رب أخ (شيوعي) لم تلده أمك

[بابكر مخير]

قدر ما إتنقلت ولفيت، دورتا وحمتا في بلاد الله!! ذي السودان ما شفتا
ما بس السودان براهو؟ لكن السودانيين
مشيت السودان إجازة من إجازة مقضيها في الإمارات، ممني نفسي بي كم يوم، يعني أربعة وقول بالكتير خمسة ستة، أزور فيها الأهل وأشوف فيها حبان بلاقيهم كل ما أمشي السودان.
المرة دي كانت في مفاجاءة في إنتظاري؟ لو قلت سعيدة لنفسي بكون شوية كدا قصرت في تقديرها ولو قلت دخلت الفرحة في قلبي بكون كمان ما أديتها قدرها.
لاقيت المرة دي خلاف الحبان المعتاد لقائهم؟ أحباء هم جزء غير مقتطع من ذاتي، من حياتي، من ذاكرتي، من تأريخي.
أشقاء، إخوة، زملاء، نفسي الطالع ونازل، روحي العايش بيها وليها.
علي، عبد الباسط، عوض، موحمد علي، خالد وعمر.
للإيضاح!!!! التلاتة الاوائل وبالترتيب الغير مقصود أو منظم فكل واحد منهم هو أنا وماممكن زول يقدم نفسو على نفسو وهم أنا، نفسي وروحي؛ التلاتة هم: علي بابكر الكنين وعبد الباسط فضل السيد وعوض محجوب.
كانو التلاتة؟ حمر، حمرة عين، وحمرة قلب.
عشت معهم أيام دراستي في براتسلافا. ولما كانو أكبر مني سنا، كانو بيعاملوني ما بس كأخوهم الصغير لكن كالإبن اليافع المدلل، يلاطفوني في أوكات زنقة القراية الحارة ويساعدوني أوكات العيشة الصعبة في الغربة الجديدة ويناصحوني في اموري الشخصية وذي ما بيقولو كانو ليا هم السند والعضدد.
قلت كانو التلاتة؟ حمر؟؟؟ يعني يساريين، شيوعيين، إشتراكيين وأنا متأكد أنهم لازالو كذلك (الرجال لاتغير من لونها وهم رجال والرجالة ذاتها وكلها) وأنا كنت وما زلت حزب أمة. لكن كانو ومازالو ليا أخوة ولرب أخ لم تلده أمك.
غيرهم التقيت محمد علي الجعلي (موحمد) قربي وصديقي وأخي وهو أقرب لي مجموعة فرسان اليسار (الفرسان التلاتا؛ ع x 3)، وكذلك بقريبي وحبيبي عمر عبد المجيد ولتكتمل الفرحة التقيت خالد هاشم وهو الروح التي كانت تملا أجواء خلافتنا الحزبية تسامحا ومحبة. كان هو مع أخريين مثل عبد المنعم سعدالدين وسيف الدين أبوقصيصة يمثلون كتلة غير منظمة لكنها كانت تشع إستقلالية.

التقيت بكوكبة النجوم الستة مرتين.
الأولي في إفطار صباح جمعة في دار علي لتكون جمعة يتيمة قبل حلول شهر البركة (رمضان) والتانية كانت يوم الخميس في إفطار رمضان في غرة أيامه عند موحمد علي (ماهو الروباطاب بينطقوها كدا) وكأن البركة لم ترد أن تضيع فرصة لقاءتنا هذه دون أن تضع بصمتها عليها.

بذكر أني قلت لشقيقي موحمد:
زاد الحبان دايما ليهو مكان
وخصوص إن كان من الخلان الهما أمان وإطمئنان وبيهم عزة بلدي السودان
وكان رد موحمد (الرباطابي القح) دا عشان فطرتيين.

[bayan]

ربنا يدوم المحبة والحن

تعرف اجمل ناس بتكون لاقيتهم هم ناس الدراسة لانها علاقات صافية
لا تعكرها سياسية ولا كورة

من الاشياء التي اتفعلها دائما عند ذهابي الى الخرطوم
زيارة الحيشان الثلاثة(الاذاعة والتلفزوين والمسرح)
ويتنادى الزملاء والزميلات القدام من كل فج
والضحك من الاعماق والريدة في العيون
والشيب يكلل الهامات...
ولكن ترجع القلوب شابة ونضرة
ثروتنا الحقيقة هم اصدقائنا.. مافي ثروة غيرها...
عشان كدا لازم نسورهم ونحصنهم بالمحبة والتواصل

التحية لشلتلك وموحمد وربنا يجمعكم في ساعات الخير

وليك يا مخير كل المودة ورمضان كريم..

