حصاد الإجازة - محطات - [الأرشيف] - سودانيات .. تواصل ومحبة

عكــود

29-08-2007, 11:52 AM

http://www.3aza.com/upload/user_uploads/azrkamil83bb/Sudan-202.jpg مئذنة جامع العكوداب - قوز قرافي

محطة أولى - صالة القدوم:

وصلنا مطار الخرطوم ظهراً . . الصالة واسعة وعدد شبابيك ختم الدخول كثيرة، لكن المستخدم منها كان شباكين فقط، رغم وصول 3 طيّارات في وقت واحد، ولك أن تتخيّل طول الصفين والبطء في الإجراءات.
أمامنا في الصف كانت سيّدة وبصحبتها 3 أطفال، قدّمت الجوازات (4 جوازات) وكرت معلومات القدوم بالنسبة لها، حسب إعتقادها أن الأطفال لا يلزمهم كرت دخول منفصل. أقول قدّمت الجوازات للعسكري وبعدها عينك ما تشوف إلاّ النور . . تلقّت زجرة بصوت عالي من سيادتو ودرس في وجوب إتباع التعليمات وضرورة أن يُرفق مع كل جواز كرت دخول و (أرجعي أمشي عبّي البيانات دي هناك وأقيفي في الصف تاني!).
فيها إيه لو تكلّم بكلّ أدب مدركاً دوره كـ:
1- موظّف يقدّم خدمة لمواطن يتمتّع بحق المواطنة (ما عايز أقول يدفع ضرائب على دائر الملّيم دون مقابل).
2- عنوان بوابة دخول البلد، يفترض فيه أن يعكس الوجه المشرق لجهة عمله للقادمين.
3- سوداني يجب عليه التأدّب مع النساء خاصة التي تصحب أطفالها.

بعدها دخلنا لصالة العفش الفسيحة ذات العربانات الكافية لحمل الشنط التي تنوء بحملها من ملايات وستاير وعدّة وما خفي أعظم . .
و الحق يقال، ما زالت الصالة تحافظ علي بعض من شبابها، لولا سوء الإضاءة والتكييف.
فيها إيه لو بدّلوا اللمبات المحروقة وعملوا صيانة للمكيّفات؟

من الإيجابيّات، إتباع نظام الإسكاننق للعفش بدل التفتيش اليدوي، لكن لو الله غضبان على واحدة من الشِنط واعتقد موظّف الجمارك أن بها ما يستوجب التفتيش اليدوي، فإنها ستتعرّض لوابل من الشخبطة بالطباشير ذو اللون الأخضر (الذي يصعب إزالته مهما اجتهدت بعدها) على جنباتها الأربعة. هذا ما حدث لشنطة تسمى ديبلوماسية كنت أضع فيها الجوازات والتذاكر وبعض الأشياء الخفيفة، فما زالت المسكينة تعاني العدوان الغاشم رغم كل ما بذلنا من مجهودات لتخفيف آلامها.
فيها إيه لو كان عندو إستكر بلون معيّن يضعه بوضوح على القطعة المراد تفتيشها؟
ده حتى كان أحسن له من الطباشير يعمل له حساسية في إيديه.

قال سياحة قال . .

http://www.3aza.com/upload/user_uploads/azrkamil83bb/Sudan-130.jpg معاوية لاحق القش من الجزيري . . يبدو، والله أعلم، أنّه كُداد

عبد الله علي الحاج بابكر

29-08-2007, 12:46 PM

يا سلام على القيزان وعلى المآذن وعلى القرير كله.. تعرف صورة القش الكداد دي قربت تخليني اطلب اجازه واسافر ياخي صفاء ونقاء وراحة بال زيها فافي شوف الخضره دي باقيلك تخليليها زول يزهج. اقترح على سودانيات تقدم طلب لى كفيلك عشان يديك اجازه تاني وتجيب لينا الاشياء الجميله دي.

خالد الحاج

29-08-2007, 02:28 PM

معتصم الطاهر

29-08-2007, 04:47 PM

عكود

سلامات
حمد لله على سلامة وصولك
( عرفنا وصلت متين) الوكت دا كلو انت ما وصلت

تعيش ام ربى ..

omrashid

29-08-2007, 05:19 PM

عكود سلامات

ومنتظرين بقية المحطات

عكــود

03-09-2007, 10:04 AM

ياخي صفاء ونقاء وراحة بال زيها مافي شوف الخضره دي باقيلك تخليليها زول يزهج. العزيز عبد الله،
الف مراحب بيك في سودانيات الجمال.

هناك زهج مافي يا عبد الله . .
يكفي مرقة من البيت و الجلوس مع أوّل شُلّة قاعدة،
لا تحس ولا يحسّون بأنّك ضيف
سعادتك بهم لا تقل عن سعادتهم بك.

اقترح على سودانيات تقدم طلب لى كفيلك عشان يديك اجازه تاني وتجيب لينا الاشياء الجميله دي. إقتراحك سمح بالحيل والله . .
بس لو صلّحتو بتذكرة سفر ذهاب وإياب . .
تكون ما قصّرت تب :D

عكــود

03-09-2007, 10:08 AM

عبد الله علي الحاج بابكر

03-09-2007, 10:11 AM

عكود
الطمع ودر ما جمع طالبنا بالاجازه كمان نديك تذاكر ...ادوني اجازه انا شوفوا كان ما مشيت بى كرعيني وعمت المالح .. ياخي نحن ترابلي ولاد ترابلي نحب ارضنا بشده نجد نفسنا هناك الدفيق والاشميق والكوريق والكريق والنوريق .
نشيل الطوري ونفك الملوي ونتغدى بالملوخي
يا عكود حبنا للبلد مخالف .. زي مجذوب النوبه الصوفيي ... غرقانين تب.
لك محبتي

عكــود

03-09-2007, 10:28 AM

عكود

سلامات
حمد لله على سلامة وصولك
( عرفنا وصلت متين) الوكت دا كلو انت ما وصلت

تعيش ام ربى ..
الباش . .
وصول الجتّة بلا روح شِن فايدتا؟
نحمد الله أن عادت إلينا الروح،
وذهب الظمأ
وابتلّت القلوب.

تحياتي لقوت قلبك.

عكــود

03-09-2007, 10:29 AM

عكود سلامات

ومنتظرين بقية المحطات
كيفك يا أم راشد . .
باقي المحطّات في الطريق.

آسف للتأخير.

عبد العظيم الطاهر

03-09-2007, 10:40 AM

سلامات يا عمدة
قرأت مرة لشخص يشاكي من تجربة مريرة وأنقل علي لسانه :

" صعدنا إلي طائرة سودانير بعد صفوف ومعاملة قاسية قي مطار الخرطوم الدولي.. كانت معي طفلتي ثلاثة أعوام وبدأت في البكاء لأنها كانت تعاني من العطش. بكل براءة ضغطت علي الجرس أعلي الكبينة
أنادي علي المضيفة.. جاءت تتهادي بعد زمن ليس بالقصير وسألتني : في شنو؟
قلت لها أن طفلتي تعاني من العطش ورجوتها أن تأتيني بما يسد رمقها ...
قالت : هوي هوي ما تفتح لي باب موية نحن الفينا مكفينا . ؟؟؟!! "

طبعا لم أستغرب معاملة العسكري فهذا طبع والطبع لا يتغير يا عكود يا أخوي فهو نظام سلوك وتربية.
كنت أسعد الناس بخبر عرض سودانير للبيع.. بلاش عاطفة لا معني لها ناقل وطني ومش عارف شنو؟؟
نريد خدمة تحترم المواطن علي الأقل كزبون دفع من حر ماله لينال تذكرة يفترض من ضمن التكاليف فيها وجبة محترمة وجرعة ماء وابتسامة ...
والتودد عند السودانين يعتبر نوع من النفاق.. ؟؟ المصري يلقاك مبتسما وهو يناديك يا سعادة البي
إتفضل يا إبن النيل ... هذا هو عمله وإن كان في سريرته يقول (البواب إبن الوسخة) لكن لا يهمني سريرة القوم بل ما ينطقون به وما يرتسم علي وجههم..

ما أصعب الإبتسامة في الخدمة العامة في السودان.

واصل يا عمدة خلينا نتهيأ لما سيلقانا فأنا أنوي قضاء أجازة شهر قريبا إن شاء الله في السودان.

في إحدى سفراتي للسودان كنت ممتلئاً بالوطنية لذا قررت مع سبق الاصرار أن بلدي ووطني أولى بهذه الدولارات التي كانت تستفيد منها بلاد أخرى في سفراتي السابقات ...فتيممت صوب الخطوط السودانية في جدة طائعاً مختاراً وحجزت لى مقعداً بعد إستقبلوني بتلك اللا مبالاة وكانت نظراتهم لي تقول ( يا زول إنت الجابك لينا شنو ...؟ ) وسألتهم متى الحضور الى المطار فأجابوا : الساعة السابعة مساءاً والإقلاع في تمام الساعة العاشرة ... فكنت بالمطار من الساعة السادسة والنصف لعلمي بالوساطات و( البريورتي ليست والويتنغ ليست وهذه الاشياء ) فخشيت أن يدردقوني لذلك حرصت على الذهاب باكراً .. بإختصار شديد ... ظللنا جلوس على الكراسي بصالة المغادرة من الساعة السابعة مساءاً حتى الساعة الثامنة صباحاً من اليوم التاني ... قاعدين في الكراسي ... نوم الديك في الحبل ... وصلت الطائرة وأبتهجنا فخرجنا نتدافع لحجز المقعد الأفضل ( طبعا الركوب مش بالارقام ولا يحزنون ) فوجدنا الطائرة مستأجرة وهي تشبه علبة ( البف باف ) تماماً حاجة بيضاء كدا بدون أي شعار وممطوطة زي الكوسة .. هممت بالرجوع ولكن أحد المرافقين لي شجعني على الركوب ... ركبت ... وجدت أن لا أدراج علوية بالطائرة لكي تضع شنطة السامسونايت بل سلك أي والله سلك زي باصات الدروشاب ... بعد أن تكدسنا داخل الطائرة سودانيين على نيجيريين على تشاديين خرج كابتن الطائرة ومعه المضيفات .. خرجوا لكي يتفرجوا علينا وتعلو وجوههم تلك الابتسامة التي تحسها كالخنجر تماماً وهي تخترق منك الفؤاد ... ومن يومي داك حلفت ما أبقى وطني في السفر :D

عكــود

03-09-2007, 12:35 PM

يا عكود حبنا للبلد مخالف .. زي مجذوب النوبه الصوفيي ... غرقانين تب.
لك محبتي مدد يا شيخنا عبد الله . . مدد
وما أعظمه من إنجذاب.

