اقتباس:
قلت لي التكل بيبنو في الشارع عشان كدا قال اتعارض طيب دي كنا نفهمها كيف معناتو في كتير من تفاصيل الجمال فايتة علينا ياريت لو تجتهد مع اختنا ماريل في ابراز تلك التفاصيل كي يوضح جمال التصوير الذي اراده الرجل لكن معناه حميد دا كان موغل في المحلية تحياتي لك ولماريل |
اكرم المهاجر
تحياتى جاياك كان الله مد فى الايام بس شيل معاى حبة صبر شكرا لمرورك |
اقتباس:
وصدقتى فى اى كلمة قلتيها فى حق الزول(العوض) ما قصر وما تقصر بيهو الايام |
مرق الحلم
ايوا بحبك حبا جما وياما بعزك يا نادوس وساقات حنك فيهن منك ومنى المشق والقادوس يا ضرا مرق الحلم الواحد من شرا ريح الزمن السوس خيل العشق الخابى تناهد جايى تشوفك وانتى عروس فاله هدير الناس الصاعد يطوى هجير الاسف البوص ضمى عليها حنان الساعد جمى حشاها الهردو البؤس خلى غنانا البات منباعض يغرز يدمى الليهو يدوس يبعد عنك شر العارض كلما نقرب يا نادوس وكل البفهمو فيك يا بلادى وهادى الدنيا وساس يسوس البى غادى الشاق الوادى يبقى تركتر مو مجروس يمة كفانا...بلد جبانة ودود الافة الفيها يلوص دايرين نحيا....ونربى جنانا زرعة عينة وماهو بروس كل بلد ترفع تبانة ونبنى العالم بيت جالوص لافى نخيلا تطرشو دانة لامن لغما تحت ابنوس وتبقى الدنيا صحيح دنيانا والبنى آدم دون كابوس ................ وتلك النار الهاردى حشانا نار الشوق لى ام بتعوس ام الناس العلت شأنه بى عود شمعة وخيط فانوس نارنا عشق والله ادانا قلبا وافى وصافى نفوس وياما نفسنا طويل وخطانا قدر مسافتك يا نادوس **************************** ساقات:سواقى اى جمع ساقية المشق والقادوس:من اجزاء الساقية المشق هو الخناق والقادوس هو الاناء الذى يحمل الماء من النهر ضرا:من الضروة وهو ما يمكن ان يحمينا من العراء المرق:هو اكبر ركيزة فى سقف الحجرة الخابى:المسرعة تناهد:تتسارع انفاسها فاله:التفاؤل يطوى:يلف البوص:عيدان القصب المجوفة جمى:ريحى الهردو:تآكل و تفتت منباعض:ليس مثل بعضه البعض اى بمعنى مختلف عن بعضه ساس يسوس:يقصد بها السياسة مجروس:عربة من عربات الجيش جبانة:مقابر يلوص:يتحرك بلا توقف زرعة عينة:هى الزراعة التى تتم فى موسم نجاحها ونجنى منها على الاغلب ثمر ومن ثم علف بروس:هى الزراعة التى لاتتم فى موسم نجاحها ونجنى منها على الاغلب علف فقط تبانة:هى كرات الطين التى يتم تجهيزها لبناء بيوت الجالوص تطرشو:تضربوا |
اقتباس:
ماريل كونى قريبة بهذا البوست :) منكم نتعلم ودى الذى تعلمينة |
سوقني معاك يا حمام ..
سوقني معاك يالحمام ... ... سوقني محل ما الحبيبة قريبة تراعي الغرام غريبة الأشواق حبيبة يجيبا منام في منام ... ... سوقني محل ما المحنة أيادي تقطر سلام سماحة الحياة فوق أهلنا وبلادي تقرقر وئام ... ... غلابه وأمان مو الطيابة ضكارى بصارى وكرام حباب الحبان في بابه وتدخلوا عليّ الحرام فقارى ولكن غنايا غنايا بهذا الغمام بهذا النيل كم تغايا وتيرابا النرميهو قام ... ... إرادة القمره البتقدر براها تضوي الضلام شعاع شمشاً ياما خدّر وإذا يبَّس لا يُلام ... ... فيابا خرابا الحرابة وخرابة فكر سوسي سام خرابة الكل نفسو تأبى عقابه .. تلِم عم سام ... ... ولِيد مخلوق للقرايي خزين مدخور للجِسام تتمر نيتو التخايي إلاما مذهلل إلام درب من دم ماب يودي حرِب سُبّه .. حرب حرام تشيل وتشيل مابِ تدِّي عُقب آخرتا إنهزام ... ... بطانة الشيطان قديمِة وبعد دا منو العرشو دام إذا الإنسان ما لو قيمِة علي إيش خلَّفُو سام وحام ... ... تعالوا الدم ما هو مويةِ ولا ها ترايي المسام خبارى بحمر فى أخويا وطراوة الخوة إبتسام ... ... تعالوا نحانن بعضنا تعالوا نحانن بعضنا نخل قلبو على التُمام نبضنا يشهل أرضنا وأرضنا تجِم العضام ... ... تعالوا بدل نبني ساتر نخيب ظن الصدام نطَّيب للعازه خاطر نقوم لأطفاله سام ... ... أخير كرّاكةً بتفتح حفير وتراقد الركام أم الدبابة البتكشح شخير الموت الزؤام ... ... تعال لي غابتك