اقتباس:
متابع بمتعة والله. أعتقد "تتوهدبي" معناها عدم وضوح الرؤية، وتقال للجهجهة برضو. كأن يُقال مثلاً: زولك ده وهدبني بالحيل، بس قالّو حِديساً كدي واحداً فرزتو وواحداً ما فرزتو. أو: وصلت البلد صباحاً بدري مع الوَهَداب. |
شكراً ماريل على البوست الجميل
اقتباس:
أتّفق معاك في معنى الوهدبة ودي أبيات تانية لي حمّيد وردت فيها الوهدبة: دبيب الرِّيح من دَبَش القهر اتلوّى اتلبّدْ ولَدَغ الشّيمة الشّيمة انكفتْ البحر انخجّ الزبد انعجّ الطين انحتربْ ومرقت عقربْ ورفعت شارة اندفعت فارة تجاه المركبْ ووقعت سارَة على صنقور رواسي قريبك وقام مِنْوهدِبْ وكابسو الجندبْ ________ الوهدبة دي وهدبتني أنا ذاتي كتبت مشاركة كاملة فيها أبيات لحمّيد لمن راجعتها لقيتا عن (الدهدهة) وليس (الوهدبة) .. ولي عودة إن شاء الله .. .. |
اقتباس:
قلت اندهِك خُف من يشِط الريح نديهتي علي صناقير الشتات ويجهجك عن جيهتي أبو التيْ تيْ * سنين تبري السراب ويدهدهك حمّيد * أبو التيْ تيْ: صدى الصوت .. |
اقتباس:
|
اقتباس:
انك ستعطى لهذا البحث اضافات ثرة... باصر مشاغل الحياة وشاركنا ولو بالقليل... |
العمدة عكود
ابو دعد ازهرى متابعتكم اللصيقة كافية لمنح الوقود لا تكتفوا بالتعقيب انداحوا واكتبوا كل ما تعرفون البوست لكم وبكم وما انا الا مبادرة بطرح الفكرة كونوا هنا.. اكون بخير |
شكراً ماريل على الفكرة الجميلة والمفيدة
يقول حميد في الضوء وجهجهة التساب ... والضوء ينط من دندهوبو..يجيبو صاد صوت المطر يمكن أن نؤول مصدر الكلمة إلى (دندهوب ) وهي حسب المعنى العام للجملة ربما تعني السرحان أو الحيرة.. وقد أتت كل من الدهدة والوهدبة في ذات المعنى في قصائد مغايرة كما أورد عكود وأزهري سيف الدين ... مرات كتيرة الواحد بلقى نفسه بطبق نصائح أساتذة اللغة الأنجليزية زمان وبفهم الكلام في سياقه العام :D |
سلام يا ماريل، أزهري وأحمد،
الدَنْدَهوب = التلّة الصغيرة أو كوم التراب الدَهْدَهة = التأخير (لا تتدهده أي لا تتأخر) الوَهَدَاب = كما شرحناها سابقاً. بوست ممتع حقيقة. |
