نجاتنا من موت محقق فى حرائق الصيف السيسيليه..

[الجيلى أحمد]

آخر مرة أمطرت هنا كانت كانت قبل ثلاثة أشهر,
أنه موسم الصيف الخانق,
تهب فيه رياح السموم (شروكو) القادمة ن أفريقا بقوة
جالبة معها لهيب الصحارى ,
المنطقة هنا مشهورة بالحرائق فى الصيف شأنها شأن أسبانيا والبرتغال
والمناطق الجبليه ومناطق الغابات فى أوروبا ..

بدأ اليوم عليلآ منذ الصباح بشمس هادئة ورياح معتدلة وطقس صيفى منعش
فبدأنا العمل فى الشركة بخطى مرحة وتحايا الصباح , وقهوته تملأ الجو وتذيع نشاطآ فى الممرات داخل الشركة الصغيرة,
فى منتصف اليوم بدأ الطقس فجاءة بالتغير وبدأت الريح تهب قوية ودرجات حرارة منتصف اليوم حولتها إلى حمم
,ذهب معظم العمال لتناول وجبة منتصف اليوم فى منازلهم كما تجرى العادة هنا وبقيت أنا ومعى المديرة العامة والسكرتير وسائق شاحنة يستعد للمغادرة بشاحنته وينتظر مل بعض الأوراق ..
ذهبت للتدخين فى الخارج فوجدت أن الرياح أشتدت لتصبح عاصفة ولاحظت مكانى أسفل التل حيث تقع الشركة أن نارآ قوية بدأت تستعر فى أعلى المنطقة الجبلية, حاولت مع الثلاثة الآخرين تحضير خراطيش المياه المخصصة للحريق والإستعداد لأى مفاجأة قد تحدث, ونحن مشغولون بترتيبات السلامة كانت النار تتقدم نحونا بسرعة مزهلة وتحاصر النطقة من ثلاثة جهات,
الريح العاصفة جعلت منها حريقآ مهيبآ يطير ولايمشى , لقد إنحدرت نحونا بفعل الرياح فى دقائق معدودة, رجال الأطفاء كانو قد بدأو الإنتشار فى المنطقه ولكنهم لم يفلحوا فى السيطرة على الحريق , حاولنا إنقاذ مايمكن إنقاذه وحين هممنا بركوب العربات كانت النار الملتهبة قد أحاطت بنا تمامآ من الجهات الثلاثة,
كانت الشاحنة تقف أمام المدخل فجريت نحوها برفقة السائق , الحريق كان قد أحاط بالبوابة ولكن لم يكن أمامنا من حل سوى إختراقه , من خلفنا أصبحت رؤية الشركة والمنطقة صعبة فقد تكاثف الدخان حتى حجب الرؤية تمامآ..
وصلت إلى البيت سالمآ ولكن عربات الإطفاء والهليكوبتر لاذالت تسرع نحو المنطقة التى تم إغلاقها تمامآ ولاندرى حتى الآن ماذا حدث للمنازل المحيطة,
ننتظر حلول المساء تمامآ لنتبين كل شئ..

[أبومناهل]

الجيلي . .
حمداً لله على السلامة . .
ياخ مالك ومال إنقاذ مايمكن إنقاذه
( أي حاجة فيها إنقاذ كعبة )
الجري في الحالات دي هو أنجع وأفضل الحلول
وإنت جاري تغني بصوت عالي ( الجري دي حقي )
حمداً لله على السلامة .. وما تشوف شر إن شاءالله
وربنا يغطيك ويحفظ لإليشا وسميرة . .

[الوليد عمر]

الجيلى :



ألف حمد الله على السلامة ..

و الجاتكم فى (الشركة ) سا محتكم .. والله دى سلامة كبيرة ربنا خارجكم من هلاك محقق ..
والعندو باقى رزق لا زم يكملوا ..



ألف حمد الله على السلامة .. وأعمل حسابك يا حبيب قالوا الحرائق عندكم ما دايرالها زولا يولعها .. براها بتولع ..

وأهلنا الغبش .. دائما بقولوا :




" النار ما فيها من (شريرة) ...

و .. (بت النساء) ما فيها من صغيرة ..






سلامات .. سلامات ..
والله يديك طولة العمر ..