يا خيرا تعال لها يا أسده الهمام بدل دوشكة يغني طيره محل قنبلة عش نعام ... ... بلد صمَّي وشعب واحد عصية على الإنقسام أبيه وبكراها واعد صبية ومشهاده تام ... ... بساط أحمدي كم يشيلنا وتشهِّلنا على الدوام نَقِل ليلنا تقوِّي حيلنا ودليلنا تمام التمام ... ... نلقّم سقف المتاهة نجم هدّاي في الضلام ونطعِّم حرف النزاهة لإيلافك يا حمام ديموقراطية وأمان سوا .. سوا عالين مقام مواريثنا المن زمان محصَّنة في أروع نظام ... ... بريدك يا زول بريدك بعشقك حتّى الهيام أريحيتك عد تزيدك مهابة وليك القيام ... ... عهدي معاك يا حمام حبِيْب الرُسل الكرام رسول الأمراء العظام عصامي على ما يرام ... ... ماب تهدِل في خنادق ولا ب تقدِل فوق حطام ولا ب تنزل في فنادق وسطنا مراعيك قُدام ... ... فيا ملدوغ من أديس معوَّق في كوكدام تعال عمِّر فينا ميس كفانا طشيش الكلام جناحيك جنوب شمال وأمش طوِّف يا حمام محِل غصن العزّة مال عليك وعليهُو السلام حكيم الطير يا مهبِّر شُراكة القَتَلة اللئام متين بإسم الحق تكبِّر وبالرحمة تصلِّي إمام ... ... فلاحة العالم تعمر محبّة مودة ووئام يقص الايد التدمر تشمِّر ساعد السلام ... ... سوقني زمن كُلُّو عافي نتاجو عِلم خيرو عام بري آيمة من المنافي وطن وافي على الدوام ********************** |
اقتباس:
ليس هنا من معلم غير الحبيب حميد الذى استعجله الرحيل كأنما تضيق هذى الدنيا عن تحمل رؤاه وقيمه اما عن الود لك مثله وربما اكثر بكثير |
عودة الى رحاب الحبيب(حميد)
واسال الله له فى هذا الشهر الفضيل الرحمة والمفغرة......... |
عيوشة عيوشة
عيوشة منبوشة نبشوها قبالك بت حاله زي حالك عودا انبهت حرقان زي شتلة معطوشة عينيها رماشة ام لمبة فتاشة من طاقة جات الريح كتر البكا التجريح خلاها دعموشة عيوشة عيوشة تلوشة والله ضفاف خيم عليها جفاف زي صرخة الغرقان فوق موجة بين فيضان شعراتها منفوشة شفع مبارياها عيوشة عيوشة الليل هديماتا وشمش الله برطوشة تشرب من الشارع وتاكل من الكوشة شفع مبارياها عيوشة عيوشة ترقصلهم رقبة صقري جابودي السامبا كاروشا عيوشة جامايكا اسلولي عيوشة عيوشة ماب ترقص عيوشة ماب ترقص لكنها الدوشة تفلت من الشفع في الفلتة تنترتع تدخل علي بيتا ستاتو منمدي ناسا بعرفوها لكن يعافوها دايرين غسيل عدي شاكرين يا دقلوشة يدوها عيشاى بي دمعة مرشوشة وتنملك الشارع خطواتا مربوشة في السوق مع الاطفال عيوشة عيوشة الليل هديماتا وشمش الله برطوشة تشرب من الشارع وتاكل من الكوشة علي قدر ما كاست عينيها مالاقات غير مطبقة وبصلة المطبقة انهردت والبصلة مقروششششششة يا جرحنا الحايم يلبد اذا ماشاف صحبانو مكشوشة يضحك اذا الكومر قبل علي كوبر والله المديري يمطق الفرحة بس فرحة مغشوشة ان تنجا من كشة تلتيل ودريرة كيف تنجا من جوعا من بردها وليلا عزت برنداتا واوكارا مطروشة بيت الله قافلنو المستشفي غافرنو ساحتا مرشوشة كم كم يوم يعز النوم رغما عن المشموم والدوخة والدوشة دي مدينة ما هيلك مافي البيشبهلك ومافي البخاويلك غير ناس احاويلن قطعت احاويلك اصحابك الساعتك لابد يعاينولك صمتا يجيبولك باكر تلاقيهم فوق وجبة فوق كوشة جنب مجري يحكولك ودونا لي ضابط كالعادة وانكفرن قال وين اوديهم والعندي ماقادر بالموية اكفيهم والعسكر ادونا سيطان وفكونا كالعادة يا اخونا حيكومة مربوشة دايرين شغل مافيش غير نغسل العربات غير نضرب الاورنيش حمالة جرسونات شغلا ما ياكل عيش وبالحالة دي الكشة بلديه والبوليس ومرات يجيبو الديش مايقبضو الباعوش مايقبضو الضبان الماب يدور فتيش الارزقي السمسار اش معني نحن وليش نحن الحرامي والله البدسو العيش الزول يخاف يكفر يرجع يقول معليش معليش يا عيوشة من تكبر اه واه وادم يريد حواه الطيرة بي عشوشة والفارة بي جحاره الكل بي ماءواه وهنا في ابن ادم تاه ملجاه ارض الله لا اوضة لا حوشة عيوشة عيوشة لااوضة لا حوشة مسكيني عيوشة ....................................... منبوشة:هى مفردة مصدرها(نبش)اى البحث عميقا داخل الاشياء ومنبوشة تعنى ان الناس يعرفون حالها ويتحدثون عنه عودا:المراد هنا جسمها معطوشة:اكثر مراحل العطش دعموشة:صارت تعانى خلل فى الرؤية تلوشة:الشفاه(وهنا تتجلى براعة حميد فى الوصف عندما شبه شفتيف عيوشة بالضفاف الجافة والتى يصبيها التشقق وكانت هذه حال عيوشة من جراءاصابتها بالجوع والعطش) دقلوشة:مفردة تقال للطفلات الصغيرات كنوع من ابدأ المحبة والاعجاب مربوشة:على غير هدى انكفرن:زهج واغتاظ وظهر ذلك جليا فى ملامحه وسلوكه |
