اقتباس:
للمساعدة :- 1- حلفا (الجديدة والقديمة) 2- يقظة شعب [youtube]http://www.youtube.com/watch?v=z6_uN4pg8Zo[/youtube] |
(غصباً عنك يلفت نظرك) كلام / سيد عبدالعزيز طبعا ً دي آخر أغنية لحـّنها وغنـّاها الكاشف وسجلها للاذاعة في عام 1969 (نفس عام وفاته يرحمه الله) الأغنية دي ليها قصص وحكايات: القصة الأولى على لسان الشاعر سيد عبدالعزيز نفسو حيث يقول : في يوم جمعة وأنا وأصدقائي العبيد وخالد نسير بسوق أمدرمان وكان مملؤاً بأشكال وألوان الحسان من كل الأعمار وإذا بواحدة بارعة الجمال ... لفتت اليها كل الأنظار رجال ونسوان .. كبار وصغار .. وعند ذلك قلت مخاطباً أصدقائي بصفة لا شعورية (غصباً عنك يلفت نظرك) وأكملت المطلع .. والحكاية الثانية التي تتعلق بلحنها وغنائها يقول عمنا سيد : الحقيقة ما كانت هذه الأغنية للكاشف بل لأحمد المصطفى وكنت قد وعدته بها وبعد استلامي لها من لجنة النصوص سلمتها للكاشف ليسلمها لأحمد المصطفى وبعد كم يوم قابلني الكاشف وعرفني بأنه لحـّن الأغنية وح يغنيها، قلت ليو : ليه ما سلمتها لأحمد؟! قال لي :أحمد تنازل لي عنها، قلتلو أنا ما راضي، قال لي: على كيفك ترضى أو تغضب. والرواية الأخرى ذكرها السر أحمد قدور ... قال: سيد عبدالعزيز جاء يفتش عن أحمد المصطفى في دار الفنانين وما لقاهو ... أها الكاشف شاف عمنا سيد بيسأل عن أحمد المصطفى قام قال ليهو : دايرو في شنو يا سيد ؟ قال ليهو: داير أديهو أغنية فطلب منو الكاشف أن يقولها لهم ... وبعدما عمنا / سيد قرأها قام الكاشف قال ليهو : بالله ده غناء ده وأشار الى آخر أن يطلب من سيد عبدالعزيز قراءتها مرة ثانية، ثم اشار الى ثالث أن يطلب من سيد عبدالعزيز قراءتها مرة ثالثة وبذلك كان الكاشف قد أتم حفظها ثم قام بتلحينها. غصباً عنك يلفت نظرك مهما تحاول وتأخذ حذرك تصبح عاشق ... غصباً عنك طعم شوفتو يحلو في نظرك وتفرح جدا لو كان نظرك تفتكرو ملاك انتظرك في مناظرو يتمتع نظرك تقول ليه ومنشرح صدرك الحسن كلو اتفصل قدرك البدر شفناهو نورو في بدرك لا ما اطـّاول قدرو لقدرك إن يوم في العمر الحظ نصرك وفي نعيم حسنو أتمتع بصرك تصبح أسعد أبناء عصرك وتملأ عيون كل من بصرك أنت في قربو تأمن دهرك يا محظوظ يومك وشهرك حلو الدنيا يجري في نهرك وأيامك باسمة وزهرك أنت في قربو الناس تعتبرك الموفق وأسعد وأبرك بالنعيم اتعوض صبرك والشباب العاد في كبرك |
يا سلام عليك يا شبارقة..