[رأفت ميلاد]

سلام يا الجيلى
سلامة وكرامة ياخى

الحرائق من أخطر الكوارث

الحمدلله الجات على كدة وربنا يستر على الشركة والناس الحولها

سلام

[خالد الحاج]

ألف سلامة يا صاحبي..
الحمد لله كتير..
وبعدين يا جيلي جعولية السودانيين دي هنا خليها..
كل شهر تقريبا بتجينا نشرة (Veilighied) وغالبا ما تكون في حالة حدوث حريق.
أهم نقطة أساسية في النشرة( أهرب بسرعة من مكان الحريق) ..
وعادة ما يكون هنالك مكان محدد للقاء في هذه الحالات حتى يتفقدوا الغير موجودين.
ألف سلامة يا زول

[OMER ISSA]

الف حمدآ لله على سلامتك يا صديقى
يا اخوى حرايق اوربا دى ما دايره حرورية الكبابيش
اقرب مخرج و قول يا فكيك و انت لو جريت ما بتتلحق
تبقى طيب للبنيات و الله يحفظك ليهم

[الجيلى أحمد]

ياخ مالك ومال إنقاذ مايمكن إنقاذه
( أي حاجة فيها إنقاذ كعبة )
.
:D:D


تعرف ياأبومناهل
إنو الحكاية دى كلها حصلت فى وقت وجيز جدآ, شأن كل الكوارث الى تقع..
ولولا ذهابى للتدخين فى الخارج لكانت كارثة لاتحمد عقباها,
الحصل إنو فى ظرف عشرة دقائق إجتازت النيران مساحة ضخمة من الحقول المكسوة بالشجيرات الجافة و الحشائش وإالتهمت فى طريقها أربعة منازل (فيلل) وحقول زيتون وعنب (دا كلو فى وقت وجيز جدآ)..
لكن يازول ربك ستر..

شكرآ ياحبينا وربنا يحفظ بنياتك

[مُهيَّد]

ألف سلامة الجيلي ...

ربنا ستر .... ياخ زي ما قال الخال - الجعلنة دي خليها بي جمبة ...

[عبد العظيم الطاهر]

ياخ مالك ومال إنقاذ مايمكن إنقاذه
( أي حاجة فيها إنقاذ كعبة ) :D:D:D:D:D:D
.

صحي والله ... الاريحية بتاعتنا نحنا السودانيين ديل هي العاملاها فينا ..:)

أطلق ساقيك للريح .. زي ما قال ليك

والله الف حمد الله على السلامة يا شيخي ... أها .. هسه الخروف متين ..؟؟؟:p

[عبد العظيم الطاهر]

:D:D


ولولا ذهابى للتدخين فى الخارج لكانت كارثة لاتحمد عقباها,



ياريت يا الجيلي ياخ .. لو جيت دخنت لينا .. قبل ستاعشر سنة ...:D:D:D

[mamkouna]

حمدلة ألف على سلامتك يا الجيلي.
ربنا يغطي عليك و يحفظك من كل سوء.

[ناصر يوسف]

الجيلي

الجيلي

الجيلي خوي هووووووووي

مالو الجنا ده ؟؟ طِرِش ولا شنو

هيااااااااا الجيلي بركه السمعتني

أها قلتلك

السيجاره المرقت تولعها برّه الشركة دي

كانت سيجارة شنو ؟؟

برنجي ولا ب بننقي ؟؟

سيجاره حمراء ساااااااااااكت كدي ولا مطععععععععمه

غايتو

لعن الله السجاير والتدخين

عِلا سيجارتك دي باااااااااااااااااااارك الله فوقها

ورُبَ سيجارة نااااافعة خير من باكو سيجاير ضااااااااااااااار

الجيلي أخوي

حمداً لله علي سلامتك

كُن في عون الله ورعايته

ربنا يحفظك لعيالك ويحفظهن ليك

قول آمين

آآآآآميييييييين يا رب العالمين

[أبومناهل]

ناصر يوسف
والله طلتك تفرح وتبهج


سيجاره حمراء ساااااااااااكت كدي ولا مطععععععععمه


ياحبيب الجيلي بتاع سوائل بس ;)

[kbeida]

حبيبنا الجيلي راجل سيسيليا
يازول حمدلله على السلامة لقد شاهدت هذه الحرائق في التلفزيون وكل الصحف كتبت عنها, أتاريك يازول أنت في نصها!!!؟
تعالوا علينا جاي في الشمال قضوا الايام دي معانا, عندنا عواصف وسيول وامطار والجو متلج لكن أحسن منكم.
الف الف حمدلله على السلامة


كبيده

[kbeida]

صور للحريق

[معتصم الطاهر]

العريس2 ( تربيع)
سلامات
وسلامتك

ان شاء الله يكون عندكم تأمين ..

