر الإجباري والجاهِل.. هذا العمل يُثري قاموسي انا, أولاً ثم يمنحني قراءة جديدة بالغة الإختلاف, لأعمال حميد. فياله من عمل. _____ شاكرة لكِ وللإخوة (المترجماتية) أجمعين.
العزيزة جدا وهاد
يكفينى حديثك هذا لاواصل فى هذا العمل رغم قدرتى المتواضعة
صدقينى ليس هناك بينكم من جنى فائدة هذا العمل اكثر منى
لا تظنى انى كنت ملمة بكل المعانى فقد بحثت كتيرا وسألت
كثيرا وتعثرت لذلك اظننى اكثر من استفاد....
شاكرة يا عزيزتى وحديثك هذا اكبر حافز يجعلنى اواصل

[imported_tahmoi]

بسمك اللهم
ماريل سلااااااااااااااااامات
بعد غياب شهرين أو يزيد
يا سلااااااااااااااااام وانت برضو راجعة للبوست الحبيب جدا الي

[imported_ماريل]

بسمك اللهم
ماريل سلااااااااااااااااامات
بعد غياب شهرين أو يزيد
يا سلااااااااااااااااام وانت برضو راجعة للبوست الحبيب جدا الي

يا معز مهما كتر الساساق تلقى خطاى ساقتنى للبكان ده
واقول:
مسيخ البكان البعيد عن عيونك
مرير الزمان اليخيب ظنونك
اصونك...
واقصر لسان البخونك
......................

[imported_ماريل]

(عاشت الارض)
نص لا يحتاج ترجمة:)




لا نغنِّيكَ
ولكنّا نناضلْ
هذه الأوتارُ أعصابُ شهيدٍ
كلَّفته الأرضُ أن يرحلَ
فأستأذنَ راحلْ
كشعاع ، بسلامٍ ، هرّب الدفءَ
إلى الآتينَ من شُمِ المراحلْ
هذه الأنغامُ أهداها لنا
بعد أن نازل بالمنشور أعوادَ المقاصلْ
لا نمنِّيكَ بباطلْ
كان ياما كان في مرِّ الزمان
كان سلطانٌ وشرطيٌ وكاهن ومغنٍ
هبّت الثورةُ والسلطانُ فرَّ
رجع الكاهنُ للمعبدِ يبكي
عمل الشرطيُ
فلاحاً
وكرَّ يطلق الماءَ
على صدرِ الجداول
يضرب الأرضَ على صوت الكمان
وهو يكتظُّ يهتزُّ ويلتذُ معَ خبطِ المعاول
... ... ...
كلّنا للأرضِ والأرضُ لنا
ولنا متسع حتى السماء
فإلام،
ولِم يغمر الأوطان طوفان الدماء ؟
يا أخا الأرض
لِمَنْ هذه الحربُ؟
ومَنْ ذا الذي يشقى
ومَنْ يعشق الأوطانَ أطلال دمارٍ ودمن !؟.
...
إنه البومُ
الذي يعجبه ليل الخراب
إنه الشؤم
الذي ينجبه ويلُ الحراب
هل أتي اليوم الذي تعقبه خيلُ الصحاب
فيحطُّ الغيمُ
في جوف أراضينا ويرتاح التراب
هل أتى حينٌ من الحلم
على الإنسانِ
يحيا مطمئناً للزمنْ
تضع الحربُ به أوزارًها
كرنفال السلْمِ يجتاح مدى العالم
إبداعاً وقمحا
والعصافيرُ السلامية
تبني دارَها حباً وصدحا
يا ورودَ الدرب يا أحجارَها ليلاً وصبحا
يا خطى العمّال يا أيّارَها خبّاً وكدحا
لاتِّحاد الساعدِ الكوني مرحى
لا خضرارات الفننْ
لانغراز الإصبع الثوري
في عين الدمار
وارتفاع العلبة "البنبانَ" كوباً من لبنْ
...
لتجار الحربِ
تبّاً ..
للخوازيق
وتباً للبوار
للسرابيات في تيه الفِتن
للذي يُبحر غرباً عن أماني الشعب
تبّاً للدوار
للخطابياتِ من دون فِطن
لانطلاق الريح في غير لقاحْ
دون خيرٍ وصلاحْ
للتي تمطرُ موتاً وجراح
والتي تمرح من دون رسَنْ
في مراعي الشيبِ في حقلِ الشباب
للذي يملأ كفيه بتبرٍ وترابْ
يكشح التبرَ على حظوته
والترابيات في عين الوطن
...
أدعياءُ الحرب كالحرب تماما
أولياءُ السلم لا خوفٌ
عليهم لا حزَنْ
وإذا مرّوا بهم
قالوا سلاما
وإذا غُمَّ بهم
نادوا وطنْ
...
هذه الحربُ وثنْ
وأنا أؤمن
بالحرب التي بين أحشائي
وتجويع الفجارْ ..
الطواغيت ..
إذن
فلتكن يا عام
عام الإنصهار
بالذي أدعوه قلبي
بالحبيبةِ ، بالقريبةِ للوطن
ولتكن يا شعب ضد الإنكسار
وليكن ما قد دفعنا من دماء لانبلاج الفجرِ
مََهراً أو ثمن
...
نحن أقسمنا
على صدر عموم الشهداء الفقراء
أن نسوِّيه
بروحٍ وبدنْ
ونقوِّيه
على سوق النهار
"ونضوِّيه"
وطنْ
فلتكن يا عام
عام الانتصار للجماهير
على بؤس الزمن
قد كفاها ما دحاها من محار
من عذابٍ ومحنْ
فلتكن يا بحر
بحراً ، للبحارْ
التي تنضحُ سلماً دون مَن
...
...
عاشت الأرض لنا لافتةً
ولأعداءِ العصافير
كَفَنْ

[imported_ماريل]

(ملحمة الضؤ وجهجه التساب)



ودَّاها فوق قُوز الرماد
كان ظنُّو يوم يومين تلاتِة
المُوية تنزِل والبحرْ يشرد شُراد
يفضل تَرا .
يبراهُو بالسلُّوكة من ورا لا ورا
والعِيوش والخير يعم يرقد رقاد
والناس تخُمْ خمّ السرور ، وماهُو البرا ..
ناساً كُتار فاكرين كدِي .
يومين تلاتِة ، الحالة ترجع حالَتَا
ويبنوا البيوت هُو وشفَّعوا وأم الوِلاد ..
ينجمَّعوا ، ويسترجعوا الماضي وشتاتات السواد في صالَتَا ..
شِيتاً ضحك .. شيتاً بِكِي
ويبقى الخراب دا رهاب رِهابْ
عِبرة وحكاوى بتنحكي ..
بلدك مِتلْ كمِّين بلادْ ..
بدت الدقون فيها الخَتَا
نجَّس تراها المُتْرَفين .. كِترتْ مواعين الفسادْ
وكان كلمة الإسلام غُتَا ...
جاتْ الَلَتْ الله وشالتا .
******
كان ظنُّو يوم .. يومين .. تلاتِة ..
مشى السِبُوع والتاني جا
والمُوية كلما ليك تزيد ... ويقلْ رجا .
قوز الرمادْ الكان قِريْب .. فات بعيد بقى ماب تخُوجْ
قوز الرمادْ ... يا الضوْ فِضِلْ جزيرِة ضاربْ فيها مُوجْ
وحصار حصارْ كيف النَجَا
*****************************
ترا:المكان الرطب
السلوكة:الة يتم استخدامها فى الزراعة
البرا:يعنى ليس لوحده او(براهو)

[imported_ماريل]