ماريل
ربنا يفتحها عليك دنيا و آخرها اقتباس:
البروس هو ما يقوم دون أن تقصد زراعته .. و منها ما يقال ( قايم بروس) .. و بعض المرات يكون مدحا .. للبنت التى تربت على طبيعتها .. و مرات يكون ذما بأن لاأصل له أو غير مقصزد نموه و لكنه نما مع سفاية الآخر و المصريين يقولون ( عشان الورد ينسقى الــ ) |
اقتباس:
شكرا كتير على مرورك الجميل تعرف يا استاذ مسألة نشرح مفردات عامية دى صعبة شديد لانو ذات المفردة قد يكون لها معانى تختلف حسب البيئة وانا هنا معنية بالبيئة التى نشأ فيها شاعرنا حميد .... (بروس )حسب ما متوفر لدى من معلومة هى كما شرحتها وذلك لا يمنع ان تتطابق ذات المفردة مع ما تفضلت انت بشرحه رغم انى ارى ان شرحك اقرب للصواب واحتمال صواب الشرحيين ايضا جائز............ و لك الود اكمله |
ماريل يا حبيبة
انا قلت ناقص و كملتو ... ما قلت صواب و اقرب الوحيد الممكن يقول صاح و غلط هم الرويس احوان ( عكودوالزول) أنا شمالى تركيب تايواني .. |
[QUOTE=ماريل;448553]جية الشليل
المترة:هى الارض الزراعية التى لا تشرب من النيل مباشرة قد تشرب من الابآر [hr]#a88888[/hr] الاخت ماريل كل الشكر لهذا المجهود الرائع .. احسب ان المترة هي البئر التي يسقى منها وليس الارض التي تسقى ؟؟ مرة اخرى اعانك الله ورحم الله حميد بحجم ما اعطى من جمال |
اقتباس:
يكفينى مرورك وكمان ال100 اغنية بتاعت مصطفى سيد احمد تسلم يا تايوانى |
[QUOTE=علاء ابو حريرة;473036]
اقتباس:
المترة تطلق على البير التى تسقى منها الزراعة كجزء يراد به الكل (والكل هى البير والارض) وقد قال ذات الحميد: وراء طرف الحقاب كان روض وكان بيناتو خاوى غدير وهادى الصحراء كانت غابة بى شدرا الكتير وغزير صباح وهجير يهبهب ناز حلاته وفرفرات الطير وكت يغشاها مرة رذاذ قطيع غزلان نعام واسود سعية الله تخوجل فى بلاد السود بلود وبلود دليبن راز متر مد البصر جنات خدر رباها تور الساقى حرقت حين جاء بابور جاز لك ان ترى هنا ان حميد يقصد ب(متر)الاراضى ذات نفسها فهى تمتد مد البصر خضراء كأنها جنة شكرا كتير ابو حريرة |
اقتباس:
تحياتى ماريل ورمضانك كريم كلامك صاح المتره هى البئر وتسمى الارض التى تُسقى من البئر ايضا متره |
تحياتي ماريل ؟؟ معلومة انه المترة مقصود بيها البير اخدتها من جدي رحيمه الله فقد كان له ارض قبالة قرية الكباشي من لا تحت وكان رحيمه الله حين يخرج متوجها صوبها يقول انا ماشي ادور المترة ويعني بذلك البئر ؟؟ وان كان ذلك لا يقدح فيما ذهبت اليه فا المفردة عند حميد رحيمه الله عوالم بحالها وتقبل كل المعاني ؟؟ عن نفسي لم اجد مفردة تصف دلالة المعنى المقصود كقوله قي مصابيح السما التامني : تنقش تنقش ..عذرا ان خانتني الذاكرة
|
اقتباس:
شكرا على مرورك وتأكيدك للمعلومة |
اقتباس:
المترة فعلا يقصد بها البئر وبابور البير والارض المزروعة المهم يا سيدى هى فعلا كلمة تطلق على الجزء وعلى الكل (انت يا ابو حريرة جدك ما كان بقول انو ماشى المترة وهو قاصد تماما انو ماشى للارض ؟؟) اما تنقش تنقش فهى: تنقش تنقش فوق ارض حجر لفيت لفيت دخ بالسيسيق يا جاو وسجر يا نخل طوال وانا رجلى عضير انا نفسى قصير من شرب الشيشة البنقو القات سف التمباك لف الحب شاى فى ورق قصدير برد الاحراش حر الزنازين من يسقط وعاش اضرب بى ايدى قربت اطير ............................ ............................ مرحب بيك مرات ومرات هنا يا سيدى |
