الشعر الغنائى عند دكتورعلى الكوبانى .. حالة مستفزة جدا .. راى مطروح ..!!
الشعر..عموما.. نتاج تفعال وجدانى ...فيه زخم معطيات شتى تشكل .وتصور..حالة تلك الخصوصيه الابداعيه..وهو افراخ لواقعية الاحساس ...فى صبا إرتعاشه وهو افراز يرسم بلغة تعاببير كلماته كل ذلك القوام البديع....وتاتى حالات نتاجه..بدفق فيوض تحكى وتعكس.وتترجم جوهر كل تلك المعانى..فى سلاسة النظم..وقواعد توازنه...وفى سحر.. إنسيابه..وفى معايشته الوجدانيه..وانفاس شهق الصدق .فيه..وعمق التجربه.. وحالة التشكيل....والتجريد.. وينطبق ذلك على كل انواع الشعر..وخاصة الغنائى..ولعل شواهد اغنيات الحقيبه تفى ببياناتها عن كل فروض الشروحات والتفاسير..المعانى..والرصانه..والاثر البعيد المدى..لذا هى خالده...وصادقه..وملموسه..لانها تهبش حاجات فى عمق الوجدان.. لناتى الى حالة .الانتاج الصناعى لضرورة الشعر ...عند..دكتور على الكوبانى... وهو اشبه بحالة تركيب .وتصنيع مستمره..لا توقف لديها..تستعمل كل قواميس المفرادت لتتفق مع فكرة الموضوع .وملودية اللحن...ومقترحات الشله..المحيطه..لان جوهر الطرح ياتى من الفكره..للموضع الذى يحتاج للتركيبه الشعريه....ليكون جاهزا عند الصباح للارسال... والتلفزه...!! يستحيل ان يكون كل ذلك نابع .من الحسى الوجدانى .والمعايشه العاطفيه...!! انه اوكازيون..مفتوح..!! مصنع ينتج.خمسينيات الاغنيات ..بلا توقف..!! بلا توقف..!! بلا توقف...!! والفائز من يدفع ..اكثر...!! وهى .حالة..ماديه..صناعيه..مفتعله...!! وستموت هذه الاغنيات غدا..لانها فاقدة لكل المقومات.لانها ولدت بلا رئة إستنشاق....ولانها حالة ..مرضيه...تحتاج للانعاش..ولانها متارجحه..ليست لها اصول ...او جذور...!! وبالطبع .هذه حالة..مستفزه..جدا..!! وإتلاف...غير .مسبوق...!! هل من المعقول .ان ينتج شاعر...فى سرحانه..فى ...خميلة..الشعر...بهذه الكميه التى انتجها..دكتور.كوبانى!! وهى حالة ..[/B]ابعد ما تكون عن رقة .الاحساس..ورهف الشعور..وسحر شعور التدفق...الجمالى لمعطيات الجمال الاشمل..الذى فيه ذلك التفصيل التحديدى..للمبدع الفنان...وخصائص التركيبه التى تستلهم..وتستهوى احلام الحقيقة والخيال.فى تزواج ابداعى ووجدانى يمنح بكل سخاء..وهو يعيش حالة ذلك الارتعاش..!! الذى محوره المعايشه الوجدانيه..والتدله العاطفى.الذى يقنن تلك التجارب فى نسق متوازن ومتباعد ليست فيه كل كثافة الانتاج ..بل الندره ومذاق النجربه..والصدق والمعايشه وانا لا انكر ان لدكتور كوبانى ظلال فيها فواح شذى العبير...والعنبر..لكن حديث المدينه يتناول السمكره والاستعداد لملء فراغات الالحلن..والوسط الفنى له ماربه واشكالاته..وتلك النميمه...!!التى اشارت الى دكتور كوبانى بشكل او اخر...@!! يا جماعه..انا.غلطان...؟؟؟؟..ولا شنو....؟؟؟ |
عصومي
قال ليك: زولك القريب ولا ود أمك البعيد دحن دكتور علي كوباني، ياهو زولي القريب، ما إحنا سوى في رأس الخيمة وطبعن واجب علي أني أرد آها شوياتك عليا وبجيك يديك الف عافية ومبروك على الوليد وإنشاء الله الباقيين ويديم ليك الأفراح يا زول ناس الفن والغنا ديل ما تهابشم ورانا عرس بنات والعلاقات الجيدة مهمة لزوم الحفلات |
الاستاذ عصمت ...
دائما اتحسس ما تكتبه عن الفن والامدرماني بالتحديد ودائما اجد ضالتي فيما تذهب اليه ولكنك هنا لم توفق (احسب ذلك )والحكم للجميع ... فالدكتور الكوباني ...فنااااان وشااااعر في انسانيته وقلبه الابيض ...وبسمته التي لاتفارقه واعرف ان ذلك لايشفع له كشاعر ولكن اردت ان الفت الانتباه لان الرقة والحساسية هي صفات الشعراء وساتيك هنا بقليل من ما كتبه وللجميع الحكم ... ولك جل احترامي نعمات حمود |
سمعتم .. رأى دكتور كوبانى يا مخيّر و نعومة ..!!!
هو أقرب الى ما يقول الريس عصمت .. ولكن وفق رؤية د. كوباني .. عرفت كوباني فى الجامعة .. وكنا قريبين الى بعض لمدة شهرين أكثرمن أى مدة ( 18 ساعة فى اليوم تقريبا كنت وقتها أنفذ ( كافتريا الطب) .. كوباني يقول أنا كاتب أغاني ولست شاعرا .... تواضع كان أم صراحة فالرجل صدق مع نفسه و معنا .. ودا موضوع سأرجع له .. كتابة الشعر .. و الشعر و هل يكون الشاعر كاتبا أحيانا و شاعرا أخرى ؟ |
اقتباس:
لو لاحظت مداخلتي مع عصمت، ما إطرقت فيها عشان أبدي رأي أخوك والحمد لله حكاية الشعر بالنسبة ليا، لمن أكون شاعر بي عظمة ودي بلقاها هنا وسطكم قلت لي عصمت الزول دا (د علي) بقى زولي القريب لأنو عصمت ود أمي والمسافة هي الخلتني أكون منو بعيد علي أنا عرفتو عن قرب في 87 كان وكتها رجسترار، دا طبعن غير معرفة الأسر آها لفت الأيام وجيت زاملتو ورافقتو وإلتصقتا بيهو في رأس الخيمة المثل بيقول المابعرفك يجهلك؛ العاوز معرفة علي كوباني يجينا هنا ويسأل منو أي حجر من جبال الشحوح ولا إسم نقطة مويا من الخليج العربي ولا بحر العرب، يسأل منو الراعي والرعية، أهل بلد ولا وافدين. نعومة وصفتو غير وصفو لمن ذكرت البسمة الما بتفارقو لأنو هو البسمة وهو المرسوم في البسمة ما بقول أدب لأنو دا وصف هو فاااااااااااااتو هناك وما بقول الذوق لأنو هو الشماعة المعلقيين فيها كل الرقي مشكلتو علي كبييييييييييرة وهي أنو ما بسجر لكن ذي ناس عم فتحي وإن كان الإتنين حلاة السفة في خِشموهم ليك المودة عمدتنا ومستنين تحكي لينا عن ( كافتريا الطب) |
الاساتذة ....
المعتصم ..اين انت يا رجل ....؟ نسبة لالمامي البسيط بحكم دراستي للشعر ...هناك اختلافابين الشعر الغنائي وغير الغنائي ولنتفق ان الدكتور شاعرا غنائيا ....كمرحلة اولى وبعدها ننظر ثم نصنفة (اين موقعه من الاعراب بالنسبة لشعراء الاغنية )....اتفقنا ... والكوباني لم اعرفه جيدا رغم تواجدنا معا ربما لظروف عمله وانشغاله ... ولكن عرفته جيدا من خلال جميع اهلي (الجالية السودانية هنا بالامارات )فهو انسان في المقام الاول ...هنا اتفقنا جميعا ...تبقي حكاية الشعر المصنوع دي ...سا نزل لكم ما استطيع ولكم تقديري نعمات |
هاكم ...الملاك
علي الكوباني أنــا شــفـتـه المــلاك بـأيــــدي ســالـمـتــو بـهـــرنـي بي نــورو خــلانـي مـأســـورو ومـن ضعـته في بحورو أنا عـقـلي فارقتو ***************** لـو طـلاك صـباحـو أو ضـمـاك جـنــاحـو أكـيـد القـلـب بشـفى وتاني تطيب جـراحـو كـمان لو شـفـته لونو وسحرو الفي عيونـو تـدور ترحل في كونو من حسـنو ولطافـتـو ***************** الــراقــي في وســامتو مرسـومة ابتسـامتو تـفـوق البـدر صـورتو وآيـة الحـسـن هامـتو دلال مـن غـيـر تـعـالي ورقـة وذوق مثـالي زي الــــدر بـــلالــي في أصـلو ووداعـتـو ***************** مــن يــــوم ما لقيتــو كل الفـــات نســيــتــو في قـلــبي اصـطـفـيتو ودون النــاس هـويتو صـار لحـيــاتي معــنى وفي أحــلامي جـنّة بــس الحــظ تجـــنّى شال قـلبي وسعـادتـو |
هاكم كمان ..
