من نوادر أصحاب شوقي بدري (أولاد أمدرمان)
بدأت علاقتي بشلة الأخ شوقي بعد سفر شوقي الي تشيكوسلوفاكيا وكنت وقتها طالبا في جامعة القاهرة الفنن كما كنا نسميها..
كانت الدراسة في الجامعة مسائية تنتهي في التاسعة مساءا كنت بعدها أتوجه بسيارتي الي أمدرمان بمعية أخونا التجاني محمد التجاني سلوم وصديقي زاهر عبدالله خوجلي وابراهيم العقيلي (كركور) وهو من أبناء بانت.. رغم اني كنت من سكان الخرطوم بحري والكبري كان واحد وقتها وذلك قبل كبري شمبات الا اني كنت أذهب يوميا الي أمدرمان لمدة سنة كاملة دون انقطاع حتي أصبت باليرقان قبل سفري الي تشيكوسلوفاكيا بشهرين وسافرت بعد العلاج الطبي والكي لدي ود مختارالي تشيكوسلوفاكيا0. في تلك الفترة تعرفت علي رواد بيت طه امام(شقيق القاضي عبد المجيد امام) الذي أعلن العصيان المدني العام في بداية ثورة أكتوبر.. وأصبحت عضوا في الشلة التي كانت تضم كل ألوان الطيف من شباب أمدرمان فمنهم الطالب ومنهم الموظف ومنهم العامل ومنهم المخنجي(بائع البنقو)ومنهم أولاد كبريات عوائل أمدرمان من بيت المهدي وبيت بابكر بدري وبيت زروق وغيرهها. كان لكل فرد من تلك الشلة مواصفات خاصة وجميعهم يتشاركون في صفات الرجولة والظرف وسرعة البديهة..يعني باختصار شلة يندر تجميعها من انحاء أم در في مكان واحد..لكل واحد منهم نوادر تملأ كتب.. دعونا نبدأ بعثمان عبد المجيد(كوارع أو جيمس كما كان البعض يطلق عليه)الذي سافر فيما بعد الي الاتحاد السوفييتي للدراسة..الراجل الذي طار ورك في راس الدولاب..كلام عجيب مش كدا:confused::confused:لا أعلم ان كانت السمسمية في ذاك اليوم شديدة فقد جاء بها الفخ شخصيا. والفخ راجل تخين عندما يتحدث كان صوته يأتي وكأنه من أعماق بئر.. المهم الجماعة كانوا قاعدين وكلهم حلفوا انو عثمان كان قاعد في السرير ووراهو دولاب وفجأة عثمان طار من السرير ورك فوق راس الدولاب والجميع غير مصدقين لما رأوه..الطريف ان شقيقي مجدي حتي اليوم عندما أقول له عثمان جيمس يرد علي: عثمان الطار ورك في الدولاب. هذه القصة أوردتها لالقاء الضوء علي هذه الشخصية التي لا تستبعد منها القيام بأي شيئ غريب.. كان لعثمان غراب أمسك به صغيرا بعد أن وقع من العش.احتفظ به وصار يطعمه وأسماه ويكو ولما كبر كان يحط علي عامود كهرباء بجوار البيت وفي وقت أكله كان عثمان يطلق له صفيرا خاصا فيأتي الغراب طائرا فاردا جناحيه ويحط علي ركبة عثمان الذي يكون قد حضر له اللحم مقطعا الي قطع صغيرة ويطعمه بنفسه في فمه...وعندما يأتي شخص جديد لزيارة عثمان ويريد أن يتخلص منه كان يعطيه السمسمية وبعد أن يسري مفعولها في الضيف يصفر عثمان ويأتي الغراب ويدخل الي الغرفة فاردا جناحيه فيخاف الضيف ويلبد ويغطي رأسه بيديه ويطلق الصيحات والبسملة.. ولعثمان حكايات كثيرة منها حبه للكلاب وتربيتها وسوف أكتفي هذه المرة وسأعود بحكايات أخري عنه وعن باقي الشلة.. |
عم فتحي عليك الله ما تكون بخيل أنا قاعد منتظرك بعدين الشغل البقطارة دا بيشحتف :D
تحياتي/ عثمان الطيب |
أولا
التحية والشوق جئنا لنرحب بمقدمك و نقول ليك طولت الغيبة بعدين نرجع ليك بعدما تكمل حركات حلب .. |
اقتباس:
يا عثمان المرة دي عشان خاطرك لكن بعد كدا ما حتتكرر عشان ما معقول أكب العندي كلو وبعد داك أقوم أشحت.. عثمان كان عندو كلب وولف وفي تلك الفترة لم يكن كثيرين يملكون وولف فيما عدا الخواجات وقليل من السودانيين هواة تربية الكلاب وعثمان كان منهم.. هذا الكلب كان غريب كصاحبه فقد كان في غاية الذكاء ويفهم الكلام وينفذ كل الأوامر لدرجة انو عثمان دربو زي الكلاب البوليسية البطلع المخدرات وكان عثمان عندما يذهب لشراء السمسمية يأخذ معه الكلب واذا اعتذر المخنجي بأن البضاعة قاطة كان عثمان يطلب من الكلب البحث فيبدأ الكلب في شم أرجاء البيت وان كانت هناك بضاعة مخبوءة فأكيد ركس وهو اسم الكلب كما أعتقد..ركس كان بيطلعها من أي حتة وفي مرة أخرج الكلب السمسمية من بئر كانت مربوطة بداخلها بحبل.. والكلب كان مدرب لقيادة الكلاب الأخري التي كان عثمان يملكها فكان عثمان يخرج العصرية راكبا العجلة والكلب أمامه ووراء الكلب 6 كلاب آخرين يمشوا وراء القائد وعثمان علي العجلة وراءهم يلقي الأوامر : شمال..يمين...ستوب والناس في الشارع كانوا قد اعتادوا علي هذا المنظر.. في مرة الكلب اختفي وكاد عثمان أن يجن وبدأ يبحث عن الكلب وجند أصدقاءه للبحث معه ولكن مرت الأيام ولا أثر للكلب..