(قائد الأسطول - كلمات سيد عبد العزيز) لحن وغناء سرور .. غناها أيضا فنانون أخرون .. هذه الأغاني التى تترك انطباعاً أدبياً حاداً كثيفا لدى السامع لها .. فهى ملتزمة ما لا يلزم من القوافى .. بجانب انها مشطرة فى مقاطع ست تتماشى وروح العصر.. غير أنها كانت فى حينها نقطة تحول جادة للاغنية السودانية فهى رمزية اتخذت ستاراً لتوصيل شحنات سياسية علت الذهنية السودانية من جراء الاستعمار الإنجليزيى فكانت خطاباً مباشراً للسلطة.. وأسئلة.. إنها العلة والمعلول بكل مضامينه.. وفوق كل شىء إنها اغنية متميزة.. وشاءت أحداثها الغنائية أن تميزها فى عصرنا فكانت السلم الذى خطا عليه الفنان ( بادى محمد الطيب) : يا قائد الأسطول تخضع لك الفرسان ياذو الفخار والطول أرحم بنى الإنسان مين لسماك يطول ما يطولك اللمسان معناك شرحو يطول والله يا إنسان أصدق كفانا مطول ياذو الحسن إحسان أنا عقلى بيك مختول والناس عقول ولسان ما بنكر المعقول آمنت بالأيمان بالطلسم المصقول بدل لخوفى أمان بالنور سحرت عقول كانت صميمة زمان يا من تحق القول قتل النفوس حرمان وما الجندى والمكتول و طالب الغفران من أيدو راح منتول وأتوهد النيران فاقد الصواب مبتول مما رأى حيران أصبح زهر مشتول وفاح ملا الجيران يا علة المعلول كم أومى ليك بنان كم من أسير مغلول مالاقى فى لحظة حنان يرى وعدك المحلول زى حجة الوسنان والكان سكونو تلول ما ببدلهم بجنان يا حبيبي كون ممهول وليكون ماكان الفى غد مجهول والماضى أسمه الكان نفديك شباب وكهول ونبقى ليك أركان فى حبك المأهول ونخدم السكان يالفى سماك مفصول تنشاف عيان وبيان ما عرفنا ليك وصول وما دنيت أحيان إنت الخطاك أصول يعلم الديان مثلت فينا فصول ما بدرسها النسيان |
أخ شبارقة لك التحيّة البوست ده جميل جداً واصل فيه رحم الله الشاعر مسعد حنفي والتحية للعم فتحي وكل أفراد الأسرة |
اقتباس:
الأخت قمر دورين لك التحية وشكرا ً على الدعم المعنوي ... وح نواصل بإذن الله . قالوا الشاعر سيد عبد العزيز كان ماشي (ومعه أحد الشعراء) في الطريق وفي أثناء ما هم ماشيين فتحت واحدة من البنات باب الشارع حقهم وكانت تظن أن الشارع خاليا ً من المارة .. وفجاة شافت الشاعر وصاحبو ..فقامت قفلت الباب بسرعة وإدسـّت وراهو .. خجلانة لأن أحد غريبا نظر اليها (الزمن داك البنات كانن بيخجلن من الرجال:)) ... أها عمنا سيد عبد العزيز وصاحبو أتاريهم شافوها (بالرغم من حرصها الشديد على ألا يشوفوها) ... أها طوالي عمنا سيد قال لصاحبو : حاول يخفي نفسو.. قام صاحبو قال ليهو : وهل يخفى القمر في سماهو ؟... عمنا سيد قال ليهو : أبدا ً وطبعا ً لا .. شفناهو شفناهو ..... وكانت بداية القصيدة التي أكملها عمك سيد في نفس اليوم ... وقام الفنان سرور بتلحينها وغنائها . حاول يخفي