اقتباس:
الغريبة ياقوت القلوب الأمكنة دي بتسكنك ولا علي كيفك.. شكراً قوت القلوبما بتنتظر منك توقيع عقد ولا كونتراكت ولا غيرو.. بس تسكنك كدة بس.. وأي زول يتسكن بمكان معين..فــ ياحليلو.. المعاناة في الحياة دي كلها سببها الحب.. لمّا تحب (أي حاجة) يبقي تتوقع طوالي انك حــ تعاني بسبب حبك للحاجة دي أو بسبب حبها ليك.. الأمين عبد الغفار بيحرِّض علي المعاناة ويغني( حِب الناس يحبُّوك).. ونحن نغني وراهو.. هو طبعاً مافي مفر من أنك تحب وتتحبّ كمان.. وبقدر قوّة علاقتك بالمحبوب بيكون ألمك وعذابك وطشَشان روحك المُحِبّة.. لكن المحبّة ذاتها عادلة بشكل جميل.. يعني بتألمك قدر قوّة ارتباطك بالشيء.. معاناة الزول الغرقان في المحبّة ما زي الزول الحبّ أمبارح (مثلاً).. لأنو يا قوت القلوب الألم والمعاناة العاطفيّة دي بتسلك درب الذكريات.. وقدر ما تكون ذكرياتك مع المحبوب كتيرة قدر ما (شيل شيلتك).. لما يغيب عن عيونك أو إنت تغيب.. ابتسامة بتشبه ابتسامتو ممكن تبكيك.. ضحكة زي ضحكتو ممكن تلخبط يومك كلو.. خط زي خطو في الورق ممكن يخليك تطِش اليوم كلو.. أغنيّة كنتو بتسمعوها سوا ممكن تخليك تفتح بيت عزا في قلبك وتكون انت الميِّت والمعزّي والمعزِّيين وكل المأتم الوجداني.. وعليه قيسي المكان.. تلاقي زول في لمّة اجتماعيّة الناس تقول ليك ياسلام ياخي والله فلان دة الدنيا مريحاهو جنس راحة..بيت وعربيّة ومرا..تاني داير شنو.. وطبعا ما بيكونو عارفين الجوّاهو شنو..ممكن عادي يكون جوّاهو متقطع بس ساكت ساي..موش ممكن. عشان كدة انا شايف انو الراحة في الدنيا حالة مؤقتة..بتمشي وتجي.. زي المواسم بالضبط.. ونحن بين جية المواسم وغيابها غير نلوك الصّبر،ما لينا شيء. أمّا إنتي.. فــ ليك التحيّة والأمنيات الصادقة. |
اقتباس:
كيشو يتجلّي... تعرف ياكيشو من الحاجات السّمحة في الحياة دي فكرة التحوُّل من حالة لأخري. يقول ليك والله الليلة الفنان كان متجلي.. معناها أبدع ولمع نجمه.. طيّب ليه يعني هو ماقاعد يبدع ويتجلي في ابداعه علي طول..؟؟ هنا بيجي رأي الجمهور الحضر الحفلة.. هو البيحدّد هل الفنان ابدع ولا لأ.. ممكن حمد الريح أخشّ ليه تلاتة حفلات وفي التلاتة ديل يغني (حمام الوادي).. بس أكيد ما كلهم حيكونن حمام وادي بالنسبة لي انا الجمهور ده.. يعني الحكاية بتكون محكومة بمزاجي النفسي وحالتي الحضرت بيها الحفلة.. حمام الوادي ممكن وانا قافلة معاي أشوفو غربان غربان.. وانا سرحان مثلا..ممكن ما أشوف في حمام من أساسو ناهيك عن أنو حمام وادي ولا خلا.. وكان سألوني عن الأغنية لحظتها ممكن أقول ليهم (الساقية)..وممكن زول سرحان شديد يقول ليهم (زاد الشجون).. بس الزول المستّف بالحنين بيندمج مع الاغنية كلمة كلمة ونغمة نغمة التقول كتبوها ليهو مخصوص..أها ده البيحلف ليك إنو حمد الريح الليلة إتجلي واتوهّج. حكاية مشربكة صاح.. المهم: بما أني في مقام الجمهور..فأنا شايفك اليومين ديل (ما شاءالله) متجلي..ههههه وباصاتك البينيّة قاتلة عديل كدة..باصات من نوعيّة (هاك جيب قون).. قلت لي أقرع الجفلن...هههه. والله لقيتك أخطر مما أتصوّر ذاتو.. شايف سمراء اعلنت عن نفسها (جافلة).. فهل ستقرعها..(بالعربي الفصيح). ياخي لقيتك خطير والله.. بالمناسبة: (حمام الوادي) شاعرها منو..؟؟؟ أوع تقول لي سبدرات.. |