... يا ستهم غناء /كمال ترباس كلمات وألحان د.علي الكوباني سـمـحـة يا سـتـهـم... وحـســنـك يفـوق حــد الخــيـال كيفـن محـاسنـك أعـدهـم ********* حسـدوكي هــم يا ستــهـم لمَـا الصــفــات عــددتهم لو ما الظروف وخوف الملام بهوا كي كان كلمتهـم كــان قلت اسـمـك للأنام وبحـتَ بي ســر الغــــرام وعشـق الليـالي العشـتهـم ********* شـافــوكى هم يا ستـهـم وغـنــوك معـاى في سـرهم عـرفوا الجمال وأحلى الخصال وكل المعاني الردتهم قالو المحال رقة ودلال والجيد طويل وعيون غزال والبـسمـة فيـك يا ستهـم ********* وينا الحـروف يا ستـهـم صعـبـَن علي ما عـرفـتـهـم أرجع وأقول دونـك تحول سـجـع القـوافـي الشـفـتـهـم لو قلت زول ما زيو زول ما بوفي قول أو ليك أطول مـا إنـتي سـتي وسـتهـم ********* |
وتاني كمان واحدة...
[align=justify]منتهي الريدة علي الكوباني تعـال يا منتـهى الريـدة تعـال لعـيـوني يا سـيدا تعـال نـوًر سنين عمري وجيـب الفرحـة ليً عـيدا *********************** فـراقـك يا حبيب طـوًل زمان البهـجـة إتبـدّل لمـن كنـت في دنـيـاك بسافر في الخـيال وأرحل بكون جنبك وأكون مشتاق وأضيع واتلاشي في الأشواق وأحسك جوه في الأعماق وتـدي عيـوني يوم عيدا ***************** ويـن من بعـدك أيـامي تتطيـب أو تحـلى من تاني وكيـف في بعـدك أتهـنّا بعد كل العـذاب جـاني بـقـيـت من آه لى آه عـيـوني الحـزن همّـاها أعيش في الذكرى واطراها حـروفـي الكنت بتـريدا ***************** تعال يا غـالي أرجـع ليّ خلاص ألم البعـاد فاض بيّ ونبـدأ مواسـم الإلفـة تغيـب الدمعـة من عينـيّ وتبقى اللـقـيا عيـديـة زهـور بشـوقنا مسقـيه أهــازيج ريـد فرايحيـة مشاعـر اللهفـة بتزيـدا[/align] |
واحدة اخيرة للفنانة ندى القلعة ....
يا قلبي علي الكوباني قلت ليك سيب الغــرام يا قلبي ما رضيت الكلام خلاك وغاب ما حنَا ليك وبقيت مع الشقا والملام ********* من ريدو في جواك صحا شلت الأماني المفرحه ما قايل الحلـم الكبير لحظاتو زي ضل الضحى والليلة ما الهـــم إترسم والحســرة بانت والنـــدم حتى الأمان راح وانعدم تلقاهو وين تاني المنــام ********* يا ريتو في الآخر عرف دمع الفــراق الما وقـف لا شفتو من بعدو الفرح لا راضــية آلامك تخـف وأنت في قلب العـذاب راجي في الأمــل السراب لو الزمان يوم ليهو جاب أو طــلا وأداك السـلام ********* خليهو يا قلبي اليسـيـر ما بلقى زيــك تاني غـيــر لا حبك الفــات الحدود لا قــدرك العـــالي وكبير خلينا نحيا الدنيا ريــد ونعيش مع الناس التـريـد والبدلك بي زول جديد شيــلو من جـــواك تمـام |
الاخ عصمت ...لك احترامي ابدا ...
وصلتني رساله من الدكتور الكوباني وطلب ان توصلك عبر هذه النافذة وهي فيما يلي الرائعة ناعومي فخري بتصديك لأغنياتي لا حدود..بس عايزك تقولي للأخ عصمت..شكري الجزيل على نقده..بس قولي ليهو الكوباني قال ليك من جاب المعلومة بتاعت أني طلعت خمسينات من الأغنيات..وأنا رصيدي المتواضع لم يتجاوز الخمسين أغنية في 15 سنة...؟؟ بعدين ليس الأغنيات لمن يدفع أكثر ..لكن بشيل حقي من شركات انتاج الأشرطة..عشان ده تقييم للعمل..وفي كثير من الأحيان يوزع وليس لي فيه رزق.. مرفق ليك أغيات الملاك...وستهم..ومنتهى الريدة وديل من آداء الرائع ترباس..وأغنيتي حال الدنيا..وبتستاهل..للرائع عصام محمد نور..واغنية سيب الغرام لندى.. وأغغنية عيون النيل...ودي جديدة لعبد القيوم الفنان الشايقي.. لك حبي وتقديري.. هذا ما وصلني واكرر لك كل احترامي نعمات حمود |
الأعزاء نعمات وعصمت لكم التحية والاستئذان بالدخول في هذا النقاش الجميل والسماح لي بأن أدلو بدلوي فيه:) ياعصمت كلامك فيه حقيقة حسب رؤيتك واستغرابك لغزارة انتاج أخونا الكوباني ولكنك نسيت أو تناسيت حقيقة هامة وهي وجود شيئ اسمه شيطان الشعر الذي حبا الله به البعض وحرم منه الآخرين.. ماذا تقول يا عصمت في اسحق الحلنقي الذي كان المسيطر الوحيد في حقبة من الزمن كانت فيه كل الأغاني التي تطلب من المستمعين في برنامج ما يطلبه المستمعون من نظمه.. لقد كان الحلنقي ومازال شاعر تجاري ولكن ذلك لا ينفي أنه شاعر وشاعر غنائي جيد وموهوب...أنا أعرفه شخصيا وأعلم أنه كان ينظم الأغاني بالطلب والمواصفات التي يطلبها الفنان من حيث الموضوع والقافية والبحر المطلوب..هذه والله عبقرية لا تنقص من موهبته بل تضيف اليها صفة الاحترافية.. لا تنسوا ان الشعراء في الجاهلية كانو يتبارون شعرا في مجالسهم وينظمون الشعر دون اعداد مسبق للمواضيع او القافية ويأتي الشعر قمة في الجمال والروعة ولا نتهمهم بالاتجار بالكلمات.. الكوباني شاعر موهوب وغزارة شعره تحسب له وليست عليه....لي عودة.. |
الحبيب ..بابكر.. شكرا للتهنئه..والولد ولدك..ونشوفك يوم السبت 28 يونيو 2008 .إستاو كلب.الساعه 6.30 مساءا.. انا قصدت ان .ان اصور تلك الحاله من واقع حديث الوسط الفنى..وعن صناعة القصيده..وتركيب الاغنيه..وهى زوايا لها ابعاد... وسنواصل الحديث..بصوت جهور.. كل الحب.. |
سيدة الحسن والجمال..
الايقونه..نعمات حمود... كم يسعدنى وجودك هنا..وانت تتولين النقل المباشر من دكتور على الكوبانى.. تحدثت انا عن مخاض حالة الشعر...ونتاج ذلك الافراز..فى مواقيت إنتاجه..وهى معاناة دفق الوجدان... والحديث فى المدينه ووسطها الفتى.زيتكلم بصوت على .عن صناعة وتركيب..وتاهيل .الشعر الغنائى عند دكتور كوبانى...وغزارة ذلك الانتاج االيومى.من واقع فكرة شللية الايفاء لخاصة دكتور كوبانى..وهذا يعنى توجيه الفكره ...بعيدا عن معايير الدفق والاحساس...فى زحمة واقعية الفرض الملازمه..ودكتور كوبانى يعلم تلك الظروف والملابسات جيدا...من واقع الاحتكاك اليومى..وحين تتاح ظروف اللقيا مع الشله..من الفنانيين الذين يتغنون باغنياته...!! دكتور كوبانى..كتب بصدق والهام بعضا من قصائده..حيث عاش تجربة المخاض .والمحاق والمعاناه..وحين افرخها ..كانت رؤية متكامله فيها ألق دفق الشعر.. وكانت صادقه..مشتعله...ومؤثره.. فيها ..الشجون .الوان.. |
الشاعر المهندس معتصم الطاهر...