عاينْ البلد دي دمار دمار .. فيها إيش فِضِلْ ؟!
لعبة قصب فِ إيدين طفلْ !!!؟
الحِيطة وكتينا التقع..
تقع ألفِ وجعة على الضُلعْ ..
دخانه يمرق في السما .. آهاتو تنزف في الأرِضْ
بحر الصَبُرْ والاحتمال بيناتو ينقطَّع تُرعْ
لا يلقى يربُط لا يحِلْ .
لا حولة يا الكتب .. الكراريس .. المكَرِّنِة في الشتِلْ !؟
التَخْتَة .. أقلام الرصاص .. كنَب المدارسْ .. كُور يلُوجْ
باب الفَصِلْ كاسحبو موجْ
لا قوَّة يا ورق الجرائد .. يا المصاحف ؟؟
والصحيحات .. المَجَخْسنة في الذِبلْ ؟؟!!؟؟
ورافعين دواليبن بعيد .. طابلين خَوازِيقُن طَبِلْ !!
لا حولة .... حال ... ماب تِنْقَبِلْ ؟؟
يا مسلمين ؟؟.......؟؟
وين لي تَسابْ عشرة وتَسابْ كم وأربعينْ ؟
دا يمِين خرابْ كمِّين سنة .
يا الضوْ .. مِنُو الفي الكون يصدِّق كان هِنا
ليلة ذِكرْ .. حلقةْ مديح .. دارةْ غُنا ..
هيصة ورقيصْ .. القرمصيصْ .. سيرة عريسْ .. وحلاةْ عروسُو محَنْنَة ؟؟
يا الضوْ .. مِنُو الفي الكونْ يصدِّق ؟ كان هِنا
شُفَّعْ بيلعبوا جَمْ بَعَضْ .. دِيكْ لِفّتُنْ .. في الدِشِّي _ غَبْشِي _ مَشكَّنَة
واللاَّ الشَتِلْ خايِفْ لها .. فارِدْ ضَفايرُو وحاضِنَا .
فِيقْ ... لا تضيقْ
باتْ الفَرِيقْ بَهَجِي ومَتَمْسَحة بالمِي .. وين يا الضوْ نَقاقِير الهَنا
ووِيننْ مشاوِير الفرحْ .. غَزَلْ البناتْ .. الهُودَنَة ..
حَشْ البراسِيمْ العصُرْ .. الليلْ .. وَنَسْتُو .. الشيْطَنَة ؟؟؟
وعِندْ الفَجُرْ كمْ مِيضَنَة ؟!؟
وهَذَرْ التلاميذ _ الصباح _
بِي جَمْ رواكِيبْ الحَلَبْ ؟؟
يا الضوْ بِيُوت الناسْ حياتا مَبشْتَنة ؟؟
.................................................. ...
مكرنة:عندما يكون الشئ متحرك وفجاءة يصطدم باخر يمنعه الحركة يطلق عليه لفظة(كرَن)او(مَكَرِن)او بمعنى تخلف عن الحركة او توقف عن الحركة
يلوج:يتحرك كثيرا وغالبا تكون الحركة جيئة وذهابا
الدشى:الحشائش الغزيرة
مشكنة:محشورة
المى:الماء
الهودنة:لعبة يلعبها الاطفال

[imported_ماريل]

الحِلّة كلَّها في البحَرْ !
كَسَر البحرْ .. ؟؟ ..

ولاَّ انتَحَرْ قلبْ المياهْ ..؟ ..
واِنكبَّ قَبَلَكْ وحْدَكْ ؟؟؟.
ضاضاك فِ بلدكْ شرَّدَكْ
نَفَدتْ قوافلْ الأغنياء .. وجملك على الحصْحاصْ بَرَكْ ..
مرتاح حمامُن في البروجْ .. وإنت أب حماماً طاشْ يلُوجْ
لا سوَّى عشْ .. لا ركَّ .. رَكْ .
يا الدنيا .. كيف مِتْقلْبِنة
تصحَى العصافير الودِيعة ، مع الصباحْ مِتْخلْقِنَة !
وشرْ الكلابْ مِتْمسْكِنة ؟
وين نْرَّتا وهِوْهِيوَا وينْ الليلِة غابْ ؟
كلبْ الجَنائنْ زيُّو زيْ كُل الكلابْ
كلبْ الغلابَة المُسْتَغلِّينْ العَبِيدْ .. الليلِة سِيدْ .. سيِّدْ مُهابْ ..
كلبْ أبْ زَهانَة تَهِينُو هانة ، مِن المهانة تقولُّو تَكْ .
حُكْم اِنقلاباتْ التَسَابْ !؟!
دوَّارَة .. دنيا فَرنْدَقسْ
نِنْجارَى فيها سبقْ سبَقْ .. نخسرْ بعض في هِينْ ترابْ
نتلاوَى عند فتحْ اللَبَقْ .. فاكرين برانا أهل العقابْ
تارِي البحرْ .. عَوَّافِي .. عندُو معانا حَقْ ؟..؟
يا الدنيا .. زيْ سكْرَة وتَفِكْ مِنْ راسُو فَكْ .!.
بعضْ المسافاتْ اِتْلَغَتْ
الفارغِة طَنْبَجَا والملانِة اِتفرَّغَتْ ..
الدَنْدَهُوباتْ زيْ بعضَ ..شكل العِديدِى ورَصّها
نَفس العَنَاقْريب نَفْسَهَا
عَفَشَك دَة ، حَقْ غِيَرك تَشِك .. يَدَخل فى بَالك أَلفْ شَكْ
مَا الحَالة اصلاً مِن بَعض
حكم إنْقِلابات الَتَسَاب
الدِنْيا كُلَهَا حِلّتك
تَنْضُم مَعَ اَلَفِى آخْر الَبَلَد .. مِن غِيْر تَفُوتَا مِحِلّتك
تَحْكِيْلُو قِصَة تَقِصّها
إِنْ نَفَسُو فِيْهَا تَحِسّها
إِنْ مَاها فِيْهَا تَحِسّها
حَتَى الأحَاسيِس نَفَسَهَا
مَا الَحَالَة كُلَهَا مِنْ بَعَضَ
..........................................
قَبَلك:قصادك
متقلبنة:متغيرة كل يوم على حال
متخلقنة:زهجانة
نَرٌتا:صفة لصوت الكلاب محاكاة ل نرررررررررررررر التى يطلقها الكلب
تك:كلمة تقال للماعز عندما تريد ان تنتهرها
اللبق:الطين الذى يتم به حجز المياه فى الجدول لمنع المياه من الانسياب
الدندهوب:بناء من الاعواد الخشبية يشبه(الراكوبة)يوضع العفش اعلى راسه كحماية من المياه وخوفا من ان يذهب به الفيضان
التساب:الفيضان

[imported_ماريل]

إِلا الَمَسَاخِيْت الَدِقُون ... خَتَوُهَا بين أَهَلَك قَرَضَ
بالَدِيِن وبالَطِين بالَنَسَب ... بالَمَيكْرَفُونَات بالَخُطَبَ
بالَبَنْطَلُونَات بالَرُتَبْ
فرِّق تَسُد
تَاخُدْ قَنَادِيلَك تَفُوت .. وإنْكَتَلُو فِى حِزْمَة قَصَب
ويَوْم التّصُد تَلَقَى الَبِيُوت فِى أزْيَارَهَا بَانِى الَعَنْكَبُوت
والَحِزْمِة شَاَهَد فِى التُّرَب
حَرَسَك يِظَمْبِر مِنَهَا
وفَرَسَك يكُد .. لا اسَيَادَهَا تَسَأل عَنَها .. ولا زُوْل يَرُد
أرْخِيلِى اضَانِكَ يا بَلَدَ
مَرّة اسَمَعِينِى مِن الَبَعِيد وإنْطَارَشِينِى وللابد
فِى حَبْلى مَاتَت شَتَلتِى .. مَاْت بيْتى مَاْتَت حِلّتِى
لَكِنِى يُوم مَاَت إِتْولَدْ جُوَاَى الفَ إنْساَن جَدِيْد
وانَا ذَاِتِى مِن ذَاتِى إِتْوَلدْ
وَرَتْنِى مَلَتَى مِلّتى
والمُوْية بَدَلت الوجُوه
يا بَادِى مِن بيتَكَ تَتُوه
تَضهَب ضِهِب
لَوْ بَاَبُو مَافى أو العَتَبَ
تَحَسِبْلو مِن قَوْز الرَمَاد
أو بِيْت أمِيْر المُؤمنِين الِلِسة حِيطُو تَسِوى رَبْ رَبْ در.. دَرَبْ
والَدنْدَهُوب إنْدَكّ دَكْ
هَرَسْ القَزازْ .. المُوية جازْ .. والجازْ وَدَكْ
بِينُو الدقِيقْ إتْلكَّ لكْ
ضِلَفْ الدَواليب الكُبارْ .. عائماتْ خَشَبْ
المُكْحَلِة .. الكُشتينة .. مِيزانْ الدهبْ !!
ضُوقْ الغضَبْ .
ضُوقْ المَذلَّة الدُسْتَبا الناس العُزازْ
سِيدك دخرنالُو المطرْ .. أمَّا إنت يكفيك الرزازْ
خدرّتَ تاني يجي الجَرادْ ..
أقوى الحقيقة من المجازْ ..
وهِنا المحكْ .؟.
يا أرزقي .. يا نسلِ حمّالةْ الحطبْ