اقتباس:
إنت عارف ياحبيب.. الإنسان حياتو كلها حوجة.. دايما في حالة احتياج مستمر.. محتاج ياكل.. محتاج يحب..يحبوهو..يتعلم..يعمل..الخ.. في حلقة لا نهائيّة من الإحتياج.. يعني ما في زول بيجي يقول ليك والله انا ما عايز أي حاجة.. والدين ذاتو بيشير لفقر الانسان(أنتم الفقراء الي الله).. والفقر هو الافتقار..هو العوز والبحث عن شيء لا تملكه.. والفقر الي الله هو الفقر الي ما يملكه الله ولا نملكه نحن..والله يملك كل شيء.. ونحن مابنملك شي. دي الحياة..فقر دائم مهما صرنا اغنياء.. والاغتناء ذاتو مرّات كدة نسبي بحت.. في زول في اقصي قرية في جنوب النيل الأزرق عندو بيت طوب أحمر وسط قرية بيوتها كلها من الطين والقش..شايف روحو بالضرورة أغني زول. ونفس الزول ده الغني في القرية لو جا الدمازين مثلا..حيكتشف انو فقير.. ولو وصل الخرطوم مثلا..حيلقي نفسو يبكي علي خيالو الصوّر ليهو إنّو هو غني. ولو مشي أوروبا (عييييك) وهكذا وهكذا.. الكلام الفوق ده ذاتو حالنا مع الخالق..اغني أغنياء العالم بيفتكر إنو زول غنيان.. لكنو فقير بنفس معطيات المثل القلتو ليك هنا..(مع اختلاف المعايير والعوَز) هسع الجاب النقة دي شنو..؟؟ أيوااا.. إنت قلت: (ياخي لي زمن من ونسة زي دي..) طبعا فجأة اكتشفت حوجتك لونسة زي دي.. طيّب شنو الخلاك تكتشف الحاجة دي كدة بس.. ده بيودينا لكلام عن إخفاء القيم بعضها لبعض..واحتلال حوجة لأخري مكانيا وزمانيا.. أنا محتاج أنوم بدري..دي حوجة.. بس قبل ما أنوم محتاج آكل..حوجة تانية إحتلت مكان الأولي.. وفي لحظة البحث عن الأكل بتتراجع حوجة النوم وتختفي ظاهريا مع بقاءها كحوجة مُلحّة.. مجرّد ما تاكل بتلقي نفسك خلاااااص استويت للنوم.. هنا حوجة الأكل ديك تلقاها في سقط لقط. قلنا شنو.. حوجتك للونسة ظهرت أو اكتشفتها هسع لأنك كنت محكوم بحوجات تانية زحلقت حاجتك للونسة واخفتها لحين تحقيق الأولي ثم الثانية ثم ....الخ. دي القاعدة.. الاستثناء أنو الظروف هي البتحدد مسار الاحتياج. ودة موضوع طويل. انت موضوع البوست كان شنو..؟؟؟ههههه |
حضور ومتابعة واستمتاع يالرشيد ياخي انا داير اصاحبك .... وموافقك تشيل حالي بعد زمن :D |
اقتباس:
قبل العرس ولا بعدو..؟؟ حالك الماشي ده شيلتو ساااهلة.. ونحن حالنا الواقف ده ما بيتشال بالسّاهل.. الكلام ده قانون فيزيا بيتخيّل لي.. المهم: إنت لهسع بتفكر في الصُحبة...؟؟ ياخي انا من زمان مصاحبك بيني وبين نفسي وانت ماجايب خبر..!! * تشرِّف ياحبيب. ــــــ * الرواية لأخونا كيشو. |