العزيزة / ماريل
التحية و القومة ليك. وكأني بك تنسجين خيوط أحزانك علي فقد شاعرنا المبدع حميد و تصنعين منها هذا العمل الإيجابي الرائع. الله يديك العافية. و يقيني أنك قادرة علي تطوير الفكرة - و لو في بوست آخر - بإنتقاء بعض قصائد حميد و إستعراض الصور الجمالية فيها خاصة المرتبطة ببئة الشاعر. يعني التعميم من شرح المفردة إلي إلقاء الضؤ علي المعاني و المشاهد التي يصورها البيت أو المقطع أو القصيدة ككل. دا بوست مميز بالجد وتسلمي |
اقتباس:
امبارح لمن رفعت البوست ده وبديت اكتب فيهو تانى فكرت بينى وبين نفسى ن ف ف ف ف ف ف ف ف س فكرتك دى اى والله وقلت حاجيب مقاطع واشرح الصورة الجمالية القصدا حميد فى المقطع المعنى خصوصا لمن مريت على المقطع البقول فيهو(مشهادة تام) قلت يا سلالالالالالام ياخى شوف حميد صور لينا الجمال ده كيف يعنى شدة ما حلوة لمن بقت فى تمام المشاهدة يعنى مافيها اى شئ ناقص بس نجى نشاهد ونستمتع رحمك الله يا حميد وربنا يديك العافية يا خالد |
(نوره)
آه يا غُبُشْ ما عندي ليكم غير نغيم ..برجوه ينفُض لي غبار زمن القسا ..الكتّاح يهِزْ عرجون نخل صبر الغلابة الطالْ .. يحِتْ يخرِتْ ..تباريح الأسى الممدودة فوق نور الدُّغُشْ يا نورا آه .. يحرَد كنائسنا المسيح ..يعرش مدارسنا الصّدى ييبس .. يباس حلق العصافير الوديعة من البُكَا يندَرْدَرْ الصّوت البعيدْ .. أسيان يصُد من دون صدى ينكَفْرَنْ الفجر الصّبوح .. يحمي الزهيرات الندى تختا الدراويش الضّريحْ .. يسكن خلاوينا الجنون يهجر جوامعنا الإله يا نورا آه ... تطرح غيوم الشوق تئِنْ .. تشرَقْ تموت خيل .. كلمة الحق التّناهِدْ في الشِّفاه تعقِر بسيمة الصِّحْ مع لوبي الجّروفْ تغرِزْ ضريعات الحروفْ ينشف مُرَاح الأمسيات .. تتمطّق الأرضة المروق والأغنياتْ اللّي الشّروق .. والأرض والحب والمطر تضْهَب تتوه .. وكتين يضيع عرق الجِّباه الشُّم .. شمار في مرقة آه يا نورا آه ... من دّرْبِكْ التّور نَفَس خيل الصّبُر .. فَتّر خطاوي الشّوق وراه يا نورا آه ... ساعة الشّموس الغُرْ .. تهضلمْ تلحق الصِّح في المغاربْ تدفر الضو الكهاربْ في وشيّكْ تذفر المدن الضّبابية السّرابية ... الكآبة وحائط التيِّه والطّشَاشَات فوق قِفيِّكْ يا أم عوارض .. مو دعاشة .. ماها شبّورة وتقيفْ جايي ليك يا نورا غيمة .. تملا ماعونك خريفْ يملأ عينيك ويفضِّلْ .. يروي جوّاك ... العطاشة ..مو دعاشة يا مطر عِزْ الحريقْ يا مصابيح الطّريقْ يا المراكبية البتجبِدْ من فَكْ الموج الغريق يا الجزاير النتحويبا .. لما إنشعوز بحرنا جينا ليك والشوق دفرنا....يا نشوق روحنا ودمرنا يا المراسي النتحويبا .. لما إنشعوز بحرنا يا المحطات الحنينة ... القصّرَت مشوار سفرنا يا ما شايلك بيني حايمْ أيوة شايلك .. بيني حايمْ في الأرِضْ تكوين قضيّة .. !!! في السّمَا الأحمر .. غمايمْ بي برِدْ نغما السّلامِي . ..رَطّبَتْ حلق الحمائمْ طنبر النّخل التبلدي .. راقص الأبنوس وصَفّقْ سَوّتْ الصقرية موجة خَلّت النِّيل هاجلو هوجة بشّرت بالخير بلدنا .. شالت الشّبَال نسائمْ جدّدَتْ زلفي القديم ..أمشي بي الماشيبو أقاوم لا بتكَبِّر راسي فورة .. لا بتصغِّرني الهزائمْ جِنْس يا نورا ابن آدم ..حلمو في عالم مسالِمْ لا اللّيالي الماها ليّا .. لا الشّمَاتات العليّ لا البنوك المخملية لا تفاهات الحضارة .. لا عفاريت المدينة .. لا العمارات السّوامِق .. فوق ضَهَر ناساً فقارى لا الهتاف الفاوة ضارى غطى بالي من الفوارق .. لا الألوهة الطوطمية لا البرندات الوسيمة .. ولا الأسامي الأجنبية بتمحى من عيني ملامحِكْ .. وإنتي جاية المغربية دايشى داقشى المغربية .. وشِّك المقبول مكَنْدَكْ .. سامسونايتك زمزمية كونشبر ..طورية منجل سبحة فانوساً مدَرْدَحْ قلت بيهن لي زمانك .. يا زمان الحاجة عندكْ يا زمان الآفة حدّكْ .. لا تطا الوردة الصبية يا نفس فجر القصائد .. يا بلادي القَطَع قلب الرّوادي باللُّواج الجاي وغادي ده ما هو صوتِكْ .. لاها صورتِكْ دي البترقش ناديي فوق صدر الجرائد .. ماها صورتك !!!! لا هو صوتك ..