يا مستفيدْ مِن بذَّةْ أطفالْ السوادْ الما نزلْ فوقُن ملكْ
بالسُكرْ .. العيشْ .. السمادْ ؟؟؟؟!
المُويَة أوْلى من العبادْ ؟
في ياتْ كتاب دين ياتْ حديثْ .. يا فاجِر الله بيسألكْ ؟
يا حَسرةْ الإتغشَّى فيك ... كَبَّر وراكْ ... جاهد جهادْ ...لامن هلكْ
يا حَسْرةْ الصدَّق صلاتكْ .. وموعظاتكْ في الفسادْ .. بان الشَرَكْ .
أيْوااااااااتَلك ..
أيْوَة ... أيْوَة .. يا بحرْ التسابْ ما أعدلكْ .
شُكراً جزيلاً يا بحرْ .. رغم الكَساد
بحَّتْ لنا العَفَنْ المَكرِّنْ في الزمنْ من عهدِ عاد
.................................................. ...
ختوها بين اهلك قرض:جملة تقال كناية عن خراب ذات البين
انكتلو:تشاجروا مصدرها قِتال وبالدارجى كِتال
شاهد:العلامة التى توضع على القبور
يظنبر:يتغير حاله الى الافضل فيفرح عندها يقال فلان ظنبر
ارخيلى اضانك:كناية عن (اسمعينى بتركيز)
انطارشينى:عكس ارخيلى اضانك اى لا تستمعى لى او لا تهتمى لما اقول
مَلتى:الملة بفتح الميم الجحيم والعذاب
مِلتى:الملة بكسر الميم هى العقيدة والدين
اتلك:عندما تضاف الماء الى الدقيق وتفوق كمية المياه الدقيق يصير العجين لزج فيقال لِكة ومنها اتلك

[imported_ماريل]

والضوْ وليداً ما قرا
خرَّجتو منك باقتصاد ... قانون ... فلكْ
جَفَّ المِداد ..
ما أعدلكْ .
جَفَّ المداد ما أعدلكْ
ما أعدلك ... ما أعدلكْ
بالسكَّر .. العيشْ ... السماد
المُوية أوْلَى من العباد ؟
يا شارعْ الثورة القصاد أهلي المسالمينْ البعادْ
يا بندقيتو ...هِنا المحكْ
وقَبَّل على القِبلة ونَدَهْ
قُبَّالْ يمد إيديه إنتَبَهْ !
حِسْ المطرْ .. بين الشدرْ .. والضوْ مع الفيها إنشَدَهْ
بَرَّة ..... المطرْ
في الدَنْدَهُوبْ برضُو المطرْ
خَتَّ البِرِشْ فوق راسُو ... لكِن المطر
أوْوْوْوْ .. والهوَا
وراسْ تمرة فوق عَقَشْ المسكينِة
الجَرِيدْ رمَى دَنْدَهُوبا .. العدِّة فاتتْ بالبحرْ
بِرِشْ الصلاة اللافْحُو الهوا .. وإبريقْ يثرثرْ بين كَررْ
يا الله سِتَّها في السفر
والضو ينط من دنْدَهُوبُو ... يجيبُو صاد صوت المطرْ
في إيدو كوز .. سبْحِة و كَكَرْ .

حَلَّةْ مُلاحْ .. كرَّاسْ غُنا .. إعلانْ قضية .. عِلمْ طلبْ

.. بروازْ قديمْ .. حاضن عَروسْ وعريسْ وسيم بين كمْ نفرْ
السِبْحة والكُوز .. مُو اللَتَا
تشبهْ أمير المؤمنين .. باكر يقولُوا سرقْتَها
فنـَ ــنـَـ ــنْْْْْْ ... يفِنَّها في البحرْ !؟
أقوَى البحرْ .. واللاَّ المطرْ ؟ أوّّوّّ والرياحْ
بتَصحِّي في الجو الجراحْ ... بِتَحِتْ من الجوفْ الفِكَرْ
إشْْْْ في الوعر ..
عِشْ قُمْرِي بي فرخِينُو كان من حظ وَرَرْ
يا رازِقْ الحيوانْ أخُو ...؟!؟
يا رازقْ الحيوانْ أخُو .. الينْجَا مِن كِيد البحرْ .. ما ينجَى مِن إيد المطرْ
والينْجَا من إيد المطرْ .. ما ينْجَى من كِيدْ الرياح ..
والينْجَا من كيدْ الرياح .. ما ينجَى من كيد الفِقَرْ ؟؟!!؟؟
يِي .. دا القدرْ .
ما أعتى حربك يا بشرْ .. إنت الغريبْ
والموج يشيل غادي ويجيبْ
ينكَرْبَشْ النيمة الدَبيب ... والضوْ مُو جايب لك خبرْ
..................................................
نده:من نداء والمعنى ينده اى ينادى الله او يدعو الله
انشده:انشغل
ككر:مقعد
مو اللتا:ليست ملكها
الينجا:الذى ينجو
يتكربش:يصعد متمسكا بشئ ما مثلا ينكربش الشجرة يصعد الشجرة متمسكا بساقها

[imported_ماريل]

طقْ ..
دندهُوبْ ناس ستِ نُور .. عودُو إنكسرْ .. وفاااات بالبحرْ
تِحت السماوات ما في أرِضْ
في الموية .. في الريح .. في المطرْ
في الدَابِي .. في التمْر الخطرْ
وإنسان يصُبْ _ قبل السمِا _ عرَّاقِي والوشي والشَعرْ
غيَّرْ وقفتو .. الدندهوب زالَفْ هَبَرْ
يا غيمة ..هوي .. دا وكِتْ مطرْ ؟؟
واِرتجَّ جوف الجوْ رعدْ
يا الضوْ كفرْ؟؟ ...
يا الضوْ كفرْ؟؟...
من بعدما نفد الصبُر .. والإحتمال في الجوف دَشَرْ
صنَّ المطرْ .
والجوْ صِفا .. بنْقَرْ حجرْ بتْ الرسول .. لكِن بعدما الضوْ كفرْ
ضربتْ شعاعات الشمش في دوشة فوق قوز الرماد ..