جاييك بالصور البتنقر جوّاك.

عكــود

03-09-2007, 12:38 PM

وجدت أن لا أدراج علوية بالطائرة لكي تضع شنطة السامسونايت بل سلك أي والله سلك زي باصات الدروشاب:D:D
متل أم أسلاك دي يا عبد العظيم . .
إن بقى عندي سلك عريان ما أركبها،

العمر مش بعزقة ياخي.

تشكر على الإضافة والفتل على نفس الحبل.

عكــود

03-09-2007, 12:41 PM

محطة ثانية – حوش المغتربين:

عادة أحرص على عمل إجراءات السفر ودفع "الأتاوات" المفروضة قبل وقت كاف من سفري تفادياً للمفاجآت.
صباحاً بدري يمّمت وجهي شطر البعبع الذي ألفناه ليس عن حب من سكن الديار بل من كثرة الترداد. أسلمت أوراقي ورأسي و 4 جوازات لتقدير المعلوم الذي دفعته دون قولة بِغِم. بعد إكمال المعاملة والمساسقة بين الشبابيك التي تجبرك أن تحني رأسك للموظف/ة حتى تسمع ما تتفضّل به عليك من تعليمات من تحت نخريها، حيث لا مجال لسماع ما تقول وأنت منتصب القامة شامخ الهامة إذ أن صوتها خفيض، ومن المؤكد ليس عن خفر، كما أن الميكرفونات في الصالة تصدح بصوت عال "نحن من نفر عمّروا الأرض أينما قطنوا – رحمك الله يا العطبراوي". بالمناسبة، شيخ محمد بن راشد، في واحدة من زياراته لإحدى المصالح العندها تعامل مع الجمهور، كسّر بنفسو كل الشبابيك التي تُجبر المُراجع أن يحني رأسه.
المهم، بقينا على صف التأشيرة، الصف كان أطول من المعتاد، وإذا عُرِف السبب، بطل العجب، "فالشبكة طاشة"، عبارة يعرفها كل من فتح الله عليه بزيارة ذلك المبنى، يعني الكمبيوتر ما شغّال وما معروف يرجع يشتغل متين، لأنّو التحكم من وزارة الداخلية.
فوّضت أمري للـ لا نام لا أكل طعام وطبقت أوراقي متخارجاً، ولسان حالي يقول " بسيطة . . ما فضّل شي غير ختم التأشيرة وما بيستغرق عملها أكتر من ربع ساعة".
فهل صدق لسان حالي؟
أواصل المحطة التانية لإيراد موقفين . .
واحد مُحبط ويقوّم العصبي،
والتاني مُشرِق وينعش الأمل.

mamkouna

03-09-2007, 12:44 PM

كيفك يا عكود و كيف أخبارك؟

غايتو أنا و زوجي الممكون حصُلنا قطرك دا في آخر محطة..!:D
كانت فرصة سعيدة جداً...
إنشالله دايماً ملمومين في الخير..
و دايماً تامين..و دايماً سالمين.

عكــود

03-09-2007, 12:55 PM

يا سلاااااام يا الدعاش الرشّ
ممكونة والممكون
وما أجملها من محطّة . .
ولاااا عطبرة في أيّام عزّها :D

ربّنا يمد في الأيّام ونتلمّ في الخير دائماً.

تحياتي لكل الممكوناب

الهادي أحمد علي

03-09-2007, 06:23 PM

الأخ عكود والجميع

متعكم الله بالصبر

وإليكم هذه المحطه التي تماثل محطتك الأولي عند صالة القادمون بمطار الخرطوم

جينا داخلين أخي عكود قاصدين الصفوف التي أشرت إليها ، و في معيتي أبنائي حسام وسامي أعمارهم دون الثانية عشرة ، و طبعا القلب يبتبت من نظرات العساكر والأمنجية،.. شفت لي ملازم قريب من الصفوف بادرته بالتحية والإبتسامة.. بادلني بنظره إرتياب متجهمه ولم يرد تحيتي (أنا لا أطمح في أحسن منها). قلت له :جنابك أنا جوازي سوداني لكن أبنائي ديل عندهم جوازات أجنبيه في أي صف أقيف؟ تردد برهة فحصني متشككا في سودانيتي أحسست ذلك عندما أخذ جوازي و فحصه صفحة صفحة.. توقف عند صفحة الصورة ونظر إلي من جديد، نظر للأولاد لكن لم يشأ ان ينظر إلى جوازاتهم. سألني: جاي من وين؟ أجبته: من مسقط . ناولني الجوازات, وقال لي:ما في مشكله اقيف في أي صف ( أحسست أن كلامه منطقي ولم لا؟ ). إخترت أحد الصفوف المخصصه للأجانب. وعندما جاء دوري ناولت العسكري المتجهم جوازاتنا وبداخلها إستمارات الدخول وشرحت له الموضوع، فازداد تجهما وأخذ نفسا عميقا و كأن نظراته لجوازي تقول لي وقعتك سوده. ومن غير أن يجهد نفسه أي عناء ختم للاولاد دخول وفتح لهم الباب وطلب دخولهم .وعندها أخذ جوازي وأعاده لي وقال لي: شوف أي صف من صفوف السودانيين يمشيك يا زول. وزح للبعدك ما تعطل الناس. قلت له: بس ممكن أنت تمشيني.. الله يرضى عليك وأولادي دخلوا. لم يرد..... يا إبن العم ما تمشيني .. قال لي: أنت ما بتعرف تقرأ ؟ الصف دا مخصص للأجانب. فقلت له: يا أخي في أي بلد تاني الأولويه والإحترام للمواطن! قال لي: طيب جيت ليه؟ إذا أنت شايف هنا ما في إحترام ؟ قلت له: يا أخي أعتقد ما في بينك شئ, وانا ضيف عليك , و أكبر منك سنا. قال لي بتهكم: طيب يا عم, يا حاج, شوف ليك صف تاني وهوينا....عندها أدركت أن لا فائده ترجي من إستجدائه. ذهبت للصف المجاور وكان مخصص للسودانيين . طلبت من الجماعه في أول الصف أن يقدموني تقديرا لحالتي خاصة إنه أولادي صغار ودخلوا, فسمحوا لي عن طيب خاطر. وعندما وصلت للشبك قال لي العسكري: يا زول أمشي آخر الصف. فذكرت له أني إستأذنت من الجماعه, وأولادي ............. فقال: ديل سمحو ليك ...لكن الزول الموجود في آخر الصف ذنبه شنو ؟ والله لو بقيت شنو ما أمشيك ولو عايز تشوف أولادك بسرعه أحسن ليك تمشي زي ما قلت ليك آخر الصف.
بعد هذا التهديد ماذا تظنني فاعل غير الذهاب لآخر الصف

عكــود

03-09-2007, 06:39 PM

العزيز الهادي،

ياخي لي الشرف الرفيع بأن تكون أولى مداخلاتك في بيتنا المتواضع . .
ده كرم منّك والله.
ألف مرحب بيك يا خوي والدار مشرعة أبوابها لقلمك الجميل.

التجهّم والعدائية صفتان ثقيلتان في ميزان حسنات أصحاب السعادة عساكر جوازات المطار.
هل سمع مسؤولي الجوازات هناك بأهميّة وفائدة تدريب هؤلاء على فن معاملة الجمهور؟
هناك عدّة طرق لتدريبهم.
بل هل سمع أصحاب السعادة بحديث المصطفى صلى الله عليه وسلّم "تبسّمك في وجه أخيك صدقة"؟

متعكم الله بالصبر آمييييين . . وإيّاك يا رب.

تشكر على الإضافة الثرّة.

الجيلى أحمد

03-09-2007, 07:11 PM

حمدآ لله على السلامة ياصاحب

دا بوست متعه
وحتمآ ستنقل لنا صور الأماكن والأزمنة بأعين
تقدر قيم الجمال وحس رفيع يفى كل أوتار الدهشه

أحكى ياعكود

وراجى البلاوى
وقصص (مجنون طابت):D:D

عكــود

03-09-2007, 07:43 PM

http://scotland.indymedia.org/usermedia/image/5/gurair_009.jpgالقرير = الأرض الخصبة

الجيلي . .

كيفك يا الحبيّب . .
سأواصل ما سمح لي الوقت . .
ومجنون طابت ياهو ده وللا أنا غلطان؟
http://scotland.indymedia.org/usermedia/image/12/gurair_102.jpg أخذت خصيصاً للجيليإن بقى ياهو . .
جاييك ليهو وحكاويهو ما بتخلص
فقد أضاف لإجازتي طعم القرنفل
وبعض مرّات . . طعم الدوم
ذلك الزول الجميل الغتيّت. :D
خلّيك متابع معانا.

