تعرف يا عادل
انا امس قريت دعوة ابو اماني واحتفاءكم بها
اها جيت كتبت مداخلة سؤالي الاول لاسامه
انو هل فعلا ح يشارك ولا حيعتذر gap

بس قلت اسي لو اسامة فعلا اعتذر (الناس دي ح تعلقها لي في رقبتي)

اسامة قبل كدة رشحوهو للانتخابات
جا شبك الناس شكرا فلان وشكرا علان واعتذر
جوا رشحوهو للجنة مسابقة الشعر نفس الفيلم شكرا فلان وشكرا علان واعتذر

انا خايف بعدين يجيهو ولدو يقول ليهو اديني قروش
يقوم يقول ليهو
(شكرا جدي بشير
وشكرا ابي معاوية
وشكرا لي أنا دا
وشكرا لك ابني
واعتذر لكم جميعا)gap

إنتو يا أخوانا أبو السعود ده عوير ولا شنو؟؟؟؟؟؟
 

اقتباس:
المشاركة الأصلية كتبت بواسطة أسعد http://sudanyat.org/vb/images/buttons/viewpost.gif
شكرا اسامة وانت تنشر بيننا ثقافة الاعتذار gap


* أسعد :
شكرا بتاعة قلبك يا .. خلف الله ؟؟ الراجل بندودور فيو يسحب إعتذاره تجي إتا تشكره عشان إعتذر؟ عكود.. أسعد ده أقوم أعضيه في أضانو ولا بتقوم إتا تعضيه.. بعدين تعال هيني .. نحن السودانيين أدب الإعتذار ده ما عندنا كلو كلو .. الواحد يكون غلطان ومعترف بغلطه .. بس تقول ليو إعتذر يحمر ليك ويقول ليك .. ليه أعتذر ليو أنا ..؟ هو أحسن مني بشنو؟ بالله يا أسعد خليك محضر خير وتعال ساعدني ندقسو ..
* أسامة :
أسامه أخوي ده أول طلب أطلبه منك .. ويؤسفني أن أقول ليك إعتذارك مرفوض 100 في المية وإذا أصررت سأكتم الجراح في كبدي غائرات مالها عدد!:confused: ولن أقبله إلا إذا كان السبب هو معرفتي الأكيدة بمقامك السامق الرفيع .. وتحفظك بعدم النزول إلى مقام أدنى .. في هذه الحاله لك العذر ولا جناح عليك وصافيه لبن .. أنتظر ردك مع صادق معزتي لك .. و .. تشششااااوووو:cool:

كل ابن ادم عوير في نظر الطرف الاخر
يا ابواماني اولا احب اوضح ليك انو البيني وبين اسامة مناكفة، انا عن نفسي بتكيفّ لمن اناكف من احب...
اذا كان دي بالنسبة ليك عوارة
فانا بالنسبة لي بوستك دا كلو عوارة في عوارة
وقصص بيض بتاع كراس الابتدائي المرسوم قلوب وشاقيهو اسهم وبطاقتك الشخصية وهواياتك وبيضنتك في طفولتك وعولاقك في ثانويتك وتهومياتك بعد الزواج...

لكن يظل دائما القانون الازلي (اي زول عاجباهو عوارتو)
فخلينا في عوارتنا عشان نخليك في عوارتك

والله انا كواحد من الجميع ديل قبلان العذرجدا،
شكرًا اسامة ...

السادة
رأفت ميلاد
تماضر حمزة
حجة آمنة
فتح العليم
أسعد
أشكر لكم مداخلاتكم
اقبلوا اعتذاري

قبلنا :rolleyes:

قالو ليك يا أسامة واحدة إسمها الرضية، و راجلها إسمو وِداعة الله النوع البيكون أرباب معاشات داك و نقتو بقت كُتر و قاعد ليها في البيت زي شوكة الحوتgap
أهااااا
قومي يا الرضية يوم إتشاكلي مع وِداعة الله، و قامت قاطعتو و أبت تنضم معاو من صباح الرحمن، قومن يا نسوان الحلة تعالن أشربن معاها الجبنة بي الضحوية، لمن جن مارقات مرقت تقدمهن، قامن قالن ليها: هييي يا الرضية ودعناك الله، يلا هي المفروض تقول ليهن: قبلنا وِداعة اللهgap
قامت إتذكرت إنها مكجنه وداعة الله سيد الاسم و ما دايره تجيب طاريه، قامت عوجت قدوما و قالت ليهن: قبلنا :rolleyes:

gapgap
و عليه قبلنا يا أسامة ;)

يا اخونا أعد مافى ؟:cool:

وقالها السياب.. لاتخطئوا في حقنا ولو بحسن نية ..!
 

