قصص من الدنيا؛ وبعض حكاوي...!!! [الأرشيف]

عبدالمنعم الطيب حسن

26-06-2020, 04:56 PM

سلام وتحية وشوق لكل الاحباب والاصدقاء هنا،
شغلتنا الشواغل، من الوتس لحدت الفيس
وكمان كمبيوتر البيت الثابت بقى ما شغال
ومن المكتب نتنا داب الشغل
وممشي حالي بالموبايل
اها مع الجوانح دي جبتا لابتوب لزوم الشغل ونلاين من البيت قال ليك
ليهو كم شهر امبارح لاقاني في سودانيزونلاين اسم صاحبي عكود يا
في مداخلة لاستاذنا الدكتور حسن فرح...
اها قتا ليه ما اجرب ادخل من اللبتوب دا
واليوم من اول محاولة دخلت
وانبسطت
اها
قتا ما اجيكم ايدي فاضية
هاكم الونسة دي اتمنى ان تعجبكم
.............
من كل شدرة غنا؛
ساحاول ان احكي حاجات ذات مدلول ومنفعة وفوائد للقاري
وساحاول ان اختصر
مع الواتساب دا الناس الكلام الكتير ما بتدوروا

نبدأ
.............
سكنت في ايام الجامعة مع حللي؛ ومن لم يتعرف على حللي فقد فاتته امنية
كانت شقتنا ملتقى ابناء العمال من عطبرة وسنار
واولاد المغتربين من الخليج والبحرين
وابناء الهامش من كل بقاع البلد الطيبة
وناس نضاف برضو بجونا
المهم
مرة جوا طالبات اخر ترطيبة
وبدوا يحكوا في قصص لما ابوي كان سفير في لندن
وقصص عن لندن ومتحف الشمع ذاتو
ولما مشينا اجازة كندا وقصص عن كندا وروعة شعبها
وقصص عن جزر الكناري
والبراري في سهول المكسيك وجنوب افريقيا
وقصص عن اليابان
ياخ اتفه دولة كانت الصين
وانا قاعد اشرب في الونسة شراب
المهم في زميلة كدة فطنت لوجودي وصمتي وشرابي
وسالتني انت يا منعم ساكت ليه
احكي لينا عن دول زرتها وذكرياتك فيها
قتا ليهو والله يا جماعة الدولة الوحيدة الزرتها في اجازة نص السنة هي ليبيا
تنفع !!

يتبع...

عكــود

26-06-2020, 05:29 PM

يا سلااام على طلتك يا حبيب!
مبسوط والله بعودة حرفك،
بارك الله في الصديق الجاب سيرتي في س اون لاين.
سنارة وقبضت كور :)

عبدالمنعم الطيب حسن

26-06-2020, 05:40 PM

يا سلااام على طلتك يا حبيب!
مبسوط والله بعودة حرفك،
بارك الله في الصديق الجاب سيرتي في س اون لاين.
سنارة وقبضت كور :)
يا سلام والله شوقنا ماسورة مكسورة عديل كدة
تصدق في العيد كنتا عاوز اتصل عليك لكن فجاة كدة اتلخبطت الحكاية ونسيت الاتصال
طبعا مع الجوانح دي الزول يقرب ينسى اسمو
قابلت صديقي طيبان في جخانين الفيسبكي
ومهند الخطيب
المهم نسال عن الصحة والاحوال والوليدات وامهم
النور يوسف متفسح بهناك وطبعا نحن سواء في الرياض
المهم محبات من هنا لحدت الامارات؛
سودانيزونلاين براها؛
دائما في سيرتك مع صاحبي اللدود حافظ حسين
انت يا ابوذر من الناس الذين تضج المجالس بذكرهم
ربنا يحفظك ويخليك ويغطيك
وهاكم دي كمان

ما دمنا في المنصورة هاكم دي
ونحن برالمة جداد وجيرانا طالبات معانا في الجامعة
اها جونا وعزمونا لحضور حفلة راس السنة في شقتم
واكدت زميلتنا في الكلية الدعوة
المهم من عصرا بدري استحميت ومشيت بدري وبراي
قبل الشباب الساكنين معاي في الشقة
خفت البرالمة تقول شنو!!
المهم مشيت والجماعة لسا ولا اتغدو حتى
اتاريها راس السنى بتدا حوالي الساعة 12 ليلا
واحد زميلي في السكن فقدني قال البرلوم الخفيف دا تلقاهو مشى الحفلة
فعلا دق باب الطالبات ولا دخل حتى وقال عاوزني
المهم طلعت معاه
قال لي دا شنو يا عربي يا متخلف حد يمشي لحفلة راس السنة ستة الا حتة مساء بالغت
المهم مشينا الشقة وارتحت والساعة 11 ونص مشينا كلنا
يلا بدات الحفلة وكان اول سؤال اي زول يحكي يحتفل وين السنة الفاتت ومع منو
يا زول ناس حكوا ابوظبي وعندك عمان والعمارات
وتونس ياخ ابسط مدينة كانت كوستي
وكل الاحتفالات مع الاهل والاسرة
اها لما سالوني انا
جاوبت بصراحة
والله يا جماعة انا اول مرة احتفل براس السنة وما عارف ذاتو الناس بتحتفل
والسنة الفاتت زي الوكت دا يا نائم يا في النادي
لكن المؤكد اني كنت في واوسي التي ما غادرتها الا الى هنا
ههههههههها

عبدالمنعم الطيب حسن

26-06-2020, 05:48 PM

في العصريات امشي مع ابوي للزراعة
او بالاحرى الحق به
اشتغل شغلانات خفيف كابن مزارع حتى المغرب
نحلب بقرتنا ونمشي البيت
مرة كان بكرة ابوي عندو موية في الطماطم اها قال لي
جهز كم لبقة استعدادا للموية بكرة
اللبقة هي ان تغلق بالتراب الموية من الجدول الرئيسي
وتوجها نحو جدول فرعي يسقي بعضا من سرابات
وعندما تتملي السرابات تغلق وتفتح الموية في الجدول الرئيسي
لتذهب لجدول فرعي ويروي سرابات وهكذا
فكنت اقفل واعمل لبقة لكل جدول فرعي
جاء جار ابوي في الزراعة وصاحبو
وقال لي توقف الشغل طوالي دا امل اكتر من اللازم خلي ابوك بكرة اعملا
ابوي بسمع الكلام قال لي خلاص وقف
وقفت وانا ما رضيان عشان عاوز اساعد ابوي وبكرة الصباح بكون براهو وهو كبير في السن
المهم امتثلت ووقفت
عمنا اخد كلمتين تلاتة مع ابوي ومشى
ابوي طوالي اداني الطورية وقال لي واصل
وسالته ليه قبيل وقفتي
قال لي يا ولدي دا اسمو جبر الخواطر
الراجل تدخل ولو ما عاوز اكسر خاطرو انت ترتاح شوية وهو بفوت وبعد دا تواصل....
جبر الخواطر قيمة انسانية وسودانية عظيمة
من يومها وحتى الان احاول الا اكسر خاطر زول؛

جبر الخواطر ياخ حاجة سمحة

عبدالمنعم الطيب حسن

26-06-2020, 06:02 PM

((وقال لي توقف الشغل طوالي دا امل اكتر من اللازم خلي ابوك بكرة اعملا))

عمنا دا كان وكت القصة كان في مطلع الستينات من عمره المديد متزوج اكتر من سيدة وبلا اطفال؛
وابوي علق على كلام الامل دا وقال لي فيما ما معناه
عمك دا بتكلم عن الامل الزايد وهو لي هسا بفتش للعرس وعاوز الذرية
عمنا دا تزوج فعلا بعد الكلام دا امكن باكتر من 10 سنوات
وفعلا رزق باطفال جميلين
والله انا بعد ما جوهو الاولاد رجعت من برة وسجلتا زيارة مخصوص للسلام عليه في بيتو
برا لابي كونه صديقه الحميم
وتهنئته بالاطفال الحلوين الذين جاءوا على كبر
عمك بعد تعب عرفني
ما زال مبسوطا عمنا دا
ويضحك سن سنين تعال يا محمد وامش يا احمد
المهم
لا معنى للحياة بلا امل
امل راجيهو لي باكر
امل وبدر

عبدالمنعم الطيب حسن

26-06-2020, 07:53 PM

وبمناسبة الطورية مرة ابوي الظاهر شاف شغلي معاه فيهو كسل شوية
قال لي:
امسك في قلمك دا قوي طوريتنا دي ما بتقدر عليها
هههههههها

عبدالمنعم الطيب حسن

27-06-2020, 12:02 AM

وبمناسبة القلم لاحقا ابوي غير رايو ودعاني للعمل لكن ما بالطورية
مشيت مصر وانا بعد برلوم وجيت السعودية عمرة ورجعت السودان وجبتا لابوي
ريحة ون مان شنو وعراريق رهيفة وجلاليب وعمم وجزمة كشف
وعصرت مصاريف لابوي في ايدو
المهم بعد كم اسبوع قتا ليهو ياحاج انا مسافر
علي العديلة يا ولدي وين ماشي
قتا ليهو مصر للقراية
قال لي
يا زول هوي مصر ان بتمصر فيها امشي السعودية دي محل القروش
ولكن يا ابوي لسا عندي قراية
رد سريعا
القريتو دا كفاية خلاص
................
الغريبة مشيت مصر وقعدتا 4 سنين عاشم الحب والثورة
ورجعت تاني السعودية عمرة بعد التخرج
ونزلت في نفس شقتنا القديمة مع اصحابي الخريجين الكنت نازل معاهم
قبل نحو 4 سنوات
وما زالوا يقول لي عبدالمنعم البرلوم
.............
الامل سمح

imported_عبدالله الشقليني

27-06-2020, 09:44 AM

https://www.youtube.com/watch?v=Zcmc_NZ6k2I

عبدالمنعم الطيب حسن

27-06-2020, 07:10 PM

https://www.youtube.com/watch?v=Zcmc_NZ6k2I

هلا استاذنا عبدالله الشقليني
نورت البوست يا كبير
شوف صاحبنا عبيد عندا يتجلى كسوداني اصيل ساعة زنقات الدنيا ام قدود

اشتغلنا عمل اضافي هنا في الرياض انا وصاحبي عبيد
مع واحد صاحبنا وحبيبنا
وتاخر في اعطاءنا المبلغ المتفقين عليهو بعد انتهاء المشروع
وفي الايامات ديك
توفت فجاة ابنته الكبيرة
حزنا عليها شديد
وبعدا بكم شهر سالتا عبيد يا زول قريشتنا العند فلان صاحبنا خبرا شنو
رد عبيد حاسما:
الموضوع دا تنساهو خالص ما ممكن ياخ تكون علي الزول دا اتنين
نحنا والدنيا
................
عبيد حكيم

النور يوسف محمد

27-06-2020, 10:03 PM

عبدالمنعم الطيب حسن

27-06-2020, 10:56 PM

بسم الله الرحمن الرحيم

الزول الوناس وحكاى
نورت بيتك ومطرحك ياخ
،،،
قاتل الله الفيس وربيبته الواتس
اقتلعنا من دوحة سودانيات ومضارب العمدة عكود
تماما كالغربة التى فرقت بيننا وبين مسقط راسنا ومحط صبانا

وفى كل كانت ايامنا الزاهيات وليالينا المدهشة

شكرا يا راقى
هلا النور حبابك الف ياخ
تحيات الف واشواق كميات ياخ
امتد الحظر علينا يا صديقي وعد ما تم الفتح
خوفوني الشعوب من نقل اطفال للحلاق
الوليدات خنفسوا وانا ذاتي دقن لحدت هناك والله ما كنت مفتكر انو ممكن تكون عندي دقن طويلة كدة المهم عملتا منها كم صورة ورسلتها لاهلي هههههه
وحلقت مشيت لاخوي هنا حلقت واتغديت قبل اسبوعين ربما
اهاااا امس جبتا المكنة والمقص وطلعت حلاق تصدق هههههه
بس اخدت زمن طويل لكن ظبطت الحلاقة لحدت ام محمد قالت خلاص مزقنا فاتورة الحلاق دي نهائي
تسلم اخوي وهاك الحكمة دي من افواه البسطاء

الشكلة دورت في النادي بين شابين اصحابنا واهلنا
احجزك احجزك حجزناهم
انا في فريق مع مجموعة ماسكين واحد والتاني عاد بعيد شوية بهدوا فيهو شباب تانيين
قوم في مجموعتنا واحد بائخ قال لي الولد بتاع الشكلة:
قوليهو اتا اختك مش حملت من خطيبا
وكانت في شاعة زي دي مدورة في الحلة
الولد بتاع الشكلة طوالي اتلفت للبائخ وقال ليهو:
والله ما بقولو كدة دي شكلة بسيطة بكرة بتنتهي
لكن الكلمة الزي دي عمرا ما بتروح

تصدقوا الزول دا لحدت هسا هو ذاتو ما عارف انا مصاحبو ليه
.....................
قيمة انسانية عظيمة من صاحبنا البسيط
..............
شعب معلم

بابكر مخير

28-06-2020, 07:11 AM

يا سلااام على طلتك يا حبيب!
مبسوط والله بعودة حرفك،
بارك الله في الصديق الجاب سيرتي في س اون لاين.
سنارة وقبضت كور :)

أول حاجة..
نعوم يابا سلام ودارك (سودانيات) أصلن سماها داير ضياء، ونجموها تزيد إشعاع....
وتااااااااااني هام!!
كوكي أمانا ما إتفضحت،، الحوامة شنها ليك.. إتا ياكا مفروض هنانا ذي كدي مرابط، مرطب في دوحة الحنان سودانيات

بابكر مخير

28-06-2020, 07:19 AM

،،،
قاتل الله الفيس وربيبته الواتس
اقتلعنا من دوحة سودانيات

النور
يا سعادتو
الفيس والواتس
كدي عيني في عينك ;)
يابا إتا شايل قلمك وشغال تسميح (من سماحة) في كل المواقع وبيوت الجيران في الأسافير.. أدخل في حتة وعلى مضض، لكن ألقاك غيرت المفاهيم هناك وبي سطورك المنشورة ديك. ختيت برواز الجمال ماركة مسجلة..
غايتهو لو ما الكتوف إتلاحقت كتا قلت ليك ومعاك الطيب وكل ضباط الشرطة من شعراء وكتاب (مرافيت ولا ممن سهى عنهم الحكيمباش والتطهير;);)) تجمعوا وترفع تمام:cool::cool:

بابكر مخير

28-06-2020, 07:24 AM

وبمناسبة الطورية مرة ابوي الظاهر شاف شغلي معاه فيهو كسل شوية
قال لي:
امسك في قلمك دا قوي طوريتنا دي ما بتقدر عليها
هههههههها

مش الحمد لله القال ليك كدي..
إسعادن لينا وفي شان نتهنا هنانا بي قولك..
أسمع قول الوالدين وإتا رزقك متين..
الطورية سمحة لكنها مانت حرمتنا من جنس القول السمح دآ..
محبة لك وقمة الإجلال للوالد

عبدالمنعم الطيب حسن

28-06-2020, 01:09 PM

أول حاجة..
نعوم يابا سلام ودارك (سودانيات) أصلن سماها داير ضياء، ونجموها تزيد إشعاع....
وتااااااااااني هام!!
كوكي أمانا ما إتفضحت،، الحوامة شنها ليك.. إتا ياكا مفروض هنانا ذي كدي مرابط، مرطب في دوحة الحنان سودانيات

هلا هلا مرحبتين استاذنا واخونا وحبيبنا الدكتور بابكر مخير؛
سودانيات دي زي موية النيل لابد للعودة لصنعائها وان طالت الاسافير
تصدق لي زمان بهاتي بالدخول وتلفوني عكود معاي عشان الباسورد التاه مني بس استحيت من طلب الباص وكثيرا
بين موبايل ولابتوب وكمبيوتر مكتبي الانترنيت فيها حبة
وفي البيت وليداتي بوظوا الكمبيوتر
قوم يا اللابتوب طوالي من اول محاولة اخترقت الحصون وها انذا اخيرا مع الطف ناس
شوف الكلام التحت دا يا دكتور

اشتركنا ديانا نحن تلاتة اخوان
اخونا نزل السودان وشغال في الدينا وكانت الفكرة هي ان يدفع منها مصاريف البيت الكبير
وفعلا كم شهر بسلم ناس البيت مصاريفم
شوية كدة بقت تجي تلفونات من السودان للمصاريف للبيت الكبير
خلاص رجعنا نرسل المصاريف
بعد سنة سمعنا ان دينتا تحولت لحافلة
كلمت اخوي الكبير وهو غير شريكنا
وباركتا ليهو الحافلة الجديدة
هههه
وقتا ليهو زولك دا ما بشاور مش عندو شركاء برضو
اخوي الكبير قال :
شوفو الحافلة دي لو بقت رقشة زول يجيب خبرا ول اتكلم عنها تاني ماف خلاص الموضوع يتقفل على كدة
وفعلا اتقفل على كدة
والحافلة ذاتا راحت وبقت الخوة راسخة
....
اسرة حكيمة

عبدالمنعم الطيب حسن

28-06-2020, 11:02 PM

مش الحمد لله القال ليك كدي..
إسعادن لينا وفي شان نتهنا هنانا بي قولك..
أسمع قول الوالدين وإتا رزقك متين..
الطورية سمحة لكنها مانت حرمتنا من جنس القول السمح دآ..
محبة لك وقمة الإجلال للوالد
سلام بابكر اخوي
شوف هنا ابوي عاش زهاء المية عام
وعلمته الحياة والدنيا

مرة بفتش لحاجة في البيت
لحظة لقيتا تلفظت بكلمة مخلة بالاداب العامة
الغرفة كانت فاضية ما انتهيت من كلمتي
الا وابوي في وشي وسمع الكلمة
خجلت وعرقت وغلبني اتصرف
ابوي قالي بكل هدوء الدنيا
انتا ما متوقع اجي داخل ولو شفتني ما قتا
الكلمة دي؛ اعتبرني ما سمعتها
لكن ما تعود لسانك على الكلام الزفر
كان ذلك وانا بعد صبي
حتى تاريخه لا اقول لي كلمات
مخلة
خلاص لساني ابا النوع دا تب
......
ابوي استاذ عظيم؛

عكــود

29-06-2020, 11:51 AM

عبدالمنعم الطيب حسن

29-06-2020, 03:55 PM

يا سلام يا عبد المنعم !

والله متابع وبمتعة شديدة.
رحم الله والدكم، هؤلاء كانوا معلمين وملهمين.

بعدين يا بابكر ، الله وكيلك بلا سودانيات والبركل، ما عندي باسوورد منتداياً آخر.

حباب الطلة سعادتو النور

هلا عكود نورت البوست
تسلم يا باشا
وعارف ابهاتنا ديل كان ثروة فارقت دانيانا ولكنها تسكن الروح
جوة؛
احاول وغالبا لا استطيع ان اتمثل سلوك والدي واتخيله وقد مر بنفس ظرفي
افشل غالبا وكثيرا
اعتقد البيئة والظروف التي انتجت هؤلاء العمالقة غير....
كانت الحياة سهلة ولا كانوا يعانون، كانوا كل الرضاء والقناعة نحن هسا لو عندك قطر تدور للمقطورة هههه
عاشوا طويلا لانهم لايسرفون في الحياة
كان ابي ينام عقب العشاء مباشرة ولو دلوكة فوق راسو
ويصحى قبيل الفجر، ويغفو ظهرا
هؤلا كما قال عنهم الطيب صالح كما شجر السيال والسلم
بالمناسبة عندي في بيتي في واوسي شجرة سيال واخرى سلمة
صارتا عاليات وظليلات لا اعرف كيف نبتتا ووصلتا مرحلة الظل والثمر
لابد انهما الان تعانقان روح ابوي فقد دلاني ان اسور هذه القطعة التي اسكن فيها الان وهي جزء من حوشنا فاضي
مؤكدا انه في حياته سيتم كل شيء بسهولة ولكن لو غاب فان هؤلاء الاسود(بتاعين الحافلة الفوق دي) ههههه
حا يضيعونني ههههههها
سورتها وانا بعد طالب
وصار في بيتنا حوشا باسمي
..............
استاذنا الدكتور بابكر ورد اسم عكود في بوست لصديقنا الدكتور حسن فرح
وانا ذاتي كثيرا ما اذكر عكود في بوستاتي لي في الفيس وسودانيزونلاين فالعمدة مستحيل ان تنزل في محطاته الكثيرة ولا تتزود بحريف الزاد والحكمة
......
واسمع دي معظم هذه الحكايات انشرها هنا وهناك وبعض سبق سيفه عذلها
ا

عمنا فيصل الفوق دا مرة في النادي جاب طحنية وعيش كمية
من الفرن القريب من النادي
وشلة الكوتشينة اكلت وعرقت
وساله صديقه يا عم فيصل من اين لك هذا؟
قال مشيت لاولاد خالتي الكوزين ديل سلفوني 10 الف واضاف: مغفلين
ومغفلين دي شجعت ماو الذي سال عمه؟
بترجعم يا عم فيصل
رد سريع:
ارجعم من وين؟؟
واضاف:
هم ضاربم فيهن حجر دقش
...........
اكل تورك واحتفظ بالتصنيف لزولك

عبدالمنعم الطيب حسن

29-06-2020, 10:41 PM

نواصل المشوار

استاذي المرحوم معتصم محمد علي
معتصم كيمياء
قال لينا في اول حصة في فصل المتنبي في اولى ثانوي في مدرسة الجيلي الثانوية...
يا شباب شدو حيلكم خريج الثانوي يا دوبك بشتغل كمساري في بصات ابورجيلة
الاخطاء الصغيرة بنغفرا ليكم والكبيرة ما بنتوقعا منكم
والزمن دا بدور بسرعة فوق تخيلاتكم
شدوا حيلكم واقروا جامعة ليست للوظيفة فقط ولكن لتوسيع المدارك
خلوا طموحكم عالي ولا ترضوا بانصاف الحلول
اقابله متقطعا طوال الفترة منذ تخرجنا من الثانوي في النصف الثاني من التمانينات وحتى
2017 هو من الجزيرة اصلا ولكنه اتخذ الجيلي وطنا ومنزلا
قابلته اخر مرة في مدرسة ثانوية خاصة في المصفا وهو مديرها
وتوفي بعدها فجاة بشهور
ولكن تظل كلماته واستاذته تنير الدروب لكثير من تلامذته على امتداد الوطن
..............
استاذي العظيم

عبدالمنعم الطيب حسن

30-06-2020, 10:45 AM

نواصل في الذكرى نمد

......
في نادينا في الحلة عمنا فيصل اكبر موظف في الحكومة
ونهاية الدوام بعتل عيش سكر فحم
اي حاجة شغل عضلات وكان وقتها كبيرا
المهم شاف اتنين من تجار السكر ماشين علينا
مرتاحين وجلاليبم نضيفة
قال قولته الشهيرة:
والله في ناس في الدنيا دي عايشين
بالفكرة بس؛

عبدالمنعم الطيب حسن

30-06-2020, 07:05 PM

عارف والله فكرة الصور دي فكرة جهنمية
خلاص حا ارفع صورة ابوي
لخصوصيتها وندرتها فهو يلبس العراقي والسروال الطويل والتوب في اي مناسبة
شيخ عرب
هكذا كان يفعل كبارنا
للاسف الشديد اللبسة دي كادت تنقرض
يلبسها الان فقط اخوي احمد رفعه الله
فهذه فرصة لحفظ الصورة جبتها توا بعد مداخلتك من قروب الاسرة
ابي عاش قرابة المية عام وتوفى مطلع التسعينات فهذه صورة من الزمن السمح
ياخ لما كنت اشوف ابوي بالتوب الابيض الجميل والمركوب والعصاية ليتكي عليها
وهي برضو من تمام اللبس كنت اسعد اي ما سعادة
ولروحه الطاهرة المطمئنة الف هناء وسعادة

عبدالمنعم الطيب حسن

30-06-2020, 11:35 PM

نحاول رفع صورة ابوي
https://www8.0zz0.com/2020/07/01/01/335712753.jpg

لقد نجحت في تحميل صورة ابوي
ياخ حاولت يمين يسار ظبطت

ناصر يوسف

01-07-2020, 07:55 AM

عبدالمنعم الطيب حسن

01-07-2020, 09:54 AM

الحبوب عبد المنعم الطيب حسن

يسعد أيامك ياخ و بركة بالطلة الجميلة و الحكي الجميل

أجمل ما في حكاويك هنا ، إنها مليانة بالدروس و الحِكَم والعِبَر

سعيد غاية السعادة بعودتك لبيتك الوهيط سودانيات

و هنا

( استاذي المرحوم معتصم محمد علي
معتصم كيمياء )

أترحم معك علي الأستاذ و المربي الجليل أستاذ معتصم

كان بعمل مديراً لمدارس المجلس الإفريقي بالمصفاة

عرفته عن قرب و تعلمت منه الكثير الكثير

الله أسأله له الرحمة و المغفرة

هلا ومسهلا بصديقي ناصر يوسف
تحياتي يا زول يا عطر
اسْعَدن ايامكم وتسعد رحيق واخواتا
شكرا للاستقبال الحار
سودانيات تظل بيتنا الاول حبو ما بتحول
ساكون هنا
وذلكم قدري فيما املك
تحايا تاني وشوق ومودة شديدة
.........
استاذي معتصم كان يخصني بود خاص؛
واعطاني فرصة في الداخلية في ثانوية الجيلي في وقت كان فيه ممنوعا على ابناء المنطقة السكن في الداخلية
ومن شدة تاثري به ان درست الكيمياء لاحقا نفس تخصصه
وواحدا من اجمل وانبل من تعرفت عليهم وتاثرت بهم
بكيت عليه بالدمع الغزير حال عرفت بوفاته السريعة
له الرحمة بقدر انسانيته وفضله....
وقد قابلته في المصفا وقابلت ام رحيق وانت كنت بمصرا
سنلتقي يا صديقي
واشواق من هنا لعندك

عبدالمنعم الطيب حسن

01-07-2020, 12:23 PM

ولعيون ناصر وكل الكرام هنا خذوا هذه
صاحبنا في مكة يحكيي انه مشى لخاله المرطب لاستلاف مية جنيه لاتمام تكاليف العمرة
خاله قال ليهو انتا هنا نجحت شنو عشان تمشي كمان السعودية
انت كمساري وحا تبقى كمساري في باظي دا للابد
المهم صاحبنا دبر المية 100 جنيه وجاء عمرة
واتوفق بعد سنتين رسل قروش لاهلو اشتروا بص بنفس المواصفات
وهكذا بعد كم سنة اشترى بكسي برضو
قاعد لما تم 7 سنوات
قنا ليهو ياخ انت رطبت شديد ارجع لاهلك امك وابوك مشتاقين ليك وعندك بص وبكسي
قال:
والله لكل ما اتذكر موقف خالي دا معاي بديها سنة
لسا طمعان في الزيادة

عبدالمنعم الطيب حسن

02-07-2020, 02:44 PM

صاحبنا في مكة يحكيي انه مشى لخاله المرطب لاستلاف مية جنيه لاتمام تكاليف العمرة
خاله قال ليهو انتا هنا نجحت شنو عشان تمشي كمان السعودية
انت كمساري وحا تبقى كمساري في باظي دا للابد
المهم صاحبنا دبر المية 100 جنيه وجاء عمرة
واتوفق بعد سنتين رسل قروش لاهلو اشتروا بص بنفس المواصفات
وهكذا بعد كم سنة اشترى بكسي برضو
قاعد لما تم 7 سنوات
قنا ليهو ياخ انت رطبت شديد ارجع لاهلك امك وابوك مشتاقين ليك وعندك بص وبكسي
قال:
والله لكل ما اتذكر موقف خالي دا معاي بديها سنة
لسا طمعان في الزيادة

عبدالمنعم الطيب حسن

03-07-2020, 03:53 PM

عمنا قريب الله رجل متقدم في السن يعيش وحيدا ومحبوبا ومسالما
مرة لظرف ما جارو لقاها بالليل يتحاوم في حوشو
ياعم قريب الله اخبارك الجابك شنو بالليل تتحاوم
لم يقدم عمنا قريب اجابات مقنعة
مسكه صاحب البيت من يده وقال ليهو:
ياعم قريب الله تمشي معاي للشرطة، امسكك ول بتمشي معاي ساهي؟
عمك قريب الله رد:
الضمان المسوك
فصارت مثلا
................
كنا في الثانوي يقابلنا عم قريب الله في السوق
ويسالنا نفس السؤال
عارفين يا اولاد الدنيا دي زي شنو
زي شنو يا عم قريب الله
ينبسط يجلس ويخلع مركوبه ، يتحرر المركوب والرجل كليهما؛ يشير لمركوبه الحر
,يجاوب سعيدا:
زي مركوبي دا

.............
فلتة زمانو يقول بعضهم انه مجنون
انا متاكد هو اعقل من كلهم
..................
ولكنها الدنيا

ناصر يوسف

03-07-2020, 07:07 PM

استاذي معتصم كان يخصني بود خاص؛
واعطاني فرصة في الداخلية في ثانوية الجيلي في وقت كان فيه ممنوعا على ابناء المنطقة السكن في الداخلية
ومن شدة تاثري به ان درست الكيمياء لاحقا نفس تخصصه
وواحدا من اجمل وانبل من تعرفت عليهم وتاثرت بهم
بكيت عليه بالدمع الغزير حال عرفت بوفاته السريعة
له الرحمة بقدر انسانيته وفضله....
وقد قابلته في المصفا وقابلت ام رحيق وانت كنت بمصرا
سنلتقي يا صديقي
واشواق من هنا لعندك

ربنا يرحمه و يغفر ليه

لقد كان معلماً و إنساناً عظيماً يذكرني بوالدي المعلم و المربي يوسف حسن التوم رحمه الله و غفر له

هكذا هم أبناء ذلك الجيل من المعلمين

التعليم يم يكن هو الأساس ، بل التربية و التنمية الريفية و ترقية المجتمع في زمن التعليم اللا مركزي

عبدالحكيم

04-07-2020, 08:24 AM

عبدالمنعم الطيب حسن

04-07-2020, 05:15 PM

وما الحياة الدنيا إلا قصص وحكاوي ...

خذها من أبوينا آدم وحواء وابنيهما هابيل وقابيل ... قصص حكاها لنا رب العباد في خير كتاب ...

وما عقبهما من أنبياء ورسل .. قصص ...........

والصحابة .. قصص ..

ومن تبعهم بإحسان إلى يوم ....

ومن لم يتبعهم بإحسان وهذا بيت القصيد وهذا ما نحن فيه هذه الأيام من إيلام ( تره إيلام دي وليدة اللحظة فأنا أكتب كلمة الأيام جات الإيلام وقلت معبرة هذه الأيام من إيلام ...

وفوق كل هذا وذاك يقول الله تعالى (وَمَا الْحَيَاةُ الدُّنْيَا إِلَّا لَعِبٌ وَلَهْوٌ غ– وَلَلدَّارُ الْآخِرَةُ خَيْرٌ لِلَّذِينَ يَتَّقُونَ غ— أَفَلَا تَعْقِلُونَ ) ...

فيا أقصص القصص وهات من حكاويك ..
ونحن نقرأك أو نقرأ لك ...

لك الشكر والإمتنان ..

هلا عبدالحكيم حبابك الف
نورت البوست
اهدي هذه المداخلة لك وللاعضاء وللقراء الكرام
ولكل من تورط في قراءة هذا البوست
حتى وصل هذه الصفحة
تحياتي للجميع

(أمي عليها سلام
فقدت باكرا الولدا والولدا وفقدت الاخت ولاحقا زوج البنت والزوج والاب
ولكنها ظلت سنديانة صلدة ومتماسكة،
اسفنجية...
تمتص الاهات ولا تقهر
كانت امام الاحزان جبل
جبل من الصبر والصمود والحكمة
وعندما توفت امها جدتي ذهبت للتعزية من مهجري لموطني فالسيدة كانت بمثاسبة امي
هي فعلا امي
كانت تقول لي بركة بطني الشافتك قبال عيني
وجدت امي غير تلك التي عرفتها مثالا للصبر والايمان والقوة
وجدتها يلفها حزن عميق
حاولت ان تتماسك ولكن كان الحزن يطفح كل ساعة على محياها الجميل
وتغيرت وظل الحزن على والدتها يتملكها تماما
رغم انها كانت في حوالي السبعين من عمرها كان عمري امي؛ اما جدتي فقد تعمقت في عقدها العاشر وربما تجاوزت المية عام
ولكن تظل الام اما
حدثني لاحقا اخواتي ان والدتهن ما ان تسمع بوفاة في الحلة
والا تبدا البكاء من البيت تبكي امها وتظل هكذا في مكان العزاء تبكي امها
وظلت حزينة حتى لحقت بها
في تمام صحتها وجمالها ولكن
هدها الحزن وقتلها الفراق بعد سبع سنوات من غياب امها المرير
سبع سنوات عجاف
حزني على امي مثل حزنها على امها بل اكتر كونها عاشت مع والدتها زهاء السبعين عاما وربما اكثر
وانا تقريبا نصف المدة وكونها لم تفارقها ابدا طوال السبعين عاما حتى الفراق الاخبر
انا لم ابلغ العشرين بعد،
والا وغادرت امي ووطني وظللت هكذا بين مجيء وغياب حتى غادرت الوسيمة
وغابت للابد
واظلمت دنياي
ساكَن دمي هم

..................
هذه الوسيمة من تلك الاوسم)

عبدالمنعم الطيب حسن

05-07-2020, 05:08 PM

راكبين مرة في حافلة المغرب من بحري وماشين الحلة
الحافلة جلها بنات جامعيات يتكلمن كلهم بصوت واحد واحد دكتور عصام والمحاضرة
وفطرنا ليك وزملينا محمد وصاحبنا يسن البقرا احصاء
والقانون دا صعب والعجب لمحاسبة
المهم
في اعمامك اتنين راكبين في الحافلة ومتضايقين من كلام الطالبات الكتير دا
عمك واحد منهم نهر البنات
هوي يا بنات اسكتن صدعتن بينا
عمك المغيوظ التاني رد قائلا:
السكات حليلو

عبدالمنعم الطيب حسن

06-07-2020, 12:17 AM

شهوري الاولى في الرياض كنت شغال مدرس خصوصي،
اها جاني طالب بعيد وما عندي غير حق الذهاب بالمواصلات العامة من سنتر البلد لحدت بيت الطالب
ولا عندي حق الرجوع، توكلت ومشيت،
وصلت بيت الطالب وجاني ابوهو ودا امر طبيعي خاصة في اول حصة يشوف ويطمئن على الزول الحا يدرس ولدو ربما سنوات
وهذا ما حصل مع الطالب لحدت ما تخرج من الجامعة وكان وقتها في تانية متوسطة،
المهم ابو الولد السعودي بعد تعارفنا وقال لي خلاص شهر بكدة ياخ قربت اطير من الفرح لانو لو سالني كنت قتا ليهو نص المبلغ دا،
ولسا،
ما تكونوا نسيتو انو في جيبي مافي ولا هللة والمسافة بعيدة؛
تصدقوا الراجل دخل ايدوا في جيبو وطلع 500 ريال وقال لي اتفضل يا زول دا عربون؛
وشد حيلك مع احمد هو شد حيل لكن، الله يستر ما ينقطع بس؛
رجعت بي ليموزين واشتريت عشاء بروست للعزابة معاي في الشقة وحولت 100 ريال لامي؛
وقربتا افتري
ههههههه

عبدالمنعم الطيب حسن

06-07-2020, 04:54 PM

احكي ليكم
حدث في حافلة
1 من 2
ركبنا حافلة المغرب من الجيلي ووجهتنا بحري
مالك الحافلة وسايقا في نفس الوكت من الجيلي يعني ود المنطقة وبعرف اسودا وضبعا وناسا
وكنت عريس باين الحنة اي راكب يركب جديد يعاين ويتاكد بالحنة في ايدو اليمين وينبسط
كدة السودانيين ينبسطون للعريس والعرس
يلا شوية كدة جاء فريق كامل عاوزين يركبوا لحد السقاي 15 كلم او اقل وهم شباب وما حا يدفعوا؛ حتى مافي
جيوب يشيلوا فيها الفلوس اردية كورة بس الكمساري رفض السواق قالو خليهم يركبوا
ركب الشباب شماعتن واحسوا بالانتصار على الكمساري
سالتهم
بس يا شباب اوعى تكونوا مغلوبين؟
رد واحد بصوت منخفض: غالبين
والتاني تجاهل اجابة اخوهو قال:
والله يا عريس مغلوبين1-صفر لكن كان معاهم الهواء والحكم
المهم جو من المرح بدأ يتسرب للحافلة..
شوية كدة نزل الفريق وتنسمت الحافلة من الزحمة
في سيدة كدة كبارية (كما يقول الفاضل سعيد) وروحا حلوة استلمت الحافلة وحكت:ان الحرامي تلب علي بيت
حاجة كبيرة وساكنا براها
الحاجة صحت الحرامي قاليها: هسسسسسس ياحاجة
الحاجة ردت: هس عاد كيفن في بيتي يا ولدي!!!
يا ولدي دي كهربت الحرامي وكهربت الحافلة وركابا
(والكمساري ذاتو تابع القصة طبعا في العادة الكمساري لايتابع لانو القصص بتاعة الركاب لانها كتيرة)
واصلت السيدة الحكي؛
اها ذاب الجليد بين الحرامي وست البيت ؛ كما ذاب بين ركاب الحافلة
والحرامي ذاتو قعد على طرف سرير فاضي جنب الحاجة
وكلمة يا ولدي دي كسرت الرجل وقال للحاجة والله تاني ما اتلب بيت ولا اسرق حاجة
قاليك في النهاية الحاجة قالت ليهو:
شيل ليك حاجة بِسَيْطة كدة ما ترجع فاضي
رفض الرجل ان ياخد شيئا من الحاجة وغادر بالباب هذه المرة....