لعلك انت قد بينت واقع الحقيقه..مجرده..وصادقه...ومتفتحه..وشاهده.. كم ارجو ان تواصل وتعود...بثقل المعرفه...ودعنا نواصل..من اجل ان نوضح الواقع الجديد فى دنيا الشعر..والمدارس الصناعيه فيه .وهياكل التركيب اللحنى التى ـتملأ مثل فرلغات المبانى... اتوقع عودتك..يا باش.. كل الحب |
الحبيب ..بابكر...
الولد ولدك..ونشوفك يوم السبت 28 يونيو 2008ى .زباستو كلب الشاعه 6.30 مساءا... حديث المدينه ووسطها الفنى ..فى همسه وصرلخه.يتحدثون عن صناعة القصيده.وهيكلة تركيبها..ويشيرون فى خفاء الى .غزارة الانتاج اليومى للكوبانى.. وحسب الافادات..ان هنالك فكره...وتركيبه.وتصنيع..!!! احببت ان اطرح هذه المساله.,,واستعد للغوص فى عمق محيطه... وبس...!! كل الحب.. |
اقتباس:
سلامات .. لا اتفق مع من يقول أن هناك شعر غنائي و غيره .. هناك شعر سهل التلحين والغناء .. وفقا لبحره الخفيف .. وهذه ميزة كتابات د. كوباني .. و د. كوباني انسان مفعم بالجمال منذ عرفناه .. و يملك بيت شعر اسمع عزة لن يستطيع ان يكمله الى قصيدة لذا فهو في رحلة بحث عن بيت ضائع .. و لذا تجده غزير الكتابة .. أما عن .. الشعر الغنائى ..فهو ذاك الذى يُكتب ( يُنجر ) للحن مسبق .. د. كوباتي يملك ملكة وموهبة أن يأخذ حدثا معينا ليصنع به عمل شعرى .. و هذه فطرة يفتقدها كثيرون مِن مَن يكتبون الشعر ( منهم شخصي ) .. و تجد أن خير من يتصف بها فى شعراء المرحلة ( مدني النخلى) .. أما كتابات الكوباني فلي معها عودة .. حتى ذلك الحين .. قولي له نحبك .. |
اقتباس:
لتجاوبه بما يكتب عنه .. وهذا هو كوباني الى أعرفه اهتمامه بكل ما يهم الناس وهو اهتمام الطبيب والشاعر وكوباني زول يتحب .. |
العزيزه نعمات.. ارجو ان تنقلى لدكتور كوبانى ..تقديرى.واعزازى ...ومحبتى له..وحرصى عليه.. وانا اورد مقولتى عنه..وهو ياتى بكل رحابة الصدر.ودفء الالفه..وهدوء الواثق..وفى ادب يوضح رايه..هذا يكشف عن معدن الرجل..وصفاء نفسه..ورقى تعامله...وهو يكتم انفعاله تحت طيات كلماته المتوازنه.. له التحيه والتجله.. وانا استمتعت جدا ببعض قصائده التى تمثلت فى دلالالتها بفواتح مدى مترامى المعانى والملوديه الفنيه لنعود لصلب الموضوع...وهو فصل التحديد فى اللغه.بان هذا شاعر غنائى..والاغنيه من كلمات...فلان الفلانى.. وفى مدارات الشعر الاخرى..القصيده من شعر الشاعر فلان .الفلانى.. وكما اسلفت المخاض الشعرى له حريق معاناته التى تحجم الولاده فى قصيدة فرديه اغلب الاحيان.تصور التجربه..وتمنح معطيات الجمال فى ربيع الدنيا..وتشكل كافة الملامح التى تمنح ذلك التصور الابداعى ألق عطائه...وتجربته الثره..وقوة عنفوان ما يعتمل..ليخرج يفرح...ما..او حزن..ما..او هجر.ما.او بواكى الشجون..وصراخ الاشجان.. انا لا انكر ابدا ان للكوبانى الدكتور..روائع فى التشكيل ..وتفرد فى المعانى... لكن ما اقلقنى ضجيج المدينه ...وهمس الصراخ الذى ارتفع فى الوسط الفنى.وما يجاوره عن .صناعة كلمات الاغنيه..وتركيبها بما يواكب ضرورة الحوجه.او خيال الفكره.من الذين يطلبون ان تملأ كلمات الاغنيه فراغ اللحن.وهكذا يبدا التوظيف الصناعى ياخذ موقعه..وتبقى القصه ...تركيب على فوارغ الرؤيا وابعاد تصور الفكره..لتجنح موازين تجارب المعاناه ومخاض التجربه التى تعطى عصارتها فنا.وشعرا .يملأ ارجاء الكون بترنيمه.وروعته.. وحديث المدينه.ااخافنى ..!!. فهبشت دكتور على الكوباانى...بهذه القسوه..!! واردت ان اسبر غوره.واستخرج منه .ما يفيد..وينفى..ويؤكد لنا .انه بذلك المد.الذى يجعله يحترق ليمنح...ويعطى من لهيب احتراقه كل ذلك الوقود الوجدانى ...العتق.. العزيزه نعمات.. ارجو ان تبلغيه .سلامى..وان تطلبى منه ان يستحمل وخز الابر..التى شككناها فى خاصرته...ونحن متاكدين.. ان نزيف تلك الوخزات..سيمنح من عمق وجدانه..لنا ..حروفا انيقه..تفيض بلواعج الاشواق...وسحر الجمال...ومزن السقيا.. نعمات.. لك.وله.كل كثافة الفيوض.وسلامة القصد..وبياض النيه.. وارجو كل الخير.. |
الحبيب فتحى...
نتفق على ان هنالك صناعه تركيبيه للشعر الغنائى .بما يتفق عليه.من الايحاء.او الفكره.. وعلك تلاحظ ان كثافة وغزارة الانتاج..انتهت بالحلنقى الى ..افلاس جمالى ..جعله يكتب قصائد بلا معانى... مثل . .كلماته..للقصيده..ما مشكله!! التى اتت بمعايير التعجيز اللفظى ..زوشطحت بموازين التشبيه..فالحلنقى قد وصل الى نهاية مطافه الابداعى..!! لذا غمرته تلك الفوضى.زوهو الشاعر الغنائى..الذى قال الكثير عن الجمال..وعن نزف الحزن .زوعن مواجع الفراق...وضجيج الاشواق.. وهو قد فقد الايقاع منذ ان بدا..السمكره الغنائيه... نضب المعين.وحل الجفاف واحتل المجارى النديه... واتى العطش...!! وحين تعرضت لدكتور الكوبانى..انه يمثل جيلا مختلفا فى ظروف مختلفه...وهو يطرق مدارات جديده..خفت عليه من حديث المدينه...وهمس الوسط الفنى.الذى يغتال نهارا جهارا..لذا هبشته بتلك القسوه.اردت ان اصحى فيه اشياء.. تقديرى لهذا الدكتور الفنان..انتص قسوة النتقد...برحابة اتساع قدرات..ورد بلطف الادب...والزام التربيه .وهدوء النفس.واستحمل تلك العباراات الناريه..وامتص كل شىء بتحمل الفنان.. له التحيه والاعزاز.. ويا العزيز فتحى.. انت ابن شاعر ابدع بدرر من روائع المعانى.والاغانى...وصدق المشاعر.وبديع الوصف... عليك الله قارن..وانت تتبع مخاض معاناة الوالد الشاعر الفنان .مسعد حنفى وهو يخرج كل تلك الدرر...وهى لا تزال تضج وتملأ بتعابيرها ارجاء الكون...وتنضح القا..وامتاعا ..وشجونا..وطربا.. لذا نحن احرص الناس على مثل الكوبانى.زلانه فيه وهج من قبس..[/size]لك المحبه.يا بديع.. |
التحايا الطيبة للجميع و التحية للشاعر دكتور كوباني و الذي كنا نلتقيه كثيرا في مضماري ند الشبا و جبل على و نستمتع بقفشاته مع محمد ميرغني و اسحاق الحلنقي و بعض سكان العين الكرام اواخر التسعينات.. ننقل لكم هذا الحوار اثراء للنقاش :
