أريد رأيك أو (رايك) وليس رائك !!
في أكثر من (بوست) بموقع سودانيات العامر ، قرأت جملة (أريد رائك) أو (هذا رائك في الموضوع) حتى شككت في سلامة لغتي العربية ! إذ أن المصدر (رأَى) ، و الاسم منه (رأّي) ،، فنقول (هذا رأيي في الأمر) و (هذا رأيك في الموضوع) و (الرأي قبل شجاعة الشجعان).. و في دارجتنا السودانية نسهّل همزة القطع فنقول ( أها رايك شنو؟؟) دحين انتو رايكم شنو؟؟!! |
اقتباس:
(رائك دي) انا لما أشوقها أقرب أمشي للزول أو الزولة الكاتباها ، وأعضي في نص رأسو ، هي ذاتها شينة وما فيها حس بالحروف، لا أتساق، وبعد دا غلط ، الحمد لله يا خي الكتبت البوست دا، وادعو الله ان يريحنا من (رائكم) وأخواتها زي (آ)بدل (التنوين بالفتحتين) ، و حاجات تانية أخف وطأة .. نحتاج إلى آرائكم، رأيك، رأيكن، ........................ ولا نحتاج إلى (رائكم) أو (رآكم) أو (رائك) ... ولا حتى (شينكم وصادكم) ، همزاتكم ممكن بس أهمزوا في المكان الصاح |
اقتباس:
عبد الجليل ، مسّاك الله بالخير ،، تعرف ،، إنت ريّحتني جداً ،، لأني بصراحة شكيت في إنو أكون أنا الغلطان ،،، الغريبة إنو الغالبية بتكتب (رائك)دي !! و ده المحيرني !! |
اقتباس:
تعرف أنا من الناس البطبز فى اللغة ذاتى .. لكن (رائك) دى ذاتى قبال كدة لاكزت بيها أخونا قرقاش فى مداخلة فى موضع تانى ما عندو .. لكن ما قراها أعتقد شكلها شين لأنها فى توقيع .. وتجيك ناطة فى كل مداخلة .. هو ممكن تكون خطأ غير مقصود زى حقاتنا .. لكن حقتنا بتتبلع فى المداخلة وتضيع فى الزحام.. أعتقد مشرفى المنتدى يجب عليهم تعديل مثل هذه الأخطاء .. لأنها فى التوقيع مثل الختم .. وتشكك الزول ويرجع زى سواتك دى .. مرحب بيك وينجيك الله من ناس بابكر عباس أعداء التصحيح |
اقتباس:
رأفت مساك نور.. في الواقع في (طبزات) بتتبلع و نوع تاني لا !! يعني زي (رائك) دي ، إذا افترضنا جدلاً إنو معناها (لغويا) صحيح ، البكسرها شنو؟؟؟ ما هي الهمزة على النبرة دي فيها حالتين * إمّا هي ذاتا مكسورة ، زي حائِك و فائِت و شائِك *أو ساكنة و قبلها حرف مكسور زي جِئْتك و بِئْر و ذِئْب مافي حالة تالتة ،،، يعني من ناحية نحو مفروض يقولوا (نريد راءَك في الموضوع) ده على فرض إنو المعني صحيح ، وهو ما كده طبعاً !! بعدين ياخ أنا ركزت للنقر تخوفني بي ناس بابكر عباس:Dgoood:D |
اقتباس:
أنا ضد المباشرة... بعدين أحمد طه دا طارح الموضوع، بشكل جيد.. و هو عندو في المنتدى زي كم و ستين مشاركة، قمت بمراجعة كم و تلتين منهن، الزول دا و الحق يقال: مجود للكتابة. بس بعمل إسبيس بين الكلمة الأخيرة في الجملة و الشولة |
اقتباس:
بابكر سلامات.. فعلاً المباشرة ما كويسة ، بعدين ياخ المشاركات الكتيرة دي شايفها بتجيب الهوا،أحسن الزول يقرا و ينسحب لامن شاف لامن دري، مودتي |
من اين اتى هؤلاء ...جمله شهيره للاستاذ للطيب صالح ..عليه رحمه الله ...ولااظن انه قالها الا بعد ان تملكته الدهشه تماما ... مما يجرى امامه من احداث ... فما يراه حادث امامه لايشبه مااعتاد عليه من امور من اهله ومن بنى جلدته .. وكان المدهش والغريب ان الفاعلين للامور المستجده ...هم بعض من لحمه ودمه ولا تخطئهم العين ...لذا كانت حيرته اكبر ..وسؤاله صارخا ..