اقتباس:
دندني وزيد عذابك .. !!! عارف أنا لسه مبسوط من يوم ( هكرووووووك ) بتاعتك ديك looool بعدين الرشيد بفرض الجو الذي به يتوفر كتير من الاطمئنان .. !!:) فتتسع مساحات الهواية .. عندنا .. !!:D متعك الله بالمحبة -- الرشيد .. قلت ليهو صاحبو مضرِّي عيشو الأيّام دي .. !!looool بالغت فيها والله :) |
اقتباس:
لكن قلت لي شنو؟ اقتباس:
أما حكاية "بلح اليوم باليوم وكمان بالكوم" :) قلنا ليكم ما عايزين نخش النادي دا[/justify] |
اقتباس:
وبعدين ياخ بقى في عقبة كبيرة تحول مستقبلاً بيننا وبين التعبير عن مشاعرنا القديمة والمعروفة تجاه القرعlooool[/justify] |
اقتباس:
ليه الحصل شنو ؟ قرعوووووووووك ؟ ...زانت مااااابتعرف صليحك من عدوك ياخ احبطنى يسعلنى الله ياكيشو :o مانى قايلاك ضمن كتيبة المقروعين :D |
اقتباس:
والانتيمو موجود يحمد سيدو looool[/justify] |
اقتباس:
طبعا ياكانديك في لحظات في الحياة الزول بيعمل حاجات سمحة خلاص.. يعني تكون فرحان شديد كدة .. بتشوف أي حاجة معروفة ما ممكن تعبر ليك عن مدي الفرح دة.. تقوم فجلأة كدة تعمل ليك حركة مشاترة كدة(غض النظر عن اتجاه الشترة سلبا ام ايجابا).. والحركة دي بتخليك تحس انك عبرت تمام عن الفرحة الانت فيها. مثلا: زول محروم من الاطفال.. متزوج ليهو عشرة سنوات.. فجأة الطبيب قال ليهو مبروك المرا حامل.. أها ده حيفرح كيف..؟؟ بيقوم بشكل لا إرادي يعمل حاجة مشاترة كدة.. لأنو الفرحة دي من نوع خاص.. ممكن عادي يقوم يقبض الطبيب ويرفعو فووووووق.. أو بعد يمرق الشارع يسلم علي أي زول بحرااااارة كدة.. التقول ناس الشارع ديل ساعدوهو في الإنجاب. أو يركب المواصلات والكمساري يطقطق يقوم هو يقول للكمساري: (علي بالطلاق ما في زول يدفع..ويدفع للناس كلها) ده اسمو الفرح المجنون.. الفرح الــ في سبيل التعبير عنو..الزول بيجيب حاجات مختلفة .. ليه...؟؟ لأنو الحدث المفرح ذاتو مختلف..وجنون الفرح هنا بيعتمد علي درجة مغايرة الحدث المُفرح لما سبقه من بواعث للفرح كانت..إنت ماشفت جنون الفرح حق الكورة..؟؟ ياخي الصحفي شجرابي قبل كدة جايبنو في التلفزيون كورة هلال ناساروة بعد القون التالت حق مسّاوي قام مسك ليك في رقبة جارو في المدرجات الوسطي وقعد ينطط.. ويجعر عووووع عووووع....وما جايب خبر..المريخاب البيشوفو الكورة الزمن داك تلقيهم بيقولو:(يازول احترم شيبتك دي) ههههه إضافة لإنو الفرح المجنون بيخلي الزول فرحان وبيفرح التانيين برضو..(فرح إشتراكي راسو عديل) الكلام ده الجابو شنو..؟؟؟ أيواااا هكروووووك الرّاجح أن الأخ كيشو كان في حالة مزاجيّة باهظة الجمال.. لذلك فلم يجد بدّا من التعبير بشكل مغاير وجميل يحتوي كل ما بداخله من جنون للفرح.. فكتب تلك الجملة الــــ كيفتني في حناني.. واحتمال ساعة كتابتها كان بيدندن معاها جهراً كمان.. فالفرح المجنون ما بيقدر الثقل والتعذر يحجبو بس ممكن يقلل من حدتو وبس لكن لا بدّ من منفذ وإلا إنشرط الانسان من الفرح.. بالمناسبة: الفرح برضو ممكن يشرط. زي الضحك بالضبط. بس الشرط هنا معناها شنو..؟؟؟ ده خليهو لمداخلة تانية. لأنو أنا بالطريقة دي حيشرطني الضحك من نقلات كيشو الرشيقة دي. والله لكن الزول ده خطيييير. |