لاها صورتك !!! إنتي يا الفي إطْن الصّحَارَى شُفّع العرب الفتارى البَفِنّو الشايلا إيدُنْ .. ويجرو كابسين القطارة يجرو باريين القطارة لا سراب الصّحراء موية ..لا حُجار سلّوم موائدْ إنتي في الغابة اليصارِعْ .. جوفو للآهات تلكِّي ياما دفّقْ غيم رجاهو ..لكن الأيام كركِّي في خلا حالنا اليمحِّن .. ويملأ بالسُّهد الوسائدْ إنتي غيمة ..شديرة ..خيمة .. إنتي جاهنا .. والتّقَا الطّلَقَت وشينا .. فرّقَت غُمّة جباهنا فرّجت في الحارّة ضيقنا فرّحَت شُفّع فريقنا والمواعين الحزينة ..وإتجاهنا يا النغيم البقّ فينا .. وشدّ لي وتر إنتباهنا يا تباشير يا بشارة إنتي يا ضرعاً تَكَرْمَشْ .. شان يرضِّعني الجسارة إنتي في منفاي رفيقة .. وفي حشا الأشواق حرارة يا هُدَى النّاس الحيارى يا ندى الفجر اليبلِّلْ صور عوينات الفقارى جاي ليك .. آه جاي ليك .. جاى ليك يا نورا آفة آفة للسوس الجا ينقُرْ ..عود عشيماً داخرو فيكْ وأصلي لمن أدور أجيك .. بجيك لا بتعجِّزْني المسافة لا بقيف بيناتنا عارِضْ .. لا الظُّروف تمسك في إيدي ولا من الأيام مخافة يا نفس فجر القصائد .. ما ضِهِبْ في بُعدي عنِّكْ واصلي متغرِّب عشانك .. راضي بالبيجيني منِّكْ ما بكيت شُحْ اللّيالي لا شكيت نُحْ .. شلتو حالي رغم إنو الحال بيفضح.. إلا كُت في الحارة بصرخ يا وطن عِز الشّدائدْ ... يا وطن عِز الشّدائدْ |
اقتباس:
اقتباس:
اقتباس:
وذكّر فإن الذكرى تنفع المؤمنين بعدين أنا ك"شايقي لندن" برضو عندي سؤال لمقطع من واحدة من قصائد "حميد" الله يرحمو وغلبني أتذكرو كامل كلو كلو: ...............زماناً كان (عاول) بكسر الواو وتاني في حتة تانية : .............(عاولي) التمور والواطة بور وضّح...........أبنْ.............أفصح:plooool:p |
اقتباس:
حبابا شديد والله ...... يااااااااااااااااااه لو عارف المقطع الرايح منك ده انا ملتصق بى قدر شنو هبشتنى هبشة عارف شنو ما حتصدق والله ....... انا يوم زواجى شلت كيس الحنة وكتبت المقطع دى على رجلى والحنانة احتارت فينى واحتارت تنقش رسم الحنة وين وانا ما كان هامينى تنقش وين بقدر ما كنت فرحانة انى عبرت عن حاجاتى فى اليوم داك وبى نقش الحنة,,,,,,,, المهم المقطع من قصيدة لى الحبيب(حميد) وتغنى بيها الفنان الجميل(صديق احمد) والمقطع بقول: (انا وانت قبل ده اتلاقينا شقينا على الدنيا جداول وجدبنا زمانا كان عاول والعالم سوينا جنينا....) وكان هذا المقطع هو مدخلى لحياتى الجديدة وقد كانت كما تمنيت لها ان تكون..... الترجمة: مفردة عاول مفردة تطلق على النخلة التى تقط فلا تحمل ازهار وعندها لا يمكن ان تتم عملية التلقيح بالتالى لاتنتج اى ثمر فى ذلك الموسم وتصبح (تمرة عاولى)اى غير منتجة..... يعنى بالمعنى كده عقرت فى ذلك الموسم وهذا لا يمنع ان تجود بثمارها فى موسم اخر..... |
يا هيثم ده النص الكامل اتفضل ياخى:
(القلب يشوف قبال العين) القلبِ يشوف قبّال العين من قبلِ أقابلك شفتك وين في ياتو عريس مخضر إيدين بين حضنو حلم يلصف لا وين والناس في الدارة إتنين إتنين كل خطوة تشيله عديلة وزين قوق قمريتين فوق كروقتين قيساب الشوق نوريقو متين يا رش الغيم يا ريحة الطين يا بختي أنا وكل الصابرين يا زول يا زين أنا شفتك وين في ياتو صباح باهي ووضّاح الطير صدّاح للزهر الفاح صفق البرسيم للطل مرتاح والناس أرواح في حضرة راح العشق الدغري العذري الصاح يا قومة بدري وفوتة الدار من أجل حلم راجنو صغار في ياتو محطة غشاها قطار إندهده فيها وقضّى نهار حس العمال تحت الأمطار الربط الخط ما فكَّ الخط يا كم في الخط يا كم تنفار والناس النار أم قلباً حار فتحوها بيوتن للسفّار الزول الوافي العوّافي يدِّيك العافي من المافي وما يأخد إلاّ الأخبار لاقيتك آهن لاقيتك في سرِّي ندهتك ولبيتك مع إنِّي ولا خابر إسمك لا الجيهة المنها لابيتك إنت الإنسان الغنيتك إتمنوا الناس إتمنيتك يا ريتك تخبر ياريتك كم صبرِ وعشم إستنيتك لو قبلِ أقابلك ما شفتك ما كان في حزَّتي حبيتك أنا وإنت قبل ده إتلاقينا شقِّينا على الدنيا جداول جبدنا زمانا كان عاول والعالم سوِّينا جنينة يا رشة غيمة عتاميره ربّة عربان وطنابيره قندول الشوق الحين لبّن جاب لي بيّوضة عصافيره يا ريح الزنج إذا اشتاقت تفتِق بأنفاسه مزاميره يا القمحة السمحة المدخورة قسِّيبته قلبي مطاميره أنا شفتك وين ؟؟ قبلِ أقابلك بين دنيا الريد ومقاديره |
