سودانيات .. تواصل ومحبة - قاموس المفردات العامية فى اشعار حميد

اقتباس:

المشاركة الأصلية كتبت بواسطة بابكر عباس (المشاركة 479182)

كلامك حول السرارة صحيح، ممكن تُطلق على الأقرباء البعاد، لكنها برضو بتطلق على الأقرباء البعاد من السريات.
"الشوق" الفي القصيدة دي، انا شايف انو الشاعر قاصد بيها واحدة من سرارة "راشد" وبرضو من سريات أهلة؟؟
ليش؟
الشاعر قال: راشد حالف ما يطهر إلا أبوهو وعمتو يحضروا، ونجيب الغنايين عشان الشوق بت سرهم ترقص. عمتو القريبة نسبا تجي وتبهجم بالحضور، مجرد الحضور! والشوق البعيدة نسبا تجي وتبهجم بالرقص؟! معروف في ذلك الزمان والمكان، رقيص البعيدين في مناسبة زي الطهور دا، علامة خفة، وأغلب الظن انو البقدرن يتجرأن ويعملنها بكونن من الناس الذين يعتبرون في ذلك المكان والزمان من الأقل مكانة إجتماعية.
صحيح حميد راجل تقدمي، لكن اللاوعي مرات بيكون متأخر شوية.

اقتباس:

المشاركة الأصلية كتبت بواسطة أسامة معاوية الطيب (المشاركة 479187)

بابكر ... اتفرغت لشرح الشعر ... وشعر حميد كمان بي وعيو ولا وعيو ؟ :D:D
شرحك دا خارج سياقو التاريخي والثقافي والاجتماعي تماما *
ومحاولة كسر رقبة المعاني لتتسق مع فكرة غائبة مشرك بيها لي زول واللا لي نص دي ما حاجة كويسة في العموم ...
ياخي فكرة الرجل الواحد صاحب الألف طاقية ( واحدة منهن طاقية الإخفاء) دي فكرة ما بتشبهك
أنا قت الكلام دا لأنك بمجرد أن (أنزلت) شرحك المقدس دا حكمت على حميد
((صحيح حميد راجل تقدمي، لكن اللاوعي مرات بيكون متأخر شوية))
*واحد من البيئة(في ذلك الزمان والمكان) وإلى يومنا هذا

اقتباس:

المشاركة الأصلية كتبت بواسطة أسامة معاوية الطيب (المشاركة 479198)

لا يخفى على الجميع أن جزئية (راشد حالف ما يتطهر) بما فيها من اسقاطات سياسية وأيدلوجية (في سياق النص كاملا) جاءت على لسان طفل واجتهد حميد جدا في أن تبدو طفولية فطرية على أن تضمن الفكرة من خلالها وهو ما يسوّق لا حقا لصدقيتها ... وبمثل ما أن رفض الطفل الطهور حتى حضور والده وعمته فكرة فطرية طفولية ... بما تحمل من اسقاط سياسي !!! قنا نجيب المداحين ... تم رفضها في سياق اجتماعي مقبول وعادي حتى (الطنطنة ) والربط بفكرة العودة من الحج !!! شان الشوق بت سرنا ترقص ... تفضح في فطريتها وعاديتها ميل راشد الطفل للشوق بت سرهم التي يفضلها على أقرانها !! وفيها ملاحة وذكاء ... لأن فكرة تسويق الرقص يشي بعافية المجتمع (على الأقل في البيئة بتاعة القصيدة في ذلك الزمان والمكان) وفكرة تمرير عافية المجتمع من خلال طفل فيها صدقية عالية لأن ست الدار نفسها يرتبط فرحها بذاكرة حزينة تسيل الدموع وتقعد عن الرقص ... لكن فرح راشد الطفل فرح مهول وخرافي ... يجمّل الحاضر ويقود نحو مستقبل ليس منبتا عن ماضيه ولكنه بالضرورة ليس مكبلا به

وفي الآخر تشريح النص كجزئيات هي في الأصل وحدات من وحدة جمالية وكاملة للنص ، لا يعتبر نقدا بل (نقيد) تقرأ بالدارجية بكسر النون وتشديد القاف وهو فعل يرتبط بالطيور وغالبا يضر بالمنقود (التمرة ام راس مثال)
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ
الإهداء : إلى بابكر عباس ... يجده ينقد بخير