اقتباس:
يعلم الله ( هكرووووك ) بتاعت كيشو دي تستحق هذه التحفة الجميلة من الحروف الباذخة .. !! متعك الله بالجمال يا رشيد .. وأعلم أن ( تنشرط بالفرح ) الحبة ما بتجيك ... فانشرط انشراطك لننشرط .. !! وللدهشة أيضاً ( انشراطها ) ان صحت النسبة .. حدثني صديقي ذات دهشة .. وكان من متعاطيّ (التمباك) عمدا .. أنه ولج مكانا لم يعتقد أن محبوبته بين الحاضرين فألفته عند المدخل .. ( مكوم سفتو ) فصاحت : وووب علي يا ( ... ) ماااا نظرتا من سقطي ... !!!* * في اشارة للقول المأثور ( ما سقطت من نظري ) .. !! تحياتي ياخ ليك وللعزيز كيشو فهو صاحب الفضل في هذا الجمال .. ! |
اقتباس:
الدولة اتجهت لدول آسيا ياحبيب.. وآسيا دي بعد البحر الأحمر مباشرة.. يعني من السعوديّة وانت ماشي.. البلد كلها منتجات آسيويّة.. إنت ماسمعت بالرد الرد.....؟؟ ياحبيب ما تلاوز من ناس انتيمو ديلك.. الحكاية بسيطة(لو توفرت الرّغبة طبعا)..بس تشيل كيبوردك ومحل ما تلقي محاثيث طوّالي تتكل. بس قبل ما تتكل..إتوكل.. وقبل ما تتوّكل..أعقلها.. وأقع القرع. |
اقتباس:
قالو الخيل تجقلب والشكر لى كيشو ;) |
اقتباس:
مساء القرع .. !! الجمال الذي عنيته هو مداخلة الرشيد (الشحمانة)* دي .. !! * ربنا يتم شفاء خالد الحاج صاحب الحقوق في العبارة |
*****
شايف هوامشكم كِتْرت، أتاري عيونكم تعاين لامن جننت قلوبكم ذاتو :D |
الرشيد حمد لله على السلامة
وشكرا للكلام الجميل دا وبيجيك راجع ليك تانى شكرا لعودتك |
اقتباس:
_____________ * القرع خشم بيوت هنا ياريس لوووووووووووول |
اقتباس:
نجي للإنشراطة بفعل الضِّحك.. ياخي متّعك الله بالجمال والضِّحك.ملحوظة: كلّ الكلام الأنا بقول فيهو ده محض رؤية خاصّة ووجهة نظر لا علاقة لها بثابت محدّد.. كويس..؟؟ تعرف يا ريِّس (وقعت لي في جرح حكاية ريِّس دي).. الإنسان في الوضع الطبيعي غير الضّاحك طبعا..بيكون مجرّد انسان.. وكل الأحوال التعبيريّة اللاحقة هي اللي بتخليهو يتصف بيها ويبقي موصوف بالضحك..بالفرح بالحزن..الخ.. يعني الزول لمّا يكون قاعد ساااي ده انا بسمِّيهو زول.. لمّا يضحك بيكون زول قاعد يضحك.. لمّا يبكي بالضّرورة زول باكي.. يبتسم زول مبتسم..يندهش زول مندهش. وهكذا من صفات تعبيرية تلحق بهذا الـــ زول فيلحق باسمه حال يدل علي ما هو عليه.. طيّب الضِّحك كيف بيشرط الزول..؟؟ ده مجرّد معني تقريبي لحدّة الضحك وقوته.. الزول في رقبتو حال إنّو ساكت وما لحقتو أيٍّ من دلائل الأحوال كالضِّحك والدّهشة والبكا وإلخ...بيمثل قيمة وقورة..(أي رزينة)..