.. كلبةْ مدينِة نِعِيجَتَا .. ديكا العجوزْ .. وكدِيس عماد ..
.. طيرةْ بقرْ .. ودِحِيش غريبْ .
شوف الظروفْ ؟!
دحَشكْ .. حمارتَكْ .. والضيوف !
قلعنْ يَحَفْتِنْ في الرماد ؟؟
وبالسكَّرْ ؟؟ العيشْ ؟؟ السماد ؟؟
الموية أوْلَى من العباد ؟؟؟؟
وبالفِيتَرِيتِة العِيشْ حُكُمْ ... الموية أوْلَى من البُكُمْ ؟
ومَلَصْ العِرِيرِقي ولباسُو .. ومصَّرِنْ .. ما غيَّرِن
خمْخَمْ عقابْ الكسرِة .. واللابْرِي القديمْ ..
من دندهوبو المنْتَكِلْ النيمة .. شال باقي الأكلْ
خمَّ الرياح .. خمَّ المطرْ .. خمَّ الجراحْ ..
خمَّ الدَبِيبْ في القُفّة .. مو جايب خبرْ
قصَّالُو فرعين منقة .. بالمِنْجَل هبرْ
حشْحشْ صَبايْطاً هِن صُفُر .. لكِن قُلاد
البدري لسه على الحصاد
في أرواحْ على قوز الرماد
يا الضوْ بقالِنْ أعزَّ زاد ,,, ونجاضو زاد .
وإنكابَسَنْ فوق وجبةْ الزمن الغريبْ ، كلبةْ مدينِة ... كديس عماد ..
يا الضوْ دبيب .؟.
وطيرةْ البقرْ .. في الجوْ تغيبْ ..
دلَّتْ من الكازُومْ د بيب
والضوْ يَصنْقِع والوررْ
يا رازِقْ الحيوان أخو
نختا ... وتصيب .

نتحدَّى كيدك .. يا بحرْ
نتحدَّى إيدك .. يا مطرْ
يا آفة .. يا ريح .. يا فِقَرْ
نتحدَّى بالصبرْ الجميلْ ... بأعمالنا ... بي طيرةْ البقرْ
وطيرةْ البقرْ ، في الجوْ تغيبْ
دلَّتْ من الكازومْ دبيب .
وإنكاتلنْ في آخر التمُرْ
كلبةْ مدينِة ...نعيجّتا .. ديكا العجوز .. وكديس عماد .. حمارتو .. والدحشْ الغريب
ودِحِيشو فوق الرمادْ .
عَكْمْنا فينا من الغلِي ، وعِيشةْ الجلاجلْ والشتاتْ ؟..
وبالسكَّرْ .. العيش .. السمادْ
الموية أوْلَى من العباد ؟؟؟
وبالفِتَرِيتِي .. العيشْ .. حُكُمْ
الموية .. أوْلَى من البُكُم ؟؟؟؟؟
ولمَّـَّــَّــس دِحِيشُو ..
الضوْ بكى .
بكى ما بكى ؛؛؛
بكاّهو حِسْ الطائراتْ
بكَّاهُو قُدْرَتُو تنتهي ؛؛؛
بكَّاهُو يرجى المعجزات !!؟
بكَّاهُو قُولةْ الموية أخفَّ .. وأقلَّ من كمْ وأربعين
بكَّاهُو كضَّبْ حاســـَتُو .. وصدَّقْ أمير المؤمنينْ
بكَّاهُو ما رَمَى للكُرِيق ، زاغْ في أوائلْ النازحـينْ
مع إنُّو أدْنَى الناس شِتُول ، وأخفَّ سُكْنَة ، وأقلَّ طينْ
وإنضرَّ أكترْ منَّهُمْ .. لكِنُو .. ما ندمان .. يَمِينْ
بِيتُـــو اليَرُوحْ ..
عَفَشُو اليَرُوحْ ..
غنَمُو التَرُوحْ ..
ما طالَ عايِشْ .. وفِيهُو رُوحْ .. وأمُّونَة نفَدتْ بالعَوِينْ .
في اللُجَّة يفْضَل كالسَفِينْ .. أكْرمْ لُو من جرحْ النزوحْ .
ولمَّـَّـس دِحِيشُو .. الضوْ بكَى
بكَى ما بكَى

بكَّاهُو يرْجعْ لِي ورا
بكَّاهُو رادِي الدنْدَهُوبْ الغادِي
وأم دُرمان تغنِّي .. حبيبتي آه .. وودادي وين .. وحَبيبي وُوبْ !
والباقي كلُّو مقابلاتْ ..
ضِدْ القوانينْ البدِيلَة مع القوانين البديلة
اليَسْوَى ما يسْوَى الرَزِيلة
جهنمْ .. الجنَّة .. الفَضِيلة
.................................................. ...........
طق:صوت انكسار العود
زالف:مال
هبر:تهدم
بنقر:جلس
البكم:الحيوانات
مصرن:اعتصرهن حتى يجفن من المياه
صبايطا:الصبيطة هى الفرع
زاد:الاكل
زاد:ازداد
دلت:انزلت
الكازوم:الفم
نختا:نخطئ
عكمنا:احكم قبضته
الغلى:الجوع
انضر:تضرر او تأذى
العوين:هم المحتاجيين للعون من الاطفال والنساء

[imported_ماريل]

ولا خَتَرْ في بالُنْ الحالْ الكَدَرْ
لا علَّمُنْ سِيلْ الجبالْ الشَاتْ مواريث القَبيلة مع الحجرْ
لا حِكمةْ البحرْ الكَسَرْ
ما ليهُو مُسْلِمْ لا الكَفَرْ
هَبَدْ الجوامع من طَرَفْ .. غَمَرْ الكنيسة مع الغَمرْ
ما علَّمُن
ما علَّمُنْ
والألَّمكْ . ما ألَّمُنْ
ما ألَّمُنْ .. ما ألَّمن
ضِدْ القَوانين الهَزيلة مع القوانين العديلة ، الماب تَمرْمِطْ للبِلاد .. اللابْ تَصنِّفْ للبشرْ .
والضوْ زَفَرْ
استغفر .. إنشهدْ .. تَلا
في سِرُّو سُورة الزلزلة ... دُونْ بِسْمِلة .
قاوم عَنَا ..
نفَّضْ عِرِيرِقِي ودفرْ طاقيْتُو لي ورا ..
وإنحنى
شدَّ الحَبِلْ .. بالطُوفْ دَنَا
جَمْ تمْرَة مِن دُون التَمُرْ .. ماب تنْطَلِعْ .. طالت كُدُرْ .. يقَّن عفاها وسبَّله
سابْ الحِديَّات تَسكِنا
بمْبُونَة مِن كمْ وأربعين .. وحِّيدا ما خَلفتْ جَنَا
مِن جابا جدُّو من المَحَسْ .. من هي الصغيرِة محانِنَا
يسقيها بالجُوزْ ما فَترْ .. قَدْر اليَرَجِيها المطرْ .. والليلِة حظَّها طُوفَنا .
شرَّقْ .. بحرْ
غرَّبْ .. بحر

شـمَّل .. بحرْ
جنَّبْ .. بحر

د نقرْ .. بحــرْ
صنْقَعْ .. بـكـى .
بكَى ما بكَى
بكُّاهُو حِسْ الطائراتْ
بكَّاهُو قُدْرَتُو تنتهِي
يكَّاهُو يرْجَى المعجزاتْ


وبآخِرْ نَفَسْ .. والحِيلْ كِمِلْ
بِي طُوفُو صدَّ الدنْدَهُوب .. بين الضَبابِينْ والنملْ
نامْ نُومةْ الدِيكْ في الحَبِلْ ....
صحَّاهُو آذان العَصُرْ .. يا الضوْ مَفوِّت كمْ وَكِتْ ؟
نـقْـنَـقْ بَراهُو تِحِتْ تِحِتْ
رقْـرقْ دموعُو بِقَتْ تَحِتْ
صلاَّيْ من القرآن غُنا
صلْ يا حمام قِدَّامي .. أنا ..
غرقان لِي فِ أنجاسْ لِي هِنا
ما شال جداولنا البحر
شال مُسْتَراحاتنا وهَبَرْ
طفَّحْ زَفارات كم سنة
مِرحاتنا والكُوشْ القُدامْ ماصِن وَكِتْ ماصَ الهَنا
بـ إيه إغتسِلْ ؟
وإتوضأ بـ إيه ؟
غير الصَبُرْ ... يا ... ربَّنا ؟
.................................................