مـاريـــل ها مرة اخري سنخرج للشوارع شاهرين هتافنا ولسوف تلقانا الشوارع بالبسالات المضادة للعساكر والمساخر والخنوع ها مرة اخري سنصعد فوق هذا الاختناق الى عناق البندقية سيدي أن الرصاصة موعدي للاحتفاء بوجه ماريل الحبيبة او بخاطر ما اكون السلام عليك يا وطني الصلاة عليك يا طيب الاسماء يا كفني ويا رحط الجموع ها مرة اخرى نعتزل القصائد حسبنا الوطن المضرج بارتحال الطير عن شجر تيبس ماتيبس كم تشبس ما تشبس كم تجاسر ثم مات وما تذكر للنجوع يا ايها الماضون في شفق المشارق بالبيارق والبريق يا ايها الآتون من صدف الجسارة بالسحائب والحريق ضيقوا ليتسع الطريق هذه الشوارع لا تخون هي الشوارع علمتنا ان نفيق ان نبر البرتقالة أو نموت فداءا للرحيق ماريل يا غابة الأبنوس يا جرح التبلدي يا فنارات المواني يا نخيل يا ملة الصرعى وابناء السبيل يا اخوة الشعراء من هذا القبيل يا اخوتي الجوعى لنحتل الموائد ثم دور النشر وننشر صورة لالهنا في الصفحة الاولي ونكتب تحتها ماريل تنهشها المساخر والذمم المآ مركة البغيضة والشعر المطفف والبعوض .. السل و الآسف العميق ولا تموت ماريل كانت تستعيذ بأغنيات الكدح كانت تستعيد مشاحنات العربجية بائعات الخبز قرب الشاحنات ماريل فوق الجرح كانت تستجير القمح يمرق من نفوس الأنقياء القمح يدخل حشرجات .. حشرجات .. حشرجات فالقمح يزرعه الشيوخ الزيف في باب الكنسية بين ياقات البنوك الصفر في جرس الكنيسة وكل العاملين لدى الوكالة زارعون الساسة المتاكفون عن الخساسة يعرفون القمح في حقل السياسة مرتين القمح يزرع في الشتاء وفي الربيع القمح يحصد لانتخابات الرئاسة ماريل حدثنا صبايا الحى والفتيات جلبن الدلاليك لك الغناءالبلابل واطلقنا الحناجر وطني للصبر اخر يسقط الصبر ويحيا آل ياسر قمنا نقرشنا الجريد الامهات ضفرنّا برش في الاصيل ملآنا بالماءا لجرارة اخذنا من تمر الخوابي قبضتين وانطلقنا لحديث جانبي ماريل كنتي تقترحين للشجر التشبس بالتراب وللعصافير التمسك بالغناء وللرياح الانطلاق للم اشتات الغيوم وحشد ايقاع الفصول وشحذ حنجرة الرعود وبدء كورال المطر ماريل يا رياح الاربعاء ويا بروق الاربعاء ويا رعود الاربعاء ويا مطور الاربعاء بحق ماريل الجميلة كيف كيف ينشق القمر أو كيف مشعلة الطريق تأتي مكبرتة بدخان المصانع أو بي بوخ الكادحين تبدو كسنبلة الإباء على جباه الفاتحين مدائن العصفور بالطبشور والنغم المعتق في حلوق العاشقين ماريل تولجنا بهذا المد تخرج لهذا النيل نيلا من جديد ماريل تولجنا ونخرج من اصابعها هتافاً صاقعاً وشعاع مرحلة لانجاز الضريرة لشنق الادعياء (أسامه الخواض + محمد الحسن حسن سالم حميد) شكرا ماريل لهذا الجمال |
سلام للجميع مرّة أخرى، وشكلي حأسوي الدرب ساساقا يا ماريل ..