فالوقار هو الرزانة.. وفي القرآن (وقِرن في بيوتكن) بالكسرة ولمّا تتقري بالقاف المفتوحة بتعني القرار(الهبوط)..و(مالكم لا ترجون لله وقارا) بمعني لا تخافون لله عظمة.. المهم: الوقار هو الرزانة..والتوقير هو التعظيم والترزين.. الضِّحك مثلا بيمثل مهدّد أوّلي لهتك وقار الإنسان (حال أنو قيمة وقورة..) لمّا الزول يبدا يضحك بيضعف تماسك الغشاء الوقور المحيط بالإنسان دة.. لمّا يزيد في الضحك بتنشأ تشققات في الغشاء الوقور.. لمّا خلااااص يحصِّل سدرة منتهي الضحك بيتمزّق الغشاء الوقور ده.. ويبقي الزول إتعرّي من وقارو المفترض وبقي قاعد في السّهلة (يعني ما رزين) وممكن يعمل حاجات أصلا ما ممكن يعملا حال انو محتفظ بتماسك الغشاء الوقور داك. الخلاصة شنو: تمزُّق الغشاء الوقور البيحيط بشخصيّة الإنسان هو الشرط المعني في المقاربة(الضِّحك شرطني).. وغايتو هي جملة بلاغيّة شديد طوّالي الزول ممكن يصنفها علي أساس أنها مجاز مرسل علاقتو الكليّة (أطلق الكل وأراد الجزء).. الكل هو الزول طبعاً والجزء بالتأكيد الغشاء الوقور. الجملة الأصليّة كالآتي: الضِّحك شرط غشاء وقاري...أي مزّقه. طيّب الوقار وغشائه المفترض ديل هل منشأهن الإتنين حالة دينيّة ولا مجتمعيّة ولا فكريّة محدّدة.. الوقار هنا ياطارق مكتسب بفعل أواليات ومحدّدات كتيرة بيخش فيها الدين والعادات والتقاليد ونظرة المجتمع ككل. زمان أهلنا الكبار بعد كلو ضحكة بيستغفروا الله.. ده نابع من إسقاطات دينيّة من أنو كترة الضحك تُميت القلب.. واسقاطات موروثة من أنو الضِّحك بلا سبب قلة أدب..وخلافو.. بس كلها في نظري محاولات للمحافظة بصورة عفويّة غير مستقصدة علي تماسك غشاء الوقار الإفترضتو ليك دة.. المهم: الوقار ده ياريِّس ما بالضرورة ديني..بس مجموعة دوال في منظومة تكوين الزول في رقبتو..كوكتيل من العادات المجتمعيّة والمعتقديّة . أجمل ما في الموضوع انت قايل شنو..؟؟؟ إنو بمجرّد ما تكمِّل ضحكك الشارطك دة وتروق.. مباشرة الغشاء الوقور بيرجع يلتئم من تاني وترجع زول وقور.. يعني الحكاية وقتيّة طالما انت محتفظ بعقلك..وكان فقدتو وانت بتضحك ياكا الفقدت الغشاء بالمرّة..ههههههه |
اقتباس:
ــــــــ ياعيني تعاينن.. جننتنُّو قلبي.. ياسلاااام يا الجابري ياخي..:) |
اقتباس:
بس القزاز المظلل ده بالله نزلو شويّة.. النّاس رشّحتك تقوم ترشح تخليها.. قلت لي بقيت من اصحاب الفارهات... زيّك زي الريِّس كانديك.. سمراء دي بالله شوفو ليها إن شاءالله أتوز.. أمّا نحن ديل فماتنسونا من صالح الدعوات...ههه في انتظارك . |
اقتباس:
تجري جري الوحوش غير أنتيمو ما بتحوش.. خليك من التايواني.. ركزي علي الإنتيم علي الأقل تطلعي ليك بشهادة خبرة ولا ساعة سويسريّة. |
اقتباس:
جبت دلوي وجيتك .. حبيبنا كانديك تحدث عن الإنشراط بالفرح .. واسترسلت أنت وواصلت في (الإنشراط بالضحك) .. من وجهة نظري هناك مساحة بين الفرح والضحك .. الفرح حاله معنوية تشكل مضمون الحالة .. والضحك هو حالة تعبيرية عن مضمون الحالة السابقة (الفرح)في كثير من الأحيان ذ أن هناك من الحالات السلبية ما (يشرطك بالضحك أيضاً) .. يقول ليك فلان ده الضحك شرطو .. وقد يكون (الفرح) كاتم صوت ..وإن كانت بقية الحواس لا تلتزم بحالة الصمت هذه ..وأحيناً يحدث تسريب في شكل (تِكِشِم ) .. كحالة جلوسك مع من تحب ..(لو قعدت تضحك ساي بتقول عليك عبيط):p |
الأغبش سلامات.. عشان تعرف الفرق بين الرويعي والشريف.ههههقلت لي المرّة دي ماجيتنا فاضي.. تمام يازول..كلامك صاح.. الفرح ماهو الضِّحك ولا الضِّحك الفرح.. كل واحد كون قايم بذاتو.. وزي ماقلت إنت،الضِّحك واحد من الأشكال التعبيرية الممكن تكون مقترنة بالفرح بس بصورة غير حصريّة بمعني انو الضحك ممكن يكون بسبب تاني والفرح ممكن يتم التعبير عنو بحاجة غير. الضحك ممكن يكون بسبب نكتة..والزول البيضحك بسبب نكتة أو قصّة ما بيعني إنو فرحان.. عجبتني حكاية الفرح الصّامت المكتوم دي.. الفهمتو انا من كلامك انو يكون زول في حالة فرح ويحاول ما يعبر عن الحالة، لكن برضو بيبين الفرح عن طريق التسريب اللي بيظهر في صورة (تِكشِّم ) أو الحواس تقوم تفضح الزول.. وهنا التكشِّم دة ذاتو يا أغبش حالة عفويّة لكن لا بدّ منها.. ليه..؟؟ لأنو ضروري الفرح ده يلقي ليهو متنفس وإلاّ لاختلت موازين العواطف الانسانية.. كيف..؟؟ علم النفس فيهو تنظيرة في الحكاية دي.. بيقول: الإنسان هو الملك.. المشاعر البيظهرها وقريبة ودايما بخليها تمرق دي طبقة النبلاء.. المشاعر المكبوتة بتمثل طبقة البروتاريا..الطبقة المسحوقة. إذا واصل الإنسان الملك دة، في تقريب طبقة النبلاء علي حساب الطبقة المسحوقة المُبعدة من مسرح الحدث .. النتيجة حتكون ثورة عمّالية تطيح بالملك وبالتالي بيحدث خلل في الإتزان. النتيجة: ممكن الجنون. شفت كيف..!!! الإنسان السّوي هو البيعامل رغباتو كلها بنوع من تساوي الفرص.. لأنو الرغبات المكبوتة دي ممكن توديك التوج.. والكلام ده دينياً مثبت (الترويح عن القلب ساعة بعد ساعة).. يعني مشاعرك تجاه الحاجات ورغباتك لا بدّ من ان تعمل حساب ليها.. تخليها تظهر في أي شكل كان، من دون إفراط طبعاً..لأنو الإفراط في رغبة محدّدة هو كبت لأخري وهكذا من متواليات ودوال. الحياة ذاتها فن يا الاغبش..والإنسان الفنان بيعرف متين يلبي الرغبة الفلانيّة ومتين ما يكبت التانية ومتين يرخي الحبل للتالتة ومتين ومتين.. الإنسان الله خلقو وجوّاهو بذرة الفن.. ومما يجي الحياة بعد داك يا إمّا صار فنان مشهور(فنّ الحياة) يا إمّا طلع هناق ساي.. فنّ الحياة ذاتو بتندرج تحتو مناهج ومقرّرات ودروس خصوصيّة وامتحانات ومسائل شائكة خلاص.. التعامل مع الآخر فن.. متين تتعامل بعفوية فن.. متين وكيف تفك آخرك برضو فن.. ياخي نمسك من وين وننتهي بي وين. المهم: ياخي كلامك كيفني وإندحت ووقعت فيك بري تقيل..هههه يازول خليك قريب. |
ياااا بلد...