عكــود

03-09-2007, 08:19 PM

وأواصل المحطة الثانية:

عدت يا سادتي بعدها بعدّة أيّام مكتملاً الأوراق لعمل تأشيرة الخروج لي وللأسرة. كان ذلك الساعة 8 صباحاً حيث حضرت مراسم فتح الأبواب والشبابيك فكنت الأوّل في صف التأشيرة. الحق يقال كان يبدو كل شي جاهز لإستقبالنا كما شاهدنا في الداخل، الضبّاط موجودين وبكثرة، الكمبيوترات تربض في إنتظار من يقول فتّاح يا عليم رزّاق يا كريم ويسمّي اسم الله ويبدأ إنهاء إجراءات الجمهور مغلوب على أمره. إنتظرت أمام الشبّاك المفترض يكون للتأشيرة لتقديم أوراقي . . في الشبّاك الآخر لم يكن هناك صف وأفادت الضابط هناك أن زميلتها "حتجي بعد شويّة"، إلاّ أن الزميلة الـ حتجي بعد شوية كانت في حالة مبادلة شمار الصباح مع ضابط زميل وهم يشربون الشاي ولا يلتفتون أبداً للشعب الواقف المنتظر.
إستمرّت تلك الحالة حتى الساعة 8 ونص (نص ساعة بالتمام والكمال، الناس واقفة صف والضابط تسولف وتشرب في الشاي).
أخيراً جاتنا تقدل (صلاة النبي فوقو)، جلست وفتحت الكمبيوتر وشنطة اليد لإخراج النظّارة والموبايل، وطبعاً معاذ الله من أنّها تعتذر للجمهور الكريم على التأخير، مدّت إيدها، ذات الحنّة المنقوشة، لإستلام جوازاتي وأوراقي دون أن تنظر إلى العبد لله (أي نعم الشكل يمكن يكون ما مشجّع، لكن على الأقل كان تبدي إهتماماً بالذين هم سبباً في جلوسها في برجها العالي). ناولتها ما معي، واستلمته، عندها رنّ الموبايل ودخلت في محادثة لا نسمع منها شيئاً ولكنّا نرى التبسّم والتكشّم. أخرجت نظّارتها، مسحتها، لبستها وراجعت البيانات في الكمبيوتر. الجواز الأوّل ختمتو، التاني خلّتو على جنب وكان جوازي، التالت ختمتو، أمّا الرابع فنادت "عليكي الله يا محاسن تعالي شيلي الجواز ده أدخلي بياناتو في الكمبيوتر عندك" وكان جواز حرمنا المصون التي تستخدم ذات الجواز 7 سنوات خلَت وتوضع لها التأشيرة من ذات الشبّاك كل سنة، فـ يا ربّي المسح معلوماتها من الكمبيوتر شنو؟ طبعاً محاسن ما جات وظلّ الجواز محلّو، استغرق الكلام ده حوالي 10 دقائق، ثمّ التفتت ناحيتي، "جوازك ده تمّ العشر سنوات ولازم تستخرج جواز جديد، في ده ما بقدر أختم ليك تأشيرة خروج"، بكل أدب شرحت لها قصّة جوازي كالتالي: تنتهي العشر سنوات في أكتوبر 2007، وقبل حضوري للإجازة راجعت السفارة وطلبت جواز جديد، وكانت الإجاابة "دفاتر مافي . . لكن بنجدّد ليك ده لمدّة سنة زيادة" وتمّ التجديد بختم وتوقيع ضابط الجوازات في السفارة حتى أبريل 2008. كان الرد "أنا ما بقدر أختم تأشيرة لجواز تنتهي صلاحيتو في مدّة أقل من 3 شهور، لازم تقابل العقيد"،
"يا بت الحلال - صوتي إبتدا يعلا شوية- أنا كمواطن ذنبي شنو؟ الجواز مجدّد بمعرفة سلطاتكم حتى أبريل 2008، وإذا ما كان عندكم دفاتر لجوازات جديدة في السفارة، دي ما مشكلتي . . كدي أديني الجوازات الباقية دي وأديني جوازي و ورّيني مكتب العقيد وين". قامت من محلّها مشكووووورة وشالت جواز زوجتي ومشت تدخل البيانات في الكمبيوتر - يبدو أنها قِنعت من محاسن -. ختمت الجواز وأدّتني جوازاتي.
طبعاً مشيت لمكتب العقيد وأنا أكاد أتميّز من الغيظ، واستخلفت الله في باقي اليوم . .
قال ربع ساعة . . قال.

سأواصل وأحكي عن مقابلتي مع العقيد.

عكــود

03-09-2007, 08:31 PM

http://scotland.indymedia.org/usermedia/image/1/gurair_032.jpg مهرجان الألوان عند المغيب و . .
يا شمس لا تغيبي

mohamed hemaid

03-09-2007, 08:55 PM

وهنا اصلّي ركعتي التحية..

حمدا لله علي سلامتك ..
تلقاني في آخر محطة
ادفق منطال الدواخل شوقا

عكــود

03-09-2007, 08:59 PM

لا تنسانا من صالح الدعوات يا حميد . .
أنا قلت البوست ده إن ما جابك . .
بس يانا المركّبين القفر وراك.

طلّتك تفرح والله.

mohamed hemaid

03-09-2007, 09:44 PM

http://scotland.indymedia.org/usermedia/image/1/gurair_032.jpg مهرجان الألوان عند المغيب و . .
يا شمس لا تغيبي

عذرا لاقتباسها مرة تانية ..
ساقربل الشعاع المتدفق علي المياه
واوافيك بنتيجة القربلة..

منظر يرد الروح ويحتاج الي ابيات من الشعر..

عكــود

04-09-2007, 11:47 AM

تشكر يا حميد على قراءة الجمال . .
وهاك دي فوق البيعة:
http://scotland.indymedia.org/usermedia/image/1/sudan_129.jpg الحنين ودّاني، جيت للساقي سادر . .
قتّ أنشد ناسا، من زولي المسافر

عبد الله علي الحاج بابكر

04-09-2007, 11:57 AM

عكود
جنس الصور دي لا تنزلها لينا هني
ياخي كرهتنا الغربه

عكــود

04-09-2007, 12:02 PM

عكود
جنس الصور دي لا تنزلها لينا هني
ياخي كرهتنا الغربه شفت الجدول ده يا عبد الله؟
السر عثمان قال شنو؟

الحفير شوف عيني يبكي معاي يكابر
دمعو جدول جاري لي بيتكم مجاور

الله يلزمك الصبر.

عبد الله علي الحاج بابكر

04-09-2007, 12:33 PM

عكود اخوي
تعرف داير لي جريا بين روق التمر ده وافجخ الزراعي دي وجي اعصر صدري فوق تقند الجدول ده واشرب عكر منه وتاني ارجع وادردق وادرقق في الزراعي دي حسادة وبغرا من الجمال المالاقينوا ده..

omrashid

05-09-2007, 05:21 AM

عكود اخوي

اتاريها الشماليه سمحه دا وخضراء وهمبريب وانحنا قاعدين في امدر في الحر

خلاص عايزين نصيبنا في الثروه

السلطه ليكم

مع التحيه

الجيلى أحمد

05-09-2007, 05:57 AM

ياعكود

دا ما البوست البكتبو فيهو تعليق على الماشى,
دا بوست ماهل بدور القعاد وتفين الواطه..

خصصتمانى (أنت وجنابو) بسعادة وأيما سعادة
لكما المحبه والق كل كل الصباحات..

عكــود

05-09-2007, 07:38 AM

عكــود

05-09-2007, 07:43 AM

اتاريها الشماليه سمحه دا وخضراء وهمبريب وانحنا قاعدين في امدر في الحر يسعد الله صباحك يا أم راشد،
الدعوة موجّهة ليك ولراشد وأبوكم.
شرّفونا.

خلاص عايزين نصيبنا في الثروه

السلطه ليكم أهاااااا . . الغلط لزومو شنو؟ :D
أهلنا ديل كل شي ولا تهابشيهم في الثروة والأطيان،
ماك عارفاهم عاد؟

أبقوا علي أم درمانكم وسلطتكم،
بُخات وسُعاد عليكم.

عكــود

05-09-2007, 07:47 AM

ياعكود
دا ما البوست البكتبو فيهو تعليق على الماشى,
خصصتمانى (أنت وجنابو) بسعادة وأيما سعادة
لكما المحبه والق كل كل الصباحات..
عارفك متابع يا جيلي . .
وكنت أنت ثالثنا هناك . .
ماك من أهل الخطوة ما شاء الله عليك :D

دا بوست ماهل بدور القعاد وتفين الواطه.. وسفّة مااااكنة
وبزّيق على الجنب
وشخّيت في الواطة قدّامك بالعصا

خلّيك قريب.

عكــود

05-09-2007, 08:05 AM

أواصل المحطة الثانية (مقابلة العقيد - مدير شرطة جوازات المغتربين):

في مكتبه، بعد السلام عليكم، شرحت له سبب المقابلة . . كان ذلك بنبرة المتضايق الكايس يفش غبينتو ودعّمت حديثي بتوجيه نقد لاذع لمنتسبي وزارة الداخلية في عدم منطقية إجراءاتهم وكيف أنّهم يتفنّنوا في تعقيد أمور خلق الله وتعاليهم على المواطن المسكين و قطعهم الناشف معه مع البعد فراسخ عدّةً عن بذل أي ريق حلو للمراجعين، علاوةً على عدم التنسيق بين موظفي السفارات وموظفي الداخل . . و و و و كلام غاضب كتير.
هناك تكنيك في فن خدمة الزبائن يقول " إذا حدث خطأ معيّن، سبّبته أنت أو مصلحتك، وتضرّر منه الزبون ولا يمكن تداركه، يجب أن تعوّض الزبون بخدمة/ات إضافية أكثر من المعتاد. مثال لذلك إذا أخطأ الهوتيل في حجزك أو سبّب لك تأخير، يرسل لك المدير، عادة، سلّة فواكه في غرفتك. يبدو أن العقيد خالد كان يضع ذلك نصب عينيه.
الحقيقة لله الراجل إستقبل ثورتي بصدر رحب وشرح لي سبب ضرورة إستخراج جواز جديد.
وزاد على ذلك بأن وعد أن يستخرج لي الجواز الجديد في 10 دقائق والتأشيرة في دقيقتين، وما علي سوى أن أعبّي طلب جواز جديد وأرفق 3 صور شخصية وإحضارها له في مكتبه، وسيتكفّل هو بالباقي. قال كل ذلك بكل إبتسامة وروح مرحة (الراجل دمّو خفيف وعندو قبول) مع إقراره بأن المواطن لا يجب أن يدفع ثمن تقصير السلطات.
رغماً عن أن السبب لم يكن مقنع بأي حال من الأحوال، حيث أن جوازي ساري المفعول حتى أبريل 2008 حسب تجديد السفارة المفترض يكون معتمد من كل أجهزة وزارة الداخلية وسلطات الجوازات في المطارات الأخرى، إلاّ أن الرجل بلطافته أستطاع أن يمتص كثير من غضبتي.
لم يكن أمامي خيار غير أن أتّبع ما نصح به، وبما أنّي لم أحضر في ذلك الصباح الجميل حاملاً معي صور شخصية التي لا تفارقني في السفرعادة، توكّلت ومشيت الأستوديو في نفس الحوش للتصوير، وطبعاً كنت لابس جلابية، ونصحني المصوّر أن أخلع العمة والطاقية (لأنّ الصورة بأي غطاء للرأس غير صالحة للجواز والبطاقات الرسمية). ولكم أن تتخيّلوا الصورة الطلعت والتي تزيّن حاليّاً الصفحة التانية من الجواز الذي يحمل الرقم 160001 والساري المفعول حتى تاريخ 4/8/2009.
رجعت لمكتب العقيد خالد وسلّمته الصور والطلب، وكان عند وعده، أخد الطلب والأوراق اللازمة وقام بعمل ملف و وقّعه وطلب من أحد العساكر الذهاب للشبّاك لدفع الرسوم والرجوع حالاً. في هذه الأثناء كنت أجلس في مكتبه أمامي كباية قهوة طلبها لي وعدد وافر من الجرايد قدّمها.
بعد دفع الرسوم، أرسل الملف لـ "مجاهد" مع توصية بأن يستخرج الجواز خلال 10 دقائق. يبدو أن مجاهد كان "مشغول شوية" فتأخر أكثر من الزمن المطلوب. أحسّيت بالحرج في الجلوس في مكتب الرجل، خاصة وأن المراجعين ماهُن شوية، فقلت لو: أنا بمشي آخد لي لفّة وأجيك راجع، وكان الرد: "من محلّك ده ما بتتحرّك، أنا وعدتك ما تمرق من هنا إلاّ والجواز في إيدك وعليهو التأشيرة". صراحة الراجل خجّلني بطريقة معاملتو معاي ومع كل المراجعين الدخلوا مكتبه أثناء وجودي هناك.
المهم، لا أطيل عليكم، إستلمت الجواز والتأشيرة بعد أن قام بنفسه وتابع الإجراء من موظّف لآخر حتى أتي به بين يديه. صاح الإجراء أخد يمكن ساعة أو أكثر، وليس كما وعد، لكنّه كان مدركاً تماماً لدوره الخَدَمي و مطبّقاً بكل كفاءة واقتدار شعار "الشرطة في خدمة الشعب".