[الجيلى أحمد]

الأحباء
الوليد
رأفت
ودالحاج
أبوعزيزه
مهيد
الليكودى عظمة
ممكونة
أبورحيق
باش معتصم

وكبيده

لكم التجلة ياصحاب وأمتنانى لصادق دعواتكم ,
ولكن يبدو ان الأمر لم ينته تمامآ هنا..
فاليوم كان أسوأ من الأمس برياح (الشروكو) القوية ودرجات حرارة عالية فى حدود الأربعين..
عصر اليوم إشتعلت النيران فى منطقة الحقول والمرتفعات المحيطة بحينا ولم نسطتع إيقافها إلا على تخوم الحى ومنازلنا..
عندما بدأت النيران إتصلنا بالدفاع المدنى (المطافئ ) ولكنهم أخبرونا أنه لم تتبقى لهم أى قوة يمكنهم إرسالها إلينا وإن جميع قواتهم وسيارات المطافئ مشغولة بإطفاء حرائق إشتعلت كالسرطان فى كل مكان, ووعدوا بالمساعدة حال توفر الإمكانية.. ولم يتبقى لنا سوى النفير وبالفعل بدأنا (سكان الحى فى التجمع لمجابهة الحريق إنتشاره نحو منازلنا..نجحنا فى ذلك لحد ما وسيارات الإطفاء أتتنا فى الوقت المناسب تمامآ بعد أن كاد الأمر يخرج من إيدينا.. زال الخطر تمامآ والحمد لله ولم يعد هنالك خوف من حرائق أخرى فى منطقتنا فالنار أتت على الكثير..

تم إعلان حالة طوارئ فى صقلية بعد أن إنتشرت الحرائق فى كل مكان,
وأنباء تصلنا عن سقوط قتلى فى "مسينا" ومناطق ضخمة إلتهمت الحرائق
أخضرها ويابسها..

عل الطقس يتحسن فى اليومين القادمين..

(ياكبيدة مطركم الكتير فى الشمال دا, أدونا منو "رشه")

[الجيلى أحمد]

ان شاء الله يكون عندكم تأمين ..


تعرف يامعتصم
الخواجات ديل نجيضين خلاص فى مسالة التأمين دى,
الواحد كان إشترا سفنجه, تلقاهو عامل ليها تأمين..

[الجيلى أحمد]

صباح الخير ياود الحاج

تعرف إنو قيامنا بإغلاق كل الأبواب والشبابيك فى آخر حظات أدى إلى إنقاذ مبنى الشركةمن الداخل ,فالحريق أتلف وإلتهم كل شئ تى الحوائط من الخارج
والجميع منذ الأمس فى غاية الإندهاش كيف لم تدخل تلك النار داخل المبنى
..(طبعآ لو كانت أتلفت الفايلات والسجلات والكمبيوترات , كان يبقى منو العوض وليهو العوض) لكن ربك لطف..


المفارقه
أنه لدى عقد مع هذه الشركة لمدة ثلاثة أشهر فى العام,
وأعمل معهم فقط فى الصيف
وتبقى لعقدى معهم إسبوع واحد..

[جلال محمد جلال]

اليوم كان أسوأ من الأمس برياح (الشروكو) القوية ودرجات حرارة عالية فى حدود الأربعين..
عصر اليوم إشتعلت النيران فى منطقة الحقول والمرتفعات المحيطة بحينا ولم نسطتع إيقافها إلا على تخوم الحى ومنازلنا..
عندما بدأت النيران إتصلنا بالدفاع المدنى (المطافئ ) ولكنهم أخبرونا أنه لم تتبقى لهم أى قوة يمكنهم إرسالها إلينا وإن جميع قواتهم وسيارات المطافئ مشغولة بإطفاء حرائق إشتعلت كالسرطان فى كل مكان,