قرر عثمان أن يلف العاصمة المثلثة مشيا وقسم الأحياء في امدرمان الي أحياء وشوارع وبدأ رحلة البحث وهو يعلم ان الكلب اذا كان في الشارع سوف يشم رائحته أو يسمع ندائه.ولكن انتهي من أمدرمان دون نتيجة وبدأ في البحث في الخرطوم وهذه العملية استغرقت ثلاثة أشهر دون كلل أو ملل الي ان كان يوما في لأحد شوارع السجانة فسمع زمجرة الكلب وهيجانه داخل أحد البيوت فخبط علي الباب وفتحت له امرأة عجوز والكلب زاد هيجانه بعد فتح الباب والمرأة صرخت فيه دا شنو البتسوي فيهو يابوبي. فرد عليها عثمان بوبي يامرا يا لب.. ونادي علي ركس باسمه طالبا منه ان يحضر وركس قام طوالي قطع السلسلة وجا ونط في عثمان والمرا طوالي قفلت الباب وقالت ليهو من ورا الباب:؛ والله ياولدي الكلب دا لقيناهو تايه وجيعان قدام البيت فقمنا دخلناه وأكلناهو مستنيين لغاية ما يجي صاحبو..سوقو ياولدي عشان باين انت سيدو.. هذا هو غثمان جيمس ..هل قابلتم مثله في أي مكانgoood |
اقتباس:
طلتك ولا القمر ياباش.لكن ياخ عيني وجعتني من الطبزة..انت مالك ومال الحلب.. أنا في الحقيقة ما غبت كتير لكن الظاهر كدا حأغيب جد جد من آخر الشهر..عندي سفرة لي بلاد الخواجات وانشاءالله أقابل شوقي ورأفت مادام السفرة ملح وانا ماشي مرافق لي واحد ماشي يشتري حاجات من هناك.يعني كمان فيها عمولة ممكن تفك العرجة.. وبعد رجوعي ولو الله وفق ناوي اقعد اسبوع في القاهرة ومنها للسودان سيدا آخد لي اسبوعين تلاتة..وكان فضلت حبة قريشات بعد تسديد الديون المتراكمة يمكن آخد لي خفسة لي الدوحة وبعد داك أسلم النمر في انتظار زول تاني كايس مرافق انشالله للحج.. |
جيمس
عثمان عبد المجيد علي طه، إبن أم سلمة بابكر بدري،، القصد من ذكر الأب أولن، مع أنه الحأحكية مربوط بي جهة الأم، بي سبب؟؟؟؟ بابكر عبد المجيد علي طه في يوم تخرجه من الكلية العسكرية وكأن أول الدفعة، إستلم السيف بطريقة قوية جدن (بيقولو عليها كسر السيف)، الحضور في دار الرياضة أمدرمان صفق كما السونامي في قوة الصوت والناس هللت وكان من بين الحضور العم عبد المجيد علي طه وأمامه رجل يتحدث مع آخر جالس معه،، وقال الرجل وليته لم ينطقها،،، دآ ما ود بت بابكر بدري،،، طفق العم وإنتصب وهو عسكري أشد من إبنه،، وقال للرجل؛ هو بابكر بدري دآ كان راجل بتو؟؟؟ طيب قصة عثمان جيمس،، كان طالب في الأحفاد ولي سبب، طلب منه أن يحضر ولي أمره أو يرفد.... زعل وهاج وماج،،، والسمسمية تغلي في دماغه... دخل عند العميد يوسف بدري (خاله) وقال للعميد: أنا ما عايز المدرسة، لكني عايز نصيبي في ورثة جدي بابكر.... وبهدؤ العميد الذي يهدي السونامي (برضو، تاني ما الكلمة عاجباني) قال ليهو: هآ، أمشي المجلس البلدي وشوف جدك خليكم شنو؟؟؟ عثمان جيمس والفردة التانية ليهو،، محمد مهدي مسعود الحلو (الجاك بالانس).. ما متذكر بالضبط، ياتو واحد في التلاتة، شنقيطي بدري ولا شوقي أوعثمان جيمس، قال لجاك بالانس: بس يدوني خمس دقايق جو دماغك، أعرف فيهو شنو ويشيلو عمري... |
[
طيب قصة عثمان جيمس،، كان طالب في الأحفاد ولي سبب، طلب منه أن يحضر ولي أمره أو يرفد.... زعل وهاج وماج،،، والسمسمية تغلي في دماغه... دخل عند العميد يوسف بدري (خاله) وقال للعميد: أنا ما عايز المدرسة، لكني عايز نصيبي في ورثة جدي بابكر.... وبهدؤ العميد الذي يهدي السونامي (برضو، تاني ما الكلمة عاجباني) قال ليهو: هآ، أمشي المجلس البلدي وشوف جدك خليكم شنو؟؟؟ عثمان جيمس والفردة التانية ليهو،، محمد مهدي مسعود الحلو (الجاك بالانس).. ما متذكر بالضبط، ياتو واحد في التلاتة، شنقيطي بدري ولا شوقي أوعثمان جيمس، قال لجاك بالانس: بس يدوني خمس دقايق جو دماغك، أعرف فيهو شنو ويشيلو عمري...[/color][/size][/B][/QUOTE] أول حاجة يابابكر أنا كنت مستغرب من تأخيرك في المشاركة لأنك أحد أقرباء جيمس وبتعرف معظم الأسماء الجات في البوست... حكاية الدخول في راس جاك دي حكاها شوقي وفعلا القالا واحد من الاتنين الذكرتهم..وجاك ود الحلو دا براهو حكاية.. تعرف واحنا في كورس اللغة في ماريانسكي لازني مرة اتشاكل مع استاذ اسمو بيتل..بعد الشكلة مشي البار وطشم تمام وجا الساعة اتناشر الداخلية والداخلية بابها بيقفل الساعة 9 مساء لغاية تاني يوم الصباح..ود الحلو جا وضرب الجرس مرة واتنين وجات المدرسة الماسكة وردية ليل فتحت ليهو الباب وهو واقف قداما يطوطح.. وقال ليها (NOW S or S) المدرسة تسالو انت قاصد شنو وهو يكررليها في الجملة وفي الآخر قال ليها..(SENEC or SUDAN) ولمن لا يعلم سنيتس دا اسم كورس لغة في سلوفاكيا.. نسيت أقول ليك سبب الشكلة..الاستاذ كان بيعلم الطلبة نطق حرف رجي بالتشيكي وطبعا لامن تنطفها بتنطق الراء والجيم في بعض وود الحلو كل لما ينطق بيطلع النطق حرفين والاستاذ يقول ليهو: (NO PANE HILO SAY RJE) وود الحلو برضو ينطقها غلط وفي الآخر لامن زهج قال للاستاذ:(هيلو NOT حلو SAY) ودورت الشكلة.. أنا طبعا اتعمدت ما أذكر انو أم عثمان من آل بدري وأفتكر كانت أول واحدة اتعلمت وكانت بتعرف انجليزي.. |