عدد من الوشوش الجادة والماجادة

اقتباس:

المشاركة الأصلية كتبت بواسطة ماريل (المشاركة 479207)

من الاشياء الكنت متمنية اقوم بيها فى حياتى
انى استضيف (حميد)واناقشوا فى الحتات الزى دى
لاقيتوا يوم راس السنة ولاول مرة فى حياتى اصر اسلم عليهوا
عشان تكون طوبة فى البناء لى قدام ورتبت مع صديق قريب من(حميد)
مسألة الاستضافة لكن يد المنون كانت اسرع كثيرا...
كنت على الاقل قدرت ارد عليك فى الجزئية دى على حسب ما سمعته
من(حميد)شخصيا لكنى الان ما عندى غير ارد بناء على فهمى لشخص
حميد المتجسد فى عموم كتاباتوا.....
اميل كثيرا للرائ الاول(الشوق بت سرنا)هى امراءة تربطها صلة قرابة بعيدة براشد
لكنها مشهورة باتقانها الرقص على ايقاعات الدليب....
اما الرائ الثانى(الشوق هى من السريات)لا اعتقد انه يستقيم مع افكار حميد
المسألة ما جابت ليها(لا وعى كمان)....
ما قادرة ابلع فكرة انو ذات الانسان الكتب:
قول للزنوجة
النوبوية
دم العرب
كيف البجاوية واريحية الحلب
لى كل خلاصات النسب
من بطن سودانية جد بطرانى اى بالحيل نعم
ما سادنا دون سودانا سيد
طول الزمن شانك خدم ليك يا وطن جمعا عبيد
لا لليسو
ده عريبى اشو
بلويت بجم
جلابى مندكرو انقهم
تلك النعوت الماها فيك
والماهو فيك لا تشيلو هم.........
.........................
__________________
ممكن يكون(لا وعيوا متأخر للدرجة دى)
(ربنا يرحمك يا حميد فكرك لا تسعه الاحرف ههنا)

اقتباس:

المشاركة الأصلية كتبت بواسطة أسامة معاوية الطيب (المشاركة 479209)

ماريل لا أعتقد أن راشد (الطفل) سيكون على علم بمهارات الشوق في الرقص وإلا افسدنا فطرية الطفل فيه
أو هذا ما أراه أنا على الأقل

اقتباس:

المشاركة الأصلية كتبت بواسطة أسامة معاوية الطيب (المشاركة 479206)

انتو الدكتور دا سحب تعليقو ؟؟
أها لبس طاقية الإخفاء معناها

غايتو

الله في

اقتباس:

المشاركة الأصلية كتبت بواسطة بابكر عباس (المشاركة 479213)

السحب تم لانو شفت مداخلتك التانية وفضلت سحبها للمحافظة على عظم النقاش والتقاضي عن حق النفس

اقتباس:

المشاركة الأصلية كتبت بواسطة أسامة معاوية الطيب (المشاركة 479217)

حبابك في عضم النقاش لكن النفس زاتا مافي زول هبشا
نحن نقدر يا دكتور ؟
بس عرفنا انك بتتضايق عادي زيك وزينا

اقتباس:

المشاركة الأصلية كتبت بواسطة بابكر عباس (المشاركة 479220)

نفهم من كدا، انو حُميد الشاعر تقمص "راشد" الطفل لدرجة إنفصال تام عن حٌميد الراشد؟

اقتباس:

المشاركة الأصلية كتبت بواسطة ماريل (المشاركة 479224)

اسامة سلامات
وعى راشد بى فنون الشوق فى الرقص ده وعى(مكتسب) من خلال حديث
الناس عن رقصها الجميل او الفتان او المتناسق اوانو هى زولة مشهورة بالرقيص
الجميل وده ما بتصادم بالوعى الطفولى باى حال من الاحوال...
حتى راشد زاتو
ممكن يكون وعيوا الطفولى ده قادر يفرق بين الزولة الرقاصة والزولة(الما رقاصة)
مافى شئ يمنع انو وعى راشد قادر يفرز....
والاطفال قادريين تماما يتفاعلوا مع الموسيقى ويميزوا وده شئ فطرى...
وده اقرب لفهمى من انو راشد يكون واعى لمسالة انو الرقيص بكون(للسريات)
وبنات البلد(لا ).....
ياتو يوم كان فى ثقافة المنطقة انو الرقيص عيب عشان يقوم يتضمن انو يرقصن السريات
وحتى لو كان الفهم ده موجود فاظنوا كان فى زمان غابر (حميد)لم يكن شاهد
على ذلك الزمان؟؟؟؟؟