العزيز الجيلي ..
سلامات ..
وحمداً لله علي السلامة ..
لكين يا أخوي النيران دي سببها شنو ؟؟
ما هو نحنا عندنا هنا درجات الحرارة في الأيام العادية فوق التلاتة واربعين في اليومين دي .. وفي عز الزنقة بتبقى فوق التسعة والأربعين ؟؟؟

[abubakr sidahmed]

حمد لله ع السلامة .. بس انتو صحراكم دة الفيهو نجيلة زي ما شايف في الصورة وين ؟؟؟ نحن صحارينا الشجر فيهو مغترب فلسان والكتاحة بتجييك مولعة براها .. يعني انا الشهر الفات (هسع مستمتع في منطقة استوائية باجازة قصيرة ) كان المكتب بتاعي ( يا رافت دة مكتب مجازا حتي ولو كنت مدير المشروع او ابوه ذاتو لانو بورتاكبن)كانت المكيفات بعد الساعة اتناشر الضهر تحرد وما تتحرك ابدا - ذكرتني بحمارنا في عمكة وهي قرية جنوب حلفا التي كانت اها حمارنا دة كنا بنشيلو خرج الموية ( دي حاجات ما للحناكيش بتاعيين البوتلد ووتر) من النيل الي البيت كدة مشوار كيلو وفي نص السكة حفرة كبيرة من زمن كتشنر كان حفرها يشيل منها تراب لخط السكة حديد .. المهم الحمار الافندي داك كان بعد مشواريين يحرد بس اول ما يصل بي وانا راجع من البيت الي النيل ومجعمز علي ضهرو ويشيلني فوق وهاك الي الحفرة احتجاجا لاستغلالي لكرمه فالمفروض دوريين موية وانا عايز التالت ... اها المكيفات تحرد بعدما تصل الحرارة في الضل 47 سنتغريد.. المهم بكان ماانا الحين ببني بيوت وعمارات ما محتاجيين لحريقة زي بتاعتكم لانو مولعة وانا يبدو لي كثرة اسماء النار عند العرب من لظي وسقر وجهنم ولهب يعني اسماء دلع للحبيب الموجود دائما .. كفاكم الله شر سقر
مودتي
ابوبكر

[kbeida]

ثلاثة قتلى ويستمر الحريق
صور جديدة

[امجد محمد الامين]

نسال المولى السلامة
الجيلي حمد لله على السلامة

[الجيلى أحمد]

.. بس انتو صحراكم دة الفيهو نجيلة زي ما شايف في الصورة وين ؟؟؟

سلامات والله يسلمك,

صقلية جزيرة كاملة الإخضرار بطبيعة ساحرة, ماليس أخضر فيها فقط الأسفلت الذى يغطى الشوارع ,فحتى البحر الذى يلتف عليها يتقاسم اللون الأخضر فيه الأزرق فى بعض الشواطئ..
ولكنه الجفاف,
وحالة الخرف التى تعم الكرة الأرضيه بسبب بلاهة الإنسان,
فقد تسبب الإستخدام الخاطئ للطاقة وإنتاج الغازات المضره إلى تحولات بئيه
لاتعتبر السيول والفيضانات والجفاف سوى مقدمات لكوارثها غير محمودة العواقب..
فالإرتفاع المستمر لمعدلات درجات الحرارة بشكل خارق لطبيعة البيئات أمر سيؤدى لمهالك محتمة ربما الحرائق أحد جوانبها ولكن إتلاف المحاصيل بسبب تلك الحرارة وإنخفاض معدلات الإنتاج سيمثل كوارث إقتصادية لمجتمعات للزراعة دور فى دخلها القومى ومكونها الثقافى والإجتماعى
(الزيتون, العنب ) كأمثلة....

[الجيلى أحمد]

لكين يا أخوي النيران دي سببها شنو ؟؟
ما هو نحنا عندنا هنا درجات الحرارة في الأيام العادية فوق التلاتة واربعين في اليومين دي .. وفي عز الزنقة بتبقى فوق التسعة والأربعين ؟؟؟

عزيزنا جلال
لك التحية وخالص الشكر
تتسبب فى هذه الحرائق غالبآ وسائط فى غاية البساطة (كبقايا سيجارة مشتعله القى بها عابر) ولكن فى الغالب لايتم النظر للوسائط فقط بل للمسبب الحقيقى وهو الجفاف وإرتفاع درجات الحرارة..