عبدالمنعم الطيب حسن

06-07-2020, 04:57 PM

حدث في حافلة 2 من 2

بعد شوية واحد عمل شكلة قال فوتوني محطتي بعد تعب اقنعناه ينزل والمسافة قريبة
والحافلة ترجع تاني للمحطة بتاعك القريبة صعبة
وانت شاب واصلا تكلمت بانك نازل متاخر
المهم نزل يطنطن
بعدا ناديت الكمساري وقلت ليهو:
انا نازل في المؤسسة الايه؟ المؤسسة
المؤسسسسسة
اوعك تفوتني
اهو كلمتك من بدري
عشان بعدين ما تقول ما كلمتني ومتاخر وبتاع
طبعا كنا تونا في االسقاي والباقي من المؤسسة اقلاها 30 كلم
الكمسار استغرب شنو المحطة البنبهو ليهو من هسا دي المهم
الكمساري قال للعروس:
العربي دا اقبضي فيهوشديد ما تخليهو براهو
بروح في البنادر دي
ههههههههها

................
في الحافلة كل الركاب احباب

عبدالمنعم الطيب حسن

07-07-2020, 11:16 AM

في تالتة ثانوي بعد امتحانات الشهادة السودانة
لفينا نحن دفعة واصدقاء
جبل اولياء لاصدقاءنا هناك، وقعدنا في بيت كل صديق يوم اي اسرة مشينا ليها ضبحولينا واكرمونا غاية الكرم
في جبل اولياء ديم البساطاب وفي الحلة الجديدة وفي ايد الحد وفي السلمانية
وكان البرنامج كالاتي كل واحد يقول بكرة المجموعة معاي وبعدها فلان حدد وحجز
بعدها السفر لعد بابكر والجيلي وواوسي بما فينا اولاد الجبل
وحلة بابكر شرق النيل الوحيدة النمنا فيها كلنا كمجموعة صالون فخيم واسع واسرة يا ما
اما في الجبل وواوسي والجيلي اولاد اي حلة يتونسوا ويغادروا ليلا لبيوتهم
وكل المجموعة جاءت الجيلي وواوسي وكانت لفة طويلة المهم
في كل بيت نقيل ونبيت ونستانس وقد يدور الوست نهارا
والعصروبالليل نمشي
النوادي ونلعب كرة طايرة ووست
اي بيت ضبيحة يا رجل انبسطتنا واتنونسنا وقربنا نسمن هههها
المهم في واحد لافي معانا المناطق دي كلهم ومستلم الونسة والتنظير
اها باختصار ما وجه اي دعوة للقروب
مع انو وضع اسرته الاقتصادي احسن من اي اسرة زرناها لكن الفسل دا كعب ياخ
تصدق لسا الاصدقاء ديل متواصلين كلهم
لا منعنتنا الظروف من التواصل لا فرقتنا محنة
الا صاحبنا دا انقطعت علاقتو بالشباب
والغريبة بلاقيني كتير ويحاول ينعش العلاقة
ويستانس معاي
طبعا انا كزول( قديم) بمشي معاه
الزول دا قد يكون عندو اصدقاء اخرين
واسرة واحباب
انا لا اكرهه
ولكنه ليس صديقي
.........
معظم السودانيين ان لم يكن كلهم كرام وبشيلوا فوق الدبر والدم
ولكن النوعية دي موجودة في السودان،

الصفحة دي الاصعب تحريرا في نهايتا وترتني عديل كدة
لكنه ملمح من الحياة لابد من المرور عليه
شكرا خالد
....................
الفسالة بطالة

عبدالمنعم الطيب حسن

07-07-2020, 07:28 PM

خصمي في تالتة متوسطة، يعتقد انه رجلا... مع انه مازال طفلا بعد؛
انا في تانية ثانوي،
ما أطوِل عليكم،
تعاركنا في التمرين، ركلست مع بعض اقراني في ذات الميدان، وقعدنا نتونس، كنت قد نسيت موضوع الشكلة التي لتوها،
لكن زولي الظاهر ما كان قد نسى، مشى بيتهم البعيد عن الميدان، وجاب عكاز ابوهو المضبب،
ونحن في غمرة ونستنا جاء الولد، وقبل ان يصلنا انذرني قائلاً : يا زول استعد انا جيتك...
وقفت مع الشباب الموجودين، على حيلي، الولد لا يحتاج لاستعدادات ذات بال،
فهو اصغر مني عمراً، وحتى عندما كنت في عمره، كنت اطول منه، فهو قصير القامة خفيف الجسم وقتها؛
لا اتذكر عميقا التفاصيل حول نهاية الشكلة التي كانت سريعة، فواضح ان الحجازين هم اقراني، سرعان ما سيطروا على الولد والعكاز المضبب،
لم اكن مندفعا في الشكلة، فالولد اصغر مني، وكنت ارى المسالة برمتها عيب،
كان يمكن ان يغدر بي، ولكنه لم يفعل...
اكبرته حينها، وما زلت
لا ادري، ان كان صديقي خضر الشيخ ادريس خضر؛ يتذكر المسالة،
لم نتخاصم ابدا، ولم نتذكر هذه القصة ابدا خلال ونساتنا الطويلة الجزيلة، الممتدة لاحقا؛
عندما تلاحقت الكتوف،
ولصديقي خضر التحية، اينما كان.....

عبدالمنعم الطيب حسن

08-07-2020, 11:29 AM

عوض ود فطين المكي
استاذ منعم لك التحيه...
مبدع في استدعاءو تداعي المعاني والعاطفه متي شئت...
ولعل ذلك امتداد طبيعي ورافد لشلال الابداع الذي يجري في اسرتكم الكريمه من نباهه
..وشغف بالعلم والمعرفه..والشعر الذي انعكس في سلوك افراداسرتكم...
والنظره التفاوؤليه ..والاستماع باللحظه وبما هو متاح من مباهج الحياة..
وجبر الخواطر ..هو مالمسناه خلال استمتاعنا بالتعامل معك عن كثب..
قيل أن والدكم شاعر مجيد...اكد لنا هذه المعلومه...
اراك تذكر كثيرا ذكرياتك بمصر..ولعلها لها الاثر الكبير في تكوين شخصيتك...
وتخلق ماتؤمن به من افكار ومعتقدات..لكن لم تتعرض لذكريات وقصص..السعوديه..
عموما لك التحيه ...ومتابعنك...
ملاحظه بسيطه تداعي الذكريات وشلال العاطفه في حكاويك طغي علي اللغه......

,,,,,,,,,,,,,,,,,,,,,,,,,,,,,,,,,,,,,,,,,

و وبعدين حا اجيب ردي عليهو لاحقا
خليكم قراب
ما تبتعدوا

عبدالمنعم الطيب حسن

08-07-2020, 10:56 PM

هذا ردي لصديقي عوض ابراهيم
كما وعدت في المداخلة اعلاه
وكل الاخوة والاحباب
وكل من تورط في هذا البوست ووصل هذه الصفحة

(هلا عوض صديقي واخوي عارف في مسالة لغة الكتابة دي ما قاعد ابذل فيها جهدا كبيرا
ولا صغيرا بكتب هكذا عفو الخاطر
بكتب مباشرة من الكيبورد للصفحة وما قاعد اراجع خالص الا الاخطاء الاملائية الفادحة
للسرعة في الكتابة ودائما اركز على الفكرة او الموضوع او ما اود توصيله
لذلك تظل اللغة وسيلة لتوصيل الفكرة وليس غاية في حد ذاتها
ومرات اكتب بدارجية قحة لانو المقام هكذا
كتاباتي اقرب للونسة في ضل ضحى والدنيا جمعة
او انت راكب المواصلات ماشي للبلد
او في اي مناسبة اجتماعية تجمع الاهل والاصدقاء وبتونسوا
هذه مصادري للكتابة اكتب لهم وعنهم وبهم وبلغتهم
نعم ابي شاعر مجيد كتب شعرا مترع بالانسانية وصفاء تلك الايام بدت في جمعه من افواه الحفظة
واتمنى تدوينه وحفظه هذا تراث اعظم من ان يضيع
بل ان الاشعر من ابوي هو عمي شيخ ادريس فهذا الرجل فلتة زمانه اتمنى برضو التدوين لهذا العظيم
الغريبة نحن الابناء المباشرين لابوتنا الشعراء لم نقرض الشعر
كما يفعل ابواتنا عدا محمود اخوي
والاغرب ان الجيل التاني من الاسرة اولاد اخواننا واخواتنا شعراء مجيدين
امين وعارف واسامة ونسيبة والدكتورة ريان وبدرالدين الامين
واحتمال في تاني بس ما بلغونا)

عبدالمنعم الطيب حسن

09-07-2020, 05:37 PM

اقرا هذا الكلام كتبته قبل نحو سبع سنوات عن صديقي احمد حللي

( قبل التوغل ،
بعد الاذن ...
كلمتين في الخاص ، لصديقي هذا ...
لو قدر له ، وتورط حتى هذه الصفحة

( هي تحية لك ارقرقها كالمسك ينفح من تامورك العطر
ان رضيت بها ارفعتني فوق السماكين بل في هامة القمر
وان زللت-وكم من منطق زلل-فاغفر لملتمس عفوا ومعتذر)

هاله من الاشراق هذا الرجل ،
ليست كنار المجوس ، تضيء لساعة وتموت ...
ولكنها هالة الحب ، من المهد الي اللحد تشع ...
هو هدوء البحر عند شروق شمس ....هو اشتعال الشمس في ميلاد عرس
حسب درويش ....

بين هدوءه ، وعند الاشتعال لايترك لك فكاكا ،
مشرقا دائما .....
لم ارى في حياتي كارزيما بهذا التجلى سوى هنا ،
كنا نسيمه القديس ...
عالي الانسانية ، وهيطها ؛
اقل قصة فيها تراجيديا ، ممكن يصدع ويتوتر ...
واي مشكلة عندو لها حلا .....

عشت مع الرجل مواسم الفرح كلها ؛
ولحظات الحزن الحزين جلها ؛
جمعتنا شقة واحدة ، سنينا عددا
الاتنين فقط ...
ولم يكن الشيطان ثالثنا...
راسا لراس ...
فيس تو فيس.....

حتى انني تحفظت ، ان اكتب عنه ، خوفي من الا اوفيه حقه ....
فالرجل اكبر من أي كلمات .....
واخاف ان تنحاز عاطفتي ،
فتضيع الحاجات ؛
صديقي ، واحبه بلا تحفظ ....
تصدقوا كنا نخبي عنه الماسي ، ونائبات الدهرحولنا ...
لا نريد ان نوتره ، وعندما يعلم شكلة ليها ضل ...
ويلاحق ، ويستلم الامر ، لا يفرض نفسه ، ولكن تقدمه
الاريحية ، والانسانية ...
وينطلق ، لا يلوي ...
... ويحلها ...
.......
كانت شقتنا ، ملتقي الطلاب ،والطالبات ...
ابناء العمال ، من عطبرة وسنار ...
ابناء المغتربين ، من الخليج والبحرين ...
ابناء المهمشين ، من دارفور والدمازين ...
حتى ناس من هناك بجونا ؛
ونحن المحسوبين بجاي ..........
اختلفنا مرة ، وانا الغلطان ، وسامحني كام ...
وكأن شيئا لم يكن ، وبراءة الاطفال دائما ، في عينيه
...................................
عندما يغني بخاف اسال عليك الناس ...
تسري طمانينة عجيبة وسط الحضور ....
يعزف على العود ، كمحترف ، تعلمه في سجنه السياسي ...
الرجل مهموم بقضايا الشعب ...
ليست لديه ، انصاف حلول ...
دائما في العلالي................

ملاك يداعب احلام العذارى ...
والمسحوقين ...
عنوان للوفاء ...
حلم تشاهده العيون في ساعة صفاء ...
يحب زهر البنفسج ....
يحب اللون الابيض ....
برزخ بين السهل والتل ....
وفي افقه تصدح الكناري ،
والنجم انيق ....
و.....)

عبدالمنعم الطيب حسن

10-07-2020, 04:54 PM

يعد الدكتور محمد جعفر محمد الفاضل،
واحدا من أكفأ واندر واشجع والطف؛
السياسيين الذين قدمتهم الحركة الطلابية بمصرا العظيمة،
وقد شرفتني الظروف ان اعمل مع الدكتور محمد جعفر وجها لزميل،
فعندما كنت برلوما، كان الدكتور على وشك التخرج،
فلرجل طاقة جبارة للعمل المتواصل؛ فهو يخرج من اجتماعات الخلية،
ليدخل اجتماعا لمكتب المجال، وبعدها ربما اجتماع المركزية،
ثم اجتماعات اللجان السياسية التي لا تنتهي الا لتبدأ،
والرجل متحدثا رئيسا في معظم الندوات التي تقيمها التنظيمات السياسية في المنصورة،
وكادرا لا يشق له ركن؛ في الجمهورية من مدن القناة حتى مدن الصعيد،
حتى اسكندرية كمان وكمان؛ وفي القاهرة...
له حضورا طاغيا ومحببا ومحبوبا...
للرجل كاريزما لا تخطاءَها العين ولا الاذن، ولا العقل؛ وله جماهيره في كل مدن الجمهورية؛
لقد شهدت بعيني الدكتور محمد جعفر يخطب في الطلاب عز المطر عز البرد،
لا الطلاب غادروا؛ ولا هو سكت حتى تم موضوعه...
للرجل طاقة للعمل جبارة...ولم تجزله جماهير المنصورة،
فقد خرجت المنصورة على بكرة طلابها وطالباتها، بكيزانها، وديمقراطييها، بانصار سنتها،
وفلوترييها، باتحادييها وحزب امتها...
كلهم خرجوا وجاءوا لمحطة القطار في وداع محمد جعفر محمد الفاضل،
حتى ان المصريين الموجودين في المحطة استغربوا جدا ،
فقد كان الوقت صباحا؛ وقد تجمع كل السودانيين في زمان ومكان واحد لوداع واحدا من الرموز المنصورية،
وسواق القطر استغرب والكمساري، وربما القطر نفسه...
شكرا لطلاب المنصورة الاروع؛
مرة تحدث الدكتور الصادق حسن قائلا: ان لديه ارقام عندما تصل ال13 سيموت كل السياسيين السودانيين،
واولهم محمد جعفر،
هذا الكلام قبل ربع قرن من الزمان،
يبدو ان الرقم اللعين ال13 لم يكتمل، الدكتور محمد جعفر محمد الفاضل؛
ما زال بخير، وجي يرزق،
يربي اولاده في هدوء وسكينة،
له التحايا والتقدير في اي ارض وتحت اي سماء،
وله نرفع طواقينا فوق ومعاها عممنا،
فالرجل اسطورة وقامة واستقامة؛ واجمل ما يكون...
شكرا؛ لكل من مر من هنا...

عبدالمنعم الطيب حسن

11-07-2020, 01:25 PM

(( لقد لفت نظري هذا البوست لتفاصيل محفورة في الذاكرة
و يجب ان ندونها في الورق))

نعم اتذكر غالبا تفاصيل التفاصيل؛ حول اي موضوع او نقاش او حكاوي؛ منذ طفولتنا الباكرة تلك التي عشناها بين حقل وجدول
حتى كهولتنا اللاحقة تلك التي ما زلنا نكتوي بنيرانها في مغترباتنا
امنياتي عودة كل طيورنا المهاجرة لاوكارها الحنينة وكل منا يحلم بالرجوع
لوطن القماري؛
هذا الامر احيانا يزعجني كون ذاكرتي بها تفاصيل التفاصيل لاشياء لم تكن مهمة ابدا
الحاجات المفيدة بحاول اسكبها هنا لعلنا نستفيد منها ذكرى وشجن وذاد؛

((كثير من تفاصيل الحياة الصغيرة تتلاشي و لا يدرك معناها
الا من يتمنع ب حصافة شديدة.))

هنا نحاول ان احول ما اره مفيدا من ونستنا وحكاوينا وققصنا من روح المشافهة لريحان التدوين
وهو امر به ارق وشطط كوننا تعودنا على الاستماع اكتر من القراية ام دق كمتلقين
والعظيم محمد ابراهيم نقد قال محفزا على الكتابة والتدوين قال فيما معناه
ليس القراية ام دقن ولكنها الكتابة؛
(( العزيز عبد المنعم يبدو أن دفتر مذكراتك فيهو الكثير و المفيد))

اووووه انها رحلة عمر يا صديقي منذ طفولتي الباكرة وقد قلت لصديقي انني اتذكر ميلاد اختي
التي اعقبتني بنحو تلاث سنوات مفتخرا بذاكرتي القوية
فقال لي :عادي وانا بتذكر لما كنت برضع هههههههه

بابكر مخير

11-07-2020, 05:27 PM

عبدالمنعم الطيب حسن

12-07-2020, 12:25 AM

نعومي يابا
لقيتني إتقرصتا وأعاين أشوف وإتذكرت شريط بتاع قريصي جد..
* واحد شاطر في الإنجليزي وإحنا في الوسطى وقاعد في منتصف الصف الأول يعني مدرس اللغة الإنجليزية لو قال ما يعبرهو بنغسب أنهو يعبرهو لأنهو في المطالعة من بوك ون ياهو هو براااااااهو البيرطن.. أها جابو لينا ود سفير السودان في لندن بعد عودتهم النهائية والشافع ما ببالغ لو قلت المدرس ظاتهو بقى يلج.. صاحبنا بتاع الصف الأول إنقرص ورجع معانا الصفوف الخلفية...
* ولد من حلتنا لمن نلعب كورة الشراب، بيجضم ليك الكورة دي وتقول بس لازقها في كراعهو ما بيفكها إلا قون. كبر وفي الثانوي شافهو ليك ناس الأندية الكبيرة.. الشافع أول مبارة المدرب لعبه رأس حربة وجاب ليهو هاتريك.. بدلوهو في الدقايق الأخيرة بهداف التيم الأصلي وأول ما نزل جاتهو فرصة إنفراد بالقون شات وطفش القون المضمون والجمهور يعجبك. صفافير وهتافات نوع عامل لينا حافظها وناس الإدارة يتغامزوا! قالوا: عايز شنهو قال، نشتري ليهو قطعة أرض والله قطعة قماش لي جلابية كتيرة عليهو. صاحبنا من أساسي بقى إحتياطي ومن الدرجة الأولى نزل الليق وعفصة عدوك.
يابا كتييير الإتعفصوا لمن يتجلى نجم أصحاب القدرة الفذة..
دحن حسي عمك، نااافخ أني عملتا ليا كمين الف مشاهدة في قريب العشرة سنيين وجيتني يا ود السفير ويا بتاع الثانوي صاحب الهاتريك في شهر فتا الألوف...
لك إعجابي بملكتك وبي جميل حكيكا والحلو قولك..
بس خلي بالك ما حأنقرص لأنهو الكُبر متلازمتهو جائحة الليقنة..
محبة وشكر :L:L

الدكتور بابكر مخير
انتوا اهل الجلد والراس ياخ
وانا ضيفكم في بيتكم الكبير
كيفك يا صديقي لعلك والاسرة بالف صحة وسلام؛
فرحة لا تدانيها فرحة عندما تصفحت المنبر بعد سنوات
ووجدته ما زال فاعلا؛
وعندما تصفحت فرحتا تاني وسعدت ايما سعادة عندما وجدت اسمك لامعا ولكنه مضيء بحلو الحديث وجميل السمر
لمع اسمك من ضمن كتيبة احبابي في سودانيات زي سيف مرصع وسط النجوم
كتيبة سودانيان بداءا باستاذنا المثابرالدكتور حسن فرح وليس انتهاءا بالربان عكود
وما احاول اتجمل ساقول الحقيقة سعيد جدا بنسبة العالية
فقد سحبتني فابرقتني وارعدتني ثم امطرنتي نشوة وحبورا
ان سودانيات ما زالت بخير ومنبرمقروء شديد
شجعني هذا على مواصلة البوست
ولسا الباقي كتير
شكرا يا دكتور لكلماتك المحفزات
وستجدني ان شاء الله دوما هنا فهذا بيتي الاوعنو تاني ما بتحول....
.....
وهدية ليك المداخلة دي

(( لكن العارفو إنكـ لمن تقعد في التاتشر بتكون صعب خلاص))

ههههها داك تاتشر القصف بتاع زمان ياخ
اصلا الواتساب غير فهو اقرب لمشاكسات الاصدقاء
ومعظمه نيران صديقة تصيب بعض الاصدقاء وهنالك التجاوزات كون
المساحة اضيق الاحتكاك اقرب وكلهم مية والنشيطين عشرة
وكل قصف مركز في السياسة ومرات في رايش في اللحم الحي ردا على تفلتات
والسياسة غالبا حادة وما فيها جبر خواطر
وبرضو شتتناها ليههم حفاظا على ود الاخاء ياخ
وخوفا من الكلمة الجارحة البتمرق غصبا
لكن على المستوى القريب والتعامل اليومي والطويل
تجدني زول كيوت(فيصل محمد صالح) بس
واحب الناس ياخ
ودمعتي من يوم ما ماتت امي بقت قريبة
اجد نفسي وسط اللمات رغم اني لا اتحدث كثيرا
ولكني استمتع
وفي واوسي نتلم كل الاهل والجيران وزملاء الابتدائي ولاحقا
ونضحك لمن بهناك
ونديها موية وتدينا طراوات
وبرضو مقصر الظل الاجتماعي
ومتقوقع قليلا
وكل وكتي الفاضي احاول ان اوزعه بين الطيب وفاطمة

بابكر مخير

12-07-2020, 08:11 AM

حاشا وتب ماك معني بي النص الماهو حقك
لكني حقا قاصدك في كلمة قالت
شكراً
شكراً ليك ديمة
وشكراً
لي جنتنا دي ونعيمها
شكراً
لسودانيات وليك وليهم
محبة من جوووووووا القلب
واصل خليني أنقرص، أتكرنر وأتفرغ للتمتع بي قولك

https://www.youtube.com/watch?v=rDtA4mGTMs4

عبدالمنعم الطيب حسن

15-07-2020, 10:36 PM

محمود اخوي مع الخالدين،
غاب من كان في مقام الاب، من كان يونسنا بلطيف الحكاوي،
وكنا نسهر حوله عندما ياتينا من اضوبان حيث بيته واولاده مع اعمامنا هناك
ولكنه لابد ان ياتي في الحلة دائما وكثيرا؛ خاصة خلال حياة والدنا؛
وخلال التلاتين عاما الاخيرة من وجودي خارج البلد؛
حضوره حتمي حال عودتي في اي اجازة ونكون تلك الايام موعودون بسهرات في البيت الكبير مع اخواته،
قلبي مع اخواته فتحية وعشة ومريم وبخيتة،
لابد انهن اليوم يتقطعن من الحزن العميق...
فالرجل اساسي في مجلسهن طوال العمر،،،
له الرحمة بقدر انسانيته ولطفه،
توفي اليوم بواوسي التي ولد بها نهاية التلاتينات الميلادية،
وعاش بعيدا عنها اكثر من ثمانين عاما وعاد اخيرا؛
ليموت فيها....
https://www7.0zz0.com/2020/07/16/00/300122333.jpg

عبدالمنعم الطيب حسن

15-07-2020, 11:19 PM

انشغلت خلال الاربعة ايام الفاتت بوفاة اخوي الاكبر محمود يوم الاحد 11-7-20
له الرحمة فقد كان عالما وعلما لطيفا وزكيا ولماحا
وشجاعا وكريما وفخورا باخوانه وسعيدا بينهم ومعهم
ولكنها الدنيا :confused:
وبرضو اللابتوب بتاعي ضرب :mad:
فكأن المصائب لا تاتي فرادى
تحياتي لكم جميعا

عكــود

16-07-2020, 01:06 PM

رحم الله أخيكم محمود وأحسن إليه وجعل الجنة مستقره ومتقلبه.
أحسن الله عزاءكم يا عبد المنعم وجعل البركة فيكم وفي ذريته.

هذا حال الدنيا وما الدائم إلا الله ولا نقول إلا ما يرضي الله، إنا لله وإنا إليه راجعون.

بلغ تعازينا لكل الأهل ولا حول ولا قوة إلا بالله.

عبدالمنعم الطيب حسن

16-07-2020, 10:44 PM

القصة دي وانا في الابتدائي عديل كدة
يعني زمانِك شديد
امكن سنة 1980 او حولها
جاءت ام سلمة وهي طفلة اصغر مني
كلمت ناس بيتنا انو كمال وقمر غرقوا في البحر
طوالي اخوي الكبير تحرك نحو البحر
وانا مشيت معاهو
وكنت متخيل انو الزول البغرق ما معناها مات
ولكنه غرقان حا يلقوهوا وامكن يعاقبوهوا وانتهى الموضوع على كدة
تاكدت مع الموت لما شفت اخوي بشيل في الفاتحة مع اهل الشهيدين
وشفتا ناس ببكوا
سنة 2010 او نحوها تزوج صاحبي صلاح اخو الشهيد قمر
وصيت صاحبي ان جاءه طفل ان يسميه قمر
وبعد 9 شهور ويومين بالضبط جاء ولد وسماهو صلاح قمراً
بعد فترة باركت الولد لصلاح وسالته عن اسمه
ضحك صلاح وقال لي بقيت نساي يا فردة
الولد سميناهو قمراً على حسب اقتراحك
قمر الان في رابع ابتدائي او نحوها
ومريخابي متعصب زي ابوهو
وعمو كوري

عبدالمنعم الطيب حسن

17-07-2020, 07:49 PM

هبطت المنصورة حافظا لكل اغنيات محمد الامين ووردي وجزءا مقدرا لصلاح بن البادية وزيدان
وعبدالعزيز المبارك وزيدان وسيد خليفة
وملقط روائع من هنا وهناك لفنانين سودانيين مبدعين
ومكتفي ومتبشع
يقوم يجيني ابراهيم النعمة الحي وقاعد دا وعضو هنا في المنبر
يكتب باسم ابراهيم النعمة بالانجليزي
يجيني شايل شريط لمصطفى سيد احمد وفيهو اغنية لمحتك
يا زول اسمع وحا تنبسط
وهو جنس انبساط عاد
من يومها خلاص صار مصطفى سدرة منتهاي وجيلي
وجاء وكت حفظنا فيه كل اغنيات مصطفى التي تصلنا
وكان ابراهيم يجمع الروائع ويحتفظ بالاغنية حتي يحفظها ويجي يغنيها لنا
لابراهيم صوت عذب وبعداك يفك المسجون
ونسمع الشريط
جلبتا ليك من بلاد الله البعيدة صنوف من الوجد الملح
قتا القاك والسمح كتا اصطاد في الظهيرة من مناقير الكلام
بوصلات سكك الاغاني
ولما الاقي اللون ادسو
لما يغرس فيني حسو
لملقاتك هدية واتفقد الرعش المعبا في ايدي
وبعد داك بقينا نفتش لشعراء ابوالسيد
من يحيى فضل لعاطف خيري
لمحمد شمو لمريخا
لحميد وللقدال
للمفردة الجديدة والفن الجديد
لاحقا صار مصطفى رفيقنا في ليالي العمرة في مكة والمدينة وجدة
ولاحقا في ليالي الاغتراب في الرياض والدمام واستراليا وكندا وفي السودان واليمن وليبيا
وفي بانكوك الفتية
احكي عن جيلي
شاركنا المشاعر والظلم والجوع
شاركنا الحب والثورة وحب الوطن
اعنقد انه في تلك السنوات القاحلة كان مصطفى هو المعادل الموضوعي للترابي
كان هو العز والكرامة والشموخ والوطنية
الحديث عن مصطفى يطول وقد اعود تاني كون مصطفى كان هو الخلفية لكل حركاتنا وسكناتنا
نلف نلف ونلف وفي النهاية نرجع نستكين مع مصطفى
ونحلم بالحرية والديمقراطية وعودة الوطن
هذه الاغنية اول من سمعتها للاستاذ
قبل استمعت غدار دموعك والسمحة قالوا مرحلة
ولكن تظل لمحتك هي نفطة التحول الكبرى في انععطافي نحو مشروع مصطفى الثقافي برمته..... ساحاول ان انزل الغنوة كم اليويوب
استمتعوا بلمحتك تحياتي

عبدالمنعم الطيب حسن

18-07-2020, 03:03 PM

لما جات فطومة للدنيا دي...
كنت وما زلت الاسعد بها على الاطلاق؛
كانت امي تقول يارب تجيك بنية وانت بتحب الاطفال؛
كتبت لصاحبي يوم الولادة جاتنا البنية السندسية حلاوة لبن
كلم مرتو قاليها ناس منعم جاتم بت وسموها سندس هههههها
المهم امها تعبت شديد لحظة الولادة واصلا الولادة مرهقة
اها انا شفتها منهارة من الارهاق ومن التعب ومن الاعياء
وطبعا هي مدام حضرتي وانا حافظا وعارف البرضيها شنو
بحكم العشرة
اها قلتا ليها:-
ولا يهمك يا اميرة بكرة فاطمة دي تبقى ليك اخت وصديقة ورفيقة
انهارت سحابات الحزن من وجه الام الجميلة....
واختفت سمات الارهاق وعادت ملامح الهدوء والسكينة والارتياح
تلف وجهها الوسيم؛
وسرحت تحلم بان تصبح فطومة كبيرة؛
الان الحمد لله فطومة صارت اساسية في المطبخ مع امها
وعندها ابتكارات وطبخات وحلاويات بتعملا من النت
بس بتطلب حاجات غالية وما معروفة زاتو كتير هههههها
لكنها فنانة ورسامة وبتترنم
وايدها طاعمة
وحنينا ونفسا حلو
واجمل هدية من رب كريم
فطومة على وشك الولوج لمرحلتها المتوسطة
وشاطرة في الدراسة

عبدالمنعم الطيب حسن

18-07-2020, 11:00 PM

https://youtu.be/cpiA8bFS93g?list=RDcpiA8bFS93g&t=13
.......................
واخيرا نجحت في تحميل غنوة لمحتك...
كان سكة دخولي لعوالم مصطفى سيد احمد
تلك الحالمة؛
استمتعوا بالغنية العذبة؛

عبدالمنعم الطيب حسن

20-07-2020, 10:01 PM

وهاكم هذه القصة من اهلنا الطيبين على ضفة النهر؛
النهر العظيم

عمر صاحبنا؛ جاءته فرصة للدراسة في مصر؛ ولكنه في الاجازة يرجع مزارع ابن مزارع
اهلنا في الجروف بعد ان يحصدوا المحصول الرئيسي في الموسم الشتوي ؛ نفس الارض يزرعون عليها عيش ريف
يسمونه القنقر(يمة قنقري وين)كما تساءل ذلك المعتوه؛ المهم هو ذ ذاته
ولان دورة حياته قصيرة وتكون التربة المحصود منها المحصول لتوه ما زالت رطبة وندية
فيعدولنها خفيفا بالطواري وينثرون حب القنقر الذي هو الفشار قبل ان ياخد نار
ينثرون الحب على امتداد الارض؛ ولان الطيور قريبة ومتحفزة تاتي لتاكل من البذور الجاهزة
لاخفاء البذور تحت الارض ياتون بغصن شجرة ضخم ويضعون عليه احجار او طوبات يسمونها التقَّال
وهي موضوعة على غصن الشجرة ويلفون بها على البذور المبثورة لتوها
فتتغطى بالتراب اللين وتقل فرصة ان تاكلها الطيور القريبة صديقة المزارع
اها صاحبنا عمر بمجرد ما يبعد من ابوهو يرمي الطوبات والتقال فيصير غصن الشوك خفيفا
ولكنه لا يغطي البذور بالتراب اذن مافيش نتيجة
ابوهو البعيد يعرف بحكم الخبرة ان الحركة بتاعة ولدو سريعة معناها رمي التقال
فيقول قولته الشهيرة:
يا عمر هووووي خت التقال
ما تلف ساكت في الفاضي
فاصبحت مثلا في حلتنا يُقال ان فلانا رامي التقال ولافي ساكت في الفاضي؛
وعندما جيت للغربة اكتر من صديق وصاني
خت التقال وركز ما تلف ساكت في الفاضي وتجينا ساكت فاضي؛
ههههه

بابكر مخير

21-07-2020, 03:01 AM

وعندما جيت للغربة اكتر من صديق وصاني
خت التقال وركز ما تلف ساكت في الفاضي وتجينا ساكت فاضي؛
ههههه

نعومي
الغربة وما الغربة..
من الأقوال في السودان لما تكون داير تتملك ليك شئ غير معروف بواطنهو وداخلهو بيقولوا: ذي البطيخة.. ما معروف من جوآ حمرآ ولا بيضاء وحلوة ولا مسيخة..
أها الغربة بطيخة، منها يا رجعتا غانم وعرستا وبنيت الفيلا الماخمج وإشتريت ليك واطة وزرعتها ولا رجعتا خالي الوفاق وكل المفروض تتدخرهو صرفتهو قبلك، قراية للوليدات ودهب للمراة وسابتك...
بس في عامل مشترك ذي ما البطيخة كان حلوة ولا مسيخة، بيضاء ولا حمرآ لي سيد المصران بأليافها بتفقع مرارتهو ومن الغربة بعد ما ترجع المرارة إن ما إتفقعت بتورم..
لو كان أكرم لساتهو قاعد، كنت طلبت منهو يعملوا دراسة في حالة العايدين من الإغتراب ونسبة الأصحاء من المعلوليين...
ربنا يابا يردك من غربتك..
سالم وغانم، شديد وعافي....

عبدالمنعم الطيب حسن

22-07-2020, 10:47 PM

نعومي
الغربة وما الغربة..
من الأقوال في السودان لما تكون داير تتملك ليك شئ غير معروف بواطنهو وداخلهو بيقولوا: ذي البطيخة.. ما معروف من جوآ حمرآ ولا بيضاء وحلوة ولا مسيخة..
أها الغربة بطيخة، منها يا رجعتا غانم وعرستا وبنيت الفيلا الماخمج وإشتريت ليك واطة وزرعتها ولا رجعتا خالي الوفاق وكل المفروض تتدخرهو صرفتهو قبلك، قراية للوليدات ودهب للمراة وسابتك...
بس في عامل مشترك ذي ما البطيخة كان حلوة ولا مسيخة، بيضاء ولا حمرآ لي سيد المصران بأليافها بتفقع مرارتهو ومن الغربة بعد ما ترجع المرارة إن ما إتفقعت بتورم..
لو كان أكرم لساتهو قاعد، كنت طلبت منهو يعملوا دراسة في حالة العايدين من الإغتراب ونسبة الأصحاء من المعلوليين...
ربنا يابا يردك من غربتك..
سالم وغانم، شديد وعافي....

انعل ابو الغربة ياخ؛
عنك بعيدا ابيت الرحيل ولكنها الظروف الاقوي مني ومنك يا جميل....
يا الغربة ان شاء الله تعقري
تعدمي الشك الخدري
تعدمي القرش الفقري
كان شلتي العيال من بدري...
لو كانت الغربة رجلا لقتلته؛ وهي توأم الفقر السيامي؛
الغربة صعبة والعيشة برة الوطن ميتة ممرحلة...
نحن نحلم بالرجوع
اي مغترب يحلم بالرجوع؛
لمرافي الصبا؛ ومحطات الطفولة الرائعة
هل من عودة هل؛
يا دكتور بابكر
اهديك الكلمات ادناه كتبتها لصديق عزيز طلب مني الاستمرار في البوست وعدم التوقف

صاحبي زوجتو اسما يسرية محمد الحسن، هو اسمو عبيد،
اها جابو ليهو بنت، قلت ليهو سميها نبيلة... نبيلة عبيد؛
انتم اسرة فنية ياخ....

خليك قريب
انا اصلي ممهول مرتين؛
ومع الكورونا دي البوست ممتد بس نلبس الجونتيات
وصابييييها هنا
بستفيد من لابتوب الشغل من بعد، المنزلي قاليك نسرق الخط ونرش ذكريات وحكاوي القهاوي
طبعا حضرتي
حركتي تقيلة وبجي في الحفلات كاخر معزوم،
رمضان قبل القبل الفات حضرت منو جزء في السودان
اها معزوم فطور في الفكي هاشم على بعد اكتر من تلاتين كلم
اتحركت بالعربية صاحبي شايل فطورو ماشي على الشارع
قال لي حلل الصيام وامشي
عطلونا ناس الشارع يقيفوا قدام العربية؛ ويصروا ننزل
المهم وصلنا على قريب التراويح هههههها
بموت في الابري الاحمر الحلو مر ياخ
وبشربو عادي كدة بدون الموسم حتى
المرة دي عانيت؛ المطارات مقفلة
عمي وزوجته اول مرة يسافروا ويركبوا طيارات جوا حج
عمك قالي الحاجة دي ويقصد زوجته
اتفلهمت علي في المطارات دي فلهمة شديدة
رجعت الحلة تحكي دخلونا المجارك ومرقونا من المجارك
ود بتها قال ليها
والله يا حبوبة هسا لو سموها المجارك
كان قلتي الجمارك هههههه
المهم خليك قريب
قريب دنياي
قريب الله الجعلي
قريب فرت
غريب والغربة اقصى نضال

: اها جايين في الذكريات، التي هي صادقة، ونبيلة...نبيلة عبيد
ولسا في قصص وحكاوي من القلب للخاطر للشارع
الشارع المليان غلب دقست قوافلو
مع السراب رابط جليد الهم سعن محزوم خشيمو من الصبر راجى السحاب.

