في دي، لا، أصلا إسمي "أبوبكر" معقدني وزهجان من تحول حركاته حسب الإعراب؛ عشان كدا بستأنس ببابكر.
غير شبارقة، أنا أصلا مهوس بالخطأ والصواب، ودا، ممكن تقول عليهو "خيال شبارقة" ضعيف في النحو السليقي، لكن المدرسي بعرفو وعندي مقدرة جيدة للقياس،
النحو في المدرسة كنت بعرفو بطريقة قياسية حقتي براي ولا أحبه ولليلة مرات بسأل: شنو الفرق في المعنى بين جاء الولدان ولّ جاء الولدين؟ ناقشت ناس كتار فيهو وإمكانية حفظ الترتيب داخل اللغة بالفواصل بدل الحركات، عموما حقو ندثر جزء من النحو مثلا: ترك الأسماء الخمسة من غير تغير في الحركة حسب موقعها:
جاء أبوبكر، وضربت أبوبكر ومررت بأبوبكر

بابكر عباس
سلام

عشان ما تكنكش في الكعكول
بديك اسئلة سهلة وكلاسيك جدا..
بطاقة تعريفية مفصلة (مسقط الرأس، النشأة، مراحل الدراسة وفي أي مدارس...الخ.. )
حكي كدا بالراحة وتداعى لينا بالله بطريقة كرونولوجية

سلام يا سرنا
من دون أقراننا ببانت غرب الذين كانوا يدرسون بمدرسة القسم الثاني، كنت وأولاد أخواتي ندرس بمدارس مجمع بانت شرق ميدان المولد والمتوسط بالأهلية (أ) والثانوي بالعجلات بالسني الثانوية بعد لغوا الداخليات لعرب الجزيرة، يعني أولاد مدني صر، إمتحنت مرة واحدة (كنت شاطر) ودخلت البطري بجامعة الخرطوم خلال فترة الديمقراطية، يعني درست بطري ديمقراطي موش زي ماريل، بعد الجامعة إشتغلت بالجامعة (برضو كنت شاطر) وعملت كباحث حقلي ضمن المشروع الالماني لابحاث الإبل بالبطانة لزمن، وكنت بركب النياق أيام البحث وبعمل شغل مجنون، حتى إنو بروفسور إنغلهارت (مدير المشروع) في إحتفالات عيد ميلادوالسبعين بهانوفر وأثناء حديثه عن مشاريعم بالسودان قال: المرة دي، لقينا لينا زول مختلف جدا..
مرة ركبت ناقة لمسافة عشرين كيلو متر بدون حوية بعد أن تهنا بالبطانة، الآس (الصلب) بتاعي تزلط في تلك الرحلة وما زالت آثار تلك الزلوط موجودة والمغالطني الموية تكضب الغطاس.
بعد محاولة إغتيال حسني مبارك، توقف التمويل، وفي يوم كنت عايد من معمل سوبا لشمبات، لاقاني زميل في الطريق ماشي مكتب العمل لمعاينة، دخلت معاهو، لقيتم برضو بفتشوا لناس ليهم علاقة بالإبل، دخلت المعاينة ومشيت السعودية ومنها للإمارات وما زلت مباري الإبل من قوز لقوز حتى يفعل الله أمرا....
نسيت، أمي إسمها آمنة بت أبقناية (أبقناية بالقديم)، مولودة برفاعة وتربت بمدني بالدباغة وما زالت توانس الناس وتودهم وتحمل همومهم.

سلامات يابابكر

بمناسبة حديثك عن الابل .. اظن انك من القلائل في هذه الدنيا الذين يحبون عملهم .. ودي بالمناسبة نعمة تعدل اكتر من ستة علب طحنية

بصراحة .. لو اتيح ليك ترجع السودان وتشتغل هناك بمخصصات مالية اقل (طبعا) هل بترجع عشان تفيد البلد بخبرتك ؟

نشكرك يا أبو أماني على كرمك الفيّاض و إنت جايب لينا مثقف قدر الضربة و أديب فذ.......

و نحي كمان الأديب الراقي لكونه فتح قلبه و تواضع...

كيفك يا بابكر؟

الأسئلة

ماذا أضافت سودانيات لأديبنا الفذ؟
بابكر عباس كثيف التواجد في البوستات ذات الطابع الصراعي (من صراع) و قليل أو نادر التواجد في البوستات الهادئة، لماذا؟
فجأة كدى و من غير مقدمات تحول بابكر عباس لعالم لغة، يرصد الأخطاء اللغوية و النحوية و علامات الترقيم..ما هي خلفيات هذا الإهتمام المفاجئ؟ هل قرأ بابكر عباس حديثا كتاب في قواعد اللغة و شال بسطونتو و جاء على المنبر، أم هو هم و إهتمام قديم؟
ما هو اجمل كتاب قرأه بابكر عباس
أي نوع من الكتابة يجذب و يشد بابكر عباس
من هو الكاتب الاسفيري المفضل بالنسبة لبابكر عباس
كيف نقرأ موقف بابكر عباس السياسي من الحالة السودانية

جايي

- الكضب خيبة، ما برجع يا خالد، وحاليا يا غالي، الإنسان وطنو وضعو ومخصصاتو وبما إنك هاجرت وصنعت لنفسك وضع جديد؛ العودة منه بتكون صعبة، إلا مضطرا.