وإشارتك لإرتفاع درجات الحرارة عندنا فى السودان دون أن تسبب حرائق , إشارة ذكية,
ولكن مناطق خط الإستواء يعتبر إرتفاع الحرارة فى الصيف وإستمراره لأشهر جزء من سماتها , وهو أمر يناقض السمات البيئة فى أوروبا-..
وهذا لايمنع أن هنالك أيضآ أعمال إجرامية تتعلق بإشعال هذه الحرائق
ففى بعض التحقيقات يتضح أنها عمل مخطط البعض يعذوها للصبية والمراهقين
ومن يحار بهم بهم الدليل يرمى بها المافيا ..

[الجيلى أحمد]

صديقى كبيدة

نعم ياصديقى إنها لكارثة,
والأمر لن يكون أفضل حالآ فى مقبل الأيام ,
فدرجات الحرارة ستظل على إرتفاعها عندنا -وإنخفاضها عندكم فى الشمال-
, سمعت فى الأخبار أن الحكومة (فى المركز:D) خصصت ميزانية إستثنائية لمجابهة الحرائق..
____________
أسعدتنى مكالمتك وجميل سؤالك عنا..

[الجيلى أحمد]

نسال المولى السلامة
الجيلي حمد لله على السلامة
عزيزنا أمجد

شكرآ لك ولصادق دعواتك

[iman mohamed hussien]

الجيلي اخوي

الف لا باس عليك عارف امبارح بشوف في الاخبار
شفته الحريق قلت دي ما منطقة الجيلي لما ناصر والعائله
كانوا معاكم .الف حمد الله علي السلامه ليك والمدام واليشا
ايمان

[omrashid]

الجيلي

الف حمدلله علي السلامه

معليش علي التاخير ما كان عندي access

سلامه والف سلامه

[عبد الوهاب هنداوى]

الحبيب الجيلى لك الود
الف حمدا على سلامتك وربنا يحفظك لزهراتك
ولهم تحياتى وام الكل وتسلم يا عزيزى
...................هنداوى

[ريما نوفل]

العزيز الجيلي

ألف حمدلله على سلامتك
الرب يبعد عنكم كل مكروه.

[الجيلى أحمد]

الف لا باس عليك عارف امبارح بشوف في الاخبار
شفته الحريق قلت دي ما منطقة الجيلي لما ناصر والعائله
كانوا معاكم .الف حمد الله علي السلامه ليك والمدام واليشا
ايمان

ياسلام ياإيمان


قبل كم يوم كده كنت بتكلم مع خالد الحاج ,
وقلتا ليهو إحتمال فى الأسابيع الجاية أجى هولندا,
أول حاجة فكرنا فيها إنو نصلكم بهناك,
وبنجيكم كان جينا بى غادى..

ناصر والعائلة قضوا معنا وقتآ كالأحلام,
ورحلوا قبل أن نرتوى منهم
عليك الله ياإيمان قولى لناصر يوريكم الصور..

شكرآ لك وتحياتى لمدنى وللأزهار

[الجيلى أحمد]

حبيبنا هنداوى

شكرآ لك على صادق الدعوات,
وربنا يغطى عليكم دائمآ

العزيزة أم راشد

ولايهمك
عارفك مابتقصرى
وشكرآ لك


عزيزتى ريما
شكرآ لدعائك الصادق
وليحفظك الله ويحفظ أهلنا فى لبنان من محن الزمان

[الجيلى أحمد]

حمدلة ألف على سلامتك يا الجيلي.
ربنا يغطي عليك و يحفظك من كل سوء.




تعرفى ياممكونة إنو الغربة ومحن الزمن خلن قلب الواحد رهيف,
دعواتك دى كلما أقراها قلبى يفر والدميعات يترقرقن
عندى أخوات حنينات بالحيل, ودى كانت دائمآ دعواتن
طوال سنوات المهجر ..