متابع البوست التوثيقي الجميل.. تحيّاتي.. |
اقتباس:
شكرا ً يا الرشيد على المتابعة وعلى الدعم تعرف يا الرشيد معظم الناس بيكونو سمعو الأغنية الوطنية (يقظة شعب) لمحمد وردي أو على الأقل بيكونو سمعو موسيقاها التي كانت مقدمة برنامج إذاعي شهير إمتد لعشرات السنوات ألا وهو برنامج (دكان ود البصير) ولكنهم قد لا يعرفون الكثير عن صاحب الكلمات. مرسي صالح سراج هو من أرقين *- حلفا القديمة ثم حلفا الجديدة ... الحلفاويين كانوا وما زالوا بيعتزوا جدا ً بحلفا وعندما أجبروا على الهجرة في بداية الستينيات كانوا بيقولوا : حلفا دغيم ولا باريس .. وحلفا أرقين ولا برلين ... وذلك عندما ناس عبود قالوا ليهم : حنوديكم لمكان جميل ونعوضكم عن وادي حلفا . مرسي صالح سراج لم يكن شاعرا ً فحسب بل كان صحفيا ً وناقدا ً رياضيا ً وفنانا ً تشكيليا ً ... عمل لفترة من الوقت مستشارا ً لوزارة الإعلام بالرياض - المملكة العربية السعودية ... لا أعرف تاريخ ميلاده بالظبط ولكنني أعرف أنه إنتقل إلى الرفيق الأعلى وهو في ريعان شبابه في سنة 1967م ... وكانت وفاته بلندن التي ذهب إليها مستشفيا ً ... يرحمه الله. * أرقين و دغيم: أسماء لأحياء أو قرى .. في حلفا الجديدة يطلقون أرقين على مجموعة قرى متقاربة في الجغرافيا (قرية 5 وقرية 8 وقرية 11) ( يَقِظَة شَعْب) كلامات : مرسي صالح سراج ... لحن وغنا: محمد وردي http://www.sudanyat.org/upload/uploa...SSSJJJJJhh.JPG(الشاعر المرحوم/ مرسي صالح سراج) هامَ ذاك النّهرُ يستلهـمُ حُسنا فإذا عبْرَ بلادي ما تـمنّى طرِبَ النّيلُ لَدَيْها فتثنَّىَ فأروي يا تاريخ للأجيالِ عنـّا * ( * محمد وردي كأنو ينطقها أنّا) ... حسب سمعي :) ***** ثائرٌ إذ هبَّ من غفوتِهِ ينشدُ العلياءَ في ثورتِهِ كاندفاع السّيلِ في قوّتِهِ عجباً مَن لهُ جندٌ على النّصر يُعين كُلُّنا نفساً ومالاً وبنين ***** نـحنُ في الشِّدَّةِ بأسٌ يتـجلَّىَ وعلى الوُدِّ نـضُمُّ الشّملَ أهلا ليسَ في شِرعتِنا عبدٌ وموْلَىَ قسَماً سنرُدُّ اليومَ كيدَ الكائدين وحدةً تَقْوَىَ على مَرِّ السّنين ***** قلْبُ إفريقيا بِوَعْيٍ نابِضِ حَلَّ مِنّا بالـجّنوبِ النّاهِضِ مِن عدو الغابِ بِلَيْثٍ رابِضِ قِدَمَاً هي كانت جنّة المستعمرين مالـَهُم منها تبارَوْا هاربين ***** نـحنُ أبناء ملوك في الزّمان توّجوا الفونج وزانوا كردفان أفسحَ المجدُ ليهم خيْرَ مكان نسباً نِعْمَ أجدادٍ بِهِم يزهو جبين خُلُقٌ يسمو وعَزْمٌ لا يلين ***** شرقـُنا يوم اللقاء كيفَ سعَىَ حينَ داعي البذلِ بالرُّوحِ دعا كيفَ بالسَّيْفِ تحدَّىَ المِدْفَعَا ودِمَاً بذَلوها ثرّةً لا تستكين للخنا للقيْدِ للعَيْشِ الـمُهين ***** حِينَ خَطَّ الـمَجْدُ في الأرْضِ دُرُوبَا عَزْمَ تِرْهاقا وإيـمان العروبة عَرَبَاً نـحنُ حملْناها ونُوبة بِدِمانا مِن خلودِ الغابرين هُوَ يحدونا إلى عِزٍّ مُبِين ***** هـَمُّنا في العَيْشِ إقْدامٌ وجُود وعنِ الأوطانِ بالمَوْتِ نذود لِنَرَىَ السُّودانَ خفّاق البنود وغَدَاً سوفَ يَعْلو ذِكْرُنا في العالمين فعُلُوَّاً كان شأنُ العامِلين |
اقتباس:
فأروي يا تاريخ للأجيالِ أنـّا كثائرٌ إذ هبَّ من غفوتِهِ ينشدُ العلياءَ في ثورتِهِ كاندفاع السّيلِ في قوّتِهِ ... حتي يستقيم المعنى ... والله أعلم. |
