اقتباس:
معاك في انّو تفسير النص المبدع ممكن يقفل النص ويحد من فضائه الواسع ، بتكون أكيد لاحظت لي انّو ردّي الذي وردت فيه دلالات راشد ،كان ردّا على نقطة أثارها أسامة معاوية دي واحدة ,الثانية نص رسايل ست الدار دا نص موغل في وضوحو ودلالاتو ،يعني مافيهو مجال تخيّل كبير ، في غضبة لاحقة في ذات القصيدة بيرد (بعتو شفيعكم يا عمّال ؟ بعتو وجيعكم للراسمال ؟ هاكم دي ) ، وحميد كان لامن يقول هاكم دي يخمش من الأرض خمشة ويكشحها على الوجوه الإفتراضية للعمّال ، جو القصيدة دي بالذات يسمح لجدل ماقصد ويقصد حمّيد ، (مؤكّد) الأنا أوردتها في ردي على أسامة كانت تأكيد للاسم الحركي للشهيد عبدالخالق ، لا لتأكيد انّو راشد مسمّى عليهو ،وعلى ذات النسق فتحت باب الدلالات الممكنة للأسماء الواردة ، فقط لأن النص يسمح بي كدة .عادة أنا مثلك لا أميل لتحنيط نص ابداعي ولا تنميطه ، أو قل أجتهد في ذلك . شرح الكلمات العامية في شعر حميد برضو ممكن يحتمل شرح المعنى العام أو الجو المحيط بالجملة الشعريّة ،فالكلمات وحدها لا توصل المعنى الكامل أحياناً ، عندك مثلا كلمة (بنبونة ) أوردتها الأخت ماريل بمعنى بذور البصل وهو معنى صحيح تماما ، ولكن نفس الكلمة (بنبونة ) وردت في نص آخر لحميد (الضو وجهجهة التساب ) بمعنى النخلة الوحيدة الماعندها بنات .. في قوله ( بنبونة من كم وأربعين ..وحّيدا ما شالت جنى ، من جابا جدّو من المحس ، من هي السغيري محاننا ، يسقيها بالجوز ما فتر ، قدر اليرجّيها المطر ، والليلي حظّها طوفنا ) . أرجو ألا نكون قد بعدنا بالبوست عن مرماه المحدّد ، ولكّننا نحاول أن نوسّع في الماعون قليلاً وأهو كلنا مستفيدين من الحوار الجميل الداير .. __ كن بخير يا صاحب . |
اقتباس:
|
اقتباس:
_______ تحياتى يالبديرى, يازول اهدا شوية , رقم سبعة فى الخط مابخلى حجتك أقوى.. أنت كدا هش وبتغرق للناس حوار جميل بخوضو فيهو .. أكتب مداخلاتك بالفكرة التى توده , لكن يازول ماتكبرا لينا بالشكل المخيف:D دا . أرجو انو تكون عندك اضافات أكثر فى البوست المفيد دا |
اقتباس:
|
ماريل سلامات .. - انا شايف الوقفة في بعض النقاش الحاصل هنا ماعندها معني خلاف انها انجراف وراء نوايا سواقة البوست في اتجاه اخر .. او هكذا يخيل لي ..!! الفكرة من بداية البوست كانت واضحة ، الان اي زول عاوز يفتحلو نفاج نقاش جانبي وطرح اراء ده ما محلها .. اصرار البعض علي مناقشة مواضيع اخري بخلاف موضوع البوست ده عناد ومحاولة لفتلو فتل مع سبق الاصرار .. وكمان الترصـّد يا سوقي البوست ده بالطريقة البدأ بيها يا خلينا نشوفلنا شغلة تانية .. ما تعتقدي اعتقاد جميل في كل المكتوب هنا .. . اواخر القصيد الاولي .. وين طيبان ؟ نحنا نُصاحاً زي واطاتنا نحنا نصاح إلا القراص والتجار والحاصل البحصل كل صباح شتلاتك قبضن الحملان كبرن بالحيل العضمين الروكة إنزرعن اوعك تشفق من تالانا ولا نبقالك مشغولية زيّك واحد مستورين وما ناسين المسئولية المحجوب ينشد من خبرك شافعو محسّب من يومين التومات طيبات ونصاح إلا هُباش بلحيل آ الزين راشد كرر .. شهر اتنين كان ما جيت أنا ما بطهر الله يبعد العارضي تعال كان فد دور يدوك يا تعال كان بالخصم إن شاء الله تعال وما تتوصى .. وداعة الله وداعة الله أوعى البشغل والعربات والحيكومة السمها فاير أم أولادك ست الدار بت أحمد جابر . . |
اقتباس:
الحمدلله الذي جعلنا من المانحين لها |
اقتباس:
تحياتى لك يالجيلى ياجميل لكل بداية نهاية ولكل نهاية بداية! المعلومة العاوز اوصله وصلتها ! ودا طرفى من البوست (حاتاوق ليهو من الحيطة) تسلموا كولكم من غير فرز سلام:) |
اقتباس:
عودة لموضوع بت سرّنا ، أمس كنت بنضم مع الصديق /هاشم محمد موسى ، هاشم دا ود أخت حمّيد ،ودا ما المهم ،المهم انّو حافظ أغلب أشعار حمّيد ومعاصر لي عدد كبير من قصايدو وحاضر زمان وحيها ،وبيناتهم نقاشات طويلة بحكم القرابة والإهتمام من جانب ودالأخت ،سألتو عن (الشوق بت سرّنا)،أوّلا قطع لي الشك بي انّها (الشوق ) وليست (الشول ) أبداً ، قلت ليهو هل حصل ناقشت حمّيد في ما يعني بي (بت سرّنا) أو سمعت ليهو توضيح ؟ قال لي : لا .. ماحصل ، هاشم برضو بيقول انو حمّيد ممكن يكون قاصد قريبتنا وممكن يكون قاصد انّو الشوق دي من بواقي (الرقيق) حسب السائد في الزمان داك ،وهذا بالتأكيد ليس خصماً على حمّيد ،فحمّيد ناقل للواقع بكل تفاصيلو وليس مطالبا بتنقية المفاهيم ، وهذه أمانة منه ، أعتقد انّو دا رايك برضو .. __ تحياتي . |
اقتباس:
طارق سلامات .. كيفنك .. جميل ان نجتمع علي حب رجل بهذا الجمال .. |
تحياتى ياطيبان,
وشكرآ ياأخى على الرد المرتب.. اقتباس:
أنا ماشايف اى علاقة بتربط عبد الخالق بتسمية (راشد) فى القصيدة لأنو الصياغ كلو ماعندو ماعلاقة بالربط دا, الا الناس تكون معتمدة على ولع كليهما بالعناد ... ربط الاشارة فى القصيدة بعبد الخالق, يخل بكليهما(القصيدة وعبد الخالق) كما انه يخل بالفضاء الفسيح للتخيل |
اقتباس:
كنتا بسمعا (راشد قرر) لكن كرر دى شوفو لينا شرح اضافى, غايتو فى البوست دا راشد يمكن يكرر تالت :D:D:D:D |
اقتباس:
اضافي دي ما اظن يا الجيلي .. لكن انا اظن انو راشد كرر = اصر علي رايو انو ما يتطهر الا ابوهو يجي .. راشد مصر علي حضور ابوهو شهر 2 و |
اقتباس:
القصيدة في الحتة دي بالذات كانت بتناقش في قضية عمال المصنع ،وفي ما آل اليه حال نقابة العمّال ، الكلام دا صريح وواضح في ( وينا نقابة السجم الشوم ،وين عمال السكة رماد ؟ ) ،، لا بد أن يستدعي النص الشفيع أحمد الشيخ الذي افتقد بدره في ليلة ظلماء كالتي تحيط بعمال هذا المصنع . ولامن تصل لقمّة الغليان والسخط تهتف ست الدار : بعتو (شفيعكم) يا عمال بعتو وجيعكم للراسمال وشن راجيين يا تعسا الحال هاكم دي... والله مهازل ميتين عامل ؟ والله عمايل وما تنسى يا الجيلي - وماك ناسي أكيد - تربط الكلام دا بي مفردات الرأسمالية والأمركة في مواضع عديدة في القصيدة ( الرأسمال / كان الوفد دا أمريكاني / العربية الأمريكية / مو المكنات الأمريكية ) . وشفيعكم يصبح الشفيع أحمد الشيخ بالضبط في : البوليس يهتف شيوعية ، وفاكر نفسو ينبّذ فينا ، أيا يا بوليس أمّك مسكينة . فيما يختص بدلالة اسم راشد ، أنا ما فاصلو أبدا عن السياق العام للقصيدة ، وشايف انّو دلالة الاسم هنا ما بتنفصل عن جو القصيدة العام ، الترميز باسم راشد وإيراد صفاته ذاتها تمر مرورا لطيفا بفضاء النص ، وتجعله متماسكاً أكثر ، يا الجيلي النص دا بالذات ما بيدّي مساحة كبيرة للإفلات من رسالته المباشرة ..دا نص أنا بسمّيهو (فش غبينة ) ، لا يصلح إلا أن يكون إلا بهذه الطريقة .. وقصيدة رسايل ست الدار من جيل قصائد المصادمة عند حمّيد ، كقصيدة ياموج البحر الأحمر : ياموج البحر الاحمر سميتك قاسم امين كتلوك الناس القصر الناس المأفونين الناس البالا مغطي والساسة المبيوعين كتلوك خدم الراسمال يازول ياعاتي يازين الفرحو الامريكان والربحو تجار الدين كتلوك وكان قاصدين في ذاتك ناس تانين ياعادي كما العمال ___ ألف تحيّة . |
اقتباس:
يلا ياطيبان وياريت لو جبت معاك أسامة معاوية . |
طيبان يازول مبسوط عافية المنطق,
ربط حديث حميد بالارث اليسارى والنضالى فى مسيرة الشعب السودانى أمر يكرس ل(سجن المعنى) ...واكثار ربطها بالرمز الشيوعى يجعلها تبدو حجرآ عليه, وعلى تفسير الكلمات ودلالتها "الليلية متلح ليك كلمة دلالتها دى تليحة بى مزاج":p.. ليس من شئ أكثر ابهارآ فى شعر حميد أكثر من تطويره لصورة الشعر فى المخيلة الشعبية .. هذه المخيلة شعبية التعبير, ومحلية الكلمة ..وكونية الفهم والهضم حميد ليس بحوجة لشرح فى المعنى حميد عالم من الدهشة بشهيق عالى ومدوى .. |
| الساعة الآن 04:25 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.