لسا ونص وخمسة

عبدالمنعم الطيب حسن

23-07-2020, 05:09 PM

عمنا حسن زول سوق؛
اولادو في ليبيا رسلو ليهو قروش عشان
يشتري حافلة كاستثمار للاولاد ولمصاريف الاسرة في البلد الصعبة دي...
قالهم بلحيل استلم الفلوس وختاها في اخر ركن في البيت
وبلغ زوجته فقط وام الاولاد بمكان القريشات كاحتياطي لاي ظرف طاري
المهم عمنا طوال بدأ سرا في رحلة البحث عن بيت
وفعلا لقى بيت ممتاز وسعرو قدر القروش المعاهو طق طرق
لم يتردد لحظة واشترى البيت وعمل اجراءات نقله باسمه
في ظرف زمني بسيط
واولاده ما زالوا يتسألون عن الحافلة
المهم بلغهم انه اشترى بيت
الاولاد انبسطوا للبيت ولكنهم تسألوا وين الحافلة يا ابوي
رد عمنا بكلمتين قصار ولكنهم مليانات
قال ليهم:-
انا حاجة بِتَنْقَلِبْ اصلي ما بشتريها
................
نظرية عمنا طلعت صاح
البيت ذاتو لاحقا فكوهو لبيتين للولدين الرجعو من ليبيا
هسا ماشاء الله اخر ترطيبة في البيتين الملك في المدينة
محل عملهم بعد الرجوع من الاغتراب؛
...............
الحافلة جافلة
العقار راحة بال

عبدالمنعم الطيب حسن

24-07-2020, 01:23 PM

والفكرة الاساسية من البوست هو ان نستفيد من التجارب والحكاوي والقصص
وما فيها من حكم وعبر وخيارات
حتى لا نقع في نفس الاخطاء...
اول حاجة عملتها في اول سنين اغترابي ان بنيت بيت حقي في حوشنا الكبير وانا بعد عمرة بدون فيزا عمل رسمية
بيت عادي زي بيوت ناس الحلة
ماشاء الله الان اجمل اوقاتي خلال اجازاتي السنوية
اقضيها فيهو خاصة بعد ان كبرت الليمونات واثرت واصبحت الحديقة ملاذي غالبا من شراب الشاي الصباح
حتى المغرب بكون قاعد فيها ومرات اغفو في منتصف النهار تحت اشجاري الظليلة
وبعدها طوالي اشتريت بكسي وطبعا البوكسي في منطقتنا مهم
استمتعت به طوال عشرة سنوات ولكن بعد الزواج زادت الطموح لقطعة ارض في العاصمة امكن في المستقبل نحتاج ليها لدراسة الاولاد وكدة
بكسيني دا كان بشتري قطعتين في بحري عام 2000
وبعته سنة 2010 وزدت على ثمنه مرتين عشان اشترى قطعة في بحري
يعني بعد ما كان بشتري قطعتين
رجع واشترى 1/3 قطعة
ولكني لست ندمان فقد استمعت بالعربية وانبسطت بيها
وركبتا فيها امي وديتا البكيات والاعراس
وزيارة اخواتها وصديقاتها
وكانت مبسوطة وهي تقول عربية ولدي
اجمل لحظة في حياتي على الاطلاق عندما تكون امي راكبة معاي وثالثنا الحب
ونحن نتنقل في حلتنا من بيت عرس لزيارة لعزاء
فرحة امي لا تقارن باي قطع ارض؛ ولا حاجة مادية مهما غلت...
فامي غالية وفرحتها ورضاها انار لي كل الدروب الظلمة؛
وكانت دعوتها دائما قشة ما تعتر ليك يا ولدي؛

عبدالمنعم الطيب حسن

25-07-2020, 08:13 PM

عمنا عركي مشهود له بالجدية والحزم والكلمة الواحدة؛ والقرار السريع والنهائي
يعمل سائقا لعربيته التجارية؛ ويعمل معه اخونا الاكبر الفاتح
يعمل معه مساعدا في اللوري دا؛
ودائما المساعد بركب فوق في التندة بتاعة العربية
والفيها صندوق اسمه صندوق الزوادة
وفيه الحلة بزوادتا كلها وشنطة المساعد دا برضو معاهم فوق
وطبعا المساعد كان من ضمن مهامه تزبيط الحلة؛
يخيم السواقين ويجتمعوا ياتوا بالاكل الجاهز من الحلة وياكلون؛
يبدو ان اخانا الفاتح قد تعب من حكاية الحلة دي؛ وتظبيتا كل يوم...
فقرر ان يثقبها ويرميها في الخلاء دا ....
وقد فعل!!!
عمنا عركي ماعارف القصة دي نادى:
الفاتح الفاتح الحلةالحلة
رد الفاتح من تندته: الحلة قدينااها يا عمنا
قال عمنا عركي جملة واحدة ولم يزد:
تعال لي نازل بشنطتك؛ القدا الحلة المكنة بقدها...

عبدالمنعم الطيب حسن

26-07-2020, 11:59 PM

مشينا رحلة انا وصاحبي مع اهلنا بالعربات التجارية لبورسودان؛ ونحن بعد صبية
ولكن تلك قصة اخرى؛ المهم السواقين والكماسرة كلهم من الحلة واهل؛
في بورسودان يتجمون في ميدان منخفض كدة؛ يستخدمونه كمواقف معلومة للجميع منذ سنين طويلة؛
لحين ايجاد شحنة والرجوع تاني
وكانت جل ونستم
نحن امبارح نمنا في كسلا واليوم وصلنا بورسودان ونحن نمنا في القضارف ونحن نمنا في جبيت ونحن في الفاو وهكذا
عمك سواق معاهم زهج من الكلام المكرر قال حكمة:
هوي البنوم في في القضارف و لَّ في فرنسا
بجي ينقطع في الحفرة دي؛

عبدالمنعم الطيب حسن

27-07-2020, 07:33 PM

عسمان شواكيش صاحبنا وفردتنا؛
وروحو حلوة؛ فجاة كدة في ايام االعرس الجماعي؛ قرر اعرس؛
هيا يا عسمان العرس دا عاوز قروش وعاوز بيت
وانت اباطك والنجم؛ وووو يسمع كلامنا كلو ويقول الله بتمو
اهااا في الاول كان طموحو عالي؛ بدأ بخطوبة بنات متعلمات ومدرسات؛
وياخد الشواكيش عادي؛
وتقهرشوية شوية ولم يعد يتشرط المهم انثي واهلا طيبين؛
نلاقيهو ايام الخطوبات اها يا عثمان ما اتوفقت يقول
بطيبته كلها: لسا والله؛ لكن ما قنعنا؛
انا بفتش وابوي بفتش ههههها
نحن نقول ليها غايتو انت ميزتك الوحيدة انك شاب؛ تاني يخربك...
ويزيد هو: وضراعي اخدر وخدَّام ساهي لي الله سيدي
وطيب يا جماعة...
صاحبنا عثمان اتوفق وتم العرس مع الجماعة واخدت الحياة دورتها؛
مرة جانا في النادي مكشر يا شواكيش مالك؟
والله يا جماعة المرة دي زعلت ولملمت شفعا العصر دا ومشت اهلا
يا زول كيف الكلام دا تلقاك عملت حميل ونمت بالمصاريف عارفك اقتصادي
والقرش دا ان وصلك تاني ما بتفكو باخوي واخوك
اوعك تكون مِقصِّر معاها ومع اولادا في اكل وشراب
رد قائلا:
افو والله ما مقصر معاها باي حاجة
والله لحدت الطحنية دي بجيبا ليها
.............
محمد ولدو الكبير على وشك انهاء مرحلته الثانوية؛
ومرتو ذاتا ما بترضى في لقب شواكيش دا...

عبدالمنعم الطيب حسن

28-07-2020, 10:31 PM

نعم حياة السودانيين تتشابه كون المصدر واحد
والظرف المحيط واحد؛ والبيئة والمشية ذاتا وقدلتو
واي حلة فيها محجوبا وفيها فاطنة بت محمودا وفيها زينا وعرسو
وفيها ود ريسا.....
بل ان المشاعر الانسانية واحدة قرات مائة عام من العزلة
كانما الحكاية تحصل في المجتمع السوداني؛
مكتوبك هو لب البوست ورسالته الاساسية
ان يجد كل منا نفسه في ذات القصص والحكاوي والحكم
انا مصور فقط وناقل لحكاوي المجتمع وقصصه واحكامه
ويظل الواقع اعمق واروى؛
متاكد ان القاريء الذكي سيعبر نحو لب الفكرة
ان غلبتي العبارة؛ ولم اوفق في توظيفها
اعتمد على القاري الحصيف الذي ما خذلني يوما
شكرا يا جيمي؛ للمشاعر الصادقة ونبيلة؛
اختم بهذه القصة الصغيرة
معانا موظف هندي كبير في السن؛ كان ماشي قدامي من المواقف
للمكاتب؛ مفروض يلف يمين ولكنه واصل كنت امشي خلفه
بمسافة تهبشك غنوة واناولك كاس
المهم تباطت في المشي قتا اشوف عمك دا ماشي وين
بالصباح دا
وصل الي جالون زبالة ووضع علبة عصير وغتايتا ولف متوجها نحو المكتب
مشي مسافة ١٠٠ متر ربما ليرمي الزبالة في مكانها
في الغالب انا ارمي البواقي في اقرب مكان فاضي
من اليوم داك اكبرت عمك دا
وبقيت احتفظ بالبواقي بعد الاستعمال؛ والمها في كيس؛
وارمي بها في مكبها
الحياة مدرسة نتعلم كل يوم
لا نتكبر على التعلم ابدا....

عبدالمنعم الطيب حسن

30-07-2020, 12:27 AM

اليكم هذه القصة البسيطة
كان يسكن معنا في مكة ونحن بعد عمرة صديقنا عبدالباقي الشايقي
جاء والده عمنا الشايقي (وهذا اسمه كناه به اباه لصداقة مع احد
اهل الشمال) جاء عمرة وخلص العمرة وقعد معانا فترة
المهم عمنا الشايقي راجل لطيف خلص العمرة وقعد يونس فينا وكنا
كلنا في عمر اولاده
ولده عبدالباقي اشترى طاقتين قماش جلاليب وفصل بمقاسه عشرة جلاليب
وكنا قد استغربنا ليه زول يشتري لابيه عشر جلاليب (كل خمسة تتشابه) والجلابية تطبق جمب الجلابية
وزالت دهشتنا عندما طلب من احد الشباب قلما وقال له اكتب في جيب الجلابية الداخلي
اول جلابية عبدالله ودحسن تاني جلابية فلان ود فلان وهكذا قلنا له باقي جلابية
واحدة يا عم الشايقي هذه لن نكتب عليها اسما هذه لك
فسكت ولا نعرف ان كان قد اقتنع بكلامنا ام ساكتلو فوق راي
بعدها باسبوعين او نحوهما قال لنا عمك الشايقي
ياناس هوي انا بعد دا مسافر
حاولنا ان نقنعه بان يستريح شوية ود فرصة في مكة وبتاع
قال لينا
خلاص ان غرضي قضيتو تب
والنوم دا ما بقدر عليهو ( تجاوز الستين وقتها من عمره المديد)
انا هناك بشتغل يوميا في سوق خضار حلة كوكو
وبرجع اخر اليوم بزاد كتير لبيتي؛ ولي كم ناس محتاجين في الحلة
وما عندهم مصدر دخل
...........
#وطنا_ الباسمو_غنينا_ورطنا

عبدالمنعم الطيب حسن

30-07-2020, 10:56 PM

عكــود

31-07-2020, 04:56 AM

في سوق الجيلي في رجل يبيع طعمية؛ وسندوتشات طعمية للطلبة؛
محل صغير يعمل فيه اكتر من عشر شباب
ومزحوم زحمة مبالغة من الطلبة؛ طلبة الثانوي بالذات؛ يشترون سندوتش طعمية
رغيفة ومعاها 3 او ربما 4 طعميات وبس خلاس؛
ولاحظت اي طالب يرمي 1000ج ثمن السندوتش في كرتونة كبيرة جمب عمك
والعندو خمسة براه يفك ويشيل الباقي؛ ويركب الصف في الجهة المقابلة؛
عمك صاحب البوفية لا يتدخل ابدا في عملية الفلوس دي
زحمة خلتني اسال اخوي عن السبب بتاعا شنو؛
قال لي: شفتا الراجل دا اي طالب عندو ما عندو يشيل سندوتش؛ بعد الطلاب بكرة يدفع الفين ولو ما عندو يدفع متى ما توفر
ولو ما عندو خالص خلاس انتهى؛
سالت بعض الطلاب من وفوق لفوق اكد لي المعلومة والتي هي معروفة لكل ناس السوق....
علمت انو عمك دا من البوفية دي عمل بيت طوابق في الجيلي ذاتا؛ وعربية فخمة...

شفتا كيف

# شعب_عظيم_في_دولة_تافهة
سلام يا عبد المنعم وكل عام وأنتم بخير.

يا سلام على عمك، ربنا يبارك له في رزقه.

سكنت في سكني الحالي قبل 4 سنوات وبمشي أصلي في المسجد الجنبنا.
أول أيامي لاحظت في بعض الأيام بعد صلاة المغرب بتكون في حوش المسجد صواني رز باللحم والناس بتقعد تاكل. استغربت، سألت واحد سوداني بيصلي معانا، قال لي: أنا ساكن هنا 25 سنة وكل يوم اتنين وخميس، صاحب مطعم إقبال (البناية الجنبنا) بيجيب إفطار للصايمين في المسجد، ما غبّ ولا مرة.

مطعم إقبال صاحبو باكستاني، والمطعم من المطاعم المشهورة جداً، رغم انو متوسط المستوى.
لاحظت انو من بعد صلاة الفجر، إلى بعد منتصف الليل المطعم مزدحم خالص بالزبائن، خاصة سواقين التكاسي، لا تخف الزحمة أبداً طول الوقت.

لاحظت برضو، كل يوم جمعة بعد صلاة الفجر، عمال المطعم بيجيبوا ثرامس شاي بلبن وكراتين كيك يوزعوا المصلين بعد الصلاة.

ما قلّ مال من صدقة، آمن الرجل بحديث المصطفى عليه الصلاة والسلام وملأه اليقين بالبركة، فأنزلها الله عليه.

اللهم ألزمنا اليقين

عبدالمنعم الطيب حسن

31-07-2020, 07:21 PM

كل عام احبابي واصدقائي والقراء اصدق اصدقائي الكرام....
والمتابعين وجميعا، وكل من وصل لهذه المداخلة
اقول لكم
العيد مبروك عليكم
والسنة الجاية ربنا يحفظكم
ويحقق امانيكم
ويجي العيد ويلقاكم تامين ولامين
والسودان وقد تجاوز المحن
واستقر وطنا للسماحة والحب وكل الاغاني الممكنة،
اتمنى ليكم متعة ممتدة، مع اللحوم الممتعة
انا كائن لحمي، اكل المرارة، وام فتفت
والكمونية دي خلاصة الخروف،
واموت في اللحم الشية، والمحمرات،
ولا بد لي من كاتولة مركزة من الشربوت،
لا اوصيكم اضربوا اللحمة ضرب من لا يخشى القاوت،
عيد لحيم،
تحياتي،
وتصبحوا على وطن النجوم
وضاح ووسيم،،،

عبدالمنعم الطيب حسن

01-08-2020, 04:59 PM

بمناسبة عيد اللحم
بعض نصائح حتى تصل المتعة مداها
تجنب الشحوميات عموما،
وتجنب الهُبر من اللحوميات
والقطع الكبيرة ما امكن...
وثق دائما ان احلى اللحم ما حاور العظم...
واماميات المذبوح دوما فايتة الخلفيات بمسافات،
لجهة الطعم والهشاشة والدسامة،
كل ما تقدمت في المذبوح احلوا....
النيفة ما اطعمها للاكيلة الحرفاء
اليوم لم يسلمني الجزار راس خروفي زعلتا شوية
اعداده في الغربة مضني،،
وبعدين مشيت،
المهم الشطوط والليمون والبصل الابيض اساسي
اذا واجهتك حرارات في الاخراجات هنا وهناك،
جراء الشطوط الحريفة فعليك بالنصيحة الذهب التالية
بس خت موية في الفريزر او بيبسي او شربوت او اي مشروب
وخليه بارد شديد واشربه بعد الاكل مباشرة
الشربة بالرمدة،
وللخايفين من النزلة بشرط السكر موزون
عليهم بحجر حجرين من الطحنية دي،،،
برضو فعالة،،
لابد من الكاتول بالعدم فسن اب كما يقول طيوبي صغيري،،
ولمن يعاني من داء الملوك استخدم الحبة
فليس كل الايام عيد لحمة كنا يقول الراسخون في القاوت،،
المرارة ما اطعمها ولو اخدت شلهبة بالنار فهي اطعم،
وتظل الكمونية سيدة المائدة هذه الايام،،
ومن لا يحب الكمونية فقد فاتته متعة المتعة،
والشاي الاحمر بالهبهان وبالقرنفل المغلي مع الموية وسكر يتم الكيف...

ههههههههها
لا تتخيلوا انني نهم،
فانا في الغالب غير متطلب، وغير متبرم...
لم اطلب ابدا في حياتي تجهيز طعام خاص،،
اكتفي بالموجود،
وانبسط به..
وآكل واقش شنبي...
واتفكفك،،
تحياتي،،

عبدالمنعم الطيب حسن

03-08-2020, 01:05 AM

شكرا اخوي على الكلام المشجع والمحفز؛ ما حا اتجمل ولكني ساقول الحقيقة مداخلتك اسعدتني ايما سعادة؛
سحبتني؛ ابرقتني وارعدتني ثم امطرني بهجة وفرحا وحبورا؛
عارف انو ردة الفعل لكلماتي البسيطة التي اكتبها عندما يكون كما ذكرت هذا امر يشجعني على المواصلة في البوست؛
رغم الجو السياسي الكؤود والمحبط وخيبة امل ام الشهيد والثائر وكل الشعب في الوجه الجديد كونو الانجازات على الارض صفر؛
رغم التضحيات العظيمة للشعب العظيم في ثورته الاعظم؛
بل المعاناة زادت؛ وكادت الحياة ان تتوقف في بلدي الطيب؛ باهله ورغم صوفيتنا كشعب واصلا نحن طلباتنا ما كتيرة؛
عاوزين موية نضيفة؛ ورغيفة؛ في متناول اليد لجهة الوفرة والسعر؛ وعلاج لمريضنا الفقير اصلا؛
وتعليم لاولادنا وبناتنا؛ وكباية شاي احمر كب تسع اما لو بلبن اسكت كِب؛
وفنجان قهوة بشمالو يسوى الدنيا بحالو...
ولابأس من كهرباء تنير لنا الطريق
وحكومة رشيدة تدير لنا مدخلات البلد بنزاهة وبقومية؛ وبحيادية؛ وشفافية...
وحاكم قلبه على الشعب وليس اعداء الشعب...
نحن لا نبحث عن رفاهيات واجازات وفسح وراحات؛ مع انو من حقنا؛
ولكننا شعب مطالبه بسيطة ونومة في حوشي الفسيح في واوسي وانا استنشق الهواء الطلق وملايتي تهبب من عصرا بدري؛
لا تعادلها نومة في اي مكان اخر في العالم؛
وما انا الا من غزية!!!
مع انه مطالبنا من شدة بساطتها اصبحت ثوابت لدى معظم شعوب الارض؛
الارض الطيبة...
في مصر يا امير كانت خطيبة زميلنا في الجبهة الديمقراطية والمهتم بالسياسة جدا
قد سافرت للسودان؛ ورجعت بعد شهر تقريبا
وجينا كلنا ونحن المهتمين بالشان السياسي جينا نسال عن الحاصل بالبلد لزولة هبشت الارض ورجعت
لتوها
وسالناها اهااا السودان كيف؟
اجابت: حر حررررر شديد
احبطتنا الاجابة ونحن نتسم حال البلد المعروف لنا مطلع التسعينات الميلادية....
ذكرت لك هذه القصة لانو واحد زملينا قال لي ياخ البلد مقلوبة
وانت المهموم بتحررها وحريتها وسلاما وعدالتا
تحكي في قصص وذكرني بقصة البنية اعلاه
ما يشجعني على الاستمرار في البوست هو كلمات رقيقات مثلما ذكرت؛
واستفادت القراء من الحمكة الشعبية التي تتناثر هنا وهناك في ثنايا البوست؛
ونوع من التغير؛ هو كمان ما ممكن يكون المنبر كلو حمدوك...
معليش طولت عليك؛
كمغترب عندي كان احساسا انو الناس في السودان بستغلوا المغترب؛
مشيت اصلح العجلة في بنشر في الطريق للحلة؛ وكان معاي اخوي الاكبر....
صاحب البنشر ذكر رقم قتا ليهو لا كتير
نزلت المبلغ صاحب البنشر وافق
صلحت الكفر دفعت المبلغ حسب الاتفاق
اخوي شايفو تم الباقي بين ما دفعت وما ذكره صاحب البنشر في البدء
اعطاه البنشرجي في ايدو....
وكنت قد اتفقت مع عربية توصلني من المطار لبيتنا بي 950 الف جنيه وكان صاحب العربية قد طلب مليون
وصلنا البيت ارتحنا وشربنا موية وعصيروشاي
اصر اخوي على السواق ان يرتاح شوية واحتمال في كرامة
رفض صاحب العربية فهو على راس العمل وراجع المطار تاني
كلمتا اخوي بالاتفاق
دفع ليهو المليون طق
اهاااااا من الوكت داك بقيت ما بخش في اي مفاوضات حول الاسعار ما يطلبه البائع لسلعته
اعطيهو اياه وانا مبسوط وهو مبسوط
انا من غزية؛
تحياتي لك ولكل من وصل القراءة لهنا
سلاااام

عبدالمنعم الطيب حسن

04-08-2020, 09:00 PM

الشعب السوداني؛ لاينفك يدهشك في اي تصرف وسلوك؛
ودي بتميزنا كشعب وتظل بصمة خاصة بنا؛
كاننا نولد بها؛ وبالتاكيد ورثناها ونورثها لاطفالنا جيل بعد جيل؛
سمعتنا الطيبة في الخليجمن كرم وشهامة وامانة؛
وعز نفس فوق لاي تصور...
نحن الجيل اللاحق لقيناها قاعدة وراسخة
من اوائل المغتربين؛
ساحكي لك قصة هنا وقصتين في مداخلة لاحقة؛
القصة الهنا حكاها لي عمي حجازي الذي عاش هنا في الخليج
دهرا وما زال يربي في هدؤ وصمود احفاده واحفاد احفاده في حلتنا؛
قاليك الشيخ الكبير مع اصحابو وقد راهنهم على عزة نفس السوداني
الذي عمل معه عشرات السنين؛ وكان الوقت مغرباً
ناداهو قائلا: يا عم محمد صالح انت اشتغلت كتير
وكبرت في السن عاوزين نعمل ليك خروج نهائي
بكرة تجيب اقامتك عشان اجراءات الخروج النهائي...
عمك ولا كضب ولا فكر ولا تردد اخرج اقامته من الجيب الامامي
كانما يحتفظ بها قريبة لامر جلل كهذا؛
ومد الاقامة القريبة للشيخ
قائلا: وبكرة ليه؟ دلوكتي مالو!!
.....................
ساعود بقصتين اخريين تدل على عظمة هذا الشعب السمح
وسريعا

عبدالمنعم الطيب حسن

05-08-2020, 11:51 PM

نادر صاحبنا لزم؛ يعول اسرة ومدارس؛
يعمل سواق في امجاد؛ اتفق مع صاحب العربية انه يعمل منذ سنوات باي عربية ويقيف امام مستشفى بحري
ويوصل الناس الكان عندهم شخص منوم في المستشفى لقراهم او بيوتهم في بحري وحولها
باتفاق مرضي ماديا له؛
ولكنه في المقابل اي جثمان يوصله حتى بيت اسرته بدون اي مقابل لو موافق خلاص ولو عندك مانع
دا مفتاح عربتك؛
وكانت فلسفته في ذلك انو هذه الاسرة فقدت احد افرادها ليس من الحكمة اخذ مبلغ مالي لتوصيل جنازة
فتاملوا!!!
واستمر سنوات يؤدي هذه الوظيفة بهذه الاريحية
ومرتاح جدا ومبسوط
تحول الان لقيادة شاحنة ولكنه ما زال يحن لمناخات تلك الايام العطرة
..................
اختي ساكنة في الحاج يوسف اذهب لبيتها منذ انا طالب بالمواصلات طبعا...
المهم ايام العرس بالليل كدة ماشين ليها معزومين عشاء
وراكب عربية عاد ما عريس؛
المهم وصلت المكان ولكن تهت من الدخلة بالعربية لحدت البيت؛ ولكني في الارية
سالت ولد في تاشرته كدة في اولى ثانوي
يا ولد تعال بتعرف بيت ناس فلان
نعم؛
طيب وصف لي؛ لالالا اركب معاكم لحدت البيت؛
يا ولد كيف الكلام هسا الدنيا ليل؛ وانت صغير ما تمشي بعيد من بيتكم
اصر الولد
وفتح الباب وركب قلت ليهو يا ابني ليه التعب دا
قال: المسافة قريبة وبرجع سريع
وانا فرحان لو ما قضيت واجب صغير زي دا
حياتي ذاتا معناتا شنو؟
.....
بالحرف الكلام الفوق دا قالو الولد دا

عبدالمنعم الطيب حسن

06-08-2020, 08:06 PM

دخل عمي الشيح حسن على لجنة الانتخابات؛ في حلتنا لانتخابات مجلس شعب نميري
وساله استاذنا علي عمران عن عمره، فاجاب عمي ان عمره خمسين سنة
فضحك الاستاذ علي واللجنة لانو قبل فترة جاءهم الحسن الشيخ حسن وقال انه عمره خمسين عاما
وقال له استاذ علي ياعم الشيخ زيدا شوية لانو قبل شوية ولدك الحسن قال عمرو 50 سنة
رد عمي الشيخ: الحسن علي كيفو لكن انا 50 دي ما بزيدا ساعة
....
صاحبنا ظل واقف في ال38 سنوات وسنوات
اعترف في جلسة صفاء انو طوَّل خلاص في ال38 دي يا جماعة انا من الليلة وصلت 39
......
صاحبنا الموظف السعودي قال ان والده ظل يقول انه في ال55
قبل ان يتوظف معانا قبل نحو سبع سنوات
......
الحاجة الدكتور سالا عمرك كم يا حاجة؟
قالت 40 الدكتور سألا تاني: ود ولدك يا حاجة
قالت نعم
كتب 65 سنة
.......
الكُبُرْ دا زول بدورو مافي،
..........
الاطفال فقط يذكرون عمرهم الحقيقي؛

عبدالمنعم الطيب حسن

07-08-2020, 11:18 PM

خلال التمانينات ذهب عبدالوهاب اخوي للعمل في العراق؛
في عز حرب الخليج!!!
ضمن مئات الالوف من السودانيين؛
بعضهم ما زال في العراق؛ ولكن ذلك موضوع اخر...
المهم اخوي اشتغل في مكان يزوره مئات السودانيون يوميا؛
ومعه عمك عراقي كبير في السن؛
ساله اخوي: يا عم علي واولادكم بالجبهة؛ بالله جية السودانيين دي هنا ما ورطة؟
اجاب عمك سريعا لابد ان السؤال وقع ليو في جرح:
والله ورطة ونص
اضاف لها وهبة لاحقا كلمة وخمسة...

عبدالمنعم الطيب حسن

08-08-2020, 09:26 PM

مشينا نحن اربعة طلاب لزيارة صديقنا في قرية في ضواحي الخرطوم
المهم وصلنا البيت وصاحبنا مشى التمرين رسلوا ليهو يجي
استقبلنا اخوهو الكبير بكامل الاريحية والليمون البارد
وكان يلبس عراقي بلدي
وكان عداد الكهرباء موصل ولكن التوصيلات الداخلية مفصولة
فتكلمنا بالانجليزية ونحن نلعن عدم الكهرباء
واسرفنا في الاستياء
المهم جاء صاحبنا وعرفنا باخيه
المهندس الكهربائي خريج جامعة الخرطوم والمغترب بالامارات
لسع خجلانين لاحقا اعتذرنا لصاحبنا
قال اخوهو ما زعل لانو كنا طلبة لسانا صغار
وقال انجليزيتنا هردبيس ساكت
ههههههههها
.........
لاحقا في القطار ونحن ماشين مصر قطعنا
بالانحليزي برضو عن عمك كبير شوية
معانا في السفرية
لم يرد ابدا....
لنكتشف لاحقا انه عاش ٢٠ عاما في امريكا
وانه ماشي مصر اجازة وبعدها لبريطانيا بلد الانجليزي ذاتو
ليعود بعدها لمنزله في قلب الخرطوم...
القصة الدخلتنا في اضافرينا انه استمر في التعامل مع
بانسانية عالية،،،
سلام

عبدالمنعم الطيب حسن

09-08-2020, 08:14 PM

قبل سنوات قليلة كنت اسكن في بيت
له باب خارجي لكل المبني، الباب الخارجي هذا به حوش بعيدا
عن موقع الشقق،
وكان معي محمد ولدي
وقد خرجت لمشوار قريب ونسيت ان اخذ معي المفتاح والتلفون
واصبحت وولدي بالخارج،
تصادف ان عمنا سوداني ساكن مع عزابة جيراننا في الحي،
وعلاقتنا لا تتجاوز سلام عليكم وعليكم السلام،
المهم قتا لعمك يا استاذ بالله ممكن تلفونك اكلم المدام ترسل الولد يفتح لينا الباب
رحب عمنا بالفكرة باريحية السودانيين المعتادة،
واسالني عن الرقم، وانتظر الجرس،
لتكون المفاجاة ان الرقم خطا
كرر الرقم تاني بعد سالني وكررت نفس الرقم
وطلع برضو خطا
عمك زعل شديد،
وبدأ مستغربا كيف الواحد ما حافظ رقم مرتو
وعندهم اولاد وما معروفة الظروف
وانا مصر الرقم صاح ونتصل تجي رسالة تاكد ما الرقم الصحيح
وعمك خلاص فاض بيهو وبدا متوتر شديد
ومستغرب من السوداني الما حافظ تلفون زوجتو دا
ولا شك انو حسب حسابات شتى
وعمك رفض يمشي شقتو رغم محاولاتي باقناعه،
سياتي جار لنا في اي لحظة ويفتح الباب،
عمنا مصر ينتظر وقال لي عديل الحاصل شنو بالضبط
هل الاوضاع العائلية مستقرة ههههها
وانا احلف انو مافي الا الخير
المهم فجاة كدة اتذكرت انو دا رقم قديم
وتم اغلاقه بواسطة الاتصالات،
واستبدلناه للمدام برقم جديد
وحكيت القصة لعمنا واتصلت بالرقم الصحيح
سرعان ما جاء احمد وفتح لنا الباب...
ورايت فرح الدنيا في وجه عمنا الطيب

عكــود

10-08-2020, 06:03 AM

عبدالمنعم الطيب حسن

11-08-2020, 11:41 AM

سلام منعم،
قصة مشابهة لخطأك في رقم المدام.

أنا أعتمد كثيرا على ذاكرتي في حفظ الأرقام حتى صارت عادة وهواية، ونادرا جدا ما تخذلني ذاكرتي مهما كان الرقم طويلا.

مرة أولادي سافروا السودان وجوني أولاد اهلنا زيارة في الشقة وكان يوم خميس. أخدوا ونستهم وهم طالعين عزمتهم نمشي نتعشى سواء في مطعم معروف.
البناية كان فيها ماكينة صراف آلي وعادة بسحب منها.
لمن نزلنا مشيت الماكينة عشان اسحب مبلغ. ادخلت البطاقة ومفروض ادخل الرقم السري المكون من أربعة وال انا بستخدمو من سنين.
يا الرقم السري ده ما قدرت اتذكرو خالص في اللحظة ديك، قدر ما حاولت أبى يجيني خالص.

ناديت واحد من الشباب على جنب، اتسلفت منو مبلغ ومشينا المطعم.
قعدتي في المطعم، اتذكرت الرقم السري.

صراحة كان موقف محرج، انقذني منو صاحبنا.

تحياتي
هلا العمدة تحياتي
هههههههها خليني انظِّر شوية،،،
مع ناس حلتكم ديل، اكيد ونستكم كلها عن حلتكم
ورمالا ونيلا ونخيلا، وانسانا الطيب الجميل
لاشك انكم عشتم مناخات واجواء تلك الحلة التي
(يحفها النيل ويحتويها الخصيب)، فتخلصت انت يا عمدة من الخليج وملحه، وحلقتا هناك،،
رجعت القهقري للبساطة هناك،
وتخلصت من الملح وموية الملح، ومن ارقامها وبنياتها، وفجاة عاوز فلوس من الصرافة
وكلياتك ما زالت بهناك تسبح، عقلك الباطن معلق
في القرير، فكيف له ان يتذكر ارقام الغربة، وكبدها، ومكابداتها،،،
ومرات كتيرة العقل الباطن يرفض الواقع
وينكره، ويتمسك بالماضي،،،
زميلتنا اتوفى والدها الاستاذ في اليمن، وجاها الخبر في الجامعة وطبعا كنا ندرس في مصر،
المهم والله انا لما عرفت الخبر انتحيت جانبا وبكيت ايوة بكيت هي بنته الكبيرة، مع ظروف السودان وغايتو،،،
المهم مشينا للعزاء لقينا البت عادية جدا،
بل انها لم تبكي اباها ابدا، وقالت للاصدقاء الودوها المطار انها ذاهبة لمقابلة والدها،،
المهم مشت وبكت مع اهلها بكاء السنين
وقلبها وعقلها استسلم للواقع وامن به،،
رجعت حزينة واعتزلت كل المجتمع، ولا تظهر الا في عزاء،،، وتاني تختفي..
الغريبة في السودان تتعامل عادي،،
قاليك لو نسيت حاجة لا ترهق نفسك بمحاولات تذكرها،، انسى واتعشى فجاة كدة من تلاليب الذاكرة تقفز، يسمي العلماء هذه اللحظة بلحظة الاستبصار،،،
المهم،
اكيد ضيوفك انبسطوا من المشاوي،
لكن لو اكلوا قراصة بملوحة، او عصيدة بتقلية لكانت متعتهم امتع،،
سلِّم عليهم، جملة،،

بابكر مخير

11-08-2020, 05:39 PM

إمتاااااااااااااااااااع

عبدالمنعم الطيب حسن

12-08-2020, 10:07 PM

إمتاااااااااااااااااااع
شكرا دكتور بابكر علي المرور
دعني احكي لك هذه الحكاية الصغيرة،،،
.........

