قاموس المفردات العامية فى اشعار حميد
الاهداء:
الى تلك الروح الطاهرة التى علمتنا الحب ثم حلقت فى سلام الى عوالم كما تشتهى (الحبيب حميد) الى كل الغلابة التعابة المنهكين (نحن) الى كل من استعصيت عليه بعض المفردات الغارقة فى المحلية (بعضكم) الى من تبقى من رائحتهم اولئك الذين رحلوا ليتركوا فراغ مستف بالاسى (ابوى الشريف محجوب شريف) تمنياتى له بموفور الصحة والعافية... |
رحل حميد فغرقت فى الاسى
وما كنت احسب حسابا ليوم يموت فيه حميد وانا ما زلت على قيد الحياة صديقتى سماح فى محاولة منها لانتشالى همست لى ذات مساء ان لا ادع عجلة الحياة تتوقف ههنا على ان اديرها كما كان يحب حميد ان يفعل فهكذا قد ترقد روحه فى سلام.... ثم رايت ان اساهم بما توفر لى من معرفة باشعار حميد وبمفرادات استخدمها حميد هى غارقة فى المحلية وذلك بحكم نشأتى فى ذات البيئة التى عاش فيها ان انشئ قاموس يترجم هذه المفردات لتسهيل المعنى الى مخيلة القارئ ليكتشف عوالم ارحب واوسع فى قصائد حميد اتمنى لكمم الاستفادة مع عميق محبتى لكم ومودتى للحبيب حميد |
جية الشليل
شوك الشوق .. لي الشوف آ خي ضارب في إطن النسج الحي يا منقاش أحزان وإنشرت .. وادي الفرح إتمدد صي يا راحلين عِنْ دُغُش الليل .. ما لاقيتو جناياً زي تكية نخل الفجر الجاسر .. في المترة عراجين ضي يا رعّاوة العرب الرُّحّل .. ما لاقاكم في المطراني في كاويق الجرف الأمحل بين أسراب الرهو الراحل .. ساند أكتاف الليل الميّلْ عِنْ ساساق الغيمة عليكم بين رقراق الخيمة معاكم .. ما أديتوهو شوي بي حرجل آ رطانة الليلهم ليّلْ ما لاقاكم في ونساتكم بين الشادي وبين كاساتكم في صلواتكم .. عِنْ دعواتكم أو دقساتكم عِزْ خلواتكم زول زول الله إن ِمحِن آ بسأل الهبّاد لي غُلْب اخواتو الفرّاح عوّان الحلِّي الفدّار لي الليل ظلماتو آ نجمات شقيش قولِنلِّي ما لاقاك طالع مندلي المطعوم من طيبة أماتو الفجاج الندّ نباتو موج البحر الأحمر هوجتو وعرق العرق اللاوي ثباتو جانا الشدر الأخضر منو ونار الشدر الأخضر جاتو راح شقيش أب قولاً واحد ليش ما يرجع من غرباتو طول طول ما طلّ علينا وقاطع مننا جواباتو الغابات جات تنشد منو العربان راجين جيّاتو أديناهم علقو وعَرَقُو وصورتو يقلِّب في كتباتو ضل رشاشو .. ركيزة زولو ساعات سلمو ويوم حوباتو سن طوريتو .. ولون أبرولو وحس طمبورو البي نغماتو لهلب عشق الناس الفقرا وبرّد جوفِن .. يا غنواتو الدخلت فينا .. تمرق جينا على جلاتو وجيداً جينا .. طلقنا وشينا .. ووش أطفالنا الليلة حلاتو غني معانا غنانا هويتو غني العالم غني حياتو لا ساومنا عليها قضيتو ولا فكينا من إيدنا وصاتو ألف شليل يا نورة يفوتو شان ما يجيكي شليلك ذاتو ************* ما تم تلوينه بالاحمر هى المفردات التى ستتم ايراد مرادفاتها اطن:هى بطن او بمعنى داخل مثلا اطن البير داخل البير المترة:هى الارض الزراعية التى لا تشرب من النيل مباشرة قد تشرب من الابآر العراجين:جمع عرجونة وهى سبيطة التمر بعد خرت التمر منها المطرانى:الارض التى شربت مياه الامطار كاويق:اوراق القصب او اللوبى بعد ان تجف وتتساقط الجرف:المكان الذى تغمره فيضانات النيل وتتم زراعته بعد انحسار الفيضان الامحل:الذى لم تتم زراعته رقراق:الظل الذى تتخلله اشعة الشمش الهباد:الذى يبرد من الالام والاحزان عوان:هم المحتاجين للعون والمساعدة غالبا تطلق على الاطفال ويمكن ان تعتى كبار السن ايضا طالع ومندلى:نسبة لان النيل دائما يكون فى الارض المنخفضة يسمى اهل الشمال مكان الزراعة والذى يكون باتجاه النيل بلد تحت يعنى اسفل ةلذلك يطلقون على الذاهب الى هناك مفردة نازل او مندلى وطالع هنا تعنى الراجع من مكان الزراعة الى البيوت تنشد:تسأل على جلاتو:من أجله |
تحياتي ماريل
