حفاظآ على ميزة التثبيت, ونحو التعميم الخاص..
 

لماذا يتم تثبيت لبعض المواضيع؟
ليست هنالك أى حوجة لتثبيت أى موضوع ..
هذه الخاصية (خاصية التثبيت ) تفقد المنتدى نكتهه
وهى التميز الجاذب,
كما ان تعليق المواد فى صدر المنتدى , كعلامة على بروزها ,
تسحب من المواضيع نفسها ومن قيمتها ,
فالبوست يتم تقييمه من متنه , ووضعه فى الصدر يجعله يفقد نصف قيمته ,
فلكأنما هى سلعة مختلفة
, بينما ذات المواضيع ,هى ذات ذات السلعة..
نحن لسنا فى سوق ,
واتباع ذات العادات التسوقية الرائجة للكلمة ستقود الى ضمور الوعى ,
فكل كلمة رنانة ستبقى فى الصدر , وكل عنوان أدبى مستهوى من قبل البعض سيكون عاليآ , وكل القيم ستصبح هى عناوين بارزة,

لاتنافر
لاتنافس

كون من الطيبة والتسامح ,
ومن سيدفع الثمن ,
سيدفعه مجلس الاداره الذى سيتلقى الصفعة تلو الاخرى ,
وسيدفعه الوف من الناس الذين لن يقدم لهم الموقع ممارسة ديمقراطية سوية.

من الذى أوكل الى أحدهم رفع العناوين وتثبيتها؟
من الذى يقرر ذلك؟

لماذا لاتترك المواضيع ضمن صراعها الطبيعى؟

جوجو الجميل،،
قالوا:
شهرن ما عندك فيهو نفقة ما تعد أيامهو،،
مثبت، مزبط، مسبك..
كلها طبيخ يابا :eek::eek:،،
(هويا ما تخدوها بي حساسية، هي جات كدآ:(مش الطبيخ بتسبك والفول بزبط)...
معاك قلبا وقالبا،،
أكان في ميدان التحرير أو في ساحة التغيير :cool:


(لاحظت حكاية "جوجو" دي كيتن في أبو دعد;))

هسع دا موضوع تفتحو يوم العيد
والناس مشغولة بالضبيحة
انت ناوي تضبح منو:D

كان قلت ليك ناوى أضبح عمنا مخير , بتصدقى ؟:D:D

يابدور فكرة الضبيحة دى عندها علاقة بالتخلف ,
وقمة فى الحيوانية بى شكلها الحالى ..
والناس شكلا نست القيمة الأساسية من فكرة الفداء

ان تضحى بما تحب من أجل حياة أفضل لك وللآخرين..

الفداء قيمة عظيمة
وليست طقوس وصلوات وصعود لجبال ,
الفداء ليس الذبح
بل ذجر النفس وتربيتها على احترام الآخر وتقدير قيم الحرية
والتسامح ...
من يظن أن الفداء هو كبش يذبح
فلقد سلخ عن رسالة نبينا الكريم فكرته

الله لايعتنى بجلود الخراف,
ولكن الضحايا هم المساكين

الأثرياء من أهل المدينة والزائرين, يغزون سوق الناقة
يعطرون انوفهم وثيابهم باللحم الشهى , فى الأوقات العصيبة ,
وهذه أمة
تقبض على الأوقات العصيبة
كقبض المرء على جمر محرق

فأين المفر ..

ربما يسطيب الرب ذلك ..
من يدرى
ربما هو حانق ..


انزلاق امعاء غليظ على جزع شجرة
رائحة شواء
وتعلو التهانى ..
لايسأل أحد من فديتم ؟
ومن يفعل ذلك بنية سديدة
يتلغف جلد أضحيته صبية طيبين
أو تلوكه معدة ديوان الذكاة الشرهة .
فأين المفر؟

لم يتركوا للطيبين مفر سوى السؤال المرهق .


من أفدى أنا يارب؟

ضحكة طفل

وأب فقير , كومة ديونه أكبر من أن يذيد
عليها شهقة...

