المجانيـــن في يقيـــن ....
في كل الزوايا ،،
الحلة ، السوق ، اطراف الشوارع ، نواصي البيوت ، شوارع الظلط .. هم خطر الحلة وهمها أحيانا .. وفكاهتها و ضحكتها أحيانا أخر .. لكنهـــم بركتها ، رحمتهـــا تنزل لهم فتتفرق على الناس .. لاتخلو منطقة من مجنون ، وكأن القدر اوزعهم ان ينتشرو في الأرض ،، ليريهم من آياته ... نستوجب الحمد ، ويستوجبون التأمل .. |
اولاد تـــش
اولاد تـــش ،،
اربعـــة وخامسهـــم دربهم ، يسيرون في صف واحد ، حفاة عراة متطاولين في البنيان ،،، عزوز و كرملة و برينسة و طحنية يقال انهم كانو من زينة شباب الحي ولكنهم سختو ، والسخت رواية .. ورواية اخرى تقول كما يرويها الطيب سيد الكارو : يازول ها ماتسمع لي كلام زول ، الناس ديل لا (......) بنات جوة قبة الشيخ لاشي ، الناس ديل بارو الود اكرم كرملة دا وجاب ليهم (بنقو) من الغرب ، لفوهو وأظنهم ماكسروهو ، وإنضارو في كشك انصاف ست الفطور وشربوهو وودربهم .. يخبرني وانا يمينه وإنقرط للحمار : ياخ الشيخ دا ميت آ زول كيفن يسخت ليهو ناس ؟ لكن ياالطيب ياخ إتا مامقتنع بي الشيخ دا والا شنو ؟ ينفخ بين شفتيه في إستياء : شياختو طايرة فوق قبتو دي . وعند الجيلي حارس البيارة : يازول الناس ديل ساقو بنات من جمب الكمائن وخشو بيهم بعد المغرب قبة الشيخ واول مابدو دخل واحد طويييل وعريييض وشعرو جاري بالواطة وعندو جناحين سغار أظنو حوار القبة ، ولما ليك فيهم تشتيت في يدينهم وكرعينهم وفوق حاجاتهم ، وقامو كدي جاريين يكوركو تـــش تـــش . ولي الليلة اسمهم اولاد تـــش . طيب ياالجيلي انا الطيب قالي ان... يقاطعني : الطيب دا بارا لي انصار السنة ديل مابينفع آزول تاني . بس ياالجيلي كلامو منطقي ؟ واردف مداعبا : بعدين انصار السنة ديل ناس كويسين ياخ يمص اصبعه الأوسط ويرفعه امامي : طظ |
عــــــزوز
او عبد العزيز كما تناديه امه ,,
ذلكـ الأسمر الكناري الذي لا يشيب ،، من اول مرة اراه فيها وهو يتربع خلف (علــم) ست الشاي ،، يتأمل (القاسمة نصها للمبمر ، شان يرتاح بينات رجلينا) غير آبه بمئات الصارخين في النادي والمتابعين لنهائي كأس العالم (البرازيل وألمانيا) ،، منذ تلك المرة وأنا ارى فيها هذا الكناري اجده كما هو ،، لم يتغير ،، ولا حتى بنطلون الجينز الذي يزعم الجيلي انه دخل به للقبة حين اراد فعل فعلته فيها قبل ان يسخته الشيخ .. عزوز هادئ جدا ، لا يتحدث مع أي حد ،، كل مايفعله هو السير ورأسه في الأرض ، لا يرفعه الا اذا راى (توب او طرحة) ،، وهذه هي مشكلته الوحيدة ،، ماإن يرى عزوز اي (مرة) الا ويتبعها غير محول بصره عن ظهرها .. وهذا ماسبب له كل هذا الكره في الحلة . رغم ان عزوز هو الرجل الوحيد الذي يتبقى في (الحلة) صباحا ، الا انه لم يتعرض لأي من نساء الحلة يوما ،، وغاية مايفعله هو ان (يتدبى) والجزارة زحمة ليقف خلف الحريم في طربيزة الخضار ويمد يده بتلك الورقة البيضاء ل(مهدية) في صمت .. لتزجره بعضهن وتتركه بعضهن حتى يملها ويقف خلف أخرى .. هذه العادة كادت ان تفقد عزوز عينه بضربة سكين من (حامد الكهربجي) عندما انهال عليه ضربا قبل ان يخرج السكين ويضربه في وجهه وهو يزمجر : انــــا بكتلك بكتلك الليلة . يتدخل بعض الحضور : حامد اقيف صلي على النبي يازول مالك ؟ ويجرونه من فوق عزوز وهو يزبد غضبا ويقول (صيج ليها انا شوفتو) ومابخليهو بكتلو . بعدها اختفى عزوز قرابة العام ولم يعد الا عند وفاة والده ... |
في انتظار كرملة وبرنسية وطحنية و دربهم همسيلف
أكتب |
نسيت أقول بسم الله بسم الله
خلاص واصل ياخ فالنوم ما داير يجي ولا قادر أمشي ليو والحل؟ ياخ أنا مستمتع بالحكي الطاعم دة حتي تمنيت إنو أكون عزوز صأحب الصاجة ذات نفسو:D |
اقتباس:
بس والله الشغلة ماساهلة كلو كلو ... عشان كده سحبتة رايى ليك بانك تعمل مجنون !! ده لو انت ماوصلته المرحلة دى ...لسع :D |
محيو ....