الكدر:الكدر هو عدم الصفاء
هبد:مفردة مستقاة من انطفأ النار عندما تصير رماد اى (هبود)يقال النار هبدت وهبد الجوامع اى كسرا
الكدر:ملساء ليس بها مكان يساعد على صعودها
الحديات:جمع حدية وهى نوع من الطيور
سبله:اى تركها للسابلة شئ غير ذو قيمة
بمبونة:وحيدة لا تنجب ليس لها جنى
الجوز:عود يربط فى كل طرف من اطرافه صفيحة تحمل على الكتف لنقل الماء
مرحاتنا:جمع مراح وهى مكان تحفظ فيه السعية
ماصن:اذابن

[imported_ماريل]

بكّاهُو .. خَلَّ البال نَبلْ
قُولة .. عقابَكْ في الجبل ، من زيْ دِي بشْرَبْ يا جَنا ؟
هُونَق دِحِيشُو .. الضوْ بكى
بكى ما بكى
بكَّاهُو رادِي الدندهُوب الغادِي
وأم درمان تَنُونِي .. حبيبتي آه .. وودادي وين .. وحبيبي وُوب
والباقي كلُّو مقابلات ..
والنشرة .. مافي .. ولا خبرْ عن بلدُو .. عن شِدَّة عَناهو .. عن البحر
عن سر نَفي
ودِي الوكْتِ لندن ماب تبين ..
حالاً دَحِين .. زيْ حالُو .. فِي .
يا الضوْ
قَبُلْ غِيبةْ الشمشْ
قَبْل القَعُو .. قبْل البعوض .. قبْل الدَعَتْ
والمُويَة كُل ما لِيك تَزِيد .... والزَاد نَفَدَ
قَبْل الحِصار .. يا زُول أخير تَخَتَا البَلَدْ .
يا زُول قُعادكْ شِنْ يفِيدْ ؟
شِنْ حارسُو شِنْ خائف عَلِيه ؟
أكترْ من الطين الوقع في الطين شهيد ؟
صُور التَمُرْ .. يا الضوْ .. أمِشْ
عِينْ الشَمِشْ .. يا الضوْ .. أمش
البُرْتُكان والمنْقَة والنِيمْ .. تِنْطَقِشْ .. يا الضوْ أمِشْ
الدنْدهُوبْ .. يا الضوْ .. أمِشْ
حَدَرن لُو من قوز الرماد .. رَمَن الرِمشْ .. قالن لُو أمش
قبْل الحصار .. يا الضوْ أمِشْ
نَبْيَ الله نُوح .. قال لكْ تَمِشْ
من ضو ترُوح .. يا الضوْ أمِشْ
يا زُول قٌعادكْ شِن بفِيد
شن حارسُو شِن خايف عليهْ ؟
دكَّانك الغايةْ العَرِشْ !
دولابك !
العَفَشْ الجديد !
الحافلة !

بيبان الحديد !
تاوَلِيتكْ ! البايرَكسِ !
إيه خايف عليهْ !!
أكتر من الطين الوقع في الطين شهيد ؟
داك الفَرِشْ ..
والعدِّة في السحَّارَة .. خُتْ فُوقَا البِرشْ
ومن ضو أمِشْ .
عارفين قليبك طبعُو حار
وبيَهِمَّك الروح مو القِرِشْ .. لاكين أمشْ
في الفيها ما عندك خِيار .. غير ما تَمِشْ
إنسان معمَّرْ بالحياة
ما ترْمِي نفْسكْ يا حِمِشْ للتهْلُكَة .. خلِّينا أمِشْ
شِنْ حارسُو ؟
شن خايف عليهْ ؟
أكتر من الطين الوقع في الطين شهيد !؟
وملَّـَّـَّـس دِحِيشُو ..
الضوْ بكى .

بكى ما بكى
بكَّاهُو حسْ الطائرات
بكَّاهُو قُدْرَتُو تنْتَهِي
بكَّاهُو يرجَى المعجزات
بكَّاهُو يقْنَع بالرحيل
بكَّاهُو ما كان الشُدَرْ .. ما الطير .. وما كان النخيل
بكَّاهُو كِيفِنْ سَدْ شِبِرْ من مُويا يصْبِحْ مستحيل
بكَّاهُو يَلْوَطْ في البحرْ .. والغِيرُو يشربُو سلسبيل
بكَّا البِينضُمْ في الغَلطْ .. يا قالُو مُلحِد يا عميل
بكَّاهُو .. آه ..
ما هُو .. الإله
؟؟ .. ؟؟ ..
يا دَكَّةْ السُلْطَة
ودُخانا .. وشمْلَتا
وفي شرْعَك الإنسان يموت
إن زادت الموية ويموت من قِلَّتا
لو سامحك في حقُّو .. سِيدي .. العُمدة ..
تبْ ماب تسامحك بِتْ أبوي في شتْلَتا .
يا مَسَمِّي مِحْنَتنا :-
إمتحان !
مرَّات قَدَرْ !
حِيناً غضبْ !
!! ؟؟ !!
ناكِرْ جِبِيهاتنا .. وصلاةً صلَّتا .
يوم يمْحَق الصاح الخطا
.............................................
عقابك:المقصود اهلك المسئول عنهم وغالبا تطلق حين يراد اولادك
هونق:صوت الحمار
القعو:الضفادع
الدعت:العقارب والدبايب
السحارة:شنطة من الحديد
يلوط:يلتصق

[imported_ماريل]

وين ؟ تمشي من غضب الغلابة اللا بَكتْ لكْ نازِلاتَا .. ولا شَكتْ لكْ عِلَّتَا
لمْلِمْ خُرافاتكْ علِيكْ .
ما حرَّقتنا ضَرِبةْ إيديك .. بسْ روحنا حَقَركْ سلَّتَا
وبِنَجِيبَه ضرْبتْنَا .. وتَصِيب .. في حَزَّتَا
وفي حَزَّتَك .. يا بيتنا كَبْ
ويا بيت أمير المؤمنين إنت اِتْنَـكبْ .
والضوْ شَطَبْ جِيهةْ اليمين ..
حجَّاً ........ إلى ان آمنين
وبي خط خَلاَوِيهُو المَكعْوَجْ والحَرِفْ واضِح تَخِين
بي دمْ .. و .. طِين
الضوْ كتب فوق باب أمير المؤمنين
(ما ضرَّ بيتَ أبي لهبْ لوظلَّ بينَ المسلمينْ
لوْ جاء فينا لِما ذهب يا مؤمنينَ بغير دِينْ)
ومَضَى اِسمُو بين قوسين "غضب"
والمويَة أوْوْوْوْ .. أو كاللظَى
رَمت الدهاليز والأوض .. بسْ فضَّل الباب .. العِظَة ؟.؟
,, و ,, . ,,

.. الضو ضحك
ساعةْ واداعُو .. بِقَت طَرَبْ
غنَّـَّـى وضَرَبْ .. بي طُوقُو عند ساعةْ العِشِي
بانتْ نِوِيرَاتْ العربْ .. حَزْنَانِة غَبْشِة مَدَعَّشِي
حِسْ الصُبَارْ في المُويَة .. والقّعُو .. والمِعُوزْ
طَرَّاهُو للديك العَجُوزْ .
يا الضوْ يجُوزْ ينْجَى .. ويَجُوز
"" الصَبَرَة كَمِيرْ كُوْ كَوْ تِنْعشَّى عَشَاهَا مِنْ ضَوْ
الصَبَرَة حَرَامِيَّة وأشوْ فِ حبال خاذوقة إتْلوْلوْ
لا ترمي دموعك شوْشوْ
قــاوِمْ والمـُرَّة بِتِحْلوْ
ترف إستخباراتُن أوْ صَاجْ الْدَبَّابَة الْ كـَرَرَوْ