أخي الفاضل شبارقة تُكرم على الغوص في (اللُجج) وجمع الدرر مع نكهة البهار الشخصي الذي لا نجده في المسَجل المكرر. فهذا بحر لا يُمل الغوص فيه ولا عمق له. بس قول لي . . إنت من مدرسة السر قدور ولا المرحوم الفريق إبراهيم أحمد عبد الكريم تجدني من المتابعين مرفقة: شوف لينا معاك عتيق دا حبيبنا ياااخ إسماعيل حميم |
والله بوست قولة شحمان زاتها شوية فيهو
ابداع وطرب حد الوجع بجيب كومى واجيكم التحايا لك ولضيوفك |
ازيك يا عاصم
... غايتو بوست صعب جداً ودايرلو تحضير جيد بس نفعتك كلمة (لمحة) دي :):) ... المهم لمحة ولّا ما لمحة قبل تفارق عمك سيد عبد العزيز يا ريت لو اديتنا لمحة عن مبحث هام في حياتو فقد كان معروف بهلالايته ونظم عدد من الأشعار في ذلك أخوه ...يوسف عبد العزيز كان كابتن فريق الهلال في الأربعينات ... تخريمة أسيوطية: تذكر أغنية أخونا عوض التيجاني عصملي الكان بيرددها دائماً لغاية ما حفظناها ..برضو لسيد عبد العزيز رحلة في طيارة حبيبي قلبي حاب رحلة بين طيات السحاب وحدنا إنت وأنا حبيبي خاف يوم الذهاب في بساط الريح المهاب ... |
اقتباس:
شكرا ً أخونا إسماعيل حميم على هذه الحميمية بخصوص المدارس أنا أنتمي لمدرسة الباحث / علي مصطفى الشهير بدكشنري الحقيبة ... الرجل طبعا ً قبل أن يتبحر في الشعراء وأغانيهم كان شيـّال مع الفنانين الكبار ولذلك فهو يحفظ الكثير جدا ً من الغنا ويعرف جميع الشعراء ويعرف حكاويهم وقصص أغانيهم كمان. الشاعر عتيق محطة كبيرة لا شك في ذلك ولابد من التوقف عندها ... وحنتكلم عنو بإذن الله. بما إنو الموضوع عن الشعراء فياريت تدينا لمحة عن الشاعر حميم.... وشكرا ً لك. |
اقتباس:
شكرا ً كتير يا ستنا جيبي كومك وخليك قريبة يا الطال عشان جيتك وقوفنا. |
اقتباس:
حبابك د. العوض ... كلمة (لمحة) دي أنا إخترتها بعناية عشان ما يجي واحد يزنقني في خانة اليك :) ح أشوف ليك حقيقة هلالية عمك سيد ... وما عشان أخوهو كان كابتن الهلال معناتو إنو هو كمان هلالابي ... وبعدين القصائد الكتبا دي يمكن عن هلال السماء الواحد ده (شبارقة لابس جلابية المريخاب :)) |
نرجع لعمنا الشاعر / سيد عبد العزيز قالوا الفنانين كانوا تلاتة بس (سرور و اللمين برهان وكرومة) ... أها في بداية التلاتينيات قاموا إنقسموا لفريقين ... سرور براهو ... وكرومة واللمين مع بعض ... أها الإنقسام ده خلى الشعراء زاتم ينقسمو (شعراء يكتبو لي ديل وشعراء يكتبو لي ديلاك) ... وبقى في نوع من التنافس ... أها قال ليك عمنا سيد كتب ليك قصيدة سمحة خلاص وقام أداها لسرور وقام سرور لحنها لحن جميل جدا ً وفي أول حفلة ليهو قام غناها (كانت حفلة ساهرة على مسرح نادى الخريجين بأمدرمان سنة 1934) ... قال ليك الخلق ما إيدوك الدرب ...الأعمى شايل المكسـّر ... والفنان سرور كانت ليو طريقة غنائية خاصة بيهو براهو وهى الرقص الموزون والتحرك البطئ المستمر على خشبة المسرح مما جعل الجميع ينتشي ويتمائل طربا ً مع الأغنية . طبعا ً نحن ما سمعناها بصوت سرور لكن سمعناها بصوت الثنائى ميرغنى المامون وأحمد حسن جمعة لأنهم سجلوها في الإذاعة وإشتهرت هذه الأغنية بهما... في المداخلة الجاية إن شاء الله حنحكي ليكم قصة هذه الأغنية أقيس محاسنك بمن - كلام عمنا سيد عبد العزيز أقيس محاسنك بمن يالدرة الماليك تمن نورعينى ونور الزمن ما شفنا فى طول الزمن سواك بدر فى داخل كمن الأنوار .. يتزاحمن فى خدودك أخدن أمن ومن فاهك يتبسمن بروق فى بروق يتقسمن دى الدنيا أم جنة عدن شفنا ملاك لابس بدن إنسان لكن مفردن حاز النور حاز اللدن غصنو مهفهف أملدن