[align=center] أغنية «كلك حلو» عملتها في المشرحة وكلام الميتين واضح جداً!![/align] د. علي الكوباني الرجل المتخصص في الطب الشرعي والشاعر والملحن المعروف.. عاد الى البلاد أخيراً من مقر عمله بدولة الامارات العربية المتحدة. والتقيناه في حديث رافقنا فيه الزملاء مجذوب حميده وعبد المنعم ابو ادريس عن الطب الشرعي والغناء ورحلة الحياة. * مهنة بتعتمد على مصائب الناس..؟ ربنا سبحانه وتعالى مرات بيجعل رزقك في مصائب الناس. وأنا رزقي بعتمد تماماً على المسألة دي.. لو ما الناس ماتت وعملت مشاكل لمدة شهر... نحنا بنبقى عطالة. * ومرات بتقيف المشاكل؟ حكمة الله الناس ما قاعد تبطل مشاكل.. بالذات في عاصمة عدد السكان من ستة الى سبعة ملايين ما بتتوقع ديل كلهم ينوموا من غير مشاكل. * وفي النهاية آخر اليوم عندك حصيلة؟ أيوه بتجي حصيلة ما بطالة. وأنا حقيقة عايز اضيف حاجة، يعني زمان انا كنت بفتكر انو الموت هو نهاية الحياة «الانحنا» عايشنها.. لكن انا اتعلمت من خلال تعاملي مع الموتى انو التعامل معاهم مريح جداً. * كيف؟ التعامل مع الانسان الميت أحسن من التعامل مع الحي، لانو لغة التخاطب معاهو ساهلة ومريحة. * لغة التخاطب مع الميت؟ أيوه.. ودي حكمة الطب الشرعي، يعني الطب الشرعي ده لا داير قراية جامعة، لا دراسات عليا. ودي كلها بتعملها عشان تكون مؤهل عشان تبقي لغوي. * لغوي كيف؟ يعني تقدر تفهم كلام الزول الميت ده.. لانو بوريك كل العايز تعرفه.. جنسيته شنو؟.. وعمرو كم... وطولو كم وشغال شنو.. والحياة عملت فيهو شنو.. ومنو الكتلو .. والساعة كم؟ * اللغة دي مفرداتها شنو؟ الآثار التشريحية. * ممكن تشرح الحكاية دي؟ الآثار بتبدأ من آثار الموت نفسه.. مثلاً سبب الوفاة ومعطيات هوية الميت.. وبالمناسبة افادات الميت واضحة أكثر من الزول الحي.. وان تسأل زول الحصل شنو يقول ليك ما متذكر، لكن الميت يقول ليك جنسو شنو مباشرة. وبتعرف التشكيلة العربية بسرعة، حتى من خلال العظام بتعرفوا صيني ولا افريقي ولا اوربي. * بتعرفوا رجل ولا أنثي من خلال العظام؟ أيوه.. يعني مجموعة عظام ممكن تعمل منها تشكيلة وتعرف من خلالها معلومات كثيرة. * ممكن تتعثر عليك اللغة دي؟ كلما كانت الجثة مكتملة.. كانت المهمة أسهل.. والصعوبات بتبدأ بعد مرور زمن على الوفاة ووجود الجثة متحللة او محروقة او غيره، لكن العلم متطور طبعاً وبيوريك. ومهما كان الجزء الموجود عندك بسيط ممكن تطلع منو حاجة.... ونحنا عندنا تطور علمي كل يوم. وبتجي حالات معقدة؟ أيوه .. وبتبدأ بي كيف تربط السببية بالوفاة، يعني مثلاً زول أصيب في حادث وكان حيّ.. والاسعاف ماشي على المستشفى عمل حادث، دي بتدخلك في متاهة الزول مات بالسبب الاول ولا الثاني... ومرات بتعدد الاسباب.. لكن ما عندنا طريقة، التدقيق لازم لانو الكلمة الممكن تقولها بتقيف عليها أحياناً حياة إنسان. وممكن يشنقوهو بسبب كلمة منك. * تذكر حالات زي دي؟ أيوه.. يعني واحد ضرب ليهو زول بي عكاز ورماهو في البحر. ولما جاء الجثمان كان الزول ده ميت بالغرق مش بالعكاز، فالراجل ده ما حكموا عليهو بالقتل العمد. * ليه؟ القصد الجنائي كان شنو؟.. الزول ده ضربو بالعكاز وافتكرو مات وشالو رماهو في البحر عشان يخفي الجريمة، فبقى القصد الجنائي وسبب الوفاة ما واحد.. وهنا بتجي أهمية الدقة في ممارسة الطب الشرعي. ولازم تتعلم تقول لا أدرى...! * يعني شنو؟ يعني ما بعرف..إنت يا أخي لا حاوي ولا عندك قدرات إلهية. * وما بعرف دي بتكون عادة في ياتو جرائم؟ يعني في التحلل لما يشيل الانسجة مثلاً.. ولما تكون المسألة معقدة جداً.. ما عرفت حاجة ما تحاول تفترض. * من الحاجات الصعبة عندكم النبش؟ أيوه .. لأنو بتحاول تعتمد على العظام والشعر.. لكن عموماً ما تحاول تفترض سبب للوفاة.. وأذكر ايام ونحنا في كلية الطب في جامعة الخرطوم. ودي فرصة الواحد يذكر ايامو الطيبة في الكلية كطالب واستاذ. وهى من الكليات المشهود ليها بكفاءة عالمية. واذكر انني جيت كأستاذ ممتحن للطلبة في كلية الطب. وكانت لجنة الامتحان مكونة من ثلاثة دكاترة. وأنا كنت اصغرهم وبروفيسور لينش وده خواجة. وكان من دهاقنة علم الاطراف والطب الشرعي في بريطانيا. والثالث كان من الأساتذة الدرسوني، عموماً بدأ الامتحان الشفهي ودكتور لينش سأل الطالب سؤالاً أنا شخصياً ما كانت عارف اجابتو، رغم اني دكتور واستاذ في الجامعة.. عاينت بي ضهر الخواجة لاستاذي وفهمت منو انو ما عارف اجابة السؤال. ودي مأساة لانو نحنا مفروض أى سؤال يتقال هنا نحن عارفين اجابتو.. عموماً الطاب كان شجاع جداً وقال(I dont no) ..أنا ما عارف، فالخواجة قال ليهو.. مبروك نجحت.. سؤال واحد والطالب نجح. وما كان مصدق. ودكتور لينش قال ليهو لو كان قلت أى إجابة كنت سقطت، لانو أنا عارف إنو الدكاترة الواقفين معاي ديل ما عارفين الاجابة.. ودي حكمة اتعلمناها..انو في الطب لو ما عارف طوالي تقول ما عارف. * دكتور الميتين ده بيكتب شعر ويلحن أغاني .. كيف؟ زمان ترباس الله يديهو العافية قال علي كوباني ده بيلقى النصوص في جيب الميتين.. فقلت ليهو اذا افترضنا اني لقيت الشعر في جيوبهم بلقى معاها النوتة الموسيقية برضو! * عندك تفسير للمسألة؟ السكون والهدوء في المشرحة بيديك جو كويس لكتابة الشعر وتلحين الأغاني. * في المشرحة؟ إن أجمل الأغاني كتبتها هناك.. والغريب في المسألة دي شنو. * دي ياتو أغنية؟ أغنية «كلك حلو» البغنيها جمال فرفور.. * اتوقعت تنجح؟ أيوه وراهنت عليها .. لأنو من المرات القليلة بناتي الصغار يتفاعلوا مع أغنية بالطريقة دي. وراهنت المطرب انو الاغنية دي حاتلقي صدى كبير جداً. * عملتها وكنت محدد المطرب؟ لا ما كنت محدد الحايغنيها منو * مرات بجيك احساس انو الاغنية دي بتاعت فلان؟ أيوه.. يعني أغنيات زي (ستهم) وحبابك جيت وشوفوا الجمال ده.. اتعملت بي احساس كمال ترباس.. وشريطي الجديد برضو اتعمل بي احساس كمال ترباس. * الاحساس ده دائماً مع كمال ترباس؟ لا ممكن يكون مع ناس غير كمال ترباس زي اخوانا ياسر تمام وعاصم البنا .. وان شاء الله معتز صباحي وعصام محمد نور.. وعندي معاهو اغنية اسمها بتستاهل. وهى من الاغاني القليلة الما من ألحاني. * عندك حاجة شهيرة مع المرحوم عوض دكام في مشوار المساء؟ أنا أولاً بترحم على روح صديقي دكتور عوض دكام الطبيب الانسان والرجل الفنان.. ودكتور عوض مشهور بي قفشاته طبعاً. وكان التلفزيون قد استضافنا في ثاني حلقة تقريباً من برنامج (مشوار المساء) في رمضان. ود. عوض قال ليهم في الحلقة فجأة كده وما كنا متفقين عليها..انو محتج كيف يجيبوهو مع دكتور الميتين ده الماعندو لادا ولا عيادة. والبرنامج على الهواء طبعاً، فقلت ليهم دكتور دي مفروض يقولوها للزول الدرس طب، لكن الاسنان دي ذاتها ما مفروض يعملوا ليها كلية. وممكن يدرسوها لى ناس الطب بالعصر، لانها محاضرتين واحدة قلع والتانية حشو.. وطبعاً كانت ضربة حلوة ود. عوض اتلقاها بي رحابة صدر وقطع شك ناس الاسنان من المحببين الينا. * نرجع للمشرحة جيت هناك كيف؟ ده بيرجعني لاستاذي دكتور عبد المطلب محمد يسن. وهو العلمي الصنعة من الالف الى الياء. وليهو الفضل في إني اكون طبيب شرعي. واذكر اني جيت المشرحة لقيتها في حالة يرثى لها. ووضعها مأساوي. وانا جيت المشرحة بي كرّعي. وأتذكر انو بعد ما شال ورقي وقفلوا في الدرج قال لّي دي أكبر غلطة ارتكبتها في حياتك. * وكانت أكبر غلطة فعلاً؟ أنا ما ندمت أصلاً على إني بقيت طبيب شرعي. ولو رجع بي الزمن تاني حا أجيب ورقي برضو للمشرحة. * مرت أحداث كبيرة على السودان في فترة وجودك في المشرحة؟ أيوه احداث على مستوى الجريمة والسياسة والموت والتعذيب. ودخلنا في معارك كثيرة لدرجة اني لو رجعت للعمل في السودان مرة أخرى ما حا اشتغل في التشريح.. لكن يمكن اكون مدرب لي ناس تانين. * ليه؟ لانو ما أقدر أقدم أكثر من القدمتو على مستوى التشريح. * الجثة السودانية كيف؟ الشغل فيها ساهل الى حد ما. * كيف؟ نحنا ناس بتتميز بالوضوح والشجاعة، يعني الزول الكتل.. كتل.. بي عكاز ولا رصاصة ولا غيره، لكن برة العقلية الاجرامية خبيثة. ولازم اقول هنا انو الجثة السودانية صعبة أحياناً. * كيف؟ اللون مثلاً مرات بيعقد التشريح، يعني أذكر في بريطانيا البروفيسور الكان بيمتحن فيني الامتحان الشفهي سلمني صورة لامرأة عارية تماماً وارقدة في سجادة.. عاينت ليها.. سألني شفت الصورة كويس؟.. قلت ليهو أيوه..قال لي المرأة ميتة السبب شنو.. ولانو لونها ابيض قدرت احدد سبب الوفاة وهو اختناق بسبب أول اكسيد الكربون. وده بيخلي جلد الزول لونو زي لون الكرز... وليه كانت عارية.. ده لانو التسمم بأول اكسيد الكربون بيصيب الزول بجنون مؤقت، ويبدأ يقلّع ملابسو. *أول جثة اشتغلتها؟ كانت مطعونة خمسة طعنات. واشتغلتها لي واحد من كرتون كسلا، فقلت يا عبد المطلب انا بفتكر - شوف الفلسفة - انها قضية شرف او حاجة زي دي لانو فيها خمسة طعنات.. ووالله قال لي ما تتسرع ساكت.. تلقاها في سفة سعوط.. وقد كان. وطلع الزول مطعون في مشكلة بسبب كيس سعوط... واذكر برضو انو في فترة كنت شغال براي في المشرحة لانو د. عبد المطلب تعرض لحادث وسافر خارج السودان - والشغل كان زحمة وكان معاي اسماعيل وعم جادو. واذكر انو كنا شغالين أنا واسماعيل برانا وما عندنا مكتب الا تربيزة واحدة والتلاجة جنبها وبنجي الصباح نشوف أرانيك ثمانية وأوامر التشريح وبتلقى الجثث قاعدة بتقرأ ملخص البلاد وتشوف الأهم، عشان تبدأ بيهو. واسماعيل يكون فاتح باب التلاجة عشان اوريهو يجيب ياتو جثة... عاينت لقيتو بيضحك وأنا لسه زول حديث عهد وهو اشتغل في المشرحة (33 سنة) فسألتو مالك...؟ قال لي تصور يا دكتور على الجثة دي أشرت لي وقال ليّ تعال، فضحكت وقلت ليهو القال ليك تعال ده جيبو وتعال نبدأ بيهو. وفعلاً عملنا شغلنا لكن حقيقة أنا ابتديت أخاف بعد اسبوعين.. لانو اسماعيل مات. * خفت ليه؟ انا ربطتها بي قصة الزول ده. وقلت والله انا ربنا خارجني، يعني لو كنت واقف جنبو كان ناداني المصدر : جريدة الصحافة 18/03/2008 http://72.14.205.104/search?q=cache:...n&ct=clnk&cd=1 |
الاستاذ عصمت ...
تناخ كل كلماتي في حضرتك ....وارفع قلمي ....فسلاما سلاما .... شكرا لك فقد حظيت بمعرفة الرجل العلي الكوباني من خلال هذه النافذة والتي احسبها اتتني (همبريد وطراوة )وقد تابع نقدك والذي جاء بردا وسلاما على قلبه ناصع البياض برغم سواده الخارجي واستميحك العذر ان انشر ما كتبه لك من خلال نافذتي ... الرائعة ناعومي شكري أجزله على توصيلك الرسائل..وانشاء الله يا يابا لا تفوتي ..ولا تموتي... برضو يا ريت لو نشرتي رسالتي لكل الأحباء..وأخي أستاذ عصمت ..لك الود وكما قلت للأخت ناعومي..الجميل في نقدك..أسلوبك الراقي وكلامك المهذب..وأجمل شئ إنك نبهتني لما قد ينشر من بعض أخوانا الفنانين في الجلسات والقعدات عن الأغاني بالطلب أو النجر والتفصيل ..وصدقني أنا بعيد من ذلك..لكن أحيانا بتمر بيك لحظات ويسألك هل نص بعالج مشكلة عاطفية معينة..؟؟ فإذا كان بتشوف إذا كان بلائموا ..أما والله ما اظن أنا عندي القدرة على الصناعة..لأني لا زلت (ولد صغير) وتلميذ..وزي قال الأستاذ إبن الأستاذ فتحي مسعد حنفي..أن تسطير كلمات لمعالجة قضية طرف وما قدر يعبر عنها..ممكن تكون ميزة عند بعض الناس.. ويا أخي عصمت..فعلاً هناك خلط كثيرفي الوسط الفني وحتى هناك كثير من الأعمال تنسب لبعض الناس وليس لهم علاقة بها..(والله ناس كتير بفتكروا أني كاتب أغنية الشريف مبسوط مني..؟؟؟!!! يعني تخيل أني اكتب يا هناي وهنايا....؟؟؟!! ) حتى بعض الأغاني الراقية تنسب لي وليس شرف كتابتها ولكن أنا أيضا ملحن ولحنت للحلنقي وصلاح حاج سعيد ,اشرف سيد أحمد وعبد الله البشير..والآن في الطريق عملين لعزمي أحمد خليل ..وعبد العال السيد شاعر أنت المهم والناس جميع ما تهمني...لذا قد تنسب لي أشعار وأغاني دون قصد..لا زال عندي مخزون سنين من أعمال وما طلعتها ..يبقى كيف العمل..؟؟ وانت عقدتنا يا عصمت...؟؟ شكري أجزله على الكلمات الرائعة من الأحباء ...ود مخير ..ومعتصم الطاهر..وفتحي مسعد حنفي..وزي ما قلت أنت ..الشاعر الغنائي أو كاتب الأغاني بظل في حالة بحث عن الأغنية الكاملة ..ولن يصل أبداً..لكن بالجد لو أنا كتبت (وجه القمر سافر) لما كتبت بعدها..شكري لفيصل سعد وذكرى ذلك اللقاء الجميل..وصدقني لوما الغنا وند الشبا.كانالقعدة في الخليج ما وقعت لينا... كتر خيرك يا ناعومي..وانشاء الله ما نخدمك في المشرحة... علي |
شكرا دكتور كوباني علي هذا التواضع الذي ليس غريبا عنك حسب ما سمعته من كل من زاملك أو صادقك واسمح لي أن أهديك أغنية وجه القمر سافر لوالدي المرحوم مسعد حنفي
وجه القمر سافر يضوي شعاعه نور وافر يابدر ساءلك جاوب ليش اخوك نافر ,,,,,,,,,,,,, من حيّه السباع تنتر ومن رمشه السهم طافر ريم يسحبلي سيف لحظه وآخر بالسلاح غافر يادمع ادفق ودع ياقلب سافر شوقي لي ضافر هل بي نظرتك اظفر يامن بالقلوب ظافر ،،،،،،،،،،،،، كاحل طرفك الناعس والجيد بالاثيث غامر مجدولات ايديك صدرك رجح طبق الضامر زيدني من تيهك طايع ليك ياآمر زهرة السامر رفقاً بمجنونك ياليلى بني عامر ،،،،،،،،،،، إعلم لولا ماطرفك للبيض الرقاق شاهر إنسان عيني كاد بغرق في ماء خدك الزاهر ونورك يتوقد لي عيون الخلوق جاهر ظلمي شي ظاهر اشراق الفجر يشهد بي طرفي العليك ساهر ،،،،،،،،،،،، في دولة صباك تايه ياالبي عشقي ماك فاكر اصبح مسكنك قلبي الفي كل ثانيه ليك ذاكر لو رأيت محيك ياالبي نظرتك ماكر ليك اكون شاكر وام الافق بيك تقنع لا تولد شمس باكر ،،،،،،،،،،،، ننظر بانه تتمايل قامة البنفدع خاتر وننظر كيف صدير يقلع تفاحه وردف ناتر وبين ناعساته يضوي الصارم الباتر اللحاظ فاتر لامعه سيوفه تتبارق من كسراته ياساتر ،،،،،،،،،،،،، عاشق محيك الضاوي وعاشق حسنك النادر تقبل لحظك يمرضني وانت على شفاي قادر في هواك قابل تنفيذ امرك الصادر ليّ ليه غادر حلمك جود واتعطّف سارع بي لقاي بادر ،،،،،،،،،،،، وحيات طرفك الناعس وحيات حاجبك الداير وحيات خدك المجلي ومنظوم ثغرك الناير بي لقاك تسمح لو كان في المنام زاير فكري فيك حاير كل ساعه جيش حبك يهجم في الصدير غاير |