اتا زاااااتك مجنون ياخ !! |
مُحيي سلامات
ياناس يا أناناس ما تدفسوا البيض كلوا في مُخلاية واحدة بتفجخ و الدنيا قبايل عيد . . .أها يعني نخبز بـــِ شنو؟ محيي، أميري، سمراء، . . . بس فضلت البت الشافعة ديك الله يطراها بالخير و تزور المصطفى . . .وحدوه هــــــــــيه ما دائم إلا وجهه كريم اها فردة فردتين، دور دورين كدا و بجيكم راجه. |
ادفق يانمر ماتبقى رقراق .........
وماتنسى ترانيمهم التي تحمل حكمة لاتجارى ...... بالجمبة كده: بالله الزول ده صيّج وللا حامد ده حايل ساي! ;) بجيك... |
اقتباس:
بس الحل بسيط ، اعفص الريموت افتح قناة السودان والله تنوم نوم مع الصيام دا اقتباس:
شكرا حد سعر السكر وطعمو وشكرا طن وطنين هوادة ياقريب وخليك قريب .. اقتباس:
تجي قدامنا (....) مرت (...) المحامي ، وكعادتها لابسة توب الشفون الخفيييف داك ، ذي طرقة الكسرة بل أشد خفة ، وقميصها الحدو نص الساق ظااااهر ذي ضنب الغنماية وريحتها اسكت ساي نحنا اتلبشنا خليهو عزوز ، المهم تجي وتقيف في الجزارة ويجي عزوز يقيف وراها ، بعد شوية عزوز يقبض ليك المرة ويدق بيها الواطة وماشاء الله كنكش فيها المرة الكوراك غلبها والله ياأميري أي زول كان في الحلة ديك حاول يقل عزوز من المرة وهو مكنكش فيها ذي القرادة ، وبدون اي مبالغة أربعة رجال ال1 فيهم 4في4 إتنين بجرو في عزوز وإتنين بجرو في المرة ، ولااااا حركوها قيد انملة ، لحدي ماعمك شيخ الصافي سل سكينو بي غضبة جعلية وقال داير يطعنو الناس بدت تحجز في الصافي والصافي مصر يطعن الزول في النهاية في واحد من الموجودين اتصل بي ناس الطارة جو وفكو المرة ودوها بيتها وساقو عزوز معاهم . بس فكوهو كيف دي ، لو قلتها ليك ح ترجع في كلامك صدقني . |
اقتباس:
المشاركة الأصلية كتبت بواسطة سمراء http://sudanyat.org/vb/images/buttons/viewpost.gif محيو .... اتا زاااااتك مجنون ياخ !! اوووووو سممممراء المجانين في يقيـــــن ياخ اريتني ان متيقن بس كيف ال1 يتيقن بعد داك الجن ملحوق :D لو بت خافي من المجانين خليك قريبة |
اقتباس:
اووو البعاتي نمبر1 لو مالقيت كمساري تعال انا بتلب معاك في الفردة فردتين دين وتعال اصلو اولاد تش ناقصين بعاعيت وجيب معاك البنية الشافعة ال الله يطراها بالخير ، وتعالو ياتمشو في صف ياتمشونا منتشرين عارف ياابو حميد اولاد تش ديل عندهم حاجة غريبة جدا ، لمن يتلمو مع بعض كلهم بمشو في صف واحد !! دي أكتر حاجة محيراني فيهم ، الجيلي بقول إنو حوار القبة هو رصاهم بالصف وبدا يتش تش فيهم 1 1 بعد داك قاليهم على الفصول سر . |
اقتباس:
كدة كلام محمد عبد الرحمن في محلو كل البيض إندفس في مخلاية 1ة وكان جانا العيد إلا نشوف بيض النمل بس فضل البعاتي نمبر2 الشفيع علي الشفيع سيدنا هيثم دا كان جا ، الا العيد نجيهو مضحين تعال ياعمك دي توزيعها جديدة وأقطع ياخطيب |
يانمر رمضان كريم
انت مسئول من الخير الشواطين في رمضان مش ربطوهم ؟؟؟ وتييييب ,,,,,,,,.. شيطانك دا من ذوي الاحتياجات الخاصة ولا فاكنو بضمانة looool غايتوا قرينا والذنب علي صاحب البوست ;) |
اقتباس:
بعد الضغوطات العايشا انسان بلادي افتكر الجنون راحة حسع اي واحد ماشي ويتكلم براهو.. فضل شنو من الجنون..؟؟؟ القفة جابت اللفة ودوار العقول ثم ماذا بعد المجنون دا الايفلع يعني..؟؟؟ |
اقتباس:
الله أكرم ياوجيدة الشياطين ذاتها ما انواع سمعتي بالشيخ القال داير يطلع فتوى الإختلاط في المواقع الإجتماعية ؟ اها دا شيطانو يكون صغار سن ؟؟ عارفة ؟ لو إتلقى نص اليقين الموجود عند المجانين وإتوزع لأكتفى الناس كأكتفائهم عن الأكل في نهار رمضان ،،، لو رأيتي كرملة وهو يرتدي أكياس النايلون ويجلس في كشك إنتصار (يلحوس) بقايا الطعام المكشوحة له في إحدى أكياس النايلون وإبتسامته تتخطى حواجز الروح ، او وجدته وهو ينام تحت الكارو المنكفية وقربه صاحبها يجتر شيئا ، او حتى قناعة عزوز التي لاتتخطى ماذكرت ... شكرا على المرور وجيدة |
اقتباس:
مرافي إتي أكيد لسة مابتكوني مشيتي السوق ؟ انا اقوليك امشي السوق وشوفي كمية الشحادين في السوق ، وأوعدك ح تجي راجعة بأكتر من خمسين نوع من انواع الشحدة كل نوع له قواعده ، وكمية الشفع البيبيعو في السوق شي ليمون وشي أكياس وشي فرشتين والتالته هوادة أمشي عشان تعرفي إنو والاااااااااهي المجانين في يقين اقتباس:
ككككككك طبعا طحنية دا مشهور جدا بإنو زول نياش نيش جد ، حتى في بعض الناس بسموهو فلسطيني ، والشفع كانو بشاغلوهو (طحنية ود الجنية) ويقومو جارين الساعة يامرافي الإرفع ليهو نص طوبة إتأكدي إنو رفعو شافع في الإسعاف دوووق بختها في عنقرة الشفع . المهم ولي كلامك شان تشوفي يوم مدير المدرسة الصباح طلع عامر اخو طحنية السغير وطردو ودقاهو معاهو كم نفر كدة عشان ماجابو الرسوم ويقوليهم المابجيب ولي امرو مايجي داخل ، يازولة وطحنية شاف أمو داقة جرس في البيت جاليك جاري للمدرسة ولسوء الحظ لقى ليك الطلبة في فصحة الفطور ، والأساتذة والأستاذات قاعدين تحت الشجرة بيفطرو خشا ليك المدرسة ورفع ليهو كم حصحاصة وعينك ماتشوف إلا النووووور بعد دقيقتين المدرسة كلها طلبة واساتذة وإستاذات محشورة في فصل وااااااااااحد لحدي ماجات امو مرقتو واليوم الدراسي تم . قلتي لي إلا يفلق كككككك |
محي الدين النمري
رمضان كريم وتصوم وتفطر على خير(كيف مع السكر المافي والموية القاطعة دي...مش؟؟؟) جابني الدرب وقلت أشوف الناس الحلوين الأنا بحبهم وأمس القرييييييبة دي كنت بشتري في الخضار من الملجة لو في زول شافني وقرّب مني ، كان صنّفني منهم... (ياخ تتكلم مع روحك وتنهّرا قدام الناس..... دي حاجة سمحة خلاس) أهاااااا ما أطوّل عليك وأصلي ماني مطوّل لقيتك جايب سيرتي قلت كان كدي بدل نتفرج ونستمتع ونمرق ساكت لاحس لاخبر النقول لي الزول دة: أنا فارقت خرطوم السجم ورجعت الخلا ، وعشان كدي بتلقاني متوفففففر كان الله هون من الليلة ولي غادي بس إنت تعال واكتب ساي مودتي التي تعلم |
بسم الله الرحمن الرحيم
الله يا محى الدين على هذه المَلَكْه .. حين يقوم اليقين مقام الشك وتكون بشائر النصر هى عين الهزيمة .. ماذا نتحسس !!! وكيف لنا أن نقرأ الأحداث من زوايا رؤيتهم النافرة وجوانب عقلهم المرهق .. أكتب يا محى الدين .. عن عموم الفكرة مستنداً على هذه النماذج التى تفضح يقيننا وعقلنا ... شكراً محى الدين |
" وآآه ياكوستي ....... نارم حية ........ مرارة وشية .............