[بابكر مخير]

العزيزة الدكتورة
كتر خيرك شاركتني البوست ومن قبلو شاركتني فكرة حلاوة الذكريات.
أيام الدراسة بفتكر أنها إمتداد لأيام الطفولة والذكريات الحلوة الجميلة وعلى قولك البريئة.
يديم ليك الصحة والعافية وبالله كل ما تمشي التلفزيون والإذاعة والمسرح، خريمي علي ناس (حسن) الراجل العظيم المتطور، قصدي ناس تلفزيون النيل الأزرق كلهم ممثلين في ربان سفينتهم الأستاذ حسن وبرضو طلي ناس أف أم 100 الحلويين.
من المودة أطنان والإحترام يملا المكان

[Hassan Farah]

بابكر مخير كيف حالك يا خوى اصحابك ديل فيهم اتنين اهلا لى--- عبد الباسط فضل السيد ود اعمى لزم ومحمد على الجعلى شقيق الهادى وعبدالرحمن من الاهل كذلك-- اخر شوفة فى براتسلافا قبل 35 عاما بالتمام والكمال عنوان عبدالباسط مقروض فيه جدا لو كان بطرفك ارجوك ان تمده لاخيك-----

[بابكر مخير]

بابكر مخير كيف حالك يا خوى اصحابك ديل فيهم اتنين اهلا لى--- عبد الباسط فضل السيد ود اعمى لزم ومحمد على الجعلى شقيق الهادى وعبدالرحمن من الاهل كذلك-- اخر شوفة فى براتسلافا قبل 35 عاما بالتمام والكمال عنوان عبدالباسط مقروض فيه جدا لو كان بطرفك ارجوك ان تمده لاخيك-----

أبو علي
سلام وتحايا، أكان ديل أهلك مياني قريبن ليك ولا شني.
نقلا أهدي ليك حكاية الرباطابيات الكانن معزومات عند الشايقية
(شايقيي من باب التغيير، ممكن تكون برضو رباطابية. ما والله بقونا كل كلمة نقولها نخاف يحسبوها مطاعنة ولا قصد كدا ولا كدا؟؟؟) كانن قريباتنا معزومات غدا عندها وبعدها شربن شربوتن فاخر، المهم الشربوت لعب بالرأس وعند المغيب، قررن قريباتنا الرباطابيات العودة لمنزالهن، آههههههههههههها لمن مرقن، راح ليهن الدرب. قامت وحدا سألت التانية: يا فلاني، دحن إحنا وينن. ردت التانية وقالت ليها: إتي في إحني وينن ولا إحني منن. (هذه حكاها ليا موحمد علي الجعلي. وطبعا غير أنو رباطابي سريع البديهة، صاحب طرفة ونكتة وكان التنافس بينو وعبد الباسط، بنستمتع بيهو إحنا، ما دم الغرب بقانا ذي دم الخواجات).
أخونا عبد الباسط التلفونو في السودان نمرتو 00249918090813 يعني هو عوض محجوب ما بتذكر فترة تواجدنا معا في براتسلافا نادوني بي إسمي، الإسم المفضل عندهم الكان بينادوني بيهو "تورشين" بالمناسبة دي تصب في أن سيدي خليفة المهدي كان قيافة لأني كنت أقيف منهم الإتنين (ياريت تلاقي عبد الباسط حسي. زمان براك بتعرفو وكلامي دا بتأكد ليك).
مكرر ليك الحبيب تلفون عبد الباسط في السودان 00249918090813 ودي بفتكر أسرع طريقة إتصال، بالله بلغو تحايايا ومحبتي.

[Osman Hamad]

ألاخ والعم مخير

الصداقة والخوة لوحدها دِين، ولو تعلمون إنه لعظيم.
لكم الود ومتعكم الله ببعضكم البعض.

[بابكر مخير]

ألاخ والعم مخير

الصداقة والخوة لوحدها دِين، ولو تعلمون إنه لعظيم.
لكم الود ومتعكم الله ببعضكم البعض.