لك منّي ألف تحية سعادة العقيد خالد . .
وليت زملائك وزميلاتك الآخرين/ات كانوا على نفس القدر من المسؤولية.

عكــود

05-09-2007, 08:35 AM

http://scotland.indymedia.org/usermedia/image/10/gurair_100.jpg نتقابل بعد الدوام . .
(حَنَــك تقيــل)

abu qusai

05-09-2007, 08:46 AM

http://scotland.indymedia.org/usermedia/image/10/gurair_100.jpg نتقابل بعد الدوام . .
حَنَــك تقيــل

الله يجازي محنك ..... متابعك أنا ،

والله لكن سعادة العيشتو جم طينو وتمرتو
يقلع منو يشتل في حفرتو

لكن ما شاء الله الجداول مليانة شايفها ..

لك التحية وللأسرة

أبو قصي

kbeida

05-09-2007, 08:50 AM

عكــود

05-09-2007, 09:10 AM

الله يجازي محنك ..... متابعك أنا ،
والله لكن سعادة العيشتو جم طينو وتمرتو
يقلع منو يشتل في حفرتو
لكن ما شاء الله الجداول مليانة شايفها ..
لك التحية وللأسرة
أبو قصي
تسلم يا أبا قصي على المتابعة . .
الجداول مليانة . .
الله يملا النفوس باليقين.

سلام ليك وللمعاك.

عكــود

05-09-2007, 09:17 AM

الحبيب عكود
تعرف بوستك ده ممكن يتجزأ لي عدة بوستات وكلها شيق و ممتع , يعني القرير دي براها بوست يمكن يتقسم لي صور وشعر وغناء و طرائف و... .
صالة الوصول في مطار الخرطوم دي براها بوست و شئون المغتربين بحلوها ومرها بوست.
شكرا شكرا شكرا
ومتعك الله بالصحة والعافية

كبيده
كبيدة يا عزيز . .
ليك وحشة وشوق.

تشكر يا سيدي على الكلام الجميل عن البوست . .
جمالو يجي من مداخلات الأحباب هنا،
وما ينوبني إلا أجر المناولة.
أحببت أن أمد لكم مائدة إجازتي بكل الأصناف . . على علاّتها
و أشرككم في كل هذا (القرير، الإشراقات والإحباطات).

وخليك متابع . .
فما زالت هناك محطات أخرى.

ناصر يوسف

05-09-2007, 09:36 AM

عكود يا طيب القلب يا سيد الشهامه

علي الرغم من إنو الواحد زعلان منك وداير يطق عديييييييييل كده

عِلا البوست ده شال منو كتير زعل ما بحملو

واصل في نثر محطاتك المِمراحات

وتحايا خاصة جِداً لِرُبي

عكــود

05-09-2007, 09:42 AM

ناصر الحبّوووووووب،

ياخي لك العتبى حتى ترضى . .
وما بقدر علي زعلك والله.

أنت والبورداب الإلتقيتهم في إجازتي . .
كنتم من أهمّ المحطّات
التي سيتوقف فيها قطار الحكي.

رُبى تغريك السلام وكانت منتظرة تلفون منّكم.

عكــود

05-09-2007, 09:47 AM

http://scotland.indymedia.org/usermedia/image/8/sudan_132.jpg
عشان تلحق التمرين . .
لازم تحش قشّك من ضوْ.

هدية ليك يا ناصر . .
بس كيف تعفي وترضى؟

عبد الله علي الحاج بابكر

05-09-2007, 10:08 AM

عكود
عرفنا البلد ديك قالوا
حتى الطير يجيها جاعان من اطراف تقيها شبع
لكن
حتى الحمير تسلم على بعض وتشم بعض وتحب بعض وتتعرف على بعض
دي حكايي تاني مره.
الغريب شوف الراكب ادى الحماره فرصه تسلم وتتعرف على الحمار الاخر ما ضربها ولا منعها
بلد والله ياخي طيبة اهلي كاتلاني انا ما انفع الا بيناتهم..

عكــود

05-09-2007, 11:35 AM

حتى الحمير تسلم على بعض وتشم بعض وتحب بعض وتتعرف على بعض
دي حكايي تاني مره.
الغريب شوف الراكب ادى الحماره فرصه تسلم وتتعرف على الحمار الاخر ما ضربها ولا منعها
بلد والله ياخي طيبة اهلي كاتلاني انا ما انفع الا بيناتهم.. لسان حال الراكب يردّد قول الشاعر:
أحبّها وتحبّني ويحب ناقتها بعيري

لذا رخى الحبل للعشّاق.

مرورك يشكّل إضافة مهمة ويرسم لوحات مكملّة يا عبد الله.

تسلم

ناصر يوسف

05-09-2007, 12:29 PM

http://scotland.indymedia.org/usermedia/image/8/sudan_132.jpg
عشان تلحق التمرين . .
لازم تحش قشّك من ضوْ.

هدية ليك يا ناصر . .
بس كيف تعفي وترضى؟

العكودابي

سلام

عوافي

شكراً لتخصيص هذا العام

وما لها كاميرتك تغرينا جميعاً بزيارة هذه الأرض الخصبة في كل شئ (الشماليه)

شكراً كثيفاً مجدداً

الهادي أحمد علي

05-09-2007, 01:39 PM

أيها الشقيق
تعرف تصديقا لكلامك( زي ما بيقولوا) الموضوع كله يعتمد على التدريب... لأنه مؤكد العقيد خالد نال قدرا من التدريب مكنه من أداء وظيفته كما ينبغي له أن يؤديها. لكن قبل ذلك ربما الحد الأدنى غير متوفرهنا .. ففي بلد زي السودان مفروض أن يكون الحد الأدنى للإلتحاق بوظيفة شرطي (نفر) مفروض ألا يقل عن درجة البكالريوس و الحمدلله صارت الجامعات في بلدنا (الثانويات سابقا) صارت تفرخ آلاف الخريجين، الذين صار موضوع بطالتهم هاجسا له إنعكاسات نفسيه وإجتماعيه معقده .
وأعتقد أننا بحاجه لطرحه يوما ما في بوست منفصل.
كذلك يا أخي سبحان الخالق تصدق إنه أنا جوازي صادر بتاريج 7 فبراير 1998 يعني يكمل 10 سنوات بتاريخ 6 فبراير 2008م (مش ابريل زي جوازك) . يعني بالحساب يوم خروجي كانت المدة المتبقية لجوازي أقل من سته شهور لكن لم تتم معاملته كجوازك !! تعرف ليه لأنه المسأله كلها بالمزاج... يعني أنا طلعت و أنت لا أنت تم إصدار الجواز لك في مده لا تتجاوز نصف ساعه و غيرك يحتاج يومين وربما تكون إمكانياته اللوجستيه لا تسمح له بالمبيت في الفنادق والأكل من المطاعم والإجازه لا تكفي

لا توجد معايير ولا إجراءات محدده وإن وجدت لا تتبع إلا بالمزاج.
صدقني السودان غني بكل شئ حتى بالحراميه. والسوداني قوي البنيه كثير الصبر شديد التحمل وإلا لما تحمل كل هذا التخريب والتعذيب.
هل ينقصنا التدريب أم التربيه وخاصة التربيه الوطنيه , إحترام الغير، إحترام الوقت والواجب العام والمال العام؟؟؟؟؟

صورك غاية في الروعه وتنبئ بأن من يقف خلف عدسة الكاميرا فنان بحق ، حقاً وليس إطراءأً إنه بوست رائع وغني وانت تخرم بين محطاتك بين الكلمه والصوره.
التحيه أيضاً لجميع المتداخلين.

بالمناسبه حاولت أرفع بعض الصور بس أنا شويه عودي طري في هذه الأمور و كما ترى بتعلم منكم جميعاً كل يوم جديد.

عكــود

05-09-2007, 07:41 PM

سنــــــدة (1):

الأحباب . .
ناصر يوسف
الهادي
الأخوة/ات

في حضرتكم يطيب الجلوس وتسمو الأرواح . .
تعالوا نستمع للفذ أبو داؤود ثم أواصل معكم وبكم.
http://aafat.org/upload/uploading/Dawood_awa_tazkorina.wma
أسمحوا لي بإهداء خاص لراجل سيسيليا . .
الحبيب الجيلي،
فبه عشق خاص لأبي داؤود و
الخصل العربيدة و
كل منديل منقوش جانبه.