هذا البوست أعمق مما يحتمله عابر.. وفيك لم أعتد مجرد العبور ودروبك تشهد.. ويا الرشيد فينا.. أجمل ما في السفر بين الحروف إيقاظ خلايا في الروح ظنناها سقطت.. وإنعاش غيرها في العقل ظنناها نائمة.. والأجمل على الإطلاق ان تفتح بكلمة المدى على وسعه فيتلقاك اثنين بقدر ما تغرف من بحر غوصك فيهما لاتجد لهما قرار ولن تكتفي: - الشعور باللانهائية المرئية - اللاشيئية الانسانية بحسبما قال رحالة كانت هوايته تقليب صفحات الكون. ومثله هنا أفعل. ربما هذا من أجمل ما خطت يدك هنا يا صاحب. ولله درك يا فتى. |
اقتباس:
كدي امشي القرية المجاورة ديك انبش الماضي واجيب ليك حتة ذكرتني ليها كلامك عن فن الحياة وكيف تتعامل مع من حولك ومتي تفك آخرك ومتي تكبح جماح نفسك .. كدي خلي دي علي جمب كده .. لسه مالقيت البفتش ليهو: هناك بعض الشخوص بحورها تختلف عن الآخرين ... فبينما تجد بحور عصية الغوص تجد أخري غاية في السهولة... هناك تلك النوعية من البشر ذات السمات البسيطة ... ما أن تقع عينك علي الواحد منهم ... أو حتي تقرأ ما يكتب ... حتي تجد نفسك تحيط بكل جوانب شخصيته ... وهناك علي العكس شخصيات تحتاج لمعدات غوص خاصة لتسبر غورها .. جلد سميك ... وهي من تفسح المجال لتكوين إنطباعات قد تكون خاطئة في كثير من الأحيان .. تحتاج لمهارات مختلفة ... لمجهود أكبر ... يتعبني جداً التعامل مع هذه النوعية من البشر ... لكنه تعب ممتع ...في بدايته فقط... بعضهم تنتهي رحلتك معهم نهايات سعيدة فتجد في الأعماق درراً وياقوت ما كنت لتراها لولا تكبدك عناء ومخاطر تلك المهمة الشاقة ... والبعض الآخر تصل معهم إلي نتائج هزيمة ... أكثر الذين لا أود معرفتهم هم أولئك الذين تحتاج وأنت تتعامل معهم إلي أن تحمل معك آله حاسبة لتصرفاتك ... دائمو التذمر ...لديهم راي سلبي تجاه كل شئ وكل شخص ...لترضيهم يجب أن تتفق معهم في الراي دوماً ...وعلي النقيض منهم هناك أيضاً من يتفقون معك في كل شئ في سلبييه مطلقة ( آآآي والله زي ما قلت .......) والله كلامك صاح .... وإذا غيرت رايك بعد دقائق تجده أيضاً يتفق معك ... قد يسأل أحدكم ... هل هناك فريق ثالث ؟؟؟ نعم ... من أتفق وأختلف معه ... لكن بأدب الإختلاف والإتفاق ...من يعبر عن نفسه دون ضغوط أو تخوف من رد فعل من يسمع رأيه ...أحب جداً من ( الفي قلبو في لسانو ) ... علي أن يكون صافي القلب ... |
دي برضو ما عندها علاقة مباشرة مع البفتش ليهو لكن نفاج لكلام كتيييير :