اما (عاولى التمور والواطه بور)
فهذا جزء من النص(السرة بت عوض الكريم) اليك هذا يا عزيزى والبقية فيما بعد: ما كُنَّا قايلين في حياتنا يجينا أقسى من المضى ساعة مِروق الإنجليز قلنا الظلم فات وإنقضى .. تاريهو كمْترْ .. وقام دقون حلفي .. وعُشر .. معيوقة .. نال دمْسِيس .. ضريسي .. وشوك جمال الله يا ربّ .. كربك .. كُربْ عاولي التمور الواطة بور الناس حطب بابور شهور غلبان يدور مافيش مطور .. ويجيك بعد دا عِلم طلب ؟ |
اقتباس:
أرجو مراجعة ما أوردتيه من شرح ل(المشهاد) بعاليه ، فهو يبتعد كثيرا عن المضمّن بالمقطع الشعري : أبيّة وبكريها واعد ،، صبيّة ومشهادا تام حمّيد استخدم الصورة البلاغية في هذه الكلمة في مواضع مختلفة وبمعاني مغايرة ، فالكلمة يتغيّر مدلولها حسب السياق الذي ترد فيه . انظري لها في بعض ما كتب حمّيد بمواضع أخرى ففي قصيدة (أهواك)جاءت هكذا: ويا بت من البلد السلام يغشاك ما يغشاك شر يا حجوة فى بيتنا القديم ،(مشهادو) ،والكبد ابكشر أرجاكي ما بين الوفاء وشوق الضلوع الما دشر. أمّا في قصيدة (النخلة) : والطيّب الصابر سنين راجيها باكر ،، حقـو راح لا فك دين .. لا سد جوف رزقو المعلّق في السبيط (مشهادو) أصبح بين بين النخلة ما بترجى الصباح. __ تحيّاتي . |
ويا ريت لو راجعتي معاك قصيدة لبن الطيور بالذات المقطع الأخير :
اقتباس:
وأعتقد أن الصحيح هو : عابر سبيل صدفة استراح في ضلّي أوّل ما رسى جكّن جرابو نساني راح ..فضّل ضليلي الما نسى ليمونة فوق أزيار سبيل .. إيد الحسادي تقصقصا (......) بالصبر الجميل أشواكا تقوى وتحرسا . __ تحياتي . |
رغم الاهمية البالغة لمثل هذه كتابة (قاموس لمفردة)
تبقى هذه المفردة محدودة المتلقى و تخاطب فئة (مهما كثرت) قليلة .. خصوصا اذا كانت هذه المفردة "لهجة" ان صح التعبير للغة عامية ...! كتب اسماعيل حسن والسر عثمان الطيب وشقور وغيرهم من ابناء الشمال السودانى الشقيق:D بلغة اهل الوسط ... وكذلك فعل هاشم صديق ومحجوب شريف....! (حميد حسب ظنى ينتمى الى القبيلتين:D)... ما الذى اراده المرحوم حميد من الكتابة بمثل هذه "لهجة"؟ تعريف متلقيه بمفردة مكان نشاءته ؟ (ما الفائدة؟) هل اتت هذه المفردة مجردة فى سياق الشعر ولم تكن مقصودة؟ هل يحسب استخدامها له او عليه؟ افكار راودتنى و انا امر كثيرا خلال هذه البوست المفيد جدا "للغرباء " امثالى الذين حالت بعض مفردات حميد الشعرية فى عدم اكتمال حالة الاعجاب المستحقة له... !! ماريل يا اخ:D باللهِ اطلعى من البوست اياه و تعالى بى جاى ؟looool |
ماريل سلامات مباري البوست ده من البركل من هناااااااااااااااااااااك .. جيت اقيف ليك في حلقك شوية .. وهي وقفة مسانده لابراز جوانب اخري قد تختلف فيها الرؤي .. وقد اخطئ وقد اصيب .. ان اصبت اهلا .. ان اخطأت فلي العذر لأن حميد اكبر من كل احرفنا معا ً . |
اقتباس:
ابداك من هنا .. زول حاضري بالصدفة إستراح في ضلِّي أول ما رسى وجكّن جرابو نساني راح وفضَّل ضليلي المانسى …. …. …. ليمونة فوق أزيار سبيل عابث عياني يقصقصه لابدّ من صبراً طويل شان يربى شوكه ويحرسه *** يا طيبان وانت عارف .. حميد في كل قراءة تجده قد صاغ النص بمفردة جديدة .. الابيات اعلاهـ وردت بذات الصياغة .. وقدمه عبد العظيم منصور ملحن بذات المفردات .. دي اول وقفة في حلق القصيده .. وماريل .. . |
وووو:
تحياتى ماريل .