شاب في حلتنا بغني لينا في مناسبات الحلة
وصوتو عادي لكن حافظ وبفك الحيرة
والناس بتنبسط مع الايقاعات الافريقية
الحارة....
المهم قابلته بعد سنوات ووجدته يعمل سائقا
في حافلة، وسالته ليه خليت الغنا
قال لي: الشعب السوداني ما بقدر الفن والفنانين،
في سري قلت: الشعب السوداني تطير عيشتو

عبدالمنعم الطيب حسن

13-08-2020, 07:56 PM

اخر الاحزان،،،،
كل آل بشيري ومن يمهمه الامر، ومن يحزنه،،،،
غاب اليوم فجأة، محمد احمد الطيب الشيخ بشيري، ولد اخونا البتمم كيفنا، وبكمل مجلسنا، محل فرَّتْنا وونستا وضحكتنا، محمد جيلنا، حافظ قصص كبارنا وحكاويهم، وذلك لطول عشرته لجده لامه وجده لابيه،اعمامي ياخ،،،
(محمد دا انا خالو وعمو وهو القمر)،،،
ولطول عشرته لجده عم والده ووالدته، ابوي، واولادهم واحفادهم،، وهم اهل شعر وحكايات، واسياد مجالس، ولمَّات،،،
محمد ضحوك ووقور، وتقي،وسمح وبسام العشيات، لا تمل الجلوس اليه،
غادر اليوم بدون حتى من كلمة وداع،،
مسختا علينا ام قرفة ياخ، وتلك المشاوير الحنينة، وتلك الديار الفيها ريحة عقابنا وعربنا،،،،
طويل الحزن عليك يا اكتر من حبيب،

عبدالمنعم الطيب حسن

15-08-2020, 02:00 PM

وهاك القصة دي من حلتنا؛

ع . ح . ر

اواخر التمانينات غادرنا في وقت متقارب ، هو الي ابوظبي ...
وانا الي مصر ؛
رجع مليان قندرانيات ،
رجعت مليان هموم ، وذلك موضوع اخر ...
يا هو زولنا القديم ذاتو ، القندرانيات دي ما سوتلو الحبة ...
فقط ذادته عطاء وكرم وانسانية ...
كلمني من اثق في حديثه ، ان الرجل دا بطل صفحتنا دي ...
رابط ماهية رسمي ، لخمس اسر من الاقارب حسبا لي واحدة واحدة ...
يوم تلاتين من الشهر ، تصل للجماعة حتى لو كان برا الحلة ...
الغريبة رمضان الفات دا كلو معاها ، ما جاب لي سيرة ...
فرحت فرحة يتيم يوم العيد ، باللبس الجديد اليوم داك كلو انا ممتن ومبسوط ، ومازلت ممتليء غبطة ...
الدنيا دي بخير ، والناس الزي ديل هم الحافظين التوازن ، وتماسك المجتمع والدنيا الان صيف جمرة ،
قحطا قمطريرا ...
حدثني اخر قال : صاحبك دا يمر بالصدفة قريبا من بيت زيد من الاهل ، يالله البيت محتاج ترميم مع الخريف القرب دا ..
بصمت ياتي البناء والبشيل الطوب ، والاسمنت ، وبكرة يتفاجى اصحاب البيت ، بالترميم النزل من السماء دا ....
الله ما كريم ...
يعاود المرضى ، ويمد يد المساعدة بشويش حتى لا يراها الاخرون ...
في صمت يمد ، ويعصر ويغادر ، وكان شيئا لم يكن وبرأة الاطفال في عينيه ،
قبل العيد يعاود الاهل ،
وقبل ذهاب بنت الجيران للجامعة والمدرسة تلقاهو قريب ،
ويطول الكلام عن خير الرجل ، وصمته ولابكلم حتى اصدقائه ،
في ناس انناس ..
صاحبنا دا كمان امانة مو وناس ، وحكاي، والنكتة في طرف لسانو ،
والشغل دا خلو ساهي ، عادي يبيت مع القندراني في الورشة ،
نسيت ان اقول : ان القندرانيات ماشة زايذة ،
الارزاق دي زي الماسورة بتاعة الموية ،
اكان فتحتها ، بتنبهل ،
ولو كمان قفلتها ، بتنحسر ،
الزول دا الليلو برا ، كما قال النور يوسف تزوج مرتين ،
وما شاء الله ،
وشيهو ملان ....

وقلبو كمان

عبدالمنعم الطيب حسن

15-08-2020, 02:02 PM

شكرا جزيلا للادارة لرفع البوست اعلى في البنر؛
شكرا العمدة عكود واركان حربه الميامين
شكرا لكم كونكم حافظتوا على المكان ونكهته طوال عقود؛
وهذا وفاء نادر وصمود متناهي؛ لصاحب المكان ولعضويته وقرائه
دمتم ابدا؛
لا جاء يوم شكركم
تحياتي

عبدالمنعم الطيب حسن

16-08-2020, 08:06 PM

[
(SIZE="6"]
مثل هذه البوستات تغسل شوارع الروح والقلب
مثلما تغسل الامطار نوافذنا
ورغم اننا من الجيل الذي يتهم
بانه يتمترس في الماضي
وليس بإمكانه الخروج عن هذه الدائرة من الانفصام
لكن للماضي اجنحة
احيانا يحملك عبر هذه الاجنحة لتتنفس بعمق
نتنفس عبقا وتاريخا ومكانة
انا ياسيدي مهووس بالامكنة
ويظل المكان عندي محفورا في كل خلايا الذاكرة
ويترك ندوبا وثقوبا ليس من السهل ان تنتهي
بل يعجز كل اطباء التجميل
عن إعادتها إلى ما كانت عليه
جميل جدا ان تدخل الى دهاليز البوست على هيئة رجل
وتخرج منه على هيئة كتااااب
كتااااب ملئ بشتى العلوم
والمعارف الإنسانية
حكاوي رائعة
تجعل الهواء النقي يدخل الى رئتيك بسهولة

هجمة مرتدة
يا اخي لم انس وانا طفل صغير ان امي كانت تاتي بي مساءا الى جدي
ومن ثم تاتي كل قريباتنا لنفس الجد
وكل واحدة تقول لنا جدكم حا يحكي ليكم حكاوي عشان تنوموا
والجد والله قصصه كانت تدخل بالاذن اليمنى
وتخرج باليسرى
لانها مكررة وحفظناها عن ظهر قلب
لكن الطريف في الموضوع إنه هو الذي ينام
قال عشان تنوموا قال !!!

اذكر انه حينما مات عليه الرحمة والمغفرة
كانت جيوبه منتفخة
وسعدنا ايما سعادة بالورثة التي ستغير حياتنا تماما
ولكن بعد حضور الامام
وإخراج ما في الجيب
اتضح ان ذلك يسمى (راتب الامام المهدي)!!!
يعني ما كنا نتوقعه قريشات طلع ادعية
انا لله وانا اليه راجعون
بالله شوف مدى زهد هؤلاء الناس
يموتون وفي افواههم دعاء
وفي قلوبهم دعاء
وفي جيوبهم ادعية !!!![/SIZE])
هذه مداخلة صديقي الاثير ابوحراز في منبر سودانيزونلاين، اسعدتني هذه المداخلة،
لاحقا ساجلب ردي عليها
تحياتي يا سادتي وسيداتي الكرام،،

عبدالمنعم الطيب حسن

17-08-2020, 10:23 PM

حباب ابوحراز، حبابك الف ياخ...
نورت البوست؛ وجملته وقمرته؛ حتى انهال ضوءه
تماما تمام اكتمال الكتابة ينير اقبية الخفايا؛ وينتمي لفاكهة الفرح ياخ
(ويدهش الفصول لموسمين)
عندما رايت نور اسمك يلمع في اخر مداخلة؛ اعدت تهيئة نفسي والمكان؛
انتظرت خمس دقائق لاستيعاب الموقف؛ تماما كما فعلت بورصات العالم حال اندلاع حرب الخليج
اغلقت ابوابها نصف ساعة لاستيعاب الموقف والتطورات؛
واعددت لنفسي كاسة شاي وكترت الهبهان؛ وبعضا من هيل؛
واوقفت الدخول على المنبر من الجوال؛
وسخنت لابتوبي الموخمج؛
وقرات كتابة مرة ومرتين وتلاتة
ما حا اكضب عليك؛
كان مكتوبك اجمل تقريظ تلقيته في الاسافير منذ نحو عشرة اعوام؛
اسعدني ما اجادت به خاطرتك؛
ايما سعادة؛ ودا الكلام البخلي الزول يعضي كيبورته ونواجزه؛
وكل حاجة جواي انتعشت؛
وفرحت ايوة فرحت من القلب والخاطر صبابة...
فانت يا ابوحراز كاتبي المفضل
قرأت كل ما كتبت في المنبر؛
وعندما يلمع اسمك في اي بوست افتح البوست طوالي
وكلي ممنون بمتعة شديدة
واستمتع فعلا بالمكتوب
ولم تخذلني ابدا
ولم تخذلني مرة
انت كاتبي المفضل في المنبر؛
وانت ممن يضج المنبر بذكراهم؛ نحتفي بحضورك الوريف ونفتقدك حالما الغياب
سرا وعلانية؛
شكرا لبكري ابوبكر ان جعل لقاء الرائعين امثالكم ممكنا...
شكرا ليك ياخ
شكرا كتير والله
وانا زيك ابن الامكنة؛
اثير للمكان وما زلت اتردد على مدرستي المتوسطة في الجيلي
تلك التي فارقتها مطلع التمانينات؛
احن لبيتنا القديم؛ وتُكُلْ امي بلداياته؛
ورائحة طعامها اللذيد ما زالت تعانق فوادي؛
وشاي صباحاتا الندية وريحة النار ياخ وقطعة خبرة قليلا وحرف كسرة غالبا
احن لمناخات غرفة ابوي تلك المبتلة دوما بماء ابريقه الحريف
وريحة الارض المبلولة لتوها وطرف المصلاية
انها ريحة الوقار والصلاح والتقوى
ريحة ابوي ياخ
يوم كسرنا غرفة ابوي لنبني مكانها غرفة احدث بكيت ايوة بكيت
اذا اعدنا بناء الغرفة فمن يعيد لنا ريحة ابوي الذي يلمى المكان باريجه الفواح؛ ويفيض...
اجمل لحظاتي حياة كنت اقضيها لاحقا بعد ما اغتربتا واتفلهمتا
اجمل لحظاتي كنت اقضيها براكوبة امي
حتى ان عشة اختى تحتج على اسم الراكوبة
وتسميها استراحة هههههها
اختفت راكوبة امي مع التطورات في خريطة بيتنا
ويوم ما جيتا ولقيتا مافي انفجرت في نوبات
ما زلت احن لمكان امي وراكوبة امي ورائحة امي وقوتها وحكاويها
وخفة روحها ودمها؛
ان امي وتضحكني من جوة القلب تلك سدرة منتهاي اذن....
اذا اعدنا بناء الاستراحة؛ فمن يعيد لي امي...
ساعود لاعلق على باقي مداخلتك عزيزي
ابوحراز
وساختم هكذا فجأة لانها من الاستحالة انهاء مشاعر انسابت شلالات على الورق...
واختلطت فيها المشاعر
وايه الدنيا غير
لمة ناس في خير
او
ساعة حزن...

عبدالمنعم الطيب حسن

18-08-2020, 06:26 PM

احمد اخوي،،،الرحيل المر،،
تاني قام واحد جميل من اخواني مات،
.......
يا منايا حومّي حول الحمى واستعرضينا
واصطفي
كل ّ سمح النفس بسّام العشيات الوفي
الحليم َ العف كالأنسام روحًا وسجايا
......
غادرنا قبل ساعات احمد اخوي الوسيم الفهيم، البقسم العدم، البشيل فوق الدبر والدم،
،،،،
فقدنا في ظرف شهر
رحمة احمد الطيب الشيخ بشيري
واخوها
محمد احمد الطيب ود بشيري،
ومحمود اخوي
واليوم احمد اخوي
وما نقول الا ما يرضي الرب،
وان لفراقكم لمحزنون
وانّ لفراقك يا احمد الطيب لمحزنون،،
،،،،،
قام الكي اجدد تاني وهو لم يبر بعد،

عبدالمنعم الطيب حسن

19-08-2020, 05:05 PM

ابوحراز
ساواصل في طقس احتفالي بالعزيز ابوحراز..
فليمثله تضرب اكباد الكيبوردات؛ والطبل انشده...
قلت لصديقنا ذهبت لصديقنا المشترك في مدينة تبعد عن محل اقامتنا
حوالي مية كيلو؛ قلت له لقد ضربنا اكباد الابل...
قالي بالله جاب ليكم كبدة ابل هههههها قتا ليه آاااي

(Quote: هجمة مرتدة)

القصة دي حكاها لي عمنا بنفس التفاصيل...
انا ناقل امين فقط
امين زكي؛ اميين محمد امين؛ امين دنيايا...
المهم عمك قال ضرب لي اخوك فلان؛ اخوي دي جيل ورانا شديد؛ واميركي عديل كدا.
اخوي فلان ضرب لابوه انو عاوز يعرس بت سودانية ولفتاتا غزال ومقيمة مع اسرتها في ارض الاحلام يا جميل واصحى
عمنا قال لي قتا لاخوك موضوع زي دا ما بنفع بالتلفون رسل زيارة سريع؛
وجاءت الرسالة وعمنا اطمن شوية وضرب اكباد الطائرات هذه المرة واصبح مع ولدو فلان
الولد ساق ابوهو للاسرة؛ الابو قعد معاهم مسافة ساعات، من اجل التعارف
ورجع مع ولدوا قال للولد البت دي ما عاوزا ليك؛ تعال نعرس ليك بنات اعمك بالصف
اخونا دا اصر وابوهو اصر
المهم في النهاية الاب قال للولد اسمع انا ما بقعد في مجلس العرس دا
وما رضيان...
ورجع بعد فترة الحلة...
الولد عرس رغم رفض ابوهو للخطوبة ولكنه عرس
بعد خمس سنين عاشتم القصة؛ واربعة اطفال حلوين وملظلظين،
اخونا دا اتصل على ابوهو يابا ان عاوز اطلق المرة دي
الاب تاني يا ولدي موضوع موضوع زي ما بنفع بالتفون لا تتخذ اي قرار ورسل زيارة سريع
وجاءت الزيارة؛ وعمل نزل مع ولدو في البيت الذي اصبح اسري تظلله رياحين اربع اطفال متتاليين
ابوهو قالو عارف يا ولدي لو المرة دي بتصبحك بقة وبتمسيك بدقة
تتحمل بس، ديل ٤ اطفال ما عندهم ذنب،
بعد دا طلاق مافي انا ما بقعد في مجلس طلاق لم اقعد في عقده
المهم اخر كلام طلاق مافي وانا ما عافي منك لو طلقت المرة دي
......
الولد ما طلق وعادت المياه تجري بفضل حكمة الاب
والاطفال ما شاء ما زالو في حنان اسرتهم المكتملة عايشين ومبسوطين
وكمام زادو....

كان عمي الشيخ ان سمع ان فلانا طلق فلانة
يقول:
فلان دي غلطان هو
قبل ان يسمع الحيثيات؛ والدفوع والتبارير

بابكر مخير

19-08-2020, 06:21 PM

.......
الكُبُرْ دا زول بدورو مافي،
..........

المشكلة أنهو واقع مرير ومصير حتمي وثقيل بشكل :mad::mad:

عبدالمنعم الطيب حسن

20-08-2020, 10:19 PM

المشكلة أنهو واقع مرير ومصير حتمي وثقيل بشكل :mad::mad:

منور البوست والله يا استاذي الدكتور بابكر،
العمر يا صديقي يمشي في تضاد مع غريزة البقاء،
ياخ كلهم يتهربون للوراء، اي معرفة مع شخص لي تسمح بالمزاح، وجاءت ظروف فيها عمر يقول عمرو مثلا خمسة واربعين سنة

سنة امازحه قائلا اكيد انها خمسة واربعين سنة صافية من غير الجمع والسبت والعطلات الرسمية، ويضحك،
اعمل في مجال احيانا فيهو سؤال عن العمر، حتى لا اخرج من يتناقش معاي بريحو في حنانو، واقول ليهو مواليد كم في الاقامة، واضيف االناس مرات بتطلع شهادة تسنين اكبر من عمرا
يرفع الحرج مباشرة ويذكر عم الاقامة ويؤكد انه مكتوب غلط،
طبعا دفعتك واولاد الحلة ما بتقدر تزوغ منهم،
صاحبنا ودفعتنا ونديدنا لقيتو منقص عمرو سنتين قالا قدامي ودافع عنها وانو خشا المدرسة صغير وانو هو اصلا ما دفعتي قتا ليهو يا زول انا مواقف اتا اصغر مني بسنتين،
لكن اتا عارف وانا عارف والله عارف انو الكلام دا ما صاح، ههههها،
صاحبنا دا ما بصوم ونحن ما عندنا مشكلة لكن عامل فيها صائم، مرة صاحبنا وصاحبو عندو سكري، لقاهو بياكل في الكنيسة في بحري وخات تلفونو قدامو وموتسب، صاحبنا جاب طلب فولو وقعد وراهو ورسلو رسالة كتب فيها:
ما تكتر الشطة،،،

عبدالمنعم الطيب حسن

22-08-2020, 05:59 PM

ماشين السيرة، والبص امتلأ حتى فاضت جوانبه،
صاحبنا عسمان شواكيش جاء متاخر كعادته، وما لقى مكان حتى للوقفة،
بقى رقَيِّقْ وانحشر جمب اصحابو،
والوقفة صعبة في الحتة الضيقة،
المهم قام راح قاعد فوق كرعين صاحبو عادل،
استقر وانبسط
شوية اتلفت لصاحبو عادل قائلا:
اسمع هوي اوعى يكون في ضميرك في حاجة....
ههههها

عبدالمنعم الطيب حسن

23-08-2020, 10:03 PM

انور وانوار تلامذتي بدرسم خصوصي في مكة، تلاميذ لطيفين وارواحم حلوة، لا اشعر باي ملل في حصتم،
مرة انوار والدتها ندهت ليها واعطتها، كيك
للاستاذ الذي هو حضرتي،
البنية اللطيفة جابت الكيكة وختتا، وقالت لي يا استاذ
امي كريمة، تجيبلك الشاي والقهوة والتمر والكيك،
دا من غير الفلوس يا استاذ،
حكيت القصة دي لصاحبنا العريس لتوه وعروسته الجميلة،
وقمنا بعد فترة عزمناهم عشا وبعد العشاء والونسة قالوا ماشين،
اصرينا ان يمطو السهرة زيادة، كعادة السودانيين،،
فقالت العروس: والله عندي عدة مردومة، ومكوة غيار الراجل دا،
وصمت فترة واضافت ضاحكة:
دا من غير الفلوس يا استاذ...

فتح العليم الإمام

24-08-2020, 06:14 AM

تحياتى منعم وصيوفك هنا
ياخى بوست جميل جمال ذاتك وذكريات ممتعة لزمن جميل لن يعود .
كرونا طلعت حاجات جميلة منك.
ومبروك اللابتوب واكيد العيال حفظهم الله ما حا اريحوك فيه .
كن بخير وعافية

عبدالمنعم الطيب حسن

24-08-2020, 10:10 PM

تحياتى منعم وصيوفك هنا
ياخى بوست جميل جمال ذاتك وذكريات ممتعة لزمن جميل لن يعود .
كرونا طلعت حاجات جميلة منك.
ومبروك اللابتوب واكيد العيال حفظهم الله ما حا اريحوك فيه .
كن بخير وعافية

فتح العليم؛ يا امريكا؛ اشواق اشواق يارجل... تصدق كل يوم في طريق العودة من المكتب؛
اتي من قلب شارع الستين متجه عند دوار الكويت غربا؛ ووجهي اذن استوب معهد الادارة؛
مستشفى عبيد، انعطف يسارا نحو شارع الجامعة يقابلني بيتكم الاليف على يمين؛ وما زال صاحبي نصار الحاج
في ذات البناية كما بقول اهل الامارات؛ غالبا ما اتوقف في اول بقالة جنوب منزلكم العامر؛
اتزود ببعض بسكويتات؛ وماءا؛ واشتري عصيرات وشيبسات للطيوبي واخوانه؛
مرة قابلت محمد ولد صاحبنا نصار الحاج، ومرة مشينا زيارة لاسرة بنت من ودرملي تسكن في نفس بنايتكم؛
توفي زوجها وترك لها اطفال صغار؛ له الرحمة
انت كيف يا صديقي مع امريكا والكرونات وصاحبنا ترامب؛ ترامب الفسل...
لا شك ان امريكا حلوة تحياتي لاولادك الشباب؛ ولكل الاحباب بطرفكم؛
هنا نحن نعد العدة للعودة للوطن؛ لقد شبعنا غربة؛ يا صديقي
امنياتي ان نتقابل في الجزيرة الخضراء...
ياخ انا بحب الجزيرة سرا وعلانية؛ الله عالم...
وطبعا كلنا بنحب السودان واهلو؛
وكلنا نحلم بالرجوع؛ اي مغترب يحلم بالرجوع...
صاحبي عاطف بعد ربع قرن في امريكا رجع السودان واشترى بيت في الحاجي يوسف؛
وبوكسي وصاريوما في بحري ويومين في فارس الكتاب؛
الغريبة ولده الكبير ارتبط بالسودان وقال ما راجع ذاتو؛
صاحبي رجع امريكا لاخلاء اطرافه وسيعود بمن تيسر من الاسرة؛
هوي يا عليم طولت عليك ياخ؛
والله شوق الشوق ياخ؛

عبدالمنعم الطيب حسن

26-08-2020, 06:55 PM

ولدين شباب من الاعراب اهلنا، ويبدو انهما متخاصمان،،،
قاعدين مع شلة بنتونس في مناسبة،
وكان الجو بشائر خريف... وقبايل عيد
فتمنى احد الولدين الاعراب مية كبش
سمين يبيعهم في العيد القرب دا ويركب طوالي
بكس ٨١
العرابي التاني قال: ان شاء الله ربنا يديني مية مرفعين
جعانات شديد، ياكلن المية خروف القبل شوية ديل
كل ذئب يقوم بكبشو،،
الاعرابي التاني زعل يا حاسد يا راصد
والشكلة دورت،
حجزناهم وما زلنا نضحك
هههههها،

فتح العليم الإمام

27-08-2020, 01:20 AM

فتح العليم؛ يا امريكا؛ اشواق اشواق يارجل... تصدق كل يوم في طريق العودة من المكتب؛
اتي من قلب شارع الستين متجه عند دوار الكويت غربا؛ ووجهي اذن استوب معهد الادارة؛
مستشفى عبيد، انعطف يسارا نحو شارع الجامعة يقابلني بيتكم الاليف على يمين؛ وما زال صاحبي نصار الحاج
في ذات البناية كما بقول اهل الامارات؛ غالبا ما اتوقف في اول بقالة جنوب منزلكم العامر؛
اتزود ببعض بسكويتات؛ وماءا؛ واشتري عصيرات وشيبسات للطيوبي واخوانه؛
مرة قابلت محمد ولد صاحبنا نصار الحاج، ومرة مشينا زيارة لاسرة بنت من ودرملي تسكن في نفس بنايتكم؛
توفي زوجها وترك لها اطفال صغار؛ له الرحمة
انت كيف يا صديقي مع امريكا والكرونات وصاحبنا ترامب؛ ترامب الفسل...
لا شك ان امريكا حلوة تحياتي لاولادك الشباب؛ ولكل الاحباب بطرفكم؛
هنا نحن نعد العدة للعودة للوطن؛ لقد شبعنا غربة؛ يا صديقي
امنياتي ان نتقابل في الجزيرة الخضراء...
ياخ انا بحب الجزيرة سرا وعلانية؛ الله عالم...
وطبعا كلنا بنحب السودان واهلو؛
وكلنا نحلم بالرجوع؛ اي مغترب يحلم بالرجوع...
صاحبي عاطف بعد ربع قرن في امريكا رجع السودان واشترى بيت في الحاجي يوسف؛
وبوكسي وصاريوما في بحري ويومين في فارس الكتاب؛
الغريبة ولده الكبير ارتبط بالسودان وقال ما راجع ذاتو؛
صاحبي رجع امريكا لاخلاء اطرافه وسيعود بمن تيسر من الاسرة؛
هوي يا عليم طولت عليك ياخ؛
والله شوق الشوق ياخ؛

يازول ياجميل القلم وجميل السياسة والنضال.
اعدت لى زكريات جميلة فى تلك البناية والتى قضيت فيها أجمل السنوات. فكم اشتقت لها ولبقالات الحى .
رحم الله عمنا حسن فقد سمعت بوفاته ورحيله حيث ترك الصغار ولكنها إرادة الله .فكنت لصيق به وتاريخه حيث عمل موظف في جامعة الخرطوم ومنها إلى اليمن وأخيراً السعودية الى وفاته . أسأل ان يرحمه رحمة واسعة .
فكم اشتقت الى تلك الديار من غبيرة الى البطحاء .
التحية الى نصار الحاج جارى السابق ونعم الجار.
ياخى ما طولت فحكيك حلو
التحية الى صاحبك عاطف على قراره بالاستقرار فى السودان.
اسال الله ان نتقابل فى الجزيرة .

عبدالمنعم الطيب حسن

27-08-2020, 07:57 PM

العروسة هنا محظوظة وشفتا ومديرة بنك ياخ
ما بتتمقلب، كما حصل لبتنا او اختنا في القصة ادناه
التي حكاها لي صديقي محمد الهادي،
وقال انه يعرف العريس مع وقف التنفيذ دا
عريس خلا، ورقاد واطة
الى قصة ابجيقة دا
المهم تم ترشيح فتاة لهذا الرجل وتم التعارف
بينهما وزمن الخطابات المكتوب على غلافها قابل للكسر
اكيد جوة فيها صورة، رسلي صور
رسل صورة،
ارسل صورة التخرج ياخ الشعر كيف
والوسامة والعضلات والجهاز التنفسي كلو تمام،
الصورة دي قبل اكتر من عشرين عاما حسوما،
وتمت المراسم، والعروس في المطار
مشى لاستقبالها عريسنا واختو وزوجها،
وسلمت عليها الاخت ودا عريسك يا فلانة
الف مبروك والهناء والسعادة وتغلبيهو ب....
التفت العروس ورأت كهلا متهدل المنكبين
مكترش البطين صلولع، في نهاية اربعيناته المجيدة يرفل
وفي عمر ابوها، كانت تتامل ان ترى شابا مفتول العضلات،
مليان الشعرات، قوي البنية، غير منهار ومتماسك ووسيم وتلاتيني
انهارت عروستنا التي لتوها،
انهار عالمها واحلامها، وصرخت باعلى صوتها ولم تصافح
يد العريس الممدودة من زمن تغلبيهو بالعيال
امسكت بها اخت العريس واحتضنتها
لتهدي من روعها،
اتلم السودانيبن مفتكرينو عزاء
وبدو في الانسحابات،
وحلفت الا ترجع بطيارتا دي،
المهم كما يقول محمد الهادي
بعد اسبوعين من مكوثها ما بين المستشفى
وشقة اخت العريس ولاحقا شقة قريبتها
رجعت البنت لاهلها، وقد تحصلت على لقب مطلقة
بلا ذنب جنته سوى احلام من جانبها
واكاذيب وزيف ودسدسة وغتغيت من جانب
العريس التعيس،

عبدالمنعم الطيب حسن

28-08-2020, 10:40 PM

يسميه رواد التواصل الاجتماعي، الكومنت الفشيخ،،
ويسميه بعضهم القفلة الحراقة،،،
وهو عموما
اخر كلام، حيث لا كلام بعده،،
مثلا

في معرض الكتاب، اشترت زميلتنا كتاب لماذا رفضت الماركسية لمصطفى محمود،
زملينا عنكبة، قال ليها اقري الماركسية وارفضيها انتي،
لكن ما ترفضيها عشان رفضا زول تاني، وانتي اصلا ما قريتيها، ليه تخلي زول يقرر نيابة عنك

عبدالمنعم الطيب حسن

29-08-2020, 06:57 PM

عادل عبدالله صاحبي شديد، من زمن خاطب وبتجيهو خطابات
في مكة قابلة للكسر برضو،
اشترينا اقامات، كل الشلة عن طريق عادل دا في الرياض، فهو اول واحد
من الشلة دخل الرياض، هسا اتطور ومشى عفيف،،
المهم عادل مشى من شقتنا بتاعة العزابة بشيلتو
زول عرس، وعرس طب وانبسط،،، مشينا نجيبو من المطار،
بعربية عم اسامة الله يرحمو، انا ومحمد الطيب ود عم عادل وود خالتو،،
واسامة دا جيلنا لكل لانو عم الجماعة ديل فصرنا نقول له عم اسامة
انا صاحبم كلهم،،،
محمد اكترنا لطفا ومنفلت،،،
وفي لفة المطار مكتوب هدي السرعة،،
محمد قال بالله يا عم اسامة هدي السرعة
هسا عادل دا تلقاهو قراها هُدى،،
بعد ٩ شهور انجب عادل وهدى بنتا
سماها امل كما كان مخطط قبل الزواج
بعد سنوات جاءت امل الرياض، ثم رحلوا المدينة حوالي
٧ سنوات ورجعوا، مشينا نسلم امل بقت كبيرة وفي المدرسة
سالتها يا امل بتعرفيني، قالت لا والله ياعمو
قلت ليها،،
يا بنتي والله انا بعرفك مما كنت مجرد فكرة،،
امل تخرجت من الجامعة وعلى وش زواج،،
.........
في المنصورة سالت صديقي النعمان جمعة يا نعمان ان طولت في البلد دي
قال لي: والله انا من زمن يوسف دا كان كيس بس
يوسف دا كان يلعب جمبنا في اجتماع الجمعية العمومية،،
ولد
زميلنا وزميلتنا التي ما زالت طالبة وقتها

عبدالمنعم الطيب حسن

31-08-2020, 07:57 PM

صاحبنا من ايام الدراسة حتى اغترابه الحالي،
مازال عجولا متعجلا، المحاضرة الساعة ٨ تلقاهو من ستة
الا حتة لابس ومشنط وشارب الشاي، ومتاهب للخروج،
يا وهم حرس الجامعة بكون ما داوم،
المهم عجلة من امها، يكون متوترا ودائما كان الريح تحته،
يخاف من الزمن، ويقول لو عرستا عقب التخرج هسا ولدي
كان اتخرج، ونفرض اتخرج يعني شنو؟
طبعا صاحبنا عرس في الخمسين طق وعندو طفل،
المهم شفقة من امها، قريبات دي زرته ما زال شفقان طب،
كنت ادرس طالبا سودانيا، في تالتة ثانوي، هو التالت في الترتيب ابوهو مهندس ومغترب ومرطب
اخوانا الاتنين الاكبر يدرسوا طب في امريكا عديل كدة،
الاصغرين في الثانوي برضو والمتوسطة الكلام قبل حوالي ٢٠سنة،
كان عمك دا متوتر شديد كل يوم بعد الحصة يونسني ياخ انا لو تزوجت عقب
تخرجي طوالي كان هسا اولادي كلهم اتخرجوا،
لا حولااااا
المهم الاولاد كلهم تخرجوا وعرسو واستقروا في امريكا،،،
عمك ذاتو هسع في الواشنطون دي سي،،،
قابلت صاحبي مضهب، في شمبات العصر وفرحت للقائه وضمنتا ونسة ممتعة للحلة
وين ما شي يا زول سالني صاحبي،،،
الحلة وانتا ذاتك ماشي الحلة مفروض، حلة شنو فيها شنو، ومستعجل ليه،
المهم اقنعني انو نرجع بحري تاني ونتغدى في مطعم الخيام، وناكل خشاف،،
ولما تحججت بمسالة الزمن قالي حكمة ما زالت نبراسي:
ما تخلي الزمن يسيطر عليك، تملك زمنك، تحكم فيهو
تسعد بساعاتك كلها، ( ما مضى لا يعاد، والمؤمل غيب، ولك الساعة التي انت فيها)
لا تضيع زمن حر وجميل وماثل ولايف
بزمن فات وروح،
وزمن جائي، وزمن لسا،،،
،،،،،،،،،

عبدالمنعم الطيب حسن

02-09-2020, 10:53 AM

مجاهد زميلنا من كلية الاداب، ومن الدلنج برضو،
،
يوم سالته يا شاب، هل هنالك امطار ياما، في الدلنج ؟
(لا تنسى ثقافتنا مصرية)
الامطار وضعها كتير في الدلنج، هل الدلنج مطيرة ماطرة،
ضحك الرجل، واستعدل في جلسته،
وقال عبارة
واحدة تعبر من الكومنتات الفشيخة
بدليل كوني حافظا منذ اكتر
من تلاتين سنة،
قال:

ياخ ميكائيل اساسا من الدلنج،
هههههها،
بالمناسبة شفتا مجاهد دا قبل فترة
قليلة في التلفزيون
بفتي، طبعا ما حضرتا البرنامج
كوني ما قاعد استمع لاي فتاوي،
من اي كائن كان،

عبدالمنعم الطيب حسن

03-09-2020, 08:01 PM

الشمارات، كما يقول جيل اليوم، ويسميها اهل الجزيرة عنكوليب الكلام، وشعبيا معروفة بالقطيعة، وهي تكاد تكون غريزة، كل الشعوب تحبها، وما اجتمع اثنان منسجمان والا كان زميلهم موضوع الشواء،،
في مجال العمل اكتر تفشيا، الكل يتبرع بشمارات ليتقرب من المسؤول،،
المهم مرة قاعد في راكوبتنا مع اخواتي وكلنا بنقطع فوق واحدة، الواحدة دي في نص القطيعة جاتنا زيارة ووقفت في نص الراكوبة، والقطيعة مستمرة، ياخ البنات ديل تقول اصابهن العمى فجاة،
حاولت انقذ الموقف، وقتا ليهم هوي فلانة دي بتسلم عليكن، فجاة انتبهن وبالغن في الاحتفاء بها،،
شوية مشت، وفكن الضحكة المكتومة من زمن فلانة دي بتسلم عليكم،
وقال اختي الحكيمة:
اخر الزمن دا باب السترة بقى مخلع
الزول تكون بتقطع فوقو تلقاهو واقف فوق راسك،، يسمع نص القطيعة،،،
.........
انتشرت مؤخرا ظاهرة القطيعة فوق اقاربك من الدرجة الاولى، عادي واحد من الحلة يجي يقطع ليك فوق اخوك،،
مرة واحد حاول يعملا معاي ثبتو في اللحظة
بعد كم يوم لقيتو وقد اشاد بي في المجالس،،

عبدالمنعم الطيب حسن

05-09-2020, 05:19 PM

في مصر جاء مهندس سوداني ومغترب،
قال عاوز يعرس بنت مصرية،
المهم لقى العروس وجاءت امو واخواتو من السودان للمنصورة ليحضروا العرس، في طالبة ديل اهلا
اها عزمتنا، يوم العرس بعض الطلاب وبعض
الطالبات، حضرتي كنت من الضُمُن، اول مرة نشوف العريس واهلو،
اثناء الحلفة يوزع اهل العروسة
زجاجات الكوكولا على المعازيم،
بعض الشباب يتخاطفون زجاجات الكازوزة،
ويشربوا فيما ما بينهم،
ام العريس واخواته، لما شافن المصريين في بعض يوزعون، ويتخاطفون فيما بينهم
بدأن ياخذن ويتخاطفن زجاجات ويوزعن على
الطلبة، والطالبات ،،الدم بحن،
حضرت عرس في حلتنا بعد طول اغتراب،
والعشاء كان سفرة، خيم صمت رهيب على مجموعتنا في السفرة،،
لقيت نفسي بتونس براي،
اها قدامي الفول قعدت آكل في فولي داك

وصديقي الانتيم زعلان، ويلكد فيني وانا مستغرب، مرة قالي اكل ياخ زي الناس، حاولت ولم اوفق، شايف زحمات، وايادي تتطاقش، رجعت لفولي، حيث كنت تقريبا براي،
بعد الاكل صاحبي ميت من الضحك، يا زول انتا اكلت شنو،
فول شنو ياخ،،،
الناس دي اولا بتهجم على اللحمة ثم الصلطات، ثم الطابيخ، والخشاف والتحلية،
الفول دا اكلت فيهو براك،
يا مغترب يا تعبان،
ههههههها

عبدالمنعم الطيب حسن

07-09-2020, 10:25 AM

واحد من حلتنا- ما صاحبي - لكن مستغل حكاية انو المغترب اي ونسة بتنفع معاهو، لذلك كل ما ارجع اجازة يقابلني ويحكي نفس القصة، طوال اكتر من عشرات السنوات يحكي لي ذات القصة، سميته سرا رجل القصة الواحدة، بيضة ديك ياخ،
الاغرب انو القصة تافهة جدا، وبائخة بوخ شديد،
والله انا كل ما يبدا فيها اتوتر، ولكن لاني ضيف، بجامل، في الزول لحدت ما تخلص المكرورة الملل،
اخر اجازة، لقاني في فرقة ولحسني القصة ذاتا للمرة الالف، بصراحة فاض بي كلمت قريبي بالمعاناة دي، بعد ما خلصت صبيبي مع قريبي وحبيبي، اشوفو ليك يكشْوِل في نعلاتو وقال لي عن اذنك، يا زول مالَك قطعتا الونسة ووشيك اتغير
قالي ماشي للتافه دا الفَّها معاهو،،
ضحكت واثنيته عن الذهاب، مع وعد مني ان لا اتونس مع الاستغلالي دا تاني،
خلاص ياخ من انا طالب نفس للقصةالبايخة دي،
معقولا ياخ، الدنيا دي ملانة قصص، لساتي ما قدرت افهم ليه كدا، قتا اكلمكم امكن الاقي تفسير،
سلملم،

عبدالمنعم الطيب حسن

09-09-2020, 01:55 PM

منطقة كاملة؛ حوالي عشرة قرى...
متصلة مترابطة؛؛
ما ان تتهب للدخول امنا مطمئنا حتى تقابلك الزراعات؛
اولا رائحة البرسيم
وتستمر الرائحة تصحبك
رائحة التوغل في الحقول....
لا تعرف ان كنت تتوغل في مزارع ام مساكن
حتى تولج لداخل البيوت الرحبة الجميلة
ظلوا يبنونها على مدى العمر ،،،،
العمر كله...
فاضحت جنة في الارض
اجمل سكن...
فجاة تصحى تلقى دا كله كانه حلم
المياه فوقك وتحتك
والطوفان يجتاج المدى
.....
واوسي غرب؛ جزء من واوسي الكبرى ذات المصير؛
كلهم اهل وجيران واحباب
وعلاقة متجذرة من قرون..