اقتباس:

المشاركة الأصلية كتبت بواسطة ماريل (المشاركة 479225)

بالمناسبة انا ما قريت مداخلتك
لكنى بشكرك على حرصك انو النقاش
يكون فى متن الخيط بعيدا عن (شخوصنا)

اقتباس:

المشاركة الأصلية كتبت بواسطة طيبان (المشاركة 479226)

لا يا أسامة راشد فارز مهاراتها ، وعارف الغنّانين أخير من المدّاحين ،عشان الشوق بترقص في الغني ،المسألة أظنّها مربوطة بالضبط بمهارات الشوق دي .
لا قريب دا الشفّع بيمشوا مدحفسين وراجين الفاصل عشان (.....) من مقاشي ، و(....) كريمة ح يرقصن ..
لا قريب دا كنّا (كلنا راشد :) ) .
دا يكون وعي مبكّر بسطوة الإيقاع ، وربّما بسطوة الجسد - وفق فرويد يمكن :)- ، شي كدة فطري ، مع إمكانية ترسيخه بواسطة الكبار واحتفائهم بالبت الرقّاصة ..

ويا عملات المثل :
بطريقتك دي بنخسر القضيّة .:D شفّعنا بريئين نعم ، لكن شنو جردل القداسة الكبّيتو فوقهم ؟؟

__

بابكر يعوس فوق عدلو ، هو ليهو فترة داخل في دور المثقّف الموسوعي ، كان ما جاب سيرة اللاوعي دي بتجيهو إكزيما في قلبو .

اقتباس:

المشاركة الأصلية كتبت بواسطة أسامة معاوية الطيب (المشاركة 479253)

بابكر
سر نجاح حميد كشاعر إنو اتقمص راشد في خلق حالة فطرية نضيفة حولو ... عشان لما يتدخل حميد الشاعر أيدولوجيا أو سياسيا أو فكريا يتسق إيصالها ...
هي أم تتحدث عن ولدها ... أقراها في السياق دا بعيدا عن حميد وراشد ... حتى لا تجر المعاني جرأ لزاويتك (الحرجة) دي!!!
وطبعا دا في الآخر محاولة لإعادة قراءة قصيدة يعني ماها (مولارية)*

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ
نقطة ضعفي في البراهين والخطين التحت الجواب

اقتباس:

المشاركة الأصلية كتبت بواسطة طيبان (المشاركة 479284)

:D:D
يا أسامة ملف الطفولة دا لو فتحناهو أنا متأكّد انّك ح تخسر ..:)

ح أخش غريق شويّة وأقول لك .
راشد دا واضح من القصيدة انّو عمرو خاشّي على ستة سنوات ..والطفل ماهو برئ براءة مطلقة في السن دي .:)
قلنا ستّة تقريبا للأسباب الآتية :
1- شفـّعنا زمان في الغالب بيطهّروهم وهم خاشّين المدرسة .
2- طنطنة راشد دي وربطو للمديح بالحج ، معناها حاضر وواعي بي كم موسم وارتبط في ذهنو انو المدّاحين ديل بجيبوهم لما يجي زول من الحج ، قطع شك راشد دا واعي لو بي حجتين تلاتة .
3- التومات أصغر من راشد ، وصفهن في النص (هُباش بالحيل ) ، لكن مدركات ومتداخلات في المجتمع البرّة ، حايمات بالحلّة ، (جنّي يرطنن قالن نحن الخواجات ) ،مرقن تابعن الحدث الكبير عن قرب واستمعن لرطانة الخواجات وجن لي أمّهن يرطنن ، الكلام دا الطفل بيعملوا بعد التلاتة سنوات ، ويمكن علي أربعة سنة ، راشد لو أكبر منهن بي سنتين عمرو ح يكون حوالي 6 سنوات ..