الدَنْدَهوب: مجموعة عيدان تُنصب أيام الفيضان وتُرفع فوقها العناقريب والعفش والعدّة لكي لا تجرفها المياه. صورة للدَنْدَهوب بكاميرا الوالد – فيضان 1988 http://www.sudanyat.org/upload/uploads/dndhoob.jpg الدَنْدَهوب في قصيدة " الضو وجهجهة التساب" - حمّيد الدندهوبات زي بعض شكل العديدي ورصّها نفس العناقريب نفسها عفشك دا حق غيرك تشك يدخل في بالك ألف شك . . . . والدندهوب إندك دك هرس القزاز الموية جاز الجاز ودك . . . . برّة المطر في الدندهوب برضو المطر ختّ البرش فوق راسو لكن المطر أووو والهوا وراس تمرة فوق عفش المسيكيني الجريد رمى دندهوبا العدي فاتت بالبحر برش الصلاة اللافحو الهوا وإبريق يثرثر بين كرر يا الله ستّها في السفر والضو ينط من دندهوبو يجيبو صاد صوت المطر . . . . خمخم عقاب الكسرة والآبري القديم من دندهوبو المنتكل في النيمة شال باقي الأكل خم الدبيب في القفة مو جايب خبر خم الرياح ... خم المطر ... خم الجراح . . . . طق دندهوب ناس ست نور عودو إنكسر وفات بالبحر تحت السماوات ماف أرض في الموية في الريح في المطر في الدابي في التمر الختر إنسان يطق قبل السماء عراقي والوشي والشعر غير وقفتو ... الدندهوب زالف هبر . . . . بكاهو رادي الدندهوب الغادي وأم درمان تغني : "حبيبي آه ... وودادي وين ... وحبيبي أوب " والباقي كلو مقابلات ... . . . . وبآخر نفس والحيل كمل بي طوفو صد الدندهوب وبين الضبابين والنمل نام نومة الديك في الحبل . . . . عين الشمس ... يا الضو أمش البرتكان والمنقة والنيم تنطقش يا الضو أمش الدندهوب ... يا الضو أمش حدرنلو من قوز الرماد رمن الرمش قالنلو أمش |
سلام يا أزهري،
يبدو الساساق حيكترمن تالاي برضو :) وعشان ماريل تكون بخير، أنا متّكِل على قولها: اقتباس:
نحن في القرير نقول لكوم التراب أو "قويز" الرملة، دندهوب. أمّا الصوّرو الوالد يتطابق تماماً مع القصدو حميد في القصيدة الجبتها؛ وده نحن بنسمّيهو "الرّوشان" الممكن يكون فوق راكوبة، كما في الصورة، أو فوق شجرة نيم أو خلافو. بعض تلك الكلمات المحليّة تختلف إستخداماتها من منطقة لأخرى. معنى الرّوشان إستخدمو إبراهيم الكامل في مرثية "أبوي المات إمام" في تشبيه الوالد به، كناية على الملاذ الآمِن: أبُوي المُوية ما بتَشْغِل لِهَاة رَوْيَان وابُوي الهَاوِي مَا بيَسْعَل ضَرَى الرّوشَان غَدَر جِسْر التَّسَاب خَلْخَلْنَا بالأرْكَان والرِّيح فَرْطَقَت..لينا الله يا سليمان ليك ولماريل ألف تحيّة. |
نعم يا عمده.. الدندهوب القاصدو حميد في قصيدة الضو هو الأشار ليهو أزهري : عباره عن حاجة قريبه من ال "سيداب " بيكون عالي بيرفعو فيهو العفش والعده عشان ما تتبلبل.. الروشان ده ما سمعت بيهو.
ياريت يا أسامة معاوية لو إتداخلت هنا.. بذكر إنك في نهاية التسعينات إنك كتبت عن " مصابيح السما التامني وطشيش " بما تحملو من أمثال وحكاوي شعبية ، وذخيره حية من المفردات العامية. -- تحياتي ياماريل ، ولضيوفك |
اقتباس:
عودا أحمد ياخي وشكرا لماريل التي ابتدرت ما يدعوك الى الكتابة وشكرا لحميد من قبل ذلك. لكم تحياتي |
تسلم يا كانديك على الكلمات الطيبة ..