الدرب عااااااالي وأرمي المداااااري" عقيرة مجلجلة ........ وطنبور ناشز منشز ,,,, ود مجذوب بحوم الطرقات بسوق كريمة ................ - الزول ده من وين ؟ - من كوستي - ومن كوستي الجابو كريمة شنو ؟ - والله ماعارفين ناس يقولو راد ليهو بت هنا وناس يقولو غير كده - أها جنّا وركب الظلط ....؟ - أيوة أهلو جو من كوستي بالسيرة والأخبار لقوهو هنا ساقو معاهم ... بعد 6 شهور لقينا بطنبور عندنا هني!!! - جا كيف راجع ؟!! - حسي كلامو جا بكرعيهو ...!!!! ويمر من أمامنا بخطواته الايقاعية الراقصة وطنبوره النشاز وهو يردد: "آآآه ياكوستي .... نارم حية .......... مرارة وشية ...... الري عاااااااالي .... وأرمي المداري ......... آآآه ياكوستي" |
مرة سألت زول
- هل المجنون بكون عارف نفسو مجنون ؟؟ - طبعا لا - يعني الناس الحوليهو هي البتحدد انو مجنون وهو بكون شايف نفسو مامجنون ؟؟ - ايوه طبعاً - طيب البضمن لينا شنو انو نحن ما مجانين :confused: |
سلامات يا نمر
قالوا واحد لستك عربيتو بنشر قدام مستشفى المجانين .. فك العجل .. طلع الإسبير لقاهو منفس .. دردق العجل للبنشر صلحو وجه راجع .. سلقط ملقط ما لقى صواميل العجل .. وقف متحير .. واحد مجنون قاعد فى الشباك مصور الحكاية .. قام نادى الراجل وقال ليهو (فك صامولة من الثلاتة عجلات وأربط العجل .. بتوصلك تلقى الصواميل الناقصة) .. الراجل أتهجم وقال ليهو (كلامك حكمة والله .. لكن أنت موش مجنون) .. رد عليهو (آى مجنون لكن ما غبى) :) موش أمكن يا نمر الجماعة ديل شافو الما شفناهو .. وعرفو القصة فشنك ساكت .. |
ويروي بعض سكان كسلا عن مجنون كان يقطع شوارع المدينة جيئة وذهاباً وهو عارٍ كما ولدته أمه ، وأحياناً يخصف عليه من بعض "الدلاقين" ليواري سوءته...
ذات أمسية شتوية.. أحس صاحبنا بالبرد فدخل بدون إصدار أي صوت للمسجد وافترش أرضيته والتحف مجموعة مفارش قربه ، ونام قرير العين هانيها ولما كان آخر خارج من المسجد -بعد صلاة العشاء- لم يلاحظ وجوده أحد في الفجر حضر المؤذن والإمام -كالعادة- مع بعضهما للصلاة وقبل وصولهما سمعا أصوات جلبة وصياح وخبط على الأبواب من داخل المسجد الذي كانا متأكدين أنه أُغلق فارغاً... بما تبقى لهما من شجاعة إقتربا أكثر من الباب الذي كان صوت الطرقات يتعالى منه وسأل أشجعهما : دة منو؟؟؟؟ أجاب صاحبنا بغضب واضح : عيسى بن مريم ............. ........... في ذلك اليوم لم يصلِ الناس الصبح في المسجد لأنه كان ..........مغلقاً ___________________ مشيت وين إنت آ سيد البوست؟؟؟؟ |
تحية ليك محي الدين
رايع بدون شك اولاد تش مثال حي لكثير من امثالهم المنتشرين في كل الازقة والحواري لهم فكاهة خاصة ممزوجة بالحزن علي حالهم المرير ولكن هي ارادة الله وله فيها سر لا يعلمه الا هو لك التحية مجددا واصل متابعين ومشدودين معاك |
اقتباس:
آلشفيع علي الشفيع رمضان كريم ياصاحب تصوم وتفطر على خير ،، ياخ في خلاكم داك اللحم متوفر بكثرة ومجاني عديل قالو ،، أضرب الشية وأتقي الله . عارف بمناسبة الشية دي برينسة دا ماشاء الله طول وعرض سموهو برينسة عشان قالو مرة شارطوهو : إدوهو نص عرقي ويرفع البرينسة عشان يدقرو ليها بي الحجر وصاحبك كان اظنو ماعندو حق القزازة فقالو ( والذمة عند الرواة) انو هب أمسك البرينسة ال86 وهب ارفعا ياعمك من ديك سموهو برينسة ،، طبعا في رواية تانية بتقول برينسة