اقتباس:
اقتباس:
هلا ومرحبا بكما وشكرا ً على الإضافات |
اقتباس:
سلامات يا جنابو لقيتا ليك معتقة وبصوت أحمد يوسف لغاية ما يجينا ود عثمان ويجيبا لينا من عدة جهات |
اقتباس:
مع تحياتي |
اقتباس:
طول يا ليل على الباسل .. كلمات علي المسـّاح وغناء عبد العزيز محمد داؤود |
الشاعر التامن : محمد علي عبد الله (الاُمي) يقال أنه كان متجهم الوجه .. عابسا ً .. منغلقا ً على نفسه .. إنفعاليا ً سريع الغضب يا ويل من يناديه بالأمي .. وبالرغم من ذلك كتب أعذب الأشعار منها الأغنية التالية التي ترنم بها أمير العود ومن بعده أحمد الجابري. سألتو عن فؤادي بصوت أحمد الجابري : |
الشاعر محمد علي عبد الله (الاُمي) مولود بحي الركابية بأم درمان في العام 1918م .. يقال إنو تربطو صلة قرابة بالمبدع / خليل فرح .. كان ترزيا ً ماهرا ً .. إنتقل إلى مدينة الأبيض حيث عاش فيها فترة من الزمن وكان دكانو بتاع الخياطة ملتقى للأدباء والفنانين والمفكرين ... ثم انتقل بعدها لشمبات. ما بخاف من شئ برضي خابرالمقدر لا بد يكون إن أتانى الهم جيشو دافر يلقى يا خلاي صبري وافر يلقى عزمي التام ليهو خافر يلقى قلبي شجاع ما جبون بالعدا معروف ما ببادر ما بخون الجار مانى غادر ما بقول للناس مثلى نادر بل بقول للخالق شئون ما عصيت مولاي مانى فاجر لا ولا بالعالم بتاجر نفسي يا أحباب ليها زاجر لم أكون كل يوم لي لون الثبات معروف لي معاصر لو بقيت في داخل معاصر و الإله غير شك لي ناصر رغم انف الواشي الخؤون قول لشاهد الزور فيما ثائر هدى روعك قبل الخسائر يا ما قبلك عميت بصائر من لساني وقولي الهتون قول لأهل الجور والمساخر مافى أول ما ليه آخر مابدوم العز والمفاخر و ما بدوم الظل والحصون عن لسان الحق مانى نافر وما جحدت الخير مانى كافر ما ضمرت السوء مانى حافر للصديق هاويات السجون http://www.youtube.com/watch?v=pQaG6usAaBs |
اقتباس:
|
في تلاتينيات القرن الماضي شاعرنا (الأمي) كتب (إنت حكمة إنت آية) والزمن داك كان في مدينة الأبيض التي قلنا أنه أنتقل إليها وكان عندو فيها دكان خياطة كبير كان بمثابة منتدى أدبي يلتقي فيه الشعراء والأدباء والفنانين والمهتمين بالأدب والطرب عموما ً وكان من ضمنهم الأديب والشاعر والسياسي والوزير / محمد أحمد المحجوب الذي كان وقتها قاضيا ً بمدينة الأبيض. إنت حكمة إنت آية ولّ إنسان إنت صاحي ولّ نايم ولّ طرفك من طبعو نعسان إنت راحي إنت روحي إنت إنسان عيني يا صاحي وإنت إحسان إنت نادي وإنت هادي وإنت ميسان إنت ظافر إنت ضافر أسود وفرسان إنت شادن إنت لادن إنت فتـّان إنت ضامر إنت سامر إنت هتـّان إنت نادر إنت ناضر إنت بستان إنت صافي إنت نافي زور وبهتان يا حياتي يا مماتي هاك سطران الصبابة ومر عذابها وقلبي أقران إنت ساهي وإنت لاهي إنت بطران في دلالك وفي جلالك يا سامي وكران يا صفايا يا وفايا هاك برهان عن غرامي وطول هيامي السابني ولهان عزَ قربك أما بعدك ما لو لي هان قلبي خافق هل توافق قدري ينهان يا حبيبي كن طبيبي أمري حيران طول نهاري ثم ليلي ساهي سهران طال عذابي وصاح غرامي جـَوّي عكران دمعي هامي وشوقي نامي وفرشي نيران إنت حالي إنت عالي إنت سلطان إنت ساطع وانا ساجع بي غناك طان طال أنيني وفاق حنيني ألحان لأوطان واليلومني في هواك يا سيدي غلطان قالوا الأديب والسياسي الوزير / محمد أحمد المحجوب ( 1910 – 1976م ) زار شاعرنا الأمي في دكانو بالأبيض (بـُعيد إشتهار أغنية (إنتا حكمة)) وقال ليهو ممازحا ً: إنتا الحكمة يا محمد علي .. وأردف مرتجلا ً : ما أحلى نيران الهوى في حب هواك يا مسرتي تما أحلى ما يرضى الحبيب ما أحلى نوحي وعبرتي http://www.youtube.com/watch?v=6d4i5Md6sLE |