نفس الحيره وصلتنى ... وانا اقراء هذا البوست الذى يحاول ان يصحح كلمه ...رائك ..ويحاول ان يعربها وووو...الخ الخ من باقى شنشنه وطنطنه العرب تلك التى تعرفونها ولا نعرفها ...ولانريد ان نعرفها .... فالفينا مكفينا ..........والحقيقه اننى لا اود ان احتكر جمله..انته رائك شنو ...؟ ولكننى اخترتها كتوقيع ...او لازمه لشخصى ....لذا اسمحوا لى وبكل حب واحترام للجميع .. ان ادافع عنها وهى بذلك الشكل.. لذا فانا مندهش ايضا واسال من اين اتى هؤلاء ..؟ واسال هولاء ...( خصوصا... احمد ود طه ) ... ..هل يعتقدون ان مايتحدثون به فى بيتهم ووسط اهاليهم ..هو رطانه العرب او.. مايسمى باللغه العربيه الفصحى حتى يلزمونا ببها ..وهل اذا جلس سودانين واحد من الشرق والتانى من الغرب وهم يتونسون باللغه التى درجنا على استعمالها فى وسط السودان ..جلسوا ليتونسوا وجلس بينهم اعرابى الايحتاج هذا الاعرابى الى مترجم ..بامانه جاوبوا ..؟ ثم هل تعتقدوا ان ذلك الاعرابى سيرى فى ذينيك الاثنين ..اعراب يتونسون ....ام افراخ بذى مرخ .. ياساده من قال لكم اننأ نتكلم برطانه الاعرب حتى نصححها كما يريدون او كما تريدون ..؟ .. نحن نتحدث دارجيه سودانيه اصيله نكتبها ونتحدث بها ... ربما يكون ان اصلها رطانه العرب ..وهذا امر اخر ..ولكن سودانويه الى النخاع ... اخذناها عنوه واقتدارا ..( وعاش يحى فضل الله .).... وعقبال لجوبا ...وياجوبا مالك على .... ثم عن اى عرب تتحدثون عرب المشرق ولبنان والشام ام المغرب وال شنقيط ام عرب صلاله ام عرب اليمن ..؟ ..عن اى عرب تتحدثون ..اترى تتحدثون عن اصحاب الشعر النبطى .. الانباط الذين ذكرهم المتنى وذكر موقعهم من رطانه العرب .. فذبحه .. ضبه ابن امه الطرطبه ... عن اى عرب تتحدثون ومن منهم سيقبل ان يكون اسمك... احمد ود طه ....( كما عنوانك الالكترونى )......بدلا عن احمد بن طه..ولاادرى ان كان اسمك ينتهى بالعنزى او الدوسرى.. او القحطانى او العسيرى .. عموما اطمئن مااكثر الذين نسبوا نفسهم الى الدوحه الكريمه ...ولكن يقينى انهم اى الدوسرى والعنزى وبقيه البدو المستعربه .. لديهم رائ ..مــــــــــــ كور.... فينا ....... اتمنى ان اكون قد ارحنا الحبيب ..بركه ساكن ..وهو فى متاهته حول ..التفكير بلغه ووالكتابه باخرى ..فهاهى خيولنا ستعود بالسلب الكبير ...كونوا معنا ...وبرضه .. |
قرقاش : معليش بس بدون مكابرة امسح رائك داك واكتبو كدا
رأيك يعني ياسيدي داير تقنعنا انك كاتبا بالطريقة دي مخصوص لأنك تعتقد بعدم عروبتك ؟ يعني عندك موقف من اللغة الصحيحة ؟ طيب ما تكتب بالسودانية القديمة !! والموضوع ماعندو علاقة بهؤلاء ولا حاجة أحمد طه موضوع الأخطاء الكتيرة دي محتاج للنوعية دا من الكتابات كن بخير |
احمد طه سلامات
الاخطاء اللغوية والإملائية كتيرة ولا ضير في التصحيح والتوجيه بس الناس بتكتب بي استعجال لاسباب كتيرة يعني بتكون اخطاء غير مقصودة بس تصحيحك مهم جدا والله يا احمد عندي ام تصحيح لغوي للنطق :D لكن في النهاية الزول بستفيد تشكر |
حبيبنا دكتور اسامه لك التحيه والاحترام ...