وفي العمر دا ليهو الحق يكون فارز مهارات الشوق بت سرّهم .
الشوق دي في النص ماها طفلة ، لا ,الشوق دي مرة كبيرة غالبا سمحة ومجيّهة وفوق دا كلّو رقّاصة ، والأهم عاجبة راشد وندادتو ، لأنّهم بالفطرة بيحبوا الهجيج والرقيص ،وراشد واثق من انّو رقيصها مميّز ،لأنو استدعاها هي من دون جميع نسوان الحلّة ، بل واعتبر انّو طهورتو دي لازم تكون بالغنّانين عشان الشوق ترقص ،يعني هو مو سائل في الغنايين ذاتهم ..
تقول لي برئ ؟ برئ انت دا :D

_

الموضوع في رأيي مرتبط بالفطرة ..وبس .

اقتباس:

المشاركة الأصلية كتبت بواسطة أزهري سيف الدين (المشاركة 479365)

سلامات يا بابكر ومشتاقين

المعروف وقتها في المناطق ديك؛ حفلات الطهورة كانت ليها شنّة ورنّة، يعني الناس بجيبو فنانين مشهورين للطهورة. والدَارَة ما كانت حِكِر على الأهل القُراب بس، يعني رقيص الأقارب البُعاد (الأسرار) ما كان خِفّة.
دا كلام ناس كتار عاشوا في ذلك الزمان والمكان.
كلامك دا أقرب للوضع الراهن، لأنو الرقيص الآن بقى نادر، والرقاصات بقو بالإيجار.

فلو دي الحجة البنيت عليها رأيك، أعتقد حتحتاج تراجعو.

تحياتي
..

اقتباس:

المشاركة الأصلية كتبت بواسطة أسامة معاوية الطيب (المشاركة 479431)

حبيبنا يشهد الله جيتني في قفلتي
انا كت ماشي على التومات عشان أعضد فكرتي حول راشد
طبعا راشد في القصيدة انا قاسمو لي حالتين - هو والتومات - قربت أخت لي فاصلة منقوطة قت بابكر يفرح ... فمسحتها
أها
راشد كطفل الحالة البتخصو في رقبتو مقصود بها حالة الطفولة وفطريتا (فيما يخص الكلام المنسوب ليه ) الكلام البتقولو امو (ست الدار) بيكون فيهو اسقاطات حميد والتي عمد على إنزالها بلسان إمرأة عادية حتى يكسبها بعدها المجتمعي المتجذر !!!
يعني لما يقول (حالف ما يتطهر إلا ابوهو وعمتو تحضر ... وتجي الشوق ترقص ... وما يجيبو المداحين وهكذا طلبات طفولية محضة دون اكتراث لما وراء الأكمة !!! يخلق بيئة سليمة معافى فطرية تسمح بتقبل ما ستجيء ست الدار لاحقا بطرح افكارها من خلاله ويبدو حينها كيف أن الطرح متسق مع المجتمع وليس منبتا عنه !!!
(وعارف راشد لما يطنطن ... من هنا يتضح لنا راشد الرمز !!! وتتقافز الأفكار )
التومات بنفس المستوى ( جن يرطنن كطفلات لاقتن كلمي برة جن شايلاتنها وداخلات ... هكذا ببساطة ) ولكن الإسقاط يتتالى في فضح ست الدار لحالة المجتمع التي استغلها العمدة (كرأس سياسي ) ليوجه الثقافات ... باتجاه حشد أفكار التدخل في بنية المجتمع وإغراقه بالغريب والدخيل ليس لأي انتماء يخص الفكرة ولكن لمجرد التكسب والذي ينتهي بالتواطؤ على سرقة تاريخه وآثاره ... مع انتباه المجتمع ممثلا في (ست الدار) لما يحدث دون القدرة على تغييرو !!!