و أحسن الله عزاءكِ و عزاء الوطن نمُدُ إليكِ بذات همس ِ صديقنا سماح إن هي إلا الحياة يا ماريل تديرُنا و نُديرها و ندور معاً. نحنُ موعودون إذاً بسياق ٍ حميم ٍ و مورق بمعيتك و الساكن فينا حميد. |
مساء الخير يا ماريل
هذا بحث في غاية الأهمية اذ يضئ الكثير من المفردات ومعانيها. لحميد الرحمة والخلود ولكِ تحياتي ومودتي |
ياصديقتي الجميلة
قالها حميد: ... هل يعني النهاية الموت ويتبعزق غناك سدى ؟! أملنا الغيم حا يتسابق على الأرض العزيزة فدى وطنا حبيبنا رغم البيك هي الأشواق حنينا إليك يظل دفاق خيالنا عليك دوام ساساق يخلي البينا بين عينيك مساحة غزيرة ماها فراق فما هانت علاقة حب وفاء وتاريخ على الإطلاق وما طال المطر بيصب طبيعي إنو البحر ما راق كما إنو العكار من طين كمان من طين بيجي الرواق كمان من طين بيجي الرواق.. كلمات حميد كما صوت مصطفى.. تسري منا مسار الدم لن (تتبعزق).. صوته لم يفتر رغم ال(بينا).. فلنكن إمتداداً لمحبته للحياة وهذا الوطن.. ولنتمسك بالأمل الذي ظل يبثه فينا.. فهذا هو التكريم الحقيقي لأمثاله له الرحمة ولنا الصبر الجميل _____________ أكتبي ياماريـــل خيط جميل ومفيد جدا.. أتمناه (بوستاً) ممتدا وغزيرا لأن كتابات حميد ممتلئة بمفردات العامية التي تستعصي على البعض.. تجديني إن شاء الله من المتابعين |
كده يادوب يبدأ الدرب الصاح للاحتفاء بحميد
لا املك الا ان ارفع قبعة لهذه الفكرة الذكية من ناحيتى سأجتهد بنقل المفردات التى ترد فى البوست بحثا عن شرح وافى لها من بعض المتبحرين فى لهجة البلد (حديث الشوايقة) باعتبارهم الاكثر قدرة على محاولة الاقتراب من المعانى التى كان يعنيها صاحب الرمزية المتفردة .. حميد وما اصعبه من امتحان .. اتمنى ان نقترب من تحقيق الحد الادنى من النجاح |
اقتباس:
فى انتظار ان تمد لى ايضا يد العون فى هذا البحث الذى لا اظنه سهل على الاطلاق لك تشكراتى ولحميد دعائى بالرحمة والمغفرة وحسن القبول عند الله |
اقتباس:
ارجو ان تشاركنى بالبحث عن القصايد والباقى على الله ثم على وكل من له فكرة عن الموضوع |
اقتباس:
ارجو ان تكونى خير عون لى كما انت دائما محبتى كلها يا نخلة |
اقتباس:
كما كان حميد ايضا للجميع انا هنا مشاركة فقط بما توفر لدى من قصيد ومعانى مفردات .... ثم انا ايضا اتمنى |
أختى /ماريل
مساك نور كتبتى عنى فى أحدى البوستات حينما أقراء أسمك أصاب (بى خمة نفس ) ألان أنا وحينما وجدت هذا البوست تدفق الاوكسجين فى كل مساماتى .. وحلقت فى عالم من الدهشة والانبهار وأنتى تغوصين فى مفردة حميد ولجة ( النضم ) الطاعم وتفردين هذا القاموس لمثل هذا الكلام (عارف عروق النخلة وين خابر صمودا المن متين ضامن ثبات ساقا الهطيط سامع مناتقة الرياح .. !!!) ماريل متابعك .. وراك .. وراك حميد يجمعنا لة رحمة ونور |
جوابات ست الدار والزين ود حامد
الجواب الأول: ست الدار بت احمد تكتب ليك يا الزين ود حامد شوقنا أما بعد المبعوتة المنك وصلت ورح فكيت الطلب الفوقنا باقي الدين يا الزين خلصتو قدر الباقي مصروف راشد والتومات والجايات من جاي لاجاي زي ما قت لك قبال دا شهر اتنين حنطهر راشد شهر اتنين المدرسة تجز الله يبعد العارضى تجينا راشد حالف ما يطهر الا ابوه وعمتو تحضر والا يحيبو الغنايين عشان الشوق بت سرنا ترقص قتلو نجيب المداحين طنطن انا جاي من الحج وعارف راشد لما يطنطن كل الدنيا الفوقي تطنطن غايتو بشر ... بس ربو يهون ما كلمتك بالتومات أول البارح جني يرطنن قالن نحن الخواجات بسم الله .... مرق حصلت لقيت لك جعفر زارد البيت بالخواجات يبقى حداشر وخواجية ناس البلد الكسرو عليهن صدوا يقلبو في ايديهن عدمانين من أسم حكيم واللا خبيراً بالمشروع علماء آثار .... فضلت فيها آثار ما خموها الجونا قبلكم ... شن خلولنا بلا حجار الله يصرف الخواجات بينات جعفر والمحجوب ... والمحجوب والخواجات