عكــود

06-09-2007, 08:00 AM

العكودابي
سلام
عوافي
شكراً لتخصيص هذا العام
وما لها كاميرتك تغرينا جميعاً بزيارة هذه الأرض الخصبة في كل شئ (الشماليه)
شكراً كثيفاً مجدداً كاميرتنا ما بتغريك يا ناصر . .
كاميرتنا بتدعوك
عسى أن تراودك نفسك
للجمال.

لك المعزّة الخالصة.

عكــود

06-09-2007, 08:09 AM

أيها الشقيق
تعرف تصديقا لكلامك( زي ما بيقولوا) الموضوع كله يعتمد على التدريب... لأنه مؤكد العقيد خالد نال قدرا من التدريب مكنه من أداء وظيفته كما ينبغي له أن يؤديها. لكن قبل ذلك ربما الحد الأدنى غير متوفرهنا .. ففي بلد زي السودان مفروض أن يكون الحد الأدنى للإلتحاق بوظيفة شرطي (نفر) مفروض ألا يقل عن درجة البكالريوس و الحمدلله صارت الجامعات في بلدنا (الثانويات سابقا) صارت تفرخ آلاف الخريجين، الذين صار موضوع بطالتهم هاجسا له إنعكاسات نفسيه وإجتماعيه معقده .
وأعتقد أننا بحاجه لطرحه يوما ما في بوست منفصل.
كذلك يا أخي سبحان الخالق تصدق إنه أنا جوازي صادر بتاريج 7 فبراير 1998 يعني يكمل 10 سنوات بتاريخ 6 فبراير 2008م (مش ابريل زي جوازك) . يعني بالحساب يوم خروجي كانت المدة المتبقية لجوازي أقل من سته شهور لكن لم تتم معاملته كجوازك !! تعرف ليه لأنه المسأله كلها بالمزاج... يعني أنا طلعت و أنت لا أنت تم إصدار الجواز لك في مده لا تتجاوز نصف ساعه و غيرك يحتاج يومين وربما تكون إمكانياته اللوجستيه لا تسمح له بالمبيت في الفنادق والأكل من المطاعم والإجازه لا تكفي
لا توجد معايير ولا إجراءات محدده وإن وجدت لا تتبع إلا بالمزاج.
صدقني السودان غني بكل شئ حتى بالحراميه. والسوداني قوي البنيه كثير الصبر شديد التحمل وإلا لما تحمل كل هذا التخريب والتعذيب.
هل ينقصنا التدريب أم التربيه وخاصة التربيه الوطنيه , إحترام الغير، إحترام الوقت والواجب العام والمال العام؟؟؟؟؟

حباااابك يا الهادي من تاني . .
مداخلتك هبشت مواطن ألم كثيرة يعاني منها جسد البلد . .
كنّا قد افترعنا بوست يناقش كثير من هذه الآلام . .
إليك رابطه وأرجو زيارته:
http://sudanyat.org/vb/showthread.php?t=1310

جوازي يا الهادي كان بيكمّل العشر سنوات شهر 10 / 2007 وفي السفارة هنا، قبل سفري السودان، تمّ تجديده (بدلاً من إستخراج جواز جديد - مافي دفاتر -) حتى شهر 4 / 2008. إلاّ أن جماعتنا في حوش المغتربين لم يعترفوا بتجديد السفارة، لأنّو الدفاتر وصلت وبالتالي أي تجديد بعد العشر سنوات لا يُعتد به !!!! :eek:
شفت التناقض ده كيف؟

لا تملك إلاّ أن تغنّي:
عذّبني وتفنّن . .
فييييييي ألوان عذابي.

كل التقدير والإحترام يا الهادي.

ود الريس

06-09-2007, 10:53 AM

الموقر / عكود

حمدا لله على سلامتك والاسرة ...
الى متى نحن هكذا نجتر ذكرى الايام الخوالى فى خدمتنا العامة ...؟؟؟

عكــود

06-09-2007, 12:16 PM

العزيز ود الريس،

مرحب بيك في سودانيات . .
وألف أهلاً.

هي بعض جروح في خدماتنا وشحصياتنا . .
حبينا نسلّط عليها بعض الضوء،
وفي نفس الوقت نبرز مواطن الإشراق فيها.

حبابك ألف.

عكــود

06-09-2007, 12:17 PM

الأحباب،

أستأذنكم في غياب بضعة أيّام . .
بسبب سفيرة صغيرونة.

أخدوا راحتكم . .
البيت بيتكم، ويا هلا بيكم.

الجيلى أحمد

09-09-2007, 05:07 PM

يالله عليك ياأبوذر

ياأخى دى متعة وتطريب فخيم

الخصل العربيده عدمتنا نفاخ النار:mad:

بوستك دا بقى لى قعادو صعب
وفراقو حار:D

إنشا الله جنابو يكون مبسوط:D:D

kbeida

10-09-2007, 08:51 PM

الحبيب عكود

هذه بعض صور الاجازة في أيطاليا

http://www.flickr.com/photos/9129294@N04/sets/72157601738283920
/

لكم الود

الجيلى أحمد

25-09-2007, 01:47 AM

ياعكود

غطست مشيت وين.?

منتظرنك تواصل,
البوست ده لسه راجيهو كتير..

الجيلى أحمد

28-09-2007, 06:07 AM

[QUOTE=عكــود;76858] http://scotland.indymedia.org/usermedia/image/12/gurair_102.jpg

كل حاجة فى الصورة دى مشحونة بالبهجة والضياء,

الوجوه والجلاليب والطواقى,
وحتى شاحن الموبايل من شدة مامبسوط (قامن ليهو سلوك زيادة):D
أول مرة أشوف شاحن طالعات منو 19 خط

بلغ عنا مجنون طابت المحبة
وشكوانا من ندرة أخباره

عكــود

04-10-2007, 06:25 AM

الجيلي . .
البوست ده حأعكلت فيهو عكليتة الحلفا الفي الجرف
وجاييك ليهو بمزااااج
وللحكي البيحبّو قلبك.

جنابو بلّغناهو الشكوى والمحبّة . .
وزدناها حبّة

عكــود

04-10-2007, 06:28 AM

حبيبنا كبيدة . .

كل سنة وأنت بألف خير.

تسلم ياخوي على المتابعة والمرور . .
بس صور إجازة إيطاليا أبت تفتح معاي ضُمّة.
كدي شوف لها حل.

kbeida

04-10-2007, 09:04 AM

الحبيب عكود
لم أود أن أفتح بوستا مماثلا ,اسميه حصاد الاجازة في أيطاليا ولكني وددت أن يشارك الجميع بصور الاجازة في هذا البوست حتي نتشارك جميعا تلك اللحظات الجميلة التي أنتقتها الكاميرا. لم أقصد المقارنة فعندي ميضنة جامع العكوداب بأيطاليا كلها فقوز قرافي هو الموطن الاصل قبل أم درمان.
وفي بوست مماثل سميته العيد في بلادهم وددت الجميع المشاركة فيه حتى نعيش العيد في كل أنحاء العالم.
واليك الوصلة من جديد و أظنني عرفت سبب الخطاء الفني ولك العتبى حتى ترضى
http://www.flickr.com/photos/9129294@N04/sets/72157601738283920/

لك الود
كبيده

عكــود

04-10-2007, 09:26 AM

تشكر عزيزنا كبيدة على نسمات مرورك . .
ويا ريت تفتح بوست "سياحة في إيطاليا" ومعانا شيخنا الجيلي ما حيقصّر في مشاركة إثرائه.
بوست العيد في بلادهم كنت قد قرأته وأعجبني.

أمّا ميضنة أهلك العكوداب . . فالحق لله، تعجب
وأفصح أكتر يا كبيدة.

على جنب: الوصلة ما فتحت معاي برضو :confused:

معتصم الطاهر

04-10-2007, 10:27 AM

ما زلت متوهطا حبي
و مكنكش فى عشقكم ..
وقاعد مستني

kbeida

04-10-2007, 03:05 PM

نعمل شنو بعد دا بس نرمي اللوم على التكنلوجيا المحرجة

كدى ادينا انت قصة الميضنة وشيخ محمد نور انا طولت من السودان.

عكــود

09-10-2007, 05:18 AM

ما زلت متوهطا حبي
و مكنكش فى عشقكم ..
وقاعد مستني
و أنت الأجمل . .
وستظل أحسن منّا . .
إلى حين إشعار آخر.

عكــود

09-10-2007, 05:37 AM

نعمل شنو بعد دا بس نرمي اللوم على التكنلوجيا المحرجة

كدى ادينا انت قصة الميضنة وشيخ محمد نور انا طولت من السودان. كبيدة يا قريب،
إستمتعت بصور إيطاليا الرائعة
ولو عندك صور لمدينة البندقية، تلك المدينة الساحرة،
أتحفنا بيها برضو.

بس كمان حيّرتني معاك:confused:
الميضنة تبرّع ببنائها درويش الله مجاور الرسول الكريم، عليه أفضل الصلاة وأتم التسليم،
الخال سيد أحمد الرفاعي. أوصى ببنائها على أن تكون أطول مئذنة في المنطقة، وقد كانت.
شيخ الصايم ديمة، نفعنا الله بأفضاله، لم يريد أن يفوته أو حيرانه الفضل
فتبرعوا بالمصنعية كلها
أتوا قوز قرافي وباشروا العمل يوم وصولهم
كانوا يعملون طوال اليوم وهم حفاة
يمدحون المصطفى ويذكرون الله
أتمّوا العمل في وقت قياسي
وعند سفرهم سالت مآقي رجال قوز قرافي لفراقهم
فقد دخلوا القلوب وبنوا مآذن من المحبة في قلوب الناس.