نفسو وهل يخفى القمر في سماهو أبداً وطبعاً لا شفناهو شفناهو ******* حاول يخفي نفسو وغير اتجاهو سطع النور في أفقو وكل إنسان رآهو خلنا البدر أشرق كامل في علاهو وخلنا الزهر فتح من أنفاس شذاهو ****** جذاب حسنو رايع لادن خلقو مايع رقص البان مشيهو تحب تنظر وشيهو عيونك تختشيهو من قوة ضياهو ومن شدة حياهو ******* مرة إذا نظرتو ونظرو ليك رناهو قلبك ينشرحلو وترتاح لي لقاهو دون تشعر تحبو وتلهج في ثناهو ******** كل وصف تراهو أقل من مستواهو مترفع عظيم عالي بعيد مداهو ملأ العين جمالو الزاهي رشح نداهو يلالي والكواكب تتناثر حداهو فيه الحسن أودع ما ملكت يداهو ***** مفرح وشوفتو تفرح بتلقاك باسم كالزهر المنسق في زمن المواسم تشوف في مقلتيهو حياة دلالو وتيهو واللحظ البجرح والوجد المبرح أنا من دون أصرِّح قلبي اصطفاهو وهسه هناك معاهو |
ابو البنات
وجيب لي الطيب من جناين اسيا وانعش روحي بوست منعش وعبقو يفوح |
اقتباس:
أووووو بت الشيخ ... بت ملوك النيل معانا بي جاي ... بت ملوك النيل (كلمات سيد عبد العزيز) أغنية نسيم الروض كتب كلماتها الشاعر / عمر البنا في 1936م (كان في بيروت) وكان يشعر ويحس بنار البعد والغربة وشوق لأهلو والصحبة والمحبوبة (آسيا) يا نسيم الروض زورنى في الماسيه وجــيب لي الطيب من جناين آســيا وأنعــــش روحي من الـــم البين حنكمل القصيدة والقصة إن شاء الله لمن نجي للشاعر الكبير/ عمر البنا شكرا ً يا بت الشيخ. |
من حور الجنان - كلمات سيد عبد العزيز من حور الجنان أم أنت إنسان الكمال هل أنت الملاك جيت تورى الناس الجمال سبحان من نشاك حسنه وفى غاية الكمال يهواك الجنوب وإليك ينقاد الشمال وما أظن يحصوا حسنك لو يحصوا عدد الرمال بى إيه يقدروك يا ملك ملوك عصر الجمال سلطان بهجتك محروس بجيوش الجلال ويغار من صفا حسنك صفا ماء الزلال فى مراية خدودك أشوف تأكيد سحر الحلال وأشوف فى سما حسنك كل يوم يسطع هلال صفا ماء الجمال فى مجال جمالك راق وجال زى ماء الحياء فى عيون ربات الحجال ما فعل السلاح تفعل عيناك النجال مكسور الطريف كسر قلوب الرجال يا خلاصة المعانى الصار معناك موضع مثال فوق المحسنات حايز لطف وكرم خصال آلهة الجمال اعترفوا ليك ما ليك مثال وتتمنى البدور تقبيل يداك بى امتثال يا طايل الوريد يا أهيف يا اللى خصمه زال فيك منظر يحنن وفيك منظر فارس النزال ليك من الغزالة جبين وقاد وعيون غزال الحور من مناصبها لى قدرك تكتب نزال يا الغصن الرطيب عاجبنى فيك الإنهدال اللادن قوامك من ملبن وذو اعتدال جوهر حسنك الصافى وسيرك طاهرات عدال آيات بينات ما فيهن للكافر جدال شاركت الغمام والموج مناظر وارتحال شاركت الظباء فى نفرتن والإكتحال شاركت القلوب فى موضعن وعلى كل حال نفداك بالنفوس وفداء النفوس كان المحال |