شخصيتان متشابهتان حد التطابق ... لكن مختلفتان حد التنافر .... هناك من الناس ما يتعامل مع الأمور بكل أريحيه دون تكلف أو عناء ... يدخلك من أول لقاء بكل أبوابك المشرعه وغير المشرعه .... يستبيح محاريبك المقدسه في أقصر مده زمنيه ممكنه ...يختصر مساحات من الزمن بقفزات داخلك ...يبدأ معك من نقطة فوق الصفر ... بنفس هذه الملامح المتطابقة في شخصين ... أحدهما ينفذ إليك بهدوء مريح وتغلغل تتمني المزيد منه كلما أوغل ..يتشربك بسهوله ولا تحس بزيادة وزن بإضافته الماديه ..فقط تحسها معنوياً ... إضافه وإمتداد لروحك... أما الآخر .. وايضاً بنفس الملامح ... تحسه متطفلاً ..ساذجاً ... دخوله يسبب لك الكثير من الأعراض الجانبيه ... تحاول قدر الإمكان تفادي تصويبه ... فتنجح مرات وتفشل أخري لكثرت سهامه الموجهه نحوك ... إن لم تكن تملك قدر كافي من اللؤم والمباشره تزيد خسائرك بتكرار زياراته الداخليه لك ...تحاول جاهداً في هذه الحاله إبقاء كل ما تخشي عليه في أقاصي الأعماق ... كتاحه (أشتر)نموذج للنوع الأول .... وللثاني نموذج لا تعرفونه من خارج المنتدي |
دي الحتة الذكرتني الموضوع كلو .. كيف تتعامل ومتي ومع من :
نوعين من الشباب مختلفين ... في تصرفاتهم ... ورد فعلك تجاهم نوع من الشباب وبالذات الأصغر منك تجده عاقلاً رزيناً حتي أن ذلك قد يضيف سنوات الي عمره الحقيقي ... يعاملك بتقدير فائق ( قد تستحق بعضه وقد تستحقه كله ) .. تحس معه أنه يعتبرك قدوه ومثل ... جانب منك يسعد بذلك .. وجانب آخر يتململ .. لأنه يفرض عليك بالمقابل قيود تقيد سلوكك وتصرفاتك أمامه ... حتي لا تخدش الصورة التي رسمها لك وحتي لا تخيب ظنه بك وقد تغير في معتقداته وسلوكه بسبب ذلك ... مسؤولية تفرض عليك نوع معين من الونسه والسؤال عن الأحوال والنقاش العام ...تسعد به وله لكن لا تستطيع أن تمضي معه ساعات طوال لأنه مرهق بالنسبة لك .. ليس السبب أنك تتجمل أمامه ... لكن التعامل الجاد ولبس ثوب المرشد مرهق ... النوع الثاني خفيف الوزن في كل شئ ... ربما في تقديره لك وإعطائك حقك المشروع من التقدير الكافي بحكم السن أو النسب أو الوضع الإجتماعي ... وهنا يسبب لك الضيق في هذا الجانب ..فالإنسان بطبعه يسعي إلي التقدير الذي يظن أنه يستحقه وهي واحده من درجات سلم ماسلو الشهير للحاجات الإنسانية ... لكن في الجانب الآخر لا يفرض عليك أي نوع من القيود إذ يمكنك التصرف أمامه بدون آله حاسبة لتصرفاتك ... تجد معه بعض المتعه الخفيه ولا يرهقك وجوده لساعات .. تمارس معه نوع من االتمرد الخفي علي قيودك المجتمعية ..لكن هناك تلك الوخزه الخفيه بعد كل حين كلما تجاوز حدوده ( وأعتبر الحاله واحده ) .. وفي النهاية ليس هناك خيار واحد بأن تختار النوع المفضل لديك ... وإن فعلت تخسر إيجابيات النوع الآخر ... وإن لم تفعل ( تكسب) سلبيات النوعين ,, هكذا هي الحياة |
| الساعة الآن 07:00 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.