من بوست لي بحلة تاني، انشره الان، بعد ان عم الفيض كل منطقة ودرملي، وكل منطقة واوسي غرب، وهي جزء من منطقتي منطقة واوسي الكبرى،
ماساة لاهلنا في شمبات، وفي الحلفايا، وفي الكدرو وفي الخليلة، وفي الفكي هاشم، وفي السقاي، ودمار مكتمل في التمانيات، والجيلي وواسي، وودرملي،،،
ودي كلها منطقة متداخلة، والاقرب اكثر تداخلا،
كماهو الحال، في ودرملي، وواوسي،
بالمناسبة مدام حضرتي من ودرملي،،،
سلام وتحية،،،

عبدالمنعم الطيب حسن

09-09-2020, 02:09 PM

تآلف الاهالي مع النهر، وايتلفوا معه...
وامتزجوا به؛
حتى ولان قابلت احدهم فهو روح بماء النيل معطونة؛
اما اذا سلمت او آنست ينفحك العبير
وريحة الطمي ويلفحك الدعاش...
يعرفون النيل قطرة ماء قطرة ماء
وذرة كركجيج
ذرة كركجيج
سنبلة سنبلة
شخيب حليب
شخيب حليب
حزءا اصيل من عالمهم؛ يرون ماءه النضير
ساعة الاصيل
ساعة السحر
على ضفته يقفون ربما يوميا يبثونه لواعجهم
يشكرونه على كل هذا العطاء...
يسمعون هدير موسيقاه الجزلة قُبيل الهجعة
بُعيد الاسحار
فهو ابدا رفيقهم في الطيف او في الصحيان
.....
حتى لكان الواحد فيهم يبدو تماما نيل
في تمام انسيابه العبير....
......
لذا لم يفارقوا الضفة
ولم يهن النيل عليهم
....،
فجأة غدر بهم الحبيب
وامتلأت الساحات بالفيضانات
وغمرت المياه كل ارض
وكادت ان تبلغ عنان السماء
السماء السابعة
يعلم الله
مياهات مياهات مياهات
.....
ساعود والعود نيل؛

اليوم هما مداخلتين على غير العادة التي هي مداخلة يومية كون موضوع الفيض مرتبط، والماساة مريعة على كل البلد،،

وبالمرة نتمها مية،
اصلو المية مية واردب،،

عبدالمنعم الطيب حسن

11-09-2020, 03:08 PM

عمنا فيصل، وصديقنا حمد، وحبيبنا علي، التلاتة اولاد دفعة، وحلتنا، عمنا فيصل وحمد موظفان ميريان، دفعتهم علي تاجر، وعندو مداخيل ومعاهو نقد واصول وهارت كرنسي، جميعهم، يسكنون في حلتنا،،القصة التالية على لسان عمنا فيصل قال: عصرا هالك واقفين في مواصلات الحلة في بحري انا وحمد اخوي دا،،
لانعلم لا ندري الا الكامري المكيفة تدق البوري، ويطل وجه صاحبنا علي مناديا: فيصل حمد تعالو،
ومشينا اركبو ركبنا، ماشين الحلة نعم يلا بنا
ما زال عمنا فيصل يحكي، اتاريها حلتنا قريبة كدة
قربنا ننوم مع التكيف ولكن منعتنا الونسة والجوع من النوم، توشك صاحبنا دخل البيت،
شوية جابت الشغالة الاثيوبية صينية مليانة لحم ودجاج، وشية وكبدة وكسرة ولا مدينا ايدنا عليها انا والكاشف اخوي، انملينا تب، شوية تسحب الشغالة الصينية وتاتي باخرى بها فواكة وعنب وتفاح، وبسبوسة وخشاف، وعصير منقة وجوافة موز بلبن، وجاء الشاي المنعنع وحلو،،،
اترعنا زين، مع الصالون المكيف والتغذية الجيدة، شوف عيني صاحبي حمد عينيهو بقن حمر،
باختصار واصل عمنا:
صاحبنا بعربيتو رمانا جنب بيتنا لا ايد لا كراع،
اجرجرت ودخلت البيت
رقدت في السرير بملابس العمل،
المرة قالت لي اسوي ليك اكل
اضاف:
والله لو بقدر اقوم كنت اديتا كف،،،

عبدالمنعم الطيب حسن

14-09-2020, 01:55 PM

زمان في المنصورة كان اصحابنا بطلعوا مجلة شهرية ذات مواضيع مختلفة، المهم مرة اخدوا صنة طويلة، وطلعوا عدد خاص بالشعر،
صاحبي قال لي جماعتك ديل شكلهم فتروا،،،
ههههههههها
فعلا فقد كان ذلك العدد الاخير،

عبدالحكيم

14-09-2020, 03:39 PM

بالمناسبة مدام حضرتي من ودرملي،،،
سلام وتحية،،،

لا أدري لماذا وقفت ها هنا ؟
اذا هي معك لماذا لم تنتدبك للوقوف مع اهلها ؟
واذا هي هناك فلماذا لم تهرع للوقوف إلى جانبها ؟
وهل السلام والتحية لها أم لنا ؟
تساؤلات تسببت فيها الفيضانات ....اللهم نجي اهل واوسي وودرملي وكل متضرريها في السودان ..
سلام وتحية ،،،
سَلامٌ، وَإنْ كَانَ السّلامُ تَحِيَّةً،فوَجْهُكَ دونَ الرّدّ يكفي المُسَلِّمَا ...

عبدالمنعم الطيب حسن

14-09-2020, 10:28 PM

لا أدري لماذا وقفت ها هنا ؟
اذا هي معك لماذا لم تنتدبك للوقوف مع اهلها ؟
واذا هي هناك فلماذا لم تهرع للوقوف إلى جانبها ؟
وهل السلام والتحية لها أم لنا ؟
تساؤلات تسببت فيها الفيضانات ....اللهم نجي اهل واوسي وودرملي وكل متضرريها في السودان ..
سلام وتحية ،،،
سَلامٌ، وَإنْ كَانَ السّلامُ تَحِيَّةً،فوَجْهُكَ دونَ الرّدّ يكفي المُسَلِّمَا ...

هلا عبدالحكيم،
كيفك يا حبيب
السلام والتحية لكم،
والبوست اصلا من السنة الماضية
الفيضان الفات، واوسي وودرملي منطقة واحدة تقريبا وهم اهل، وجيران منذ نحو قرون،،،
نقلت من البوست مداخلتين، لعودة الفيض تاني
وهذه المرة اعنف،
تحياتي يا سمح، وسلامي الاكيد،،،

عبدالمنعم الطيب حسن

21-09-2020, 06:57 PM

حكت مريم اختي الكبيرة، انه ومعاها مجموعة من بنات الحلة ذهبن يكفرن للبنات اللائي وقد رسبن في امتحانات الشهادة الثانوية ذات مارس ماسك كتف ابريل، قالت والله البنات كلهن لقيناهن زعلانات ويبكن، الا نفيسة بت حاج الصافي، لقيناها تاكل ليها في بتيخ،،،

عبدالمنعم الطيب حسن

30-09-2020, 06:31 PM

قبل نحو ربع قرن من الزمان، كنت عاوز اعمل حمام بلدي في بيتي الجميل، في حلتنا، وقد قررت ان يحفر العمال الحفرة في منتصف حوشي من الناحية الشرقية، جاءت الوالدة عليها سلام، وقالت ان المكان دا غير مناسب خالص، يا ولد في زول بحفر حفرة محل ونستو ونومو
خليها هناك واشارت للركن الجنوبي الشرقي حيث بيت اخوي، في ساعتها تم تغيير المكان لاقصى حدود حوشي في جزءه الجنوبي الشرقي، وفعلا اكتمل، وعملنا لاحقا فاصل مع اخوي، في كل الجزء الجنوبي من حوشي، وعملنا بابين
للحمام واصبح مشتركا،
منذ ذلك الزمان ما زال هذا الحمام
يخدم الاسرتين،
طبعا قبل خمس سنوات اتفلهمتا كمغترب مشلهت وعملت سايفون لاولادي حيث يعانون من الحمام البلدي،
اخوي برضو عمل حمام تاني قبل اقل من سنة،
وما زال هذا الحمام بعيدا يخدم كل من اراد ان يكون بعيدا في لحظات الخلاء
الوالدة حكيمة ياخ، كانت اخر من يقرر،
وقرارا الكمدة بالرمدة،
يمة سلام ياخ ومشتاقيين،،
والله شوقنا دخاخين دخاخين،

عبدالمنعم الطيب حسن

08-10-2020, 08:51 AM

خالي رتش مان يوم اخد لفا على كل نساء الفريق، ورشا كل حاجة بمية الف،
تحكي لي امي وقالت لي لما وصلني سلم واتونس ولما جاء ماشي قاليها ياحاجة انتي عندك تلاتة اولاد في السعودية فما محتاجة،
وتضيف امي انها كانت مفلسة تلك الايام، واولادا التلاتة كل واحد طاعن الارض، ومصهين وتاكِل
المهم قالت لاخوها مستورة والله، هههههها
وبعد ما مرق اضافت
البقولوا سمين يقول آآآمين

عبدالمنعم الطيب حسن

15-10-2020, 07:20 AM

الشلة من حلتنا، مشوا الفرن جابوا الرغيف
وغشوا بقالة عصام اشتروا طحنية ملفوفة في جريدة،
ومشوا الخور رملة باردة يستانسوا، وياكلوا،
جاء صديقهم متاخرا،
ادوهوا رغيفة، وواحد ناولو باقي الطحنية القليلة، بجريدتا قائلا:-
هاك قلع في الكتابة دي اتعشى.....

عبدالمنعم الطيب حسن

24-10-2020, 05:52 PM

اب

عبدالمنعم الطيب حسن

17-11-2020, 08:51 PM

عمنا عبدالرحمن موظف معانا في ذات الشركة،
الحقيقة انا موظف معاهم، فقد جيت ولقيتو في الشركة
الاقدمية يجب ان تُحترم،
المهم جاءت المناسبة وقال لييا منعم انت عمرك ٤٠ سنة، النصيحة انبسطتا ما اكضب عليكم ههههها
ولكن يا استاذ!!!
احمد ولدك مواليد كم، احمد مهندس اتصالات على راس العمل،
قال لي مواليد ٨٠
عمنا استدرك قال لي خلاص انت مواليد
٧٩ ....
شكرت الاستاذ، وغادرت هسا يقوم يغير رايو كمان،،،

عبدالمنعم الطيب حسن

18-11-2020, 07:00 PM

كان سعر البتيخة في حدود ٥٠
سالت البائع عن السعر، شافني مغترب وقال يغشني
قال الواحدة بمية، طلبت ٢ واديتو ميتين، استلم البائع المبلغ تحيط به حسرة عظيمة
قبل ان نتحرك سألني اخوي الاصلن مستغرب في القصة من بدايتا، ليه تشتري بالضعف،
قتا ليهو عشان البائع دا يموت بالحسرة كونه لم يقل ان البتيخة بالف للمغترب المغبي دا،،،

عبدالمنعم الطيب حسن

30-11-2020, 12:41 PM

٢٠٢٠
سنة صعبة على صعيد غياب اعزاء
وعلى صعيد تورط الوطن في مزيدا من الفشل،
وعلى صعيد تعطل العمل، وانسياب الحركة،
٣ شهور سدة في البيت، وصلنا مراحل من القلق الارق
والتلاتة البعدا بنص ايقاع ونص حركة
مع كامل الالتزام بالاحتياطات،
التلاميذ لم يذهبوا لمدارسهم لمدة عشرة شهور،،،
كلنا نعيش في عمق الازمة بطريقة مختلفة،،،
نرجو السماح لعدم متابعة البوست لفترة قد تطول
فكلنا في الهم كرونا،،
والدنيا مجنونة،،

........
ساواصل

عبدالمنعم الطيب حسن

08-12-2020, 10:43 PM

واحد تعارفنا في النت، سالني .....و...؟ واتخرجت متين لما قتا ٩٢،،،
زعل

عبدالمنعم الطيب حسن

08-12-2020, 10:46 PM

وانت مالك ياخ ٩٢دي انت ول انا،،،
ههههههها

عبدالمنعم الطيب حسن

08-12-2020, 10:48 PM

/في الرياض سالني سوداني متزوج، طبعا،، عندك اولاد اآآأي،
وسالني عن عمر اكبرهم، ولما قتا،
زعل برضو
هههههههها

عبدالمنعم الطيب حسن

08-12-2020, 10:53 PM

وواحد تاني سالني ليك كم سنة مغترب، كلمتو،
سالني من كم حاجة طلعت ما عندي
زعل برضك

عبدالمنعم الطيب حسن

08-12-2020, 10:57 PM

العالم دي وكت الحقيقة بتزعلا
بتسال ليه طيب،،
اساسا،

عبدالمنعم الطيب حسن

17-02-2021, 09:46 PM

واحد من حلتنا كان معانا هنا، قرر يمشي السودان
وجاءني مودعا حاولت اثنيه خاصة وانه مرطب مع محامي شهير
ولما راى محاولاتي
قالي اسمع يا صاحبي انا جيت اكلمك واودعك
ما جيت اشاورك،، ههههههههها
المسالة محسومة،
ساعود لافصل ...
تحياتي للحضور الباهي لونو،
الوضاح وجميل،،،

ناصر يوسف

18-02-2021, 08:10 AM

عبدالمنعم الطيب حسن

18-02-2021, 09:37 AM

الحبيب عبد المنعم

حبابها شوفة قلمك مزين للبيت الكبير سودانيات

هلا حبيبي ناصر تسلم اخوي...
صاحبي وصديقي محمود دا من جيلي قدامنا بساعات في ثانوية الجيلي، درس الحقوق وعمل محاميا اغترب كم سنة عمل بيت في الدروشاب، مكتمل وفاضي وغير مؤجر، ولا عاوز،،
وقرر فجاة الرجوع
عندو بيت في الحلة وكان يعمل مدرسا اثناء الدراسة واستمر بعدها سنوات يعمل مدرسا ومحاميا، المهم اغترب ورجع في ذات وظيفته معلما بالمدارس الابتدائية، في الشيخ عبدالقادر، يعمل ويسكن في الشيخ علي يمشي مسافة ظ£كلم ومثلها في الاياب،
بقى سمح وناير ومرطب وزوجتو برضو مدرسة جمب البيت، المهم الروقة ظاهرة في عينيهو،
عندهم بنات توأم في الثانوي قالي لما يدخلوا الجامعة بمشي اقعد معاهم في الدروشاب
ولما يتخرجوا برجع الحلة وقد ابيع بيت الدروشاب،،،

.....
الناس تدير حياتا بطريقة مختلفة وموحية صديقي نموذج ناجح اعتبره، ومستقر ومرتاح،،

ناصر يوسف

18-02-2021, 02:58 PM

هلا حبيبي ناصر تسلم اخوي...
صاحبي وصديقي محمود دا من جيلي قدامنا بساعات في ثانوية الجيلي، درس الحقوق وعمل محاميا اغترب كم سنة عمل بيت في الدروشاب، مكتمل وفاضي وغير مؤجر، ولا عاوز،،
وقرر فجاة الرجوع
عندو بيت في الحلة وكان يعمل مدرسا اثناء الدراسة واستمر بعدها سنوات يعمل مدرسا ومحاميا، المهم اغترب ورجع في ذات وظيفته معلما بالمدارس الابتدائية، في الشيخ عبدالقادر، يعمل ويسكن في الشيخ علي يمشي مسافة ظ£كلم ومثلها في الاياب،
بقى سمح وناير ومرطب وزوجتو برضو مدرسة جمب البيت، المهم الروقة ظاهرة في عينيهو،
عندهم بنات توأم في الثانوي قالي لما يدخلوا الجامعة بمشي اقعد معاهم في الدروشاب
ولما يتخرجوا برجع الحلة وقد ابيع بيت الدروشاب،،،

.....
الناس تدير حياتا بطريقة مختلفة وموحية صديقي نموذج ناجح اعتبره، ومستقر ومرتاح،،

التحايا ليك و لصديقك محمود

و تبقي الدنيا إنجمااااااامة و راحة بال يا صديقي

عبدالمنعم الطيب حسن

20-02-2021, 03:11 PM

التحايا ليك و لصديقك محمود

و تبقي الدنيا إنجمااااااامة و راحة بال يا صديقي

محمود زول عصامي وقدامي وقنوع...
طبعا اهلنا المعاك في المصفا كلهم بعرفوك،،
بلغ سلامي لديار الاحبة والاحبة بطرفك،،،
كل التحايا،

عبدالمنعم الطيب حسن

25-02-2021, 07:59 PM

مشينا اشترينا غويشة دهب
الغويشة غالية، واصلا انا زهجان.
اليمني بتاع المحل سالني من اسمي عشان يكتب الفاتورة
كلمتو
كتب دندون الطيب ههههههههها
ياخ معقول بالله من الله ما خلقك لاقاك واحد اسمو دندون،
اليمن ابرد شعب في العالم
قالي الاسماء ما كتيرة ياخ...

عبدالمنعم الطيب حسن

01-03-2021, 07:18 AM

صاحبنا كتب في ما معناهو
كلام ود الرضي،، بالله شوف البنات
ديل الكبرني وسمحن
رد عليهو واحد في نفس البوست
كاتبا:ده زي القال للممثلة سمية الخشاب
( وين يا خشب لما كنا نجارين )
كان ابي عليه سلام ينسجم مع اغنية
حليل زمن الصبا الماضي
وحليل زمن العشوق راضي
بصوت ترباس،،

عبدالمنعم الطيب حسن

01-03-2021, 04:26 PM

مرة فاتتني الطيارة في ناس في الحلة شمتو
وانا راجع الحلة وكنت مدخنا في المطار الزول الاشتريت من ٢ علبة سجاير برنجي اديتو واحدة قتا لي رجعا محتاج لفلوس قعدت يقلب فيها،
قتا ليهو في احتمال تكون مزورة ما اشتريتا منك قبل شوية بالفين هات الف،
اداني الالف وصلت الحلة
ناس سمعت بيك جيت راجع فرحوا،،
شفتا اختي منزغمة مارقة عرفتها ماشة للخليفة
رجعتها قتا ليها الخليفة علاقتو شنو كمان بالطيران
مدير امن المطار من حلتنا رجعني بعربية خاصة مع تلفون لزول هناك ماشي معاي لحدت باب الطيارة،، وصلت جدة في نفس اليوم مشيت الفندق حجزت للرياض بكرة واجرتا عربية من المطار وقربتا امشي عمرة
ههههههها

عبدالمنعم الطيب حسن

02-03-2021, 10:29 PM

محمد ولدي في الثانوي، اليوم كنا برانا قتا ليهو:
عااااارف يا محمد! رد سريعا: اي اي عارف🤣🤣

عبدالمنعم الطيب حسن

09-03-2021, 01:41 PM

فريق الشعلة هو الاساسي في حلتنا منذ سنة 1964 م ، في منتصف التمانينات كنت نائب الرئيس،
عملنا فريق تاني اللهيب بناء على طلب الرابطة في المنطقة، فاصبح لحلتنا فريقين في الرابطة
عثمان صاحبي ودفعتي ولاعب اساسي في الشعلة،
في مباراة فجاة قعد يشجع في اللهيب يا عسمان شنو ياخ،، وكان واقف جمب احد اقطاب فريق اللهيب وعندو عربية، وولدو يلعب في اللهيب، ولدو اسمو هشام..
سالتوا ليه تخون الشعلة، ياعسمان؟
قال هو القطب دا (ود ملاح) عندو عربية وبرجع معاهو الحلة،،
لما تسوي ليك عربية، بشجع شعلتك دي
هههههها،

النور يوسف محمد

09-03-2021, 03:53 PM

عبدالمنعم الطيب حسن

10-03-2021, 10:13 PM

سلاااااااااااااااام يا منعم
ـــــــــــــــــــــــــــــــــــــ

ياخى فكرة البوست ده عجبتنى :D
مرات كده فى حكاية ما بتكون اكتملت ، ولو ما دونتها بتروح ،

فالظاهر على حا ( اشف ) الفكرة واعمل لى بوست اكتب فيه ما تيسر الى حين

اخبارك والدنيا معاك

مرحبتين النور حبابك الف،
انا كويس، اقع واقوم،، اخوك بتذكر اي لقاء، حوار،
نكتة بسمة همسة تعليق ولو، منذ طفولتي الباكرة، لو جاءت المناسبة بتذكر الحدث المشابه لها،
وهذا ما قاعد افعله هنا في هذا البوست،
......
خذ راحتك استاذ النور، ياخ والله اكتر حاجة فارساني ان وطنيين امثالك بالاغتراب،
وعلاقات الشعب يتصدرها الدهماء الاغبياء الرعاع..
تسلم اخوي،
.....
بالمناسبة ما توصلني للمسؤول عن التامين في شركتكم، بس وانا بتم الباقي،
اخوك مندوب مبيعات محترف،
تحياتي،
زمان سالتا هندي عن اسبلنق كلمة ومعناها، الهندي قال تشتغل وتتعلم انجليزي،
دحين هسا نكتب حكاوي وقصص ونبيع تامين ههه

عبدالمنعم الطيب حسن

11-03-2021, 07:25 PM

الذين يروجون لعمرة حمدوك، ويعتبرونها محمدة، هم ذاتهم المعادل الموضوعي للذين يروجون لعدم صلاة وصيام حمدوك...
البشير كان يحج كل عام، ويعمر كل شهر
ويقتلنا كل يوم، ويفسد كل ساعة..
عموما دي سخافات نخليها،،
...
عاوزين لقمة ساهلة، وموية نضيفة، وعلاج قريب، ومقعد لطالب وطالبة في التعليم العام، والعالي بمنافسات شريفة...
وفوق هذا وبعده وقبله عاوزين
حرية.. سلام .. وعدالة،،

#نفس_الزول

.....

عبدالمنعم الطيب حسن

16-03-2021, 12:28 PM

البت كلمت خالتا بانها سوف تتزوج وان تاريخ الزواج حددناهو في شهر خمسة الجائي دا،
خالتا المغتربة هنت وباركت وطلبت من بت اختا الاثيرة تاجيل الزواج حتى
شهر ٧ عشان نحضر...
البت ردت لا حولا ياخالة، معقولة بس شهر سبعة
لا لا، شهر سبعة دا انا بكون حامل🤣🤣🤣

عبدالمنعم الطيب حسن

18-03-2021, 06:05 PM

واحد في حلتنا مراهق شديد شاف بت جميلة استحمت لتوها وطلعت ببشكيرها تقطف موية الحمام في الشارع العريض
تلكأ صاحبنا حتي اكملت القطف ودخلت بيتهم واغلقت باب الشارع وراها
وصل صاحبنا محل الموية المقطوفة لتوها وجثا على ركبتيه المراهقتين، وتكرف العبيرا،😳😳
ولانه صاحبي فقد كنت اموت من الضحك لتصرفه الغريب والمفاجي،
وسالته وان احث فيه على القيام من هذا الركوع وقد طال
يا زول الحكاية شنو،
ياخ وكت ما لاقيت اللحم الله لا بمنعنا من ريحتو وريحة شوربتو
🤣🤣

عبدالمنعم الطيب حسن

20-03-2021, 11:10 AM

الخليفة في حلتنا ، متصدر حل الاشكاليات بين الاهالي،
بعدين في مشكلة في الميدان بتاعنا بتاع الكورة.. ومجتمعين الشباب واعمامك، المهم الايام ديك كان عاضيني كلب ماخد ١٠ حقن مع مراقبة الكلب، بمشي كل يوم اطمئن على صحة الكلب، عند جيرانا، الايام الاخيرة قربتا اسوقو معاي البيت.
وكان من ضمن العلاج موية باردة في باقة
المهم الخليفة قال لي كيف تشرب قدامي،
قتا ليهو شنو شنو
دي
موية ما عرقي،
الخليفة زعل كلم ابوي،،
...
اولاد الحلة اي زول اتناقش معاهو
يقولو ليهو بهنا ليفة وبهنا ليفة عندك كلام مع اللفاها مع الخليفة🤣🤣

عبدالحكيم

20-03-2021, 03:51 PM

عبدالمنعم الطيب حسن

20-03-2021, 07:00 PM

ما قالك يا قليل الأدب ....

لا ما قال لي
الخليفة دا انا خالو
وامو بت عمتي
وابوي جدو،،
وصديقي الشخصي،
نحن اسرة واحدة، لاحقا الخليفة كل ما بلاقيني
يقول لي وين باقة العرقي... ويضحك
والحكاوي دي بنحكيها عشان نسجل التاريخ للاجيال القادمة،، كيف كانت الحياة،،
بدلا عن المشافهة،،
القصة دي حصلت وانا بعد طالب في الثانوي
قبل اكتر من تلاتين عاما،
مات فيها الخليفة.. ومات ابوي..
وانت مصر تجرحني،
....
مافيش قلة ادب في الحوار دا،،

عبدالحكيم

21-03-2021, 08:06 AM

لا ما قال لي
الخليفة دا انا خالو
وامو بت عمتي
وابوي جدو،،
وصديقي الشخصي،
نحن اسرة واحدة، لاحقا الخليفة كل ما بلاقيني
يقول لي وين باقة العرقي... ويضحك
والحكاوي دي بنحكيها عشان نسجل التاريخ للاجيال القادمة،، كيف كانت الحياة،،
بدلا عن المشافهة،،
القصة دي حصلت وانا بعد طالب في الثانوي
قبل اكتر من تلاتين عاما،
مات فيها الخليفة.. ومات ابوي..
وانت مصر تجرحني،
....
مافيش قلة ادب في الحوار دا،،

معاتبي ...
لك العتبى حتى ترضى ...

اخ عبدالمنعم بدءا للخليفة وابوك الرحمة من الله والمغفرة واساله ان يدخلهما الجنة ..
اخالك وقد ذهبت بعيدا ... وما قصدت
كل الذي عنيته وانا اتخيل الخليفة وهيبته وهو يسمع ما جاء في حكوتك .. أن يكون رده هكذا ...
وما قصدت أن اجرحك وبإصرار . حاش لله .
فيا اخي الإنسان ...نفس ..(بين جنبيه ) ..ونفس.. يتنفس به (رئتيه ) متى ما توقف اي منهما انتهى كل شي .
ففي هذه الأيام النفس والنفس تم تكميمهما بكمامة (لزوم كورونا ) ابتلاءا من رب ذي جبروت وقوة ..
اكرر لك العتبى وواصل كل حكاويك وليس بعضها .. ومن جانبي فكمامتي اتكمم بها في دنياي طبعا دون قصص دنياك وبعض حكاويك ... حتى لا اجرحك وبدون إصرار .

يا مَن يُمازِحُني في الهَزل بِالغَضَبِ
فَــرِّق فَدَيتُـــكَ بَينَ الجِــدِّ وَاللَّـــعِبِ
إِذا اِصطَلَحنا مُنِحنا بِالصُّــــدودِ فَما
تَنفَكُّ مِن غَضَب يُفضي إِلى غَضَبِ

تحياتي ...............

عبدالمنعم الطيب حسن

21-03-2021, 01:19 PM

معاتبي ...
لك العتبى حتى ترضى ...

اخ عبدالمنعم بدءا للخليفة وابوك الرحمة من الله والمغفرة واساله ان يدخلهما الجنة ..
اخالك وقد ذهبت بعيدا ... وما قصدت
كل الذي عنيته وانا اتخيل الخليفة وهيبته وهو يسمع ما جاء في حكوتك .. أن يكون رده هكذا ...
وما قصدت أن اجرحك وبإصرار . حاش لله .
فيا اخي الإنسان ...نفس ..(بين جنبيه ) ..ونفس.. يتنفس به (رئتيه ) متى ما توقف اي منهما انتهى كل شي .
ففي هذه الأيام النفس والنفس تم تكميمهما بكمامة (لزوم كورونا ) ابتلاءا من رب ذي جبروت وقوة ..
اكرر لك العتبى وواصل كل حكاويك وليس بعضها .. ومن جانبي فكمامتي اتكمم بها في دنياي طبعا دون قصص دنياك وبعض حكاويك ... حتى لا اجرحك وبدون إصرار .

يا مَن يُمازِحُني في الهَزل بِالغَضَبِ
فَــرِّق فَدَيتُـــكَ بَينَ الجِــدِّ وَاللَّـــعِبِ
إِذا اِصطَلَحنا مُنِحنا بِالصُّــــدودِ فَما
تَنفَكُّ مِن غَضَب يُفضي إِلى غَضَبِ

تحياتي ...............
ولا يهمك يا حكيم ياخ الموضوع بسيط
انا ملتزم اخلاقيا بان احكي القصة بتفاصيلها كما حصلت... لا كما اتمنى،
فعلا العبارة قد تبدو غريبة نوعا، كنت ممكن اكتفي بان هذه موية وانا بتعالج من حقن السعر،
ولكن العبارة قلتها كما كتبتها من منطلق الصدق اولا وعمر المراهقة والتمرد،
وتعامل معها الخليفة بلطف وبلغ ابوى وهو يضحك وهو زعلان شوية،
فالرجل انا خاله في الحساب، و هو الكبير مكانة وعمرا فانا في عمر اولاده،
وقتها، حتى انه قال لي لاحقا والله انا قصدي ماممكن تشرب وتتفاوض في نفس الوقت ... بتشرق يا خال،،،
الحكاية كلها في تحوير
العبارة
بهنا ليفة وبهنا ليفة
عندك كلام مع الخليفة،
(كما كنا نردد في طفولتنا)
فصارت
مع اللفاها مع الخليفة،
من الانداد، والاصدقاء،،
كل عام وانت بالف صحة وعافية
ازال الله الامراض والكرونات، وتعم الصحة العالم كله وترجع الحياة لطبيعتها،،
تحياتي، وودي💜

عبدالمنعم الطيب حسن

23-03-2021, 01:40 PM

هههها مرة جمب البوستة في شارع المزاد ركبت وعاوز انزل قصاد سوق بحري مسافة بسيطة، المهم الحافلة شاحنة فل ركبت كراع في الحافلة وكراع في الهواء
وجمبي الكمساري قتا ليهو شوف انا نازل هنا في سوق بحري،،،
الركبة دي اوعاك تكون دايرلك فيها قروش،
ضحك الكمساري شديد، وقال لي معفي ياخال
دخلتو كم جنيه في جيبو
وقتا ليهو ديل ليك خاصات ما تديهن الجلابي،
قال لي عليك الله ما تدخل معانا المزاد، 🤣🤣🤣
قتا ليهو اول مرة زول يعزمو مشوار
ضحك تاني،

عبدالمنعم الطيب حسن

25-03-2021, 08:25 PM

صاحبنا كلم ود اخوهو يشوفو ليهو زميلتم ويخطبا ليهو،
المهم ود اخوهو برضو صاحبنا وبدا يلمح، البت بتعرف الخطيب،
بعد شوية الخطيب سال ود اخوهو وقال ليهو بالله نضارتا كيف،،
ود اخوهو طوالي عمل خط رجعة،
وقال لي
ياخ النضارة دي يعرفوها كيف،
ههههههها،
العم في سن ود اخوهو، ومشى اجازة ونحن هنا في الغربة، البطالة...
بعد فترة البت رسلت خطاب لصاحبنا الخطيب انها ارتبطت،، شفتا الخطاب
البت خطاطا خلاص،
انا قتا ليهو البت الخطاطة تلقاها نضرة شديد
قالي اسكت يا تافه...

عبدالمنعم الطيب حسن

26-03-2021, 08:01 PM

زمان في الثانوي عاملين حفلة وداع لطلاب الثوالث،
كنت في تانية، الحفلة كبيرة فيها حمد الريح، وعييك،
اللجنة الفنية برئاسة المدير نفسه وبها خيرة الاساتذة وطلاب كنت من بينهم، المهم قبل الحفلة بدقائق ناداني المدير وقال لي ابدو
لم يكن هنالك اي برنامج معد، ولا الحبة،
المهم اداني المكرفون وصعدت المسرح والحشود كثيفة الجيلي داخلية،،
المهم مسكت المكرفون ولمحت الاستاذ م البدوي استاذ التربية الاسلامية فقدمته للافتتاح ووهو صاعد للمسرح اعطيته المايكرفون وهمست في اذنه بالله يا استاذ خفف عليك بقصار السور كانك بتصلي بجماعة سرا،
.ضحك الاستاذ كما لم يضحك من قبل وقرا سورة قصيرة وبقى صاحبي حتى مغادرتي المنطقة..
المهم البرنامج كان مرتجل ونجح
يبدو ان سلق البيض والارتجال والمكرر وفاضي وخمج وراثة سودانية،،
ليس هنالك جديدا،،

......
دولة كاملة تتضارى وراء المغتربين الفقارى تسقط بس

عبدالمنعم الطيب حسن

01-04-2021, 08:39 PM

صاحبنا عندو محل في المصفا
ماجرو لواحد عاملو مطعم، كل يوم بجي صاحبنا يطمئن على الدكان ويفطر ويرجع الحلة وبكرة يجي وهكذا،
بعد تلاتة شهور المستاجر طلب منو تخفيض الايجار بنسبة خمسين%
ول
دا مفتاحك،،

عبدالمنعم الطيب حسن

20-04-2021, 11:36 AM

صاحبي كضاب شديد شغال عسكري نفر قال مودنوا بعثة امريكا تصدق مشت فيني الكضبة
وكنت ادرس في مصر رسلت جواب لصاحبنا المشترك يرسل لي عنوان العسكري في امريكا،
صاحبي قال في سرو وكلمني لاحقا الزول دا-يقصدني- اتلحس والله شنو،
قعد العسكري ستة شهور في الخرطوم -الزول مو في امريكا- لكن خلالها بعض الشفوت من اولاد الحلة شافوهوا في فتاشة ههههها
المهم جاء الحلة اخواتو قعدن يبكن لابس بدلة قال اشتراها من واشنطون دي سي صاحبنا المشترك قالي والله البدلة دي معلقة في دكاكين سعد قشرة بالهبل...
دفعتنا من اولى لخامسة وعاد
لقيتو نكرني حطب وقال وراي بسنتين
في المدرسة،
اخر مكنة رافعا قال درس اداب في جامعة الامام المهدي،.ناضجين
يلحقنا ويفزعنا المهدي الامام وخاصة ان جامعتو بتستوعب طلاب ناضحين درسوا لحدت تانية متوسطة بالقديم
🤣🤣🤣

عبدالمنعم الطيب حسن

24-04-2021, 12:28 PM

قصبة منصح الوادي المخدر درو
منصح الوادي هو الجزء الاعلى من الوادي وليس داخله انما طرفه
حافته،
وهو بمثابة التقنت عند اهل الزراعة
التقنت بصلته او طمامته او باميته او ثمرته بتكون اكبر واجمل واحلى
كونها بتشرب نز،
اها مثلها بقصبة المكان الاخصب في الوادي وبالتالى تكون انصح وانصع واكتر اخضرارا وازهارا،، وازدهارا
اصلا الوادي كله خصيب بدليل ان قشه مخدر معناها المطر كان قريب،
والاجواء بديعة...

عبدالمنعم الطيب حسن

15-05-2021, 01:19 AM

Quote: شفت الدكتورة عشة السعيد وكانت في زيارة للسفارةالسودانية، يوم ٢٧ ابريل دا،
ولما جاءت جمبي قلت ليها: ابقي عشرة على المباديء والثورة يا دكتورة،
وانا واقف في صف الجوازات للتجديد،،
وقفت، والتفت وقالت: حاضر يا ابني ما توصي حريص،،
انبسطتا مرتين مرة لابني،
واخرى لحاضر ما توصي حريص،
...

اكيد استقالتها دي لو تاكدت تكون اتأثرت بالوصية بتاعتي،،
💪

عبدالمنعم الطيب حسن

05-08-2021, 10:21 PM

اب

عبدالمنعم الطيب حسن

04-09-2021, 02:59 PM

كنا جزءا من هذا النزوح في تلك الفترة، نحن الطلاب السودانيين بمصرا، الخريجون كان ينظم لهم رحلات عودة للوطن، في فترات سابقة،، وبمجرد مجي الانقاذ صار الطالب منهم لا يرجع للوطن، لا يعود باعلى الدرجات العلمية واغنى التجارب الثورية، ولكن
يركسل منتظرا، سفرا واغترابا وهجرة، والطلاب عموما بحكم تجربتهم السابقة في مصر اقدر على سنين الانتظار في مدن الجمهورية، فكانوا يسكنون مع زملاءهم ويتقاسمون اللقمة وطبق الفلافل والسرير،
وقد وصلت طلائع اصدقاءنا الي امريكا وكندا واوربا واستراليا البعيدة..
ومعظمنا ذهب للسعودية عمرة وزوغة فهذه بلاد طيبة واهلها قوم كرام.. وتلك قصة اخرى
قننوا اوضاعهم لاحقا..
ذهبت معتمرا للسعودية وكانت سعادتي لا توصف عندما ارسل ١٠٠ ريال لامي لزوم رغيفة وكهرباء ودواء..
تجربة طلاب مصر في عمق التراجيديا تلك،
بالله يا صديقي لا تنسانا من عكس الصورة،
تحياتي يا فنان،،
شخصيا كنت اقرا كل كلمة كتبتها في تلك الفترة وخاصة زكرياتك مع الفنان حسين شريف، فانا شغوف بالكتاب وبالمكتوب وبك.
القراءة شغف كما ذكرت انت في بوست سابق،
ودي الذي لا تعلم...
.....
من كتابة لي في بوست طلال عفيفي، عن مصر
كقبلة للمطرودين من جنة المشروع الحضاري
في التسعينات الحزينة،
الطولت مشوار سفرنا..