معليش وبدون مكابره واصرار على الخطاء اقول ... الكلمه كده توصل الغرض المطلوب منها ولا لا ..يعنى مفهومه ولا لا .. |
اقتباس:
أقول ليك حاجة.. والله أنا توقيعك ده ما قريتو !! بعدين انت متوّر نفسك في شنو؟؟ أنا موضوعي كان بسيط و واضح ، ما جبت سيرة عروبة و لا رطانة ، و كان كلامي عام ، قلت يا اخوانّا (رائك) دي غلط ، إملائياً و لغوياً، بس!! و افتكر ما فيها حاجة إنو الناس تتناصح و تصحح بعض .. أما حكاية (من اين أتى هؤلاء) .. فنفس الدرب الجابك جابني، ده كلام ده يا راجل;) لك قواسيب مودتي.. |
اقتباس:
وياخي والله مافي زول قاصد يطلعك غلطان ... لكن كلنا دايرين كلنا صاح ياخي أخوك محاسب ... كان يتمنى يكون دكتور لولا ضيق ذات الراس ياخي ابقى طيب |
سلامات احمد طه
عندى مشكلة فى الهمزة تحياتى |
اقتباس:
أم التيمان كيفنك .. الهمزة مشكلتك فيها شنو؟ إذا المسألة يكتبوها كيف حتلقي شفت+ا =أ،، و شفت +غ=إ .. و البقيات واضحات ،، أمّا يكتبوها متين ، فهمزة القطع بتكون مكتوبة فوق أو تحت الألف في مثل (أحمد) و (إبراهيم) و بتكون ظاهرة في النطق ، و همزة الوصل لا تكتب بل يُكتب الألف بدون همزة و بتكون ملغيّة في النطق زي جملة (همزة الوصل) لاحظي في النطق إنك انتقلت من التاء في (همزة) إلى اللام في (الوصل) بدون ما تنطقي الألف ، عشان كده سمّوها همزة وصل.. مودتي اللتي تعلمين |
ادعو الله ان يجعلنا ممن يسمعون القول فيتبعون احسنه ...
وعليه فلقد عدلنا التوقيع وجعلناه بالياء...بدلا عن الهمزه .. كفانا والله واياكم شر الهمزه اللمزه .. |
اقتباس:
تسلم يا غالي |
الاستاذ الدكتور النور احمد يطرح السؤال التالى ..
