[align=justify]صبّحك الله بالخير يا مي هاشم،

تعرفي لو حكيت لمامان قلت لو في واحدة كانت قايلا إسمك (هيثم) حيضحك حتى يقع طنبورو :D

مع التحية لهيثم مامان ولعموم أبناء مسّاوي الشاربين التميّز مع لبا أماتُم. شباب مسّاوي الشغلة البيمسكوها بينجضّوها لامِن تقرّب تحرق، وفي شتّى المجالات، علِم، أدب، شعر، رياضة وفوق ده كلّو، يمتازوا بقوّة الإنتماء لمسّاوي ولبعضهم البعض.[/align]

ونحن زاتنا هٌشنا وكتين جاتنا ريحة الكُشنة..
معقولة يا عكــود أنا ما شفت البوست دا قبل كده؟

عليك الله عاين الزول اللصيص دا كتب وحكى تفاصيل طويلة وعريضة في كم سطر:
بي تلاتين كلمة بس، وفي تمانة سطور "وسطيه"، وبإسلوب مسرحي، كتب حسون ألطف وأجمل وأشعر قصّة!
وقيل البلاغة عند أهل اللغة هي أن تحكي تفاصيل كثيرة بكلمات قليلة

أحمد طه يا سيدي.. تحيّاتي
لصديقنا الأبدي خالد الحاج الرحمة وحسن القبول. كان رجلاً ذوّاقاً، مُحبّاً، وممتلي بالبساطةِ والوضوح..
قرأته هنا وأستمتعت مثلما أستمتع دائماً حين أقرأ له

ثم أين أنت يا رجل؟ لكَ في المنتدى إفتقاد
مُناضماتك سمحة، إشتقنا لها، فلا تبخل بها علينا
وكن بخير

سلام يا الفقير،

حسون زول مبدع بحق!
وبالمناسبة، الكوبري ده إنت ذاتك وصلتو و إنت نازل على البحر، و الصدقة كانت في البيوت العلي شمالك. عشان كده، ريحة الكُشنة كانت واصلة الكوبري ومالية خياشيم العابرين عليه.

إنت زول عزّال ونقّاي.
فعلاً الزول ده وصّل الخبر بتفاصيلو كلّها في كلمات بسيطة و لطيفة. و أكيد حميدي، الوصفو الخالد بأنو بطيني وليس ثائر، قد ألقى الخبر على مسامع الحيران بحماس وكلمات سريعة متقطّعة بفعل المناهدة و إستنشاق ما يسيل من الأنف ومسح ما تبقى بظاهر الكف اليسار بحركة سريعة.
من المقاطع البليغة أيضاً ما قاله الطيّب صالح وهو يصف كيف قضوا ليلتهم في الصحراء وهم في طريقهم إلى أم درمان، قال:
و أتى إعرابي بخروف "وكّأه و ذبحه وشوى لحمه على نار أوقدها".
يا للجمال!

!
وعلامة التعجب الفوق دي يا عكــود للإعجاب وليس للإستغراب..وإن كان الإستغراب في حقها برضو جائز.
ياخي حميدي دا وكأنك إلتقطت له صورة بالكلام
أراه الأن قافزاً، منططاً، ومنغمساً في الشلاقة لشحمة أذنية
غايتو ربنا ينفعنا بي جاهو، ويجود علينا بي همتو العاليه دي

وقال:"في ليلة مثل هذه تحس إنك تستطيع أن ترقى الي السماء على سلّم من الحبال. هذه أرض الشعر والممكن وإبنتي إسمها آمال"
ياخي أنا أخر الجملة دا فقعني بالمتعة، شوف إسم بتو دا لصقو لينا كيف، وشوفو قال بيهو قدر شنو من الكلام؟