عبدالمنعم الطيب حسن

05-09-2021, 06:07 PM

غاب الفارس السمح، ولدنا وحبيبنا البتمم كيفنا، ومجلسنا بعذب الحديث، رغم سنه الغض، ولكنه كبير بعقله، وبانسانيته،
تجده دوما ساعة الحوجة كانبل اولاد البيت، قدامي وهميم، يضبح ويسلخ، يوزع الروح الحلوة، والابتسامة المطبوعة على وجهه الصبوح، الصباح،،
تفرغ لخدمة والده وممارضته، وشاله على كتفه للحمام، ويضعه على المقعد المتحرك، وياتي به للبيت الكبير ليستانس مع اخواته، واخوانه، ويظل يوانسه ويضاحكه بالساعات...
يبث الطمانينة في الاسرة الكبيرة الممتدة،
وسيم وكليم وحبوب..
اخذ من ابيه الوسامة، اللطف والظرف الكاريزما، وقضيان الغرض،
ومن جده اخذ الطيبة والحكمة،
الصمود والكرامة،
ومن الانسانية اخذ اعطر ما فيها الحب،
لم يقل لي ابدا اسمي مجردا ولكنه يقول: يا عمي ويكتفي..
ويسلم علي بالقبلات على جبيني،
وبالاحضان الحميمة،
يا ولدي اللطيف،
ضوء البيت، ولا بقولوا لُو اعمل كدة، ولكن تتقدمه الاريحية، الفهم، والارحام والتي لها حافظ عظيم،،
نفتقده اليوم ونحن اكتر ما نكون حوجة له،
ولكنها الاقدار،
انه ابني وابن اخي الحبيب..

الطيب احمد الطيب حسن بشيري

عكــود

05-09-2021, 06:21 PM

أحسن الله عزاءكم أخي عبد المنعم.

رحمه الله وأحسن إليه وجعل الجنة مستقره ومتقلبه.
لله ما أعطى وله ما أخذ ولا نقول إلا ما يرضي الله، إنا لله وإنا إليه راجعون.

أنزل الله على والديه وعليكم الصبر والسلوان، ولا حول ولا قوة إلا بالله

عبدالمنعم الطيب حسن

06-09-2021, 04:57 PM

عايد عبد الحفيظ

07-09-2021, 04:15 PM

عبدالمنعم الطيب حسن

09-09-2021, 12:12 PM

له الرحمة والمغفرة والقبول الحسن

من أمتع البوستات التى تقرأها وتحس بعدها
بالسعادة .
مقدرة هائلة على الحكى الممتع ، الجميل ،
والأسلوب واللغة ملكية خاصة لك الأخ الحبيب
عبد المنعم .
كتابة جميلة تبدأ فلا يوقفك من الإستمرار
والمواصلة فى القراءة إلا الشديد القوى .
وما أكثره فى سوداننا الحبيب فى هذه الفترة
العجيبة من حياتنا وتاريخه
لك مودتى ومحبتى

شكرا الدكتور عايد
تسلم يا صاحبي، والله رغم الارهاق والزمن الشوية ومافي، والمسؤوليات، نحاول ان نكتب قصاصات وتجارب وقصص، ولو عملت فرق واسعدت شخص واحد، ننسى كل مجابدة الزمن الممحوق، ومافي،،
ونسعد ايما سعادة..لسعادتكم احبابي..

تسلم اخوي وخليك قريب..

عبدالمنعم الطيب حسن

12-09-2021, 12:34 PM

دخلت على امي في غرفتها، شفتا صاحباتا معاها، عاوز ارجع، نادتني امي تعال يا ولد سلم على خالاتك ديل!!
رجعت مباشرة على امي، ومديت لها ايدي للسلام، يا الله سلمت على، ههههها
وعاوز ارجع تاني،
قالت هوي هوي يا جنا،. يا المغبي
خالتك دي مادا ليك ايدا، سلم عليها،
سلمت على خالتي، ومش متاكد سلمت على كل الخالات ديل،
ول فطيت بعضهن،
...
لمبتي بتبق
..
🤣🤣🤣🤣🤣

عبدالمنعم الطيب حسن

16-09-2021, 07:19 AM

صاحبنا جاب صورة ود اخوهو،
قال دي صورتي لما كنت صغير،
الجماعة قالوا ليهو:
ياخ لمن انتا اتولدتا في الجزيرة ابا،
كاميرا يصوروا بيها الصادق المهدي مافي..

عبدالمنعم الطيب حسن

01-10-2021, 05:41 PM

كانت الاذاعة الملجا ونحن بعد صبيان، ارتبطت عندي في نهارات الخميس ببرنامج مختارات الخميس للغنائية، من اعداد وتقديم علم الدين حامد، فان شغلنا كطُلبة وكموانة على وشك الانتهاء واليوم بنستلم المصاريف، وبكرة اجازة وكشاتين الجمعة تبدا بعد الفطور ولقبيل المغرب، وتتواصل بعدها في النادي..
اذكر بكاء المذيع هو ينعي زميله مذيع نشرة السادسة والنصف كمال محمد الطيب،...
واذكر من الاذاعةذو النون بشرى وعلم الدين حامد وليلى المغربي وسهام العمرابي، وابراهيم البزعي النضام حتى ان صاحبنا قال انو ابراهيم البزعي دا متخرج من كلية الالسن،،
كتابك يا عمر بلساننا جميعا،
فنحن جيل الاذاعة..ومجلة العربي والدستور والدوحة وصباح الخير، وعادل امام وفاتن حمامة وسعيد صالح واحمد زكي
جيل الطيب صالح وعلي المك وحمدي بدرالدين،
جيل الدحيش وكوري وسامي عزالدين والضب،،
جيل وردي ومصطفى ووردي وودالبادية وكل اساطين الفن السوداني...
جيل عاطف خيري ويحيى فضل الله ومحطة التلفزيون الاهلية ومحمد نعيم سعد والدهباية..
جيل المهر الذكي وزيدان الكسلان ومريم الشجاعة،
جيل سهام والهام، سهام من الخرطوم، والهام بنت من بنات حلفا،،
حلفا دغيم، ولا باريس..
جيل الانتصارات الصغيرة والهزائم الكبيرة..
جيل الحب والشعر والثورة،،

..
ما زالنا نحلم بسودان اخضر
وباطفالا حقيقيين..
يتربوا فوق ترابه،

عايد عبد الحفيظ

18-10-2021, 06:03 PM

الأستاذ الحبيب عبد المنعم
نستمتع بحكاياتك الجميلة ، نقرأ ونحس
بحلاوة حكيك ، نذوق طعمه ونشم
فيه عبق ورائحة تلك الأزمنة الجميلة ،
نقرأ ونستعيد جلستنا أمام
حبوبتنا ونحن فاغرى الأفواه ، ووجوهنا
تتلون بشتى الألوان التى تترجم تلك
الأحداث طى الحكاية إلى صور واضحة
وجلية فى مخيلتنا .
حكيك ممتع وآسر ويشدك ويجذبك إليه .
لك مودتى ومحبتى

عبدالمنعم الطيب حسن

28-09-2022, 09:59 PM

اب

عبدالمنعم الطيب حسن

06-10-2022, 10:12 PM

عبدالمنعم الطيب حسن

12-10-2022, 08:59 PM

واوسي؛
الليلة جيتني في محلتي يا استاذ، جعفر عباس..
انا من اهالي واوسي، وخالنا الشيخ ادريس مدني استقر في الحلة واساسي في كل المناسبات،
وهو رجل طيب وودود وفي اول اجازة ساخبره بهذه الصفحة وهذه الكتابة، وانا بعلق هنا عسى ان يلتقطها احد الاصدقاء ويوصلها للخال العزيز، وهذا امر متاكد سيسعده..
جناين المنقة في واوسي يا لها من رحيبة..
اخر اجازة مشيت مع اطفالي واستمتعوا بالمنقة المتوفرة تحت الاشجار بكثافة بل انتظروا حتى تسقط المنقاية من الشجرة وقد اكتمل نضجها،
في مراهقتنا وشبابنا كنا نذهب غالبا كل جمعة في العصريات للمزارع حيث ياتي موظفين وطلاب الخرطوم للرحلات في منطقتنا، فنذهب في العصريات حتى يكون ضيوفنا وقد انهوا مسالة الاكل والشرب ونبتعد ما امكن، حتى لا نضايقهم ونقترب اكثر ساعة الغناء، وكانت الرحلات ياتي فيها كبار الفنان، فاستمعنا في جناين منطقتنا للفنان كابلي والجابري وبشير عباس والبلابل،
وغيرهم كثر..
تسلم يا مكافح يا مناضل يا كبير...
....
مشاركة لي في صفحة الاستاذ ابوالجعافر، وقد ذكر انه واصدقائه ذهبوا برحلة لحلتنا،
فكانت السطور اعلاه..

عبدالمنعم الطيب حسن

13-10-2022, 11:30 PM

بالله اسا انت والارباب وفتحي على مسافة واحدة من الجميع،
الهادي بالله ما تسوقنا بالدرب التحتاني
..
لا حياد في الحب والحرب والسياسة
..
بعدين اياك تعتقد لما اكتب رائي هنا دا معناها طوالي راي الحزب لا يا عمك
ممكن تمر ايام ما اقرا مادة للحزب
لكن رائي لو جاء قريبا من راي الحزب
دي اسمها الوحدة الفكرية ودي بتتبني عبر السنين وتجاربها..
وفكرة الانسان نفسه والدنيا والعالم والمحيط
..
الحزب في الغالب يعبر عن رؤيتي وفكرتي، وليس العكس،
ودي قسمة من الله يهبها لعباده الجذريين
..
دمت،

عبدالمنعم الطيب حسن

14-10-2022, 04:02 PM

ليس هنالك حياد مطلقا في الدنيا يصحبي،
واللامنتمي دا فكرة طوباوية ليس لها ممثل على ارض المعاش،
اي انسان له موقف فكري، تجاه اي حدث، وردة فعل، صحيح هنالك مهتم وهنالك مهتم اكتر، كلنا لست محايدون كلنا منتمون، الاختلاف فقط في الدرجة، وليس النوع.
..
زمان لو تذكر يا عنكبة كنا نسمي المرتبط شديد بالجبهة الديمقراطية كنا نسميهو المتورط..
وكان مثالا للمتورطين طارق البشرى طنطا،
وذو النون جعفر، وعنكبة.واسامة عبدالمنعم.

عبدالمنعم الطيب حسن

18-10-2022, 07:57 PM

عمك السوداني قريبات دي في تمرين كرة القدم للاولاد، بعرفني كدة يا دوب بالشكل والونسة في المواضيع العامة، ما بعرف اسمي حتى، انا بعرف اسمو، المهم جيت سلمت على مجموعة اباء وهو
في نصهم مسكني من ايدي، وقالي بزهج شديد، ياخ ما تحلق شعرك دا..
هههههههههها
قربت اديهو درس بس مشّيت الموضوع،
عشان اكبر مني شوية؛ وزوجتو متوفية وعايش مع ولدو وبتو وهو اب وام لهم..
قلت ياخ معقول، عمك دا الفيهو مكفيهو..ابقى عليهو انا والدنيا..
كلامو صاح انا زاتي شعري كتير ومخنفس.
واصلا مفروض احلق قبل شهر، ولكنه الكسل التاريخي عند حضرتي..

عبدالمنعم الطيب حسن

19-10-2022, 04:36 AM

الشاعر خطاب حسن احمد،
سلم على محجوب شريف، ومصطفى ووردي والقدال وحميد.

(جلبت ليك من بلاد الله البعيده
صنوف من الوجد الملح
درت القاك بالسمح
كنت اصطاد في الظهيره
من مناقير الكنار
بوصلات سكك الاغاني
ومن قري الليل القصيه
انتشل عطر الاماني
لو الاقي اللون ادسو
لما يغرس فيني حسو
لي ملاقاتك هديه
واتفقد الرعشه المعبيه
في ايديا)
...
المنصورة مطلع التسعينات، مع صوت المغني الرطب، واصدقاء العمر عمر مضوي
و Ibrahim Alnimma وحللي وعبدالمنعم ابراهيم،،
جاءتنا الاغنية الرحيبة بمفردات جديدة وفكرة جديدة، اذكر انني كتبتها في نفس الساعة وجلست عليها حتى حفظتها، ما زلت..
مبدعين شكلوا وجداننا باكرا على الحب والصدق والجمال،،

عبدالمنعم الطيب حسن

23-10-2022, 05:36 AM

https://www9.0zz0.com/2022/10/23/04/105116572.jpg
.

الاستاذ الخطيب مع زملان الصبا،
ضحكة من القلب..

عبدالمنعم الطيب حسن

25-10-2022, 06:48 AM

الانقاذ اججت القبيلة في الفضاء السوداني كله، في الاعلام ياتي الوزير، بدل السؤال عن وزارته مشاكلها والحلول، يساله المذيع المبرمج المبرمج عن قبيله اصولها امتدادها واماكن تواجدتها يبتسم الوزير ويتحدث حديث العالم عن القبيلة، وغُيبت المعلومة التي ينتظرها المواطن الغلبان،
واضف عندك بتوع النكت والتنميط القبلي المريع، ورعاية تامة من الدولة،
زمان النكتة تبدأ كان في واحد وتستمر بالواحد دا لحدت ما تنتهي
فرق النكات العاطلة عن اي موهبة يبدا نكته بفلاتي وجعلي وادروب،،ويبيعون نكات الشعب للشعب بفلوس،
اصلا النكت دي الفها الشعب وتاخذ دورتها وتلف.
لا افهم ابدا ان يكون الواحد من بتاعين النكات ديل
شباب ومتعلم وتكون شغلتو كلها يعيد انتاج نكت الشعب، لا يضيف ولا يؤلف..
ورسميا السؤال في الجنسية والوظيفة عن القبيلة
وسورة طه..
واضعفت الانقاذ منظمات المجتمع المدني والاحزاب ففي الجامعات استبدلت روابط الكليات بروابط المنطقة والقبيلة
وصارت الاحزاب في اضعف حالاته، فلجأ المواطن للقبيلة والاثنية للحماية، بعد ان فقد العدالة والامن في وطن المطففين الطفابيع..

عبدالمنعم الطيب حسن

31-10-2022, 05:38 AM

العالم دا كلو ما نافع...
لا الخليج، لا العالم الاول، لا استراليا، وما تقول لي اليابان والشرق وغموض وبتاع..
كلو ما نافع..
.....
حلتنا بس..

عبدالمنعم الطيب حسن

05-11-2022, 12:00 AM

ليس هنالك علاقة بين التغيير الجذري والحرب الاهلية..
بل ان الحروبات القائمة الان سببها المظالم والفرز الطبقي الحاد،
وبسبب فشل الاحزاب القديمة من طرح برنامج سياسي واقتصادي يلبي وينسجم مع طموحات واماني واحلام الشعب،
الحل الجذري ببساطة هو تحطيم جهاز الدولة القديمة فكرا وممارسة، وقيام دولة الشعب والحرية والديمقراطية مكانها.. يتصدى لها نفس الشعب والطلائع التي لها مصلحة في انهاء احتكار النادي السياسي القديم، واحلال قوى مستنيرة مكانه من كل اهل البلد..
والتغيير الجذري هو القطيعة مع القديم بكل شخوصه قيادة وبرامج..
والدولة القديمة منذ الاستقلال اثبتت الايام فشلها بل ان البلد نفسها كفكرة وكذكرى وكوطن في مهب الريح،،
..
التغيير الجذري سلمي بطبعه وتكوينه لانه ينبع ويصب في الشخصية السودانية التي هي شخصية سلام بامتياز،
والله بكره الحرابة
والله بحب السلام..

..

عبدالمنعم الطيب حسن

05-11-2022, 05:27 PM

يا عنكبة الحياة كلها مجاسفات..
وليكن استثمارنا في تعليم اولادنا تعليم جيد
الحياة صعبة يصحبي،
ونحن نكتفي من الغنيمة بالاياب،
وبيت واوسي اجمل سكن...
الليمونات مثمرات والنيم ضلو وصل الجيران،
وشجرة القرض امتدت ثمارها لدرجة ان ام اكبر دكتور في حلتنا بتاخد منها😂😂😂
..
ويبدو ان الطموح يتقهر كلما تقدمنا في العمر
زمان عاوزين نغترب لاوروبا وامريكا شوية اكتفينا بالخليج..
حلمنا ببيت في المدينة..
لاحقا
رجعنا لمحل دفنوا اهلنا زمان صرتنا
حنينا لمراتع الصبا، والدهشة الاولى..
والعريجة لمراحا
..

ناصر يوسف

06-11-2022, 12:57 PM

عبدالمنعم الطيب حسن

08-11-2022, 12:59 PM

عبد المنعم تحياتي و أشواقي

فوق المعني كدي هسي يعني العريجا رجعت لمراحها خلاص ؟؟

قَرَّبَتْ
....
لو القرار بيدي مطلوب، كنت من زمان اكون بجواركم في بلد الاحباب والصِحاب،
لكنها الظروف..
..
محمد صاحبك الذي قابلته وهو طفل ويحب الحيوانات، هسا بقى شاب على اعتاب الجامعة..
وفطومة اتفلهمت شديد وبقت تتكلم بالحروف،
وتترنم سرا، وترسم احيانا..
وعاوزين اجازة على الاقل في الحوش الكبير..

عبدالمنعم الطيب حسن

13-11-2022, 06:12 AM

هبطتُ الرياضَ، في خواتيم الالفية الثانية،
عقابيلها، وقد أزِفت..
مثلي مثل ملايين السودانيين الذين ضاقت بهم بلاد النيل والخير، ولكن ذلك موضوع آخر..
سرعان ما اكتشفت ان الرياض مدينة افقية..
تتمدد عمقاً وحوافاً، تتربع هنيئة وتستطيل طويلاً..
تيقنت سريعا، ان السيارة اصيلة في العمل وحتمية في الحركة، وليست ترفاً..
شرعت مباشرةً في التعلم، ودخلت مدرسة القيادة،القيادة الرشيدة..
شهر كامل كانت الفترة المقررة لي لاستلام الرخصة..
سرعان ما دعاني المعلم للاختبار النهائي بعد اسبوعين، ربما اقتنع كوني خلاص سواق ، نجحت طوالي..
واستلمت رخصتي المي خمج.. وكانت مدتها خمس سنوات، وكنت متيقن اني لن اجددها، خمس سنوات طويلة وكافية في تقديري وقتها، ولكني جددتها مرات ومرات..وبرضو دا موضوع آخر..
واشتريت كرسيدا بيضاء فخيمة موديل ٨٢، اشرف على تدريبي عمليا في الشوارع احد الاصدقاء، علمني ان اركز كل ٤ ثواني بالمرايا على السيارات التي خلفي،
ظللت بالاسابيع منهمك ومنهك، في متابعة السيارات التي تسير خلفي، ولكني على كل حال تشجعت وامتلكت ناصية الطريق، وفي طريقي ان اصبح سواقا محترفاً،
اكتشفت ان لا داعي على الاطلاق لمراقبة السيارات خلفي، ومفروض ارمي قدام بس،،
اركز امامي، وقبل الشروع في تنفيذ فكرتي الجديدة، سالت للاطمئنان احد غلاة السواقين، قالي لي فيما معناه:
لا تنظر للسيارات التي خلفك نهائيا،
ركز قدامك،، ولا تنظر في المرايات الجانبية على الاطلاق، الا في حالة تؤد ان تلف شمال ترمي الاشارة شمال وتنظر في المراية اليسار، وتلف بعد التاكد من ان شمالك لك،
لا سيارة في الافق القريب،
وكذا اليمين،
يلا بكتب الكلام دا للمتعلمين الجدد، ولكل من يطيل النظر في مراية الوسط واليمين واليسار بلا داع، قدام بس..
#درب_السلامة

عبدالمنعم الطيب حسن

14-11-2022, 05:36 AM

الكمبيوتر لغة اي وظيفة، والانجليزية لغة اي ترقي للوظيفة،
والسيارة تكسب زمنك، وبرضو جزء من عدة الشغل خاصة لمناديب المبيعات،
تصدق خلال العشرين سنة الفاتت،
كنت وما زلت احاول ان اتعلم مزيدا من اللغة، الحاجة لمن تكون داخلة في اكل العيش،
مكرها عليها لا بطل..
وتظل لغتنا بتاعة عمل ومكاتب،
حاولت مرة ان اقرأ رواية بالانجليزية،
ترجم لي محمد ولدي اللهو دارس في مدارس لغات ترجم لي العنوان،
وسالته في السطر الاول من ترجمة كلمتين والتاني تلاتة وهكذا
في السطر الخامس قالي: يابابا كدة مش حا نخلص
الرواية دي فيها مئات الصفحات..
😂😂😂😂
ر

عبدالمنعم الطيب حسن

15-11-2022, 04:48 PM

مدربنا، المعلم بتاعنا، كان مصريا قحا، تنبأ لي باني لن اتعلم القيادة ابدا، ولا اشتغلت بيهو، دا اكل عيش يصحبي مافيهوش يمة ارحميني،
المهم هو نفسه اختاري من ضمن السواقين الذين انهوا التدريب قبل موعده باسبوعين وامتحنت سريعا، واثناء فترة الاسبوعين كان معي في نفس القروب سوداني لاحقا عرفت انه طبيب
المعلم بتاعنا سالني عن السكر والضغط، وقد اسهبت (كمثقف) كان يقرأ طبيبك الخاص،
وعطيته برنامج مشي وغذاءات وعييك،،
وكانت مهنتي وقتها (عامل عادي)
و معه صور الاقامات،
بعد كم يوم اكتشف انو السوداني المعاي التاني هو الطبيب وليس حضرتي،
وجاءني معاتبا وزعلان واضاف حتى مهنتك مش دكتور ولا فني حتى
عامل عادي..
لقد بالغت يا زوووول
..
😂😂😂

عبدالمنعم الطيب حسن

20-11-2022, 11:54 AM

ان تتزوج في قرى السودان، معاها تنجب في نفس السنة..
لو تاخرت ساعة، تبدا الاسئلة من المحبين، والاشفاق من العاديين، والشماتة من الحمقى
ساعة بس يا باشا..
البنات سألن عروسة من حلة مجاورة تزوجت من جارهن،
عقب عودتها من شهر التعسيلة مباشرة،
سألنها؟ عما اذا كانت قد حملت
حسمتهن: افترضن اني حملت في الاسبوع دا، اعرف كيف..
..
بت شفتة من حلتنا، عرست وكان متبقي على سفر زوجها ٥ أيام فقط..
يقال انها اتعالجت من الالتهابات مبكرة، قبل الدخول مشت للدكتور،
وحملت في الابعة ايام دي..
وقد كانت حكيمة زوجها سافر للطائف ولم يرجع الا والولد في المدرسة
..

عبدالمنعم الطيب حسن

23-11-2022, 08:19 AM

وكتابه ابداع ما بعده،
يكتب عن اي موضوع، فتحس انك امام فيلم سينمائي شفيف ومبهر، تصوير بالكلمات، والحروف نابضة تتحرك، وكل حرف ياخد تمام موقعو، وكل كلمة تنساب، وكل جملة تتماسك، لتصمد وتعيد القراءة وتنبهر وتسعد ويكون قد صنع لك طلال لحظات هنية، تدوم..
له قاموس خاص، وتراكيب للجمل مبهر ..
وبصمة تسعدك وتبقى..
كل الحب لهذا الفنان الانسان...
......
......

مداخلة في بوست عن الانسان والكاتب والسينمائي طلال عفيفي..

عبدالمنعم الطيب حسن

23-11-2022, 04:02 PM

عينيك وحاتك غربتي واهلي ودياري الفيها ضائع لي زمن،
....
وتصبح اماني كسيرة في خاطر الحَنان
...
وكتبت ليك والله يا قمر الزمان
عشان جيتي في الزمن المحنة
وشفتا في عينيك حس اهلى القُدام
..
الشاعر صلاح حاج سعيد، والفنان مصطفى رفيق لجلينا وسلوى، وكان الزمن ترابيا، موحشا، ومكندك بالحريق،
طمّنا جيلنا وصبراهوا، وقالوا لينا انو الدنيا لسا بخشها ضؤ،
كانا رفيقا جيلنا في ازقة ستوتة والغاز قاطع والشاي والسكر والعدس، ولاحقا في مكة وشقة العتيبية، وساحة اسلام، وملقية،
وجئنا باشرطتنا لرياض الخير، بمصطفانا وصلاح حاج سعيدنا..
وكان الكست والمسجل رفيقنا طوال هذه الرحلة الجبلية، الرحلة الصعبة، كانا وما زالا
سلوانا ومبتغانا، وقد تباعدت المسافات واستطالت الغربة، ونهض الف باب..
واصبحت العودة لوطن النجوم مجرد حلم..
..
لصلاح حاج سعيد ولمصطفى سيد احمد
عالي الفراديس،
ولنا الحزن الطويل،

عبدالمنعم الطيب حسن

26-11-2022, 10:18 AM

نحن لفوتة يا هندسة،
جيلنا اكتر جيل بتلفت، وقد ضاعت علينا سنوات خصيبة،، اضاعتها الغربة، والشتات.والتلفت. تخيل كل طلبة وطالبات المنصورة في البلد، ياخ كنا لساتنا نكون شباب،، الغربة تعجز وتعجز في بلدك غير من ان (تعجز وانت ضيف)
الجيل الحالي كسر اي مرايا واعتمد على مرايات داخلية، مرايات الروح والدم، فانتصر..
ولسا قدامو معارك الانتصار النهائي،
نحن نصفق ونساعد بالموية الباردة..

عبدالمنعم الطيب حسن

27-11-2022, 09:08 AM

...
صحيح ابوي كان عندو بقر، وامي عندها غنم
مشهورات باللبن والسماحة...
مرة عبدالوهاب اخوي قال: غنم امي ديل احسن غنم في الحلة، بعد يومين ماتت غنماية، امي زعلت وقالت لعبدالوهاب سحرت الغنماية، تغرما!!!
وبخرت باقي الغنم
..
انا كمثقف كانت علاقتي متوترة بالبقر والغنم،
مرات في الخريف نحن الصبيان بنكش غنمنا ونمشي نسرح بيها في السكة مرة او مرتين في العام...
ولم اكن بارعا في حش القش، وما حلبت مرة غنماية، وحتى اللبن علاقتي به كانت معدومة اصلا..
ههه

بابكر مخير

27-11-2022, 09:30 AM

نحاول رفع صورة ابوي
https://www8.0zz0.com/2020/07/01/01/335712753.jpg

لقد نجحت في تحميل صورة ابوي
ياخ حاولت يمين يسار ظبطت

عليه الرحمة وكل المغفرة

عبدالمنعم الطيب حسن

28-11-2022, 07:59 PM

:Lعليه الرحمة وكل المغفرة
كل الود يصحبي وصديقي الدكتور بابكر مخير
دعني احكي لك هذه الحكاية عن ابوي:
...
ابوي يحكي دوما بقناعة متناهية
ان جده
الفكي عبدالله
مرق كراعو برة
ويستمر ان جارات بنته عيشة
قد قلنا لها ان ابوك فكي اي كلام
ليه تتعبي كل يوم وتزوري القبر
دا فكي مش قوي
مشت حبوبتنا عشة كلمت جدنا المتوفي حديثا الفكي عبدالله بكلام جاراتها
..
قوم يا جدي المتوفي يطلع كراعو برة بكفنها
لمدة تلاتة ايام بلياليها وشاهدها كل القرى المجاورة
والبعيدة
المهم جاهوا الخواجة الحاكم
واقنعه انه لا يجوز ان يقوم ويبعث قبل النبي
فاقتنع جدنا
وسحب الرجل بكفنها، وكأن شيئا لم يكن،
ورجع القبر كما كان، وتساوى التراب ولم يكن هنالك اثر لرجل طالعة ومسحوبة لتوها..
تلك رواية ابي..
قرأت طبقات ود ضيف الله زمان، ولست متاكدا ان
كانت القصة متضمنة..
..
سارجع للبحث ان كانت القصة موجودة في الطبقات، اشك انها موجودة،
..
قال طيارة قال،
الصوفي الجد زمان كان يجيب المباراة
ناجية المسيد

عبدالمنعم الطيب حسن

30-11-2022, 08:43 AM

بعد تجارب السنين، ومن تراكماتها وتمددها، ومضي اخصبها
وانفلاته،
توصلت لقناعة ان العلاقات الى ضعف وتلاشي ثم زوال…
وان معظم الناس حمقى ومجانين،
وأن الركائز الاجتماعية محض أوهام، وأكاذيب
وان التوتر مسيطر على العالم،
وان كل شخص عايش في رحاب زاته المغلقة على الزيف والاكاذيب والاوهام؛
وان الاستثناءات من ندرتها تكون تكون مفردة شاذة، لا تُحسب ولا تُقاس، ولا يُركن اليها…
فكن نفسك، فان العمر اقصر من الترهات،
فانطلق… لا تلتفت لا تنهزم…
المؤكد ان لا جدوى خلف النافذة،
اغلقها بعد ان تقفز منها حيث الحياة الحقيقية..

عبدالمنعم الطيب حسن

07-12-2022, 05:28 AM

ها مرة أخري سنخرج للشوارع شاهرين هتافنا
ولسوف تلقانا الشوارع بالبسالات
المضادة للعساكر والمساخر والخنوع
ها مرة أخري سنصعد فوق هذا الإختناق
إلى عناق البندقية
سيدي إن الرصاصة موعدي
للإحتفاء بوجه ماريل الحبيبة
أو بخاطر ما أكون
السلام عليك يا وطني

#موعدنا_19_ديسمبر

ناصر يوسف

07-12-2022, 07:18 AM

عبدالمنعم الطيب حسن

08-12-2022, 09:13 PM

عبد المنعم الحبيب

سلام و شوق

لنا و للوطن رب يحمينا

أللهم ولي من يصلح حالنا و حال وطننا
.....
تسلم يا صحبي، وود حلتنا؛
شوق بالزيادة والله ليك وللبلد وللناس الطيبة وزينة
....

عبدالمنعم الطيب حسن

08-12-2022, 09:22 PM

تسلم يصحبي
زي ما قال الطيب صالح فيما معناه
ان بهذه الحياة حاجتين مهمات
الحب والصداقة
وانا والله مرتبط وجدانيا ارتباط شديد بحب اسرتي الصغيرة، حتى ان والدتي عليها سلام كانت تلمح فيما معناه لابي وان بعد طفل ان يقلل من الارتباط بي فكان ابوي وهو اب لاكتر من عشرة ان الزول دا المتعلق بي
وهكذا مع جميع افراد اسرتي الكبيرة والصغيرة؛
اما الاصدقاء فعلاقتي بهم من قوتها وتماهيها حكاية؛ فما زالت عيناي تدمع للقاء صديق فزكل بعد طول غياب
والابداع في هذا الامر لجهة شدة التعلق والارتباط يعود لاسرتي الصغيرة والكبيرة ولاصدقائي الخلص -وهم كثر-
وليس لي
...
شكرا يصحبي على الكلمات الحلوة؛ والعمر مجرد رقم
...[/COLOR]

عبدالمنعم الطيب حسن

10-12-2022, 01:56 PM

Alnour
المسرح والسينما والادب والغناء والفن عموما؛ لا بد له ان يرتبط بقيم واحلام وآمال الجماهير؛ في الحرية والديمقراطية وسلام الشعوب والعدالة؛ يعكسها، يعبر عنها؛ وهذا مبحث طويل ومتشعب وانا شخصيا اؤمن تماما ان الابداع عموما ينبغي ان يخدم قضية؛ القضية بانفتاحها الجماهيري العام
وهذه مدرسة الفن لقضية كاحد اهم اسلحة الجماهير؛
اما المدرسة البرجوازية الالهائية فهي مدرسة الفن للفن والمتعة اللحظية والانسحاب لاحقا؛
وهذا بالضبط ما تعبر عنه كرة القدم وفرق النكات وغناء القونات
..
اذ لا يعقل والحال كذلك ان يستاجر شيخ اللمين طائرة ب 300 الف دولار، ليصحب فيها حوالي 200مشجع ومشجعة من انصاره؛ ولكل منهم مصاريف جيب؛ 2500 دولار؛ في بلد يموت شعبها من عدم العلاج وانعدام الدواء؛ ولا رغيفة ولا موية نضيفة... ولا امن
...
عموما كرة القدم واحدة من اكبر مخدرات الشعوب وآلة ضخمة وجبارة لصرف الشعوب والهائها عن القضايا الحيوية مثل الجوع والمرض والفقر والديكتاورية، وحق الانسان في ان يعيش بكرامة...
تسلم يصحبي؛

عبدالمنعم الطيب حسن

12-12-2022, 06:55 PM

قبل نحو ثلاثين عاما دار حوار في شقتم في (سمنود) المنصورة؛
حول فكرة مدرستين
الفن للفن ؛
الفن لقضية..
وكان حضورا عادل ود الجعلي و زهير الزناتي واخرين بينهم الشاعر السمؤل من القاهرة؛
وطارق البشرى من شبين حيث اوضح طارق ان الفن لقضية هي فكرة ماركسية بامتياز
هذا البوست ما هو الا صدى لتلك الليلة العظيمة؛
كل الزملاء اتفقوا ان الفن لقضية؛ انت يا عنكبة طرحت رايا توفيقيا ان الفن لقضية ولكنه في نفس الوقت اثناء ما يخدم قضيته؛ يرفه لشعبه...
رعى الله تلكم الايام الزاهرات؛

عبدالمنعم الطيب حسن

14-12-2022, 05:22 PM

فعلا؛
تعادلية لازم
الخير والشر
المتعة والظلامية
34سنة يحكمنا الكيزان وداعش؛ لولا مصطفي ونجيب محفوظ والطيب صالح وحميد
وميسي كنا ممكن نموت من القهر والهزيمة؛
وطبعا للفلوس سحر لا يُقاوم
او كما قال يحيى حقي
...

عبدالمنعم الطيب حسن

15-12-2022, 02:10 PM

عبس يا كرونجي
...
كنت اداري بفريق الشعلة؛ بتاع حلتنا
ودفعتي والاكبر مني في تلك الفترة كانوا لاعبين اساسيين؛
قالوا منعم دا نسكتو بمنصب اداري بنائب الرئيس؛
كنا في الثانوي...
وكان الشباب في الميدان، ونحن في النادي نلعب ويست...
ناس الرياضة الجالسة
هههههها
...
في مصر يوم كليتنا لاعبة ضد تجارة
مشيت الملعب وكان عندي نزلة، وشربت دواء
نزلة، استمتعت بسطلتة الدواء...
رجعت في نص المباراة
قلت السطلة دي
ما بفوتا؛ كورة شنو!!
كملت سطلتي في البيت؛ ههههههها
في الابتدائي والمتوسط كنت بشجع الهلال؛
شوية لقيت الشغلة طويلة؛ والمكسب زيرو...
فاهملت؛ وتركت...
في مصر كنا نشجع الزمالك؛
كيتا في الاهلي اللهو فريق الحكومة؛ من حسني وجمال مبارك لاخر عسكري

عبدالمنعم الطيب حسن

17-12-2022, 11:22 AM

فلقونا فلق
قاليك اكتر 2000 طبيب سوداني بعملوا في بريطانيا؛
واكتر من 1500 بوروفسير بعملو في الخليج
يقولونها بفخر؛ وكانها حاجة كويسة

عبدالمنعم الطيب حسن

18-12-2022, 06:28 AM

انشر؛
جيران ؛
اصدقاء؛ في حافلة؛
في الجخانين؛
في الدكاكين؛
في لوري؛
في بوكسي؛
وكداري...
في المدن؛
في القرى؛
والبوادي...
في الحضر؛
فوق هامات الشجر...
في كل مكان؛ واي زمان....
الدعوة للعصيان؛ والانتظام فيه لاحقا...
هو برنامج عمل يومي؛
لكل فرد ؛
وكل قوى سياسية؛
وكل الشعب....
............................................
العصيان المدني؛ 19 ديسمبر ...
............................
الثورة مستمرة؛
و
سننتصر؛

عبدالمنعم الطيب حسن

19-12-2022, 01:56 PM

عنكبة صاحبنا؛
والده عمنا عبدالمجيد يعمل جزاراً؛
ونحن برالمة في -مصر-بعد كم شهر سالته؟
يا ابراهيم
انا سمنتا ول حاجة!!!
قالي: لا لكن نِضِفْتا؛ بعد دا ممكن تنْضَبِحْ عادي، بتربِحْ تب....

ههههها
ههههههه

عبدالمنعم الطيب حسن

20-12-2022, 08:50 PM

Ilhadi
هههههههها
.....
مزنوقين ايام الامتحانات عكنبة شايل كتابو وحايم كل خمسة دقائق يحول الكرسي بتاعو
مرة الغرفة شوية يطلع البلكونة شوية الصالة؛ شوية يرقد في السرير؛
شوية يقرب كرسيهو للسرير
شوية يرفع كرعيهو في الكرسي ويقعد في المكتب؛ ووو
- عنكبة ياخ ما تستقر وتزاكر
- بحاول اكتشف في قعدة مناسبة؛ انتا قايل المذاكرة دي شنو؟
ما قعدة!!!
لسا بفتش لقعدة مناسبة؛؛؛
وحا اجيبا؛

ههههه

عبدالمنعم الطيب حسن

22-12-2022, 12:20 PM

Ibrahim
لروح صديقنا حاتم علي محمد عثمان؛
في الاعالي الراحة والطمانينة والغفران؛
كان صديقنا وحبيبنا وصفينا
كان احد اهم شلة الوست في الصيف بالمنصورة؛
يضحكنا ويرفه عنا؛ ونحبه؛
زميلنا في السياسة والهم الوطني العام...
غيابه مؤلم ولكنها الدنيا تتناقص من اطرافها ومن العمق؛
قابلته في اجازته بالخرطوم صدفةً؛
فانفقنا اليوم كله في انس وترحاب؛
كنت كانني اودعه؛
لم نلتقي بعدها؛
نتقابل في الجنة...