وهيبة أسد فى عيون شدن يا الجبرة المازجة العجن وجسمك بالطيب إنعجن إذا النسمات بيك عرّجن طباق الجو يتأرجن والأنفس يتهيجن أنت نرجس من الوسن لعيونا الأعين جسن وأن آية الحسن الأسن وغصون الروض يتمايسن فى ذاك الزى الحسن وكل حسن مالك حسن روضك زى عارضين صفن حلاك سحرك ما سحر وفن كواكب النور البلصفن بصفاتك ما أتوصفن بدور الكون لو ينصفن يسجدن ليك ومايكون وفن فيك عيون بالحسن إزدرن ومهما أفكارهم يكبرن زى حسنك ما يعبرن مع البدرين سيرك سرن ومن وزنك هن يقصرن |
قصة الأغنية : الرواية الأولى : قالو في أم درمان كان في مرتين متشابهات في الإسم (كل واحدة فيهن إسما محاسن) وكانن جميلات وبيغيرن من بعض ... أها قام عمنا عبيد عبد الرحمن كتب في واحدة فيهن أغنية (من محاسن حسن المحاسن في جبينو النور والهلال) أها قامت التانية زعلت زعل شديد خلاص وحرقتا ليك نار الغيرة وقالت : كييييييف يقول الكلام ده في محاسن ديك وأنا موجودة :mad:.... أها قامت مشت لعمنا سيد وقالت ليهو : عاوزاك تقطع فيني أغنية على مقاسي ... قام عاين ليها من فوق النضـّارة كده وقال ليها : عاد يا محاسن أقيس محاسنك بمن يا الدرة الماليك تمن إنتي نور عيني ونور الزمن. الرواية التانية : قالو بت الشاعر أو حفيدتو قالت ليو : إنت كتبت شعر في كثير من البنات إلا أنا ... عشان كده عاوزاك تفصـِّل لي قصيدة تعدد فيها محاسني ... قام قال ليها : أقيس محاسنك بمن يا الدرة الماليك تمن. على جنب : لماذا إختلفت الروايتان في قصيدة واحدة ؟!! ... يخيل لي ناس زمان ديل كانوا بيألفوا قصص الأغاني دي ويقطعوهوا لينا من رأسم ساي:) يا ود عثمان ما تلحقنا بيها ولو بصوت مرغني المأمون وأحمد حسن جمعة تكون ما قصرت تب ...(شايف اليومين ديل كل الناس قاشرين بيها وبالذات طه سليمان) |
...
[rams]http://www.sudanyat.org/upload/uploads/agees3.mp3[/rams] ... |
شباارقه يا صااحب... انت جبت سيره الشاعر مرسى و انا لى يومين افتش فى قصاصاتى القديمه عن قصاصه اذكر انى احتفظت بها قبل فتره ليست بالقليله و هى كانت عن سيره هذا الشاعر و لقد كتبها الصحفى الرياضى ود الشريف... الليله فرجت و وجدت هذه القصاصه مع مجموعه اخرى من القصاصات القديمه و التى عاده ما احتفظ بها كلما لفت انتباهى موضوع معين فى اى واحده من الصحف التى اطالعها من فتره لاخرى... عملت اسكان للقصاصه و هى هنا كما هى و بها من الحديث الكثير عن هذا الشاعر ... http://www.sudanyat.org/upload/uploads/mursi.jpg |
. أخوي شبارقة الدكشنري شخصية لا يستهان بها في هذا المضمار قبل أسابيع قليلة ماضية بمركز راشد دياب كان المنتدى في حضرة ذكرى القامة المرحوم عتيق وقف الدكشنري بالمرصاد لمقدم البرنامج والمتحدثين مصححاً ومحققاً . وعندما تحدث حكى موقف له مع عتيق عن إحدى القصائد لم يتذكرها عتيق وأصر الدكشنري إنها له وحدد تاريخ تسجلها بمكتبة الإذاعة باليوم والسنة ، وبعد المراجعة تأكد عتيق من صحة معلومته. اما عن المدارس .. السر قدور عاش جزء كبير من التاريخ الذي يتحدث عنه ملازماً له. أما المرحوم الفريق إبراهيم كان يتميز بالقدرة الهائلة على الحفظ حيث أطلق عليه البعض اسم الـ ( Recorder) يجمع المعلومات ثم يبثها من خلال برنامجه . عليه ألف رحمة ونور ثم لك ما طلبت موجود بيننا سرقه منك النظر وهو حافز لي للمواصلة في فيها بدأت. تجده هنا في هذا الرابط صادق التقدير إسماعيل حميم . |
سلام يا شبارقة..