طقت حجي ... العمدة طفاها باقي الناس الجات للفرجي ... قنبو قيلو شبعو لحوم ... والخواجة يصور ساكت سته خرفن وتيس ما كفن سته خرفن في فد يوم المعدوم أشكال والوان أي خدار في اليوم داك في كملن رف كمين دكان أول كفو الخواجات بعدو العمدة وصمد الساقية ناس المجلس والمشروع بعدو الطلبة وباقي الناس حتى الشفع والحروم سته خرفن وتيس إنصفن سته خرفن في فد يوم جات من صالح بت كلتوم تسكت تخبز طول اليوم لامن حرقت الدولاب قنبت المسكينة تدعي الله يصرف الخواجات غاية الليلة السقا يشولت واطات الله دي ست رشاها مافي غنوة ما غناها مافي مدحتنا ماسواها حمارو صبح لحق أمات طه سب الدين والامريكان جنس بدع زولك ده يحير عند الجد كان أده ينقنق عند الفارغة يشيل ويبعزق إذكرت كلامك ليا ... إنو في ناس لاعبين بالدين وناس لاعبابا الامريكان الله يصرف الامريكان الله يصرف الصرفيكان ما خلوني نشدتك منك كيفن حالك والخرتوم كيف المصنع والعمال حالم لسع نفس الحال ؟ مارقوك سووك باشكاتب؟ يورينا الله زيادة الراتب كيف الناس والحالة عموم ؟ والعزابة الكحيانين سيد البيت عل ما زكاكم لسع تقعو تقومو براكم ؟ قلبي معاكم ربي يخدر عود ضرعاتكم بالي معاك يا الزين ود حامد بالي هناك والشوق الشوق خلى شدير الجوف محروق راجي مطيرة الزين ود حامد نحنا نصاحاً زي واطاتنا نحن نصاحاً إلا القراص والتجار والحاصل البحصل كل صباح شتلاتك قبضنالحملان كبرن بالحيل العضمين الروكة إنزرعن اوعك تشفق من تالانا ولا نبقالك مشغولية زيك واحد مستورين وما ناسين المسئولية هي يا الزين زغرد بت أم زين جابت لها بت ستة أولاد حتين البت المحجوب ينشد من خبرك شافعو محسب من يومين التومات طيبات ونصاح إلا غباش بالحيل آ الزين راشد كرر ... شهر اتنين كان ما جيت انا ما بطهر الله يبعد العارضة تعال كان فد يوم يدوك تعال كان بالخصم ان شاء لله تعال وما تتوصى ... وداعة الله أوعى البشغل والعربات والحيكومة السمها فاير أم أولادك ست الدار بت احمد جابر الخطاب الثاني : ست الدار بت احمد كيفك جاني جوابك مفتوح شارع جاني جوابك وانا بتصور في ناس راشد والتومات في الشتلات والحالة عموم ناس حلتنا التحت ... الفوق الليهم الله وعيشة السوق جاني جوابك وانا بتصور في المشروع وعمايل جعفر ولما بكيت ... يا ست الدار أيوة بكيت ... يا ست الدار لما قريت علماء آثار علماء أيه يا بت الناس سواح أيه ... ما عندك راس ست الدار تتوهدبي ليه وديل جماعة السي أي أيه تعرفي أيه السي أي أيه امريكان في كل مكان ديل مالين الدنيا ملي ديل قالين الخلق قلي باسم الدين والامريكان أي عوج مبدي ومختوم صوتنا هناك وهنا مكتوم ومافي فرق في الوقت الراهن بين واشنطون والخرطوم انا مأزوم ... مأزوم ... مأزوم يا خرطوم وينك وينك يا خرطوم شن شب وقلبك وسلبك حلبك ؟ زنجك ؟ بجتك ؟ نوبتك ؟ عربك ؟ انا مأزوم ... مأزوم ... مأزوم يا خرطوم ... أوه خرطوم ... أوه واشنطن طن ... طن لفتك فجراً يقطع رحطك ست الدار سامعاني يا اخيتي ومرتي وأمي و أم الكل انا بندهلك من شارع الله ... فوقي هجير والتحتي بقل سبي معاي الشردو راجلك ... والحرموني شوية الضل سبي الحالة العالة علينا ... حتى احكيلك بالتفصيل حاصل الحاصل يا بت احمد جاني وفد في المصنع زاير ... وكان الوفد دا امريكاني لف وفات اليوم التاني جانا مدير المصنع فاير وشو حمار العدة العاير نقفل مصنع فيهو خساير وقالو يخفضو ميتين عامل ميتين عامل في فد مرة ميتين عامل ... ميتين عامل يبقو هوامل ... يبقو هوامل ؟ مايهموش ... الهم المصنع تف قرارو وفات في حالو مسئولين ونقابيين مافي العارض واللا اترجى العمال من سمعوا احتجو ... سيرو موكب صامد صامت اتضامنا معاهم سرنا ... أب عرام دور عربيتو ... العربية للامريكية زنقح خلا الموكب ثابت احتجينا مع الاحتجو اتكلمنا كلام موضوعي قلنا لمصنع حق الدولة ... والعمال اصحاب الحق هي اللي تقرر والتتولى هي البتحدد سير المصنع ايد العامل هي القاع تنتج ما المكنات الامريكية زيت العامل ياهو البطلع ... مو المكنات الامريكية ودرن الايدي العمالية انضف من لسنات الفجرة ودين الدقن الشيطانية ومن كرفته البنك الدولي ... وكل وجوه الراسمالية وأشرف من ... داك الحين المصنع هاج وجات عربات اللات بوليس ... فضو العالم بالكرباج والبمبان الامريكاني شرقت شمس اليوم التاني كنا حداشر ونوباوية متهمننا بالتخريب والتحريض وال ... وال... والشيوعية البوليس صاقع شيوعية وفاكر نفسو بنبذ فينا هي آ بوليس امك مسكينة البوليس عمدني شيوعي والتحقيق طلعني مدان التحقيق طبعا تحقيقم أو تحقيق الامريكان اسبوعين عديتن جوه اسبوعين زادننا قوة ست الدار ما تشفقي خالص ست الدار انا ياني الزين ست الدار سامعاني كويس ؟ كل الهم ما يشغى الغم بيتنا وراشد والتومات وكل الناس الحالهم شاهد ست الدار الشوق الواحد لي حلتنا وليكم ليكم للاشراق الفي عينكيكم شوق وسلام الزين ود حامد ردي سريع ... باليد ... باليد في دورين موعود بي شغلة لمت لمت .. كان ما لمت انا جاييكم وما ندمان الخطاب الثالث : بعد الحاصل والاتحصل ست الدار بت احمد تكتب زيني الزين ... أب حالاً زين جاني جوابك يا المبروك وسابني اشوف الدنيا كويس واعرف غلط الصاح مظبوط سابني أميز ... واقدر أفرز ... وأرجع أميز فرحانابك يا احزان فرح النار بي لوح الزان مبسوطابك يا المبسوط ما هزاني مصيرك قدر ما هزوني الميتين عامل ميتين عامل في فد مرة ميتين اسرة تروح وين في الايام النجسة المرة ميتين عامل؟ والله مهازل والله عمايل يا اوغاد ... وينا نقابة السجم الشوم وين عمال السكة رماد وين الطلبة ووين الوين بعتو شفيعكم يا عمال بعتو وجيعكم للراسمال وشن راجيين يا تعسا الحال هاكم دي ... والله مهازل ميتين عامل ؟ والله عمايل عامل ساكن في آخر الدنيا وصل المصنع باخر بنية ينتج كيف ؟ شغال بي فونيا ؟ عامل ينتج عشرين حتة تلحقو منها قيمة اتنين سته بغطو المنصرفات سبعة ... تمانية ... تسعة بغطو أدها تسعة المنصرفات كل الفايض ... بدخل وين ؟ قولو البفضل بمشي لمين ؟ وبرضو خساير ؟ والله مهازل يا مضغوط ... خفض ميزك حبة تين تنك القعدة تلاته خطوط خفف مرتك توب مضغوط من التمسحبو كبابي الصين خفض عمرك يا انبة الفانية وبي نظارتك واجه ثانية ثانية عيون الشغاليين ثانية وبس والله مهازل ميتين عامل ؟ ميتين بيت؟ ميتين أسرة بلا راس خيت ؟ ميتين أسرة ملوها جراج ميتين أسرة حا تولد صاح وليكم يوم يا اولاد الهرمة ليه يا الزين بتوصي علي وانا بت احمد ست الدار أم اولادك وهم صغار ... ثم اولادك وهم كبار وياك الزين ود حامد داك كان متوظف ... ياكا الزين كان متوقف ... يا الزين ليش يا الدخري توصي عليا اسبوعين قضيتن جوه يبقى غصب ... زادنك قوة ليش يا الزين بتوصي عليا ليش يا الدخري توصي عليا وعارف ام راشد والتومات ... مرتا دغري وغلباوية آه يا الزين ... لو كنت معاكم ... كنت بقيت النوباوية ما تهتم يالزين بالحاصل واصل سعيك ... واصل واصل واصل سيرك كان ما كنت الزين ود حامد كان حا يكونك واحد غيرك في فضاء فالك يا انسان نسمة تقولك في الامكان ابدع واحسن من ما كان يا تو مطرة سوت شو ... فرقو غيما الامريكان يا تو رصاص ما عقبو خلاص يا تو سجن يا الزين ود حامد يا تو محن تمحى الاحساس لما يكون في الساس والراس يا تو وطن يا الزين ود حامد يا تو زمن دام للانجاس طه ترابلتو راحو الديش غزا بكانا اتنين رطانة صاقع كلو من اسماعين هو الفسر لهن الشغلانة ويا اسماعين ما كان الديش شق مسيمعك بالجبخانة لو المجلس قبل اوراقك ... او في الثانوي لقيت لك خانة لكن قدرك يا انسان ... بلداً هاص هيصة جبانة طالو الناس التريانين ... ضلو الله الما ضلانا اخدو