والناس طيبين والدنيا حلواااااا
والعيد مبارك
آناس

شنو يا جادين..
شايفك بديت بالتثبيت وقلبت خرفان وجلود أضاحي..
أركز علي حاجة واحدة..
ولّا البوست حلّة عزّابة "قطر قام" :D:D
المهم:
كل عام وإنت بخير يا علي..
أمنيات متحققة وحلام تسعي في مناكب الواقع..
قلت لي كيف كيف..؟:p

الرشيد يااخى
صديقنا الذى كان فى الدمازين looool
كيفنك والخرطوم؟


الفكرة الانسانية دى دايمآ قاعدة على الحافة وليس من شئ يدفعها نحو الهاوية سوى حرصنا عليها (من أقوال على ):D
غايتو كان دورتها كويس , بتلقاها نفس الفكرة ,
والله ماتفرق معاك زاوية ..ياها فكرة الانسان المجرى ذاتا

:D:D
شايفك مبسوط

كل سنة والخروف بخير ,
يارشيد
هسه منو الضحية عليك االله؟




وبعدين يافردة أركز ليك على رأى
جادين ولاَ على؟:D:D

كل ماأشوف كلمة مناكب دى بتخيل كمية بتاعت خيوط وعناكب ,

هسه الله فى العيد السعيد دا ماأداك كلمة تانية غير مناكب دى؟

بل قل:
كيفنك والدمازين..
نتقاسم ذات الغربة والابتعاد عن الأمكنة التي يرقص عند إحداثياتها القلب..
ثمّ:
بخصوص التثبيت، بوافقك طبعاً في ما ذهبت إليه..
لكن برضو أنا شايف إنّو التثبيت بيضر بالبوست أكتر مما يفيد..
لأنّو حركة البوستات وقفزها لأعلي بفعل التداخل، واحدة من وسائل ملاحظة الناس ليها..
لكن المثبّت حين التداخل يظل ثابتاً في مكانه، فيضيّق الفرصة علي نفسه من أن يُلاحظ.
المهم:
رأيي إنّو التثبيت يقتصر علي البوستات العامّة زي المواجبات الإجتماعية والأفراح الجماعية، والنداءات الإنسانيّة المختلفة.

ثمّ:
عيدك سعيد يا سفيان.

دي تبقي مشكلتك براك..
خيالك دة ما يودّيك إلّا للعناكب..!!
يازول مشكلتك دي حلّها غادي غادي..:D

مبسوط شديد..
منتظر الجيران يضبحو وينادوني..:D

التثببيت من عند الله يافاروق
ولاَ كمان عندك رأى؟

جنك نفخ ,
أها أنفخ

أدونا الجلد يافاروق
ومعاهو شوية قرض , التسالى بتاعنا كمل

:D:D

يا زول وين ألقي الكضوم للنفخ..
منفاخ من أقرب عجلة وتقع الخروف..
السّاهلة السّاهلة يا علي..

إنت ما حصل عيّدت عيد ضحية في عطبرة..!!

ياعلى الذى كان فى الدمازين:D

التثبيت يفقر المواضيع , ويخبئ بريقها ,
اذا اردت لبوست الموات فعليك بتثبيته ,
مطرقة التثبيت تربت على كتف المنتدى حتى انها تدميه أحياآ

مرة يافردة كنا مبسوطين:D فى شمال هولندا , والدنيا عيد ضحية .
قمنا اتدينا:D:D خروف من مزرعة
على التعترا علينا شافتنا واحدة من بنات المنطقة ,
والله ورونا ليهو بمبى :D:D

الغريبة يارشيد
انهم بعد داك عجبتم الفكرة :D

بعد مادفعونا التمن وجابو الوليس , والبوليس غرمنا ..
عزمناهم ليك زى الترتيب , وعضوا معانا
وعرفوا الضحية معناها شنو,
الجماعة اتبسطوا جدآ, وكل مرة كان بيضربو تلفون يسألو :
أها عيدكم قرَب؟:D

:D:D
كان تتغاتتو عليهم..
وتقولو ليهم عيدنا بجي في العمر مرّة واااحدة بس..

قلتا لي بقي ليكم بمبي..
يعني زي حالتي العلي دي..:p

انتوا اتدينتوا الخروف و لا نشلتوا يا مان :D:D
شديد اللحم و لا قوي الشربوت و
بكمبودرو سالط و مكثف تركيزو :D:D

اما بخصوص التثبيت فلا
غبار عليه يا حبوب ..

