إشارات دينيه فى غُنا الشايقيه (رَصد)
[align=center]1[/align]
كل البسيطة حِسـان يوم ما ملَن عينى غير عابرة مافي إنسان يهدمني يبنيني آآه يا جمـــــــــال فتان قلّب موازيني لولا صفاء الايمان يفتني فـــــي ديني * الحبيّب |
- عملية الرصد والتقصى للإشارات المسقطه فى النصوص هى عمليه سهله نوعا ما , غير أن الصور والمراد التعبيرى قد يستعصى أحيانا ويغوص فى ذكاء الشاعر ..
- كثافة الإشارات نفسها كماً هى ما دفعنى لمحاولة الرصد وربما التفكيك .. - وإن كان الشعر هو عصير مقروءات ومشاهدات ومعتقدات أيضا فلا غريب أن يكون الرافد الرئيس للغة الشاعر التعبيريه هو الدين كما تجلى ذلك بوضوح فى نَص الحقيبه . - محاولة الرصد والتفكيك عمليه جماعيه ..أملى أن أجد الكثير فى الذواكر البعيده منها والقريبه .. - ربما كان للشاعر (الحبيّب) نصيب الأسد مما يوحى بميلان الرصد وبعض الفراغات ولايعنى بالتأكيد أنه الأكثف إستخداما للدين فى نص الغزل .. |
اقتباس:
الذى نجح فيه الحبيب أيضا هنا (لولا صفاء الايمان) يفترض فى ذاته الهائمه فى سماحة عابره صفاء أيمان يقيه شر أن يفتن فى دينه .. وصل الحبيب هنا فى الوصف الى منتهاه .. بعباره أخرى تميّز فى الوصف.. ودا دافع حقيقى وبكرلإستخدام المقدس من غير إنفلات .. ضامناً أن لا يأتى آخر بوصف أعلى من ذلك لجمال المحبوبه |
تحياتي اخ علي
رغم اني ما خبير في الاغاني بس اخوك سميع حقيبة من الدرجة الولي علي ما أظن انو ما الغناء الشايقي بس الفيهو لمحات دينبة وعلي ما اظن ايضا انو اغاني الحقيبة من اكثر الاغاني الغنية باللمحات الدينية بل بالاغتباس من القران الكريم وقد تجد لمحات حتي من الفقه والفتاوي داخل بعض الابيات والكوبليهات ودا ناتج من تربية الخلاوي الاتربي عليها الشعرا ديل وجعلت الواحد فيهم يمتلك رصيد خرافي من المفردات والمعاني ورديفاتها يصنع منها ما يشاء من اوصاف ونقل لواقع ومعايشات عاشوها هم صوروها لنا في ابهي واجمل صور وتجلت الحكاية دي في اغاني تصارع الزمن وتقهر النسيان ماذالت تمشي بيننا علي رجلين وعلي ما اظن ايضا ولست متاكد انوالشاعر محمد ع الله الامي كان مشهور بالحكاية دي وكدي شوف معاي العبادي هنا قال شنو واتامل (شوف النهر مار بخشوع تقول هجسان أو مر المنام بى مقلة النعسان) (جلت قدرته ما اكفر الانسان كم ينسى الجميل ويجحد الاحسان) وتحيلتي واحترامي للجميع |
اقتباس:
صباح الخير انا برضو ما متخصص .. ياهو من السمع بس الخلاوى دى أهم رافد مطلقا لشعر الحقيبه بس لما أتحولت الأغنيه لما بعد فترة الحقيبه بدات الإشارات فى التناقص حتى إمكن إنعدمت تماما .. والحاجه المهمه برضو إنو نص الطمبور لسه بتعامل مع الإشارات دى وبى كثافه ربما زياده الحقيبه دسمه جدا فى الموضوع دا بس انا ما عندى قدره عليها لكن أعجبتنى كلمات ود الرضى لدرجة الدهشه : من تعاطى المكروه عمدا غير شك يتعاطى الحرام |