[abubakr sidahmed]

عزيزي الجيلي

امس تابعت في التلفزيون صورا واخبارا عن حرائق تعدت المائة في بلاد الاغريق قريب منكم وان اكثر من 6 الف جندي يحاولون اطفائها وان التعب بلغ بهم مبلغا كبيرا جعلهم منهكيين مما استدعي ا طلب النجدة من دول اخري ....رايت الحرائق وهي تنتشر وسط الاخضر واليابس بسرعة مخيفة ..
ارجو ان تكون بعيدا الان عن هذه الحرائق ..
وتمنياتنا بالسلامة
ابوبكر

[الجيلى أحمد]

صباح الخيرات ياأبوبكر

ماحدث فى اليونان فاجعة ,
وموت ذلك العدد من الأطفال حرقآ وإختناقآ لاذال جاثمآ على الصدر كعلة..

(حين ترى مصائب غيرك تهون عليك مصيبتك)

[مهند الخطيب]

أخوي الجيلي ،،،،، سلاماتك كتار بالحيل

عساك انت طيب ونارك والعة :)

أبعد عن الشر وغنيلو ياجيلي مالك ومال البلاد البتحرق دي ؟!! امشي السودان ، البلد مابتحرق لكن بتحرق انتا زااااااااتك:D:D

ألف حمد الله على سلامتك

[عكــود]

شيخنا الجيلي . .
ألف سلامة يا حبيب
وده شرّاً متطّلبكم وقع في الزيتون
نسأله اللطف دائماً

ولولا ذهابى للتدخين فى الخارج لكانت كارثة لاتحمد عقباها, وبعد ده يقولولك التدخين ضار بالصحة ننصحك بالإمتناع عنه . .
يا ما في الدنيا مظاليم

[فيصل سعد]

ألف سلامة يا صاحب
و ما تشوف شر.

[الجيلى أحمد]

الأحباء
مهند
أبوذر
والمسافه الذى أشتقناه

شكرآ لكم ياصحاب وسأعود لكم لاحقآ..

[عمر مجذوب خطيب]

الجيلي يا اخوي يعني تخلي ميلانو السمحة وعارضات الازياء الاسمح ولموبارديا كلها وتمشي تشتغل في صقلية معقل المافيا - دا كلام دا ياخي ديل الكورة عندهم حرابة عديل (ديربي صقلية) حمدا لله على السلامة

[الجيلى أحمد]

حتى الآن لم تنزل قطرة ماء (على الأقل فى هذا الجزء من سيسليا)
إنه موسم الأمطار,!!
قبل عدة أيام إنتهى موسم حصاد العنب,
ثلاثين بالمئة من الثمر أراقته الشمس وأحرقته,
تلك خسارة كبرى للمزارعين..
نعم قد تتدخل الدولة بتعويضات , ولكنها لن تسد خسارة المزارعين غير المسبوقه..

وقبل أن تجف خسارة العنب,
تطل خسارة الزيتون دون ريبة..

أشجار ذابلة بثمار صغيرة, إن حبة الزيتون تحتوى الزيت فى ضخامتها
وكلما ضعفت هزلت حياة الناس..


إنها التغييرات المناخية التى تسببها بلاهة الإنسان..


ربما إنسان سيسليا أقل تضرر ,

ولكن ماذا عن الذين جرفت السيول
أرواحهم ومساكنهم...????

[الجيلى أحمد]

الجيلي يا اخوي يعني تخلي ميلانو السمحة وعارضات الازياء الاسمح ولموبارديا كلها وتمشي تشتغل في صقلية معقل المافيا - دا كلام دا ياخي ديل الكورة عندهم حرابة عديل (ديربي صقلية) حمدا لله على السلامة



سلامات ياعمر,

روما تبعد عننا حوالى الف كيلومتر,
فتخيل كم تبعد عننا ميلانو (المدينة التى تنازعها الأسبان والشماليين حينآ, حتى أصبحوا مزيجآ من ثقافتها) )أنها بجانب عظمتها
التاريخية التى تنضح بها شوارعها كمدينة ذات موقع جغرافى عجيب) وددت أن أحكى لك عن مسارحها وعن دار الأوبرا فيها , وعن أشهر المقاطع التى تسكننى, حين يتغنى بها أشهر الفنانين...