اقتباس:
المحبة والسلام طبعن كبيرة بنات بابكر العاشت وعايشناها هي السارة وقدر ذكر عنها جدك بابكر بدري الكتير وهي الساعدتو في مدرسة رفاعة، طالبة ومعلمة وكانت تتحدث الإنجليزية،، كتير من أصدقائنا حين يلتقوهو يخرجو بزهو كبير لمعرفتهم لها،،، يا أخي حبوبتكم (وهي خالتي لكن كان ممكن تلدي الوالدة في العمر) بتتكلم إنجليزي،،، هي والدة شقيقنا كمال بدري طيب الله ثراه وفاطمة والدة المعز،، الأخوة الأكبر لشوقي... عن ود (الهِّلو) جاك بلانس،، هو الآن في المملكة ورجل مطوع كبييييييييير، عمر بن الخطاب version القرن العشرين والحادي والعشرين،، شدة وبأس بي طريقة غير حقت أبو الفاروق.. ربنا قادر أن يهدي الجميع ولنا من عند نبينا (ص) الشفاعة والتمني بالرضاء والمغفرة.. ولك سلام |
أولاد زروق
------- اتنين من أظرف وأغرب مخاليق ألله وهم ص.زروق وط.زروق واسمحوا لي أن أتحدث عنهم دون ذكر الاسم الأول حتي لا يعتبر كلامي هذا تشهيرا بهم خصوصا وأن ما أنشره يعتبر طرائف من زمن الجاهلية.. نبدأ ب أخونا ط. زروق الشخص الذي كنت أجلس معه يوميا ولمدة سنة دون أن أعرف شكله.. كلام غريب لكن له سبب منطقي ..فمنزل أخونا طه امام لم تكن به كهرباء وكنا نجلس في نجيلة في حوش المنزل ومع المحسنات الجمالية لم نكن نري بعض بوضوح الا اننا بالصوت كنا نعرف من يتكلم..وأول مرة أري فيها ملامح ط. كانت بعد سنة من معرفتنا ببعض وكان ذلك بالصدفة..فقد كنت يوما في الخرطوم مع الأخ طه امام بالقرب من ميدان أبو جنزير فجاء شخص وسلم علي طه وعلي وقال جايين من وين وماشين وين يا عبيد وكلمة ياعبد كنا نطلقها علي بعض وحتي أنا الحلبي كانوا ينادوني بياعبد. عندما سمعت الصوت عرفت صاحبه وقلت له بالله انت فلان فرد علي أمال حأكون منو يافتحي..طبعا هو عرفني عشان لوني فاتح ببين في الضلمة لكن هو ما بيظهر بدون نور..وكانت تلك هي المرة الأولي التي أري فيها ط. علي الطبيعة ومازالت صورته تلك في ذاكرتي حتي اليوم فأنا لم أقابله مرة أخري نهارا فكنت مثل الأعمي الذي فتح فجأة ورأي أمامه ديك ورجع عمي تاني بعد ثواني فأصبح شكل الديك هو كل ما يربطه بالأشياء وصار يسأل عن الأشياء بالمقارتة بلون الديك وطول الديك وحجم الديك.. من طرائف أخونا ط. انه كان يذهب بعد القعدة بسيارته الموريس ماينر وكان يصل الي منزله بسلام فهو عندما يمسك بالدريكسون تطير الشلعة من راسو ويسوق بحذر. في يوم بعد القعدة وكانت قعدة مدنكلة أخونا مشي وطلع معاه أحد الأخوان ودور ليهو عربيتو وقعدو ورا الدركسون وخلاهو بعد أن تمني له سلامة الوصول.. أخونا وهو ماشي شاف ليهو عربية ماشة قدامو وقال يمسك في خطراتا عشان ما يصدم ليهو شجرة أو عامود وفضل ماشي ورا العربية وفجأة ما يحس الا وهو خابط العربية من ورا.. هنا الطشمة طارت ونزل من العربية عايز يطلع السواق غلطان.وقام يكلمو بغضب وقال ليهو دا شنو ياخ في زول بيوقف كدا بدون ما يدي اشارة..الراجل عاين ليهو باستغراب وقال ليهو : ياخ دايرني أدي اشارة جوة جراش بيتي أخونا خبط الراجل جوة قراش بيتو:Dgoood دا أخونا ط. زروق ونرجع ليكم تاني مع ص. زروق بس بدون استعجال عشان الزهايمر شغال.. |
من نوادر أصحاب شوقي بدري (أولاد أمدرمان)
يافتحي انت مستني تكمل الموضوع بعد ماتسافر وترجع بالسلامه
ولا الذاكره عايزه تزييت عشان تشتغل تمام اها ماتشمت فيك الناس وتخليهم يقولوا الزهايمر كبس عليهو. |
اقتباس:
يامجدي ياخوي الحكاية ما زهايمر لكن ضعف المتابعة والمشاركة بتحسس الزول بأنو فارض نفسو علي الناس بي كلام ما مفيد.. وبيجيب الاحباط ودي حاجة انت شخصيا اشتكيت منها قبل كدا. عموما مداخلتك دي رجعت لي بعض الزكريات ومنها حكاية عن المرحوم عبدالله طه أفتكر انت كنت معاي لامن حكاها في بيت عثمان عبدالمجيد.. في مرة كانوا الجماعة سهرانين في المقرن والشربة كانت تقيلة وأخونا عبدالله تعب ونعس وكان تاني يوم شغال فقام استأذن من الجماعة وقال ليهم قايم أنوم برة في العربية.. طلع وشاف عربية الطيب زروق المورس وفتح الباب ونام في الكنبة الورا.. بعد شوية جاتو صحية لقي نفسو جوا العربية والعربية جوا أوضة..عاين ورا العربية لقي باب قراش وقدام العربية باب صغير وفهم انو العربية مقرشة جوة قراش فقام فتح الباب الصغير ودخل لقي نفسو في حوش والدنيا منورة وفي نص الحوش سريرين واحد فيهو راجل والتاني فيهو مرا..وقف في نص الحاش وصفق وقال: هوي يا ناس البيت انتو.. الراجل والمرا قومو مخلوعين بالراجل الفي بيتهم دا وشكلو محترم ما حرامي..الراجل قال ليهو انت منو يازول والجابك هنا شنو.. عبدالله قال ليهو : انت المنو والجابني أنا هنا شنو ..انا كنت نايم في عربية صاحبي وصحيت لقيت روحي جوا قراش. الراجل قال ليهو : تبقي انت نمت في عربيتي مش عربية صاحبك علي العموم حصل خير.قومي يا مرا سوي لينا شاي ولا قهوة نفك الفي راسنا دي..وقعدوا شربو الشاي والراجل بعد داك وصل عبدالله بيتهم عشان هو بيتو كان في الثورة. الصدفة انو عربية الراجل كانت برضو موريس ونفس اللون وعبدالله افتكرا عربية الطيب لامن دخل نام فيها وسيد العربية كان مليان شري وما لاحظ في زول نايم ورا.. |
من نوادر أصحاب شوقي بدري (أولاد أمدرمان)
انا غايتو متاكد الحكاوي البتحكيها دي ماممكن تكون حكاوي فارغه
لكن اكيد كل زول بيقراها حيطلع منها بي فايده كبيره ودا حيختلف من زول لي زول وحسه الحكاوي دي ماممكن تكون مسلسلات وافلام ومسرحيات قمه في الكوميديا وانا زاتي لو ماكنت شاهد على كتير من الحكايات دي بسبب ارتباطي الشديد بيك في الفتره ديك كان ممكن افتكر انها مبالغات وحكاوي مساطيل لكن الحمدلله انت عارف انا عمري مااتسطلت بالرغم من ان اصحابي كلهم بدون استثاء سطلجيه . |
والله يا فتحي متابعين
كلمة كلمة ومداخلة مداخلة لكن نوع الكتابة دي تقراهو تستمتع بيهو وتلبد تحت القشgoood |
[والله يا فتحي متابعين
كلمة كلمة ومداخلة مداخلة لكن نوع الكتابة دي تقراهو تستمتع بيهو وتلبد تحت القش قش شنو يازول واللاهي دا كان ملبوك .استعمال سلاطين..المهم الله يجبر بي خاطرك وما يجو أهل الناس ديل يرفعو علي قضية رد شرف.. تعرفوا من أغرب الحكايات الحصلت وكنت انا أحد المشاركين فيها حكاية أخونا كركور..(ابراهيم عقيلي) مرة كنا سهرانين كالعادة في بيت أخونا طه في العباسية والقعدة جرت لي 3 صباحا عشان كان فيها زيدان وعمر الشاعر..ولما فرتقنا الجماعة قالوا لي بالله يافتحي وصل معاك أخونا دا.. وأخونا دا كان ساكن في الثورة وأنا ماشي بحري والكبري كان واحد يعني لازم عن طريق الخرطوم.طبعا أنا احتجيت وقلت ليهم ياخوانا البوديني الثورة شنو وأجي راجع تاني لي كوبري الخرطوم..لكن الظاهر ما كان في فايدة من الرفض وفي الآخر رضخت وقلت أمري لله نمشي نوصل الراجل الثورة وفي الرجعة ننزل كركور في بانت ونكمل علي بحري. المهم مشينا الثورة ونزلنا الراجل ورجعنا بانت ننزل كركور في بيتم الجنب السينما.ولما وصلنا وقفت العربية مستني كركور ينزل لكن مافي باب اتفتح ولا زول نزل فاتلفت وقلت ليهو ياكركور انت نمت ولا شنو ..ما تنزل ياخ خلينا نمشي..وياللهول..لقيت القاعد الزول بتاع الثورة وكركور مافي.وطبعا عرفتو انو كركور نزل في الثورة وأخونا دا أظنو نام وما انتبه انو وصل. غايتو سبيت ليهم الاتنين ورجعت الثورة تاني أفتش علي كركور وقلت أكيد يكون السواري قبضو ووداهو النقطة..لكن ربك رب الخير لقيت كركور واقف يتلفت مخلوع في المكان النزل فيهو وأول ما شاف العربية قال ليتا: دا شنو يا عبيد انتو نزلتوني وين؟ المهم نزلنا بتاع الثورة ودورنا تاني لي بانت وطبعا كركور عشان كان كل يوم بينزل أول واحد لامن العربية وقفت افتكر نفسو وصل وفتح باب العربية ونزل بدون ما يعاين هو نازل وين.. تقول لي قش يا أسامة..:D. دا كان من الصنف الخللا برعي يدور الفيسبا بتاعتو ويطش في الخلا يفتش بيتهم والجرايد تاني يوم كتبت انو برعي تعرض لي فقدان ذاكرة ودي حكاية الناس العجايز الزينا بيتذكروها كويس... واحنا كنا الوحيدين الفاهمين الفلم... |
اقتباس:
تحياتي/ عثمان الطيب |
اقتباس:
تحياتي/ عثمان الطيب |
اقتباس:
في الحقيقة ياعثمان كنا خمسة مكبسنين ناس نايمة وناس سارحة ومافي زول جايب خبر هو ماشي وين وانا كنت سايق عربيتي (الكفتيرة) وهو اسم اطلقو عليها أخونا الشفيع السيد الموجود في الدنمارك منذ ستينات القرن الماضي والاسم اتعمل عشان مكنة العربية كانت خفيفة وبتدخن من المكنة فكنت تشوف الدخان طالع من الكبوت وانا ماشي زي كفتيرة الشاي لامن الموية الفيها تغلي..زيادة علي كدا الدركسون كان فيهو بوش دورة كاملة ولازم تركز شوية عشان لامن تجي تلف لازم تلف الدركسون لغاية ما يشبك وبعدين تلف العجل. تعرف زي ما قال أخوي مجدي في حاجات لما تحكيها تلقي الناس طوالي ينطوا ليك في حلقك علي أساس انك كضاب ..واحد يقول ليك الجاك وواحد يقول أكتل العقرب دي.ودي مصطلحات الزمن داك للكضب والكضاب.. أها أسمع دي: أقسم بالله العظيم وبكل الكتب السماوية وبحياة أولادي وترب أبوي وأمي اني في مرة رجعت من أمدرمان الي بحري بالعربية بدون دركسون عشان الترس العاشق ومعشوق خرط وبقي يلف علي الفاضي..والحكاية دي في ناس لسة عايشين يشهدوا عليها..كانت الساعة تلاتة صباحا والشوارع فاضية والعربية الجماعة بينزلو يضبطو اتجاه اللساتك ولامن نجي نلف ينزلوا يلفوا اتجاه اللساتك للجهة العايزين نلف ليها وبعد ما نلف برجعوا اتجاه اللساتك للوضع المستقيم..وعلي هذه الحال قطعنا كبريين .. وفي الحقيقة الواحد لو ما كان ضارب موية الزينداوية وماكل سمسمية تمام ما كان بتجيهو الشجاعة يعمل حاجة زي دي.. أ كيد في ناس كتير ما مصدقين الحكاية دي لكن كل كلمة فيها حقيقة.. |
اقتباس:
اولا سلام يا عم فتحى ..ودى اول مداخله لى معاك لكن اى حاجه بتكتبها انا بقراها لكن دى عجبتنى لمن ما قدرته افوتها .هاهاهاه والله دى ماااااااااااا اظنها سمسيه ... بالغتو والحقيقه بالغو الفو اللساتك ... ياخى ذكرتنى واحد اسمو يوسف زكى الله يرحمو ومعاه صحبو اسمو يوسف امين برضو حكايتهم فى شبه فيها اوعا اكون من شلتكم ... واصل... كلامك جد بخلى الواحد ناسى خشمو مفتوح من كترت الضحك :D:D:D |
اقتباس:
شكرا ليك علي المجاملة البترفع الروح المعنوية للواحد وبتخللي الواحد يواصل عشان ضعف المشاهدة بتعمل احباط والواحد يكسل ويحس انو بيكتب لي روحو..أما موية الزنداوية والسمسمية فديل ليهم ناسهم الفاهمين المعني الحقيقي شنو وأحسن تخلليك بعيد;)goood |
العم فتحي
اتمناك طيب .. ياخي أم درمان دي كانت فيها المحن والله :)...مجتمعا مترابط بشكل غريب رغم إنو كل واحد من جهة .. أشكر عبرك أولا عمنا شوقي بدري ..فهذا الرجل حبّبني في أم درمان كثيرا بحكاياته الواقعية وذاكرته القوية وتوثيقه لأناس شكلوا ذاكرة ام درمان . وأشكرك كمان لي طريقتك الجميلة في الحكي ..دي مواقف طريفة وشكلو الزمن داك السمسميّة زاتا كانت بي خيرا ..;) كل حكاية أجمل من التاني وتجبر الواحد يضحك من القلب ..لكن حكاية الزول الدقش ليهوعربية واحد تاني جوّة القرّاش والعربية البينزلوا الجماعة يلفّوا لساتكا دي حاجة ماتخلص والله ..:D شكلو كان زمن جميل ..الله يعيد ويديم بهجة أيامك ياعم فتحي ... ____ أحكي الله يرضي عليك ... |
اقتباس:
دا معناه البوست ابتدا يطلع براعم مع اني كنت قايل البذور ماتت تحت الواطة.. انشاءالله بكرة انزل ليك واحدة من المولد طوالي من دكان النفراوي مباشرة عشان تشوف قلعة صلاح الدين الأنا شفتها محل ساعة المجلس البلدي معاي.ودي ذاتا من محن تجربتي للسمسمية أول مرة.لكن المشكلة بعد داك اني بقيت أفتش للقلعة دي لكن حلفت بي دين أبوها ما تجي تاني ..المشكلة يا طيبان الحكاوي كتيرة لكن ما كلها بتتحكي عشان في ناس ممكن يزعلو ويقول ليك ليه تفضحنا بعد ما الله تاب علينا..وديل كلهم أولاد ناس من أكبر بيوت امدرمان ..أسامي تخلع وزي ما قال شوقي أخونا انو الله يرحمو محمد عبد الرحمن المهدي بعد ضربة النميري لي الجزيرة أبا قال لي أهلو : يللا فرتقوا المولد دا وأدوني ورثة أبوي. من محن أخونا شوقي بدري انو لغاية يوم الليلة ما خت سيجارة ولا كاس في خشمو مع انو كان فريز درجة اولي ممكن علي ضمانتو تشيل السمسمية البيعزلا ليك وانت مطمن انها درجة أولي.. ومزاجو يقعد مع ناس السمسمية ولو ما بتعرفو وجيت داخل علي الشلة بتفتكر شوقي مصقوع ومطين زي الناس القاعد معاهم.. خليتك بي عافية.. |
اقتباس:
دى خطيييييييرة يا عمو والله انا على شوية يطردونى من الوردية:D:D يديك الف عافية |
اقتباس:
قسما عظما القال سارة مرا بي ألف راجل تب ما كضب..هسع في واحدة اتجرأت تخش البوست المشبوه دا غيرك:confused:عفيت منك وأنا حأخت النرويج في برنامج رحلتي في شهر يونيو عشان مداخلتك دي..بس التلفون بالخاص..وحأجيب ليك 2 كيلو تسالي..:) |