متابعين ومستمتعين..فهل من مزيد؟ وعلى طريقتك التساؤليه في إيراد الصور، خذ صورة هذا الشاعر وخبرنا من هو، وماهي أشهر أغنياته |
اقتباس:
شكرا ً ليك كتير يا د. العوض ... وبالمناسبة الأغنية دي لي منها سنين ودنين ما سمعتها. اقتباس:
يا سلام عليك يا ود عثمان يأخي ... وشكرا ً ليك. |
اقتباس:
شكرا ً أخوي إسماعيل على هذا الإثراء ... وفعلا ً البوست الفخم بتاعك سرقو مني النظر وغيابي عن النت ساعتها ... فمعذرة . |
اقتباس:
مرحب حباب أخونا مبر ... وجودك معانا هو براهو دافع للمزيد. طبعا ً لو حاولت أقوقل بالصورة ما ح أقدر :) الشاعر هو فتحي الضو وأشهر أغانيهو : شقي ومجنون التي تغني بها المرحوم/صديق الكحلاوي |
نظرة ... كلام عمنا / سيد عبد العزيز ألحان وغناء / عبد الله الماحي نظرة يا السمحة أم عجن لو كان قليل تبرى الشجن أعرف صفا الأيام أقيف أنظر جمال تلك الوجن دولات صدودك ماوعن آلامو بى إدرّعن أبكى وأصيح متضرعاً يا ناس دموع عينى ترّعن أرحمونى مارضنى الظعن أمالى جور لى قاطعن أحشاي هديل أتقطعن وبالفرقة نشابك طعن يا منبع النور والفـِطن يا الفقتى يعرب والرطن فى جوفى من حبك قطن يا جاهلة مليون ألف طن كيف أسلى عينيك والوجن يالبسمتك نور الدجن جسمك حرير ناسجو العجن ناضر وباللون انعجن الضاوية زى خديك من فى الدنيا يا نور الزمن أرواح نسائمك لى رمن نرجس مزج لى مسك اليمن ما أحلاك يا الجيدك شدن يالعمرى فيك ضائع سدىً انا عندى شوفتك يا اللدن أحسن من الروح فى البدن يا منبع الذوق آه يا من حبك غرز فى الجوف كمن يا غالية قط ما ليك تمن إن هب او جار الزمن ليك السلام ما ولعن خديك وبالنور يلمعن وعدد النجوم ما يطلعن يرضيك وبيك لى يجمعن http://www.youtube.com/watch?v=4cWmJQsCg-M |
قال ليك الأقباط زمان لما يكون عندهم عيد من أعيادم يقومو يعملوا زفة وإحتفالات ومهرجانات في الشوارع ... أها في عيد من الأعياد وفي واحد من شوارع أم درمان كان عمنا سيد عبد العزيز واقف مستمتع بالموسيقى والأناشيد والزفة ... وفي أثناء ماهو متابع قام شاف ليهو قبطية فائقة الجمال (شديدة ... شدة الحرامي :)) والبت كانت واقفة وتعاين من بلكونة في الدور التاني من إحدى العمارات وكانت بتتفرج في المهرجان الفي الشارع وكانت ماسكه ليها غصن أخضر فيهو زهور وتتلاعب به بأناملها (عمك كحلا كيف أنا ماعارف !!) ... طوالي عمنا سيد صور المشهد ده وبدأ يقول : يا مداعب الغصن الرطيب .. يا مداعب الغصن الرطيب وطوالي جاهو شيطان الشعر .. يا مداعب الغصن الرطيب في بنانك إزدهت الزهور زادت جمال ونضار وطيب * * * يالمنظرك للعين يطيب تبدل الظلمات بنور وتبدل الأحزان سرور إن شافك المرضان يطيب * * * تعجبني والشيء العجيب هادئ واليف ماك النفور بى عفتك صنت السفور والحسن والأصل النجيب * * * أنا وأنت في الروض يا حبيب راق النسيم وحلى للمرور بقى أحلى من ساعة السرور وأدق من فهم اللبيب * * * والروضة في موقع خصيب حضنوها وإتلافو النهور ترى فيها أنواع الزهور من كل لون أخدت نصيب * * * يانع ثمارا وغض وطيب أشبه بربات الخدور الإنبرجن في يوم حبور زادن جمال ونضار وطيب * * * في الروض غنى العندليب ورددوا غناهو الطيور ترتيل أناشيد الحبور وفتيانا يوم عيد الصليب * * * دنت الثريا بقت قريب بين السلوك في تاني دور في ثانية كم سطعت بدور وأهلة كان نوعن غريب * * * شيء ينعش الروح في الأديب ويحيي روح ميت الشعور للقاك تنشرح الصدور ويفرح القلب الكئيب http://www.youtube.com/watch?v=E6PoFAsx2Ek الأغنية مهداة ليكم كلكم وبالأخص لصاحبنا رأفت ميلاد. |