ضَنَبْ الطيَّارَة الْفِي الجوْ
الْ ترْمِي قنابل بوْ بوْ
كم يبني بلادك يا الضو أوْ يحمِي وِلادك يا .. لو
الينضُمْ طوَّالِي يسوْ ""
والضوْ بكَى .. فُورَنْ وَشِي
من شُوقُو .. واللاَّ من العذاب الفوقُو ..
ولاَّ من التَعَبْ غالبُو المشِي
وكلْ فرْدِة جَارَّهَا من بَلَدْ .
- : - يا الضوْْْ .. سلامتك .. جِئت مِتِينْ
سِبْتُوهَا وحَّدّا للبعُوضْ .. للطير .. ودبَّايْ البحرْ
نُونِي الضَبابِين .. الكلابْ .. الجِنْدبْ .. الفار .. السَعَرْ
.. للجِنْ .. يَلَبِّشَه .. للدَعَتْ .
يا الضوْ .. بلدنا .. وودَّعَت
راحتْ شتُول ، دُوب فدَّعت
فِطْسَت بيوت ، ما ضاقت الزِينْ والعَدِيل ما اتمتَّعت
ضاعت سعايات إنْسَعت
يا الضو تَليِّسُو بالقُفَاف ، آخر المطاف ، شمْلَةْ كِنِيشْ اِتوسَّعت

حِلْتنَا غِرْقَت ، ومن طَرَفْ
حلتنا غرقت ، وفي شِبِر !!؟
غَرَّقْنَا يا الضو صِح سَرَف ؟؟
العلمتنا العُوم .. تقُوم تَغرَق هِي .. ما تقْدَرْ تعُوم ؟!؟ يا للأسَف .
عزَّ المَصاب ..
البَرَكَة يا الضوْ في الرُقاب
إلاّ الرقاب إنُجهْجَتْ
ما جاتا راحةً من كُتُرْ ما انْجيْهَتْ ، ما دام معلَّقَة في التراب .
صَنَّت ..
شِويْتِين .. نَهْنَهَتْ
خايْفَاك يَهَقِلَكْ السرابْ .. يا الضوْ يَهَقِّلْنا السراب
واِنأوَّهَتْ .
والضوْ صنم ، ما جاب جواب
لا ذاتَه هِي اِسْتَنَّت جواب .

_:_

أمُّونَة وِينَا ؟؟ مع العَوِين في المدرسة
أمِّك مَنصَّحَة حالة زين ؟؟ في المدرسة

خالْتِي الزِلال ؟؟ في المدرسة
جِدِّك حسين ؟؟ في المدرسة
السُكْنَة كيف ؟؟ في المدرسة
العِيشِة كيف ؟؟
- تسْعَل سُعال .. يا الضوْ تقول تامْ لَكْ سَنِي
تسعل تقول .. ماك .. من هِني
شِنْ السؤالات ينفعُوا
ما حال غلابة علي غلابة إنْفَرْزَعُوا
فتَحُولُن الغُبُشْ .. القلوب .. قبْل البيوت
قَسَمُوا القِليْلِي معا بَعَضْ .. كم طمَّنُونا وشدَّعُوا
لكِن دَوام الحال محال ..
وعلى العموم .. ما مرَّ يوم .. ما جاب هموم
هَمَلِي ونِقاراً تسْمَعُوا .....
واحدين يقُولُوا لك خلاس .. واحدين مُصِرِّين يرْجَعُوا
وإن جئت بلدنا مُطَمِّنَة
بَسْ .. كيف .. يا أخَيِّي نأمِّنَه - قبل البحر - من ها الفِقَرْ
فِقَراً ضُعُفْنَا مَسَمِّنَا

ال في العروق دا مُو دمِّهُن ..
دمَّك .. يا أخيِّي ..
ودمِّي أنا .
الَنَار تَقِيْد فِى الَكَان سَبَب
يَا الَضّو بِيُوتَنَا يَوقِعُو
اللّه يَجَازِى الَكَان سَبَب .. يَا الَضّو بِيُوْتَنَا يَوَقِعُو
نَهَجِر بَلَدَنَا نَزِح هِنا
كان سُلْطَة ينْسلّط عَلِيها .. أكَّان لِجانَّا يلجِّنا .
وبِي تُوب وَكِت نَزَحَتْ حِرِقْ
قشَّتْ وَشِيها من الأسَى .. ومسَحتْ وَشِي الضو العِرِقْ ..
عَصَرَتْ علِي طَرَف الطَرِيق .. عَقَدَتْ سِفِنْجَتَه بي دِلِقْ
وكُلْ فَرْدِة كانت من بلد ، ويِنْشَافَنْ الإتْنِينْ خَضُرْ ..
اللِيل سُتُرْ ... الليل سُتُرْ .
سَرَحَتْ مع الخاطِر بَعِيد .. عَكْسَ العِرِقْ
شِيمْةَ التَهاوِيم شالَتَا
نِحْنَ وقَدَرْنا قَدُرْ قَدُرْ ..
نَصْبُرْ صَبُرْ

نصبر على البُوخْ الغَريبْ ..
نِسْتحْمَلْ أصوات القَعُو
لامِن نلاقي الهَمْبَرِيبْ ..
والليل غَناوِي نَوَلِّعُو
يا يُمَّة تَفْرَحِي من طَرَفْ .. عاد .. والمسافرين يرجعو
دَه كأنُّو لا دمع إنزَرَف .. لا خيوط قلوب إنقطَّعُوا
لا شتلة لا محْصُول تلَف ..لا ناس بيوتن وقَّعُوا
بحراُ بَلا الخازُوق زَحَف .. نبْنِيلُو قِيف ما يطلَعو
صُدْفَتْنا تبقى آخر الصُدَف .. نمْسِك زَمنَّا نَطوِّعوا
يخَتُونا يمشوا يَوَدِعُوا .. فِقَراً علينا إتْرَبْعُوا
ديل لاب يخافوا من الحساب .. لاب يختشوا ولاب يشبعوا
حقَّاً نحرسو ولاب يجِي .. حقك تلاوِي وتقْلَعو
أمْسِك شُباطين الصراع .. الماب تحصِّلُوا فلِّعُو
ثبِّت لي بالك لا يلين .. أنْقَحْ ترابك وازرعو
عُقْبان أبو الإنسان حنين .. ما شقَّ حَنَكاَ ضيَّعُو
سَرَحت مع الخاطر بعيد ..
................................................
نازلتا:ما نزل بها
حزتا:لحتا
مدعشى:غير واضحة الرؤية
كمير:اسم من اسماء الصبرة
كوكو:محاكاة لصوت الصبرة
فورن:ظهرت عليه ملامح الضيق
فدعت:تطلق على جرايد النخل عندما تكبر وتنتى
سعايات:ما تسعى من الانعام
يهقلك:يخدعك
شدعو:مصدرها (شجعوا)والمقصود المواساة والدعم
الفِقر:جمع فقرة وهى الرقبة

[imported_ماريل]

عَكْسَ العِرق شِيمةَ التهاويم شالَتَا

دَقَشَتْ طَرَف قوز الرماد إنتَرْتَعتْ ..
كادَن عيونا يَوِقِّعُوا
رجَفَتْ ..
صِحَت بي حالَتا
صدَّابَا تيَّار البحرْ .. كان أقوى من بالَه النّزَف
وكان فرحةْ الناس الأسَفْ
الهمبريب البوخ
غِــنِيوَاتَه القعو
صنَّت بِنيْةً جَنْفِي هيل بِت السَرَفْ
جمْ كُوم وِلاداً يقْطَعُوا
فوق البحر .. فوق اللجان التاني جاتْ
فوق الفِرَج والبشْتَنَة
الحالة ما دارت بَحِت .. الحالة ظاهْرَة وبيِّنَة
السُلْطَة عن غرق البلاد مسئولة هِي ..
وفوق عِينَا حقَّنا تدْفَعُوا..
- وبلدك حِمايته مُمْكِنَة
_ أصْلُو اِحْنا لازمنا امتداد .. قُبَّال بيوتنا يوقِّعُوا