الإبن عثمان.،
الصداقة دِين ودين، دِين يعتنقها المخلصون، حفظة المودة والمحبة والأخاء والصداقة دين في ذمة الحافظين على سنن الحياة الصادقة، سدادها مضمون عندهم.
الصداقة، حصة من روح الإنسان وجسده، لا تحصا ولا تحسب ولا تعد، يعطيها الإنسان لإخية الإنسان دون أن يحصي عائدها وأنتم يا أهل الحصاحيصا، هاكذا،،، زميلي في مراحل الدراسة الأولي وصديقي الذي أعطاني أكثر مما أخذ مني، أعطى ولم يحصي لأنهو حيصيصاوي الأستاذ أبوبكر وزيري له المحبة والصداقة.
تعرف يا سيدي ،صداقة الدِين بتنفع قدام وصداقة الدين بتنفع حسي،،، يعني الصداقتين مخارجة، حسي وبعدين ناسي ديل ربنا يغني الجميع ناس صداقة دِين، ما حالنا وحالهم من بعضو.
لك الشكر على المداخلة.
ولك شكري على حدبك وغيرتك على سودانياتك وإستلمت رسالتك وعملت بيها، حفاظا على الصداقة والخوة.
همسة:
قال ليهو أسكت ما تم
قال حاضر والعصيدة فيها السم

[Hassan Farah]

الاخ العزيز بابكر مخير-تورشين- يا رجل نحن اهل جد جد ولو اننا لم نلتقى وعموما وبدون محاباة لاهلى الرباطاب بعتبر كل من يحب البلد هو من اهلى ولاد عمنا الشايقيه بحب غناهم وطمبورهم ويعجبنى فيهم تضامنهم الامر الذى ينقصنا نحن الرباطاب ومشروع كير الزين دليل على ذلك وتعرف الاخطر من كير الزين هو ما يعرف بخزان الشريك-- لقد اكتشفوا خطأ فى تصميم خزان مروى حيث بان لهم ان معدل تراكم الطمى عالى جدا يعنى كم سنة والخزان ينسد لهذا قرروا بنإ خزان الشريك لتخفيف سرعة تراكم الطمى او بلاحرى حجز الطمى خلف الشريك وهذا يعنى على الرباطاب السلام
الاخ عبد الباسط فضل السيد قراشى كنت اتحدث معه قبل قليل كان سعيدا ويبلغك ارق التحايا واعز الاميات
لك تقديرى
حسن فرح--

[عبد الوهاب هنداوى]

عمنا تورشين
لك الود ويا سلام على الذكريات الجميلة ونعمة الخوة
لمن الناس تكون متشاطرة الشبع والجوع ودى الخوة
الما ممكن تتنسى .....عموما لمن اكون مزاجى ما رايق
وعندى حالة من القلق اقوم اتصل على اى من الاصدقاء
العندى معاهم تاريخ مشترك ونتوة فى ذكريات الماضى
ولا يمكن ان اصنف الناس بانتماءاتهم اودينهم ....
والزمن العلينا ده لا يمكن ان تجد صديق او من يشاركك الشر
بس ممكن يشاركك اذا كانت له مصلحة ذاتية وما اكثرهم
وخاصة فى بلاد تجمع الناس بتاريخ محجوب عن الاخر
وتسلم عمنا ود تور شين والتحايا لناسك الحمر وربنا يلمنا
معاهم فى ضل راكوبتهم ام همبريب بارد وناكل عصيدة
موحمد وسلام ..................هنداوى

[بابكر مخير]

عمنا تورشين
لك الود
وتسلم عمنا ود تور شين والتحايا لناسك الحمر وربنا يلمنا
معاهم فى ضل راكوبتهم ام همبريب بارد وناكل عصيدة
موحمد وسلام ..................هنداوى

العزيز عبد الوهاب
ليك الشكر على مشاركتك
الغريبة (ود تورشين الأصلي) سيدي خليفة المهدي عليهما السلام هو صاحب القولة الشهيرة:
الحمرة اللباها المهدي ......... والمقصودين هم الإنجليز وجيش العثمانيين، عشان لونهم أبيض لكن عندنا طبعا بنقول للزول اللونو كدا ، أحمر!!! مش كدا برضو؟؟.
وأنا شاء القدر أن أجد حمرة من ناسن خضر أو خدر (ديل طبعا السمر وكدا) وأزاملهم وأصادقهم، ودا البيخلني أقول لسيدي (ود تورشين الأصلي) ما كل الحمرة أظنو بياباها المهدي،
ما حمرة الكنين وفضل السيد وود محجوب، ياها حمرة عبد الخالق وفاطمة ونقد سليل الدناقلة (يا رسول الله). ناس بلد وبنات بلد وأولاد بلد.
همسة
يا الهنداوي الوداك أستراليا شنو تجارة، قراية ولا إغتراب؟
ولا هجرة، وهروب من ناس الأنقاص والعذاب

[بابكر مخير]