نورة الحاج بالدق باكر دور ما خش عليها خاتي اللوم قطع التمرات الفوق راس بيتو الخلفاء شكوهو ومالقو حق المحجوب اتلقى اخبارك وقال جاييك في اول بص البرسيم طهرنا البارح نعجة راشد صبحت والدة الحيضان سقناهن لوبي التومات طيبات ونصاح راشد طيب وانا طيبين ينشدو منك في الافراح وفي الاتراح ... الزين الزين ما تشغل بالك بس يا الزين كان درت مشورتي اصلو كتالك يا هو كتالك تجي مندلي الواطة تراها وبي جاي جاي ... بندبر حالك ما الحيكومة الضاقت دمك عينا محل قبلت قبالك شورتك عندك عندك شورتك والببقالك ... الببقالك التمرات بعناها آ الزين خفنا السوس ونزالة السوق مبعوتالك عشرة جنيه والاشواق من هنا لا عندك تلغرافات : نوري . السوق ... ست الدار بت احمد جابر المحجوب في قطر اليوم عفش الزين النوباوية الخرطوم ... الخرطوم بحري ... كشك الشعلة ... الزين ود حامد راشد راقد والواطة جعفر طالق فيها بهايمو ست الدار بت احمد جابر نوري ... السوق ... المحجوب ود احمد جابر كتب الزين ... كل الاوراق ... راشد كيف النوباوية الخرطوم ... الخرطوم بحري ... كشك الشعلة النوباوية انا في السكة وست الدار راشد ود الزين ود حامد ************************************************** ***************************** الطلب:ضريبة على النخيل تقدر بعدد النخلات التى تثمر فقط العارضى:هى العوارض وهى ما يتعارض امام رغبات وامنيات الانسان الكسرو:اتوا فى شكل جمع غفير والوصف مستقى من انكسار الفيضان على الحلة حجى:مشكلة او شكلة الفرجى:المشاهدة يشولت:يكثر من الجية والذهاب او بمعنى المساسقة ايضا قبضن:اى غاصت جزورها فى الارض فاحكمت قبضتها على الحياة بمعنى اخر نجاح الغرس العضمين الروكة:العضم من مقاييس المساحة مثل المتر والفدان والروكة هى الارض المتشارك عليها اكثر من واحد التحت ....الفوق:تحت تعنى اتجاه النيل وفوق اتجاه الصحراء تتوهدبى:تصبحى قلقة قالين:مصدرها قلى البن وهى مفردة تستخدم كناية عن شدة العذاب وكانك يتم قليك مثل البن والبن طبعا يتعرض للنار مرتين هجير:حر الشمس بقل:الظل الذى لا تزال تحس فيه بحرارة الشمس يعنى الحته اليادووووووووب جاها الظل العاير:دايما ما تطلق على الحمار الذى يجرى محاولا الفكاك الجبخانة:الرصاص طهور البرسيم:هى او ما يتم حشه من البرسيم وفى العادة لا يباع بل يتم توزيعه على سكان الحى مندلى:اى ذاهب باتجاه النيل او اتجاه الزراعة |
اقتباس:
لم اتصور ان يكون حديثى ذاك عالق بزاكرتك حتى اللحظة اظننى لا احتاج ان اقول لك انى كنت اقصد المزاح ليس الا ....... عبئ مسامك بالاكسجين وتعال معنا نغوص فى بحار حميد وندرك بعض اسرار المفردات التى تضج بالجمال والاندهاش ثم لك العتبى |
اقتباس:
ماذا يعني حميد "ببت سرنا"؟ |
اقتباس:
الصى :الخلا |
اقتباس:
وحاتك ما شاردة من بوست الضرب بس المود الانا فيهو الايام دى لا يتلائم مع قدسية وحساسية ذاك الموضوع يوم يوميين وارجع ليهو تانى ما فضل لى فيهو كتير اما عن الشوق بت سرنا قد تعنى الاتى:الاسرار هم الاقارب من الدرجة التانية عند اهلنا هناك يعنى لا ابان عم لا اخوال قرابه ابعد شوية كدى دايمااهلنا ناس محافظتى مروى والدبة يقولوا ليك ناس فلان ديلك اسرارنا يعنى لهم صلة قرابة بنا وهو تعبير عميق المعنى وحنين |
اقتباس:
فهكذا اتمناكم تساندونى فى هذا البحث جد شاكرة لاضافتك كن قريب فوجودك اكيد له طعم مختلف |
اقتباس:
السكون بيقولو برضهو، المحلة صانة |
سلام يا ماريل،
ربّنا يرحم حمّيد ويغفر له. أتابع بإعجاب واهتمام، وما شاء الله! واصلي أرجوك ولا تفتر الهمّة، فهو توثيق مهم. التحايا والإحترام. |
اقتباس:
الشائع انو الصى هى الصحراء اما السكون وما الى ذلك اول مرة تمر على عموما بتاكد واكيد برجع للنقطة دى كان فى العمر باقى ثم تشكراتى والله على مداخلتك وكن فى الجوار |