قلنا عمنا الأمي كان سريع الغضب والإنفعال وكان لا يرضى أبدا ً لقب (الأمي) ودا هو السبب زاتو الخلى اللقب يلتصق بيهو لأنو عندنا في السودان بيحلى لينا نلصق فيك اللقب إذا كنت بتزعل منو أها قال ليك وفد من إتحاد نساء السودان زار مدينة الأبيض ومن ضمن الزيارة قالن النمشي نمر على دكان عمنا الأمي ومشن يسألن من مكان لمكان لغاية ما وصلن المحل ولقن عمنا الأمي (وهن جاهلات له) وقالن ليهو : يا حاج وين دكان الأمي ؟ قال ليك بعد سؤالن دا إلا مرقنهن كرعينهن ... عمك هاج فيهن وطردهن شر طردة :D طيب تعالو نشوفو قال شنو في عيون الصيد: عيون الصيد الناعسات عـَيوني عيون النيل حاكن عيوني نسيت قلبي وروحي ونسوني وفقدت الكانوا يؤانسوني ليالي هناى جد عاكسوني وأخاصم النوم كيف درسونى مع الآلام هاجت شجوني وأطباء الكون ما عالجوني جفوا بنفورهم هيجوني متين في الطيف يصبو ويجونى فقدت صحاى لا تنصحوني خطاب وعتاب كفى بارحونى عيون الصيد ديل جرحوني سروري يتم لو يلمحوني غلبني أسير هيا درجونى وعلى الأطلال ليل عرجونى هواى شريف لا تحرجونى وعلى الأكفان شيش درجونى مقر املى فيهم ظنونى يزيدوا دلال وتزيد جنوني لذيذ تعذيبهم لو ضنونى وصالهم راحتي ومنوني ونستمع إليها بصوت المطرب هاشم مرغني: |
في ثلاثينيات القرن الماضي كتب الشاعر الأمي قصيدة (أسمعني وأشجيني) أسمعني واشجيني بي ذكرة الأحباب بالله ناجيني غرد يا حمام رحماك نجيني من دي الهموم البي ومن قاعا سجيني خلي الهنا يجيني وخلي السرور يصبح في طيـّو زاجيني تبريحي صاليني وهيامي زاد أضعاف ومنامي ساليني قول إنت سليني خلي اليزول مني ألمي المواليني الشوقو ماليني والبين برى جسمي بنوايبو باليني يا دمعة بليني ويا قسوة الأيام فتي الحدود ليني مين غيرك يشفيني ومين غيرك إنت يعيد صبري المجافيني قول ليهو صافيني زمني القصد هجري في هاوية خافيني غاب رشدي أهديني في ملتقى النيلين اتغن أشديني على توتي عديني تجد الأدب فطري تجد الحيا الديني صابحني ماسيني يا جالب الأفراح لا تبقى ناسيني سجعك يواسيني ورجاي فيك يا حمام إن مت ترثيني اصعد وناديني واقصد رياض شمبات سيربي وديني في غناك أبديني واندب هناك حظي وسعدي المعاديني إن رمت ترويني مروي العطيش في اب روف بي جرعة داويني في جوفي كاويني حب ام عفاف ام در من قبل تكويني بطرا البساتين وبطرا الشذى الفواح والمسك والتين يا جنة فتيني هل بعد هذا رجوع يا حظي أفتيني [media]http://server8.sm3na.com/719/Sm3na_com_asmeni_wa_ashjini.rm[/media] http://server8.sm3na.com/719/Sm3na_c..._wa_ashjini.rm |
نختتم القصائد الغنائية التي اخترتها لكم للشاعر محمد علي عبد الله الأمي بقصيدة غزل (صريح :)) ألا وهي (هواك وهواي بي جارو) وهي أغنية منسية قام المطرب ياسر تمتام بإزاحة الغبار عنها .. يقول الأمي في بعض أبياتها: هواك وهواى بى جارو .. سبن أفكاري نظراتك أحب تعطف تزيل وجدي ..أحب كل البحب ذاتك بحب لونك .. بحبو .. بحب ياحبي نفحاتك بحب فى خدك الزهرة .. بخاف ترميني لمحاتك بحب قربك بخاف بعدك .. بشوفك بين دوحاتك بخاف صدك بخاف جورك .. وأحب تتهنى فى حياتك بحبك حبي للعافية .. وكمان ياسيدي وحياتك بحب فيك الحياء الفطري .. وأذوب من حالي صيحاتك إذا فى حبكم ضعت .. إذا أقبر فى ساحاتك أكون للحظ دوام شاكر .. واقبل إنت راحاتك شعاع الشمس من نورك .. زهور الروض وجناتك سكرت وتهت دون خمرة .. وكان أسبابي لجناتك صب يادمعي فى سيلك .. وزيد ياصدري زفراتك حبيبك ودعك راحل .. وزيد ياطرفي عبراتك |
| الساعة الآن 05:37 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.