اما طحنية ..

فعلمه عند شيخه ،، وقبله عند ربه ..

فهو يقول قصة عجيبة ، يكررها كل مرة ، ولكن في كل مرة يحكيها لايحس من يستمع لها الملل فهو يقول :

انا عرست عمري خمسة وعشرين سنة .. وهسة عمري خمسة وعشرين سنة ،، عزيزة مرتي جابت لي محمد بس ،، لكن عندها بت تانية إسمها رحمة .. انا الله أمرني إني أكتل رحمة .. لكن محمد متزوج رحمة .. رحمة إذا اتوفت محمد بيتوفى .. لأنهم حاجة واحدة .. ولد بت سوا بعض .. انا لمن وديتهم للداية تطهرهم .. قالت لي ولدك دا وديهو الطهار .. وديتهم الطهار قال لي حرام عليك ..
انا ذاتي عيسى وموسى ونوح .. السككي للعندو زكي .. ماتقول لي كيف او كي .. والموت قبالو بيكون الكي .. افهم ياحي ..
ويواصل طحنية جريته ..

في ناس في الحلة
بيعتقدو انو طحنية دا ولي صالح ، وبيقولو انو لمن يغيب من الحلة ، بيمشي بيفتحها على الناس ويجي ..
والدليل على كدة انو في مجموعة من التجار الكانو بيمشو شلاتين للتهريب ، شافوهو هناك وهو لابس نضيف جدا وهيبة .. على الرغم من شكلو .. بيجي يشحد تلاتة انفار كل مرة من التجار .. تلاتة فقط مابيزيدهم ..

في السنة الاولى جا لي عبد الإله جمب العربية بتاعتو ،، وقف ومد يدو بس بدون مايفتح خشمو .. عبد الاله ابى يديهو وقالو طردو .. طحنية ماقال اي شي بس قلب يديهو رأسا على عقب ومشى ..
قدام حبة لقى عمار المهندس مد ليهو يدو بي نفس الطريقة والمهندس برضو ابى يديهو حاجة .. قلب يديهو مرة تانية وفات ..

قالو لما وصل لي اللوري بتاع شمباتي ، شمباتي اداهو عشرة تالاف .. شالها طحنية ورفعها فوق وطلع زناد حرقها ..


وبعد فترة ليست بالطويلة ، استقر الشمباتي في حي النصر الحاج يوسف واستثماراته تأتيه حد الباب ..