[نزار كروم]

حمد الله على السلامة يا جيلي
وما تشوف شر يا رب

[الفاتح]

الجيلي أخوي
ciao وكموستاي وتوتابين..
حمد الله ألف على السلامه.. خلًَي بالك من روحك

[بسمله]

آخر مرة أمطرت هنا كانت كانت قبل ثلاثة أشهر,
أنه موسم الصيف الخانق,
تهب فيه رياح السموم (شروكو) القادمة ن أفريقا بقوة
جالبة معها لهيب الصحارى ,
المنطقة هنا مشهورة بالحرائق فى الصيف شأنها شأن أسبانيا والبرتغال
والمناطق الجبليه ومناطق الغابات فى أوروبا ..

بدأ اليوم عليلآ منذ الصباح بشمس هادئة ورياح معتدلة وطقس صيفى منعش
فبدأنا العمل فى الشركة بخطى مرحة وتحايا الصباح , وقهوته تملأ الجو وتذيع نشاطآ فى الممرات داخل الشركة الصغيرة,
فى منتصف اليوم بدأ الطقس فجاءة بالتغير وبدأت الريح تهب قوية ودرجات حرارة منتصف اليوم حولتها إلى حمم
,ذهب معظم العمال لتناول وجبة منتصف اليوم فى منازلهم كما تجرى العادة هنا وبقيت أنا ومعى المديرة العامة والسكرتير وسائق شاحنة يستعد للمغادرة بشاحنته وينتظر مل بعض الأوراق ..
ذهبت للتدخين فى الخارج فوجدت أن الرياح أشتدت لتصبح عاصفة ولاحظت مكانى أسفل التل حيث تقع الشركة أن نارآ قوية بدأت تستعر فى أعلى المنطقة الجبلية, حاولت مع الثلاثة الآخرين تحضير خراطيش المياه المخصصة للحريق والإستعداد لأى مفاجأة قد تحدث, ونحن مشغولون بترتيبات السلامة كانت النار تتقدم نحونا بسرعة مزهلة وتحاصر النطقة من ثلاثة جهات,
الريح العاصفة جعلت منها حريقآ مهيبآ يطير ولايمشى , لقد إنحدرت نحونا بفعل الرياح فى دقائق معدودة, رجال الأطفاء كانو قد بدأو الإنتشار فى المنطقه ولكنهم لم يفلحوا فى السيطرة على الحريق , حاولنا إنقاذ مايمكن إنقاذه وحين هممنا بركوب العربات كانت النار الملتهبة قد أحاطت بنا تمامآ من الجهات الثلاثة,
كانت الشاحنة تقف أمام المدخل فجريت نحوها برفقة السائق , الحريق كان قد أحاط بالبوابة ولكن لم يكن أمامنا من حل سوى إختراقه , من خلفنا أصبحت رؤية الشركة والمنطقة صعبة فقد تكاثف الدخان حتى حجب الرؤية تمامآ..
وصلت إلى البيت سالمآ ولكن عربات الإطفاء والهليكوبتر لاذالت تسرع نحو المنطقة التى تم إغلاقها تمامآ ولاندرى حتى الآن ماذا حدث للمنازل المحيطة,
ننتظر حلول المساء تمامآ لنتبين كل شئ..

الف الف حمدالله على السلامه يا الجيلى
ربنا يحفظكم و يردكم سالمين
انشاء الله

[الجيلى أحمد]

الأحباء

نزار

الله يسلمك ياصديقى
وكن دومآ بخير

شليل

(توتو بينا , إى تو كومستاى)
شكرآ ياشليل

بسملة
وأخيرآ ظهرت
وينك يافردة ووين بقية الشباب..???
يعنى إلا نقرب نموت حتى تظهروا..?
شكرآ
وأتمنى أن يرد الله غربة الجميع
سالمين معافين..

[بسمله]

الأحباء

نزار

الله يسلمك ياصديقى
وكن دومآ بخير

شليل

(توتو بينا , إى تو كومستاى)
شكرآ ياشليل

بسملة
وأخيرآ ظهرت
وينك يافردة ووين بقية الشباب..???
يعنى إلا نقرب نموت حتى تظهروا..?
شكرآ
وأتمنى أن يرد الله غربة الجميع
سالمين معافين..

تبرا تبرا انشاء الله بعد خرف ( ابوى )

و الله باقى الشباب انا ذاتى ما عارفاهم وين
ماعندى نمره اى زول هنا فى الخرطوم و نفسى الاقيهم ..


اليشا كيف