العزيزه...نعمات... وانت الرحيق...والعطر.. كم اسعدنى ان تصل كل الزوارق الى ضفاف ذلك الشطء..وتهدأ .وتستكين...ونصل كلنا الى نقطة إلتقاء .مفرحه..ولعل الفضل فى ذلك للعزيز دكتور على كوبانى.فى توازن نهجه.وفى ملمحه الراقى والرائع..وفى زمان تفرده...وهو يشرح الحاله بممبضعه بدراية ومعرفه.وفن.وإتقان... دكتور على الكوبانى.. اضاف الى ادبيات النقاش بعدا اخر مترامى..وخلق هيكلة متناسقه فى.ادب.وفن .وعلم.وارسى قيم جديده لمحاور النقاش..وهذه تحمد له.. ولعل حرصى عليه..وهو يصوغ من تجارب وجدانه تلك الرؤى الجديده والمؤثره والتى تعالج فى رسم عطائها قضايا مهمه فى زمان العشق والاشواق..ونبض الدفق...وذلك الاسترسال المخملى الدافىء.. ولعل .لدكتور على الكوبانى ذلك السحر الاخذ.الذى اذا اطلقه غمر كل خلايا الاحساس بعطرالالفه..ورنين المحبه.وتدفق التواصل.وهذه تكشف عن عمق أنسانية هذا الرجل الفنان.. كم يذكرنى ..وهو يتناول الاشياء .بالراحل المقيم الصديق ...دكتور عوض دكام.. الذى كان ملح طعام مجتمع العاصمه..وبهار لياليها الملاح.. له الرحمه.. العزيزه ....نعمات... مرة ثانيه .ارجو ان تنقلى عنى..اعجابى الشديد به.وبمدراكه المتسعه..وبسمو الروح .وتلك الاريحيه التى تعكس إحكام التربيه..الممزوجه بالعلم والفهم...والمعطونه بتلك الشاعريه العذبه..وفواتح الفن الجميل.. ونحن هنا وهناك.نهبش من نحبهم .ببعض القسوه احيانا...لاننا نريدهم دائما ان يكونووا على مدى كل ذلك الارتقاء... التحيه ....لك ايها الفنان الشاعر الدكتور.. وهاهو الربيع قد اتى الينا فى اوروبا..وكم نامل ان نشهق من انفاسه شذى ذلك العطر الفواح.. وافتكر ..دا مشروع ....قصيدة جديده.. كثيف الاعزاز..عميق التقدير.. |
أبو الوليد وزينوبة السمحة وأخيانهم
أمانا عليك مداخلتي وسرد تأريخ حياتي المملة دي ورأس الخيمة وبتصبح د.علي وبتماسا كوباني وبعد دا تقول اقتباس:
يا أخويا لكن ما نعومة بتستاهل وهي المأمونة والمؤمنة (أحيييا أنا يا مصر) مأمونة توصل السلام والكلام ومؤمنة من عين الحاسد والحسود |
السلام و التحايا الطيبة تصل الجميع هنا ،
و طلب بسيط للاخت نعمات بان تدعوا الاخ دكتور علي كوباني للمشاركة معنا في منبر سودانيات، نتمنى ان تنقلى له هذة المناشدة باسمي و بالنيابة عني و ادينا الرد و الخبر في هذا البوست و لك وافر الشكر و عميق الود و التقدير و الاحترام .. |
[align=center][flash=http://www.youtube.com/v/bMhdr8uHeeM&autoplay=1]WIDTH=400 HEIGHT=350[/flash][/align]
|
اقتباس:
نعنوة ساكنا في إمارة غير التي يسكن فيها د كوباني والحكاية عاوزا سفر والسفر هناك مرهق ولا يخلو من خطورة البتان في شارع الزلط ومن عيونهم البتاكل الزلط آها مسكينة البنية مدينها مشوار تحفو المخاطر ليه ولا لأنو دكتورنا برضو من فصيلة البكايين الأورغيييييييية والله تعرف يا فوفو علي برضو من محبي النت، سابح وسارح فيها على طول ما بستغرب لو نعنوة دعته، يكون بيناتنا هنا تعرف من حظي قريب منو وفي اليوم كدا بنحسو ليك كمين مرة، وبعض مرات كتيرة أدخل عليهو وهو يكون في نص الكتابة، يقوم يرفع ليا يدو، بفهم أنو غرقان، آها أقوم أفتح ليهو موضوع والله د علي دا بي كل الأحاسيس دي، لمن يرفع عينو كدا يعاين ليك يخليك تشوف الموت الأحمر... طبعن عندي معاهو إتفاق؛ أنو يراعي الخوة وبعدين يمرر قصتي دون قطعي وجزر ونجارة متمني يكون معانا هنا ويقُص ويفُص لينا عن نوادرو مع كمال ترباس ليك وليها وليهو المحبة والمودة |
اقتباس:
دكتور علي انا بعرفه كويس بس الزمن طال و بكون نساني ،، و نتمنى و نسعد بوجوده معنا هنا ،، و انا ما بتسلبط فيه و اقول ليك صاحبي .. لكن صادفته كتيرا في المضامير مع ناس العين الظراف ، و لاقيته مع ترباس و مهند اورغن و حضرت معاه قعدة فرفور الكاربة برأس الخيمة و ابداع اغنية "الزيارة" اورغ و جيتار و تدشين و تلحين "كلك حلو" و الشريط عندي للذكرى و التاريخ ... يديكم العافية .. |
اقتباس:
ما تفتكر أنو الحكاية عدم ولاء في عدم حضوري لعرس سيد الإسم وذي ما إتا قلتا هو ياهو وليدي وأخو البنيات ومحمد لكن لزوم السفر والعودة الي السيد "الدوام" ............... بالمناسبة قدر فرحتك، دكتور علي عندو فرحة!!! زفاف اختو وربنا يديم الأفراح للجميع وبرضو عندو فرحة تانية ركت ليهو في كتفو بقى للصفوف يتقدم!!! ما إترفع وبقا مقدم ليكا وليهو أجمل التهاني |
[[B]QUOTE=معتصم الطاهر;100927]نعومة
سلامات .. لا اتفق مع من يقول أن هناك شعر غنائي و غيره .. هناك شعر سهل التلحين والغناء .. وفقا لبحره الخفيف .. وهذه ميزة كتابات د. كوباني .. و د. كوباني انسان مفعم بالجمال منذ عرفناه .. و يملك بيت شعر اسمع عزة لن يستطيع ان يكمله الى قصيدة لذا فهو في رحلة بحث عن بيت ضائع .. و لذا تجده غزير الكتابة .. أما عن .. الشعر الغنائى ..فهو ذاك الذى يُكتب ( يُنجر ) للحن مسبق .. د. كوباتي يملك ملكة وموهبة أن يأخذ حدثا معينا ليصنع به عمل شعرى .. و هذه فطرة يفتقدها كثيرون مِن مَن يكتبون الشعر ( منهم شخصي ) .. و تجد أن خير من يتصف بها فى شعراء المرحلة ( مدني النخلى) .. أما كتابات الكوباني فلي معها عودة .. حتى ذلك الحين .. قولي له نحبك ..[/QUOTE] استاذي المعتصم ... اولا مشكور لحبك للكوباني وليت ينوبنا منه جزء .... ولكن لا اتفق معك فهناك شعر غنائي كما هناك مديح (وليس مدح )وللشعر مستحدثات يوميه ولكنها لم تدون ولم تدرس ...وربما هنالك بحور جديدة ولكنها لم تلحق بسابقتها ...وهناك شعر بمفردات حديثة به مفردات مبهمة تجده عند الشعراء الشباب الان بالسودان ولكن حسب الدراسه كان اخرها الحديث كما نزار وفاروق جويدة واخرين ...ولكن لو نظرنا الى مظفر ورفاقة ربما ترى خلافا لذلك اقول هناك بحور جديدة ومفردات مستحدثة ورموز ...وشعر غنائي حسب ايقاع الزمن والعولمة ... لك شكري نعمات [/B] |
الاعزاء جميعا
مازال مدد الدكتور متواصل معي ....وقد وصلني منه ايميل جميل ومعه اعمال جميله ولكنني لاميتي لم اتمكن من انزالها وربما استعين باحدهم هنا لتوصيلها لكم ...وهو في انتظار الباص ويرد كما اوصاني ولكم جميعا المتعة بالرجل الجميل حقا ...ونص الايميل : ناعومي صباحاتو بيض..عبرك يا راقية أهدي تحياتي وإعزازي بالرائع فيصل سعد واقول ليهو أنساك كيف وأنا قلبي ريدك نزفو.. وشكري على الدعوة الكريمة لهذا المنتدى الرائع بناسو الحلوين..وكتر خير الأستاذ عصمت الجمعنا في هذا البوست...وشكري لود مخير على التهنئة بالرتبة وعقبال ما نبارك ليك الجديد والسمح ...وأهدى ليكم جميعا المرفق إحدى أغنياتي مع الفخيم ترباس ..شوفوا الجمال والرقة والذوق والحلا÷.. كتر خيرك يا بت الأصول.. |
الاعزاء جميعا ...