اللهم أنزل شبايب رحمتك على حميد. أكيد شرح العبارات العامية جميل ووافى . أسمحى لى بالمشاركة لتحسين شرح عبارة المترة. والمترة هى عبارة عن بير عميقة وواسعة بمعنى أنها ممكن تقاس مترين طول ومترين عرض وهى غالبا ً ماتبنى جدرانها بالحجر والمونة الحرة ، ويقولون ( مترتها )أى حفرتها حتى وصلت إلى عين الماء ( المنسوب الجوفى ) وهى مصدر مياه لرى أراضى تعتبر بعيدة من مجرى النيل . |
اقتباس:
أخطاء النقل في شعر حمّيد بقت متداولة في نصوص كتيرة على النت ، وهي مشكلة علّق عليها في حياته ، اتصلت عليه أنا وخالد أخوي مرّة بخصوص صفحتين مفتوحات باسمو في الفيس بوك ،قلت أشوف لو عندو عنّها علم ،اعترض بشدّة ونفى علاقتو بالفيسبوك ، وطلب منّنا إيقاف الصفحتين إن كان ذلك ممكناً ، كل القدرنا عملناهو إنو وضّحنا في الصفحتين راي حمّيد وكتبنا هناك ألا يتحدث أحدهم باسمه دون تفويض ، واحدة من الصفحات لاحقا تمت اضافة تعريف لصاحبها بقوله أنه أحد معجبي حمّيد بعد أن كان الناس يظنون أنه حميد وشابكنو يا أستاذ ، يا أستاذ :) ..الشاهد في الأمر أن إرث حمّيد الشعري يحتاج لجهد توثيقي كبير ،حتى ما ورد من أشعاره بقرايات مختلفة داير تثبيت وتدقيق ،أعتقد إنو مهمّتنا كلّنا انّو نحافظ على ما كتبه كما كتبه . أرجع للمقطع أعلاه : حسب ما قرأ حمّيد وسمعناها : زول حاضري بالصدفة إستراح في ضلِّي أول ما رسى وجكّن جرابو نساني راح وفضَّل ضليلي المانسى ليمونة فوق أزيار سبيل إيد الحسادي تقصقصا تتكابى بالصبر الجميل أشواكا تقوى وتحرسـا أدّاها ود النصري : عابر سبيل صدفة استراح في ضلّي أول ما رسى جكّن جرابو نساني راح ..فضّل ضليلي الما نسـى ليمونة فوق أزيار سبيل ..ايد الحسادي تقصقصا تتكابى بالصبر الجميل أشواكا تقوى وتحرسـا وأدّاها عبدالعظيم منصور كما ورد بعاليه : زول حاضري بالصدفة إستراح في ضلِّي أول ما رسى وجكّن جرابو نساني راح وفضَّل ضليلي المانسى ليمونة فوق أزيار سبيل عابث عياني يقصقصه لابدّ من صبراً طويل شان يربى شوكه ويحرسه في وجود نص مسموع للشاعر أنا أقول أن نأخذ به ..مع الوضع في الإعتبار أن بعض التغييرات تطرأ على النص عند التلحين والغناء .ربما تم بعلم حمّيد ،وهو ليس قاعدة كما تعلم ، فقد تم تحوير بعض قصائده في حياته ، ك(نعمة) عند عقد الجلاد ، واتجوبكت قصائد أخرى له كما فعل معتصم ابراهيم بالمقتطع من (مصابيح السما التامني ..وطشيش) ،، نص وطنّا حبيبنا رغم البيك هي الأشواق . __ تحياتي . |
طيبان سلامات : كتير من النصوص عند حميد يجتهد بعض محبيه لقراءتها وهو امر معلوم .. فأعمال حميد - قد - تصعب احيانا ً علي من لم يتابعه بدقة .. الجزئية موضوع النقاش في توثيقي بصوته كما يلي .. :- [rams]http://albrkal.com/files/nas1.mp3[/rams] اعتقد ان الحوار هنا قد يغيّر كثيرا في التعريف بالمفردات ويساعد ماريل كثيرا في ايجاد الشرح الاقرب للمعني .. الجزئية التي لحنها و تغني بها عبد العظيم منصور كما اوردتها انت [rams]http://albrkal.com/files/nas2-2.mp3[/rams] هنا بصوت حميد و عبد العظيم منصور معا ً - للحفظ [rams]http://albrkal.com/files/nas3.mp3[/rams] . |
اقتباس:
المهم انا فقط زولة معجبة بكتابات حميد وبحاول قدر قدرتى الضعيفة وبدافع المحبة الشديدة(لحميد)ربنا يرحموا ان اقدم اضاءات على ما كتب وعندى مرجعات بستعين بيهم بعد ترجمتى محاولة بقدر الامكان ان اتفادى الاخطأ(ولن استطيع الى ذلك سبيلا) لكن يظل العشم ان تمتد لى اياديكم لتعبر بهذا البحث الى مبتغاه وما مثابرتى على هذا العمل الا بدافع المحبة كما اسلفت وايضا المرارة من كون ان الحبيب(حميد) لم يجد التقدير الكافئ للاحتفاء بنصوصه والتى تحمل الكثير وتعالج الكثير بفكرة فريدة ومفردة متفردة... اما بخصوص الجزئية التى تطرقت اليها فانا رجعت للشخص الذى حاورته فى هذه الجزئية وخرجنا منها سويا بهذا الفهم وقال لى بالحرف الواحد(مادام طيبان قال المعنى ما كده يبقى ما كده) عليه يا ريت لو افدتنا فى النقطة وارفقت وجهت نظرك واكون شاكرة |
اقتباس:
او الزول البوصى الام او الاب والله يا طيبان عقدتنى عدييييييل كده تعال وارمى لينا هنا يا ريتك تجى والله |
اقتباس:
سعيدة بى جيتك هنا الحتة دى نظام حجزتها للرد عليك |
اقتباس:
يا سلام على الوقفة والله وقعها عندى وفرحتى بيها زى وقفة العيد ...... وانا مدركة تماما ان حضورك يضيف بلا شك خصوصا وانت لصيق بحميد واشعاره ومن المهتميين افزعنى يا اسامة وانى لك من الشاكرين..... ياخى وحيات دينى وايمانى فرحانة عدييييييييل بى جيتك هنا تسلم من كل شر وربنا يتم ليك على خير وكان الله ابعد العارضى انا اول الحاضريين فى ليلة يكون فيها البدر مكتملا(هى) وانت فى قمة فرحك محاط بالصحاب والاهل والاحباب .... |
اقتباس:
شكرا على مشاركتك ومفردة المترة سبق لى شرحها فى متن هذا الخيط وما ارفقته انت من شرح لم يبتعد كثيرا فالمترة تطلق على البير(كما تفضلت انت) وايضا على الارض الزراعية التى تشرب من ذات البير....... مودتى والاحترام |
اقتباس:
أنا مثلك وغيري كثيرون ، نجتهد لسبر عميق معاني الشعر عند حمّيد . فغير الخيال الخصب جدا الذي يميّز شاعريته الفذة ،أتوقف كثيرا عند تعبيراته الدقيقة والمصوّبة بدقة تجاه المعنى ، ثم على هذا المخزون اللغوي للهجة الشايقية في شعر حميد ، أشعار حمّيد سحّارة لمفرداتنا الحيّة والمندثرة ،ولا أظن أن هناك مفردة شايقية واحدة - أو تفريعاتها - فلتت من حمّيد ,لذا نحبّه وتحبّينه ويحبه الآخرون حبّا جمّا ، وبلا نهاية . المشهاد مفردة سودانية على الشيوع ، لا تميّز لهجتنا ، فهي مستخدمة أكثر من استخدامها عندنا في لهجات الجعليين وناس الجزيرة ، بل موجودة عندهم في سياق الونسة العادية كقولهم ( فلان مشهدتو ليك ) ،و(فلان مشهدوهوا ) ، هنا تعني بالضبط انو فلان دا جيّهت حالو أو جيّهوا حالو..المشهاد تمام الجيهة وتمام الحال ،و(الصبيّة المشهادا تام ) فهمتها في ذات السايق ، أي البنيّة المعدول حالا ومجيّهة جيهة تامة ، كزهرة مفرهدة أريجا قاجّي وفي تمام أوان القطف . المشهاد برضو تاخد معاني تانية حسب ورودها في سياق الجملة كقولهم ( يا فلان امش فوق مشهادك ) يعني أمش فوق دربك الماشي فوقو أو فوق عدلك ، وكقولهم (قوم شوف مشهادك ) يعني كوس صلاح حالك أو شوف لك شغلة تنفعك .. وهكذا .. أضيف وأقول : كلّنا تلاميذ في حضرة حمّيد ، وكما تجتهدي في بذل هذا الجهد الكبير لشرح المعاني نجتهد في ذلك ومتأخرين عنك بخطوات كثيرة لأننا لم نكتب عنها، وفي البال ملاحظتين :- الأولى : انّو حمّيد كل مرّة بيغيّر في قصايدو كما أشار أسامة حمزة ،وحسب ما قال حمّيد في لقاء معه مع جريدة المشاهد قبل سنوات ،أن القصيدة عنده متحرّكة وغير ثابتة والكلام دا واضح في قصايد كتيرة منها وأوضحا قصيدة رسايل ست الدار ، فالنص الأصلي بعيد بشكل مذهل عن النص المتداول والمغنّى ، والحركة دي برضو واضحة جدّا في (مصابيح السمي التامني ,طشيش ) فالمسوّدة الأولى للقصيدة والتي حفظناها صم أيّامها تبعد فراسخ كثيرة عن النص النهائي المسجّل بشريط الكاسيت بصوت حمّيد وهكذا . ( حدّثني الأخ عبّاس ودعلوية وهو أقرب خلق الله إلى حمّيد وصاحبو الروح بالروح دا غير قرابة الدم بينهما بعد وفاة حمّيد بأيام انو حمّيد كان شغّال قبل وفاتو في طباعة ديوان (الضو وجهجهة التساب ) الملحمة الأجمل عند حمّيد في رأيي ، قال عبّاس انّو حمّيد بقى يغيّر في القصيدة حتى أنو اصحابو اعترضوا علي البيسوّي فيهو وقالوا ليهو ما صاح تغيّر في قصيدة الناس حفظتها وعرفتها بي شكلها المعروف ، يعني حمّيد لم يكن يتورّع عن التبديل والتغيير حتى في قصيدة كهذه ، وبعد أكثر من عشرين سنة على كتابتها ، لكنه قلق الشاعر وسعيه للكمال ) . الملاحظة التانية : انو حمّيد على تمكّنو من لهجة الشايقية عموما ولكن تظل بصمة شايقية أهلنا في نوري تطغى على كثير من القصائد حتى على لهجة الشايقية من مناطق أخرى ، فحمّيد ابن بيئته جدّا حين يريد ،وحتى شخصيّاته في القصائد هي شخصيات حقيقية نعرفها في الجريف وفي عموم نوري ،من شدّة وصفه للشخصية أو الإشارات التي يضعها حولها ، ولكن حمّيد ما كان بنقبض . عزاؤنا حين نعجز عن فهم معنى كلمة في قصيدة أن شعر حمّيد ظل وسيظل يُحس أوّلا ، ثم يُقرأ ثانيــاً .. آسف للتطويل .أرجو ألا أكون قد ذهبت بالبوست بعيداً عن مساره . __ تحياتي .. |
| الساعة الآن 02:34 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.