اقتباس:
او عكود ود سرنا (عشان التعبير ده يقع لى بابكر ود عباس) سأواصل طالما النفس طالع ونازل وطالما فى العمر باقى هى رسالة سأوليها كل اهتمامى وليس بعضه فعسى ان اهب حميد نقطة من بحر جمايلو فهو قد اعطى بلا كلل او ملل ولا من او اذى كم احبنا ذاك الحميد وكم احببته وهذا البحث قمة اولوياتى لباقى العمر كن بخير ولا تبعد خطاك اكيدة انا ان وجودك يسهم الى حد كبير فى نشر المفردة والمعنى فانت ابن لذات البيئة التى نشأ بها الحبيب حميد |
لبن الطيور
** ** يوت قلبي يدّي قبل تدور طول حبِّي ديمة قَبَل عينيك فضَّل لي بس لبن الطيور ما خِبر بكانو أجيبو ليك *** *** *** لامن زماني عليّ يجور أكمد كياني صبر وأجيك وما ألقى خردلة من شعور طيِّب تخيِّب ظنِّي فيك *** *** *** شقّيش أقبِّل وين أروح وأنا تاني مجروح من وشيك يا غربة ياليل يا نزوح دغش الغبش ما بات وشيك ؟ **** **** **** يا غلبي كلما الليل دخل ياني المغنِّي "النجمة ديك“" ولاَّ القِدر يرجى النخل لامِن يشيل قادر عليك **** **** **** يا ريتني خلّيت الرياح في الغربة ترميك بالأسى من قلبي ما دلّيت جناح يحميكَا في ذاك المسا كان ما إنجرحت بلا الجراح الفيِّ قبلك أوعسى صبراً عليك محقتو راح يقدر عليها ييبسه *** **** *** جيت لي غرد وأنا قت بلد لمتنا في المنفى القسى طول عمري لي عينتك مدد حين أحسى غيمتك تحبسه *** *** *** زول حاضري بالصدفة إستراح في ضلِّي أول ما رسى وجكّن جرابو نساني راح وفضَّل ضليلي المانسى …. …. …. ليمونة فوق أزيار سبيل عابث عياني يقصقصه لابدّ من صبراً طويل شان يربى شوكه ويحرسه ************************************ ********************************* يوت:مفردة تفيد دايما خبر بكسر الخاء:عرفت اكمد:املاء حد التدفق خردله:مقياس للكمية يفيد اصغر مقياس ممكن شقيش:على اى شق او بعنى اى اتجاه يقال مقبل شقيش يعنى ماشى على ياتو اتجاه وشيك:يوشك او بمعنى اقترب او دنا دليت جناح:خفضت جناح (واخفض لهما جناح الذل من الرحمة) محقتو:المحقة هى التبذير ومحقت تعنى بذرت ا غرد:هو الغرض جاييك فى غرد اى لى عندك طلب او غرض ومغرود فيك اى محتاج ليك جكن جرابو:جكن بمعنى يملاء الماعون ثم يضغط عليه ليكسب فراغ جديد والجراب الماعون ضليلى:تصغير للضل عيانى:عنوة اى مع سبق الاصرار |
ماريل سلامات ،
والله دى من البوستات التى لايندم عليها زول يقعد وراء الجهاز ويكسر ضهرو٠٠ بجد طلعتا بفايدة وتعلم ، واصلى ومتابعنك بصمت ، وليس لدى شئ اضيفة ولكن اتابع لكى اتعلم منك ومن ضيوفك الكرام لك اجمل التقدير والاحترام ،تسلمى:) |
وعبرك يا مريل
اهدى هذا البوست والتعازى الحارة للاخ والصديق شهاب شكوكو انة يعشق كلمات المرحوم باذن الله " حميد '' حد الثمالة ٠٠ تحياتى وعزائى لفقيدنا٠٠ وياريت تظهر هنا ٠٠ لكى تشاهد وتسهم فى كرنفال كلمات شاعرك المحبب لك وللآخرين كن بعافية محل مامتواجد٠ عفواً اختى ماريل |
يا نسمة نشدتك بالله
********** ******** ساحراني عيونك يا نيل يا نسمة نشدتك بالله كان ماشي علي نوري تزوري حبّاني وأهلي وخلايي ……….. أغريله سلامي وقوليله المطرة إن صبّت يا الجايي العرق الناقع دا الليلى وأولابو كشينبة وإنقايي …. …. …. قندول الشوق حد ما لبّن دندح حبّايي وحبّايي الطير ورياحاً قد هبَّن ينفزعوا ويرموا الحاحايي إندلِّي على الجرف الليلنا وجيبيلي معاك كركجايي ما هو الكركجي خلق نيلنا وساحرني صفاهو الشبّايي …. …. …. شادهاني مراكب من بحري وروّاسي يحنِّس سلكايي قولة يا ليل … ونزل صدري وزِّين وانفدعت لوبايي جاهراني رمالاً كم ربّت من قيفه وعبّت مخلايي بالليل إن غبّت زين ربّت .. ووين زيّها -تشرق- مصلايي ساحراني عيونك يا نيل أومت بنبونة لطرفايي الموج بشِّير ومواويل محظوظة عروسك واللا آيي ..!! …. …. …. بارقاني بروقكن يا ناساً سوّايي