وأهو ترانا بنعافر عشان نحافظ على توازن الأشياء مع بعض.. |
اقتباس:
وسعيدة بعودتك الى سودانيات حسب ما علمت انك انقطعت لفترات طويلة سعيدة بعودتك ومشاركتك |
اقتباس:
كم اسعدتنى هذه المشاركة الرحمه لحميد الذى كان مدخلنا لكل هذا الجمال داومى يا امال على مثل هكذا اطلالة |
اقتباس:
انها اعطت للبوست قيمة عظيمة شكرا لك ما اجملها من مساسقة لا تنقطع يا استاذ ازهرى |
اقتباس:
مشاركات ثرة من جانبك مساسقتك ان كترت يكون كتر خيرك شديد وياااااااما احلى خطوك هنا |
اقتباس:
لك ول(لا اسميهم ضيوفى فهم اصحاب الدار) |
اقتباس:
وسعيدة بان ابتدرت ما يدعوه للمشاركة وايضا شكرا لك على المتابعات |
بسم السلام
بسم السلام نبدأ راحة غناوينا على خاطرو تتمدأ ساحة حكاوينا ....... ونتغنى بالاطفال ياهن تقاوينا من قاموا قامو رجال يات ريح تقاوينا ...... بنغنى من عتال داخل على الميناء يرفع بدل شوال كفو ويحيينا ماهو الونش شغال صنعة ايادينا ........ يا دربنا الوصال اصبحنا وامسينا بى روعة العمال زراع بوادينا علماء ورجال اعمال وطنية تغنينا عن محرقة راس مال وجندينا يحمينا ...... خل المراية قبال بنوت حوارينا وكل البيكدح شال فى البيت رفع طينة اصبحنا بالامال والجايى ينسينا ليل الجراح الطال ظلمة ماسينا سبناها شلنا الفال شلنا السمح جينا ..... وبسم السلام نبدأ ونختم حكاوينا وطول الزمن تندى وتخضر غناوينا ....... ************************* تقاوينا :التقاوى هى البذور الجيدة اما تقاوينا فى البيت الثانى بمعنى تقوى علينا قبال:قصاد البكدح:الكدح هو السعى بمشقة وتعب الفال:التفاؤل بالاشياء الجميلة |
اكتبي ماريل
|
اقتباس:
ابتداءا من السبت القدامنا سنقوم فى مركز الوافر بامدرمان فى الانتظام فى برنامج امسيات حميد والسبت القادم تحديدا سنتضيف الباحث التربال محمد عمر باتورى فى حديث عن حميد المزارع متناولا الجوانب التى تعرض لها حميد فى هذا الجانب المهم وغالبا سيكون معه الباحث والشاعر عوض فضيل فى مساحة ستفرد لملحمة عم عبدالرحيم التى كان لعمنا عوض فضيل دور واضح فيها .. نتمنى ان يكون هذا البوست حاضرا معنا فى الوافر |
اقتباس:
قصيدة عم عبد الرحيم ********** فتاح يا عليم رزاق يا كريم صلى على عجل همهم همهمة حصن للعباد وهوزز سبحتو ودنقر للتراب هم فوق هم همـا صنقع للسما وكان فى الجو فى غيم وكم نجمات بعاد وكان الدنيى صيف لا قالتو كيف كيف اصبحت كيف لا لمسة حنان لا لمسة وداد لا رمشة طريف من قلبا وفى زى ايام زمان ايام الدفى *********** كانت ماهـا فى كانت فى المراح شدتـلـو الحمار تحلب فى الغنم لى شاى الصباح والطير ما نضم ما رسل نغم عم عبد الرحيم اتوكل نزل فى المشرع لقى زملان الشقى الجا من الجريف الجا من الجبل عل الناس بخير صبح هاظرم نقنق ناقرم غاظوه نعل وعم عبد الرحيم ما بخبر زعل كل الناس هنا ما بتخبر زعل تزعل من منو وتزعل فى شنو كل الناس حنان كل الناس صحاب كل الناس اهل والماهم قراب قربم العمل الطاق اليطق عشت ابو الزمل بالحالة العليك بالفال بالامل ********** عم عبد الرحيم كت فلاح فى يوم فى ايدك تنوم على كيفك تقوم لا دفتر حضور لا حصة فطور تقرع بالقمر تزرع بالنجوم لكن الزمن دوار آ بدوم عم عبد الرحيم ماشى على الشغل فى البال القديم اتعارض تكل تنشايح جراح .. ياااا كيف الغسل ؟ الدنيى ام صلاح تبدأ من التكل من حجة الصباح فى حق الملاح فى اللبس الجديد فى القسط القديم وبيناتن عشم فى الفرج البعيد *********** امونة الصباح قالتلو النعال والطرقى انهرن ما قالتلو جيب ما قالتلو جيب شيلن يا الحبيب غشهن النقلتى والترزى القريب بس يا ام الحسن طقهن آبفيد !! طقهن آبزيد !! انطقن زمن وان طق الزمن لازمك توب جديد وبى اية تمن غصبًا للظروف والحال الحرن شان يا ام الرحوم ما تنكسفى يوم لو جاراتنا جن مارقات لى صفاح او بيريك نجاح ده الواجب اذن وايه الدنيى غير لمة ناس فى خير او ساعة حزن ************** عم عبد الرحيم يا حر ماكا حر ياريت التمر يا ريت لو يشيل كل تلات اشهر والله ايام زمان كانت ما تمر كان ما جاك هوان ما لاقاكى ضر كان لا ضقت ضيق لا اتغرغر صبر لا شابيت غريق لا طلوح فقر وكان ما كان وكان كان اكسيكى در ******* حيكومات تجى وحيكومات تغور تحكم بالحجى بالدجل الكجور ومرة العسكرى كسار الجبور يوم باسم النبى تحكمك القبور تعرف يا صبى مرة تلف تدور ولا تقول برى او تحرق بخور هم يا الفنجرى يا الجرف الصبور كل السقتو ما باقى على التمور وارضك راقدة بور لا تيراب وصل لا بابور يدور والماهية اف عيشة هاك وكف فى هذا الزمن تب يا دنيا تب فى هذ الزمن تف يا دنيا تف يا العبد الشقى ما اتعود شكى لكن الكفاف فوقك منتكى والسوق فيك يسوق حالك ما بتسر الا كمان فى ناس فايتاك بالصبر ساكنين بالايجار لا طين لا تمر واحدين بالايجار ما لا قين جحر سلعتم الضراع والعرق اليخر عمال المدن كلات الموانى الغبش التعانى بحارة السفن حشاشة القصوب لقاطة القطن الجالب الحبال الفى اطن الفرن الشغلانتو نار والجو كيف سخن فرقاً شتى بين ناس عيشا دين مجرورة وتجر تكدح بالاجر ومرة بلا اجر عيشهم كمهو وديشم هان قدر ********* وناسا حالا زين مصنع مصنعين طين فى طينو وين ؟ ما مرابا مر بارد همها لا بعرق جبين لا وشا يصر عين والله عين كلها كمها عزها هان قدر فى الجنة ام نعيم فى الجنة ام قصر يا عبد الرحيم الا ورا القبر يلكد فى الحمار لا تسرح كتر وان كان الفقر يا عبد الرحيم اشبه بالكفر *********** نقرط للحمار نقريط الحمار لا تنسى النعال الطرقى ، الخدار اللبس الجديد تسريح السفر للماشى الصعيد ماشى الديش نفر والبــال اشتغل والبال اشتعل ب الابا مايعيد الحول ما اشتغل الغبن الشديد السابة ورحل الضيق المحل الفرج القريب الجا وما وصل زى الحال دة يوم لا كان لا حصل والبال اشتغـل ************* السكة الحديد يا عمو القطر يا عبد الرحيم قدامك قطر وسال الدم