حذفت بواسطة الكاتب بابكر مخير
لخطاء، باعثه الإضطراب

[باسط المكي]

حذفت بواسطة الكاتب بابكر مخير
لخطاء، باعثه الإضطراب
ودمخيرتحياتي ..
لكبطعم القدلة في ودنوباويوالجامع ابخلاوي..
والتحية .لاصدقاءك ..الحمر ..ومن ملاحاظاتي
اكتر الناس .صاقتهم قوية ..وشفافة ..
واوفياءلحد بعيد في الصداقة ...هم الحمر
دي ملاحظة ماعارف رايك شنو

[نبيل عبد الرحيم]

الحبيب مخير
تحياتى لأصدقائك الحمر ولا أنسى الصفر والخضر
والجميل فى الموضوع أن الصداقه هى فقط التى جمعتكم رغم الخلاف الفكرى
وإن دل هذا على شئ فهو يدل على النضوج الفكرى

[أسامة الكاشف]

العزيز ود مخير
بالتأكيد الصداقة في الغربة الدراسية ليها طعم تاني
أنا من خريجي اسيوط 1986
ولمحاسن الصدف في بوست هنا مخصص لخريجي أسيوط
لو دخلتو برضو حتتأكد من أنو الصداقة البتتبني في غربة الدراسة
عندها طعم تاني
أنا كنت في الجبهة الديمقراطية
لكن كل من ولج باب أسيوط صار صديقاً لي
بغض النظر عن الاتجاه السياسي
كنا نتجادل في دار الاتحاد
ونتعازم في الشقق
نتعارك بالجرائد الحائطية
ونتجمع عند الملمات والأفراح كأسرة واحدة
قد تجد النشاز
لكن العبرة بالغلبة
ايام لا تزال لها في الحلق طعم الشهد
وبهذه المناسبة تحياتي لأصدقائك
وتحيات خاصة لكل الأسايطة
(بالله زورونا في بوستنا وشوقو طبيعة العلاقة البتربط بين الناس ديل)

[مواطن]

الحبيـب بكــور
صداقـة ووطـن .. إغبطـك على ما حباك الله من قبول في أفئـدة الناس .. وأدعو لك بطول العمـر ..
لا تهـم الألوان في الوفاء فالأهـم هـو لون السريرة .. إن كان أبيضاً فقـد ظفـرت بذات الوداد ..
إن وطناً فيـه دوت مجاك وود مخيـر ولنا جعفر والجيلي وآمال الشيخ وود أبوعاقلة وخالد الحاج وعادل عصوم .. وكيشو .. وباقي الأحباب في سودانيات .. هـو وطن لايخشى عليـه .. فبيننا مباهج الحب تمشي .. فهنا لك مريدين أيضاً يا دكترة.
أقـعد بالعافية

[بابكر مخير]

بتخيل ليا؟؟
لمن زول يكتب عن أخر أو أخرين بمدح،
ما بكون عشان يشكرهم قدر ما بيكون قاصد إظهار محاسنهم للأخرين..
المذكورين أعلاه وأنا بين وجعة فراق لواحد منهم عزيز وحبيب وبين فرحة بإجلال واحد منهم غالي وحبيب..
"للمعلومية الفرحان ليهو علي بابكر الكنين وإختياره من عضوية الحزب الشيوعي وثقة جماهير ذاك الحزب الفاز بيها لتحمل مسئولية مهما عظمت فهي له أبسط من رمشة عين وأقل من نقطة وسط بحر.....
أما الموجوع عليهو هو قريبي حبيبي عبد الباسط الذي ذهب عنا قبل أن يرآى ثمار كفاحه متبلورة في عقد مؤتمر في الهواء بعد سنين الجور التي صابتهم وعملوا في الخفاء."
واليوم جاءت إضافة أخرى لهذه الكوكبة من الإخوة الذين لم تلدهم أمي...
ود المهدي ود الأستاذ.. "وسيبقى كذلك الي أن أجد الوقت السانح للبوح بإسمه،،
والعرفو يخليهو سر"
وقصته ستلحق بعد أن أجد من الكلمات ما تتناسب، فهو في القول أزكا الناس ويجب إيجاد كلمات تتناسب وطيبه وهو في التعامل أرقى البشر ويجب أن توجد الكلمات التي تتناغم مع رقيه وهو أعظم بنو آدم ويجب توفير المفردات التي تتناسق وعظمته..
والي ذلك الحين سأعتكف وأخلو وأتهجد..
بلا جلبة أو ضوضاء لأخرج البشبهو......