عبدالمنعم الطيب حسن

22-12-2022, 04:27 PM

عمنا رملي جوهوا في البيت مغربية دامسة
وعمك كبير ونظرو بالنهار متواضع شديد
جوهو اصحاب ولدو
عسمان العيص والدشيم وحضرتي
وشاف رهاب رهاب الجلاليب البيض تقول يا غربتي
افتكر القبب تحتا فكيان؛
اتفضلو اتفضلو
اتفضلنا
عمك نادي ود بتو جاب الموية
وقال ليهو سووا الشاي
وقال للاولاد ما عرفتكم الليل ذغلش
رد عسمان انه فلان ود فلان
والمعاك
فلان وفلان اولاد فلان
عمك نادي ود بتو تاني
ان يخلوا الشاي
وقال لينا زولكم المانافع دا مافي
ودعناه،
ما فتح خشمو

عبدالمنعم الطيب حسن

23-12-2022, 11:41 AM

الغريب عن وطنو مهما طال غيابو
مصيرو يرجع تاني لاهلو وصحابو
ينسى الامو وشجونو
ينسى حرمانو وعذابو...
سعيدين بعودة الكوتش احمد الزين لبلده ولاسرته بعد ان طال الغياب؛
الكوتش رجلا عظيما اذ اعتبر سرا وعلانية ان كل اولاد المدرسة اولاده
وكل الاباء اصدقائه؛
فعمل بحكمة الاب وتفاني الصديق
وخلق جوا من الانتماء والمسؤولية؛
من امامه ابطال ومن خلفه رجال؛
لله دره من بطل؛
...
مرة تانية الف سلامة للوصول وكانت تلك دورة من الحياة
وستعقبها دورات..
امنياتي ان يلتقي الجميع في حضن البلد السمحة وزينة وراسية وعديلة ولفتاتا غزال؛
تصبحون على وطن ايها النشامى
وطن وضاح ووسيم..
....
كلمتي في وداع الكوتش احمد الزين حسن مدير ادارة التدريب بمدرسة امل الرياضية بمدينة الرياض؛
والعائد لوطنه بعد غيبة استمرت عشرة اعوام

عبدالمنعم الطيب حسن

24-12-2022, 11:05 AM

هههههها
الله ما كريم ياخ
...
في محاكمة القصر العشوائي قال علي الحاج ان الفلوس جابا من عمله كطبيب في بريطانيا؛ استدعت المحكمة الدكتور عزالدين علي عامر للشهادة حول مرتب الطبيب في بريطانيا والمنصرف والباقي كتوفير
فاوضح الدكتور عز الدين للمحكمة: ان راتب الطبيب في بريطانيا بالكاد يكفي الالتزامات الشهرية
فقال له القاضي طيب تفتكر علي الحاج دا جاب القروش دي من وين؟
فاجاب الدكتور عز بخفة دم الشيوعيين المعهودة: الله ما كريم ياخي
😂😂

عبدالمنعم الطيب حسن

26-12-2022, 11:56 PM

بهدِيك الفوضي
شِجار طفلين، فى ساحة روضة
بهديك الغُربة
هتاف الموتى، وصمت التُربة
بهدِيك حُزنك
وسِتات الفول أثناء الخمشة.. بعد إذنك
بهديك إحباطى
حديث عابر فى مركبة عامة، بصوت واطى
بهديك الليل البين جبلين
فقدك لقى دين
بهديك طلّة لبيوت الخيش
وخِيام تفتيش
وأسواق أرخص ما فيها حليفة الله
بهديك مُتمرّد
والنيل فى الجركانات باعوهو برّد

بهديك ولا شيِ
وأقطع وديان السهو، مشي

بهنس..
الف رحمة ونور

عبدالمنعم الطيب حسن

28-12-2022, 07:30 PM

كنت اعتقد ان أبطِل السجائر امرا دونه الامرين..
من غلاة المدخنين، المتورطين أنا....
ادخن بشراهة وبحب وبإستمخاخ،
فنحن تلاميذ عمك كوري..الذي هو واحدا من اكثر المدخنين الذين رايتهم تأوُّها وانسجاما ودهشة..
ما زال يعتصر السيجارة وهى انثى؛ بإشتياق ووله اصيلين..
المهم ذهبت ذات عصرية للمستشفى للتبرع بالدم لاحد اقرباء زميلي في السكن..
وكنت قد صحوت توا من النوم حيث غالبا عملي بالليل.. ولان المسالة طوالي لم اشرب شايا ولم اقرض رغيفاية، جري للمستشفى
اخذوا منا عينات وننتظر شوية إشوفوا صلاحية دمنا.. المعاي اتبرعو عادي، دمهم طلع نقي ومفلتر وانصح ما يكون.. انا دمي طلع شقي ومجنون،
اخدني الدكتور الكيني على جمب وشرح لي مطولا ان دمي ضعيف، وخفيف.. ومليان نيكوتين.. ولازم اوقف التدخين،
والا اباعد بين الوجبات..وكأنو بقول لي: تعال وتعال، ما تحرق شبابك، شبابك تشابك..شديد الزحام..
رجعت البيت، وانا شبه حزين على دمي المختلط بالنيكوتين، والضعف والرتابة.. اخرجت علبة السجائر المارلبورو الحمراء، وكانت شبه مليانة قريب 20 سجارة، السجارة تغازل السجارة.. وكل واحدة محل ولهي وحبي المقيم..
عصرت علبة السجائر بكل ما املك من قوة بكلتا يدي عصرتها..وانا افش فيها غلبي ودمي المسفوح على خارطة الضعف والنيكوتين..
واحلتها فتاتا، إذا عزمت فاهْتَرِسْ،،
اختلط ورق العلبة بالبرنسيسةبالفلتر بالنيكوتين وبحسرتي على فراق الدخاناية..
ولم انس ان اعدمت ولاعتي الذهبية الغالية والوسيمة..
ولم اصاب لا بصداع ولا توتر ولا غيره..
فانا انتقم لدمي، اصحبت مسؤولية دمي معلقة في رقبتي..
رجعت اسمن ولوني
افتح..
ورجعت انسانا عاديا غير مدخن..
بل صار رائحة التدخين تزعجني، ولكني لا اتبرم على اي مدخن..
فتلك حرية وخيارات شخصية...
وطبعا لم اجرب الصعوط ابدا في حياتي
رغم المحاولات الشديدة من بعض اصدقاء المراهقة، انا قررت في صباي الا اتعاطى التمباك، خلاص فل استوب..
ولكنه خيار داخلي لم ابلغ به اصدقائي لحظتها، حساباتي طالما هم مستمتعون به..ليه اعكر متعتهم.. فظلوا يحاولون لسنين، ما ظفروا بي
..
هذه مداخلة -نقحناها- كانت في الاصل اجابة لسؤال Mohalab ،
كيف تركت التدخين ياعم عبدالمنعم؟
تسلم ولدنا مهلب بابكر..

..
هذه القصة حلصت في يوم
10 ابريل2002

عبدالمنعم الطيب حسن

30-12-2022, 11:03 AM

بهاء شاب سوداني عادي
تلقاهو في اي مكان سوداني حميم،
في الحافلة والدافنة، في العرس والطهور، في التمرين، والدكان، والبيت...
والاهم شايل هم ام واخوات،
الام تنتظره، وقد جاء من الفرن حاضن الرغيفة الطازجة، وكرت الكهرباء، ودواء الحاجة،
تنتظره الام لتملا عيونها بالضنا الوسيم،
تنتظره الاخوات غطاء وستر،
وامان،،
يا لجسارة اخوان بهاء، ويا لشجاعة اخواته،
ويا لصمود هذه الاسرة السودانية العظيمة،
انا اخوك يا بهاء،
قتله الجنجويد، العصابة، لا سبب
غير تخويف وارهاب شعب،،
لن يركع،،
#كلنا_بهاء

عبدالمنعم الطيب حسن

05-01-2023, 04:20 AM

الفترة القادمة حبلى بمفاجآت سيئة؛
مع الظرف الاقتصادي الذي وصل مرحلة بعيدة؛
والمجاعات على الابواب؛
اتوقع ان يقوم الكيزان باغتيال قيادات
مليشيات او حتى داخل الجيش
لخلق مزيدا من الفوضي لتمرير مزيدا من القمع والقتل؛
هذه فرصتهم يحرقوا البلد؛
طالما لم يتمكنوا من حكمها؛
الكيزان هم الحكام الفعليين اليوم ولكنهم يعرفون ان لامستقبل لهم؛ لذا متمسكون بتيار اللا دولة الحالي؛ لان دولة حقيقية ستصفيهم وتفككهم وتحاسبهم؛
الامر يتم
بواسطة متنفذين زي حمدتي والبرهان وكباشي
هذا تمهيد لتقسيم الوطن؛
دارفور والشرق ومجموعة دويلات
دي خطة الكيزان ودروعهم
بس للشعب حسابات اخرى
الجذري قادم قبيل الفوضى الخلاقة؛
قحت لشقيها لم تعد فاعلة
وانتهى بهم الامر موظفين بنصف دوام عند دولة الجنجاويد وعلي كرتي؛
الحركات المسلحة صنعها الكيزان سينتهي بها الامر للذوبان في الفراغ؛
...
مصر لحسابات لوجستية لا تؤيد تيار الفوضى الخلاقة الذي يؤدي لتدفق تيارات بشرية
لا تتحملها مصر التي تمر بظرف اقتصادي خانق
مصر تؤجج الفتن والانقسامات
والدويلات
ولكنها لا تؤيد ان تصل البلد لمرحلة الانهيار التام
ذلك امر مرهق لها على عمق امنها القومي وحدودها الجنوبية
..

عبدالمنعم الطيب حسن

06-01-2023, 08:19 PM

امي برضو
ظلت مقرشة في ذات البهاء والوسامة؛
حتى غابت في ابهى صورة
سيدة شديدة الوسامة
شجاعة وفارسة
رزينة ووقورة
صبوحة كعشاء الضيفان
ومبتسمة ونقية دوما كطفلة
وحكيمة كجدة
جميلة كعروس
وطيبة كقلب

عبدالمنعم الطيب حسن

08-01-2023, 11:10 PM

https://www2.0zz0.com/2023/01/08/22/233387841.jpeg (https://www.0zz0.com)

ضحكة من القلب مع زميل الدراسة طه الشيخ الجنيد

عبدالمنعم الطيب حسن

10-01-2023, 08:17 PM

لاقاني في حلتنا احمد ود دفعتي وجاري جائي من المدرسة
سالني: عمو عبدالمنعم انتا بتعرس متين؟
قلت ليهو:
الكلام دا بتكون سمعتو من ابوك الكب
😂😂😂😂😂😂

عكــود

11-01-2023, 05:03 AM

تحياتي يا عبد المنعم،

ياخي ده بوست مكتمل البهاء والحميمية وبمجهود بسيط منك ممكن يكون كتاب عالي القيمة في أدب السيرة الذاتية.

أبقى طيب

عبدالمنعم الطيب حسن

12-01-2023, 01:51 PM

تحياتي يا عبد المنعم،

ياخي ده بوست مكتمل البهاء والحميمية وبمجهود بسيط منك ممكن يكون كتاب عالي القيمة في أدب السيرة الذاتية.

أبقى طيب

هلا حبيبنا الامير؛
عكود المحترم...
والله فكرة البوست جات بالصدفة فقط كنت اكتب في الفيس كل
كل يوم حكاية او ذكري
وهي اصلا موزعة بين المنتديات؛ هنا وسودانيزونلاين
ولقيت السلسلة متابعات كبيرة بالذات عن اهل واوسي الكرام...
ورجعت لتغذية هذا البوست ببعض
البوستات والمداخلات في الفيس والواتساب
تصدق بشارك مشاركة؛ راتبة في قروب واحد فقط؛
المهم توسعت الفكرة لاحقا
وصرت اي كتابة بوست او مداخلة في الواتس غالبا وقليلا من القروب
اي كتابة احس انها بتعمل فرق للقاري
بنقلا هنا في البوست دا
اكتشفت ان هنا بتتحفظ للزمان
وفي المستقبل قد اختار منها كتابات كتبتها بمزاج
عالي واعيد نشرها في كتاب
يارب نلقى زمن ومود وتمويل لنشر الكتاب
فلو اسعد شخص واحد انبسط ياخ...
كل الود يصحبي...

عبدالمنعم الطيب حسن

17-01-2023, 08:03 AM

غاب قبل ساعة صديقي وحبيبي واخوي؛
محمد حسن فور...
الرجل البشوش الشهم الكريم الضحوك؛
شديد الانسانية مكتمل البهاء واللطف...
الليلة جاء يوم شكرك؛
نلتقي كلما سمحت ظروف عمله؛ وظروف تواجدي في البلد.
ونقضي ساعات من الانس والاضاحيك؛
يبرني باخر النكات والتعليقات والحكاوي؛
اضحك من الاعماق فصديقي حكاي؛
ووناس..
قبل فترة حصلت لي نكتة هنا نكتة من النوع الذي يضحكه ويسره؛
تصدقوا كل فترة احكيها لنفسي واتخيله امامي
واضحك براي لضحكه؛
هسا النكتة احكيها لمنو تاني...
كانها مفصلة عليهو؛
الليلة جاء يوم شكرك
اي كلمات اقل من مقامه عندي
انا حزين غاية الحزن
ومفجوع حد الفجيعة ما تقيف
لغياب احب الاصدقاء؛
ارسل لي صديقنا المشترك خلف
رسالة يخبرني بالوفاة بعد سماعه الخبر بثواني؛
فهو يعرف مكانة الرجل عندي؛ فقد كنت اساله كل يوم صباحا ومساءا عنه؛
لم يحتمل خلف الخبر لوحده فبحث عن من يقاسمه الاحزان؛
خالص التعازي لكل لاسرته الصغيرة؛ وكل الاهل
...
له الرحمة والغفران بقدر انسانيته ولطفه؛

عبدالمنعم الطيب حسن

18-01-2023, 09:30 AM

...............................
ساتحدث الان عن شهيد الفكر والانسانية الاستاذ محمود محد طه؛ ساتحدث بمشاعر فتى في مرحلته الثانوية يرفل؛
ساكتب هكذا عفو الخاطر؛ واعتذر مبكرا لو جاءت الكتابة اقل من قامة الاستاذ؛
فهو رجل عظيم؛ وانسان وسوداني؛
كالنخل قامة واستقامة واجمل مايكون؛
باختصار كان جيلنا في تلك الفترة متفتحا مطلعا ومتابعا؛ وقارئا من الدرجة الاولي؛
فقد قراءنا كل القصص الصغيرة والمجلات في طفلوتنا؛
كانت مكتبة صديقي عمر بركات مليئة بالاطايب؛ وكنت قارئا نهما؛
قرانا كل روايات احسان عبدالقدوس في المتوسطة ولك رويات نجيب محفوظ؛ في الثانوي؛قاليك يا دكتور ياسر؛ المساطيل المثقفين
عملوا ندوة بعنوان
نجيب محفوظ ولَّ ما نجيبوا؛
وقبلنا على كتب الفكر والسياسة والفن؛ اذكر انني قرات كتب الاستاذ في تلك الفترة؛ وقرات الرسالة التانية؛
واذكر ان صديقي الدكتور اسامة البشرى كان يقول عندما يسالوننا عن الصلاة كان يقول :انه يصلي صلاة الاصالة؛
وكان لدينا اهتمامات كبيرة بالسياسة؛ اذكر انني نسخنا بخط اليد البيان الشهير للاخوان الجمهوريين؛.( هذا او الطوفان)
ووزعناه في النادي والدكانين؛ وعلقناه في الجريدة الحائطية التي كنا ننشرها في النادي اسبوعيا؛
كنت اكتب بابا ثابتا تحت اسم همسات دافئة؛
اذكر اننا كنا في مدرسة الجيلي الثانوية وفي الحلة وفي النادي نتابع بشغف محامكة الاستاذ؛
ولاحقا حكم الاعدام الارعن؛وكان يساعدنا في الاخبار الطازجة اخي بابكر الطيب احمد؛ المترجم وقتها بوكالة السودان للانباء؛
كان ينقل لنا نبض العاصمة والحضر حول اعدام الاستاذ؛
اذكر حتى الان كلمته عندما سالته عن راي الخرطوم ومثقفيها في اعدام الشيخ السبعيني؛ لمجرد انه عارض قوانين سبتمبر؛
وطلع بيان باسم الجمهوريين؛ اذكر انه قال لي بالحرف: هنالك امتعاض عام من كل الشعب على هذا الحكم الجائر؛
كنا نعتقد بمشاعرنا الطفلة آنئذن ان الاستاذ لن يتم اعدامه؛ وان روحه الطاهرة ستنجو في لحظات اعدام جسده لحظة التنفيذ؛
كان الشعب يرفض المحاكمة والحكم؛ وكان يمني نفسه بمعجزات لخلاص الاستاذ؛ وروحه النقية؛
فهو واحدا من افذاذ الشعب؛
ومن انقى طلائعهم؛ وقادتهم وملهميهم؛
به كل بساطة الشعب؛ وشجاعته وكارزميته؛
وعندما تم الاعدام اذكر انني بكيت في سرا وعلانية؛
ورايت امي وهذه سيدة امية علمها الزمن واحسن تعليمها؛ تبكي واذكر ان رايت خالتي يالقسمة زعلانة؛
هذا الشعب الجزء من الشعب امكن ما سمع بالاستاذ حتى؛ ولكن الشعب العبقري يرفض الظلم والظلام؛
ويرفض اراقة الدم السوداني الذكي؛ العطير؛
لمجرد راي؛ وبيان...
تبا لهم قضاءة السلطان المهلاوي؛ والمكاشفي؛
كانت كلمات الاستاذ في المحكمة؛ منفستو عظيم لانسان راقي وشجاع؛ وبيان يكلب شعرة الجلد؛
اذكر انني حفظت جزءا كبيرا من تلك المرافعة التي رفض فيها الاستاذ الاعتراف بالمحكمة؛
وبقضاتها غير المؤهلين اصلا لمحاكمته؛
وبقوانينها التي هي صناعة رديئة كتبها جهلاء بليل بهيم؛ ويطبقها قضاة جهلة وفي نفسهم غرض ومرض...
وراهم الترابي الذي فشل في مقارعة الاستاذ بالحجة فكان لجوءه للسلطان ليقتص له من خصمه الفكري؛
تبا لهم جميعا...
الدم السوداني الذي والعطير نثره النميري من قبل في اعظم قادة الفكري السياسي الاستاذ عبدالخالق محجوب وصحبه الابارير؛
وختمه بالاستاذ المفكر المهندس محمود محمد طه؛
ولكن الشعب قال لا؛ وذهب الدجالون لمزبلة التاريخ؛ وسيظل الاستاذ واحدا من اعظم السودانيين؛
وسيكتب التاريخ عنه بماء من ذهب وابريز عن رجل حكمة ومفكر كبير ومتجاوز؛
شكرا صديقي الدكتور ياسر
وتسلم؛
وموعدنا في سودان الحرية والديمقراطية وسيادة حكم والقانون والعدالة الاجتماعية
موعدنا في وش الفجر!!!

.............
مكتوب 2016

عبدالمنعم الطيب حسن

19-01-2023, 08:39 PM

عبدالمنعم الطيب حسن

22-01-2023, 03:21 PM

Abdelrahman
عارف يا هندسة الحياة دي بتمسخ شديد بغياب الام؛ وتبقى بايخة بغياب الاصدقاء؛ محمد دا ملهمي ومعلمي رغم انه يصغرني؛ فهو مدرسة في المواقف والتفاني والكفاح... كتير من الحكاوي والمواقف التي اكتبها هنا في النت هو بطلها...
ياتيني في البيت رغم الارهاق الذي يعانيه من جراء المرض والعمل..
ويقول لي دوما بكرة بتسافر خلينا نتونس...
ساخر لابعد حدود السخرية؛ وكلامو حكم ودرر وانسانيتو متدفقة
ليس بيننا حواجز البتة..
صديقي واحبه...
ومصيبتي فيهو كبيرة...
متصبر وصابر؛ ساحكي لنفسي دوما نكاته وحكاويه ولا امل تريددها ؛
ليس امامي خيارات كثيرة
شكرا يصحبي لمواقفكم التي طالما شدت من عضدي واكبرت جواي اليقين..
وشيدت لي من الصبر متاريس..

عبدالمنعم الطيب حسن

25-01-2023, 06:03 PM

فرحات عباس
الزول دا يا جماعة صديق العمر ومشيت بيتم في رفاعة..
على حافة الاستاد؛ وعلى ضفة البطانة؛
وقابلت والده العظيم عمنا الباشمهندس عباس فضل المولى
الذي سمى ولده فرحات تيمنا بالرئيس الجزائري فرحات عباس؛
لتاخذ الايام دورتها ويذهب ذات الفرحات ليدرس القانون الدولي في الجزائر
ولقبته الدفعة بالرئيس...
شفتو الزول دا واصل كيف؟
لروح عمنا عباس فضل المولى الهناء والراحة في الاعالي...
ومن زمن نحن عزابة ونحلم بالزواج؛
وحتى الان من زمن دنا بنته الجميلة الطالبة الجامعية الان
كانت مجرد فكرة؛
وسكنا سوا سنينا عددا؛
ولما تحب صديق السكن فا الابداع في حتة دي
والروعة له؛ ليست لك.
فرحان صديقي ومن القلائل جدا الذين احبهم..
وارتاح بقربهم ونضحك من الاعماق
خلال اكتر من تلاتين عاما لم تزيد العلاقة الا صلابة...
فرحان لا جاء يوم شكرك يا ترس...
...
بالنسبة للفن فرحات دا حافظني من زمن وردي وعركي وطغيان حضور مصطفى الطاغي
لكني قديم من زمن الحان الخميس مع معتصم فضل
وانت السماء بدات لنا
وزيدان ياخ
والشفيع
وووو
...
عيييك عوالم باذخة
.................................................. .............................

Quote: بشيري يا برلوم يا نبيل ... ما عرفتا البوست دا إلا اليوم ... الزمن السريع الكاسح .. القاسي أحيانا يجعلنا نتخطى مواضع جميلة ما كان لنا أن نتخطاها لو كان يمشي الهوينى غير فزع ولا مهموم ... قبل كم يوم قرأت بوست بعنوان عبد المنعم الطيب رفاعة .. يتحدث عن فنان من أولاد دلوت القريبة من رفاعة .. وعلق أحد المتداخلين أن المدعو عضو معنا بالمنبرر .. قلت في مداخلتي .. إن العضو عبد المنعم الطيب في المنبر ليس هو ذلك الفنان .. إلا أنه ذو نضم جميل بطعم الغناء .. أو هكذا قلت .. صديقي اللذيذ ..... سعيد جدا أن أكون في الصف العريض الطويل للمتابعين لهذا البوست الرائق.

تعليق على البوست في حلة تانية...

عبدالمنعم الطيب حسن

29-01-2023, 12:50 PM

قدمت عمرة بالباب صباحا للسفارة السعودية
التسليم للجواز بعد 2 ظهرا من خلال شباك يفتح في الشارع العريض..
جيت الساعة اتنين المنتظر الوحيد والشباك اصلا مغلق؛ شوية فتح الشباك وناولني الموظف جوازي معتذرا ومطالبا بالشهادات؟
شهادات شنو انا برليم في سنة اولى برليم بسنونو؛ ومعاي شهادة قيد ارفقتها مع الطلب...
اعتذر الموظف واغلق الشباك وغادر..
وانا في الشارع داك ومسكت في شباكي؛ وحرستو بس حرسة قدر الله؛؛
وواقف ومنتظر؛ بعد نص ساعة يفتح الشباك وياتي موظف اسمر هذه المرة- لمزيدا من الحبكة-
وما تكلم معي كتير طلب جوازي؛ وعاد بعد لحظات واداني الجواز قائلا مبروك يا زول...
وصلت مكة وسكنت مع طلاب ودافعت عن جدي الشيخ ادريس ود الارباب المولود بفركة من بطن امو في نقاش مع الطلاب..
رجعت الحلة بعد تلاتة شهور اول كلمة قالتا لي حبوبتي: حلمتا بجدك الشيخ ادريس ودالارباب يغيطك بفركته كل يومين تلاتة احلم...
...
صعدت شقتنا الكائنة في الدور التاني جاني فجأة وانا في السلم جاني شعور ان والدي بموت في هذه اللحظة؛ -تركته قبل شهور في كامل صحته-
توترت؛ طردتا الفكرة؛
استحميت مرتين
شغلتا مصطفى؛ كلامي قليل مع حللي؛ مشيت السينما براي لاول مرة؛ رجعت الشقة في نص الفيلم..
نمت متوترا وصحيت قبيل الضهر بكوابيس
ما زالت صورة ابوي تزاحمني في صحوي ومنامي...
الساعة اتنين يجي صديقي ومعاهو اتنين من الاصدقاء؛
توجست خيفة اعلم ان صديقي دا ما بطلع من شقتو ايام الاجازة لو جاء الجيش
اكلنا عدس والله اللقمة مرة والكوداب شلاني تماما ومسخ القعدة مع الاصحاب
مشيت المطبخ اعمل شاي
لحقني صاحبي وقال لي البركة فيكم توفى الوالد..
رجعت السودان لقيت انو ابوي اسلم الروح في ذات لحظة طلوعي للشقة..
وفاة امي كمان فيلم براهو
..
مشاركة لي مداخلة في الفيس مع صديقي يتحدث عن الحاسة السادسة

عبدالمنعم الطيب حسن

04-02-2023, 03:35 PM

ما ضاع حق وراءه مطالب..
تكللت المساعي طوال سنين
بالنجاح ..
وهاهو المجرم نبيل الصادق وقد طالته يد العدالة..
...
طوال ايام المحاكمة كنت على يقين انك متابع...
فقد ظللت السنين الطوال تكتب عن القضية؛ قضية الشهيد عبدالمنعم رحمة العادلة...
لم تفتر لك عزيمة؛ ولم يستكين لك مسعي..
حتى تكللت المثابرة بوصول المجرم لحبل العدالة..
...
وبكرة يحاكم قاتل الشهيد الدكتور علي فضل..
وكل شهداء الثورة السودانية حتى الان؛
لن ننسى ولن نغفر
....
مداخلة لي مع ودالزين في منبر سودانيزونلاين؛
فقط ظل هذا الرجل يكتب عن شهيد الطبقة العاملة؛ والحزب الشيوعي الذي اغتالته سلطة الجبهة الاسلامية بواسطة امنها الكيزاني في الحصاحيصا في تاريخ 17-6-1994
وقد ظل زملاء كثر على راسهم الجبهة الديمقراطية للمحامين
يجمعون الادلة حتى اوصلوا القاتل للمقصلة
وهذه رسالة للقتلة انه مهما تطاول ليل الظلم
فلابد ان يشرق صبح الحقوق والعدالة...

عبدالمنعم الطيب حسن

05-02-2023, 10:02 PM

سوداني جاء المنصورة لعلاج المرض الكلوي؛ قريبه من الدرجة التالتة؛ جاء من ليبيا وتبرع له بكلية...
كطلاب وقتها متابعين للحالة ضمن حالات كتيرة في مدينتنا؛ استغربنا لان معظم المتبرعين لاقارب من الدرجة الاولى...تمت العملية
وطلع المتبرع والمتبرع له من المستشفى...
ومازالا في نفس الشقة..
المتبرع له حسا بالصحة واختلف مع قريبه الذي تبرع له قبل ايام...
سمعنا بالخلاف وجينا كطلاب من المتابعين للحالات من الاول..
(لقينا المتبرع له ياكل ليهو في بتيخ)ههههههها
وقد شما العافية...
وقريبه يبكي باعلى صوته..
وغرقان في الدموع في غرفة اخرى ؛
ولسا يتعافى من اثار العملية...قال وسط دموعو انو قريبو شاكلو وهددو بالطردمن الشقة..
غايتو انا شخصيا باختصار قعدتا ابكي معاهو...
وسكتناهو؛
وسكتوني الجماعة...😂😂
قال المتبرع دا: وين البوليس ماشي يشتكي...
وما اشتكى...
بعد كم يوم ودعناهو للسفر برا نحو ليبيا وما زال يبكي للخذلان الذي حصل...
وقال احتمال ما يرجع السودان نهائي بكلية واحدة
وكان وقتها شابا ولم يتزوج بعد...
القصة حصلت قبل نحو تلاتين سنة؛ هسا اتذكرتها بمناسبة المحكمة* دي.. فتوترت
...
العالم فيهو مظاليم كتار
مظاليم معنويا
لا اعتقد ان المحكمة ترد لهم شيئا؛
...

عبدالمنعم الطيب حسن

08-02-2023, 08:59 PM

عمر
صحيح ياعمر؛ والله البوست دا حاولت ما انشروفي النهاية فعلت.. فليست كل المواقف وردية، وليس كل جزاء المواقف البطولية احسان وتقدير..
والقصة دي فيها عبرة وعبر وملمح من الحياة
لا يمكن تجاوزه
فتوكلت وتوترت ونشرت
...
رغم ذلك هنالك مواقف وقصص كثيرة لاصحابنا ناس الكلى ناصعة ومشرفة وفيها تضحيات
..
واحد ومعاهو زوجته المتبرعة
يحكي لنا في جزيرة الوردة عن اولاده وبناته وامه واخر حاجة
قال نسيت المضحية يقصد زوجته وبدا في المديح؛
مدي الظل العالي
قالت له زوجته ضاحكة:
نحن نضحي وانتم تنسونا...
😂😂😂

عبدالمنعم الطيب حسن

14-02-2023, 08:26 AM

الرحمة والغفران يا عمدة ووثير المرقد لامنا العظيمة...
البركة فيكم وصادق التعازي والمواساة
غياب الام يا عمدة بخلي الضهر اعوج؛
وبخلي الدنيا مسيخة...
ويعم الظلام جواك؛
ولم تعد للاشياء اهمية؛ وتنسلب روحك..
ينسرِب شبقك بالحياة؛ ويتسرب ماء عينيك الضياء
تنقهِم..
يتعطَش الوجدان يفيض بالفراغ..
وتستمر (مِدوكِب) طوالي..
عيييييك
.....
ساحاول ان اكتب مشاعري قبيل تلقي الخبر الفاجعة؛ قبيل
وفاة ابوي التي كانت في صبيحة 13-1-1991
ساحاول ان اتذكر المشاعر التي طالما انتابتي
قبييل تلك المصيبة التي هزت كياني وجوانحي..
فقد كنت يافعا؛ وشديد الارتباط بوالدي؛
الذي هو منذ طفولتي الباكرة حتى وفاته في عشريناتي الحزينة؛
قد كان طوال تلك الفترة شيخا قويا ومتماسكا كصخرة وكنخلة
وكسنديانة يمتص الاهات؛ ولا يُقهر؛
وقورا وسيماً كعريس؛ ضحوكا كطفل؛
قنوعا كناسك؛
...
ساحاول ان اكتب ايضا عن غياب امي التي غادرتنا فجأة
صباح الخميس 2-3-2005
ساحاول ان اتذكر تلكم الساعات التي سبقت وتواءمت مع
رحليها الزلزلة
الذي باختصار حولني حتى الان لمجرد آلة
صحيح الحياة تمضي؛
لان الموت حقيقة وواقع..
ولكن ساعاتي بعد غياب امي ليست ابدا كتلك التي في حضورها البهي حضورها
البهجة؛ اي كلمة تخرج من فم امي تضحكني وتسعدني؛
ايما سعادة..
اي لمحة؛ اي همسة...
فقد فقدت دليلي؛ اظلمت دنياي؛
واكب دمي هم...
...
ساحاول ان اكتب عما فعلت بي الحاسة السادسة
فقد جهجت باكاتي؛ وتوترت ساعاتي؛
وامتلاءت بالخواء والهواء وتخبط الفؤاد
والقلب اغتشى
ربما تمهيدا للحزن الدائم القادم القائم المقيم ابدا..
لم اكتب ابدا عن تلكم الحادثتين الفاجعتين..
وربطهما بالحاسة السادسة عندي..
ولا اذيعك سرا اذ ان البوست هذا ما شرعت فيها الا لكتابة
تلكم الذكرتين الحزنتين؛
ولكني لم استطع ببساطة
وياريت اقدر الان ان اكتب ...
ساحاول
وان لم تنزل مداخلات الروايتين في هذ البوست فتاكد انني لم استطع..
ولكني ساكتبهما يوما ما؛
انه امر حتمي..
...

..
تسلم يا عمدتنا
العمدة عكود

عبدالمنعم الطيب حسن

16-02-2023, 03:32 PM

كنت ذاهب لوحدي قبيل المغرب من واوسي لامدرمان حيث المدام واسرتها..
في الكباشي اشوف استاذي في الجيلي الثانوية؛ محمدالكباشي
واقف في الشارع ومنتظر وسيلة مواصلات تقله نحو بحري..
توقفت مباشرة بالقرب منه ونزلت سلمت عليهو؛
وقلت له انا فلان من واوسي وتلميذك في الجيلي الثانوية منتصف التمانينات
تفضل يا استاذ اركب....
ورجعنا نتونس في ذكريات طويلة؛
وابتهج الاستاذ اي ابتهاج بهذا التلميذ الذي تعرف عليه بعد نحو اكتر من 20 عاما...
اكثر ما آلمني هو وفاة شقيقه استاذنا عبدالوهاب والذي كان يدرس نفس التخصص لغة عربية في ذات الجيلي..
وقال لي ان ولده متزوج بنتي وبنته متزوجها ولدي عبدالوهاب..
وانه ذاهب لاخذ زوجته من بحري وعرفت انهم راجعين الكباشي طوالي؛
سالته عن مكان زوجته ولازم اوصلك يا استاذي حتى مكانها
وصف وصف يمين يسار...
هي هنا مع السلامة يا ابني...
خلينا نسلم على امنا وزوجةاستاذنا؛ انا منتظرك هاهنا..
انتظرت ورجعبعد فترة معاه زوجته؛
سلمت عليها وفتحت باب السيارة الوراء اركبي يا امي..
نظرت لزوجها؛
وزوجها قال: نركب المواصلات قريبة انت ما قصرت واصل مشوارك..
لا والله انا مشواري اصلا بكبري الحلفايا فزوجتي في ودالبخيت
اركبوا اقدمكم
ركبت الزوجة والاستاذ..
وطوالي ركبت شارع المعونة شمالا..
وقد حلفت ان لن اتوقف الا في الكباشي..
تراها لاتتجاوز ال25 كلم واصلا فيها عشرة كلم حتى كبري الحلفايا..
ووصلتهم البيت في الكباشي
ورجعت تاني لود البخيت..
وانا مغتبط ومتكيف من نفسي؛
فهذا اقل واجب لاحد الطف واحب اساتذتنا الاجلاء
...
سلام

عبدالمنعم الطيب حسن

18-02-2023, 12:12 PM

قصبة منصح الوادي المخدر دِرُّو
(قعدت قلبي تطوي وكل ساعة تفرو)
منصح الوادي هو الجزء الاعلى من الوادي وليس داخله انما طرفه
حافته،
وهو بمثابة التقنت عند اهل الزراعة
التقنت بصلته او طمامته او باميته او ثمرته بتكون اكبر واجمل واحلى
كونها بتشرب نز،
اها مثلها بقصبة المكان الاخصب في الوادي وبالتالى تكون انصح وانصع واكتر اخضرارا وازهارا،، وازدهارا
اصلا الوادي كله خصيب بدليل ان قشه مخدر معناها المطر كان قريب،
والاجواء بديعة...
...
الدِرْ: نوع من الحشائش المفضلة لدى الحيوانات العشبية
نوع طري وهين ولين؛ اقرب للسعدة ولكنه اقصر وزاحف ومنتشر

عبدالمنعم الطيب حسن

18-02-2023, 02:35 PM

الذكرى الحادية عشرة لغياب الهرم
...
محمد وردي الفنان دا؛

كمان حكايتو حكاية

لا اعرف منذ متى بدات اسمع وردي واطرب وانسجم؛

مع الصوت العذب والكلمة المنتقاة واللحن المنساب ؛

تماما.....

كما خرير الماء النمير من جدول؛ يتوغل في الحقول؛

يردم الهاوية....

بابورو اللستر يسوي تحححح؛

جاء وقت حفظت معظم اغنيات وردي ؛

كما هو الحال عند معظم السودانيين؛

وردي ليس فنان صالونات ومثقفاتية؛

ولكنه فنان الشعب....

هو فنان عبدالوهاب اخوي المفضل؛

وهو يقود شيوَله الضخم يكسر الجبال؛

في بلدا طيرها اعجمي ...

هو فنان صديقي هرول وهو سايق اللوري مليان برسيم؛

يوزع من سعد قشرة حتى شجرة ماحيبي ...

هو فنان صديقي عبدالحميد في ورشته في بديع زايد؛ حتى ان صديقه الباكستاني؛؛

وقد بدا يترنم احبك احبك انا مجنونك...

هو فنان محمد صالح يبيع الفول في ام الحمام؛ ويحلم بالرجوع؛

الي مراتع الصبا؛ وقد طال الفراق...

هو فنان اكوج راكب عجلة في منقلا ...