وهنا يتضح أن راشد يشتغل على إشعال فكرتين محوريتين
الفكرة الأولى تنقية صورة المجتمع وإعادته لحالته الفطرية لكشف التدخل الغريب فيها
الفكرة استخدامه كرمز لبدء ثورة الرفض من خلاله (هذا باستصحاب أن راشد الاسم يعود كاسم حركي لعبدالخالق محجوب كما سمعت من روايات لست متأكدا من صدقيتها ولكنها واقعة لي في جرح)
وإن كنا قد ارتحنا للتدرج دا يبقى تحميل اختيارو للشوق شان ترقص في طهورتو اكتر مما تقدم من تدرج يصبح مُخل وفيه محاولة (واعية أو دون واعية) لإدخال حميد (الشخص) في القصيدة وقراءة أي بيت ورد فيها من باب توجه حميد السياسي!! والفكري !! وانو لو كتب جامع معناها قاصد (عدم الجامع :D) لانو هو زاتو شن عرفو بالجامع !!! ويبقى الموضوع موضوع تاني خالص
بعدين ورد في بعض روايات القصيدة (الشول بت سرنا ترقص) هنا يمكن أن ننقسم لفريقين في شرح السرارة دي باعتبار دلالة الاسم وربطها بفكرة السرية ... وحينها أيضا كنت سأكون مرتاح جدا لأن حتى الشول يمكن أن تكون قد دخلت للنص باعتبار ان الشوق هو الاسم الأول - طبعافي حال ثبت أن الشول هي الأسم الأول الوارد في النص يبقى حميد جاوب !!! بمعنى إنو لاحظ حساسية ما تجاها وتعدد التفاسير وقام باستبدالها - في مناسبة أخرى كان يريد أن يشير فيها لتقارب دماء السودانيين - كما درج أن يفعل ويؤمن - فأدخل اسما ينتمي للجنوب وجعله قريبا لفتاة تتحدث من أقاصي الشمال !!!

أو هكذا يتراءى لي

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــ
القراياة الهادية دي مهداة لبابكر عباس ... تجده بخير :D

اقتباس:

المشاركة الأصلية كتبت بواسطة بابكر عباس (المشاركة 479460)

- أصلا مهمتي في المنتدى دا، مضايقة (الساكنين) والثوار فيهو، وإثارة شكوك حول المقدس (حِميد مثالا).
- يا أخي، أنا أحكامي غير جاهزة وقاعد أجتهد فيها وفي معظم الأحيان قاعدة تكون من (بنات) أفكاري. انت ممكن تقول لي: قفة اليقينية (يا عملات الصائغ) ختها شوية.
وبرضو بقول ليك: أبيت، اليقينية والجلافة بتحفز الزول البحاور فيك وبتخليهو يجهز كل أسلحتو (يا عملات ماريل لمنعم) ويجيك.

أحكام جاهزة آل!

شفتا كلام حميد حول الدخلاء؟

اقتباس:

المشاركة الأصلية كتبت بواسطة أسامة معاوية الطيب (المشاركة 479470)

1/ أنا ما عندي مقدس ... وسيرد اليوم الذي أتناول فيه عيوب الهتافية في شعر حميد ... والإسهاب غير المبرر في بعض القصائد ما يضر بالفكرة الأم ... وعدم استحسان استخدام بعض المفردات (بذائقة شعرية محضة) وهكذا
2/ أبيت تخت القفة ان شاء الله ما تختها ... بس طيب غتيها مرة مرة ... معانا ناس شمامين (جمع شمام)
3/ ما شفت كلام حميد حول الدخلاء والله
4/ عملت لينا شنو فيما يخص (لو عملت ليك منتدى ) ؟ نعتزل اللعب الدولي يعني ؟

اقتباس:

المشاركة الأصلية كتبت بواسطة أحمد طه (المشاركة 479489)

طيب يا أسامة
إذا كانت (سرنا) في النص بمعنى قريبتنا ، شنو يعني معنى بت سرنا ؟؟ ما بت سرنا برضو سرنا:confused:
كدي اتأمل الحتة دي !

ثم ياخي بت سرهم دي إسمها الشوق ... الشوووووق
و عندنا الشوق بت راجنو و الشوق بت فضل الساتر
شوقاً تاني ماني خابرا

(برضو أسأل عباس ود علويةlooool)

أضف إلى ذلك أن من اشتهرن بجودة الرقيص كانن هن (وما زالن)!!
لأنو ما عندهن (التحفظات) الغالبا ما تكون عند بنات البلد لامن يرقصن
و نحن في اللعوب أو الحفلات بتعجبنا البت الرقاصة (ولو كانت ماها سمحي) مالا البت السمحي و ماها رقاصة ، و يعلم الله شفعنا من يوعو في الدنيا دي بيفرزو الرقيص السمح من المو سمح

هذا والله تعالى أعلم

اقتباس:

المشاركة الأصلية كتبت بواسطة بابكر عباس (المشاركة 479492)

مداخلة أحمد طه دي، ختن (أوسامة) وطيبان في خانة (اليك)، وقربت تُشير لزول خارج البئية بأنو خطير.

