اقتباس:
هاقد هويت في خيمتك البهية:D |
[QUOTE=عبد الجليل سليمان;396326]الحلقة الرابعة:
بحثاً عن بضعة رُكاب يفاوضون في الدفع كأنهم يفاوضون على (وحدة) وطن. ________________________ QUOTE] ههههه خطيررررررر (بطريقة ناصر يوسف) ياخي دي بعد قريته ..رفعت يدي عن الكيبورد وصفقت تصفيقاً حاراً حتى آلمتني يداي اها نحن منتظرين الباقي سررريع |
الحلقة الخامسة
حكاية من زمن بعيد .. إلى صديقتي .. نبراس الدمرداش .. دون توقيع. هكذا تمضي الحياة. وسافرت برفقته إلى بلد بعيد على منحنى البحر الكبير، كانت تشعر بزهوٍ حتى في مشيتها، تنام على ساعد (حنين)، وتصحو على كلمات هامسه. كانا يشدان أوتارهما وينشدان وعلى رمال الساحل النظيفة واللامعة يستلقيان بينما تتدلى أقدامهما تضرب بحب بالغ لجة الماء المالح وتداعبها فتصدر صوتاً كصوت نائم متعب يحلم بوقت كافٍ لحلاقة ذقنه الكثه حتى يوقف سخرية جارته اللعينة. سنوات. والحياة تمضي بهما عند منحني البحر في بلاد الموت المجاني والدم المسفوك دونما رأفة، كانا يحاولان مع غيرهما إيقاف الأمر بضخ الحب الذي نضب في مواعين مشاعر سكان منحنى البحر الكبير الضيقة. كانت تظن انهما يمتلكان فائضاً من الحب يتصدقان به للفقراء. وما ظنت أن يأتي يوماً يقع فيه شريكها في بند (الغارمين)، أو يمضي بها الأمر فتمسي من (المؤلفة قلوبهن).. لكنها الحياة تتقلب كعفريت (بيداس الكاهن) الذي لسعته نملة بمقدار خردلة على بطنه فأضحى يحك صدره و يتمرغ في حوض دم النذور. طالت الغربة ولم تطُل. عادا في إجازة. وكل شئ عدا رائحة الموت كان رائعاً، لكن أمراً ما يشبه الأسرار العظيمة، الأسرار القاتلة، التي لو انكشفت لحاق بصاحبها موت ساحق كان يتحرك في صدره، و لأن صدرة سيضيق يوماً ما قرر إيداع سره صدر لجة البحر الكبير حيث كانا يزيحانها بإقدامها وهما يتبادلان الكلمات اللينة الطيعة، العاشقة، يطردان بها رائحة الدم العالقة بأنفيهما. عادا ولكن. _________________ الخامسة دي عشان آيات النور |
اقتباس:
عبد الجليل رمضان دا قرر يفتح فيهو للنفرازي وأظنو قرر ينفرز براهو ومافيش حد أحسن من حدgoood غايتو لغاية هسة الجماعة راكبين الظلط.كدي نستني لامن يخشو الأوض ونشوف الجاي شنو..شكيتك علي الخلقك يا جاليليو;) ياجماعة كلامي دا خم رماد عشان في رمضان لازم الواحد يلزم الأدبlooool |
جليل أكتب بلا توقيع فأجمل الكتابات من كانت بلا أب
عريها ما استطعت وسنسترها بأعيننا رمضان كريم للبدور وللجميع التوقيع حليف سابق لي بكور |
اقتباس:
ويابدور موضوع في السلك واختيار موفق ... ولعبد الجليل الاتجاه العام للخيمة (كونها منصوبة عليك) مبشرا ولكنك وعدتنا بنفزاوي وقلت الثورة مستمرة وسننشر اذا لم تكن هناك عقبات نحن في انتظار اي جزء السلسلة وتشكر على كل حال وجود هذه الخيمة خطوة نحو سودانيات منتدى حوار وليس بيتا لاحدنا ... ولسمراء لكن ماعصرت علينا شديد اها في رمضان دا اقبل وين غير الخيمة دي وتسلمي وكل عام وانت بالف خير |
اقتباس:
سأنشر بالطبع (النفزاوي وغيره)، لأنني مبدئياً مع نشر كل شئ يكتب، هذا أمر حتمي .. لكن ليس في خيمة نصبتها بدور يا (منعم) .. فيما لو إدعيت (أني فهمت)، لأن هذه الخيمة – هي لتناول مشروبات خفيفة ومكسرات، و قهوة .. يعني (تفريق مويات) .. بس بإتقان .. فلنحضر جميعاً ونفرقها مويتنا بدقة. ونترك بعض المساحات (الناشفه) كي يرشها من يأتون متأخرين بالـ( ماء طبعاً) من ينسج لك خيمة يا منعم .. وينصبها ويشد على الأرض أوتادها .. فشد معه .. ولا تترك مساحة للـ( هبوب) ليقتلعها .. هذه الخيمة منبر للجميع ..أنت على رأسهم – و عدوي الأول (بابكر عباس) سوف يأتي و (قشة ما تعتر ليه). لكنه لا بد أن يقرأ المعوذتين والإخلاص أولاً، ثم يردد: من علا زلقاً عن غرة زلجا.. و دعنا يا منعم أن لا نضع وزر ذاك على وازرة هذا . ودمت. |
اقتباس:
شكرا يا سيدي. |
يا جلاجيلو
بتجيب السادسة والبعدا والبعد البعدا ... سريع ولا دخلتي الجاية دي بجر لي وتد وبمش علي التاني وقيلا اتضامن مع بابكر عباس عديل كدا أها تجاهلك وصلني... |
الأحبة في سودانيات