- تعرف العلاقة مع الإبل دي، غريبة ومتفردة وزمان أنا قلت ضاحكا هنا: أي زول ما شغال في الإبل، أو عندو علاقة بالإبل؛ بيعتبر تمومة عدد في الدنيا دي، ساكت!

سلام يا خال،
- طبعا يا اخوانا، "الاديب الفذ" دي، تقرأ بسخرية ودودة، سودانيات علمتني كيف أوصل فكرتي بطريقة مباشرة وباقل عدد من الكلمات، وسرقت أفكار كثيرة من الأعضاء وأنا رجل سريع التعلم والرصد وأعمل تنقيح لأفكاري ومعلوماتي بإستمرار وأحفظ للآخرين حقهم بداخلي.
- أجمل كتاب هو: العطر لباتريك زوسكيند
- تشدني الكتابة الوصفها الرشيد ب"الوصف الخشن"
- كاتبي الإسفيري الحالي هو: المحامي حاتم الياس
- موقفي من الوضع السياسي الراهن أقرب لموقف الحزب الليبرالي السوداني

بقية المداخلة غير المقتبسة، برجع ليها.

- لم أتعود أن أخفي رايي ولمان يكون هناك إختلاف قاعد أشوف من واجبي إبداء الراي بكل حيادية. مرات لمان تكون هناك مشكلة ولم أبد رايي فيها، قاعد أشوف نفسي متخاذل ومتناقض. عموما أطمح أن أكون عادل مع نفسي.
هناك بعض البوستات إنتقمت فوقها لنفسي، مثال: الإشتباكات مع عبد المنعم الطيب، معظم السجال أخذ طابع شخصي، أعتذر عليهو.
زمان لمان كنت قاعد مع أمي واخواتي، ما كانوا بقطعوا في زول غائب قدامي ولو حصل؛ بستجدوني عشان ما أكلمو وغالبا قاعد أكلمو قدامن.
عدم تواجدي في البوستات الهادئة وأقراءها بوستات الأدب، والنصيحة كدا، ما فيها شئ جديد يأخذ بتلابيبك ويستفزك.
- بالنسبة لموضوع اللغة، أنا ضعيف جدا بقواعد اللغة وإهتمامي منصب لعلامات الترقيم وأحاول تعلمها، ودي، حاجة مختلفة، أنا شايف انها بتخلي الكلام (حتى الدارجي) مفهوم وبتقدر تعرف مقصد الكاتب. ما حصل صححت زول في المنتدى، إلا شبارقة وقيس والرشيد كنوع من المداعبة وهم يفعلون ذلك معي كنوع من المكاواة، مرات قاعد أرسل رسائل داخلية لمان أشك في وجود خطأ كبير من قبل كاتب المداخلة، لكن بشكل عام، أنا ضد تنبيه الكاتب للخطأ الإملائي والنحوي داخل البوست.
يا أخي، أنا زول حساس!

مداخلتك أرهقتني!

عليكم الله، واحد يسألني:
حلم لم يتحقق؟

لك التحايا والشكر على بخات المرح الذكى التى تعطر بها أجواء هذا المكان .................................


حلم لم يتحقق؟ :)..................


كثيراً ما تكون الحقيقة الواقعية غير متطابقة مع الإنطباع الذى تتركه الكتابة فى الأسافير عن قضية معينة ,وعليه ,بى رغبة حقيقية للوقوف عند المرأة وبابكر عباس ..........رأى تفصيلى حقيقى عن نظرتك للنساء..... وفى رواية (النياق:p) فى عالمك ...........

أهم محطة بتاعت فرح و محطة بتاعت ندم في مشوار بابكر عباس؟

تسلط ذكوري مقيت وفيه استقصاد بائن لنصفنا الاخرة (المرأة)
عليه اتوجه بشكوى للامانة واخص بالشكوى رئيس المجلس لاتخاذ ما يلزم جراء هذا التعدي السافر ^_^

الحمد لله انك ما نسيت الجزئية دي..
طبعا اخوك عامل فيها بعرف كل ناس مدني.. بعد ما جبت سيرة أبقنايه (يلحقنا ويفزعنا)...
خلاص طلعت حقنا تب :D

سلام يا مواهب،
حلم لم يتحقق ولن يتحقق، هو: محافظ مشروع الجزيرة، أو وزير زراعة بالجزيرة (مشروع الجزيرة لا يخضع لوزير الزراعة الولائي).
المرأة:
أخواتي كانن وما زالن نقطة ضعفي.
النساء في السودان حاليا كلهن مناضلات.
مفتاح نجاج علاقتي الإنسانية بالمرأة الصديقة هو إحساسي بعدم بخلها وضروري يكون معدل غيرتها النسائية أقل من ستين في المية، بعد داك لو طلبت روحي بديها ليها.

التربية والتنافس بينهن في السودان قاعد يطلع نسبة كبيرة من النسوان المشوهات جماليا (أقصد الجمال الداخلي).
بشكل عام: ان تكون إمرأة عايشة بالسودان؛ تستحق التعاطف.