قصة أغنية قائد الأسطول:- قال ليك عمنا سيد عبد العزيز عجبتو ليك واحدة من بنات آل المهدي (ناس حي الأمراء) وقام مشى لأهلها عشان يخطبا وكده ... قاموا رفضوهو ... وسبب الرفض الرئيسي إنو الزمن داك كتير من وجهاء المجتمع كانو بيعتبروا الشعراء والفنانين ديل ناس صعاليك ساي بتاعين غنا ورقيص وما عندهم شغلة ... أها البت كانت بتقرا في كلية المعلمات في أمدرمان ... أها عمنا سيد الشاكوش حرقو وجهجهو بالحيل لكن ما باليد حيلة ... ومن شدة إعجابو بيها كان بيمشي يقيف قدام الكلية عشان يشوفا وهي طالعة ... وطبعا ً الطالبات عموما ً بيطلعن فى شكل مجموعات في الأول وبعدين كل مجموعة تمشي في إتجاه ... المهم في يوم من الأيام البت طلعت براها بدون صاحباتا (أظنها كانت على عجلة من أمرها) ولم تمر لحظات إلا وطلعن رفيقاتها وراها ... أها هي بقت فى المقدمة ورفيقاتا بقن خلفها .. وعمنا سيد عبد العزيز أتاريهو كان متابع الفيلم وقام طوالي صورو في لوحة جميلة حيث قال: يا قائد الأسطول تخضع لك الفرسان ياذا الفخار والطول أرحم بنى الإنسان على جنب : أنا (وكثيرون غيري) كنا قايلين الأغنية دي مكتوبة في ضابط كبير في الحرب العالمية ولا ّ في معركة كرري ولا ّ معركة فتح الخرطوم ... أتاريهو عمنا سيد كان مكتول في حوش العمدة :) |
اقتباس:
لينك للحفظ |
شكرا ً ليك يا باشمهندس وماك مقصّر ... تسلم اقتباس:
رأئك شنو يا ود عثمان في كلام أخونا د. الزوول ؟ ناس كتيرين مفتكرين أغنية بساط الريح (رحلة في طيارة) لسيد عبد العزيز وناس كتيرين بيقولوا لعبيد عبد الرحمن .. الغريبة هم الإتنين كانوا أصحاب شديد وحتى عندهم ديوان شعر مشتركين فيهو مع بعض ... وفي ناس بيقولو الأغنية دي موجودة في ديوان لسيد عبد العزيز وفي ناس بيقولو موجودة في ديوان لعبيد عبد الرحمن .. أنا شخصيا ً أرجح أنها للشاعر عبيد عبد الرحمن |
يا سلام يا عاصم ياخ
دا بوست في السلك احب اغنيات الحقيبة جدا وفي اغنية يا خ تلاوز لي كل يوم يا غزلية وين الرايقة يا الفنية ناري الليلة لو عندك الاغنية كاملة ومعلومات عنها اتحفنا بها وسي سى لود عثمان ...... واغنية تانية يقول مقطعها ياحليل زمن الصببا الماضي ويا حليل زمن العشوق راضي وبرضو c c لود عثمان ...... وشعب بهذا الثراء الفني والانساني الابداعي لن يهزم ابدا ....... وتسلم شبارقة |
اقتباس:
هلا حباب أخوي عبد المنعم يا غزلية وين الرايقة وأغنية الكنينة يا رطب الجنينية هن أغاني دلوكة غنـّاهن علي ابراهيم (اللحو) في بدايات حياتو الفنية والإتنين من كلمات شاعر مغمور بيقولولو ود النزيهة (من ناس شندي ... أهل علي إبراهيم زاتو) وقالوا كان بيرتجل الشعر ويلحنو ويغنيهو كمان ... أنا أغنية يا غزلية سمعتها من اللحو ولكن سمعتها أكتر من سيد خليفة. أما حليل زمن الصبا الماضي الغناها المطرب/ إبراهيم الكاشف فدي طبعا ً كلام عمنا الشاعر الكبير / عبيد عبد الرحمن (حنتكلم عنو لقدام إن شاء الله) وحنجيبا ليك ومعاها أخواتا ... بس إنت خليك متابع. شكرا ً ليك يا عبد المنعم ... وتسلم ياخي. |
اقتباس:
طبعا ً الأغنية دي إتغنت سنة 1929م يا الفقتي يعرب والرطن دي في ناس قالو: الصحيح إنو عمنا سيد قال : يا الفقتي يعقوب الرطن أها ... يعقوب الرطن ده منو ورطن قال شنو ؟ قال ليك يعقوب ده كان واقف مع صاحبو بتونسوا فقام دخل عليهم واحد وبدأ يرطن مع صاحب يعقوب ويعقوب مافاهم حاجة لأنو ما بعرف يرطن وقام الزول الجا داخل ده أدّه ليك صاحب يعقوب حاجة ملفوفة كدي .. وفات أها بعد كم يوم كدي جو ناس البوليس ليعقوب وقالولو: صاحبك في السجن وعايزك تشهد ليو ... أها في المحكمة وبعدما شرحو القصة ليعقوب إتضح إنو الحاجة الكانت ملفوفة ديك كانت من الممنوعات (يا مسدس يا بنقو)... يعني الشغلانة كانت مكيدة عشان يرمو بيها صاحب يعقوب (يعني مسـّكوهو أمانة وهو ما عارفا شنو) أها قام القاضي سأل ليك يعقوب : يا زول إنت كنت قاعد مع صاحبك ده لمن جاهو الزول ده؟ (وأشار القاضي إلى صاحب صاحب يعقوب) يعقوب : آآآآي كنت قاعد معاهو القاضي : الزول ده قال شنو لصاحبك ؟ يعقوب : أنا والله ما بعرف أرطن ولكن الزول ده قال لصاحبي بالرطانة كذا وكذا وكذا ... فأستغرب الجميع لذكاء وفراسة وفطنة يعقوب الذي حفظ الكلام القالوهو بالرطانة بالرغم من إنو ما بيعرف يرطن (وترجمة الكلام إنو الزول قال لصاحب يعقوب : أمسك لي الأمانة دي معاك لغاية ما أرجع من السفر)... وده السبب الخلى عمنا سيد عبد العزيز يتناول يعقوب في القصيدة الفوق دي .. وده طبعا ً تلميح من عمنا سيد لفطنة الكاسرا فيو ضـُلعا وكاتلاهو كمد :) |
اقتباس:
اخير منها يعرب و الرطن شكرن على البوست الجميل |
اقتباس:
عارفه قصة يعقوب دي في ناس كتار بيقولو صحيحة ... وبعدين الرطانة الحفظا ما كانت كتيرة كلهن تلات أو أربع كلمات ... يعني ما صعبة على يعقوب... بعدين قال ليك : عمنا كرومة كان بيحفظ الأغنية كاملة في نفس اللحظة ... وعمنا إبراهيم الكاشف كان (أمي) لا بيكتب ولا بيقرأ وكان بيحفظ الأغنية بالسمع . شكرا ً ليك على المتابعة... وخليك قريبة. |
عصاية أبو العائلة : قال ليك الشاعر يوسف الحسن أبو العائله كانت عندو عصاية عاجباهو عجب شديد خلاص ...أها في يوم من الأيام كان قاعد في دكان واحد من أصحابو في سوق ام درمان ... يتونسو سااااي ... ضاربين الهمبريب ... أظن عمنا أبو العايلة عينو سرقتو وصاحبو قام عشان يبايع ليهو زبون ... في اللحظة دي جا واحد براحة سرق العصاية وعرّد ... طبعا ً عمنا أبو العايلة زعل زعل شديد على عصايتو الإنسرقت ... وقام حكى لأصحابو (سيد عبد العزيز و عبد الرحمن الريح وعتيق وعمر البنا) وقال ليهم إرتجالا ً: ختـّيتا في دكان مقدد تقول غربال وقايل سيدو واعي وليهو خاتي البال اوصيك أحترس ما تخت ليكا فيهو حبال قام عمنا سيد عبد العزيز قال : يوسف ليهو حق على العصا بتحسر زي عصاة موسي الكلامو مفسر إن ضربت حديد الصلب لان إتاثر وإن ضربت جبل إنهد جانبو تكسر قول للسارق الآثم سرقت النار عصاتنا بنظبطا في ليل ولا نهار أوعك تنوم خليك دوام مسهار يوم نلقاها في إيدك ..ده يوما ً حااار قام عمنا عبيد عبد الرحمن قال : وافاني الخبر يا صاحبي يوم الجمعه والناس في المساجد للصلاه مجتمعه قالو ابو الحسن فقد العصايا أم لمعه ذات الإنعدال رمز المناعه ومنعه الشالا يشيلو الموت بطي السرعه يحفى .. يعمى .. يشحد يمد القرعه خاتمة حياتو الموت المعاهو الصرعه عمنا عمر البنا قال : السرق عصاية يوسف رزيله طباعو إن شاء الله يعيش ناقص مقصـّر باعو عينو تنقد .. وينشل يمينو وضراعو ورقبتو تنحني تنزل تحت لكراعو عمنا عتيق كان رقيق شوية في كلامو .. قال مواسيا ً عمنا أبو العائلة: صبراً أخي رب وعسى تاتيك مصانه مقدسه مولاي ينجيك من أسي وتجزيك من الخيرات كسا انت الخزين ضو المسا وانت الحنين ساعة القسا |