أمّا إن كنت تقصد شيخ محمد نور ود عاشة بت تور القوز
فقد كان، رحمه الله، رجلاً آتاه الله من البديهة الحاضرة
والذهن الوقّاد ما يندر وجوده
كان شيخاً ورعاً لطيفاً محبّاً محبوباً
شأنه شأن أهل الله الذين يأسرون العقول والقلوب معاً
كان يمتاز بالنكتة الحاضرة والإبتسامة الدائمة
ورث أبناؤه عنه الذكاء وسرعة البديهة.

وبرضك يا ريتك تفصح في البريد الداخلي.

تحياتي يا زول يا جميل.

عكــود

09-10-2007, 09:05 AM

محطة ثالثة – الطيب بشير:

أو جنابو كما يحلو لنا تسميته. إتصلت به و اتفقنا على اللقاء بعد نصف ساعة في الصحافة محطة 7، لسهولة الوصف قال حيجي راكب عربية حمراء، ما كان يحتاج والله لذلك، فالقلب عرفه قبل أن تتعرّف العين على العربية، بدا أليفاً كما عرفته، فما كان ينقصنا سوى القلدة والكَرفة.
تقالدنا وتكارفنا وتلابعنا وتريقنا على بعض، ولم نفترق حتى آخر يوم في الإجازة إلاّ للضرورة. فقد كان يسكن جبرة وكنت أسكن الصحافة ممّا سهّل التواصل.
الطيب لا تملك إلاّ أن تحبّه، من النوع "البشيل فوق الدبر ما بميل"، واضح ومباشر في رأيه، لمّاح . . لمّاح و غتيت.
بناء جسور الإلفة بينك والطيّب لا يحتاج كثيرعناء أو مقدّمات، فهو من النوع الذي لا تتردّد أبداً في تكليفه بأي مهمّة وأنت غير ماخد في خاطرك . . لأنه طيّب الخاطر.
استطعنا خلق مناسبات من الفرح والبهجة، لقاءات مع بعض الأحباب، دعوات غداء وعشاء وقندهار، جلسات في الأوزون وقهوة أو قراصة أو شاي عند أحدنا. في كل ذلك كان حادينا اللطف، الأدب، الشعر، الصوفيّة وروح سمحة تفرضها الحضرة.
طبعاً ده ما معناه إنّو الطيّب هو ذلك الملاك البرئ (لا والله، حاشاهو البراءة). . فبه من الغتاتة و الخُبث ما يفيض ويتدفّق عند أوّل سانحة، والأمثلة الصادفتها كتيرة، لا يُندب إيراد أغلبها هنا :rolleyes:.
جنابو زول دوغري وحبّوب، جمع صرامة العسكر (وليس إنضباطهم في المواعيد)، دبلوماسية الإعلامي، شفافية الشاعر وفن رواية القاص، فلا غرابة أن تكون إجازة 2007 من أجمل الإجازات التي قضيتها في السودان.

شكراً جنابو على الرفقة الحسنة وليك وحشة هنا.

نسايم

09-10-2007, 12:19 PM

الشايقي الحنييييييييين
في محطة المطار معاااك حق بقيت كل ما اسافر براي اتوكل انو لازم تحصل لي مشكلة مع ياناس الجوازات يا ناس الالزامية يامع العفش
بس جملت المحطة الاولي بي مشاهد من الشمال الحبيييب
عارف انا ماشفت الشمالية مع انى منها وطول عمرنا عايشيين في شندي بس عايشيين شوايقة
ودا البعجبنى في الشايقية لابنسو اصلهم ولابخلو الناس تنساهو

عبد الله علي الحاج بابكر

09-10-2007, 12:23 PM

عكود
رمضان كريم لا احسن عيد مبارك
شنو حكايتك مع العساكر ضابط جوازات طيب خاطرك وده اسع احال اجازتك لمتعه ...
بعدين شنو ياخي بركلنا معاك شن لومو .. أعدل مره مره ادينا طله.
تحياتي

عكــود

10-10-2007, 05:06 AM

مرحب بيك يااااا نسايم،
وقد أعجبني نشاطك الملحوظ في المواضيع والمشاركات الراقية في مختلف البوستات . .
أنتِ مكسب لسودانيات.
وتااااني أهلاً وسهلاً.
في محطة المطار معاااك حق بقيت كل ما اسافر براي اتوكل انو لازم تحصل لي مشكلة مع ياناس الجوازات يا ناس الالزامية يامع العفش
سألوا رحّالة جاب معظم دول العالم: من هُم أكثر الناس جموداً ويصعب التعامل معهم؟
قال: هم موظفي الجوازات والجمارك.
يبدو إنّو الحكاية عامّة بس جماعتنا، عفارم عليهم، يتخطّون المعدّل العالمي في هذا المجال.
عارف انا ماشفت الشمالية مع انى منها وطول عمرنا عايشيين في شندي بس عايشيين شوايقة
ودا البعجبنى في الشايقية لابنسو اصلهم ولابخلو الناس تنساهو ود اليمني عندو أغنية بتقول:
فسراع يا نسايم أشواقي . . وديلي السلام مطبوق
لي اهلنا وجميع حبّانّا . . للحِلّي التحت والفوق

أشواقك ستصل صحبة نسايمك.
بس جملت المحطة الاولي بي مشاهد من الشمال الحبيييب

وعشان خاطرك يا بت اخوي، نهديك شدرة المنقة دي:
http://www.3aza.com/upload/user_uploads/azrkamil83bb/Sudan-149.jpg

تسلمي على مرورك الهمبريب.

عكــود

10-10-2007, 05:13 AM

عكود
رمضان كريم لا احسن عيد مبارك
شنو حكايتك مع العساكر ضابط جوازات طيب خاطرك وده اسع احال اجازتك لمتعه ...
بعدين شنو ياخي بركلنا معاك شن لومو .. أعدل مره مره ادينا طله.
تحياتي

عبد الله الحبيب،
ينعاد عليك بألف صحة وسلامة ورضى نفس . .
أنت والأسرة الكريمة.

تقول شنو يا عبد الله، البواليص ديل الناس ظالمنهم في كتير من الأحيان وما شاهدته منهم في الإجازة دي يصب في مصلحة سمعتهم ومهنيتهم تماماً.
أتمنى أن تسود تلك الصفات كل القِطاع.

بركلنا حاشاهو اللوم .
اللوم من تالاي أنا ده،
وسآتي إليه تائباً طالباً السماح.

عكــود

10-10-2007, 08:14 AM

ســــندة (2) - مهداة لنسايم وعبد الله علي الحاج -:

http://www.3aza.com/upload/user_uploads/azrkamil83bb/Gurair-082.jpg
http://www.3aza.com/upload/user_uploads/azrkamil83bb/Nasri-Hamam.wma
للحفظ أضغط هنا (http://www.3aza.com/upload/user_uploads/azrkamil83bb/Nasri-Hamam.wma)

فقارا ولكن غنايا . . غنايا بهذا الغمام
بهذا النيل كم تغايا . . تراباً نرميهو قام

بلد صمِّي وشعب واحد . . عصيّة علي الإنقسام
أبيّــة وبُكـراها واعد . . صبيّة ومشهادا تــام

عبد الله علي الحاج بابكر

10-10-2007, 12:10 PM

عكود
ياخي حرام عليك دي لوحه ما يقهمها الا من شب وترعرع هناك مع اهلي الطيبين والسمحين حمالين الشيل وعدالين الميل.. يا سلام ياخي نقلتني نقله سريعه لعالم برئ طاهر نقي صافي ورائع روعة اهلي ديل .. فرسان والله صقور جو انظر كم تجدهم متاهبين لكل شئ كان درت الحاره تلقاهم وكان درت المساعدة والكرم هم اهلها.. انظر لتوحدهم في الزي العراقي والطاقيي والباض بياض السريره والنيه.. يا خي ديل والله ناس غير وشيتو كتر ديل ناس بركه..
صورة والله رائعه وهدية قيمه .. المتني يا عكود يا خي ما عارفني تربال ولد تربال احب الارض والزراعه وانداح واغوص بل اتلاشي في طبيعة اهلي واخلاق اهلي وحب اهلي.. ياخي كم تقت لى فك الملويي وشيل الطوريي..
ياخي عبق اهلي وريحة اهلي زيها مافي .. طعم الحياة هناك يا عكود طعم العبلوج تعرف العبلوج يا عكود!! ان عرفت العبلوج تكون اصيل جد.. اوعك تستعين بصديق.

عكــود

14-10-2007, 06:25 PM

كل سنة وأنت بخير يا عبد الله . .

ياخي حرام عليك دي لوحه ما يقهمها الا من شب وترعرع هناك مع اهلي الطيبين والسمحين حمالين الشيل وعدالين الميل.. يا سلام ياخي نقلتني نقله سريعه لعالم برئ طاهر نقي صافي ورائع روعة اهلي ديل .. فرسان والله صقور جو انظر كم تجدهم متاهبين لكل شئ كان درت الحاره تلقاهم وكان درت المساعدة والكرم هم اهلها.. انظر لتوحدهم في الزي العراقي والطاقيي والباض بياض السريره والنيه.. يا خي ديل والله ناس غير وشيتو كتر ديل ناس بركه.. عشان جِنس وصفك السمح ليهم ده . .
أحرص على زيارتهم سنويّاً.
وليتك يا عبد الله أخدت لك عشرة ونسة معاهم في ضل العصر ده . .
ياخي ديل ناس إبداع عديييييل،
ترجع البيت وقد غسلت كل همومك،
ومصارينك موجعاتنّك بالضحك المن القلب.

نسايم

14-10-2007, 07:09 PM

مرحب بيك يااااا نسايم،
وقد أعجبني نشاطك الملحوظ في المواضيع والمشاركات الراقية في مختلف البوستات . .
أنتِ مكسب لسودانيات.
وتااااني أهلاً وسهلاً.

سألوا رحّالة جاب معظم دول العالم: من هُم أكثر الناس جموداً ويصعب التعامل معهم؟
قال: هم موظفي الجوازات والجمارك.
يبدو إنّو الحكاية عامّة بس جماعتنا، عفارم عليهم، يتخطّون المعدّل العالمي في هذا المجال.
ود اليمني عندو أغنية بتقول:
فسراع يا نسايم أشواقي . . وديلي السلام مطبوق
لي اهلنا وجميع حبّانّا . . للحِلّي التحت والفوق

أشواقك ستصل صحبة نسايمك.