[justify] اقتباس:
المشاركة الأصلية كتبت بواسطة أسعد http://sudanyat.org/vb/images/buttons/viewpost.gif
كل ابن ادم عوير في نظر الطرف الاخر
يا ابواماني اولا احب اوضح ليك انو البيني وبين اسامة مناكفة، انا عن نفسي بتكيفّ لمن اناكف من احب...
اذا كان دي بالنسبة ليك عوارة
فانا بالنسبة لي بوستك دا كلو عوارة في عوارة
وقصص بيض بتاع كراس الابتدائي المرسوم قلوب وشاقيهو اسهم وبطاقتك الشخصية وهواياتك وبيضنتك في طفولتك وعولاقك في ثانويتك وتهومياتك بعد الزواج...

لكن يظل دائما القانون الازلي (اي زول عاجباهو عوارتو)
فخلينا في عوارتنا عشان نخليك في عوارتك

قالها بدر شاكر السياب رحمه الله في إحدى روائعه الثورية .. ولم تدر بخلدي لحظتها وحقيقي يا عزيزي أسعد.. وجدت نفسي في موقف لا أحسد عليه البتة .. وإجتاحني الندم وأنا أقرأ ماخطة يراعي بحقك ولو بحسن نية .. كانت غيبة عقل ونزق كهول .. وبكل أسف جاءت بحق إنسان أكن له كل الود والمحية الصافية (إسفيريا حتى اللحظة) متمنيا أن تتجسد قريبا .. وصدقني يا أبو السعود بعد ردة فعلك الطبيعية تلك غرقت في ما يندي به جبيني خجلا على جنحتى السخيفة هذه بحقك فلك العتبى حتى ترضى وأثق في كرم أخلاقك رغم ضخامة الذلل.. فالعود الطيب يزداد طيبا كلما زادته النار إحراقا .. والشئ من معدنه لا يستغرب .. هو سلوك كريم من أخ كريم حسب يقيني.. وإن لم تسامحنى يا الحبيب فسأعض بنان الندم حتى أدميه ..ولن يكون ضميري من (الطلقاء)!.. أكرر إعتذاري مجددا .. وأقبل إعتذار الحبيب أسامة (على مضض) فقد كانت حجته دامغة لم أحر معها إلحاحا عليه!.. كعربون للصداقة وحسن النية أرجو منك أن تختار لنا من ذوقك الرفيع ضيفا بديلا لعزيزنا أسامة .. وحتى لا أوصم بالعشوائية والإرتجال.. لم أشاء ترشيحك أنت شخصيا (هذه المرة فقط) .. واللللليلااااا .. أرجى الراجيك ..! الكرة في ملعبك يا الحبيب ولك صادق مودتي .. تشششاااووو .. إلى حين :cool:


[/justify]

أتراني أثقل عليكم ولا .. أشعر ؟؟؟؟
 

الحبيب عكود ..
[justify]
سلام مربع .. توقفت كثيرا .. أمام عزوف بعض الزملاء وعدم إستجابة ضيافتي لهم بحجج معظمها أعقله وأستجيب له والبعض أتحفظ عليه وأقبل العذر على مضض فالنفس البشرية كما قال فرويد ..شديدة التعقيد .. ولكن تكرار الظاهر ه هذي جعلني أشك .. فربما كنت فاكيها في روحي وقائل إني .. أسدي خدمة للمنتدى بينما العكس أنا الحين حقيقي (كونفيوزد :confused:) فهلا كفيتني إحتمال الحرج فيما لو رشحت شخصا وإعتذر أيضا مما قد يدفعني لصرف النظر عن الأمر برمته ؟؟ ولك إن إرتأييت أن ترشح عنى شخصا حسب نظرتك .. ولك أن تدلني .. سواء السبيل .. لك مودتي
[/justify]

لا يا أبو أماني ياخ

ما تزعلني منك gap

البوست دا من أحب البوستات المرت علي في النت دا كلو، ما سودانيات بس :)

واصل بالله

يلا على بركة الله gap

وين يا حجة آمنة .. إنشاء الله لسه صابرة زيي..!!!
 

اقتباس:
المشاركة الأصلية كتبت بواسطة عكــود http://sudanyat.org/vb/images/buttons/viewpost.gif
سلام يا زين،

لا تُحبط يا أصيل فتطفئ شمعتك.
للناس أسبابها.

واصل ترشيحاتك وسيستمر البوست بإذن الله.