احمد طه برضو مدعو.

اقتباس:

المشاركة الأصلية كتبت بواسطة أسامة معاوية الطيب (المشاركة 479531)

بابكر اجيك من الآخر ... حتى لو قال حميد الآن انا كت قاصد السرية التي عناها اخونا بابكر أب قفة دا :D الموضوع عندي لا يمس (لا وعي) حميد الشاعر ... حيث أن الأمانة الشعرية تقتضي نقل الأحداث بحذافيرها ثم التدخل بالفكرة المضادة ... وإلا يبقى تزوير في أوراق شعرية !!!

ثم إنو ما جاء به احمد سليمان طه - وهو ناقد بارع جدا ومرجع بالنسبة لي - هو ليس نقدا شعريا ولكنه تحرك جيد في متاح ذاكرة مجتمعية وماهو أشقى مالانا فيها ... ولا اسع ما طمنا زي ماهو متطمن !!!
مع إشارة ذكية منو ... إنهن كانن (ومازالن) ... تدعم وجهة نظرو لحد ما للزول الماعندو حديدة ولكنها عندي أنا ... إن فتحت باب الاحتراف اتفق معاهو فيها ... غير ذلك لا ...

اقتباس:

المشاركة الأصلية كتبت بواسطة طيبان (المشاركة 479537)

مداخلة أحمد سليمان طه الأولى في جدل (السرارة ) أنا نطّيتا قاصد ، :) وأظن البارح قلت لي أسامة حمزة الكلام دا ، يا أحمد دا عكّيم شنو السوّيتو لينا دا ؟ أنا مطمئن جدّا لانو الشوق دي قريبتن لي ناس راشد ، السرارة البيقصدوا بيها (الخدم) دي معنى بعيد ،ويمكن حتى الاستخدام دا جا من وعي متأخّر في المجتمع بضرورة إزالة الفوارق - ولو شكليّاً - نوع من الاستلطاف والتقريب ،لكن ان قلت لي زول في البلد فلان داك سرّنا المعنى الأقرب هو أنّو قريبنا من بعيد ، مالم يكن فلان داك معروف للمستمع إنو ما هو قريب وفق قبيلتو ،دفوعاتك عن الشوق دي وحديثك عن السياق فيهو ما اتقرت لي بي طريقتك واسمح لي عاد في الإختلاف معاك .
للمتابعين ، أحمد سليمان طه دا هو واحد من مراجعنا الكبيرة وشعرانا العظام ، ملم ومهتم بثقافة المنطقة بشكل ممتاز وهو مقيم بها وهو صاحبن لي حمّيد وبالتأكيد لي عباس ود علوية :) ، يعني لو أي زول غيرو كان تكلناهو - أنا وأسامة- في ركن ورشّيناهو لكن أحمد دا إلا نفاوضوا .. وبلا زعل كمان .:)

__

أسرارنا = قرايبنا .
الداعمين للمعنى دا من شايقية الموقع ..
ماريل وأسامة معاوية وأزهري سيف الدين وطيبان .
الداعمين للمعنى التاني :
أحمد سليمان وأسامة حمزة (أسامة زاتو مو مالي ايدو) ..

مع تقديري للاخ ماجداب واصحاب المداخلات التي تلت مداخلته، وحاشاي أن أسلب لأحد حقاً.

لو تتبع المداخلات المقتبسة فوق دي ما تحريك ايجابي للحوار وحديث غير علمي سأتحسس قدرتي على التفرقة بين مجاملة صديق ووجهة نظري.

ويصبح قولك :

اقتباس:

عليه لا اجد اى حراك ايجابى تسبب فيه العضو (بابكر عباس)

تنقصه الدقة.

وانت برضو مع وجدي ، عليك الله اعفي لي:)