دي جاية من برينسيسة ( ظاهر انو كان مدمن قبال مايجن صاح ؟) المهم فبرينسة جنو شراط ومن زمان قبال مايجن ويبقى مجنون رسمي كان بيشارط بي اي شي وممكن عشان خمسة جنيه تشارطو يسوي المابيتسوى وماشاء الله شفت اللعيبة بتاعين البلي استيشن المصنعين بكونو عاملين كيف (ناس يايا توري وبوكا وقروسو بتاع ايطاليا داك ) ستة في ستة ، المهم ياعمك مرة الغسال شارطو انو يغسل ليهو الهدوم القاعدة في الغسال كلها وكانت تجيب 6 دست اظنها عمك برينسيسة قعد اتفرجخ ليك في البمبر وشت شت شت شت الساعة اتنين كانت الحبال كلها مليانة وسرير الغسال زاتو مليان ،، بس عارف كان مشارطو بي شنو ؟؟؟؟؟ للأسف كان مشارطو بي انو يشبعو بس (يأكلو لمن يشبع ) وللأسف مرة تانية الغسال خسر كل القروش الكسبها في الإسبوع داك .. بجيك لي قصتو مع الشية تاني . |
داير اتجنن امامك داير انصح مانى قادر !!!!looool
ديل ما مجانين ياااااااااااخ...ديل ناس مسبوقييييييين بكم ركعة كده يااااااخ وكايسين التمامة...لو مغالطنى اربط ليكا فكرة فى جناح حمامة:cool: كل سنة وانتا طيب ياااااااااااخ..يا محى التين عنب تمر |
اقتباس:
تحيات ،،،،، تملا الساحات ،،، نعم انهم في يقين ، ويقين متفرد القناعة ، وافر الكمال .. يقول صاحبي : درجتهم بعد الأنبياء أقول كيف : يقول : انهم في حالة من السمو الروحي ، أرواحهم تفرغت لشئ في الطبيعة (لا ادري ماهو) ، وأجسادهم مثلت فوضى الأرض ،، أقطعه : لكنهم مجانين وليسو دراويش ؟ يقول : السمؤ الروحي ليس حكرا على حلقات الذكر (الطبيعة أكبر من ذلك ) ،، هناك ارواح تعلو لأشياء أخر ... يتمتم بالقرب منا أحدهم وكأنه يفهم حديثنا او بالأصح يشاركنا : يارب بهم وبآلهم دق دق دق .... |
اقتباس:
الترانيم دي عجيبة جدا ،، عارف لمن كنت ساكن الدروشاب كان في مجنون اسمو جمايكا ،، شعرو مضفر كدة (وماتسألني البيضفرو ليهو منو) لأني ماعارف ومحتار لحدي هسة ، المهم الزول دا كان من اولاد الجنوبيين ديل وكان بيغني بي صوت عالي وبي صوت جميل جمال ماعادي ،، وأنا واحد من الناس الكنت بلقط ليهو القرع من الجزر الجمبنا وبوديهو ليهو (الوكت داك انا في الإبتدائية) وبقعد على مسافة منو كدة وبقعد اسمعو بيغني .... يااااااااامهند من صوت جمايكا ،،،،، ويااااااااجمايكا من الحانو البيغنيها .. في يوم شافني دكتور محمد ازهري (طالب الطب الوكت داك) وناداني : اتا قاعد هنا مالك ؟؟ ارد : الزول دا غناي جدا ياخ يقول : انت عارفو بقول في شنو ؟ احك يدي بي راسي (اخوك من سغير مثقفاتي ياخ كككك) واقوليهو : والله ماعارف يقول لي : دي ترانيم الكنيسة .................. دا كان سبب من أسباب دخولي الكنيسة وأنا في أولى ثانوي |
اقتباس:
الأغبش يا أغبش سؤال منطقي صدق ؟ عارف في بداية قصتي عن أولاد تش كتبت الروايتين بتاعات اسباب الجنون ،،، المشكلة كانت في شنو عارف ؟ أول شيخ مشو ليهو قاليهم : (الناس ديل مامجانين الناس ديل ودوهم لي دكتور) اول دكتور مشو ليهو قاليهم : (الناس ديل اتناولو كمية كبيرة من مادة أثرت في العصب بتاعهم) عارف الكنتة كانت وين ؟ لما فحصو ليهم الدم لقو المادة الزايدة هي مادة الكولا !!!!!!!! وانا اقول في عيد الضحية نحنا بنكون متيقنين كدة ليشنو كككككككك اعمل حسابك ياصاحب خليك اغبش واقع الشربوت دا بس ككككككك |
اقتباس:
قالو واحد من الخلفاء لاقى مجنون في الطريق ودار بيناتهم الحوار دا : -من ؟: -انا الخليفة -اانت الحكيم ؟ -انا الخليفة الحكيم نعم . -سأسألك سؤال ياحكيم ، اتجيبني ؟ -ان شاء الله -متى نشعر بمتعة النوم ؟ اجابه الخليفة بثقة - اثناء النوم . لم يفكر المجنون فسأله مرة اخرى -لكن النوم موت فكيف نشعر ونحن موتى ؟ اجابه الخليفة : -اذن نشعر قبل النوم ؟ فسأله وهو يهم بالرقاد : - وكيف نشعر بشئ قبل ان نجربه ؟ احتار الخليفة وقال : -اذن بعد النوم . تثائب المجنون وشد عليه غطاءه وقال : - كيف نشعر بشئ بعد ان ينتهي وغط في نومه فقال الخليفة : والله لا أخاطب مجنون بعد اليوم . |
اقتباس:
عارف ؟ والكلام دا حقيقة والله ،، في مصحة بحري المنها وإتا داخل المنطقة الصناعية ،، يحكي لي 1 صاحبنا ويقول : كانو عندهم شغل فيها اوكلتهم بيهو منظمة عالمية بتهتم بالمرضى النفسيين ،، من ضمن الحاجات المفروض يعملوها إنو يملو بيانات في فورمة فيها 21 سؤال يحاولو يحصلو على إجاباتها من المريض ،،، أثناء مالافين على العنابر ناداهو واحد من المرضى قاليهو تعال ياخ . إتو شغالين شنو ؟ - نحنا عندنا إستبيان ، يعني بنسأل اسئلة كدة والناس بتجاوب . - وإتو تابعين لي وين ؟ - نحنا مكلفانا منظمة عالمية . - كدي اديني ورقة الأسئلة دي ؟ -إتفضل طوالي . يحكي صاحبنا ويقول : انا كنت خايفو يشرط الورقة والا يشيلها يقوم جاري بيها نبقى في المساككة ، لكن الحيرني جدا إنو كان بيقرأ في الجهة المكتوبة بالإنجليزي وكان بيقرأ بي صوت وبي لغة عالية جدا . بعد ماإنتهى من القراية ومد لي الورقة قال : هاك امسك ، في سبعة اسئلة ناقصة وديتوها وين ؟؟؟ يضطر صاحبنا والمجموعة كلها إعادة الإستبيان لأنو المنظمة رجعت الأوراق بعد إكتشفو إنو في سبعة اسئلة ماأدرجت في الأستبيان !!!!!!! |
اقتباس:
اقتباس:
عيسى هيمسيلف ككككككككك لكن صدقني دا مامجنون دا إستثقل الهدوم سااااي أكرم كرملة وهو من (ابناء الذوات) كما يقول عنه حسن حامد المثقفاتي محللا شخصيته او كما يدعي : الود كرملة دا تأثير ضغوط والدينو عليهو كان ليها اثر كبير في المرحلة الوصل ليها دي ، وانا بتذكر كيف كان ابو أكرم دا بينهرو لمن يلقاهو يلعب معانا في الشارع ، وطبعا كان بشوف إنو الزمن البيضيعو معانا دا احسن ليهو فيهو يقرأ معهد التعليم البريطانية لغات او كمبيوتر ، ونحنا الوكت داك مابنعرف التكتح شماشة سااااي ، كان ابوهو بيفتكر إنو القروش الكتيرة دي ممكن تضيع لو ماأكرم شد حيلو ولحقو في السوق ، والعارف لي تاريخ والد اكرم دا ، بيعرف كويس إنو كان من اصغر الناس الدخلو سوق الدهب دا وإستمرو فيهو ،، بدأ والد كرملة صبي صايغ وبعد داك بقى يبيع دبل فضة ، وكان بيجيب ابو مرين وهلم زينة ، لحدي ماكون نفسو في السوق وبقى تاجر كبير ودا السبب الخلاهو يعرس متأخر فماكان عندو نصيب من الذرية إلا أكرم كرملة ،،،، ودا كان بداية المشكلة ،،، |
اقتباس:
الضغوط علي كرملة كانت زايدة بصورة ماعادية ، خوف والدو عليهو بإعتبار إنو ولد واحد ،، ونظرة قرناءه الأولاد في الحلة والمدرسة ليهو بإعتباره (سحسوحة) ،،،،،،،، وغيرها ،،، دي كلها ادت في النهاية لجعل كرملة احد المدمنين لكل انواع المخدرات ،،، يواصل حسن حامد قوله : وفي يوم كان برينسة وأكرم متفقين إنهم يلفو كعادتهم في كشك إنتصار ، قبل ان ينضم إليهم عزوز وكعادته يدخل في شراط معاهم (منو البيشرب أكتر) في تحدي معروف بيسموهو (جلسة راس) يحدد الشخص الراس بآخر زول يقدر يجبد .... وكان كرملة أخفهم رأسا فكان اول واحد ودر فيهم ،،، ودي طبعا الرواية التانية لسبب جنون اولاد تش بس هي رواية فيها مايضعفها ،،، |