الليلة لا قيتو ... كلام عمنا / سيد عبدالعزيز .....غناء المطرب/ إبراهيم الكاشف الليلة لا قيتو ملى السرور قلبي وبإسمو ناديتو القلب حباهو وبالشكر واليتو ما عشقت هندامو وقامتو وتواليتو أنا عاشق أخلاقو وقدرتا جليتو ياليتو يشعر بى ياليتو ياليتو بالزمة يا مدهش وجدانى هزيتو منى الفؤاد بالصد صدعتو وأذيتو وإن حلفونى بأسمك عن ضررى عزيتو ليه ودى بالهجران يا حبيبى جازيتو أنا لو ضمنت رضاك كان شخصى هنيتو وبيك تم لى أملى الفى الكون تمنيتو وأقول صريح للناس يا ناس السعد ظنيتو عرج على بعد ما خلاص العمر أفنيتو |
اقتباس:
عود..بصوت الفنان سيد خليفه [rams]http://www.sudanyat.org/upload/uploads/nathra_ya_alsumha.mp3[/rams] لينك للحفظ |
الفي دلالو ... كلام عمنا/ سيد عبد العزيز الفي دلالو ما أعظم جلالو إستحل هلاكي ولي حرم هِلالو الهلال الشغل الناس هِلالو الظلام حين شاف محيو أنجلالو نضرة خدودو وبالأنوار يلالو راح أنفسنا وريحانة لخِلالو المنعم توب العز كسالو مثال النعمة وماأعظم مِثالو جداول ديسو في وردانو سالو طيبو يعبق كل ما الليل أمسالو شالو فالو الناس يتمنو حالو مثالو الباسم وحتى الغيم سِحالو ومن ضميري حب الغير محالو نائم وخلى الكان نائم صِحالو المدلل ما أكرم خصالو حسنو وافي ومافي لسان حصالو عالي سماهو بعيد وصالو المحاسن في مراية جمالو رطب قوامو وخمر التيه أمالو |
اقتباس:
تشكر يا باشمهندس على إثراء البوست بكل ما هو جميل . |
قلنا عمنا سيد عبد العزيز كان شغـّال في النقل الميكانيكي وقامو نقلوهو للعمل في عروس الرمال (الأبيض) ... وكان معاهو ولدو إسمو (كمال) وكمال ده كان بتاع كمال أجسام ... يعمل حركات كده زي حركات شمشون الجبار :) وزي حركات حيدر قطامة بتاع مدني ... كمال سيد عبد العزيز كوّن ليهو فرقة سمـّاها فرقة النمر الكردفاني وكانت معروفة في كل أنحاء كردفان ... أما عمنا سيد عبد العزيز فكان طويل ونحيل |
|
برضو عمنا سيد كتب كلمات أغنية / غنـّى القمري على الغصون ذكرني الدر المصون |
كانت تلك لمحة عن عمنا الشاعر / سيد عبد العزيز وعن بعض أشعاره التي أثرى بها مكتبة الغناء السوداني. إنتقل الشاعر سيد عبد العزيز إلى رحمة الله تعالى في سنة 1976م عن عمر ٍ يناهز الـ 76 عاما ً ... يرحمه الله ويغفر له. |
سؤال المسابقة التاني: الصور الثلاث تمثل ثلاث مراحل من حياة شاعرنا الكبير ... فمن هو ؟ http://www.sudanyat.org/upload/uploads/hhaass.JPG ماذا يكون حبيبتي؟ ماذا يكون؟ ****** يا جرح دنياي الّذي لا يندمل يا من تركت القلب ينزف في أنين حسرات لحظات توالت في وجل كصدي يطير مضيّعا عبر السنين ******* ماذا يكون حبيبتي؟ ماذا يكون. ******* بعد الّذي جرّته أيّام العذاب و توشّح القلب المولّه بالسراب وهو الّذي يلقي الصباح علي أمل و يبثه من وجده شوق الكنار وينضّد النغم المورّد للنهار حتّي مع الّليل المخيّم بالظلام يهب الحياة غناؤه... يهب الفنون. ******* ماذا يكون حبيبتي؟ ماذا يكون؟ ******* بعد الوعود وقد تلاشت و انطوت بعد البراعم في أكمّتها ذوت بعد العناد و قد توشّح بالظنون؟ ******* ماذا يكون حبيبتي؟ ماذا يكون؟ ******* و مع السلام لك من فؤادي باقة الحبّ الحنون لك من عيوني دمعة المزن الهتون لك من جنوني، يا جنوني، ألف لون لك من فؤادي ما يكون وما لا يكون و لك السلام و لهفتي و تساؤلي: ماذا يكون حبيبتي؟ ماذا يكون؟ وتغنى له شرحبيل أحمد بـأنشودة : قدم الخير عليك يا بلادي |
| الساعة الآن 05:37 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.