لربما كان من المناسب أن أشير هنا، إلى أن الهضبة الحبشية، رغم اتصالها الأقدم بجزيرة العرب، ( لجاء اليها العرب عند ظهورر الاسلام..) بقيت على لغتها الخاصة بها. وهي لغة تدخل ضمن المجموعة السامية، في حين تحول أهل كوش، رغم اتصالهم الأحدث، نوعاً ما، بجزيرة العرب، من كوشيتهم، إلى اللغة العربية... انا لااسال عن تمسك الاحباش ...ولكن عن تفريطنا نحن ... |
اقتباس:
[color=00008B] مافي زول فرط في شي يا دقلاش... كل زول بتكلم لهجتو الورثها من ابّهاتو و اجدادو، الحلفاويين و المحس و السكوت و الدناقلة و البجة ..الخ عندهم لهجاتم المورثة من كبارم ، كذلك الشايقية و المناصير و الرباطاب و الجعليين و الكواهلة و البطاحين و الشكرية ...الخ ورثوا كلامهم من أجدادم.. و ربّنا هو الخلق الناس شعوب و قبائل ، و قال (و جعلناكم شعوباً و قبائلَ لتعارفوا، إن أكرمكم عند الله أتقاكم) , و قال ( و من آياته خلق السماوات و الأرض و اختلاف ألسنتكم و ألوانكم) فعليك الله يا قرقاش ما تقعد تنقر في الوتر ده لأنو مسيخ و ما منّو مصلحة..[/size[/color]] |
أحمد طه
سلام وتصوم وتفطر على خير شكراُ لك على تصحيح رأيك ولكن المشكلة الكبرى عندنا نحن السودانيين هي نطق وكتابة حرف " القاف"الذي نقلبه بقدرة عجيبة إلى "غين"، فنقول الاستغلال ،بدلاُ عن الاستقلال، وفعلاُ نطق القاف صعب إلا لمن تعود عليه، بدليل إنو الواحد ممكن بدل يقول غايتو يقول قايتو. حرف القاف ليس مشكلة لنا وحدنا،بل لشعوب أخرى فالمصريين بعضهم طبعاُ ينطقونها كاف، فيقولون "الكاهرة" بدل القاهرة، والعرب أيضاُ ينطقونها مثل "جيم " المصريين. دمت بخير. |
اقتباس:
هي لخبطة نصاح يا السر اخوي! زمان كانت محصورة في الفانانين و أنصاف المثقفين ، ما زلت أذكر عثمان حسين وهو يغني في نشيد بلادي أنا ( فأنت دمي ، كلّ ما أغتني !) بغين بيّنة لا مراء فيها !! أو ابن البادية في ليلة السبت (هل أبلغوك وشايةً كذبا ، يا حلوتي عني فصدّغت!) غين ما فيها مغالطة ، و الغريبة إنو المثالين الذكرتهم ديل تسجيل الاذاعة، أما الآن فالقصة باظت مرة واحدة ، الجرايد ، التلفزيون،الاذاعة ،، يشهد الله في أكثر من مسجد صليت خلف من يقرأ (إهدنا الصراط المستغيم) أها شنو ليك؟؟ |
اقتباس:
والله يا قرقاش أنا من أمدرمان أب عن جد .. لكن أحمد طه وشلتو ديل والله ما عارفم .. هسة كلام أسامة ده ما زعلك .. هو ذاتو من هؤلاء :D:D:D ياخى عرب وعجم شنو ولغة .. أنا ذاتى متلتل .. الخطأ فى النطق .. زى ما قال أحمد طه (رأيك ولّ رايك) الإتنين لافقات .. تعرف فى المدرسة كان معاناعربى من الجزيرة .. كان بناديى رئفت .. كنت بتغاظ شديد .. قام فى واحد تانى نادانى مرفت .. قلت ليهم أخير رئفت .. تعرف النقد لأنه فى التوقيع زى ما ذكرت .. لاكن كان حشوة .. فتش كتابتى على قفا من يشيل مليانا بالبدع .. حقو أدور شكلة مع الإدارة ونرجع لمدة ساعة للتعديل .. أها أنا أمدرمان أنت من دنقلا العرضى .. |
اقتباس:
رأفت ضحكتني لامن دموعي جرت ! ذكرتني نكتة رواها الجاحظ في (البيان و التبيين) قال : قال مولى لزياد : أهدوا لنا همار وهش ، يريد حمار وحش ، فقال زياد : ما تقول، ويلك ! قال : أهدوا لنا أيراً ، يريد عَيرا ، فقال زياد الأول أهون ، و فهم ما يريد ! دحين زولك بتاع (مرفت) ده بالغ فيها gooodgooodgoood |
حبيبنا احمد طه ...على فكره فى احمد طه لقبه جنرال ياهو انته . ولا .اسم على اسم ..؟