-كُنَّا بنقوله وتلْكِنَا ..
_ حيكومة دايْرَة تَلَجِنَا .. تدِّينا مشروع نزرعو .. تدِّينا جِيهةً نسْكِنَه
- لوْ وقْفُوا الحرب الحرام الْ الله ذاتُو هُو لاعِنَا
- كان البلاد إنطامَنَت .. كان ألْفِ خزَّان اِنبَنَى
_ يكْفِينا ذِلَّة ومسْكَنَة ,, كانت زمان السرقة دسْ .. الليلِة عِينك مُعْلَنة
_ وفِرجاً قِبيلْ بِنَشوفه عِيب .. عينك عِيان ومَقَنَنَة
- باسْمَ الرَصيف والمارصيف .. كم بيت وصالون اِنبَنَى
_ كانت شعاراتُن وعود صارت مُجرْد عَلْقَنَة
- وبين الدقون والدلْقَنَة .. كل التقول موساك تقوم تلقاهو ربَّ الفرْعَنَة ..
_ والجايِي أعتى من اللِي فات
- الجايِي أعتى من اللي فات
.................................................. .
دقشت:مشت
جنفى:تستخدم يدها اليسار
هيل:مفردة تقال لنسب الشئ لفلان مثلا الكتاب هيل احمد تعنى حق احمد
تلكنا:يطلق على الحديث عندما تقول (لكن)

[imported_ماريل]

والضو تَنَى ..
عضَّ اصْبَعُو
عضَّابو حِسْ الطائرات
عضَّابُو قُدْرَتُو تنتهي .. عضابو يرجى المعجزات
عضابو صبْرُو وطول رَجَا
.. وَيْْ .. أبونا جا
.. ويْ .. يال القِمِيرا .. أبونا جَا
وجرُوا كالفراشات شُفْعُو
جروا منُّو غادي وفلَّعُوا
أدُّوا البحر .. أدُّوا الحجار ..
ساعةَ الحَضانْقُول يجْدَعُوا .. برَّاقْ عيونُن يشْلَعُوا
تالا القميرا يصنْقِعُوا ...
يا الطالع الشجرة جيب ليْ معاك خِيمة
تستُرْ من المطرة إن كبَّت الغيمة

جيب لك معاك قمحات
قمحاتنا في الشيمة
وغنم الحَلِب رايحات
ضلَّمْنَا ضِلِّيمة

- خيمة السعودية دَفُو ماب تَدَفِيكا
ولبن اليهودية بلدك ينسِّيكا
قمحاً من امريكا خاذوق رِكب فيكا
غير خير بواديكا مافي اليكفِّيكا

يا طالع الشجرة من خيمتك التوبة
جيب لك فروع خضرا أو جافَّة يادوبة
في الحرَّة في المطرة في عِزْ بَرِدْ طوبة
نمْرُق مـن الوَكَرة وتبْقالنا .. راكوبة


يا طالع الشجرة قبِّل على الحِلَّة
قول ليها يوم بكرة كُـرْبتْنا تِنْحلَّه
ننزِل نضوِّيكي ضِرْعاتنا مادِلَّة
قادرين نسوِّيكي عُقْبان عَلِي الله


يا طالع الشجرة
طوْلنا يا والله

أنزل هيا ويلاَّ
إندلَّى نِنْدلَّى
نِنْدلَّى حلتنا
حلتنا مادِلَّة
.................................................. .
عض اصبعو:كناية عن الغيط او الندم
القميرا:تصغير للقمرة
جرو منو غادى:ابتعدوا عنه
الحضانقول:الحجر
كربتنا:مصيبتنا
اندلى:انزل باتجاه البحر وفى هذه الحالة مقصود باتجاه الحلة لان الناس طلعت الصحراء عندما ضايقها البحرمادله:

[imported_ماريل]

نندلَّى ما دام الأسف ، والجهجات ماب ينفعُو
ثبِّت يَقِينك ،، يا ولد .. الناس مصيرُن يرجعُو
ما شال عزيمتنا الهوا
والبنْدِقْ المربوط سوَى .. مافي أيِّ ريح بتفرْزِعُو
إنت وأنا ..
نار السعق كان ولَّعت بيناتنا ما تِسْتهْوَنا
الجوْ شرارة تَوَلِعُو
الزول بَحِنْ ..
حِنّ يا ولد ..
حِناً يقَدِمَك أتْبعُو
وتِشْ عينو دجَّال الضلال
قبَّال يَمِدَ لك أصْبَعو

حِنّ .. يا .. ولدْ
والضو يقالد من طَرَفْ .. ناس البلد قبَّال يقالْدُو يَدمِّعو
دمع السواد الانزرف .. لوْ الدموع بِيَرَجِعُو
في عَمَّة .. في بِتْ .. في ولَدْ
شمََّّ البلدْ .
ناضَمْ قبيلتو ووانَسا
هبْهَبْ دموعُن ويبَّسا
نقْنَاق حِبَيْبِين القَسا
طرَّاهُو حِس الطائرات
والضو نِسى
قوز الرماد ، والفوقو ، فوق قوز الأسى
الْفي المدرسة .
- شُفْنَا .. أيِّ شِي .. وما شُفْنَا شِي
مِعْزَاتنا كَدَّن للحصى .. شُفَّعنا بيَّتُوا للقَوَى
وجع البطون ..
درن العيون ..
الهلْوَسَة

موية الغنم والدود ، وموية الناس سَوَا
المستراحات الخَلاَ
الله يجازي الكان سبب . . ما نلْقَى عافِي ولا دَوَا
ما نلْقى غير النسْنَسَة .. وكاوِيقْ كلام شالو الهَوَا
حال .. ماها حال
وقْعَتْنا تبقى على الجبال .

[imported_ماريل]

غلُّوا البضاعة .. العِنْدُو سِلعِة عِرفْ لها
غلُّوا القمح
غلُّوا اللحم
غلُّوا الخَدار
حتَّى .. الملح !
دسُّوا اللبن
دسُّوا العَدس والصلصة
دسُّوا الإسبرين ..
دسُّوا المعايش كلَّها
_ حاكومة وين .. واللجنة وين .. في عديلة راكْبَة محلَّها
اللجنة حلَّيتا .. المصيبة الجامْدّة شِنْ بِيَحِلَّها ؟؟

حال .. ماها حال
وقْعَتْنا تبقى على العدو .. الفيها تبقى على الجبال
قَدَرْ الله .. يا بِت الحلال
لع .. يا العَشِي .. قَدَرْ الرجال .. اللابْ تخاف الله وتتوب لابْ تِخْتَشِي
وأنا لجْنَة غرَّقت البلد .. أرجع وأجيك بي يات وشِي ؟؟!!؟؟
_وغلاَّ البضاعة .. الْفِي إيدُو مفتاح البضاعة ..
الأرزقي المايِصْ عَرَقْنا ومِتْحشِي ..
وما ضرَّ غير أبَّان دقون فيها الضلالة معشْعِشِي
وفِقَراً تَغُشْ في الله .. تخُشْ بيتو وتسرْقُوا ورا العِشي
كُرْ .. من ضمير ناس .. هان قَدُرْ .. تجْلِب بِلاده وتِتْرَشِي
كُرْ .. من عَوَارْضِك يا بلدنا .. الناس تَشُوف ومَدَعْمِشِي
تسمع سماع .. ومَطَنِّشِي !!
وحاكْمَانا في اشنو .. وشان شِنُو ؟
حاكُومة ما خابْرالنا شِي ؟!؟
حِسْ أمَّها المَهَرِيِة همْ ، يجي من بعيد
يا أمُّونَة بتِّي شِن الشَكِي
ما حاشُو في الطين الرُخُسْ .. ينحاش فِ أرْضِ مَكَرِكِي