أها نحن قاعدين مستنينك من أمبارح
وإنت عامل أضان الحامل طرشة حارسين ليك البوست وإنت ساكي التاشيرة:p "بالله شيل معاك لاب توب عشان تواصل من الطيارات برضو" ما تتأخر |
استاذنا الجميل فتحي مسعد
حكي .. بمزاااج جدا متابعين ياخ ماا تطول علينا .. !! تحياتي |
اقتباس:
|
العم فتحي ... طابت أوقاتك ، حلفتك بتربة أمك وأبوك كان ما واصلت يا عمك أنا قاعد في لي في طوبة عديييييييل وحاااااااارسك والله بس ما تطول عشان التسالي ما يخلص;)
تحياتي/ عثمان الطيب |
اقتباس:
تحياتي/عثمان الطيب |
اقتباس:
يا عثمان هو أنا لاقي أبقي شوقي..ياريت ياخ اكون زيو..وبعدين ياخ انت ما فهمتها ودي ما يفهمها الا واحد بتاع سمسمية.. أولا أنا ختيت البوستين ورا بعض وممكن الزول يتلخبط عشان آخر مداخلتين كتبتهم أنا. ودا ممكن يربك.. الاحتمال التاني انو الحكاية مقصودة.1) يا عم فتحي زي ما انت غلطت فيني أنا غلطت فيك:D 2)لفت نظر لجميع المهتمين بالجندر: روبس في ميل ياخوانا ما ميل ..في ميل من الأميال زي ما قال عبد الحليم حافظgoood |
اقتباس:
خلاص كدا واحدة بواحدة أنا عملتك ميل وانتي عملتيني شوقي ويبقي الجاتك في اسمك سامحتك.. هسع انتي كنتي عايزاني كيف أعرفك في ميل؟ وكدي اشرحي لي الاسم دا لفائدة الجميع وعموما انا بتذكر انو الموضوع دا في زول ناقشو معاك لكن برضو ما كنت متأكد..لكي العتبي وأمسحيها في شوقي;) |
اقتباس:
بعدين انا الحاجات دي ما عندي جاهزة يعني بنزل طوالي من الذاكرة ودا بيحتاج لي مزاج خاص وأنا المحسنات الجمالية بطلتها واليومين ديل تفكيري كلو في السفر ولكن برضو حأحاول ما أتأخر.. بالمناسبة وين هاشم طه:confused:بالله افقدو لينا عشان باين الراجل دا ما براهو ويمكن في زول مزعلو.. |
اقتباس:
والله مشاغل يا أسامة ..انت عارف التاشيرات الشينجن بقت زي امتحانات التخرج والطلبات كتيرة وشوقي رسل لي دعوة لكن برضو عايزين كشف حساب بنكي وحجز تزاكر وفندق وتأمين صحي وانترقيو وبعد دا كلو تنتظر 14 يوم للرد بالقبول أو الرفض.. لاب توب شنو ياخ البشيلو:eek:أنا ما بصدق آخد اجازة من النت أقوم اشيل النت معاي.. لاحظ أنا بكتب في 5 منتديات ويوميا بكتب في كل منتدي حاجة .أصلو أنا راسي دا مكتب:confused: وزي البوست دا أنا ما ممكن انزلو في أي منتدي تاني لكن هنا الناس بعرفوني وعندي أصدقاء كتار بيعرفوني شخصيا وعارفين انو دي حكايات من زمن الجاهلية الأولي..عشان في جاهلية تانية في أوروبا.. |
ًص.زروق
أهو دا كان الغموض ذاتو.. جنن أخوهو المرحوم مبارك زروق كان مابي الشغل ومبارك كل ما يوديهو يشغلو في مكان يقوم أخونا يشتغل شهر وأول ما يقبض الماهية يمشي طوالي يشتري بيها كلها سمسمية ويرجع البيت يشيل تبروقة ومصحف وابريق مليان موية ويطلع برج الحمام الفي بيتهم في غرفة في السطوح ويقعد هناك لغاية ما السمسمية تخلص والتبروقة والمصحف غاشي بيهم أهلو وكنت لامن تمشي تسأل عنو أهلو يقولو ليك في خلوة بتاخد ليها كام يوم وما عارفين الزول بيسوي شنو فوق والأكل كانو بيطلعوهو ليهو فوق. في يوم من الأيام واحنا قاعدين العصر في بيت طه في يوم جمعة شغالين عسلية بالتلج أخونا دا جا داخل علينا رابط يدو الشمال وقافل عينو الشمال ونخرتو الشمال وأضانو الشمال بي لصقة وبيعرج بي كراعو الشمال. طبعا احنا قلنا الزول دا مالو .هل ضربتو عربية من الجنب الشمال ولا شنو:confused:فقمنا سألناهو يازول مالك في شنو؟ قام بكل هدوء وجدية جاوبنا: تعرفو يا عبيد أنا أمبارح جاتني رؤيا انو ملك الحسنات في اليمبن وملك السبئات في الشمال فقررت أعطل ملك السيئات سنة عشان ما يكتب حاجة وأخلي بتاع الحسنات بس الشغال.. المهم الزول دا أنا قعدت كم شهر قبل ما أسافر وكان لسة موقف ملك السيئات وسافرت وهو في نفس الحالة وألله أعلم الحصل بعد داك شنو عشان ما لاقيتو تاني.. مرة كنا قاعدين في القيف جنب البحر في حتة خضراء والجماعة كانوا بيلولوا في السمسمية ومنتشيين بالهمبريب الجاي من البحر وفجأة جا راجل عجوز الظاهر كان صاحب الزراعة وقام يكورك: انتو يا صعاليك دا شنو البتعملو فيهو دا والله الا أجيب ليكم البوليس عشان يربيكم..الجماعة قالوا ليهو معليش يا حاج احنا متأسفين وماشين خلاص.وفعلا قلنا يللا ياجماعة قبل العجوز دا يجيب لينا الحكومة وأخدنا بعضنا ومشينا وبعد كم خطوة أخونا صً.رجع للراجل وقال ليهو: طيب يا عم عن اذنك ممكن أشرب موية وأشر علي البحر..الراجل مات بالضحك وقال ليهو وقت ما بتقدرو عليهو بتشربوهو مالكم.. كفاية كدا.. |