وعشان خاطرك يا بت اخوي، نهديك شدرة المنقة دي:
http://www.3aza.com/upload/user_uploads/azrkamil83bb/Sudan-149.jpg

تسلمي على مرورك الهمبريب.

عاااارف ....
بيقولو لي اهل امى مابتشبهينا (قصدهم الجعلييين) ورثتى من الشوايقة محنتهم الفي دموعهم
لكن والله ما لقيت احن من اهلي الشوايقة ببكو في اللقا وبدمى قلوبهم الفراق
وانا زيهم ....
عشان كدا البعرفهم والبحبهم مابقدر يفارقهم لانهم بهدو ليك قلبهم
والزول البهدي لي قلب بشوفو اهدي لي العالم لانو العالم حب

كنت ولا زلت بفضل اقضي اجازتى بين ناس بسيطييين وببعد من المدينة وبعتبر
انو الايام البقضيها في وسط اهلي هي اصدق واحلي ايام خصوصا
انو بتوافق طلوع التمر وتساب البحر
كفاية بتلقي مية حبوبة تقول ليك تعال النشمك ومليون جد يعطرك بي دعاه وبركاااته
ناااس مابرجوك لما تصلهم يسابقو الزمن ويلاقوك في خشم الباب سلام احضان لو غبت ثانية
وحبهم سباااق
لما يعرفوك بي روحهم الكبير بيقول جدك والسغير عمك والنديييدك اخوووك
والشاااي وضل الضحي وونسة حاجة فاطمة والتمر وقدر ما تاكل
يقولو ليك اتيمنت بت..... ما اكلت
لما اصل هناك بحس بي روحي سكنت ولما اصل الحواشااات بلقي الضيعتو الغربة مغرووس
مع الزرع الاخدر وقدر ما المو يتبعتر تانى ويرجع للارض لانو مابنتمى لي غربة
وللاسف احنا ناس غربة
شرف لي انو تقرا لي

نسايم

15-10-2007, 07:48 AM

ســــندة (2) - مهداة لنسايم وعبد الله علي الحاج -:

فقارا ولكن غنايا . . غنايا بهذا الغمام
بهذا النيل كم تغايا . . تراباً نرميهو قام

بلد صمِّي وشعب واحد . . عصيّة علي الإنقسام
أبيّــة وبُكـراها واعد . . صبيّة ومشهادا تــام

هدية احلي من نسااايم الصباح ..
تسلم .... ويسلم القرير

عكــود

15-10-2007, 08:32 AM

صبّحك الله بالخير يا نسايم . .
تشكري على الإضافة المستحَقّة في حق أهلنا هناك.

أمّا كلامك هنا:لما اصل هناك بحس بي روحي سكنت ولما اصل الحواشااات بلقي الضيعتو الغربة مغرووس مع الزرع الاخدر وقدر ما المو يتبعتر تانى ويرجع للارض لانو مابنتمى لي غربة فيه وصف بليغ لحالنا . .
وحال أرواحنا المغروسة في الحواشات هناك.
وقدر ما المو يتبعتر تانى ويرجع للارض لانو مابنتمى لي غربة

وقدر ما المو يتبعتر تانى ويرجع للارض لانو مابنتمى لي غربة

سعيد بقبولك الهدية.

على جنب:
لو تسمحي، أمسحي الأغنية من إقتباسك عشان ما تشتغل من جدولين :D.

نسايم

15-10-2007, 08:42 AM

صبّحك الله بالخير يا نسايم . .
تشكري على الإضافة المستحَقّة في حق أهلنا هناك.

أمّا كلامك هنا: فيه وصف بليغ لحالنا . .
وحال أرواحنا المغروسة في الحواشات هناك.

سعيد بقبولك الهدية.

على جنب:
لو تسمحي، أمسحي الأغنية من إقتباسك عشان ما تشتغل من جدولين :D.
رجعت تاانى ... ممكن
انا عمري ماقلت ولا اضفت حاجة ماحسيت بيها
وما حبيتها لاوبوستك حنييين
زي اليد البتتمد وتنفض تراب الغربة عن القلب
فاسمح لي بالعودة كلما حن للقلب للشمال الحنيييين

عكــود

15-10-2007, 08:50 AM

رجعت تاانى ... ممكن
انا عمري ماقلت ولا اضفت حاجة ماحسيت بيها
وما حبيتها لاوبوستك حنييين
زي اليد البتتمد وتنفض تراب الغربة عن القلب

وأنا سعيد بزياراتك . .
ألف مرحب بيك فالدار دارِك يا نسايم.

فاسمح لي بالعودة كلما حن للقلب للشمال الحنيييين ستعودين، إذن، مرّات ومرّات . .
فلا يتوقّف القلب عن الحنين . .
ولا الشمال عن الجمال والإدهاش.

خلّيك متابعة،
فما زالت هناك محطّات، غنوات و . .
صُوَر،
تحتاج مداخلاتك.

نسايم

15-10-2007, 09:08 AM

وأنا سعيد بزياراتك . .
ألف مرحب بيك فالدار دارِك يا نسايم.

ستعودين، إذن، مرّات ومرّات . .
فلا يتوقّف القلب عن الحنين . .
ولا الشمال عن الجمال والإدهاش.

خلّيك متابعة،
فما زالت هناك محطّات، غنوات و . .
صُوَر،
تحتاج مداخلاتك.
عاااارف ....
الشوايقة ديل مابتنفع معاهم الغربة
المفروووض يختو حارس في باب المطار يسالك انت شايقي
لو شايقي يقول ليك ممنوع من السفر
لانو الغربة بتخش جوووووووووة جواهم
وتكسر وتهدم وتدك كل حصون الالفة
وتخليك لا جماااد زي غيرك السائريين في الارض
ولا انسان كما هؤلاء الذين يجلسوون فوق العنقرببي المقطع
اصحاب الايدي الخشنة والكسرة الحنييينة والقلب الاحن
صورك شتول منقة وبرتقال وهين تمر
وترابلة سمر ووجوه حناااان يراها القلب فيبتسم
خت الصور خلينا نعيشها

عكــود

15-10-2007, 10:36 AM

محطة رابعة – السفر للبلد :

و كعادتي، عند كل إجازة، بعد أن أقوم بواجب الزيارات، صلة الرحم وتقديم التعازي فيمن توفّاه الله من الأهل والأصدقاء في الخرطوم، أيمّم وجهي شطر مراتع الصِبا متحرّراً من كل البروتوكولات التي تفرضها المدينة.
كان صباحاً جميلاً، تظلّل الغيوم سماء الخرطوم وهناك بعض رذاذ منعش، توجّهت صوب السوق الشعبي – أم درمان - لركوب البص من هناك. هنا تُنْدب المقارنة بين هذه السفرة وسفرتي في العام الماضي حيث السفر بحافلات الهايس (14 راكب) وطريق شريان الشمال و قد فعلت فيه آليات خزّان الحماداب الثقيلة ما فعلت، كان لا يخلو كيلومتر واحد من حفرة أو دقداق، مما يجعل السائقين يفضّلون الطريق الرملي حفاظاً على حافلاتهم وأرواح المسافرين.
هذه السنة، كان الوضع مختلف، فقد استبدلت الحافلات بالبصّات السياحية الكبيرة المكيّفة المريحة، ذات الـ (دي في بلير) واسطوانات ندى القلعة ونجوم الغد. حقيقة كانت سفرة مريحة استغرقت 4 ساعات فقط وكنت جوار السبيل القدّام حوشنا. في أم درمان أراد سليمان حسّون (الكموسنجي) أن يتخيّر أفضل الكراسي لقريبه (اللي هو أنا)، وقد فعل. إلاّ أنّه دقس في بيع تذكرة الكرسي المجاور لشخص آخر يفوقني حجماً و وزناً، وأنا ما مقصّر في الناحية دي برضو. حقيقة كان في ضيق شوية ولا أعيب الكراسي، بس الراجل كان غاية في اللطف وخفّة الدم ما جعلني لا أحس بطول الـ 370 كلم التي قطعناها.
خلال الرحلة يقدّم لك مضيف البص الحلاوة في بداية الرحلة، ثمّ وجبة خفيفة والعصير البارد مع أجمل إبتسامة وملاطفة. أتمنى أن يدوم الحال كذلك وإدراك أهميّة فن تقديم الخدمة والإبتسامة. كما ليتهم يراعون أهميّة الإنضباط في المواعيد وعدم (رَجَـــيان) المتأخّرين على حساب الملتزمين بمواعيدهم، وأخذ الأمر بمهنيّة أكثر.
في بداية الطريق وقبل الخروج من حدود أم درمان، توجد نقاط جبايات عدّة، توقّف البص 3 مرّات لدفع مبالغ وأخذ إيصال قبل أن يتوقّف للمرّة الرابعة لدفع ضريبة إستخدام الطريق.
مافي طريقة يجمعوا كل هذه الضرائب لتدفع مرّة واحدة في مكان واحد، وبعد داك يتقسّموها بطريقتهم، بدل ما يأخّروا خلق الله ويرفعوا العصبي لسائق البص 4 مرّات؟

الطريق قد تمّت صيانته من أفضل ما يكون، لا دقداق، لا حُفر لا مطبّات وعند وصوله منحنى النيل توجد لافتات توضّح إسم كل قرية ومحليّة يمر بها الطريق.
قضيت أسبوعين في البلد، رجعت بعدها الخرطوم لبعض المشاغل وعدت مرّة ثانية للبلد و قضيت باقي إجازتي إلاّ أسبوعاً إدّخرته لأقضيه بين الأهل والأصحاب في الخرطوم.

http://www.3aza.com/upload/user_uploads/azrkamil83bb/Sudan-136.jpg هناك كان هؤلاء ملء القلب والخاطر

عكــود

15-10-2007, 10:39 AM

اصحاب الايدي الخشنة والكسرة الحنييينة والقلب الاحن
صورك شتول منقة وبرتقال وهين تمر
وترابلة سمر ووجوه حناااان يراها القلب فيبتسم
خت الصور خلينا نعيشها نسايم،

أتمنى أن تكون قد أروت الصورة عاليه . .
بعض غليلك.

كل التقدير.