مطر وطارت دمعتين وانشايح وتر يا طاحن الخبر ما بين القضا ومرحاكة القدر الشهدو الدموم و الدمع الهدر ايدهم فى التراب والعين فى القطر عارفين الحصل عارفين فى حذر الخبر اليقين بوخ وانتشر اطفال القرى وعمال الحضر ادوهو الطيور ودنو البحر انصاعد سحاب وادفق مطر عم عبد الرحيم فى الشارع عصر لى تالا اليسار متفادى الكجر عربية الكجر دورية الكجر جفلت الحمار وطوح زى حجر وعم عبد الرحيم اتلافا القطر فتاح يا عليم سال الدم مطر جرتق للتراب منشور بكتاب روشتة وجواب ماهية شهر مفتاحا اب غراب اورنيقين سهر جم لبدة حمار مقطوعين ضهر عم عبد الرحيم يا كمين بشر عم عبد الرحيم يا كمين بشر صحى الموت سلام ما يغشاك شر صحى الموت سلام ما يغشاك شر *************** *************** الهمهمه:التحدث بصوت خفيض كلام غير مفهوم حصن:جعلهم فى حصن او حماية والمقصود هنا التحصين بقراءة القرآن هما:نزل من يهمى الغيث اى ينزل المطر المراح:بيت البهايم نضم:تحدث وبالنسبة للطير غنى المشرع:مكان البنطون وهو ما ينقل الناس من ضفة النهر الى الضفة الاخرى يخبر:يعرف تقرع:تفتح المياه لتسقى الزرع الزمن دوار ااابدوم:لايبقى على حال واحد انعارض:وقف فى عرض الطريق او حال بينى وبين ما اريد تكل:المطبخ جحه:محاججة وهى كثرة الجدل واللغط وقد تصل حد المشكلة تتشايح جراح:تؤلم وتحرق حرن:وقف وامتنع عن السير صفاح:عقد القران انغرغر صبر:امتلا حد الغرغرة الكفاف:ادنى مستويات الفقر منتكى:مائل سلعتم الضراع:السلعة هى المعروض للبيع والضراع هى الساعد اى انهم عمال يكسبون من سواعدهم العرق اليخر:العرق يسيل كالمياه كلاة الموانى:العتاله الجالب الحبال:الذى يجلب الحبال للبيع اى يحمل الحبال ويعرضها للبيع الفى اطن الفرن:داخل الفرن تكدح بالاجر:الكدح هو التعب والمشقة اى تعمل بمقابل ديشم هان قدر:جيشهم على هذا القدر يلكد:يضرب الحمار بباطن رجله تسريح السفر:تذكرة المرحاكة:حجر الطاحونة بوخ:تبخر مثل الماء فصار اخف وزنا لى تالا:الى اتجاه الكجر:العساكر جفلت:اخافته وجعلته يهرب طوح:سقط اتلافا:تلقاه لبدة حمار:هى لباده تصنع من القطن والقماش توضع تحت سرج الحمار لتحميه من الاحتكاك المؤذى مقطوعين ضهر:المقصود بلا سند |
سلامات يا ماريل
... بوست دسم أشكرك عليه وأسمحي لي أن اقترح تحسيناً فيه لا أعرف خلفيتك الثقافية تماماً وإن كنت قد استنتجت أن لك صلة قوية بالبلد ومفرداتها معرفة هذه المفردات في ظني لا تتوفر إلا لمن نما وترعرع في البلد وهذا في ظني شيء جيد سيمكنك بدون شك من تفسير كل الكلمات التي يحويها شعر حميد ولكنه في نفس الوقت يحد كثيراً من معرفتك بما يصعب على باقي الناس وبالتالي على اختيارك للكلمات التي تحتاج لشرح فليس كل ما تلونينه بالأحمر يحتاج لشرح عند عامة الشعب السوداني (أقصد بالشعب السوداني كل من لم يتربى في البلد حتى وإن كانت أصوله شايقية) وليس كل ما تفرتضين أنه معروف للشعب السوداني هو كذلك بالتالي التحسين الذي اقترحه أن ينبري شخص آخر وربما أشخاص آخرين (من غير الناطقين بها) :):D:) للسؤال عن الكلمات عن هذه الكلمات ثم تقومين بشرحها لك مودتي ... |