من نوادر أصحاب شوقي بدري (أولاد أمدرمان)
يافتحي انا مافهمت الراجل ليه ضحك لما صاحبك
طلب يشرب مويه من البحر الظاهر مخي تخين . |
ا.عبد الجبار
سوف أخرج هذه المرة عن دائرة أمدرمان وأختار أحد أصدقاء شوقي ولكنه من أبناء الأبيض كان زميلا لنا في داخلية استراهوف في براغ.. في الغربة يتشارك الطلاب زكرياتهم قبل أن يغادروا السودان للدراسة وعادة ما تكون تلك الزكريات بلا أسرار وتتسم بالصراحة وبالذات اذا تم استلطاف بين شخصين كانت لهما نفس الهوايات والعادات.. حكي لي أ.حكايتين من أيام الأبيض وتجربته مع السمسمية.. حكي انه في مرة كان يتعاطي السمسمية مع بعض الأصدقاء الذين كانوا يدرسون في خور طقت .يعني لا أهل في الأبيض وكانوا في كل جمعة يأتون ويقضون اليوم مع صديقهم. وفي ذلك اليوم اتفقوا علي تناول الغذاء في منزل صديقنا.. كانوا جميعهم مصاقيع جالسين في انتظار الغداء.وأول ما الغدا اتختا علي الطربيزة جا أبو أخونا داخل عليهم والجماعة كلهم صمتو واتبرجلو..عشان المصقوع بكون خايف لو اتكلم بيتكشف ..المهم الأب قعد معاهم والغدا كان كسرة وملاح أخضر وصحن الباشري في النص..الجماعة بدو ياكلو الكسرة خلصت فالاب نادي واحد من أولاد البيت وقال ليهو أمشي يا ولد جيب كسرة قوام..الولد مشي وجاب الكسرة والجماعة نازلين أكل وزول بينطق بي كلمة مافي والجو متوتر وخلصو أكل وفضلو قاعدين في السفرة وكان في صينية كنافة مختوتة جنبهم.الأب مد ايدو وخت صينية الكنافة في الطربيزة.يقوم صاحبنا يشيل كورية الملاح ويكبها في الكنافة..من الصقعة افتكر انو دي الكسرة الطلبوها جات وعايز يوري انو فاهم وواعي..طبعا تخيلو الحصل بعد داك وأولاد طقت تاني ما عتبو البيت دا.. الحكاية التانية قال في مرة كانت السمسمية شديدة والدنيا عصرية وكان خاتي ليهو عنقريب في الضل ومع السخانة فكر يخش ياخد ليهو دش وطبعا حمامات السودان في الحوش وهو وأخوهو كانو قاعدين سوا في الحوش.. أخونا دخل الحمام وأخد الدش وبعد شوية جا مارق أخوهو عاين ليهو وقال ليهو دا شنو يازول وأشر ليهو علي جسمو.أخونا لامن دنقر وعاين لقي نفسو بي جلابيتو بتشر موية طبعا لانو استحمي بدون ما يقلع الجلابية.عاين وقال لا حول الله ورجع دخل الحمام تاني لانو عرف انو عمل حاجة غلط وبعد دقبقتين جا مارق عريان ملط..يعني صلح الغلط. |
اقتباس:
ياخي في زول يستأذن عشان يشرب من البحر..أخونا من الصقعة كان خايف لو شرب من البحر بدون ما ياخد اذن الراجل يزعل. والراجل ضحك عشان عرف انو الزول دا مصقوع .. |
اقتباس:
اقتباس:
أولاد أبويا الصقعي ما خشم بيوت وإتو إتنينتكم ولاد بيوت طيبة وكريمة،،، في صقعة سمسمية ودي حقت البكر.. وفي صقعة، سقطوبا من الآير كونديشن ودي حقت اللساتو في الصغر.. بعدين ياتوحة،، شنو المزاج الما عندك؟؟؟ ما هو في الفريزر،،:eek::eek: طلع قرمة تفك الخرمة... وواصل لينا.. متابعيين ومستنين بقية الشلة وشيتن وصلت التشيك، ظنيتك باكر علي الأسلوفاك،، وفارس،،، يا حليلو،، وإن كان هو أقرب للتِقِل (شنقيطي الله يرحمه، كان يده الشمال ولا شمال الهزبر) من لي شوقي... سلام |
اقتباس:
انت يابابكر الوداك تهبش في الفريزر عندي شنو ولا انت زي ما قالوا المصريين ما بتتبلا فولة في خشمك:( التشيك انا لسة ما قبلت عليهم لكن عندي تجربة خاصة بتلم التشيك والسلوفاك حصلت لي شخصيا ومافي مانع اقولا عشان مافي زول يقول شايل حس الناس وناسي روحو.. تعرف يابابكر في أحد الأصياف..مش دي برضو جمع صيف ولا كيف:confused: أعتقد في بداية التمنينات براغ كلها صرفت ماهية التلاتة شهور والفلس ضرب الكل وكنا بنتلقط الأخبار عن الداخليات الفيها زول استلم قروش من أهلو وأنا قروشي الكان أبوي برسلها لي من دبي اتأخرت.. مشيت داخلية ياروف الفيها أحمد أدم وفي السكة مريت علي البنك اسأل عن حوالتي..وهناك باني سوبوتكوفا الكانت بتعرفني شخصيا قلبت في الورق وقالت لي قروشك جات لكن بالغلط رسلناها براتسلافا عشان زميلتي ما لاحظت انو انت سبت سلوفاكيا وعنوانك اتغير وما قرت باقي الورق وقامت حولت القروش لي براتسلافا..قلت ليها طيب هسع نعمل شنو؟قالت لي انا حأرسل لي البنك هناك عشان يرجع القروش لي براغ ودا حياخد حوالي اسبوعين..لا حول الله اسبوعين كيف وأعمل شنو في الجوع.. المهم قلت أمري لله وواصلت طريقي لي ياروف وهناك لقيت الجماعة كلهم مقشطين وفرقة المديح كلها هناك ..