ما تتشابك عليك التخسسات يا ابو الرشد !!
و ايامك ساكوبيس :D:D

والله مع البمبى بتاع الرشيد
وشوية غبارك دا
بثيت ليك المنتدى دا كلو :D:D

التعليق أعلاه يابوكش لأنو الرشيد عندو





مشكلة مع الالوان بالليل
بيشوف البنفسجى بمبى ,
تتخيل؟:D

كويس أنا بالليل..
إنت شن خبرك يا علي..؟ :D

ولا عشان لقيت عكود مافي الليلة..؟
كان يصرف ليك حركة من حركات أولاد الخرطوم..
تآآآمن ذاتو..:D:D

يااخى أهل الحق سامحونا ,
هسه انتا جاى من كندا عشان تاخد حقك فيهو ؟:D:D

يابوكش
الجملة بتاعت (لاغبار ) دى عاجبانى شديد والله..

الواحد يمشى السوق ويشبكم ليك :
هذه طماطم غبار عليها .

هذا جوز حمام لاغبار عليه .
اعطنى ربع كيلو لحمة لاغبار عليه

يعني نفهم من كدة إنّك الليلة ناوي تشتري:
طماطم وجوز حمام وربع كيلو لحمة..؟ :D:D

و اللبن و الباسطة يا فاروق :D:D

يعني الواحد ثرثرة ساي :D:D
ما يثرثر معاكم يا ثرثار ..

دا للفطور يا بولشيكيفوف,
بلد زى دى يمكن تاكلك انت ذاتك لو عملتا ليك رقبة واجانحين,
ديل بياكلو العصافير يااخى ,
الواحد تشوف ضنب العصفور فى خشمو وهو قاعد يبلع فيهو ,
ويحلف ليك يمين انو الخنقتو تساليية..
ناس ضميرا زى وشها
تراهم فتخشى من وقع وجوههم على الله .

تكاثروا من فكرة واحدة ,
كأنهم نبت شيطانى داهم بلدة ما فى ظلام دامس
وصنعوا أقنعة يضعونها على وجوههم , ورفعوا سبابتهم
وتبسموا بخبث ..
ذات الوجوه , أيينما وليت فذات القماءة
فأين المفر ..
تترك الجمل بماحمل ,
وتيمم شطر نفسك وعائلتك,
يلاحقونك بالجباية
ويتوالد الشهداء من فردوس الغلابة

تتحول الى نبى
وتنسى كل شئ
فى خضم غفران صوفى
يلاحقونك هناك
ينزعون الجبة ويلبسونك شجرة

لايتركون لك شئ
اما ان تكون جبهجيآ لعينآ
او ميت,بالحيلة

مبسوطين الفوق دي تستاهل واحد( قول كا يا جادين):D


والخروف المثبت أعلي اعناقنا مقدار تكبيرة و نصل حاد يشكو يتحسر علي سوء الخاتمه
و يشكو إلي الله أنامل الضباح

فمن الظالم ومن المظلوم هنا؟

جيلي و رشيد و فيصل كل سنة وانتم بذات النزق ياخ

كل عام وإنتوا مناسبين كدة ياخ

المهم أكملت قبل قليل طقوس الذبح والدم والشربوت
ونفسي في غزال لادن يحلي لي طعم الشطة

الرشيد..نزل منك لستك هنا ولل شنو..؟

اذا دا انا ولل ما انا..كل سنه وانت طيب وموفور الصحة والعافية والاشراق..

الاخ الجيلي..
كل سنة وانت طيب..
رأي وجيه جدا..وفيهو منطق قوي..البقاء للأصلح..
لكن هناك قراء من غير المقيدين في الموقع وتعميم الفائده بعض من رسالة الموقع او المنتدى..
قد تأخذ بعض المواضيع حقها من النقاش والحوار..وتنزوي..لو لبعض حين..
فهي غائبة في حالة الانزواء هذي..بل ليس لها وجود لدى الزائرين..
هذا باعتبار القراء هم اعضاء و زوار..
اما في حالة الاعضاء فقط..فقد شدني منطقك..

تيوبليس يا سفيان..:D

كل سنة وإنت طيّب ياخي..
أمنيات متحققة وآمال عِراض..
ثمّ:
الجيلي دة أيّ إسم بلفق معاهو..
عشان كدة مريح في المناداة..
تناديهو بأيّ إسم يقول ليك أيوة..:D
كل سنة والجميع بخير