[imported_ماريل]

حَرْمان عليكي تقولي لا
مجبورة يا خادْمَ الفَكِي .. مجْبُورة إنتِي على الصلاة
لا تأذِي جرحو تحَكْحِكِي
وجاييك مَلَكْلَك من تِحتْ .. يا أمّونة تاني تَلَكْلِكِي
شيلي الحَرف داك رشْرِشِي
قوم يا عشاي .. قوم للعَشي
قوم .. واِنتَكِي
وقام واِنتَكَى
ويلقى الحسن في صفْحَتو وقِدَّامْ وَشِي
- إن جيت بلدنا إنكسِّرت
_ أيِِّّ .. آ .. الحسن
- كَسَرَا البحر ؟
_ أيِِّّ .. آ .. الحسن
- يابا البحر دا .. بحرْ بلدنا ؟
_ أيِِّّ .. آ .. الحسن
- الزول يكسِّر بلدو ؟؟
والضو .. سكَتْ .. طقْطَق أصابِع ولدو
.... فِسْْ .. إنجِلِسْ
... فِسْْ .. إنجِلِسْ
- يابا المدارس اندمَّرت ؟؟ صاح والجوامع اِنكسَّرت ؟؟
_ أيِِّّ .. آ .. الحسن
- يابا .. الجوامع .. هيل مِنُو ؟
_ هِيل الله .. نُــوم ..
- حتَّى المدارس حقَّتُو ؟؟
_ لا لا الْلتْ الحاكومة .. نوم ..
- هُو الزول يكسِّر حقُّو كيف ؟؟ !!؟؟
والضو يَطَلْوِحْ بُو اِندهاشْ .. ما يلقى قيف
.. لا بان لُو .. بَرْ .
وأمُّونَة صُوتا من البعيد ..
نوم .. يا .. قَشَرْ
- صِحْ يابا في الجامع ، جا تمساح واِنبَطَحْ ؟؟
_ أيِِّّ .. آ .. الحسن
- يابا التماسيح .. مسلمين ؟
_ لا مجرمين
- لابسين دقون .. لافِّين طِرحْ ؟؟

_ ..........

- ما تَضْرَبُوهُن بالسلاحْ ، وتَكَتِلُوهُن .. تاحْ .. تَرَحْ ؟
والضوْ .. سرحْ
وأمُّونة صوته من البعيد .. حَلِقَه إنجَرَحْ
: نوم يا قَشَرْ .. : نوم قبْل أجيك
- يابا البحر دا ولَدْ مِنو ؟
_ ولد المطر
- ويابا المطر ؟
_ بت السحاب
- ويابا السحاب ؟
_ خير للبشر
- ويابا البشر ؟
_ هُول ربَّنا
- ونان ربـ
وأمُّونة تجري من البعيد ..يقطع كلامو وتنْحَسُو
تَجْبِدْ أضانُو وتقْرُصُو
لا تقْلِدُو .. جيب القَشَر دا علي رفاقتو نرَقِدُو
أمُّونة هَزَّتَا تمْغِسُو
- أنا دايْر أنوم في صدر أبوي .. شان البحر
وقام إنحشر .. في صدر أبوهُو وحدَّثُو :-
في مرَّة جُونا .. رجال كبار .. كبآر
غَمَتُولِي في إيدِي .. قروش كتار .. كتآر
أمُّونة شالتا فنَّتا..
الراجِل أبْ دِقناً كبير .. سبَّاله دنْقَر لقَّطَا
وأنا قُم بكيت
أمُّونة فكَّت صُرَّتَا .. وأدتني صندوق بسكَوِيت
_ بعدين ؟
- سكَتّ .. وأمُّونة قامت .. شَوّ .. بَكَت
وتلْفَح نعالَه .. وتَفْلَعُو ..
نوم .. يا .. قَشَرْ
نوم .. قَبْلَ أجيك
- أنا داير أنوم في صدر أبوي .. شان البحر
وقام إنحشَرْ .. في صدرَ أبو
ونام الحسنْ ..

[imported_ماريل]

في آخر المسا
وصنَّت عيون النوم يجيها بعد تعَبْ ..
سرْسارو داخل المدرسة .
والضو غَمَد
صِحَى .. بِي صياح الأمهات .. وأطفالَه مِنطلْقِين بِكِي
كل فردِة تبكِي على بلد
بكَّاهَا حِسْ الطائرات .
والضو .. ضحك ..
لمَّا البنات قالَن لُو طُقَّهَا بِي حَجَرْ !
يا الضو تَطُقَّهَا بي حجرْ .. في الجو ..
تَرمِّي لنا الخِيام ..
يا قطْرَِةَ التَرَاكُومَا ..
يا سكَّرْ .. دقيق .. ومعلبات .
ومنام .. منام
جات البلد .. تَعَتِبْ .. جراحَه مَسَبَبات
لون القمح ..
طعم التُمُرْ ..
ريحةَ الطَلِحْ ..
ضُل البرندات القُدام
البُرتُكان .. والمنقة .. والليمون
يجوهو .. منام .. منام
طُورِيْتُو .. فِطْنَ الكونْشِبِر .. مرْكُوزة تالا السام
تجيهو .. منام .. منام
المُشْرَع .. البنْطُون معَدِّي .. ودوْشَةَ العمال .. تجيهو .. منام .. منام
الروضة والأطفال .. بنات الإبتدائي .. العام .. تجيهو .. منام .. منام
الشارع الوسطاني .. والزاوية .. الَسَلام والناسْ ..
يجوهو .. منام .. منام
الصَفْقَة .. والطنْبُور .. ووِزَّاً عام .. يجيهو .. منام .. منام
الناس تقاومْ في البحرْ .. مرْيُوقَة .. مِتْماسكِين تمام ..
في القيف يجوهو منام .. منام
الأرْزَقِي أرباب البنوك .. شُلَّةْ حَرامِيْةَ الضلام
المُلُّسْ .. السادة الكرام .. لافِّين عليهُن زيْ غَفَر .. قاشْرِين
يجوهو طُمام .. طُمام
السُوق .. غَلاها .. الشُفَّع الأيتام ..
يجوهو .. دِيوش .. دِيوش ..
وبلا قروش .
اللجنة .. تجَّار الرصيف .. المسْخَرة .. الهدَّام ..
يجوهو .. كروش .. كروش
والضو يدُوش !
أصبح صباحِك .. يا البلد
واللاَّ العَفاريت أصبحت
يصْبِحْ صباحِك يا البلد
تَبْرِي وجرحْ بالك برد ..
والضو يعافِر في الجبل
مرُّوا بُو سابع يوم وِلاد
يا الضو حمارْتكْ .. طفَّحَت
أمِس الكلاب بَعَجَنَّهَا
كلبةْ مدينِة .. وديكا .. عِيك .
دحشك .. معاهُو دحيش غريب
خلِّينا فوق قوز الرماد
أدِّينا عيش وصبيط تَمُرْ .. يبقالو زاد
إسبوع يعيش كان الله اراد
أنا بُكْرَة صادْ .. كان الله راد
والضو خنس .. قنَّب حكَى
حكَى للوِلاد قصَّة تساب كم واربعين
حكَى بي مَغَسْ ..
كيف جِدُّو فات الدنيا .. فاكر الإنجليز ضربُوا البحر بالطائرات
شان يشْرَق المشروع يموت والأمَّة تنْشَتت .. شتات
قال وإنتكَى ..
" الإنجليز أذنابَه في .. وكم وأربعين مويات وجات"
صنَّة و بكى
بكى ما بكى
بكَّاهُو حِسْ الطائرات
بكَّاهُو قُدْرَتُو تنتهي
بكَّاهُو يرْجَى المعجزات
__________________