نسايم

15-10-2007, 11:01 AM

نسايم،

أتمنى أن تكون قد أروت الصورة عاليه . .
بعض غليلك.

كل التقدير.

الغليل مابتروي الا اكون جنب النخلة دي وهيني ملااااان تمر
بس الصورة زي ماقلت ليك حركت الفؤاد ونفضت التراب
تسلم

عكــود

15-10-2007, 06:06 PM

إلى أن تبتلْ عروق الشوق . .
نعيش مع هذا الصبي فرحته الغامرة:http://www.3aza.com/upload/user_uploads/azrkamil83bb/Sudan-214.jpg

عكــود

16-10-2007, 05:13 AM

ســـــــندة (3):
رمال حلّتنا - لكل الأحباب الغائبين

http://www.albrkal.com/agani/remaal_heltna.mp3

للحفظ اضغط هنا (http://www.albrkal.com/agani/remaal_heltna.mp3)

عكــود

16-10-2007, 07:20 PM

إرادة القمْرَه البتقـــدر . . . براها تضوّي الظلام
شعاع شمساً ياما خدّر . . . إذا يَبّس لا يُـلام

يابا خرابه الحرابه . . . خرابة فكِر سوسي سام
خرابه الكل نفس تابا . . . عقـــابا تلِمْ عم سـام

وِليد مخلوق للقرايي . . . خزين مدخور للجِسام
تتمّر نيتــــو التخايي . . . إلامَ مــذهللْ إلام؟

و

سوقني معاك يا حمــام

عمر مجذوب خطيب

17-10-2007, 01:10 PM

جلال محمد جلال

11-12-2007, 07:57 AM

العزيز عكود ...
سلامات ...
عندما وطئت قدماي أرض مطار الخرطوم(قبل شهرين تقريباً) قفزت إلى رأسي عمامتك الناصعة على الفور ..
بعدها دخلنا لصالة العفش الفسيحة ذات العربانات الكافية لحمل الشنط التي تنوء بحملها من ملايات وستاير وعدّة وما خفي أعظم . .
و الحق يقال، ما زالت الصالة تحافظ علي بعض من شبابها، لولا سوء الإضاءة والتكييف.
فيها إيه لو بدّلوا اللمبات المحروقة وعملوا صيانة للمكيّفات؟

هل تصدق أنني ووجدتها على نفس الحال ؟؟
أما العفش .. تقالعوا بقدرة قادر ...
بعدين في حاجة إسمها إستمارة قدوم مواطن .. تلاقيها مجدعة في الصالة قبل ما تعمل أي إجراء لازم تملاها .. بصراحة لم أفهم معناها .. لم يستعملون الكومبيوترات إذن؟؟

من الإيجابيّات، إتباع نظام الإسكاننق للعفش بدل التفتيش اليدوي، لكن لو الله غضبان على واحدة من الشِنط واعتقد موظّف الجمارك أن بها ما يستوجب التفتيش اليدوي، فإنها ستتعرّض لوابل من الشخبطة بالطباشير ذو اللون الأخضر (الذي يصعب إزالته مهما اجتهدت بعدها) على جنباتها الأربعة.
حدث هذا معي أيضاً .. وأسوأ ما في الأمر أنه حدث لأكبر الحقائب وزناً معنا .. حقيبة زوجتي وإبنتي معاً ..ولك أن تتخيل حجمها .. بسبب هذه الحقيبة الكونتينر تأخرنا ساعة كاملة .. ليتضح بعد التفيتش اليدوي أن الذي إستدعى تفتيشها لا شئ !! هكذا ببساطة .. !!

المهم، لا أطيل عليكم، إستلمت الجواز والتأشيرة بعد أن قام بنفسه وتابع الإجراء من موظّف لآخر حتى أتي به بين يديه. صاح الإجراء أخد يمكن ساعة أو أكثر، وليس كما وعد، لكنّه كان مدركاً تماماً لدوره الخَدَمي و مطبّقاً بكل كفاءة واقتدار شعار "الشرطة في خدمة الشعب".
هذه الصورة الناصعة -والشهادة لله- قابلتني أكثر من مرة ..
في المغتربين ، قدرت الموظف المبلغ المستحق كزكاة علي برقم فلكي ( لمان ركبي سابت)، وقبل أن أنفجر صارخاً ، قالت لي الموظفة بهدوء :
- تقدر تقابل مسؤلة الزكاة لمناقشتها في المبلغ .
وصحت : أين هي ؟
فوصفت لي الموظفة مكتبها :
-أطلع من الباب دا وعلى يدك اليمين تلقى مدخل ، يمينك وإنت داخل في سلم أطلع فوق بتلقا مكتبها .
خرجت وفي رأسي ألف سؤال .. وحسب الوصف ذهبت ولم أجد السلم .. ياجماعة الخير وين السلم بتاع سلمى .. ؟؟ كل سؤال له إجابة .. ولا واحدة وصلتني ..
المهم بعد نص ساعة تفتيش قابلت رجلان وإمراتان يتحدثون قرب المدخل .. فسلمت ، وبغيظ سألتهم : بالله ياجماعة وين سلمى بتاعة الزكاة دي ؟؟
ردت إحدي السيدتين بضحكة جميلة : أنا سلمي بتاعة الزكاة دي ..
- إنتي ؟؟ قلتها وقد أخجلتني الإبتسامة المشرقة ، أنا لي ساعة بدور على مكتبك ..
وأخذتني لمكتبها ، والسلم إبن الكلب مختفي خلف حائط يجعل رؤيته مستحيلة للداخل .
المهم في الموضوع الأستاذة سلمي مشكورة .. تفضلت بمراجعة كل شيء من جديدة بكل ذوق .. والنتيجة إنو الموضوع تمخض عن تقليل المبلغ بدرجة طيبة ومرضية . فخرجت من عندها شاكراً ليس للتخفيض ولكن للذوق وحسن المعاملة ..
التحية للأستاذة سلمي .. وليت كل الموظفين والمسؤلين علي تلك الشاكلة من الدماثة .
شيء آخر لفت نظري ..
بعد غياب عدة أعوام عن السودان .. إكتشفت أن كثير من المؤسسات الخدمية أصبح المسؤولون فيها على درجة جيدة من الوعي وإدارك حجم المسؤلية .. والسعي الجاد لخدمة المواطن ..
لاحظت أيضاً وللاسف الكثير من الظواهر السالبة والمحزنة .. التي لا يتسع لذكرها المجال ..

عكــود

11-12-2007, 08:17 AM

عكود - مية مية - عجبتني الصور - الخضرة والبشر والطريق والدواب - والايام التي كانت - قبل 20 سنة كنت جزءا من هذه المشاهد من مغاربها وصباحاتها وعصرها المخصص لحش القش واطعام البهايم ومرة مرة تمرين الكورة
مودتي

سلاااام يا عمر،
أعذرني على التأخير في الرد على مداخلتك البتتوّر النوستالجيا.
بس إنت ذاتك وين الأيّام دي؟

بكل أسف أغلب الصور إتمسحت من البوست . .
وده بسبب "خروقيّي" منّي
وما حأقول طبّظت شنو،
بس قول يا معين!

ليك وحشة.

عكــود

11-12-2007, 10:47 AM

عزيزنا جلال،

ياخوي ألف حمد الله على السلامة وإن شاء الله تكون لقيت الأهل بخير وتزوّدت ما يكفيك من حنانهم.
وتسلم على تذكّرك للعمة البيضاء وصاحبها.

بعدين في حاجة إسمها إستمارة قدوم مواطن .. تلاقيها مجدعة في الصالة قبل ما تعمل أي إجراء لازم تملاها .. بصراحة لم أفهم معناها .. لم يستعملون الكومبيوترات إذن؟؟يبدو إنّهم لا يتعاطون التكنولوجيا وفوائدها. ونفس الشي عند المغادرة، هناك أيضاً إستمارة يجب أن تملاها، يا سيدي، بالصفحتين!
ده كلّو كوم وتأشيرة الخروج كوم تاني، ما أعتقد في دولة في الدنيا الوسيعة دي، بتشترط على مواطنيها أو المقيمين بها الحصول على تأشيرة خروج، غيرنا. يكفي أن يسجّل ذلك في جوازات المطار. نحن هنا مقيمين في دولة الإمارات، عند نيّة السفر، ما عليك إلاّ تاخد جوازك والمطار عِدِل، بينما تطالبنا دولتنا الحصول على التأشيرة وما يتبعها.
حدث هذا معي أيضاً .. وأسوأ ما في الأمر أنه حدث لأكبر الحقائب وزناً معنا .. حقيبة زوجتي وإبنتي معاً ..ولك أن تتخيل حجمها .. بسبب هذه الحقيبة الكونتينر تأخرنا ساعة كاملة .. ليتضح بعد التفيتش اليدوي أن الذي إستدعى تفتيشها لا شئ !! هكذا ببساطة .. !! ياخوي أنصحك أن تتفادى الشِنط الكبيرة، الحجم المتوسّط أفضل، حتى ولو زاد عدد القطع المحمولة. أمّا الملايات والستاير والترامس وما شابهها، فعليك بالكراتين، على الأقل لو شخبطوها مافي ندامة.:D

المهم في الموضوع الأستاذة سلمي مشكورة .. تفضلت بمراجعة كل شيء من جديدة بكل ذوق .. والنتيجة إنو الموضوع تمخض عن تقليل المبلغ بدرجة طيبة ومرضية . فخرجت من عندها شاكراً ليس للتخفيض ولكن للذوق وحسن المعاملة .. ألف تحية وتقدير للأستاذة سلمى وكل من يحذو حذوها، وإن كان هم قلّة.
في زيارة للسودان سريعة قبل شهر تقريباً، مشيت لعمل تأشيرة الخروج من جهاز المغتربين. والله عذّبوني عذاب الهدهد، وسأرجع لحكاية التفاصيل. إنتو يا خوانا حكاية نقيبات الشرطة ديل مع المحركة وتعطيل خلق الله و التكشيرة في وجه خلق الله شني؟ مع العلم هِن آآآآآآآخر حنّة منقوشة وقرقرة بالموبايل وعلبة ميرندا ورا علبة بيبسي والخلوق مندفسة في الصفوف قدّام الشبّاك :mad:

تشكر جلال على المداخلة الشحمانة.