اقتباس:
لا مانع ان يقوم المتداخلين بالسؤال عن بعض المفردات التى فى القصايد وان اقوم انا او اى شخص اخر بشرح المفردات.. بل اظن ان هذا سيكون جميل واتمنى ان يقوم اناس اخرين وهم كثر فى هذا المنتدى بانزال القصائد وشرحها هذا هو الدعم الذى ارجوه منكم كلكم.... اقتراحك جميل يا زوول يلا ابدأ لينا انت عشان مقترحك ينزل ويطبق على ارض الواقع ثم..... شكرا على اقتراحك الذى بالتاكيد محل تقديرى |
اقتباس:
اكّان علي يا ماريل ماني شايف لي شيتاً محتاجلو شرح ضمه ضمه ومستغرب في حِمّيرك ده زاتو صاقع لى نفسي ... انتو الناس ديل بقو خواجات وللا شنو ؟ الشي .. الكلام العربي آب يعرفو؟؟ عليه آب أنفع في المهمة دي :):) .... |
اقتباس:
سلامات تاني يا ماريل نستعمل التكل بمعنى المطبخ وإن كان أقل منه مساحة فهو أصلاً مكان العواسة (الدوكي) فليس لدينا ما يتعارف عليه حالياً بالمطبخ حيث أن مهام المطبخ تتوزع على عدة أماكن أكبرها هو التكل وهو مكان العواسة ويكون في شكل غرفة صغيرة ليس لها باب ويجب أن يكفي لوضع الصاج وبنبر العواسة والواقود (حطب الوقود) وقد يحوي أيضا كفتيرة الشاي للإستفادة من نار الدوكي أما غسيل العدة فيتم في أقرب ضل وعادة ما يكون عنقريب العدة متنقلاً أو موجود في الصالة ... في غالب الأحيان لا يكون التكل جزء أساسي من بناء البيت ولكنه يضاف إليه إضافة ولذلك يكون زائداً وفي كثير من الأحيان يبنى خارج المنزل (في الشارع) ثم تفتح فتحة بمثابة باب يقود إليه وقد يضيق الشارع بسبب هذا البناء الزائد (المتعارض) وقد يقفل تماماً وهذا في ظني تصوير بليغ من حميد أما تكل الثانية (الدنيى ام صلاح ...تبدأ من التكل) فالمعنى واضح حيث أن متطلبات المنزل تبدأ من الأكل والشرب وهو ما أشار اليه بالتكل ... وقال حميد أيضاً في الرجعة للبيت القديم: اغشي التكل خرمان في شاي ... جيعان اكل وداك التمر والزير قريب بايت من البارح ملان راقد في صدر الهمبريب در تقرا ديك كتب الولاد |
ماريل سلامات
اقتباس:
واصلها في بطن الفرن وتم اختصارها وحذف الياء والباء وتم الصاق الفاء بــ طن فاصبحت تنطق فطن تحياتي |
اقتباس:
بس انا قصدت افصل( فى اطن )عشان القارئ يعرف النطق وان الكلمة مكونة من شقيين |
سلام يا ماريل
وكل المتداخلين الإعزاء... هذا البوست أفادني في مفردة من مفردات حميد كانت مجنناني جن كلمة "دندهوب" قدر ما سألت.. وفتشت شيخ قوقل دا من سنين.. وكنت بستعملها ككلمة "جوكر" تتفهم حسب سياقها في أي جملة أقولها.. شكراً فهمت الدندهوب وشفت الصورة كمان.. |
اقتباس:
شكراً على التوضيح يا ماريل وواصلي في هذا الموضوع الجميل وإن شاء الله سوف احاول ان اساعدك تحياتي |
اقتباس:
فهو من اجتهد فى شرح المفردة ونقل الصورة |
اقتباس:
شدو من اذرى بالله عليكم ما زلت اكرر واقول ان هذا البوست لكم وبيكم وما انا الا مبادرة بطرح الفكرة.... وشاكرة جدا لك ايها الاسمر |
الراحل حمّيد....ود النصرى [rams]http://www.sudanyat.org/upload/uploads/hoosh_alrabi3.mp3[/rams] للحفظ |
بسمك اللهم
اقتباس:
شكرا جميلا ماريل بكانا : مكانا وهي عربية فصيحة حيث تقول العرب مكة وبكة وكثيرا ما ابدلت الميم باء سدر : سرح وشرد حيث يقول الرُحل سدر اذا رحل وسافر وابتعد كَكر : يشابه البنمبر لكنه من خشب الدونكا : وهي مفردة نوبية ( المطبخ )مكان صاج العواسة كالني : جلدني او ضربني الكتر ... الصاح الكفر : بدليل يقرأ ويرتل شكرا ماريل نواصل |
اقتباس:
بس الرابط ما بيقرا ارجو منك ان تحاول التعديل وافر احتراماتى وتقديرى لمساهمتك |
اقتباس:
كم هى مشاركة جميلة منك تشكراتى ووافر التقدير |
كود:
الشي .. الكلام العربي آب يعرفو؟؟وهو بالله دا عربي نصاح!! راعي معاك للناطقين بغيرها :D كود:
أن ينبري شخص آخر وربما أشخاص آخرين (من غير الناطقين بها)للسؤال عن الكلمات عن هذه الكلمات مع شجب وإدانه وإستنكار لأيقونات الزول العروبي التي تم سحبها من الكود .. بالجد فكره جميله .. وفيها إختصار للقصائد في مقاطع .. وللزول مصابيح السماء التامنه التي تم تحميرها:D خيالاً..نقطه..نقطه ..كلمه..كلمه..بيت..بيت .. في إنتظار الشرح الوافي والإعراب الكافي.. .. النفاج .. من.. أتبرا الطيبه .. حظروني من عودة .. أو مرقة ليلية منعوني من ذاتي .. واخواني جندية للقمع يوماتي سدوبا وردية شك في هوياتي .. فتيش وسخرية لكناتي .. لهجاتي .. شلخاتي .. عينيا أوكير وحمداتي .. باعوضة سل فيا تحتاج معاناتي لبطاقة شخصية ! . من ..مصابيح السماء التامنة بتتبب السجاج مع الفجاج..تقوم إيدين بنيات الفريق بتحش تمر.. تخرت سبيط بتعتق الدكّاي.. وتخبز للصفاح بتكفي عيزومة وضيوف.. . ومرثية الراحل مصطفي سيداحمد ..شق علي فيها كثير من المقاطع وكأنها كتبت من رصيد حميد اللغوي الخاص المفعم بحب مصطفي ..وكأن حميد كان يناجي بصدي صوته روح مصطفي التي تحلق حوله .. . من ..الضو وجهجة التساب كلب اب زهانه* تهينو هانه من المهانه تقولو تك .. المقصود ..التحقير وقد تقترب الصورة حول ان المراد يلتف حول الكجر ..هذا ما يفهم من السياق..فهل هناك معني أخر وتوريه لشئ لصيق بالبيئة ؟ .. وشكراً ماريل ومن معك علي هذا الخيط البديع .. . أكيد في الإنتظار... . أكرم |
وين التراجمه:D
بلاهي يدكم مع الناطقين بغيرها looool من..بت العرب النوبية غنيتك يا عشقي وتيهي يا بلاداً كم سمحة وجيهي لو لقت الناس البتدورا الأيدي التنفض كانديكا تنقفذ تلحقا في الكانديكا ترتالا تكوس لها في الجيهي ..... من..عروس الطين حُلماً زانو ليك كابوس ... وراجنبو الليالي يصِنّو والوعد المشتت روس ..... وكاويق شِنْ بترْجِن منو ؟؟ . |
| الساعة الآن 12:56 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.