وبرضو الحبيّب وإستخدام مجنون وباهر فى عابره 2
كلهم يا عابرة غنوا لما شافوك كالشعاع طلع البدر علينا من ثنيات الوداع وجب الحُب علينا ما دعا للحسن داع ريدك المبعوث فينا جاي بالأمر المطاع شعري في تقديس جمالِك شقت اخبارو البقاع |
1 مرفق
وعبقرية الحبيّب فى عابره 2 هنا لا تخطئها العين .. تأمل
الصوره للشاعر الحبيّب (شاعر العابرات) |
الاخ علي تحياتي
انت يا اخوي ما في واحد بي جاي متخصص في الموضوع دا يفيدنا اي واحد حتي بس لوعندو فكرة بسيطة ما ضروري يكون متبحر وهاك دي من رائعة ود الرضي العز والنفل اتصبر بيها (بالسرور كل وجة استهل و الجميع لله إبتهل ) بالله شوف الكلام دا كيف اسع في واحد من المتشوعرين ديل بقدر يقول زيو |
على صديقى
كتبت أشياء كثيرة هنا لكن بنزوة حاسوب متخلّف فقدت كل الذي كتبته بصراحة تنكدت و كدت أخرج من الموضوع بلا حمص, بس صعب بصراحة إني ما أترك أثر على موضوع كهذا. وأعدك بالعودة لاحقاً لأقول ما عندي. شكراً جدّاً خالص |
اقتباس:
ناس الحقيبه بيستخدمو الأشاره الدينيه دى ببراعه غريبه وممكن نقول عليها عفويه يعنى أصلا النص الدينى كان كثيف فى لغة خطابم اليومى بسبب جهة التعلم الوحيده (الخلوه)..وبرضو قياسا مع إستخدام الحداثه ممكن نقول على إستخدام الحقيبه إستخدام حميد .. وبجيك راجع بإستخدام غريب |
اقتباس:
كن بخير |
شوف ود أبنعوف هنا عمل شنو بى قصة سيدنا إبراهيم :
هيا ادعى زبانية عذابك .. إذا شايفـــــة البى قليل إذا ويلك عندى جنة .. أكيد بعشــــــــــق كل ويل سوى سواة قوم آزر .. وقــــــــــود نارن للخليل ونارك برداً سلاماً .. على قلباً بيـــــــــــــــك عليل ياخ دى حصة تربيه إسلاميه عديل |
بوست جميل يا ماجداب
متابع بمتعة .. سأدعو أخي وابن عمي أحمد سليمان طه للمشاركة فيه .. الرجل حجة "بضم الحاء" :) في هذا المضمار وفي غيره .. |
اقتباس:
ابن عمي خالد ، تعظيم سلام ، و شكراً لك لدعوتي لهذا البوست الرائق ، و شكراً للأخ ماجداب لطرحه الفكرة الجميلة ،، قد يذكر الأخ ماجداب قول الحبيب: يا ريت من زمان، يا ريتني من بدري ... سلّمت الأمور للبغيوب يدري ! و بعد ذلك بسنين ، و بعد أن بلغ منه اليأس مبلغاً ، قال : علي البَجي و البَفوت الحمدِ للهِ .. و علي كلّ الظروف الحمد للهِ !! وهي قصيدة أرجو أن يرفع الله بها درجته في الصالحين لما فيها من تسليم و رضا بأقدار الله ! و كنت فيما مضى أعجب كيف أن كثيراً من أهلنا الشاقية و شعرائهم يحبون الرسول (ص) و تتقاطر دموعهم في حلقات المديح ، و هم مع ذلك يحبون الدّكاي و الوِرِد و لا يطيقون فراقهاما ! و الآن لا أجد عجباً في ذلك ، و أعلم يقيناً أنهم صادقون في محبتهم الرسول (ص) و أن رحمة الله التي وسعت كل شيء ستسعهم إن شاء الله ! سألني صديق عن معنى قول الشاعر ابراهيم الزومة : آسيا فيك اتقطع العشم ... و صدرك المصحف للقسم !! أين وجه الشبه ههنا؟؟ قلت له أظنه يشير إلى القداسة ، ألا ترى كمية الخوف و الرهبة في نفوس من يمدون أيديهم إلى المصحف الشريف لتأدية القسم !! هكذا أيضا يكون حال من يمد يده إلى ذلك الصدر;) و شاعرنا الكبير محمد العبيد سيد احمد القائل يا المراغنه انا زول عقيدة .. و ريدتي لي اهل الله شديدة هو ذاته القائل : ناري انا من كبيق ضوّه ... وشوش و عسكارو لوّا مقلوز و دايرو يتهوّا ... و تضُرْبو الريح منو نروا أشرب منّو يا قرني ... مصنوع في بلدنا هني مين غير ضوّه قول لي مِنِي ... تستاهل شكر منّي حليل جلساتنا يا أحمد ... جانا الزمن المرمّد ناس ضوّه نشاطن اتجمّد ... حجّن و زارن محمد !! و تأمل معي هذه الصورة البارعة لابراهيم ابنعوف : مرّة في ليلة اسكرني حبك ... غبيتَ بقيت ما اعتيادي شفتِك فوق في سمايا ... عليكي المخلوق تنادي نور أو نار ماني فاكر ... حين عيونك شرفن قصادي وحاتك قرّبت أكفر ... رجعتَ قلبتَ الشهادي لي عودة .. |
ود الحاج ..
انا قلت حيسعفنى زول من الذاكره البعيده وآخر ربما من القريبه فإذا بهم الإثنان معا فى شخص واحد .. محمد طه .. يسعد مساك ياخ .. ودا برغم امتاعو ودهشتو شكلو من طرف الشنطه .. وبعد تعرف آسيا بابورك فى الأراك دى كنت عايز أبدا بيها ولاوزت عشااااان الحته دى .. وحتة ( يقوملها سيدى الحسن ) محمد ياخ راجيك هنى |
علي سلامات..
والله دة بوست سمح.. بالرغم من انو حيكون مرهق بالنسبة ليك.. عمليات الرصد دي محتاجة طولة بال.. انا ماعندي علاقة بغنا الشوايقة بس حتابع معاك |
متابعة لصيقة وباستمتاع..
للأسف حفظي سيء للغناء .. وكخاطر (قد يساعد) أو ذا صلة بالموضوع..فإن أمداح شيخنا حاج الماحي وشيخنا ودحليب مليئة بحنية الشايقية ومفرداتهم مع انها دينية.. مودتي |
والله ياعلي الذاكرة بقت خربة ، و انت زول (من صورتك) لسة شباب ، فما تواخذنا ياخي .. الحبيّب زول ختمي ، حافظ الكتير من المولد و البراق ، لذلك كان لا بد لأصداء الروحانيات دي إنها تنعكس في شعرو . و دايرك بالله تعرج علي : ست ريدي، في ذاتك عبدت الله و زاد إيمان قليباً ليّ قبلك تاه السر عثمان هنا (الريدة) زادت إيمانو بالله !! و العجب العجيب لو فتحت لينا سحارة عبدالله محمد خير !! بس أصل البركل و اجيك راجع .. |
اقتباس:
كل البوستات سهله عندما تحاولها مع احمد طه وآخرين .. يمكن هو شعر مكتوب .. يقينى يالرشيد حتلقاهو بخصك جدا .. ممتن لمتابعتك |
اقتباس:
التداخل ما بين دينى وغيره فى الشعر دا ربما هى فكرة البوست ذاتو ..حاج الماحى بيجسد الفكره تماما هو فى روحو دى ..(فى الاصل طمبارى).. وبفتكر مادام فى تداخل دينى فى شعر الغزل العكس ايضا قاعد يحصل .. (ودى فكره جديده للمرجع أحمد طه )... |
اقتباس:
معليش للإنقطاع إثرعله كدا وحاجات تانيه .. ونواصل |
اقتباس:
|
| الساعة الآن 02:01 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.