قلته لى ...مافرطنا ..وقلت لى ده وتر مسيخ ... من ناحيه فرطنا هاك المعلومه من ويكبيديا . النوبية هي لغة نيلية صحراوية من الفرع السوداني الشرقي في جنوب مصر وشمال السودان، وكان معظم الناطقين بها يسكنون في وادي النيل في ما أصبحت بحيرة ناصر بعد بناء السد العالي جنوبي أسوان. وعدد الناطقين بها حوالي مليون نسمة. بين القرن الثامن والقرن الخامس عشر م، كان النوبة يكتبون لغتهم بلأبجدية القبطية بإضافة بعض الحروف. لكن الآن لا يكتبونها إلا قليلً، ومن يكتب النوبية يكتبها بحروف عربية أو لاتينية. ولهجاتها هي: المحسية (أي "نبـيـن") والفاديجا الدنقلاوية (قرب مدينة دنقلة) والكنزية في مصر الميدوبية في جبل ميدوب في دار فور لهجة البرقد قرب نيالا (منقرضة) لهجات جبال النوبة النوبية العتيقة (في القرون الوسطى)، وأشهر المخطوطات فيها "معجزات القديس مينا" وهاك الصوره دى ... [img]http://www8.0zz0.com/2010/08/12/09/755532147.jpg[/img] من ناحيه المساخه ...والله المساخه من الزول الذى استلبنا ثقافيا .. مش مننا نحنه الدايرين نرجع حقنا اما من ناحيه الاغانى مثلا ..على راى عادل امام .....ماهو عبد الحليم بقول .. اولوو الووو اللوو ..ولا حد بيكلمه يعنى ... اشمعنى ابن الباديه ...؟ وحتى العرب ..شوف الكوايته والريايل ..الذين يطرشون الكلام ..وووو يااخوان ان ماعندنا هو لغه سوداناويه نفتخر ونعتز بها وهى اختراع وابتكار محلى من ابتكارات اهلنا العظام وهى بتادى غرضها تماما ...انتوا الحارق رزكم شنو ...؟ نحنه سوادنيه ماصلين ومفصلين ولينا تاريخ وكتابه وارقام وكل ده مكتوب فوق الصخور ...للعاوز يغالط ... المبدع رافت ...نعم اخوك اصوله من ضواحى دنقلا ...يعنى دنقلا ذاته نحنه من اقاليمها وفينا شويه عرق بتاع حلب .....وان كنا نبحث عن مجد دنقلا الضائع ... اماعن امدرمان فانا من مواليد الخرطوم .....القشاشه ...مكاان نمره اتنين الحالى ... |
حبيبنا قرقاش، حياك الله مع الأسف أنا لا جنرال و لا ميجر ، زول مسكين ساي ، الجنرال داك زول قاعد فوق عزّو! طيب ، من ناحية التفريط، ممكن أوافقك إنو القبائل النوبية غير الناطقة بالعربية حصل منهاتفريط ، تجد منهم الآن (بالذات ناس الخرطوم) من لا يفهم كلمة واحدة من الرطانة ، أمّا الكتابة النوبية فدي انتهت بدري خالص. لكن القبائل العربية السودانية مابنقدر نقول حصل منهم تفريط ، لأنو دا ياهو كلامهم العارفنّو من جدود جدودم ! في تاريخ البشرية كان في فترات من القحط و الحروب أدت لي هجرات واسعة ، ليه نستبعد إنو بعض القبائل العربية هاجر أسلافها إلى السودان قبل قرون طويلة بحثا الأمن و الكلأ و طاب لهم المقام في البطانة أو غيرها من أنحاء السودان ، ثم تزاوجوا و اختلطوا بأهل المنطقة حتى يأمنوا شرهم و حتى يكتسبوا حقوق المواطنة، و مع ذلك احتفظوا بلغتهم التي جاءوا بها ؟؟ المنطق بيقول كده.... بعدين ياخي الأغنيتين الأنا ذكرتهم مكتوبات باللغة العربية الفصحى ، فحقّو الفنانين يراعوا الحتّة دي و يحاولوا يعوّدوا ألسنتهم على المخارج الصحيحة لحروف اللغة العربية ، و لأنو برضو تغيير حرف واحد ممكن المعنى كلّيا ، مثلا (أغتني) معناها غير (أقتني) ، الأولي يعني يبقى غني، عكس فقير ، و التانية يعني يتملّك أو يحوز تحياتي |
| الساعة الآن 10:06 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.