كان ماسبق نقل لما وصلني من الشفيف الكوباني ...ولكن ... اولا يتفق الجميع باجماع بانه انسان ودود وفكه وجميل حد القول ...اتفقنا ... انا كنت قد سمعت بعض اغانيه ولكنني لم اقف عندها كثيرا له العتبى ولكن بعد ان تشرفت بجميع اعماله واطلاعي عليها جميعها فحقيقة كشاعر فلاغبار عليه وحاشا ان يكون هذا صناعة او سمكرة وغيرها من وسايل معالجة الخراب انه شعر ولا يقل عن شعر اء العهد الذهبي واغنياته الملاك وستهم لا تقل حسب راي الشخصي من شعر خليل فرح (فلق الصباح وعزة والضواحي )وارجو الا اكون .... واعيب عليه فيما ذهب اليه بعد الانتاج والتلحين (لمن اعطى )فقد تعامل لظروف شتى مع فئه تشوبها بعض الشوائب لذلك اصابه ما اصابه ...وحسب علمي تعامل كثيرا مع (ندى القلعة _وطه سليمان _شكر الله _وعاصم ...)وتعامل مع ترباس بسبب الصداقة وكرم الضيافة التي يغدغها عليه عند قدومه المتكرر بالامارات ..وكذلك عصام وعبد الغيوم الشريف والذي لم يسمع باغنياتهم معه احد حتى الان ... وحتى ظهوره كاعلامي لم يوفق فقد كان دايما برفقة من عليهم (اغبرة )واخرها سهرة قناة زول والتي ترافقه ندى واحدى فنانات اثيوبيا ...وهذه الاغبرة التي اعنيها لم اضعها انا ولكنه الشارع السوداني والذي يهلل ويكبر ويستمع ويشتري ولكن في النهاية يقيم ويقول كلمته ولكم ان تنظروا للذين ذكرت من فنانين يشكلون اعلى الانتاج ودخل الشبابيك وعداد الحفلات ولكن في نفس كل واحد منا لهم شى من حتى بما في ذلك الدكتور علي نفسه ولذلك اسرع بالحديث عن تعاونه مع ترباس وعصام وعبد الغيوم لما لهم من مقام فني عالي (نظام قشرة وكدا ) لكم شكري جميعا ... ويا ود مخير انا وانت واحد وكلها كم كلم ولا مشكلة في البترول او العربية (وكم من قريب يغيب وان كان ملء المكان )وانت قريب للكوباني والاتنين انا سعيدة بقربي ليكم ويا ود سعد نزلنا ليك الرد زيك وزي غيرك وما زلت عاجزة عن الكلمات لسيد الكلام والطباع والقلب عصمت العالم ولكم جميعا دايما محبتي التي لا املك غيرها نعمات |
الرائعة...المصابيح الضياء.. نعمات.. كم وددت ان لا نصل الى نهاية لهذا الملف الضخم للشاعر الفنان دكتور على الكوبانى..الذى دلق علينا من افاعيل سحره. ما احلانا الى حالات رعس تتقد ...واحساس دفق يتناثر..وجمع بيننا فى توافق التوازن.. و سقانا من خندريس مدامه المعتق ما اسكر وجداننا وجعلنا نغرق فى غفوة ذلك الحلم الجميل.. و كلماته الشهد تتقطر ..عسل.. والفضل الاكبر يرجع لك. و انت سيدة الحسان. و مقامات ذلك الجمال الذى يستنطق كل وجدان الخلق... و لعل تلك السمات تتدفق من خلال كلماتك التريانة بكل تلك الفيوض ... فساهرنا وادمنا السهر..واطفات شعاعات توهجك كل مصابيح النجوم . وبقت انوار البدر الذى هو انت بكافة ضيائك مزارات من نوريتدفق.. اسرتنا وسكنت خبايا وجداننا .. واقامت فيها.. وكان ذلك بردا وسلاما علينا.. وكما قال الشاعر المهندس فى كليوباترا انت من يغرقون الليل فى ينبوع نور... يا لزمان الجمال حين يلجمنا بفصيح لغته ويسكت كل الافواه بقوة ذلك الاقناع.. ولبابكر وفيصل سعد الشيخ البديع الفنان.. و لعطور خفر المساء وهو يغشى مواقعنا .. و ياتينا بدعاش شواطىء الخليج برغم ازمنة البعد وفوارق المسافات.. وترشنا حبيبات قطراته بندى من نداوة الندى الرعاش .. لكم يا احبة.. و للعزيز دكتور كوبانى الحب والاعزاز والتقدير.. و اضم صوتى الى صوت الجميع بضرورة ان ينضم إلينا دكتور كوبانى فى هذا المحفل برغم مشغولياته الكثيرة نريده ان يطل ويربطنا بتجديد التواصل وتداخل المعرفة.. وتبقى الصداقة قرابة..و نكسب الودين.. بقياسات مدى كل ذلك الحب.. وكل الاحترام .. |
اقتباس:
[align=center][rams]http://sudaniana.com/download.php?action=lsn&id=8173[/rams][/align] |
اقتباس:
1 (بتاعت فوق)؟؟؟؟؟ بحسدك علي السيدة الفضلي زوجك؛ لكن في إحتماليين ممكن يخففو حسدك ليك ويبقى متوية؟ الإحتماليين: الأول؛ السيدة بتعمل بي قولة "السواي ما حداث" وعرفاك طق حنك سسسسسسسسسسسسسسسسسسسسساكت التاني؛ السيدة كايسة اليحلها منك ومتمنيا تملصك (تمقلب ليها) في زولتن تاني (لك في صديقك مثل)،، لكن بالمناسة الراطابية دي واقعة من السماء مية مرة وما بتكون زولة الحبيبة سلوى ولك السلوى في سطورك المتدفقة علي الرهاب ومهدورة سداً :D:D دا ما بحلك 2 بتاعت فوق علي كوباني للذين ما بتابعو التلفزيونات السودانية أو ما مشو مشارح في السودان والإمارات ولي الما شافوهو،، بقول: هو طويل، وعريض، قوي البنية شديد الشكيمة،،، شلولاخ ومعلومة لزوم التوضيح "الجسم البشري في حالة الثبات لالتام، أثقل منه في حالة الصحيان والحركة" دكتور علي كوباني يتلاعب بالجثث بيد واحدة مهما كبرت وثقلة الجثة. هذا المارد الجبار له قلب أرهف من ورق البرنسيس "بعض كبير من القراء يعرفون البرنسيس حق المعرفة" وله حنية وحلم يرهف قلب إبليس ظاتو، ليهو يد إمتدادا طول شارع بيت المال "ما إمتداد بيت المال،، هو ذاتو" وليهو كفا؟؟؟ حق شوقي بدري كفُ سمسمة. لمن لاقيتو، يومي الجيت عينو؟؟ حمرا وشرارة، كان نفسو حااااار طالع من خشاشيمو، بس التقول تنين القديس بطرس (روفي سامحني،، أنا بي شئون الدين،،، عالم بي شئون الدنيا) وسألني؟؟؟ إتا بتعرف عصمت دا الحبيب عصومي تعرف أخوك،، سياستي؛ ....ربا عيالو نكرتك ونكرتا مشيتي لي لندن ولي يومي ذاتو الإتولدتا فيهو، وهي منو أمدرمان ولا السودان؟؟؟ ولا العالم ولا بروفسير نور الجليل ولا حتى سيدي الصادق وحزب الأمة والكيان ما كان كياني حيتنعل... الدكتور الحلو بغريك سلامو وبيشكرك أنك فتحتا الموضوع دا وهو ذي ما بيقولو: راجل فخيم،، عالم،، فنان ليك وليهو وعشان الكلام يحلو؟؟ لي نعنوة التحايا والسلام المودة والمحبة[/color][/size] |
الاخ عصمت ...