هاشم صالح وابراهيم الجزولي ومحمد محجوب عثمان وعبد السلام بابكر ومليجي وتاني منو ما متذكر..المهم عرفت انهم مفلسين ما عندهم حق الرغيف والمصيبة أنا ركبت الترماي بآخر كرونة يعني ما عندي حق الرجعة وأنا ساكن في فيترنيك أخر البلد من الناحية التانية.يعني مشوار عايز ليهو بالميت 4 ساعات مشي.. غايتو قلت أقعد مع الجماعة انشالله أتغدا بي عشرة وست..حوالي الساعة اتنين الباب خبط ودخل علينا زول سوداني طويل وضخم ومشلخ دنقلاوي وقال السلام عليكم..الجماعة كلهم نطوا وأخدوه بالحضن وأنا ما بعرفو..عرفوني بيهو وقالوا لي دا دكتور عثمان الجزار من بلغاريا.. الدكتور قعد وفتح الهاند باج وطلع منها شبشب وجلابية وفرشة أسنان والباقي كلو قزاز كونياك وجبنة بلغارية..طبعا احنا ما كضبنا ودورنا شلعي والمزة جبنة ونسينا الغدا والفلس.. لامن جات الساعة 11 بالليل أخوك بقي زي يني..شلعة يحكو بيها..قلت للجماعة أنا ماشي داخليتي عشان دي مواعيد آخر ترماي..الجزار أداني كرونة حق الرجعة وطبعا بعد الكم ساعة ديل اتصاحبنا..ووعدتو أجيهو تاني يوم أشوف باقي القزايز دي نعمل معاها شنو.. مشيت أترتح ووصلت محطة الترماي وبعد دقايق ترماي 9 وصل وركبت فيهو وبعد شوية دقست عشان المشوار طويل وأنا تقريبا نازل في نهاية الخط.. فجأة لقيت ليك زول بهزني من كتفي وبقول لي قوم احنا خلاص وصلنا ..عاينت ليهو وسألتو دي فيترنيك قال لي فيترنيك شنو وصلنا براتسلافا..أخوك نط وقام يجضم في روحو عشان يتأكد دي حقيقة ولا حلم..عاينت لقيت نفسي قاعد فعلا في قطر ومحطة براتسلافا الما بغباها برة الشباك والقطر علي وقوف..سألت الراجل أنا الجابني هنا شنو..الراجل ضحك وقال لي انت كنت سكران سكرة شديدة والكمساري جا وحاول يصحيك عشان التزكرة لكن انت كنت زي الميت فقام فتش جيوبك لقي الهوية بتاعتك فقال دا طالب أجنبي أكيد ما بكون ركب بدون تزكرة وخلاك ومشي..أههها وابتديت أفكر الحصل شنو والموضوع دا حصل كيف..وفي الآخر وصلت للتفسير المنطقي الوحيد وهو انو الترماي كل ما يجي داخل محطة السواق بالمكرفون بيقول اسم المحطة وترماي 9 بيجي بي محطة القطر براها سترشيد البتقوم منها قطارات براتسلافا..وأنا مع الطشمة لامن سمعت اسم المحطة نزلت ودخلت محطة القطر فتشت قطر براتسلافا والوقت كان بدري.عزلت لي قمرة فاضية ودخلت رقدت فيها والباقي لا علم لي به والمسافة بتاخد 6 ساعات زي ما عارف.. المهم طارت السكرة وجات الفكرة...أسوي شنو واتزكرت قروشي الفي البنك والساعة 6 صباحا والبنك في وسط البلد ودي ما مشكلة ممكن أمشي المشوار دا عشان طبعا جيبي ما فيهو ولا كرونة توصلني.. المهم اتوكلت ودورت الييادة لغاية ما وصلت البنك الكان مواعيد شغلو 8 ونص..قعدت في سلم البنك لغاية ما فتح ودخلت البنك أول واحد مع الموظفين وأنا خايف يكونو رجعو القراش لي براغ..لكن ربك رب الخير ستر ولقيت مذكرة براغ لسة ما وصلتم.. استلمت الحوالة وطوالي علي كافتيريا كنت بغير فيها القروش لما كنت في سينتس وبجي براتسلافا.. فطرت تمام وفكيت السكرة بي اتنين بيرة وركبت مشيت المحطة عشان أرجع براغ ولقيت في قطر بقوم الساعة 12 الضهر وفعلا ركبت القطر ووصلت براغ الساعة 6 مساء وطوالي علي ياروف للجماعة السألوني أها وصلت كيف أمبارح ولما حكيت ليهم اني جاي من براتسلافا طبعا ما صدقوني لغاية ما طلعت ليهم وص الاستلام من بنك براتسلافا ومن اليوم داك الناس بقو يحكو انو فتحي مسعد سافر براتسلافا بالترماي..ودي حقيفة عشان انا ركبت الترماي ونزلت في براتسلافاgoood:D:D [color=#0080ا...]المهم قعدت معاهم لغاية ما القزاز كمل وقروشي كملت ورجعت داخليتي وابتديت من الأول اشمشم الداخليات الفيها زول جاتو قروش من أهلو..[/color] |
من نوادر أصحاب شوقي بدري (أولاد أمدرمان)
الله يلعن السكر وسنينو
في اول الكلام قلت الحكايه دي حصلت ليك في اوائل التمانيات لكن اظن انت قاصد اواخر السبعينات وعلى مااذكر انت سبت البلد ديك وجيت السودان نهائي في اواخر تمنيه وسبعين وجيت الامارات في مايو تسعه وسبعين مش كدا ولا انا غلطان . غايتو الله يستر من تطور الزهايمر وحقو لو سافرت تشوف ليك علاج للموضوع دا . |
اقتباس:
كلامك صح 100% هي فعلا أوائل السبعينات بس لامن يبقي عمرك زي عمري حتلقي العشرة سنين دي ولا حاجة..شكرا للتصحيح وأنا فعلا من 79 كنت في الامارات.. |
| الساعة الآن 05:57 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.