هو فنان الزبير راعي الغنم في البطانة ؛

هو فنان ادم في زالنجي؛

هو فنان اوشيك في شرقي كسلا؛

هو فنان صباح العيد في كل بيت سوداني؛

والمقيلة الكاربة؛ بين اليقظة والاحلام؛

وقد شقا النهار؛؛؛

هو فناني وفنانك وفنان افريقيا الفتية؛

هو فنان الامل

والنور

والضوء

والصباح

عبدالمنعم الطيب حسن

21-02-2023, 08:19 PM

التعويم ببساطة الغاء اي سلطة لعملة البلد بيعا وشراء وادخار،.
وتقييم كل السلع والخدمات بالعملة الاجنبية،
اي ارتهان هذا،،
ثم الاخطر ان الموظف بتعامل براتب بعملة مالها قيمة،
عليه ينبغي ان تعوم الرواتب والبلدلات وتعطيني كموظف عندها ما يوازي منصرفاتي،،
ثم التعويم بلا غطاء نقدي،، هو انتحار ونحر لاي زول بتقاضى قصاد عملو بالعملة المحلية،،
استلم كدولة كل الصادر من معادن ومنتجات زراعية وحيوان،
وضع ولاية المالية على كل دخل الدولة،
اما ان تحمل المواطن البسيط رفاهية القتلة هذا لا يجوز،،
مصر عندما عومت الجنيه كان لديها احتياطي نقدي
اكتر من مية مليار دولار في البنك المركزي
ولها دخل من المغتربين حوالي 25 مليار واكتر من النصف من قناة السويس، وبتبيع بترول
وبتصدر منتجات زراعية، ومن السياحة،
دخلها يتجاوز استيرادها
وميزانها التجاري يميل لصالح الصادر،
...
عموما القصة دي ستعجل بسقوط حكومة الهبوط والعسكر والحرامية،،
...
قلنا قبل سنتين
12-2-2021
والنتيجة ما نعيش لا ما نسمع!!

عبدالمنعم الطيب حسن

25-02-2023, 02:08 PM

تمكين الكيزان بعد الانقلاب تتم باوامر مباشرة من كرتي؛ نافع؛ علي.
للبرهان ولحمدتي سوا بسوا
ابراهيم جابر داخل المنظومة بثلات صرفات فهو كوز وعارف محل الفلوس وين وعسكري ولكنه لن يتجاوز البرهان الذي ليس بيده امر
كلهم ينفذون المرسوم بعناية من الكيزان للعودة للحكم خلال فترة انتقالية قصيرة؛ تحت حكمهم و
يتم فيها ترتيب قانون انتخابات مصمم لارجاع الكيزان بالانتخابات هذه المرة..
قحت جزء لا يتجزأ من الخطة؛ وان تحلم انها ممكن تتحالف وتاتي بالانتخابات
وطبعا الاحلام متاحة وومكنة..
وقادتها- قحت بلا جماهير- متماهون مع الكيزان ويقتسمون معهم خيرات البلد ووظائف لا تسد الرمق وليس لهم فيها القول الفصل فالقحاتة مجرد هنابيل؛ وهم اصلا كيزان بالوكالة او بالاصالة..

...

عبدالمنعم الطيب حسن

07-03-2023, 02:36 PM

العالم دي شفقانة يصحبي
سادت ثقافة البرجوازية الصغيرة تلك التي تتعجل النتائج دوما؛ تحرق مراحل
وتقفز فوق الزمن والعواطف والمبادي متوهمة؛ولكنها تتوه قبل الوصول الرزين لمرافي آمنة..
التي تتطلب خطوات وئيدة..
وئيدة وجِيدة طعم الدم...

عبدالمنعم الطيب حسن

08-03-2023, 02:58 PM

في يوم المرأة العالمي..
8مارس؛
التحية والتجلة والتقدير لكل نساء الارض قاطبة
وهن يفعلن المستحيل من اجل غدا مشرق لهن ولاسرهن ولمجتمعهن..
التحية للمرأة السودانية وهي تتقدم الصفوف في الثورة ككنداكة اصيلة من اجل الحرية والسلامة والعدالة..
التحية لكل عاملة ومعلمة وست شاي وست كسرة
وزارعة ومكافحة من اجل ان تعيش واسرتها في كرامة؛ من ذل السؤال والاستغلال؛
تحية خاصة
للكواكب المنيرة
*فاطمة ابوعركي؛ سيدة نساء الارض قاطبة الوسيمة الفهيمة الكليمة
معلمتي الاولى وملهمتي؛ ما انا الا بخا من بستانها العطير..
* محاسن حسن سعيد السمحة الباسلة؛ رفيقة الدرب الطويل؛
التى تناضل يوميا من اجل تربية اطفالنا في غربة صعبة..لها كل التقدير والاحترام والحب..
* اخواتي اسيا؛ مريم؛ بخيتة؛ عشة؛فتحية
الاخوات سكر نبات احبهن؛ انهن اعظم امانيي؛
ظلال وقد اجدبت الدنيا؛
كل الود والاحترام..
يطول عمرهن الخصيب...
*فاطمة الطيب بنتي توتا بعضا مني؛ التي تسهر الليالي
ديدنها التوفق وكانت الاولى هذا الفصل؛
لها التحايا والهدايا والحب؛

والتحية لكل الانسانية في كفاحها المستمر من اجل الحب والسلام والرفاهية
..
وتحية خاصة لك قارئي العزيز يا من تورطت ووصلت هذه المرحلة من الرسالة؛

عبدالمنعم الطيب حسن

11-03-2023, 10:06 AM

اذكر وانا طالب في اولى ثانوي قريت مقال طويل عنوانه
(حكاية 15الف حاج سوداني لم يعودوا من السعودية)
لسا حافظ العنوان كان نصه كما بين الاقواس؛
اذكر احد الاصدقاء قالي قريت الكلام دا كلو؟ ماكان في داعي
واضحة 15 الف حاج زاغوا؟
قلت ليهو عاوز اتاكد جاب الرقم دا كيف
البواخز رجعت فاضية
الوكالات استقبلت الاف التذاكر بتاعة العودة لصرفها نقدا..
بالمناسبة انا جيت عمرة من مصر ضمن الاف الطلاب
كشوني وقد كتبت بوست عن الترحيل في المنبر
وجيت راجع تاني من السودان حج
ودبرت 15 الف ريال اشتريت الاقامة؛
حيث مازلت
السعودية بلاد طيبة واهلها قوم كرام...

عبدالمنعم الطيب حسن

13-03-2023, 07:55 AM

النظام الراسمالي العالمي كله سينهار؛ و ستنهار المنظومة الثقافية الثقافية برمتها؛ المنظومة الثقافيةالمسيطرة الان..
انها مسالة وقت ليس الا؛
انه امر حتمي...
تعليقي على انهيار كم بنك في امريكا؛

عبدالمنعم الطيب حسن

14-03-2023, 05:18 AM

ياالله ياخ..
...
اشتغلت عام دراسي كامل سائقاً لحافلة مدرسية تقل تلاميذ صم من منازلهم لمدرستهم الابتدائية والعكس؛
وغالبا الاب او الام او كليهما صم.
كنت انزل امام كل بيت، واطمئن على جلوس كل تلميذ في مقعده،
واقوم باغلاق الباب،
واتحرك لمنزل اسرة اخرى..
كنت سعيدا بالعمل مع هؤلاء مرتفعي الهمم،
اخر يوم عمل؛
كل اب اسرة انتظرني امام الباب...
وكان وداعا حارا وصامتا ومصحوبا بدموع
لم انسى هذا ابدا رغم مرور السنون
ان يودعك اطفالا صم بدموع،
وانت مجرد سائق لحافلتهم الخيرية،
لابد انهم حسوا بتعاطفي اللامحدود معهم ومع اسرهم،
واهتمامي الشديد بكل تلميذ من صعوده للحافلة
وحتى رجوعه ودخوله منزل اسرته بصحبة كبير من الاسرة واحكام اغلاق باب منزلهم..

عبدالمنعم الطيب حسن

15-03-2023, 07:55 PM

الاصدقاء والصديقات الكرام؛
هذه مداخلة كتبتها قبل شهور في بوست لابينا الصادق سمل
وهو يحكي ان تجربته في العمل سائقا لحافلة تقل تلاميذ في روضة..
ذكرني لها اليوم احد الاصدقاء في الاشعارات
فنقلت البوست هنا..
شكرا للتفاعل العظيم مع الكتابة البسيطة،
دون إدعاء اي بطولات..
اي منكم او منكن لو جابتو الظروف لنفس العمل لادى نفس المهمة امكن بتجرد اكتر..
الانسانية هي مرجعنا جميعاً

عبدالمنعم الطيب حسن

17-03-2023, 09:50 AM

عبدالمنعم الطيب حسن

19-03-2023, 06:50 PM

في مطلع التمانينات؛جاء عبدالوهاب اخوي (وهبة) كما احب اناديهو من نيالا
حيث يعمل; جاء في اجازة..
تصدقوا بكيت من الفرحة لعودة اخوي..
وجاب لي قميص مشكل اصفر على خطوط حمراء عمل هزَّ وقتها ههههههها
وبرضو جاب معاه مسجل حديث وكبير
وشرائط لوردي والعطبراوي فنانه المفضل..
وطبعا قد لا يعلم كتيرون ذلك؛
ان عبدالوهاب دا قوقاي وغناي شديد
وصوتو مدهش..
ولكن شغلته الحياة.. فلم يهتم لهذا الجانب؛
المهم مناسبة الكلام دا
سمعت قبل شوية الغنوة ادناه للعطبراوي فاعادتني
القهقري لذكري تلكم الايام الناصعات..
وعلقت في تلكم الذكري..حيث كان الزمن ابيض..
وتذكرت انو كنا نسهر الليالي انا ووهبة في انس واضاحيك..
وقد ينضم لنا عبدالدائم ان هو موجود بالحلة..
لاحقا بعد ان اغترب وهبة
صرت اسهر مع عبدالدائم سهرات طويلة تمتد طوال اجازاته
او ان هو قريب ياتي في الويك اند
سعيد اخونا الاصغر بحكم سنه...
لم يكن مشاركا في السهرات الطويلة سابقا؛
ولكن انتقلت سهراتنا لاحقا في ليالي الغربة الطويلة؛ بعد ان تلاحقت الكتوف..
حتى مرات نتصادف في اجازة
بنكون مكتفين من الونسة مع بعض
وقذ ندخر الحكي
لليالي الغربة القادمات..
الونسة الليلية مع الاسرة كلها
دا موضوع طويلة كتبت عنه سابقا؛
.....
خليكم مع العطبراوي..

عبدالمنعم الطيب حسن

21-03-2023, 11:17 PM

أُمي

عبدالوهاب اخوي الاكبر مباشرة؛
طالما كان موجودا في البيت؛
فهو يجهز لها الحمام؛
ونظيف ثوب وحذاء...
ويشذب الزوايد من اظافرها؛
ويعطرا؛
ويفطرا؛
ويزورا ؛
القبة - قبة جديها الشيخ عبدالقادر؛ والشيخ مُحُمد -
ويظل يطوف حولها؛
ولا يهدأ له بال؛
حتى يطمئن على:
مقامها
ومنامها...

عبدالمنعم الطيب حسن

24-03-2023, 06:19 PM

حدثني عبدالدائم اخوي قال لي
عبدالوهاب قبل اغترابه الاخير
كان شديد الارتباط بامه في اخر ايامه في البلد
واخر ايام والدته بالدنيا
وختم عبدالدائم الخبير بشؤون الدنيا والناس والحياة:
امي دي عمرا ما بكت في وداع اولادا المغتربين؛
وهي المتعودة على غيابنا منذ بدايات شبابنا
حتى ونحن نقترب من الكهولة..
ولكن يوم سفر عبدالوهاب بكت بدموع
وحتى خفنا الا تسكت
واضاف:
والله عبدالوهاب دا كانو بودع في امه
انه احساس الام؛ والابن الذي يحبها..

عبدالمنعم الطيب حسن

25-03-2023, 01:00 PM

رمضانيات-1
صاحبنا المرحوم محمد حسن احمد؛ الله يرحمو ويوسدو الباردة؛
محمد كان مصابا بمرض السكر؛
يحكي انه في مطعم في بحري ذهب للفطور واخذ طلبه؛
وشاف صاحبنا داك ماف داعي لذكر الاسماء
العامل فيها اكبر صوام هههههها
يضرب في الفول والكبدة؛
وفاتح جوالو يقرا في الواتساب
براحة من غير ان يراه جلس في الكرسي الوراء ضهرو
وارسل رسالة واتساب:
اسمع يا فلان ما تكتر الشطة...
😂😂😂

عبدالمنعم الطيب حسن

26-03-2023, 08:58 PM

رمضانيات-2

صديقي الاثير ايام الخطابات؛ وقد سالته: كيف عامل مع السيد رمضان؛
رد كاتبا: رمضان عندكم هناك في السعودية مع الترطيبة والجداد والعصيرات والمكيفات؛
هنا حر يفسخ؛ فطور عصيدة ملاحا في الريف؛ وبليلة عيش ريف؛ وعشاء تعبان؛ وحلو مر مر وحار ومسيخ!! الله زاتو ما أمر بالهلاك ياخ...
نحاول نعوض السنة الجاية؛ ان تحسن الاقتصاد
😂😂😂

عبدالمنعم الطيب حسن

27-03-2023, 07:43 AM

رمضانيات-3

في حفل زواج صاحبنا عبدالوهاب العبيد عثمان؛
الذي كان في عمق رمضان..الحفلة عظيمة
والفرح عم الحضور وفاض؛ حتى تدفق في الشوارع المجاورة...
و غني الفنان ياريت يا ريت ياريت
تقرب اكثر الشباب والشابات من بعض..وغابوا في الفرح والنشوة والسعادة التي يشيعها الغنا دوما..
واحد واقف جمبي قال: يا هوي رمضان!
رد عليهم راقص في طرف الدارة المهججة:
رمضان مين؟ رمضان زايد ههههها
وتوغل داخل الفرح الجماعي
الفرح العريض..

عبدالمنعم الطيب حسن

28-03-2023, 07:29 AM

رمضانيات-4

في مكة؛ وفي شقتنا الديمقراطية..صاحبنا عاطف مصطفى الزين كان يلعب الشطرنج حتى السابعة صباحا في نهار رمضان؛ مع صاحبنا الفنان محمد جعفر؛ واختلفوا واحتد النقاش.. وتوقف اللعب
والتزم كل منهما سريره في غرفة بها حوالي سبعة شباب؛ شوية عاطف ولع سجارتو قصبة وقد استمخ؛ خلصها طفاها ونام..
صحيتو الساعة ستة للفطور
اثناء الوجبة قلت له هامساً:
اليوم دا عاد ممكن تكون جعان او عطشان
لكن خرمة مافي؛ ضحك عاطف فارس
في امريكا البعيدة له كل الحب والشوق من حاصف لقاصف...

عبدالمنعم الطيب حسن

28-03-2023, 05:52 PM

زول ساكت مسيكين وبيتم طرف؛ ماشي مع شلة كبار الحرامية؛ وبتوع البنوك والطواقي والقريبين في العمر والعوانطة؛ في حلة جمبنا..حتى انه اصغر منهم عمرا ...
ياخ بركب في بكاسيهم وبمشي معاهم المدينة؛
والمناسبات؛ وبجاملوا في نكاتو البايخة
المهم واحد مغترب حسا بحسه الاجتماعي انو العلاقة دي ما طبيعية..
فسال من له باع في العلائق الاجتماعية؛ واحد اهم راصدي التحولات..
العلاقة بين فلان دا والشلة دي ما طبيعية ماهو السر؟
اجاب الراصد: السر في انو صاحبك دا عندو دفتر شيكات مارقو للربا والتلاف
بكتب شيك باي مبلغ وبوقع وبغتي طواقي ياما
للعقارب ديل..
وبدوهوا من قعر الصحن لحسة؛
وساعة الورطة ياكل نارو😳
...
الصورة المرفقة للفت الانظار
صاحب فكرة عبارة لفت الانظار هو
خالد الطيب ابوقرجة

عبدالمنعم الطيب حسن

29-03-2023, 07:00 PM

رمضانيات-5

صاحبنا عبدالوهاب اشقر؛ جاب الفتوة بتاعة الازهر التي اباحت للطلاب الافطار ايام الامتحانات
وجاب معاهو فول وفلافل وكورس الفيزياء عشان يذاكر ونمشي للامتحان شقتنا كانت جمب الكلية..
وتصادف ان تواجد معنا اشرف علوم خشا معانا في السندوتشات وسوينا الشاي...
اها جات زميلتنا وجارتنا لقت الشباب بضربوا
سالت حللي اشرف دا عذرناه عشان مسيحي
لكن الجوز دا مالم؟
قاليها اساليهم
سالتنا مالكم؟
رد اشقر: انا مريض بالكلى؛
ومنعم دا صاحبي حا يتبرع لي بكلية.
😂😂😂

عبدالمنعم الطيب حسن

29-03-2023, 09:37 PM

رمضانيات-6

في عقابيل المرحلة المتوسطة؛ صادف رمضان العطلة المدرسية التي هي موسم العمل لطلاب ذلكم الزمان الثمانينات يا مجيدة؛
كنا نعمل طُلب نصحي ستة الا حتة واصلا بنكون نمنا تلاتة بعد سهرة جامدة في نادينا العريق..
نمشي نشتغل لحدت الساعة واحدة ومن الملطم للبحر نجلبق لحدت الساعة ستة ونرجع منهكين من العطش؛ وكنت اثناء ساعة الافطار لا آكل اي اكل نهائي اشرب بس موية مطلق وليمون وابري احمر وابيض.. وبس
اذكر ان والدي عليه سلام في برزخه الوضيء
كان في غلبة معاي في الشراب الما بروى معاهو دا؛ وكان يمسك كاس الشراب من يدي اغفله وارجع تاني انشرب..واستغل فرصة انشغاله مع اقرانه بصلاة المغرب واستمرأ الشرب..
وارجع الصينية البيت واكل لقمة بعد فترة
وامشي النادي..
فقط يوم الجمعة اكل مع الفطور..
كانت مبالغة كان ممكن اتوفى من العطش؛ وكان ممكن افقد سوائل..
لكنها العناية الالهية غطتنا من هول العطش وانا وشلتي من الُطُلَبْ..
وكانت مسالة الصيام دي لينا نعتبرا رجالة عديل؛
وكنا نري ان الفطور عيب..
يا لذكرى تلكم الايام ياخ هسا تذكرتها عطشت
😂😂😂

عبدالمنعم الطيب حسن

30-03-2023, 07:40 AM

تسلم حبيبنا الدكتور بابكر...
بصراحة احاول ما استطعت ان اكتب الحكاية كما حصلت لما كما اتمنى؛ خاصة وان معظم ابطال القصص في مجال النت او قريبين؛ يعني كدة ول كدة بتأفش بتأفش هههههه
زمان ايام المنتديات كنت بديها موية شوية شديد؛ بحيث لا يغير من السياق العام؛ محفظا على بيئة الحكوة واتساقها؛
وكما قال عبدالوهاب صاحبي ذات زنقة انو منعم دا كاتب يعني بِزَوِّد..
بس هسا مع الفيس تراجعنا من الموية وبقينا نبيع صافي نبع لحظتو غالباً..
وبحاول اعيش لحظة الحكاية تاني وانقل تفاصيلها دون تدخل من جانبي؛
فانا اقرب لاكون راوي اتحين دوما واحاول ما استطعت ان اروي بصدق مهما جنح؛ اوغل مسافرا مع الاصيل...
واعتقد دوما ان الواقع اكثر ابهارا من اي خيال..
..
لا اكذب عليك هنالك الكتير من المسكوت عنه؛
احاول ان اتجاوزه لانو في حاجات كدة تموتها بيها بس..
لا تحكيها لاي كائن؛ كان عند اي منا؛
وسبب تاني يجعلني لا اركز على المسكوت عنه لاعتبارات انو الممكن كتابتو
وحكايتو كتير..
وتسعفني ذاكرتي بتفاصيل التفاصيل؛
وفي اخراجها لحيز التدوين راحة لي؛ وسلوى ونشوة..
تماما زي الرسام تكون اللوحة مرتشة بالضباب في مخيلته؛
وما ان يفرغها على الورق حتى تستعيد زاكرته نضارها وقد خفَّت الحمول..
فالذكرى للانسان عمر ثان؛ وكنت اري وجه ابي وقد تهلل واشرق بالبريق وعاد اكثر شبابا ووسامة وسعادة؛
وهو يسترجع ذكرياته مع اخوانه واصدقائه على حافة حدود البطانة حتى عمقها ونواحي الهوج..
تسلم يابا..

عبدالمنعم الطيب حسن

31-03-2023, 11:21 AM

رمضانيات-7

في سجن ترحيل مكة؛ وفي نهار رمضان جابوا دفعة بينهم مصريين..جلس جمبي عمك مصري..
وكان زعلان شديد؛
المصري قالي: مسكوني جمب الحرم قالوا عليْ شحات باله شكلي شكل شحاتين؛
-حاشاك والله ياشمهندس؛ دا انت بيه؛
انبسط المصري لكلامي
- قال شحات قال دا انا عندي مصانع وشركات؛
يشوفوا التذكرة برضو دي درجة اولى
معقول الشحات يجي طيران وبدرجة اولى كمان..
تذكرتي على مصر للطيران الدرجة الاولى..
وفي نص كلامو معاي
طلع علبة سجائره واشعل
والله ماني صائم لهم
قال شحات قال
انا شحات؛ دا حنا اللي بنشحد..
والناس مقامات برضو
لا يكون الدخان بزعجك يا زول
-لالا خد راحتك يا هندسة،
😂😂

بابكر مخير

31-03-2023, 04:30 PM

معظم الصحفيين لا يتحمل راي اخر
..
الدكتور زهير السراج؛ كنت دائم التعليق في صفحته في الفيسبك
وكان صديقي؛
وكمان كان يتواضع احيانا ويعلق في صفحتي..
صحيح تعليقاتو كانت متكبرة وجوفا
وكنت ارد عليهو بكل تهذيب
ومرة في مقال سياسي كتبت في صحفته
انو هذا الراي ساذج
وعينك ما تشوف الا الحظر
معقولا بس
تحطر صديق دائم في صفحتك لمجرد انه كتب راي مخالف لرايك
..
ماعارف لكن شايف لساتنا شديد
..
عنون صفحتك يا طلحة في الفيس خلينا نتونس معاك
انا صفحتي باسم
عبدالمنعم الطيب بشيري
بالعربي

[B][COLOR="Magenta"]نحن هكذا
كان شايل دكتوراة ولا حمالي في الميناء، كان شيخ ولا حوارهو، كان جد ولا حفيدهو....
إحنا يابا أصلنا، زعليييييييييييييييييييييين أويي أويي loooollooool
مرة بيا حالة قريبة، ومع أني ما قلتا شيتن ولا علقتا سالب، لكنهو برضهو البروف ما الدكتور السراج لكنه قامتن تاني ولا معبرني، يمكن شايف أنه في فارق،،، ما حجبني ولا بلككني الحمد لله ;);)

عبدالمنعم الطيب حسن

01-04-2023, 11:46 AM

رمضانيات-8

حدثني زول صحبي وما بكضب فقال:
ساهروا حتى قريب الصباح في حفل صاحبهم المشترك؛ وتولوا ضيافة المعازيم حتى اخر صفرة؛ وما تعشوا تلك الليلة ولا تسحروا؛
وصحوا بدري بدري عند ناس العرس وغادر ستة الا حتة العرسان نحو كسلا الوريفة؛
وتوجه صحبي وصديقه نحو مطعم الكنيسة النابض في قلب بحري؛ وقابلا قوم كثر جالدين
وضربا الكبدة والعدس..
وشربا الشاي ودخنا.. في جو من الالفة والتسامح؛
وفي طريقهما للمواصلات
لمحا مزيرة مندية فذهبا وشربا كوزين باردين
وجاءت فتاة وراءت الشابين يشربان وكانت تحمل سكرا واستغربت للشابين الذين يطلعان التمساح من البحر ؛
وفي وسط استغرابها حب احدهم ان يخفف عليها
خلعة اكتشاف افطارهما فقال لها
السكر دا في رمضان ما قالو غالي يا غالي؛
فضحكت البت ولوحت لهما بشنطتها
وهي تضحك..
واصل صديقي الما بكضب
انه ركب مواصلات منطقتهم وان الكمساري
شم ريحة السجارة؛ وزعلان عمل
ويعاين ليهو ومستغرب وصاري وشيهو؛
وقال قَرّب ما يرجع لي الباقي؛
وكل مرة يحمر ليهو..
وختم: الكمساري يحمر لي وانا بعد كل
حميرة بديهو دشوة ..
😂😂😂

عبدالمنعم الطيب حسن

02-04-2023, 04:50 PM

رمضانيات-9
عمنا العوض من المزارعين المشهود لهم بالفَلاحة؛ في زراعة الشتويات وخاصة الطماطم
ومحصول طماطمو من الدرجة الاولى؛ وكان يتاجر في شتلات الطماطم؛ فيبيعها جاهزة لبعض المزارعين الذي لا يزرع (مسمسم)الذي هو زراعة بذور الطماطم لتصبح شتول فتُقلع ويُعاد زراعتها
اها لاحظ المزارعين انا الشتول التي يشترونها من عمنا العوض نوعها ومحصولها وانتاجها اقل من ذات الانتاج في مزرعته؛ فاستنتج المزاعون انه ربما يزرع مسمسم من نوع رخيص للسوق
واحر من نوع جيد يزرعه هو..
فسمى المزارعون لاحقا الطماطم التي لا تنجح
بانها تيرابا من العوض حتى ولو ناثر بذورها المزارع بنفسه، يقولون هكذا كنوع من التندر والفكاهة..
كلمت بالقصة دا صاحبنا في الدراسة Hafiz
في ونساتنا للطويلة الجزلة في تلكم الايام الخصبة..
ايام الامتحانات نمشي نجيب المحاضرات المصورة من زميلنا عمر الذي يحضر المحاضرات ويصور من اول الدفعة؛
المهم مرة امتحان زاكرناه من مذكرات صاحبنا عمر المصورة وما ظبط معانا
اها حافظ قال لي:
المذكرات الذاكرنا منها دي تيرابا من العوض...

عبدالمنعم الطيب حسن

04-04-2023, 12:07 AM

رمضانيات-10
ايام المتوسطة؛ عندي عجلة فيليبس حمراء..
وكنت احيانا امشي بها المدرسة.. كما هو حال جيلي آنئذن؛ المسافة لمدرسة الجيلي المتوسطة حوالي 7كيلو ذهابا ومثلها في الإياب؛ ومعظم الارقات نركب المواصلات..
مرة بالليل مولع اللمبة الخارجية بتاعة الحوش واصلح في عجلتي ساكت...
سالني اخوي الكبير عبدالدايم
بكرة ماشي المدرسة بالعجلة ولا شنو؟
اجبت:
والله حسب الامكانيات والزمان والمكان والظروف والمُلابسات...
علق عبدالدايم:
بالله شوف الولد دا فلسفتو؛ ما تقول ماشي بيها ولّ ما ماشي بيها ساكت!!
😂😂😂

عبدالمنعم الطيب حسن

04-04-2023, 06:58 PM

رمضانيات-11
جدي ابوعركي؛ كلامو مختصر وشوية. ممزوج بالسخرية..له مقدرات فائقة على
القفلة الحراقة.. او الكومنت الفشيخ بلغة جيل هذه الايام..
*احد جيرانه علق قائلا انو -فلان صديق العمر لجدي- ما شفناهو في العزاء دا
العزاء لاخو جدي والجار يقصد اثارة جدنا ليعلق
ولم يخذل جدنا الشعب
- فلان دا وصل قبالك انت الجار؛ وقعد تلاتة ايام
والله كلمتك دي حقو تمصمص خشمك منها
*عثمان ترتوس يهبش تحت اللحاف في سرير في غرفة جدنا الخاصة لقى صابونة حمام كبيرة؛
فعلق عثمان
- الصالونة شني
جدنا
- الهباشة شني
* اهلنا لايركبون على ضهر الحمارة الوالدة لتوها اكراما للعشرة؛ ويقولون ان ضهرها ليِّن..
جدنا سائق حمارتو الوالدة حديثا؛ ومعاها دحيش صغير وكيوت وينطط...
قام واحد شليق سالو
- جدي الدحيش دا لقيتو وين؟
- لقيتو واقع
😂😂😳

عبدالمنعم الطيب حسن

05-04-2023, 05:54 PM

رمضانيات-12
كنت في طفولتي وصباي احفظ اي عنوان بازر في جريدة
او كتاب او مجلة احفظه واظل اردده لايام بصوت مسموع ومرات بلحنو كمان؛ اظل هكذا حتى يعتر لي بنط عريض آخر احفظه وهكذا
اذكر انني حفظت الكلام ادناه بالنص ورددته لفترة
(السودان جزء من الجزيرة العربية لولا تطفل البحر الاحمر)
واذكر انني زعلت من البحر الاحمر المتطفل دا
اكتشفت لاحقا ان هذا العنوان الحفظتو ليس خطا فقط ولكنه ساذج..
وحفظت بيت المتنبي الشهير
(افدي ظباة فلاة ما عرفنا بها
مضغ الكلام ولا صبغ الحواجيب
حسن الحضارة مجلوب بتطرية
وفي البداوة حسن غير مجلوب)
قبل ان افهم معناه لاحقا
وفي المنصورة حفظت 32 تجربة فيزياء مكتوبة باللغة الانجليزية دون افهم معظمها استعدادا لامتحانات العملي..
وحفظت كذلك(انا آه من الكوميديا المصرية)
وذات مرة ناس البيت بتكلمو عن اي نوع من الطعام تفضل؟
اسيا اختي قالت مضوي اخوي دا بحب اكلة إسما الكوميديا المصرية
😂😂😂

عبدالمنعم الطيب حسن

06-04-2023, 01:34 PM

سيكشف حمدتي بعد فوات الاوان ان قحت اشد بؤساً وفقرا من الشرتايين والعمد المزيفين الجمعم في استراحات بري؛ ذات زنقة وبحث عن حاضنة فحضن الفراغ..
وبعدها لف الوسط دا بساق كلب من نهر النيل شمالا لحدت كردفان ومشى الشرق والخرطوم دا مافي حلة والا زارا ومافي كوز كضاب والا اداهو بكسي..
بحثا عن حاضنة ولكن وييين تلقاها عن الغافل
لسانه فاك؛ ومواقفو كيزانية بحتة..
وهو اداءة طيعة ولينة ومامورة في ايد اللجنة الامنية..
اخيرا تحالف مع قحت؛
وهي اقل شانا ومقدارا من ان تشكل له حاضنة
فقحت مجرد شلة اصحاب حار بيهم الدليل
وليس لهم في الشارع من نصير
والا
فليعنوا عن مليونية تائيد للاطاري
لن يخرج سوى سلك ومنقا وطه والتاج وعرمان
والدقير والسيخ وبرمة وبعض كيزان مغتيين بالتراب
وكوادر حماية مدنيين للجماعة المصنوعيين صناعة دول..
والجنويد ينحل
وحميدتي لاهاي بس
...

عبدالمنعم الطيب حسن

07-04-2023, 05:38 PM

رمضانيات-13
في المنصورة وفي شقتنا الكائنة بحي ستوتة الشعبي
الذي يسميه عنكبة (عمق المدينة)؛
حيث المدنية في ابهج تجلياتها..
كنت بذاكر في البلكونة وشقتنا تقع في زقاق ضيق
يا دوبك يمرر الناس والمهمات؛
طفلتان مصريتان شقتيهما متقابلات
كلتاهما في بلوكانتها.. تتساءلان بالالغاز
واحدة قالت للتانية: حاجة تشوفيها ما تشوفكش
تسمعيها ما تسمعكش
اجابت الاخرى: الهواء
ردت السائلة باستغراب: هو الهواء انتي بتسمعي كلامهم
كانت زميلتنا اشواق احمد عبدالقادرساكنة في الدور الارضي في عمارة عمنا فاروق العندو مرسم في الارضي في عمارته هذه يرسم ويشكل بالجبص
وكان رجلا لطيفا..
وكنا نسكن بالدور الاول انا وعنكبة البرلومين..
وفي السطوح يسكن عم فاروق واسرته
عم فاروق قال لاشواق ذات مرة: انو عبدالمنعم دا من المدينة؛ لكن ابراهيم دا واضح انو من الارياف..
هههها
اشواق قالت ليه بالعكس.. منعم الريفي وابراهيم ود الجزيرة الحوش؛
عمنا فاروق عندو بت في الابتدائي لطيفة وروحا حلوة معظم الوكت قاعدة مع اشواق تحت تذاكر
او تتونس..
مرة امها نادت عليها تعالى يا أمَر
وتاخرت قمر في الطلوع لامها
ندهت مرة اخرى تعالي يابت سرعة
البت قالت: اوكي وما طلعت
شوية وامها باعلى صوتها تنده
تعالي يا انتي يا بتاعتي الاوكي
😂😂😂😂

عبدالمنعم الطيب حسن

08-04-2023, 07:10 PM

رمضانيات-14
باختصار شديد اجد نفسي مع رجل الشارع العادي كما يسميهو عنكبة؛ الزول العادي وبسيط وسوداني؛ اي زول كلامو بسيط وصادق وعلى سجيتو دا زولي؛ غير كدة يبدا يتفلهم وينظر املاهو تنظير وفلهمة وانتهينا..
شاب من اهلنا حاول اتفلهم عليْ قدام تجمع من اولاد الحلة؛ المهم اديتو درس في الفلهمة اسعد المجتمعين هههههها وصار تعليقي معه نكتة يتناقلها الشباب في مجالسهم؛ وصولها لود اخوي عمر فصار يعيد حكايتها منتشيا
ويبداها كالاتي: الجنا متفلهم وعمي متفلهم وووو
ويستمر في الحكاية..
😂😂😂😂😂
في حلفا القديمة مع تاجر بتونس (نحن الطلاب نسمي التجار الدروز؛ )
عرفت انه ليهو اسبوعين في حلفا وما لقي لساتو حجز لمصر بالباخرة
ونحن الطلاب نسافر تاني يوم طوالي؛
طبعا نحن بنجي في السنة مرة والتاجر بمشي وبجي عشرة مرات بالمنطلق الاولوية للطلبة
المهم لما عرف اني جيت امس ومسافر بكرة؛
زعل وحاولت اراضيهو وافهمو
في النهاية قلت ليهو انتوا للدروز ديل ما بتحبوا الطلاب صاح؟ قالي: والله كراهية شديدة زي الحرب بين دولة ودولة..
نسيبنا المرحوم علي كان بنقل في طوب لضريح الشيخ علي ود حسن؛ في جلسة افطار قلت الشيخ علي الغرفة عاوز بيها شنو هو اصلا متوفي..
دقا علي تربيزة الاكل قائلا: والله لو عارفك وهابي لقمة في الصحن دا ما اكلا معاك..
فهمه الحاضرون وانا انو ما وهابي تب مافيولا يمكن ان اكون..
طبعا اصلا كان الطوب لتوسيع الخلوة
التي هي بيت الامة لاهل البلد؛
وشخصياً اسعد لحظاتي اقضيها في هذا المسيد
واسوق محمد واحمد للخليفة العطا عشان يعزم لهم...
في اسوان الباخرة جاية من حلفا كلها سودانيين؛ضابط الجوازات المصري قال للعسكري:
دخل لي الطلاب اولا لتاشيرة الدخول؛ عنكبة علق: بالله شوف الامتيازات التاريخية دي..
العسكري يشيل ويدخل في الدروز
الضابط نهره:
ياحمار اقولك دخلي الطلاب تتدخلي السودانيين
😂😂

عبدالمنعم الطيب حسن

09-04-2023, 06:46 PM

رمضانيات-15
في الغالب اي جنيهات سودانية متبقية معنا في حلفا نحولا لجنيهات مصرية؛ وننزل اسوان وقبل ما نمشي الفندق او بيوت الشباب او محطة القطار للسفر مباشرة شمالا؛ نمشي القهوة نشرب شاي صاموتي ونضرب سندوتشات الفلافل ولكن ذلك موضوع اخر..
السفرية ديك ما لقى الركاب جنيه مصري واحد في حلفا؛ فاضطروا يشتروا بباقي الفلوس تسالي تسالي تسالي؛ وارتفعت اسعار التسالي بدورها في حلفا..والدروز لان معاهم فلوس كتيرة عادي تلقى الدرزي معاها اردب تسالي
واصلو المية مية واردب كما يقول الاستاذ علي المك؛
المهم في الامر الباخرة وقد امتلأت بالتسالي شوالات شوالات رتخ رتخ..
دخلنا الباخرة وتبادل الطلاب التعليقات
وابتدرنا السخرية من التسالي انا وصديقي حافظ
Hafiz
- في درزي في الحقيقة هو ما دزري هو تسالي
- وفي درزي اسمو تسالي محمد تسالي
- وفي تسالي ماشي براه
- الباخرة دي ما باخرة ركاب دي باخرة تسالي وتسالي
- ستات الفول والتسالي في الخرطوم وحلفا تحولن لستات فول بس
- المظاهرات في الخرطوم وحلفا اندلعت يقودها القرفانين ومحبي التسالي ورواد السينما لانعدام التسالي
- في اسوان شوال التسالي ببريزة
- في اسوان اشتري شوال تسالي وخد اتنين مجانا
😂😂😂😂