عكود .. يا أخي إنتا والله واحة وريفة الواحد يستفئ ظلها كل ما إشتد الهجير .. الله يخليك لينا يا ..أب شنب .. الشايقي الجنب وعشانك بكاتل الريح وعشانك قليبي جريح..يا..سمح..ياااااا زين .. لك تقديري .. وكلامك أوامر ..تشششاااووو!
* بس عذرا كدي نديها صنة .. وامخمخ ليكم بمزااااد الضيف الجاي ..

اقتباس:
المشاركة الأصلية كتبت بواسطة حجة امنة http://sudanyat.org/vb/images/buttons/viewpost.gif
لا يا أبو أماني ياخ

ما تزعلني منك gap

البوست دا من أحب البوستات المرت علي في النت دا كلو، ما سودانيات بس :)

واصل بالله

يلا على بركة الله gap

[justify]

والله يا ست الكل كانت القشة والبعير..وفشلت فشلا ذريعا في إستقطاب..شخصين من أحب الناس للقلوب جميعا وليس قلبي وحده .. هما توم آند جيري .. سوري قصدي إسامة وأسعد أو جوز اللوز.. (بهذر يا جماعة)!! تقوموا كمان تدوني سخة كااااربة.. أصلكم اليومين ديل بقيتوا على الهبشة ..!! حقيقي كانت أمنية ..أن يزينا مائدتي وهذا البوست فهما ملاحة المائدة عند الأكل وفاكهتها عند التحلية .. الإحباط جاء مكملا لعدة إحباطات تعيها مثلي .تشل وتشمل كل من كان سوداني هذه الأيام !!.. عموما تفدى لكي الرقاب يا حجة لكي معزتي يلا .. تشششاااوووgap[/justify]
بالجمبة كده :
التقريظ أعلاه يملأني زهوا .. وقد إنتفخت أوداجي حتى كادت تنفجر آآآآه لو شفتي المنظر على الطبيعة:eek: .. تفحطي كيلو!!! ..

هدية كااااااربة للحبائب كلهم وعلى رأسهم حجة وعكود
 

[justify]درجنا في كل مرة ومنذ سنين على ترشيح ضيف من قدامى الزملاء .. ولكن هذه المرة أطل على سماء سودانيات .. بل دار في فلكها كوكبا .. متوهجا.. يعج باطنه بالنفائس والمطايب .. شخص حديث العهد بسودانيات ومازال في مهد التعارف ولكنه مذ خطواته الأولى .. كان له القدح المعلى في حب الناس وأنا أولهم.. هذا الشخص له عدة أصدقاء حميمين هنا ..وعلى راسهم الرائع أبدا مبر .. الذي يحدفنا دوما بالورود والدرر .. وحتى العبد لله إتعكلت فيه وقال ليو بصراحة تامة عند التحية إنو عيكليتة بدرجة (مشير) .. (بس ما برقص)!!:D والظاهر عليو ما صدقني .. عشان كده .. اوريه العكلتة الأمها بت عم أبوها .. واقدم لكم بدون سابق إذن أو معرفة وثيقة .. الحبيب :-


عكود الرسول عليك جييهو لي ووهطو في الكرسي .. وأعدكم بمساجلات ظريفة ظرف حجة أمنة ..كيتن في وهاد وكل حسان سودانيات .. يلا تششااااووو :cool:
[/justify]

كل عام وكلكم بخير وعافية ..
 

مرت شهور وإنقطعت الأسباب بيننا .. ولكل ظروفه .. بس مقبلين على عيد .. عساه سعيد رغم التحفظات البوردرابية ... أتمنى لكم كل الخير والسعادة .. وقد حرك أشجاني فاصل (تشات) جمعني بالأديب الأريب الأستاذ الدكتور الرائع أبو مازن أحمد زين وقد بلغني بوصول عزيز خطاب وفتحي مسعد السودان وإنه يوم الخميس الجاي تجمع البوردراب كلهم من أسرة سودانيات ولنا لقاء عبر اللقاء المباشر والأثير إنشاء الله .. لكم حبا صادقا من القلب .. وتحية خاصة للشاب الظريف الذي طنشنا بكل سهولة ويسر وعدم إهتمام لا نحسد عليه ..العزيز: -

تشششااااووو:cool:

سلام يا أبو أماني،،
ياخي البوست دا توثيقي بامتياز، وانا عن نفسي قاعد استفيد من تجارب وحكاوي الآخرين القاعدة تتم استضافتهم هنا. ما دام ثروت طنّشك، أنا برشِّح ليك بعد العيد، صاحبنا أمير الأمين.
بالله ما تقول أيّ حاجة، أدفرو برسالة في الخاص، وخليهو يجيك بمعنويات ما بعد رمضان.


ويلا تشااااو