يجري الان صناعة أبي مسلم الخرساني

تم تصفية القيادات العليا للجيش الايراني
وده افضل تمهيد لقيامة ابومسلم الخرساني

اتوقع في الايام او الشهور القادمة ظهور شخصية مجهولة (ممكن ما بتطلع في التصوير او انها تكون ملثمة)
وح تكون الشخصية دي التعامل معاها من ناحية قداسة عرقية وليس مرجعية دينية
اي أن الايرانيين سيقدسونه بانه سيعيد لهم امجاد الإمبراطورية الفارسية وكدة يعني

فقط يتبقى عملية اغتيال خامنئي
وح يطلع لنا الرجل الغامض بسلامته
متوعدا باستعادة امجاد الامبراطورية الفارسية
ميك فارس قريت اغين

الاختراق الاستخباراتي موشر واضح لانهيار نظام الملالي
وبالمقابل قيامة أبي مسلم الخرساني بدعوى قومية لاستعادة امجاد الإمبراطورية الفارسية
لان الدين اصبح كرتا محروقا بسبب عمايل نظام الملالي

تحياتي أسعد وعساك بخير،
يبدو أن كثير مما تنبأت به، ظهرت بوادر حدوثه الآن.

حبيبنا يا عمدة
محبة وشوق ياخي
ايوة علشان كدة عاوز اشتغل (ليلي عبداللطيف) بالليل^_^

الشغلة كلها بتفك ليك عشرة توقعات، اكيد ح تصدف واحدة منها

ولا يكون ده "حظ الوحيدين" القالو درويش حين قال (الوحي حظ الوحيدين)
علشان كدة تلقى الرشيد لمن الكهرباء تقطع بقعد يسب دين لي ابوالجاز
موش انقطع عنه الوحي، بكون انقطع منو الوعي زاتو ^_^

:):)
الرشيد الإتقطع منو كتير، مش الكهرباء وبس، وما براهو، بس خليها في سرّك.
Cc: من يهمه الأمر

ديشااااااااك الورجاغ العظيم يعود من منفاهو الإسفيري

غايتو كلنا متحسبين وقوعنا في فخ الذكاء الإصطناعي ده يا أسعد

أما رشدويه فإني أتفق تمااااما مع العمدة عكود بإنو هو شنو الما فقده الرشيد


ههههههههه

ثم إنه يعلم الله مشتاق لورجغتك الشحمانة وعي دي ياخ

كاااااك
يا له من مقطوع الطاريء

عزيزي الرشيد
حيثما انقطعت فحسبك
وألزم مكانك يا مقطوع الطاريء

حبيبنا ابورحيق
محبة واشواق كبيرة ياخي

ثلاثة اشهر تفصلنا عن احتفالات عيد ميلاد المسيح يوم 2025/12/25
هل سيبلغ (العالم الاول ) ذلك التاريخ بسلام؟
هل سيمرّ عام 2025 ويكون الرجل الابيض ابيضا؟
ام ان بوتن وبأسلوب استيفان روستي يقول لرفقاء دربه في البياض (اسمحوا لي بالرقصة دي) ويأخذهم في جلسة تان تحت أشعة الحروب الحارقة.
هل سينهض عملاء امريكا في شرق اسيا (اليابان وكوريا الجنوبية) ويضحوا بأنفسهم امام لهب التنين الصيني؟

هل سيخرج علينا ابومسلم الخرساني من كهوف جبال زاغروس ويخطب فينا خطبة عصماء يبتدرها بقول (كووووولكم اركبوا هنا)…

هل سيرمي نتنياهو آخر كروته في خلق صراع شرق أوسطي يعزز من سلطته في اسرائيل ويدخل في صراعات ومواجهات مع مصر (آخر حصن في سقوط الشرق الأوسط).

هل سيبارك ترامب كل ما ذكر أعلاه ويجعل العالم يدخل في حروب عالمية يجعل منها محرقة لحرق الدين الامريكي الذي تجاوز الحدود؟

هل سيظل الرشيد في ضلاله ام انه سيعود اليه نصيب من اسمه؟

ثلاث شهور تفصلنا عن معرفة حقيقة (القادم اسوا) و (بكرة حنضل).

:D:D:D:D:D

انا غايتو منتظر ان يدار العالم كلو بواسطة الذكاء الصناعى
من تعيين وفصل الحكام الى فلان لازم يعرس فلانة وفلان وفلانة لزم يطلقو بعض :biggrin::biggrin:

يا سعادة محبة وشوق كبيرة ياخ

غايتو الحتة اللي قولتها دي نحن قاب قوسين او ادنى منها وكلها تلاتة او خمسة سنين ونخشها.
لكن الشغلة دي ح تسلمنا تسليم أهالي للمسيح الدجال لانها ساعتها ح تكون بداية سيطرة جنوده من الـ Agents ويمكنهم في الارض وساعتها ح تتم قيامة المسيح الدجال كما ورجغنا عنه في بوست سابق بنفس الاسم.

السوال هنا كيف ح تتم قيامة المسيح الدجال
اتوقع انها ح تكون حاجة قريبة من نبوءة فيلم ماتريكس ونذكر هنا منها رؤوس أقلام إلى حين الورجغة عنها باستفاضة في البوست القديم (قيامة المسيح الدجال).

فيلم ماتريكس حكى انه البشر طوروا الألة لحدي ما الألة دي بقى عندها وعي خاص بيها هنا نكتب ونقول AGI ونخت تلاتة خطوط تحت الذكاء الاصطناعي العام ده.

اها بعد كدة قام البشر عملوا مدينة مخصصة للألة في الشرق الأوسط وهنا نكتب (غزة) ونعمل تحتها مليون خط.

بعد كدة دخل البشر في صراع مع الألة وهنا قام البشر بعمل حركة قردية تحجب الشمس مصدر الطاقة الرئيسي للألة، وساعتها الألة في بحثها عن مصدر طاقة لقت انو البشر افضل بطاريات طاقة في الارض وبقت تسحب منهم طاقة، ولمن حكاية سحب الطاقة كانت مسالة عذاب للبشر لدرجة يموتوا بسبب شفط الطاقة منهم، هنا قامت الالة ابتكرت وسيلة عبقرية وهي انهم تخليهم يعيشوا في عالم افتراضي وبالتالي البشر ما حيحسوا بعذاب سحب الطاقة منهم.
وهنا بتكون قيامة المسيح الدجال في انهم ح يتحكم في الناس بنفس القصص الواردة في الأحاديث…

وللحديث شجون في الحتة دي

الاسرائيلين بدل يشتغلوا على الإطاحة بالنظام الإيراني
اشتغلوا في حاجة واحدة ومركزين فيها وهي اغتيالات للصفوف الامامية من قيادة النظام الإيراني

الحركة دي تمهيد لظهور الخرساني اللي ح يكون شاب مجهز بالعتداد النووي اللي ح يضرب بيهو اسرائيل وساعتها ح يكون موت بعض الاسرائليين نوويا هو كبش فداء لانطلاقة امبراطورية بني صهيون في الدول العربية.