يا بت ملوك النيل - كلام/ سيد عبد العزيز يا بت ملوك النيل يا أخت البدور مين لى علاك ينيل فى البدو والحضور الجبرة فيك بتخيل محمية الحما الما حام حداه دخيل ما كان أبوكى بخيل بت عز الرجال أهل الدروع والخيل الهنا... والسرور يا السامية ست الجيل طرفك من حياء فى عصر السفور خجيل حسنك وضع تسجيل فى صحف الدهور يتلوه جيل عن جيل لى يوم النشور الهيفا يا الخنتيل حروف آيات محاسنك أرتلن ترتيل يعجبنى فيك تمثيل أخلاق الملاك فى سطوة القتيل الفارس الجسور غصنك رطيب وعديل شعرك ليل جبينك يخجل القنديل النور عليكى سديل يا معنى الجمال الما أتوجدلو عديل فى ناس ولا حور فقتى الكانوا قبيل ما خدات فى الجمال جائزة نوبيل حيرتى كل نبيل عيناك سحرهن يسحر سحر أبابيل يخترق الصدور يا صاحبة الأكليل ما أظن النهار العين تدورلو دليل محياك نورو جليل كنت أقول شمس لو ما الزمان كان ليل أن عليك نور لا زلت ليك أميل يا رمز السعادة الما أتوجدلو زميل يا آية التكميل يا مراية الجمال الفيكى كل جميل ريحانة العصور [youtube]http://www.youtube.com/watch?v=rcTFkSfY0kM[/youtube] |
يا أنة المجروح - كلام / سيد عبد العزيز يا أنة المجروح يالروح حياتك روح الحب فيك يا جميل معنى الجمال مشروح للحب زناد فى الجوف زى الزناد مقدوح منه الجبابرة تلين لصوت بلابل الدوح وتصاحب النسمات تفضل معاها تروح بين نغمة الأشواق ومحاسن الممدوح الناس تحب رؤياك بالخاطر المشروح يا ملفت الأنظار يابسمة المفروح وانا أهدى ليك الحب حب من فؤاد مجروح حب الشحيح للمال حب الجبان للروح سورية فى السودان بحبى ليكى أبوح عنب جناين الشام أتمنى منه صبوح وانشد فؤادى الضال بين الرياض مذبوح وأرى الهلال فى ظلال تلك الخميلة يلوح أنا لو ضمنت رضاك أكون سعيد ممنوح يا من تسر رؤياك تفرح وتنسى النوح تكسى النهار بجمال خديك جمال ووضوح منه الغزالة تقيف فى موقف المفضوح من الوله للقاك دمعى الغزير مسفوح ناقم على الأيام مع أنه طبعى صفوح انا والخيال فى جدال وانت بنداك منفوح كل ما النسيم يغشاك زى الحديقة تفوح رايق كحيل نعسان انسان رقيق وجموح ساحر العيون بجمال فى سواك ما ملموح ان كان تميس بنميس ان كان تموج بنموح عدل الطبية جعل جور الحبيب مسموح [youtube]http://www.youtube.com/watch?v=Qpr-But799k[/youtube] |
قلنا الشاعر / سيد عبد العزيز كان شغال في النقل الميكانيكي بالخرطوم ... أها الخواجات قاموا نقلوهو إلى مدينة الأبيض (غربة عديل كده في الزمن داك) ... أها قام الشاعر الفذ / عبيد عبد الرحمن (نديد سيد عبد العزيز وتؤام روحو وصديقو) شعر بفقد وغياب سيد فقام كتب قصيدة خاصة لسيد هي (رسائل *) المشهورة بحبيبي أكتب لي وأنا أكتب ليك بالحاصل بي والحاصل بيك التي تغنى بها المبدع / إبراهيم الكاشف. * معظم الناس وأنا منهم كانو فاكرنها مكتوبة في محبوبة ... طلعت لراجل :) |