وغيمةً رتايي بيّوضة تخدِّر وأعراساً تنقر من تايي ولي تايي …. …. …. يا نسمة نشدتك بالله صنِّيلي مع ربة دارة وطنبارى تخوجل غنّايي محبوبةً سارحي معا طارة حبّوبةً سمحي وحجّايي وصبحاني الجمعة علي شفّع قمراته التقرابه قرايي حفيان الله بينجيهو من دعتي وشوكي وحرّايي …. …. …. يا نسمة الدرب الوسطاني حفتييَّا … الرايح والجايي آذان زاويتنا وحلتنا في تالتي تمعوِن في سمايي كُشنة حَلتنا ،، حمو الدوكي زرزور الجنِّي وكسرايي …. …. …. رجعة بنوتنا مع الغيبة حبحيبه وود الحلفايي متكية بتكرُت في حيبي من ساقه وتخرت دمّايي ريق اليتمطق في صورة وقام رقرق … في آخر آيي مارتلو الفي ورشة مكفرن في الكرو .. والدوشة الفي إندايي بين بطن البلد البطراني .. مطراني .. مرطبي .. سفّايي محروسة أنفاسا من أبنوسه وعقبان لي آخر خلفايي …. …. …. كم قهوة شوفتك راماني وحاماني عوارض لوّايي وقندول الشوق عد مالبّن دندح حبَّايي وحبّايي الطير ورياحاً قد هبّن ينفزعوا ويرموا الحاحايي …. …. …. لكين وأنا حيّاً ينتبّن يا نسمة.. إن صبّت يا الجايي …. …. …. كجنت اللنجيالأفرنجي بايركس تصاوير وهوايي ؟!؟ داير أهلي وسهلي وشيت جهلي يا رحمة خلقة الله كِفايي …. …. …. الخلا بأبيارو وبأزيارو غدرانو التترارَى مرايي شوك غابو الحاني على أطيارو قش الله .. الوين زيّو ملايي وفوق عزِّي مكرّم .. ما دِلاَّ … وأنا حر في بلدي وفي رأيي .. …. …. …. …. الحاري قليلتو .. ولا الساكت .. متعشِّم في الترف الجايي الحاري عقابو .. ولا الساكت متعشِّم في الترب الجايي الحاري حقيقيتو .. ولا الساكت متعشم في الوهم الجايي ***************************************** **************************************** نشدتك:سالت او طلبتك خلايى:اصدقائى كشنيبة وانقايى:مساحة من الارض تقسم بشكل طولى قندول:راساالقصبة الذى يحمل الذرة والذرة الشامى ومختلف انواع الحبوب لبٌن:امتلاء ببودار اللانتاج التى يكون لونها ابيض لذلك تشبه باللبن دندح:امتلا بالحبوب حاحايى:حبل تعلق عليه صفائح ويتم هزه فتحدث الصفائح صوت ليتم طرد الطير من المحصول كركجايى:طين البحر شبايى:الشب الذى تتم به تنقية المياه شادهانى:شاغلة تفكيرى رواسى يحنس سلكايى: انفدعت:مالت ودائما ما توصف بها الشجرة عندما تثمر والبنات عندما يوشكن على البلوغ جاهرانى:ينبعث منها ضؤ ياخذ نظرى قيفة:القيفه هى حافة النيل عبت:امتلات مخلايى:كيس يخاط من القماش او الخيش يحمل الى السوق لتوضع فيه الاغراض اومت:هزت راسها علامة الايجاب بنبونه:البصلة التى تحمل الدرنات التى يتم زرعها طرفايى:الطرفى نوع من الاعشاب بشيٌر ومواويل:تابشير هز اليد علامة على التطريب والمواويل الاغانى بارقانى:خطفت بصرى رتايى:حنينة من الحنان تايى:مجموعة من الناس صنًى لى:ارجو ان تصمتى طنبارى :عازف الطمبور تخوجل:تتحرك جيئة وذهاب سارحى:تتحرك بلا خوف حجايى:تجيد ان تقص القصص او الاحكايات او الاحاجى دعتى:العقارب والدبايب حرايى:حر الشمس حفتييا:الحفت هو الحفر وهنا المقصود اثار الارجل على الدرب والتى تجعله شبه محفور او منحوت كشنة:قلية البصلة حمو الدوكى:نار الكانون زرزور الجنى:نوع من الطيور مكفرن:مقطب الجبين اندايى:بيت الشراب تشرب فيه المريسة سفاية:الرمال التى تسف الامطار اى لا تصبح لزجة قهوة شوفتك رامانى:القهوة ترمى اى تصيب بالصداع من لا يشربها فى وقتها المعتاد لوايى:وجع البطن يتبن:يتحرك كجنت:كرهت تترارى:تتلامع ما دلا:مفردة المقصود بها المدح وتعنى يا سلالالالالالالالالالام او ما شا الله الحارى:المتعشم |
اقتباس:
وكون ان اتبحر فى قصيد حميد واسهم فى تقريب المعنى للغير ففى اعتقادى انى ساجعل لحياتى معانى كثر وليس معنى واحد ثم ارجو ان تضيف ولا تكتفى بالمتابعة فقط فيبدو من اسمك ايها البديرى انك ايضا ابن ذات البيئة |
اقتباس:
ولكن معكم باذن الله نحصل مايمكن ان نحصلة ٠٠ لكِ ماتتمنين ياختى٠ :) |
اقتباس:
فى انتظار هطولك فاليد الواحدة ما بتصفق |
(شن طعم الدروس)
وريني شن طعم الدروس مادام بكانا مشى قطر وكيف ذاتا ترتاح النفوس تقبل قرايتاً فى سفر يايمه حان الإمتحان من وقتو بس فاضل شهر ما اظنى من جور الزمان انجح واجيب ليكم نمر كيف ذاتى يا نبع الحنان انجح من آلام السهر عمرك سمعتيلك جبان خاض المعارك وانتصر زينوبة كل ما افتح كتاب القاك فى أول سطر القى الجداول والصحاب القى الجناين والتمر فى الحصة عقلى أنا قام سدر يمه المدرس لو فكر كان بلقى قاعد فوق ككر فى الدونكا لسع ما فطر يسمع كليمة يا عشاي وأغلى الحكم عند الضجر أنا قلبى كلو عليك جناى وقلب جناى على حجر والله موش لو كان نهر لو كالنى بي سيطان بقر مادام عقيل الجن سدر ما اظنو من عندك حضر بذاتو ابوى تلقاهو قام فاتح كتابو مع الفجر يقرأ ويرتل فى كلام ما بفهمو الناس الكُتُر زينوبة كر من حالى كر قاعد لى فوق نيران جمر غربة وكمان حالاً فقر عذبنى قبل أصل القبر الشوق متل شوك الكتر طعن الجسم لمن خدر والله لو ما منجبر ما كان بفارقك بى شبر زينوبة دنيا الإغتراب خلتنى زي ورق الشدر اتحت من عدم الشراب عم الأراضى وانتشر الغربة اصلو طعيمها مر لكنى بقعد بالجبر لمن سنين الهم تمر يا ربى الهمنى الصبر ************************************** هذه القصيدة هى اولى قصايد حميد التى عرفت طريقها الى آذان الناس وعرفت حميد الى قلوب الناس... كان حينها يافعا ذهب للدراسة فى مدينة عطبرة ليدرس المتوسط هناك فكتب هذه القصيدة مخاطبا زينب امه اسال الله الرحمة لهما الاثنين حميد وامه زينب **************************************** ***************************************** |
عندما كتب حميد قصيدة شن طعم الدروس غضبت منه خالته التى كان يقيم عندها
فقد احست انها مقصرة فى حقو فكتب لها حميد هذه القصيدة ليزيل عنها حزنهاوعتبها عليه (يا خالتى) ********* ما تقولي لي دخل البطون والفي البطون مابتمرق يا خالتي شيليها الظنون والله مابينكم فرق ما زي بعض لوبي الجروف والقايمة كلها فد عِرق والكلمة من غير الحروف قوليها لو كان تتنطق خالتي المجنح ما بيطير و اللاحقها ايدك بتلحق عمر انت شفتيلك بعير معقول محكّم وينطلق طعم الدروس ما لي أنا لي كل مسافر ومغترب عاد واشريري علي الغريب الديمة دمعوا بينسكب أنا دمعة تروي العليها وتمنحق وانا شمعة تستطع في الدروب والشمعة لازم تتحرق ******************************** |
سلامات لماريل و الاحباب هنا ..
لا شك بان الانسان ابن بيئته .. و فعلا اغلب اشعار الراحل المقيم حميد طيب الله ثراه مليئة بالعامية و تحديدا الشايقية .. و يمكن ادخالها في عنوان البوست بدلا عن العامية ان اردت التركيز و التخصيص .. و لك وافر التحايا .. |
ممتاز ياماريل
بوست جدير بالاحتفاء كوجودك هنا تماما |
اقتباس:
سانظر اليه بعين الاعتبار |
اقتباس:
هى فقط محاولة لالقاء الضؤ على ما اظنه يستحق .... حميد كان منبر للاستنارة ومؤسسه قائمة بذاتها للحب والسلام والامنيات بوطن فسيح يسعنا على اختلافاتنا حميد يستحق ذلك واكثر... انا احبه وانتم تحبونه فالنحتفى به كما يجب شكرا يا امال كلماتك هذى هى ما يدفعنى للمواصلة |
اقتباس:
كوني هنا دائما كوني بالف خير ولحميد الرحمة وعليه السلام |
اقتباس:
و الصحه و العافيه لشاعر الشغب محجوب شريف... بوست مميز و متابعين معاك يا ماريل..و كان لقينا وقت هناك الكثير عن مفرده حمّيد له الرحمه و المغفره... |
اقتباس:
|
اقتباس:
هى مفردة تفيد تكرار حدث بصورة روتينية يوميا او دايما تقودنا الى ذات المعنى قد تكون يوميا اكثر دقة ربما لذلك اشكرك على وجودك هنا |
اقتباس:
|
| الساعة الآن 11:24 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.