سنقضي طول أيام الشهر المبارك معكم في فسحة خيمتنا الجميلة وها قد أطل علينا الشهر المبارك فأكتست القلوب الطيبة أجمل حللها وأستعدت للإستقبال إستقبالا يليق بمقامكم الكريم فها هي الخيمة تزدهر بطلتكم الجميلة وبأرائكم وأفكاركم المنيرة التي تشعل الإبداع ويجعل الفكر يزدهر ويسمو ليوصلنا إلى حرية الفكر والسمو الأخلاقي والرقي الحضاري سنقضي أوقات وساعات عذبة نتمتع خلالها بالأحاديث الشيقة والنوادر المستحبة وبطلتكم السمحة سيكتمل البدر وتطيب السهرات في ظل نور خيمتنا الفضي بجانب النهر العذب والماء الرقراق.. رمضان كريم اخوتي وأخواتي الأعزاء تصوموا وتفطروا على خير |
اقتباس:
- و بعتذر بيها عن مداخلتي الفاتت المليانا أنا، و التي لولا توثيقها بالإقتباس بواسطة أميري، مي و النور، كنت سحبتها. و زي ما بكون في واحد قبال كدا قال: كي بوردك حصانك. - كبطل بهديها للغائبين فيصل علي بالدوحة و حسين عبد الحفيظ بفرجينيا و لو ما خائف أبقى زي حجاج الجزيرة في إذاعة أم درمان، كنت مليت المداخلة بالجميلين و الجميلات حتى لو الجيلي همسيلف طرشق, الحكاية: إسمها خيارات: حلمان أنا ملاك، و عندي جنحين بيضا، و متجاوز الزمان و المكان و شغال شغل زي الساعة، قبل رمضان دا و الناس بتخم في الرماد، زهجت زهجة بتي كلب، ما زهجتها قبلئذ (يطرشني كان سمعت بقبلئذ دي قبلئذ) و أشعر ليك زي البتكلم و أقول: - أسمع يا زول هوي الشهر دا أنا ما بشتغلو ليك. - القصة دي مملة، ما في تغيير؟! كم سنة مما يحسبون؟! - ما بشتغل... ما بشتغل... - فلان أكتلوهو... كتلناهو - فلان أكتبو ليهو موجب.... وجبناهو - الكديس دا أكسرو ليهو كراعو... بحتك... بحتك نلقى ليهو حفرة نرميهو فيها، و الغريبة ممكن نفس الحفرة دي يقع فيها واحد سكران و تلقاهو تت ترب إتنفض وقام! .... و خمخمك ...خمخمك... نخمخم المكسور دا و يا جبيرة، ياجبص، حسب الكمير أو الخرطوم، على التوالي. - فلان عرسوا ليهو، عرسنا... فلانة طلقوها، فركشنا.... (بالله بهناك برضو قصة الجندر دي قاعدة!) - وحات سيدي الحسن لو ما ضُقتا الأجاص ما بشتغل. - صحيت أناهد و نفسي قائم و أقول: الحمد لله دا حلم ساكت. - شن فائدة الجناحين البيضا، لو ما وشك لفحو الهوا، و كان عندك إحتمال للسقوط؟! - يا زول حياة بدون خيارات دي، الله ما وقعنا فوقا. - الغريبة إتذكرت السبب الخلاني في النوم أتحجج بضواقة الأجاص؟ - سنة الفين و تلاتة كنّا في الشارقة، بعد خمينا الرماد رجعنا البيت و من التعب نمنا بدون عشا. - صحيت الساعة خمسة صباحا مشيت الشغل و جيت راجع تلاتة ظهر زي الكابوي الحصانو مات في الخلا، و جا داخل المدينة مخمخم السرج، - لقيت صاحبي الكان مساهر معاي بقرّم ليهو في أجاصايا! - ما صائم؟ - انت يعني إتعشيت؟ - معفن! كمان خيارك عندو سند! - لليلة دي حركة قرمة الأجاصايا ديك في خشم الزول داك و تنقلها ذات اليمين و ذات اليسار في خشمو، معذباني و جهجهت لي خياراتي في الدنيا دي! - مرة إشتريت لي كيلوين بتاعات أجاص و دخلتهن التلاجة، و نص النهار جكيت لي كيلوين (برضو)، جيت راجع هجمت علي التلاجة و مسكت أبرد و اكبر أجاصا، و رقدت في الكنبة زي رقاد الكديس داك، و خم خمشت ليك الأجاصا... - بعد بلعتها ألقى ليك لساني برة و يقول لي بمدتو ديك: أبدا والله أصلو ما زيها... شكرا يا بله على نية التضامن |
أولا يابابكر رمضان كريم وكل أجاصايا وانت طيب..
ياخ كان الأحلام بتخلي الزول يكتب كلام زي كلامك دا حقو تنوم وتحلم طوالي يمكن الدور الجاي تطلع حورية ولا عروس بوم الدخلة ونقعد احنا نطلب من رأفت يوصف لينا الليلة دي زي بتاعة هنومة ديك.. أها يابابكر تصوم وتفطر علي خير وأبعد من لبن النوق وأعفي لينا كان زودنا العيار حبتين.. |
اقتباس:
قيل: أن الرجل ليتلذذ في الجنة بقدر عقله. |
اقتباس:
وعينك في الحيطة |
السماء سوداء ومثقوبة بالثقوب البيضاء الصفيرة
وهناك فوق هذا كله:الله السماء مصنوعة من الحديد لذا الشياطين حين يصطدمون بها وهم يحاولون التلصص على أسرار السماء يحترقون ويضيئون الليل ولا يبلغون الأرض إلا رمادا خالد عويس من روايته "كياح" صفحة 116 |
| الساعة الآن 01:56 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.