لا ارفع راسي من الانحناة تلو الاخرى ... حقيقة تاسرني كلماتك كلها كلها انت تمدح وانت تنتقد وانت ترثي وانت وانت واشهد اهل المنبر جميعهم اني (بت حمود)اسيرة عصمت العالم وتعابيرة ....ودا يا دكتور ود مخير بكاء نسوان عديل رايك شنو عصمت ... اتمنى ان نكون انا وانت قد بلقنا ما رمينا اليه واتمنى ان يكون كوبانينا قد فهم حقيقة ما اثرته هنا شكرا كثيرا على الكلام االجميل ... الدكتور ود مخير ...مع انك رباطابي ولكن ... رغم قربك المكاني والوجداني والمهني من الكوباني ولكنك لم تتحدث لنا عن ما قصدناه نحن هنا يالحبيب بصدد الكوباني الشاعر والاديب والملحن والاعلامي ...وذهبت انت لاوصافه الشكليه وطول يده والميتين وغيرو ونحن اسلفنا القول باجماع بكل صفات الجمال والانسانية له اين انت من الشاعر والملحن ومقدم السهرات رايك هنا بالله وبعدين مالك ومال البكاين انت اسي البتعمل فيه مع الكوباني دا شنو ؟ ما احسن منو البكاء ... للكوباني الجميل العتبى ان قسينا (الجمع للتعظيم ) عليه في النقد ولكم مني جميعا المحبة الصادقة نعمات |
دكتور مخير..الحبيب... ما كتبته عن تدفق نعمات حمود...هو الواقع الرؤيا برغم فواصل الزمن..ومسافات البعاد...فالجمال يتمثل فى محاوره بالف شكل ومشهد..وعصبه تعابير الحروف...فهى تنطق بمقامات سحر الجمال.وتكشف عن نوافير شخصيتها وهى تنثر كل محاور تدفق الجمال...وهو يشع ويبرق ويتصل ..فى انتقال متقدم..تحسه .وهو يخترق . ويتشكل..ويمنح برغم المسافات .الق وهجه....فالجمال رؤيه..وفكره.وتدفق.وملمح..وتصرف..واحساس.ومعنى.. والهام...و ينبوع .ومجمع....وحروف كلماتها اعنى .العزيزه .نعمات.. تنضح بالشهد ..والنشوى..وبين الشهد والنشوى تضجع ..على روعة المشهد كل قوامات تلك الهيكله..البيان.... وهى ..تقتلع مساكن وجدنا..الحقيقه .بانها ...هى ذلك الربيع الاخضر الفواح...بنضار شبابها الغض..وانتشار فتنتها الطاغيه وهى تاسر كل الكون...وتتخلل الوجدان فى انسياب يسبى ..ويخترق .ويحكم.. ..والكوبانى الدكتور الشاعر الفنان..وانت..ونحن..وزمان الناس .ينقع تحت اسر كل تلك السطوه...وكل ذلك السلطان...ونحن نرضى الاسر..بكل الرضا .وكل قناعات الاقتناع... دعونا نرسف فى قيود ...سحر ذلك الجمال...ودعوا صليل قيوده تشجينا بصليلها.ونحن سعداء فرحون.. هنا ترقد النعمه..ودعونا نصطلى بلهيب كل تلك النيران .الاحتراق... وانتم على ضفاف شواطىء الخليج..ونحن هنا تفصلنا الالاف الاميال..بعدا وفراقا..لكن عواصف كل ذلك الجمال الاخذ تهب علينا.وتقتلع وجداننا فى هبوب رياح صرصر عاتيه....دعوها تقتلع مضاربنا وتحملنا معها..الى مدى كل ذلك الارتقاء.... والهة..الجمال...نعمات..هى الاحاطه.. العزيزه نعمات ... هى حقيقة الجمال..المطلق.. وهى شهق الانفاس... وكلكم تفتحون مسارات الرئه..لتستنشق انفاس الجمال..وهو يعيد الحياة والاحياء فى معابر الوجدان... ونعمات... صاغها وصورها..ونفخ فى روحها ...الخالق العظيم...كل اسرار سحر الجمال...مظهرا.وملمحا..وتعاملا..وخلقا..وفتنة ورقة...وادبا ومسلكا وعلما.وثقافه .وفنا... وبعدا...ومنحها من فيوض ابداع اسراه.ما جعلها عشق كل الناس... فهى لها رسالة حب ..تبثها وتبعثها .الى اطراف الكون والى قلوب كل الاحبه... فهى مجرة .لها زمنها.وايقاعها..وبهارجها..ومدار دورانها..وهى تبخ وهج ضيائها على مسام كل الكون..والسعداء من يلتقطون الاشاره..وهم يسدرون فى خيالات احلام المنى..والليل ذلك الساقى لمزن عطايا نفحات الجمال وهى تنسرب من محياها.. الايقونه...نعمات.. ليحفظك الله ..وانت مثل عذارى الحى.... نقول لك..رفقا بالحيارى...!! دكتور بابكر... رايك..شنو؟؟ استرسل ام فى هذا الكفايه...!!!! اقول فولى هذا واستغفر الله لى ولكم... وابعث اشارات المحبه والاعزاز ... اولا لست .. الجمال والسحر والحسن....إنعام..حمود ثم دكتور كوبانى الشاعر الفنان.. ثم دكتور مخير..المساح دمع البكا... ثم صريع الجمال...البديع فيصل سعد الشيخ.,,الذى صرعه ما انبعث من بين الحروف.فارداه قتيلا...فصمت..!! لكم بكل اشراقات الحب..والجمال.. وكل الاحترام |
اقتباس:
|
اقتباس:
اقتباس:
فالواقع فوق أن يوصف والرؤية إن كانت!! تمت..... فقطعاً ستعذر هذا اقتباس:
;):p;):p ليتك تحدثت اليها!!! فهي!! عبر الهاتف نبرات صوتها إن لامست أطراف أذنك أطربته، حتى وإن كنت كويبيد !! لتحول القوس الي فيولين والسهم الي قوس (القوس بتاع الكمان) أنا الحبيب سمعتها مرة في الشارقة وللشارقة في قلبي مكانة، فهي البارقة الجميلة، جمال كل من جاء منها أو خالطها أو حتى ذكرها،،، سمعتها من خلال مكبر الصوت تقدم برنامجا، كان الصوت صافيا، صفا سماء بلدي في مساء الصيف، تبرز لتضيئه أشعة قمر مستدير، أبيض؛ وما أشبه الإثنتين. أخي الحبيب أخاف أن أسترسل، فينقلب عليا الأصدقاء ليعادوني، بتجاوزي لحدود حكرهم وملكهم وأخاف أن أستمر فاستنزف نهر كلاماتي فيجف مورده وأموت ظماء من عطش التعبير عن حالي وأخاف أن ينتحل جسمي من كثير السهر وطول السهاد على ما هو بعيد المنال ويصير أمري مطابقا لقولة الشاعر: [align=center]جسمي إنتحل كييييييييييف العمل[/align] ....... البكاء بكاكم وسبقناكم في الولولة والجرسة:mad::D:D |
| الساعة الآن 05:51 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.