قبل ما نواصل حديثنا عن الشاعر سيد عبد العزيز وإلقاء بعض الضوء على بعض قصائده ... دعونا ناخد إستراحة صغيرونة ونديكم مسابقة بسيطة عن الشعراء (البفوز فيها يختار هديتو براهو) .... الشاعر المرحوم صاحب الصورة النادرة أدناه ... من هو ؟ |
اقتباس:
للمساعدة :- 1- حلفا (الجديدة والقديمة) 2- يقظة شعب [youtube]http://www.youtube.com/watch?v=z6_uN4pg8Zo[/youtube] |
(غصباً عنك يلفت نظرك) كلام / سيد عبدالعزيز طبعا ً دي آخر أغنية لحـّنها وغنـّاها الكاشف وسجلها للاذاعة في عام 1969 (نفس عام وفاته يرحمه الله) الأغنية دي ليها قصص وحكايات: القصة الأولى على لسان الشاعر سيد عبدالعزيز نفسو حيث يقول : في يوم جمعة وأنا وأصدقائي العبيد وخالد نسير بسوق أمدرمان وكان مملؤاً بأشكال وألوان الحسان من كل الأعمار وإذا بواحدة بارعة الجمال ... لفتت اليها كل الأنظار رجال ونسوان .. كبار وصغار .. وعند ذلك قلت مخاطباً أصدقائي بصفة لا شعورية (غصباً عنك يلفت نظرك) وأكملت المطلع .. والحكاية الثانية التي تتعلق بلحنها وغنائها يقول عمنا سيد : الحقيقة ما كانت هذه الأغنية للكاشف بل لأحمد المصطفى وكنت قد وعدته بها وبعد استلامي لها من لجنة النصوص سلمتها للكاشف ليسلمها لأحمد المصطفى وبعد كم يوم قابلني الكاشف وعرفني بأنه لحـّن الأغنية وح يغنيها، قلت ليو : ليه ما سلمتها لأحمد؟! قال لي :أحمد تنازل لي عنها، قلتلو أنا ما راضي، قال لي: على كيفك ترضى أو تغضب. والرواية الأخرى ذكرها السر أحمد قدور ... قال: سيد عبدالعزيز جاء يفتش عن أحمد المصطفى في دار الفنانين وما لقاهو ... أها الكاشف شاف عمنا سيد بيسأل عن أحمد المصطفى قام قال ليهو : دايرو في شنو يا سيد ؟ قال ليهو: داير أديهو أغنية فطلب منو الكاشف أن يقولها لهم ... وبعدما عمنا / سيد قرأها قام الكاشف قال ليهو : بالله ده غناء ده وأشار الى آخر أن يطلب من سيد عبدالعزيز قراءتها مرة ثانية، ثم اشار الى ثالث أن يطلب من سيد عبدالعزيز قراءتها مرة ثالثة وبذلك كان الكاشف قد أتم حفظها ثم قام بتلحينها. غصباً عنك يلفت نظرك مهما تحاول وتأخذ حذرك تصبح عاشق ... غصباً عنك طعم شوفتو يحلو في نظرك وتفرح جدا لو كان نظرك تفتكرو ملاك انتظرك في مناظرو يتمتع نظرك تقول ليه ومنشرح صدرك الحسن كلو اتفصل قدرك البدر شفناهو نورو في بدرك لا ما اطـّاول قدرو لقدرك إن يوم في العمر الحظ نصرك وفي نعيم حسنو أتمتع بصرك تصبح أسعد أبناء عصرك وتملأ عيون كل من بصرك أنت في قربو تأمن دهرك يا محظوظ يومك وشهرك حلو الدنيا يجري في نهرك وأيامك باسمة وزهرك أنت في قربو الناس تعتبرك الموفق وأسعد وأبرك بالنعيم اتعوض صبرك والشباب العاد في كبرك |
يا سلام عليك يا شبارقة..