اقتباس:
بلونه النحاسي وقوامه المربوع ،، صدره البارز وعضلاته المفتولة ،، شعره الناعم المرمي بإهمال على عنقه الطويل ،، ولحيته الشعثاء بلون حواجبه السوداء الغزيرة ،،،،،،،،،،، به من الوجاهة مايجعل مرتادات (الجزارة) يسترقن النظر لجسده الذي كشفت أكياس النايلون جزء كبير منه ،،، يرتدي أكياس النايلون ،، مايمر عليه كيس في الشارع الا ويرتديه عدا الأكياس السوداء فإنه يقول (وجع راس وجع راس) حين يسألوه عنها ،، اذا مشى لا يظهر منه غير صدره القوي واطراف رجليه ،، اما اذا جلس فيجب ان تغض النساء الطرف خشية الفتنة (كما يقول صديقي حجوج) : يقول صديقي : ( اتا قايل الحريم ديل بنادو كرملة دا وبقعدوه قدام البيت وبجيبو ليهو الأكل حنية منهن ؟ لالا يافردة ديل (...........) دايرين يكشفو بس ) |
وبمناسبة ماقلت ياصديق:
في صباح يوم خريفي كنّا....... قاعات محاضرات علم النفس بالتجاني الماحي.... ونحن صغار لنا زغب كزغب القطا في انتظار الدكتور المحاضر ونحن نبتلع الخوف من وجودنا في ذلك المكان!!! هرج ومرج يقصد به تنفيس مايمكن من أحاسيس قطعه دخول الأستاذ المحاضر ...... خمسيني ....... لو وجه دائري ولون خمري........ ارتقى فسكت الجمع الدكاكيني عن الصخب...... -ازيكم ياشباب؟ بتمنى ليكم عام دراسي مفيد......دايرين نبدأ طوالي. واتبع قوله بتناول طباشيرة........... -عايز اسألكم سؤال هو المدخل الحقيقي لعلم النفس............ منو هو مطربكم المفضل؟ صمت قبور يحيط بالقاعة............ والاستاذ يكرر سؤاله بالحاح وهو يلوح بطباشيرته اليتيمة.......... - ياأخوانا!!!!!! منو هو مطربكم المفضل؟!!!! يااخوانا مطربكم المفضل هو زيدان ابراهيم.......! واتبعها بكتابة الاسم على البلاك بورد........... - منو مطربكم المفضل؟ يللا كلكم مع بعض........ وجمعنا يردد في حياء.......... -ز....ي.....د.....ان.....اب.....را....هيم.... - لا لا ........بصوت عالي...... - زيداااااااااااااان ابراهييييييييم........ - اعلى .......اعلى........ -زيدااااااااااااااااااااااااااااااااااااااااان ابرااااااااهييييييييييييم........ ونفاجأ بدخول رجلين من تمرجية المستشفى موجهين كلامهما للدكتور الاستاذ.... - احيييييييييييييي تاني انت جيت بيجاي ياجسطرة؟!!!!! وساقاه الى حيث تتوارى الاشياء تاركين ماتبقى من وجوهنا مضمخة بلعاب البلادة!!!!!!!!!!!!! |
اقتباس:
المشاركة الأصلية كتبت بواسطة مهند الخطيب http://sudanyat.org/vb/images/buttons/viewpost.gif وبمناسبة ماقلت ياصديق: في صباح يوم خريفي كنّا....... قاعات محاضرات علم النفس بالتجاني الماحي.... ونحن صغار لنا زغب كزغب القطا في انتظار الدكتور المحاضر ونحن نبتلع الخوف من وجودنا في ذلك المكان!!! هرج ومرج يقصد به تنفيس مايمكن من أحاسيس قطعه دخول الأستاذ المحاضر ...... خمسيني ....... لو وجه دائري ولون خمري........ ارتقى فسكت الجمع الدكاكيني عن الصخب...... -ازيكم ياشباب؟ بتمنى ليكم عام دراسي مفيد......دايرين نبدأ طوالي. واتبع قوله بتناول طباشيرة........... -عايز اسألكم سؤال هو المدخل الحقيقي لعلم النفس............ منو هو مطربكم المفضل؟ صمت قبور يحيط بالقاعة............ والاستاذ يكرر سؤاله بالحاح وهو يلوح بطباشيرته اليتيمة.......... - ياأخوانا!!!!!! منو هو مطربكم المفضل؟!!!! يااخوانا مطربكم المفضل هو زيدان ابراهيم.......! واتبعها بكتابة الاسم على البلاك بورد........... - منو مطربكم المفضل؟ يللا كلكم مع بعض........ وجمعنا يردد في حياء.......... -ز....ي.....د.....ان.....اب.....را....هيم.... - لا لا ........بصوت عالي...... - زيداااااااااااااان ابراهييييييييم........ - اعلى .......اعلى........ -زيدااااااااااااااااااااااااااااااااااااااااان ابرااااااااهييييييييييييم........ ونفاجأ بدخول رجلين من تمرجية المستشفى موجهين كلامهما للدكتور الاستاذ.... - احيييييييييييييي تاني انت جيت بيجاي ياجسطرة؟!!!!! وساقاه الى حيث تتوارى الاشياء تاركين ماتبقى من وجوهنا مضمخة بلعاب البلادة!!!!!!!!!!!!! كككككككككككككك لكــــــــــن والله جسطرة جسطركم ،،، عـــارف لو كنت مكانكم كنت بتمنى لو جسطرة تم المحاضرة صدقني كان مرقكم وسط الزهور وصوركم ككككككككككك بس ذكرتني بي حكاية جسطرة دي حكاية ود اللذين الإسمو برينسة ،، قبال مايجن زي الناس وفي دروشتو المصطنعة ، يلم ليهو كم نفر من الحلة و بيلفو في الحلل المجاورة ويقولو : (القدس القدس يامسلمييييييين ،،، القدس القدس يامسلمييييييين ،، ايييييين صلاح الدين ،، القدس امانة في اعناقنا ) ويدقو الأبواب : ( نحنا ناس منظمة تحرير القدس دايرينكم تتبرعو بي أي حاجة ، ان شاء الله ملابسكم القديمة ) أذكر ان عبد الباسط يوم الجمعة (بتو ادتهم بنطلونو (بسكويتي اللون ) )كما يقول ، وإشتراهو من سوق التلاتا في نفس الإسبوع .... |
ياخ والله مجانينك ديل انا حبيتهم
المجانين ديل لا عندهم جن ولاسخطهم شيخك:p ديل مظاليم انسانية ساي الا جارتنا ديك دايما بشوفها بتتكلم ليها مع زول في خيالها بصوت مسموع بس منخفض وتضحك وتتونس معاه =يمكن بتكلم روحها مرة قلت عايز اسمعها بتقول شنو لقيتها بتقول ليهو تقصد اللابسة البلوزة الزرقاء؟ دي فلانة بت سلمي:p واليوم داك للصباح مانمت من الخوف ياربي قالوا عني شنو |
اقتباس:
عارف الود كرملة دا عندو موهبة عجيبة جدا ،، أنا شخصيا بقول انو موهبة بعد داك ناس الحلة يتفقو معاي مايتفقو دي حاجة تانية ،،، بي انا شايف انها موهبة ولو اتوفلات في زول واعي كان دخل غينس كرقم قياسي ،، هذا المدعو كرملة يااسكاب عندو القدر انو يقبض الضبان (الذباب) وهو طاير او راكي على حد السواء ،، يعني يااسكاب اي ضبانة جات في مدى يد كرملة او قريبة من المدى اتاكد انو كرملة اصتادها ،، تلقاهو قاعد في الارض وبعاين حولينو جات ضبانة طايرة جمبو ولاااا بجتهد معاها بس يعاين ليها كدة ينشن تمااااام وكف جنف يقبضها وهي حية يلحقها خشمو ويقزقز بيها . اتخيل معاي يااسكاب الزول دا لو كان نصيح سرعة حركتو وتركيزو دي كانت بتوديهو وين ؟؟ ومالي حق اقعد اتفرج فيهو ؟؟؟ المهم انا داير اقوليك اتا بتقبض تا بتقبض الحروف وهي طايرة :D:D:D |
اقتباس:
GG سلامات وعوافي ،، ان شاء الله خير ،، بس انا خايف تكون رشحت صوتك لي إذاعات المدعو (الجن الكلكي) :D باقي هم اي زول ينادوهو بي إسم امو معناها ح يضموهو ح يضموه :D:D |
كتب مجنون زات فحمة :
(دحين جربت عضة زول ملان مغسة ؟؟) عــــــدنا ،،،، |
| الساعة الآن 08:04 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.