متابع البوست التوثيقي الجميل.. تحيّاتي.. |
اقتباس:
شكرا ً يا الرشيد على المتابعة وعلى الدعم تعرف يا الرشيد معظم الناس بيكونو سمعو الأغنية الوطنية (يقظة شعب) لمحمد وردي أو على الأقل بيكونو سمعو موسيقاها التي كانت مقدمة برنامج إذاعي شهير إمتد لعشرات السنوات ألا وهو برنامج (دكان ود البصير) ولكنهم قد لا يعرفون الكثير عن صاحب الكلمات. مرسي صالح سراج هو من أرقين *- حلفا القديمة ثم حلفا الجديدة ... الحلفاويين كانوا وما زالوا بيعتزوا جدا ً بحلفا وعندما أجبروا على الهجرة في بداية الستينيات كانوا بيقولوا : حلفا دغيم ولا باريس .. وحلفا أرقين ولا برلين ... وذلك عندما ناس عبود قالوا ليهم : حنوديكم لمكان جميل ونعوضكم عن وادي حلفا . مرسي صالح سراج لم يكن شاعرا ً فحسب بل كان صحفيا ً وناقدا ً رياضيا ً وفنانا ً تشكيليا ً ... عمل لفترة من الوقت مستشارا ً لوزارة الإعلام بالرياض - المملكة العربية السعودية ... لا أعرف تاريخ ميلاده بالظبط ولكنني أعرف أنه إنتقل إلى الرفيق الأعلى وهو في ريعان شبابه في سنة 1967م ... وكانت وفاته بلندن التي ذهب إليها مستشفيا ً ... يرحمه الله. * أرقين و دغيم: أسماء لأحياء أو قرى .. في حلفا الجديدة يطلقون أرقين على مجموعة قرى متقاربة في الجغرافيا (قرية 5 وقرية 8 وقرية 11) ( يَقِظَة شَعْب) كلامات : مرسي صالح سراج ... لحن وغنا: محمد وردي http://www.sudanyat.org/upload/uploa...SSSJJJJJhh.JPG(الشاعر المرحوم/ مرسي صالح سراج) هامَ ذاك النّهرُ يستلهـمُ حُسنا فإذا عبْرَ بلادي ما تـمنّى طرِبَ النّيلُ لَدَيْها فتثنَّىَ فأروي يا تاريخ للأجيالِ عنـّا * ( * محمد وردي كأنو ينطقها أنّا) ... حسب سمعي :) ***** ثائرٌ إذ هبَّ من غفوتِهِ ينشدُ العلياءَ في ثورتِهِ كاندفاع السّيلِ في قوّتِهِ عجباً مَن لهُ جندٌ على النّصر يُعين كُلُّنا نفساً ومالاً وبنين ***** نـحنُ في الشِّدَّةِ بأسٌ يتـجلَّىَ وعلى الوُدِّ نـضُمُّ الشّملَ أهلا ليسَ في شِرعتِنا عبدٌ وموْلَىَ قسَماً سنرُدُّ اليومَ كيدَ الكائدين وحدةً تَقْوَىَ على مَرِّ السّنين ***** قلْبُ إفريقيا بِوَعْيٍ نابِضِ حَلَّ مِنّا بالـجّنوبِ النّاهِضِ مِن عدو الغابِ بِلَيْثٍ رابِضِ قِدَمَاً هي كانت جنّة المستعمرين مالـَهُم منها تبارَوْا هاربين ***** نـحنُ أبناء ملوك في الزّمان توّجوا الفونج وزانوا كردفان أفسحَ المجدُ ليهم خيْرَ مكان نسباً نِعْمَ أجدادٍ بِهِم يزهو جبين خُلُقٌ يسمو وعَزْمٌ لا يلين ***** شرقـُنا يوم اللقاء كيفَ سعَىَ حينَ داعي البذلِ بالرُّوحِ دعا كيفَ بالسَّيْفِ تحدَّىَ المِدْفَعَا ودِمَاً بذَلوها ثرّةً لا تستكين للخنا للقيْدِ للعَيْشِ الـمُهين ***** حِينَ خَطَّ الـمَجْدُ في الأرْضِ دُرُوبَا عَزْمَ تِرْهاقا وإيـمان العروبة عَرَبَاً نـحنُ حملْناها ونُوبة بِدِمانا مِن خلودِ الغابرين هُوَ يحدونا إلى عِزٍّ مُبِين ***** هـَمُّنا في العَيْشِ إقْدامٌ وجُود وعنِ الأوطانِ بالمَوْتِ نذود لِنَرَىَ السُّودانَ خفّاق البنود وغَدَاً سوفَ يَعْلو ذِكْرُنا في العالمين فعُلُوَّاً كان شأنُ العامِلين |
اقتباس:
فأروي يا تاريخ للأجيالِ أنـّا كثائرٌ إذ هبَّ من غفوتِهِ ينشدُ العلياءَ في ثورتِهِ كاندفاع السّيلِ في قوّتِهِ ... حتي يستقيم المعنى ... والله أعلم. |
| الساعة الآن 05:50 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.